ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ತುಜೆವಿಶಿಂ ಕೆದಿಂಚ್ ಹೆರಾಂಕ್ ಸಮ್ಜಾಂವ್ಕ್ ವಚಾನಾಕಾ, ತುಕಾ ಪಸಂದ್ ಕರ್ಚ್ಯಾಂಕ್ ತಿ ಗರ್ಜ್ ನಾ, ತುಕಾ ಪಸಂದ್ ಕರಿನಾತ್ಲ್ಲೆ ಕಶೆಯ್ ತುಕಾ ಪಾತ್ಯೆಂವ್ಚೆನಾಂತ್’
ಕುಂಡೊ ಚಳ್ವಳೆಕ್ ಥೆಂಕೊ ಜಾಯ್
ವರಸ್ : 2007
ಅಂಕೊ : 40
ಮಯ್ನೊ : ಅಕ್ತೋಬರ್
ಸಂಪಾದಕೀಯ್ - 40.
ವಲ್ಲಿ ಕ್ವಾಡ್ರಸ್
ಕೊಂಕ್ಣಿ ಭಾಸ್ ಇಸ್ಕೊಲಾಂನಿ ರಿಗೊನ್ ಕಾಂಯ್ ವರ್ಸ್ ಜಾಲೆಂ. ಕೊಂಕ್ಣಿ ಭಾಸೆಚ್ಯಾ ಸದ್ದ್ಯಾಚ್ಯಾ ಪರಿಗತೆಚೆರ್ ಹರ್ಧೆಂ ಪೆಟುನ್ ಘೆಂವ್ಚಿ ಪರಿಗತ್ ಅಜೂನ್ ಉದೆಂವ್ಕ್ ನಾ ಮ್ಹಳ್ಳೆಂ ಉತಾರ್ ಭೋವ್ ನಿಶ್ಟುರ್ ದಿಸತ್, ಪುಣ್ ಸತ್ ಉತಾರ್ ಹೆಂ. ಆಮ್ಚಿಂ ಭುರ್ಗಿಂ ಕಿತ್ಲೆಂ ಕೊಂಕ್ಣೆಕ್ ವೆಂಗ್ತಿತ್, ಭುರ್ಗ್ಯಾಂಚಿಂ ವ್ಹಡಿಲಾಂ ಹ್ಯಾ ಕೊಂಕ್ಣೆಕ್ ಕಿತ್ಲೆಂ ಗಳ್ಸಿತಿತ್ ಮ್ಹಳ್ಳೆಂ ಪುಡ್ಲೊ ವೇಳ್-ಕಾಳ್ ಧಾಖಯ್ತ್ ಶಿವಾಯ್ ಹಾಂವ್ ಕಾಂಯ್ ಬೊಲ್ಮೆಂ ಸಾಂಗೊಂಕ್ ವಚಾನಾ. ಹ್ಯಾ ಪರಿಗತೆಂತ್ ಕೊಂಕ್ಣೆಂತ್ ಉದೆಲ್ಲಿ ’ಕುಂಡೊ ಚಳ್ವಳ್’ ಮಾತ್ರ್ ಮ್ಹಜ್ಯಾ ಗಮನಾಕ್ ವೆತಾ.
ಸತ್ ಸಾಂಗ್ಚೆಂ ತರ್, ಕೊಂಕ್ಣೆಕ್ ಜೊಕ್ತ್ಯಾ ವೆಳಾರ್ ಹಿ ’ಚಳ್ವಳ್’ ಸುರು ಜಾಲ್ಯಾ. ತಿ ಕೊಣೆ ಸುರು ಕೆಲ್ಯಾ? ತಾಂಚಿ ಸಾಹಿತಿಕ್ ಅರ್ಹತಾ ಕಿತ್ಲಿ? ತಾಂಚಿ ಪ್ರಾಯ್ ಕಿತ್ಲಿ? ತಾಂಚ್ಯಾ ಚೆಪ್ಯಾಚೆರ್ ಕಿತ್ಲಿಂ ಪಾಕಾಂ ಆಸಾತ್ ಮ್ಹಳ್ಳೊ ನಿಯಾಳ್ ಸದ್ದ್ಯಾಕ್ ಕರಿನಾಸ್ತಾಂ, ಜರ್ ಕೊಂಕ್ಣೆಚ್ಯಾ ಭಲಾಯ್ಕೆಭರಿತ್ ವ್ಹಾಡಾವಳೆಚ್ಯಾ ನದ್ರೆನ್ ಸಾಂಗ್ಚೆಂ ತರ್, ಹಿ ಚಳ್ವಳ್ ಮಾತ್ಶಿ ಅಡ್ಹೂಕ್ ಲಾಗತ್, ಪುಣ್ ಕೊಂಕ್ಣೆಕ್ ಭೋವ್ ಗರ್ಜೆಚಿ ಮ್ಹಣ್ಚ್ಯಾಂತ್ ಮ್ಹಜ್ಯಾ ಮತಿಂತ್ ಕಸ್ಲೊಚ್ ದುಭಾವ್ ನಾ.
ಕೊಂಕ್ಣಿ ಪತ್ರಿಕೋಧ್ಯಮ್, ತಶೆಂಚ್ ಸಾಹಿತ್ಯ್ ಅಜೂನ್ ಜಿಯೆಲಾಂ ವಾ ಜಿಯೆತಾ ತರ್ ಕೊಣಾಚ್ಯಾಗೀ ದಯೆನ್, ಕೊಣಾಚ್ಯಾಗೀ ಭಿರ್ಮತೆನ್, ವಾ ಕೊಣಾಚ್ಯಾಗೀ ಕಾಕುಳ್ತಿನ್. ಆನಿ ಹ್ಯಾ ಸಿಂತಿಮೆಂತಾಳ್ ಪರಿಗತೆಂತ್ ’ಕೊಂಕ್ಣಿ’ ಕೊಣಾ ಕೊಣಾಚೊ ತುರುಪಾಚೊ ಎಕ್ಕೊ ಜಾಲಾ. ಕೊಣೆಂ ತೆಂಪಾಧಿಂ ಗಳಯಿಲ್ಲ್ಯಾ ಎಕಾ ಬಿಟಿಯೆಕ್ ಸಯ್ತ್ ಪ್ರಸಾದ್ ಕರ್ಚಿಂ ಆಸಾತ್, ಆನಿ ಸೆಂವ್ಚಿಂಯ್ ಆಸಾತ್. ತೆಚ್ಚ್ ಪರಿಂ ಕೊಣೆಂ ಯಥೇಶ್ಟ್ ಮಾಪಾನ್ ಬರಯಿಲ್ಲೆಂ ಸರ್ವ್ ಸಾರೆಂ ಮ್ಹಣ್ಚೆ ವಿಧ್ವಾನ್ ಪಂಡಿತ್ಯಿ ಆಸಾತ್. ಹ್ಯಾ ಪರಿಗತೆಂತ್ ನಿಜಾಯ್ಕೀ ಏಕ್ ಅರ್ಥಾಭರಿತ್, ಕೊಂಕ್ಣೆಚ್ಯಾ ಮಟ್ಟಾಕ್ ಭಲಾಯ್ಕೆಭರಿತ್ ವಾತಾವರಣ್ ರುತಾಂ ಕರಿಜಾಯ್, ಕೊಂಕ್ಣಿ ಸಾಹಿತ್ಯಾಚೆಂ ಮಟ್ಟ್ ಚಡಾಜಯ್, ಕೊಂಕ್ಣಿ ಸಾಹಿತ್ಯ್ ಕೊಂಕ್ಣಿ ವಾಚ್ಪ್ಯಾಂಕ್ ಪಾವಜಯ್ - ಪುಣ್ ಪಯ್ಲೆಂ ಸವಾಲ್ ಉದೆತಾ; ಮಾಜ್ರಾಕ್ ಘಾಂಟ್ ಭಾಂದ್ಚಿ ತರ್ಯೀ ಕೊಣೆಂ? ಕೊಣ್ ತೆ ವಾಚ್ಪಿ? ಖಂಯ್ ಆಸಾತ್? ಕಿತೆಂ ಕರ್ತಾತ್? ಕೊಣ್ ತೆ ಮಟ್ಟ್ ಚಡಯ್ತೆಲೆ? ಕಸಲೆಂ ತೆಂ ಮಟ್ಟ್? ಎದೊಳ್ ತಾಣಿಂ ಕಿತ್ಲೆಂ ಮಟ್ಟ್ ಚಡಯ್ಲಾಂ? ಆನಿ ಕಸಲೆಂ ತೆಂ ಮಾಪ್ ಜೆಂ ಮಟ್ಟ್ ಮಾಪ್ಚೆಂ?
ಸತ್ ಸಾಂಗ್ಚೆಂ ತರ್ ಮ್ಹಾಕಾ ಭುರ್ಗ್ಯಾಪಣಾರ್ ಆಯ್ಕಲ್ಲ್ಯಾ ಎಕಾ ಲ್ಹಾನ್ ಕಾಣ್ಯೆಚೊ ನಿಯಾಳ್ ಯೆತಾ (ಹಾವೆಂ ಚೂಕ್ ಕಾಣಿ ಆಯ್ಕಾಲ್ಲಿ ತರ್ ವಾ ಸಮ್ಜಾಲ್ಲಿ ರೀತ್ ಚೂಕ್ ತರ್ ಮಾಫಿ ಆಸೊಂ). ಏಕ್ ರೆಡೊ ಎಕಾ ಜಾಗ್ಯಾರ್ ನಿದೊನ್ ಆಸ್ಲೊ ಕಂಯ್. ತಾಚೊ ಧನಿ ಯೇವ್ನ್ ತ್ಯಾ ರೆಡ್ಯಾಕ್ ಆಪ್ಲ್ಯಾ ಬೆತಾನ್ ಏಕ್ ಮಾರ್ತಾ, ತರ್ಯೀ ತೊ ರೆಡೊ ಉಟಾನಾ, ದುಸ್ರೊ ಮಾರ್ ಮಾರ್ತಾನಾ ರೆಡೊ ಸ್ವಪ್ಣಾಂತ್ ಕೊಣೆಂಗೀ ಕೊಣಾಕ್ಗೀ ಮಾರ್ಚೆಂ ಆಯ್ಕತಾ, ತಿಸ್ರೊ ಮಾರ್ ಮಾರ್ತಾನಾ ತಾಕಾ ಲಾಗ್ಸಾರ್ಚ್ಚ್ ಕೊಣೆಂಗೀ ಕೊಣಾಕ್ಗೀ ಮಾರ್ಚೆಂ ಆಯ್ಕತಾ. ಚೊವ್ತೊ ಮಾರ್ ಮಾರ್ತಾನಾ ತಾಕಾ ದುಭಾವ್ ಯೆತಾ ಕಾಂಯ್ ಅಪ್ಣಾಕ್ ಪುಣಿ ತೊ ಮಾರ್ ಪಡ್ಲಾಗೀ ಮ್ಹಣ್. ಪಾಂಚ್ವೊ ಮಾರ್ ಪಡ್ತಾನಾ ರೆಡ್ಯಾಕ್ ಸಮ್ಜತಾ - ಹೋ! ಹೆ ಮಾರ್ ಪಡೊನ್ ಆಸ್ಚೆ ಅಪ್ಲ್ಯಾ ಪಾಟಿಕ್ಚ್! ಆನಿ ರೆಡೊ ಉಟ್ತಾ. ಆಮ್ಚೊ ಕೊಂಕ್ಣಿ ಲೋಕ್ ಕಾಂಯ್ ಹ್ಯಾ ರೆಡ್ಯಾಕ್ ಸೊಡ್ನ್ ಆಸಾ? ಕವಿ ಜೊಸ್ಸಿ ಪಿಂಟೊಚ್ಯಾ ಉತ್ರಾಂನಿ ಸಾಂಗ್ಚೆಂ ತರ್ "ಆಮ್ಚಿ ನೀದ್ ಕೆದ್ನಾಂಗೀ ಸುಟಾಜೆ ಆಸ್ಲಿ, ಅಜೂನ್ ಆಮಿ ಘೊರೆವ್ನ್ ಆಸಾಂವ್".
’ಮಟ್ಟ್’ ಹೊ ಭೋವ್ಶಾ ದೆವಾನ್ ಆದಾಂವ್ ಆನಿ ಯೆವೆಕ್ ರಚ್ತಾನಾ ರಚ್ಲ್ಲೊ ಸಬ್ಧ್. ಜೊ ಕ್ರಿಸ್ತಾನ್ ಜಲ್ಮೊನ್ ಯೆಂವ್ಚ್ಯಾ ಕಾಳಾರ್ ಆಸ್ಲ್ಲೊ, ಆತಾಂಯ್ ಆಸಾ ಆನಿ ಫುಡೆಂಯ್ ಆಸ್ತಲೊ. ತರ್ಯೀ ಅಜೂನ್ ಖಂಚ್ಯಾಯ್ ಪುನೆಗೆಲ್ಲ್ಯಾನ್ ತೆಂ ಮಟ್ಟ್ ಸೊಧುನ್ ಕಾಡ್ಲ್ಲೆಂಯ್ ನಾ, ಅನಿ ಮುಖಾರ್ಯೀ ಕಾಡ್ತೆಲೆ ಮ್ಹಳ್ಳೊ ಭರ್ವಸೊ ಮ್ಹಜ್ಯಾ ಆಶಾವಾದಿ ಮತಿಕ್ ಸಯ್ತ್ ನಾ. ಪುಣ್ ಕೊಂಕ್ಣೆಂತ್ ಆಸ್ಚೆಂ ಸರ್ವ್ ಮಟ್ಟಾಚೆಂ ಮ್ಹಣ್ ಹಾಂವ್ಯೀ ಒಪುನ್ ಘೆನಾ. ಹ್ಯಾ ಚಿಂತ್ಪಾಚೆರ್ ಇಲ್ಲೊ ಆಟೊವ್ ಕರ್ಯಾಂ ಮ್ಹಣ್ ಮ್ಹಾಕಾಯ್ ಭಗ್ತಾ.
ಕೊಂಕ್ಣಿ ಪತ್ರಿಕೋಧ್ಯಮ್ ಜರ್ ಕೊಣಾ ಕೊಣಾಚ್ಯಾ ದಯೆನ್, ಭಿರ್ಮತೆನ್ ಚಲ್ತಾ ತರ್ - ಹ್ಯಾ ಪತ್ರಾಂನಿ ವೃತ್ತಿಪರತಾ ಸಾಹಿತ್ಯ್ ಕಶೆಂ ಆಶೆವ್ಯೆತಾ? ಸುತಾಕ್ ದೀಂವ್ಕ್ ತಾಂಕ್ ನಾಸ್ಚೆ ಕೊಟಾಕ್ ಕಶೆ ದಿತೆಲೆ? ದೆಕುನ್ ಆಮ್ಚ್ಯಾ ಕೊಂಕ್ಣೆಂತ್ ಮಟ್ವೆಂ ಬರಯಿಲ್ಲೆಂ ಸರ್ವ್ ಕವಿತಾ ಜಾತಾ, ಲಾಂಬ್ ಬರಯಿಲ್ಲೆಂ ಕಾಣಿ ಜಾತಾ, ಅನಿಕ್ಯೀ ಲಾಂಬ್ ಬರಯ್ಲ್ಯಾರ್ ಕಾದಂಬರಿ. ಆನಿ ಹೆಂ ಬರಯಿಲ್ಲೆ ಕೊಣ್ ’ಕವಿರಾಯ್’ ತರ್ ಕೊಣ್ ’ಕಾಣ್ಯಾಂಚೆ ರಾಯ್’, ಆನಿ ಕೊಣ್ ’ಕಾದಂಬರಿಚೆ ರಾಯ್’. ಸರ್ವಾಂಕ್ ಪಾಟೊಸ್ ಆಸಾ, ಉರ್ಮಾಲ್ ಆಸಾ, ಮುಂಡಾಸ್ ಆಸಾ, ಅಭಿಮಾನಿ ಪಂಗಡ್ ಆಸಾ, ಶಾಲಾಂ ಆಸಾತ್, ಮಾನ್-ಸಮ್ಮಾನ್ ಆಸಾತ್, ಫುಲಾಂ ಫಳಾಂ ಆಸಾತ್ - ಇತ್ಲೆಂಚ್ ಕಿತ್ಯಾಕ್? ವೆವೆಗ್ಳೆ ಪುರಸ್ಕಾರ್ಯೀ ಆಸಾತ್. ಆನಿ ಹ್ಯಾ ಪರಿಗತೆಂತ್ ಸರ್ವಾಂ ಸವೆಂ ಆಮಿಂಯ್ ’ಗೋವಿಂದಾ’ ಮ್ಹಳ್ಳೆಶಿವಾಯ್ ನಿರ್ವೋಗ್ ಆಸಾ?
ಆಯ್ಲೆವಾರ್ ಹಾಂವ್ ಮಟ್ವ್ಯಾ ಆವ್ದೆಚ್ಯಾ ರಜೆಂತ್ ಗಾಂವಾಕ್ ಗೆಲ್ಲೊಂ, ರಾತ್ಭರ್ ಮಿತ್ರ್ ಎಚ್ಚೆಮಾಚ್ಯಾ ಘರಾಂತ್ ತರ್ಕ್ ಸಂವಾದ್, ತಾಚೆ ಸವೆಂ ಧಾವೊ ಮಾಂಡ್ಪಿ ವಿಲ್ಸನ್ ಕಟೀಲ್. ಆಮ್ಚ್ಯಾ ತರ್ಕಾಚೊ ವಿಶಯ್ ಕೊಂಕ್ಣೆಂತ್ ಕುಂಡೊ/ಸಾರೆಂ ಛಾಪ್ಚೆವಿಶಿಂ. ಆನಿ ಅಪ್ರಾಧಿ ಕದೆಲಾರ್ ಹಾಂವ್ ಆನಿ ಮ್ಹಜೆರ್ ಕಠೀಣ್ ರಿತಿರ್ ಅಪ್ರಾಧ್ ಮಾಂಡ್ಲ್ಲೆ ಮ್ಹಜ್ಯಾ ಕಾಳ್ಜಾಕ್ ಲಾಗ್ಸಿಲೆ ದೋಗ್ ಅಮಿಗ್. ತಾಂಚಿ ಫಿರ್ಯಾದೆಕ್ ಹಾಂವ್ ಸಂಪೂರ್ಣ್ ಕಬೂಲ್ ಜಾಲೊಂನಾ ತರ್ಯೀ ತಾಣಿಂ ಸಾಂಗ್ಲ್ಲೆಂ ಸರ್ವ್ ಪೊಲ್ಲು (ತಾಂದುಳ್ ನಾತ್ಲ್ಲೆಂ ಭಾತ್) ಮ್ಹಣ್ಚೊ ಮ್ಹಜೊ ಇರಾದೊ ನ್ಹಯ್. ಮ್ಹಜಿ ಜವಾಬ್ ಜಾವ್ನಾಸ್ಲಿ ಹಿ;
1. ಹಾವೆಂ ಯಾ ಖಂಚ್ಯಾಯ್ ಸಂಪಾದಕಾನ್ ’ಪತ್ರ್ ಚಲಂವ್ಚಿಂ’ ಎಕ್ಲ್ಯಾ ದೊಗಾಂ ವಿಮರ್ಶಕಾಂ ಖಾತಿರ್ ನ್ಹಯ್ (ಎಕ್ಲೆ ದೋಗ್ ನಿಶ್ಟುರ್ ಉತಾರ್ ತರ್ ಹಾಂವ್ ಧಾ-ಪಂದ್ರಾ ಮ್ಹಣ್ತಾಂ)
2. ಹೆ ಧಾ ಪಂದ್ರಾ ವಿಮರ್ಶಕ್ (ಮ್ಹಾಕಾ ಧರ್ನ್), ವರ್ಸಾಕ್ ಕಿತ್ಲ್ಯೊ ಕಾಣ್ಯೊ ಬರಯ್ತಾತ್? ಕಿತ್ಲಿಂ ಕವಿತಾ ಬರಯ್ತಾತ್? ಏಕ್ ಪತ್ರ್ ಏಕ್ ವರ್ಸ್ಭರ್ ಚಲಂವ್ಕ್ ಹಾಣಿಂ ಬರಯಿಲ್ಲ್ಯೊ ಕಾಣ್ಯೊ ವಾ ಕವಿತಾ ಪುರೊ?
3. ಹಾಂವ್ ಕೊಂಕ್ಣೆಚೆಂ ಮಟ್ಟ್ ಸಾಹಿತ್ಯ್ ರಾಕೊನ್ ಬೊಸೊನ್ ಕೊಣಾಯ್ಚಿಂಯ್ ಬರ್ಪಾಂ ಮಟ್ಟ್ ನಾಂತ್ ಮ್ಹಣೊನ್ ಜರ್ತರ್ ಪರ್ಗಟ್ ಕರಿನಾಯೆ ರಾವ್ಲೊಂ ತರ್ - ತಿಂ ಬರ್ಪಾಂ ಕೊಂಕ್ಣೆಂತ್ ಹೆರಾಂ ಪರ್ಗಟ್ ಕರಿನಾಂತ್ ಮ್ಹಳ್ಳಿ ನಿಘಂಟ್ ಆಸಾ? ಅಶೆಂ ಜಾಂವ್ಕ್ ರಾಕೊನ್ ಆಸ್ಚೆ ಕುರ್ಲ್ಯಾ ಸ್ವಭಾವಾಚೆ ಸಯ್ತ್ ಆಮ್ಚೆ ಭಂವ್ತೊಣಿ ಧಾರಾಳ್ ಮಾಪಾನ್ ಆಸಾತ್. ಕಾಂಯ್ ಅಶೆಂ ಕೆಲ್ಯಾರ್ "ಹಾಕಾ ಆತಾಂ ಹಾಂಕಾರ್ ಆಯ್ಲಾ, ಕಾಂಯ್ ಏಕ್, ದೋನ್ ಪ್ರಶಸ್ಥ್ಯೊ ಲಾಭ್ಲ್ಯಾತ್ ದೆಖುನ್ ಹಾಚಿ ಮಿಂಜಾಸ್ಕಿ ಪಳೆ, ಹಾವೆಂ ಬರಂವ್ಕ್ ಸುರು ಕರ್ತಾನಾ ಹೊ ಜಲ್ಮೊಂಕ್ ನಾ, ಆತಾಂ ಮ್ಹಾಕಾ ಮಟ್ಟ್ ಶಿಕಯ್ತಾ" ಅಶೆಂ ಚಿಂತ್ಚೆಂ ಆಮ್ಚೆ ಮಹಾನ್ ಕೊಂಕ್ಣಿ ಬರವ್ಪ್ಯಾಂಚೆ ಕಿತ್ಲೆ ಧಾಖ್ಲೆ ಜಾಯ್ಜೆ?
4. ಕೊಂಕ್ಣಿ ಸಾಹಿತ್ಯಾಂತ್ ಕುಂಡೊ/ಶೆಣ್ ಭರೊಂಕ್ ಫಕತ್ತ್ ಬರವ್ಪಿ ಕಾರಣ್? ಹಾಂತುಂ ಸರ್ವ್ ಸಂಪಾದಕಾಂಚೊ ಹಾತ್ ನಾ? ತರ್ ವಿಶೇಸ್ ಅಂಖೆ ಪಳೆ ಆನಿ ತುಂಚ್ ಸಾಂಗ್, ’ಭಾತ್ ಕಾಂಡ್ಲ್ಯಾರ್ ತಾಂದುಳ್ ಜಾತಾ’ ಮ್ಹಳ್ಳ್ಯಾ ವರ್ಗಾಚ್ಯೊ ಕಿತ್ಲ್ಯೊ ಕವಿತಾ ಆಸಾತ್ ಮ್ಹಳ್ಳೆಂ. ವಾ ಭಾರತಾಕ್ ಸ್ವಾತಂತ್ರ್ ಕಶೆಂ ಲಾಭ್ಲೆಂ ಮ್ಹಳ್ಳಿ ಚರಿತ್ರಾ ಸಾಂಗ್ಚ್ಯೊ ಕವಿತಾ ನಾಂತ್ಗೀ ಮ್ಹಣ್.
ಅಖ್ರೇಕ್ ಮ್ಹಜೆಂ ಫಯ್ಸಲ್ ದಿಲೆಂಚ್; ಹಾಂವ್ ತುಮ್ಚೊ ಅಮಿಗ್ ಜಾವ್ನ್ ತುಮ್ಚೆ ವಾದ್ ಮಾಂಧ್ತಾಂ, ಏಕ್ ಕವಿ ಜಾವ್ನ್ ತುಮ್ಚೊ ವಾದ್ ಒಪ್ತಾಂ, ಪುಣ್ ಏಕ್ ಸಂಪಾದಕ್ ಜಾವ್ನ್ ಹಾಂವ್ ತುಮ್ಚೊ ವಾದ್ ಮಾಂದಿನಾ. ಸಾಹಿತಿಕ್ ಮಟ್ಟ್ ಎಕಾಚ್ಚ್ ದಿಸಾ, ಎಕಾಚ್ ಖಿಣಾನ್ ಬದ್ಲಿಯೆತ್ ಮ್ಹಣ್ಚೆಂ ಚಿಂತಾಪ್ ಕಿತ್ಯಾಕ್ಗೀ ಮ್ಹಾಕಾ ಪಿಶೆಂ ಮ್ಹಳ್ಳೆಪರಿಂ ದಿಸ್ತಾ.
ಸಾಹಿತಿಕ್ ಮಟ್ಟ್ ಸುಧ್ರಾಪ್ ಏಕ್ ನಿರಂತರ್ ಪ್ರಕ್ರಿಯಾ, ಹಳ್ತಾರ್ ಜಾತಾ, ಜಾಯ್ಶೆಂ ಕರ್ಯೆತಾ. ಪುಣ್ ತೆಂ ಕಾಂಯ್ ಎಕ್ಲ್ಯಾ ದೊಗಾಂಯ್ಚೆಂ ಕಾಮ್ ನ್ಹಯ್. ಸರ್ವಾಂನಿ ತಾಕಾ ಥೆಂಕೊ ದೀಜಾಯ್. ಆನಿ ತಾಚಿ ಗರ್ಜ್ ಪಯ್ಲೆಂ ಹರ್ಯೆಕ್ಲ್ಯಾಕ್ ಗರ್ಜೆಚಿ ಮ್ಹಣ್ ಭಗಾಜಯ್ ಶಿವಾಯ್ ವಚೊನ್ ಕೊಣಾ ಕೊಣಾಕ್, ತುವೆಂ ಎದೊಳ್ ಬರಯಿಲ್ಲೆಂ ಸರ್ವ್ ಸಾರೆಂ, ವಾ ಕುಂಡೊ ಮ್ಹಣ್ತಚ್ ಕಾಂಯ್ ಮಟ್ಟ್ ಚಡ್ತಾ? ಅಸಲೆಂ ಅಣ್ವೆಂ ಚಿಂತಾಪ್ ಚಿಂತ್ಚೆ ಪಂಡಿತ್ ಕೊಣ್ಯ್ ಆಸಾತ್ ತರ್ ತೆಂ ಖರೆಚ್ ಜಾವ್ನ್ ಪಿಶೆ.
ಕೊಂಕ್ಣಿ ಸಾಹಿತ್ಯಾಕ್ ಕಾಂಯ್ ಭಾರತಾಂತ್ಲೆಂ ಉಂಚ್ಲೆಂ ಸಾಹಿತ್ಯ್ ಮ್ಹಣ್ ಹಾಂವ್ ಮಾಂದಿನಾ, ಪುಣ್ ಕೊಂಕ್ಣೆಂತ್ ಆಸ್ಚೆಂ ಸರ್ವ್ ’ಶೆಣ್’ ಮ್ಹಣ್ ಸಾಂಗ್ತೆಲ್ಯಾಂನಿ ’ಉಂಡೊ’ ರಚುನ್ ಧಾಖಯಿಲ್ಲೆಂ ತರ್ ವಾದ್ ಆಸಾವೆ? ಮ್ಹಜ್ಯಾ ಮಟ್ವ್ಯಾ ಆವ್ದೆಚ್ಯಾ ರಜೆಂತ್ ಹಾವೆಂ ಪಾರ್ಕಿಲ್ಲೆಂ ಅಡ್ಹೂಕ್ ಸತ್ ಹೆಂ ಜಾವ್ನಾಸಾ, ಚಡಾವತಾಂನಿ ಚಿಂತ್ಚೆಂ ಇತ್ಲೆಂಚ್ ’ಅಪುಣ್ಂಚ್ ವ್ಹಡ್ಲೊ, ಆನಿ ಹೆರಾಂ ಸರ್ವಾಂ ಮೂರ್ಖ್’. ಅಪುಣ್ ವ್ಹಡ್ ಮ್ಹಣ್ ಚಿಂತುಂಕ್ ಸರ್ವಾಂಕ್ ಹಕ್ಕ್ ಆಸಾ, ತೆಂ ಕಾಂಯ್ ಹಾಂವ್ ನೆಗಾರ್ ಕರಿನಾ, ಪುಣ್ ಆಮಿ ವ್ಹಡ್ ಮ್ಹಣ್ ಧಾಖಂವ್ಕ್ ಹೆರಾಂಕ್ ಹಲ್ಕ್ ಕರ್ಚಿ ಏಕ್ಚ್ ವಾಟ್?? ಹೆಂ ಕಸಲೆಂ ಚಿಂತಾಪ್? ಹೆಂಚ್ಗೀ ಮಟ್ಟ್?
ಕೊಂಕ್ಣೆಂತ್ ಕುಂಡೊ ಚಳ್ವಳೆಕ್ ತ್ರಾಣ್ ಲಾಭಜಯ್ ತರ್, ಸರ್ವಾಂನಿ ಹಾಚೆರ್ ಮೆತೆರ್ ಜಾಯ್ಜಯ್. ಹಾಂಗಾಸರ್ ಪಯ್ಲೆಂ ಆಪ್ಲ್ಯೆ ಗುಪಿತ್ ಇರಾದೆ (Hidden agenda) ಸಾಂಡಿಜಾಯ್. ಕುಂಡೊ/ಸಾರೆಂ ಫಕತ್ತ್ ನಿಬಾಕ್ ಘೆವ್ನ್ ಕೊಣಾ ಕೊಣಾಚೆರ್ ಅಪ್ಲೊ ಜಾಳ್ ವೊಂಕ್ಚೊ ನ್ಹಯ್. ದುರ್ಭಾಗ್ಪಣಾಕ್ ಮ್ಹಾಕಾ ಅಸಲೆಚ್ಚ್ ಧಾಖ್ಲೆ ಆಯ್ಲೆವಾರ್ ಮೆಳ್ಳೆ. ಸತ್ ಸಾಂಗ್ಚೆಂ ತರ್ ಆಮ್ಚೊ ಇರಾದೊ ಪ್ರತ್ಯಕ್ಶ್ ಜಾವ್ನ್ ವ ಪರೋಕ್ಶ್ ಜಾವ್ನ್ ಕೊಣಾಯ್ ಎಕಾ ವರ್ಗಾಕ್ ಹಲ್ಕುಂಚೊ ಭಿಲ್ಕುಲ್ ನ್ಹಯ್. ಪುಣ್ ಥೊಡೆ ಪಾವ್ಟಿಂ ಸಯ್ರ್ಯಾಂಕ್ ದಿಂವ್ಚಿ ಮರ್ಯಾದ್ ತೊ ಸಮ್ಜೊಂಕ್ ಸಕಾನಾಸ್ತಾಂ, ವಾಡ್ಲ್ಲ್ಯಾ ಬೊಶಿಯೆಂತ್ಲೆಂ ಜೇವ್ನ್ ತೆಚ್ಚ್ ಬೊಶಿಯೆರ್ ಮುತೊನ್ ವೆತಾನಾ ಸೊಸ್ಲ್ಲ್ಯಾ ಶಿವಾಯ್ ಹೆರ್ ನಿರ್ವೋಗ್ ಆಸಾ? ಪುಣ್ ವಿಪರ್ಯಾಸಾಚಿ ಗಜಾಲ್ ಮ್ಹಳ್ಯಾರ್ ತಶೆಂ ವಾಡ್ಲ್ಲ್ಯಾ ಬೊಶಿಯೆರ್ ಮುತ್ಲ್ಲ್ಯಾಂಕ್ ಆಲ್ತಾರೆಚೊ ಮಾನ್ ಮೆಳ್ತಾನಾ. ಆನಿ ಅಸಲ್ಯಾ ಆಣ್ವ್ಯಾಂಚಿ ಸಯ್ತ್ ಪುಜಾ ಚಲ್ತಾನಾ.
ಅನ್ಯೇಕಾ ಕಾಣ್ಯೆಚೊ ನಿಯಾಳ್ ಕರ್ತಾಂ; ಆದಿಂ ಎಕ್ಲೊ ಭುರ್ಗೊ ಹಾಗ್ತಾನಾ ಭಾಕ್ರಿ ಖಾತಾಲೊ ಕಂಯ್, ತವಳ್ ಎಕ್ಲ್ಯಾನ್ ತಾಕಾ ಸಮ್ಜಾಯ್ಲೆಂ ಕಂಯ್ ’ಅಳೆ ಭಾವಾ ಹಾಗ್ತಾನಾ ಭಾಕ್ರಿ ಖಾಯ್ನಾಕಾ’ ಮ್ಹಣ್. ತವಳ್ ತೊ ಭುರ್ಗೊ ಜಾಪ್ ದೀವ್ನ್ ಮ್ಹಣಾಲೊ ಕಂಯ್ "ಹಾಂವ್ ಬುಡವ್ನ್ ಖಾತಾಂ - ಕಿತೆಂ ಕರ್ತಾಯ್?". ಆತಾಂ ಆಮ್ಚ್ಯಾ ಕೊಂಕ್ಣೆಂತ್ಯೀ ಅಶೆಂ ಬುಡವ್ನ್ ಖಾತಾಂ ಮ್ಹಣ್ತೆಲ್ಯಾ ಪಂಡಿತಾಂಕ್ ಹಾವೆಂ ವ ಕೊಣೆಂಯ್ ಕಿತೆಂ ಕರುಂಕ್ ಸಾಧ್ಯ್? ತಾಂಕಾಂ ತಾಂಚೆ ತಿತ್ಲ್ಯಾಕ್ ಸೊಡ್ನ್ ಪಯ್ಸ್ ರಾವೊನ್ ಪಳೆಂವ್ಚೆಂಚ್ ಬರೆಂ ನೆ?
ಭೋವ್ಶಾ ಹಾವೆಂಯ್ ತಿಚ್ಚ್ ವಾಟ್ ವಿಂಚ್ಚಿ ಬರಿ.
ದೇವ್ ಬರೆಂ ಕರುಂ, ಕಿತೆಂಯ್ ಜಾಂವ್ ಪುಣ್ ಕೊಂಕ್ಣೆಚೆಂ ಬರೆಂ ಜಾಂವ್,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
