ಬ್ರಿಜಿತ್,

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕಥಾಂಕರ್ - 6

ಮಟ್ವಿ ವಳೊಕ್: ಕೊಂಕ್ಣಿ ಸಾಹಿತ್ಯಾಚೆಂ ವಾಚಾಪ್ ಲ್ಹಾನ್‌ಪಣಾರ್ ಆಸಾ ತರ್‌ಯ್ ಅಪ್ಣಾಕ್‌ಯ್ ಸಾಹಿತ್ಯ್ ರಚನ್ ಕರುಂಕ್ ಜಾತಾ ಮ್ಹಳ್ಳೆಂ ಚಿಂತಾಪ್ ಘೆವ್ನ್, ಸಂಗಿಂ ಏಕ್ ಅಪುರ್ಭಾಯೆಚಿ ಮಟ್ವಿ ಕಾಣಿ ಘೆವ್ನ್ ಆಯ್ಲ್ಯಾ ಬಾಯ್ ಬ್ರಿಜಿತ್ ಗೊನ್ಸಾಲ್ವಿಸ್ ಬಾರ್ಕುರ್. ಪಾತ್ರ್‌ಚಿತ್ರಣ್, ಬರೊ ವ್ಹಾಳೊ, ಬರಿ ಭಾಸ್ ಆಟಾಪ್ಚಿ ಹಿ ಕಾಣಿ ವಾಚ್ಪ್ಯಾಂಕ್ ಜರೂರ್ ರುಚ್ತೆಲಿ. ಅಪ್ಲಿ ಮಿನತ್ ಮುಖಾರುನ್ ವರಿಜ್ ತರ್ ಹಿ ಫುಡ್ಲ್ಯಾ ದಿಸಾಂನಿ ಬರ್‍ಯೊ ಕಾಣ್ಯೊ ಬರಂವ್ಕ್ ಸಕ್ಚಾಂತ್ ಕಾಂಯ್ ದುಭಾವ್ ನಾ.

ಬ್ರಿಜಿತ್, ಬಾರ್ಕುರ್

ಕಥಾಂಕರ್ - 6. ಸಿಂಡ್ರೆಲಾ.

"ಜೆಸ್ಸಿ.... ಜೆಸ್ಸಿ..."

ಸ್ಟಡಿ ಹೊಲಾಂತ್ ಶಿಕ್ಪಾಂತ್ ಮಗ್ನ್ ಜಾಲ್ಲ್ಯಾ ಭುರ್ಗ್ಯಾಂ ಬರಾಬರ್, ಬೂಕ್ ಉಸ್ಕ್ಯಾರ್ ತಕ್ಲಿ ಮೆಜಾರ್ ದವರ್ನ್ ನೀದ್ ಕಾಡ್ಚೆಂ ಜೆಸ್ಸಿಗೀ ಉಡೊನ್ ಪಡ್ಲೆಂ. ಭಿತರ್ ರಿಗ್ತಾಂ ರಿಗ್ತಾಂ ಬೊಬಾಟಿತ್ತ್ ಆಯಿಲ್ಲಿ ಸಿಸ್ಟರ್ ಬೆನ್ನಿ ದಾರಾಚೆರ್ ಉಭಿ ರಾವ್ಲಿ.

"ಗುಡ್ ಆಫ್ಟರ್‌ನೂನ್ ಸಿಸ್ಟರ್" ಭುರ್ಗ್ಯಾಂನಿ ಆಂವ್ಸರಾನ್ ಉಭೆ ರಾವೊನ್ ವಂದನ್ ಕೆಲೆಂ.

ಸಿ.ಬೆನ್ನ್ ಥಾವ್ನ್ ಪ್ರತಿವಂದನ್ ಆಯ್ಲೆಂನಾ. "ಜೆಸ್ಸಿ ಖೈಂ ಆಸಾ? ಜೆಸ್ಸಿ..." ಸಿಸ್ಟರಾನ್ ಪರ್ತ್ಯಾನ್ ಜೆಸ್ಸಿಕ್ ದೆಂಕ್ಣೊ ಘಾಲೊ.

ದಡ ಬಡ ಉಟ್ಚಾ ಅಂವ್ಸರಾಕ್ ಉಸ್ಕ್ಯಾರ್ ಆಸ್‌ಲ್ಲೊ ಬೂಕ್ ಸಕಯ್ಲ್ ಗಳ್ಳೊ, ಬೂಕ್ ವಿಂಚಿತ್ತ್ ಉಭೆ ರಾವ್ಲೆಂ ಜೆಸ್ಸಿ, ಸಿಸ್ಟರಾನ್ ಅಪ್ಣಾಕ್ ಕಿತ್ಯಾಕ್ ದೆಂಕ್ಣೊ ಘಾಲೊ ಸಮ್ಜಾನಾಸ್ತಾನಾ ಘುಸ್ಪಡ್ಲೆಂ. ’ದನ್ಪಾರಾಂ ಜೆವಾಣ್ ಜಾಲ್ಲ್ಯಾ ಉಪ್ರಾಂತ್ ಅರ್ಧ್ಯಾ ಘಂಟ್ಯಾಚಿ ನೀದ್ ಕಾಡ್ಚಿ ಸಿ.ಬೆನ್ನಿ ಆತಾಂ.. ಹಾಂಗಾ..’ ಜೆಸ್ಸಿಕ್ ಕಾವ್ಜೆಣ್ ಭೊಗ್ಲಿ.

"ಕಿ... ಕಿತೆಂ.. ಸಿಸ್ಟರ್?.. ಕಿತ್ಯಾಕ್.?" ಸಿಸ್ಟರಾಚಾ ಸಾಮ್ಕಾರ್ ಉಭೆಂ ಜಾಲ್ಲ್ಯಾ ಜೆಸ್ಸಿಚೆಂ ಸವಾಲ್ ಅಖೇರ್ ಜಾಂವ್ಚಾ ಪಯ್ಲೆಂ ಕಾನ್ಸುಲಾಕ್ ಛಟ್ ಛಟ್ ಕರ್ನ್ ಥಾಪ್ಡಾಂ ಪಡ್ಲಿಂ. ಏಕ್.. ದೋನ್... ತೀನ್.... ಚಾ... ಹಾತ್ ದುಖ್ತಾ ಮ್ಹಣಾಸರ್ ಸಿ.ಬೆನ್ನಿ ಮಾರಿತ್ ರಾವ್ಲಿ. ದೊನೀಂ ಕಾನ್ಸುಲಾರ್ ಪಡ್‌ಲ್ಲ್ಯಾ ಥಾಪ್ಡಾಂಚಾ ದುಖಿನ್‌ಗೀ ಯಾ ಚಾಳಿಸ್ ಭುರ್ಗ್ಯಾಂ ಮುಖಾರ್ ಮಾರ್ ಖೆಲ್ಲ್ಯಾ ಅಕ್ಮಾನಾಕ್‌ಗಿ, ಜೆಸ್ಸಿಚಾ ದೊಳ್ಯಾಂತ್ಲ್ಯಾನ್ ದುಖಾಂಚಿ ಝರ್‌ಚ್ ದೆಂವೊಂಕ್ ಲಾಗ್ಲಿ. ಲಜೆನ್ ತಾಣೆಂ ದೀಶ್ಟ್ ಸಕ್ಲಾ ಘಾಲಿ.

"ಹೆಂ ಕಿತೆಂ ಕೆಲಾಂಯ್ ತುವೆಂ ಜೆಸ್ಸಿ..?.. ಪಳೆ ತುಜಾ ಮಾಂಯ್ಚೆಂ ಕಾಗಾದ್. ತುಜಿ ಮಾಂಯ್ ಥಂಯ್ ಕೊಣಾಘರಾ ಘಸ್ಟೊ ಕಾಡ್ತಾ ತುಕಾಯ್ ತ್ಯಾಚ್ಚ್ ಕಾಮಾಕ್ ಲಾಂವ್ಕ್ ನ್ಹಂಯ್. ತುವೆಂ ತಿಚ್ಯಾಬರಿ ಜಾಯ್ನಾಸ್ತಾನಾ ಚ್ಯಾರ್ ಅಕ್ಶರಾಂ ಶಿಕೊನ್, ತುಜ್ಯಾ ಪಾಂಯಾರ್ ಉಭೆಂ ರಾವಾಜಯ್ ಮ್ಹಳ್ಳೆ ಖಾತಿರ್..." ಸಿಸ್ಟರಾಚಿಂ ಥಾಪ್ಡಾಂ ಕಿತ್ಯಾ ಖಾತಿರ್ ಮ್ಹಳ್ಳೆಂ ಜೆಸ್ಸಿಕ್ ಆತಾಂ ಸಮ್ಜಾಲೆಂ.

"ಮ್ಹಾಕಾ ಕಳಿತ್ ನಾಸ್ತಾನಾ ಕಶೆಂ ಪೋಸ್ಟ್ ಕೆಲೆಂಯ್ ತುವೆಂ?.. ಹಾಂಗಾ ಆಯ್ಕ್..." ಮ್ಹಣಾಲಿ ತಿ ಭುರ್ಗ್ಯಾಂ ಕುಶಿನ್ ಘುಂವೊನ್. 

"ತುಮಿ ಗರ್ಚ್ಯಾಂಕ್ ಬರಂವ್ಚೆಂ ಹರ್‍ಯೆಕ್ ಕಾಗಾದ್ ಮ್ಹಜಾ ಮೆಜಾ ಥಾವ್ನ್ಂಚ್ ಪೋಸ್ಟ್ ಜಾಯ್ಜಾಯ್ ಮ್ಹಣ್ ಪಯ್ಲೆಂಚ್ ಸಾಂಗ್ಲಾಂ ನ್ಹಂಯ್‌ಗಿ? ಪಳೆಯಾ ಹ್ಯಾ ಚೆಡ್ವಾಕ್.."

ಜೆಸ್ಸಿಕ್ ಬೋಟ್ ಜೊಕುನ್ ಮ್ಹಣಾಲಿ. "ಹಾಂಗಾ ಇತ್ಲೆಂ ಬರೆಂ ಖಾಣ್ ಜೆವಾಣ್ ಆಸಾ. ತಿತ್ಲೆಂ ಆಸೊನ್‌ಯೀ ಹಾಣೆಂ ಮಸ್ಕತ್ ಆಪ್ಲ್ಯಾ ಆವಯ್ಕ್ ಕಾಗಾದ್ ಬರಯ್ಲಾಂ, ಅಪ್ಣಾಕ್ ಶಿಕೊಂಕ್ ನಾಕಾ, ಕೊಣಾಗೆರ್ ಪುಣೀಂ ಕಾಮಾಕ್ ಧಾಡ್ ಮ್ಹಣ್. ಕಿತ್ಲೆ ಧಯ್ರ್ ಹಾಚೆಂ?.. ಬರೆಂ ಕರ್ನ್ ಶಿಕೊನ್ ಬರೆ ಮಾರ್ಕ್ಸ್ ಕಾಡ್ಲೆಯ್ ಜಾಲೆಂ.. ನಾಂ ಜಾಲ್ಯಾರ್ ಸರ್ಟಿಫಿಕೆಟಿಚೆರ್ ದಸ್ಕತ್ ಕರಿನಾಸ್ತಾನಾ ತುಕಾ ಧಾ ದೀಸ್ ಕ್ಲಾಸಿಚಾ ಭಾಯ್ರ್ ಉಭೆಂ ರಾವಾಶೆಂ ಕರ್ತೆಲಿಂ.. ಜಾಗ್ರುತ್.." ಜೆಸ್ಸಿಕ್ ಬೆಶ್ಟಾಯ್ಲೆಂ ತಿಣೆಂ.

ಸಿಸ್ಟರಾನ್ ಅಖೇರ್ ಕೆಲ್ಲೆಂಚ್ ದೂಕ್ ತಡ್ವುಂಕ್ ಜಾಯ್ನಾಸ್ತಾನಾ ಜೆಸ್ಸಿ ದಡ ದಡ ಕರ್ನ್ ಮಾಳ್ಯೆಚಿಂ ಮೆಟಾಂ ಚಡಾಲಾಗ್ಲೆಂ. ವಯ್ರ್ ಆಸ್ಚೆಂ, ಭುರ್ಗ್ಯಾಂನಿ ಸಾಲಾನ್ ನಿದ್ಚೆಂ, ಎಕ್‌ಚ್ ವ್ಹಡ್ಲೆಂ ಹೊಲ್ ತೆಂ. ವೊಣದೆಕ್ ಲಾಗೊನ್ ಬಸ್‌ಲ್ಲೆಂ ಜೆಸ್ಸಿ, ಆವಯ್ಚೆಂ ಕಾಗಾದ್ ವಾಚಿಲಾಗ್ಲೆಂ. ಆವಯ್ನ್ ತಾಕಾ ಜ್ಯೋರ್ ಕರ್ನ್ ಬರಯಿಲ್ಲೆಂ. ವಾಚ್ತಾಂ ವಾಚ್ತಾಂ ತಾಕಾ ದೂಕ್ ತಡ್ವುಂಕ್ ಜಾಲೆಂನಾ. ದೊಂಪ್ರಾ ಮಧೆಂ ತಕ್ಲಿ ದವರ್ನ್ ಉಸ್ಕೆವ್ನ್ ಉಸ್ಕೆವ್ನ್ ರಡಾಲಾಗ್ಲೆಂ.

******************

ದುಬ್ಳ್ಯಾ ಕುಟ್ಮಾಂತ್ ಜಲ್ಮಾಲ್ಲ್ಯಾ ಜೆಸ್ಸಿಚಾ ಆವಯ್ ಬಾಪಾಯ್ಕ್ ಚಾರ್ ಜಣಾಂ ಮಾತ್ರ್ ಭುರ್ಗಿಂ. ದೋಗ್ ಚೆಡೆ ಆನಿ ದೊಗಾಂ ಚೆಡ್ವಾಂ. ಬಾಪುಯ್ ಬೊಂಬೊಂಯ್ತ್ ಕಾಮ್ ಕರ್ತಾಲೊ ಜಾಲ್ಯಾರೀ ಮಯ್ನ್ಯಾಕ್ ಘರಾ ಖರ್ಚಾಚೆ ಪಯ್ಶೆ ಧಾಡ್ತಾನಾ ಮಾತ್ರ್ ಹರ್‍ಯೆಕ್ ಪಾವ್ಟಿಂ ರೀಣ್ ಕಾಡ್ನ್ ಧಾಡ್ತಾಲೊ. (ಜೊಡಿಚೆ ಪಯ್ಶೆ ಅಪ್ಲ್ಯಾ ಸ್ವಂತ್ ಖರ್ಚಾಕ್ ಮಾತ್ರ್). ಘೊವಾನ್ ಧಾಡ್‌ಲ್ಲ್ಯಾ ಪಯ್ಶ್ಯಾನ್ ಭುರ್ಗ್ಯಾಂಚೆಂ ಪೊಟ್ ಭರುಂಖ್ ಜಾಯ್ನಾಸ್ತಾನಾ ಲಿಲ್ಲಿಬಾಯ್ ಸೆಜಾರ್ಚಾ ಘರಾಂನಿ ಕೂಲಿಚೆಂ ಕಾಮಾಕ್ ವೆತಾಲಿ.

ಲಿಲ್ಲಿಬಾಯೆಚಾ ಮತಿಂತ್ ಏಕ್ ಹಟ್ ಆಸ್‌ಲ್ಲೆಂ. ಕಿತ್ಲೆಯ್ ಕಷ್ಟ್ ಜಾಂವ್, ಭುರ್ಗ್ಯಾಂಕ್ ಬರೆಂ ಶಿಕಾಪ್ ದೀವ್ನ್ ತಾಂಚಾ ಪಾಂಯಾರ್ ಉಭೆ ರಾವಾಶೆಂ ಕರಿಜಾಯ್ ಮ್ಹಣೊನ್. ಘೊವಾಚ್ಯಾ ಜೊಡಿಚೆಂ ಆನಿ ಆಪ್ಣಾಚಾ ಕುಲಿಚಾ ಪಯ್ಶ್ಯಾಂಕ್ ಪಾತ್ಯೆಲ್ಯಾರ್ ಕಾಂಯ್ ಫಾಯ್ದೊ ನಾ ಮ್ಹಣ್, ತಿಚಾ ಭಾಂವ್ಡಾಂಚೆ ಹಾತ್ ಪಾಂಯ್ ಧರ್ನ್ ವಿಜಾಚೆ ಪಯ್ಶೆ ಶಿಕ್ಪಾಚಿ ವಿಲೇವಾರಿ ತಿಣೆ ಕೆಲಿ. ಚೆಡ್ಯಾ ಭುರ್ಗ್ಯಾಂಕ್ ಪಾದ್ರಿಂಗೆರ್, ಚೆಡ್ವಾಂ ದೊಗಾಂಕ್ ಸಿಸ್ಟರಾಂಚಾ ಬೊರ್ಡಿಂಗಾಂತ್ ದವರ್ಲೆಂ. ಘೊವ್ ಬೊಂಬೊಯ್ ಆವಯ್ ಗಲ್ಫಾಂತ್ ಭುರ್ಗಿಂ ಎಕೇಕ್ ಕಡೆ ಅಶೆಂ ಸಗ್ಳೆಂ ಕುಟಾಮ್ ದೇಸಾಂತರ್ ಜಾಲ್ಯಾರೀ ದೆವಾನ್ ಕರ್ಚೆಂ ಸಗ್ಳೆಂ ಬರ್‍ಯಾಕ್‌ಚ್ ಮ್ಹಣ್ ತಿ ಪಾತ್ಯೆಲಿ.

ಪಾದ್ರಿಂಗೆರ್ ರಾವ್‌ಲ್ಲ್ಯಾ ಚೆಡ್ಯಾ ಭುರ್ಗ್ಯಾಂಕ್ ಶಿಕ್ಪಾಂತ್ ಜಾಂವ್ ಬುಧ್ವಂತ್ಕಾಯೆಂತ್ ಫಾಯ್ದೊ ಕಾಂಯ್ ಜಾಂವ್ಕ್ ನಾ ತರೀ ಹೆ ಭುರ್ಗೆ ಮಾತ್ರ್ ತಾಂಚಿ ’ಬಿಟ್ಟಿ ಕಾಮಾಂ’ ಕರ್ಚಾಕ್ ಉಪ್ಕಾರಾಕ್ ಪಡ್ಲೆ.

ಜೆಸ್ಸಿಚೆಂ ಭಯ್ಣ್ ಜಾನೆಟ್ ಶಿಕ್ಪಾಂತ್ ಹುಶಾರ್ ಆಸ್‌ಲ್ಲೆಂ ಜಾಲ್ಯಾರ್‌ಯೀ ಜೆಸ್ಸಿ ಮಾತ್ರ್ ಬಡ್ಡ್. ಶಿಕಾಪ್ ಮ್ಹಣ್ಚೆಂ ತಾಚಾ ತಕ್ಲೆಂತ್ ರಿಗಾನಾತ್‌ಲ್ಲೆಂ. ಹರ್‍ಯೆಕಾ ಪಾವ್ಟಿಂಚಾ ಪರಿಕ್ಶೆಂತ್ ಚಾರ್ ತಾಂಬ್ಡೆ ಗೀಟ್ ಗ್ಯಾರಂಟಿ. ಪಾಸ್ ಜಾಂವ್ಚೆಂ ಕನ್ನಡಾಂತ್ ಆನಿ ಹಿಂದಿಂತ್ ಮಾತ್ರ್. ಗಣಿತಾಂತ್ಲೆ ಂ೨+ಃ೨+ಅ೨ ಸೂತ್ರ ಜಾಂವ್ದಿ, ವಿಗ್ಯಾನಾಂತ್ಲೆ ನ್ಯೂಟನಾಚೆಂ ವ್ಯಾಖ್ಯಾನ್ ಜಾಂವ್ದಿ ಯಾ ಪೈಥಾಗೋರಸಾಚೆಂ ಪ್ರಮೇಯ್ ಜಾಂವ್ದಿ ತಾಕಾ ಭಿಲ್ಕುಲ್ ಸಮ್ಜಾನಾತ್‌ಲ್ಲೆಂ.

ನೊವ್ಯಾ ಕ್ಲಾಶಿಂತ್ ಶಿಕ್ತಾಲೆಂ ತರ್‌ಯೀ ಆಟ್ವ್ಯಾ ಕ್ಲಾಶಿಚಿಂ ಲೆಕಾಂ ತಾಕಾ ಯೇನಾತ್‌ಲ್ಲಿಂ. ಆವಯ್ಚ್ಯಾ ಕಶ್ಟಾಂಕ್ ಭಿರ್ಮತ್ ಪಾವೊನ್ ಸಿಸ್ಟರಾಂ ಹರ್‍ಯೆಕ್ ಪಾವ್ಟಿಂ ಮುಖ್ಲ್ಯಾ ಕ್ಲಾಸಿಕ್ ಲೊಟುನ್ ಘಾಲ್ತಾಲಿಂ. ಪುಣ್ ಜೆಸ್ಸಿ ಶಿಕ್ಚಾಂತ್ ಕಿತ್ಲೆಂ ಬಡ್ಡ್ ಆಸ್‌ಲ್ಲೆಂಗೀ, ಪದಾಂ ಗಾಂವ್ಚಾಂತ್ ತಿತ್ಲೆಂಚ್ ಹುಶಾರ್. ಇಸ್ಕೊಲಾಂತ್ ಚಲ್ಚಾ ’ದೇಶ್‌ಭಕ್ತಿ ಗೀತ್’ ಸ್ಪರ್ಧ್ಯಾಂತ್ ಜಾಂವ್, ಸ್ಕೂಲ್ ಡೇಂತ್ ಚಲ್ಚಾ ಡ್ಯಾನ್ಸಾಂಕ್ ಪರ್ಧ್ಯಾ ಪಾಟ್ಲೆಂ ಗಾವ್ಪಿಣ್ ಜೆಸ್ಸಿ ಆಸ್ತಾಲೆಂಚ್.

ಹೈಸ್ಕೂಲಾಚಾ ದೊರ್‍ಯಾಕ್ ಲಾಗೊನ್ಂಚ್ ಆಸ್ಚಾ ಸೌಂಡ್ ಸಿಸ್ಟಮಾಂತ್ಲ್ಯಾ ಆಂಗ್ಡಿ ಥಾವ್ನ್ ವಾಳ್ಚಿಂ ಹರ್‍ಯೆಕ್ ಪದಾಂ ಜಿಕುನ್ ಧರ್ತಾಲೆಂ. ಮೆಹರು ಟೀಚರ್ ರಸಾಯನಶಾಸ್ತ್ರ್ ಶಿಕಯ್ತಾ ಜಾಲ್ಯಾರ್ ಜೆಸ್ಸಿ ’ನೂರೊಂದು ನೆನಪು.. ಎದೆಯಾಳದಿಂದ..’ ಮ್ಹಣ್ ತಾಚೆ ಇತ್ಲ್ಯಾಕ್ ಘುಣ್ಗುಣ್ತಾಲೆಂ.

ಜೆಸ್ಸಿಕ್ ಗಾವ್ಪಿಣ್ ಜಾಂವ್ಚಿ ಜಬ್ಬೊರ್ ಆಶಾ. ಏಕ್ ಪಾವ್ಟಿಂ ಹಿ ಇಚ್ಚಾ ಅಪ್ಣಾಚಾ ಆವಯ್‌ಕಡೆ ವೆಕ್ತ್ ಕೆಲ್ಲೆಂ ತಾಣೆಂ. ’ಪುತಾ ಆಮಿ ದುಬ್ಳಿಂ ಹೆಂ ಪುರಾ ಆಮ್ಕಾಂ ಸಾಂಗ್‌ಲ್ಲೆಂ ನ್ಹಂಯ್.. ತುಂ ಬರೆಂ ಕರ್ನ್ ಶಿಕ್’ ಮ್ಹಣ್ ಆವಯ್ನ್ ಬೂಕ್ ಸಾಂಗ್ಲಿ.

ವ್ಹಡ್ಲೆಂ ಪೋಟ್ ಆಸ್ಚಾ ಮೆಹರು ಟೀಚೆರಿಕ್ ’ನಿತ್ಯ ಗರ್ಭಿಣಿ’ ಮ್ಹಣ್ ಕೊಲಾಂವ್ಚಾಂತ್, ಕ್ಲಾಸಿಂತ್ ಆಸ್ಚಾ ಸೊಭಿತ್ ಚೆಡ್ವಾಂಕ್ ಮಾತ್ರ್ ಪಳೆಂವ್ಕ್ ಪಾಠ್ ಕರ್ಚಾ ಕನ್ನಡ ಮೇಸ್ತ್ರಿಕ್ ’ಚೊಳ್ಳ’ ಮ್ಹಣ್ ಚಿಡಾಂವ್ಚಾಂತ್, ಕನ್ನಡ ಮೇಸ್ತ್ರಿಕಡೆ ಶೇಲೆ ಕರ್ನ್ ಉಲಂವ್ಚಾ ಪಿ.ಟಿ.ಟಿಚೆರಿಕ್ ’ಚೊಳ್ಳಿ’ ಮ್ಹಣ್ ಮಸ್ಕಿರ್‍ಯೊ ಕರುಂಕ್ ಜೆಸ್ಸಿಯೀ ಕಾಂಯ್ ಪಾಟಿಂ ನಾತ್‌ಲ್ಲೆಂ.

ಬೋರ್ಡಿಂಗಾಂತ್ಲ್ಯಾ ತಾಚಾ ಕ್ಲಾಶಿಚ್ಯಾ ಉಶಾ, ಲೀನಾ, ಅನ್ನಮ್ಮ ಆನಿ ಜಿನ್ಸಿನ್ ಸಾಂಗಾತಾ ಬೊಸೊನ್ ಲೆಕಾಂ ಶಿಕ್ತಾನಾ ಜೆಸ್ಸಿ ಮಾತ್ರ್ ತಾಂಚೆ ಸಾಂಗಾತಾ ಬೊಸೊನ್ ಖಂಚೆಂಯ್ ಏಕ್ ಪದ್ ಘುಣ್ಘುಣೊನ್ ಆಸ್ತಾಲೆಂ.

ಘರಾಂತ್ ಆವಯ್ಚೆಂ ಉತರ್ ಇಲ್ಲೆಶೆಂ ಜ್ಯೊರಾನ್ ಚಲ್ತಾಲೆಂ ಜಾಲ್ಲ್ಯಾನ್ ಜೆಸ್ಸಿಕ್ ಆನಿ ತಾಚಾ ಭಾಂವ್ಡಾಂಕ್ ಶಿಕ್ಪಾಚಿ ವಿಲೇವಾರಿ ಜಾಲಿ. ನಾಂ ತರ್ ಜೆಸ್ಸಿಚೊ ಬಾಪುಯ್ ಚೆರ್ಕ್ಯಾಂ ಭುರ್ಗ್ಯಾಂಕ್ ಹೊಟೆಲಾಂತ್ ಗ್ಲಾಸ್ ಧುಂವ್ಕ್ ಆನಿ ಚೆಡ್ವಾಂಕ್ ಖಂಯ್ ಬೊಂಗ್ಲ್ಯಾಂತ್ ಕಾಮಾಕ್ ದವರ್ನ್ ಅಪುಣ್ ಮಾತ್ರ್ ಇಜೀಚಾರಾಚೆರ್ ಬಸೊನ್ ಧವಿ ಬಿಡಿಯೆಚೊ ಧುಂವರ್ ಸೊಡ್ಟಾ ಆಸ್‌ಲ್ಲೊ. ಕಿತ್ಯಾಕ್ ಮ್ಹಳ್ಯಾರ್ ತಾಕಾ ಭುರ್ಗ್ಯಾಂನಿ ಶಿಕಾಪ್ ಶಿಕ್ಚೆಂ ಭಿಲ್ಕುಲ್ ಪಸಂದ್ ನಾತ್‌ಲ್ಲೆಂ.

ಸಕ್ಕಡ್ ಆಸಾ ಹ್ಯಾ ಬೊರ್ಡಿಂಗಾಂತ್ ಆವಯ್ ಬಾಪಾಯ್ಚೊ ಮೋಗ್ ಮಾತ್ರ್ ನಾ. ಜೆವ್ಲ್ಯಾಂವ್‌ಗೀ, ಖೆಲಾಂಗೀ ಪುತಾ ಮ್ಹಣ್ ವಿಚಾರ್ತೆಲಿಂ ಕೊಣೀಂ ನಾತ್‌ಲ್ಲ್ಯಾನ್ ಜೆಸ್ಸಿ ಚಡಾವತ್ ಮೂಡೀ ಜಾವ್ನ್ ಆಸ್ತಾಲೆಂ.

ಅಪುಣ್ ಏಕ್ ವ್ಹಡ್ಲೆಂ ಗಾವ್ಪಿಣ್ ಜಾಂವ್ಚೆಂ ತೆಂ ದಿಸಾಕೀ ಬುಡೊನ್ ಸ್ವಪ್ಣೆತಾಲೆಂ. ತಾಕಾ ಸಿಂಡ್ರೆಲಾಚಿ ಕಾಣಿ ಭೋವ್ ಪಸಂದ್. ಮಾವ್ಶೆ ಭುರ್ಗ್ಯಾಂನಿ ದಿಂವ್ಚೆ ಉಪಾದ್ರ್ ಸರ್‍ವ್ ಸೊಸುನ್ ವರ್ಚಾ ಸಿಂಡ್ರೆಲಾಕ್ ಏಕ್ ಪಾವ್ಟಿಂ ಆಂಜ್ ಭಡ್ವೊ ದಿಶ್ಟಿಕ್ ಪಡ್ಲೊ. ಆಪ್ಲ್ಯಾ ಅಜ್ಯಾಪಾಂಚಾ ಬೊಡಿಯೆನ್ ದುಬ್ಳ್ಯಾ ಸಿಂಡ್ರೆಲಾಕ್ ಸೊಭಿತ್ ಸುಂದರ್ ಚಲಿ ಜಾವ್ನ್ ನೆಟಂವ್ಚೆಂ ಸೊಭಿತ್ ಸುಂದರ್ ರಾಯ್ ಕುಂವರಾನ್ ಸಿಂಡ್ರೆಲಾಕ್‌ಚ್ ಅಪ್ಲ್ಯೆ ಜಿಣ್ಯೆ ಸಾಂಗಾತಿಣ್ ಜಾವ್ನ್ ವಿಂಚುನ್ ಕಾಡ್ಚೆಂ. ತಸಲೊಚ್ ಆಂಜ್ ಭಡ್ವೊ ಅಪ್ಣಾಕ್ ದಿಷ್ಟಿಕ್ ಪಡ್‌ಲ್ಲೊ ಜಾಲ್ಯಾರ್ ಹ್ಯಾ ಶಿಕ್ಚಾ ಕಷ್ಟಾಂತ್ಲೆಂ ಅಪ್ಣಾಕ್ ನಿವಾರ್ನ್ ಅಜ್ಯಾಪಾಂಚಾ ಬೊಡಿಯೆನ್ ಅಪ್ಣಾಕ್ ಗಾವ್ಪಿಣ್ ಕೆಲ್ಲೆಂ ಜಾಲ್ಯಾರ್ ಕಿತ್ಲೆಂ ಬರೆಂ ಆಸ್ತೆಂ.. ಅಶೆಂ ತೆಂ ಚಿಂತಾಲೆಂ.

**************

ತ್ಯಾ ದೀಸ್ ಕ್ಲಾಶಿಂತ್ ಮೆಹರು ಟಿಚೆರಿನ್ ವಿಚಾರ್‌ಲ್ಲ್ಯಾ ಸವಾಲಾಕ್ ಜಾಪ್ ದೀಂವ್ಕ್ ಜಾಯ್ನಾಸ್ತಾನಾ ತಕ್ಲಿ ಬಾಗಾವ್ನ್ ರಾವ್‌ಲ್ಲ್ಯಾ ಜೆಸ್ಸಿಕ್ ಪಳೆವ್ನ್ ಟಿಚೆರಿಚೊ ರಾಗ್ ತಕ್ಲೆಕ್ ಚಡ್ಲೊ. ಸಕಾಳಿಂ ಸಕಾಳಿಂ ಅಪ್ಣಾಚೊ ಮೂಡ್ ಪಾಡ್ ಕೆಲೊ ಮ್ಹಣ್ ತಿಣೆ ಜೆಸ್ಸಿಕ್ ಕ್ಲಾಸಿಂತ್ ಥಾವ್ನ್ ಭಾಯ್ರ್ ಘಾಲೆಂ. "ತುಜೆ ತಸಲ್ಯಾಂನಿ ಇಸ್ಕೊಲಾಕ್ ಯೆಂವ್ಚೆಪ್ರಾಸ್ ಕೊಣಾಗೆರ್ ಗೊರ್‍ವಾಂ ಚರಂವ್ಕ್ ಗೆಲ್ಯಾರ್ ಜಾಯ್ನಾಂಗೀ..? " ಮ್ಹಣ್ ಟಿಚೆರ್ ನಂಜ್ಯೊ ಹಾಸ್ಲಿ.

ಟಿಚೆರಿಚಿಂ ಉತ್ರಾಂ ಆಯ್ಕೊನ್ ಅಕ್ಮಾನ್ ಭೊಗ್‌ಲ್ಲ್ಯಾ ಜೆಸ್ಸಿನ್ ಇಸ್ಕೊಲಾಕ್ ಆಧೇವ್ಸ್ ಮಾಗ್ಚೊ ನಿರ್ಧಾರ್ ಕೆಲೊ. ಜೆಸ್ಸಿಕೀ ಪುರೊ ಜಾಲ್ಲೆಂ ಬೊರ್ಡಿಂಗಾಂತ್ ಸಿಸ್ಟರ್, ಇಸ್ಕೊಲಾಂತ್ ಟಿಚೆರಾಂ ಆನಿ ಅಪ್ಣಾಕ್ ಹ್ಯಾ ಶಿಕ್ಪಾಚೆ ರಗ್ಳೆ ನಾಕಾತ್ ಮ್ಹಣ್ ತಾಣೆಂ ಗಲ್ಫಾಂತ್ ಆಸ್ಚ್ಯಾ ಆಪ್ಲ್ಯಾ ಆವಯ್ಕ್ ಕಾಗಾದ್ ಬರಯಿಲ್ಲೆಂ. "ಅಪ್ಣಾಕ್ ಖೈಂ ಪುಣೀಂ ಕಾಮಾಕ್ ಧಾಡ್" ಮ್ಹಣ್.

ಬೊರ್ಡಿಂಗಾಂತ್ ಯೆಂವ್ಚಿಂ ಆನಿ ವೆಚಿಂ ಹರ್‍ಯೆಕ್ ಕಾಗ್ದಾಂ ಸಿಸ್ಟರಾಂ ಮುಖಾಂತ್ರ್ ಪಾಶಾರ್ ಜಾತಾಲಿಂ ಜಾಲ್ಲ್ಯಾನ್, ಜೆಸ್ಸಿನ್ ಆಪ್ಣೆಂ ಆವಯ್ಕ್ ಬರಯಿಲ್ಲೆಂ ಕಾಗಾದ್ ಸಿಸ್ಟರಾಂಚಾ ಮೆಜಾರ್ ದವರ್ಲೆಂ ನಾ.

ಬೊರ್ಡಿಂಗಾಂತ್ ಆಸ್ಚಾ ಹರ್‍ಯೆಕ್ ಚಲಿಯಾಂಚಿ ಚಾಲ್ ಪಾರ್ಕುನ್ ಉಪ್ರಾಂತ್ ಆಸಾ ತಶೆಂ ಸಿ.ಬೆನ್ನಿಕ್ ವರ್ದಿ ದಿಂವ್ಚಾ ’ಚಾಡಿ ಭಟ್ಟ’ ಚೆಡ್ವಾಚೆ ದೊಳೆ ಚುಕಂವ್ಚೆಂ ಕಶ್ಟ್ ಜಾಲ್ಯಾರೀ ಸಕಾಳಿಂ ಮಿಸಾಕ್ ವೆತಾನಾ ನಿಮಾಣೆಂ ರಾವೊನ್ ಬೊರ್ಡಿಂಗಾಚಾ ಗೆಟಿಮುಖ್ಲ್ಯಾ ಕುಶಿನ್‌ಚ್ ಆಸ್ಚ್ಯಾ ಪೋಸ್ಟ್ ಬೊಕ್ಸಾಂತ್ ಕಾಗಾದ್ ಗಳಯಿಲ್ಲೆಂ ಕೊಣಾಚಾಯ್ ಗಮನಾಕ್ ಗೆಲೆಂನಾ.

*****

ಸಿ. ಬೆನ್ನಿನ್ ಕಾನ್ಸುಲಾರ್ ದಿಲ್ಲಿಂ ಥಾಪ್ಡಾಂ, ಸರ್ವಾಂ ಮುಖಾರ್ ಮಾರ್ ಖೆಲ್ಲಿ ಲಜ್ ಆನಿ ಆಪ್ಣಾಚಾ ಆವಯ್ನ್ ಗೊವ್ಜಿ ಕರ್ನ್ ಬರಯಿಲ್ಲೆಂ ಕಾಗಾದ್. ಹಿಂ ತಿನೀಂ ಸಂಗತ್ ಜೆಸ್ಸಿಕ್ ಉಸ್ಕೆವ್ನ್ ಉಸ್ಕೆವ್ನ್ ರಡೊಂಕ್ ಮೊಸ್ತ್ ಪುರೊ ಆಸ್‌ಲ್ಲೆಂ. ಜೆಸ್ಸಿಕ್ ಅಪ್ಣಾಚಿ ಆವಯ್ ಬಾಪುಯ್ ಭಾಂವ್ಡಾಂ ಸಕ್ಡಾಂಚೊ ಉಡಾಸ್ ಆಯ್ಲೊ. ಆವಯ್ ಕಿತ್ಲೆಂ ಮಾರ್ಲ್ಯಾರೀ ತಿಚೊ ರಾಗ್ ನಿವ್ಲ್ಯಾ ಉಪ್ರಾಂತ್ ಆರಾವ್ನ್ ಧರ್ನ್ ಸಮಧಾನ್ ಕರ್ತಾಲಿ. ಬಾಪಾಯ್ಚೊ ಮೋಗ್ ಮ್ಹಳ್ಯಾರ್ ಕಿತೆಂ ಮ್ಹಣ್ ನೆಣಾಸ್ಚಾ ಜೆಸ್ಸಿಕ್ ಆನಿ ತಾಚಾ ಭಾಂವ್ಡಾಂಕ್ ಸಗ್ಳ್ಯಾ ಸಂಸಾರಾಂತ್ ತಾಂಚೊ ಮೋಗ್ ಕರ್ತಾಲಿಎಕ್‌ಚ್ ಎಕ್ಲಿ ಆನಿ ತಿ ಆವಯ್.

ದೊಂಪ್ರಾಂ ಮಧೆಂ ತಕ್ಲಿ ದವರ್ನ್ ರಡೊನ್ ರಡೊನ್ ಥಕ್‌ಲ್ಲ್ಯಾ ಜೆಸ್ಸಿಕ್ ಥಂಯ್ಚ್ ನೀದ್ ಆಯ್ಲಿ. ಆನಿ ತ್ಯಾ ಲ್ಹಾನ್‌ಶಾ ನಿದೆಂತ್‌ಯೀ ತಾಕಾ ಏಕ್ ಸ್ವಪಾಣ್ ಪಡ್ಲೆಂ, ರಡೊನ್ ಬೊಸ್‌ಲ್ಲ್ಯಾ ತಾಚೆಮುಖಾರ್ ಏಕ್ ಆಂಜ್ ಭಡ್ವೊ ದಿಶ್ಟಿಕ್ ಪಡ್ಲೊ, ಆನಿ ತ್ಯಾ ಆಂಜಾಚಾ ಹಾತಾಂತ್ ಏಕ್ ಪರ್ಜಳ್ಚಿ ಅಜ್ಯಾಪಾಂಚಿ ಬೊಡಿ, ಥೇಟ್ ಸಿಂಡ್ರೆಲಾಚಾ ಆಂಜ್ ಭಡ್ವ್ಯಾಚಾ ಹಾತಾಂತ್ ಆಸ್ಚೆಪರಿಂ. ತೊ ಆಂಜ್ ಭಡ್ವೊ ತಾಕಾ ಮೊಗಾನ್ ಆಪಯ್ತಾ "ಜೆಸ್ಸಿ.. ಜೆಸ್ಸಿ.."

"ಜೆಸ್ಸಿ.. ಜೆಸ್ಸಿ.." ಸಟ್ಟ್ ಕರ್ನ್ ಜಾಗ್ ಜಾಲಿ ಜೆಸ್ಸಿಕ್. ಹೆಣೆಂ ತೆಣೆಂ ಪಳಯ್ಲೆಂ ತಾಣೆಂ. ತಾಕಾ ಆಂಜ್ ಭಡ್ವೊ ದಿಸೊಂಕ್ ನಾ. ಧವ್ಯಾಚ್ ಲೊಬಾರ್ ಆಸ್ಚಿ ಸಿ.ಬೆನ್ನಿ ತಾಚೆಲಾಗಿಂ ಬೊಸೊನ್ ತಾಚೆಂ ಮಾತೆಂ ಪೊಶೆತಾಲಿ. ಮೊಸ್ತ್ ದೀಸ್ ಥಾವ್ನ್ ಆವಯ್ಕ್ ಆಶೆಂವ್ಚಾ ಜೆಸ್ಸಿಕ್ ಲಾಗಿಂ ಬೊಸೊನ್ ಮೊಗಾನ್ ಅಪ್ಲೆಂ ಮಾತೆಂ ಪೊಶೆಂವ್ಚಾ ಸಿ.ಬೆನ್ನಿ ಥಂಯ್ ಅಪ್ಣಾಚಾ ಆವಯ್ಚೆಂ ರೂಪ್ ದೆಕ್ಲೆಂ. ತಾಚಾ ದೊಳ್ಯಾಂನಿ ಪರ್ತ್ಯಾನ್ ದುಕಾಂ ಉದೆಲಿಂ.

"ಜೆಸ್ಸಿ ಕಿತ್ಯಾಕ್ ಅಶೆಂ ಕೆಲೆಂಯ್ ತುವೆಂ...? ತುಕಾ ಕಿತ್ಯಾಕ್ ಶಿಕೊಂಕ್ ನಾಕಾ? ಹಾಂಗಾ ಕಿತೆಂ ಉಣೆಂ ಆಸಾ..? ಮ್ಹಾಕಾ ಸಾಂಗ್. ಸಿಸ್ಟರಾನ್ ಸವಾಲಾಂ ವಯ್ರ್ ಸವಾಲಾಂ ಘಾಲಿಂ"

"ಸಿಸ್ಟರ್ ಮ್ಹಾಕಾ ಶಿಕೊಂಕ್ ನಾಕಾ, ಲೆಕಾಂ, ವಿಜ್ನಾನ್ ಕಶ್ಟ್ ಜಾತಾತ್. ಮ್ಹಾಕಾ ಗಾವ್ಪಿಣ್ ಜಾಯ್ಜಯ್.. ಮ್ಹಾಕಾ ಶಿಕೊಂಕ್ ನಾಕಾ..." ಜೆಸ್ಸಿ ಸುಸ್ಕಾರ್ಲೆಂ.

"ಹೋ. ತಿತ್ಲೆಂಚ್..ಗಿ.." ಸಿ.ಬೆನ್ನಿ ಹಾಸಾಲಾಗ್ಲಿ. "ಶಿಕಾಪ್ ತುಕಾ ಕಷ್ಟ್ ಜಾತಾ ಮ್ಹಣ್ ತುಂ ಚಿಂತಾಯ್ ದೆಖುನ್ ಕಷ್ಟ್ ಜಾತಾ. ಜೆಸ್ಸಿ ತುವೆಂ ಶಿಕೊಂಕ್ ಆಸಕ್ತ್ ಧಾಕಯ್ಜಾಯ್. ಇಸ್ಕೊಲಾಂತ್ ಶಿಕಯ್ತಾನಾ ಚೀತ್ ದೀವ್ನ್ ಆಯ್ಕಾಜಾಯ್. ತುಜಿ ಮಾಂಯ್ ಥಂಯ್ ಕೊಣಾ ಘರಾ ಕಶ್ಟ್ ಕಾಡ್ತಾ ಕಿತ್ಯಾ? ತುವೆಂ ಬರೆಂ ಕರ್ನ್ ಶಿಕಾಜಯ್ ಮ್ಹಣ್. ತುವೆಂ ಅಶೆಂ ಕೆಲ್ಯಾರ್ ತಿಚಾ ಕಷ್ಟಾಂಕ್ ಕಿತೆಂ ಪ್ರತಿಫಳ್ ಜಾಲೊ?" ಜೆಸ್ಸಿ ಮೌನ್ ರಾವೊನ್ ಸಿಸ್ಟರಾಕ್ ಆಯ್ಕಾಲಾಗ್ಲೆಂ.

"ಜೆಸ್ಸಿ, ತುಕಾ ಕಾಮಾಕ್ ದಾಡ್ಚೆಂ ಜಾಲ್ಯಾರ್ ಮಾಂಯ್ನ್ ಗಲ್ಫಾಕ್ ವೆಚಿ ಗರ್ಜ್ ಪಡ್ತಿನಾ. ತುಮ್ಕಾಂ ತುಮ್ಚಾ ಪಪ್ಪಾಚೆ ಖುಶೆ ಫರ್ಮಾಣೆ ಕೊಣಾ ಘರಾ ಕಾಮಾಕ್ ದವರ್ನ್ ಮಾಂಯ್ನ್ ಘರಾ ಬೊಸ್ಯೆತ್ ಆಸ್‌ಲ್ಲೆಂ ನ್ಹಂಯ್‌ಗಿ..?"

"ಜೆಸ್ಸಿ .. ತುವೆಂ ಪ್ರೇತನ್ ಕರಿಜೆ, ವೇಳ್ ಪಾಡ್ ಕರಿನಾಸ್ತಾನಾ ಶಿಕಾಜಯ್. ಯೆಂವ್ಚಾ ವರ್ಸಾ ತುಕಾ ಧಾವಿ. ತುಜ್ ಜಿಣ್ಯೆಚಾ ಫುಡಾರಾಕ್ ಧಾವಿ ಕ್ಲಾಶೆಚೆ ಮಾರ್ಕ್ಸ್ ಪ್ರಮುಕ್ ಅಂಶ್ ಜಾತಾತ್. ದೆಕುನ್ ತುವೆಂ ಶಿಕಪ್ ಪಯ್ಲೆಂ ಅಖೇರ್ ಕರಿಜೆ. ಆನಿ ತುವೆಂ ಗಾವ್ಪಿಣ್ ಜಾಂವ್ಚೆಂ.. ತೆಂ ಕೆದಾಳಾಯ್ ಜಾವ್ಯೆತ್. ತುಜೆಂ ಕೊಲೆಜಿಚೆಂ ಶಿಕಾಪ್ ಜಾಲ್ಲ್ಯಾ ಉಪ್ರಾಂತ್ ಸಮೇತ್ ತುವೆಂ ಸಂಗೀತ್ ಕ್ಲಾಶಿಕ್ ವಚ್ಯೆತ್, ಸಂಗೀತ್ ಶಿಕ್ಯೆತ್. ತೊ ವಿಶಯ್ ವ್ಹಡ್ಲೊ ನ್ಹಂಯ್."

ಪರ್‍ವತಾಬರಿ ಉದೆಲ್ಲೊ ಸಮಸ್ಸೊ ಹಿಮಾಬರಿ ಕರ್ಗೊನ್ ಗೆಲೊ. ಜೆಸ್ಸಿಚಾ ಮನಾಂತ್ಲಿಂ ಮೊಡಾಂ ನಿತ್ಳಾಲಿಂ. ಸಿ.ಬೆನ್ನಿಚೆಂ ಹರ್‍ಯೆಕ್ ಉತಾರ್ ತಾಚಾ ಮತಿಕ್ ಬರ್‍ಯಾನ್ ನಾಟ್ವಾಲೆಂ. ತಾಚೆ ಥಂಯ್ ಆತ್ಮ್-ವಿಶ್ವಾಸ್ ಝಳ್ಕಾಲೊ.

"ಸಿಸ್ಟರ್ ಹಾವೆಂ ಕೆದ್ಳಾಯೀ ಗಾವ್ಪಿಣ್ ಜಾವ್ಯೆತ್‌ಗೀ?"

"ಹೋ.. ಖಂಡಿತ್, ದೆವಾಚಿ ಖುಶಿ ಆಸ್ಲ್ಯಾರ್ ತುಂ ಖಂಡಿತ್ ಏಕ್ ಬರಿ ಗಾವ್ಪಿಣ್ ಜಾಂವ್ಕ್ ಸಕ್ತೆಲೆಂಯ್". ಜೆಸ್ಸಿ ಆನಿ ಸಿ.ಬೆನ್ನಿ ಸಾಂಗಾತಾ ಉಭಿಂ ಜಾಲಿಂ. ಜೆಸ್ಸಿನ್ ಆಪ್ಲಿಂ ದುಃಖಾಂ ಪುಸ್ಲಿಂ.

"ಸೊರ್ರಿ ಸಿಸ್ಟರ್, ಆನಿ ಮುಕಾರ್ ಹಾಂವ್ ಬರೆಂ ಕರ್ನ್ ಶಿಕ್ತಾಂ.". ಭಗ್ಸಾಣೆಂ ಮಾಗ್ಲೆಂ ತಾಣೆಂ.

"ಹುಂ ಗುಡ್, ವೆರಿ ಗುಡ್ ಗರ್ಲ್"

ಆತಾಂ ಖರೆಂಪಣಿಂ ಜೆಸ್ಸಿಕ್ ಅಪುಣ್ ಸತ್‌ಚ್ ಸಿಂಡ್ರೆಲಾ ಮ್ಹಣ್ ಭೊಗ್ಲೆಂ. ಆಪ್ಲ್ಯಾ ಆಂಜ್ ಭಡ್ವ್ಯಾ ಸಾಂಗಾತಾ ಸಂತೊಸಾನ್ ಮಾಳ್ಯೆಚಿಂ ಮೆಟಾಂ ದೆಂವಾಲಾಗ್ಲೆಂ.

ಕಥಾಂಕರ್ ಮುಖ್‌ಪಾನಾಕ್

ಆದ್ಲ್ಯಾ ಕಥಾಂಕರ್ ಪಾನಾಕ್: 1, 2, 3, 4, 5

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications