ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 58. ಖೊಡೊ
ಎಲ್.ಜೆ.ಬ್ರಹ್ಮಾವರ್: ಕೊಂಕ್ಣೆಂತ್ ಪಾಟ್ಲ್ಯಾ ಸಾತ್-ಆಟ್ ವರ್ಸಾಂ ಥಾವ್ನ್ ಸಾಮಾಜಿಕ್, ಧಾರ್ಮಿಕ್, ಲೇಖನಾಂ ಬರವ್ನ್ ಆಯಿಲ್ಲೊ ಮೂಳ್ ಶಿರ್ವಾಂ ಫಿರ್ಗಜೆಚೊ ಲಿಗೋರಿ ಡಿ’ಸೋಜ್, ಪ್ರಸ್ತುತ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಅಪ್ರೂಪಾಯೆನ್ ಕಾಣ್ಯೊ ಆನಿ ಪದಾಂ/ಕವಿತಾ ಬರಯ್ತಾ.
ಎಲ್.ಜೆ.ಬ್ರಹ್ಮಾವರ್
ಪೊಲಿಸ್ ಸ್ಟೇಶನಾ ಥಾವ್ನ್ ಭಾಯ್ರ್ ಸರ್ಲ್ಲ್ಯ್ ಚವರ್ಲೆಟ್ ಕಾರಾರ್ ದೋಗ್ ಪೊಲಿಸ್ ಒಸ್ವಾಲ್ಡಾಕ್ ಖೊಡೊ ಶಿರ್ಕಾವ್ನ್ ಏರ್ಪೋರ್ಟಾಕ್ ಹಾಡಿಲಾಗ್ಲೆಂ. ಕುವಯ್ಟ್ ಏರ್ಬಸ್ ಮುಂಬಯ್ ವೆಚ್ಯಾ ವಾಟೆರ್ ತಯಾರ್ ಜಾಲ್ಲೆಂ. ಲೋಕ್ ಆಪಾಪ್ಲಿ ಲಗೇಜ್ ಕೌಂಟರಾರ್ ಘಾಲುನ್ ಬೋರ್ಡಿಂಗ್ ಪಾಸ್ ಘೆತಾಲೊ. ತಾಂತ್ಲಿಂ ಥೊಡಿಂ ಹಾಂಗಾಸರ್ ದೋನ್ ವರ್ಸಾಂ ಸಂಪವ್ನ್ ಆಪ್ಲ್ಯಾ ಮಾಂಯ್ ಗಾಂವಾಕ್ ವೆತಾತ್ ಜಾಲ್ಲ್ಯಾನ್ ಭೋವ್ ಚಡ್ ಖುಶಾಲ್ ದಿಸ್ತಾಲಿಂ.
ಒಸ್ವಾಲ್ಡಾಕ್ ಖೊಡ್ಯಾರ್ಚ್ಚ್ ಏರ್ಪೋರ್ಟಾ ಭಿತರ್ ವರುನ್ ಎಕಾ ಕುಡಾಂತ್ ಬಸಯ್ಲೊ. ಕಾರಾರ್ ಥಾವ್ನ್ ದೆಂವ್ತಾನಾ ತಕ್ಲಿ ಪಂದಾ ಘಾಲ್ಲ್ಯಾ ಒಸ್ವಾಲ್ಡಾನ್ ಭಿತರ್ ಕುಡಾಕ್ ಪಾವ್ತಾನಾಂಚ್ ಅಪ್ಲಿ ತಕ್ಲಿ ವಯ್ರ್ ಉಕಲ್ಲಿ. ಹಾಕಾ ಕಾರಾಣಾಂ ಸಭಾರ್ ಆಸ್ತಿತ್. ಪುಣ್ ಖೊದೊ ಫಕತ್ತ್ ಅನೀತಿಚ್ಯಾ ವಾಟೆನ್ ಚಲೊನ್, ಜಯ್ಲ್ ಶಿಕ್ಶಾ ಜಾಲ್ಲ್ಯಾಂಕ್ ಮಾತ್ರ್ ಶಿರ್ಕಾಯ್ತಾಲೆ. ಕೊಣ್ಯ್ ವಳ್ಕಿಚಿಂ ಆಪ್ಣಾಕ್ ಪಳೆತಿತ್ಗಾಯ್ ಮ್ಹಳ್ಳೆಂ ಜೆರಾಲ್ ಚಿಂತಾಪ್ ಒಸ್ವಾಲ್ಡಾಚೆಂ ಜಾವ್ನ್ ಆಸ್ಲ್ಲೆಂ. ಗಾಂವ್ಚ್ಯಾನಿ ಪಳೆಲ್ಯಾರ್ ಹಾಂಗಾಚಿ ಖಬಾರ್ ವಾರ್ಯಾ ವೆಗಾನ್ ಗಾಂವಾಂತ್ ವಿಸ್ತಾರೊನ್ ವೆತಾಲಿ ಜಾಲ್ಲ್ಯಾನ್ ಒಸ್ವಾಲ್ಡ್ ಭಿಂಯೆವ್ನ್ ಗೆಲ್ಲೊ.
ಕುಡಾಂತ್ ಬಸ್ಲೆಲ್ಯಾ ಒಸ್ವಲ್ಡಾಚಾ ದೊಳ್ಯಾಂತ್ ದುಖಾಂ ಸವೆಂ ನಾನಾಂತಿಂ ಚಿಂತ್ನಾಂ ಯೆತಾಲಿಂ.
"ಛೇ... ಮ್ಹಜ್ಯಾ ಎಕಾ ಚೂಕಿ ವರ್ವಿಂ ಆಸಲೆಂ ಅನಾಹುತ್ ಘಡ್ಲೆಂ. ಮ್ಹಜೊ ಹಾತ್ ದರ್ಲ್ಲ್ಯಾ ಡೊರಾನ್ಯ್ ಮ್ಹಜೊ ಸಾಂಗಾತ್ ಸೊಡ್ಲೊ. ಏಕ್ ದೀಸ್ಯ್ ಮ್ಹಾಕಾ ಪಳಂವ್ಕ್ ತೆಂ ಆಯ್ಲೆಂ ನಾ!"
"ತುಂ ರಡ್ತಾಯ್ ಕಿತ್ಯಾಕ್?" ಅಂತಸ್ಕರ್ನಾಚೊ ದುಸ್ರೊ ತಾಳೊ ಸಾಂಗ್ತಾಲೊ "ತುಜೆಂ ರಡ್ಣೆಂ ಆಯ್ಕೊಂಕ್ ಹಾಂಗಾ ಕೊಣ್ಯ್ ನಾಂತ್. ತುಜ್ಯಾ ಹಾತಾಂನಿಚ್ ತುಜ್ಯಾ ಫುಡಾರಾಕ್ ಕುರಾಡ್ ಮಾರ್ಲ್ಯಾಯ್. ಡೋರಾ ಆತಾಂ ಆಜ಼ಾದ್...! ಪಿಂಜ್ರ್ಯಾಂತ್ಲೆಂ ಭಾಯ್ರ್ ಪಡ್ಲೆಲೆಂ ಸುಕ್ಣೆಂ! ಖಂಯ್ ಜಾಯ್ ಥಂಯ್ ತಾಕಾ ವಚೊಂಕ್ ಯೆತಾ. ತಾಕಾ ಆತಾಂ ವಿಚಾರ್ಚೆ ಕೊಣ್ಯ್ ನಾಂತ್. ತರ್ಯೀ ಮ್ಹಜೊ ಫುಡಾರ್ ಕಿತೆಂ ಜಾತಲೊ? ಆತಾಂ ಹಾವೆಂ ವೆಚೆಂ ತರ್ಯೀ ಖಂಯ್ಚರ್? " ಹ್ಯಾ ಚಿಂತ್ನಾಂ ಬರಾಬರ್ ಪರ್ತ್ಯಾಕ್ ದುಖಾಂ ಒಸ್ವಾಲ್ಡಾಚಾ ದೊಳ್ಯಾಂತ್ಲ್ಯಾನ್ ಭಾಯ್ರ್ ಪಡ್ಲಿಂ.
ತಕ್ಲಿ ಪಂದಾ ಘಾಲುನ್ ಬಸ್ಲೆಲ್ಯಾ ಒಸ್ವಾಲ್ಡಾಚ್ಯಾ ಭುಜಾಂಚೆರ್ ಕೊಣಾಚೊ ಹಾತ್ ಚರ್ಲೆಲ್ಯಾ ಪರಿಂ ಜಾತಾನಾ,
"ರಡಾನಾಕಾ ಒಸ್ವಾಲ್ಡ್ ಧಯ್ರ್ ಘೆ....! ಮನಿಸ್ ಪೊಂಡಾಂತ್ ಪಡ್ತಾ, ಪಡ್ಲೆಲ್ಯಾ ತಾಣೆ ಪರ್ತ್ಯಾಕ್ ಉಟೊನ್ ಉಭೊ ರಾವೊಂಕ್ ಜಾಯ್. ರಡ್ಚೆಂ ಪುರುಶಾಚೆಂ ಲಕ್ಶಣ್ ನ್ಹಂಯ್."
ತಾಚ್ಯಾ ಖಾಂದ್ಯಾರ್ ತಾಚ್ಯಾ ಕಂಪೆನಿಚ್ಯಾ ಮಂದೂಪಾಚೊ ಹಾತ್ ಆಸ್ಲ್ಲೊ.
ಒಸ್ವಾಲ್ಡಾನ್ ಆಪ್ಲೆ ದೊಳೆ ಉಭಾರುನ್ ತಾಕಾಚ್ ಪಳೆಲೆಂ. ಆಪ್ಲ್ಯಾ ತೊಂಡಾ ವಯ್ಲ್ಯಾ ಪಶ್ಚತ್ತಾಪಾಚ್ಯಾ ಖುಣಾಂಕ್ ತೊ ಪಯ್ಸ್ ಕರುಂಕ್ ಸಕ್ಲೊ ನಾ.
"ಆತಾಂ ವೇಳ್ ಉತ್ರೊನ್ ಗೆಲಾ.....! ತುವೆಂ ಹಾಚ್ಯಾ ಆದಿಂಚ್ ದೊಳೆ ಉಗ್ತೆ ಕರಿಜಾಯ್ ಆಸ್ಲ್ಲೆ. ಹಾಂವ್ಯ್ ಆತಾಂ ಕಾಂಯ್ ಕರುಂಕ್ ಸಕಾನಾ. ಹೊ ಗಾಂವ್ ಸತಾ-ನಿತೆನ್ ಕಾಮ್ ಕರ್ತೆಲ್ಯಾಂಕ್ ವರೊ. ಹಾಂಗಾಸರ್ ಕಾಮ್ ಕರ್ತೆಲ್ಯಾ ಹರ್ಯೆಕ್ಲ್ಯಾನ್ ಆಮಿ ಹ್ಯಾ ಗಾಂವ್ಚೆ ಮನಿಸ್ ನ್ಹಂಯ್ ಮ್ಹಳ್ಳೆಂ ಚಿಂತಾಪ್ ಘೆವ್ನ್ ವಾವ್ರಿಜಾಯ್. ಆನಿ ಹಾಂಗಾಚಾ ಕಾನೂನ್ ಕಾಯ್ದ್ಯಾಕ್ ಮಾನ್ ದೀವ್ನ್ ತಕ್ಲಿ ಬಾಗಾವ್ನ್ ಚಲಾಜಾಯ್. ಜರ್ತರ್ ಕಾಯ್ದ್ಯಾ ವಿರೋದ್ ಆಸ್ಲ್ಲೆಂ ಮನೋರಂಜನ್ ಜಾಯ್ ಜಾಲ್ಯಾರ್ ತುವೆಂ ತುಜ್ಯಾ ಗಾಂವಾಕ್ ಗೆಲ್ಯಾ ಉಪ್ರಾಂತ್ ಕರಿಜಾಯ್ ಆಸ್ಲ್ಲೆಂ. ಹಿ ಚೂಕ್ ತುಜಿಚ್ಚ್ ಒಸ್ವಾಲ್ಡ್....!"
ಮಂದೂಪಾಚಾ ಉತ್ರಾಂಕ್ ಕಾಂಯ್ಚ್ ಜಾವಾಬ್ ದೀಂವ್ಕ್ ಒಸ್ವಾಲ್ಡಾಕ್ ಸಾದ್ಯ್ ಜಾಲೆಂ ನಾ.
"ತುಜೊ ಪಾಸ್ಪೋರ್ಟ್, ಟಿಕೆಟ್, ಆನಿ ಬೋರ್ಡಿಂಗ್ ಪಾಸ್....!" ಮಂದೂಪಾನ್ ಒಸ್ವಾಲ್ಡಾಚಾ ಹಾತಿಂತ್ ಚೆಪ್ಲೆಂ.
"ತುಜೊ ಸ್ಪೊನ್ಸರ್ ಬರೊ ಮನಿಸ್ ಜಾಲ್ಲ್ಯಾ ವರ್ವಿಂ ತುಕಾ ಆಜ್ ವೆಚೆಂ ಭಾಗ್ ಮೆಳ್ಳೆಂ. ನಾತ್ಲ್ಯಾರ್ ತುಜ್ಯಾ ಕರ್ನ್ಯಾಂಕ್ ದೋನ್ ವರ್ಸಂ ತರ್ಯೀ ಜಯ್ಲಾಂತ್ ತುವೆಂ ಬಸಾಜಾಯ್ ಆಸ್ಲ್ಲೆಂ. ಹಾಂಗಾಸರ್ ಏಕ್ ಲ್ಹಾನ್ ಬ್ಯಾಗ್ ಆಸಾ. ಕಂಪೆನಿಚಾ ಥೊಡ್ಯಾ ಇಶ್ಟಾಂನಿ ಸಾಂಗಾತಾ ಮೆಳೊನ್ ಥೊಡೆಂ ಗಿಪ್ಟ್ ತುಕಾ ದಿಲಾಂ. ಆನಿ ಮುಕಾರ್ ಪುಣಿ ಬರೊ ಜಾ. ಹ್ಯಾ ಗಾಂವಾಕ್ ತುಕಾ ಪಾಟಿಂ ಯೇಂವ್ಕ್ ಸಾದ್ಯ್ ನಾ. ಪುಣ್ ದುಸ್ರ್ಯಾ ಖಂಯ್ಚಾಯ್ ಗಾವಾಕ್ ತುವೆಂ ವಚ್ಯೆತ್....!"
ಮಂದೂಪಾನ್ ಸಾಂಗ್ತಾನಾ ಒಸ್ವಾಲ್ಡಾಚಾ ದೊಳ್ಯಾಂತ್ಲ್ಯಾನ್ ದುಖಾಂ ದೆಂವ್ಲಿಂ. ಮಂದೂಪ್ ತಾಕಾ ಆದೇವ್ಸ್ ಮಾಗೊನ್ ಪಾಟಿಂ ಪರ್ತಾಲೊ. ಥೊಡ್ಯಾ ವೆಳಾನ್ ಎಕಾ ಪೊಲಿಸಾನ್ ಯೇವ್ನ್ ತಾಕಾ ಪ್ಲೇನಾ ಭಿತರ್ ಆಪವ್ನ್ ವೆಲೆಂ. ಪ್ಲೆನಾ ಭಿತರ್ ಪಾವ್ಲ್ಲ್ಯಾ ಉಪ್ರಾಂತ್ ತಾಚ್ಯಾ ಹಾತಾಂತ್ಲೊ ಖೊಡೊ ನಿಕ್ಳಾಯ್ಲೊ. ಏರ್ಹೊಸ್ಟೆಸಾನ್ ದಾಖಯಿಲ್ಲ್ಯಾ ಪರ್ಮಾಣೆಂ ಒಸ್ವಾಲ್ಡ್ ಆಪ್ಲಿ ಬಸ್ಕಾ ಘೆವ್ನ್ ಬಸ್ಲೊ.
ರಾತಿಚಿಂ ವೊರಾಂ ಇಕ್ರಾ ಜಾಲ್ಲಿಂ. ಕುವೆಯ್ಟ್ ಏರ್ವೇಸ್ ಕುವೆಯ್ಟ್ ಏರ್ಪೋರ್ಟಾ ಥಾವ್ನ್ ಸುಟೊಂಕ್ ತಯಾರ್ ಜಾಲ್ಲೆಂಒಸ್ವಾಲ್ಡಾಕ್ ಹ್ಯಾ ಗಾಂವಾಂತ್ ಥಾವ್ನ್ ತಿಸ್ರ್ಯಾ ಪಾವ್ಟಿಂಚೆಂ ಪಯ್ಣ್. ಹೆಂ ಪಯ್ಣ್ ತಾಚೆಂ ನಿಮಾಣೆಂ ಪಯ್ಣ್ ಜಾಂವ್ಕ್ ಪಾವ್ತೆಲೆಂ ಮ್ಹಣ್ ತಾಣೆ ಸಪ್ಣಾಂತ್ಯ್ ಚಿಂತುಂಕ್ ನಾತ್ಲ್ಲೆಂ. ಹರ್ಯೆಕ್ ಪಾವ್ಟಿಂ ತೊ ಹೆರಾ ಭಾಶೆನ್ ಹಾಸೊನ್ ಖೆಳೊನ್, ಭೋವ್ ಖುಶಾಲಾಯೆನ್ ವೆತಾಲೊ ಜಾಲ್ಯಾರ್, ಹ್ಯಾ ಪಾವ್ಟಿಂ ತಾಚೆಂ ಕಾಳಿಜ್ ಭೋವ್ ದುಖಾಂತ್ ಭರ್ಲ್ಲೆಂ.
ಪ್ಲೇನ್ ಪಂಚ್ವೀಸ್ ಹಜಾರ್ ಪೀಟಾಂಚಾ ಉಂಚಾಯೆರ್ ಪಾವ್ಲ್ಲೆಂ ಆನಿ ಆಟ್ಶಿಂ ಕಿ.ಮಿ. ವೆಗಾನ್ ದಾಂವ್ತಾಲೆಂ. ಏರ್ಹೊಸ್ಟೆಸ್ ರಾತಿಚೆಂ ಜೆವಾಣ್ ಘೆವ್ನ್ ಆಯಿಲ್ಲೆಂ. ಪುಣ್ ಒಸ್ವಾಲ್ಡಾಕ್ ಕಿತೆಂಚ್ ಖಾಂವ್ಕ್ ನಾಕಾ ಆಸ್ಲ್ಲೆಂ. ತಾಚಿಂ ಚಿಂತ್ನಾಂ ಪರತ್ ಘುಂವೊಂಕ್ ಲಾಗ್ಲಿಂ.
"ತುಕಾ ಆಪವ್ನ್ ವರುಂಕ್ ತಿತ್ಲೆಂ ಸುಲಭ್ ನಾ ಡೊರಾ....!" ನವೆಂಚ್ ಕಾಜಾರ್ ಜಾಲ್ಲ್ಯಾ ಒಸ್ವಾಲ್ಡಾನ್ ಆಪ್ಲ್ಯಾ ಹೊಕ್ಲೆಕ್ ಸಮ್ಜಂವ್ಚೆಂ ಪ್ರಯ್ತ್ನ್ ಕೆಲೆಂ. "ತುಂ ನೆಣಾಂಯ್ ಏಕ್ ವೀಜಾ ಕಾಡುಂಕ್ ಕಿತ್ಲೆ ಕಶ್ಟ್ ಆಸಾತ್ ತೆ....! ಲಾಖಾ ಗಟ್ಲ್ಯಾನ್ ಪಯ್ಶೆ ಭರುಂಕ್ ಜಾಯ್.... ಪಯ್ಶೆ ದಿಲ್ಯಾರ್ಯ್ ಕಾಮ್ ನಾಸ್ತಾನಾ ಬಾನಾಂವ್ಚೆ ಮಸ್ತ್ ಜಣ್ ಆಸಾತ್!"
"ತುಕಾ ಜಾಯ್ನಾಂ ಜಾಲ್ಯಾರ್ ಮ್ಹಜಿ ಕಜ಼ಿನಾಂ ಆಸಾತ್ ಹಾಂವ್ ತಾಂಕಾ ವಿಚಾರ್ತಾಂ.....!" ಡೋರಾಚ್ಯಾ ತೊಂಡಾರ್ ಬೆಜಾರಾಯ್ ಉಟೊನ್ ದಿಸ್ತಾಲಿ.
"ನಾಕಾ....!" ಒಸ್ವಾಲ್ಡಾಕ್ ಕಿತೆಂ ಕರ್ಚೆಂ ತೆಂ ಸಮ್ಜಾಲೆಂ ನಾಂ. "ತಾಂಚೆಲಾಗಿಂ ತುಂ ವಿಚಾರಿನಾಕಾ... ಹಾಂವ್ಚ್ ಟ್ರೈ ಕರ್ತಾಂ!" ಡೊರಾಕ್ ತಾಣೆ ಬಾಸ್ ದಿತಾನಾ ತೆಂ ಮತಿಂತ್ಚ್ ಸಂತೊಸ್ಲೆಂ.
ಒಸ್ವಾಲ್ಡ್ ಆಪ್ಲ್ಯಾ ಮೊಗಾಕ್ ಆದೇವ್ಸ್ ಮಾಗೊನ್ ಗಲ್ಪಾಕ್ ಪಾಟಿಂ ಆಯ್ಲೊ. ದೀಸ್ ದಾಂವ್ತಾಲೆ.
ಡೊರಾಕ್ ಆತಾಂ ಎಕ್ಸುರ್ಪಣ್ ದೊಸುಂಕ್ ಲಾಗ್ಲೆಂ. ಒಸ್ವಾಲ್ಡಾಚ್ಯಾ ಘರಾ ರಾಂವೊಂಕ್ಯ್ ತಾಕಾ ಸಭಾರ್ ತ್ರಾಸ್ ಜಾಲ್ಲೆ. ಕಾಮಾ ಥಾವ್ನ್ ಯೆತಾನಾ ಥೊಡೊ ವೇಳ್ ಜಾಲ್ಯಾರ್ ದುಬಾವಾಚ್ಯಾ ನದ್ರೆಂತ್ ಒಸ್ವಾಲ್ಡಾಚಾ ಘರ್ಚಿಂ ದೆಖ್ತಾಲಿಂ. ಘರಾ ಥಾವ್ನ್ ಕಾಮಾಕ್ ವಚೊಂಕ್ಯ್ ತಾಕಾ ದೋನ್ ಬಸ್ಸಾಂ ಬದ್ಲಿ ಕರ್ನ್ ವಚೊಂಕ್ ಆಸ್ಲ್ಲೆಂ. ಒಸ್ವಾಲ್ಡಾಚ್ಯಾ ಘರಾ ವರ್ನಿಂ ಆಪ್ಲೆಂ ಘರ್ ತಾಕಾ ಲಾಗಿಂ ಪಡ್ತಾಲೆಂ ಜಾಲ್ಯಾರ್ಯೀ ಕಾಜಾರಾ ಉಪ್ರಾಂತ್ ಎಕಾ ಚೆಡ್ವಾಚೆಂ ಘರ್ ತಾಚ್ಯಾ ಘೊವಾಚೆಂಚ್ ಘರ್ ಜಾಲ್ಲ್ಯಾನ್ ತೆಂ ಆಪ್ಲ್ಯಾ ಘರಾ ವಚಾನಾಸ್ತಾನಾ ಒಸ್ವಾಲ್ಡಾಚಾ ಘರಾಚ್ ಯೆತಾಲೆಂ.
ಒಸ್ವಾಲ್ಡ್ ಗೆಲ್ಯಾ ಥೊಡ್ಯಾಚ್ ಥೆಂಪಾನ್ ಒಸ್ವಾಲ್ಡಾನ್ ಡೊರಾಕ್ ವಿಜಾ ಕಾಡ್ನ್ ಕುವೆಯ್ಟ್ ಹಾಡಯ್ಲೆಂ. ಡೊರಾ ಆತಾಂ ಕುವೆಯ್ಟ್ ಪಾವ್ಲ್ಲೆಂ. ಹಾಂಗಾಚೆ ರಾಜ್ರಸ್ತೆ ಆನಿ ನಿತಳಾಯ್ ಪಳವ್ನ್ ಡೊರಾಕ್ ವಿಜ್ಮಿತ್ ಜಾಲೆಂ. ತೆಂ ಎಪ್ರಿಲ್ ಮಯ್ನಾಂತ್ ಆಯಿಲ್ಲ್ಯಾ ವರ್ವಿಂ ಹಾಂಗಾಚೊ ಹವೊ ಗಾಂವ್ಚ್ಯಾ ಹವ್ಯಾಕ್ ತಾಳ್ ಪಡ್ತಾಲೊ.
"ಡೊರಾ...., ತುಕಾ ಆತಾಂ ಥೊಡೊ ತೆಂಪ್ ಖಂಯ್ಚರ್ಯೀ ಭಂವೊಂಕ್ ವಚೊಂಕ್ ಜಾಯ್ನಾ. ಹಾಂಗಾಚಾ ರೂಲಿ ರೆಗ್ರ್ಯಾಂ ಪರ್ಮಾಣೆಂ ತುಜಿ ವಿಜಾ ಸ್ಟ್ಯಾಂಪ್ ಜಾವ್ನ್ ತುಜೆ ಐ.ಡಿ. ಕಾರ್ಡ್ ಜಾತಾ ಪಾಅಸೊನ್ ಏಕ್ ಮಹಿನೊ ಲಾಗ್ತಲೊ. ಮ್ಹಜ್ಯಾ ಲಾಗಿಂ ಕಾಂಯ್ ಕಾರ್ ನಾ. ಹಾವೆಂ ವೆಚೆಂ ಬಸ್ಸಾರ್! ಆನಿ ಯೆಂವ್ಚೆಂ ಬಸ್ಸಾರ್! ಸಗ್ಳೊ ದೀಸ್ ತುವೆಂ ಎಕ್ಲ್ಯಾನ್ಚ್ ಘರಾ ಬಸಾಜಾಯ್ ಪಡಾತ್!" ಒಸ್ವಾಲ್ಡಾನ್ ಡೊರಾಕ್ ಸಮ್ಜಾಯ್ಲೆಂ.
"ಕಾಂಯ್ ವ್ಹಡ್ ನಾ! ಪುಣ್ ತುಂ ಸಾಂಜೆರ್ ಥೊಡೆಂ ವೆಗ್ಗಿಂ ಯೇ. ಸಾಕಾಳಿಂ ಗೆಲ್ಲೊ ತುಂ ಥೊಡ್ಯಾ ಪಾವ್ಟಿಂ ರಾತಿಂ ಯೆತಾಯ್. ಹೆಂ ಕಸಲೆಂ ತುಜೆ ಕಾಮ್ ಮ್ಹಳ್ಳೆಂ ಮ್ಹಾಕಾಚ್ ಸಮ್ಜಾನಾ....!" ಡೊರಾ ಉಲಯಿಲ್ಲೆಂ.
"ಹ್ಯಾ ಗಾಂವಾಂತ್ ತಶೆಂಚ್ ಡೊರಾ. ಹಾಂಗಾ ಓವರ್ ಟಾಯ್ಮ್ ಆಸ್ತಾನಾ ಓವರ್ ಟಾಯ್ಮ್ ಕರುಂಕ್ ಜಾಯ್. ಥೊಡ್ಯಾ ಪಾವ್ಟಿಂ ಕಂಪೆನಿಕ್ ಅರ್ಡರಾಂ ವಯ್ರ್ ಆರ್ಡರಾಂ ಯೆತಾತ್. ತೆಂ ಕಾಂಯ್ ಸೊಡುನ್ ಯೆಂವ್ಚೆ ಪರಿಂ ನಾ. ಮ್ಹಜ್ಯಾ ಮಿಶಿನಾರ್ ಹಾಂವ್ ಎಕ್ಲೊಂಚ್ ಆಸಾಂ. ದೆಕುನ್ ಹಾವೆಂಚ್ ಸಗ್ಳೆಂ ಪಳಂವ್ಕ್ ಪಡ್ತಾ. ಆನಿ ಕಾಮ್ ಕೆಲ್ಯಾರ್ ಪಯ್ಶೆಯ್ ಮೆಳ್ತಾತ್ ಪಳೆ. ಆತಾಂ ಮ್ಹಾಕಾ ತುಜ್ಯಾ ವಿಜಾಚೆಮ್ಚ್ ರೀಣ್ ಆಸಾ. ತೆಂ ರೀಣ್ ವೆಗಿಂಚ್ ಫಾರಿಕ್ ಕರುಂಕ್ ಆಸಾ."
ಡೊರಾ ಒಸ್ವಾಲ್ಡಾಚಾ ಹರ್ಯೆಕಾ ಉತ್ರಾಕ್ ಹಾಂ ಕರಿಲಾಗ್ಲೆಂ.
ತೊ ದೀಸ್ ಆಯ್ತಾರ್. ಡೊರಾ ಸಾಂಜೆಚ್ಯಾ ಸಾಡೆ ಚ್ಯಾರ್ ವೊರಾಂಚಾ ಕೊಂಕ್ಣಿ ಮೀಸ್ ಆಯ್ಕೊನ್ ಬಾಯ್ರ್ ಯೆತಾನಾ ಸಭಾರ್ ಜಣಾಂ ವಳ್ಕಿಚಿಂ ಮೆಳ್ಳಿಂ ತಾಂತ್ಲೆಂ ತಾಚೆಂ ಇಶ್ಟಿಣ್ ಲೀನಾ ತಾಕಾ ಚಡ್ ಮೊಗಾಚೆಂ. ಗಾವಾಂತ್ ಲ್ಹಾನ್ ಥಾವ್ನ್ ತಿಂ ಸಾಂಗಾತಾ ವಾಡ್ಲ್ಲಿಂ ಗಾಂವ್ಚೆ ಥೊಡೆ ವಿಶಯ್ ಉಲಾವ್ನ್ ತಾಣಿಂ ಎಕಾ ಮೆಕಾ ಸುಖ್ ದುಖ್ ವಾಂಟುನ್ ಘೆತ್ಲೆಂ. ಲೀನಾ ದೋನ್ ತೀನ್ ಘರಾಂನಿ ಹಾಂಗಾಸರ್ ಪಾರ್ಟ್ ಟಾಯ್ಮ್ ಕರ್ತಾಲೆಂ. ಡೊರಾಕ್ಯ್ ತಾಣೆ ಕಾಮಾಚೊ ಸಹಕಾರ್ ಭಾಸಾಯ್ಲೊ. ಕೊಣಾಲಾಗಿಂ ಪುಣಿಂ ಉಲವ್ನ್ ಟಿಚರಿಚೆಂ ಕಾಮ್ ಮೆಳಾಶೆಂ ಕರ್ತಾಂ ಮ್ಹಣಾಲಾಗ್ಲೆಂ.
ದೀಸ್ ಪಾಶಾರ್ ಜಾಲೆ. ಡೊರಾಚೆಂ ಇಶ್ಟಿಣ್ ಲೀನಾ ಡೊರಾಗೆರ್ ಆಯಿಲ್ಲೆಂ. ಡೊರಾ ಆಪ್ಲ್ಯಾ ಪತಿರಾಯಾ ವಿಶ್ಯಾಂತ್ ಸಾಂಗ್ತಾನಾ ತೆಂ ಥೊಡೊ ವೇಳ್ ಥಟಕ್ ಜಾಲೆಂ ತೊ ಖಂಯ್ಚರ್ ಪುಣಿ ವಾಟ್ ಚುಕ್ಲಾ ಮ್ಹಳ್ಳೆಂ ಸಮ್ಜೊಂಕ್ ತಾಕಾ ವೇಳ್ ಗೆಲೊ ನಾ.
"ರಾತಿಚೆಂ ಥೊಡ್ಯಾ ಪಾವ್ಟಿಂ ಪಿಯೆವ್ನ್ ಯೆತಾ. ರಾತಿಚೆಂ ತಾಚ್ಯೆಲಾಗಿಂ ಉಲಂವ್ಚ್ಯಾ ಪರಿಂ ನಾ. ಸಕಾಳಿ ಉಟ್ತಾ ಕಾಮಾಕ್ ವೆತಾ. ಹಾಂವ್ ಹಾಂಗಾಸರ್ ಯೆತಾನಾ ಮಸ್ತ್ ಸಪ್ಣಾಂ ಪಳವ್ನ್ ಆಯಿಲ್ಲಿಂ. ಏಕ್ ಬರ್ಯಾ ಕಾಮಾಕ್ ಲಾಗೊನ್ ಆಮ್ಚೊ ಫುಡಾರ್ ಬಾಂದುಂಕ್ ಜಾಯ್ ಮ್ಹಳ್ಳೆಂ ಸಪಾಣ್ ಮ್ಹಜೆಂ ಆಸ್ಲ್ಲೆಂ. ಆತಾಂ ತೆಂ ಚೂರಾನ್ ಚೂರ್ ಜಾಲಾಂ. ದಿಸಾಚಿಂ ಮ್ಹಾಕಾ ನಾಕಾ ಜಾಲ್ಲಿಂ ಚಿಂತ್ನಾಂ ಯೆತಾತ್. ರಾತಿಚೆಂ ನೀದ್ ಪಡಾನಾ." ಡೊರಾನ್ ಸಾಂಗ್ಲೆಲೆಂ ಆಯ್ಕೊನ್ ಲೀನಾಕ್ ಆಪ್ಲ್ಯಾ ಇಶ್ಟಿಣೆ ಖಾತಿರ್ ಕೊತೆಂ ತರ್ಯೀ ಕರುಂಕ್ ಜಾಯ್ ಮ್ಹಳ್ಳೆಂ ಚಿಂತಾಪ್ ಆಯ್ಲೆಂ.
*************
"ಒಸ್ವಾಲ್ಡ್... ತುಂ ಯೆತಾನಾ ತುಜ್ಯಾ ತೊಂಡಾಚೊ ವಾಸ್, ಆನ್ ತುಂ ಪಿಯೆವ್ನ್ ಯೆತಾಯ್....? ತುಂ ಖಂಯ್ ವೆತಾಯ್ ಆನ್ ಕಿತ್ಲ್ಯಾ ವೊರಾರ್ ತುಜೆಂ ಕಾಮ್ ಕಾಬಾರ್ ಜಾತಾ ಹ್ಯಾ ವಿಶಿಂ ಹಾವೆಂ ಸಂಪೂರ್ಣ್ ಮಾಹೆತ್ ಘೆತ್ಲ್ಯಾ. ಫಾಲ್ಯಾಂ ಸಾಕಾಳಿಂ ಹಾಂವ್ಯ್ ತುಜ್ಯಾ ಬರಾಬರ್ ಯೇವ್ನ್ ತುಜ್ಯಾ ಮೆನೆಜರಾಕ್ ಮೆಳ್ತೆಲಿಂ...!"
"ಛೆ...ಛೆ... ತುವೆಂ ಆಮ್ಚಾ ಆಫೀಸಾಕ್ ಯೆಂವ್ಚೆಂ ನಾಕಾ!"
"ಕಿತ್ಯಾಕ್ ಹಾವೆಂ ಯೇಂವ್ಕ್ ನಜೊ. ಹಾಂವ್ ಯೆತಲಿಂಚ್!"
"ಹಾವೆಂ ಕಾಮ್ ಕರ್ಚಾ ಥಂಯ್ ಸಗ್ಳೆ ದಾದ್ಲೆಚ್ ಆಸಾತ್! ತೆ ಮ್ಹಾಕಾ ಹಾಸ್ತಿತ್....! ಮ್ಹಜೆಂ ಮಟ್ಟ್ ಉಣೆಂ ಜಾಯ್ತ್!"
"ತುಮ್ಚಾ ಕಂಪೆನಿಂತ್ ಬಾಯ್ಲಾಂ ಕಾಮಾಕ್ ನಾಂತ್.....?"
"ಬಾಯ್ಲಾಂ ಕಾಮಾಕ್ ಆಸಾತ್, ಪುಣ್ ತಾಂಚೆಂ ಡಿಪಾರ್ಟ್ಮೆಂಟ್ ವಿಂಗಡ್ ಆಸಾ. ಥಂಯ್ಚರ್ ತಿಂಚ್ ವಾವುರ್ತಾತ್. ದಾದ್ಲೆ ಕಾಂಯ್ ಥಂಯ್ಚರ್ ವಚಾನಾಂತ್ ದೆಕುನ್ ತುವೆಂ ಯೆಂವ್ಚೆಂ ಮ್ಹಾಕಾ ಸಾರ್ಕೆಂ ದಿಸಾನಾ ಡೊರಾ.....!"
ಸದಾಂಚೆ ಸವಯೆ ಪರ್ಮಾಣೆಂ ಒಸ್ವಾಲ್ಡ್ ಉಟೊನ್ ಕಾಮಾಕ್ ಗೆಲ್ಲೊ. ಒಸ್ವಾಲ್ಡ್ ಗೆಲ್ಲ್ಯಾ ಥೊದ್ಯಾಚ್ ವೆಳಾನ್ ಘರ್ಚ್ಯಾ ದಾರಾಚಿ ಕಾಂಪಿಣ್ ವಾಜ್ಲಿ. ಡೊರಾನ್ ದಾರ್ ಉಘಡ್ತಾನಾ ದೋಗ್ ಘಟ್-ಮುಟ್ ತರ್ನಾಟೆ ಥಂಯ್ಚರ್ ಉಭೆ ಆಸ್ಲ್ಲೆ. ಡೊರಾಕ್ ತಾಂಚಿ ವಳಕ್ ನಾತ್ಲೆಲಿ.
"ಕೋಣ್ ತುಮಿಂ. ತುಮ್ಕಾಂ ಕೋಣ್ ಜಾಯ್ ಆಸ್ಲ್ಲೆಂ?"
"ಒಸ್ವಾಲ್ಡಾಕ್ ಥೊಡೆಂ ಆಪಯ್..... ಆಮ್ಕಾಂ ತಾಚ್ಯೆಲಾಗಿಂ ಥೊಡೆಂ ಕಾಮ್ ಆಸಾ!" ಜವಾಬ್ ದಿಲಿ ತಾಣಿಂ
"ತೊ ಹಾಂಗಾಸರ್ ನಾ. ತೊ ಕಾಮಾಕ್ ಗೆಲಾ೧"
ತುಜ್ಯಾ ಘೊವಾನ್ ಆಮ್ಚ್ಯಾ ಚ್ಯಾರ್ ಜಣಾಂಚಾ ಫಂಡಾಂತ್ಲೆ ಪಾಂಯ್ಶಿ ಡಿನಾರ್ ರೀಣ್ ಕಾದ್ಲ್ಯಾತ್. ತೆ ಪಯ್ಶೆ ಆಜ್ ದಿತಾಂ ಫಾಲ್ಯಾಂ ದಿತಾಂ ಮ್ಹಣೊನ್ ಪಾಂಚ್ ಮಹಿನೆ ಜಾಲೆ. ತಾಕಾ ತೆ ಪಯ್ಶೆ ಫಾರಿಕ್ ಕರುಂಕ್ ಸಾಂಗ್. ನಾತ್ಲ್ಯಾರ್ ಪರಿಣಾಮ್ ಉಲ್ಟೊ ರಾವಾತ್. ತಾಚೆ ಲಾಗ್ಚೆ ಕಶೆ ವಸೂಲ್ ಕರುಂಕ್ ಜಾಯ್ ತೆಂ ಅಮಿ ಜಣಾಂಯ್..." ತಾಣಿಂ ಡೊರಾಕ್ ಬೆಶ್ಟಾಯ್ಲೆಂ. ಥೊಡ್ಯಾ ವೆಳಾನ್....
"ತುಕಾ ಹಿ ಗಜಾಲ್ ಕಳಿತ್ ನಾ ಆಸ್ತೆಲಿ. ತೊ ರಾತಿಚೆಂ ಗ್ಯಾಂಬ್ಲಿಂಗ್ ಖೆಳ್ತಾ. ತೊ ತಾಂತುಂಚ್ ಸಂಪೂರ್ಣ್ ಬುಡೊನ್ ಗೆಲಾ....!"
ಡೊರಾ ಹಿ ಖಬಾರ್ ಆಯ್ಕೊನ್ ಸಂಪೂರ್ಣ್ ಗಳೊನ್ ಗೆಲೆಂ. ತುರಂತ್ ತಾಣೆಂ ಲೀನಾಕ್ ಆಪಯ್ಲೆಂ. ಮ್ಹಾಕಾ ಹ್ಯಾ ಖರ್ಗಾಂತ್ಲೆಂ ಕಶೆಂ ಪುಣ್ಯ್ ವಾಂಚಯ್ ಮ್ಹಣ್ ತೆಂ ಪರಾತಿಲಾಗ್ಲೆಂ.
"ಡೊರಾ.... ತುಂ ಭಿಯೆನಾಕಾ. ಆಜ್ ಒಸ್ವಾಲ್ಡಾಚಾ ತೊಂಡಾ ಥಾವ್ನ್ ಖರಿ ಗಜಾಲ್ ಜಣಾ ಜಾ. ಘರಾ ಥಾವ್ನ್ ಭಾಯ್ರ್ ಯೇವ್ನ್ಚ್ ತಾಕಾ ಬೂದ್ ಶಿಕಯ್ ಆನಿ ಹಾಂಯ್ ತುಕಾ ವರುಂಕ್ ಯೆತೆಲಿಂ....!" ಲೀನಾನ್ ಧಯ್ರ್ ದಿಲೆಂ
ಡೊರಾನ್ ಆಜ್ ಘಟ್ ನಿಚೆವ್ ಕೆಲೊ.
ರಾತಿಂ ಘರಾ ಆಯಿಲ್ಲ್ಯಾ ಒಸ್ವಾಲ್ಡಾ ಲಾಗಿಂ ಡೊರಾನ್ ಸಗ್ಳೊ ಪ್ರಸ್ತಾಪ್ ಕಾಡ್ಲೊ. ಪಯ್ಲೆಂ ಒಸ್ವಾಲ್ಡಾನ್ ನೆಗಾರ್ ಕೆಲೆಂ ಜಾಲ್ಯಾರ್ಯೀ ಡೊರಾ ಘರ್ ಸಾಂಡುನ್ ವೆತಾನಾ,
"ಡೊರಾ ತುಂ ಖಂಯ್ಚರ್ಯೀ ವಚೆಂ ನಾಂಯ್. ತುವೆಂ ಮ್ಹಜ್ಯಾ ಸುಖಾ ದುಖಾಂತ್ ವಾಂತೊ ಘೆಂವ್ಚಿ ಭಾಸ್ ದಿಲ್ಯಾಯ್!"
"ಪುಣ್ ತುಜ್ಯಾ ಫಟ್ಕಿರ್ಯಾ ಜಿವಾನಾಂತ್, ಅನುಪ್ಕಾರಿ ಜಿವನಾಂತ್, ದಗಲ್ಬಾಜಿ ಜಿವನಾಂತ್ ಸಾಂಗಾತ್ ದಿತೆಲಿಂ ಮ್ಹಣ್ ಭಾಸ್ ದೀಂವ್ಕ್ ನಾ ಒಸ್ವಾಲ್ಡ್. ತುಂ ಅವ್ಘಡಾಕ್ ಪಡೊನ್ ಕೊನ್ಶ್ಯಾರ್ ಆಸ್ಲ್ಲೊ ಜಾಲ್ಯಾರ್ ಹಾಂವ್ ತುಜಿ ಜೀಣ್ ಭರ್ ಸೆವಾ ಕರ್ತಿಂ ಆಸ್ಲ್ಲಿಂ. ಪುಣ್ ತುಂ.... ಶ್ಯೀ.... ಮ್ಹಾಕಾಚ್ ಲಜ್ ದಿಸ್ತಾ....!"
ಡೊರಾ ಘರಾ ಥಾವ್ನ್ ಚಲ್ತೆಚ್ ರಾವ್ಲೆಂ.
ಒಸ್ವಾಲ್ಡಾನ್ ಖೆಳೊಂಕ್ ವೆಚ್ಯಾ ಸುವಾತೆಚೆರ್ ನಿಗಾ ದವರುನ್ ಆಸ್ಲ್ಲ್ಯಾ ಪೊಲಿಸಾಂನಿ ರಾತಿಚ್ಯಾ ದೋನ್ ವೊರಾರ್ ಬಿಲ್ಡಿಂಗಾಚಿಂ ಮೆಟಾಂ ಚಡ್ಚ್ಯಾ ಒಸ್ವಾಲ್ಡಾಚೊ ಪಾಟ್ಲಾವ್ ಕೆಲೊ. ತೊರಿಗ್ಲ್ಲೆಂ ಪ್ಲ್ಯಾಟ್ ಖಚಿತ್ ಕರ್ನ್ ದಾರಾ ಭಿತರ್ ರಿಗೊನ್ ಒಸ್ವಾಲ್ಡಾಕ್ ಆನಿ ತಾಚ್ಯಾ ಸಾಂಗಾತ್ಯಾಂಕ್ ಖೊಡೊ ಶಿರ್ಕಾವ್ನ್ ಜಯ್ಲಾಂತ್ ಕುಡಾಯ್ಲೆಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
