ಕವಿತಾकविताPoem
ಬೊನಾ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಯೆಯಾ, ಕವಿತಾ ವಾಚುನ್ ಮೊಗಾರ್ ಪಡಾ, ತುಮ್ಕಾಂ ಸರ್ವಾಂಕ್ ಭಾಗಿ ಮೋಗ್ ಕರ್ಣಾರಾಂಚೊ ದಿವಸ್ ಆಮಿಂ ಮಾಗ್ತಾಂವ್
ಎಚ್ಚೆಮ್, ಮುಂಬಯ್
ಯೇರೆ ಬೊನಾ
ಯೆತಾಯ್ ತರ್ ಯೇರೆ
ಬೊನಾ ರಾನಾಕ್
ಮೊಡಿನಾಕಾರೆ ಅಶೆ ದೊಳೆ ಹಾಫ್ತ್ಯಾ ಸಾಂತೆಂತ್
ಮೊರಾ ಪಾಕಾಂ ನೆಸೊನ್ ಆಮಿ ನಾಚುಯಾಂ
ದಾಟ್ ರಾನಾಂತ್ ಪಾಚ್ವ್ಯಾ ತಣಾಂತ್
ನದ್ರೆ ಭಾಯ್ರ್ ಉಭೊನ್ ವೆಚೆ ಪಾರ್ವೆ ಜಾವುಯಾಂ
ಯೆತಾಯ್ ತರ್ ಯೇರೆ
ಬೊನಾ ಕಾಚ್ಚೆ ಮಳ್ಯಾಕ್
ವೊಡಿನಾಕಾರೆ ಅಶೆಂ ಪಾಲಂವ್ ಫೆಸ್ತಾ ಸಾಂತೆಂತ್
ನರ್ ಮಾದಿಯೆಚೊ ಖೆಳ್ ಆಮಿ ಖೆಳುಯಾಂ
ಬೊಲ್ಯಾಂ ಇಡ್ಯಾಂನಿ ಪಾಳಾಂ ಮುಳಾಂನಿ
ಖಬ್ರೆ ಭಾಯ್ರ್ ಸುರಾತಾಂತ್ ಚಾಮ್ಡಿಂ ಸೊಡುಯಾಂ
ಯೆನಾಂಯ್ ತರ್,
ನಾಡಿನಾಕಾರೆ ಬೊನಾ ಅಶೆಂ ಸಾಂತೆಂತ್
ದೊಳೆ ಮೊಡುನ್, ಪಾಲಂವ್ ವೊಡುನ್
ಘೊವ್ ಆಸಾ, ಭುರ್ಗಿಂ ಆಸಾತ್ ಪೆಟತ್ರೆ ಸಾಂತ್!
ಮೋಗ್ ಕರ್ಣಾರಾಂಚೊ ದೀಸ್ ಫಕತ್ತ್ ತರ್ನಾಟ್ಯಾಂಕ್ ಮಾತ್ರ್ ಕಿತ್ಯಾಕ್? ಘೊವ್-ಭುರ್ಗಿಂ ಆಸ್ಚಾಂಕ್ ಕಾಂಯ್ ಮೋಗ್ ಕರುಂಕ್ ಆಡ್ವಾರ್ಲಾಂಗಿ ಮ್ಹಳ್ಳೆಂ ಪೊಕ್ರಿ ಸವಾಲ್ ಕರುನ್ ಹಾಂಗಾ ಆಯ್ಲಾ ಎಚ್ಚೆಮ್, ಮುಂಬಯ್
ಮೆಲ್ವಿನ್ ಜೆ. ವಾಸ್
ಆಯ್ಕ್ಗೊ ಮಾನಾ ಆಯ್ಕ್
ತುಕಾಚ್ಚ್ಗೊ
ಮಾನಾ ತುಕಾಚ್ಚ್...
ಮ್ಹಜಾ ತುಜಾ ಸಂಬಂಧಾಚಿ
ಹಿ ಪಯ್ಲಿ ವಳಕ್ಗೊ ಮಾನಾ
ದೊಳೆ ತಿರ್ಶೆ ಕರುನ್
ಹೆವ್ಶಿಂ ತೆವ್ಶಿಂ ಪಳೆನಾಕಾ
ಮ್ಹಜಾ ತುಜಾ ವಳ್ಕೆಚಿ
ಹಿ ಪಯ್ಲಿ ದೀಷ್ಟ್ಗೊ
ಮಾನಾ
ಲಜೆನ್ ಆಸ್ಡ್ಯೊ ಧಾಂಪುನ್
ಮೊಗಾ ಭಾಸ್
ಪಾರ್ಕಿನಾಕಾ
ಮ್ಹಜಾ ತುಜಾ ದಿಶ್ಟೆಚಿ
ಹಿ ಪಯ್ಲಿ ಭೆಟ್ಗೊ ಮಾನಾ
ಹಾತಾಂತ್ ಬೊಟಾಂ ವೊಳಾವ್ನ್
ಕಾಳ್ಜಾ ಉಡಿ ಪುಣೀಂ ಶಿಣಯ್ನಾಕಾ
ಮ್ಹಜಾ ತುಜಾ ಭೆಟೆಚಿ
ಹಿ ಪಯ್ಲಿ ರಾತ್ಗೊ
ಮಾನಾ
ತೊಂಡಾರ್ ಹಾತ್ ಧಾಂಪುನ್
ರೆಸ್ಪೆರಾ ಭಾಸೆಕ್
ವಿಸ್ರಾನಾಕಾ
ಮ್ಹಜಾ ತುಜಾ ಪಯ್ಲ್ಯಾ ರಾತಿಕ್
ಹಿ ಪಯ್ಲಿ ಕಾಣಿಕ್ಗೊ ಮಾನಾ
ಪಿಯಾನೊಚೆ ದೋನ್ ಥರಾಂಚೆ ಬುತಾಂವ್
ಏಕ್ ಕಾಳೊ ಮ್ಹಾಕಾ ಧವೊ ತುಕಾ
ಮ್ಹಜಾ ತುಜಾ ಕಾಣಿಕೆಕ್
ಪಯ್ಲ್ಯಾ ರಾತಿಚೊ
ಸಂಬಂಧ್ಗೊ ಮಾನಾ
ಕಾಳೊ ದೂಕ್ ತರ್ ಧವೊ ಆಮ್ಚೆಂ
ಸುಖ್
ದೂಕ್ ಆನಿ ಸುಖ್
ಸಾಂಗಾತಾ ವಾಜ್ಲ್ಯಾರ್
ಜಿಣಿಯೆ ಪಿಯಾನೊ
ನಾದ್ ವ್ಹಾಳಯ್ತಲೊ
ಪಳೆಗೊ ಮಾನಾ ಪಳೆಗೊ ಮಾನಾ
ಉದೆವ್ನ್ ಯೆತಾತ್ ಕಾಳಿಂ ಪಾವ್ಸಾ ಮೊಡಾಂ
ಪಾಕೆಂ ಸೊಧ್ಚಾ ದೊಳ್ಯಾಂಕ್ ನಾಕಾ ಭಿರಾಂತ್
ಆಜ್ ಹಾಂವ್ ಪಾಕೆಂ ಆನಿ ತುಂ ಮ್ಹಜೆಂ ಸಾತೆಂ
ತುಜ್ಯಾ ಮಾತ್ಯಾಕ್ ಮ್ಹಜ್ಯಾ ಹಾತಾಂನಿ ಧಾಂಪ್ತಾಂ
ಮ್ಹಜಾ ಮಾತ್ಯಾಕ್ ತುಜಾ ಕೆಸಾಂನಿ ಲಿಪಯ್
ಆಯ್ಕ್ಗೊ
ಮಾನಾ ಆಯ್ಕ್ಗೊ ಮಾನಾ
ಮ್ಹಜಾ
ಹಾತಾಂತ್ಲೊ ಕಾಳೊ
ತುಜಾ ಹಾತಾಂತ್ಲೊ ಧವೊ
ಪಿಯಾನೊ
ಮಧುರ್ ನಾದ್ ವ್ಹಾಳಯ್ತಾ
ಆಯ್ಕ್ಗೊ ವ್ಹಳೂ ಆಯ್ಕ್
ಆಮ್ಚ್ಯಾ ಪಯ್ಲ್ಯಾ ರಾತಿಚಾ ಪಾವ್ಸಾ ಶಿಂವರಾಂತ್
ಹ್ಯಾ ವಿಶಾಲ್ ಉಗ್ತ್ಯಾ ಸಂಸಾರಾಂತ್ ವ್ಹಳೂ ವ್ಹಳೂ ಆಯ್ಕ್..!
ಖರೊ ಮೋಗ್ ಮ್ಹಳ್ಯಾರ್ ಕಸಲೊ ಮ್ಹಳ್ಳ್ಯಾ ಸವಾಲಾಕ್ ಅಪುರ್ಭಾಯೆಚಿ ಹಿ ಕವಿತಾ ಗುಂತುನ್ ಜವಾಬ್ ದೀಂವ್ಕ್ ಆಯ್ಲಾ ಮೆಲ್ವಿನ್. ಜೆ. ವಾಸ್.
ಕವಿಚಾ ಸ್ವಪ್ಣಾಚೆಂ ತ್ರಾಣ್ ಕಿತ್ಲೆಂ ಪಳೆಯಾ, ಹೆಂ ಕವಿತಾ ಅಟ್ರಾ ವರ್ಸಾ ಸಕಯ್ಲ್ಯಾಂಕ್ ವಾಚುಂಕ್ ಆಡ್ವಾರ್ಲಾಂ. ವೇಲೆಂಟೇಯ್ನ್ ದಿಸಾ ಮೊಗಾಚಾ ರೊಗಾಂತ್ ಸಗ್ಳೊ ಸಂಸಾರ್ ಪೊಕ್ರಿ ಜಾತಾನಾ ಆತಾಂ ಕೊಂಕ್ಣಿ ಕವಿಂನಿ ಪೊಕ್ರಿ ಜಾಲ್ಲ್ಯಾಂತ್ ಕಾಂಯ್ ಚೂಕ್ ಆಸಾ?
ಹೆಂ ಕವಿತಾ ಫಕತ್ತ್ ಮನರಂಜನಾ ಖಾತಿರ್ ಮಾತ್ರ್ ಬರಯ್ಲಾಂ ದೆಖುನ್ ಕೊಣೆಂಯ್ ಕವಿಚೆರ್ ಯಾ ಸಂಪಾದಕಾಚೆರ್ ಶಿಣ್ಚೆಂ ನಾಕಾ.
ಆಸ್ಟಿನ್ ಪ್ರಭು, ಚಿಕಾಗೊ
ವೇಲೆಂಟಾಯ್ನ್ ದಿವಸ್!
ಮೋಗ್, ಮೋಗ್,
ಮೋಗ್ ಮ್ಹಣ್
ಹಾಂವ್ ತಾಕಾಚ್ಚ್ ಪಳಯ್ತಾಂ
ತೆಂ ಮಾತ್ರ್ ಮ್ಹಾಕಾಚ್ ಪಳೆವ್ನ್
ಘಾಗ್ರೊ ಅಸೊ ಉಕಲ್ತಾ!
ಇತ್ಲೊ ತೇಂಪ್ ಹಾಂವ್ ತಾಚೆಂ
ವದನ್ ಪಳವ್ನ್ ರಾವ್ತಾನಾ
ತೆನ್ಕಾ ಪಳವ್ನ್ ರಾವ್ತಾಲೆಂ ತೆಂ
ಗುಮಾನ್ ಕರಿನಾಸ್ತಾನಾ
ಆತಾಂ ತಾಕಾ ಏಕ್ಚ್ಚ್ ಪಾವ್ಟಿಂ
ತ್ಸುನಾಮಿ ವಾರೆಂ ಲಾಗ್ಲೆಂಗಾಯ್
ಶಾಭಿತ್ ಆಸ್ರೊ ಸೊಧುಂಕ್ ತೆಂ
ಮ್ಹಾಕಾ ಆಕರ್ಷಿತಾಕಾಯ್?
ಚಲಿಯೊ ಕೆನ್ನಾಂಯ್ ತಶ್ಯೊಚ್ರೇ
ಮಿತ್ರ್ ಮ್ಹಜೊ ಮ್ಹಣ್ತಾಲೊ
ಮಹಿನ್ಯಾಕ್ ಪಾವ್ಟಿಂ ಆವ್ರ್ ಯೆತಾಂ
ಸ್ವರೂಪ್ ಬದಲ್ತಾ ಸಾಂಗ್ತಾಲೊ
ಆಜ್ ವೇಲೆಂಟಾಯ್ನ್ ದಿವಸ್
ಮೋಗ್ ಕರ್ನಾರಾಂಕ್ ಲಾಗ್ಶಿಲೊ
ಆದ್ಲ್ಯಾ ಕರ್ತುಂವಾಂಕ್ ಫಾತೊರ್ ಘಾಲ್
ಸಂಬಂಧ್ ಸೊಡ್ಯಾಂ ತೊ ಪಯ್ಶಿಲೊ
ಆಶೆಂ ಚಿಂತುನ್ ಹಾಂವ್ ತಾಚ್ಯಾ
ಲಾಗಿಂ, ಲಾಗಿಂ ವೆತಾನಾ
ಕುತ್ತ್ ಕರುನ್ ಹಾಸೊಂಕ್ ಲಾಗ್ಲೆಂ
ತಡ್ವುಂಕ್ ತಾಂಕಾನಾಸ್ತಾನಾ
ವ್ಹಾ-ರೆ-ವ್ಹಾ ಸೊಭಿತ್ ತಾಚೆಂ
ನ್ಹೆಸಾಣ್ ಪಳೆವ್ನ್ ರಾವ್ತಾನಾ
ಮಾಸಾ ಮುದೆ ಮ್ಹಾಕಾ ತಿಳ್ತಾಲೆ
ಹಾಂವ್ ತಡ್ವುಂಕ್ ಸಕ್ಲೊಂನಾ
ಹಾಂವೆಂ ತಾಕಾ ಪೊಟ್ಲುನ್ ಧರ್ಲೆಂ
ತಾಚೆಂ ಆಂಜಾಳ್ ರೂಪ್ ದೆಖ್ತಾನಾ
ತೆಂವೀ ಮ್ಹಜ್ಯಾ ಆಂಗಾರ್ ಉಡ್ಲೆಂ
ವ್ಹಳೂ ಲಾಗಿಂ ಪಾವ್ತಾನಾ
ಠಾಗೋರ್ ಪಾರ್ಕಾಂತ್ ಮೋಗ್ ಆಮ್ಚೊ
ಲೋಕ್ ಆಮ್ಕಾಂಚ್ ಚೊಯ್ತಾನಾ
ಮಾತ್ಶಿ ಲಜ್ ಭೊಗ್ಲಿ ಮ್ಹಾಕಾ
ಏಕ್ ಮಾಪ್ಳಿ ಮಿಟ್ಯೊ ಮಾರ್ತಾನಾ
ಕಿತ್ಲೊ ತೇಂಪ್ ಥಾವ್ನ್ ರಾಕೊನ್ ರಾವ್ಲ್ಯಾಂ
ತುಂ ಏಕ್ ಖಂಯ್ಚೊ ಓಸ್ಟಿನಾ
ವೇಲೆಂಟಾಯ್ನ್ ದಿವಸ್ ಆಜ್
ಆನ್ಯೇಕ್ ವರಸ್ ಹಾಂವ್ ರಾಂವ್ಚಿಂ ನಾ
ಅಶೆಂ ಮ್ಹಣೊನ್ ಬಾಯ್ ಮ್ಹಜೆಂ
ಮ್ಹಾಕಾ ಪೊಟ್ಲುನ್ ಧರುನ್ ರಾವ್ತಾನಾ
ಕಿತೆಂ ಕರ್ಚೆಂಚ್ ಕಳ್ಳೆಂನಾ ಮ್ಹಾಕಾ
ಕೊಟಾರ್ಲಿ ಪ್ಯಾಂಟಾಂತ್ ಚರ್ತಾನಾ
ಮಂಜುರಾನ್ ಹೊಟ್ಲಾಕ್ ಯಾ
ಮ್ಯಾನೇಜರ್ ಮ್ಹಜೊ ಮಿತ್ರ್ಗೊ
ಪಂದ್ರಾ ಮಿನುಟಾಂ ಶಾಂತಿ ಹಾಡ್
ತುರ್ಥಾನ್ ರಿಕ್ಷಾ ಧರ್ಯಾಂಗೊ
ರಿಕ್ಷಾ ರಾವವ್ನ್ ದೊಗಾಂಯ್ ಆಮಿಂ
ಬಂದ್ರಾ ಕುಶಿನ್ ಚಮ್ಕಾಲ್ಯಾಂವ್
ರಿಕ್ಷಾ ಭಿತರ್ ಕಿತೆಂ ಚಲ್ಲೆಂ
ಹಾಂಗಾ ಬರಂವ್ಕ್ ಹಾಂವ್ ಸಕಾನಾ
ರಿಕ್ಷಾ ಡ್ರಾಯ್ವರ್ ಪಾತ್ಕಾಂತ್ ಪಡ್ಲೊ
ಆರ್ಶ್ಯಾಂತ್ ತಿಳುನ್ ರಾವ್ತಾನಾ
ಧಾಂಚೊ ನೋಟ್ ದಿಲೊ ತಾಕಾ
ಹೊಟೆಲ್ ಮಂಜುರಾನಾಕ್ ಪಾವ್ತಾನಾ
ದೊಗಾಂಯ್ ಆಮಿಂ ಭಿತರ್ ಗೆಲ್ಯಾಂವ್
ಮಿತ್ರಾಚೊ ಮ್ಹಜ್ಯಾ ಪಾತ್ತೊ ನಾ
ಏಕ್ಚ್ಚ್ ಪಾವ್ಟಿಂ ಜಾಗೊಂ ಜಾಲೊಂ
ಬಾಯೆನ್ ಚಿಂತ್ತಾಯ್ ಕಿತೆಂ ಮ್ಹಣ್ತಾನಾ
ದೋನ್ ವೊರಾಂಕ್ ದೊನ್ಶಿಂ ರುಪಯ್
ದಿತಾಯ್ ಜಾಲ್ಯಾರ್ ಕೂಡ್ ದಿತಾಂ
ಮ್ಯಾನೇಜರಾಚಿಂ ಉತ್ರಾಂ ಆಯ್ಕೊನ್
ಕರ್ಚೆಂ ಕಿತೆಂಚ್ ಕಳ್ಳೆಂನಾ
ಜಾಲ್ಲೆಂ ಜಾತಾ ಮಾರ್ ಗೆಲಿ
ವೇಲೆಂಟಾಯ್ನ್ ದಿವಸ್ ಆಜ್
ಕ್ರೆಡಿಟ್ ಕಾರ್ಡ್ ದಿಲೆಂ ಹಾಂವೆಂ
ಚಿಂತಿನಾಸ್ತಾಂ ಕಿತೆಂಚ್ ಲಜ್
ಪಯ್ಶೆ ಯೆಟುನ್, ಚಾವಿ ಘೆವುನ್
ಕುಡಾಕ್ ಆಮಿಂ ಪಾವ್ಲ್ಯಾಂವ್
ಪಡ್ದೆ ಧಾಂಪುನ್ ದಿವೆ ಪೆಟವ್ನ್
ಖಟ್ಲ್ಯಾರ್ ಆಮಿಂ ಬಸ್ಲ್ಯಾಂವ್
ಏಕ್ ಮಿನುಟ್
ಮ್ಹಣೊನ್ ಹಾಂವ್
ಕಾಕುಸಾ ಕುಶಿಂ ಘುಸ್ಲೊಂ
ಕುಡಿಚಿ ಗರ್ಜ್ ಸಂಪವ್ನ್ ಪರತ್
ಕುಡಾತೆವ್ಶಿಂ ಹಾಂವ್ ಪಾವ್ಲೊಂ
ಬಾಯ್ ಮ್ಹಜೆಂ ಖಟ್ಲ್ಯಾರ್ ನಿದ್ಲಾಂ
ವಸ್ತುರ್ ಉಡವ್ನ್ ಮೆಜಾರ್
ಓಸ್ಟಿನ್, ಓಸ್ಟಿನ್, ಐ ಲವ್ ಯೂ ಮ್ಹಣ್
ಸುರು ಕೆಲೆಂಚ್ ತಾಚೆಂ ರಜಾರ್
ಹುನ್ ಉದಾಕ್ ಸೊಡ್ಲಾಂ ಹಾಂವೆ
ಪಯ್ಲೆಂ ಇಲ್ಲೆಂ ನ್ಹಾಂವ್ಯಾಂಗೊ
ಕುಡಿವಯ್ಲೊ ಘಾಮ್ ಸಗ್ಳೊ
ಸಾಬು ಘಾಸುನ್ ಕಾಡ್ಯಾಂಗೊ
ಇತ್ಲೆಂ ಆಯ್ಕೊನ್ ಬಾಯ್ ಮ್ಹಜೆಂ
ಸರಾರಾಂ ನ್ಹಾಣ್ಯೆ ಕೂಶಿನ್ ಘುಸ್ಲೆಂ
ತುಂವೀ ಯೇ ಮ್ಹಣೊನ್ ಮ್ಹಜೊ
ಹಾತ್ ವೊಡುನ್ಂಚ್ ರಾವ್ಲೆಂ
ದೊಗಾಂಯ್ ಆಮಿಂ ಲಜ್ ನಾಸ್ತಾಂ
ಶವರಾ ಭಿತರ್ ರಿಗ್ಲ್ಯಾಂವ್
ಊಬ್ ಉದಾಕ್, ನಳಾ ಪಾವ್ಸ್
ಚಾಕೊನ್ ಮಾತ್ಶೆಂ ರಾವ್ಲ್ಯಾಂವ್
ಉಪ್ರಾಂತ್ ಹಾಂವೆ ತಾಕಾ, ತಾಣೆಂ ಮ್ಹಾಕಾ
ಸಾಬು ಘಾಸುನ್ ರಾವ್ತಾನಾ
ಭಗ್ಲೊ ಸಂತೊಸ್ ಕಸೊ ವರ್ಣುಂ
ತುಮ್ಕಾಂ ಪಾತ್ಕಾಂತ್ ಘಾಲ್ಚೊಂನಾ
ದೊಗಾಂಯ್ ಆಮಿಂ ಸಾಂಗಾತಾ ನ್ಹಾವ್ನ್
ಉದಾಕ್ ಆಮಿಂ ಉರಯ್ಲೆಂ
ದೆವಾನ್ ದಿಲ್ಲಿ ಸೊಭಾಯ್ ಪಳೆವ್ನ್
ಮತಿಂತ್ ಬರೆಂಚ್ ಖಿರಯ್ಲೆಂ
ಹೆಣೆಂತೆಣೆಂ ಪಳೆವ್ನ್ ಬಾಯ್
ವೊಂಠಾಂಕ್ ಉಮೆ ದಾಂಭ್ತಾನಾ
ಭುಮಿ ವೈಂಕುಟಾಕ್ ಪಾವ್ಲ್ಯಾಂವ್
ಭಿಲ್ಕುಲ್ ಲಜ್ಚ್ ನಾಸ್ತಾನಾ
ತುವೆಂ ಆತಾಂ ನ್ಹಾಲ್ಲೆಂ ಪುರೊ
ಬಾಯೆನ್ ಮ್ಹಾಕಾ ಜಾಗಯ್ಲೆಂ
ಆಂಗ್ ಪುಸುನ್ ವಿಶೆವ್ ಘೆ
ಭಾರಿಚ್ ಮೋಗಾನ್ ಫರ್ಮಾಯ್ಲೆಂ
ಹೆಣೆಂ ತೆಣೆಂ ಸಗ್ಳ್ಯಾನ್ ಪುಸುನ್
ವೊಲಿಭಿತರ್ ರಿಗ್ಲೊಂ ಹಾಂವ್
ಪಂದ್ರಾ ಮಿನುಟಾಂ ಪಾಶಾರ್ ಜಾಲಿಂ
ಬಾಯೆಕ್ ರಾಕೊನ್ ರಾವ್ಲೊಂ ಹಾಂವ್
ಧಡಕ್ಕ್ ಬಾಗಿಲ್ ಧಾಂಪ್ಲ್ಲೊ ಆವಾಜ್
ಗಿನ್ಯಾನ್ ಮ್ಹಜೆಂ ಜಾಗಯ್ಲೆಂ
ತುರ್ಥಾನ್ ಹಾಂವ್ ಪ್ಯಾಂಟ್ ನ್ಹೆಸ್ಲೊಂ
ದಾರಾಕುಶಿಂ ರಾವಯ್ಲೆಂ
ಶಿರಿಂ ಚುಕೊನ್ ರಾವ್ಲಾಂ ವಿಣ್ಗೊ ಹಾಂವ್
ಬಾಯೆನ್ ಘಡಾಯ್ ದಾಖಯ್ಲೊ
ಪೊಕೆಟ್ ಫಾರುನ್ ಮಾರ್ಲ್ಯಾ ಧಾಂವ್
ಮ್ಹಾಕಾ ಫೊಂಡಾಂತ್ ಪುರಯ್ಲೊ
ದೋನ್ ವೊರಾಂಕ್ ಭಾಡೆಂ ದಿಲಾಂ
ಪಾಟಿಂ ಖಾಟ್ಯೆರ್ ಪಡ್ಲೊಂ ಹಾಂವ್
ಗಾಢ್ ನಿದೆಂತ್ ಪಡೊನ್ ಆಸ್ತಾಂ
ಬಾಯೆಕ್ ಚಿಂತುನ್ಂಚ್ ರಾವ್ಲೊಂ ಹಾಂವ್
ಪರತ್ ಆಯ್ಲಾಂ ತೆಂ ಸ್ವಪ್ಣಾಂತ್ ಮ್ಹಜ್ಯಾ
ಮ್ಹಾಕಾ ಕುಚುಲ್ಯೊ ಕರುಂಕ್
ಪಾಟಿಂ ಪರ್ತುನ್ ನಿದ್ಲ್ಯಾಂವ್ ಆಮಿಂ
ಆದ್ಲೆಂ ಸರ್ವ್ ತೆಂ ವಿಸ್ರೊನ್
ವ್ಹಳೂ, ವ್ಹಳೂ ಹಾಂವ್ ತಾಚ್ಯಾ
ಬಾಜ್ವೆಚೆ ಹುಕ್ ಕಾಡ್ತಾನಾ
ತಾಣೆಂ ಹಾತಾಕ್ ಮ್ಹಜ್ಯಾ ಏಕ್ ದಿಲೆಂ
ಕಿತೆಂಚ್ ಪರ್ವಾ ನಾಸ್ತಾನಾ
ಏಕ್ಚ್ಚ್ ಪಾವ್ಟಿಂ ಜಾಗ್ಲೊಂ ಹಾಂವ್
ಘಡ್ಯಾಳಾಚೆರ್ ದೀಷ್ಟ್ ಖಂಚವ್ನ್
ವೊರಾಂ ದಿಸ್ತಾತ್ ಫಾಂತ್ಯಾಚಿಂ ಭಾರಾ
ಧೊಸ್ತಾಲೊಂ ನಿದೆಂತ್ ಸ್ವಪ್ಣೆವ್ನ್
ಭಾಗಿ ವೇಲೆಂಟಾಯ್ನ್ ದಿವಸ್ ತುಕಾ
ಟೆರ್ರಿಕ್ ಹಾಂವೆಂ ಆರಾಯ್ಲೆಂ
ಸಗ್ಳೆಂ ಸ್ವಪಾಣ್ ಸಾಂಗೊನ್ ತಾಕಾ
ತಶೆಂಚ್ ಕರ್ಯಾಂಗಿ - ನೆರಾಯ್ಲೆಂ
ತುಕಾ ಲಾಗ್ಲ್ಯಾ ಬಾಳ್-ಬೂಧ್
ಟೆರ್ರಿನ್ ಮ್ಹಾಕಾ ಸಾಂಗ್ತಾನಾ
ಉಶೆಂ ಪೊಟ್ಲುನ್ ನಿದೊಂಕ್ ಗೆಲೊಂ
ದುಸ್ರಿ ಪರ್ವಾಚ್ಚ್ ನಾಸ್ತಾನಾ.
ರೋನಿ ಸುವಾರಿಸ್, ವಾಲೆನ್ಸಿಯಾ
ಬಾಬುಲೊ
ಜಲ್ಮ್ ಘೆತ್ಲೊ ಉದರಿಂ, ಜಾವ್ನ್ ಏಕ್
ಬಾಬುಲೊ
ಲ್ಹಾನಾ ವ್ಹಡಾಂಕ್ ಸರ್ವಾಂಕಿ ಮೊಗಾಚೊ ದಾಕ್ಟುಲೊ
ವರ್ಸಾಚೊ ಜಾತಾನಾ ಜಾಲೊ ಉಡ್ಕಾಣಾಂ ಗಾಲ್ಚೊ ಪಿಲೊ
ಪ್ರಾಯ್ ಭರೊನ್ ವಾಡ್ತಾನಾ ದಿಸ್ಲೊಂ ಆಕರ್ಷಿಕ್ ಚಲೊ
ತೆದ್ನಾಂ ಪಡ್ಲೊ ಮ್ಹಜೆರ್ ತಿಚೊ ಮೊಗಾ ದೊಳೊ
ದೆಕುನ್ ದಿಲೊ ತಿಕಾ ಹಾಂವೆಂ ಮ್ಹಜೊ ಗಳೊ
ಘಾಲ್ ಮ್ಹಣ್ ಲಗ್ನಾಚೊ ಝೆಲೊ
ಘೆವ್ನ್ ಲಗ್ನಾ ಝೆಲೊ ತಿಚೊ ಪತಿ ಜಾಲೊ
ತಿಚಾ ಮೊಗಾ ಸಾಗೊರಾಂತ್ ಖೂಬ್ ಉಪ್ಯೆಲೊ
ಆಪುರ್ಬಾಯೆಚಾ ಬಾಳಾಂ ದೊಗಾಂಕ್ ಬಾಪುಯ್ ಜಾಲೊ
ವಾಗಾಂವ್ಕ್ ತಾಂಕಾ ಜಿಣಿಯೆಂತ್ ಅಪ್ಟಾಲೊಂ ದಾಪ್ಟಾಲೊಂ
ಫುಡಾರ್ ದಾಕಂವ್ಕ್ ತಾಂಕಾಂ ಖೂಬ್ ಕಸ್ಟಾಲೊ
ಅಸೊ ಸೊಭಿತ್ ಸಂಸಾರ್ ಬಾಂಧುನ್ ಹಾಡ್ಲೊ
ಆತಾಂ ಅಸ್ತಮ್ತೆಚಾ ಜೀವಾನಾಂತ್ ಎಕ್ಸುರ್ಪಣಾಚೊ ಭಾಲೊ
ಘೆವ್ನ್ ಬೊಸ್ಲಾಂ ದೆಕುನ್ ಅನಾತ್ ಅಸ್ರ್ಯಾಚೊ ಮುಲೊ
ಝಡೊಂಕ್ ರಾಕ್ಚೊ ಏಕ್ ಪಿಕೊ ಖೊಲೊ
ಖಂಚ್ಯಾ ವೊಕ್ತಾಕ್ಯಿ ಯೆನಾತ್ಲೊ ಅಲೊ ಪಾಲೊ
ರಾಕ್ತಾಂ ಸೊಮ್ಯಾ ಆಯ್ಕೊಂಕ್ ತುಜೊ ಉಲೊ
ಜಾವ್ನ್ ಖರೊ, ಖಾಲ್ತೊ ಅನಿ ಬೊಳೊ
ದೀಂವ್ಕ್ ತುಜಾ ಉಲ್ಯಾಕ್ ಪಾಳೊ
ಯೇವ್ನ್ ಸೊಭ್ಚ್ಯಾಕ್ ತುಜಾ ಪಾಯಾಂ ಥಳಾಚೊ ಕಳೊ
ಮೋಗ್ ಕರ್ಣಾರಾಂಚಾ ದಿಸಾ ಕೊಣಾಕ್ ಅಪ್ಲ್ಯಾ ಪ್ರೇಮಿಚೊ ಉಡಾಸ್ ಯೆತಾ, ಕೊಣಾಕ್ ಆಪ್ಲ್ಯಾ ವ್ಹಡಿಲಾಂಚೊ ಉಡಾಸ್ ಯೆತಾ, ಕೊಣಾಕ್ ಇಸ್ಟಾಚೊ ತರ್ ಕೊಣಾಕ್ ಅಪ್ಲ್ಯಾ ಬುರ್ಗ್ಯಾಂಚೊ ಉಡಾಸ್ ಯೆತಾ ಮ್ಹಣ್ಚಾಕ್ ಹೆಂ ಕವಿತಾ ಅಪುರ್ಭಾಯೆಚಿ ಗೊವಾಯ್ ದಿತಾ.
ವಾಯ್ಲೆಟ್ ಜೆ. ಪಿರೇರಾ
ವಾಲೆಂಟೈನ್ಸ್ ಡೇ
ಸಾಂತ್ ವಾಲೆಂಟೈನ್ ಭೋವ್ಚ್
ನಾಂವಾಡ್ದಿಕ್
ಮೋಗ್ ಕರ್ನಾರಾಂಚೊ ತೊ ರಚ್ಣಾರ್
ಆಚರ್ಸಿತಾತ್ ಸಗ್ಳ್ಯಾ ಸಂಸಾರಾರ್
ಭೋವ್ ಘಡ್ದೆನ್ ವಾಲೆಂಟೈನ್ಸ್ ಡೇ
ತಾರಿಕ್ ಚೊವ್ದಾ ಫೆಬ್ರೆವರಿಚಿ
ಸಂಸಾರಾರ್ ನಾಂವಾಡ್ದಿಕ್ ತ್ಯಾ ಫೆಸ್ತಾಚಿ
ಸಾಂತ್ ವಾಲೆಂಟೈನಾಚ್ಯಾ ಮೊರ್ನಾ
ದೀಸಾಚಿ
ಅಪುಟ್ ಮೊಗಾಚ್ಯಾ ಪ್ರತೀಕ್ಷೆಚಿ
ಮೋಗ್ ಕರ್ನಾರಾಂಕ್ ತಾಣೆ ಸಾಂಗಾತಾ ಹಾಡ್ಲೆಂ
ದೆಖುನ್ ಜೈಲಾಚೆಂ ಶೀತ್ ತಾಕಾ ಫಾವೊ ಜಾಲೆ
ಜೈಲಾರಾಚಿ ಧುವ್ ತಾಚ್ಯಾ ಮೊಗಾಕ್ ಭುಲ್ಲೆಂ
ವಾಲೆಂಟೈನಾನ್ ಆಪ್ಲ್ಯಾ ಜೀವಾನ್ ಹಾತ್ ಧುಲೆ
ಸಂಸಾರಾರ್ ಆಚರ್ಸಿತಾನಾ ಹೆಂ ಫೆಸ್ತ್
ಭಾರತಾಂತ್ ತೊಡ್ಯಾಂನಿ ಹಾಚೆರ್ ಹಾಡ್ಲಿ ಖ್ಯಾಸ್ತ್
ಆಚರ್ಸುಂಕ್ ನಜೊ ಮ್ಹಣ್ ಹೊ ದೀಸ್
ತಾಕಿದ್ ಖಡಕ್, ಪಾಳಿಜೆ ಲೊಕಾಂನಿ ಸಮೇಸ್ತ್
ಭಾರತಾಂತ್ ರಕ್ಶ್ಯಾಬಂಧನ್ ಆಚರ್ಸಿತಾತ್
ದೀಸಾ ಉಜ್ವಾಡೆಚ್ ಭಯ್ಣ್ಯಾಂಚೊ ಮಾನ್ ಲುಟ್ತಾತ್
ವಾಲೆಂಟೈನ್ಸ್ ಡೇ ವೆಸ್ಟರ್ನ್ ಸ್ಟಾಯ್ಲ್ ಮ್ಹಣ್ತಾತ್
ಪೂಣ್ ವೆಸ್ಟರ್ನ್ ನ್ಹೆಸಾನ್ಂಚ್ ತೆ ನ್ಹೆಸ್ತಾತ್
ಪಾವ್ಲಾ ಸಂಸಾರ್ ಎಕ್ಕೀಸ್ವ್ಯಾ ಶತಾಮಾನಾಕ್
ತರೀ ಥೊಡೆ ಉರ್ಲ್ಯಾತ್ ಅಂಧ್ಕಾರಾಂತ್
ಸಮ್ಜಾನಾಂತ್ ತೆ ಹ್ಯಾ ಫೆಸ್ತಾಚೊ
ಮಹತ್ವ್
ದಿತಾತ್ ತ್ಯಾ ದೀಸಾಕ್ ತಾಂಚೊ ಉಳ್ಟೊ ಅರ್ತ್
ಮೋಗ್ ಕರ್ಣಾರಾಂಚಾ ದಿಸಾಚೊ ಮಹತ್ವ್ ಕವಯತ್ರಿ ವಾಯ್ಲೆಟ್ ಪಿರೇರಾ ಹ್ಯಾ ಕವಿತಾಂತ್ ಕಳಯ್ತಾನಾ ಹ್ಯಾ ದಿಸಾಚೊ ಆಪಾರ್ಥ್ ಕರ್ಚಾಂಚೆರ್ ಶಿಣ್ ಉಚಾರ್ತಾ ಸವೆಂ ಖರೊ ಮೋಗ್ ಮ್ಹಳ್ಯಾರ್ ಕಿತೆಂ ಮ್ಹಣ್ ಸುಟಾವೆಂ ಸಾಂಗ್ತಾ.
ಜೊಮೆಲ್, ಬೊಂದೆಲ್
ಫಕತ್ತ್ ಆಯ್ಚ್ಯಾ ದಿಸಾ
ಜಶೆಂ ವಾಲ್ ದಾಂಕಾಂಕ್ ರೆಂವಡ್ತಾ
ಕೊಬು ಘಾಣ್ಯಾಂತ್ ಚಿಂವಡ್ತಾ
ತಶೆಂಚ್ಗೊ ಮೊಗಾ ಆಯ್ಚ್ಯಾ ದಿಸಾ
ಹಾಂವ್ಗೊ ತುಕಾ ತುಂಗೊ ಮ್ಹಾಕಾ
ತುಂ ಮಾತ್ರ್ ಯೇಂವ್ಕ್ ಘಳಾಯ್ ಕರಿನಾಕಾ.
ಮೊಳ್ಬಾ ವಯ್ರ್ ದರ್ವಡ್ಚ್ಯಾ ಮೊಡಾಂನೊ
ತೆಂ ಪಾವ್ತಾ ಮ್ಹಣಾಸರ್ ಪಾವ್ಸಾಕ್ ದಾಡಿನಾಕಾತ್
ಗಾದ್ಯಾ ಮೆರ್ಯೆಚಿ ವಾಟ್ ಮ್ಹೆಳಯ್ನಾಕಾತ್
ಕುಂಬು ಪಾಂಪಾಳ್ಯಾಕ್ ವ್ಹಾಳಾ ಉದ್ಕಾನ್ ಬೆಷ್ಟಾಯ್ನಾಕಾತ್
ಸದಾಂಚ್ಯಾ ತುಮ್ಚ್ಯಾ ಆಮ್ಸೊರಿ ಎಕ್ವಟಾಂತ್
ಘಡ್ಘಡ್ಯಾಚೊ ಧಾಂಗ್ರೊ ವಾಜಯ್ನಾಕಾತ್
ಝಗ್ಲ್ಯಾಣ್ಯಾಚೊ ಟೋರ್ಚ್ ಪೆಟವ್ನ್
ವಾಟ್ ತಾಚಿ ಗುಸ್ಪಡಾಯ್ನಾಕಾತ್.
ಜಶೆಂ ಚಿತಾಳ್ ಉದ್ಕಾ ತೆವ್ಶಿನ್ ಧಾಂವ್ತಾ
ಮೊರ್ ಮೊಡಾಂ ಪರ್ಮಳಾಕ್ ತಾಳ್ ದಿತಾ
ತಶೆಂಚ್ಗೊ ಮೊಗಾ ಆಯ್ಚ್ಯಾ ದಿಸಾ
ಹಾಂವ್ಗೊ ತುಕಾ ತುಂಗೊ ಮ್ಹಾಕಾ
ಮೊಳ್ಬಾ ವಯ್ರ್ ಆಂಯ್ಡೆ ಗೊಟ್ಚ್ಯಾ ಮೊಡಾಂನೊಂ
ತೆಂ ಪಾವ್ತೆಚ್ ಶಿರಾಂದಾರಿಚೊ ಪಾವ್ಸ್ ದಾಡಾ
ಭಂವ್ತೊಣಿಚ್ಯಾ ಗಾದ್ಯಾಚ್ಯೊ ಮೆರೊ ಕಾಡಾ
ಕುಂಬು ಪಾಂಪಾಳ್ಯಾಚೆಂ ಪೆಂಕಾಡ್ ಮೊಡಾ
ತಾಚ್ಯಾ ಆಕಯ್ಕ್ ವ್ಹಾಳ್ಯಾಂತ್ ಲೊಟುನ್ ಸೊಡಾ
ಘರಾ ಪಾಟಿಂ ವೆಚಿ ವಾಟ್ ಮಾಜ್ವೊನ್ ದೊಡಾ
ಮ್ಹಜ್ಯಾ ಮೊಗಾಕ್ ಆಜ್ ಪಾಟಿಂ ವಚೊಂಕ್ ಜಾಯ್ನಾಂ ಜಾಂವ್
ಕಾಳ್ಜಾ ಬಾಂದಾಚಿ ಗಾಂಟ್ ಮಾತ್ರ್ಮೊನಿಂತ್ ಥಿರ್ ಜಾಂವ್.
ಕೊಣ್ ಸಾಂಗ್ತಾ ಕವಿಕ್ ವಾಚ್ಪ್ಯಾಚಾ ಕಾಳ್ಜಾಕ್ ಆಪ್ಡುಂಕ್ ಸಾಧ್ಯ್ನಾ ಮ್ಹಣ್? ಹೆಂ ಕವಿತಾ ವಾಚ್, ಕಶೆಂ ಕವಿ ಅಪ್ಲ್ಯಾ ಮೊಗಾಕ್, ಮೋಗ್ ಕರ್ಣಾರಾಂಚಾ ದಿಸಾ ಕುಂಬು ಪಾಂಪಾಳ್ಯಾಮಧೆಂ, ವ್ಹಾಳ್ಚಾ ವ್ಹಾಳಾಮಧೆಂ, ಝಗ್ಲಾಣೆಂ-ಪಾವ್ಸಾಮಧೆಂ ಆಪವ್ಣೆಂ ಪಾಠಯ್ತಾ ಪಳೆಯಾ.
ವಲ್ಲಿ ಕ್ವಾಡ್ರಸ್, ಅಜೆಕಾರ್
ಭಿರಾಂತೆಚೊ ಮೋಗ್
ಆಜ್ಗೊ ಚೆಡ್ವಾ ಅಮಾಸ್ ಆಮ್ಕಾಂ
ತುಕಾ ಮೆಳೊಂಕ್ ಸರ್ಶಿಂ ಯೇನಾಂ
ಕಾಳ್ಜಾಂತ್ಲೆಂ ತುಜೆಂ ರುಪ್ಣೆಂ ಚಿಂತುನ್
ಉಡಾಸ್ ತುಜೊ ವೆಂಗೆಂತ್ ಘೆತಾಂ
ಆಜ್ ನವೊ ಕಳೊಗೊ ಫುಲ್ಲಾ
ತುಕಾ ದಿಂವ್ಚಾಕ್ ಧಾಂವೊನ್ ಯೇನಾ
ಉಡಾಸ್ ತುಜೊ ಮತಿಂತ್ ಹಾಡುನ್
ಪಿಸೊಳಿಂ ಬೊಸಾನಾಸ್ಚೆಪರಿಂ ಕರ್ತಾಂ
ತುಂಗೊ ಮ್ಹಜೆಂ ಹಾಂವ್ಗೊ ತುಜೊಂ
ಹಾಂವ್ ನ್ಹಯ್ ಕಾಳಿಜ್ ಸಾಂಗ್ತಾ ಹೆಂ
ಕಾಳ್ಜಾಂತ್ಚ್ ಮೊಗಾಕ್ ಧಾಂಬುನ್ ಧರ್ತಾಂ
ಸಾಂಡುನ್ ಮ್ಹಾಕಾ ತೊ ವಚಾಚೊನಾ
ಮೋಗ್ಕರ್ಣಾರಾಂಚೊ ದೀಸ್ ಆಜ್ಗೊ ಚೆಡ್ವಾ
ಮೋಗ್ ತುಜೊ ಉಗ್ಡಾಪೊ ಕರಿನಾ
ಜರ್ತರ್ ಉಗ್ಡಾಪೆಂ ಕರಿನ್ ತರ್
ನಾತ್ರಾಂ ಆಮ್ಚಿಂ ಖೆಂಡ್ತಿತ್ ಆಮ್ಕಾಂ
ಕವಿ ಇತ್ಲ್ಯಾ ಧಯ್ರಾನ್ ಅಪ್ಲೊ ಮೋಗ್ ಉಚಾರ್ತಾ ತರ್ಯ್ ಕಿತ್ಯಾಕ್ ಕಾವ್ಜೆತಾ? ಭಿಂಯೆತಾ? ತುಂಚ್ ವಾಚ್ ಆನಿ ಸಮ್ಜೊನ್ ಘೆ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.