ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 9. ಗೊರ್ಯಾಚೊ ಬೊಂಗ್ಲೊ!
ಏಕ್ ಮುಖೆಲಿ, ಸಮಾಜ್ ಸೆವಕ್ ಜಾವ್ನ್ ಫಾಮಾದ್ ಜಾಲ್ಲೊ ಆಸ್ಟಿನ್ ಡಿ’ಸೋಜ್ ಪ್ರಭು, ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಹೆಳ್ಲ್ಲೊ. ಕೊಂಕ್ಣಿ ಭಾಸೆಚೊ ಅಜೂನ್ ತೊ ತೆಚ್ಚ್ಪರಿಂ ಮೋಗ್ ಕರ್ತಾ ಆನಿ ತವಳ್ ತವಳ್ ಕವಿತಾ-ಕಾಣ್ಯೊ ಬರಯ್ತಾ. ಅಪ್ಲೊ ಮಾಂಯ್ಗಾಂವ್ ಮಂಗ್ಳುರ್ ಥಾವ್ನ್ ಹಜಾರೊಂ ಮೈಲಾಂ ಪಯ್ಸ್ ಆಸ್ಲ್ಯಾರ್ಯ್ ತಾಚಾ ಕಾಳ್ಜಾಂತ್ಲೊ ಕೊಂಕ್ಣಿ ಮೋಗ್ ಅಜೂನ್ ತೊಚ್ಚ್ ಮ್ಹಣ್ಚಾಕ್ ಹಿ ಕಾಣಿ ಗೊವಾಯ್ ದಿತಾ. ಲಗ್ಬಗ್ ಪನ್ನಾಸಾಂಲಾಗಿಂ ಮಟ್ವ್ಯೊ ಕಾಣ್ಯೊ ಕೊಂಕ್ಣೆಂತ್ ಹಾಣೆಂ ಬರಯ್ಲ್ಯಾತ್.
ಆಸ್ಟಿನ್ ಪ್ರಭು
ಮೊಂತೆರೊಗೆಲಿಂ ನಂತೂರಾಂತ್ಲ್ಯಾ ಗ್ರೇಸ್ತಾಂ ಪಯ್ಕಿ ಗ್ರೇಸ್ತಾಂ. ಮ್ಹಾಲ್ಘಡ್ಯಾಂಚಿ ಆಸ್ತ್ಚ್ ತಾಂಚ್ಯಾ ಗ್ರೇಸ್ತ್ಕಾಯೆಚೆಂ ಖಜಾನ್. ವ್ಹಡ್ ಜಯ್ತ್ ಬೊಂಗ್ಲೊ ತಾಂಚೊ ಭಾರತಾಂತ್ ಫಿಂರ್ಗಿ ರಾಜ್ವಟ್ಕಾಯ್ ಚಲಯ್ತಾನಾ ಬಾಂದ್ಲ್ಲೊ. ತಾಚಿ ಕಾಣಿ ವಿಶೇಷ್ಚ್ ಮ್ಹಣ್ಯೆತ್. ಕೋಣ್ ಮ್ಹಣ್ತಾತ್ ತೊ ಬೊಂಗ್ಲೊ ಆದಿಂ ಏಕಾ ಮಹಾನ್ ಪಯ್ಶಾವಾಲಿ ಗೊರ್ಯಾ ಕುಟ್ಮಾಚೊ.
ಲಿಗೊರ್ ಮೊಂತೆರ್ ಚಿಕ್ಮಗ್ಳುರ್ ಘಾಟಾರ್ ಸಂಚಾಲಕಾಚೆಂ ಕಾಮ್ ಕರುನ್ ಆಸ್ಲ್ಲೊ. ಇಂಗ್ಲೆಂಡಾಂತ್ಲ್ಯಾ ಹ್ಯಾ ಗೊರ್ಯಾಚ್ಯಾ ತೋಟಾಂತ್ ಹೊ ತಾಚೊ ಬರೊಚ್ ಹುದ್ದೊ ಮ್ಹಣ್ಯೆತ್; ಕಿತ್ಯಾ, ಲಿಗೊರಿಚಿ ಇಂಗ್ಲಿಷ್ ಉಲಂವ್ಚಿ ಜಾಣ್ವಾಯ್ ಹ್ಯಾ ಗೊರ್ಯಾನ್ ಮಾನುನ್ ಘೆತ್ಲಿ ಆನಿ ತಾಚೆರ್ ದವರ್ಲ್ಲ್ಯಾ ಆಖಂಡ್ ಭರ್ವಾಶ್ಯಾನ್ ಘಾಟಾವಯ್ಲ್ಯಾ ಖಜಾನಾಚಿ ಚಾವಿ ಪರ್ಯಾಂತ್ ತ್ಯಾ ಗೊರ್ಯಾನ್ ಲಿಗೊರಿ ಅಧೀನ್ ದಿಲ್ಲಿ. ತೆನ್ನಾಂ ಗೊರ್ಯಾಂಚಿ ಸವಯ್ಚ್ ತಶಿ - ಏಕಾ ಮನ್ಶಾಚೆರ್ ತಾಂಕಾಂ ಪಾತ್ಯೆಣಿ ಬಸ್ಲಿ ತರ್, ತೆ ತಾಂಕಾಂ ಕಾಮಾಕಡೆನ್ ಸಂಪೂರ್ಣ್ ಸ್ವಾತಂತ್ರ್ ದಿತಾಲೆ. ತರಿಪುಣ್ ತೆ ತ್ಯಾ ವೆಳಾರ್ ಭಾರತಾಕ್ ಸ್ವಾತಂತ್ರ್ ದೀಂವ್ಕ್ ಮಾತ್ರ್ ನೆಗಾರ್ತಾಲೆ. ಭಾರತಾಂತ್ಲಿಂ ಮೊಲಾಧಿಕ್ ವಜ್ರಾಂ, ಮೊತಿಯಾಂ, ಭಾಂಗಾರ್-ಶಿಂಗಾರ್ ಚೋರ್ನ್ ತಾಂಕಾಂ ಬರಿಚ್ ಸವಯ್ ಜಾಲ್ಲಿ.
ಅಶೆಂ ಲಿಗೊರಿಚೊ ಪಾಗ್ ತಾಕಾ, ತಾಚಿ ಪತಿಣ್ ಎಲಿಜ್ ಅನಿಂ ಭುರ್ಗಿಂ ಫ್ರಾನ್ಸಿಸ್, ವಾಯ್ಲೆಟ್, ರೊಜಿ, ಮೈಕಲ್ ಆನಿಂ ಪ್ರೆಸಿಲ್ಲಾಕ್ ಭಾರಿಚ್ ಮಜೇನ್ ಜಿಯೆಂವ್ಕ್ ಅವ್ಕಾಸ್ ಕರುನ್ ದಿತಾಲೊ ಜಾಲ್ಲ್ಯಾನ್ ಲಿಗೊರಿನ್ ಉರ್ವಾಂತ್ ಏಕ್ ವ್ಹಡ್ಲೆಂ ಘರ್ ಬಾಂದ್ಲೆಂ. ಭಾರತಾಂತ್ ಫಿಂರ್ಗಿ ರಾಜ್ವಟ್ ಚಲಂವ್ಚೊ ಕಾಲ್ ತೊ. ಖಂಚ್ಯಾಯ್ ಜೊಡ್ಯಾಕ್ ಬಾರಾ ಭುರ್ಗಿಂ ಜಾಲಿಂ ಮ್ಹಣ್ತಚ್ ಫಿಂರ್ಗಿ ಸರ್ಕಾರ್ ತಾಂಕಾಂ ಭಾಂಗಾರಾಚೆಂ ಇನಾಮ್ ದೀವ್ನ್ ಸನ್ಮಾನ್ ಕರ್ತಾಲೆ! ಅಶೆಂ ಜಾಲ್ಲ್ಯಾನ್ ಸಭಾರ್ ಜೊಡಿಂ ಭುರ್ಗಿಂ ಕರ್ಚ್ಯಾಚ್ ಕಾಮಾರ್ ಪಡ್ಲ್ಲಿಂ. ಕಥೊಲಿಕ್ ಇಗರ್ಜ್ಯೀ ಚಡೀತ್ ಭುರ್ಗ್ಯಾಂಚೆರ್ ಬೆಸಾಂವ್ ಘಾಲುನ್ಂಚ್ ಆಸ್ಲ್ಲಿ ಆಸ್ತಾಂ ಸಭಾರ್ ಕ್ರೀಸ್ತಾಂವ್ ಕುಟ್ಮಾಂ ಭುರ್ಗ್ಯಾಂಚ್ಯಾ ರಾಶಿರ್ಚ್ ಧಲ್ತಾಲಿಂ ನೇತ್ರಾವತಿ ನ್ಹಂಯ್ತ್ ಮಾಸ್ಳ್ಯಾಂನಿಂ ಪಿಲಾಂ ದವರ್ಲ್ಲೆಪರಿಂ! ತಾಂಗೆರ್ ದೊಗಾಂ ಕಾಮಾಕ್ಯೀ ಆಸ್ಲ್ಲಿಂ. ಜೊನಿ ತಾಂಕಾಂ ಬಾಜಾರ್-ಮಾಸ್-ಮಾಸ್ಳಿ ಹಾಡುಂಕ್ ಆನಿಂ ಭುರ್ಗ್ಯಾಂಕ್ ಇಸ್ಕೊಲಾಕ್ ಪಾವವ್ನ್ ಸಾಂಜೆರ್ ಪಾಟಿಂ ಹಾಡುಂಕ್ ತರ್, ಸಿಸಿಲ್ ಘರ್ಚೆಂ ಕಾಮ್ ಕರುಂಕ್, ರಾಂದುಂಕ್, ವಸ್ತುರ್ ಉಂಬ್ಳುಂಕ್, ಇತ್ಯಾದಿ. ಜೊನಿ ನಾರ್ಲಾಂಚ್ಯಾ ಕುಡಾಂತ್ ನಿದ್ತಾಲೊ ತರ್, ಸಿಸಿಲ್ ಕುಜ್ನಾಂತ್ಚ್ ಏಕ್ ಮಾಂದ್ರಿ ಪಾತ್ಳಾವ್ನ್ ಆಪ್ಲಿ ರಾತ್ ಸಾರ್ತಾಲಿ.
ಸೆಜಾರ್ಚಿಂ ಥೊಡಿಂ ಭುರ್ಗಿಂ ಪೆಂಕ್ಟಾ ಸಕಯ್ಲ್ ಯೆಂವಾಳೆಂ ದಾಖವ್ನ್ ಝಾಲಾಂತ್ ಖೆಳ್ತಾತ್ ತರೀ, ಲಿಗೊರಿಚಿಂ ಭುರ್ಗಿಂ ಪೆಂಕ್ಟಾಂತ್ ಭಾಂಗಾರಾಚೆಂ ನೆಂವಾಳೆಂ ಘಾಲುನ್ ಆಸ್ತಾಲಿಂ. ಮಿಲಾರಾಂತ್ಲೊ ಗಾಸ್ಪರ್ ಸೊಜ್ ತಾಂಕಾಂ ವಸ್ತುರ್ ಶಿಂವ್ತಾಲೊ. ತ್ಯಾ ವೆಳಾರ್ ಲುಂಗಿ, ಮುಂಡು ನ್ಹೆಸ್ತಾಲೆ ತರೀ ಲಿಗೊರಿಗೆಲೆಂ ಕುಟಾಮ್ ಪ್ಯಾಂಟ್, ಶರ್ಟಾಂ ಆನಿಂ ಆಂಗ್ಲ್ಯಾಂಚೆರ್ ಸೊಭ್ತಾಲೆಂ. ಲಿಗೊರಿಕ್ ಗೊರ್ಯಾ ಶೆಟಿನ್ ಏಕ್ ಮೋರ್ರಿಸ್ ಕಾರ್ ಕಾಣಿಕ್ ದಿಲ್ಲೆಂ. ತ್ಯಾ ಕಾಳಾರ್ ಕಾರ್ ಆಸ್ಚೆಂ ಮ್ಹಳ್ಯಾರ್ ಏಕಾ ದಿವ್ಳಾಂತ್ಲ್ಯಾ ಪುಜಾರಿಲಾಗಿಂ ಏಕ್ ಹಸ್ತ್ ಆಸ್ಲ್ಲ್ಯೆಪರಿಂ. ಕಿತೆಂ ದರ್ಬಾರ್ ಲಿಗೊರಿಚೆಂ ಪತಿಣ್ ಎಲಿಜಾಚೆಂ ಆನಿಂ ತ್ಯಾ ಭುರ್ಗ್ಯಾಂಚೆಂ! ತ್ಯಾ ವೆಳಾರ್ ಏಕಾಚ್ ಏಕಾ ಫಿರ್ಗಜ್ ಪಾದ್ರಿಲಾಗಿಂ ಕಾರ್ ನಾಸ್ಲ್ಲೆಂ; ತೆ ಚಲೊನ್ಂಚ್ ಘರ್ ಬೆಜ್ಮೆಂತ್ ಕರ್ತಾಲೆ ಆನಿಂ ಬಸ್ಸಾರ್ ಬಸೊನ್ ಬಿಸ್ಪಾಚ್ಯಾ ಘರಾ ವೆತಾಲೆ.
ವಾಯ್ಲೆಟ್, ರೊಜಿ ಆನಿಂ ಪ್ರೆಸಿಲ್ಲಾ ಬೆಂದುರಾಂತ್ಲ್ಯಾ ಸಾಂತ್ ಆಗ್ನೆಸ್ ಶಾಲಾಕ್ ವೆತಾನಾ, ಫ್ರಾನ್ಸಿಸ್ ಆನಿಂ ಮೈಕಲ್ ಕೊಡ್ಯಾಳ್ ದೊಂಗ್ರಾವಯ್ಲ್ಯಾ ಸಾಂತ್ ಲುವಿಸ್ ಶಾಲಾಕ್ ಸೆರ್ವಾಲ್ಲಿಂ. ಮಾತ್ಶಿ ಮರ್ಜಿ ಹ್ಯಾ ಭುರ್ಗ್ಯಾಂಕ್ ಕೊಂಕ್ಣಿ ಮಾಂಯ್ಭಾಷೆ ಥಾವ್ನ್ ಚಿಕ್ಕೆಶೆ ಪಯ್ಸಾ ಪಯ್ಸ್ ದವರುಂಕ್ ಪಾವ್ಲ್ಲಿ. ಎಲಿಜ್ ಭುರ್ಗ್ಯಾಂಲಾಗಿಂ ಕೊಂಕ್ಣಿ ಉಲಯ್ತಾನಾ ಭುರ್ಗಿಂ ಇಂಗ್ಲೆಜಾನ್ ಜಾಪ್ ದಿತಾಲಿಂ. ತ್ಯಾ ಭುರ್ಗ್ಯಾಂಕ್ ಶೆಜಾರಿ ಭುರ್ಗ್ಯಾಂಚಿ ದೋಸ್ತಿಚ್ ನಾಸ್ಲ್ಲಿ; ಕಿತ್ಯಾ, ತಾಂಕಾಂ ತ್ಯಾ ಭುರ್ಗ್ಯಾಂಕ್ ಪಳೆತಾನಾ ಮಾತ್ಸೊ ಕಾಂಠಾಳೊಚ್ ಯೆತಾಲೊ ಮ್ಹಣ್ಯೆತ್.
ಲಿಗೊರ್ ಮೊಂತೆರ್ ಉರ್ವಾ ಫಿರ್ಗಜೆಂತ್ ಮಹಾನ್ ಮನಿಸ್. ಫಿರ್ಗಜ್ ಫೆಸ್ತಾಕ್ ತಾಚ್ಯೆ ಶಿವಾಯ್ ದುಸ್ರೊ ಪಿರ್ಜೆಂತ್ಚ್ ನಾಸ್ಲ್ಲೊ. ತ್ಯಾ ಗರ್ನಾಳಿಂಕ್ ತಾಣೆಂ ದಿಂವ್ಚೊ ದುಡುಚ್ ಏಕಾ ದುಬ್ಳ್ಯಾ ಕುಟ್ಮಾಕ್ ಏಕಾ ವರ್ಸಾಕ್ ಖಾಣಾ-ಜೆವ್ಣಾಕ್ ಪಾಂವ್ಚೆ ತಿತ್ಲೊ. ಪುಣ್ ಘಾಟಾಗಾರಾಚಿ ಮರ್ಜಿ ಕೊಣಾವರ್ವಿಂ ಆಡಾಂವ್ಕ್ ಜಾತಾ? ಪಾದ್ರಿಂಕ್ ತೊ ಮ್ಹಳ್ಯಾರ್ ಕಾಳ್ಜಾಚೊ ಬುತಾಂವ್ ಗೊಂಡೊ, ಸಕಾಳಿಂ ನಾಸ್ಟ್ಯಾಚೊ ಲೊಣಿಯಾಂ ಉಂಡೊ ಆನಿಂ ತಾಚ್ಯೆವರ್ವಿಂಚ್ ಭರ್ತಾಲೊ ಇಗರ್ಜೆಚೊ ದಾನಾ ಕಂರ್ಡೊ.
ಲಿಗೊರಿಚೊ ಘಾಟಾ ಶೆಟ್ - ಒಲಿವರ್ ಜೋನ್ಸ್ ನಂತೂರಾಂತ್ಲ್ಯಾ ತ್ಯಾ ಬೊಂಗ್ಲ್ಯಾಂತ್ ರಾವೊಂಕ್ ಅಪ್ರೂಪ್ಶೆಂ ಯೆತಾನಾ, ಲಿಗೊರಿಗೆಲ್ಯಾಂಕ್ ಗಮ್ಮತಾಯೆಚೆಂ ಫೆಸ್ತ್ಚ್ ಫೆಸ್ತ್. ಬಲ್ಮಠಾಂತ್ಲ್ಯಾ ವಾಸ್ ಬೇಕರಿಂತ್ಲೆ ಹುನೊನಿ ಉಂಡೆ, ನಂತೂರ್ ಪದ್ವಾವಯ್ಲ್ಯಾ ಸಿಪ್ರಿಗೆಲೆಂ ಲೊಣಿ ಕಾಡಿನಾಸ್ಲ್ಲೆಂ ಆಪುಟ್ಟ್ ದೂಧ್, ಶೆಜಾರ್ಚ್ಯಾಂಕ್ ಕಾಂಟೆ ಚಿಂವ್ಚಿ ಗತ್ ನಾಸ್ಲ್ಲಿ ತರೀ, ಜೋನ್ಸ್ ಸಗ್ಳೊ ಬೊಕ್ರೊಚ್ ಬೊಂಗ್ಲ್ಯಾಕ್ ಹಾಡ್ತಾಲೊ ಲಿಗೊರಿಚ್ಯಾ ಕುಟ್ಮಾಕ್ ದಾಧೊಶಿ ಕರುಂಕ್. ಕಿತೇಂಯ್ ಆಚಾನಕ್ ಜೋನ್ಸಾಕ್ ಘಾಟಾಕ್ ವಚೊಂಕ್ ಪಡ್ಲೆಂ ತರ್, ಉರುಲ್ಲೆಂ ಬೊಕ್ರ್ಯಾ ಮಾಸ್ ಎಲಿಜ್ ಆಪ್ಲ್ಯಾ ಭುರ್ಗ್ಯಾಂಕ್ ಮ್ಹಣ್ ಘರಾ ಸಾಗ್ಶಿತಾಲಿ. ಅಶೆಂ ಆಸ್ತಾಂ ಹ್ಯಾ ಲಿಗೊರಿಚ್ಯಾ ಭುರ್ಗ್ಯಾಂಕ್ ಭುಕ್ ಮ್ಹಳ್ಯಾರ್ ಕಿತೆಂ ಮ್ಹಣ್ಂಚ್ ಕಳಿತ್ ನಾಸ್ಲ್ಲಿ.
ಶೆಜಾರ್ಚಿಂ ಫೆಸ್ತಾಂ-ಪರ್ಭೆಂವೆಳಿಂ ಕಟ್ಟಿಭರ್ ಸುರ್ ಪಿಯೆವ್ನ್ ಜೆವ್ತಾಲಿಂ ತರ್, ಲಿಗೊರಿಗರ್ ಬೊತ್ಲಿಭರ್ ಬ್ರಾಂದಿ ಆನಿ ವಾಯ್ನ್ ಆಸ್ತಾಲೊ. ಅಶೆಂ ಜಾಲ್ಲ್ಯಾನ್ಂಚ್ ಫಿರ್ಗಜೆಚೊ ವಿಗಾರ್ಯೀ ಅಪ್ರೂಪ್ ತರೀ ಚಡ್ತಾವ್ ಲಿಗೊರ್ ಘಾಟಾರ್ ಕಾಮಾರ್ ಆಸ್ತಾಂ ಘರ್ ಭೆಟ್ ಕರ್ತಾಲೊ. ದೆವಾಚೊ ಮನಿಸ್ ತೊ ಆಸ್ತಾಂ ಎಲಿಜ್ ಉಗ್ತ್ಯಾ ಹಾತಾಂನಿ ತಾಕಾ ಸ್ವಾಗತ್ ದಿತಾಲಿ.
ಏಕ್ ಪಾವ್ಟಿಂ ಏಕಾಚ್ಚ್ಫರಾ ಲಿಗೊರಿಗೆಲೊ ಘರ್ ಸಾಮಾನ್ ನಂತೂರಾಂತ್ಲ್ಯಾ ಗೊರ್ಯಾ ಸಾಯ್ಬಾಚ್ಯಾ ಘರಾ ಸಾಗ್ಸಾಲೊ. ಗೊರ್ಯಾಚ್ಯಾ ಘೊಡ್ಯಾ ಗಾಡ್ಯೆರ್ ಎಲಿಜ್ ಆನಿಂ ತಾಂಚಿಂ ಪಾಂಚ್ ಭುರ್ಗಿಂ ಇಜಯ್ಚ್ಯಾ ರಸ್ತ್ಯಾನ್ ಕದ್ರಿಚೊ ಗುಡೊ ಉತ್ರೊನ್ ನಂತೂರ್ ಖುರ್ಸಾಕಡೆನ್ ಗೊರ್ಯಾಚ್ಯಾ ಬೊಂಗ್ಲ್ಯಾಕ್ ಪಾವ್ಲಿಂ. ಉರ್ವಾಚ್ಯಾ ವಿಗಾರಾಕ್ ಭಾರಿಚ್ ದೂ:ಖ್ ಭೊಗ್ಲೆಂ ತರೀ, ಹಿ ಖಬರ್ ಬೆಂದುರ್ಚ್ಯಾ ವಿಗಾರಾಕ್ ಮೆಳ್ತಾನಾ ತೊ ಪ್ಯಾಂಟಾ ಭಿತರ್ಚ್ ನಾಚೊಂಕ್ ಸುರು ಜಾಲೊ. ತೊ ಜಾಣಾಸ್ಲ್ಲೊ ಲಿಗೊರ್ ಶೆಟಿಚಿ ದಯಾಳಾಯ್ ಫಿರ್ಗಜೆಚ್ಯಾ ಫೆಸ್ತಾಂ ಸಂದರ್ಭಿಂ.
ಅಚಾನಕ್ ಘರ್ ಬದ್ಲಿ ಕೆಲ್ಲಿ ಗಜಾಲ್ ಮಾತ್ರ್ ಲಿಗೊರಿಕ್ ಸೊಡ್ನ್ ಹೆರಾಂ ಕೊಣಾಕ್ಯೀ ಕಳಿತ್ ನಾಸ್ಲ್ಲಿ. ಎಲಿಜಾನ್ ವಿಚಾರ್ಲ್ಲ್ಯಾಕ್ ಲಿಗೊರಿ ಥಾವ್ನ್ ಶೀದಾ ಜಾಪ್ ಮೆಳಾನಾಸ್ಲ್ಲ್ಯಾನ್ ತಿ ಕಾಂಯ್ ಚಡಿತ್ ಉಲಂವ್ಕ್ ಗೆಲಿನಾ.
�
ಘಾಟಾರ್ ಲಿಗೊರಿಕ್ ಭಾರಿಚ್ ಸ್ವಾತಂತ್ರ್ ಮೆಳ್ಲ್ಲೆಂ; ತಾಣೆಂಚ್ ಕಾಮೆಲ್ಯಾಂಕ್ ಊಟ್ ಬಸ್ ಕರ್ಚೆಂ ಜಾಲ್ಲ್ಯಾನ್ ತಾಚ್ಯಾ ಚಿಂತ್ಪಾ ವಿರೋಧ್ ವಚೊಂಕ್ ಕೊಣಾಯ್ಚ್ಯಾ ಪೆಂಕ್ಟಾಂತ್ ಬಳ್ ನಾಸ್ಲ್ಲೆಂ. ತೊಟಾಚೊ ಪಯ್ಶ್ಯಾಂ ವಿಷಯ್ ಜಾಲ್ಯಾರೀ ತಸೊಚ್. ಲಿಗೊರಿಚ್ ಸರ್ವ್ ವ್ಯವಾಹಾರ್ ಕರ್ತಾಲೊ ಆಸ್ತಾಂ ಮನ್ಶ್ಯಾ ಸ್ವರೂಪಾಚ್ಯಾ ತಾಕಾ ಮಾತ್ಶಿ ಆಶಾ ಲಾಗ್ಲ್ಲ್ಯಾಂತ್ ಕಿತೆಂಚ್ ನವಾಲ್ ನಾಸ್ಲೆಂ. ಗೊರೊ ಸಾಯ್ಬ್ ಲಿಗೊರಿವಯ್ಲ್ಯಾ ಭರ್ವಾಶ್ಯಾನ್ ಇಲ್ಲೊ ಚಡ್ ವೇಳ್ ಆಪ್ಲ್ಯಾ ಕುಟ್ಮಾ ಸಂಗಿಂ ಸಾರುಂಕ್ ಲಂಡನಾಕ್ ಪಾವ್ಲ್ಲೊ.
ಲಿಗೊರಿನ್ ಹ್ಯಾ ಅವ್ಕಾಸಾಚೊ ಬರೊಚ್ ಮುನಾಫೊ ಜೊಡ್ಲೊ.. ಪಯ್ಲೆಂ ಮೇಟ್ ಜಾವ್ನ್ ಲಿಗೊರಿನ್ ಆಪ್ಲೆಂಚ್ ಬ್ಯಾಂಕ್ ಎಕಾಂವ್ಟ್ ಉಗ್ತೆಂ ಕೆಲೆಂ ಆನಿಂ ಸವ್ಕಾಸ್ ಥೊಡೆ ಥೊಡೆಚ್ ಪಯ್ಶೆ ಆಪ್ಲ್ಯಾ ಎಕಾಂವ್ಟಾಂತ್ ಜಮಂವ್ಕ್ ಸುರು ಕೆಲೆಂ.
ಲಿಗೊರಿನ್ ಮಂಗ್ಳುರಾಂತ್ಲ್ಯಾ ಏಕಾ ಭಾರಿಚ್ ಫಾಮಾದ್ ವಕೀಲಾಚಿ ಮಿಲಾಖತ್ ಕೆಲಿ ಆನಿಂ ತಾಕಾ ಬರೆಚ್ ಪಯ್ಶೆ ಭಾಸಾಯ್ಲೆ. ತಶೆಂಚ್ ಹಿ ಖಬಾರ್ ಕೊಣಾಯ್ ಹೆರಾಂಕ್ ಕಳಿತ್ ಜಾಯ್ತ್ ಜಾಲ್ಯಾರ್ ವಕೀಲ್ ಹ್ಯಾ ಸಂಸಾರಾಂತ್ ಜಲ್ಮೊಂಕ್ಚ್ ನಾಸ್ಲ್ಲೊ ಮ್ಹಳ್ಳ್ಯಾಪರಿಂ ಕರಿನ್ ಮ್ಹಣ್ ಅಖಂಡ್ ಧಮ್ಕಿ ದಿಲಿ. ಪಯ್ಶಾಂಚಿ ರಾಸ್ ಪಳೆವ್ನ್ ವಕೀಲ್ ಸಾಯ್ಬ್ ಭಾರಿಚ್ ಖುಶ್ಮುಖ್ ಜಾಲೊ. ನೋಟಾಂಚೊ ಫೆರ್ಗೊ ಪಳೆವ್ನ್ ತೊ ಪ್ಯಾಂಟಾ ಭಿತರ್ಚ್ ಸಂಪೂರ್ಣ್ ಗಳ್ಳೊ!
ಏಕ್ ದೀಸ್ ಗೊರೊ ಸಾಯ್ಬ್ ಜೋನ್ಸ್ ಅಚಾನಕ್ ಘಾಟಾರ್ ಯೇವ್ನ್ ಪಾವ್ಲೊ. ಲಿಗೊರಿನ್ ಗಜಾಲ್ ಕಿತೆಂ ತಿ ವಿಚಾರ್ತಾನಾ, ತಾಣೆಂ ಸಾಂಗ್ಲೆಂ ಕೀ ಆಪುಣ್ ಹೊ ಜಾಗೊ ವಿಕ್ತಾಂ ಆನಿಂ ಪಾಟಿಂ ವಚೊನ್ ಲಂಡನಾಂತ್ಚ್ ಮರಾ ಪರ್ಯಾಂತ್ ರಾವ್ತಾಂ ಮ್ಹಣ್ ಲಿಗೊರಿಕ್ ತಾಣೆಂ ಸಾಂಗ್ಲೆಂ. ಆಪ್ಣೆಂ ಸರ್ವ್ ದಸ್ತಾವೇಜಾಂ ತಯಾರ್ ಕರುನ್ ಹಾಡ್ಲ್ಯಾಂತ್, ಫಕತ್ ಗಿರಾಯ್ಕ್ ಮೆಳ್ಲ್ಲ್ಯಾಕ್ಷಣ್ ಸರ್ವ್ ವಿಲೆವಾರಿ ಕರ್ಯಾಂ ಅಶೆಂ ತೊ ಲಿಗೊರಿಲಾಗಿಂ ಮ್ಹಣಾಲೊ.
ಲಿಗೊರಿಕ್ ಹೆಂ ಆಯ್ಕತಚ್ ತಕ್ಲೆರ್ ಪಾರಯ್ ಧಾಡಾಯಿಲ್ಲ್ಯೆಪರಿಂ ಭೊಗ್ಲೆಂ! ಆಪ್ಲೆಂ ಸರ್ವ್ ಸ್ವಪಾಣ್ ಧಿಕ್ಕಾಪಾಲ್ ಜಾತಾ ಕಶೆಂ ತಾಕಾ ಜಾಲೆಂ. ತೊ ಚಿಂತುಂಕ್ಚ್ ಪಡ್ಲೊ.
"ಅರೆ ಲಿಗೊರಿ, ತುಂ ಕಿತೆಂ ಏಕ್ಚ್ಚ್ ಪಾವ್ಟಿಂ ಥಂಡ್ ಪಡ್ಲೊಯ್?" ಜೋನ್ಸಾನ್ ವಿಚಾರ್ತಾನಾ,
"ನಾ, ನಾ, ಹಾಂವ್ ಕಾಂಯ್ ಚಿಂತಿನಾ; ಕಿತೆಂಗಿ ಏಕ್ಚ್ ಪಾವ್ಟಿಂ ಅಘಾತ್ ಭೊಗ್ಲೊ" ಮ್ಹಣಾಲೊ ತೊ.
"ತಶೆಂ ತುಂವೆಂ ಕಾಂಯ್ ಬೆಜಾರ್ ಕರ್ಚೆಂ ನಾಕಾ ಲಿಗೊರಿ, ಹಾಂವ್ ತುಕಾ ಏಕ್ ಲಾಖ್ ರುಪಯ್ ದಿತಾಂ ತುಂವೆಂ ಮ್ಹಾಕಾ ದಿಲ್ಲ್ಯೆ ಸೇವೆಕ್. ತ್ಯಾ ಪಯ್ಶಾಂನಿ ತುವೆಂ ತುಜಿ ಆನಿ ಬಾಯ್ಲೆ ಭುರ್ಗ್ಯಾಂಚಿ ಬರಿ ಕರ್ನ್ ಜತನ್ ಘೆವ್ಯೆತ್."
"ಹೊ ದೇವ್ ಬರೆಂ ಕರುಂ ಧನ್ಯಾಂ!" ಲಿಗೊರಿಚಿ ಜವಾಬ್ ತುರ್ಥಾನ್ ಆಯ್ಲಿ ಕಿತೆಂಚ್ ಚಿಂತಿನಾಸ್ತಾಂ, "ತ್ಯಾ ವಿಷ್ಯಾಂತ್ ಕಿತೆಂಚ್ ಭಿರಾಂತ್ ಕರ್ಚಿ ನಾಕಾ, ಮಂಗ್ಳುರಾಂತ್ ಸಭಾರ್ ನಳ್ಯಾಂ ಸಾವ್ಕಾರ್ ಆಸಾತ್ ಆನಿಂ ಹಾಂವ್ ಫಾಲ್ಯಾಂಚ್ ವಚೊನ್ ತುಕಾ ಏಕ್ ಘಟ್ ಗಿರಾಯ್ಕ್ ಹಾಡ್ತಾಂ" ಮ್ಹಳೆಂ ಲಿಗೊರಿನ್.
ಜೋನ್ಸಾಚ್ಯಾ ತೋಂಡಾರ್ ಭಾರಿಚ್ ಖುಶೆಚ್ಯೊ ಹಾಸೊ ಉದೆಲ್ಯೊ. ಲಿಗೊರಿಚಿ ತುರ್ತ್ ಜವಾಬ್ ಆಯ್ಕೊನ್ ತೊಯೀ ಚಿಂತಿಲಾಗ್ಲೊ ಆಪ್ಣಾಯಿತ್ಲ್ಯಾಕ್ - ಸರ್ವ್ ತುರ್ತಾನ್ ಜಾಯ್ತ್ ಜಾಲ್ಯಾರ್ ಆಪ್ಣಾಕ್ಯೀ ವೆಗಿಂಚ್ ಲಂಡನಾಕ್ ವಚ್ಯೆತ್ ಮ್ಹಣ್. ತೆ ದೋಗೀ ತ್ಯಾ ದಿಸಾ ರಾತ್ಚ್ಯಾ ಶಿಕಾರಿಕ್ ವಚೊನ್ ಏಕ್ ಚಿತಾಳ್ ಧರುನ್ ಆಯ್ಲೆ. ಆಳಾಂನಿಂ ತ್ಯಾ ಚಿತ್ಳಾಚಿ ಕಾತ್ ವೊಡ್ತಚ್, ತಾಂಚ್ಯಾ ಬೊಟ್ಲೆರಾನ್ ಮಾಸಾಚೆ ವಾಂಟೆ ಕೆಲೆ ಆನಿಂ ಥೊಡೆಂ ಭಾಜುಂಕ್, ಥೊಡೆಂ ಕಡಿ ಕರುಂಕ್ ಅಶೆಂ ವಿವಿಂಗಡ್ ದವರ್ಲೆಂ.
ಲಿಗೊರ್ ಆನಿಂ ಜೋನ್ಸ್ ಸಾಲಾಂತ್ ಬಸೊನ್ ವಿಸ್ಕಿಚಿ ಬೋತ್ಲ್ ಉಗ್ತಿ ಕರುನ್ ಇಲ್ಲೆಂ ಇಲ್ಲೆಂಚ್ ಘೊಟುಂಕ್ ಲಾಗ್ಲೆ. ಲಿಗೊರಿನ್ ತುರ್ತಾನ್ ಭಾಯ್ರ್ ವಚೊನ್ ರಾತಿಂ ಇಲ್ಲಿ ಮಝಾ ಚಾಕೊಂಕ್ ಏಕ್ಯೆ ಸೊಭಿತ್ ತರ್ನ್ಯಾ ಚಲಿಯೆಚಿ ಬಂಧಬಸ್ತ್ಯೀ ಕೆಲ್ಲಿ. ಹೆಂ ಸರ್ವ್ ಘಾಟಾರ್ ಸದಾಂಚೆಂ. ಹಾತಾಂತ್ ಪಯ್ಶೆ ಆಸಾತ್ ತಶೆಂ ಬಾಯ್ಲ್-ಭುರ್ಗಿಂ ಘಾಟಾ ಭಾಯ್ರ್ ಆಸಾತ್ ಆಸ್ತಾಂ ತಾಂಚಿ ಘಾಟಾವಯ್ಲಿ ಮಝಾ ತೆ ಮಾತ್ರ್ ಜಾಣಾ ಆಸ್ಲ್ಲೆ! ಗಾಂವಾಕ್ ಯೇವ್ನ್ ಇಗರ್ಜೆಂತ್ ದಾಖಂವ್ಚೆಂ ತಾಂಚೆಂ ಸಾಂತಿಪಣ್ ಪಳೆತಾನಾ ದೇವಾಕ್ ಪರ್ಯಾಂತ್ ಹೆ ತಸ್ಲೆಂ ಭಿಕಾಡ್ಡ್ಪಣ್ ಆದಾರ್ತಾತ್ ಮ್ಹಣ್ ಕಸ್ಲೊಚ್ ದುಭಾವ್ ಪರ್ಯಾಂತ್ ಯೇನಾಸ್ಲ್ಲೊ! ಘಾಟಾವಯ್ಲ್ಯಾ ಕೂಲಿಂಚಿಂ ಸಭಾರ್ ತರ್ನಿಂ ತರ್ನಿಂ ಚೆಡ್ವಾಂ ಹ್ಯಾ ಶೆಟಿಂಚ್ಯಾ ಅನ್ನಾಡ್ಪಣಾಕ್ ಬಲಿ ಜಾಲ್ಲಿಂ. ಪಯ್ಶೆ ಆಸ್ಲ್ಲ್ಯಾಂಚೆಂಚ್ ಕಾರ್ಬಾರ್ ಆಸ್ತಾಂ ಸಬಾರ್ ಬಾಪಯ್ ಪೋಟಾಚ್ಯೆ ಭುಕೆ ಖಾತಿರ್ ಖಾಲ್ತಿಮಾನ್ ಘಾಲ್ತಾಲೆ.
ಲಿಗೊರಿನ್ ಜೋನ್ಸಾಕ್ ಬರೆಂಚ್ ಪಿಯೆಂವ್ಕ್ ದಿಲೆಂ ಆನಿಂ ಅರ್ಧಿ ವಿಸ್ಕಿ ಬೋತ್ಲ್ ಖಾಲಿ ಜಾಯ್ಜೆ ಜಾಲ್ಯಾರ್, ಏಕ್ ಸೊಭಿತ್-ಸುಂದರ್ ತರ್ನಿ ಚಲಿ ತಾಂಚ್ಯಾ ಸಾಲಾಂತ್ ಉಭಿ ಜಾಲಿ. ಮ್ಯಾನೇಜರ್ ಕಾಂತಪ್ಪ ತಾಂತುಂ ಭಾರಿಚ್ ಹುಶಾರ್ ಆಸ್ಲ್ಲೊ!
ವಿಸ್ಕಿ ಮಾತ್ಯಾಕ್ ಚಡ್ಲ್ಲೊ ಜೋನ್ಸ್ ತ್ಯೆ ಚಲಿಯೆಕ್ ದೆಖ್ತಚ್ ಏಕ್ಚ್ಚ್ ಪಾವ್ಟಿಂ ಪೆಂಕ್ಟಾ ಸಕಯ್ಲ್ ಉಚಾಂಬಳ್ ಜಾಲೊ. ತಾಣೆಂ ತೊ ವಿಸ್ಕಿ ಗ್ಲಾಸ್ ಮೇಜಾರ್ ದವರ್ಲೊ ಆನಿಂ ತ್ಯೆ ಚಲಿಯೆಕ್ ಆರಾಂವ್ಕ್ಚ್ ಗೆಲೊ. ತರ್ನಿ ತರ್ನಿ ಚಲಿ, ಸೊಭಾಯೆಚಿ ಪೆಳಿ ಆನಿ ಜೋನ್ಸ್ ತಾಚ್ಯಾ ಪ್ರೈವೇಟ್ ಕುಡಾಕ್ ಏಕಾಮೆಕಾ ಆರಾವ್ನ್ ಧರ್ನ್ಂಚ್ ವೆತಾನಾ ಲಿಗೊರಿಚ್ಯಾ ಪ್ಯಾಂಟಾ ಭಿತರ್ ಕೊಟಾರ್ಲಿ ಚರೊಂಕ್ ಸುರು ಜಾಲಿ ತರೀ ತಾಣೆಂ ತಾಚೆಂ ಸಂಯಮ್ ಸಾಂಬಾಳಿಜಾಯ್ ಪಡ್ಲೆಂ - ಕಿತ್ಯಾ ತಾಕಾ ತಾಚ್ಯಾ ಮತಿಂತ್ಲೊ ತೊ ಇರಾದೊ ಜ್ಯಾರಿ ಕರುಂಕ್ ಆಸ್ಲ್ಲೊ.
ಏಕ್ ವ್ಹೋರ್ ಪಾಶಾರ್ ಜಾಯ್ಜೆ ಜಾಲ್ಯಾರ್ ಬೊಟ್ಲೆರಾನ್ ಆಪ್ಲಿ ಕಾಂಪಿಣ್ ಮಾರ್ಲಿ ಆನಿಂ ಸರ್ವಾಂಕ್ ಜೆವ್ಣಾಕ್ ಆಪಯ್ಲೆಂ. ಲಿಗೊರಿ ಜೋನ್ಸಾಚ್ಯಾ ಕುಡಾ ತೆವ್ಶಿಂ ತಾಕಾ ಆಪಂವ್ಕ್ ಮ್ಹಣ್ ವೆತಾನಾ ಥಂಯ್ಸರ್ ಭಿತರ್ ಜಾಂವ್ಚ್ಯೊ ತ್ಯೊ ಕುಚುಲ್ಯಾಂಚ್ಯೊ ಹಾಸೊ ಪಳೆವ್ನ್ ತಾಕಾ ಕಿತೆಂ ಕರ್ಚೆಂ ಮ್ಹಳ್ಳೆಂಚ್ ಕಳಿತ್ ಜಾಲೆಂನಾ. ತರೀ ಆಪ್ಲೆಂ ಮಿಸಾಂವ್ ಜ್ಯಾರಿ ಕರ್ಚ್ಯಾ ಇರಾದ್ಯಾನ್ ತಾಣೆಂ ತಾಚೆಂ ಸೈರಾಣ್ ಸಾಂಬಾಳ್ಳೆಂ ಆನಿಂ ವ್ಹಳು ದಾರ್ ಬಡವ್ನ್ ಜೆವಾಣ್ ತಯಾರ್ ಆಸಾ ಮ್ಹಣ್ ಭಾರಿಚ್ ಆಪುರ್ಭಾಯೆನ್ ಸಾಂಗ್ಲೆಂ.
ಧಾ ಮಿನುಟಾಂ ಜಾತಚ್ ಜೋನ್ಸ್ ಆನಿಂ ತಿ ಚಲಿ ಸಾಂಗಾತಾಚ್ಚ್ ಕುಚುಲ್ಯಾಂಚೆಂ ಉಲವ್ಣೆಂ ಘೆವ್ನ್ ಜೆವ್ಣಾ ಕುಡಾಕ್ ಆಯ್ಲಿಂ. ಸುಟಾ-ಬೂಟಾರ್ ಕುಡಾ ಭಿತರ್ ರಿಗ್ಲ್ಲೊ ಜೋನ್ಸ್ ಆತಾಂ ವ್ಹಾಣೊಂ ಆನಿಂ ನಿದೆ ವಸ್ತುರ್ ನ್ಹೆಸೊನ್ ಆಸ್ಲ್ಲೊ. ಚಲಿ ಆತ್ತಾಂ ಯೆತಾಂ ಮ್ಹಣ್ ಕಾಕ್ಸಾ ಕುಶಿಕ್ ಧಾಂವ್ಲಿ.
"ಹೊ ಜಾವ್ಯೆತ್ ಸಾಯ್ಬಾ ಹಿ ಚಲಿ, ಭಾರಿಚ್ ಉಚಾಂಬಳ್! ಇಂಗ್ಲಿಷ್ ಯೇನಾ ಜಾಲ್ಯಾರೀ ಹಾತ್-ಭಾಸ್ ಬರೀ ಸಮ್ಜಾತಾ" ಜೋನ್ಸಾನ್ ಉದ್ಗಾರ್ ಕಾಡ್ಲೊ ಚಲಿಯೆವಿಶಿಂ ಪ್ರಸ್ತಾಪ್ ಕಾಡುನ್.
"ಹಿ ಕಾಂಯ್ಚ್ ನಹಿಂ ಮಿಸ್ಟರ್ ಜೋನ್ಸ್, ಫಾಲ್ಯಾಂ ಹಾಂವ್ ತುಕಾ ಏಕ್ ಮಂಗ್ಳುರ್ಚಿ ಕ್ರೀಸ್ತಾಂವ್ ಚಲಿ ಹಾಡ್ನ್ ಯೆತಾಂ ಪಳೆ...!"
"ಹಾಂವೆಂಯ್ ಯೇಜಯ್ಗಿ ಪಳೆಂವ್ಕ್?’ ಸವಾಲ್ ಜೋನ್ಸಾಚೆಂ.
"ನಾ, ನಾ, ತಶೆಂ ಕಾಂಯ್ ನಾ; ತುಂ ಪಳೆಂವ್ಕ್ ಯೆಶಿ ತರ್, ತುಂ ಥಂಯ್ಚ್ ತಾಚ್ಯಾ ಆಂಗಾರ್ ಉಡೊಂಕ್ ಆಸಾಯ್!" ಮ್ಹಣಾಲಾಗ್ಲೊ ಲಿಗೊರ್. ತಾಕಾ ಜೋನ್ಸಾನ್ ತಾಚ್ಯೆ ಬರಾಬರ್ ಯೇಂವ್ಕ್ ನಾಕಾಸ್ಲ್ಲೆಂ; ಕಿತ್ಯಾ ತಾಚಿ ಕಾಣಿ ವಿಂಗಡ್ಚ್ ಆಸ್ಲ್ಲಿ.
ಚಿತ್ಳಾಚೆಂ ರಾಂದಪ್ ಭಾರಿಚ್ ರುಚಿಕ್ ಕಸೊ ಪರ್ಮಳ್ ಸಗ್ಳ್ಯಾ ಬೊಂಗ್ಲ್ಯಾಂತ್ ಭರೊನ್ ಗೆಲ್ಲೊ. ಬೊಟ್ಲೆರಾನ್ ಪಯ್ಲೆಂ ಭಾಜ್ಲ್ಲ್ಯೊ ಚಿತ್ಳಾಚ್ಯೊ ಬೊರ್ಯೊ ಹಾಡ್ಲ್ಯೊ. ಜೋನ್ಸ್ ಬೊರ್ಯೊ ಕಶ್ಯೊ ಚಾಬೊನ್ ಖಾಂವ್ಚ್ಯೊ ತೆಂ ತಾಚ್ಯಾ ತಾತ್ಕಾಲಿಕ್ ಬಾಯ್ಲೆಕ್ ಶಿಕಯ್ತಾಲೊ. ಇಲ್ಲಿ ವಿಸ್ಕಿಯೀ ಜೋನ್ಸಾನ್ ತ್ಯೆ ಚಲಿಯೆಕ್ ಪಿಯೆಂವ್ಕ್ ದಿಲಿ - ರಾತಿಕ್ ತಯಾರಾಯ್ ಮ್ಹಳ್ಳ್ಯೆಪರಿಂ.
ಉಪ್ರಾಂತ್ ಆಯ್ಲಿ ಚಿತ್ಳಾಚಿ ಕಡಿ ಆನಿಂ ಉಕ್ಡ್ಯಾ ತಾಂದ್ಳಾಚೆಂ ಶಿತ್. ಲಿಗೊರ್, ಜೋನ್ಸ್ ಆನಿ ತಿ ಚಲಿ ಬರೆಂಚ್ ರುಚಿಕಾಯೇನ್ ಜೆವ್ಲಿಂ. ಜೋನ್ಸಾಕ್ ವೇಳ್ ವಿಭಾಡ್ ಕರುಂಕ್ ನಾಕಾಸ್ಲ್ಲೆಂ ಜಾಲ್ಲ್ಯಾನ್ ತೊ ತ್ಯೆ ಚಲಿಯೆಕ್ ಘೆವ್ನ್ ಶೀದಾ ತಾಚ್ಯಾ ನಿದ್ಚ್ಯಾ ಕುಡಾತೆವ್ಶಿಂ ಚಮ್ಕಾತಾನಾ, ಎಕ್ಲೊ ಎಕ್ಸುರೊ ಲಿಗೊರ್ ಏಲಿಜಾಕ್ ಚಿಂತುನ್ ಆಪ್ಲ್ಯಾ ಕುಡಾಕ್ ಗೆಲೊ.
ಶಾಂತ್ ಥಂಡ್ ವಾತಾವರಣಾಂತ್ ಸಕಾಳಿಂಫುಡೆ ಸುಕ್ಣಿಂ ಸಾವ್ಜಾಂ ಆಪ್ಲಿಂ ಗಾಣಾಂ ಗಾವ್ನ್ ಹೊ ಸುರ್ಯಾ ಪ್ರಕಾಶ್ ತಾಂಕಾಂ ದಿಲ್ಲ್ಯಾಕ್ ದೆವಾಕ್ ಹರ್ಸಿತಾಲಿಂ. ಲಿಗೊರಿಕ್ ಏಕ್ಚ್ಚ್ ಪಾವ್ಟಿಂ ಜಾಗ್ ಜಾಲಿ. ತಾಚ್ಯಾ ಮಾತ್ಯಾರ್ ಸಭಾರ್ ಕಾಮಾಂ ಆಜ್ ಕರುಂಕ್ ಆಸ್ಲ್ಲಿಂ.
’ಕಾಲ್ ರಾತಿಂ ಸಾಂಗ್ಲ್ಲೆಪರಿಂ ಹಾಂವ್ ತುಕಾ ಏಕ್ ಸೊಭಿತ್ ಚಲಿ ಹಾಡುನ್ ಯೆತಾಂ ಆನಿಂ ಸಾಧ್ಯ್ ಜಾಲ್ಯಾರ್ ಏಕಾ ನಳ್ಯಾ ಸಾವ್ಕಾರಾಕ್ಯೀ ಹಾಡುಂಕ್ ಪಳೆತಾಂ ತುಜೆಂ ತೋಟ್ ಮೊಲಾಕ್ ಘೆಂವ್ಕ್’ - ಅಶೆಂ ಲಿಗೊರಿನ್ ಏಕಾ ಕಾಗ್ದಾರ್ ಬರಯ್ಲೆಂ ಆನಿಂ ಜೋನ್ಸಾಚ್ಯಾ ಕುಡಾಂತ್ ಲಿಪಯ್ಲೆಂ; ತಾಕಾ ಸಕಾಳಿಂ ಉಟ್ತಚ್ ವಾಚುಂಕ್.
ಲಿಗೊರ್ ಶೀದಾ ಕುಜ್ನಾಕ್ ವಚೊನ್ ಬೊಟ್ಲೆರಾಲಾಗ್ಚಿ ಕಾಫಿ ಪಿಯೆವ್ನ್, ಘಾಟಾಚೆಂ ಕಾರ್ ಘೆವ್ನ್ ಮಂಗ್ಳುರಾ ಕುಶಿಂ ವಾಟ್ ಧರಿಲಾಗ್ಲೊ. ತಾಚಿ ಪಯ್ಲಿ ಭೆಟ್ ಜಾಲಿ ತಾಚ್ಯಾ ಇಷ್ಟಾ ವಕೀಲಾಚಿ. ದೋಗ್ಯೀ ತುರ್ಥಾನ್ ಕಾರಾರ್ ಬಸೊನ್ ಗಜಾಲಿ ಕರುಂಕ್ ಮಿಲಾರ್ ಇಗರ್ಜೆ ಲಾಗ್ಶಿಲ್ಯಾ ತಾಜ್ಮಹಾಲಾಕ್ ಗೆಲೆ. ವಕೀಲಾನ್ ಆಪ್ಲೆ ಮೋಗಾಚೆ ಸುಕುರುಂಡೆ ವಿಚಾರ್ತಾನಾ ಲಿಗೊರಿನ್ ಆಂಬ್ಬಾಡೆ ಓರ್ಡರ್ ಕೆಲೆ.
ನಾಸ್ಟೊ ಕರ್ತಾನಾ ವೊರಾಂ ಇಕ್ರಾ ಜಾಲ್ಲಿಂ ತರೀ ಲಿಗೊರಿಚಿ ಮತ್ ತಾಣೆಂ ಚಿಂತ್ಚ್ಯಾಪ್ರಾಸ್ ಚಡೀತ್ ವೇಗಾನ್ ಧಾಂವ್ತಾಲಿ.
"ಆಳೆ ಫ್ರೆಂಕಿ, ಹಾಂವ್ ತುಕಾ ಪನ್ನಾಸ್ ಹಜಾರ್ ಕ್ಯಾಶ್ ದಿತಾಂ. ತುವೆಂ ಫಕತ್ ಆಜ್ ಮ್ಹಜೆ ಬರಾಬರ್ ಯೇವ್ನ್, ತುಂ ಮಂಗ್ಳುರಾಂತ್ಲೊ ಫಾಮಾದ್ ನಳ್ಯಾಂ ಸಾವ್ಕಾರ್ ಮ್ಹಣ್ ನಟನ್ ಮಾತ್ರ್ ಕೆಲ್ಯಾರ್ ಜಾಲೆಂ. ದುಸ್ರೆಂ ಸರ್ವ್ ಕಾಮ್ ಹಾಂವ್ ಕರ್ತಾಂ" ಮ್ಹಣಾಲೊ ಲಿಗೊರ್. "ತ್ಯಾ ವಿಶ್ಯಾಂತ್ ತುಂವೆಂ ಕಿತೆಂಚ್ ಭಿಂಯೆಂವ್ಚೆಂ ನಾಕಾ."
ವಕೀಲ್ ಫ್ರೆಂಕಿ ಇಲ್ಲೊ ಪಾದ್ದೆಲೊ - ಪಯ್ಲ್ಯೆ ರಾತಿಂ ನವಿ ವ್ಹಕಾಲ್ ಲಜೆಂವ್ಚ್ಯೆಪರಿಂ. "ಖಂಡಿತ್ ಹಾಂತುಂ ಮ್ಹಾಕಾ ಕಸ್ಲೆಂಚ್ ಬಾಧಕ್ ನಾಂಮೂ?" ಸವಾಲ್ ತಾಚೆಂ ಹ್ಯಾ ಕಠೋರ್ ಲಿಗೊರಿಕ್.
"ನಾ ಸಾಯ್ಬಾ, ಹಾಂವ್ ತುಕಾ ಹ್ಯಾ ಮಿಲಾರ್ ಮಾಯೆಚ್ಯಾ ನಾಂವಾರ್ ಸಾಂಗ್ತಾಂ ಕೀ ತುಕಾ ಕಿತೆಂಚ್ ವಾಯ್ಟ್ ಘಡ್ಚೆಂ ನಾ. ಆಜ್ ಮಾತ್ರ್ ತುಂ ಮ್ಹಜೆ ಬರಾಬರ್ ಯೇ ಆನಿಂ ಉಪ್ರಾಂತ್ಲೆಂ ತುಂ ಸರ್ವ್ ವಿಸರ್" ಥಾಂಬಯ್ಲಾಗ್ಲೊ ಲಿಗೊರ್ ಆನಿಂ ಆಪ್ಲ್ಯಾ ಹಾತ್ ಬ್ಯಾಗಾಂತ್ಲಿ ನೋಟಾಂ ಆಟ್ಟಿಚ್ಚ್ ತಾಣೆಂ ಹೆಣೆಂ ತೆಣೆಂ ಪಳೆವ್ನ್ ಮೆಜಾರ್ ದವರ್ಲಿ.
ತೆ ನೋಟ್ ಪಳೆತಾನಾ ಫ್ರೆಂಕಿಚೆಂ ಶಿಂತಿದ್ಚ್ ಚುಕ್ಲೆಂ ಮ್ಹಣಾಜಾಯ್! ತೊ ಏಕ್ ಸೊಭಿತ್ ಸ್ತ್ರೀಯೆನ್ ಆಪ್ಲ್ಯೆ ಸಮೊರ್ ವಸ್ತುರ್ ನಿಕ್ಳಾವ್ನ್ ರಾವ್ತಾನಾ ಜಾಂವ್ಚ್ಯಾ ಅಜ್ಜಾಪಾಪರಿಂ ತೊ ಹೆ ನೋಟ್ ಪಳೆವ್ನ್ ಕಾಲುಬುಲೊಚ್ ಜಾಲೊ! ಜಾಯ್ತ್ ಮ್ಹಣೊಂಕ್ ಪರ್ಯಾಂತ್ ತಾಕಾ ಆಪ್ಲಿ ಜೀಬ್ ಸುಟ್ಲಿ ನಾ!!
ಲಿಗೊರಿನ್ ಆಪ್ಲೆಂ ಹಾತ್-ಘಡ್ಯಾಳ್ ಪಳೆಲೆಂ - ವೊರಾಂ ಸಾಡೆ ಇಕ್ರಾ ಜಾಲ್ಲಿಂ. "ಆನಿಂ ಅರ್ಧ್ಯಾ ವೊರಾನ್ ದನ್ಪಾರ್ ಜಾತಾ, ವೇಳ್ ಭಾರಿಚ್ ಮ್ಹಾರೊಗ್ ಜಾಲಾ ಫ್ರೆಂಕಿ, ಚಲ್ಯಾಂ ಆಮಿಂ" ಮ್ಹಣೊನ್ ತಾಣೆಂ ವೇಯ್ಟರಾಕ್ ಬಿಲ್ಲ್ ಹಾಡುಂಕ್ ಸಾಂಗ್ಲೆಂ. ಪಯ್ಶೆ ಭರ್ತಚ್ ದೋಗೀ ವಕೀಲಾಚ್ಯಾ ದಫ್ತರಾಕ್ ವಚೊನ್ ಏಕ್ ತುರ್ತಾಚಿ ಭೆಟ್ ದೀವ್ನ್ ತಾಚ್ಯಾ ಪೆದ್ಯಾಲಾಗಿಂ ಆಪುಣ್ ಸಾಂಜೆರ್ ಪಾಟಿಂ ಯೆತಾಂ, ತಡವ್ ಜಾಲ್ಯಾರ್ ದಫ್ತರಾಕ್ ಬೀಗ್ ಘಾಲ್ನ್ ಘರಾ ವಚ್ ಆನಿಂ ಫಾಲ್ಯಾಂ ಸಕಾಳಿಂ ಯೇವ್ನ್ ದಫ್ತರ್ ಉಗ್ತೆಂ ಕರ್ ಮ್ಹಣ್ ತಾಕೀದ್ ದಿಲಿ.
ಲಿಗೊರ್ ಘರಾ ಪರ್ಯಾಂತ್ ಏಕ್ ಲ್ಹಾನ್ ಭೆಟ್ ದೀನಾಸ್ತಾಂ ಶೀದಾ ಘಾಟಾಚಿ ವಾಟ್ ಧರಿಲಾಗ್ಲೊ. ವಾಟೆರ್ ಪುತ್ತುರಾಂತ್ ತಾಣೆಂ ಆಪ್ಲೆಂ ಕಾರ್ ಆಪ್ಲ್ಯಾ ಆದ್ಲ್ಯಾ ಈಷ್ಟಾಗರ್ ವ್ಹೆಲೆಂ ಆನಿಂ ತಾಚಿ ಗರ್ಜ್ ತಾಣೆಂ ತಾಚೆಲಾಗಿಂ ಸಾಂಗ್ಲಿ. ತಾಚ್ಯಾ ಮಿತ್ರಾಚ್ಯಾ ಕಾಮೆಲ್ಯಾನ್ ಮಾಡಾರ್ ಚಡೊನ್ ದೋನ್ ತರ್ನೆ ಬೊಂಡೆ ಕಾಡ್ನ್ ತಾಸುನ್ ಹಾಂಕಾಂ ದೀಜಾಯ್ ಜಾಲ್ಯಾರ್ ಲಿಗೊರಿಚೊ ಮಿತ್ರ್ ಏಕ್ಯೆ ಮಾಸಾಳ್, ಸುಂದರ್ ಚಲಿಯೆಕ್ ಘೆವ್ನ್ ತಯಾರ್ ಆಸ್ಲ್ಲೊ. "ಶೆಂಬೊರ್ ರುಪಯ್ ದಿಲ್ಯಾರ್ ಮೊಸ್ತ್ ಪುರೊ" ಮಣಾಲಾಗ್ಲೊ ತೊ ಲಿಗೊರಿಲಾಗಿಂ. ಲಿಗೊರಿನ್ ಕೆನ್ನಾಂಯ್ ಆಪ್ಣಾಕ್ ಎಕ್ಸುರ್ಯಾಕ್ ಬೋರ್ ಜಾಲ್ಲ್ಯಾ ತೆದಾಳಾ ಪುತ್ತುರ್ ಯೇವ್ನ್ ರಾತಿ ಪಾಶಾರ್ ಕರ್ಚ್ಯೊ ಆಸ್ಲ್ಲ್ಯೊ ಜಾಲ್ಲ್ಯಾನ್ ತಾಂಕಾಂ ಹೆಂ ಸರ್ವ್ ಸದಾಂಚೆಂ. ಫ್ರೆಂಕಿ ಮಾತ್ರ್ ಹೆಂ ಸರ್ವ್ ಚಿಂತುಂಕ್ ಸಕಾನಾಸ್ತಾಂ ಪಾಂಯಾರ್ ಪಾಂಯ್ ದಾಂಬುನ್ನ್ ದವರ್ನ್ ಆಪ್ಣಾಕ್ ಕಿತೆಂಚ್ ಸಮ್ಜಾನಾ ಮ್ಹಳ್ಳ್ಯೆಪರಿಂ ಶೀದಾ ಮುಖಾರ್ ಪಳೆವ್ನ್ ಬಸ್ಲೊ.
ಲಿಗೊರಿಚೆಂ ಕಾರ್ ಚಲಾಲಾಗ್ಲೆಂ ಘಾಟಾ ಕುಶಿನ್. ವಕೀಲ್ ಫ್ರೆಂಕಾನ್ ತೀನ್-ಚ್ಯಾರ್ ಪಾವ್ಟಿಂ ಪಾಟಿಂ ಪಳೆವ್ನ್, ತ್ಯೆ ಸ್ತ್ರೀಯೆಚಿ ಸೊಭಾಯ್ ಚಾಕೊನ್ ಆಂಯ್ಡೆ ಗಳಯ್ಲೆ ಆನಿಂ ಆಪ್ಲೆ ದೋನೀ ಹಾತ್ ಆಪ್ಲ್ಯಾ ದೋನ್ ಪಾಂಯಾಂ ಮಧೆಂ ದವರ್ಲೆ! ಕಿತ್ಲೆಂ ಮ್ಹಳ್ಯಾರೀ ದೇವಾನ್ ತಾಕಾ ರಗ್ತಾ ಮಾಸಾಚಿ ಕೂಡ್ ದಿಲ್ಲಿ. ಮಾತ್ಯಾರ್ ಬಹುಷ ಪಾಲ್ಮೋಲಿವ್ ತೇಲ್ ಮಾಖ್ಲ್ಲೆಂ ಆಸ್ತೆಲೆಂ ಚಿಂತ್ಲೆಂ ತಾಣೆಂ ತಾಚ್ಯಾ ಕೇಸಾಂಚೊ ಪರ್ಮಳ್ ತ್ಯಾ ಕಾರಾ ಭಿತರ್ ರಿಗ್ಲ್ಯಾ ಉಪ್ರಾಂತ್. ತಾಚೆ ಹಾತ್ ಆಪ್ಶೆಚ್ ತಾಚ್ಯಾ ಮಾತ್ಯಾರ್ ಪೊಶೆಲೆ ಆನಿಂ ತಾಕಾ ನಾರ್ಲೆಲ್ ತೇಲಾಚೊ ಪರ್ಮಳ್ ಆಯ್ಲೊ! ’ಪಿಟ್ಟಾಶಿ ವಕೀಲ್!’ ತಾಣೆಂ ತಾಚೆಚ್ಚ್ ತಮಾಷೆ ಕೆಲೆ.
ಆಂವ್ಡಿ-ಗುಂವ್ಡಿ ರಸ್ತೊ ಘುಂವೊನ್-ಭಂವೊನ್ ವೆತಾನಾ ವಕೀಲಾಕ್ ನೀದ್ ಪಡೊನ್ ಘೊರೆಂವ್ಕ್ ಸುರು ಕೆಲ್ಲೆಂ. ತೆಣೆಂ ತಿ ಚಲಿಯೀ ಪಾಟ್ಲ್ಯಾ ಬಸ್ಕೆರ್ ನಿದ್ರಾವಿಲೀನ್ ಜಾಲ್ಲಿ. ಲಿಗೊರ್ ಆಪ್ಲ್ಯೆ ಮತಿಂ ಮುಖ್ಲಿಂ ಕಾಮಾಂ ಕಶಿಂ ಕರ್ಚಿಂ ಮ್ಹಳ್ಳ್ಯಾ ಚಿಂತ್ಪಾಚೆರ್ಚ್ ತಲ್ಲೀನ್ ಜಾಲ್ಲೊ. ಏಕ್ಚ್ಚ್ ಪಾವ್ಟಿಂ ಲಿಗೊರಿನ್ ಕಾರಾಚಿ ಬ್ರೇಕ್ ಘಾಲ್ತಾನಾ ದೊಗಾಂಯ್ಕೀ ಏಕಾಚ್ಛಾಣೆ ಜಾಗ್ ಜಾಲಿ. ಕಾಲುಬುಲಿಂ ಜಾವ್ನ್ ಮುಖಾರ್ ರಸ್ತ್ಯಾರ್ ಪಳೆತಾನಾ ಏಕ್ ವ್ಹಡ್ ಜಯ್ತ್ ಮ್ಹೊಸ್ ಕಾರಾಲಾಗಿಂಚ್ ರಾವೊನ್ ಆಸ್ಲ್ಲಿ ತಾಣಿಂ ಪಳೆಲಿ.
"ಬರೆಂ ಜಾಲೆಂ ಹಾಂವೆಂ ಹ್ಯಾ ಪನ್ವತಿ ಮ್ಹೊಸಿಕ್ ವೆಳಾರ್ ಪಳೆಲೆಂ, ನ್ಹಯ್ ತರ್ ಆಮ್ಚೆಂ ಕಾರ್ ಹಿಕಾ ಹಾಂಡುನ್ ಸಕ್ಲಾ ಫಾಲ್ಕ್ಯಾಂತ್ ಪಡ್ತೆಂ ಕೊಣ್ಣಾ" ಮ್ಹಣಾಲೊ ಲಿಗೊರ್. ವಕೀಲಾನ್ ಅನಂದ್ ಬಾಪಾ ಕಾಡ್ಲಿ, ದೇವಾಚೊ ಉಪ್ಕಾರ್ ಆಟವ್ನ್.
ಅಶೆಂ-ತಶೆಂ ಮ್ಹಣ್ತಾನಾ ಕಶೇಂಯ್ ಪಾಂಚ್ ವೊರಾಂಚೆರ್ ತೆಗಾಂಯ್ ತೋಟಾಲಾಗಿಂ ಪಾವ್ಲಿಂ. ಬೊಂಗ್ಲ್ಯಾಚ್ಯಾ ಮುಖ್ಲ್ಯಾ ಝಾಲಾಂತ್ ಲಿಗೊರಿನ್ ಕಾರ್ ರಾವಯ್ಲೆಂ ಆನಿಂ ಪಾಟ್ಲ್ಯಾ ಬಸ್ಕೆಚೆಂ ದಾರ್ ಉಘಡ್ಲೆಂ. ಸುಂದರ್ ಚಲಿ ಲಲಿತಾ ಶೇಲ್ಯಾಂನಿ ಭಾಯ್ರ್ ಆಯ್ಲೆಂ ಆಪ್ಲೆಂ ಏಕ್ ಲ್ಹಾನ್ಶೆಂ ಹಾತ್ ಪೊತೆಂ ಹಾತಿಂ ಧರುನ್.
ತೆಗಾಂಯ್ ಬೊಂಗ್ಲ್ಯಾಚಿಂ ಮೆಟಾಂ ಚಡ್ತಾನಾ ಮುಖಾರ್ ತಾಂಕಾಂ ಮುಖ್ಲ್ಯಾ ಸೊಪ್ಯಾರ್ ಜೋನ್ಸ್ ಹಾತಿಂ ವಿಸ್ಕಿ ಗ್ಲಾಸ್ ಆನಿಂ ತೋಂಡಾರ್ ಚುರುಟ್ ವೊಡ್ಚೊ ದಿಸ್ಲೊ.
"ದೇವ್ ಬರಿ ಸಾಂಜ್ ದೀಂವ್" ಮ್ಹಣ್ ತಾಣೆಂ ಸರ್ವಾಂಕ್ ಸ್ವಾಗತ್ ಕೆಲೊ. ತೆಗಾಂಯ್ ತಕ್ಲಿ ಬಾಗಾವ್ನ್ ತಾಕಾ ನಮಾನ್ ಮ್ಹಣಾಲಾಗ್ಲಿಂ ಪಾಟಿಂ ಜವಾಬ್ ದೀವ್ನ್. ಬೊಟ್ಲೆರಾನ್ ತುರ್ತಾನ್ ತೆಗಾಂಯ್ಕೀ ಹುನ್ ಕಾಫಿ ಆನಿಂ ಗೋಳಿಬಜೆ ಹಾಡ್ನ್ ದಿಲೆ. ಲಿಗೊರಿನ್ ಫ್ರೆಂಕಿಚಿ ವಳಕ್ ಕರುನ್ ದಿತಾನಾ ತೊ ಮಂಗ್ಳುರಾಂತ್ಲ್ಯಾ ಕಲಾಸಂಪತ್ ನಳ್ಯಾಂ ಕಾರ್ಖಾನ್ಯಾಚೊ ಧನಿ ತಶೆಂ ಹೆಂ ತೋಟ್ ತೊ ಸಾರ್ಕ್ಯಾ ಮೋಲಾಕ್ ಘೆಂವ್ಕ್ ತಯಾರ್ ಆಸಾ ಮ್ಹಣ್ ಸಾಂಗ್ಲೆಂ. ಜೋನ್ಸಾಕ್ ಚಲಿಯೆಕ್ ಪಳೆತಾನಾಂಚ್ ತಿ ಆಪ್ಣಾಕ್ ರಾತಿಂ ಖೆಳ್ಚಿ ವಸ್ತ್ ಮ್ಹಣ್ ಕಳ್ಳೆಂ ಜಾಲ್ಲ್ಯಾನ್ ತಿಕಾ ಪಳೆವ್ನ್ ಆಂಬೊರ್ ಪಿಕೊ ಹಾಸೊ ದಿಲ್ಯೊ. ಲಿಗೊರಿನ್ ಲಲಿತಾಕ್ ಏಕ್ ಕೂಡ್ ದಾಖಯ್ಲೆಂ ಆನಿಂ ಭಾಯ್ಲೆಂ ವಸ್ತುರ್ ಕಾಡ್ನ್ ಘರ್ಚೆಂ ವಸ್ತುರ್ ನ್ಹೆಸೊಂಕ್ ಸಾಂಗ್ಲೆಂ. ಏಕಾ ಹಾತಾಂತ್ ಅರ್ಧೊ ಚಾಬ್ಲ್ಲೊ ಗೋಳಿಬಜೊ ಆನಿಂ ದುಸ್ರ್ಯಾಂತ್ ಕಾಫ್ಯೆ ಕಪ್ ಘೆವ್ನ್ ಲಲಿತಾ ಕೂಡಾ ತೆವ್ಶಿಂ ಪಾಶಾರ್ ಜಾಲೆಂ.
ಭಾಯ್ರ್ ತೇಗೀ ಮಾನಾಯ್ ತೋಟಾ ವ್ಯವಾಹಾರಾ ವಿಶ್ಯಾಂತ್ ಉಲಂವ್ಚ್ಯಾರ್ ಮಗ್ನ್ ಜಾಲೆ. ಫ್ರೆಂಕಿನ್ ಆಪ್ಲೆಂ ಪಯ್ಲೆಂ ಸವಾಲ್ ಜಾವ್ನ್ ಜೋನ್ಸಾಲಾಗಿಂ ಹ್ಯಾ ತೋಟಾಕ್ ಕಿತ್ಲೆ ಪಯ್ಶೆ ವಿಚಾರ್ತಾಯ್ ಮ್ಹಣ್ ವಿಚಾರ್ಲ್ಲ್ಯಾಕ್, ಜೋನ್ಸಾನ್ ಆಪ್ಲಿಂ ದೋನೀ ಹಾತಾಂಚಿಂ ಧಾ ಬೊಟಾಂ ಉಭಿಂ ಕರುನ್ ಧಾ ಲಾಖಾಂಚಿ ನಿಶಾನಿ ದಿಲಿ ಆನಿಂ ಏಕ್ಚ್ಚ್ ಏಕ್ ದೆಡ್ಕಿ ಉಣಿ ನಾ ಮ್ಹಣ್ ನಿಘಂಟ್ ಸಾಂಗ್ಲೆಂ.
ಫ್ರೆಂಕಿನ್ ಲಿಗೊರಿಚ್ಯಾ ತೋಂಡಾಕ್ ಪಳೆವ್ನ್ ಕಿತೆಂಗಿ ಗುಪ್ತ್ ಉಲಂವ್ಕ್ ಆಸಾ ಮ್ಹಳ್ಳ್ಯಾಚಿ ಆಶಾ ದಾಖಯ್ಲಿ. ಲಿಗೊರ್ ಆನಿಂ ಫ್ರೆಂಕಿ ಸೊಪ್ಯಾಚ್ಯಾ ಕೊನ್ಶಾಕ್ ವಚೊನ್ ಗುಸು ಗುಸು ಉಲಯ್ಲಾಗ್ಲೆ ಆನಿಂ ಪಾಟಿಂ ಯೇವ್ನ್ ಪರತ್ ಜೋನ್ಸಾಲಾಗಿಂ ಯೇವ್ನ್ ಬಸ್ಲೆ. ಇತ್ಲ್ಯಾರ್ ಬೊಟ್ಲೆರಾನ್ ಜೋನ್ಸಾಚ್ಯಾ ಗ್ಲಾಸಾಂತ್ ಆನಿ ಇಲ್ಲಿ ವಿಸ್ಕಿ ವತುನ್ ಜಾಲ್ಲಿ. ವಿಸ್ಕೆಚೊ ಘೊಟ್ ಮಾರುನ್, "ಕಿತೆಂ ಜಾಯ್ತ್ ವ ನಾ?" ಜೋನ್ಸಾಚೆಂ ಫ್ರೆಂಕಿಕ್ ಶೀದಾ ಸವಾಲ್ ಆಯ್ಲೆಂ.
ಫ್ರೆಂಕಿ, "ಜಾಯ್ತ್ ಧನ್ಯಾಂ, ತುಜಿ ಖುಶಿಚ್ ಮ್ಹಜಿ ಮರ್ಜಿ" ಮ್ಹಣಾಲೊ.
"ತರ್ ಆತಾಂ ವೇಳ್ ಕಿತ್ಯಾ? ವಚ್ ಲಿಗೊರ್, ತಿಂ ಸ್ಟ್ಯಾಂಪ್ ಪತ್ರಾರ್ ಬರಯಿಲ್ಲಿಂ ದಸ್ತಾವೇಜಾಂ ಹಾಂಗಾ ಹಾಡ್." ಜೋನ್ಸಾನ್ ಲಿಗೊರಿಕ್ ಸಾಂಗ್ತಾನಾ ಲಿಗೊರ್ ಜೋನ್ಸಾಚ್ಯಾ ಕುಡಾಕ್ ವಚೊನ್ ತಿಂ ದಸ್ತಾವೇಜಾಂ ಹಾಡುನ್ ಆಯ್ಲೊ. ಜೋನ್ಸಾನ್ ತೆಂ ಸಗ್ಳೆಂ ದಸ್ತಾವೇಜ್ ಆಪ್ಲ್ಯಾ ರ್ಯಾಂಡ್ ಟಾಯ್ಪ್ರೈಟರಾರ್ ಟಾಯ್ಪ್ ಕರುನ್ ತಯಾರ್ ದವರ್ಲ್ಲೆಂ. ಫಕತ್ ತೋಟ್ ಘೆತೆಲ್ಯಾಚೆಂ ನಾಂವ್ ಮಾತ್ರ್ ಭರುಂಕ್ ಆಸ್ಲ್ಲೆಂ.
ಹೆಂ ದಸ್ತಾವೇಜ್ ಪಳೆವ್ನ್ ಫ್ರೆಂಕಿಕ್ ಕಿತೆಂ ಕರ್ಚೆಂ ಮ್ಹಳ್ಳೆಂಚ್ ಕಳಿತ್ ಜಾಲೆಂನಾ; ತಾಣೆಂ ಜೋನ್ಸಾಕ್ ಸಾಂಗ್ಲೆಂ, "ಮಿ. ಜೋನ್ಸ್, ಆತಾಂ ಆಮಿಂ ಮಾತ್ಸೊ ವಿರಾಮ್ ಘೆವ್ನ್ ಹ್ಯಾವಿಶಿಂ ಫಾಲ್ಯಾಂಚ್ ಪಳೆಲ್ಯಾರ್ ಕಿತೆಂ?"
"ತಶೆಂ ಜಾಲ್ಯಾರ್ ತಶೆಂ, ತುಜೆಂ ನಾಂವ್, ವಿಳಾಸ್ ಸರ್ವ್ ಲಿಗೊರಿಕ್ ದೀ, ತೊ ದಸ್ತಾವೇಜ್ ಸಂಪೂರ್ಣ್ ಕರ್ತೊಲೊ; ಪುಣ್ ಪಯ್ಶೆ ಮ್ಹಜ್ಯಾ ಹಾತಿಂ ಮೆಳಾನಾಸ್ತಾಂ ಹೆಂ ದಸ್ತಾವೇಜ್ ಮಾತ್ರ್ ತುಜ್ಯಾ ಹಾತಿಂ ಮೆಳ್ಚೆಂನಾ" ಮ್ಹಳೆಂ ಜೋನ್ಸಾನ್ ವಿಸ್ಕಿಚ್ಯೊ ಹಾಸೊ ದೀವ್ನ್. ಹಾತಿಂ ವಿಸ್ಕಿ ಗ್ಲಾಸ್ ಘೆವ್ನ್ ಜೋನ್ಸ್ ಲಲಿತ ರಿಗ್ಲ್ಲ್ಯಾ ಕುಡಾಕ್ ಚಮ್ಕಾಲೊ - ಭೃಮರ್ ಫುಲ್ ಸೊಧುನ್ ವೆಚ್ಯೆಪರಿಂ - ಅನಿಂ ತಾಣೆಂ ತಾಚ್ಯಾ ಪಾಟ್ಲ್ಯಾನ್ ಬಾಗಿಲ್ ಬಂಧ್ ಕೆಲೆಂ. ಫ್ರೆಂಕಿಕ್ಯೀ ಪಾಂಚ್ ಭುರ್ಗಿಂ ಆಸ್ಲ್ಲಿಂ ಆಸ್ತಾಂ ಜೋನ್ಸಾಚೊ ಮತ್ಲಬ್ ಸಮ್ಜೊಂಕ್ ತಾಕಾ ಕಾಂಯ್ ವೇಳ್ ವಚೊಂಕ್ ನಾ!
ಲಿಗೊರ್ ತಿಂ ದಸ್ತಾವೇಜಾಂ ಘೆವ್ನ್ ಜೋನ್ಸಾಚ್ಯಾ ದಫ್ತರಾಕ್ ಗೆಲೊ ಆನಿಂ ಕಿತೆಂಗಿ ಟಾಯ್ಪ್ ಕರುಂಕ್ ಪಡ್ಲೊ. ಜೋನ್ಸಾನ್ ಫ್ರೆಂಕಿಕ್ ವಿಸ್ಕಿ ಅರ್ಪಿತಾನಾ, ಫ್ರೆಂಕಿನ್ ಆಪ್ಲಿ ತಕ್ಲಿ ಖೊರ್ಪುನ್ ಆಪುಣ್ ಆಟ್ ವೊರಾಂ ಪಯ್ಲೆಂ ಕಿತೆಂಚ್ ಆಮಾಲ್ ಪಿಯೆನಾ ಮ್ಹಣ್ ನಾರ್ಗೊನ್ ಸಾಂಗ್ಲೆಂ.
ಗೊರೊ ಸಾಯ್ಬ್ ವಿಸ್ಕಿ ಪಿಯೆವ್ನ್ ತಾಂಬ್ಡೊ-ತಾಂಬ್ಡೊ ಭಿಂಡಾಪರಿಂ ಜಾಲ್ಲೊ ಕುಡಾ ಭಿತರ್ ರಿಗ್ತಾನಾ. ಗೊರ್ಯಾಂಚೆಂ ಜೆವಾಣ್ ಸಾತ್ ವೊರಾಂ ಪಯ್ಲೆಂಚ್ ಜಾಲ್ಲ್ಯಾನ್ ಬೊಟ್ಲೆರಾನ್ ಪಾಂಪ್ಲಾಂಚಿ ಕಡಿ, ಭಾಜ್ಲ್ಲಿಂ ಸುಂಕ್ಟಾಂ ಆನಿಂ ಸಲಾದ್ ಜೆವ್ಣಾ ಮೆಜಾರ್ ಸಜಯ್ಲೊ ಆನಿಂ ಸರ್ವಾಂಕ್ ಜೆವ್ಣಾಕ್ ಆಪವ್ಣೆಂ ದಿಲೆಂ.
ಫ್ರೆಂಕಿನ್ ತಡ್ವುಂಕ್ ತಾಂಕಾನಾಸ್ತಾಂ ಉದ್ಕಾಚ್ಯಾ ಗ್ಲಾಸಾಂತ್ ವಿಸ್ಕಿ ವೊತ್ಲಿ ಆನಿ ಗುಟುಕ್ಕ್ ಕರ್ನ್ ಪಿಯೆಲಾಗ್ಲೊ. ತಾಕಾ ಆತಾಂ ಇಲ್ಲೆಂ ಧೈರ್ ಆಯ್ಲೆಂ. ಲಿಗೊರಿ ಜೋನ್ಸಾಚ್ಯಾ ಕುಡಾಂತ್ ಆನಿ ಜೋನ್ಸ್ ಲಲಿತ ರಿಗ್ಲ್ಲ್ಯಾ ಕುಡಾಂತ್! ಹಾಂಗಾ ಕಿತೆಂ ತರೀ ಗಡ್ಭಡ್ ಆಸಾ ತೆಂ ಜಾಣಾ ಜಾಲ್ಲ್ಯಾ ಫ್ರೆಂಕಿಕ್ ತಾಚೆ ಉಮಾಳೆ ತಡ್ವುಂಕ್ಚ್ ಜಾಲೆನಾಂತ್. ಹೆಣೆಂ-ತೆಣೆಂ ತಾಕಾ ಪಳೆತಾನಾ ಕೋಣ್ಂಚ್ ದಿಸ್ಲೆನಾಂತ್. ಬೊಟ್ಲೆರ್ಯೀ ತಾಚ್ಯೆ ನದ್ರೆಕ್ ಝಳ್ಕಾಲೊ ನಾ. ’ಮಾಂಯ್ಚೊ ಘೊವ್, ಜಾಲ್ಲೆಂ ಜಾತಾ’ ಮ್ಹಣ್ ತಾಚ್ಯೆ ಇತ್ಲ್ಯಾಕ್ಚ್ ತಾಣೆಂ ಮ್ಹಳೆಂ. ಕಾಸ್ವಾ ಮೆಟಾಂ ಕಾಡುನ್ ತೊ ಲಲಿತಾಚ್ಯಾ ಕುಡಾ ತೆವ್ಶಿಂ ಆಪ್ಲಿಂ ಕಾಸ್ವಾ ಪಾವ್ಲಾಂ ಕಾಡುಂಕ್ ಪಾವ್ಲೊ. ತೊ ಆತಾಂ ಮತಿಂತ್ ಫಕತ್ ಅಟ್ರಾ ವರ್ಸಾಂಚ್ಯಾ ಪೊಕ್ರಿ ಚೆಡ್ಯಾಪರಿಂ ಉಚಾಂಬಳ್ ಜಾಲ್ಲೊ.
ವ್ಹಳೂ ದಾರಾಚ್ಯಾ ಚಾವ್ಯೆ ಬುರಾಕಾ ಥಾವ್ನ್ ತಿಳೂನ್ ಪಳೆತಾನಾ ಫ್ರೆಂಕಿಚಿಂ ಅಂತರ್ಮಳಾಂ ತಾಚ್ಯಾ ಕಪಲಾರ್ ನೆಕೆತ್ರಾಂ ದಾಖಂವ್ಕ್ ಪಾವ್ಲಿಂ. ಬೊಡ್ಕಿಚೊ ಜೋನ್ಸ್ ವಿಣ್ಗೊಚ್ಚ್ ಪಡ್ಲಾ ತ್ಯಾ ಖಾಟ್ಯೆರ್ ಆನಿಂ ಲಲಿತ ಆಪ್ಲಿ ಬಾಜು ನಿಕ್ಳಾಂವ್ಚ್ಯಾರ್ ಪಡ್ಲಾಂ! ಜಲ್ಮಾಂತ್ ದೆಖಾನಾಸ್ಲೆಂ ದೆಖ್ಲೆಂ ದೇವಾ ಮ್ಹಣ್ ಫ್ರೆಂಕಿನ್, ವಾಂಚ್ಲ್ಯಾರ್ ಭಿಕ್ ಮಾಗುನ್ ಖಾತಾಂ ಮ್ಹಳ್ಳ್ಯಾಪರಿಂ ಪಾಟಿಂ ವಾಟ್ ಧರ್ಲಿ ಅನಿ ಮೆಜಾವಯ್ಲೊ ಆಪ್ಲೊ ಗ್ಲಾಸ್ ಘೆವ್ನ್ ಆನಿ ಇಲ್ಲಿ ವಿಸ್ಕಿ ವೊತ್ಲಿ ತಶೆಂ ಗುಟುಕ್ಕ್ ಕರ್ನ್ ಪಿಯೆಲಾಗ್ಲೊ. ಲಲಿತ ಹಾಚಿ ಕಾಯಾಮ್ ಸಾಂಗಾತಿಣ್ ಆಸ್ತೆಲಿ ಮ್ಹಣ್ ಚಿಂತ್ಲೆಂ ಫ್ರೆಂಕಿನ್ ಹ್ಯಾ ಸರ್ವಾಚೊ ಮತ್ಲಬ್ ಕಿತೆಂಚ್ ಸಮ್ಜಾನಾಸ್ತಾಂ. ಗುಪಿತ್ತ್ ತೊ ’ಪಾಪ್ ಬಾವ್ಡೆಂ ಎಲಿಜ್’ ಮ್ಹಣ್ ಚಿಂತಿಲಾಗ್ಲೊ.
ಘಾಮೆಲ್ಲ್ಯಾ ಫ್ರೆಂಕಿಕ್ ಪಳೆವ್ನ್ ಬೊಟ್ಲೆರಾನ್ ಫ್ಯಾನ್ ಘಾಲೆಂ ಆನಿಂ ಗರಮ್ ಜಾತಾಗಿ ಮ್ಹಣ್ ವಿಚಾರ್ಲೆಂ. ಫ್ರೆಂಕಿನ್ ಆಪ್ಲ್ಯಾ ನಾಕ್ ಪಿಳ್ಚ್ಯಾ ತುವಾಲ್ಯಾನ್ ಆಪ್ಲೆಂ ಕಪಾಲ್ ಪುಸ್ಲೆಂ ಆನಿಂ, "ನಾ ತಶೆಂ ಕಾಂಯ್ ಗರಮ್ ಜಾಯ್ನಾ ಸಾಯ್ಬಾ" ಮ್ಹಣ್ ಬೊಟ್ಲೆರಾಕ್ ಸಾಂಗ್ಲೆಂ.
ಬೊಟ್ಲೆರಾನ್ ಪರತ್ ಜೆವ್ಣಾಚಿ ಕಾಂಪಿಣ್ ಮಾರ್ಲಿ ಆನಿಂ ಜೆವಾಣ್ ತಯಾರ್ ಜಾಲಾಂ ಮ್ಹಳ್ಳಿ ಚತ್ರಾಯ್ ಪರತ್ ದಿಲಿ. ತಾಣೆಂ ಕಷ್ಟಾಂನಿ ಕೆಲ್ಲೆಂ ಜೆವಾಣ್ ನಿಂವೊನ್ ವೆಚೆಂ ಪಳೆಂವ್ಕ್ ತಾಕಾ ನಾಕಾಸ್ಲ್ಲೆಂ.
ಪಾಂಚ್ ಮಿನುಟಾಂನಿಂ ಲಿಗೊರ್ ಜೆವ್ಣಾ ಕುಡಾಕ್ ರಿಗ್ಲೊ, "ಜೋನ್ಸ್ ಕಿತೆಂ ಲಲಿತಾಚ್ಯಾ ಕುಡಾಕ್ ರಿಗ್ಲ್ಲೊ ಆನಿಕೀ ಯೇಂವ್ಕ್ ನಾಂ-ಗಿ ಕಿತೆಂ?" ಮ್ಹಣ್ ವಿಚಾರ್ತಾನಾ ಫ್ರೆಂಕಿನ್ ಆಯ್ಕೊನ್ ಆಯ್ಕಾನಾಸ್ಲ್ಲ್ಯಾಪರಿಂ ಕೆಲೆಂ. ಬಹುಷ ಫ್ರೆಂಕಿಕ್ ಮಾತ್ಸೊ ರಾಗ್ ಆಯ್ಲಾ ಮ್ಹಣ್ ಚಿಂತುನ್ ಲಿಗೊರ್ ತಾಚ್ಯೇಲಾಗಿಂ ಚಡೀತ್ ಉಲಂವ್ಕ್ ಗೆಲೊನಾ.
ಹೆಣೆಂ ಲಲಿತ ಅನಿಂ ಜೋನ್ಸ್ಯೀ ತ್ಯಾ ಕುಡಾ ಥಾವ್ನ್ ಭಾಯ್ರ್ ಆಯ್ಲಿಂ ಆನಿಂ ಹಾತ್ ಧುಂವ್ಕ್ ಉದ್ಕಾ ನಳಾ ಸರ್ಶಿಂ ಗೆಲಿಂ. ಸರ್ವಾಂ ಮೆಜಾಲಾಗಿಂ ಜಮ್ತಚ್ ಸರ್ವಾಂನಿಂ ಬೊಟ್ಲೆರಾನ್ ರಾಂದ್ಲ್ಲೆಂ ತೆಂ ಆಪುರ್ಬಾಯೆಚೆಂ ಜೆವಾನ್ ಬೊರೆಂಚ್ ಭೊಕಾಯ್ಲೆಂ. ಜೆವ್ಣಾವೆಳಿಂ ಜೋನ್ಸಾನ್ ಸರ್ವಾಂಕ್ ವಿಸ್ಕಿ ದಿಲಿ. ಲಲಿತಾಯೀ ಲ್ಹಾನ್ ಬಾಳ್ಶೆಂ ಆಪ್ಲ್ಯೆ ಆವಯ್ಚೊ ಪಾನೊ ಚಿಂವ್ಚೆಪರಿಂ ತೊ ವಿಸ್ಕೆ ಗ್ಲಾಸ್ ಚಾಕಾಲಾಗ್ಲೆಂ ಚುಕುಚುಕು ಕರುನ್. ಹ್ಯಾ ಜೋನ್ಸಾಲಾಗಿಂ ರಾತ್ ಪಾಶಾರ್ ಕರುಂಕ್ ತಾಕಾ ವಿಸ್ಕಿ ಅತೀ ಗರ್ಜ್ ಆಸ್ಲ್ಲಿ.
ಜೆವ್ಣಾ ಉಪ್ರಾಂತ್ ಜೋನ್ಸ್ ಕಾಕ್ಸಾಕ್ ಮ್ಹಣ್ ವೆತಾನಾ ಲಿಗೊರ್ ಲಲಿತಾಲಾಗಿಂ ಕಿತೆಂಗಿ ಕುಮ್ಸಾರ್ ಜಾಲೊ. ಲಲಿತ ಸಕ್ಡಾಕ್ಯೀ ಜಾಯ್ತ್ ಮ್ಹಳ್ಳ್ಯಾಪರಿಂ ತಕ್ಲಿ ಹಾಲಂವ್ಚಿ ಫ್ರೆಂಕಿನ್ ಪಳೆಲೆಂ. ತಾಕಾ ಮಾತ್ರ್ ಹಾಚೊ ಮತ್ಲಬ್ ಭಿಲ್ಕುಲ್ ಕಳೊಂಕ್ ನಾ!
ಫ್ರೆಂಕಿನ್ ಲಿಗೊರಿಕ್ ಸಾಂಗ್ಲೆಂ ಕೀ ಆಪ್ಣಾಕ್ ಆಜ್ಚ್ ಪಾಟಿಂ ಗಾಂವಾಕ್ ವಚೊಂಕ್ ಜಾಯ್ ಮ್ಹಣ್. ಲಿಗೊರಿನ್ ಕಿತೆಂಚ್ ದಾಕ್ಷೆಣ್ ನಾಸ್ತಾಂ ’ಜಾಯ್ತ್’ ಮ್ಹಳೆಂ. ಜೋನ್ಸ್ ನಿದೊಂಕ್ ವೆತಚ್ ಆಪುಣ್ ತುಕಾ ಪಾಟಿಂ ಮಂಗ್ಳುರಾಕ್ ವೆಚಿ ವಿಲೆವಾರಿ ಕರ್ತಾಂ ಮ್ಹಣ್ ಭಾಸ್ ದಿಲಿ. ಹೆಂ ಆಯ್ಕೊನ್ ಫ್ರೆಂಕಿಕ್ ಮಾತ್ಸಿ ಸುಟ್ಕಾ ಮೆಳ್ಳಿ ಆನಿಂ ತಾಚಿ ಘುಡ್ಗುಡಿ ರಭಸಾನ್ ಕಾಂಪೊನ್ ಆಸ್ಲ್ಲಿ ಥೊಡಿ ಥಂಡ್
ಪಡ್ಲಿ.
�
ಲಿಗೊರಿನ್ ಥೊಡಿಂ ಫೋನಾಂ ಕರುನ್ ಫ್ರೆಂಕಿಕ್ ಪಾಟಿಂ ಗಾಂವಾಕ್ ಪಾಂವ್ಚಿ ವಿಲೆವಾರಿ ಕೆಲಿ. ತಾಚೊ ಎಕ್ಲೊ ಮಿತ್ರ್ ತ್ಯೆ ರಾತಿಂ ಪಾಟಿಂ ಗಾಂವಾಕ್ ಭೆಟ್ ದಿಂವ್ಚ್ಯಾರ್ ಆಸ್ಲ್ಲೊ.
ಫ್ರೆಂಕಿ ಗಾಂವ್ಚ್ಯಾ ವಾಟೆಕ್ ಲಾಗ್ಲೊ, ಲಲಿತಾನ್ ಜೋನ್ಸಾಕ್ ಮಾಂಕೊಡ್ ಕರುನ್ ತ್ಯಾ ದಸ್ತಾವೇಜಾಂಚೆರ್ ಜೋನ್ಸಾಚಿ ದಸ್ಕತ್ ಘೆವ್ನ್ ಜಾಲ್ಲಿ ಜೋನ್ಸ್ ನಿದೊಂಕ್ ವೆಚ್ಯೆ ಪಯ್ಲೆಂಚ್! ಲಿಗೊರಿನ್ ಲಲಿತಾಕ್ ಪಾಂಯ್ಶಿಂ ರುಪಯ್ ದಿಲೆ ಆನಿಂ ಸಕಾಳ್ ಜಾತಚ್ ಬಸ್ಸ್ ಘೆವ್ನ್ ಪಾಟಿಂ ಪುತ್ತುರಾಕ್ ವಚೊಂಕ್ ಸಾಂಗ್ಲೆಂ. ಘಾಟಾರ್ ಆಸ್ಲ್ಲ್ಯಾ ಸಭಾರ್ ಕ್ರೀಸ್ತಾಂವಾಂನಿ ಗೊರ್ಯಾಂಚಿ ಆಸ್ತ್ ಭಿತರ್ ಘಾಲ್ಲ್ಯಾಪರಿಂ ಲಿಗೊರಿನ್ಯೀ ಜೋನ್ಸಾಚೆಂ ಕಾಫ್ಯೆ ತೋಟ್ ಆಪ್ಲೆಂ ಕೆಲೆಂ.
ಲಲಿತ ಸಕಾಳಿಂ ಉಟೊನ್ ಪಾಟಿಂ ಆಪ್ಲ್ಯಾ ಘರಾ ಗೆಲೆಂ. ಬೊಟ್ಲೆರ್ ಸಕಾಳಿಂ ಉಟೊನ್ ಜೋನ್ಸಾಕ್ ಕಾಫಿ-ಫಳಾರ್ ಹಾಡ್ತಾನಾ ಲಿಗೊರಿನ್ ತೊ ಆಪ್ಣಾಕ್ ದೀ, ಗೊರೊ ಸಾಯ್ಬ್ ಫಾಂತ್ಯಾರ್ ಉಟೊನ್ ತುರ್ತಾನ್ ಪಾಟಿಂ ಇಂಗ್ಲೆಂಡಾಕ್ ಗೆಲಾ ಮ್ಹಣ್ ಸಾಂಗ್ಲೆಂ. ಕಾಲುಬುಲೊ ಜಾಲ್ಲ್ಯಾ ಬೊಟ್ಲೆರಾಕ್ ಲಿಗೊರಿನ್ ಉಲಯಿಲ್ಲೆಂ ಲಾತೆಂ ಭಿಲ್ಕುಲ್ ಸಮ್ಜಾನಾ ಜಾಲೆಂ! ಬೊಟ್ಲೆರಾಕ್ ಏಕ್ ಹಜಾರ್ ರುಪಯ್ ದೀವ್ನ್ ಲಿಗೊರಿನ್ ಆನಿಂ ಮುಖಾರ್ ತುಜಿ ಸೇವಾ ಹಾಂಗಾ ನಾಕಾ ಮ್ಹಣ್ ಸಾಂಗ್ಲೆಂ.
ಆದ್ಲ್ಯಾ ದಿಸಾ ಜೋನ್ಸಾನ್ ಘರಾ ಪಾಟ್ಲ್ಯಾನ್ ಏಕ್ ವ್ಹಡ್ ಫೊಂಡ್ ಕಾಡುಂಕ್ ಸಾಂಗ್ಲ್ಲೊ ಪಾಲ್ಪೊಣ್ಸಾಚೊ ಏಕ್ ರೂಕ್ ಲಾಂವ್ಕ್. ಬೊಟ್ಲೆರಾಕ್ ತೊ ಮಾತ್ಯೆನ್ ಧಾಂಪ್ಲ್ಲೊ ಪಳೆವ್ನ್ ಭಾರಿಚ್ ಅಜಾಪ್ ಜಾಲೆಂ. ತರೀ ತೊ ಆಪ್ಣಾಕ್ ಮೆಳ್ಲ್ಲೆ ಹಜಾರ್ ರುಪಯ್ ಚಿಂತುನ್ಂಚ್ ಶೀದಾ ತಾಚ್ಯಾ ಘರಾ ಮೂಡಿಗೆರೆಚಿ ವಾಟ್ ಧರಿಲಾಗ್ಲೊ.
ಸದಾಂಚ್ಯೆಪರಿಂ ಘಾಟಾಚ್ಯಾ ಕಾಮಾಚಿಂ ಆಳಾಂ ಯೇವ್ನ್ ಆಪಾಪ್ಲೆಂ ಕಾಮ್ ಕರ್ಚ್ಯಾಂತ್
ಮಗ್ನ್ ಜಾಲ್ಲಿಂ. ಲಿಗೊರ್ ಆಪ್ಲೆಂ ಕಾರ್ ಘೆವ್ನ್ ತಿಂ ತೋಟಾಚಿಂ ದಸ್ತಾವೇಜಾಂ ಆಪ್ಣಾಚ್ಯಾ
ನಾಂವಾರ್ ಕೆಲ್ಲಿಂ ತಿಂ ರೆಜಿಸ್ಟರ್ ಕರುಂಕ್ ತಾಹ್ಶಿಲ್ದಾರಾಚ್ಯಾ ದಫ್ತರಾ ತೆವ್ಶಿಂ
ಪಾವ್ಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
