ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 26. ಧುರಿ
ಶಾನ್ ಬೊಂದೆಲ್: ವಾಚ್ಪ್ಯಾಕ್ ಭರ್ಪೂರ್ ಮನರಂಜನ್ ದಿಂವ್ಚಾಂತ್ ಹೆಳ್ಲ್ಲೆ ಬರವ್ಪಿ ಕೊಂಕ್ಣೆಂತ್ ಜಾಯ್ತೆ ಆಸಾತ್ ಆನಿ ತಾಂತ್ಲೊ ಎಕ್ಲೊ ಶಾನ್ ಬೊಂದೆಲ್. ಎದೊಳ್ಚ್ ಲಗ್ಭಗ್ ಚಾಳಿಸಾಂಲಾಗಿಂ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್ ಆನಿ ಏಕ್ ಕಾಣ್ಯೆಗಾರ್, ಕವಿ ತರ್ಯ್ ಕೊಂಕ್ಣೆಂತ್ ಕಾದಂಬರಿಕಾರ್ ಜಾವ್ನ್ಯ್ ತೊ ಫಾಮಾದ್ ಜಾಲಾ. ಏಕ್ ಬರಿ ಕಥಾವಸ್ತ್ ವಿಂಚುನ್ ತಿ ಅಪ್ರುರ್ಭಾಯೆನ್ ಪ್ರಸ್ತುತ್ ಕರ್ಚಿ ಕಲಾ ಬರ್ಯಾನ್ ತೊ ಜಾಣಾ ದೆಖುನ್ ತಾಚ್ಯೊ ಚಡ್ತಾವ್ ಕಾಣ್ಯೊ ವಾಚ್ಪ್ಯಾಚಾ ಮತಿಂತ್ ಚಡ್ ಕಾಳ್ ಉರ್ತಾತ್.
ಹ್ಯಾ ಕಾಣ್ಯೆಚೊ ಮೂಳ್ ಬರಯ್ಣಾರ್: ಯಂಡಿಮೂರಿ ವೀರೇಂದ್ರನಾಥ್. (ಕೊಂಕ್ಣೆಕ್ ಅನುವಾದ್ - ಶಾನ್ ಬೊಂದೆಲ್)
ಶಾನ್, ಬೊಂದೆಲ್
ಸಿಮ್ಲಾ!
ಚರೊನ್ ವೆಚ್ಯಾ ದಿವ್ಡಾಭಾಶೆನ್ ದಿಸ್ಚ್ಯಾ ರಸ್ತ್ಯಾರ್ ಕಾರ್ ಸವ್ಕಾಸಾಯೆನ್ ಚಲ್ತಾಲೆಂ... ವೊರಾಂ ಸಾಕಾಳಿಂಚಿಂ ಸ ಜಾತಾಲಿಂ... ಮೊಳಾಬ್ ನಿತಳ್ ಆಸ್ಲ್ಲೆಂ... ದೊಂಗ್ರಾಂ ಇಡ್ಯಾಂತ್ಲ್ಯಾನ್ ಸುರ್ಯೊ ಜಲ್ಮೊನ್ ಯೆದೊಳ್ಚ್ ರಚ್ನೆಚಿ ಸೊಭಾಯ್ ದಾಕಯ್ತಾಲೊ... ಅಂತ್ರಳಾಕ್ ತೆಂಕ್ಚೆ ದೊಂಗೊರ್... ಪಾತಾಳಾಕ್ ಶೆವ್ಟಾಲ್ಲಿಂ ಫಾಲ್ಕಿಂ... ಮುಳಾಂತ್ ವಾಳ್ಚಿ ನಂಯ್... ಸರ್ವ್ ಪಾಚ್ವೆಂಪಾಚ್ವೆಂ ಆನಿ ಥಂಯ್ ಹಾಂಗಾ ಪಾಚ್ವೆಂ ಧಾಂಪುಂಕ್ ಉಡ್ಡಾತಾ ತಶೆಂ ದಿಸ್ಚೆಂ ಬರಫ್... ದೊಂಗ್ರಾಂಕ್ ಘಶ್ಟೊಂಚೆಭಾಶೆನ್ ರಾವ್ಲ್ಲಿಂ ಮೊಡಾಂ ಖಂಚ್ಯಾಗಿ ಕಲಾಕರಾಚ್ಯಾ ಸರ್ಗಾಚ್ಯಾ ಪಿಂತುರಾಭಾಶೆನ್ ದಿಸ್ತಾಲಿಂ..
ನಿವೇದಿತಾ ಕಿತ್ಯಾಕ್ ಪರತ್ ಸಿಮ್ಲಾ ಪಳೆಂವ್ಕ್ ಆಶೆತಾ... ಸವಾಲಾಕ್ ಜಾಪ್ ಜಶಿ ಸೊಬ್ತಾಲೆಂ ಸಿಮ್ಲಾ... ತವಳ್ಚ್ ಕಟೀನ್ ಹಿಂವ್ ಉಣೆಂ ಜಾವ್ನ್ ಯೆತಾಲೆಂ ಆನಿ ಧುರಿ ಮಾಯಾಗ್ ಜಾತಾಲಿ ದೆಕುನ್ ಸುಡ್ಸುಡೀತ್ ಜಾಲ್ಲ್ಯಾ ಸಾಯ್ಮನಾನ್ ಏಕ್ ಲಾಂಬ್ ಉಸ್ವಾಸ್ ಸೆವ್ಲೊ. ಧುರಿ ಉಣಿ ಜಾಂವ್ಕ್ಚ್ ರಾಕ್ತಾಲೊ ತೊ... ಹ್ಯಾಪಾವ್ಟಿಂ ಸಗ್ಳೆಂ ಸಿಮ್ಲಾ ಭೊಂವಾಜೆ...
ಕಾರಾಚ್ಯಾ ಚಾಲಕಾನ್ ಭೋವ್ ಚತ್ರಾಯೆನ್ ಗುಂವ್ಡಿ ಮೊಡ್ಟಾನಾ ಸಾಯ್ಮಾನಾನ್ ಗುಂವೊನ್ ಆಪ್ಲ್ಯಾ ಪತಿಣೆಕ್ ಪಳೆಲೆಂ ಆನಿ ತಿಣೆಂ ಸವಯೆನ್ ಜಶೆಂ ಏಕ್ ಅಮ್ರುಕೊ ಹಾಸೊ ಪಾಟಯ್ಲ್ಯೊ. ಸಾಯ್ಮಾನಾಚಿ ದೀಶ್ಟ್ ಸವ್ಕಾಸ್ ತಿಚ್ಯಾ ಭರ್ಲ್ಲ್ಯಾ ಕುಸಿವಯ್ರ್ ಗೆಲಿ... ಯೆದೊಳ್ಚ್ ಸಾತ್ಮಯ್ನೆ ಭರ್ಲ್ಲೆ. ಏಕಾ ಮಯ್ಪಾಸಾಚ್ಯಾ ದಿಶ್ಟಿಸಂಗಿಂ ತೊ ಭಾಯ್ಲ್ಯಾನ್ ದಿಸ್ಚಿ ಸೊಭಾಯ್ ಪಳೆತ್ ಉದೆವ್ನ್ ಯೆಂವ್ಚ್ಯಾ ಸುರ್ಯಾಚ್ಯಾ ಕಿರ್ಣಾಂಸಂಗಿಂ ಖೆಳೊಂಕ್ಪಡ್ಲೊ ಆನಿ ಪಾಚ್ವ್ಯಾ ಸೊಭಾಯೆಂತ್ ಬುಡ್ಲೊ.
ನಿವೇದಿತಾಸಂಗಿಂ ತಾಚೆಂ ಲಗಿನ್ ಜಾವ್ನ್ ತೀನ್ವರ್ಸಾಂ ಸಂಪ್ಲ್ಲಿಂ ಆನಿ ತಾಂಚ್ಯಾ ಮೊಗಾಚೆಂ ಪಯ್ಲೆಂ ಇನಾಮ್ ಯಾ ಫಳಿತಾಂಶ್ ದೋನ್ಮಯ್ನ್ಯಾಂನಿ ಯೇಂವ್ಕ್ ಆಸ್ಲ್ಲೆಂ. ಜರ್ ಕೊಣ್ಯಿ ಘೊವ್ಬಾಯ್ಲಾಂನಿ ಕಶೆಂ ಆಸಾಜೆ ಯಾ ಜಿಯೆಜೆ ಮ್ಹಣ್ ವಿಚಾರಿತ್ ತರ್ ತೆಂ ಜೊಡೆಂ ಜಾಪ್ ದೀಂವ್ಕ್ ಸಕ್ತಾಲೆಂ. ದಿಲ್ಲಿಂತ್ ಏಕಾ ಫಾಮಾದ್ ಕೊಲೆಜಿಂತ್ ಮೆಸ್ತ್ರಿ ಜಾವ್ನ್ ಕಾಮ್ ಕರ್ಚೊ ವಿಶಾಲ್ ಚಿಂತ್ಪಾಚೊ ಸಾಯ್ಮನ್ ಏಕ್ ಆದರ್ಶ್ ಪತಿ ತರ್ ಥಂಯ್ಸ್ ಸರ್ಕಾರಿ ದಫ್ತಾರಾಂತ್ ವಾವುರ್ಚೆಂ ನಿವೇದಿತಾ ತಾಚಿ ಪತೀಣ್ ಜಾಲ್ಲೆಂ. ತಾಂಕಾಂ ಕಾಜಾರಿ ಜಿವಿತ್ ಕೆನ್ನಾಂಯ್ ಭೊರೊ ಜಾಲ್ಲೆಂನಾ... ಪಯ್ಲ್ಯಾ ದೋನ್ವರ್ಸಾಂನಿ ಭುರ್ಗಿಂನಾಕಾತ್ ಮ್ಹಣೊನ್ ಪಾಟಿಂ ಘಾಲ್ಲ್ಯಾ ತಾಂಣಿ ಜಿವಿತಾಂತ್ ನವಿ ಮೋಡ್ ಜಾವ್ನ್ ತಾಕಾ ತಯಾರಾಯ್ ಕರ್ನ್ ಜಾಲ್ಲಿ ಆನಿ ನಿವೇದಿತಾ ಆವಯ್ ಜಾಂವ್ಚ್ಯಾಕ್ ರಾಕ್ತಾಲೆಂ. ತೀನ್ವರ್ಸಾಂ ಆದಿಂ ಹನಿಮುನಾಕ್ ತಿಂ ಸಿಮ್ಲಾಚ್ ಆಯಿಲ್ಲಿಂ ಆನಿ ನಿವೇದಿತಾನ್ ಪರತ್ ಏಕ್ಪಾವ್ಟಿಂ ಥಂಯ್ಚ್ ವೆಚಿ ಆಶಾ ಉಚಾರ್ಲ್ಲ್ಯಾನ್ ಸಾಯ್ಮನಾನ್ ಭೋವ್ ವ್ಹಡಾ ಖುಶೆನ್ಂಚ್ ತಾಕಾ ಕಬ್ಲಾತ್ ದಿಲ್ಲಿ... ಕಟೀನ್ ಹಿಂವೆಚೊ ಆನಿ ಧುರಿಯೆಚೊ ಕಾಳ್ ಸಂಪೊಂಕ್ ರಾಕ್ತಾಲೊ ತೊ. ಸಾತ್ಮಯ್ನೆ ಭರ್ಲ್ಯಾಮಾಗಿರ್ ನಿವೇದಿತಾಕ್ ತಿತ್ಲೆಂ ಲಾಂಬಾಯೆಚೆಂ ಪಯ್ಣ್ ಸುರಕ್ಶಿತ್ನ್ಹಂಯ್ ಮ್ಹಳ್ಳೆಂ ಜಾಣಾಂ ಆಸ್ಲ್ಯಾರ್ಯಿ ಆಪುಣ್ ತಾಕಾ ಸಾಂಬಾಳ್ಟಲೊಂ ಮ್ಹಳ್ಳೊ ಭರ್ವಸೊ ಆಸ್ಲ್ಲ್ಯಾನ್ ತಾಂಕಾಂ ಫಿಕಿರ್ಯಿನಾತ್ಲ್ಲಿ. ವಿಮಾನಾಥಳಾಥಾವ್ನ್ ಭಾಯ್ರ್ ಯೆತಾನಾ ಹೊಟೆಲಾಚೆಂ ಕಾರ್ ತಾಂಕಾಂ ರಾಕ್ತಾಲೆಂ.
ಸಾಯ್ಮಾನಾನ್ ಪರತ್ ಏಕ್ಪಾವ್ಟಿಂ ನಿವೇದಿತಾಕ್ ಪಳೆಲೆಂ ಪೂಣ್ ತೆಂಯಿ ರಚ್ನೆಚ್ಯಾ ಸೊಬಾಯೆಮಧೆಂ ಕಿತೆಂಗಿ ಸೊದ್ತಾತಶೆಂ ಭೊಗ್ತಾನಾ ತೊ ಬಸ್ಕೆವಯ್ರ್ಚ್ ನಿಸರ್ಲೊ... ತ್ಯಾಚ್ವೆಳಾರ್ ಕಾರ್ ಥಾಂಬ್ಲೆಂ.
ಹೊಟೆಲ್ ಪೆಂಟಗೊನ್!
ಸಾಯ್ಮನ್ ಕಾರಾಂತ್ಲೊ ದೆಂವ್ಲೊ ಆನಿ ಸಾಂಗಾತಾಚ್ ನಿವೇದಿತಾಯಿ... ಸಾಯ್ಮನಾನ್ ತುರಂತ್ ಆಪ್ಲ್ಯಾ ಖಾಂದ್ಯಾವಯ್ಲೆಂ ದಾಟ್ ವಸ್ತುರ್ ಕಾಡ್ನ್ ನಿವೇದಿತಾಕ್ ರೆವ್ಡಾಯ್ಲೆಂ. ದೊಗಾಂಯಿ ದಾರಾಕುಶಿನ್ ಚಲಾಲಾಗ್ಲಿಂ...
"ಒಹ್... ನೊ!" ತ್ಯಾಚ್ಫರಾ ದಾರಾಂತ್ಲ್ಯಾನ್ ಭಾಯ್ರ್ ಯೆಂವ್ಚಿ ಏಕ್ ಸೊಭಿತ್ ಚಲಿ ಕಿತೆಂ ಜಾಲೆಂ ಮ್ಹಳ್ಳೆಂ ಕಳ್ಚೆಭಿತರ್ ಸಾಯ್ಮನಾಕ್ ಆಪ್ಟಾಲಿ ಆನಿ ಲಕ್ಲಿ. ತುರಂತ್ ಸಾಯ್ಮನಾನ್ ತಿಕಾ ಆರಾಯ್ಲೆಂ ಆನಿ ಪಡಾನಾತ್ಲ್ಲೆಭಾಶೆನ್ ಸಾಂಬಾಳ್ಳೆಂ. ಥಿರಾರ್ ಆಯಿಲ್ಲಿ ತಿ ಸಾರ್ಕಿ ಉಬಿ ಜಾತಾನಾ ಸಾಯ್ಮನಾನ್ ತಿಕಾ ಪಳೆಲೆಂ ಆನಿ ತಿಣೆಂ ತಾಕಾ!
ಸಾಯ್ಮನಾಚ್ಯಾ ಕಪಲಾರ್ ಹಾರಿಂಹಾರಿಂನಿ ಮಿರಿಯೊ ಉದೆಲ್ಯೊ.
"ಸಾಯ್ಮನ್!" ತಿಚೆ ದೊಳೆ ಅಶೀರ್ ಜಾಲೆ.
"ಶೀತಲ್!" ಅಪಾಪಿಂಚ್ ಸಾಯ್ಮನಾಚೊ ಹಾತ್ ತಾಚ್ಯಾ ಹಾತಾಕ್ ಸಾಸ್ಪಾಲೊ ಪೂಣ್ ತ್ರಾಸ್ ಜಾಲೆನಾಂತ್... ಶೀತಲಾಚೊ ಮೋವ್ ಹಾತ್ ಹಾತಾಂತ್ ಸಲೀಸಾಯೆನ್ ಮೆಳ್ಳೊ. "ತುಂ ಹಾಂಗಾ..." ಸಾಯ್ಮನಾಚ್ಯಾ ತಾಳ್ಯಾಚಿ ಉಂಚಾಯ್ ಉಣಿ ಆಸ್ಲ್ಲಿತರ್ಯಿ ತಾಂತುಂ ವಿಸ್ಮಿತ್ಕಾಯ್ ದಿಸ್ಲಿ.
"ಚಾರ್ ಮಯ್ನ್ಯಾಂಖಾತಿರ್ ಕೊಡ್ಯಾಳ್ಥಾವ್ನ್ ವರ್ಗ್ ಜಾಲ್ಲೊ" ಶೀತಲಾನ್ ತಾಚೊ ಹಾತ್ ದಾಂಬ್ಲೊ. "ಪೂಣ್ ತುಂ ಕಸೊ ಹಾಂಗಾ..."
"ದುಸ್ರೆಂ ಹನಿಮೂನ್!" ಸಾಯ್ಮನ್ ಹಾಸ್ಲೊ.
"ಪತೀಣ್?" ಆಸ್ಡ್ಯೊ ಉಡಯಿತ್ ಶೀತಲಾನ್ ನಿವೇದಿತಾಕ್ ಪಳೆಲೆಂ ಆನಿ ತ್ಯಾಚ್ಫರಾ ಖಂಯ್ಗಿ ಏಕಾ ಆಯಾಮಾಂತ್ ಕರ್ಗಾಲ್ಲೊ ಸಾಯ್ಮನ್ ಉಡೊನ್ಪಡ್ಲೊ. ತುರಂತ್ ತೊ ನಿವೇದಿತಾಕುಶಿನ್ ಗುಂವ್ಲೊ ಆನಿ ತಾಂಕಾಂ ಎಕಾಮೆಕಾ ಒಳೊಕ್ ಕರ್ನ್ ದಿಲಿ.
"ಮೇಡಮ್..." ಬಗ್ಲೆಥಾವ್ನ್ ಆವಾಜ್ ಆಯ್ಕಾಲ್ಲೊ ಪಳೆವ್ನ್ ಶೀತಲ್ ತ್ಯಾಕುಶಿನ್ ಗುಂವ್ಲೆಂ. "ಸರ್ವ್ ತಯಾರ್ ಆಸಾ".
"ಸಾಯ್ಮನ್..." ಶೀತಲ್ ಬಾವ್ಲೆಂ. "ಹಾಂವ್ ಆತಾಂ ಕೊಡ್ಯಾಳ್ ಭಾಯ್ರ್ಚರ್ಲಿಂ... ದೆಕುನ್ಂಚ್ ಆಮ್ಸೊರಾನ್ ಭಾಯ್ರ್ ಯೆತಾಲಿಂ. ಕಿತೆಂಯಿ ಜಾಂವ್" ತಾಂಣೆ ನಿವೇದಿತಾಕ್ ಪಳೆಲೆಂ. "ಸಾಯ್ಮನಾತಸಲೊ ಪತಿ ಕಾಂಯ್ ಲಾಕಾಂತ್ ಎಕಾ ಚಲಿಯೆಕ್ ಮೆಳಾತ್... ಏಕ್ದಮ್ ನಶೀಬ್ವಂತ್ ತುಂ... ಚತ್ರಾಯೆನ್ ಸಾಂಬಾಳ್ ಹಾಕಾ" ತೆಂ ಹಾಸ್ಲೆಂ.
"ನಿವೇದಿತಾನ್ಯಿ ಮ್ಹಾಕಾ ಕಾಂಯ್ಚ್ ಉಣೆಂ ಕರುಂಕ್ನಾ ಶೀತಲ್..." ಸಾಯ್ಮನಾನ್ ಪತಿಣೆಚ್ಯಾ ಗಳ್ಯಾಭಂವ್ತಿಂ ಹಾತ್ ರೆವ್ಡಾಯ್ಲೊ. "ಹಾಚೆತಸಲಿ ಪತೀಣ್ ಮೆಳಾಜೆತರ್ಯಿ ಚಲ್ಯಾಂನಿ ಜಲ್ಮಾಂವಯ್ರ್_ಜಲ್ಮ್ ಜೊಡಿಜೆ."
ಕಾರಾಚೊ ಆವಾಜ್ ಆಯ್ಕೊನ್ ಉಡೊನ್ ಪಡ್ಲೆಂ ಶೀತಲ್.
"ಮ್ಹಾಕಾ ತಡವ್ ಜಾತಾ..." ತೆಂ ಹಾಸ್ಲೆಂ. "ವೆಗಿಂಚ್ ಯೆಂವ್ಚ್ಯಾ ತುಮ್ಚ್ಯಾ ಬಾಳಾಕ್ ಮ್ಹಜೆಯಿ ರೆಕಾದ್ ಪಾಟಯಾ" ತಾಂಣೆ ನಿವೇದಿತಾಚ್ಯಾ ಕುಸಿವಯ್ರ್ ದೀಶ್ಟ್ ಜೊಕ್ಲಿ. "ಆನಿ ಸಾಯ್ಮನ್..." ತಾಂಣೆ ಪರತ್ ಸಾಯ್ಮನಾಚೊ ಹಾತ್ ದಾಂಬ್ಲೊ. "ಕೊಡ್ಯಾಳ್ ಆಯ್ಲೊಯ್ ತರ್ ಮ್ಹಾಕಾ ವಿಸರ್ನಾಕಾ... ಹಾಂಗಾ ಯೇ" ತಂಣೆ ಬಳಾನ್ ತಾಚೊ ಹಾತ್ ದರ್ನ್ ಪಯ್ಸ್ ಕಾರಾಲಾಗಿಂ ವೋಡ್ನ್ ವ್ಹೆಲೊ.
ನಿವೇದಿತಾಚಿಂ ದಾಡಾಮಾಂ ಅಡ್ಚಾಲಿಂ... ಮಾತ್ಸೆಂ ಹಿಂವ್ಯಿ ಖಾತಾಲೆಂ ಜಾಲ್ಲ್ಯಾನ್ ತಾಂಣೆಂ ದಾಂತ್ ಚಾಬೊನ್ ದರ್ಲೆ. ಸಾತ್ವಾರಿಂ ಪಯ್ಸ್ ಕಾರಾಲಾಗಿಂ ಆಸ್ಲ್ಲ್ಯಾ ಶೀತಲಾನ್ ಸಾಯನಾಚ್ಯಾ ಕಾನಾಂನಿ ಕಿತೆಂಗಿ ಸಾಂಗ್ಲೆಂ ಆನಿ ಸಾಯ್ಮನ್ ವ್ಹಡಾ ಆವಾಜಾನ್ ಹಾಸ್ಲೊ!
ತೊಯಿ ಹಾಸ್ತಾಲೊ ಆನಿ ಶೀತಲ್ಯಿ ತಾಚೆಸಂಗಿ ಪೊಟಾಕ್ ಹಾತ್ ದರ್ನ್ ಹಾಸ್ತಾಲೆಂ... ತಿಂ ಫಕತ್ತ್ ತೀನ್ಮಿನುಟಾಂ... ಕಾಬಾರ್ಜಾಲ್ಲಿಂಚ್ ಶೀತಲ್ ತಾಕಾ ಏಕ್ಪಾವ್ಟಿಂ ಪೊಟ್ಲುನ್ ದರ್ನ್ ಗಾಲಾಂಕ್ ಗಾಲ್ ಘಶ್ಟುನ್ ಕಾರಾರ್ ಬಸೊನ್ ಮಾಯಾಗ್ ಜಾಲೆಂತರ್ಯಿ ಗಂಭೀರ್ ಸ್ವಭಾವಾಚೊ ಸಾಯ್ಮನ್ ಮಾಗಿರ್ಯಿ ಹಾಸ್ತಾಲೊ... ತೆಂ ನಿವೇದಿತಾನ್ ಪಳೆಲೆಂ!
ಹಾಸೊನ್ ಥಕ್ಲ್ಲೊ ಸಾಯ್ಮನ್ ಪಾಟಿಂ ಗುಂವ್ಲೊ ಪೂಣ್ ತಾಕಾ ನಿವೇದಿತಾ ದಿಸ್ಲೆಂನಾ. ತಾಕಾ ಸೊದ್ತಾನಾ ತೆಂ ಪಯ್ಸ್ ಏಕಾ ರುಕಾಲಾಗಿಂ ಆಪ್ಣಾಕ್ ಪಾಟ್ ಕರ್ನ್ ರಾವ್ಲ್ಲೆಂ ದಿಸ್ಲೆಂ.
ತೊ ಲಾಗಿಂ ಗೆಲೊ ಆನಿ ತಾಕಾ ಘೆವ್ನ್ ಭಿತರ್ ಚರ್ಲೊ. ಕೂಡ್ ಪಯ್ಲೆಂಚ್ ಅಮಾನತ್ ಕರ್ನ್ ದವರ್ಲ್ಲ್ಯಾನ್ ಕಸಲೆಯ್ ತ್ರಾಸ್ ಜಾಲೆನಾಂತ್. ತೊ ನಿವೇದಿತಾಸಂಗಿಂ ಕೂಡಾಂತ್ ರಿಗ್ಲೊ. ಎಕ್ಸುರೆಂ ಹವ್ಯಾನಿಯಾಂತ್ರಿತ್ ಕೂಡ್ ಆನಿ ಏಕ್ ನ್ಹಾಣಿತರ್ಯಿ ಸೊಭಿತ್ ರಿತಿನ್ ಮಾಂಡ್ಲ್ಲೆಂ ಪಳೆತನಾ ಪರತ್ ತಾಚ್ಯಾ ವೊಂಟಾಂನಿ ಹಾಸೊ ಉದೆಲ್ಯೊ.
"ಕಾಂಯ್ ತ್ರಾಸ್ ಜಾತಾತ್ಗಿ..." ನಿವೇದಿತಾಚಿ ಚತ್ರಾಯ್ ಪಯ್ಲಿ ಜಾಲ್ಲ್ಯಾನ್ ಹಳ್ಟಾರ್ ಪಿಂರ್ಗಾಲೊ ತೊ ಪೂಣ್ ನಿವೇದಿತಾಚಿ ಜಾಪ್ನಾತ್ಲ್ಲ್ಯಾನ್ ತಾಚೆಕುಶೀನ್ ಗುಂವ್ಲೊ. "ಕಾಂಯ್ ಚಡ್ಉಣೆಂ..." ತೊ ಪರತ್ ಫುಮಾರ್ಲೊ ಪೂಣ್ ನಿವೇದಿತಾನ್ ತೆನ್ನಾಂಯ್ ಜಾಪ್ ದಿಲಿನಾ. "ನಿವೇದಿತಾ..." ತೊ ಪುಸ್ಪುಸ್ಲೊ. "ತುಂ ಸಾರ್ಕೆಂ ಆಸಾಯ್ಮೂ?"
ವಿಪರ್ಯಾಸ್ ಜಾವ್ನ್ ನಿವೇದಿತಾನ್ ತೊಂಡ್ ಮೊಡ್ಲೆಂ.
"ಕಿತೆಂ ಜಾಲೆಂ..." ಸಾಯ್ಮನ್ ಗುಸ್ಪೊಡ್ಲೊ. "ಆತ್ತಾಂಮ್ಹಣಾಸರ್ ಸಾರ್ಕೆಂ ಆಸ್ಲ್ಲೆಂಯ್ ತುಂ... ಆತಾಂ ಕಿತೆಂ ಜಾಲೆಂ..." ತಾಚೆ ಫುಗ್ಲ್ಲೆ ಗಾಲ್ ಪಳೆವ್ನ್ ಗಡ್ಬಡ್ಲ್ಲ್ಯಾ ತಾಂಣೆ ಭಿಂಯಾನ್ ತಾಕಾ ಆಪ್ಣಾಕುಶೀನ್ ಗುಂವ್ಡಾಯ್ಲೆಂ ಆನಿ ತಾಚ್ಯಾ ದೊಳ್ಯಾಂನಿ ಭರೊನ್ ವೊಮ್ತೊಂಕ್ ಆಂವ್ಡೆಂವ್ಚಿಂ ದುಕಾಂ ಪಳೆವ್ನ್ ಎಕಾಚ್ಫರಾ ಥಂಡ್ಗಾರ್ ಜಾಲೊ. "ಕಿತೆಂ ಜಾಲೆಂ ಸಾಂಗ್ಮಾ..." ತಾಂಣೆ ದಾವ್ಯಾಹಾತಾನ್ ತಾಚೆಂ ಭುಜ್ ಆರಾಯಿತ್ ಉಜ್ವೊ ಹಾತ್ ಕುಸಿವಯ್ರ್ ದವರ್ಲೊ.
"ಮ್ಹಾಕಾ ಕಾಂಯ್ ಜಾಂವ್ಕ್ನಾ" ಎಕಾಚ್ಫರಾ ನಿವೇದಿತಾನ್ ತಾಚೊ ಹಾತ್ ಮಾರ್ಲೊ ಆನಿ ತಾಕಾ ಪಾಟ್ ಕರ್ನ್ ಬಸ್ಲೆಂ.
ಸಾಯ್ಮನ್ ಕಾಂಯ್ಚ್ ಸಮ್ಜಾನಾಸ್ತಾನಾ ಖಾಟ್ಯೆರ್ ಕುಸ್ಕಾಲೊ. ನಿವೇದಿತಾಚೆ ಫುಗ್ಲ್ಲೆ ಗಾಲ್ ಯಾ ಭಿಜ್ಲ್ಲೆ ದೊಳೆ ತಾಕಾ ಕಾಂಯ್ ನವೆನ್ಹಂಯ್. ಹಜಾರ್ಪಾವ್ಟಿಂ ತಾಂಣೆಂ ತೆಂ ಪಳೆಲ್ಲೆಂ ಆನಿ ಭೊಗ್ಲ್ಲೆಂ. ಮಾಗಿರ್ ಸಮಾದಾನ್ ಕರ್ತಾನಾ ಥೊಡ್ಯಾಚ್ವೆಳಾನ್ ತೆಂ ಪರತ್ ಸಾರ್ಕೆಂ ಜಾತಾಲೆಂ ಪೂಣ್ ತೆಂ ಸಾರ್ಕೆಂ ಕರಿಜೆ ತರ್ ತಾಚ್ಯಾ ಫುಗ್ಚ್ಯಾ ಗಾಲಾಂಚೆಂ ಆನಿ ಭಿಜ್ಚ್ಯಾ ದೊಳ್ಯಾಂಚೆಂ ಕಾರಣ್ ಸೊದಿಜೆಪಡ್ಟಾಲೆಂ... ತೊ ತೆಂಚ್ ಸೊದುಂಕ್ಪಡ್ಲೊ ಪೂಣ್ ಕಾರಣ್ಮಾತ್ ಸುಸ್ತಾಲೆಂಚ್ನಾ.
ತೊ ಥೊಡೊವೇಳ್ ರಾಕ್ಲೊ. ಥೊಡೆಪಾವ್ಟಿಂ ತಶೆಂಯ್ ಜಾತಾಲೆಂ... ಕಾರಣ್ ಮೆಳಾನಾತ್ಲ್ಯಾರ್ ತೊ ಮಾತ್ಸೊ ವೇಳ್ ಮೊನೊ ಜಾವ್ನ್ ಬಸ್ತಾಲೊ ಆನಿ ಆಪ್ಣಾಯಿತ್ಲ್ಯಾಕ್ ಸಮಾದಾನ್ ಜಾಲ್ಲೆಂ ತೆಂಚ್ ಯೇವ್ನ್ ತಾಚ್ಯಾ ಬಗ್ಲೆಕ್ ಬಸೊನ್ ಯಾ ಆಂಗಾರ್ ಪಡೊನ್ ಹಾಸ್ತಾಲೆಂ ಆಸ್ತಾಂ ತಾಂಣೆ ತಿಚ್ ವಾಟ್ ವಿಂಚ್ಲಿ.
ಫೋನ್ ಕರ್ನ್ ತಾಂಣೆ ಕಾಫಿ ಅನಿ ಫಳಾರ್ ಹಾಡಯ್ಲೊ. ನಿವೇದಿತಾ ಅಪುಣ್ ಮಾತ್ಯಾವಯ್ರ್ ಏಕ್ ವ್ಹಡ್ ವಜನ್ ದರ್ನ್ ಬಸ್ಲ್ಯಾಂ ಮ್ಹಳ್ಳೆಭಾಶೆನ್ ತಾಚೆಮುಕಾರ್ ಬಸ್ಲೆಂ ಆನಿ ಕಾಫಿ ಪಿಯೆಲೆಂತರ್ಯಿ ತಾಳ್ಯಾಥಾವ್ನ್ ಉತ್ರಾಂ ಸುಟ್ಲಿಂನಾಂತ್. ತೆಂ ಬಾಜ್ಲ್ಲಿಂ ತಾಂತ್ಯಾಂ ಆನಿ ಚಾರ್ ಉಡ್ಯಾಚಿಂ ಕಾಪಾಂ ಖಾವ್ನ್ ಕಾಫಿ ಪಿಯೆಲ್ಲೆಂ ಪಳೆವ್ನ್ ಸಾಯ್ಮನಾಚ್ಯಾ ಕಾಳ್ಜಾಚ್ಯೊ ಉಡ್ಯೊ ಥಿರಾರ್ ಆಯ್ಲ್ಯೊ. ತಾಚಿ ಭಲಾಯ್ಕಿ ಸಾರ್ಕಿ ಆಸಾ ಮ್ಹಳ್ಳೆಂ ನಖ್ಖಿ ಜಾಲ್ಲೆಂ ಸಮಾದಾನ್ ತೆಂ.
ಪರಿಪೂರ್ಣ್ಮಾಪಾನ್ ಆಪ್ಲ್ಯಾ ಪತಿಣೆಕ್ ಸಮ್ಜೊಂಚ್ಯಾ ದಾದ್ಲ್ಯಾಕ್ ಪತಿಣೆಚಿ ಮನೋಗತ್ ಸಮ್ಜೊಂಕ್ ಉತ್ರಾಂಚಿ ಗರ್ಜ್ನಾ... ತಿಚಿ ಚಾಲ್ಮಾತ್ ಪಾರ್ಕಿಲ್ಯಾರ್ಯಿ ಕಳ್ಟಾ!
"ನಿವೇದಿತಾ..." ತಾಂಣೆ ಮೊಗಾನ್ ಆಪಯ್ಲೆಂ. "ಪುರಾಸಣ್ ಜಾಲ್ಯಾನೆ... ವ್ಹಚ್ ನ್ಹಾವ್ನ್ ಯೇ... ಮಾಗಿರ್ ಹಾಂವ್ ನ್ಹಾತಾಂ" ತಾಂಣೆ ಪೇಟ್ ಉಗ್ತಿ ಕರ್ನ್ ನ್ಹೆಸ್ಚಿಂ ವಸ್ತುರಾಂ ತುವಾಲ್ಯಾಂಸಂಗಿಂ ಭಾಯ್ರ್ ಕಾಡ್ಲಿಂ ಆನಿ ನ್ಹಾಣ್ಯೆಂತ್ ವಚೊನ್ ನಿವೇದಿತಾಕ್ ಸಾರ್ಕೆಂ ಜಾಂವ್ಚೆಭಾಶೆನ್ ಹುನ್ ಉದಾಕ್ ಭರ್ಸುನ್... ಸರ್ವ್ ಸಾರ್ಕೆಂ ಆಸಾ ಮ್ಹಳ್ಳೆಂ ನಖ್ಖಿ ಕರ್ನ್ ಪಾಟಿಂ ಆಯ್ಲೊ. ನ್ಹೆಸ್ಣಾಂ ಆನಿ ತುವಾಲ್ಯಾಸಂಗಿಂ ನಿವೇದಿತಾ ಮೊನೆಂ ಜಾವ್ನ್ ನ್ಹಾಂವ್ಕ್ ಗೆಲೆಂ... ಥೊಡ್ಯಾವೆಳಾನ್ ಪಾಟಿಂ ಆಯ್ಲೆಂ. ಮಾಗಿರ್ ತೊ ನ್ಹಾಂವ್ಕ್ ಗೆಲೊ ಪೂಣ್ ಪಾಟಿಂ ಯೆತಾನಾ ನಿವೇದಿತಾ ನಿದ್ಲ್ಲೆಂ!
ಏಕಾ ಲಾಂಬ್ ಉಸ್ವಾಸಾಸಂಗಿಂ ಸಾಯ್ಮನ್ ತಾಚೆ ಬಗ್ಲೆನ್ ಖಾಟ್ಯೆರ್ ಬಸ್ಲೊ. ಕಿತೆಂ ಕರ್ಚೆಂ ಸಮ್ಜಾಲೆಂನಾ. ನ್ಹಾವ್ನ್ ತಯಾರ್ ಜಾವ್ನ್ ಥೊಡೊ ವೇಳ್ತರ್ಯಿ ತಾಚೆಸಂಗಿಂ ಭಾಯ್ರ್ ವಚೊನ್ ಭಂವೊನ್ ಯೆಂವ್ಯಾಂ ಮ್ಹಳ್ಳ್ಯಾ ಚಿಂತ್ಪಾಕ್ ನಿವೇದಿತಾನ್ ದಾಂಕಣ್ ವೊಡ್ಲೆಂ. ತಾಂಣೆ ನಿರಾಶೆಂತ್ಯಿ ಏಕ್ ಮಯ್ಪಾಸಿ ದೀಶ್ಟ್ ತಾಚೆವಯ್ರ್ ಚರಯ್ಲಿ. ಸಾತ್ಮಯ್ನೆ ಭರ್ಲ್ಲ್ಯಾನ್ ತೆಂ ಪುಡ್ಪುಡೀತ್ ದಿಸ್ತಾಲೆಂ... ಪಂಚ್ವೀಸ್ವರ್ಸಾಂಚಿ ಪ್ರಾಯ್... ಚಲಿಯಾಂಚಿ ಸೊಬಾಯ್ ಉಣಿ ಜಾವ್ನ್ ಯೆಂವ್ಚಿ ಪ್ರಾಯ್ತರ್ಯಿ ತಾಕಾ ತೆಂ ಪಯ್ಲೆಂಚೆವರ್ನಿಂ ಸೊಬಿತ್ ದಿಸ್ಲೆಂ...
ಪ್ರಾಮಾಣಿಕ್ಪಣಾನ್ ಆಪ್ಲ್ಯಾ ಪತಿಣೆಚೊ ಮೋಗ್ ಕರ್ಚ್ಯಾ ದಾದ್ಲ್ಯಾಕ್ ತಿಚಿ ಮಾಜ್ವೊನ್ ವೆಚಿ ಸೊಬಾಯ್ ಗುಮಾನಾಕ್ ವಚಾನಾ!
ಲಾಂಬ್ ಏಕಾ ಸುಸ್ಕಾರಾಸಂಗಿಂ ತಾಂಣೆ ದೀಶ್ಟ್ ಭಾಯ್ರ್ ವ್ಹೆಲಿ... ಏಕಾಚ್ಫರಾ ತಾಚೆ ದೊಳೆ ಅಶೀರ್ ಜಾಲೆ ಆನಿ ಕಪಾಲಾರ್ ಹಾರಿಂಹಾರಿಂನಿ ಮಿರಿಯೊ ಉದೆಲ್ಯೊ... ಕಾಂಯ್ಚ್ ದಿಸಾನಾತ್ಲ್ಲೆಂ... ಫಕತ್ ಥೊಡ್ಯಾ ವೆಳಾ ಆದಿಂ ಪಯ್ಣ್ ಸಂಪಯ್ತಾಪರ್ಯಾಂತ್ ನಿತಳ್ ಆಸ್ಲ್ಲೆಂ ಪೂಣ್ ಆತಾಂ ದೊಳ್ಯಾಂಕ್ ಪಡ್ದೊ ವೊಡ್ಲ್ಲೆಭಾಶೆನ್ ಸರ್ವ್ ಬಂದ್...
ಧುರಿ!
ಜನೆಲಾಚ್ಯಾ ಭಾಯ್ರ್ ಕಿತೆಂ ಆಸಾ ತೆಂಯಿ ದಿಸಾನಾತ್ಲ್ಲೆಂ. ನಿವೇದಿತಾ ಜಾಗ್ಲೆಂತರ್ ಖಂಯ್ಪುಣ್ಯಿ ಭಾಯ್ರ್ ವಚೊನ್ ಯೆವ್ಯೆತ್ ಮ್ಹಳ್ಳ್ಯಾ ಚಿಂತ್ಪಾಕ್ಯಿ ಫಾತೊರ್ ಪಡ್ಟಾನಾ ತಾಂಣೆ ಕಾಂಪಿಣ್ ವ್ಹಾಜಯ್ಲಿ ಆನಿ ದಾರಾಲಾಗಿಂ ಉಬೊ ಜಾಲೊ.
"ಹಿ ಧುರಿ ಕೆನ್ನಾಂ ಕರ್ಗಾತಾ..." ತಾಂಣೆ ಆಯಿಲ್ಲ್ಯಾ ಚೆಡ್ಯಾಲಾಗಿಂ ವಿಚಾರ್ಲೆಂ.
"ಸಾಂಗೊಂಕ್ ಜಾಯ್ನಾಂ ಸಾಹೇಬ್..." ತೊ ಉದ್ಗಾರ್ಲೊ. "ಥೊಡೆಪಾವ್ಟಿಂ ವೆಗಿಂಚ್ ಕರ್ಗಾತಾ ಪೂಣ್ ಥೊಡೆಪಾವ್ಟಿಂ ಸಗ್ಳೊದೀಸ್ ಅಶೆಂಚ್ ಆಸ್ತಾ"
ಸಾಯ್ಮನಾನ್ ತಕ್ಲಿ ಹಾಲಯ್ಲಿ ಆನಿ ತೊ ಗೆಲೊ. ಸಾಯ್ಮನಾನ್ ಪರತ್ ಭಾಯ್ರ್ ದೀಶ್ಟ್ ಜೊಕ್ಲಿ. ಸುರ್ಯಾಚಿಂ ಕಿರ್ಣಾಂ ಪಡ್ಟಾನಾ ಧುರಿ ಕರ್ಗಾತಾಗಿ ಯಾ ಧುರಿ ಕರ್ಗಾತಾನಾ ಸುರ್ಯಾಚಿಂ ಕಿರ್ಣಾಂ ದರ್ತೇಕ್ ಪಾವ್ತಾತ್..." ಸವಾಲಾಸಂಗಿಂ ತೊ ದಾರ್ ದಾಂಪುನ್ ಯೇವ್ನ್ ಪತಿಣೆಚ್ಯಾ ಬಗ್ಲೆಕ್ ಆಡ್ಪಡ್ಲೊ. ತೀನ್ವರ್ಸಾಂ ಆದಿಂ ತ್ಯಾಚ್ ಹೊಟೆಲಾಂತ್ ಪತಿಣೆಸಂಗಿಂ ಭೊಗ್ಲ್ಲೊ ಅನ್ಬೋಗ್ ನಿಯಾಳಿತ್ ನಿದೆಕ್ ವೆಂಗ್ಲೊ ತೊ.
ಜಾಗ್ ಜಾತಾನಾ ದೊನ್ಪಾರ್ ಜಾಲ್ಲೊ... ಉಟಾಉಟಿಂ ಹಾತ್ಪಾಂಯ್... ತೋಂಡ್ ಧುವ್ನ್ ತಯಾರ್ ಜಾಲ್ಲ್ಯಾ ತಾಂಣೆ ಜೆವಾಣ್ಯಿ ಕುಡಾಕ್ಚ್ ಹಾಡಯ್ಲೆಂ ಆನಿ ನಿವೇದಿತಾಕ್ ಜಾಗಯ್ಲೆಂ. ತೆಂಯಿ ಉಟೊನ್ ಸುಡ್ಸುಡೀತ್ ಜಾಲೆಂತರ್ಯಿ ತಾಚ್ಯಾ ವದನಾವಯ್ಲೊ ನಿರಾಸ್ಮಾತ್ ಸುಟ್ಲೊನಾ. ಉತ್ರಾಂವಿಣೆಂಚ್ ವಜನಾಸಂಗಿಂ ತೆಂ ಜೆವ್ಲೆಂ ಆನಿ ತೊಯಿ ಜೆವ್ಲೊ. ಚಾರ್ಪಾಂಚ್ಪಾವ್ಟಿಂ ಸಾಯ್ಮನಾನ್ ಉಲೊಂವ್ಚೆಂ ಪ್ರೇತನ್ ಕೆಲೆಂತರ್ಯಿ ತೆಂ ಉಲಯ್ಲೆಂನಾ. ಜೆವಾಣ್ ಜಾಲ್ಲೆಂಚ್ ರಿತಿಂ ಆಯ್ದಾನಾಂ ವರೊಂಕ್ ಚೆಡೊ ಆಯ್ಲೊ ಆನಿ ವರ್ನ್ ಗೆಲೊ.
ನಿವೇದಿತಾ ಪರತ್ ಖಾಟ್ಯೆರ್ ಆಡ್ ಪಡ್ಲೆಂ. ಸಾಯ್ಮನಾನ್ ಬಾಗೊನ್ ತಾಚ್ಯಾ ಗಾಲಾವಯ್ರ್ ಏಕ್ ಉಮೊ ದಾಂಬ್ಲೊ ಪೂಣ್ ನಿವೇದಿತಾನ್ ಭುರ್ಗ್ಯಾಭಾಶೆನ್ ತುರಂತ್ ಆಪ್ಲೊ ಗಾಲ್ ಪುಸ್ಲೊ. ಸಾಯ್ಮನಾನ್ ನಿರಾಶೆನ್ ಏಕ್ ಸುಸ್ಕಾರ್ ಸೊಡಿತ್ ಭಾಯ್ರ್ ಪಳೆಲೆಂ... ಧುರಿ ಅಜೂನ್ಯಿ ತಶಿಚ್ ಆಸ್ಲ್ಲಿ.
ಸಾಂಜ್ ಜಾಲಿ... ಪೂಣ್ ಪರಿಗತ್ ನಿತಳ್ಳಿನಾ... ಕಶೆಂಕಶೆಂ ವಿಚಾರ್ಲ್ಯಾರ್ಯಿ ನಿವೇದಿತಾ ಜಾಪ್ ದೀಂವ್ಕ್ ಆಯ್ಕಾಲೆಂಚ್ನಾ. ತಾಚೆಮದೆಂ ಸಾಯ್ಮನಾನ್ ರಾತಿಚೆಂ ಜೆವಾಣ್ಯಿ ಕುಡಾಕ್ಚ್ ಹಾಡಯ್ಲೆಂ... ಕಟೀನ್ ಧುರಿ ಆಸ್ಲ್ಲಿ ದೆಕುನ್ ತಾಂಣೆ ನಿವೇದಿತಾನ್ ಭಾಯ್ರ್ ವೆಚೆಂ ಆಡಾಂವ್ಕ್ ಚಿಂತ್ಲೆಂ. ತಾಂಣೆ ಬೊಳಾಂವ್ಚಿಂ ಆಪ್ಣಾಲಾಗಿಂ ಆಸ್ಲ್ಲಿಂ ಸರ್ವ್ ಹಾತೆರಾಂ ವಾಪಾರ್ಲಿಂ ಪೂಣ್ ಫಾಯ್ದೊ ಜಾಲೊನಾ. ನಿವೇದಿತಾ ಜೆವಾಣ್ ಜಾಲ್ಲೆಂಚ್ ಆಪ್ಲ್ಯೊ ಗರ್ಜೊ ಸಂಪವ್ನ್ ಖಾಟ್ಯೆರ್ ತಾಕಾ ಪಾಟ್ ಕರ್ನ್ ನಿದ್ಲೆಂ.
"ನಿವೇದಿತಾ..." ಸಯ್ರಾನ್ ಸಾಂಡ್ಲ್ಲ್ಯಾ ಸಾಯ್ಮನಾನ್ ತಾಕಾ ಬಳಾನ್ ಆಪ್ಣಾಲಾಗಿಂ ವೊಡ್ಲೆಂ ಆನಿ ನಿವೇದಿತಾ ತೆನ್ನಾಂ ಇನ್ಕಾರ್ ಕರಿನಾಸ್ತಾನಾ ತಾಚ್ಯಾ ಹರ್ದ್ಯಾವಯ್ರ್ ಲಕ್ಲೆಂ. "ಸಾಕಾಳಿಂಥಾವ್ನ್ ಆತಾಂಪರ್ಯಾಂತ್..." ತೊ ಖುಬಾಳ್ಳೊ. "ಏಕ್ ಉತಾರ್ ಉಲಂವ್ಕ್ನಾಂಯ್ ತುಂ... ಕಿತೆಂ ಜಾಲೆಂ ತುಕಾ... ಸಾಂಗ್..." ತಾಂಣೆ ದಾಂತ್ ಚಾಬ್ಲೆ. "ಸಾಂಗ್ಮಾ..." ತಾಂಣೆ ತುರಂತ್ ವಿನತಿಯಿ ಕೆಲಿ.
"ತೆಂ ಕೋಣ್?" ಆವಾಜ್ ಲ್ಹಾನ್ತರ್ಯಿ ಫಾರಾಚ್ಯಾ ತೆಜಾನ್ ಉಸ್ಮೊಡ್ಲೆಂ ನಿವೇದಿತಾ.
"ಖಂಚೆಂ..." ಸಾಯ್ಮನ್ ಗುಸ್ಪೊಡ್ಲೊ.
"ಶೀತಲ್!" ನಿವೇದಿತಾಚೊ ತಾಳೊ ಗದ್ಗದ್ಲೊ.
ಸಾಯ್ಮನಾನ್ ಏಕ್ಪಾವ್ಟಿಂ ಹರ್ದೆಂಭರ್ ಉಸ್ವಾಸ್ ಘೆತ್ಲೊ ಆನಿ ತಿತ್ಲ್ಯಾಚ್ ಸಮದಾನೆನ್ ಭಾಯ್ರ್ ಸೊಡ್ಲೊ.
"ತೆಂ ಮ್ಹಜೆಂ ಕೊಲೆಜಿಂತ್ಲೆಂ ಇಶ್ಟಿಣ್..." ತೊ ಅಮ್ರುಕೊ ಹಾಸ್ಲೊ. "ಫಕತ್ ತಿತ್ಲ್ಯಾಕ್ಮಾತ್ ತುಂ ಆಮ್ಚೆಂ ಹೆಂ ದುಸ್ರೆಂ ಹನಿಮೂನ್ ಪಾಡ್ ಕರ್ತಾಯ್..." ತಾಂಣೆ ಶಿಣಾತ್ ತಾಚ್ಯಾ ಗಾಲಾವಯ್ರ್ ಉಮೊ ದಾಂಬ್ಲೊ ಪೂಣ್ ನಿವೇದಿತಾನ್ ತೆನ್ನಾಂ ಗಾಲ್ ಪುಸ್ಲೊನಾತರ್ಯಿ ಜಾಪ್ಯಿ ದಿಲಿನಾ.
ಸಾಯ್ಮನಾಕ್ ಮುಕಾರ್ ಕಿತೆಂ ಸಾಂಗ್ಚೆಂ ಕಳ್ಳೆಂನಾ ದೆಕುನ್ ತೊ ಮೊನೊ ಜಾಲೊ... ಕುಡಾಚ್ಯಾ ಚಾರ್ ವೊಣ್ಟಿಂಮದೆಂ ದಾರುಣ್ ಮೊನೆಂಪಣ್... ಪಾಂಚ್ಮಿನುಟಾಂ ಪಾಶಾರ್ ಜಾಲಿಂ.
"ಆತಾಂತರ್ಯಿ ಸಮಾದಾನ್ ಜಾಲೆಂಗಿ?" ಸಾಯ್ಮನಾನ್ ತಾಚೆಂ ನಾಕ್ ಚಿಡ್ಡಿಲೆಂ.
"ಫುಟ್!" ನಿವೇದಿತಾನ್ ತಾಚೊ ಹಾತ್ ಮಾರ್ಲೊ.
"ಅನಿಕ್ಯಿ ಕಿತೆಂ ಆಸಾ..." ಸಾಯ್ಮನ್ ದೆದೆಸ್ಪೊರ್ ಜಾಲೊ.
"ತುಕಾ ಕಾರಾಲಾಗಿಂ ಆಪವ್ನ್ ವರ್ನ್ ತಾಂಣೆ ತುಜ್ಯಾ ಕಾನಾಂತ್ ಕಿತೆಂಗಿ ಸಾಂಗ್ಲೆಂ..." ನಿವೇದಿತಾ ಫುಮಾರ್ಲೆಂ. "ಕಿತೆಂ ಸಾಂಗ್ಲೆಂ!?"
ಏಕಾಚ್ಫರಾ ಕಿತೆಂಗಿ ಉಡಾಸ್ ಜಾಲ್ಲೆಭಾಶೆನ್ ಸಾಯ್ಮನ್ ಅವಾಜಾಸಂಗಿಂ ಹಾಸ್ಲೊ... ನಿವೇದಿತಾಚಿಂ ದಾಡಾಮಾಂ ಅಡ್ಚಾಲಿಂ... ಕೆನ್ನಾಂಯಿ ಗಂಭೀರ್ ಆನಿ ಅಪ್ರೂಬ್ ಹಾಸ್ಚೊ ಸಾಯ್ಮನ್ ತಿತ್ಲ್ಯಾಯಿ ಬಳಾನ್ ಹಾಸ್ಚೆಂ ತಾಂಣೆ ಪಯಿಲ್ಲೆಪಾವ್ಟಿಂ ಪಳೆಂವ್ಚೆಂ ಜಾಲ್ಲ್ಯಾನ್ ತೆಂ ಸಯ್ರ್ಭಯ್ರ್ ಜಾಲೆಂ ಪೂಣ್ ಸಾಯ್ಮನ್ ಆಪ್ಲ್ಯೊ ಹಾಸೊ ನಿಯಂತ್ರಣಾಕ್ ಹಾಡ್ಚ್ಯಾಂತ್ ಸೆಲ್ವಾಲೊ... ತಾಕಾ ಥಿರಾಸಾಣೆಕ್ ಯೇಂವ್ಕ್ ತೀನ್ಮಿನುಟಾಂ ಲಾಗ್ಲಿಂ.
"ತೆಂ ಸಾಂಗೊಂಕ್ ಜಾಯ್ನಾ" ತಾಂಣೆ ವೋಂಟ್ ಚಾಬೊನ್ ಧರ್ಲೆ.
"ಕಿತ್ಯಾಕ್ ಸಾಂಗೊಂಕ್ ಜಾಯ್ನಾ?" ನಿವೇದಿತಾ ಉಳ್ಟೆಂ ಘುಂವ್ಲೆಂ.
"ನಾ ಮ್ಹಳ್ಯಾರ್ನಾ" ಸಾಯ್ಮನಾಚೊ ಹಾಸ್ಲ್ಲ್ಯಾನ್ ಉಸ್ವಾಸ್ ವಯ್ರ್ಪಂದಾ ಜಾಲೊ. "ತೆಂಮಾತ್ ವಿಚಾರಿನಾಕಾ... ಭಿಲ್ಕುಲ್ ಸಾಂಗೊಂಕ್ ಜಾಂವ್ಚೆಂನಾ" ತೊ ಆಪ್ಣಾಕ್ಚ್ ಸಾಂಬಾಳೂಂಕ್ ಜಾಯ್ನಾಸ್ತಾನಾ ಪರತ್ ಹಾಸ್ಲೊ.
"ತಾಂಣೆ ಕಿತೆಂ ಸಾಂಗ್ಲ್ಲೆಂ ತೆಂ ಮ್ಹಾಕಾ ಕಳಾಜೆ.." ನಿವೇದಿತಾನ್ ಹಟ್ ದರ್ಲೆಂ ಪೂಣ್ ಸಾಯ್ಮನಾನ್ ತಕ್ಲಿ ಆಡ್ ಘಾಲಿ. "ಸಾಯ್ಮನ್ ದಯಾಕರುನ್..." ನಿವೇದಿತಾಚ್ಯಾ ದೊಳ್ಯಾಂನಿ ದುಕಾಂ ಭರ್ಲಿಂ. "ಏಕ್ ಪಾವ್ಟಿಂ ಸಾಂಗ್... ನ್ಹಂಯ್ತರ್ ಮ್ಹಾಕಾ ಸಮಾದಾನ್ನಾ" ತೆಂ ರಡ್ಲೆಂ.
"ದಯಾಕರ್ನ್ ನಿವೇದಿತಾ..." ಸಾಯ್ಮನ್ ತಾಚಿಂ ದುಕಾಂ ಪಳೆವ್ನ್ ಗುಸ್ಪೊಡ್ಲೊ "ತೆಂ ಸಾಂಗೊಂಕ್ ಸಾದ್ಚ್ನಾ"
"ನಿದೆ!" ಫರ್ಮಾಣಾನ್ ಭರ್ಲ್ಲ್ಯಾ ರಡ್ಣ್ಯಾಸಂಗಿಂ ಸುಸ್ಕಾರಾತ್ ನಿವೇದಿತಾ ತಾಕಾ ಪಾಟ್ ಕರ್ನ್ ನಿದ್ಲೆಂ ಆನಿ ಸಾಯ್ಮನ್ ದೆದೆಸ್ಪೊರ್ ಜಾಲೊ. ಚಡ್ಉಣೆಂ ಅರ್ದೆಂ ವೋರ್ಪರ್ಯಾಂತ್ ತೊ ನಿದ್ಲ್ಲ್ಯಾ ತಾಕಾಚ್ ಪಳೆವ್ನ್ ಬಸ್ಲೊ... ತಾಚೆಮಾಗಿರ್ ಬೋವ್ಶಾ ತೆಂ ಸಾಕಾಳಿಂ ಸಾರ್ಕೆಂ ಜಾತೆಲೆಂ ಮ್ಹಣ್ ಚಿಂತುನ್ ಆಪ್ಣಾಕ್ಚ್ ಸಮಾದಾನ್ ಕರ್ನ್ ತೊಯಿ ನಿದ್ಲೊ ಪೂಣ್ ನೀದ್ ಆಯ್ಲಿನಾ.
ಮೊಗಾಂತ್ ತೊವ್ಲ್ಲೆಂ ಜೊಡೆಂ ತೆಂ... ಕಾಜಾರಿ ಜಿವಿತಾಂತ್ ಪತಿಪತಿಣೆಚೆಂ ಝಗ್ಡೆಂ ಸಾಮಾನ್ಯ್ ದೆಕುನ್ ತಿಂಯಿ ಝಗಡ್ಟಾಲಿಂ ಆನಿ ತುರಂತ್ ಸಮ್ಜೊನ್ ರಾಜಿ ಜಾತಾಲಿಂ ಪೂಣ್ ಹೊ ಅನ್ಬೋಗ್ ಸಾಯ್ಮನಾಕ್ ಪಯ್ಲೆಪಾವ್ಟಿಂ ಜಾಂವ್ಚೊ. ತೊ ಆಪ್ಣಾಸಂಗಿಂಚ್ ಝುಜೊಂಕ್ಲಾಗ್ಲೊ. ಹೊಟೆಲಾಚ್ಯಾ ದಾರಾರ್ ಕಿತೆಂ ಜಾಲ್ಲೆಂ ತೆಂ ಪರತ್ ಸರ್ವ್ ಉಡಾಸ್ ಕೆಲೆಂ ತಾಂಣೆಂ ಪೂಣ್ ಥಂಯ್ ನಿಜಾಕ್ಯಿ ಕಾಂಯ್ಚ್ ಜಾಂವ್ಕ್ನಾತ್ಲ್ಲೆಂ. ತೀನ್ವರ್ಸಾಂಚ್ಯಾ ಕಾಜಾರಿ ಜಿವಿತಾಂತ್ ಕೆದಿಂಚ್ ಯೇಂವ್ಕ್ನಾತ್ಲ್ಲಿ ಯೇರ್ ಕಾಂಯ್ ಆಯ್ಲ್ಯಾಗಿ... ತೊ ಚಿಂತ್ನಾಂನಿ ರೆಂವೊಡ್ಲೊ. ಶೀತಲಾನ್ ಆಪ್ಣಾಚ್ಯಾ ಕಾನಾಂನಿ ಸಾಂಗ್ಲ್ಲಿಂ ಉತ್ರಾಂ ಭಿಲ್ಕುಲ್ ನಿವೇದಿತಾಕ್ ಸಾಂಗೊಂಕ್ ಸಾದ್ನಾತ್ಲ್ಲಿಂ ತರ್ ಶೀತಲಾವಯ್ರ್ ಕಾಂಯ್ ನಿವೇದಿತಾನ್ ದುಬಾವ್ ಕೆಲಾಗಿ... ಯಾ ಶೀತಲ್ ಆನಿ ಆಪ್ಣಾವಯ್ರ್ ನಿವೇದಿತಾಕ್ ದುಬಾವ್ ಜಾಲಾ... ತೀನ್ವರ್ಸಾಂನಿ ಯೇಂವ್ಕ್ನಾತ್ಲ್ಲೊ ಹೊ ದುಬಾವ್ ಆತಾಂ ಕಿತ್ಯಾಕ್ ಆಯ್ಲೊ.... ಕೆನ್ನಾಂ ನೀದ್ ಆಯ್ಲಿ ತೆಂ ತಾಕಾ ಕಳ್ಳೆಂನಾ.
ಸಾಕಾಳ್ ಜಾಲಿ... ತೊ ಉಟ್ಲೊ... ನಿವೇದಿತಾಯಿ ಉಟ್ಲೆಂ... ವಿಪರ್ಯಾಸ್ ಜಾವ್ನ್ ನಿವೇದಿತಾಚೆಂ ಫುಗ್ಲ್ಲೆಂ ತೋಂಡ್ ಆನಿ ಭಿಜ್ಲ್ಲೆ ದೊಳೆ ತಶೆಚ್ ಉರ್ಲೆ... ದೊನ್ಪಾರ್ ಜಾಲೊ... ಸಾಂಜ್ ಜಾಲಿ ಆನಿ ರಾತ್ಯಿ ಜಾತಾನಾ ದುಸ್ರೊದೀಸ್ ಸಂಪ್ಲೊ.
ಬೋವ್ ವ್ಹಡಾ ಆಶೆನ್ ಆಪ್ಲ್ಯಾ ಹನಿಮುನಾಚೊ ಉಡಾಸ್ ಕಾಡ್ನ್ ನಿವೇದಿತಾನ್ ಪತಿಲಾಗಿಂ ಆಪ್ಣಾಕ್ ಪರತ್ ಏಕ್ಪಾವ್ಟಿಂ ಸಿಮ್ಲಾಕ್ ಆಪವ್ನ್ ವ್ಹರ್ ಮ್ಹಣೊನ್ ವಿನತಿ ಕೆಲ್ಲಿ ಆನಿ ಕಾಳ್ಜಾಮನಾನ್ ತಾಚೊ ಪರಿಪೂರ್ಣ್ಮಾಪಾನ್ ಮೋಗ್ ಕರ್ತೆಲ್ಯಾ ಸಾಯ್ಮನಾನ್ ಸಾತ್ಮಯ್ನೆ ಭರ್ಲ್ಲ್ಯಾ ತಾಕಾ ಥಂಯ್ ಹಿಂವಾಮದೆಂ ಆಪವ್ನ್ ವ್ಹರ್ಚೆಂ ಕಿತ್ಲ್ಯಾ ತ್ರಾಸಾಂಚೆಂ ಆನಿ ಆಪಾಯಾಚೆಂ ಮ್ಹಳ್ಳೆಂ ಕಳಿತ್ ಆಸೊನ್ಯಿ ಸಯ್ ಘಾಲ್ಲಿ. ತೀನ್ ಮಯ್ನ್ಯಾಂಥಾವ್ನ್ ತ್ಯಾ ತಯಾರಾಯೆಂತ್ ಬುಡ್ಲ್ಲೊ ತೊ ಪೂಣ್ ಬುಡೊನ್ ಗೆಲ್ಲ್ಯಾ ದೋನ್ದಿಸಾಂನಿ ನಿವೇದಿತಾನ್ ತಾಚ್ಯಾ ಪ್ರಾಮಾಣಿಕ್ಪಣಾಚ್ಯಾ ಸರ್ವ್ ಹಂತಾಂಚಿಂ ಇಮ್ತಿಹಾನಾಂ ಚಲಯ್ಲಿಂ.
ದೇವ್ ಆನಿ ದೆಂವ್ಚಾರ್ ಪಳೆಂವ್ಕ್ ಮೆಳಾನಾ ಮ್ಹಣ್ಟಾತ್... ಮೋಗ್ ಆನಿ ದುಬಾವಾಮದೆಂ ತೆ ಸದಾಂಯಿ ದಿಶ್ಟಿಕ್ ಪಡ್ಟಾತ್!
"ಉಲಯ್ ನಿವೇದಿತಾ" ದೊಳೆಭರ್ ದುಕಾಂಸಂಗಿಂ ಸಾಯ್ಮನಾನ್ ನಿದೊಂಕ್ ವೆಚ್ಯಾ ತಾಕಾ ಆರಾಯ್ಲೆಂ.
"ಮ್ಹಾಕಾ ಇತ್ಲೆಂಚ್ ಜಾಯ್..." ನಿವೇದಿತಾಯಿ ಭಿಕ್ಕಾಲೆಂ. "ತಾಂಣೆಂ ವೆಚ್ಯಾ ಆದಿಂ ತುಜ್ಯಾ ಕಾನಾಂತ್ ಘುಟಾನ್ ಸಾಂಗ್ಲ್ಲೆಂ ಕಿತೆಂ?"
"ತೆಂ ಸಾಂಗೊಂಕ್ ಜಾಯ್ನಾ ಮ್ಹಣೊನ್ ಹಾಂವೆಂ ತುಕಾ ಯೆದೊಳ್ಚ್ ಸಾಂಗೊನ್ ಜಾಲಾಂ" ಸಾಯ್ಮನ್ ಉಸ್ಮೊಡ್ಲೊ.
"ಪೂಣ್ ಮ್ಹಾಕಾ ಜಾಯ್!" ನಿವೇದಿತಾನ್ ದಾಂತ್ ಚಾಬ್ಲೆ.
"ಇತ್ಲೊಯ್ ಅಸ್ಕತ್ಗಿ ಆಮ್ಚೊ ಮೋಗ್..." ಸಾಯ್ಮನಾನ್ ತಾಚ್ಯಾ ದಿಶ್ಟಿಂತ್ ದೀಶ್ಟ್ ಜೊಡ್ಲಿ.
"ಮೋಗ್!" ನಿವೇದಿತಾನ್ ನಿರಾಶೆನ್ ಉಶೆಂ ಆರಾಯ್ಲೆಂ. "ಆಮ್ಚ್ಯಾ ಕಾಜಾರಾಚ್ಯಾ ಪಯ್ಲ್ಯಾರಾತಿಂ ಆಮಿಂ ಏಕಾಮೆಕಾ ಭಾಸ್ ದಿಲ್ಲಿ ಉಡಾಸ್ ಅಸಾಗಿ ತುಕಾ..." ತೆಂ ಸುಸ್ಕಾರ್ಲೆಂ "ಆಮಿಂ ಕೆದಿಂಚ್ ಆಮ್ಚ್ಯಾ ಮತಿಂನಿ ಕಿತೆಂಚ್ ಲಿಪಂವ್ಚಿಂನಾಂವ್... ಜಿತೆಂ ಮತಿಂತ್ ಯಾ ಕಾಳ್ಜಾಂತ್ ಆಸಾ ತೆಂ ಸತಾಸಂಗಿಂ ಉಗ್ತ್ಯಾನ್ ಏಕಾಮೆಕಾ ಸಾಂಗ್ತೆಲ್ಯಾಂವ್... ಆಮಿಂ ಫಕತ್ತ್ ಘೊವ್ಬಾಯ್ಲಾಂನ್ಹಂಯ್... ತಾಚೆವರ್ನಿಂ ಚಡ್ ಇಶ್ಟಾಗತೆಂತ್ ಆಸ್ತೆಲ್ಯಾಂವ್"
"ಉಡಾಸ್ ಆಸಾ" ಸಾಯ್ಮನ್ ತಗ್ಗಾಲೊ.
"ತರ್ ಸಾಂಗ್ ಮ್ಹಾಕಾ..." ನಿವೇದಿತಾನ್ ದಾಂತ್ ಚಾಬ್ಲೆ "ತ್ಯಾ ತುಜ್ಯಾ ಪರ್ನ್ಯಾ ಇಶ್ಟಿಣೆನ್ ತುಜ್ಯಾ ಕಾನಾಂತ್ ಕಿತೆಂ ಸಾಂಗ್ಲ್ಲೆಂ?"
"ತೆಂ ಸಾಂಗೊಂಕ್ ಜಾಯ್ನಾ" ಏಕಾಕುಶಿನ್ ನಿವೇದಿತಾವಯ್ಲೊ ರಾಗ್ತರ್ಯಿ ತ್ಯಾಚ್ವೆಳಾರ್ ಶೀತಲಾನ್ ಸಾಂಗ್ಲ್ಲಿಂ ಉತ್ರಾಂಯಿ ಉಡಾಸ್ ಯೆತಾನ್ ಸಾಯ್ಮನಾನ್ ವೋಂಟ್ ಚಾಬೊನ್ ದರ್ನ್ ಉಮಾಳೊನ್ ಯೆಂವ್ಚ್ಯೊ ಹಾಸೊ ಆಡಾಂವ್ಚೆಂ ಭಾರಿಚ್ ಪ್ರೇತನ್ ಕೆಲೆಂ ಪೂಣ್ ವಿಪರ್ಯಾಸ್ ಜಾವ್ನ್ ನಿವೇದಿತಾನ್ ತೆಂಯಿ ಪಳೆಲೆಂ.
"ಹಾಂವ್ ತುಕಾ ದ್ವೇಶಿತಾಂ!" ಭಿಕ್ಕೊನ್ಭಿಕ್ಕೊನ್ ರಡ್ಲ್ಲೆಂ ತೆಂ ತಾಕಾ ಪರತ್ ಪಾಟ್ಕರ್ನ್ ನಿದ್ಲೆಂ. ಸಾಯ್ಮಾನ್ ಆಪ್ಲ್ಯಾ ಮಾತ್ಯಾವಯ್ರ್ ಮೊಳಾಬ್ಚ್ ಕೊಸೊಳ್ನ್ ಪಡ್ಲ್ಲೆಭಾಶೆನ್ ಬಸ್ಲ್ಲೆಕಡೆನ್ ತಸೊಚ್ ಉರ್ಲೊ.
ನಿವೇದಿತಾಚ್ಯೊ ಪಾಟ್ಲ್ಯಾ ವರ್ಸಾಂತ್ಲ್ಯೊ ಹರ್ಏಕ್ ಆಶಾ ಆನಿ ಗರ್ಜೊ ತಾಂಣೆಂ ಪುರ್ತ್ಯೊ ಕೆಲ್ಲ್ಯೊ ಆನಿ ತಿತ್ಲ್ಯಾಚ್ಮಾಪಾನ್ ಮೋಗ್ಮಾತ್ ಜೊಡ್ಲ್ಲೊ. ಭೋವ್ಶಾ ತಾಚೊ ಪಯ್ಲೊ ಇನ್ಕಾರ್ ತಾಚಿಂ ಸಾಳಾಂಪಾಳಾಂ ಹಾಲಂವ್ಕ್ಪಾವ್ಲೊ. ಖಂಚಿಯಿ ವಾಟ್ ದಿಸ್ಲಿನಾ... ಆಪ್ಲ್ಯಾ ಕಾನಾಂನಿ ಪುಸ್ಪುಸ್ಲ್ಲ್ಯಾ ಶೀತಲಾಕ್ಯಿ ದುರ್ಸಾಲೊ ತೊ ಪೂಣ್ ಜಾಂವ್ಕ್ ಆಸ್ಲ್ಲೆಂ ಜಾವ್ನ್ ಗೆಲ್ಲೆಂ. ಕಾಂಯ್ ನಿವೇದಿತಾಕ್ ಭಾಯ್ರ್ ಆಪವ್ನ್ ವರ್ನ್ ಸಿಮ್ಲಾಚ್ಯಾ ಸೊಭಾಯೆಂತ್ ಥೊಡೆಂ ಬೊಂವ್ಡಾಯ್ಲೆಂ ತರ್ ತೆಂ ಸಾರ್ಕೆಂ ಜಾಯ್ತ್ ಮ್ಹಳ್ಳ್ಯಾ ಆಶೇನ್ ತಾಂಣೆ ಭಾಯ್ರ್ ಪಳೆಲೆಂ ಆನಿ ನಿರಾಶೆನ್ ದೊಡ್ಲೊ.
ಕಾಂಯ್ಚ್ ದಿಸ್ಲೆಂನಾ... ಧುರಿ!
ತಿಯಿ ರಾತ್ ಪಾಶಾರ್ ಜಾಲಿ ಆನಿ ಸಾಕಾಳ್ ಉದೆಲಿ. ಪಾಟ್ಲೆ ದೋನ್ದೀಸ್ ಪರತ್ ಮುಕಾರೊನ್ ಗೆಲೆ... ತೊ ಸುರ್ಯಾಚ್ಯಾ ಕಿರ್ಣಾಂಕ್ ರಾಕ್ತಾಲೊ ಪೂಣ್ ತಾಂಚಿ ಝಳಕ್ಯಿ ಮೆಳ್ಳಿನಾ. ನಿರಾಶೆನ್ ತಾಂಣೆ ಹೊಟೆಲಾಚ್ಯಾ ಚೆಡ್ಯಾಕ್ ಆಪಯ್ಲೊ.
"ಹಿ ಧುರಿ ಕೆನ್ನಾಂ ಕರ್ಗಾತೆಲಿ..." ಪಿಸಾಂತುರ್ ಜಾವ್ನ್ ಪಿಂರ್ಗಾಲೊ ತೊ. "ಧುರಿಯೆಚೊ ವೇಳ್ನ್ಹಂಯ್ ಹೊ"
"ಹಾಂವ್ ನೆಣಾಂ..." ತಾಂಣೆ ಜಾಪ್ ದಿಲಿ. "ಸಬಾರ್ಪಾವ್ಟಿಂ ಅಶೆಂಚ್ ಜಾತಾ ಸಾಹೇಬ್... ಧುರಿಯೆಚೊ ಕಾಳ್ ಸಂಪ್ತಚ್ ಯಾತ್ರಿಕ್ ಹಾಂಗಾ ಯೆತಾತ್ ಆನಿ ಹಿ ಧುರಿ ತಾಂಕಾಂ ಸತಾಯ್ತಾ"
ದೊನ್ಪಾರ್ ಜಾಲೊ... ಸಾಂಜ್ ಜಾಲಿ ಅನಿ ತಿಸ್ರೊದೀಸ್ಯಿ ಸಂಪ್ಲೊ.
"ನಿವೇದಿತಾ ದಯಾಕರ್ನ್..." ಸಾಯ್ಮನಾನ್ ಸಯ್ರಾನ್ ಪರಿಪೂರ್ಣ್ಮಾಪಾನ್ ಹೊಗ್ಡಾಯ್ಲೆಂ. "ಹಾಂವೆಂ ತುಕಾ ಸಾಂಗ್ಲಾಂ... ಶೀತಲ್ ಮ್ಹಜೆಂ ಕೊಲೆಜಿಚೆಂ ಸಂಗಾತಿಣ್... ಕೊಲೆಜಿಂತ್ ಆಮಿಂ ಪಾಂಚ್ವರ್ಸಾಂ ಸಾಂಗಾತಾ ಆಸ್ಲ್ಲ್ಯಾಂವ್ ಆನಿ ಶಿಕ್ಲ್ಲ್ಯಾಂವ್... ಆಮ್ಚೆಮದೆಂ ಬರೀ ಸಳಾವಳ್ ಆಸ್ಲ್ಲಿ... ಹಾಂವ್ ತಾಕಾ ಪಸಂದ್ ಕರ್ತಾಲೊಂ ಅನಿ ತೆಂ ಮ್ಹಾಕಾ ಪೂಣ್ ಏಕಾ ಪರಿಧೆಭಿತರ್. ತಾಚೆಮಾಗಿರ್ಯಿ ಆಮಿಂ ಸಬಾರ್ಪಾವ್ಟಿಂ ಮೆಳ್ಲ್ಲ್ಯಾಂವ್... ಏಕ್ ಬರೆಂ ಚೆಡುಂ ತೆಂ... ಅಜೂನ್ಯಿ ಮ್ಹಾಕಾ ಏಕಾ ಲಾಗಿಲ್ಯಾ ಇಶ್ಟಾಚೊ ಮಾನ್ ದಿತಾ" ತಾಂಣೆ ಸಮ್ಜೊಂವ್ಚೆಂ ಪ್ರೇತನ್ ಕೆಲೆಂ.
"ಮ್ಹಾಕಾ ತೆಂ ಸರ್ವ್ ಗರ್ಜ್ನಾ..." ನಿವೇದಿತಾನ್ ತೋಂಡ್ ಮೊಡ್ಲೆಂ. "ತಾಂಣೆ ವೆತಾನಾ ತುಜ್ಯಾ ಕಾನಾಂತ್ ಕಿತೆಂಗಿ ಸಾಂಗ್ಲ್ಲೆಂ ತೆಂಮಾತ್ ಜಾಯ್ ಮ್ಹಾಕಾ" ತಾಂಣೆ ಹಟ್ ದರ್ಲೆಂ.
"ಆನಿ ಹಾಂವ್ ಸಾಂಗಾನಾ ತರ್..." ಸಾಯ್ಮನಾನ್ಯಿ ಹಟ್ ದರ್ಲೆಂ.
"ಫಾಲ್ಯಾಂ ಸಾಕಾಳಿಂ ಉಟೊನ್ ಹಾಂವ್ ದಿಲ್ಲಿ ಪಾಟಿಂ ವೆತೆಲಿಂ" ನಿವೇದಿತಾನ್ ತೀರ್ಪ್ ದಿಲೆಂ.
"ಆಮಿಂ ಧಾ ದಿಸಾಂಖಾತಿರ್ ಆಯಿಲ್ಲ್ಯಾಂವ್ ಹಾಂಗಾ... ಅನಿಕ್ಯಿ ಸಾತ್ದೀಸ್..." ಸಾಯ್ಮನ್ ಸಾಂಗೊಂಕ್ ಉಡ್ಡಾಲೊ.
"ಪುರೊ!" ನಿವೇದಿತಾ ಮದೆಂಚ್ ಉಸ್ಮೊಡ್ಲೆಂ "ತುವೆಂ ಮ್ಹಾಕಾ ತ್ಯಾ ಚೆಡ್ವಾನ್ ತುಜ್ಯಾ ಕಾನಾಂತ್ ಕಿತೆಂ ಸಾಂಗ್ಲಾಂ ತೆಂ ಸಾಂಗಾಜೆ... ಮ್ಹಾಕಾ ತಿತ್ಲೆಂಚ್ಪುರೊ... ನ್ಹಂಯ್ತರ್...." ತೆಂ ಘಡಿಭರ್ ಥಾಂಬ್ಲೆಂ. "ಏಕ್ಚ್ಪಾವ್ಟಿಂ ಸಾಯ್ಮನ್... ಮಾಗಿರ್ ಕೆದಿಂಚ್ ಹಾಂವ್ ತ್ಯಾವಿಶ್ಯಾಂತ್ ಉಲಂವ್ಚಿಂನಾ"
ಸಾಯ್ಮನ್ ಶಿರ್ಕಾಲೊ... ವೆಗ್ಳಿ ವಾಟ್ನಾತ್ಲ್ಲಿ!
"ಹಾಂವ್ ಸಾಂಗೊಂಕ್ ಸಕಾನಾ..." ತಾಂಣೆ ಮುಟಿ ಅಂರ್ದಿಲ್ಯೊ. "ಪೂಣ್ ಬರಂವ್ಕ್ ಸಕ್ತಾಂ" ತಾಂಣೆ ಭಂವ್ತಣಿ ಪಳೆಲೆಂ. "ಏಕಾ ಕಾಗ್ದಾರ್ ಹಾಂವ್ ತುಕಾ ತೆಂ ಬರವ್ನ್ ದಿತಾಂ ಜಾಯ್ತ್ಗಿ..." ತೊ ತಗ್ಗಾಲೊ.
"ಪೂಣ್ ಸತ್ಚ್ ಬರಯ್ಜೆ" ತೆಂ ಉಡ್ಡಾಲೆಂ.
"ಭಾಸಾಯ್ತಾಂ!" ಸಾಯ್ಮನಾನ್ ತಾಚ್ಯಾ ಭರ್ಲ್ಲ್ಯಾ ಕುಸಿವಯ್ರ್ ಹಾತ್ ದವರ್ಲೊ. "ಆಮ್ಕಾಂ ಜಲ್ಮೊಂಕ್ ಆಸ್ಚ್ಯಾ ಆಮ್ಚ್ಯಾ ಭುರ್ಗ್ಯಾವಯ್ರ್ ಸೊಫುತ್ ಘಾಲ್ನ್ ಭಾಸಾಯ್ತಾಂ... ತಾಂಣೆ ಕಿತೆಂ ಸಾಂಗ್ಲಾಂ ತೆಂಚ್ ಬರಯ್ತಲೊಂ!"
"ಹಾಂವ್ಯಿ ಭಾಸಾಯ್ತಾಂ!" ನಿವೇದಿತಾನ್ ತಾಚ್ಯಾ ಹಾತಾವಯ್ರ್ ಹಾತ್ ದವರ್ಲೊ. "ತ್ಯಾಚ್ ಆಮ್ಚ್ಯಾ ಜಲ್ಮೊಂಚ್ಯಾ ಬಾಳಾವಯ್ರ್ ಸೊಫುತ್... ಮುಕಾರ್ ಕೆದಿಂಚ್ ಖಂಚ್ಯಾಯಿ ವೆಳಾರ್... ಖಂಚ್ಯಾಯಿ ಪರಿಗತೆಂತ್ ಯಾ ಕಸಲ್ಯಾಯಿ ಆವ್ಕಾಸಾಂನಿ ಹಾಂವ್ ತ್ಯಾವಿಶ್ಯಾಂತ್ ಉಲಂವ್ಚಿಂನಾ... ವಿಚಾರ್ಚಿಂನಾ... ಯಾ ತುಜೆವಯ್ರ್ ರಾಗ್ ಕರ್ಚಿಂನಾ!"
ಸಾಯ್ಮನ್ ಉಟ್ಲೊ... ಬರಂವ್ಚೆಖಾತಿರ್ ಖಂಚೆಂಯ್ ಕಾಗದ್ ತಾಕಾ ಮೆಳ್ಳೆಂನಾ ದೆಕುನ್ ಮೆಜಾವಯ್ರ್ ಆಸ್ಲ್ಲ್ಯಾ ಟಿಶ್ಯೂ ಡಬ್ಬ್ಯಾಂತ್ಲೆಂ ಏಕ್ ಟಿಶ್ಯೂ ವೊಡ್ಲೆಂ ತಾಂಣೆ ಆನಿ ನ್ಹಾಣ್ಯೆಂತ್ ರಿಗ್ಲೊ. ಸವ್ಕಾಸ್ ತಾಂಣೆ ಬರಯ್ಲೆಂ ಆನಿ ಟಿಶ್ಯೂ ಮೋಡ್ನ್ ಖಂಯ್ ದವರ್ಚೆಂ ತೆಂ ಸೊದ್ತಾನಾ ಕಳ್ಳೆಂನಾ ದೆಕುನ್ ಟೊಯ್ಲೆಟಾಚ್ಯಾ ಫ್ಲಶಾರ್ ದವರ್ನ್ ಭಾಯ್ರ್ ಆಯ್ಲೊ.
"ಹಾಂವೆಂ ಬರವ್ನ್ ಕಾಗದ್ ಟೊಯ್ಲೆಟಾಚ್ಯಾ ಫ್ಲಶಾರ್ ದವರ್ಲಾಂ..." ತೊ ಹಾಸೊ ತಡ್ವುಂಕ್ ಜಾಯ್ನಾಸ್ತಾನಾ ಉಗ್ತ್ಯಾನ್ ಹಾಸ್ಲೊ. "ತುವೆಂ ವಾಚ್ಯೆತ್"
ನಿವೇದಿತಾ ಸವ್ಕಾಸ್ ಉಟ್ಲೆಂ ಆನಿ ನ್ಹಾಣ್ಯೆಭಿತರ್ ವಚೊನ್ ದಾರ್ ಆಡ್ ಕೆಲೆಂ... ಏಕ್ ಘಡಿಭರ್ ಥಾಂಬ್ಲೆಂ ತೆಂ... ಆಪ್ಣೆಂ ಪತಿವಯ್ರ್ ದುಬಾವ್ ಕೆಲೊಗಿ... ತಾಚ್ಯಾ ದೊಳ್ಯಾನಿಂ ದುಕಾಂ ಭರ್ಲಿಂ. ತೀನ್ವರ್ಸಾಂನಿ ಮೀತ್ಮಿರ್ವಾಲ್ಲ್ಯಾ ತಾಚ್ಯಾ ಮೊಗಾಕ್ ಆಪ್ಣೆಂ ಕಿತೆಂ ಪಾಟಿಂ ದಿಲೆಂ... ಜರ್ ಸಾಂಗೊಂಕ್ ಸಾದ್ಆಸ್ಲ್ಲೆಂ ತರ್ ತೊ ಲಿಪಯ್ತೊಗಿ.... ಯಾ ತಾಂಣೆ ಆತಾಂ ಸಾಂಗೊಂಕ್ ಆಸ್ಲ್ಲೆಂ ತೆಂ ಆಪ್ಣಾಕ್ ಪತಿಚ್ಯಾ ಮೊಗಾವರ್ನಿಂ ಗರ್ಜೆಚೆಂಗಿ... ಮೊಗಾಚೆಂ ಮಾಪ್ ಖಂಚೆಂ... ಉಮಾಳ್ಚ್ಯಾ ದುಕಾಂಕ್ ಥಾಂಬ್ಣಿ ದಿಂವ್ಚೆಖಾತಿರ್ ತಾಂಣೆ ವೋಂಟ್ ಚಾಬೊನ್ ದರ್ಲೆ. ಮೊಗಾಂತ್ ಶರ್ತಾಂನಾಂತ್ ತರ್ ಮೊಗಾಚಿಂ ಇಮ್ತಿಹಾನಾಂ ಕಿತ್ಯಾಕ್... ಸಾಯ್ಮಾನಾಚ್ಯಾ ಶರ್ತಾಂಚ್ನಾತ್ಲ್ಲ್ಯಾ ಮೊಗಾಚಿಂ ಆಪ್ಣೆಂ ಇಮ್ತಿಹಾನಾಂ ಘೆತ್ಲಿಂಗಿ... ತುವೆಂ ಚೂಕ್ ಕೆಲಿಯ್ ನಿವೇದಿತಾ... ಕಾಳಿಜ್ ಬೊಬಾಟ್ಟಾನಾ ತಾಚ್ಯಾ ದೊಳ್ಯಾಂತ್ಲಿಂ ದುಕಾಂ ಕಾಟ್ ತುಟ್ಲಿಂ... ವ್ಹಾಳೊ ಜಾಲ್ಲ್ಯಾ ದಿಶ್ಟಿಂನಿ ತಾಂಣೆ ಚೊರ್ಯಾಂ ದಾರ್ ಥೊಡೆಂಚ್ ವೋಡ್ನ್ ಇಡ್ಯಾಂತ್ಲ್ಯಾನ್ ಸಾಯ್ಮನಾಕ್ ತಿಳ್ಳೆಂ.....
ತೊ ಜನೆಲಾಂತ್ಲ್ಯಾನ್ ಭಾಯ್ರ್ ಪಳೆತಾಲೊ... ಧುರಿ!
ತೆಂ ರಡ್ಲೆಂ... ರಡಾತ್ ಸವ್ಕಾಸ್ ತಾಂಣೆ ತೊ ಕಾಗ್ದಾಕುಡ್ಕೊ ಆಪಡ್ಲೊ.
ಏಕ್ಚ್ಏಕ್ ಘಡಿ... ಭೋವ್ಶಾ ಮಾತ್ಸೆಂ ದಾರ್ ಉಗ್ತೆಂ ಕೆಲ್ಲ್ಯಾನ್ ನ್ಹಾಣ್ಯೆಚ್ಯಾ ಜನೆಲಾಂತ್ಲ್ಯಾನ್ ಥಂಡ್ ವಾರೆಂ ಭಿತರ್ ರಿಗ್ಲೆಂ... ಹಿಂವಾಚೊ ಅನ್ಬೋಗ್ ಜಾಲ್ಲ್ಯಾ ನಿವೇದಿತಾಚೊ ಹಾತ್ ಕಾಂಪ್ಲೊ... ದರುಂಕ್ ಉಡ್ಡಾಲ್ಲ್ಯಾ ತಾಚ್ಯಾ ಬೊಟಾಂಕ್ ತೆಂ ಕಾಗದ್ ಲಾಗ್ಲೆಂ ಅನಿ ಏಕಾಚ್ಏಕಾ ಘಡ್ಯೆನ್ ತೆಂ ಕಾಗದ್ ಟೊಯ್ಲೆಟಾಭಿತರ್ ಪಡ್ಲೆಂ... ಥಂಡ್ಗಾರ್ ಜಾಲ್ಲ್ಯಾ ನಿವೇದಿತಾನ್ ತೆಂ ಕಾಡುಂಕ್ ಉಡ್ಡಾತಾನಾ ಭರ್ಲ್ಲಿ ಕೂಸ್ ಆಡ್ ಆಯ್ಲಿ ದೆಕುನ್ ಪರತ್ ಅರ್ದ್ಯಾ ಘಡ್ಯೆಚೊ ವೇಳ್ ಉಣೊಪಡ್ಲೊ... ತಿತ್ಲ್ಯಾಭಿತರ್ ತೆಂ ಕಾಗದ್ ಭಿಜ್ಲೆಂ ಆನಿ ಬುಡಾಲಾಗ್ಲೆಂ... ಆಪ್ಲೊ ಸಕಯ್ಲೊ ವೋಂಟ್ ಚಾಬೊನ್ ದರಿತ್ ತಾಂಣೆ ಬುಡುಲ್ಲೆಂ ಕಾಗದ್ ವೊಡ್ಲೆಂ ಆನಿ ಫಳಿತಾಂಶ್ ಜಾವ್ನ್ ತ್ಯಾ ಟಿಶ್ಯೂಚೊ ಏಕ್ಮಾತ್ ಕುಡ್ಕೊ ತಾಚ್ಯಾ ಹಾತಾಕ್ ಆಯ್ಲೊ ಆನಿ ಉರುಲ್ಲೆಂ ಕಾಗದ್ ಉದ್ಕಾಂತ್ ಜಿರ್ಲೆಂ!
ಇಮಾಜ್ ಜಾಲೆಂ ನಿವೇದಿತಾ... ಥೊಡ್ಯೊ ಘಡ್ಯೊ ಸಂಸಾರಾಕ್ ವಿಸರ್ಲ್ಲೆಂ ತೆಂ ತಶೆಂಚ್ ಉರ್ಲೆಂ... ಮಾಗಿರ್ ಹಾತಾಂತ್ಲೊ ಕುಡ್ಕೊಯಿ ತಾಂಣೆ ಕೊಮೊಡಾಭಿತರ್ ಘಾಲೊ ಆನಿ ಫ್ಲಶ್ ಚಾಲು ಕೆಲೊ... ಘಡ್ಯಾಂಭಿತರ್ ತೆಂ ಕಾಗದ್ ಉದ್ಕಾಸಂಗಿಂ ಉದಾಕ್ ಜಾಲೆಂ... ಸಾಂಗಾತಾಚ್ ಸಾಯ್ಮನಾನ್ ಬರಯಿಲ್ಲಿಂ ಉತ್ರಾಂಯಿ!
ತೆಂ ಸವ್ಕಾಸ್ ಭಾಯ್ರ್ ಆಯ್ಲೆಂ ಆನಿ ಖಾಟ್ಯೆರ್ ಬಸ್ಲೆಂ... ತಾಕಾ ಪಳೆಲ್ಲೊ ಸಾಯ್ಮನ್ಯಿ ತಾಚೆಂ ಗಂಭೀsರ್ ವದನ್ ಆನಿ ದೊಳ್ಯಾಂನಿ ದುಕಾಂ ಪಳೆವ್ನ್ ತಾಚೆ ಬಗ್ಲೆನ್ ಬಸ್ಲೊ.
"ವಾಚ್ಲೆಂಯ್ಗಿ..." ತಾಚೆಂ ಕಾಳಿಜ್ ಬಳಾನ್ ಉಡಾಲಾಗ್ಲೆಂ.
"ನಾ!" ದಡಾಮಾಂ ಅಡ್ಚುನ್ ಪಿಂರ್ಗಾಲೆಂ ನಿವೇದಿತಾ. "ತೆಂ ಕಾಗದ್ ಟೊಯ್ಲೆಟಾಂತ್ ಪಡೊನ್ ಗೆಲೆಂ" ತಾಂಣೆ ದೊನ್ಯಿ ಹಾತಾಂನಿ ಆಪ್ಲೆಂ ವದನ್ ಲಿಪಯ್ಲೆಂ.
"ಬಾಪ್ರೆ!" ಏಕಾಚ್ಫರಾ ಉದ್ಗಾರತ್ ಸಾಯ್ಮನಾನ್ ತಾಕಾ ಆರಾಯ್ಲೆಂ. "ಮಾಫ್ ಕರ್ ನಿವೇದಿತಾ... ವ್ಹಡ್ನಾ... ಶೀತಲಾನ್ ಮ್ಹಜ್ಯಾ ಕಾನಾಂತ್ ಕಿತೆಂ ಸಾಂಗ್ಲ್ಲೆಂಗೀ ಮ್ಹಳ್ಯಾರ್..."
"ನಾಕಾ!!!" ಏಕಾಚ್ಫರಾ ನಿವೇದಿತಾನ್ ಆಪ್ಲೊ ಹಾತ್ ತಾಚ್ಯಾ ವೊಂಟಾವಯ್ರ್ ದಾಂಬ್ಲೊ "ಸಾಂಗಾನಾಕಾ..." ತೆಂ ಭಿಕ್ಕಾಲೆಂ. "ಹಾಂವೆಂ ತುಕಾ ಭಾಸಾಯ್ಲಾಂ... ಆನಿಮುಕಾರ್ ಖಂಚ್ಯಾಯಿವೆಳಾರ್... ಕಸಲ್ಯಾಯಿ ಪರಿಗತೆಂತ್ ಜಾಂವ್ ಯಾ ಕೆನ್ನಾಂಯಿ ತುಜೆಲಾಗಿಂ ತ್ಯಾವಿಶ್ಯಾಂತ್ ವಿಚಾರಿನಾ ಮ್ಹಣೊನ್ ಆಮ್ಕಾಂ ಜಲ್ಮೊಂಕ್ ಆಸ್ಚ್ಯಾ ಬಾಳಾವಯ್ರ್ ಸೊಫುತ್ ಖೆಲಾ... ಸಾಂಗಾನಾಕಾ!"
ಸಾಯ್ಮನ್ ಆರ್ ಮಾರ್ಲ್ಲೆಭಾಶೆನ್ ಥಂಡ್ಪಡ್ಲೊ!
ತೆಂ ರಡಾತ್ ನಿದ್ಲೆಂ ಪೂಣ್ ಪಾಟ್ ಕರಿನಾಸ್ತಾನಾ... ಸಾಯ್ಮನ್ ಕಾಪ್ಚೆಂ ಆಪ್ಲೆಂ ಆಂಗ್ ಸಾಂಬಾಳಿತ್ ತಾಚೆ ಬಗ್ಲೆನ್ ಆಡ್ಪಡ್ಲೊ.
"ಮ್ಹಾಕಾ ಮಾಪ್ ಕರ್ ಪತಿ..." ತೆಂ ತಾಚ್ಯಾ ಗಳ್ಯಾಕ್ ವೆಡ್ಕೊಳ್ ಪಡ್ಲೆಂ. ಹಾಂವೆಂ ತುಜೆವಯ್ರ್ ದುಬಾವ್ ಕೆಲೊ..." ತೆಂ ರಡ್ಟಾಲೆಂ ಆನಿ ತೊ ತಾಕಾ ವೆಂಗುನ್ ದರ್ನ್ ಭುಜಂವ್ಕ್ಪಡ್ಲೊ... ಕಳಿತ್ನಾಸ್ತಾನಾಂಚ್ ತಾಚಿ ದೀಶ್ಟ್ ಜನೆಲಾಂತ್ಲ್ಯಾನ್ ಭಾಯ್ರ್ ಗೆಲಿ....
ಮಯ್ಲಾಪಯ್ಸ್ ಆಸ್ಲ್ಲೆ ರಸ್ತ್ಯಾಚೆ ದಿವೆ ತಾಕಾ ಪಳೆವ್ನ್ ಹಾಸ್ತಾಲೆ!
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
