ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕಣ್ ಬೊಕುಲ್!? - ಆಸ್ಟಿನ್ ಡಿ’ಸೋಜ್ ಪ್ರಭು
ವಯ್ಲೆಂ ಶಿರೋನಾಂವ್ ಆಯ್ಕಾತಾನಾ ತುಮ್ಕಾಂ ಮಾತ್ಶ್ಯೊ ಕುಚುಲ್ಯೊ ಜಾಂವ್ಕ್ ಪುರೊ! ಮಂಗ್ಳುರ್ಗಾರಾಂಕ್ ಬಿರುದಾಂ ದಿಂವ್ಚಿಂ ಮ್ಹಳ್ಯಾರ್ ಭಾರಿಚ್ ಸಸಾರ್ - ವ್ಹಡಾ ಕಾರ್ಬಾರ್ಯಾಂಕ್ಯ್ ಬಿರುದಾಂ, ಇಲ್ಲೆಂ ಶೆಣ್ ಘಾಲ್ಲ್ಯಾಂಕ್ಯ್ ಬಿರುದಾಂ, ಬಿಕ್ಕೊನ್ಂಚ್ ಆಸ್ಲ್ಲ್ಯಾಂಕ್ಯ್ ಬಿರುದಾಂ! ಹಿಂ ಬಿರುದಾಂ ಇತ್ಲಿಂ ಸಸಾರ್ ಜಾಲ್ಯಾಂತ್ ಆಮ್ಚೆ ಮಧೆಂ, ಹಾಕಾ ಆತಾಂ ಭಿಲ್ಕುಲ್ ಮಾನ್ಂಚ್ ನಾ ಜಾಲಾ ಮ್ಹಳ್ಯಾರ್ ಅತಿಶಯ್ ಜಾಂವ್ಚೊಂ ನಾ.
ಪಯ್ಲ್ಯೆ ಸುವಾತೆರ್ ಹಿಂ ಬಿರುದಾಂ ಕಿತ್ಯಾಕ್ ದಿಂವ್ಚಿಂ? ಹಾಕಾ ಜವಾಬ್ ಏಕ್ಚ್ಚ್ - ತಾಂಚೆಲಾಗ್ಚೆ ಪಯ್ಶೆ ಪೀಳುಂಕ್, ತಾಂಕಾಂ ಖುಶ್ ಕರುಂಕ್, ತಾಂಕಾಂ ಮಾಳ್ಯಾರ್ ಚಡವ್ನ್ ಆಮಿಂ ಸಕ್ಲಾ ರಾವೊನ್ ವಯ್ರ್ ತಿಳುಂಕ್. ಹ್ಯಾ ಬಿರುದಾಂಚೊ ಪಾವ್ಸ್ ಆಮ್ಚ್ಯಾ ಕಥೊಲಿಕ್ ಸಮಾಜೆಂತ್ ಕಾಂಯ್ ಉಣೊ ನ್ಹಂಯ್.
ಆದಿಂ ಮಾಗಾ ದಿಯೆಸೆಜಿಚ್ಯಾ ಬಿಸ್ಪಾಚ್ಯಾ ವಶೀಲಾಯೆನ್ ರೋಮಾ ಥಾವ್ನ್ ಆಮ್ಚ್ಯಾ ಸಭಾರ್ ಗ್ರೇಸ್ತಾಂಕ್ ಬಿರುದಾಂ ಮೆಳ್ಲ್ಲಿಂ ಆಸಾತ್. "ಬೆನೆಮೆರೆಂತಿ ಬಾಂಗ್ರಾ ಪದಕ್" - ಏಕಾ ಲಾಯಿಕಾಕ್ ರೋಮಾ ಥಾವ್ನ್ ಯೆಂವ್ಚೆಂ ಅತೀ ಊಂಚ್ ಬಿರುದ್. ಪಯ್ಲೆಂಚೆ ಸಾವ್ಕಾರ್ ರಾಶಿಂ ರಾಶಿಂನಿ ಇಗರ್ಜ್ ಮಾತೆಕ್ ಪಯ್ಶೆ ಯೆಟ್ತಾಲೆ ಆನಿ ಬಿರುದಾಂ ಆಪ್ಣಾಯ್ತಾಲೆ.
ಕಷ್ಟ್ ಕಾಡುನ್ ಇಗರ್ಜ್ ಮಾತೆಕ್ ಸಹಾಯ್ ಕೆಲ್ಲ್ಯಾಂಕ್ ಕಾಂಯ್ ಬಿರುದಾಂ ದಿಂವ್ಚಿ ಖರಿ ರಿವಾಜ್ ಆಸಾ ಕೆಲ್ಲಿ ಜಾಲ್ಯಾರ್ ಖಂಡಿತ್ ಜಾವ್ನ್ ೧೯೭೯ ಇಸ್ವೆಂತ್ ತ್ಯಾ ತ್ಯಾಗಿ ಮಸೂದೆ ವಿರೋಧ್ ಲಾಗಿಂ ಲಾಗಿಂ ಸಾಟ್ ಹಜಾರ್ ಲೋಕಾಕ್ ಮಂಗ್ಳುರಾಂತ್ಲ್ಯಾ ನೆಹರು ಮೈದಾನಾರ್ ಫಕರ್ ಏಕಾ ಮಹಿನ್ಯಾಚ್ಯಾ ಕನಿಷ್ಟ್ ವಾವ್ರಾನ್ ಜಮಯಿಲ್ಲ್ಯಾಕ್ ಮ್ಹಾಕಾಯೀ ಏಕ್ ಬಿರುದ್ ಮೆಳ್ತೆಂ ಕೊಣ್ಣಾಂ! ಅಸಲಿ ಜಮಾತ್ ಎದೊಳ್ ವರೇಗ್ ಕೊಣೆಂಚ್ ಕಥೊಲಿಕಾನ್ ಜಮಯಿಲ್ಲಿ ನಾ ಮ್ಹಳ್ಳ್ಯಾಂತ್ ಖಂಡಿತ್ ಜಾವ್ನ್ ಸತ್ ಆಸಾ. ಮ್ಹಾಕಾ ಬಿರುದ್ ಸೊಡ್, ಹಿ ಜಮಾತ್ ಜಾಲ್ಯಾ ಉಪ್ರಾಂತ್ ಏಕ್ ’ದೇವ್ ಬರೆಂ ಕರುಂ’ ಮ್ಹಳ್ಳೆಂ ಉತಾರ್ ಸಯ್ತ್ ಶೀದಾ ಆಯಿಲ್ಲೆಂ ನಾ! ಆಯಿಲ್ಲೆಂ ಫಕತ್ತ್ ಏಕ್ ಕಾರ್ಡ್ - ಮಂಗ್ಳುರ್ಚ್ಯಾ ಕಥೊಲಿಕ್ ಸಂಘಟನಾ ಥಾವ್ನ್. ಬಿಸ್ಪಾನ್ ಜಾಂವ್ ವ ಹೆರ್ ಕೊಣೆ ಲಾಯಿಕ್ ಮುಖೆಲ್ಯಾನ್ ಜಾಂವ್ ಸಾಂಗ್ಲ್ಲೆಂ ಕಿತೆಂಚ್ ನಾ. "ಕಾರ್ಯೆಂ ಜಾಲೆಂ, ವಯ್ಜ್ ಮೆಲೊ" ಮ್ಹಳ್ಳ್ಯಾಕ್ ಏಕ್ ಖರಿ ಸಾಕ್ಸ್!
ಆತಾಂ ಹ್ಯಾ ಬಿರುದಾಂ ವಿಶ್ಯಾಂತ್ ಉಲಂವ್ಚೆಂ ತರ್, ಆಮ್ಚ್ಯಾ ಸಂಘ್ ಸಂಸ್ಥ್ಯಾಂಚಾ ಮುಖೆಲ್ಯಾಂನಿ ಮಾತ್ಸೆಂ ಚಿಂತುಂಕ್ ಫಾವೊ ಜಾಯ್. ಕೊಣಾಯ್ಕಿ ಬಿರುದಾಂ ದೀಂವ್ಕ್ ಅಂವ್ಸರ್ ಕರ್ಚೊ ನ್ಹಂಯ್, ಬಿರುದಾಂ ಘೆತೆಲ್ಯಾಂಕ್ ಥೊಡೊ ತರೀ ಅನ್ಭೋಗ್ ಮೆಳೊಂ, ಸಮಾಜ್ ಆಮ್ಚಿ ತಾಂಕಾಂ ಸಂಪೂರ್ಣ್ ವಳ್ಕೊಂ, ತಾಂಚಿ ಶ್ಯಾಥಿ ತೆ ಸಮಾಜೆಕ್ ದಾಖಂವ್ - ತೆನ್ನಾಂ ಮಾತ್ರ್ ಆಮಿಂ ತಾಂಕಾಂ ಫಾವೊ ತೊ ಮಾನ್ ದಿವ್ಯಾಂ. ನ್ಹಂಯ್ ತರ್ ತೆ ಬಿರುದ್ ಘೆವ್ನ್ ಕುಜ್ನಾಂತ್ ಬಸೊನ್ ಮಾಸ್ಳಿ ಭಾಜ್ತೆಲೆ, ಮಿಜಾಸ್ಕೆನ್ ಕುಸ್ತೆಲೆ ಆನಿ ಆಪುಣ್ ತುಂಡು ರಾಯ್ ಮ್ಹಣ್ ತಾತ್ಕಾಲಿಕ್ ಹಾಂಕಾರಾನ್ ಭರ್ತೆಲೆ.
ಮಂಗ್ಳುರಾಂತ್ ಪಯ್ಲೆಂ ಬಿರುದ್ ದೀಂವ್ಕ್ ಸುರು ಕೆಲ್ಲೆಂ ಆಮ್ಚ್ಯಾ ಲೋಕಾಮೊಗಾಳ್ ಮೋಗಾ ಕಾಣ್ಯೊಂ ಬರಂವ್ಚ್ಯಾಂತ್ ಫಾಮಾದ್ ಜಾಲ್ಲ್ಯಾ ದೇವಾಧೀನ್ ಗೇಬ್ರಿಯಲ್ ಡಿ’ಸೋಜಾ (ಶ್ರೀ ಗಬ್ಬು ಉರ್ವಾ) ಹಾಣೆಂ. ಆಮ್ಚ್ಯಾ ಲೋಕಾ ಮೋಗಾಳ್ ಖ್ಯಾತಿವಂತ್ ಆನಿ ಶ್ಯಾತಿವಂತ್ ಕೊಂಕ್ಣಿ ಪದಾಂ ಘಡ್ಪಿ ಆನಿ ಗಾವ್ಪಿ ಶ್ರೀ ವಿಲ್ಫಿ ರೆಬಿಂಬಸಾಕ್ ತ್ಯಾ ಟೌನ್ ಹೊಲಾಂತ್ ದಿಲ್ಲೆಂ ತೆಂ ಏಕ್ ಲಾಯಿಕ್ ಬಿರುದ್. ತೆಂ ಬಿರುದ್ ಜಾವ್ನಾಸ್ಲೆಂ - "ಕೊಂಕಣ್ ಕೊಗುಳ್". ಹಾಚೆಂ ಉಪ್ರಾಂತ್ ಮಂಗ್ಳುರ್ಗಾರಾಂ ಮಧೆಂ ಬಿರುದಾಂ ಭಾರಿಚ್ ಸಲೀಸಾಯೆನ್ ವ್ಹಾಳೊಂಕ್ ಲಾಗ್ಲಿಂ. ಸಭಾರ್ ಆಮ್ಚೆ ಮಧೆಂ ಬಿರುದಾಂಕಿತ್ ಜಾಲೆ!
ಬಿರುದಾಂಕ್ ಮಾನ್ ಆಸಾ, ಸ್ಥಾನ್ ಆಸಾ ಆನಿ ತೆಂ ಮೆಳ್ಲ್ಲ್ಯಾಂಚೆರ್ ಲೋಕಾಕ್ ಅಭಿಮಾನ್ ಆಸಾ. ಆಶೆಂ ಆಸ್ತಾಂ ಬಿರುದಾಂ ದಿಂವ್ಚೆ ಸಂಘ್ ಸಂಸ್ಥೆಯ್ ಹ್ಯಾ ಬಿರುದಾಂಕ್ ಪಯ್ಲೊ ಮಾನ್ ದೀಂವ್ದಿತ್. ಬಿರುದಾಂಚೆಂ ಪಾತಳ್ ಉದ್ಕಾಡೆ ಆಮ್ಚ್ಯಾ ಮಂಗ್ಳುರಿ ಸಮಾಜೆಚ್ಯಾ ಭಲಾಯ್ಕೆಕ್ ಬರೆಂ ನ್ಹಂಯ್!
ಸಭಾರ್ ಮಿತ್ರಾಂ ಪಯ್ಕಿ ಸಿಜ್ಯೆಸ್ ಎಕ್ಲೊ ಮ್ಹಜೊ ಖಾಸ್ ಮಿತ್ರ್. ಏಕ್ ದೀಸ್ ತಾಣೆಂ ಮ್ಹಾಕಾ ಏಕ್ ಬಿರುದ್ ದಿಲೆಂ - "ಕೊಂಕಣ್ ಬೊಕುಲ್." ಹ್ಯಾ ಬಿರುದಾಕ್ ಆನಿ ಮ್ಹಾಕಾ ಕಿತೆಂ ಸಂಬಂಧ್ ಮ್ಹಳ್ಳ್ಯಾಕ್ ತೊ ಶೇಲೆ ಕರುನ್ ಅಸೆಂ ಮ್ಹಣಾಲೊ, "ತುಂ ಹರ್ಯೆಕ್ಲ್ಯಾಕ್ಯ್ ಭೊಕೊರ್ತಾಯ್ ಸಾಯ್ಬಾ, ಕೊಣಾಕ್ಯ್ ಸೊಡ್ನ್ ದೀನಾಂಯ್; ತುಕಾ ಹೆಂ ಬಿರುದ್ ಫಿಟ್ಟ್" ಮ್ಹಣಾಲೊ. ಬರೆಂ ಜಾಲೆಂ ಹೆಂ ಬಿರುದ್ ಮ್ಹಾಕಾ ತಾಣೆಂ ಮ್ಹಜ್ಯಾ ಸ್ವಪ್ಣಾಂತ್ ದಿಲೆಂ, ನ್ಹಂಯ್ ತರ್ ಜಾಲ್ಯಾರ್ ಹಾಂವ್ ಹೆಂ ಬಿರುದ್ ತಾಚ್ಯಾಚ್ ಗಳ್ಯಾಂತ್ ಘಾಲ್ತೊಂ!
-ಓಸ್ಟಿನ್ ಪ್ರಭು, ಚಿಕಾಗೊ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
