"ಜರ್ ಆಶಾ-ಅತ್ರೆಗ್ಚ್ ಘೊಡೆ ಜಾತೆ, ತರ್ ಭಿಕಾರಿಯ್ ತಾಂಚೆರ್ ಸವಾರಿ ಕರ್ತೆ"
ಬಿಜಿ ಆಸಾಯ್ಗೀ?
ವರಸ್ : 2005
ಮಯ್ನೊ : ಮಾರ್ಚ್
ಹೆಂಚ್ ಸವಾಲ್, ಮ್ಹಜಾ ಮತಿಂತ್ ಸವಾಲಾಂಚೆಂ ವಾದಾಳ್ ಚೆಪುನ್ ಗೆಲ್ಲ್ಯಾ ದೆ|ಜೊರ್ಜಿ ಪೀಂತ್ ಆಯ್ಕೊಳಾನ್, ಮ್ಹಾಕಾ ಸದಾಂಯ್ ಫೋನ್ ಕೆಲ್ಲೆವೆಳಾರ್ ಪಯ್ಲೆಂ ವಿಚಾರ್ಚೆಂ ಜಾವ್ನಾಸ್ಲ್ಲೆಂ. ಸುರ್ವೆರ್ ಹಾಂವೆಂಯೀ ’ವ್ಹಯ್ ಇಲ್ಲೊಂ ಬಿಜಿ ಆಸಾಂ’ ಮ್ಹಣ್ ಉಪ್ರಾಂತ್ ಹಾಂವೆಂಚ್ ತಾಕಾ ಫೋನ್ ಕರ್ಚೆಂ ಆಸ್ಲ್ಲೆಂ.
ಉಪ್ರಾಂತ್ ’ಇಲ್ಲೊ ಬಿಜಿ ಪುಣ್ ಸಾಂಗ್’ ಮ್ಹಣ್ ಜಾಪ್ ದೀಂವ್ಕ್ ಲಾಗ್ಲೊಂ ಆನಿಂ ಥೊಡ್ಯಾ ತೆಂಪಾ ಉಪ್ರಾಂತ್ ’ವ್ಹಡ್ ನಾ - ಉಲವ್ಯೆತ್’ ಮ್ಹಣ್ ಜಾಪ್ ದೀಂವ್ಕ್ ಲಾಗ್ಲೆಂ. ಹೆಂಚ್ ಸವಾಲ್ ಮ್ಹಜಾ ಜಿಬೆಥಾವ್ನ್ ಯೆಂವ್ಚೆಂ ಜೆನ್ನಾಂ ಹಾಂವ್ ಕೊಣಾಯ್ಕೀ ಫೋನ್ ಕರ್ಚೆವೆಳಾರ್. ’ಬಿಜಿ ಆಸಾಯ್ಗೀ?’ ಆಮಿಂ ಆಮ್ಚಾ ಜಿಣ್ಯೆರ್ ಕಿತ್ಲಿಂ ಬಿಜಿ? ಮ್ಹಳ್ಳ್ಯಾ ಚಿಂತ್ಪಾಚೆರ್ ಎಕೊಡೊ ನಿಹಾಳ್ ಕರ್ಯಾಂಗೀ?
ಬಿಜಿ ನಾತ್ಲ್ಲೊ ಮನಿಸ್ ಕೊಣ್ಂಚ್ ಆಸ್ಚೊನಾ. ಜಾಂವ್ ತೊ ಘಾಟಾಗಾರ್ ಯಾ ಭಾಟಾಗಾರ್. ಜಾವ್ಯೆತ್ ತೊ ಕುಲ್ಕಾರ್ ಯಾ ಶೆತ್ಕಾರ್. ಜಾವ್ಯೆತ್ ತೊ ದೊತೊರ್ ಯಾ ಕಾಜಿತೊರ್. ಜಾವ್ಯೆತಾ ತೊ ಸುತಾರಿ ಯಾ ಕಾಮ್ ನಾಸ್ತಾಂ ರಸ್ತ್ಯಾರ್ ಭಂವ್ಚೊ ಬೆಕಾರಿ - ಹರ್ಯೆಕ್ಲೊ ಬಿಜಿ. ತಾಂತಾಂಕಾಂ ತಾಂತಾಂಚೊ ಮ್ಹಳ್ಳೆಂ ಕಾಮ್ ಆಸಾ ಆನಿಂ ಅಪ್ಲ್ಯಾ ಮತಿನ್ ವೊಪುನ್ ಘೆತ್ಲ್ಲೆಂ ಏಕ್ ಮಿಸಾಂವ್ ಆಸಾ. ಆನಿಂ ತ್ಯಾ ಮಿಸಾಂವಾಕ್ ಶಾಭಿತಾಯೆನ್ ಪೊಂತಾಕ್ ಪಾವಂವ್ಕ್ ಹರ್ಯೆಕ್ಲೊ ಮನಿಸ್ ಮಿನತ್ ಕರ್ತಾ. ಹೆರಾಂಚಾ ಘರಾಂನಿ ಚೊರಿ ಕರ್ಚೊ ಚೋರ್ ಜಾಲ್ಯಾರ್ಯೀ ಮಿನತ್ ಕರ್ನ್ಂಚ್ ಚೊರಿ ಕರುಂಕ್ ಪಡ್ತಾ.
ನಾವೇ ಆಪ್ಲ್ಯಾಚ್ ಪಾಂಯಾಂಕ್ ಅಪ್ಣಾನ್ಂಚ್ ಕುರಾಡ್ ಮಾರ್ಲ್ಲೆಪರಿಂ ಜಾಯ್ತ್. ಆನಿಂ ತ್ಯಾ ಚೊರಾಚಿ ಮಿನತ್ ಇತ್ಲಿಚ್ - ಕೆದ್ನಾಂ ಅಪ್ಣಾನ್ ನಾಗಂವ್ಚಾ ಮನ್ಶಾಂಕ್ ನೀದ್ ಯೆತಾ ಮ್ಹಳ್ಳಿ ಘಡಿ ಸಮ್ಜೊಂವ್ಚಿ. ಆಮಿಂ ಆಯ್ಚಾ ಕಾಳಾಚೊ ಬುಧ್ವಂತ್ ಲೋಕ್, ಬೂದ್ಜೀವಿ, ಹ್ಯಾ ಪ್ರಕ್ರಿಯೆಂತ್ ಖಂಯ್ ಆಸಾಂವ್?
ಆಮ್ಕಾಂ ಆಮ್ಚೆಂ ಕಾಮ್, ಆಮ್ಚೆಂ ಕುಟಾಮ್, ಆಮ್ಚೆಂ ಘರ್, ಆಮ್ಚೆಂ ಹಿತಾಲ್, ಆಮ್ಚಾ ಭಾಗಿಂತ್ಲಿಂ ಫುಲಾಂ, ಆಮ್ಚಾ ಘರಾಂತ್ ಸೊಭಿತ್ ಸುಣೆಂ, ಮಾಜ್ರಾಂ ಆಸಾತ್, ಆಮಿಂ ಫ್ಯಾಶನ್ ಸಂಸಾರಾಂತ್ ಜಿಯೆತಾಂವ್, ಲೆಕಾಚೆಂ ಉಲಯ್ತಾಂವ್, ಲೆಕಾಚೆಂ ಖಾತಾಂವ್, ಲೆಕಾಚೆಂ ಪಿಯೆತಾಂವ್ ಆನಿಂ ಲೆಕಾಚೆಂ ಉರಂವ್ಕ್ ಪ್ರೇತನ್ ಕರ್ತಾಂವ್. ಪುಣ್ ಏಕ್ ಸಂಗತ್ ಆಮಿಂ ವಿಸರ್ನ್ ಸೊಡ್ಲ್ಯಾ ಆನಿಂ ತಿ ಜಾವ್ನಾಸಾ ಲೆಕಾಚೆಂ ನಿಯಾಳ್ತಾಂವ್.
ಹೆಂ ಕಿತ್ಯಾಕ್? ಕಾರಾಣ್ ಆನಿಂ ದೈವಿಕ್ ಜಾಪ್ ಎಕ್ಚ್ - ’ಆಮಿಂ ಬಿಜಿ’. ಆಮ್ಕಾಂ ಟಿವಿ ಆಸಾತ್, ಸೀರಿಯಲ್ಸ್ ಆಸಾತ್, ಆಮಿಂ ಪ್ರಗತೆಚಾ ಪಾವ್ಲಾಂನಿ ಆಸಾಂವ್, ಆಮ್ಚೊ ಶೆವೊಟ್ ಪಾಶ್ಚಾತ್ಯ್ ರಾಷ್ಟ್ರಾಂನಿ ವಸತಿ ಕರ್ಚೊ ಜಾವ್ನಾಸಾ, ಜಾವ್ಯೆತಾ ತೊ ಭಾಸಾಯಿಲ್ಲೊ ಗಾಂವ್ ಕೆನಡಾ, ಆಸ್ಟ್ರೇಲಿಯಾ ಯಾ ಲಂಡನ್ ಜಾವ್ಯೆತಾ. ಥಂಯ್ಸರ್ ಮಾನ್ನಾಚೆಂ ಖಾಣ್ ಲಾಭ್ತಾ, ಥಂಯ್ ಭಜರಂಗ ದಳಾಚೆ ಎದೊಳ್ ಉದೆಂವ್ಕ್ ನಾಂತ್. ಆಮ್ಕಾಂ ಮಿಸಾಂ ಆಯ್ಕೊಂಕ್ ದೊಶಿ ದಿತೆಲಿಂ ಕೊಣ್ಯ್ ನಾಂತ್.
ಬರೆಂ.. ಬರೆಂ.... ಸರ್ವ್ ಬರೆಂ... ಏಕ್ ಘಡಿ ಚಿಂತ್ಯಾಂ ಆಮ್ಚಾ ಜಿಣ್ಯೆಂತ್ ಆಮಿಂ ಕಿತೆಂ ಸಾಧನ್ ಕರುಂಕ್ ಆಸಾ? ಆಮ್ಚಾ ಜಿಣ್ಯೆಚಿ ವಾಟ್ ಕಿಶಿನ್ ವೆಚಾರ್ ಆಸಾ? ಖಂಯ್ ವಚಾಜಯ್ ಆಸ್ಲ್ಲಿ? ಖಂಯ್ ವೆಚಾರ್ ಆಸಾ? ಸತ್ ಸಾಂಗೊಂಕ್ ಭೋವ್ ದೂಕ್ ಭೊಗ್ತಾ ತರ್ಯೀ ಆಮ್ಚಾ ಹ್ಯಾ ’ಬಿಜಿ ಲಾಯ್ಪಾಂತ್’ ಆಮಿಂ ಹ್ಯಾ ಎಕಾ ಪರಿಗತೆಂತ್ ಆಸಾಂವ್ ಮ್ಹಳ್ಯಾರ್;
’ಆಮಿಂ ಸುರ್ವಾತ್ ಕೆಲ್ಲ್ಯಾ ಸುವಾತೆರ್ ಆಮಿಂ ಧರ್ಲ್ಲಿ ವಾಟ್ ಆಮ್ಕಾಂ ಖಂಯ್ಗೀ ಪಾವಯ್ತಾ ಮ್ಹಣ್ ಆಮಿಂ ಚಿಂತ್ಲ್ಲೆಂ, ಆಮಿಂ ಖೈಂಯ್ಗೀ ಪಾವ್ಲ್ಯಾಂವ್ ಆಸ್ತಾಂ ಅಖ್ರೇಕ್ ಆಮಿಂ ಸುರ್ವಾತ್ ಕೆಲ್ಲ್ಯಾ ಸುವಾತೆಕ್ ಪಾವ್ತಾನಾ ಆಮಿಂ ಕೋಣ್ ಮ್ಹಳ್ಳೆಂಚ್ ವಿಸರ್ಲ್ಯಾಂವ್’
ಕಿತ್ಯಾಕ್? ಕಿತ್ಯಾಕ್? ಫಕತ್ ಆಮ್ಚಾ ಚಿಂತ್ಪಾಚಾ ಆಳ್ಸಾಯೆನ್, ಆಮ್ಚಾ ಅಲಕ್ಶೆನ್, ಆಮಿಂ ಆಮ್ಕಾಂಚ್ ಫಟ್ಕಿರೊ ಭರ್ವಸೊ ದೀವ್ನ್ ಫಟವ್ನ್ ಘೆಂವ್ಚೆವರ್ವಿಂಚ್.
ಜೆಜು ಸಂಸಾರಾಕ್ ಆಯಿಲ್ಲೊ ಭಾಗೆಂವಂತಾಂಖಾತಿರ್ ನ್ಹಯ್, ಪಾತ್ಕ್ಯಾಂ ಖಾತಿರ್ ಮ್ಹಳ್ಳೆಂ ಆಮಿಂ ಕರೆಜ್ಮಾಚಾ ಕಾಳಾರ್ ಪುಣೀಂ ವಾಚ್ಲ್ಲೆಂ ಆಯ್ಕಲಾಂ ಜಾವ್ಯೆತಾ. ಆಯ್ಚಾ ಕಾಳಾರ್ ಆಮ್ಚಿ ಕ್ರೀಸ್ತಾಂವ್ ಜಿಣಿ ಹ್ಯಾ ಚಿಂತ್ಪಾಕ್ ಕಿತ್ಲಿ ಸರಿ ಜಾಲ್ಯಾ? ಹೆರಾಂಕ್ ಜೊಕುಂಕ್ ಚಿಂತ್ಲ್ಲಿಂ ಬೊಟಾಂ ಆಮ್ಕಾಂ ಜೊಕುನ್ ಏಕ್ ಪಾವ್ಟಿಂ ನಿಹಾಳ್ಯಾಂಗೀ? ಹಾಂವ್ ಜಾಣಾಂ ಆಮಿಂ ಬಿಜಿ ಮ್ಹಣ್. ಎಕಾಧಾವೆಳಾ ಅಶೆಂ ಚಿಂತ್ಲೆಂ ತರ್ ಅನ್ಯೇಕ್ ಸವಾಲ್ ಉದೆನಾಂಗೀ? ’ಹ್ಯಾ ಸರ್ವಾಕ್ ಕೋಣ್/ಕಿತೆಂ ಕಾರಾಣ್? ಮ್ಹಣ್?’ ಕಿತ್ಯಾಕ್ ಸಂಸಾರಾಂತ್ ಪಿಡಾ ಆಸಾ? ದುಬ್ಳಿಕಾಯ್ ಆಸಾ? ಅಗಿನ್ಯಾನ್ ಆಸಾ? ಭುಕ್ ಆಸಾ? ಲಜ್ ಆಸಾ? ಜಾಪ್ ಭೋವ್ ಸಂಪಿ - ಬೂದ್ಜಿವಿ ಮ್ಹಣ್ ಲೆಖ್ಚಾ ಆಮ್ಚೆಥಾವ್ನ್ಂಚ್. ಆಮ್ಚಾ ’ಬಿಜಿ’ ಚಿಂತ್ಪಾಥಾವ್ನ್.
ದೆಕುನ್ ಸಂಸಾರಾಂತ್ ಆಸ್ಚಿಂ ಅನ್ವಾರಾಂ ಉದೆಲ್ಯಾಂತ್ ಯಾ ಉದೆತಾತ್ ತಿ ಹ್ಯಾ ಅಶಿಕ್ಪಿ, ದುಬ್ಳ್ಯಾ ಲೊಕಾಂ ಥಾವ್ನ್ ಬಿಲ್ಕುಲ್ ನ್ಹಯ್ - ಬೂದ್ಜೀವಿ ಮ್ಹಣ್ ಲೆಖ್ಚಾ ಮನ್ಶಾಂ ಥಾವ್ನ್ - ಆಮ್ಚೆಥಾವ್ನ್. ಪುಣ್ ಹೆಂ ಸತ್ ಆಮಿಂ ನೆಗಾರ್ ಕರ್ಚೆಂ ಯಾ ವೊಪುನ್ ಘೆಂವ್ಚೆಂ ತ್ಯಾ ತ್ಯಾ ಮನ್ಶಾಚಾ ಚಿಂತ್ಪಾಚಾ ಪರಿಧಿಭಿತರ್ಲೆಂ ಚಿಂತಾಪ್.
ಪುಣ್ ಹ್ಯಾ ಪರಿಗತೆಂತ್ ಆಮಿಂ ಕಿತ್ತುನ್ ಪಾವ್ಲ್ಯಾಂವ್ ಮ್ಹಳ್ಯಾರ್ ಮುಖಾರ್ ಆಸ್ಚಿಂ ಮುಖೆಲಿಂಯ್ ನ್ಹಯ್, ಪಾಟಿಂ ಆಸ್ಚಿಂ ಪಾಟ್ಲಾವ್ದಾರಿಯ್ ನ್ಹಯ್. ತರ್ಯೀ ಮಾರೆಕಾರ್ ಖೊಟೆಂ ಆನಿಂ ದೈವಿಕ್ ಬರೆಂಪಣ್ ಎಕಾಚ್ ಜಾಗ್ಯಾರ್ ಆಸ್ಚೆಂ - ಮನ್ಶಾಥಂಯ್.
ಪುಣ್ ಹ್ಯಾ ಚಿಂತ್ಪಾಚಾ ಆಳ್ಸಾಯೆನ್ ಖೊಟೆಂಪಣ್ ದೈವಿಕ್ ಬರೆಂಪಣಾಚೆರ್ ರಾಜ್ವಟ್ಕಿ ಚಲಯ್ತಾನಾ ಪಂದಾ ಪಡೊನ್ ಚಿರ್ಡತಾ, ಉರ್ಡತಾ ಮನ್ಶಾಚೆಂ ಮನ್ಶಾಪಣ್. ತೆಂ ಜೀವ್ ಸೊಡ್ಚಾಧಿಂ ಪುಣೀಂ ಆಮಿಂ ಏಕ್ ಪಾವ್ಟಿಂ ದೊಳೆ ಸೊಡ್ನ್ ಪಳೆಯಾಂಗೀ?
’ಬಿಜಿ ನಾತ್ಲ್ಯಾರ್ ಮಾತ್ರ್’
- ವಲ್ಲಿ ಕ್ವಾಡ್ರಸ್, ಅಜೆಕಾರ್
