ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಬೀಗ್ ಆನಿ ಭಿಗ್ಹಾತ್
ಎಚ್ಚೆಮ್: ಕೊಂಕ್ಣೆಂತ್ ಹಾಣೆಂ ಎಕ್ಲ್ಯಾ ಕವಿಚೆಂ ಸ್ಥಾನ್ ಆಪ್ಣಾಯ್ಲಾಂ ತರ್ಯೀ ಹೊ ಏಕ್ ಪ್ರಭುದ್ದ್ ಕಾಣ್ಯೆಗಾರ್ ಸಾಯ್ತ್. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ºÁAvÀÄA ºÁZÁå '£À²¨Áa gÁvï' ªÀÄmÁé÷å PÁuÉåPï ¥ÀAiÉÄèA E£ÁªÀiï ¯Á¨sÁèA. ºÁZÁå ªÀÄmÁé÷å PÁuÁåAZÉÆ §ÆPï 'zɪÁPï ¸ÉÆqÀè¯ÉÆ ¥ÁqÉÆ' JzÉƼïZï ¥ÀUÀðmï eÁ¯Á. ¸À¨sÁgï ¸Á»wPï ¸ÀàzsÁåðA¤ ªÀÄmÁé÷å PÁuÁåAZÁ «¨sÁUÁA¤ E£ÁªÀiÁA D¥ÁÚAªïÌ ¸ÀPï¯ÉÆè ºÉÆ KPï «ªÀıÀðPï D¤ aAwà ¸ÀAiÀiïÛ.
ಎಚ್ಚೆಮಾಚ್ಯೊ ಹೆರ್ ಮಟ್ವ್ಯೊ ಕಾಣ್ಯೊ: ನಶಿಬಾಚಿ ರಾತ್, ಆವ್ರ್, ಲೇಕ್
ಎಚ್ಚೆಮ್
ಚೆರ್ಕ್ಯಾರ್ ಪಾಲಣಾಂ ಘರಾಕ್ ಸೊಡ್ನ್ ಯೇವ್ನ್ ಸೊನಾಲಿ ಕಾಮಾಕ್ ಬಾಯ್ರ್ ಸರೊನ್ ರಾವ್ತಾನಾಂಯೀ ಮಿಥುನ್ ಗೋಡ್ ನಿದೆಂತ್ ಆಸ್ಲೊ. ಸುಮಾರ್ ತೆಂಪಾ ಉಪ್ರಾಂತ್, ಕಾಂಯ್ ದೋನ್ ಮಯ್ನ್ಯಾಂನಿ ಜಾಂವ್ಕ್ ಪುರೊ.. ಆಜ್ ಪರ್ತ್ಯಾನ್ ನಾಕ್ಭರ್ ಪಿಯೆವ್ನ್ ಫಾಂತ್ಯಾರ್ ತೊ ಘರಾ ಆಯಿಲ್ಲೊ. ನಿದೆಂತ್ಲೆಂ ಉಟೊನ್ ಸೊನಾಲಿನ್ ದಾರ್ ಕಾಡ್ಲ್ಲೆಂ. ತಾಚೆ ವ್ಹಾಣೊ ನಿಕ್ಳಾವ್ನ್, ಘಾಲ್ಲ್ಯಾ ವಸ್ತುರಾರ್ಚ್ಚ್ ನಿದಾಯಿಲ್ಲೊ.
ಹಾಕಾ ಆತಾಂ ಉಟಂವ್ಚೆಂ ಯಾ ಅಶೆಂಚ್ ಸೊಡ್ನ್ ಕಾಮಾಕ್ ವೆಚೆಂ? ಸೊನಾಲಿ ಗೊಂದೊಳಾಂತ್ ಪಡ್ಲೆಂ. ಉಟಯ್ಲ್ಯಾರ್ ನಿತಳ್ ಜಾವ್ನ್ ವಸ್ತುರ್ ನೆಸೊನ್ ಫುಲಾಂ ಮಾಳ್ನ್ ಕಾಮಾಕ್ ಭಾಯ್ರ್ ಸರೊನ್ ರಾವ್ಲ್ಲ್ಯಾ ಮ್ಹಾಕಾ ಹೊ ಮಾಂಚಾರ್ ವೊಡ್ತಾ. ಮಾಗೀರ್ ತಾಣೆಂ ದೊಳ್ಯಾಂನೀಚ್ ದೀನ್ಪಣಿಂ ವಿಚಾರ್ಚೆಂ ಪಳಯ್ತಾನಾ ನಾ ಮ್ಹಣೊಂಕ್ ಜಾಯ್ನಾಂ. ಹಾಂಗಾ ಹಾಚೇ ಸಾಂಗಾತಾ ದೀಸ್ಭರ್ ನಿದ್ಲ್ಯಾರ್ ಥಂಯ್ ಪಾರ್ಲರಾಂತ್ ಆಪ್ಣಾಚೆ ಸದಾಂಚೆಂ ಗಿರಾಯ್ಕ್ ರಾಕ್ತಾತ್ ಮ್ಹಳ್ಚೆ ಚಾರ್ ಕಾಸ್ಯೀ..
ಉಟಯ್ತಾನಾ ಗೆಲ್ಯಾರ್ ಸಾಂಜ್ ಮ್ಹಣಾಸರ್ ತರ್ಯೀ ಅಶೇಂಚ್ ಹಾಂವ್ಚ್ಚ್ ಮ್ಹಣ್ ಚಿಂತೂನ್ ಉಶ್ಯಾಂಕ್ ಪೊಟ್ಲುನ್ ಧರ್ನ್ ನಿದ್ತಾ. ದೊನ್ಪಾರಾಂ ಜೆಂವ್ಚಿಯೀ ಫಿಕಿರ್ ನಾ. ಸಕಾಳಿಂ ವೆಗ್ಗಿಂ ಉಟೊನ್ ಆಮ್ಸೊರಾನ್ಂಚ್ ಕರ್ನ್ ದವರಿಲ್ಲ್ಯೊ ಚಾಪಾತ್ಯೊ, ನಿಸ್ತೆಂ ಸಾಂಜೆರ್ ಯೇವ್ನ್ ಸುಣ್ಯಾಂಕ್ಚ್ ಘಾಲಿಜೆ.
ಕಾಜಾರ್ ಜಾತಾನಾ ಮಿಥುನ್ ಅಸೊ ಅಸ್ಲೊವೇ? ತಾಚ್ಯಾ ದೊಳ್ಯಾಂಕ್ಚ್ ಚಿಂತೂನ್ ಬಸೊನ್ ಕಿತ್ಲೆಶಿ ರಾತಿಂ ಹಾಂವ್ ನೀದ್ ನಾಸ್ತಾನಾ ಪಾಶಾರ್ ಕೆಲ್ಲ್ಯೊ ನಾಂತ್. ತಾಂಚೆ ಲೇಕ್ ಆಸಾ? ತೆದಾಳಾ ಸೊನಾಲಿ ಕಲ್ಯಾಣ್ ಈಶ್ತಾಂತ್ ಆವಯ್ ಬಾಪಾಯ್ ಸಾಂಗಾತಾ ಪೊರ್ಟಾರ್ ಚಾಳಿಂತ್ ರಾವ್ತಾಲೆಂ. ಬ್ರಿಟಿಶಾಂನಿ ಕಲ್ಯಾಣ್ ರಯ್ಲ್ವೇ ಸ್ಟೇಶನಾ ಭಾಯ್ರ್ ತಾಂತುಂ ಕಾಮ್ ಕರ್ಚ್ಯಾ ಲೈಸನ್ಸ್ ಪೋರ್ಟರಾಂಕ್ ರಾವೊಂಕ್ ಮ್ಹಣ್ ಹೆ ಫಾತ್ರಾಂಚಾ ವೊಣದಿಚೆಂ ನಳ್ಯಾಂಚೆಂ ಚಾಳಿ ಬಾಂಧುನ್ ಘಾಲ್ಲೆಂ. ಸೊನಾಲಿಚೊ ಆಜೊ ಲೈಸನ್ಸ್ ಆಸ್ಲೊ ಪೋರ್ಟರ್ ಆಸೊನ್ ತೇಂ ಕಾಮ್ ಕರ್ತಾಲೊ. ಬಾಪುಯ್ ಮಾತ್ ಲೈಸನ್ಸ್ ಕರ್ನ್ ಪೋರ್ಟಾಚಾ ಕಾಮಾಕ್ ಲಾಗ್ಚೆ ಬದ್ಲಾಕ್ ನಾಸಿಕ್ ಮನ್ಮಾಡ್ ಥಾವ್ನ್ ರಖಂ ಪಾಲಾಬಾಜಿ ಹಾಡ್ನ್ ಮಾರ್ಕೆಟಿಂತ್ ವಿಕ್ಚ್ಯಾ ದಂಧ್ಯಾಕ್ ಲಾಗ್ಲೊ. ಮಧ್ಯಾನೆ ರಾತಿಂ ಮೇಯ್ಲ್ ಗಾಡಿ ಧರ್ನ್ ನಾಸಿಕ್ ಗೆಲ್ಯಾರ್ ಥಂಯ್ ಥಾವ್ನ್ ಮೇತಿ, ಪಾಲಕ್, ಶೆಪೂ, ಚವ್ಳೆಚಿ ಭಾಜಿ ಘೆವ್ನ್ ಫಾಂತ್ಯಾರ್ ಪಾಟಿಂ. ತಾಣೆಂ ಹಾಡ್ಲ್ಲಿ ಭಾಜಿ ಕಲ್ಲ್ಯಾಣ್ ರೈಲ್ವೇ ಸ್ಟೇಶನಾ ಥಾವ್ನ್ ದೆಂವೊಂಕ್ ಆನಿ ಥಂಯ್ ತಿ ಮಾರ್ಕೆಟಿಕ್ ಪಾವಂವ್ಕ್ ಚೆರ್ಕೆ ಹಾತ್ಗಾಡಿ ಘೆವ್ನ್ ತಯಾರ್ ಆಸ್ತೆಲೆ. ಟಿಕೆಟ್ ಆನಿ ಲಗೇಜ್ ಭರಿನಾಸ್ತಾನಾ ಆಯಿಲ್ಲ್ಯಾಕ್ ಟಿ.ಸಿ.ಕ್ ಮಾಮೂಲ್ ದೀವ್ನ್ ಮಾರ್ಕೆಟಿಕ್ ಪಾವ್ತಾನಾ ಕಲ್ಯಾಣ್, ಉಲ್ಲಾಸ್ನಗರ್, ವಿಠಲವಾಡಿ, ಅಂಬರ್ನಾಥ್ ಗಾಂವಾಂತ್ಲೆ ಲ್ಹಾನ್ವ್ಹಡ್ ಮ್ಹಣ್ ರಾಂದ್ವ್ಯೆಚೆ ವೆಪಾರಿ ವೆಡೊ ಘಾಲ್ತಾಲೆ. ಚಡಾವತ್ ವಳ್ಕಿಚೆ ಆನಿ ದೀಸ್ಪಡ್ತೆ ಗ್ರಾಯ್ಕ್. ಇಸ್ಣೆಂ ದಿಲ್ಯಾರ್ಯೀ ದಂಧೊ ಜಾತಾಲೊ. ನೋವ್ ಧಾ ವೊರಾಶೆಂ ಕಿಸ್ಣ ತೀನ್ ವೊರಾಂಕ್. ತಿತ್ಲ್ಯಾರ್ ಆಪ್ಣಾಕ್ ಇಸ್ಕೊಲಾಕ್ ಸೊಡ್ನ್ ಕಲ್ಯಾಣ್ ವೆಸ್ಟಾಂತ್ ದೋನ್ ತೀನ್ ಫ್ಲೇರಾಂನಿ ಆಯ್ದಾನಾಂ ಘಾಸ್ಚೆಂ ಕಾಮ್ ಕರುಂಕ್ ಗೆಲ್ಲಿ ಆಯಿ ಪಾಟಿಂ ಯೇವ್ನ್ ಬಾಬಾನ್ ಹಾಡ್ಲ್ಲಿ ಭಾಜಿ ರಾಂದ್ತಾ ಆನಿ ಗೊಂವಾಂಚ್ಯೊ ಚಪಾತ್ಯೊ ವಾ ನಾತ್ನ್ಯಾಚೊ ಭಾಕ್ರ್ಯೊ ಕರ್ತಾಳಿ. ಸುಭೇಧಾರ್ವಾಡಾಂತ್ಲೆಂ ಸೊನಾಲಿಚೆಂ ಮರಾಟಿ ಇಸ್ಕೊಲ್ಯಿ ಸುಟೊನ್ ತೆಂಯೀ ಘರಾ ಪಾವ್ತೆಲೆಂ. ತೀನ್ ವೊರಾರ್ ಧನ್ಪಾರಾಂಚೆಂ ಜೆವಣ್ ಜಾಲ್ಲ್ಯಾ ಉಪ್ರಾಂತ್ ಆಯಿ ಘರಾ ಆಡ್ ಪಡ್ತಾಲಿ. ಬಾಬಾ ಸಕಾಳಿಂ ವಿಕೊನ್ ವಚಾನಾಸ್ತಾನಾ ಉರ್ಲ್ಲಿ ಭಾಜಿಯೆಚಿ ವೊವ್ಳೆ ಘೆವ್ನ್ ರೈಲ್ವೇ ಪಾಟ್ಯಾಂಚಾ ಕುಶಿನ್ ಉಗ್ತ್ಯಾ ಜಾಗ್ಯಾರ್ ವಿಕುಂಕ್ ಬಸ್ತಾಲೊ. ತೊ ಜಾಗೊ ರಯ್ಲ್ವೇಚೊ. ತಾಕಾ ರೈಲ್ವೇ ಕಿತ್ಲೆ ವೋಂಯ್ ಘಾಲ್ಯಾರ್ಯೀ ತಾಂಚೆ ಪರ್ನೆ ಪಾಟೆಚ್ಚ್ ಪುರ್ಲ್ಯಾರ್ಯೀ ರಾತಿ ಭಿತರ್ ತೇ ಕೊಣ್ ತರೀ ಉಕ್ಲಾವ್ನ್ ಘಾಲ್ತಾಲೆ. ಸಕಾಳಿಂಚೆ ಆನಿ ಸಾಂಜೆಚೆಂ ದಾದರ್, ವಿ.ಟಿ ಕುಶಿನ್ ಕಾಮಾಕ್ ವೆಚಾ ಆನಿ ಯೆಂವ್ಚ್ಯಾ ಲೊಕಾಕ್ ಹ್ಯಾ ಉಗ್ತ್ಯಾ ಜಾಗ್ಯಾಂತ್ಲ್ಯಾನ್ ಭಿತರ್ಲಿ ವಾಟ್ ಆಸ್ತಾಲಿ. ಆನಿ ರಾಂದ್ವಯ್ ಮಾರ್ಕೆಟ್ ರೈಲ್ವೇ ಸ್ಟೆಶನಾ ಥಾವ್ನ್ ಪಯ್ಸ್ ಆಸೊನ್ ಕಾಮಾ ಥಾವ್ನ್ ಥಕೊನ್ ಆಯಿಲ್ಲ್ಯಾ ಬಾಯ್ಲಾಂಕ್ ಮಾರ್ಕೆಟಿಕ್ ವೆಚೆಂ ಪುರಾಸಣೆಂಚೆಂ ಜಾಲ್ಲ್ಯಾನ್ ಹಾಂಗಾಚ್ಚ್ ರಸ್ತ್ಯಾರ್ ವಿಕ್ತೆಲ್ಯಾಂ ಕಡೆ ತಿಂ ರಾಂದ್ವಯ್ ಘೆವ್ನ್ ಘರಾ ವೆತಾಲಿಂ. ಹಾಂಗಾ ಲೊಕಾಚಿ ಖೆಟ್ ವಾಡಾನಾತ್ಲೆಪರಿಂ ಪಳೆಂವ್ಕ್ ರೈಲ್ವೇನ್ ಚಾರ್ ಆರ್ಪಿ.ಎಫ್ ಪೆದ್ಯಾಂಕ್ ಡ್ಯೂಟಿ ಲಾವ್ನ್ ಕೊಣೆಂ ರೈಲ್ವೇಚ್ಯಾ ಹ್ಯಾ ಉಗ್ತ್ಯಾ ಜಾಗ್ಯಾರ್ ರಾಂದ್ವಯ್ ವಿಕುಂಕ್ ಬಸಾನಾಸೆಂ ಪಳೆಂವ್ಕ್ ಸಾಂಗ್ಲ್ಲೆಂ. ಪುಣ್ ಹೆ ಪೆದೆ ರಾಂದ್ವಯ್ ವಿಕ್ತೆಲ್ಯಾಂ ಕಡೆ ಥಾವ್ನ್ ಹಫ್ತೆ ಕಸೋಯೀ ಘೆತಾಳೆ ಸಾಂಗಾತಾ ದಿಸಾಕ್ ಎಕ್ಲ್ಯಾಕಡೆ ಫುಂಕ್ಯಾಕ್ ರಾಮ್ದ್ವಯ್ಯೀ ವರ್ತಾಲೆ.
ಸಕಾಳಿಂ ಉರ್ಲ್ಲಿ ಪಾಲೊ ಭಾಜಿ ಸಾಂಜೆರ್ ರೈಲ್ವೇಚಾ ಜಾಗ್ಯಾರ್ ವಿಕುನ್ ಸುರ್ ಪಿಯೆವ್ನ್ ಬಾಬಾ ಪಾಟಿಂ ಯೆತಾನಾ ಕುಂಕ್ಡಾಚೆ ಪಾಯ್ಗೀ. ಲಿವರ್ ಪೇಟಾಗಿ, ಭೊಕ್ರ್ಯಾಚಿ ಆನ್ಕಿಟ್ಗೀ, ಮಾತೆಂಗೀ ಹಾಡ್ನ್ ಯೆತಾಲೊ. ಮಾಸ್ಳಿ ಉಣಿ. ಆಯಿ ಧವ್ಯಾ ತಾಂದ್ಳಾಚೆಂ ಶಿತ್ ಕರ್ನ್ ನಾರ್ಲ್ ಘಾಲಿನಾಸ್ತಾನಾ ಮಿಟಾಮಿರ್ಸಾಂಗೆಚೆಂ ಆಳೆನ್ ಕಾಡ್ನ್ ಕಡಿ ಕರ್ತಾಲಿ.
ಲ್ಹಾನ್ ಆಸ್ತಾನಾ ಸೊನಾಲಿಯೀ ಭಾವಾ ಸಾಂಗಾತಾ ರೈಲ್ವೇಚಾ ಜಾಗ್ಯಾರ್ ರಾಂದ್ವಯ್ ವಿಕುಂಕ್ ವೆತಾಲೆಂ. ವ್ಹಡ್ ಜಾವ್ನ್ ಆಯಿಲ್ಲೆಪರಿಂ ಥಂಯ್ ರಾಂದ್ವಯ್ ವಿಕ್ತೆಲ್ಯಾಂನಿ ಮಾರ್ಚ್ಯಾ ಬೊಭೆಂತ್ ಆನಿ ರಾಂದ್ವಯ್ ಘೆಂವ್ಕ್ ಯೆತೆಲ್ಯಾಂಚೆ ದಿಶ್ಟಿಂತ್ ವಿಕಾರ್ ಆಸಾತ್ ಮ್ಹಣ್ ಗಮೊನ್ ಬಾಬಾ ಸಾಂಗಾತಾ ವೆಚೆಂ ಸೊಡ್ನ್ ಇಸ್ಕೊಲಾ ಥಾವ್ನ್ ಯೇವ್ನ್ ಜೆವ್ಲ್ಯಾ ಉಪ್ರಾಂತ್ಲೊ ವೇಳ್ ಪೋರ್ಟರ್ ಚಾಳಿಂತ್ಲ್ಯಾ ಕುಶಿಚಾ ರೈಲ್ವೇ ಕೋಲೊನಿಂತ್ಲ್ಯಾ ಇಶ್ಟಿಣ್ಯಾಂ ಸಾಂಗಾತಾ ಖರ್ಚುಂಕ್ ಲಾಗ್ಲೆಂ.
ಲೊಂಕ್ಡಾ ಪಾಟ್ಯಾಂಚಿ ವೋಂಯ್ ಮಾರ್ನ್, ಆರ್.ಪಿ.ಎಫಾಕ್ ನಮಿಯಾರ್ನ್ಯೀ ಪಾಳೊ ರಾಂದ್ವಯ್ ವಿಕ್ಚಾಯೀ ಘೆಂವ್ಚಾಯೀ ಲೊಕಾಚಿ ಖೆಟ್ ಉಣಿ ಜಾಯ್ನಾತ್ಲಿ ಪಳೆವ್ನ್ ರೈಲ್ವೇನ್ ಹೊ ಜಾಗೊ ಕಲ್ಯಾಣ್ ರೈಲ್ವೇ ಸ್ಟೆಶನಾಕ್ ಲಾಗ್ಗಿಂಯೀ ಆಸ್ಲ್ಲ್ಯಾನ್ ಲೋಕಲಾಚೊ ಮೇಟರ್ಮ್ಯಾನ್ ಆನಿ ಎ ಕ್ಲಾಸ್ ಡ್ರಾಯ್ವರಾಂ ಖಾತಿರ್ ಖ್ವಾರ್ಟರ್ಸ್ ಭಾಂದ್ಚೆಂ ಮ್ಹಣ್ ಕಾಮ್ ಸುರು ಕೆಲೆಂ. ಜೆಸಿಬಿ ಹಾಡ್ನ್ ಪಾಯ್ ಖೊಂಡುನ್ ರೆಡಿಮಿಕ್ಸ್ ಕೊಂಕ್ರೆಟ್ ಘಾಲ್ನ್ ತೀನ್ ಮಾಳ್ಯಾಂಚೆಂ ಬಾಂಧಾಪ್ ವರ್ಸಾ ಭಿತರ್ ಉಭೆಂ ಜಾಲೆಂ. ಕ್ವಾರ್ಟರ್ಸಾಕ್ ಕಂಪಾಂವ್ಡ್ಯೀ ಗೇಟ್ಯೀ ವಾಚ್ಮೆನ್ಯಿ ಜಾವ್ನ್ ರೈಲ್ವೇಚಾ ಉಗ್ತ್ಯಾ ಜಾಗ್ಯಾರ್ ವರ್ಸಾಂ ಥಾವ್ನ್ ಚಲೊನ್ ಆಯಿಲ್ಲೆಂ ರಾಂದ್ವಯ್ ವಿಕ್ಚೆಂಯೀ ರಾಂದ್ವಯ್ ಘೆಂವ್ಚೊಯೀ ವೆವ್ಹಾರ್ ಶಾಶ್ವತ್ ಬಂದ್ ಪಡ್ಲೊ. ಮಾತ್ ವಿ.ಟಿ. ದಾದರ್ ವೆತೆಲ್ಯಾಂಕ್ ಗಾಡಿ ಧರುಂಕ್ ಮ್ಹಣ್ ರೈಲ್ವೇನ್ ಏಕ್ ಪಾಂಯ್ವಾಟ್ ದವರ್ಲ್ಲಿ. ತಾಂತುಂ ಕೊಣೆಂ ರಾಂದ್ವಯ್ ವಾ ಹೆರ್ ಕಿತೆಂಯೀ ವಿಕುಂಕ್ ಬಸ್ಚೆಪರಿಂ ನಾತ್ಲ್ಲೆಂ. ಪುಣ್ ರೈಲ್ವೇನ್ ತೀನ್ ಮಾಳ್ಯಾಂಚೆಂ ಕ್ವಾರ್ಟರ್ನ್ ಭಾಂದ್ತಾನಾ ಮಧ್ಗಾತ್ ತಾಂತುಂ ರಾವೊಂಕ್ ಯೆಂವ್ಚಾ ಮೋಟರ್ಮ್ಯಾನ್ ಡ್ರಾಯ್ವರಾಂಚಾಂ ಭುರ್ಗ್ಯಾಂಕ್ ಖೆಳೊಂಕ್, ಕಿತೆಂಯ್ ಕಾರ್ಯಾಕ್ರಮ್ ಆಸ್ಲ್ಯಾರ್ ಕರುಂಕ್, ಹೋಲಿ, ಗಣ್ಪತಿ, ಆಚರುಂಕ್ ಮ್ಹಣ್ ಲ್ಹಾನ್ಶೆಂ ಮಯ್ದಾನ್ಶೆಂ ಕೆಲ್ಲೆಂ. ಕೊಣ್ ತಾಂತುಂ ಆಪ್ಲಿಂ ಮೊಟರ್ ಸಾಯ್ಕಾಲಾಂ, ಕಾರಾಂಯೀ ರಾವಯ್ತಾಲೆ.
ಪಯ್ಲೆಂ ಪಯ್ಲೆಂ ರೈಲ್ವೇ ಕ್ವಾರ್ಟರ್ಸಾಂತ್ ರಾವ್ತೆಲ್ಯಾಂಕಡೆ ಪೋರ್ಟಾರ್ ಚಾಳಿಂತ್ಲಿಂ ವ್ಹಡಾಂಯೀ ಭುರ್ಗಿಂಯೀ ಉಲಂವ್ಕ್ ಕಾವ್ಜೆತಾಲಿಂ. ಸೊನಾಲಿ ಮಾತ್ ಆಪ್ಲ್ಯಾ ರೈಲ್ವೇ ಕೋಲೊನಿಂತ್ಲ್ಯಾ ಇಶ್ಟಿಣ್ಯಾಂ ಸಾಂಗಾತಾ ಕ್ವಾರ್ಟರ್ಸಾಕ್ ವಚೊನ್ ಯೇವ್ನ್ ಥಂಯ್ಚ್ ವಾಚ್ಮೆನಾಕ್ ಸಯ್ತ್ ವಳ್ಕಿಚೆಂ ಜಾಲ್ಲೆಂ.
ರೈಲ್ವೇ ಕ್ವಾರ್ಟರ್ಸಾಂತ್ಲ್ಯಾ ಫುಟ್ಬೋಲ್ ಖೆಳ್ಚ್ಯಾ ಭುರ್ಗ್ಯಾಂಚೊ ಕ್ಯಾಪ್ಟನ್ಂಚ್ ಮಿಥುನ್. ಲೊಕಲಾಚೊ ಡ್ರಾಯ್ವರ್ ನಾಯರ್ ಅಂಕಲಾಚೊ ಪೂತ್. ಖೆಳಾಂತ್ ಮಾತ್ ನ್ಹಂಯ್ ರೈಲ್ವೇಚಾ ಇಂಗ್ಲಿಶ್ ಮೀಡಿಯಮ್ ಇಸ್ಕೊಲಾಂತ್ ಸಯ್ತ್ ಕ್ಲಾಶಿಂತ್ ಪಯ್ಲೊ. ನಾಯರ್ ಅಂಕಲಾಕ್ ದೊಗಾಂಚ್ಚ್ ಭುರ್ಗಿಂ. ವ್ಹಡ್ಲೆಂ ಚೆಡುಂ. ಗಾಂವಾಂತ್ ಆಜಾ ಆಜಿಯೆಲಾಗಿಂ ರಾವೊನ್ ಬಿಎಸ್ಸಿ ನರ್ಸಿಂಗ್ ಕರ್ತಾಲೆಂ. ಮಿಥುನ್ ಹಾಂಗಾ ಆವಯ್ ಬಾಪಯ್ ಸಾಂಗಾತಾ ಶಿಕ್ತಾಲೊ.
ಕೊಣಾಕ್ಯೀ ಗಡ್ಯೆನ್ ಪಿಶ್ಯಾರ್ ಘಾಲ್ಚೆ ಮೋಹಕ್ ದೊಳೆ. ಬಾರೀಕ್ ವೊಂಟಾರ್ ಹಾಸ್ಲ್ಯಾರ್ ಝದ್ಲಾಣ್ಯಾಪರಿಂ. ಅಸಲೊ ಮಿಥುನ್ ಬಾರಾವೆಕ್ ಪಾವ್ತಾನಾ ಅಛಾನಕ್ ಗಿಟಾರಾಚಾ ಮೊಗಾರ್ ಪಡ್ಲೊ. ಖಂಯ್ಗೀ ಕಲ್ಯಾಣ್ ವೆಸ್ಟಾಂತ್ ಮ್ಯೂಸಿಕ್ ಕ್ಲಾಶಿಕ್ ಸೆರ್ವೊನ್ ಏಕ್ ಸೆಕೆಂಡ್ ಹ್ಯಾಂಡ್ ಗಿಟಾರ್ ಹಾಡ್ನ್ ಕ್ವಾರ್ಟರ್ಸಾಂತ್ ವಾಜಂವ್ಕ್ ಲಾಗ್ಲೊ. ’ತುಜೆ ದೇಖಾ ತೊ ಯೆ ಜಾನಾ ಸನಮ್. ಪ್ಯಾರ್ ಹೋತಾ ಹೆ ದಿವಾನಾ...’ ಅಪುಣ್ ತರ್ಯೀ ಪಿಸ್ವಾಲ್ಲಿಂ ಹ್ಯಾಚ್ಚ್ ಟ್ಯೂನಾಕ್ ನ್ಹಂಯ್..? ಪೋರ್ಟಾರ್ ಚಾಳಿಂತ್ಲ್ಯಾ ಘರಾಚ್ಯಾ ನಾಣಿಯೆಂತ್ ಆಂಗಾಚಾ ನಾಜೂಕ್ ಕೊನ್ಶ್ಯಾಂನಿ ಸಾಭಾಚೊ ಫೆಂಡ್ ಕರ್ತಾನಾ ಸಯ್ತ್ ಸಗ್ಳ್ಯಾ ಕುಡಿಂತ್ ಗಿಟಾರಾಚಾ ಸರ್ಯೆಂಚೊ ನಾದ್. ಏಕ್ ದೀಸ್ ಪಾಂಚ್ವ್ಯಾ ದಿಸಾಚೆಂ ಉದಾಕ್ ಮಾತ್ಯಾರ್ ನಾವ್ನ್ ಕೇಸ್ ಪುಸುನ್ ತುವಾಳೊ ಸುಕಂವ್ಕ್ ಭಾಯ್ರ್ ಆಂಗ್ಣಾಕ್ ಆಯ್ಲ್ಯಾರ್ - ಬಾಂಯ್ಚ್ಯಾ ಕಾಟ್ಯಾಕ್, ಮಿಥುನ್ ಚೊಟ್ಟೊ. ಗಿಟಾರಾಚೇರ್ ಮಾತ್ ನ್ಹಂಯ್, ಮ್ಹಜ್ಯಾ ಲಾಂಬ್ ಕಾಳ್ಯಾ ಕೆಸಾಂಚೆರ್ ಸಯ್ತ್ ಮೊಗಾರ್ ಪಡ್ಲ್ಲೊ! ಬಾಬಾ ಭಿತರ್ ನಿದ್ಲ್ಲೊ ಆನಿ ಆಯಿ ಫ್ಲೇಟಾಂನಿ ಆಯ್ದಾನಾಂ ಘಾಸ್ಚ್ಯಾ ಕಾಮಾಕ್ ಗೆಲ್ಲಿ ಯೇಂವ್ಕ್ ನಾತ್ಲ್ಲಿ. ಆನಿ ಅಪುಣ್ಗೀ? ತಾಚಾ ಫುಟ್ಬೋಲಾಚೆರ್, ಗಿಟಾರಾಚೆರ್, ದಾಟ್ ಆಸ್ಡ್ಯಾಂಚಾ ದೊಳ್ಯಾಂಚೆರ್, ತಾಚೆರ್ಚ್ ಮೊಗಾರ್ ಪಡ್ಲ್ಲಿಂ ನ್ಹಂಯ್?
ಉಟಂವ್ಚೆಂಗೀ? ನಾಕಾಗೀ? ಗೊಂದೊಳಾಂತ್ ಚಿಂತೂನ್ ರಾವ್ಲ್ಲೆಕಡೇಚ್ಚ್ ವೇಳ್ ಉಭ್ಲ್ಲೊ. ಸ್ಟೆಶನಾಂತ್ ದಾದರ್, ವಿ.ಟಿ. ಕುಶಿಕ್ ವೆಚ್ಯೊ ಆನಿ ದಾದರ್ ವಿಟಿ ಥಾವ್ನ್ ಯೆಂವ್ಚ್ಯೊ ಗಾಡಿಯೊ ವಿಚಿತ್ರ್ ಹೋರ್ನ್ ಮಾರ್ನ್ ಫೊಳ್ಟಾಲೆ. ಸಕಾಳಿಂಚೊ ಆಮ್ಸೊರಿ ವೇಳ್ ವೆಗ್ಳೊ. ಲೇಡಿಸ್ ಡಬ್ಬ್ಯಾಂತ್ಯೀ ಪಾಯ್ ದವರುಂಕ್ ಜಾಗೊ ಮೆಳಾನಾ. ರೈಲ್ವೇ ಕಂಪಾರ್ಟ್ಮೆಂಟಾ ಭಿತರ್ ಕುಲೊ ತೆಂಕುನ್ ಜಾಗ್ಯಾ ಖಾತಿರ್ ಝಗಡ್ತಾನಾ ದಯಾ ದಾಕ್ಶೆಣ್ ಮಾನ್ ಮರ್ಯಾದ್ ಕೊಣ್ ಚಿಂತಿನಾಂತ್.
ದಯಾದಾಕ್ಶೆಣ್ ಮಾನ್ ಮರ್ಯಾದ್? ತಿ ತರ್ ಆಪ್ಣೆಂಯೀ ಚಿಂತ್ಲ್ಲಿವೆ? ಭಾರಾವಿಚೆಂ ಶಿಕಪ್ ಥಂಯ್ಚ್ ಸೊಡ್ನ್ ಮಿಥುನಾ ಸಾಂಗಾತಾ ಫೊಳ್ನ್ ಧಾಂವ್ತಾನಾ?
ಸೊನಾಲಿ ನಾಯರ್ ಅಂಕಲಾಗೆರ್ ತೆದ್ನಾಂ ತೆದ್ನಾಂ ವೆತಾಲೆಂ. ಸಾಂಗಾತಾ ರೈಲ್ವೇ ಕೊಲೊನಿಂತ್ಲ್ಯೊ ತಾಚ್ಯೊ ಇಸ್ಟಿಣ್ಯೊಯ್ ಆಸ್ತಾಲ್ಯೊ. ಮುಂಬಯ್ ಸಂಸ್ಕೃತೆಚಾ ಹ್ಯಾ ಶ್ಹೆರಾಂತ್ ನಾಯರ್ ಅಂಕಲಾಕೀ ಆಂಟಿಕೀ ಹೆಂ ಕಾಂಯ್ ವಿಶೇಸ್ ಮ್ಹಣ್ ದಿಸೊಂಕ್ ನಾ. ಸೊನಾಲಿ ಘರಾ ಎಕ್ಲೆಂಚ್ ಚೆಡುಂ ವಯ್ರ್ ದವರ್ಲ್ಯಾರ್ ಕಾವ್ಳೊ ವರಿತ್ ಸಕಯ್ಲ್ಯ್ ದವರ್ಲ್ಯಾರ್ ಮೂಯ್ ವರಿತ್ ಮ್ಹಳ್ಳೆಪರಿಂ ಬಾಪಾಯ್ನ್ ರಾಂದ್ವಯ್ ವಿಕುನ್, ಆವಯ್ನ್ ಹೆರಾಂಚಾ ಘರಾಂನಿ ಆಯ್ದಾನಾ ಘಾಸುನ್ ತರೀ ತಾಕಾ ಪೊಸ್ಲ್ಲೆಂ. ದೊಗಾಂ ಮಧೆಂ ಮೋಗ್ ಅಸೊ ಜುನೆಲ್ಲೊಗೀ - ದಿಸಾಚೆಂ ಏಖ್ ಮಿನುಟ್ಯೀ ಎಕಾಮೆಕಾಕ್ ಸೊಡ್ನ್ ರಾವೊಂಕ್ ಸಾಧ್ಯ್ ನಾತ್ಲ್ಲೆಂ. ದೆಕುನ್ ಮಿಥುನ್ ಆಪ್ಲಿ ಕೊಲೆಜ್ ಸೊಡ್ನ್ ಆನಿ ಸೊನಾಲಿ ಇಶ್ಟಾಚಾ ಆಜಿಯೆಗೆರ್ ರಾವ್ಲಿಂ. ನಾಯರ್ ಅಂಕಲಾನ್ ಪೊಲಿಸ್ ಕಂಪ್ಲೇಯ್ನ್ ದಿಲೆಂ. ಸೊನಾಲಿಚಿಂ ಆಯಿ ಬಾಬಾಯಿ ದೆದೆಸ್ಪ್ರೊರ್ ಜಾಲ್ಲಿಂ. ಮರಾಟಿ ಚೆಡುಂ ಆನಿ ಮಲ್ಬಾರಿ ಚೆಡೊ. ದೊಗಾಂಯ್ಚ್ಯಾ ಘರ್ಚಿಂ ಸುತಾರಾಂ ಭಗ್ಸುಂಕ್ ತಯಾರ್ ನಾತ್ಲಿಂ.
ಜಾಯ್ತೆ ದೀಸ್ ಮಹರಾಷ್ಟ್ರಾ ಭಾಯ್ರ್ ಆನ್ವೊಳ್ಕಿ ಗಾಂವಾಂತ್ ಖರ್ಚುನ್ ಪಾಟಿಂ ಆಯ್ಲ್ಯಾರೀ ಹಾಂಗಾ ಘರ್ಚ್ಯಾ ಕೊಣಾಚೊ ರಾಘ್ ನಿವೊಂಕ್ ನಾತ್ಲೊ. ನಾಯರ್ ಅಂಕಲ್ ಮ್ಹಣಾಲೊ ’ಎಕ್ಚ್ ತೆಂ ಚೆಡುಂ ವಾ ಆವಯ್ ಬಾಪಯ್ - ವಿಂಚವ್ಣ್ ತುಜಿ’. ಮಿಥುನಾಕ್ ದುಸ್ರಿ ವಾಟ್ ನಾತ್ಲಿ. ಸೊನಾಲಿಕ್ ಘೆವ್ನ್ ಪೋರ್ಟರ್ ಚಾಳಿಂತ್ಚ್ ಭಾಡ್ಯಾಚೆಂ ರೂಮ್ ಕೆಲೆಂ ಆನಿ ಬ್ಯಾಂಡಾಂತ್ ಗಿಟಾರ್ ವಾಜಂವ್ಚ್ಯಾ ಕಾಮಾಕ್ ಲಾಗ್ಲೊ. ಬ್ಯಾಂಡಾ ಸಾಂಗಾತಾ ಭಾಯ್ಲ್ಯಾ ಶ್ಹೆರಾಂಕ್ ಗೆಲ್ಯಾರ್ ದೊದೋನ್ ದೀಸ್ ಯೇನಾತ್ಲೊ. ದೀಸ್ ಕಸೊಯೀ ಪಾಶಾರ್ ಜಾತಾಲೊ. ತೊ ನಾತ್ಲ್ಲೆ ರಾತಿಂ ಮಾತ್ ಸೊನಾಲಿ ಉದಾರೆಂ ನಿದೊನ್ ಪಾಕ್ಯಾಚ್ಯಾ ನಳ್ಯಾಂಕ್ಚ್ ಪಳೆವ್ನ್ಂಚ್ ನೀದ್ ನಾಸ್ತಾನಾ ಕಾತಾರ್ತಾಲೆಂ. ತೆನ್ನಾಂ ದೀಸ್ಯೀ ಗೆಲ್ಲೆ.
ಸುರ್ವೇರ್ ’ಆಮ್ಕಾಂ ಮೆಲ್ಲ್ಯಾ ಲೆಕಾರ್ ಕಾಡ್’ ಮ್ಹಳ್ಳಿಂ ಸೊನಾಲಿಚಿಂ ಆವಯ್ ಬಾಪುಯ್ ಧುವೆಚೆ ಪಾಂಯ್ ಭರೊನ್ ಆಯ್ಲ್ಯಾತ್ ಮ್ಹಣ್ ಕಳ್ತಚ್ಚ್ ಲಾಗ್ಗಿಂ ಆಯ್ಲಿಂ. ವಿಶೇಸ್ ನ್ಹಂಯ್ ತರ್ಯೀ ಸುಕಾನ್ ಜಿಯೆವ್ಯೆತ್ ತಿತ್ಲೆಂ ಮಿಥುನ್ ಬ್ಯಾಂಡಾಂತ್ ಗಿಟಾರ್ ವಾಜವ್ನ್ಂಚ್ ಜೊಡ್ಟಾಲೊ. ಇಲ್ಲೆ ಇಲ್ಲೆ ಪಯ್ಶೆ ಉರವ್ನ್ ತಾಣೆಂ ಏಖ್ ಮೊಟಾರ್ ಸಾಯ್ಕಲ್ಯೀ ಕಾಣ್ಘೆಲ್ಲೆಂ. ನವೆಂ ಗುರ್ವಾರ್ ಸೊನಾಲಿಕ್ ಪಾಟ್ಲ್ಯಾನ್ ಬಸವ್ನ್ ಮಿಥುನಾನ್ ನವ್ಯಾಚ್ ಮೊಟಾರ್ ಸಾಯ್ಕಲಾರ್ ಆತಾಂಚ್ಚ್ ಶೆಂಕಾರೆಂ ಫುಟ್ಲ್ಲ್ಯಾ ಕೊಂಬ್ಯಾಪರಿಂ ಅಖ್ಖೇಂ ಕಲ್ಯಾಣ್ ಶ್ಹೆರ್ ಭಂವ್ಡಾಯಿಲ್ಲೆಂ. ದೋನ್ ತೀನ್ ದೀಸ್ ಬ್ಯಾಂಡಾ ಸಾಂಗಾತಾ ಭಾಯ್ರ್ ವಚೊನ್ ಆಯ್ಲ್ಯಾರ್ ಭುಕೆಲ್ಲ್ಯಾ ವಾಗಾಪರಿಂ ಜಾತಾಲೊ ಮಿಥುನ್. ರಾತ್ದೀಸ್ ಮ್ಹಣ್ ಮಾಂಚಾರ್ ವೋಡ್ನ್ ಚಾರ್ ಪಾಂಚ್ ಪಾವ್ಟಿಂ ನಾಂವ್ಚೆಪರಿಂ ಕರ್ತಾಳೊ ಭುರ್ಸೊ!
ಲಾಂಬ್ ಹೋರ್ನ್ ಮಾರ್ನ್ ಗೆಲ್ಲಿ ಗಾಡಿ ಡೆಕ್ಕನ್ಂಚ್ ಆಸೊಂಕ್ ಪುರೊ. ತೀ ಆನಿ ಪ್ರಗತಿ ಎಕ್ಸ್ಪ್ರೆಸ್ ಮಾತ್ ಹ್ಯಾ ಸ್ಟೇಶನಾಂತ್ ರಾವಾನಾಂತ್. ತೇ ಧಾಂವ್ಚ್ಯಾ ವೇಗಾಕ್ಚ್ ಪಾಂಚ್ವ್ಯಾ ಆನಿ ಸವ್ಯಾ ಪ್ಲೇಟ್ಫೋರ್ಮಾಂಚೆರ್ ತಾಣಿಂ ಉಭಂವ್ಚ್ಯಾ ಧುಳಿಚೊ ಅಂದಾಜ್ ಕರ್ಯೆತ್. ಆತಾಂ ಘರಾ ಥಾವ್ನ್ ಭಾಯ್ರ್ ಪಡ್ಲ್ಯಾರ್ ಅಂಬರ್ನಾಥ್ ಥಾವ್ನ್ ಯೆಂವ್ಚಿ ಫಾಸ್ಟ್ ಲೋಕಲ್ ಮೆಳ್ಟಾ. ವೆಳಾರ್ ಯೆಂವ್ಚಿ ಲೋಕಲ್ ಮ್ಹಳ್ಯಾರ್ ತೀ ಏಕ್ ಮಾತ್. ತಾಚೆ ಪಾಟ್ಲ್ಯಾನ್ ಫಾಸ್ಟ್ ಪಾಟ್ಯಾರ್ ದಾದರ್ ಮ್ಹಣಾಸರ್ ಹೊವ್ಡಾ ಮೇಯ್ಲ್ ಆಸ್ತಾ ಜಾಲ್ಲ್ಯಾನ್ ಖಂಯ್ಯೀ ಸ್ಟೇಶನಾಂತ್ ಚಡ್ ರಾಂವ್ಚೆಪರಿಂ ನಾ.
’ಅಭಯ್’ ಜಾಲ್ಲೋಚ್ ಆಪ್ಣಾಚೊ ಸಂಸಾರ್ಚ್ ಬದಾಲ್ಲೊ ನ್ಹಂಯ್? ಕಾಮಾಕ್ ವೆತಾನಾ ಭಾಯ್ಲ್ಯಾನ್ ಭೀಗ್ ಘಾಲ್ಚೆಂಗೀ ನಾಕಾ. ಪರ್ತ್ಯಾನ್ ಗೊಂದೊಳಾಂತ್ ಪಡ್ಲೆಂ ಸೊನಾಳಿ. ಮಿಥುನಾನ್ ಪಿಯೆಂವ್ಕ್ ಧರ್ಲ್ಯಾರ್ ಏಕ್ ರಾಟ್ ಪಿಯೆವ್ನ್ ರಾವಯ್ನಾ, ದೀಸ್ಭರ್, ಹಾಫ್ತೊಭರ್ ಪಿಯೆಂವ್ಕ್ಯೀ ಜಾಯ್ ಆನಿ ಮಾಂಚಾರ್ ಸೊನಾಲಿಯೀ.
ಬ್ಯಾಂಡ್ ಬಂಧ್ ಜಾಲ್ಲೆಂಚ್ ಗಿಟಾರ್ ಕಶೆಂಯೀ ಖೆಳಾನಾ. ದುಸ್ರೆಂ ಖಂಯ್ ತರೀ ಕಾಮ್ ಕರ್ ಮ್ಹಳ್ಯಾರ್ ಆಪ್ಣಾಕ್ ವೊಂಬಾನಾ ಮ್ಹಣ್ಟಾ. ಸೊನಾಲಿನ್ಂಚ್ ತಾಕಾ ಇಶ್ಟಿಣೆಕಡೆ ಉಲವ್ನ್ ಎಕಾ ಕೊರಿಯರ್ ಅಕ್ಂಪೆನಿಂತ್ ತಾಕಾ ಕಾಮಾಕ್ ಲಾಯಿಲ್ಲೊ. ಚಾರ್ ದೀಸ್ಯೀ ಕೆಲೆಂನಾ. ಆಯಿ ಬಾಬಾ ತರೀ ಕಿತ್ಲೆ ದೀಸ್ ದಿತಿತ್? ಬಾಬಾಚೊ ರಾಂದ್ವಯೆಚೊ ವ್ಯಾರ್ಯೀ ಆತಾಂ ಪಯ್ಲೆಂಚೆಪರಿಂ ಚಲಾನಾ. ಸಕಾಳಿಂಚೆಂ ಕಿತೆಂ ವಿಕೊನ್ ಗೆಲ್ಯಾರೀ ಮಾರ್ಕೆಟಿಂತ್ ಮಾತ್. ರೈಲ್ವೇಂತ್ ಉಗ್ತ್ಯಾ ಜಾಗ್ಯಾರ್ ಮೊಟರ್ಮ್ಯಾನ್ ಡ್ರಾಯ್ವರಾಂಕ್ ಕ್ವಾರ್ಟರ್ಸ್ ಜಾಲ್ಯಾ ಉಪ್ರಾಂತ್ ಸಾಂಜೆಚಾ ಇಲ್ಲಿ ಆಡ್ಜೋಡ್ ಆಸ್ಲ್ಲ್ಯಾ ಚುಂಗ್ಡಿ ದಂದ್ಯಾಕ್ ಕುರಾಡ್ ಪಡ್ಲ್ಯಾ. ಮಾರ್ಕೆಟಿಂತ್ ಉಸ್ಣೆಂ ಚಡ್ ಆಣಿ ಫಾಯ್ದೊ ಉಣೊ. ಬಾಬಾ ಅಪ್ಲಿ ಸಾಂಜ್ ಸಗ್ಳಿ ಸುರೆಚಾ ಗಡಂಗಾಂತ್ಚ್ ಖರ್ಚಿತಾಲೊ. ’ಅಭಯ’ ಜಾಲ್ಲೆ ಥಾವ್ನ್ ನಾತ್ವಾಕ್ ಉಸ್ಕ್ಯಾರ್ ಘೆವ್ನ್ ’ಹಾಂವ್ ಆನಿ ಪಿಯೆನಾ.. ಸೊಡ್ಟಾಂ’ ಮ್ಹಣ್ತಾಲೊ ತರ್ಯೀ ಸೊಡ್ಲ್ಲೆಂ ನಾ. ಆಯಿ ಮಾತ್ ಆಧ್ಲೆಪ್ರಾಸ್ ಚಡಿತ್ ದೋನ್ ಫ್ಲೇಟಾಂನಿ ಆಯ್ದಾನಾಂ ಘಾಸ್ತಾಲಿ. ಕಿತ್ಯಾಕ್ ಆಯಿ? ಮ್ಹಳ್ಯಾರ್ ಮ್ಹಜ್ಯಾ ನಾತ್ವಾ ಖಾತಿರ್ ಮ್ಹಣ್ತಾಲಿ.
ಪುಣ್ ನಾಯಕ್ ಅಂಕಲಾಕೀ ಆಂಟಿಕೀ ಕೆನ್ನಾಂ ಆಪ್ಲ್ಯಾ ಪುತಾಚೇರ್ ಭಿರ್ಮತ್ ನಾತ್ವಾಚೆರ್ ಮೋಗ್ ಆಯಿಲ್ಲೊನಾ. ಕೆನ್ನಾಂ ಕೆನ್ನಾಂ ತಾಣಿಂಚ್ ಮಿಥುನ್ ಪಾಡ್ ಜಾವ್ನ್ ವಚೊಂದಿ ಮ್ಹಣ್ ಮಲ್ಯಾಳಿ ಮಂತ್ರವಾದಿಕ್ ಧರ್ನ್ ಮಾಟ್ ಕೆಲಾಂ ಜಾಂವ್ಕ್ ಪುರೊ ಮ್ಹಣ್ ಆಯೀನ್ ಸಾಂಗ್ಚಾಂತೀ ಸತ್ ಆಸ್ಯೆತ್ ಮ್ಹಣ್ ಸೊನಾಳಿಕ್ ಭಗ್ತಾಲೆಂ. ಕೊರುಇಯರ್ ಕಂಫೆನಿ ಉಪ್ರಾಂತ್ ಮಿಥುನ್ ಎಕಾ ಬಿಲ್ಡರಾಕಡೆ ಸಾಯ್ಟಾರ್ ಕಾಮಾಕ್ ಲಾಗ್ಲೊ. ಥಂಯ್ಯಿ ಠಿಕ್ಲೊನಾ. ಉಪ್ರಾಂತ್ ಸೆಕ್ಯೂರಿಟಿ ಏಜನ್ಸಿಂತ್ ಥಂಯ್ಯೀ ತಾಕಾ ಸಮಾ ಗೆಲೆಂನಾ.
ಅಸಲೆ ಕಶ್ಟಾಂಚೆಂ ಘಡ್ಯೆ ದೆವಾಪರಿಂ ಕುಮ್ಕೆಕ್ ಆಯಿಲ್ಲೆಂಚ್ ಶಾಲಿನಿ. ತೆಂ ಸೊನಾಲಿ ಸಾಂಗಾತಾ ವರ್ಗಾಂತ್ ಶಿಕ್ತಾಳೆಂ. ನವೀ ಮುಂಬಯ್ ವಾಶಿಚಾ ಎಕಾ ಮಸಾಜ್ ಪಾರ್ಲರಾಂತ್ ಕಾಮ್ ಕರ್ತಾಲೆಂ. ಧನಿ ಮಂಗ್ಳುರ್ಚೊ ಬೊಣ್ಕೊ. ಮಹರಾಷ್ಟ್ರಾಂತ್ ಡಾನ್ಸ್ಬಾರಾಂ ಬಂದ್ ಜಾಲ್ಲೆ ಥಾವ್ನ್ ಎಕೆಕ್ಲೊಚ್ ಮಸಾಜ್ ಪಾರ್ಲರ್ ಉಗ್ತೆಂ ಕರ್ನ್ ಬಸ್ಲ್ಲೆ. ರಾತಿಕ್ ಬಾರಾಂಕ್ ಯೆಂವ್ಚೆ ತಿತ್ಲೆ ಗ್ರಾಯ್ಕ್ ದಿಸಾಕ್ ಹಾಂಗಾ ಯೆಂವ್ಚೆಂ ಕಶ್ಟಾಂಚೆ ತರ್ಯೀ ರಜೆಚಾ ದಿಸಾಂನಿ ದಂಧೊ ಬರೊಚ್ ಚಲ್ತಾಲೊ. ಸರ್ವಿಸಾಚಾ ಕಾಳೆತಿ ಫರ್ಮಾಣೆ ಪಯ್ಶೆ. ಸಾದೆಂ ಮಸಾಜ್, ಟೋಪ್ಲೆಸ್ ಮಸಾಜ್, ಬೋಡಿ ಟು ಬೋಡಿ ಮಸಾಜ್ ಆನಿ ಫೈನಲ್ ಸರ್ವಿಸ್. ಹಜಾರ್ ರುಪ್ಯಾಂ ಥಾವ್ನ್ ಧರ್ನ್ ಅಡೇಜ್ ತೀನ್ ಹಜಾರ್ ಪರ್ಯಾಂತ್. ಸಾಟ್ ಠಕ್ಕೆ ಧನ್ಯಾಕ್ ಉರ್ಲ್ಲೆ ಚಡ್ವಾಂಕ್. ಚಾ, ಕಾಫಿ, ಜೆವಣ್ ಧನ್ಯಾ ಲೆಕಾಕ್. ಕೊಣ್ ದಲಾಳ್ ಆಸ್ಲ್ಯಾರ್ ತಾಕಾಯೀ ಧಾ ಠಕ್ಕೆ.
ಪಾರ್ಲರಾಕ್ ಯೆಂವ್ಚ್ಯಾ ದಾದ್ಲ್ಯಾಂಚಾ ದೊಳ್ಯಾಂತ್ಲೆಂ ಆಮಾಲ್ ಆನಿ ತಾನ್ ಪಳೆಲ್ಲೆಂ ಸೊನಾಲಿಕ್ ಪಯ್ಲೆಂ ಪಯ್ಲೆಂ ಆಪ್ಲ್ಯಾ ಕುಡಿಚೆರ್ಚ್ ಕಾಂಠಾಳೊ ಯೆತಾಳೊ. ಪೊಟಾಂತ್ ಭರೊನ್ ಯೇವ್ನ್ ಕಾಕ್ಸಾಚಾ ಕೊಮೊಡಾಂತ್ ಮಾತೆಂ ರಿಗವ್ನ್ ನಿಮಾಣೊ ಥೆಂಬೊ ಪರ್ಯಾಂತ್ ವೊಂಕೊನ್ ಸಡ್ಯಾಂ ಭಗ್ತಾಲೆಂ. ತೆದಾಳಾ ತಾಣೆಂಯೀ ಶಾಲಿನಿಪರಿಂ ಗುಟ್ಕಾ ತೊಂಡಾಂತ್ ಘಾಲೊ ಆನಿ ತಾಕಾಯೀ ಹಳ್ಟಾಕ್ ಹೆಂ ಸಗ್ಳೆಂ ಸವಯೆರ್ ಪಡ್ಲೆಂ. ಸಕಾಳಿಂ ವೆಗ್ಗಿಂ ಉಟೊನ್ ಆಮ್ಸೊರಾನ್ ಚಪಾತ್ಯೊ ನಿಸ್ತೆಂ ಕರ್ಚೆಂ, ಚೆರ್ಕ್ಯಾಕ್ ತಯಾರ್ ಕರ್ನ್ ಪಾಲಣಾ ಘರಾಕ್ ಸೊಡ್ಚೆಂ, ದಡ್ಬಡೊನ್ ಭಾಯ್ರ್ ಸರೊನ್ ಕಾಮಾಕ್ ಯೆಂವ್ಚೆಂ. ಪಾಟಿಂ ಘರಾ ವೆತಾನಾ ಬಾಜಾರಾಂತ್ ರಾಂದ್ವಯ್ ಘೆಂವ್ಚಿ ಆನಿ ಪಾಲಣಾ ಘರಾ ಥಾವ್ನ್ ಚೆರ್ಕ್ಯಾಕ್ ಆಪವ್ನ್ ಹಾಡ್ಚೆಂ. ಮಿಥುನ್ ಘರಾ ಆಸ್ಲ್ಯಾರೀ ನಾ ಜಾಲ್ಯಾರೀ ಎಕ್ಚ್. ಅಖ್ಖೊ ದೀಸ್ ಟಿ.ವಿ.ರ್ ಮ್ಯೂಸಿಕ್ ಚ್ಯಾನಲಾಂ ಬದ್ಲುನ್ ಬಸ್ತಾಲೊ ಶಿವಾಯ್ ಭುರ್ಗ್ಯಾಕ್ ಪಳೆನಾತ್ಲ್ಲೊ. ಸದಾಂ ಸಕಾಳಿಂ ಕಾಮಾಕ್ ಭಾಯ್ರ್ ಸರೊನ್ ಯೆತಾನಾ ಸೊನಾಲಿಚ್ಚ್ ತಾಕಾ ಪನ್ನಾಸ್ ಶೆಂಭೊರ್ ಹಾತಾ ಖಾರ್ಚಾಕ್ ಆಸೊಂದಿ ಮ್ಹಣ್ ದಿತಾಲೆಂ. ತೆಂಯೀ ತೊ ಖರ್ಚಿನಾತ್ಲೊ. ಮೊಟಾರ್ ಸಾಯ್ಕಾಲಾಕ್ ಸಯ್ತ್ ಪೆಟ್ರೊಲ್ ಘಾಲಿನಾತ್ಲೊ, ರಾತಿಂ ನಿದ್ಲ್ಲೆಕಡೆಯೀ ಸೊನಾಲಿಕ್ ಧೊಶಿನಾತ್ಲೊ. ಪುಣ್ ಮಯ್ನ್ಯಾಂತ್ ದೋನ್ ಮಯ್ನ್ಯಾಂತ್ ಏಕ್ ಪಾವ್ಟಿಂ ಪಿಯೆಂವ್ಕ್ ಧರ್ಲ್ಯಾರ್ ಮಾತ್ ಸಾಂಬಾಳ್ನ್ ದವರ್ಲ್ಲೆ ಸಗ್ಳೆ ಪಯ್ಶೆ ಖರ್ಚುನ್ ಕಾಡ್ಟಾಲೊ. ರಾತ್ಭರ್ ಬಾರಾಂತ್ ಪಡೊನ್ ಫಾಂತ್ಯಾಫರಾರ್ ಘರಾ ಯೆತಾಲೊ. ಚಾರ್ ಪಾಂಚ್ ದೀಸ್ ಪಿಯೆವ್ನ್ ಪಿಯೆವ್ನ್ ತಾನ್ ಭಾಗ್ಲಿ ಮ್ಹಣ್ತಾನಾ ಆಪಾಪಿಂ ರ್ವಯ್ತಾಲೊ.
ಹ್ಯಾ ಚಾರ್ ಪಾಂಚ್ ದಿಸಾಂನಿ ಮಾತ್ ತೊ ಸೊನಾಲಿಚೊ ಭೊಂಗೊಸ್ತೊಳ್ ಕರ್ನ್ ಸೊಡ್ಟಾಲೊ. ರಾತಿಚೆಂ ಮಾತ್ ನ್ಹಂಯ್ ದಿಸಾಂಚೆಂ ಸಯ್ತ್ ಸೊನಾಲಿಕ್ ಹಟಾಕ್ ಪಡೊನ್ ಮ್ಹಳ್ಳೆಪರಿಂ ಧೊಸ್ತಾಲೊ. ದೆಖುನ್ ಸೊನಾಲಿ ಆತಾಂತಾಂ ತೊ ಭಿತರ್ ನಿದ್ಲ್ಲೆಪರಿಂಚ್ ಭಯ್ಲ್ಯಾನ್ ದಾರಾಕ್ ಭೀಗ್ ಘಾಲ್ನ್ ವೆತಾಲೆಂ. ತಶೆಂ ಗೆಲ್ಯಾರೀ ಸಾಂಜೆರ್ ತೆಂ ಯೆತಾವರೇಗ್ ತೊ ಉಟಾನಾತ್ಲೊ. ಕೆನ್ನಾಂ ಕೆನ್ನಾಂ ತಾಕಾಚ್ಚ್ ಭಿರ್ಮತ್ ದಿಸ್ತಾಲಿ. ದಿಸಾಚೆಂ ಪಿಯೆವ್ನ್ ಪಾರ್ಲರಾಕ್ ಯೆಂವ್ಚ್ಯಾ ದಾದ್ಲ್ಯಾಂ ಮಧೆಂ ಆನಿ ರಾತಿಕ್ ಪಿಯೆವ್ನ್ ಯೇವ್ನ್ ದಿಸಾಕ್ ಧೊಸ್ಚ್ಯಾ ಘೊವಾ ಮಧೆಂ ಕೆನ್ನಾಂ ಕೆನ್ನಾಂ ಸೊನಾಲಿಕ್ ಕಿತೆಂಚ್ ಫರಕ್ ದಿಸಾನಾತ್ಲೊ. ದೊಗಾಂಕೀ ತೆಂ ಆನಿ ತಾಚಿ ಕೂಡ್ ಏಖ್ ವಸ್ತ್ ಮಾತ್ ಜಾವ್ನ್ ಯೆತಾನಾ ಸೊನಾಲಿಕ್ ಆಪ್ಲ್ಯಾ ಜಲ್ಮಾಚೆರ್ಚ್ ಕಾಂಠಾಳೊ ಸುರು ಜಾಲೊ. ಪುಣ್ ಅಭಯ್ಚೆಂ ಚಿಂತಾನಾ...
ದೆಖುನ್ಂಚ್ ತಾಣೆಂ ಪೋರ್ಟರ್ ಚಾಳ್ ಸೊಡ್ನ್ ಹಾಂಗಾ ಭಾಡ್ಯಾಕ್ ಫ್ಲೇಟ್ ಘೆತ್ಲ್ಲೆಂ. ಚಾಳಿಂತ್ಲ್ಯಾ ಬಾಯ್ಲಾಂಕ್ ಫಕತ್ತ್ ಶೆಜಾರ್ಚಾಂಚೆಂ ಚಾಡಿಯೊ ಉಲಂವ್ಚೆಂಚ್ ಕಾಮ್. ಹಾಂಗಾ ಸೊಸಾಯ್ಟಿಂತ್ ಸಗ್ಳ್ಯಾಂಕ್ ಆಪಾಪ್ಲೆಂ ಮಾತ್ ಪಡೊನ್ ಗೆಲಾಂ. ಕೋಣ್ ಕೊಣಾಚಾ ರಗ್ಳ್ಯಾಂಖ್, ಖಬ್ರೆಕ್ ನಾ.
ದೋನ್ ಮಯ್ನ್ಯಾಂಚಿ ಆವ್ದಿಯೀ ಲಾಂಬ್ಚ್ ಭೊಗುನ್, ಖಾಂದ್ಯಾರ್ ಉಮ್ಕಾಳ್ಚೆಂ ಬ್ಯಾಗ್ಯೀ ಹಾತಾಂತ್ಲೆಂ ಬೀಗ್ಯೀ ಡ್ರೆಸ್ಸಿಂಗ್ ಟೇಬಲಾರ್ ದವರ್ನ್ ಸೊನಾಲಿನ್ ಹಳೂ ಬಾಗ್ವೊನ್ ಗೋಡ್ ನಿದೆಂತ್ ಆಸ್ಚ್ಯಾ ಮಿಥುನಾಚೊ ಕಾನ್ ಚಾಬ್ಲೊ. ತಾಚೆಂ ಸಂಯ್ಬ್ ಚಾಳ್ವತಾನಾ ಚಡ್ಶೆಂ ಮಿಥುನ್ ಅಸಲ್ಯೊ ಕರ್ಕತ್ಯೊ ಕರ್ತಾಲೊ.
ಆಜ್ ಸೊನಾಲಿನ್ ಕೆಲ್ಲೆಂಚ್ ಮಿಥುನ್ ನಿದ್ಲ್ಲೆಕಡೆ ಉಡೋನ್ ಪಡ್ಲೊ. ದೊಳೆ ಘಸ್ಟುನ್ ಸಪ್ಣಾಂತ್ ಭಿಯೆಲ್ಲ್ಯಾ ಬಾಳ್ಶ್ಯಾಪರಿಂ ಉಟೊನ್ ಬಸ್ಲೊ. ದಿಡ್ಕ್ ಕರ್ನ್. ಖಂಡಿತೀ ಅಪ್ಣಾಕ್ ಆರಾವ್ನ್ ಪೊಟ್ಲಿತಾ ಮ್ಹಣ್ ಚಿಂತ್ಲ್ಲ್ಯಾ ಸೊನಾಲಿಕ್ ಮಿಥುನಾಚಾ ದೊಳ್ಯಾಂಚೆಂ ಅಸಮಧಾನ್ ಮರ್ಕ್ಶೆಂ ಭೊಗ್ಲೆಂ.
ತೊ ಉಟೊನ್ ಬಾತ್ರೂಮಾಕ್ ವೆತಾನಾ ಮಾಂಚಾರ್ ತಾಚಾ ಬೊಲ್ಸಾಂತ್ಲಿ ಗಳ್ಲ್ಲಿ ಪೆಕೆಟ್ ಪಳೆವ್ನ್ ಸೊನಾಳಿ ಅನಿಕ್ಯ್ ಅಥೀರ್ ಜಾಲೆಂ. ಚಡುಣೆಂ ತಾಂಚಾಚ್ಚ್ ಪಾರ್ಲರಾಂತ್ ಗ್ರಾಯ್ಕಾಂಕ್ ತಾಣಿಂ ದಿಂವ್ಚ್ಯಾ ಕಾಂಡೊಮಾಂಚಿ ಪೆಕೆಟ್ಚ್ ತಾಂತ್ಲೆ ದೋನ್ ವಾಪಾರ್ಲ್ಲೆ. ಏಕ್ ಉರ್ಲ್ಲೊ.
ಡ್ರೆಸ್ಸಿಂಗ್ ಟೆಬಲಾವಯ್ಲೆಂ ಗೋದ್ರೆಜ್ ಕಂಫೆನಿಚೆಂ ನೋವ್ ಲಿವರಾಚೆಂ ನವಾತಾಲ್ ಬೀಗ್ ತಾಚಾ ಹಾತಾಂತ್ಲ್ಯಾ ಭಿಗ್ಹಾತಾಕ್ ಪಳೆವ್ನ್ ಹೆಡಾಯ್ತಾಶೆಂ ಭೊಗುನ್ ಸೊನಾಲಿ ಮಾಂಚಾರ್ ಕೊಸಾಳ್ಳೆಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
