ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 28. ಕುಡ್ಡೊ ಭಾವಾರ್ಥ್
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಎಕಾ ಗಾಂವಾಂತ್ ಭಿರಾಂಕುಳ್ ಪಾವ್ಸ್ ವೊತ್ಲೊ ಆನಿಂ ಗಾಂವಾಂತ್ ಉದಾಕ್ ಭರೊನ್ ಎಕೆಕ್ಚ್ ಘರಾಂ ಬುಡೊಂಕ್ ಲಾಗ್ಲಿಂ. ಅಶೆಂ ಎಕೆಕ್ಲಿಂಚ್ ಆಪ್ಲ್ಯಾ ಕುಟ್ಮಾಚಾಂಕ್ ಘೆವ್ನ್ ಗಾಂವ್ ಸೊಡುಂಕ್ ಲಾಗ್ಲಿಂ.
ಎಕ್ಲ್ಯಾ ಮನ್ಶಾನ್ ಆಪ್ಲ್ಯಾ ಕುಟ್ಮಾಕ್ ಎಕಾ ಲೊರಿಯೆಚೆರ್ ಚಡವ್ನ್ ಆಪ್ಲ್ಯಾ ಸೆಜಾರ್ಯಾಲಾಗಿಂ ವಚೊನ್ ಆಪ್ಣಾಸವೆಂ ಯೇಂವ್ಕ್ ವಿಚಾರ್ ಕೆಲೊ; "ಉದಾಕ್ ಚಡ್ಲಾಂ ಆನಿಂ ಘರಾಂ ಭುಡೊಂಕ್ ಲಾಗ್ಲ್ಯಾಂತ್ ದೆಖುನ್ ತುಂ ತುಜಾ ಕುಟ್ಮಾಕ್ ಘೆವುನ್ ಆಮ್ಚೆಸವೆಂ ಯೇ. ಆಮಿಂ ಶ್ಯಾಭೀತಾಯೆನ್ ಬರ್ಯಾ ಗಾಂವಾಕ್ ಯಾ"
"ನಾಂ" ಜಾಪ್ ದಿಲಿ ಸೆಜಾರ್ಯಾನ್, "ಹಾಂವ್ ವೆಚೊನಾ, ಹಾಂವ್ ಎಕಾ ನೀಜ್ ದೆವಾಚೆರ್ ಪಾತ್ಯೆಣಿ ದವರ್ತಾಂ ಆನಿಂ ತೊ ಖಂಡಿತ್ ಜಾವ್ನ್ ಆಮ್ಕಾಂ ರಾಕ್ತಲೊ."
ಪಾವ್ನ್ ಅಜೂನ್ಯ್ ಉಣೊ ಜಾಲೊನಾ ದೆಕುನ್ ಉದಾಕ್ ಚಡೊನ್ ಆಯ್ಲೆಂ. ಆನಿಂ ಆತಾಂ ಹೊ ಭಾವಾರ್ಥಿ ಆಪ್ಲ್ಯಾ ಕುಟ್ಮಾಕ್ ಘೆವ್ನ್ ಆತಾಂ ಘರ್ಚಾ ಮಾಳಿಯೆರ್ ಚಡ್ಲೊ. ತವಳ್ ಭಾಯ್ರ್ ಥಾವ್ನ್ ಬಾಚಾವಿ ಕರ್ಚೊ ಪಂಗಡ್ ಆಯ್ಲೊ ಆನಿಂ ಮೈಕಾರ್ ಲೊಕಾಂಕ್ ಉಲೊ ದೀವ್ನ್ ಕೊಣಾಕ್ ಕುಮೊಕ್ ಜಾಯ್ ತಾಣಿಂ ಯೇವ್ನ್ ತಾರ್ವಾರ್ ಬೊಸ್ಯೆತ್ ಮ್ಹಣೊನ್ ಸಾಂಗಾಲಾಗ್ಲೊ.
"ನಾ" ಮ್ಹಣಾಲೊ ಭಾವಾರ್ಥಿ, "ಮ್ಹಜೊ ಭಾವಾರ್ಥ್ ಭಳಿಷ್ಟ್! ದೇವ್ ಮ್ಹಾಕಾ ಆನಿಂ ಮ್ಹಜಾ ಕುಟ್ಮಾಕ್ ಕಿತೆಂಚ್ ಬಾದಕ್ ಜಾಂವ್ಕ್ ಸೊಡಿಸೊನಾ, ದೆಕುನ್ ಹಾಂವ್ ಯೆಂವ್ಚೊನಾ"
ಪುಣ್ ಪಾವ್ಸ್ ಉಣೊ ಜಾಲೊಚ್ ನಾ. ಉದಾಕ್ ಚಡ್ಲೆಂಚ್ ಆನಿಂ ತಿತ್ಲ್ಯಾರ್ ಥೊಡೆ ಎಕಾ ಹೆಲಿಕೋಪ್ಟರಾರ್ ಹಾಚಾ ಘರಾ ವಯ್ಲ್ಯಾನ್ ಉಭೊನ್ ವೆಚೆ ದಿಸ್ಲೆ. ತಾಣಿಂ ಏಕ್ ನಿಸಣ್ ದೆಂವಯ್ಲಿ ಆನಿಂ ಭಾವಾರ್ಥಿಕ್ ಉಲೊ ದೀಂವ್ಕ್ ಲಾಗ್ಲೆ "ಭಿಯೆಕಾನಾ! ತುಂ ತುಜಾ ಕುಟ್ಮಾಸವೆಂ ಹ್ಯಾ ನಿಸಣೆರ್ ಚಡೊನ್ ಯೇ, ಆಮಿಂ ತುಕಾ ಸಾಂಭಾಳ್ತಾಂವ್"
ಪುಣ್ "ನಾ, ಹಾಂವ್ ಭಿಂಯೆನಾ! ಹಾಂವ್ ಫಕತ್ತ್ ದೆವಾಕ್ ಪಾತ್ಯೆತಾಂ. ಆನಿಂ ತೊ ಮ್ಹಾಕಾ ಖಂಡಿತ್ ರಾಕೊನ್ ವರ್ತಲೊ. ಆಮಿಂ ಹಾಂಗಾ ಥಾವ್ನ್ ಖಂಯ್ಸರ್ಯ್ ವೆಚೆನಾಂವ್"
ಅಶೆಂ ಪಾವ್ಸ್ ಚಡ್ಲೊಚ್ ಆನಿಂ ಭಾವಾರ್ಥಿ ಆಪ್ಲ್ಯಾ ಕುಟ್ಮಾಸವೆಂ ಬುಡ್ಲೊ ಆನಿಂ ಮೆಲೊ.
ಅಶೆಂ ಸರ್ಗಾಕ್ ಗೆಲ್ಲೊ ತೊ ಭಾವಾರ್ಥಿ ದೆವಾ ಮುಖಾರ್ ಉಭೊ ರಾವೊನ್ ವಿಚಾರಿಲಾಗ್ಲೊ; "ದೆವಾ! ಹಾಂವ್ ತುಕಾಚ್ ಪಾತ್ಯೆಲೊಂ, ತುಂ ಮ್ಹಾಕಾ ಆನಿಂ ಮ್ಹಜಾ ಕುಟ್ಮಾಕ್ ರಾಕ್ತಲೊಯ್ ಮ್ಹಣೊನ್ ಭರ್ವಸ್ಲೊಂ. ಪುಣ್ ತುವೆಂ ಆಮ್ಕಾಂ ಅಶೆಂ ಕಿತ್ಯಾಕ್ ಸಾಂಡುನ್ ಘಾಲೊಯ್ ದೆವಾ? ಕಿತ್ಯಾಕ್ ಆಮ್ಕಾಂ ರಾಕ್ಲೆಂನಾಂಯ್?"
ದೆವಾನ್ ತಾಕಾ ಜಾಪ್ ದಿಲಿ; "ತುಕಾ ಹಾವೆಂ ಏಕ್ ಲೊರಿ, ಏಕ್ ತಾರುಂ ಆನಿಂ ಏಕ್ ಹೆಲಿಕೋಪ್ಟರ್ ಧಾಡ್ಲೆಂ ಸಯ್ತ್. ಪುಣ್ ತುಂ ಕಿತ್ಯಾಕ್ ಆನಿ ಕೊಣಾಕ್ ರಾಕೊನ್ ಆಸ್ಲ್ಲೊಯ್?"
ಸಂದೇಶ್: ಸಭಾರ್ ಪಾವ್ಟಿಂ ಆಮಿಂ ಆಮ್ಕಾಂಚ್ ಶ್ರೇಷ್ಟ್ ಮ್ಹಣೊನ್ ಲೆಖ್ತಾಂವ್ ಆನಿಂ ಅಶಿ ಆಮ್ಚಿ ದೀಷ್ಟ್ ಕುಡ್ಡಿ ಜಾತಾ. ದೇವ್ ಜಾಯ್ತ್ಯಾ ರಿತಿಂನಿ ಆಮ್ಚೆ ಮುಖಾರ್ ಯೆತಾ ತರ್ಯ್ ಆಮ್ಚಾ ದೊಳ್ಯಾಂಕ್ ತೊ ದಿಸಾನಾ. ಅಶೆಂ ಆಸ್ತಾನಾ ಆಮಿಂ ಭಾವಾರ್ಥಿ ವ್ಹಯ್ ಪುಣ್ ಸಭಾರ್ ಪಾವ್ಟಿಂ ಆಮ್ಚಿ ದೀಷ್ಟ್ ಕುಡ್ಡಿ ನ್ಹಯ್ಗೀ?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
