ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪಾಂಚ್ ಲಿಪಿಯಾಂನಿ ಕೊಂಕ್ಣಿ ಬರಯ್ತಾತ್; ರೋಮಿ (ಗೊಯಾಂ), ದೇವ್ನಾಗರಿ (ರತ್ನಗಿರಿ), ಕಾನಡಿ (ಮಂಗ್ಳುರ್), ಉರ್ದು (ಭಟ್ಕಳ್) ಆನಿ ಮಲಯಾಳಂ (ಕೊಚ್ಚಿನ್)
ಕೊಂಕ್ಣಿ ಭಾಶೆಕ್ ಏಕ್ ಲಿಪಿ?
- ಡಾ|ಎಡ್ವರ್ಡ್ ನಜ್ರೆತ್
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005 ಹಾಂತುಂ ದುಸ್ರೆಂ ಇನಾಮ್ ಜೊಡ್ಲ್ಲೆಂ ಲೇಖನ್]
ಕೊಂಕ್ಣಿ ಭಾಶೆಕ್ ಲಗ್ತಿ ಕಿತೆಂಯ್ ಸಮ್ಮೇಳ್ ಆಸೊಂ, ವಿಚಾರ್ಸಾತಿಂ ಆಸೊಂ ಥಂಯ್ ’ಕೊಂಕ್ಣೆಕ್ ಆಪ್ಣಾಚಿ ಲಿಪಿ ನಾ’ ಮ್ಹಳ್ಳಿ ಏಕ್ ಬೆಜಾರಾಯ್ ಆನಿ ತ್ಯಾ ಖಂತಿಕ್ ಆಪ್ಣಾಕ್ ಸಾರ್ಕೊ ದಿಸ್ಚೊ ಏಕ್ ಪರಿಹಾರ್ ಸುಚಾಂವ್ಚೊ ಚಡ್ತಾವ್ ಭಾಷಣ್ಗಾರಾಂಕ್ ಉಲಂವ್ಕ್ ಶಾಶ್ವಿತ್ ಏಕ್ ಗಜಾಲ್ಶಿ ಜಾಲ್ಯಾ. ಕೊಂಕ್ಣಿಕ್ ದೇವ್ನಾಗರಿ ಲಿಪಿ ಜೊಕ್ತಿ ಆನಿ ತಿ ಸರ್ವಾಂನಿ ಮಾನುನ್ ಘೆಜೆ ಮ್ಹಣ್ ಸಾಂಗ್ಚೆಂಚ್ ಚಡ್. ತ್ಯಾ ಉಪ್ರಾಂತ್ ಕೊಂಕ್ಣಿಕ್ ದೇವ್ನಾಗರಿ ಲಿಪಿ ಮ್ಹಣ್ ಸರ್ವಾಂನಿ ಮಾನುನ್ ಘೆಂವ್ಚ್ಯಾಕ್ ಠರಾವ್ ಮಾಂದ್ಚೆಂ ಆನಿ ಅನ್ಯೇಕ್ ತಸಲೊ ಸಂದ್ರಾಪ್ ಯೆತಾ ಪರ್ಯಾಂತ್ ತೆಂ ವಿಸ್ರೊನ್ ಸೊಡ್ಚೆಂ ಪಾಟ್ಲ್ಯಾ ಜಾಯಿತ್ತ್ಯಾ ವರ್ಸಾಂಥಾವ್ನ್ ಚಲೊನ್ ಆಯ್ಲಾಂ. ಪುಣ್ ಕೊಂಕ್ಣಿಚ್ಯಾ ಜೆರಾಲ್ ಪರಿಗತೆಂತ್ ವಾಸ್ತವಿಕ್ ಜಾವ್ನ್ ಕಿತೆಂಯ್ ಬದ್ಲಾಪ್ ಜಾಲ್ಲೆಂ ನಾ.
ಕೊಂಕ್ಣಿಕ್ ಅತಾಂ ವಾಪುರ್ಚೆಪರಿಂ ಚ್ಯಾರ್-ಪಾಂಚ್ ಲಿಪಿಂ ಬದ್ಲಾಕ್, ಏಕ್ ಲಿಪಿ ಜ್ಯಾರಿಯೆಕ್ ಆಯ್ಲ್ಯಾರ್ ಬರೆಂ ಮ್ಹಣ್ ದಿಸ್ಚೆಂ ವಯ್ಲ್ಯಾಬಾರ್ ಅಸ್ವಾಭಾವೀಕ್ ನ್ಹಯ್. ಸರ್ವ್ ಕೊಂಕ್ಣಿ ಲೊಕಾನ್ ಏಕ್ಚ್ ಲಿಪಿ ಆಪ್ಣಾಯ್ಲ್ಯಾರ್ ಆಮ್ಚೆ ಮಧೆಂ ಎಕ್ವಟ್ ಜಾತಲೊ, ಆಮಿಂ ಏಕ್ ಸಮಾಜ್ ಜಾತೆಲ್ಯಾಂವ್, ತ್ಯಾ ವರ್ವಿಂ ಆಮ್ಚೆಂ ಬಳ್ ವ್ಹಾಡ್ತೆಲೆಂ ಮ್ಹಣ್ ಥೊಡ್ಯಾಂಕ್ ಭೊಗ್ಲ್ಲೆಂಚ್ ಚೂಕ್ ಮ್ಹಣೊಂಕ್ ಜಾಯ್ನಾ. ಥೊಡೆ ಕೊಂಕ್ಣಿ ಬರಯ್ಣಾರ್ಯೀ ಆಪ್ಣೆಂ ಬರಯಿಲ್ಲೆಂ ಗೊಂಯ್ಕಾರ್, ಮುಂಬಯ್ಕಾರ್ ಆನಿ ಕೇರಳಾಂತ್ಲೊ ಕೊಂಕ್ಣಿ ಲೋಕ್ ವಾಚಿತ್ ತರ್ ವಾಚ್ಪಿ ಚಡ್ಲ್ಲೆಪರಿಂ ಜಾಯ್ತ್ ಆನಿ ಥಂಯ್ಚ್ಯಾ ಬರಯ್ಣಾರಾಂನಿ ಬರಯಿಲ್ಲೆಂ ಥಂಯ್ಚ್ಯಾ ಪತ್ರಾಂನಿ ಆಯಿಲ್ಲೆಂ ವಾಚುಂಕ್ ಜಾಯ್ತ್ ತರ್ ಆಮ್ಕಾಂ ಕೊಂಕ್ಣಿಂತ್ ಜಾಯಿತ್ತೆಂ ವಾಚುಂಕ್ ಜಾತೆಲೆಂ. ಲಿಪಿವರ್ವಿಂ ಆಮ್ಚೆ ಮಧೆಂ ಉಬ್ಜಲ್ಲೆ ಪಾಗೊರ್ ಕೊಸ್ಳೊನ್ ವೆತಲೆ. ಕೊಂಕ್ಣಿ ಲೋಕ್ ಖಂಡಿತ್ ಏಕ್ ಸಮಾಜ್ ಜಾತೆಲ್ಯಾಂವ್ ಮ್ಹಣ್ ಥೊಡ್ಯಾಂನಿ ವಾದ್ ಮಾಂಡ್ಲ್ಲೊಯ್ ಆಸಾ.
ಪುಣ್ ಆಶೆಂ ಚಿಂತುಂಕ್ - ಉಲಂವ್ಕ್ ಕಿತ್ಲೆಂ ಸಲೀಸ್, ವಾಸ್ತವೀಕ್ ಪರಿಗತ್ ತಿತ್ಲಿಚ್ ಸಂಕೀರ್ಣ್. ಏಕ್ ಲಿಪಿ ಆಪ್ಣಾಯಿಲ್ಲ್ಯಾನ್ ಕೊಂಕ್ಣಿ ಭಾಶೆಚೆಂ ಸಾಲ್ವಾಸಾಂವ್ ಜಾಯ್ನಾ ಮ್ಹಳ್ಳ್ಯಾಕ್ ಜಾಯಿತ್ತೆ ರುಜ್ವಾತ್ಯೊ ದಿವ್ಯೆತಾ. ಕೊಂಕ್ಣಿ ತಸಲಿ ಭಾಸ್ ಉರಜಯ್ ಆನಿ ವಾಡಜಯ್ ತರ್ ತಿಕಾ ಹರ್ ಲಿಪಿಯೆಂತ್ ವಾಡೊಂಕ್ ಅವ್ಕಾಸ್ ಕರ್ನ್ ದೀಂವ್ಕ್ ಜಾಯ್; ಲೊಕಾಂ ಮಧೆಂ ಎಕ್ವಟಾಕ್ ಲಿಪಿ ಸೊಡ್ನ್ ಹೆರ್ ಕಿತೆಂಯ್ ಗಜಾಲಿ ವಾಪ್ರುಂಕ್ ಜಾಯ್.
ಲಿಪಿವಿಶಿಂ ಉಮಾಳೆ ನಾಕಾತ್:
ಲಿಪಿ ಭಾಸ್ ಬರೊಂವ್ಕ್ ಏಕ್ ಸಾಧನ್, ಏಕ್ ಸಂಕೇತ್, ಏಕ್ ಮಾಧ್ಯಮ್. ಲಿಪಿಯೆಚೊ ಆನಿ ಪವಿತ್ರ್ಪಣಾಚೊ ಕಾಂಯ್ ಸಂಬಂಧ್ ನಾ. (ದೇವ್ನಾಗರಿ ದೆವಾಚಿ ಲಿಪಿ ನ್ಹಯ್) ಎಕೆ ಭಾಶೆಕ್ ಎಕ್ಚ್ ಲಿಪಿ ವಾಪಾರುಂಕ್ ಜಾಯ್ ಆಸೊ ಕಿತೆಂಯ್ ನೇಮ್ ವಾ ಕಾಯ್ದೊ ನಾ. ಆಪ್ಲಿ ಭಾಸ್ ಬರೊಂವ್ಕ್ ಆಪ್ಣಾಕ್ ಜಾಯ್ ತಿ ಲಿಪಿ ವಾಪರ್ಚೊ ಅಧಿಕಾರ್ ಆನಿ ಸ್ವಾತಂತ್ರ್ ಲೊಕಾಕ್ ಆಸಾ. ದಾಕ್ಲ್ಯಾಕ್ ಸಿಂಧಿ ಭಾಶೆಕ್ ಬ್ರಿಟಿಷಾಂಚ್ಯಾ ಕಾಳಾರ್ ಥಾವ್ನ್ ಪಾರ್ಶಿ-ಅರ್ಬಿ ಲಿಪಿ ವಾಪಾರ್ತಾಲೆ. ಸ್ವಾತಂತ್ರಾ ಉಪ್ರಾಂತ್ ಭಾರತ್ ಸರ್ಕಾರಾನ್ ಸಿಂಧಿ ಭಾಶೆಕ್ ದೇವ್ನಾಗರಿ ಲಿಪಿ ಅಧಿಕ್ರತ್ ಕರುಂಕ್ ಪ್ರಯತ್ನ್ ಕೆಲೆಂ. ಪೂಣ್ ಲೊಕಾನ್ ಸರ್ಕಾರಾಚೊ ನಿರ್ಧಾರ್ ಮಾನುನ್ ಘೆತ್ಲೊ ನಾ. ಪ್ರಸ್ತುತ್ ಸಿಂಧಿ ಭಾಶೆಕ್ ಪಾರ್ಶಿ-ಅರ್ಬಿ ಆನಿಂ ದೇವ್ನಾಗರಿ ಹ್ಯೊ ದೋನ್ ಲಿಪಿಯೊ ಆಸಾತ್. ಸಿಂಧಿ ಲೊಕಾ ಮಧೆಂ ಪಾರ್ಶಿ-ಅರ್ಬಿ ಲಿಪಿಚ್ ಲೊಕಾಮೊಗಾಳ್ ಜಾವ್ನ್ ಉರ್ಲ್ಯಾ.
ಸರ್ವ್ ಕೊಂಕ್ಣಿ ಲೊಕಾಕ್ ಏಕ್ ಕರ್ಚ್ಯಾಕ್ ಭಾಶೆಕ್ ದೇವ್ನಾಗರಿ ಲಿಪಿಚ್ ಜೊಕ್ತಿ ಮ್ಹಳ್ಳೊ ವಾದ್ ಆಸಾ, ಹೊ ವಾದ್ ಕೊಂಕ್ಣಿಚ್ಯಾ ಸುರ್ವಿಲ್ಯಾ ಜಮಾತೆಂನಿಯ್ ಆಯ್ಕೊಂಕ್ ಮೆಳ್ಳಾ. ಹ್ಯಾ ಪಯ್ಲೆಂಚ್ಯಾ ಥೊಡ್ಯಾ ಸಾಹಿತಿಂನಿ ಹಾಕಾ ಪಾಟಿಂಬೊ ದಿಲಾ. ತವಳ್ ಥಾವ್ನ್ ಕೊಂಕ್ಣಿ ಭಾಶೆಕ್ ಏಕ್ ಲಿಪಿ ಹಾಡ್ಚೆಂ ಪ್ರಯತ್ನ್ ಫಕತ್ ವಿಚಾರ್-ಸಾತ್ಯಾಂನಿ ಆನಿ ನೆಮಾಳ್ಯಾಂನಿ ಪ್ರಗಟ್ಲ್ಲ್ಯಾ ಲೇಖನಾಂನಿ ಮಾತ್ರ್ ಜಾಲಾಂ. ಪಾಟಿಂಬೊ ದಿಲ್ಲ್ಯಾ ಸಾಹಿತಿಂನಿ ಜಾಂವ್, ಪತ್ರಾಂಚ್ಯಾ ಸಂಪಾದಕಾಂನಿ ಜಾಂವ್ ದೇವ್ನಾಗರಿ ಲಿಪಿ ಪ್ರಚಾರ್ ಕರ್ಚ್ಯಾಕ್ ಪ್ರಾಮಾಣಿಕ್ ಪ್ರಯತ್ನ್ ಕರುಂಕ್ ನಾ. ಕೇಂದ್ರ್ ಸಾಹಿತ್ಯ್ ಆಕಾಡೆಮಿನ್ ಕೊಂಕ್ಣಿಕ್ ಮಾನ್ಯತಾಯ್ ದಿತಾನಾ ವಾ ತಿಕಾ ಅಟ್ವೆ ವೊಳೆರಿಂತ್ ಮೆಳಯ್ತಾನಾ ಲಿಪಿಚೊ ಉಲ್ಲೇಕ್ ಕೆಲ್ಲೊ ನಾ. ಪೂಣ್ ಕೇಂದ್ರ್ ಸಾಹಿತ್ಯ್ ಆಕಾಡೆಮಿಚ್ಯೊ ಪ್ರಶಸ್ತ್ಯೊ ಫಕತ್ತ್ ದೇವ್ನಾಗರಿಂತ್ಲ್ಯಾ ಸಾಹಿತ್ಯಾಕ್ ಮಾತ್ರ್ ದೀವ್ನ್ ಆಯ್ಲ್ಯಾತ್. ಆಶೆಂ ಮಾನ್ಯತೆಯೆಚಾ ಸುರ್ವಾತೆ ಥಾವ್ನ್ ದೇವ್ನಾಗರಿಚ್ಯಾ ನಾಂವಾರ್ ಹೆರ್ ಲಿಪಿಯೆಂತ್ಲ್ಯಾ ಸಾಹಿತ್ಯಾಕ್ ಕೊನ್ಶಾಕ್ ಲೊಟ್ಚೆಂ ಪ್ರಯತ್ನ್ ಮಾತ್ರ್ ಜಾಯಿತ್ತ್ ಆಸಾ. ಹೆಂ ಕೊಂಕ್ಣಿ ಸಾಹಿತ್ಯ್ ಸಮಾಜೆಕ್ ಮನಾಂ ದುಕಂವ್ಕ್ ಕಾರಣ್ ಜಾಲಾಂ.
ದೇವ್ನಾಗರಿ ಲಿಪಿ ಕೊಂಕ್ಣಿಚ್ ’ಸಂಯ್ಬಿಕ್ ಲಿಪಿ’ ಮ್ಹಣ್ ಹೆರ್ ಥೊಡೆ ವಾದ್ ಕರ್ನ್ ಆಸಾತ್. ಭಾಸ್ವಿಜ್~ಜಾನಾಂತ್ ’ಸಂಯ್ಬಿಕ್ ಲಿಪಿ’ ಹಿ ಕಲ್ಪನಾಂಚ್ ನಾ. ಎಕೆ ಭಾಶೆ ಖಾತಿರ್ ಏಕ್ ಖಾಸ್ ಲಿಪಿ ಘಡಯ್ಲ್ಯಾ ಜಾಲ್ಯಾರ್ ತಿ ಲಿಪಿ ತೆ ಭಾಶೆಚಿ ’ನಿಜಾಚಿ ಲಿಪಿ’ ಮ್ಹಣ್ಯೆತಾ. ದಾಖ್ಲ್ಯಾಕ್ ಕನ್ನಡ್ ಲಿಪಿ ಕನ್ನಡ್ ಭಾಶೆ ಖಾತಿರ್ ಘಡ್ಲ್ಯಾ. ತಮಿಳ್ ಲಿಪಿ ತಮಿಳ್ ಭಾಶೆ ಖಾತಿರ್ ತಯಾರ್ ಕೆಲ್ಯಾ. ಪೂಣ್ ಕೊಂಕ್ಣಿ ಭಾಶೆಕ್ ಲಿಪಿಚ್ ನಾ. ದೇವ್ನಾಗರಿ ಲಿಪಿ ಕೊಂಕ್ಣಿ ಖಾತಿರ್ ತಯಾರ್ ಕೆಲ್ಲಿ ನ್ಹಯ್, ಜಾಲ್ಲ್ಯಾನ್ ತಿ ಕೊಂಕ್ಣಿ ಭಾಶೆಚ್ ನಿಜಾಚಿ ಲಿಪಿ (ವಾ ಸಂಯ್ಬಿಕ್ ಲಿಪಿ) ಜಾಯ್ನಾ.
ಲಿಪಿ ಲೊಕಾಕ್ ಎಕ್ವಟಾಯ್ನಾ:
ಏಕ್ ಲಿಪಿ ಲೊಕಾಂ ಮಧೆಂ ಎಕ್ವಟ್ ಹಾಡಿನಾ. ಬಗಾರ್ ಲೊಕಾನ್ ವಾಪಾರ್ನ್ ಆಯಿಲ್ಲಿ ಲಿಪಿ ಕೊನ್ಶ್ಯಾಕ್ ಲೊಟ್ಲಿ ತರ್, ತ್ಯಾ ಲೊಕಾಂ ಮಧೆಂ ಭಾಸ್ ಹಳ್ತಾನ್ ಅಸ್ವಸ್ತ್ ಜಾತಾ ಮ್ಹಳ್ಳ್ಯಾಕ್ ಕೊಂಕ್ಣಿಚೆಂ ಕುಳಾರ್ ಮ್ಹಣ್ತಾತ್ ತ್ಯಾ ಗೊಂಯಾತ್ಲಿ ಪ್ರಸ್ತುತ್ ಪರಿಗತ್ ಸ್ವಷ್ಟ್ ಕರ್ತಾ.
ಗೊಂಯಾಂತ್ ಕೊಂಕ್ಣಿ ಲೊಕಾಕ್ ಆಮಿಂ ತೀನ್ ವಾಂಟೆ ಕರ್ನ್ ಪಳಯ್ವೆತಾ. ದೇವ್ನಾಗರಿ ವಾಪುರ್ಚೆ ಸಾರಸ್ವತ್, ಮರಾಠಿ ತೆವ್ಶಿಂ ಮಾಲ್ವೊನ್ ಆಸ್ಚೊ ಬಹುಜನ್ ಸಮಾಜ್(ವಾ ಹಿಂದೂ ಲೋಕ್) ಆನಿ ಕೊಂಕ್ಣಿಕ್ ರೊಮಿ ವಾಪುರ್ನ್ ಆಸ್ಚೆ ಕ್ರಿಸ್ತಾಂವ್. (ಆಶೆಂ ವಿಂಗಡ್ ಕರ್ಚೊ ಜಾತೀಯ್ ವಾದ್ ನ್ಹಯ್, ಗೊಂಯ್ಚಿ ವಾಸ್ತವೀಕ್ ಪರಿಗತ್ ತಶಿ).
ಸೊಳಾವ್ಯಾ ಶೆಕ್ಡ್ಯಾಂತ್ ಗೊಂಯಂಯ್ ಆಯ್ಲಲ್ಯಾ ಫ್ರಾನ್ಸಿಸನ್ ಆನಿ ಜೆಜ್ವಿತ್ ಮಿಶನರಿಂನಿ ಬರೊಂವ್ಚಿ ಸುರ್ವಾತ್ ಕೆಲಿ.
೧೫೫೬ ಇಸ್ವೆಂತ್ ಗೊಂಯಾಂತ್ ಛಾಪ್ಖಾನೊ ಜೆಜ್ವಿತಾಂನಿ ಸುರು ಕೆಲೊ ಆನಿ ತಾಂಚೆಕಡೆ ಭಾರತೀಯ್ ಭಾಸಾಂಚೆ ಖಿಳೆ ನಾತ್ಲ್ಲ್ಯಾನ್ ಕೊಂಕ್ಣಿ ಛಾಪುಂಕ್ ತಾಂಣಿ ರೊಮಿ ಲಿಪಿ ವಾಪರ್ಲಿ. ಧಾರ್ಮಿಕ್ ಆನಿ ದೊತೊರ್ನಿಚಿಂ ತಶೆಂ ಕೊಂಕ್ಣಿ ಭಾಸ್ ಆನಿ ವ್ಯಾಕರಣ್ ಲಗ್ತಿ ಪುಸ್ತಕಾಂ ತಾಂಣಿಂ ರೊಮಿಂತ್ ಛಾಪ್ಲ್ಲ್ಯಾನ್ ಕ್ರಿಸ್ತಾಂವಾಂ ಮಧೆಂ ರೊಮಿ ಲಿಪಿ ಕೊಂಕ್ಣೆಚಿ ಲಿಪಿ ಜಾವ್ನ್ ಆಯ್ಲಿ. ತವಳ್ ಥಾವ್ನ್ ಕ್ರಿಸ್ತಾಂವಾಂಚೆ ಧಾರ್ಮಿಕ್ ಕಾರ್ಯಾವೆಳೆಂಚೆ ಬೂಕ್ ಕೊಂಕ್ಣೆಂತ್ ಆಸಾತ್, ತಾಂಚ್ಯಾ ಸದಾಂಚ್ಯಾ ಕೊಂಕ್ಣಿ ವಾಪಾರಾಂತ್ ರೊಮಿಂಚ್ ಚಾಲ್ತೆರ್ ಆಸಾ.
ಗೊಂಯಾಂತ್ ಚಡಾವತ್ ಸಾರಸ್ವತ್ ಲೋಕ್ ಕೊಂಕ್ಣಿ ಬರೊಂವ್ಕ್ ದೇವ್ನಾಗರಿ ವಾಪಾರ್ತಾತ್. ಪುಡ್ತುಗೆಜಾಂ ಥಾವ್ನ್ ಗೊಂಯಾಂಕ್ ಸುಟ್ಕಾ ಜೊಡ್ತಾನಾ ಆನಿ ಉಪ್ರಾಂತ್ ಮರಾಠಿ ವಿರೋಧ್ ಝುಜೊನ್ ಗೊಂಯ್ ರಾಜ್ ಜಾತಾನಾ ಗೊಂಯ್ಚ್ಯಾ ಕ್ರಿಸ್ತಾಂವಾಂಕ್ ಸಾರಸ್ವತಾಂ ಥಾವ್ನ್ ಪಯ್ಸ್ ರಾವೊಂಕ್ ನಾಕಾ ಆಸ್ಲ್ಲೆಂ. ತ್ಯಾ ಕಾಳಾಚಿ ರಾಜಕೀಯ್ ಪರಿಗತ್ ತಶಿ ಆಸ್ಲ್ಲಿ. ತವಳ್ ಲಿಪಿಯೆ ತಸಲಿ ಗಜಾಲ್ ಘೆವ್ನ್ ಝುಜ್ಚ್ಯಾ ಪ್ರಾಸ್ ಗೊಂಯಾಂಕ್ ಆಪ್ಲೆಂ ಅಸ್ತಿತ್ವ್ ಪಾಚಾರ್ಚೆಂ ಚಡ್ ಗರ್ಜೆಚೆಂ ಆಸ್ಲ್ಲೆಂ. ತ್ಯಾ ಪರಿಗತೆಂತ್ ವಿದೇಶಿ ಲೊಕಾಥಾವ್ನ್ ಮೆಕ್ಳೆ ಜಾತಾನಾ ತಾಂಚ್ಯಾ ಭಾಶೆಚಿ ಲಿಪಿ ಆಪ್ಣಾಕ್ ಜಾಯ್ ಮ್ಹಣ್ ಹಟ್ ಧರ್ಚೆಂ ಕ್ರಿಸ್ತಾಂವಾಂಕ್ ಸಾದ್ಯ್ ನಾತ್ಲ್ಲೆಂ. ಮಾತ್ರ್ ನ್ಹಯ್ ರೊಮಿ ಲಿಪಿ ಸೊಡ್ಲ್ಯಾರ್ ಆಪ್ಣೆಂ ಸಾಂಬಾಳ್ನ್ ಹಾಡ್ಲ್ಲೆ ಭಾಶೆಚೆರ್ ಆನಿ ಸಾಹಿತ್ಯಾಚೆರ್ ಕಿತೆಂ ವಾಯ್ಟ್ ಪರಿಣಾಮ್ ಜಾಯ್ತ್ ಮ್ಹಳ್ಳ್ಯಾಚೊಯ್ ತಾಂಕಾಂ ಜೋಪ್ ನಾತ್ಲ್ಲೊ. ಗೊಂಯ್ಚ್ಯಾ ಕೊಂಕ್ಣಿ ಚಳ್ವಳೆಂತ್ ಹರ್ದೆಂ ಮುಕಾರುನ್ ವಚೊನ್ ಆಪ್ಲೊ ಪ್ರಾಣ್ ಸಯ್ತ್ ಗೊಂಯ್ಚ್ಯಾ ಕ್ರಿಸ್ತಾಂವಾಂನಿ ಬಲಿ ದಿಲ್ಲೊ. (ಚಳ್ವಳೆಂತ್ ಮಾಡ್ತಿರ್ ಮೆಲ್ಲೆ ಕ್ರಿಸ್ತಾಂವ್ ಮಾತ್ರ್!) ಗೊಂಯ್ ರಾಜಾಚೆಂ ವಿಂಗಡ್ ಅಸ್ತಿತ್ವ್ ಪಾಚಾರ್ಚೆ ಖಾತಿರ್ ಗೊಂಯ್ ರಾಜಾಚಿ ಭಾಸ್ ಕೊಂಕ್ಣಿ ಮ್ಹಣ್ ಮಾನುನ್ ಘೆತ್ಲೆಂ. ತಿತ್ಲೆಂಚ್ ಪಾವ್ತೆಂ. ಪುಣ್ ಸಾರಸ್ವತಾಂನಿ ಭಾಶೆಚೆಂ ಕಾನೂನ್ ಕರ್ತಾನಾ ’ಕೊಂಕ್ಣಿ ಮ್ಹಳ್ಯಾರ್ ದೇವ್ನಾಗರಿಂತ್ ಆಸ್ಚಿ ಕೊಂಕ್ಣಿ’ ಮ್ಹಣ್ ಭಾಶೆಕ್ ’ಲಿಪಿ’ ಭರ್ಶಿಲಿ.
ಆಶೆಂ ಗೊಂಯಾಂತ್ ’ದೇವ್ನಾಗರಿಂತ್ಲಿ ಕೊಂಕ್ಣಿ’ ಮಾತ್ರ್ ’ಕೊಂಕ್ಣಿ’ ಜಾಲಿ! ಶಾಳೆಂನಿ ತಿ ಶಿಕಂವ್ಕ್ ಸುರು ಕೆಲಿ. ಸರ್ಕರಾನ್ ಆಪ್ಲಿ ಅಧಿಕ್ರತ್ ಭಾಸ್ ’ದೇವ್ನಾಗರಿಂತ್ಲಿ ಕೊಂಕ್ಣಿ’ ಮ್ಹಣ್ ಜಾಹೀರ್ ಕೆಲ್ಯಾರ್ಯಿ ಸರ್ಕಾರಿ ಇಸ್ಕೊಲಾಂನಿ ಕೊಂಕ್ಣಿಕ್ ಫಾವೊ ತೊ ಜಾಗೊ ಮೆಳ್ಳೊ ನಾ. ಆತಾಂ ಥಂಯ್ಚ್ಯಾ
ಫಕತ್ 9 ಠಕ್ಕೆ ಪ್ರಾಸ್ ಉಣ್ಯಾ ಸರ್ಕಾರಿ ಪ್ರಾಥಮಿಕ್ ಇಸ್ಕೊಲಾಂನಿ ಕೊಂಕ್ಣಿ ಮಾಧ್ಯಮ್ ಜಾವ್ನ್ ಶಿಕಯ್ಲ್ಯಾರ್,
21% ಸರ್ಕಾರಿ
ಹೈಸ್ಕೂಲಾಂನಿ ಮಾತ್ರ್ ಕೊಂಕ್ಣಿ ತಿಸ್ರಿ ಭಾಸ್ ಜಾವ್ನ್ ಘೆವ್ಯೆತಾ! ಉರ್ಲ್ಲ್ಯಾ ಸರ್ವ್ ಶಾಳೆಂನಿ ಮರಾಠಿ ಮಾಧ್ಯಮ್ಂಚ್ ಆಸಾ. ಗೊಂಯ್ಚ್ಯಾ ಲೊಕಾಕ್, (ಚಡ್ ಕರ್ನ್ ಕೊಂಕ್ಣಿ ಸಾಹಿತಿಂಕ್) ಕೊಂಕ್ಣಿ ಭಾಶೆ ಥಂಯ್ ನೀಜ್ ಹುಸ್ಕೊ ಆಸ್ಲ್ಲೊ ತರ್ ಗೊಂಯ್ಚ್ಯಾ ಸರ್ಕಾರಿ ಇಸ್ಕೊಲಾಂನಿ ಕೊಂಕ್ಣಿ ಕಡ್ದಾಯ್ ಕರ್ಯೆತಿ ನ್ಹಯ್? ಕರ್ನಾಟಕಾಂತ್ ಇಂಗ್ಲಿಶ್ ಮಾಧ್ಯಮ್ ಆಸ್ಚ್ಯಾ ಖಾಸ್ಗಿ ಇಸ್ಕೊಲಾಂನಿ ಸಯ್ತ್ ಕನ್ನಡ ಶಿಕೊಂಕ್ ಆಸಾ, ತರ್ ಗೊಂಯ್ಚ್ಯಾ ಸರ್ಕಾರಿ ಶಾಳೆಂನಿ ಕಿತ್ಯಾಕ್ ಕೊಂಕ್ಣಿ ಮಾಧ್ಯಮ್ ಚಲನಾ? ಗೊಂಯ್ಚ್ಯ್ ಹಿಂದೂ ಲೋಕ್ ಕೊಂಕ್ಣಿ ಉಲಯ್ತಾ ಪೂಣ್ ಇಸ್ಕೊಲಾಂನಿ ಮರಾಠಿ ಶಿಕ್ತಾ ಆನಿ ಏಕ್ ನಾ ಏಕ್ ದೀಸ್ ಗೊಂಯಾಂತ್ ಮರಾಠಿ ಮಾತ್ರ್ ರಾಜ್ ಭಾಸ್ ಜಾಯ್ತ್ ತಶೆ ಸ್ವಪಾಣ್ ದೆಖ್ತಾ! ಕ್ರಿಸ್ತಾಂವ್ ಲೋಕ್ ಆಪ್ಲ್ಯಾ ಸದಾಂಚ್ಯಾ ವಾಪರಾಂತ್ ಕೊಂಕ್ಣಿ ರೊಮಿಂತ್ ಬರಯ್ತಾತ್ ತರ್ ಸಾರಸ್ವತ್ ಫಕತ್ ದೇವ್ನಾಗರಿಂತ್ಲ್ಯಾ ಕೊಂಕ್ಣಿಥಾವ್ನ್ ಕಿತೆಂ ಸರ್ವ್ ಫಾಯ್ದೊ ಆಸಾ ತೊ ಜೊಡ್ಚ್ಯಾಂತ್ ವ್ಯಸ್ತ್ ಆಸಾತ್.
ಶಾಳೆಂನಿ ಜಾಲೆಂ, ಆತಾಂ ಸಾದ್ಯಾ ಲೊಕಾ ಥಂಯ್ ಪಳೆವ್ಯಾಂ. ಗೊಂಯಾಂತ್ ಫಕತ್ ಏಕ್ ಕೊಂಕ್ಣಿ ದಿಸಾಳೆಂ-ಸುನಾಪ್ರಾಂತ್- ’ದೇವ್ನಾಗರಿಂತ್ಲೆ ಕೊಂಕ್ಣಿ’ ಪ್ರಗಟ್ ಜಾತಾ, ಪೂಣ್ ಗೊಂಯ್ಚೊ
ಲೋಕ್ ಹೆಂ ಪತ್ರ್ಚ್ ವಾಚಿನಾಂತ್. 23
ಜನೆರ್ 2005
ವೆರ್ ಸುನಾಪ್ರಾಂತ್ ಪತ್ರಾಚ್ಯಾ ಮುಕ್ಲ್ಯಾ ಪಾನಾರ್ ತ್ಯಾ
ಪತ್ರಾಚ್ಯೊ ಪ್ರಸಾರ್ ಫಕತ್ 300
ಮ್ಹಣ್ ಛಾಪ್ಲಾಂ! ಹ್ಯಾ ಪತ್ರಾಚೊ ಪ್ರಸಾರ್ಚ್ ಗೊಂಯಾಂತ್ ’ದೇವ್ನಾಗರಿಂತ್ಲಿ ಕೊಂಕ್ಣಿ’ ಕಿತ್ಲಿ ಲೊಕಾ ಮೊಗಾಳ್ ಮ್ಹಣ್ ಸಮ್ಜೊಂಕ್ ಮಾಪ್ ಜಾವ್ನ್ ಘೆವ್ಯೆತಾ! ’ ಜಾಗ್’ ಆನಿಂ ಹೆರ್ ಥೊಡ್ಯಾ ನೆಮಾಳ್ಯಾಂಚೊ ಪ್ರಸಾರ್ ಕಿತ್ಲೊ ಆಸಾ ಮ್ಹಣ್ ವಿಂಗಡ್ ವಿಚಾರ್ಚಿ ಗರ್ಜ್ ನಾ. ಪುಣ್ ಗೊಂಯಾಂತ್ ಮರಾಠಿ ದಿಸಾಳ್ಯಾ ಪತ್ರಾಂಕ್ ಬರೊಚ್ ಖಾಯ್ಸ್ ಆಸಾ. ಚಡ್ತಾವ್ ಹಿಂದೂ ಆನಿಂ ಸಾರಸ್ವತ್ ಜಣ್ ಮರಾಠಿ ವಾಚ್ತಾತ್. ಜಾಯಿತ್ತ್ಯಾ ಘರಾಂನಿ ಮರಾಠಿ ಉಲಯ್ತಾತ್.
ಗೊಂಯಾಂಯ್ ದೇವ್ನಾಗರಿಚಿ ವಾಯ್ಟ್ ಪರಿಗತ್ ಏಕ್ ಲಿಪಿ ಎಕಾಚ್ ಸುವಾತೆಂತ್ಲ್ಯಾ ಲೊಕಾಕ್ ಸಾಂಗಾತಾ ಹಾಡುಂಕ್ ಆನಿ ತ್ಯಾ ಲೊಕಾಂ ಮಧೆಂ ಭಾಶೆಚೊ ಮೋಗ್ ವಾಡಂವ್ಕ್ ಸಕೊಂಕ್ ನಾ ಮ್ಹಳ್ಳ್ಯಾಕ್ ಬಳ್ವಂತ್ ಸಾಕ್ಸ್ ಜಾತಾ. ತೆಂ ಸತ್ ಮಾನುನ್ ಘೆಂವ್ಕ್
ಪಡ್ತಾ.
ಆಡ್ಚೊನ್ ಗೆಲ್ಲೊ ರೊಮಿಗಾರ್!
ಗೊಂಯಾಂತ್ ಕೊಂಕ್ಣಿ ಉಲಂವ್ಚ್ಯಾ ಕ್ರಿಸ್ತಾಂವಾಂನಿ ಆಧಿಂ ಥಾವ್ನ್ ರೊಮಿ ಲಿಪಿಂತ್ ಕೊಂಕ್ಣಿ ರಾಕೊನ್ ಹಾಡ್ಲ್ಯಾ. ತಾಂಚೆ ಬೂಕ್, ತಾಂಚಿಂ ಪತ್ರಾಂ ರೊಮಿಂತ್ಚ್ ಪ್ರಗಟ್ ಜಾತಾತ್. ದೇವ್ನಾಗರಿಂತ್ಲಿ ಕೊಂಕ್ಣಿ ಅಧಿಕ್ರತ್ ಭಾಸ್ ಮ್ಹಣ್ ಗೊಂಯ್ಚ್ಯಾ
ಸರ್ಕರಾನ್ 4
ಫೆಬ್ರೆರ್ 1987
ದಿಸಾ ಮಾನುನ್ ಘೆತ್ಲ್ಲಿ. ತಿ ಭಾಸ್ ಆಪ್ಲ್ಯಾ ಇಸ್ಕೊಲಾಂನಿ ಗೊಂಯ್ಚೆ ಕ್ರಿಸ್ತಾಂವ್ ಆಪ್ಲ್ಯಾ ಭುರ್ಗ್ಯಾಂಕ್ ಶಿಕಯ್ತಾತ್ ಪೂಣ್ ಆಪ್ಲ್ಯಾ ಸದಾಂಚ್ಯಾ ಗರ್ಜೆಕ್ ತೆ ಆತಾಂಯ್ ರೊಮಿಂಚ್ ವಾಪ್ರುನ್ ಆಸಾತ್.
ಗೊಂಯ್ಚೆ ಕ್ರಿಸ್ತಾಂವ್ ಇಗರ್ಜಾಂನಿ ತಾಂಚೆ ಮಾಗ್ಣ್ಯಾಂಚೆ ಬೂಕ್ ಸರ್ವ್ ರೊಮಿ ಲಿಪಿಂತ್ಚ್ ವಾಚುನ್ ಆಸಾತ್. ಆತಾಂಯ್ ಗೊಂಯ್ಚ್ಯಾ ಇಗರ್ಜೆಂನಿ ಪಾದ್ರಿ ಧರ್ಲ್ಲೆಂ ಲೊಕಾ ಮ್ಹಣಾಸರ್ ವಾಪ್ರುಂಚೆ ಸರ್ವ್ ಬೂಕ್-ಮಿಸಾಳ್, ಮಿಸಾಚಿಂ ವಾಚ್ಪಾಂ, ಗಿತಾಂ ಆನಿ ಸರ್ವ್ ರೊಮಿಂತ್ ಆಸ್ಲ್ಲಿಂ ಮಾತ್ರ್ ಮೆಳ್ತಾತ್, ತಿಂ ದೇವ್ನಾಗರಿಂತ್ ನಾಂತ್. ಹ್ಯಾ ಲೊಕಾನ್ ರೊಮಿ ಥಾವ್ನ್ ದೇವ್ನಾಗರೆಕ್ ಉತ್ರೊಣ್ ಯೆವ್ಜಿಲ್ಲಿಯ್ ನಾ. ಯೆವ್ಜಿಲ್ಲೆ ತರ್ ಜಾತೆಂಯ್ ನಾ. ತಾಂಕಾಂ ತಸಲಿ ಗರ್ಜ್ ದಿಸ್ಲ್ಲಿಯ್ ನಾ. ಹ್ಯಾ ಮುಖಾರ್ ದಿಸ್ಚೆಪರಿಂ ನಾ.
ಗೊಂಯ್ಚೆ ಜಾಯಿತ್ತೆ ಕ್ರಿಸ್ತಾಂವ್ ಆತಾಂಯ್ ರೊಮಿ ಲಿಪಿಂತ್ ಆಸ್ಚಿಂ ಪತ್ರಾಂ ವಾಚ್ತಾತ್. ರೊಮಿಂತ್ಲಿಂ ’ವಾವ್ರಾಡ್ಯಾಂಚೊ ಈಶ್ಟ್’ ಆನಿಂ ’ಗುಲೊಬ್’ ತಸಲ್ಯಾ ಪತ್ರಾಂಚೆ ಧಾ ಹಜರಾಂ ವಯ್ರ್ ಪ್ರತಿಯೊ ಛಾಪ್ತಾತ್. ಲೋಕ್ ವಾಚ್ತಾ. ಪೂಣ್ ಹಾಂಚಿಂ ಭುರ್ಗಿಂ ಇಸ್ಕೊಲಾಂನಿ ವಚೊನ್ ಹೆರಾಂಕ್ ನಾಕಾ ಜಾಲ್ಲಿ ’ದೇವ್ನಾಗರಿಂತ್ಲಿ ಕೊಂಕ್ಣಿ’ ಶಿಕೊನ್ ಆಸಾತ್. ಆನ್ಯೇಕ್ ಬೆಜಾರಾಯೆಚಿ ಗಜಾಲ್ - ಹಿ ಕೊಂಕ್ಣಿ ತಾಂಚ್ಯಾ ಬೊಲಿಂತ್ ನಾ. ಕ್ರಿಸ್ತಾಂವಾಂನಿ ಚಲೊಂವ್ಚ್ಯಾ
137
ಪ್ರಾಥಮಿಕ್ ಇಸ್ಕೊಲಾಂನಿ ಶಿಕಪ್ ಕೊಂಕ್ಣಿ ಮಾಧ್ಯಮಾಂತ್ ಜಾತಾ (ಹೆರಾಂನಿ ಚಲಂವ್ಚಿಂ ಕೊಂಕ್ಣಿ ಮಾಧ್ಯಮ್ ಇಸ್ಕೊಲಾಂ ಫಕತ್
11; ಕ್ರಿಸ್ತಾಂವ್
ಆಪ್ಲ್ಯಾ 127
ಹೈಸ್ಕೂಲಾಂ ಪಯ್ಕಿಂ 126
ಹೈಸ್ಕೂಲಾಂನಿ ತಿಸ್ರಿ ಭಾಸ್ ಜಾವ್ನ್ ’ದೇವ್ನಾಗರಿಂತ್ಲಿ ಕೊಂಕ್ಣಿ’ ಶಿಕಯ್ತಾತ್. ಸರ್ಕಾರಾಕ್ ನಾಕಾ ಆಸ್ಲ್ಲಿ, ಕೊಂಕ್ಣಿಚ್ಯಾ ಸಾಹಿತಿಂಕ್ ನಾಕಾ ಆಸಲ್ಲಿ ’ದೇವ್ನಾಗರಿಂತ್ಲಿ ಕೊಂಕ್ಣಿ’ ಕ್ರಿಸ್ತಾಂವ್ ಆಪ್ಲ್ಯಾ ಶಾಳೆಂನಿ ಶಿಕಯ್ತಾತ್! ವೆಗ್ಗಿಂಚ್ ಕೊಂಕ್ಣಿ ಮಾಧ್ಯಮ್ ಇಸ್ಕೊಲಾಂ ಇಂಗ್ಲಿಶಾಕ್ ಬದ್ಲುಂಕ್ ಚಿಂತಾಪ್ ಚಲೊನ್ ಆಸಾ. ಹೆಂ ಘಡಾತ್ ತರ್ ಗೊಂಯಾಂತ್ ಕೊಂಕ್ಣಿ ಶಿಕಾಪ್ ಸಂಪ್ತೆಲೆಂ.
ದೇವ್ನಾಗರಿನ್ ಕೊಂಕ್ಣಿಕ್ ಅಸ್ಕತ್ ಕೆಲೆಂ:
ಕೊಂಕ್ಣಿ ಭಾಶೆಕ್ ’ಏಕ್ ಲಿಪಿ’ ವಾಪುರ್ನ್ ತ್ಯಾ ಮುಖಾಂತ್ರ್ ಲೊಕಾಮಧೆಂ ಎಕ್ವಟ್ ಹಾಡುಂಕ್ ಜಾಯ್ನಾ ಆನಿ ತಶೆಂ ಏಕ್ ಸಮಾಜ್ ರುತಾ ಕರುಂಕ್ ಜಾಯ್ನಾ ಮ್ಹಳ್ಳ್ಯಾಕ್ ಗೊಂಯಾಪ್ರಾಸ್ ದುಸ್ರಿ ರುಜ್ವಾತ್ ಜಾಯ್? ಗೊಂಯಾಂತ್ ಪಾಟ್ಲ್ಯಾ ಕಾಂಯ್ ವರ್ಸಾಂನಿ ಇಸ್ಕೊಲಾಂನಿ ಕೊಂಕ್ಣಿ ಶಿಕಯ್ತಾತ್, ಪೂಣ್ ಲೋಕ್ ಕಿತ್ಯಾಕ್ ’ದೇವ್ನಾಗರಿಂತ್ಲಿ ಕೊಂಕ್ಣಿ’ ಪತ್ರಾಂ ವಾಚಿನಾಂತ್? ಕ್ರಿಸ್ತಾಂವ್ ನಾಕಾ, ತೆ ರೊಮಿ ಪಾಟ್ಲ್ಯಾನ್ ಆಸಾತ್. ಪೂಣ್ ರೊಮಿಚಿ ಖಾಯ್ಸ್ ನಾತ್ಲ್ಲೆ ಹಿಂದೂ ಭಾವ್ ಅಜೂನ್ ಮರಾಠಿ ಪಾಟ್ಲ್ಯಾನ್ ಕಿತ್ಯಾಕ್ ಆಸಾತ್? ಮರಾಠಿ ವಾಚ್ಚೊ ಲೋಕ್ ಕಿತ್ಯಾಕ್ ಕೊಂಕ್ಣಿ ವಾಚಿನಾ? ಘರಾಂತ್ ಕೊಂಕ್ಣಿ ಉಲೊಂವ್ಚೆ ಸಾರಸ್ವತ್ ಆನಿಂ ಹಿಂದೂ ಆಪ್ಲ್ಯಾ ಭುರ್ಗ್ಯಾಂಕ್ ಕಿತ್ಯಾಕ್ ಮಾರಾಠಿ ಮಾಧ್ಯಾಮಾಂಚ್ಯಾ ಇಸ್ಕೊಲಾಂನಿ ಶಿಕಯ್ತಾತ್? ಸರ್ಕಾರಿ ಇಸ್ಕೊಲಾಂನಿ ಮಾರಾಠಿ ಚಲೊನ್ ಆಸ್ತಾನಾ ಕೊಂಕ್ಣಿ ಏಕ್ ವಿಂಚವ್ಣೆಚಿ(ಐಚ್ಚಿಕ್) ಭಾಸ್ ಜಾವ್ನ್ ತರ್ಯಿ ಶಿಕವ್ಯೆತೆಂ. ತೆಂ ಸಯ್ತ್ ಕಿತ್ಯಾಕ್ ಜಾಲೆಂ ನಾ? ಕರ್ಣಾಟಕಾಂತ್ ಆನಿಂ ಹೆರ್ ಕಡೆ ಆಪ್ಲಿ ಭಾಸ್ ಇಸ್ಕೊಲಾಂನಿ ಶಿಕಯ್ಶೆಂ ಸಾಹಿತಿಂನಿ ಕೆಲ್ಲೆಪರಿಂ ಚಳ್ವಳ್ ಗೊಂಯಾಂತ್ ಕಿತ್ಯಾಕ್ ಜಾಲಿ ನಾ? ಜಾಪ್ ಎಕ್ಚ್ - ದೆವ್ನಾಗರಿಂತ್ಲ್ಯಾ ಕೊಂಕ್ಣಿಕ್ ಗೊಂಯ್ಚ್ಯಾ ಲೊಕಾಚೊ ಕಿತೆಂಚ್ ಪಾಟಿಂಬೊ ನಾ. ಗೊಂಯ್ಚ್ಯಾ ಸಾದ್ಯಾ ಕ್ರಿಸ್ತಾಂವ್ ಲೊಕಾಕ್ ರೊಮಿ ಜಾಯ್. ಕೊಂಕ್ಣಿ ಬಹುಜನ್ ಲೊಕಾಕ್ ಮರಾಠಿ ಜಾಯ್. ತರ್ ದೇವ್ನಾಗರಿ ಲಿಪಿ ಆನಿಂ ಕೊಂಕ್ಣಿ ಕೊಣಾಕ್? ಮೂಟ್ಭರ್ ಆಸ್ಚ್ಯಾ ಸಾರಸ್ವತಾಂಕ್ ಮಾತ್ರ್! ಹೆ ಮಾನೆಸ್ತ್ಯಿ ಮರಾಠಿಕ್ ಚಡ್ ಮಾನ್ತಾತ್. ಮರಾಠಿ ಪತ್ರಾಂ ಚಡ್ ವಾಚ್ತಾತ್. ಆಪ್ಲ್ಯಾ ಭುರ್ಗ್ಯಾಂಕ್ ಮಾರಾಠಿ ಮಾಧ್ಯಮಾಂತ್ ಶಿಕಯ್ತಾತ್ (ಆನಿಂ ದೇವ್ನಾಗರಿಂತ್ಲ್ಯಾ ಕೊಂಕ್ಣಿಕ್ ಕಿತೆಂ ಸರ್ವ್ ಪ್ರಶಸ್ತ್ಯೊ, ಸರ್ಕಾರಿ ಅನುದಾನ್ ಆಸಾ ತೆಂ ಆಪ್ಣಾಚೆಂ ಕರಿತ್ತ್
ಆಸಾತ್.)
ಕಶೆಂ ಕೆನಾರಾಂತ್ ತಶೆಂ ಗೊಂಯಾಂತ್ ಕೊಂಕ್ಣಿ ಖಾತಿರ್ ಕಿತೆಂ ತರ್ಯಿ ವಾವ್ರ್ ಕೆಲಾ ತೊ ಕ್ರಿಸ್ತಾಂವಾಂನಿ, ಪ್ರಸ್ತುತ್ ಗೊಂಯ್ಚ್ಯಾ ಕ್ರಿಸ್ತಾಂವಾಂಚಿ ಕೊಂಕ್ಣಿ ಥಂಯ್ ಪರಿಗತ್ ಕಶ್ಟಾಂಚಿ. ತಾಂಣಿಂ ಶಾಳೆಂನಿ ಶಿಕ್ಚಿ ಭಾಸ್ ಏಕ್, ಇಗರ್ಜೆಂತ್ ಆನಿ ಘರಾಂನಿ ವಾಚ್ಚಿ ಬರೊಂವ್ಚಿ ಕೊಂಕ್ಣಿ ಬೊಲ್ತಿಚ್. ವಾಪ್ರುಂಚಿ ಲಿಪಿ ವಿಂಗಡ್ಚ್. ಪರಿಣಾಮ್ ಜಾವ್ನ್ ಇಸ್ಕೊಲಾಂತ್ ಕೊಂಕ್ಣಿ ಶಿಕ್ಲ್ಲ್ಯಾ ಕ್ರಿಸ್ತಾಂವಾಂ ಮಧೆಂ ಕೊಂಕ್ಣಿ ಶಿಕ್ಪಾಥಾವ್ನ್ ಕಿತೆಂಯ್ ಬರೆಂಪಣ್ ಜಾಲೆಂ ನಾ. ದೇವ್ನಾಗರಿಂತ್ಲೆಂ ಕೊಂಕ್ಣಿ ಶಿಕಪ್ ಗೊಂಯ್ಚ್ಯಾ ಕ್ರಿಸ್ತಾಂವಾಂಕ್ ಕೊಂಕ್ಣಿ ಭಾಶೆಥಾವ್ನ್ ಮೆಕ್ಳೆಂ ಜಾಂವ್ಕ್ ಪ್ರೇರಣ್ ಜಾಲೆಂ ಮ್ಹಣ್ ಸಾಂಗ್ಲ್ಯಾರ್ ವಿಶೇಶ್ ಜಾಂವ್ಚೆಂ ನಾ. ಕ್ರಿಸ್ತಾಂವಾಂ ಮಧೆಂ ಕೊಂಕ್ಣಿಂತ್ ನವೆ ಸಾಹಿತಿ ಉದೆವ್ನ್ ಆಯಿಲ್ಲೆಚ್ ನಾಂತ್. ಎಕಾ ಕಾಳಾರ್ ಕೊಂಕ್ಣಿ ಸಾಹಿತ್ಯ್ ಶೆತಾಂತ್ ಸಕ್ರೀಯ್ ಆಸ್ಲ್ಲೆ ಗೊಂಯ್ಚೆ ಕ್ರಿಸ್ತಾಂವ್ ಆತಾಂ ಸಾಹಿತಿಕ್ ಥರಾನ್ ಆಸ್ಕತ್ ಜಾಲ್ಯಾತ್. ದೇವ್ನಾಗರಿ ಬರಾಬರ್ ರೊಮಿ ಲಿಪಿಯೆಕ್ಯಿ ಜಾಗೊ ದಿಲ್ಲೊ ತರ್ ರೊಮಿ ಲಿಪಿಯೆಂತ್ ಜಾಯಿತ್ತೆ ನವೆ ಸಾಹಿತಿ ಉದೆವ್ನ್ ಯೆತೆ. ಗೊಂಯ್ಕಾರ್ ಕ್ರಿಸ್ತಾಂವಾಂ ಮಧೆಂ ಕೊಂಕ್ಣಿ ಸಾಹಿತ್ಯ್ ಬೆಳೆಂ ಬರೆಂಚ್ ಪಿಕ್ತೆಂ. ಎಕ್ವಟಾಚ್ಯಾ ಇರಾದ್ಯಾನ್ ಆಪ್ಣಾಯಿಲ್ಲಿ ದೇವ್ನಾಗರಿ ಲಿಪಿ ಆತಾಂ ಆಪ್ಲ್ಯಾ ಲೊಕಾಚ್ಯಾ ಸಾಂಸ್ಕ್ರತಿಕ್ ವಿನಾಶಾಕ್ ಪ್ರೇರಣ್ ಜಾಲ್ಯಾ ಮ್ಹಣ್ ಗೊಂಯಾಂತ್ಲ್ಯಾ ಕ್ರಿಸ್ತಾಂವಾಕ್ ಕಳಿತ್ ಜಾಲಾಂ. ಪೂಣ್ ಇತ್ಲೆ ಭಿತರ್ ಜಾಯಿತ್ತೊ ನಷ್ಟ್ ಜಾವ್ನ್ ಗೆಲಾ.
ಏಕ್ ಲಿಪಿ ವಾಪುರ್ನ್ ಕೊಂಕ್ಣಿ ಭಾಸ್ ಉಲಯ್ತೆಲ್ಯಾ ಚ್ಯಾರ್ಯಿ ರಾಜಾಂತ್ಲ್ಯಾ ಕೊಂಕ್ಣಿ ಲೊಕಾಕ್ ಏಕ್ ಕರ್ಯೆತಾ ಮ್ಹಳ್ಳೆಂ ಪತ್ರಾಂನಿ ಬರೊಂವ್ಕ್, ಭಾಷಣಾಂನಿ ಸಾಂಗೊಂಕ್ ಮಾತ್ರ್ ಶಿವಾಯ್ ವಾಸ್ತವೀಕ್ ಪರಿಗತೆಂತ್ ಹೆಂ ಜಾಯ್ನಾ ಮ್ಹಳ್ಳೆಂ ಸತ್ ಆತಾಂ ತರ್ಯಿ ಒಪ್ವೊನ್ ಘೆಂವ್ಚೆಂ ಗರ್ಜ್.
ಕೇರಳಾಂತ್ ಕೊಂಕ್ಣಿ ಆಸ್ಲ್ಲಿ:
ಗೊಂಯಾಂ ಭಾಯ್ರ್ಯಿ ಕೊಂಕ್ಣಿ ದೇವ್ನಾಗರಿ ಲಿಪಿಂತ್ ಆಸಾ ಮ್ಹಣ್ ವಾದ್ ಮಾಂಡುಂಕ್ ಕೆರಳಾಂಚೆಂ ನಾಂವ್ ಉಲ್ಲೇಕ್ ಕರ್ತಾತ್ ಶಿವಾಯ್ ಕೇರಳಾಂತ್ ಲಿಖ್ಣೆ ರುಪಾರ್ ಕೊಂಕ್ಣಿ ಮಾಯಾಗ್ ಜಾಲ್ಯಾ. ಕೇರಳಾಂತ್ ಕೊಂಕ್ಣಿ ದೇವ್ ನಾಗರಿಂತ್ ಬರಯ್ತಾತ್ ಆನಿ ಶಿಕಯ್ತಾತ್ ಮ್ಹಣ್ ಆಯ್ಕೊಂಕ್ ಮೆಳ್ತಾ ಪೂಣ್ ಕೋಣ್ ಬರಯ್ತಾ ಆನಿ ಕೋಣ್ ಖಂಯ್ ಶಿಕಯ್ತಾ ತೊ ವಿವರ್ ಮೆಳಾನಾ. ಕೊಚ್ಚಿಂತ್ ಎಕಾ ಮಾನೇಸ್ತಾನ್ ಚಲೊಂವ್ಚ್ಯಾ ಇಸ್ಕೊಲಾಚ್ಯಾ ದೋನ್ ಶಾಖ್ಯಾಂನಿ ದೇವ್ನಾಗರಿಂತ್ ಕೊಂಕ್ಣಿ ಶಿಕೊಂವ್ಕ್ ಅವ್ಕಾಸ್ ಆಸಾ ಪುಣ್ ಶಿಕಾಪ್ ಜಾಂವ್ಚೆವಿಶಿಂ ಕಿತೆಂಚ್ ಖಬರ್ ನಾ. ಕೇರಳಾ ಮುಳಾಚೊ ಕರ್ನಾಟಕಾಂತ್ ಆಸ್ಚೊ ಏಕ್ ಬರಯ್ಣಾರ್ ಗೊಂಯ್ಚ್ಯಾ ಬೊಲಿಂತ್ ಕೊಂಕ್ಣಿ ಬರಯ್ತಾ ತೆಂ ಸೊಡ್ಲ್ಯಾರ್ ಕೇರಳಥಾವ್ನ್ ನಾಂವ್ ಸಾಂಗ್ಯೆತ್ ತಸಲೆ ಕೊಂಕ್ಣಿ ಬರಯ್ಣಾರ್ ನಾಂತ್. ಥಂಯ್ ದೇವ್ನಾಗರಿಂತ್ ಜಾಂವ್ ಮಲಯಾಳಿಂತ್ ಜಾಂವ್ ವಿಶೇಸ್ ಕಿತೆಂಯ್ ಸಾಹಿತಿಕ್ ವಾವ್ರ್ ಜಾಯ್ನಾ. ಚಡ್ ಲಾಂಬಾಯ್ನಾಸ್ತಾಂ ಸಾಂಗ್ಚೆಂ ತರ್, ಕೇರಳಾಂತ್ ಕೊಂಕ್ಣಿ ಸಾಹಿತಿಕ್ ಭಾಸ್ ಜಾವ್ನ್ ನಾ, ಥಂಯ್ ಫಕತ್ ತೊಂಡ್ಪಾಶಿಂ ಭಾಸ್ ಜಾವ್ನ್ ಆಸಾ. ಕೊಂಕ್ಣಿಚ್ಯಾ ಫುಡಾರಾಚಿ ಖಬಾರ್ ಯೆತಾನಾ ಕೇರಳಾಕ್ ವಿಸ್ರೊನ್ ಸೊಡ್ಚೆಂ ಬರೆಂ.
ಕೆನಾರಾಂತ್: ಕೊಂಕ್ಣಿಚೊ ಫುಡಾರ್ ಕಾನಡಿಂತ್ ಮಾತ್ರ್
ಪ್ರಸ್ತುತ್ ಕೊಂಕ್ಣಿ ಕಾರ್ಯಾಳ್ ಆನಿ ಜಿವಾಳ್ ಆಸ್ಚಿ ತರ್ ತಿ ಕರ್ನಾಟಕಾಂತ್ - ಕನ್ನಡ್ ಲಿಪಿಂತ್. ಕರ್ನಾಟಕ್ ಮುಳಾಚೆ ಮುಂಬಯ್ ಆನಿ ಗಲ್ಪಾಥಾವ್ನ್ಯಿ ಆಪ್ಲೆ ಭಾಶೆಖಾತಿರ್ ವಾವ್ರ್ ಕರಿತ್ತ್ ಆಸಾತ್. ಕನ್ನಡ್ ಲಿಪಿಂತ್ಲ್ಯಾ ಕೊಂಕ್ಣಿ ಭಾಶೆಚ್ಯಾ ಹಾಂಕಾಂ ಸರ್ವಾಂಕ್ ಆಮಿಂ ’ಕೆನರಾ ಕೊಂಕ್ಣಿಚೆ’ ಮ್ಹಣ್ಯೆತಾ. ಕೊಂಕ್ಣಿ ಭಾಶೆಚಿ ನೀಜ್ ಅಭಿಮಾನಿ ಆನಿ ತೆ ಖಾತಿರ್ ನಿಸ್ವಾರ್ಥಾನ್ ಕಿತೆಂಯ್ ಕರುಂಕ್ ತಯಾರ್ ಆಸಾತ್ ತರ್ ತೆ, ಹೆ ಕೆನಾರಾಚೆ ಮಾತ್ರ್. ಹಾಂಚೆ ಪಯ್ಕಿಂ ಕ್ರಿಸ್ತಾಂವ್ ಜಣ್ ಚಡ್ ಆಸಾತ್. ಕೊಂಕ್ಣಿಚಿ ಹೆರ್ ಸುವಾತೆಂಚಿ ಪರಿಗತ್ ಪಳೆಯ್ಲ್ಯಾರ್, ಕೆನಾರಾ ಮುಳಾಚ್ಯಾ ಕೊಂಕ್ಣಿ ಲೊಕಾಂ ಮಧೆಂ ಕೊಂಕ್ಣಿಚೊ ಸುಗ್ಗೆಚೊ ಕಾಳ್ ಮ್ಹಣ್ಯೆತಾ. ಕೊಂಕ್ಣಿಚೆಂ ಜಾಯಿತ್ತೆ ಬೆಳೆಂ ಹಾಂಗಾ ಪಿಕೊನ್ ಆಸಾ. ಹಾಂಗಾ ಚ್ಯಾರ್ ಹಾಪ್ತ್ಯಾಂಳಿಂ ಧರ್ನ್ ತಿಸಾಂವಯ್ರ್ ನೆಮಾಳಿಂ ಕನ್ನಡ್ ಲಿಪಿಂತ್ ಆಸಾತ್. ರಾಕ್ಣೊ ಪತ್ರಾಚೆರ್ ಲಗ್ಬಗ್ ಸತ್ರಾ ಹಜಾರ್ ಪ್ರತಿಯೊ ಛಾಪ್ತಾತ್. ತಶೆಂಚ್ ಹರ್ ಪತ್ರಾಂಚ್ಯೊಯಿ ಹಜಾರಾಂನಿ ಪ್ರತಿಯೊ ಛಾಪ್ತಾತ್ ಆನಿ ಲೋಕ್ ಮೊಲಾಕ್ ವಾಚ್ತಾತ್. ಜಾಯಿತ್ತ್ಯಾ ಫಿರ್ಗಜಾಂನಿ ಫಿರ್ಗಜ್ ಪತ್ರಾಂ ಕಾನಡೀ ಲಿಪಿಂತ್ ಛಾಪ್ತಾತ್ ಆನಿಂ ವಾಚ್ತಾತ್.
ಗೊಂಯಾಂತ್ ಬೂಕ್ ಛಾಪುಂಕ್ ಸರ್ಕಾರಾ ಥಾವ್ನ್ ಅನುದಾನ್ ಮೆಳ್ತಾ ಆನಿ ಫಕತ್ ಹೆಂ ಅನುದಾನ್ ಘೆಂವ್ಚೆ ಖಾತಿರ್ಚ್ ಗೊಂಯಾಂತ್ ಬೂಕ್ ಛಾಪ್ತಾತ್ ತಶೆಂ ದಿಸ್ತಾ. ಹ್ಯಾ ಬುಕಾಂಚೆಂ ಪ್ರತಿಯೊ ಥಂಯ್ಚಿ ಯುನಿವರ್ಸಿಟಿ, ಆಕಾಡೆಮಿ ಆನಿ ಹೆರ್ ಸಂಸ್ಥೆ ಮೊಲಾಕ್ ಘೆತಾತ್. ಕರ್ನಾಟಕಾಂತ್ ಬೂಕ್ ಛಾಪುಂಕ್ ಸರ್ಕರಾಥಾವ್ನ್ ಕಿತೆಂಯ್ ಅನುದಾನ್ ಮೆಳಾನಾ. ಹಾಂಗಾ ಬೂಕ್ ಖಂಯ್ಚೊಯ್ ಸಂಸ್ಥೊ ಮೊಲಾಕ್ ಘೆನಾ, ಪೂಣ್ ಫಕತ್ ಲೊಕಾಚ್ಯಾ ವಾಚ್ಚ್ಯಾ ಸವಯೆಚೆರ್ ಕನ್ನಡ್ ಲಿಪಿಂತ್ ಪ್ರಗಟ್ ಜಾಂವ್ಚೆ ಕೊಂಕ್ಣಿ ಬೂಕ್ಯಿ ಕೆನರಾಂತ್ ಬರ್ಯಾನ್ ವಿಕೊನ್ ವೆತಾತ್. ಶ್ರೀ ವಿಕ್ಟರ್ ರೊಡ್ರಿಗಸಚ್ಯಾ ’ಭಲಾಯ್ಕೆ ದಾಯ್ಜ್’ ಬುಕಾಚೆ ಸ ಹಜಾರ್ ಪ್ರತಿಯೊ (ಮೋಲ್
125) ದೋನ್ ವರ್ಸಾಂ ಬಿತರ್ ವಿಕೊನ್ ಗೆಲ್ಯಾತ್. ಡೊ. ಎಡ್ವರ್ಡ್ ನಜ್ರೆತಾಚೆ ’ಕಾಜಾರಿ ಲೈಂಗಿಕ್ ಜಿವಿತ್’ ಬುಕಾಚೆ ಚಾರ್
ಹಜಾರ್ (ಮೋಲ್ 150
ರುಪಯ್) ಆನಿಂ ಭುರ್ಗ್ಯಾಂಚಿ ಜತನ್’ ಬುಕಾಚೆ ದೋನ್
ಹಜಾರ್ (ಮೋಲ್ 100
ರುಪಯ್) ಪ್ರತಿಯೊ ವಿಕ್ರೊ ಜಾಲ್ಯಾತ್. ಆಶೆಂ ಹೆರ್ಯಿ ಜಾಯಿತ್ತೆ ದಾಕ್ಲೆ ದಿವ್ಯೆತಾ.
ಕೆನರಾಚ್ಯಾ ಕಾಥೊಲಿಕಾಂ ಮಧೆಂ ಕೊಂಕ್ಣಿ ಉರೊಂಕ್ ಪ್ರಮುಕ್ ಕಾರಣ್ ತಿ ತಾಂಚಿ ಧಾರ್ಮಿಕ್ ಕಾರ್ಯಾವಳಿಂಚಿ ಭಾಸ್ ಜಾಲ್ಲ್ಯಾನ್. ಕಾಥೊಲಿಕಾಂಚ್ಯೊ ಇಗರ್ಜ್ಯೊ ಆಪ್ಲ್ಯಾ ಲೊಕಾಚಿ ಕೊಂಕ್ಣಿ ಭಾಸ್ ಆನಿಂ ಸಂಸ್ಕ್ರತಿಚ್ಯಾ ರಾಕ್ವೊಣೆಕ್ ಕಾರಣ್ ಜಾಲ್ಯಾತ್. ಆಯ್ಲೆವಾರ್ ಥೊಡೆಕಡೆ ಇಂಗ್ಲಿಶಾಂತ್ ಥೊಡಿಂ ಮಿಸಾಂ ಜಾತಾತ್, ತರ್ಯಿ ಚಡ್ತಾವ್ ಗಜಾಲ್ಯೊ ಕೊಂಕ್ಣಿತ್ಚ್ ಜಾತಾತ್. ಕೆನರಾಚ್ಯಾ ಇಗರ್ಜಾಂನಿ ಫಕತ್ ಕಾನಡ್ ಲಿಪಿಂತ್ ಕೊಂಕ್ಣಿ ಭಾಸೆಚೊ ವಾಪಾರ್ ಜಾತಾ. ಶಿಕಾಪ್ ಚಡ್ ಆಸ್ಲ್ಲೊ ಆನಿ ಚಡ್ ಶಿಕಾಪ್ ನಾತ್ಲ್ಲೊ ಲೋಕ್ ಬೇಧ್ ನಾಸ್ತಾಂ ಕಾನಡಿ ಲಿಪಿಂತ್ ಆಸ್ಲ್ಲಿಂ ಪವಿತ್ರ್ ಪುಸ್ತಕಾಂತ್ಲಿಂ ವಾಚ್ಪಾಂ, ಫಿರ್ಗಜ್ ಪತ್ರಾಂ ವಾಚ್ತಾತ್. ಸಗ್ಳೊ ಬಾಯ್ಬಲ್ ಕಾನಡಿ ಲಿಪಿಂತ್ಲ್ಯಾ ಕೊಂಕ್ಣಿತ್ ಮಾತ್ರ್ ಆಸಾ. ತೊಯ್ ದೋನ್ ಮುಳಾಂಚೊ ಆಸಾ.
ಕೆನಾರಾಂತ್ ನಾಗರಿ ಪರ್ಕಿ, ಕಾನಡಿ ಆಪ್ಲಿ:
ಕೆನಾರಾಂತ್ ಇಸ್ಕೊಲಾಂನಿ ಸುಮಾರ್ ಪಾಂಚ್ವೆ ಕ್ಲಾಸಿಥಾವ್ನ್ ಒತ್ತಾಯೆನ್ ಹಿಂದಿ ಭಾಸ್ ದೇವ್ನಾಗರಿಂತ್ ಶಿಕಯ್ತಾತ್ ತರ್ಯಿ ಧಾವಿ ಕ್ಲಾಸಿಕ್ ಪಾವ್ತಾ ಪರ್ಯಾಂತ್ ಭುರ್ಗ್ಯಾಂಕ್ ಹಿಂದಿ ತಶೆಂ ದೇವ್ನಾಗರಿ ಲಿಪಿ ನಾಪಸಂದೆಚಿ ಜಾವ್ನ್ಂಚ್ ಉರ್ತಾ. ಹಿಂದಿ ಶಿಕ್ಲ್ಲ್ಯಾನ್ ಜೆರಾಲ್ ಫಾಯ್ದೊ ಕಿತೆಂಯ್ ನಾತ್ಲ್ಲ್ಯಾನ್ ಹಾಂಗಾಚೆ ದೇವ್ನಾಗರಿಕ್ ಆಪ್ಣಾಯ್ನಾಂತ್.
ಹಾಂಗಾಚ್ಯಾ ಹೆರ್ ಲೊಕಾಂಪರಿಂ ಸಾಹಿತ್ಯಾಂತ್ ಸಕ್ರೀಯ್ ಆಸ್ಲ್ಲ್ಯಾ ಕಾಥೊಲಿಕ್ ಲೊಕಾಕ್ಯಿ ಜೆರಾಲ್ ಥರಾನ್ ದೇವ್ನಾಗರಿ ಒಳ್ಕಿಚಿ ನ್ಹಯ್. ಜೆರಾಲ್ ಥರಾನ್ ವಾಚ್ಪ್ಯಾಂಕ್ ದೇವ್ನಾಗರಿಂತ್ ಕೊಂಕ್ಣಿ ವಾಚುಂಕ್ ಕಳಿತ್ ನಾ. ಥೊಡೆ ಬರಯ್ಣಾರ್ ಸೊಡ್ಲ್ಯಾರ್ ಹಾಂಗಾಚ್ಯಾ ಹೆರ್ ಜಾಯಿತ್ತ್ಯಾ ಕಾಥೊಲಿಕ್ ಬರಯ್ಣಾರಾಂಕ್ ಸಯ್ತ್ ದೇವ್ನಾಗರಿಂತ್ ಬರೊಂವ್ಕ್ - ವಾಚುಂಕ್ ಕಳಿತ್ ನಾ. ಅಸಲೆ ಪರಿಗತೆಂತ್, ಕರ್ನಾಟಕಾಂತ್ ಏಕ್ ಲಿಪಿ ಮ್ಹಣ್ ದೇವ್ನಾಗರಿ ಥಾಪ್ಲಿ, ಹಾಂಗಾಯ್ ಕೊಂಕ್ಣಿ ಸಾಹಿತ್ಯಾಚೆ ವೀದ್-ವಾವ್ಳಿ ಜಾತೆಲೆ. ಹಿ ಪರಿಗತ್ ಗೊಂಯ್ಚೆಪ್ರಾಸ್ ಪಾಡ್ ಜಾತೆಲಿ. ಸರ್ಕಾರಾಚೊ ಕಿತೆಂಯ್ ತೆಂಕೊ ನಾ, ಆನಿಂ ಲೊಕಾಚೊಯ್ ಆಧಾರ್ ನಾ ಜಾಯ್ತ್, ಕೊಂಕ್ಣಿ ಆಳ್ವೊನ್ ವಚೊಂಕ್ ಚಡ್ ಕಾಳ್ ಲಾಗ್ಚೊ ನಾ.
ಅಸಲಿ ದುರ್ದಶಾ ಕೊಂಕ್ಣಿಕ್ ಕೆನರಾಂತ್ ಜಾಂವ್ಚಿ ನಾ ಮ್ಹಳ್ಳಿ ಗಜಾಲ್ ಖುಶೆಚಿ. ಕರ್ನಾಟಕಾಂತ್ ಲಿಪಿಯೆಚೊ ವಾದ್ ಸಂಪ್ಲಾ. ಮುಖ್ಲ್ಯಾ ವರ್ಸಾಂನಿ ಕರ್ನಾಟಕಾಂತ್ ಇಸ್ಕೊಲಾಂನಿ ಕನ್ನಡ್ ಲಿಪಿಂತ್ ಕೊಂಕ್ಣಿ ಶಿಕಾಪ್ ಸುರು ಜಾತೆಲೆಂ. ತಿಸ್ರಿ ಭಾಸ್ ಜಾವ್ನ್ ಕೊಂಕ್ಣಿ ಶಿಕ್ಪಾಕ್ ಲೊಕಾಚೊ ಪಾಟಿಂಬೊ ಲಾಭ್ತಲೊ. ಕರ್ನಾಟಕಾಂತ್ ಇಸ್ಕೊಲಾಂನಿ ಧಾವಿ ಕ್ಲಾಸ್ ಪರ್ಯಾಂತ್ ಪಯ್ಲಿ ವಾ ದುಸ್ರಿ ಭಾಸ್ ಜಾವ್ನ್ ಕನ್ನಡ್ ಶಿಕ್ಚಿ ಸರ್ಕರಾಚಿ ಒತ್ತಾಯ್ ಆಸಾ. ಕಾನಡಿ ಲಿಪಿ ಚಡ್ತಾವ್ ಕೆ.ಜಿ. ಕ್ಲಾಸಿ ಥಾವ್ನ್ಂಚ್ ಶಿಕಯ್ತಾತ್. ತಶೆಂ ಜಾಲ್ಲ್ಯಾನ್ ಹಾಂಗಾ ಶಿಕಾಪ್ ಜೊಡ್ಚ್ಯಾ ಹರ್ ಭುರ್ಗ್ಯಾಂಕ್ ಕಾನಡಿ ಲಿಪಿ ಒಳ್ಕಿಚಿ ಜಾತಾ. ಆಶೆಂ ಮನ್ ಕೆಲ್ಯಾರ್ ಕಾನಡಿ ಲಿಪಿಂತ್ ಆಸ್ಚಿಂ ಕೊಂಕ್ಣಿ ಪತ್ರಾಂ, ಪುಸ್ತಕಾಂ ವಾಚುಂಕ್ ತಾಂಕಾಂ ಕಷ್ಟ್ ಜಾಯ್ನಾಂತ್. ಆಸಕ್ತ್ ಆಸ್ಲ್ಲಿಂ ಭುರ್ಗಿಂ , ಶಿಕ್ಪಾಚೆಂ ಮಾಧ್ಯಮ್ ಕಿತೆಂಯ್ ಜಾಂವ್ ಕಾನಡಿ ಲಿಪಿಚಿ
ವಳೊಕ್ ಅಸ್ಲ್ಲ್ಯಾನ್, ತ್ಯಾ ಲಿಪಿಂತ್ ಕೊಂಕ್ಣಿ ವಾಚುಂಕ್ ಸಕ್ತಾತ್, ವಾಚ್ತಾತ್. ಆಶೆಂ ಜಾಲ್ಲ್ಯಾನ್ ಕಾನಡಿ ಲಿಪಿಂತ್ ಕೊಂಕ್ಣಿ ಶಿಕಾಪ್ ಭುರ್ಗ್ಯಾಂಕ್ ಸಲೀಸ್. ಇತ್ಲ್ಯಾರ್ಚ್ ತಾಂಕಾಂ ತ್ಯಾ ಲಿಪಿಚಿ
ವಳೊಕ್ ಆಸಾ. ಕೊಂಕ್ಣಿ ತಿಸ್ರಿ ಭಾಸ್ ಜಾವ್ನ್ ಘೆತಾನಾ ಬೊಲ್ತಿಚ್ ಲಿಪಿ ಶಿಕ್ಚೊ ಭೊರ್ ನಾ. ಹಿ ವಿಂಚವ್ಣ್ ಜಾಯಿತ್ತ್ಯಾ ಕೊಂಕ್ಣಿ ಭುರ್ಗ್ಯಾಂಕ್ ಪಸಂದೆಚಿ ಜಾತೆಲಿ.
ಕೊಂಕ್ಣೆಕ್ ರೊಮಿಯೀ ಜಾಯ್!
ಸಿಂಧಿ ಭಾಸ್ ಪಾರ್ಶಿ-ಅರ್ಬಿ ಆನಿ ದೇವ್ನಾಗರಿಂತ್ ವಾಪ್ರುಂಕ್ ಜಾತಾ ತರ್ ಕೊಂಕ್ಣೆಕ್ ತೀನ್ ಲಿಪಿ ಆಸ್ಲ್ಲ್ಯಾಂತ್ ಕಿತೆಂ ನಷ್ಟ್? ಚಡ್ಶೆಂ ಗೊಂಯಾಂತ್ಲ್ಯಾ ಕ್ರಿಸ್ತಾಂವಾಂ ಮಧೆಂ ಕೊಂಕ್ಣಿ ಜಾಗಿ ದವರ್ಚೆ ಖಾತಿರ್ ರೊಮಿ ಲಿಪಿಕ್ ತೆಂಕೊ ದಿಂವ್ಚಿ ಜರೂರ್ ಗರ್ಜ್ ಆಸಾ. ಆಮಿಂ ಪ್ರಸ್ತುತ್ ಲಿಪಿ ವಾಪಾರ್ನ್ ಕೊಂಕ್ಣಿ ಲೊಕಾಕ್ ಎಕ್ವಟಾಂವ್ಚಿ ಗಜಾಲ್ ಬಗ್ಲೆಕ್ ದವರ್ನ್, ಕೊಂಕ್ಣಿ ಭಾಸ್ ಲೊಕಾಂ ಮಧೆಂ ರಾಕೊನ್ ವರ್ಚೆವಿಶಿಂ ಚಡ್ ಚಿಂತುಂಕ್ ಆಸಾ. ರೊಮಿ ಲಿಪಿಯೆಂತ್ ಕೊಂಕ್ಣಿ ಬರಂವ್ಕ್ ಆನಿಂ ವಾಚುಂಕ್ ಸಲೀಸ್. ಹೆಂ ಫಕತ್ತ್ ಗೊಂಯಾಂತ್ ಗೊಂಯ್ಕಾರ್ ಕ್ರಿಸ್ತಾಂವಾಂ ಮಧೆಂ ನ್ಹಯ್, ಹೆರ್ ಸುವಾತೆಂನಿ ಆಸ್ಚ್ಯಾ ಕೊಂಕ್ಣಿ ಲೊಕಾಂ ಮಧೆಂ ಕೊಂಕ್ಣಿ ಉರೊಂವ್ಚೆ ಖಾತಿರ್ ರೊಮಿ ಲಿಪಿಯ್ ಶಿಕ್ಚೆ/ಶಿಕಂವ್ಚೆಂ
ಬರೆಂ.
ಆಮ್ಚೊ ಜಾಯಿತ್ತೊ ಲೋಕ್ ಪರ್ಗಾಂವಾಂತ್ ಆಸಾ. ಪಯ್ಶಿಲ್ಯಾ ಗಾಂವಾಂಕ್ ಪಾವ್ಲ್ಯಾರ್ಯಿ ಹ್ಯಾ ಲೊಕಾಕ್ ಆಪ್ಲಿ ಮಾಂಯ್ಭಾಸ್ ಆನಿ ಸಂಸ್ಕ್ರತೆಚೆರ್ ವಿಶೇಶ್ ಅಭಿಮಾನ್ ಆಸಾ. ಪರ್ದೆಶಾಂಕ್ ಪಾವ್ಲ್ಲೆಕಡೆ ಮಾಂಯ್ಭಾಶೆಚಿ ವೋಡ್ ಕೆದ್ನಾಂಚ್ ಚಡ್. ಥಂಯ್ ಆಸ್ಚಿಂ ಜಾಯಿತ್ತಿಂ ಭುರ್ಗಿಂ ಕೆನಾರಾಂತ್ ಆಸ್ಲ್ಲ್ಯಾ ಭುರ್ಗ್ಯಾಂಪರಿಂಚ್ ಸುಡಾಳ್ ಕೊಂಕ್ಣಿ ಉಲಯ್ತಾತ್. ಭುರ್ಗಿಂ ಕ್ರಿಯಾತ್ಮಕ್ ಜಾವ್ನ್ ಕೊಂಕ್ಣಿ ಸಾದರ್ ಕರ್ತಾತ್. ಮುಂಬಯ್ ತಶೆಂ ಗಲ್ಪಾಂತ್ಲ್ಯಾ ಗಾಂವಾಂನಿ ಆಸ್ಲ್ಲ್ಯಾ ಕೊಂಕ್ಣಿ ಭುರ್ಗ್ಯಾಂಕ್ ಕೊಂಕ್ಣಿ ಭಾಸೆಂತ್ ಬರೊಂವ್ಕ್ ಆನಿ ತಿ ವಾಚುಂಕ್ ಶಿಕಯ್ನಾಂವ್ ತರ್ ತ್ಯಾ ಲೊಕಾಂಮಧೆಂ ಕೊಂಕ್ಣಿ ಫಕತ್ ತೊಂಡ್ಪಾಶಿ ಉರ್ತೆಲಿ. ತ್ಯಾ ಕೊಂಕ್ಣಿ ಭುರ್ಗ್ಯಾಂಕ್ ಕೊಂಕ್ಣಿ ಬರ್ಪಿ ಭಾಸೆಚಿ, ಕೊಂಕ್ಣಿ ಸಾಹಿತ್ಯಾಚಿ
ವಳೊಕ್ ದೀಂವ್ಕ್ ಪ್ರಸ್ತುತ್ ಫಕತ್ ರೊಮಿ ಲಿಪಿಂತ್ ಸಾಧ್ಯ್ ಆಸಾ.
ರೊಮಿ ಲಿಪಿಯೆಚಿ ಜೆರಾಲ್ ವಳೊಕ್ ಆಸ್ಲ್ಲ್ಯಾನ್ ಲಿಪಿ ಪರತ್ ಶಿಕಂವ್ಚಿ ಗರ್ಜ್ ನಾ, ಭಾಸ್ ಮಾತ್ರ್ ಶಿಕಯ್ಲ್ಯಾರ್ ಜಾಲೆಂ. ಅಂತರ್ಜಾಳಾಂಚ್ಯಾ ಹ್ಯಾ ಕಾಳಾರ್ ಭುರ್ಗ್ಯಾಂಕ್ ಕೊಂಕ್ಣಿ ಶಿಕೊಂವ್ಕ್ ಫಕತ್ ಥೊಡಿಂ ವೆಬ್ಸಾಯ್ಟಾಂ ಪಾವ್ತಾತ್. ಹೆಂ ಕಾಮ್ ಸಲೀಸ್ ಆನಿ ಉಣ್ಯಾ ಖರ್ಚಾಚೆಂ. ಅಸಲ್ಯಾ ವೆಬ್ಸಾಯ್ಟಿಂನಿ ಕೊಂಕ್ಣಿ ಶಿಕಪ್, ಸಾಹಿತ್ಯ್ ಮಾತ್ರ್ ನ್ಹಯ್ ರೊಮಿ ಲಿಪಿ
ವ್ಹಾಪಾರ್ನ್ ಕೊಂಕ್ಣಿಂತ್ ಚ್ಯಾಟ್ ಕರ್ಚೆ ತಸಲೆ ಅವ್ಕಾಸ್ಯಿ ಕರ್ನ್ ದಿವ್ಯೆತಾ. ಇತ್ಲ್ಯಾರ್ಚ್ ಲೊಕಾಮೊಗಾಳ್ ಜಾಲ್ಲ್ಯಾ ಆಮ್ಚ್ಯಾ ಗಾಂವ್-ಭಾವಾಂಚ್ಯಾ ವೆಬ್ಸಾಯ್ಟಿಂನಿ ಸಂಸಾರಾಚ್ಯಾ ಖಂಚಾಯ್ ಕೊನ್ಶಾಂತ್ ಆಸ್ಲ್ಲ್ಯಾ ಕೊಂಕ್ಣಿ ಭುರ್ಗ್ಯಾಂಕ್ ಕೊಂಕ್ಣಿ ಶಿಕವ್ಯೆತಾ. ತಾಣಿಂ ಕೊಂಕ್ಣೆಂತ್ ಬರವ್ಯೆತಾ. ಆಪ್ಲಿಂ ಸಾಹಿತಿಕ್ ದೆಣಿಂ ವ್ಯಕ್ತ್ ಕರ್ಯೆತಾ. ಕಶೆಂ ವೆಬ್ಸಾಯ್ಟಿಂನಿ ತಶೆಂ ಛಾಪ್ಯಾಂತ್ಯಿ ಹೆಂ ಸಾಧ್ಯ್ ಆಸಾ. ಹೊ ಅವ್ಕಾಸ್ ಅಮ್ಚ್ಯಾ ಕೆನಾರಾಂತ್ಲ್ಯಾ ಭುರ್ಗ್ಯಾಂಕ್ಯಿ ಆಸಾ.
ಆಶೆಂ ಖಂಯ್ ಆಸೊಂ, ಆಮ್ಚಿ ಕೆನರಾ ಮುಳಾಚಿ ಕೊಂಕ್ಣಿ ಜೀವ್ ಉರೊಂಕ್ ಮಾತ್ರ್ ನ್ಹಯ್, ಸಂಸಾರ್ ಮ್ಹಳ್ಳ್ಯಾ ಹಳ್ಳೆಂತ್ ಆಮ್ಚೊ ಕೆನರಾ ಕೊಂಕ್ಣಿ ಕಾಥೊಲಿಕಾಂಚೊ ಮ್ಹಾನ್ ಸಮುದಾಯ್ ಏಕ್ ಕರುಂಕ್ ಸಾಧ್ಯ್ ಜಾತೆಲೆಂ. ಬಾಪ್ ಪ್ರತಾಪ್ ನಾಯಕ್ ಹಾಂಣಿಂ ಗೆಲೆತ್ಯಾ ವರ್ಸಾ ಜಾಗತಿಕ್ ಸಮ್ಮೇಳನಾಂತ್ ಸಾಂಗ್ಲ್ಲೆಪರಿಂ ಸರ್ವ್ ಕೊಂಕ್ಣಿ ಲೊಕಾಕ್ ಎಕ್ಟಾಂಯ್ ಕರ್ಚಿ ತಾಕತ್ ಫಕತ್ ರೊಮಿ ಲಿಪಿಯೆಕ್ ಮಾತ್ರ್ ಆಸಾ.
ಆತಾಂ ಇ-ಮೇಯ್ಲಾಂಚೊ ಕಾಳ್. ಆಮಿ ಎಕಾಮೆಕಾಕ್ ಕೊಂಕ್ಣಿ ಉಲೊಂವ್ಚೆಯ್ ಇ-ಮೇಯ್ಲ್ ಧಾಡುಂಕ್ ಇಂಗ್ಲಿಶ್ ವಾಪಾರ್ತಾಂವ್. ಚಾಲ್ತೇರ್ ಆಸ್ಚ್ಯಾ ಆಮ್ಚ್ಯಾ ಯಾಹೂ, ರೆಡಿಪ್ ಮೇಯ್ಲ್, ಹೊಟ್ಮೇಯ್ಲ್ ವಾ ಹೆರ್ ಕಸಲ್ಯಾಂಯ್ ವೆಬ್ಸಾಯ್ಟಾಂಚೊ ಉಪೇಗ್ ಕರ್ನ್ ಇ-ಮೇಯ್ಲ್ ರೊಮಿ ಲಿಪಿ ವಾಪಾರ್ನ್ ಕೊಂಕ್ಣಿಂತ್ ಧಾಡ್ಯೆತಾ. ರೊಮಿ ಲಿಪಿ ಸೊಡ್ನ್ ಹೆರ್ ಲಿಪಿಂನಿ ಕೊಂಕ್ಣಿಂತ್ ಇ-ಮೇಯ್ಲ್ ಧಾಡುಂಕ್ ಸಾಧ್ಯ್ ನಾ.
ಆಮಿಂ ರೊಮಿಯೀ ಶಿಕ್ಯಾಂ!
ಕೆನಾರಾಂತ್ ಆಸ್ಚ್ಯಾ ಆಮ್ಕಾಂ ರೊಮಿ ಲಿಪಿಂತ್ ಕೊಂಕ್ಣಿ ಬರಂವ್ಕ್ ವಾಚುಂಕ್ ಶಿಕೊಂಕ್ ಕಷ್ಟ್ ನಾಂತ್. ಕೊಂಕ್ಣಿಕ್ ರೊಮಿ ಲಿಪಿಚೊ ವಾಪಾರ್ ಸಲೀಸ್. ವಿಶೇಶ್ ತರ್ಬೆತೆಚಿ ಗರ್ಜ್ ನಾ. ಜೆರಾಲ್ ಥೊಡಿಂ ನೆಮಾಂ ಕಳಿತ್ ಆಸ್ಲ್ಯಾರ್ ಜಾಲೆಂ.
ಕೆನಾರಾಂತ್ ಕೊಂಕ್ಣಿಕ್ ಆತಾಂಚ್ಯಾ ಬದ್ಲಲ್ಯಾ ಪರಿಗತೆಂತ್ ರೊಮಿ ಕಾನಡೀ ಉಪ್ರಾಂತ್ಲಿ ಚಡಿತ್ ಏಕ್
ಚಡ್ತಿಕ್ (additional) ಲಿಪಿ ಶಿವಾಯ್ ತಿ
ಕಾನಡೀ ಲಿಪಿಚ್ಯಾ ಬದ್ಲಾಕ್(alternative) ನ್ಹಂಯ್. ಕೆನರಾಂತ್ ಕೊಂಕ್ಣಿ ಉರೊಂಕ್ ವಾಡೊಂಕ್ ಕಾನಡಿ ಜಾಯ್, ತಿ ಆಮಿಂ ಸಾಂಬಾಳುಂಕ್ ಜಾಯ್. ಪುಣ್ ಕೆನರಾಭಾಯ್ರ್ ಆಸ್ಲ್ಲ್ಯಾ ಆಮ್ಚ್ಯಾ ಲೊಕಾಮಧೆಂ ಕೊಂಕ್ಣಿಚ್ಯಾ ವಾಡಾವಳೆಕ್ ರೊಮಿ ಏಕ್ ಮಾತ್ರ್ ವಾಟ್ ಮ್ಹಣ್ ಮಾನುನ್ ಘೆಂವ್ಚೆಂ. ರೊಮಿ ಲಿಪಿ ಆಮ್ಕಾಂ ಸರ್ವಾಂಕ್ ಒಳ್ಕಿಚಿ, ತಿ ವಿಂಗಡ್ ಶಿಕೊಂಕ್
ನಾ.
ವಿವಿದಾಯೆಂತ್ ಎಕ್ವಟ್:
ಪಾಟ್ಲ್ಯಾ ಕಾಂಯ್ ಪನ್ನಾಸ್ ವರ್ಸಾಂನಿ ಮಾಂಡುನ್ ಆಸ್ಲ್ಲೊ ಕೊಂಕ್ಣಿ ಲಿಪಿಚೊ ವಾದ್ ವೊರಾವ್ನ್ ಪಳೆಲ್ಯಾರ್ ’ಏಕ್ ಲಿಪಿ’ ಕಾರ್ಯಾ ರುಪಾಕ್ ಹಾಡುಂಕ್ ಸಾಧ್ಯ್ ನಾ ಮ್ಹಣ್ ಆತಾಂ ರುಜು ಜಾಲಾಂ. ಕೊಂಕ್ಣಿ ಭಾಶೆಚೆಂ ಬರೆಂಪಣ್, ಹ್ಯಾ ಭಾಶೆಚಿ ಅಭಿವೃದ್ಧಿ ಆನಿ ತಿ ಲೊಕಾಂ ಮಧೆಂ ಉರ್ಚೆ ಖಾತಿರ್ ಕೊಂಕ್ಣಿ ಲೊಕಾನ್ ಲಿಪಿಚೊ ವಾದ್ ಇತ್ಲ್ಯಾರ್ ಸಂಪಂವ್ಕ್ ಜಾಯ್.
ಕೊಂಕ್ಣಿ ಭಾಶೆಚ್ಯಾ ವಾಡಾವಳೆಚ್ಯಾ ಶೆವೊಟಾನ್ ಕೊಂಕ್ಣಿಚ್ಯಾ ತೀನ್ ಪ್ರಮುಖ್ ಲಿಪಿಂಕ್ - ಕಾನಡಿ, ದೇವ್ ನಾಗರಿ ಆನಿಂ ರೊಮಿ - ಹಾಂಕಾಂ ಸಮಾಸಮ್ ಮಾನ್ ಆನಿ ಪ್ರಶಸ್ತ್ಯೊ ಲಾಭಂವ್ಕ್ ಜಾಯ್. ಹರ್ ಲಿಪಿಯೆಕ್ ತೆಂಕೊ ದಿಲ್ಲ್ಯಾ ಶಿವಾಯ್ ಕೊಂಕ್ಣಿಚೊ ಹೊ ಲಿಪಿಯೆಚೊ ವಾದ್ ಸಂಪ್ಚೊ ನಾ. ಕೊಂಕ್ಣಿ ಲೊಕಾಕ್ ಎಕ್ವಟಾಂವ್ಚ್ಯಾ ಬದ್ಲಾಕ್ ಹೊ ವಾದ್ ತಾಂಕಾಂ ದುಸ್ಫಟಯ್ತಾ ಆನಿಂ ಎಕಾಮೆಕಾಚ್ಯಾ ದುಸ್ಮಾನ್ ತಶೆಂ ಕರ್ತಾ. ಲಿಪಿ ಖಂಚಿಯ್ ಆಸೊಂ, ಭಾಸ್ ಮಾತ್ರ್ ಕೊಂಕ್ಣಿ ಆಸೊಂ. ಲಿಪಿಯೆಚ್ಯಾ ವೆವೆಗ್ಳ್ಯಾಪಣಾಂತ್ ಆಮಿಂ ಕೊಂಕ್ಣಿ ಲೋಕ್ ಏಕ್ ಮ್ಹಣ್ ಒಪುನ್ ಘೆಂವ್ಚೆಂ ಆಮ್ಚೆಂ ಮಧೆಂ ಎಕ್ವಟ್ ಹಾಡಿತ್. ತ್ಯಾ ವರ್ವಿಂ ಮಾತ್ರ್ ಭಾಸೆಚೆಂ ಬರೆಂಪಣ್ ಜಾಯ್ತ್. ಸಾದ್ಯಾ ಲೊಕಾನ್ ವಾಚ್ಚೆ ಖಾತಿರ್, ಆತಾಂ ಜಾಂವ್ಚೆಪರಿಂ ಬರೆಂ ಸಾಹಿತ್ಯ್ ಲಿಪಿಯಾಂತರ್ ಕರ್ನ್ ಪ್ರಗಟ್ಯೆತ್. ಕಂಪ್ಯೂಟರಾಚ್ಯಾ ಹ್ಯಾ ಕಾಳಾರ್ ಎಕಾ ಲಿಪಿಯೆಂತ್ ಆಸ್ಚೆಂ ಅನ್ಯೇಕಾ ಲಿಪಿಯೆಂತ್ ಬದ್ಲುಂಕ್ ಚಡ್ ತ್ರಾಸ್ ಜಾಯ್ನಾಂತ್. ಕೊಂಕ್ಣಿ
ಭಾಶೆಚೊ ಪೋಸ್ ಕರ್ಯಾಂ, ಲಿಪಿಯೆಚೊ ನ್ಹಂಯ್.
About us | Feedback | Contact us
Copyright © 2004
DAAIZ.COM All rights reserved.
Page concept, designed and maintained by Ashawadi
Publications