ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಸುಟ್ಕಾ
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್), ಖಣ್ (ಸ್ವ), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ, ಸಂಬಂಧ್, ಶನಿ, ಖುರ್ಸಾವಾಟ್, ಕಂಟ್ರಿ ಆವಯ್, ಭಾಂದ್.
ಬಾಲಿ!
ಮುಸ್ಲೀಮ್ ದೇಸ್ ಜಾವ್ನಾಸ್ಚಾ ಇಂಡೋನೇಶ್ಯಾಚಿ ರಾಜ್ಧಾನಿ ಜಕಾರ್ತಾ ತಿತ್ಲೆಂ ವ್ಹಡ್ಲೆಂ ಶ್ಹೆರ್ ಬಾಲಿ ನ್ಹಂಯ್ ತರ್ಯೀ ಲೊಕಾಂಚಾ ಖೆಟಿಂತ್ ಜಕಾರ್ತಾಕ್ ಸೊಡ್ನ್ ದೀನಾತ್ಲೆಂ. ದರ್ಯಾ ದೆಗೆಚೆಂ ಶ್ಹೆರ್ ಜಾಲ್ಲೆನಿಮ್ತಿಂ ಸಂಸ್ರಾಚಾ ವೆವೆಗ್ಳ್ಯಾ ದೆಸಾಚೆ ಯಾತ್ರಿಕ್ ಹ್ಯಾ ಲ್ಹಾನ್ ಶ್ಹೆರಾಕ್ ಯೆತಾಲೆ ಆನಿ ಮಜಾ ಭಗ್ತಾಲೆ. ಹಾಂಗಾಸರ್ ಗಿಮಾಳೊ ಜಾಂವ್ ಪಾವ್ಸಾಳೊ ಜಾಂವ್ ವಾ ಹಿಂವಾಳೊ ಜಾಂವ್ ವಿದೇಶಿ ಪಯ್ಣಾರಿಂಕ್ ಕಸ್ಲಿಚ್ ಅಡ್ಕಳ್ ಹಾಡಿನಾತ್ಲ್ಲಿಂ. ದೆಖುನ್ ಸಂಸ್ರಾಚಾ ಹರ್ಯೆಕಾ ರಾಶ್ಟ್ರಾಂಚೆ ಯಾತ್ರಿಕ್ ಹ್ಯಾ ಶ್ಹೆರಾಕ್ ಸರಾಗ್ ಯೆತಾಲೆ. ಅಂತರ್ರಾಷ್ಟ್ರೀಯ್ ಆತಂಕ್ವಾದಿಂಚಿ ನದರ್ ಹ್ಯಾ ವಿದೇಶಿಂಚೆರ್ ಆಸ್ಲಿ. ಅಸಲ್ಯಾಚ್ ವೆಳಾರ್ ಎಕಾ ದಿಸಾ
ಬಾಲಿ ಶ್ಹೆರಾಂತ್ ಅಛಾನಕ್ ಬೋಂಬ್ ವಿಸ್ಪೋಟ್ ಜಾಲೆ ಆನಿ ಸಭಾರ್ ಭಾಂದ್ಪಾಂ ಕೊಸಾಳ್ಳಿಂ, ಜಾಯ್ತೊ ಲೋಕ್ ಜಿವೊಚ್ ಲಾಸ್ಲೊ, ಕೊಣಾಚಾ ಕುಡಿಚೆ ವಿಸ್ವೆ ಸಯ್ತ್ ಹುಲ್ಪಾಲೆ. ಹೆಂ ಸ್ಪೋಟನ್ ಜಾಂವ್ಚೊ ಇರಾದೊ ಕಸ್ಲೋಯ್ ಆಸೊಂದಿ, ಪುಣ್ ಮೆಲ್ಲೊ ಚಡ್ತಾವ್ ಲೋಕ್ ನಿರಪ್ರಾಧಿ ಜಾವ್ನಾಸ್ಲೊ.
ಎಕಾಚ್ಚ್ ಖಿಣಾನ್ ಹಿ ಖಬಾರ್ ಜಶಿ ಸುಕ್ಯಾ ಕರಡಾಕ್ ಉಜೊ ಪೆಟ್ಲ್ಲೆಭಾಶೆನ್ ಸಂಸಾರ್ಭರ್ ವಿಸ್ತಾರ್ತಾನಾ ದೇಸ್ ವಿದೇಶಾಂತ್ಲೆ ಪತ್ರ್ಕರ್ತ್ ಬಾಲಿ ಶ್ಹೆರಾಕ್ ಹಾರಿಂ ಹಾರಿಂನಿ ಯೇಂವ್ಕ್ ಲಾಗ್ಲೆ. ಎಕೆಕಾ ಮಾಧ್ಯಮಾಂನಿ ಎಕೇಕ್ ಕಾಣಿ ಪ್ರಚಾರ್ ಜಾಲಿ. ಕೊಣಾಕ್ ಹೆಂ ದೇಶಾಭಿತರ್ಲಿ ಆಂತರಿಕ್ ಲಡಾಯ್ಶೆಂ ದಿಸ್ಲೆಂ ತರ್ ಕೊಣಾಕ್ ಭಾಯ್ಲ್ಯಾ ಗಾಂವ್ಚಾ ಕ್ರಿಸ್ತಾಂವ್ ಯಾತ್ರಿಂಕ್ ಹುಲ್ಪಾಂವ್ಚೆಂ ಮುಸ್ಲಿಮ್ ಟೆರರಿಸ್ಟಾಂಚೆಂ ಕಾಮ್ ಮ್ಹಳ್ಳೆಪರಿಂ ದಿಸ್ಲೆಂ. ಕೊಣ್ ಮ್ಹಣಾಲೊ ಬಿನ್ ಲಾದೆನಾನ್ ಅಮೆರಿಕಾಚೆರ್ ಜಾಗ್ವಣ್ ದಿಂವ್ಚ್ಯಾಕ್ ಆಸ್ಟ್ರೇಲಿಯಾಚ್ಯಾ ಲೊಕಾಂಕ್ ಲಗಾಡ್ ಕಾಡ್ಲೊ ಆನಿ ಖಂಯ್ಚಿಂ ಮಾಧ್ಯಮಾಂ ಅನಿ ಕಸಲಿಗೀ ಕಾಣಿ ಉಭಿಂ ಕರುಂಕ್ ಲಾಗ್ಲಿಂ ತರ್ಯೀ ಮೆಲ್ಲಿಂ ತಿಂ ಗೆಲಿಂಚ್, ಕಸಲೆಂಚ್ ಫರಕ್ ತಾಂಚ್ಯಾ ಜಿಣ್ಯೆಕ್ ಜಾಂವ್, ತಾಂಚ್ಯಾ ಕುಟ್ಮಾಂಕ್ ಜಾಂವ್ ಜಾಲೆಂಚ್ ನಾ...
ಇಂಡೊನೇಶ್ಯ ಸರ್ಕಾರಾನ್ ಕೊಣಾಚ್ಯಾ ದಾಕ್ಶೆಣೆಕ್ಗೀ, ಕೊಣಾಚ್ಯಾ ಭಿಂಯಾಂನ್ಗೀ ತನ್ಖಿ ಸುರು ಕೆಲಿಚ್ಚ್, ಆನಿ ಸಾತ್ ಇಂಡೊನೇಶ್ಯಾಚಾ ಜಮ್ಯಾಕ್ ಕುಡಾಯ್ಲೆಂಚ್..
ಹ್ಯಾ ಸಾತ್ ಕಯ್ದಿಂ ಪಯ್ಕಿಂತ್ ಸೊಭಿತ್ ಬಾಯ್ಲ್ಯೀ ಎಕ್ಲಿ ಜಾವ್ನ್ ಆಸ್ಲ್ಲಿ. ಹಿಕಾ ಬಾಯ್ಲ್ ಮ್ಹಣ್ಚ್ಯಾಕೀ ಚೆಡುಂ ಮ್ಹಳ್ಯಾರ್ ಸಾರ್ಕೆಂ ಜಾಯ್ತ್ ಕೊಣ್ಣಾ! ಪ್ರಾಯ್ ಚಡುಣೆಂ ಪಂಚ್ವೀಸ್ ವರ್ಸಾಂ ತರ್ಯೀ ಪಳೆಂವ್ಕ್ ಏಕ್ಧಮ್ ಸೊಭಿತ್ ಆಸೊನ್, ಹಿಕಾ ಪಳೆಲ್ಲಿಂ ಕೊಣ್ಂಚ್ ಸಾಂಗ್ಚಿಂ ನಾಂತ್ ಅಸಲೆಂ ಮುಗ್ಧ್ ತೊಂಡಾಚೆಂ ಚೆಡುಂ ಅಸಲಿಂ ಕಾಮಾಂ ಕರಿತ್ ವಾ ಅಸಲಿಂ ಕಾಮಾಂ ಕರ್ತೆಲ್ಯಾಂಕ್ ಸಾಂಗಾತ್ ದೀತ್ ಮ್ಹಣ್.
ಇಂಡೊನೇಶಿಯಾಂತ್ ಲೊಕಾಂನಿ ಸಯ್ತ್ ಪುರ್ಶಾಂವ್ ಕಾಡ್ಲೊ, ಕೊಣೆಂ ಹ್ಯಾ ಕುಡಾಯಿಲ್ಲ್ಯಾಂಕ್ ಸುಟ್ಕಾ ದೀಜಾಯ್ ಮ್ಹಣೊನ್ ತರ್ ಕೊಣೆಂ ಹಾಂಕಾಂ ಫಾಶಿ ದೀಜಾಯ್ ಮ್ಹಣ್. ಇತ್ಲೆಂಚ್ ನ್ಹಂಯ್, ಭಾಯ್ಲ್ಯಾ ಸಂಸಾರಾಚಾ ದಭಾವಾನ್ ಆಸ್ಯೆತ್, ಉಟಾಉಟಿಂ ತನ್ಖಿ ಚಲ್ಲಿ - ಥೊಡ್ಯಾಚ್ ಮಯ್ನ್ಯಾಂನಿ ಕುಡಾಯಿಲ್ಲ್ಯಾ ಸಾತ್ ಜಣಾಂಪಯ್ಕಿ ಚೊವ್ಗಾಂಕ್ ಫಾಶಿ ಜಾಲಿ ತರ್ ಬಾಕಿಚ್ಯಾಂಕ್ ಜಿಣಿಭರ್ ಜಯ್ಲಾಚಿ ಸಜಾ ಮೆಳ್ಳಿ.
ಎದೊಳ್ ಪರ್ಯಾಂತ್ ಸ್ವತಂತ್ರ್ ಉಭೊನ್ ಆಸ್ಚೆಂ ಸುಕ್ಣೆಂ ಆತಾಂ ಪಿಂಜ್ರ್ಯಾಂತ್ - ಹಿ ಸ್ಥಿತಿ ಜಾಲ್ಲಿ ತ್ಯಾ ಬಾಯ್ಲೆಚಿ.. ಅಪ್ಣಾಕ್ ಫಾಶಿ ದಿಲ್ಲಿ ತರ್ ಅಪ್ಲಿ ಜಿಣಿ ತರ್ಯೀ ಸಂಪ್ತಿ, ಆನಿ ಹ್ಯಾ ಜಯ್ಲಾಂತ್ ದೀಸ್ ಲೊಟ್ಚಿ ಗತ್ ಯೆತಿನಾ ಮ್ಹಳ್ಳೆಂ ಚಿಂತುನ್ ಉಪಾವ್ ನಾಸ್ತಾಂ ದೀಸ್ ಸಾರಿಲಾಗ್ಲಿ.
ಸಭಾರ್ ದೀಸ್ ಪಾಶಾರ್ ಜಾಲ್ಲೆಪರಿಂಚ್ ಹಿಚ್ಯಾ ಮತಿಂತ್ಲಿಂ ಚಿಂತ್ನಾಂ ವೆವೆಗ್ಳಿಂ ರುಪಾಂ ಘೆಂವ್ಕ್ ಲಾಗ್ಲಿಂ. ಜಯ್ಲ್ ದರ್ಯಾದೆಗೆರ್ ಆಸ್ಲ್ಲೆಂ ದೆಕುನ್ ತವಳ್ ತವಳ್ ದರ್ಯಾಚ್ಯಾ ಸುಕ್ತೆ ಭರ್ತೆಂತ್ ಬದ್ಲೊಂಚೊ ಲ್ಹಾರಾಂಚೊ ಆವಾಜ್ ಸಯ್ತ್ ತಿಕಾ ಅರ್ಥ್ ನಾತ್ಲ್ಲೆ ಉಮಾಳೆ ಹಾಡಯ್ತಾಲೆ. ಅಶೆಂ ತ್ಯಾ ಜಯ್ಲಾಂತ್ಲ್ಯಾ ಎಕ್ಲ್ಯಾ ದಾದ್ಲ್ಯಾಚ್ಯಾ ಸಳಾವಳೆರ್ ಪಡ್ಲಿ. ಪಯ್ಲಿ ಹಿ ಸಳಾವಳ್ ಜಾಲಿ ಆನಿ ಉಪ್ರಾಂತ್ ಇಸ್ಟಾಗಾತ್ ಜಾವ್ನ್ ಬದಾಲ್ಲಿ. ತ್ಯಾ ದಾದ್ಲ್ಯಾಚೆಂ ಕಾಮ್ ಭೋವ್ ಸಂಪೆಂ; ಜೊ ಕೊಣ್ ಜಯ್ಲಾಂತ್ ಮೊರ್ತಾ, ತಾಂಕಾಂ ವೆವಸ್ತಿತ್ ರಿತಿನ್ ಫೊಂಡಾಕ್ ಪಾವಂವ್ಚೆಂ ಕಾಮ್. ಸಕ್ಕಡ್ ಸರ್ಕಾರಿ ರೆಗ್ರ್ಯಾಂ ಪ್ರಕಾರ್. ಪಯ್ಲೆಂ ಕೊಣ್ಯ್ ಮೆಲ್ಲೆ ತಕ್ಷಣ್ ಜಯ್ಲಾಚಿ ಘಾಂಟ್ ಮಾರುಂಕ್ ಆಸಾ ತಾಣೆಂ... ಚಡಾವತ್ ಜಿಣ್ಯೆ ಆವ್ದೆಚಿ ಶಿಕ್ಶಾ ಭಗ್ಚಿಂ ಕಯ್ದಿ ಹ್ಯಾ ಜಯ್ಲಾಂತ್ ಆಸ್ತಾಲಿಂ ದೆಕುನ್ ತಾಂಚಿ ಕೂಡ್ ಮಾತಿಯೆಕ್ ಪಾವಂವ್ಚೆಂ ಕಾಮ್ ಜಯ್ಲಾಚಿಂಚ್ ಕರ್ತಾಲಿಂ.
ಘಾಂಟ್ ಮಾರ್ನ್ ಜಾಟೆಚ್ಚ್ ತೆಂ ಮೊಡೆಂ ಹಾಡ್ನ್ ಮೊರ್ನಾಚ್ಯೊ ಪೆಟೊ ದವರ್ಚ್ಯಾ ಕುಡಾಕ್ ವಚೊನ್ ಮೊಡ್ಯಾಕ್ ತ್ಯಾ ಪೆಟೆಂತ್ ನಿದಾಂವ್ಕ್ ಆಸಾ, ಉಪ್ರಾಂತ್ ಭಾಯ್ರ್ ಯೇವ್ನ್ ದಸ್ತಾವೆಜಾಂಚಾ ಕುಡಾಕ್ ರಿಗೊನ್ ಮೊರ್ನಾಚಾ ಬುಕಾಂತ್ ಮೆಲ್ಲ್ಯಾಚೆಂ ನಾಂವ್ ದಾಖಲ್ ಕರುಂಕ್ ಆಸಾ, ಅಶೆಂ ದಾಖಲ್ ಕೆಲ್ಲ್ಯಾ ಉಪ್ರಾಂತ್ ಪಯ್ಲ್ಯಾ ಕುಡಾಕ್ ಯೇವ್ನ್, ಮೊರ್ನಾಚಾ ಪೆಟಿಚೆಂ ಧಾಂಕಣ್ ಘಾಲ್ನ್, ತಾಚೆರ್ ಖಿಳೆ ಮಾರ್ನ್ ಬಂಧ್ ಕರುಂಕ್ ಆಸಾ - ಹೆಂ ಸರ್ವ್ ಪಾರೊತ್ ಆಸ್ಚಾ ಪೊಲಿಸಾ ಸಮೊರ್. ತಿತ್ಲ್ಯಾರ್ ಭಾಯ್ರ್ ತಿ ಪೇಟ್ ವರುಂಕ್ ಸರ್ಕಾರಿ ಗೊಡ್ಯಾ ಗಾಡಿ ಯೆತಾ. ತಿ ಪೇಟ್ ತ್ಯಾ ಗಾಡಿಯೆರ್ ದವರ್ಲ್ಯಾರ್ ಜಾಲೆಂ. ಉಪ್ರಾಂತ್ ತೊ ಗೊಡ್ಯಾ ಗಾಡಿಯೆಚೊ ತ್ಯಾ ಪೆಟೆಕ್ ಮೊಡೆಂ ಪುರ್ಚ್ಯಾ ಫೊಂಡಾಲಾಗಿಂ ವರ್ತಾ. ಫೊಂಡ್ ಕಾಡುಂಖ್ ಕಾಂಯ್ ತ್ರಾಸ್ ನಾಂತ್ - ರೆಂವೆಚಿ ಸುವಾತ್ ತಿ. ಉಪ್ರಾಂತ್ ಹೊಚ್ ತಿ ಪೇಟ್ ಸಕ್ಲಾ ದೆಂವಯ್ತಾ ಆನಿ ಪುರುನ್ ಪಾಟಿಂ ಯೆತಾ.. ಸಕ್ಕಡ್ ವೆವಸ್ತಿತ್ ರಿತಿನ್ ಜಾತಾ - ಸರ್ಕಾರಿ ನೇಮಾಂ ಪ್ರಕಾರ್..
ಅಶೆಂ ಆಸ್ತಾಂ ತಾಚೆಂ ಕಾಮ್ ಬರ್ಯಾನ್ ಪಾರ್ಕಿಲ್ಲಿ ಹಿ ಬಾಯ್ಲ್ ಅಪ್ಲ್ಯಾ ಬಾಚಾವೆಚೊ ಏಕ್ ಉಪಾವ್ ಕರಿಲಾಗ್ಲಿ. ಅಪ್ಣೆಂ ಅಶೆಂಚ್ ಜಯ್ಲಾಂತ್ ಕೊಣ್ಯೀ ಮೆಲ್ಲೆದಿಸಾ ತ್ಯಾ ಮೊಡ್ಯಾಸವೆಂ ಜರ್ ಹಾಂವ್ ನಿದ್ಲಿಂ ತರ್, ಆನಿ ಹೊ ಹರ್ಶೆಂಚೆಪರಿಂ ಅಪ್ಲೆಂ ಕಾಮ್ ಕರಿತ್ ತರ್, ಕಾಂಯ್ ಥೊಡಿಂ ವೊರಾಂ ಮಾತ್ರ್ ಅಪ್ಣಾಕ್ ಫೊಂಡಾಂತ್ ನಿದೊಂಕ್ ಪಡ್ತೆಲೆಂ. ಉಪ್ರಾಂತ್ ಹೊಚ್ ಯೇವ್ನ್ ತೊ ಫೊಂಡ್ ಉಸ್ತುನ್, ಪೆಟಿಕ್ ಮಾರ್ಲೆಲೆ ಖಿಳೆ ಕಾಡ್ನ್ ಅಪ್ಣಾಕ್ ಭಾಯ್ರ್ ಹಾಡಿತ್ ತರ್ ಜಾಲೆಂ! ಅಪ್ಣಾಕ್ ಸುಟ್ಕಾ! ಅಪುಣ್ ಬಾಚಾವ್!!
ಪುಣ್ ಹಾಂತುಂ ಆಸ್ಚೆಂ ರಿಸ್ಕ್ ತಿ ಸಮ್ಜಾಲ್ಲಿ. ರೆಂವೆಚಿ ಸುವಾತ್ ದೆಕುನ್ ಫೊಂಡಾಭಿತರ್ ಪುರ್ಲ್ಯಾರೀ ಥೊಡಿಂ ವೊರಾಂ ಕಶ್ಟಾಂನಿ ತರ್ಯೀ ಅಪ್ಣಾಕ್ ಜಿಯೆವ್ಯೆತ್ ಮ್ಹಳ್ಳೊ ಅಧುರೊ ಭರ್ವಸೊ ತಿಕಾ ಆಸ್ಲೊ. ಹೊ ಅಧುರೊ ಭರ್ವಸೊ ಜಯ್ಲಾಂತ್ ಮೊರ್ತಾಸರ್ ಜಿಯೆಂವ್ಚ್ಯಾಕೀ ವರ್ತೊ ಜಾವ್ನಾಸ್ಲೊ ದೆಕುನ್ ಹೆಂ ರಿಸ್ಕ್ ತಿಕಾ ಮಂಜೂರ್ ಆಸ್ಲೆಂ.
ವ್ಹಯ್! ಹಾಂತುಂ ರಿಸ್ಕ್ ಜರೂರ್ ಆಸಾ ಪುಣ್ ಕಾಂಯ್ ತರ್ಯ್ ಜಿಯೆಂವ್ಚೊ ಭರ್ವಸೊ ಆಸಾ. ಪುಣ್ ಹ್ಯಾ ಜಯ್ಲಾಂತ್ ಮೊರ್ತಾ ಪರ್ಯಾಂತ್ ಅಸಲಿ ಜಿಣಿ ಜಿಯೆಂವ್ಚ್ಯಾಕೀ ತಸಲೆಂ ರಿಸ್ಕ್ ಘೆಂವ್ಚೆಂ ಬರೆಂ ದೆಖುನ್ ತ್ಯಾ ದಾದ್ಲ್ಯಾಕ್ ಪುಸ್ಲಾಂವ್ಕ್ ತಿಣೆ ನಿರ್ಧಾರ್ ಕೆಲೊ.
ಪುಣ್ ದಾದ್ಲೊ ಅಪ್ಲ್ಯಾ ಜವಾಬ್ಧಾರೆಕ್ ಹಾಂವ್ ಎದೊಳ್ ಖಾಲ್ ಜಾಲಾಂ ಫುಡೆಂಯೀ ಖಾಲ್ ಜಾತಲೊಂ ಶಿವಾಯ್ ಅಸಲಿಂ ಕಾಮಾಂ ಕರುಂಕ್ ಅಪ್ಲೆಂ ಮನ್ ಕಬೂಲ್ ನಾ ಮ್ಹಣಾಲೊ ತರ್ಯೀ ಅಖ್ರೇಕ್ ತ್ಯಾ ಬಾಯ್ಲೆಚ್ಯಾ ಪುಸ್ಲಾವ್ಣೆಕ್ ಭುಲ್ಲೊಚ್ಚ್.
ಅಶೆಂ ಸಭಾರ್ ದೀಸ್ ಪರ್ಯಾಂತ್ ತಿ ಬಾಯ್ಲ್ ಕೆನ್ನಾ ಹ್ಯಾ ಜಯ್ಲಾಂತ್ ಮೋರ್ನ್ ಜಾಯ್ತ್ ಮ್ಹಣ್ ರಾಕೊನ್ ಆಸ್ಲ್ಲಿ.
ಎಕಾ ರಾತಿಂ ಗಾಢ್ ನಿದೆಂತ್ ಆಸ್ಚಾ ವೆಳಾರ್ ಎಕಾಚ್ಫಾರಾಂ ಜಯ್ಲಾಚಿ ಘಾಂಟ್ ವ್ಹಾಜ್ಲಿ. ಇತ್ಲ್ಯಾ ದಿಸಾಂನಿ ಭೋವ್ ಅತ್ರೆಗಾನ್ ರಾಕೊನ್ ಆಸ್ಲ್ಲ್ಯಾ ಹ್ಯಾ ಘಾಂಟೆಕ್ ಆಯ್ಕತಚ್ಚ್ ಅರ್ಧ್ಯಾ ನಿದೆರ್ ಆಸ್ಚಿ ಹಿ ಉಡೊನ್ ಪಡ್ಲಿ ಆನಿ ವೆಗಿಂ ವೆಗಿಂ ಗರ್ಜೆಚ್ಯೊ ಅಪ್ಲ್ಯೊ ವಸ್ತು ಆನಿ ಕಾಳೊಕಾಕ್ ಅಪ್ಲೊ ಲ್ಹಾನ್ ಟೋರ್ಚ್ ಘೆವ್ನ್ ಧಾಂವ್ಚಿ ತಯಾರಾಯ್ ಕರಿಲಾಗ್ಲಿ.
ತ್ಯಾ ಕಾಳ್ಕ್ಯಾ ರಾತಿಂ ಸಯ್ತ್ ಅಪ್ಲ್ಯಾ ಕುಡಾ ಥಾವ್ನ್ ಭಾಯ್ರ್ ಯೇವ್ನ್ ಮೊರ್ನಾಚಿ ಪೇಟ್ ದವರ್ಲೆಲ್ಯಾ ಕುಡಾಶಿಂ ತೆಂ ಮಾಜ್ರಾಚಿಂ ಪಾವ್ಲಾಂ ಕಾಡ್ತಾಲೆಂ ತರ್ಯೀ ದೋನ್ ತೀನ್ ಪಾವ್ಟಿಂ ರಾಕ್ವಲಿ ಪೊಲಿಸಾಚಾ ನದ್ರೆಕ್ ಸಾಂಪಡ್ಚೆಂ ವಾಂಚ್ಲೆಂ. ಭೋವ್ಶಾ ತೆಂ ತಿಚೆಂ ಅದೃಷ್ಟ್ ಜಾವ್ಯೆತ್. ಅಶೆಂ ಥೊಡ್ಯಾಚ್ ಮಿನುಟಾಂನಿ ಕಶೆಂಯ್ ತೆಂ ಮೊರ್ನಾಚಿ ಪೇಟ್ ಆಸ್ಚಾ ಕುಡಾಕ್ ಪಾವ್ಲೆಂ. ಮಂದ್ ದಿವ್ಯಾಂತ್ ಆಯ್ತಿ ಆಸ್ಚಿ ಪೇಟ್ ತಿಕಾ ದಿಸ್ಲಿ ಆನಿ ಪೆಟೆಂತ್ ಎಕಾ ವಸ್ತ್ರಾಂತ್ ಗುಟ್ಲಾವ್ನ್ ನಿದಾಯಿಲ್ಲೆಂ ಮೊಡೆಂಯೀ ದಿಸ್ಲೆಂ. ವೆಗಿಂ ವೆಗಿಂ ತೆಂ ವಚೊನ್ ತ್ಯಾ ಮೊಡ್ಯಾಚಾ ಬಗ್ಲೆನ್ ನಿದ್ಲೆಂ ಆನಿ ಮೊಡ್ಯಾಚೆರ್ ಘಾಲ್ಲೆಂ ವಸ್ತುರ್ ಅಪ್ಲ್ಯಾ ಆಂಗಾಚೆರ್ ಪಾಂಗ್ರುನ್ ನಿದ್ಲೆಂ.
ಎಕಾ ರಿತಿಚೊ ಕಾಂಠಾಳೊ ತಿಕಾ ಆಯ್ಲೊ, ಎಕಾ ಥಂಡ್ ಮೊಡ್ಯಾಸವೆಂ ನಿದೊಂಕ್! ಪುಣ್ ಕಿತೆಂ ಕರ್ಯೆತಾ? ಕಾಂಯ್ ಥೊಡಿಂ ಮಿನುಟಾಂ ಯಾ ವೊರಾಂ. ಉಪ್ರಾಂತ್ ಆಪ್ಣಾಕ್ ಸುಟ್ಕಾ ಹ್ಯಾ ಜಯ್ಲಾಂತ್ಲಿ. ಉಪ್ರಾಂತ್ ಪರತ್ ಪಿಂಜ್ರ್ಯಾಂತ್ಲೆಂ ಸುಕ್ಣೆಂ ಸ್ವತಂತ್ರ್ಪಣಿಂ ಜಿಯೆಂವ್ಕ್ ಸಕ್ತೆಲೆಂ.. ತೆಂ ಮತಿಂತ್ ಲೇಕ್ ಘಾಲ್ನ್ ಆವಾಜಾವಿಣೆಂ ನಿದ್ಲೆಂ.
ಭಾಯ್ರ್ ಎದೊಳ್ ನಮಿಯಾರ್ಲ್ಲೆಪರಿಂಚ್ ಜಾಲ್ಲೆಂ. ಮೊರ್ನಾಚಾ ಪೆಟೆಚೆಂ ಧಾಂಕ್ಣೆಂ ಧಾಂಪ್ಲೆಂ ಆನಿ ಖಿಳೆ ಸಯ್ತ್ ಮಾರ್ನ್ ಜಾಲೆ.
ಸರ್ವ್ ನಮಿಯಾರ್ಲ್ಲೆಪರಿಂಚ್!
ತಿತ್ಲ್ಯಾರ್ ಥೊಡಿಂ ಮಿನುಟಾಂ ಪಾಶಾರ್ ಜಾಲಿಂ..
ಭಾಯ್ಲಿ ಜಯ್ಲಾಚಿ ಗೇಟ್ ಉಗ್ತಿ ಜಾಲ್ಲೊ ಆವಾಜ್ ಜಾಲೊ, ಇಲ್ಲ್ಯಾ ವೆಳಾನ್ ಪೇಟ್ ಉಕಲ್ಚೊ ಅನ್ಭೋಗ್ ಜಾಲೊ. ಪೆಟೆಕ್ ಗಾಡಿಯೆರ್ ದವರ್ಚೊ ಅನ್ಭೋಗ್ ಜಾಲೊ.. ಉಪ್ರಾಂತ್ ಗಾಡಿ ಚಲ್ಚೊ ಅನ್ಭೋಗ್ ಜಾಲೊ.. ಪುಣ್ ಭಿಲ್ಕುಲ್ ಆವಾಜಾವಿಣೆಂ ತೆಂ ಪೆಟೆಭಿತರ್ ಮೊಡ್ಯಾಸವೆಂ ನಿದ್ಲ್ಲೆಂ.
ಥೊಡ್ಯಾ ವೆಳಾನ್ ತಿ ಪೇಟ್ ಸಕ್ಲಾ ದೆಂವಯಿಲ್ಲೆಪರಿಂ ಭಗ್ಲೆಂ..
ಥೊಡ್ಯಾಚ್ ಮಿನುಟಾಂನಿ ತಿ ಪೇಟ್ ದಾಡ್ಡ್ ಕರ್ನ್ ಸಕ್ಲಾ ಪಡ್ಲ್ಲೊ ಅನ್ಭೋಗ್ ಜಾಲೊ. ತಿಚೆಂ ಆಂಗ್ ಜ್ಯೊರಾನ್ ದುಖ್ಲೆಂ ತರ್ಯೀ ಸಯ್ರಣ್ ಸಾಂಭಾಳ್ನ್ ವೊಗೆಚ್ ರಾವ್ಲೆಂ. ಕಶ್ಯೋಯ್ ಥೊಡ್ಯೊಚ್ ಘಡಿಯೊ ದೆಖುನ್ ಪರತ್ ಸಯ್ರಣ್ ಸಾಂಭಾಳ್ನ್ ತೆಂ ತಶೆಂಚ್ ಉರ್ಲೆಂ. ಇಲ್ಲ್ಯಾ ವೆಳಾನ್ ಪೆಟಿಚೆರ್ ಮಾತಿ ಘಾಲ್ಚೊ ಆವಾಜ್ ಆಯ್ಕಾಲೊ. ಥೊಡ್ಯಾಚ್ ಮಿನುಟಾಂನಿ ಸಗ್ಳೆಂ ನಿಶಬ್ಧ್.
ಆತಾಂ ಹಿ ಬಾಯ್ಲ್ ಕಶ್ಟಾಂನಿ ಉಸ್ವಾಸ್ ಸೊಡಿಲಾಗ್ಲಿ - ತರ್ಯೀ ತಿಚಾ ಸುಟ್ಕಾಚಿ ಖಾತ್ರಿ ಜಾಲ್ಲಿಚ್ ಹಿ ಅಪ್ಲೇಸ್ತಕಿಂ ಹಾಸಾಲಾಗ್ಲಿ. ಸಂತೊಸಾಚ್ಯೊ ಹಾಸೊ! ಸುಟ್ಕಾ ಜೊಡ್ಲೆಲ್ಯೊ ಹಾಸೊ!
ಆತಾಂ ತೊ ದಾದ್ಲೊ ಯೇವ್ನ್ ಫೊಂಡ್ ಉಸ್ತುನ್ ಪೆಟಿಚೆ ಖಿಳೆ ನಿಕ್ಳಾಯ್ತಾ ಪರ್ಯಾಂತ್ ರಾಕ್ಚೆಂ ಸಯ್ರಣ್ ತಿಚೆಲಾಗಿಂ ನಾತ್ಲ್ಲೆಂ ದೆಖುನ್ ತಿಣೆಂ ನಿದ್ಲ್ಲೆಕಡೆಚ್ ಹಳ್ತಾರ್ ತಿಚೆಲಾಗಿಂ ಆಸ್ಚೊ ಟೋರ್ಚ್ ಚಾಲು ಕೆಲೊ ಆನಿ ಮೊಡ್ಯಾಚೆರ್ ಏಕ್ ನದರ್ ಘಾಲಿಲಾಗ್ಲಿ ತರ್ ತಿ ಕಿತೆಂ ಪಳೆತಾ! ತಿಕಾ ಸುಟ್ಕಾ ದಿವಂವ್ಚಿ ಭಾಸ್ ದಿಲ್ಲೊ ದಾದ್ಲೊ ಜಾವ್ನಾಸ್ಲೊ ತೊ!
*****
[ಪ್ರೇರಿತ್ ಕಥಾ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
