ಕವಿತಾकविताPoem
ಬಾಯ್ಲೆಚಿ
This poem is available in its original Kannada only.
ಕಾಳ್ಜಾಂತ್ಲಿ ಕವಿತಾ
ಎಚ್ಚೆಮ್
[ವಿಲ್ಸನ್ ಕಯ್ಯಾರಾನ್ ಸೊಡಯಿಲ್ಲೆಂ]
ಬಾಯ್ಲೆಚಿ ಕವಿತಾ
ಮಧ್ಯಾನ್ ರಾತಿಂ ಕವಿ ನಿದೆಂತ್ಲೊ ಉಟ್ತಾ
ಚಿಮ್ಣೆ ಉಜ್ವಾಡಾಂತ್ ಕವಿತಾ ಬರಯ್ತ್ ಬಸ್ತಾ
ಬಾಯ್ಲ್ ಬಾವ್ಡೆಂ ವೆಂಗೆಂತ್ ಉಶೆಂ ಘೆವ್ನ್ ನಿದ್ತಾ
ಕವಿ ಬರಯ್ತಾ:
ಮೋಗ್ ಉಶ್ಯಾಪರಿಂ
ವೆಂಗೆಂತ್ ಆಸ್ತಾವರೇಗ್ ಜಾಗಯ್ತಾ
ಮಾತೆಂ ತೆಂಕ್ಲ್ಯಾರ್ ಸಪ್ಣಾಂ ರಂಗಯ್ತಾ
ಫಾಂತ್ಯಾಫರಾರ್ ಬಾಯ್ಲ್ ಉಟ್ತಾ
ಬರವ್ನ್ ದವರ್ಲ್ಲ್ಯೊ ಕವಿತಾ ಘೆತಾ
ರಾಂದ್ಣಿಕ್ ಚೆಪುನ್ ಉಜೊ ಪೆಟಯ್ತಾ
ಆನಿ ಮ್ಹಣ್ತಾ:
ಕವಿತಾ ಉಜ್ಯಾಪರಿಂ
ಕಾಗ್ದಾ ಕುಡ್ಕ್ಯಾಂನಿ ಆದಾನ್ ತಾಪಯ್ತಾ
ರಿಕಾಮ್ಯಾ ಮೊಡ್ಕೆಂತೀ ಪೇಜ್ ಶಿಜಯ್ತಾ.
ಅಗೋಸ್ತ್ ಮಯ್ನ್ಯಾಚಿ 31 ತಾರಿಕ್ ಎಚ್ಚೆಮ್ ಆನಿ ವಿಲ್ಸನ್ ಕಟೀಲ್ ಹ್ಯಾ ದೊಗಾಂಯ್ ಕವಿಂಕ್ ಭೋವ್ ಸಂಭ್ರಮಾಚೊ, ಕಿತ್ಯಾಕ್ ತೊ ತಾಂಚೊ ದೊಗಾಂಯ್ಚೊ ಜಲ್ಮಾಚೊ ದೀಸ್. ಕೊಂಕ್ಣಿ ವರ್ತುಲಾಕ್ ಎಚ್ಚೆಮಾಚಿ ವಳೊಕ್ ಕರ್ಚಿ ಗರ್ಜ್ ನಾ; ಪ್ರಸ್ತುತ್ ಕೊಂಕ್ಣೆಚೊ ನಂಬರ್ - 1 ಕವಿ ಮ್ಹಣ್ಚ್ಯಾಂತ್ ದೋನ್ ಉತ್ರಾಂ ನಾಂತ್. ಎದೊಳ್ಚ್ಚ್ ಸ್ವತಾಚೆ ತೀನ್ ಕವಿತಾಜಮೆ ಪರ್ಗಟ್ಲ್ಯಾತ್.
ವಿಲ್ಸನ್ ಕಟೀಲ್ ಪ್ರಾಯೆನ್ ತರ್ನೊ, ತರ್ಯೀ ಚಿಂತ್ಪಾಂತ್ ಪ್ರಭುದ್ದತಾ ಆಸ್ಚೊ, ಕವಿ, ವಿಮರ್ಶಕ್. ಹ್ಯಾ ದೊಗಾಂಯ್ ಥಾವ್ನ್ ಕೊಂಕ್ಣಿ ಸಾಹಿತ್ಯಾಕ್, ಪ್ರತ್ಯೇಕ್ ಜಾವ್ನ್ ಕೊಂಕ್ಣಿ ಕವಿತಾಶೆತಾಂತ್ ಮೊಟಿ ದೇಣ್ಗಿ ಆಶೆವ್ಯೆತಾ. ಎಚ್ಚೆಮ್ ಆನಿ ವಿಲ್ಸನ್ - ತುಮ್ಕಾಂ ಸರ್ವ್ ದಾಯ್ಜ್ ವಾಚ್ಪ್ಯಾಂ ತರ್ಫೆನ್ ರಾಸ್ ರಾಸ್ ಉಲ್ಲಾಸ್.
ಕಾಳ್ಜಾಂತ್ಲಿ ಕವಿತಾ
ವಿಲ್ಸನ್ ಕಟೀಲ್
[ವಿಲ್ಸನ್ ಕಯ್ಯಾರಾನ್ ಸೊಡಯಿಲ್ಲೆಂ]
ಬಾಯ್ಲಾ ನಾಚ್ತೆಲೆ
ಪಾಂತಿಯೆ ಪರ್ಯಾಂತೀ ಪಾವಾನಾತ್ಲೆ
ಮಿಡ್ಲ್ ಕ್ಲಾಸ್ ದಾದ್ಲೆ ಆಮಿ
ಕಾಂಯ್ ಆಪ್ರೂಪ್ ಆಮ್ಚ್ಯೆ ಜಿಣಿಯೆಂತೀ
ವಸಂತ್ ಫುಲ್ತಾ.
ತೆನ್ನಾ...
ಕಬಾಟಾಂತ್ ಗುಟ್ಲಿ ಜಾಲ್ಲೆಂ
ಪರ್ನ್ಯಾ ಫೆಶಾನಾಚೆಂ ಪ್ಯಾಂಟ್ ಆಂರ್ದುನ್
ಇಸ್ತ್ರೆಚಿ ಊಬ್ ಲಾಗಾನಾತ್ಲೆಂ
ಮಿರಿಯಾಳೆಂ ಖೊಮಿಸ್ ಖೊವವ್ನ್
ನವೆಚ್ ಬೈಕೊಫ್ ಸ್ಲಿಪ್ಪರಾಂ ಶಿರ್ಕಾವ್ನ್
ಭಾಯ್ರ್ ಪಡ್ತಾಂವ್
ಕಾಜಾರಾ ಸಾಲಾಂತ್.
ಆಮ್ಚ್ಯಾ ವಸಂತಾಕ್ ಪರ್ಮಳ್ ವಾಂಟ್ತಾತ್
ಕರ್ಪೂರ್ ಗುಳಿಯೊ.
ಹೊಕಾಲ್ ಸಾಡಿ ನ್ಹೆಸೊಂಕ್ ವೆಚೊ
ಜೊಕ್ತೊ ವೇಳ್ ವಿಂಚುನ್ ನಿಸ್ರತಾಂವ್
ತಾಂಬ್ಡೊ ಬೋರ್ಡ್ ಸೊಧುನ್
ಹಾತಿಂ ಗಿಲಾಸ್ ಘೆವ್ನ್
ನವ್ರ್ಯಾಚ್ಯಾ ಪಾಡ್ತಿಚೆ ತರ್
ಸಾಂಜೆರ್ ಬೊತ್ಲ್ಯೊ ಲಕ್ತಿತ್ಗಿ
ಮ್ಹಣ್ ದುಭಾವ್ ಉಚಾರ್ತಾಂವ್
ಹೊಕ್ಲೆಗೆಲೆ ತರ್ ತಿಚಿಂ
ಆಂಕ್ವಾರ್ಪಣಾಚಿಂ ಕರ್ತುಬಾಂ
ಮಾತ್ಸೊ ಚಡ್ಚ್ ಮಸಾಲೊ ಲಾವ್ನ್
ಜಿಬೆರ್ ಘೊಳಯ್ತಾಂವ್
ಆಮ್ಚೊ ವಸಂತ್ ಪಿಕ್ತಾ
ಸೊರ್ಯಾಚ್ಯಾ ಪರ್ಮಳಾಂತ್.
ಪರತ್ ಸಾಲಾಕ್ ಪಾವೊನ್
ಆಯ್ತೆ ಜಾತಾಂವ್
ಬಾಯ್ಲಾ ನಾಚೊಂಕ್.
ಹಾತ್ ಉಸಯ್ತಾನಾ ತೋಂಡ್ ಉಗಡ್ಚೆ
ಖೊಮ್ಸಾ ಖಾಕಿಯೆಂತ್ಲೆ ಬುರಾಕ್
ಸುಟ್-ಬುಟ್ ವಾಲ್ಯಾಂಕ್
ಲಜೆರ್ ಘಾಲ್ತಾತ್.
ತಾಂಬ್ಶೆಲ್ಲ್ಯಾ ಪಾತ್ಕಿ ದೊಳ್ಯಾಂನಿ
ಚೊಯ್ಲೆಂ ತರ್
ಮಾದ್ರಿಚ್ಯಾ ಧವ್ಯಾ ಮುಸ್ತಾಯ್ಕೆರ್ಯೀ
ಲಜ್ ಚರ್ಲ್ಲಿ ದಿಸ್ತಾ ಆಮ್ಕಾಂ
ನಾಚ್ಚ್ಯಾ ಆಮ್ಸೊರಾಂತ್ ಕಾಂಯ್
ತರ್ನ್ಯಾ ಚೆಡ್ವಾಚೆ ಬಾವ್ಳೆ ಆಧಾಳ್ತಾನಾ
ಉಟ್ಚೊ ಕಾಳಿಜ್ ಚೆಂಚ್ಲ್ಲೊ ಆವಾಜ್
ಬೆಂಡಾ ವಾಜ್ಪಾಂತ್ ಲಿಪೊನ್ ವೆತಾ.
ನಾಚ್ತಾಂವ್ ನಾಚ್ತಾಂವ್..
ಘಡಿಭರ್ ಕೊಣ್ ನಶಿಬ್ವಂತಾಚ್ಯಾ
ಕಪಾಲಾರ್ ಗಿಚ್ಚಿಲ್ಲಿ
ಸುಖಾಚಿ ಕವಿತಾ ವಾಚ್ತಾಂವ್.
ಪಾಂತಿಯೆ ಪರ್ಯಾಂತೀ ಪಾವನಾತ್ಲೆ
ಮಿಡ್ಲ್ ಕ್ಲಾಸ್ ದಾದ್ಲೆ ಆಮಿ
ಕಾಂಯ್ ಆಪ್ರೂಪ್ ಆಮ್ಚ್ಯೆ ಜಿಣಿಯೆಂತೀ
ವಸಂತ್ ಫುಲ್ತಾ.
ತೆನ್ನಾ...
ಹೊರ್ಬೊಸ್ ಲಾಗ್ಲ್ಲೆ ಬರಿ ನಾಚೊನ್
ನವ್ಯಾ ಹೊಕ್ಲೆಕ್ ಕದೆಲಾರ್ ಬಸವ್ನ್
ಆಮ್ಚ್ಯಾ ತಾಂಕಿ ಪ್ರಾಸ್ ವರ್ತ್ಯಾನ್
ಊಂಚ್ ಉಭಾರ್ತಾಂವ್!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.