ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾ: ಬಾಯೆಚೆಂ ರಿಜಲ್ಟ್ ಆಯಿಲ್ಲೆಂ
ಪಂಚು ಬಂಟ್ವಾಳ್: ಕೊಂಕ್ಣೆಂತ್ ಅಪ್ರೂಪಾಯೆನ್ ಕಾಣ್ಯೊ ಕವಿತಾ ಬರಯ್ತಾ ತರ್ಯೀ ಅಪುರ್ಭಾಯೆಚ್ಯೊ ಕಾಣ್ಯೊ ಬರಂವ್ಚಾಂತ್ ಎದೊಳ್ಚ್ ಫಾಮಾದ್. ಪಾಟಾಪಾಟ್ ತೀನ್ ವರ್ಸಾಂನಿ ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ಲ್ಯಾ ಮಟ್ವ್ಯಾ ಕಾಣ್ಯಾಂಚಾ ವಿಭಾಗಾಂತ್ ಪಯ್ಲೆಂ ಇನಾಮ್ ಹಾಣೆಂ ಜೊಡ್ಲಾಂ. ’ಕಾಣಿಕ್’ ಪತ್ರಾಚೊ ಸಹ-ಸಂಪಾದಕ್ ಜಾವ್ನ್ ವಾವ್ರ್ ಕೆಲ್ಲೊ ಹೊ ಪ್ರಸ್ತುತ್ ’ಝೆಲೊ’ ಪತ್ರಾಚೊ ಸಂಪಾದಕ್ ಜಾವ್ನಾಸಾ.
ಪಂಚು ಬಂಟ್ವಾಳಾಚ್ಯೊ ಹೆರ್ ಮಟ್ವ್ಯೊ ಕಾಣ್ಯೊ: ಅಶೀಯ್ ಏಕ್ ಪೊಲಿಸ್ ಕೇಜ್
ಪಂಚು ಬಂಟ್ವಾಳ್
’ದುಜಾಮಾನ್ ಸಯ್ರಿಕ್
ಹಾಡ್ನ್ ಯೆತಾಂ’ ಮ್ಹಣ್ ಸಾಂಗ್ಲ್ಲ್ಯಾ ಉಪ್ರಾಂತ್ಯಿ ’ಶೈಲಾ ಕೊಲೆಜಿಕ್ ಗೆಲಾಂ’ ಮ್ಹಳ್ಳೆಂ ಆಯ್ಕಾತಾನಾ
ಮಾಂಯ್ಕ್ ಖಂಯ್ ನಾತ್ಲ್ಲೊ ರಾಗ್ ಆಯಿಲ್ಲೊ. ’ಸಗ್ಳ್ಯಾ ಚಿಕ್ಕಹಳ್ಳೆಂತ್,
ಸಗ್ಳೊ ಲೋಕ್, ಕೊಣಾ ಕೊಣಾ ಸಾಂಗತಾ ಹಾಕಾ ಬಾಂದುನ್ ದಿತಾನಾ, ತೆಂ ಆಯ್ಕೊನ್ಯಿ
ವೊಗೆಚ್ಚ್ ರಾವೊಂಕ್ ಜಾತಾ? ತಿ ಹುಂಕಾರ್ಲಿ.
"ಪೊರ್ವಾಂ ಪಬ್ಲಿಕ್ ಪರೀಕ್ಶಾ ಖಂಯ್.....ಹೊಲ್ ಟಿಕೆಟ್
ಹಾಡುಂಕ್ ಮ್ಹಣ್ ಗೆಲಾಂ" ಮ್ಹಣ್ ರೊಬರ್ಟಾನ್ ಸಾಂಗ್ತಾನಾ
ಮಾಂಯ್ ಸಗ್ಳಿಚ್ಚ್ ಖೆಂವ್ಚಾಲಿ. "ಕೊಲೆಜಿಕ್ ದಾಡ್ಚೆಂ
ನಾಕಾ ನಾಕಾ ಮ್ಹಣ್ ಸಾಂಗ್ತಾನಾ ಮ್ಹಜ್ಯಾ ದಾದ್ಲ್ಯಾಕ್
ಸೈಲಾಪಾನ್ ಮಸ್ಕೊ ಮಾರ್ನ್, ತ್ಯಾ ಸಿಸ್ಟರಾಂಚ್ಯಾ ಉತ್ರಾಂಕ್
ಸಯ್ ಘಾಲ್ಲಿ. ಬಿಡಿಯೊ ಬಾಂದುನ್ ಬಸ್ಲ್ಲೆಂ ತರ್ ಘರಾಚ್ಚ್ ಆಸ್ತೆಂ.......ವಾರ್ಯಾ ಖಬ್ರೊಯಿ ಆಸ್ತ್ಯೊನಾಂತ್, ಕಾನ್
ಮತ್ ವಿರಾರಾಯ್ ಜಾತಿ ನಾ......"
ದುಜಾಮಾನ್ ಕಿತ್ಲ್ಯಾ ವೊರಾರ್ ಯೆತಾಂ ಮ್ಹಣ್ ಕಾಂಯ್
ಸಾಂಗೊಂಕ್ ನಾತ್ಲ್ಲೆಂ. ನ್ಹಂಯ್.....ಆತಾಂಚ್ ಆಯ್ಲೊ ಮ್ಹಣ್ ಚಿಂತ್ಯಾ.....ಹೆಂ ಘಾಣುಡ್ಡೆ ಕೊಲೆಜಿಕ್ ಗೆಲ್ಲೆಂ
ಲ್ಲೆ ಲ್ಲೆ ಲ್ಲೆ ಘಾಲ್ನ್ ಕೆದಾಳಾ ಪಾಟಿಂ ಯೇತ್ ಮ್ಹಣ್?
ಪುರ್ಪುರ್ತಾನಾ ಪೂತ್ ರೊಬರ್ಟ್ ಮ್ಹಣಾಲೊ ’ಸಾಡೆ ಧಾ
ವೊರಾಂ ಬಿತರ್ ಪಾಟಿಂ ಯೇವ್ನ್ ಪಾವ್ತಾಂ’ ಮ್ಹಳಾಂ ಬಾಯೆನ್
’ತಾಕಾ ಕೊಲೆಜಿಕ್ ವೆಚೆಂ ನಾಕಾ ಮ್ಹಳ್ಳೆಂ ಮೂರೆ?"
"ತುಂ ಏಕ್ ಕಾಲೆಂ ಮಾಂಯ್...... ಸಗ್ಳಿಂ ದೋನ್ ವರ್ಸಾಂ ಶಿಕೊನ್, ಆಖ್ರೇಕ್
ಪರೀಕ್ಶಾ ದೀನಾತ್ಲ್ಯಾರ್ ಕಿತೆಂ ಫಾಯ್ದೊ? ರೊಬರ್ಟಾನ್ ಒಕ್ಕಾಣೆಂ ಘಾಲೆಂ.
"ಪರೀಕ್ಶಾ ದೀವ್ನ್ ಕೊಣಾಕ್ ಕಿತೆಂ ದೀಂವ್ಕ್ ಆಸಾರೆ? ಹಾಚ್ಯಾ ಕರ್ತುಂಬಾಂಚಿಂ ಘಡ್ಪಾಂ ಆಯ್ಕಾತಾನಾ
ಪಾಟಿಚೆಂ ಚಾಮ್ಡೆಂ ವೋಡ್ನ್ ಮೀಟ್ ಘಾಲ್ನ್ ಬಾಜ್ಯಾಂ ಮ್ಹಣ್
ಬೊಗ್ತಾ"
"ತುಕಾ ಬೊಗುಂಕ್ ಪೂರಾಯಿ ಬೊಗ್ತಾ......ಹಾಂವ್ ನಾತ್ಲ್ಲೊಂ ತರ್ ತುಂ ತಾಕಾ ಜಿವೆಂಚ್
ಪುರುಂಕ್ಯಿ ಪುರ್ತೆಂಯಿ......ಕೊಲೆಜಿಕ್ ಹಾಂವೆಂಚ್ ದಾಡ್ಲ್ಲೆಂ.
ವೆಗಿಂ ಯೆತೆಲೆಂ.....ಚಿಕ್ಕೆ ಜೀಬ್ ಸಾಂಬಾಳ್.....ಗಾದ್ಯಾಕ್ ಕಾಮಾಕ್ ಗೆಲ್ಲೊ
ಶೈಲಾಚೊ ಬಾಪುಯ್ ವಿನ್ಸಿ ಸಕಾಳಿಂಚಿ ಪೇಜೆ ಖಾತಿರ್ ಘರಾ ಯೆತಾನಾ ಯೆಜ್ಮಾನಿಚೆ ಘಾಂಟಿಕ್
ಪಾಟಿಂ ಜಾಪ್ ದೀವ್ನ್ ಬಿತರ್ ಸರ್ಲೊಂ.
"ತುಕಾ ಗೊತ್ತುನಾತ್ಲ್ಲೆಂಯೆ ತರ್......ದುಜಾಮಾನ್
ಸೈರಿಕ್ ಹಾಡ್ತಾಂ ಮ್ಹಳ್ಳೆಂ....." ಖೆಂವ್ಚಾಲಿ ಮಾಂಯ್.
"ಗೊತ್ತು ಆಸಾ....ಆಜ್ಚ್ಚ್ ಕಾಜಾರ್ ಕರುಂಕ್ ಚೆಡ್ವಾಕ್ ಖಂಯ್
ಪ್ರಾಯ್ ಜಾಲ್ಯಾ..? ತುಜ್ಯಾ ಆಮ್ಸೊರಾಕ್.....ಭುರ್ಗ್ಯಾಂಚ್ಯಾ ಫುಡಾರಾಕ್ ಆಡ್ಕಳ್
ಹಾಡ್ಚೆಂ ಪ್ರೇತನ್ ತುಂ ಕರ್ತಾಯ್.....’ ಧುವೆಚಿ ಪಾಡ್ತ್ ಘೆವ್ನ್
ಬಾಪುಯ್ ಉಲಯ್ತಾನಾ, ಮಾಂಯ್ ಪುರ್ಪುರೊನ್ ರಾಂದ್ಚ್ಯಾ ಕುಡಾಕ್ ಗೆಲಿ.
ಬೊಶ್ಯೆಂತ್ ಪೇಜ್ ಆನಿಂ ಚೆಟ್ಣಿಂ ಹಾಡ್ನ್ ಮುಖಾರ್ ದವರ್ತಾನಾ
ಪರತ್ ಪುರ್ಪುರೊನ್ ಮ್ಹಣಾಲಿ ’ಆಯ್ಚಿ ಸೈರಿಕ್ ಬರ್ಯಾಂತ್ಲಿ ಬರಿ ಖಂಯ್.......ದಾಕ್ತೆರ್ನಿಂ ಶಿಕ್ಲ್ಲೊ ಭುರ್ಗೊ ಖಂಯ್....ದುಬ್ಳ್ಯಾ ಕುಟ್ಮಾಂತ್ಲೆಂ ಚೆಡುಂ ಜಾಯ್
ಮ್ಹಣ್ತಾಲೊ ಖಂಯ್....ಆಸಲಿ, ಸಯ್ರಿಕ್ ಆನಿಂ ಸಗ್ಳ್ಯಾ ಆಮ್ಚಾಂ ಜಲ್ಮಾಂತ್
ಮೆಳ್ಚಿನಾ. ಜರ್ತರ್ ಶೈಲಾ ವೆಗ್ಗಿಂ ಆಯ್ಲೆಂನಾ ಹಾಂವ್ ಪುಣೀ ಘರಾ ರಾಂವ್ಚಿನಾಂ...."
ಮಣ್ತಾನಾ ಶೈಲಾ ಘರಾ ಬಿತರ್ ರಿಗ್ಲೆಂಚ್. ದೊಳ್ಯಾಂತ್ ಕಿಟಾಳಾಂ ಉಬ್ಜೊಂಚಾಪರಿಂ ದೊಳೆ
ವಾಟಾರ್ನ್ ಶೈಲಾಕ್ ಪಳೆಯಿತ್ತ್ ದಡಬಡಾ ಆವಾಜ್ ಕರಿತ್ತ್
ಮಾಂಯ್ ಬಿತರ್ ಗೆಲಿ.
ಶೈಲಾ ಮ್ಹಾಕಾ ಪಳೆವ್ನ್ ಕಿಸ್ಕ್ ಕರ್ನ್ ಹಾಸ್ಲೆಂ.....
"ಬಾಯೆ ಹೆಂಚ್ ವಸ್ತುರ್ ಆಸೊಂದಿ.........ಹ್ಯಾ ವಸ್ತುರಾಚೆರ್ ತುಂ
ಸೊಬಿತ್ ದಿಸ್ತಾಯ್...ಮಾಗಿರ್ ದುಜಾಮಾ ಸಾಂಗಾಂತಾ ಯೆತಾ ಪಳೆ ತೊ.......ಮ್ಹಜೊ
ಮುಖ್ಲೊ ಬಾವೊಜಿ.......ತುಕಾ ಖಂಡಿತ್ ಪಸಂದ್ ಕರ್ತಾಲೊ...."
ಹಾಂವೆಂ ಸಾಂಗ್ತಾನಾ ಬಾಯ್ ಮ್ಹಜೆಂ ಸರ್ಶಿನ್ ಯೇವ್ನ್
ಬಸ್ಲೆಂ.
"ಮಾಕಾ ಮಾತ್ರ್ ಇತ್ಲೆಂ ವೆಗ್ಗಿಂ ಕಾಜಾರ್ ಜಾಂವ್ಕ್ ಮನ್
ನಾ ರಿತಾ......" ಆನಿಕ್ಯಿ ಸಗ್ಳೊ ದೇಡ್ ಮಹಿನೊ ಆಸಾ ಪರೀಕ್ಶೆಚೊ......ಶಿಕೊಂಕ್ ಆಸಾ.....
ಮಾಂಯ್ ಕಿತ್ಯಾಕ್ ಆಶೆಂಯ್ ಆಮ್ಸೊರ್ತಾಗಾಯ್?"
"ತೆಂ ಸುಲಭ್ ಆಸಾ ಬಾಯೆ.....ಬಾವೊಜಿಚ್ಯಾ ಕಾನಾಂತ್
ಹಾಂವ್ ಪರೀಕ್ಶೆಚೊ ವಿಷಯ್ ಸಾಂಗ್ತಾಂ.....ಏಕ್ ದೋನ್
ಮಹಿನೆ ತೊ ರಾಕ್ತಲೊ....." ಹಾಂವೆಂ ಸಾಂಗ್ತಾನಾ ಬಾಯೆನ್ ಅಮ್ರುಕ್ಯೊ
ಹಾಸೊ ದಾಕವ್ನ್ ಉಟ್ತಾನಾ, ಜಾಲಾಂತ್ ಪೆಟೊ ಘೊಂಕ್ಚೊ ಆಯ್ಕಾಲೊ.
ಸಗ್ಳ್ಯಾ ಚಿಕ್ಕಹಳ್ಳೆಂತ್ ಎದೊಳ್ ಮ್ಹಣಾಸರ್ ಕೊಣ್ಯಿ ಕೊಲೆಜಿಚೆಂ
ಮೇಟ್ ಚಡೊಂಕ್ ನಾತ್ಲ್ಲಿಂ - ಶಿಕ್ಪಾ ಖಾತಿರ್.....ಚಿಕ್ಕಹಳ್ಳೆಂಚ್ಯಾ ಬಗ್ಲೆಕ್ ಆಸ್ಚ್ಯಾ ಗಾಂವಾಂತ್ ಕೊಳಕೆಬೈಲಾಂತ್ ಸಿಸ್ಟರಾಂನಿ ಯೇವ್ನ್
ಹೈಸ್ಕೂಲ್ ಸುರು ಕೆಲ್ಯಾ ಉಪ್ರಾಂತ್ ಬಾಬಾನ್ ಶೈಲಾಕ್ ಆನಿಂ
ಮ್ಹಾಕಾ ಇಸ್ಕೊಲಾಕ್ ಭರ್ತಿ ಕೆಲ್ಲೆಂ. ಶೈಲಾ ಶಿಕೊಂಕ್
ಹುಶಾರ್ ಆಸ್ಲ್ಲೆಂ. ಘರಾ ಯೇವ್ನ್ ಕೆದಾಳಾರೀ ತೆಂ ಬೂಕ್ಚ್ಚ್ ಆಪಡಿನಾತ್ಲ್ಲೆಂ. ತರ್ಯಿ
ಪರೀಕ್ಶೆಂತ್ ಸದಾಂ ತೆಂ ’ಫಸ್ಟ್’ ಯೆತಾಲೆಂ. ಕ್ಲಾಸಿಂತ್ ಶಿಕಯ್ತಾನಾ ಕಾಂಯ್ ಇಲ್ಲೆಂ ಚಡ್ಉಣೆಂ ಜಾಲ್ಯಾರ್ಯಿ ಶಿಕ್ಶಕಾಂತ್
’ತೆಂ ತಶೆಂ ನ್ಹಂಯ್, ಆಶೆಂ ಜಾಯ್ಜಾಯ್ ಆಸ್ಲ್ಲೆಂ....’
ಮ್ಹಣೊನ್ ತಿದ್ವಣ್ ಕರ್ನ್ ದಾಕಯ್ತಾಲೆಂ. ಆಶೆಂ ಜಾಲ್ಲ್ಯಾನ್
ಸಗ್ಳ್ಯಾ ಇಸ್ಕೊಲಾಂತ್ ಬಾಯೆಕ್ ಬರಿ ಮರ್ಯಾದ್. ಸರ್ವ್ ಟೀಚೆರಾಂ, ಸಿಸ್ಟರಾಂ ತಾಕಾ
ಮಾನ್ ದಿತಾಲಿಂ. ಥೊಡಿಂ ಮ್ಹಣ್ತಾಲಿಂ ಶೈಲಾಕ್ ಇಂಜಿನಿಯರಾಚಿ ತಕ್ಲಿ ಆಸಾ
ಮ್ಹಣೊನ್ ತರ್ ಹೆರ್ ಥೊಡಿಂ ಬಾಯೆಕ್ ’ಲೇಡಿ ವಿಶ್ವೇಶ್ವರಯ್ಯ’
ಮ್ಹಣೊನ್ ನಕ್ಲಾಂ ಕರ್ತಾಲಿಂ.
ಧಾವೆಚೆಂ ಪರೀಕ್ಶೆಂತ್ ಬಾಯೆಕ್ ’ಧಾವೆಂ ರೇಂಕ್’ ಮೆಳ್ಲ್ಲೆಂ.
ನೀಜ್ ಜಾವ್ನ್ ಪಬ್ಲಿಕ್ ಪರೀಕ್ಶೆಂತ್ ಬಾಯೆಕ್ ’ಫಸ್ಟ್’ ರೇಂಕ್ಚ್ ಮೆಳಾಜೆ ಆಸ್ಲ್ಲೆಂ. ಆಮ್ಚೆಂ ಇಸ್ಕೊಲ್ ಹಳ್ಳೆಚೆಂ ಇಸ್ಕೊಲ್ ಜಾಲ್ಲ್ಯಾನ್ ಥರ್. ಭೇದ್ ಕೆಲಾ ಕೊಣ್ಣಾ
ಮ್ಹಣ್ ಆಮ್ಚ್ಯಾ ಲೆಕ್ಕಾಚೊ ಮಾಸ್ಟರ್ಯಿ ಮ್ಹಣ್ತಾಲೊ.
ಹೈಸ್ಕೂಲ್ ಜಾತೆಚ್ಚ್ ಕೊಲೆಜಿಚ್ಯಾ ಶಿಕ್ಪಾಕ್ ಪೆಂಟೆಂಕ್ ವಚಾಜೆ ಆಸ್ಲ್ಲೆಂ.
ಬಾಬಾಕ್ ಧಾಡೂಂಕ್ ಮನ್ ಆಸ್ಲ್ಲೆಂ. ಪುಣ್ ಮಾಂಯ್ನ್
ಪೆಂಪಾರೆಂ ಪಯ್ಲೆಂಚ್ ವ್ಹಾಜಂವ್ಕ್ ಸುರು ಕೆಲ್ಲೆಂ. ’ಶೈಲಾ
ಬೀಡೀ ಬಾಂದುಂಕ್ ಘರಾ ಬಸೊಂದಿ’ ಮ್ಹಳ್ಳೆಂ ತೀರ್ಪ್ ತಿಣೆಂ
ದೀವ್ನ್ಯಿ ಜಾಲ್ಲೆಂ.
ಬಾಯೆಕ್ ಧಾವೆಂತ್ ರೇಂಖ್ ಮೆಳ್ಲ್ಲ್ಯಾನ್ ಸಿಸ್ಟರಾಂ ಘರಾಂ ಆಯಿಲ್ಲಿಂ. ಆನಿಂ
ಬಾಯೆಕ್ ಕೊಲೆಜಿಕ್ ಘಾಲಿಜೆಚ್ಚ್ ಮ್ಹಣ್ ಹಾಸ್ ಕರಿಲಾಗ್ಲಿಂ.
ಬಾಬಾನ್ ಖರ್ಚಾಚಿ - ವಾಟ್ ಮುಖಾರ್ ದಾಕಯ್ಲಿ. ಸಿಸ್ಟರಾಂನಿ ಥೊಡಿಂ ಕುಮಕ್
ಹಾಡವ್ನ್ ದಿವಯ್ತಾಂ ಮ್ಹಣ್ ಸಾಂಗ್ಲ್ಯಾರ್ಯಿ ಮಾಂಯ್ ಆಯ್ಕಾಲಿನಾ.
ಮಾಗಿರ್ ಫಿರ್ಗಜ್ ವಿಗಾರಾನ್ ಯೇವ್ನ್ ಸಾಂಗ್ತಾನಾಂ, ಮಾಂಯ್ಕ್ ಆಯ್ಕಾಜೆಚ್ಚ್
ಪಡ್ಲೆಂ. ಬಾಯೆಕ್ ಕೊಲೆಜಿಕ್ ಧಾಡ್ಚೆಂ ಮ್ಹಣ್ ತಿಣೆಂ ಒಪ್ವತಾನಾ,
ಮ್ಹಜೆಂ ಮಾತ್ರ್ ಶಿಕಾಪ್ ಆಟ್ವೆಂತ್ಚ್ಚ್ ಆರ್ಧ್ಯಾರ್ ಉರ್ಲೆಂ. ಘರ್ಚ್ಯಾ ಖರ್ಚಾಕ್ ಬಿಡಿಯೆಚೆಂ
ಸೂಪ್ ಮ್ಹಜ್ಯಾ ಉಸ್ಕ್ಯಾರ್ ಘೆಂವ್ಕ್ ಲಾಯ್ಲೆಂ.
ಬಾಯ್ ಕೊಲೆಜಿಕ್ ಗೆಲ್ಲೆ ಕಡೆನ್ ಬರೆಂ ಕರ್ನ್ ಶಿಕೊಂಕ್
ಲಾಗ್ಲೆಂ. ಸಕಾಳಿಂ ವೆಗ್ಗಿಂ ಭಾಯ್ರ್ ಸರ್ನ್ ತೆಂ ವೆತಾಲೆಂ.
ಪೆಂಟೆಂತ್ಲ್ಯಾ ಕೊಲೆಜಿಕ್ ವಚೊಂಕ್ ದೆಡಾ ವೊರಾಚಿ ವಾಟ್ ಚಲೊಂಕ್ ಮೆಳ್ತಾಲಿ. ಚಿಕ್ಕಹಳ್ಳೆಂ ಥಾವ್ನ್ ಕೊಲೆಜಿ
ಪರ್ಯಾಂತ್ ಬಸ್ಸ್ ನಾತ್ಲ್ಲೆಂ. ಕೊಳಕೆ ಬಯ್ಲಾ ಥಾವ್ನ್
ಪೆಂಟೆಂಕ್ ಬಸ್ಸಾರ್ ಗೆಲ್ಯಾರ್ಯಿ ದೇಡ್ ವೊರಾಂಚೊ ವೇಳ್ ಜಾಯ್
ಪಡ್ತಾಲೊ.
ಸುರ್ವೆಚ್ಯಾ ವರ್ಸಾ ಬಾಯೆಚೆಂ ಶಿಕಾಪ್ ಅಪುರ್ಬಾಯೆನ್ ಜಾಲೆಂ.
ಬಾಬ್ ಥಂಯ್ ಹಾಂಗಾಂ ರೀಣ್ ಹಾಡ್ನ್ ಬಾಯೆಕ್ ಬರೆಂ ಶಿಕಾಪ್
ದೀಜೆ ಮ್ಹಣೊನ್ ಹಟ್ಟಾಕ್ ಲಾಗ್ಲ್ಲೊ. ಪುಣ್ ಮಾಂಯ್
ಮಾತ್ರ್ ಸದಾಂ ’ಮುಕ್ಕಾಲ್’ ಉಡವ್ನ್ ಬಾಯೆಕ್ ಸೊವ್ತಾಲಿ.
’ಚೆಡ್ವಾಂನಿ ಶಿಕೊನ್ ಕಿತೆಂ ಸಂಸರಾಂತ್ ಸರ್ಗ್ ಬಾಂದುಂಕ್ ಆಸಾಯೆ? ಕಿತ್ಲೆಂ ಶಿಕ್ಲ್ಯಾರ್ಯಿ ರಾಂದ್ಚ್ಯಾ ಕುಡಾಂತ್ಲೊ ಘಸ್ಟೊ ಕಾಡೂಂಕ್
ನೈಂಗಿ?’..... ಆಶೆಂ - ತಶೆಂ ಮ್ಹಣ್ ಕುಲ್ಪಾಂ ಕಾಡ್ತಾಲಿ.....ಬಾಬ್
ಮಾಂಯ್ಕ್ ಸಮ್ಜಯ್ತಾಲೊ. ತರ್ಯಿ ಮಾಂಯ್
ಮಾತ್ರ್ ಬಾಯೆಚ್ಯೊ ಚುಕಿ ಸೊಧುನ್ ಕಾಡ್ಚೆಂ ರಾವಯ್ನಾತ್ಲ್ಲಿಂ.
ಮಾಂಯ್ಕ್ ಧುವಾಂಚೆರ್ ವಿಶೇಶ್ ಮೋಗ್ ನಾತ್ಲ್ಲೊ.....ಮಾಂಯ್ನ್ ಕೆದಾಳಾಯಿ
ಪುತಾಚೊಚ್ಚ್ ಮೋಗ್ ಕರ್ಚೊ....ತಾಕಾ ಪುಗಾರ್ಚೆಂ ಆಸ್ಲ್ಲೆಂ.... ರೊಬರ್ಟ್ ಘರ್ಚೊ ಯೆಜ್ಮಾನ್ ಮ್ಹಳ್ಳೆಂ
ಪರಿಂ ಕಾರ್ಭಾರ್ಪಣ್ ಚಲಂವ್ಕ್ ತಾಕಾ ಮಾಂಯ್ ಶಿಕಯ್ತಾಲಿ.
ಪೂಣ್ ರೊಬರ್ಟಾಕ್ ಬಾಯೆಚೆರ್ ಬರೊ ಹುಸ್ಕೊ ಆಸ್ಲ್ಲ್ಯಾನ್, ಬಾಯೆವಿಶಿಂ ಕಾಂಯ್ ಕಿತೆಂ ಉಲಂವ್ಕ್ ಆಸ್ಲ್ಯಾರ್ ರೊಬರ್ಟಾಕ್ಚ್ಚ್
ಮಾಂಯ್ ಸರ್ಶಿಂ ಉಲಂವ್ಕ್ ಧಾಡ್ಚೆಂ ಆಸ್ಲ್ಲೆಂ.
ತ್ಯಾ ಎಕಾ ದೀಸಾ ಸಗ್ಳ್ಯಾ ಚಿಕ್ಕಹಳ್ಳೆಂತ್ ಗುಸುಗುಸು ಖಬಾರ್ ಜಾಲ್ಲಿ.
ಶೈಲಾಚಿಚ್ಚ್ ಖಬಾರ್ ತಿ.
’ಶೈಲಾಚ್ಯಾ ಕೊಲೆಜಿಚೊ ಲೆಕ್ಚರರ್, ಲೆಕಾಂ ಶಿಕಂವ್ಚೊ
ಪುಂಡಲಿಕ್ ಆನಿಂ ಶೈಲಾ ಕೊಡ್ಯಾಳ್ ಪಿಕ್ಚರ್ ಪಳೆಂವ್ಕ್ ಗೆಲ್ಯಾಂತ್’ ಮ್ಹಳ್ಳಿಂ ಖಬಾರ್ ರೊಬರ್ಟಾಕ್
ವಾಟೇರ್ ಕೊಣೆಂ ಸಾಂಗ್ಲ್ಲೆಂ ಕೋಣ್ ಜಾಣಾಂ....ರೊಬರ್ಟಾನ್ ಆಯ್ಕಾಲ್ಲಿ ಖಬಾರ್ ಎಕಾಕ್ - ದೋನ್ ಕುಡ್ಸುನ್
ಮಾಂಯ್ಕ್ ಸಾಂಗೊನ್ ಸೊಡ್ಲೆಂ. ಆಣಿಂ ಮಾಂಯ್ನ್ ಪಿಡೋ ಕಾತರ್ನ್
ಹಾಡ್ನ್ ಶೈಲಾಚೊ ವಿಚಾರ್ ಕೆಲೊ.
’ತುಕಾ ಕೊಲೆಜಿಕ್ ದಾಡ್ಲ್ಲೆಂ ಶಿಕೊಂಕ್ ....ತುಜ್ಯಾ ಮಾಸ್ಟ್ರಾ
ಸಾಂಗಾಂತಾ ಮಿರಂವ್ಕ್ ನ್ಹಂಯ್....’ ಮ್ಹಣೊನ್ ಮಾಂಯ್ನ್
ಸರ್ಸರಿತ್ ಬಡಯ್ತಾನಾ, ಬಾಯೆಚ್ಯಾ ಬೊಬೆಕ್ ಹಾಂವ್
ಸಗ್ಳಿಂಚ್ಚ್ ರಡ್ಲ್ಲಿ. ’ಹಾಂವ್ ಪಿಕ್ಚರಾಕ್ ವಚೊಂಕ್ ನಾತ್ಲ್ಲಿ
ಮಾಂಯ್...’ ಮ್ಹಣ್ ಬಾಯೆನ್ ಸಾಂಗ್ಲ್ಯಾರ್ಯಿ ಮಾಂಯ್ ಆಯ್ಕಾಲಿಚ್ಚ್
ನಾಂ. ಬಾಬ್ ಕಾಮಾ ಥಾವ್ನ್ ಪಾಟಿಂ ಯೆತಾನಾ ಬಾಯೆಚೆಂ ಆಂಗ್
ಸಗ್ಳೆಂ ಸುಜ್ಲ್ಲೆಂ. ಗೊರ್ವಾಂಕ್ ಮಾರ್ಚ್ಯಾಕ್ಯಿ ಫಾಸ್ಟ್
ಮಾಂಯ್ನ್ ಬಾಯೆಕ್ ಮಾರ್ಲ್ಲೆಂ.
ಬಾಬಾನ್ ವಿಚಾರ್ತಾನಾ ಬಾಯೆನ್ ಸತ್ ಗಜಾಲ್ ಸಾಂಗ್ಲ್ಲಿಂ.
’ಲೆಕ್ಕಾಂತ್ ಬಾಯ್ ಹುಶಾರ್.... ದೆಕುನ್ ಲೆಕಾಂ ಶಿಕಂವ್ಚಾ
ಪುಂಡಲಿಕ್ ಲೆಕ್ಚರರಾನ್ ಕೊಡ್ಯಾಳಾಂತ್ ಬೋವ್ ನಾಂವಾಡ್ದಿಕ್
ಲೆಕ್ಚರರ್ ಆನಿಂ ಕೊಲೆಜಿಚೆಂ ಲೆಕ್ಕಾಚೆ ಬೂಕ್ ಬರಂವ್ಚ್ಯಾ ತಸಲ್ಯಾಲಾಗಿಂ ಥೊಡಿ
ಮಾಹೆತ್ ಜೊಡ್ಯೆತ್ ಮ್ಹಳ್ಳ್ಯಾ ಖಾತಿರ್ ಆಪವ್ನ್ ವ್ಹೆಲ್ಲೆಂ
ಮ್ಹಣ್. ಬಾಬಾಕ್ ಖುಶಿ ಜಾಲ್ಲಿ. ಪುಣ್ ಕಿತೆಂ ಕರ್ಚೆಂ.......ಮಾಂಯ್
ಮಾತ್ರ್ ಬೊಬಾಟುನ್ ಮ್ಹಣ್ತಾಲಿ....’ತುಕಾ ಕೊಲೆಜಿಕ್ ದಾಡ್ನ್, ಆತಾಂ ತುಂ ಆಮ್ಚಿಂ
ಮರ್ಯಾದ್ ವಾರ್ಯಾರ್ ಉಬಯ್ತಾತ್...’
ಬಾಯ್ ತೀನ್ ದೀಸ್ ಕೊಲೆಜಿಕ್ ಗೆಲೆಂನಾ. ’ಬಾಯೆನ್ ಕೊಲೆಜಿಕ್
ವೆಚೆ ನಾಕಾ’ ಮ್ಹಣ್ ಮಾಂಯ್ನ್ ಮ್ಹಳ್ಳೆಂ. ಪ್ರಿನ್ಸಿಪಾಲ್ಚ್ಚ್ ಘರ್
ಸೊದುನ್ ಆಯಿಲ್ಲೊ. ಮಾಂಯ್ಕ್ ಬಾಬಾಕ್ ಸಮ್ಜಾವ್ನ್ ಗೆಲ್ಲೊಂ.
’ತುಜೆಂ ಧುವ್ ಶಿಕ್ಚಾಂತ್ ಹುಶಾರ್.... ಸಗ್ಳೆ ಕೊಲೆಜಿಕ್ ತಾಚೆ ತಿತ್ಲೆಂ
ಹುಶಾರ್ ಭುರ್ಗೆಂ ದುಸ್ರೆಂ ನಾ.....’ ಮ್ಹಣ್ತಾನಾ ಮಾಂಯ್ಕ್ಯಿ ತ್ಯಾ
ದಿಸಾ ಸಂತೊಸ್ ಜಾಲ್ಲೊ.
ಥೊಡೆ ದೀಸ್ ಆಶೆಚ್ಚ್ ಪಾಶಾರ್ ಜಾಲೆ.
ಆತಾಂ ಬಾಯ್ ಸದಾಂ ಕೊಲೆಜಿ ಥಾವ್ನ್ ಯೆತಚ್ಚ್ ಬಾರಾಂ, ಏಕ್
ವೋರ್ ಪರ್ಯಾಂತ್ ಚಿಮ್ಣಿಂ ದವರ್ನ್ ವಾಚ್ತಾಲೆಂ. ಹಾಂವ್ ರಾತಿಕ್ ತಾಕಾ ಚಾ ಕರ್ನ್ ದಿತಾಲಿಂ. ಥೊಡೆಂ
ಪಾವ್ಟಿಂ ಸಕಾಳಿಂ ಪರ್ಯಾಂತ್ ವಾಚುಂಕ್ ಬಸ್ತಾಲೆಂ.
ಏಕ್ ದೀಸ್ ಸಾಂಜೆರ್ ಬಾಯ್ ಘರಾ ಯೆತಾನಾ ಕಾಳೊಕ್ ಜಾಲ್ಲೊ.
ಮಾಂಯ್ನ್ ಬಾಯೆಚೊ ವಿಚಾರ್ ಕರ್ತಾನಾ, ಬಾಯೆನ್ ’ಸ್ಪೆಶಲ್ ಕ್ಲಾಸ್’ ಆಸ್ಲ್ಲಿ ಮ್ಹಳ್ಯಾರ್ಯಿ
ಮಾಂಯ್ ಪಾತ್ಯೆಲಿನಾ...’ಮಿರಂವ್ಕ್ ಗೆಲ್ಲೆಂಯಿಸ್ತಾ....’
ಮ್ಹಣ್ ಪುರ್ಪುರೊಂಕ್ ಲಾಗ್ಲಿ.
ದುಸ್ರ್ಯಾ ದಿಸಾ ಮಾಸ್ಳಿ ವಿಕ್ಚೊ ’ಅಬ್ಬುಬ್ಯಾರಿ’ನ್ ದುಸ್ರಿಚ್ಚ್ ಖಬಾರ್
ಹಾಡ್ಲ್ಲಿ. ’ಬಾಯಮ್ಮಾ.....ಹಾಂವೆಂ ಸಾಂಗ್ಚೆಂ ಮ್ಹಣೊನ್
ನ್ಹಂಯ್.... ತುಜೆ ಧುವೆಚೆಂ ಇಸ್ಕೊಲ್ ಆತಾಂಚ್ಚ್ ಬಂಧ್ ಕೆಲ್ಯಾರ್ ಬರೆಂ.
ಮ್ಹಣ್ತಾನಾ ಮಾಂಯ್ ದಡ್ಬಡ್ಲಿ. ’ತುಂಮ್ಚೆಂ ಧುವ್,
ಬೊಣ್ಕ್ಯಾಚಾ ಪುತಾ ಸಾಂಗಾಂತಾ ಮೇಳ್ ಘಾಲ್ತಾನಾ, ಹಾಂವೆಂ
ಮ್ಹಜಾಚ್ಚ್ ದೊಳ್ಯಾಂನಿ ಪಳೆಲಾಂ..... ಕೊಣಾಕೊಣಾಚ್ಯಾ
ಪುತಾ ಸಾಂಗಾಂತಾ ತಾಣೆಂ ಭಂವ್ಚ್ಯಾಕ್ಯಿ, ತುಮ್ಚೆಂ ಜಾತಿಂತ್ ಕೋಣ್ಯಿ ಚೆರ್ಕೆ
ನಾಂತ್ಯೆ ಬಾಯಮ್ಮಾ? ಏಕ್ಚ್ಚ್ ತುಂವೆಂ ತಾಕಾ ಕಾಜಾರ್ ಕರಿಜೆ.....
ನ್ಹಂಯ್ ತರ್ ಕೊಲೆಜಿಕ್ ಧಾಡ್ಚೆಂ ರಾವಂವ್ಚೆಂ ಬರೆಂ...’
ಮ್ಹಣ್ ಸಾಂಗ್ತಾನಾ ಮ್ಹಾಕಾ ಮೊಳಾಬ್ಚ್ಚ್ ಕೊಸ್ಳಾಲ್ಲೊ ಅನ್ಭೋಗ್ ಜಾಲೊ. ಅಬ್ಬು
ಬ್ಯಾರಿ ಎಕೀನ್ ಮನಿಸ್. ಫಟಿ ಮಾರ್ಚೊ ಮನಿಸ್ಚ್ಚ್ ನಂಯ್.
ಬಾಯೆ ಸಾಂಗಾಂತಾ ಬೊಣ್ಕೊ ಭೊವ್ಲ್ಲಿ ಖಬಾರ್ ಮಾತ್ರ್
ಸಗ್ಳ್ಯಾ ಚಿಕ್ಕಹಳ್ಳೆಂತ್ ಗಾಜ್ಲ್ಲಿ.
ಸಾಂಜೆರ್ ಮಾಂಯ್ನ್ ಬಾಬಾಸಂಗಿಂ ಲಡಾಯ್ ಕೆಲ್ಲಿ. ಬಾಯ್ ಕೊನ್ಶ್ಯಾಂತ್
ಬಸೊನ್ ರಡ್ತಾಲೆಂ. ತ್ಯಾ ದೀಸ್ ಮಾತ್ರ್ ಬಾಬಾನ್ಯಿ
ಪಯ್ಲೆಂ ಪಾವ್ಟಿಂ ಬಾಯೆಚೆರ್ ಹಾತ್ ಉಬಾರ್ಲ್ಲೊ. ರೊಬರ್ಟ್ ಆನಿಂ
ಹಾಂವ್ ಬಿಂಯಾನ್ ವೊಗೆಚ್ಚ್ ಎಕಾ ಕೊನ್ಶ್ಯಾಂತ್ ಬಸೊನ್ ಕಾಂಪ್ತೆಲ್ಯಾಂವ್.
’ಫಾಲ್ಯಾಂ ಥಾವ್ನ್ ಕೊಲೆಜಿಕ್ ವೆಚೆಂ ನಾಕಾ...’ ಮ್ಹಣ್ ಮಾಂಯ್ನ್ ತೀರ್ಪ್
ದೀವ್ನ್ ಜಾಲ್ಲೆಂ. ಬಾಯೆನ್ ರಡೊನ್ ’ಆನಿಂ ಪರೀಕ್ಶೆಕ್ ಖಾಲಿ ದೋನ್
ಮಹಿನೆ ಆಸ್ಚೆ....ದೋನ್ ವರ್ಸಾಂ ಶಿಕ್ಲ್ಲೆಂ ವ್ಯರ್ಥ್ ಜಾತಾ...’
ಮ್ಹಣ್ ಸಾಂಗ್ಲ್ಯಾರ್ಯಿ ಮಾಂಯ್ ಬಾಬ್ ಆಯ್ಕಾಲಿನಾಂತ್. ’ಹಪ್ತ್ಯಾ ಬಿತರ್ ತುಜೆಂ ಕಾಜಾರ್ ಕರ್ತಾಂವ್’
ಮ್ಹಣ್ ಮಾಂಯ್ನ್ ಸಪುತ್ ಘಾಲ್ಲೊ ಆನಿಂ ಸೈರಿಕೆಚ್ಯಾ
ಮ್ಹಾಲ್ಯಾಕ್ ದುಜಾಮಾಕ್ ಖಬಾರ್ ಸಾಂಗ್ತಾಂ ಮ್ಹಣಾಲಿ. ತ್ಯಾ
ದೀಸ್ ಸಕಾಳಿಂ ಬಾಯ್, ಮತ್ ಹಳೂ ಕರುಂಕ್ ಮ್ಹಣ್ ಸಕಳಿಂಚ್ಯಾ
ಮೀಸಾಕ್ ಇಗರ್ಜೆಕ್ ಗೆಲ್ಲೆಂ. ಘರ್ಚಿ ಗಜಾಲ್, ಪರೀಕ್ಷಾ, ಆನಿಂ ಕೊಲೆಜಿವಿಶಿಂ
ಪಾದ್ರ್ಯಾಬಾಲಾಗಿಂ ಉಲವ್ನ್ ಆಯ್ಲೆಂ. ಪಾದ್ರ್ಯಾಬಾನ್ ಭುಜವ್ನ್
ಬಾಬಾಲಾಗಿಂ ಆನಿಂ ಮಾಂಯ್ ಲಾಗಿಂ ಹಾಂವ್ ಉಲಯ್ತಾಂ ಮ್ಹಣಾಲೊ ಖಂಯ್.
ಘರಾ ಆಯಿಲ್ಲೆಂಚ್ ಬಾಯ್ ರಾಂದ್ಪಾಕುಡಾಕ್ ಯೆತಾನಾ ವೊಂಕೊಂಕ್ ಆಯಿಲ್ಲೆಪರಿಂ
ವೊರೊಡ್ ಕಾಡಿಲಾಗ್ಲೆಂ.
ಆತಾಂ ಮಾಂಯ್ಚಿ ಬೋಬ್ ಆಕಾಸಾಕ್ ತೆಂಕುಂಕ್ ಲಾಗ್ಲಿ. ’ಕೊಲೆಜಿಕ್
ವಚೊನ್ ಮರ್ಯಾದ್ ವಾರ್ಯಾರ್ ಉಬವ್ನ್ ಆಯ್ಲೆಂಯ್....’
ಮ್ಹಣ್ ಬಾಯೆಕ್ ಸುಶೆಗಾತ್ತ್ ಪೊಪಾಯ್ಲೆಂ. ಮಾಂಯ್ನ್
ಮಾರ್ಲ್ಲ್ಯಾ ಮಾರಾಂನಿ ಬಾಯ್ ಮತ್ ಚುಕೊನ್ ಪಡ್ಲೆಂ.
ಹಾಂವ್ ಕಿಂಕ್ರಾಟ್ಲಿಂ ಆನಿಂ ಧಾಂವೊನ್ ವಚೊನ್ ಬಾಬಾಕ್ ಆಪವ್ನ್
ಹಾಡ್ನ್ ಆಯ್ಲಿಂ. ಬಾಬಾನ್ ಬಾಯೆಕ್ ದಾಕ್ತೆರಾಸರ್ಶಿಂ ಆಪವ್ನ್
ವ್ಹೆಲೆಂ. ದಾಕ್ತೆರಾನ್ ’ಪೀಂತ್ ಉಚಾಂಬಳ್ ಜಾಲ್ಲ್ಯಾನ್ ಆಶೆಂ ಜಾಲಾಂ ಚಡ್
ನೀದ್ ಖಳೊಂಕ್ ನಜೊ’ ಮ್ಹಣ್ ಸಾಂಗೊನ್ ವ್ಹಕಾತ್
ದಿಲೆಂ. ಕಾರಣ್ ಕಳಿತ್ನಾಸ್ತಾಂ ದುಬಾವ್ ಕರ್ನ್ ಬಾಯೆಕ್
ಮಾರ್ಲ್ಲ್ಯಾ ಖಾತಿರ್ ಮಾಂಯ್ಕ್ ಬಾಬ್ ಜೋರ್ ಕರಿಲಾಗ್ಲೊ.
ಸಾಂಜೆರ್ ಪಾದ್ರ್ಯಾಬ್ ಘರಾ ಆಯಿಲ್ಲೊ. ಬಾಯೆವಿಶಿಂ ಉಲವ್ನ್,
ಮಾಂಯ್ಕ್ ಸಮಾಧಾನ್ ಕರ್ನ್, ಬಾಯೆಕ್ ಕೊಲೆಜಿಕ್
ವಚಾಶೆಂ ಕೆಲೆಂ. ಆನಿಂ ಕಾಲ್ಚೆಂ ಸಾಂಜೆರ್ ಸಯ್ರಿಕೆಚೊ ಮ್ಹಾಲೊ ಪಳೆಂವ್ಕ್
ಸಾಂಗ್ಲ್ಲಿ. ದೆಕುನ್ ಎಕಾ ದಾಕ್ತೆರಾಚಿ ಸಯ್ರಿಕ್ ಆಸಾ ಫಾಲ್ಯಾಂ ಯೆತಾಂವ್,
ಮ್ಹಣ್ ಸಾಂಗೊಂಕ್ ಆಯಿಲ್ಲೊ. ಬಾಯ್ ಸಕಾಳಿಂ ವೆಗ್ಗಿಂ ಉಟೊನ್, ರಾಂದುಂಕ್
ವೆತಾನಾ, ಮಾಂಯ್ ಆಶೆಂದ್ ಹಾಡುಂಕ್ ಇಗರ್ಜೆಕ್ ಗೆಲ್ಲಿ. ತ್ಯಾ ವೆಳಾರ್
ಬಾಯ್ ಹೊಲ್ ಟಿಕೆಟ್ ಹಾಡುಂಕ್ ಕೊಲೆಜಿಕ್ ಗೆಲ್ಲೆಂ......ವೆಗ್ಗಿಂ
ಪಾಟಿಂ ಆಯಿಲ್ಲೆಂ.
ಪೆಟೊ ಘೊಂಕ್ಲ್ಲೊ ಆವಾಜ್ ಆಯ್ಕೊನ್ ಬಾಬ್ ಪಳೆಂವ್ಕ್ ಗೆಲೊ. ದುಜಾಮಾ
ಸಾಂಗಾಂತಾ ತೆಗಾಂ ಸಯ್ರಿಂ ಆಸ್ಲ್ಲಿಂ. ಸಯ್ರಿಕೆಚ್ಯಾ ನಿಬಾನ್
ಮಾಂಯ್ನ್ ಕರ್ನ್ ದವರ್ಲ್ಲಿ ಕಾಫಿ ಬಾಯೆ ಕರ್ನಾ ಸಯ್ರ್ಯಾಂಕ್
ದಿವಯ್ಲಿ. ಬಾಯೆಕ್ ಸಯ್ರ್ಯಾಂ ಮುಖಾರ್ ಬಸವ್ನ್ ಉಲವ್ಣೆಂ ಚಲ್ಲೆಂ.
ನವ್ರೊ ಮ್ಹಣೊನ್ ವ್ಹಳಕ್ ಕರ್ನ್ ದುಜಾಮಾನ್
ಸಾಂಗ್ಲೆಂ.
’ಆಮ್ಚೊಂ ನವ್ರೊ ವಿಶೆಂತ್ ಗಾಂವಾನ್ ಕಾರ್ಕೊಳ್ಚೊ ....ದಾಕ್ತೆರ್ ಜಾವ್ನ್ ದುಬಾಯ್
ವಾವ್ರ್ ದೀವ್ನ್ ಆಸಾ....ದೋನ್ ಮಹಿನ್ಯಾಂಕ್ ಏಕ್ ಪಾವ್ಟಿಂ ಗಾಂವಾಕ್ ಯೆತಾ.
ಸ್ವಂತ್ ಆಸ್ಪತ್ರ್ ಆಸಾ’ ವ್ಹಳಕ್ ಸಾಂಗ್ತಾನಾ ಮಾಂಯ್ಕ್
ಬಾಬಾಕ್ ಖುಶಿ ಜಾಲ್ಲಿ. ನವ್ರ್ಯಾನ್ ಬಾಯೆಕ್ ಪಸಂದ್ ಕೆಲ್ಲೆಂ. ಉಪ್ರಾಂತ್ ದುಜಾಮ್
ಮ್ಹಣಾಲೊ. ’ತುಂಮ್ಕಾಂ ನವ್ರೊ ಖುಶಿ ಜಾಲೊ ತರ್, ಆಮ್ಚ್ಯಾ
ನವ್ರ್ಯಾಕ್ ಚೆಡ್ವಾಲಾಗಿಂ ವೊರೆವಿಂಗಡ್ ಉಲಂವ್ಕ್ ಆವ್ಕಾಸ್ ಕರ್ನ್
ದೀಜೆ’ ಮ್ಹಣ್ತಾನಾ ಮ್ಹಾಕಾ ಖುಶಿ ಜಾಲಿ. ’ಪರೀಕ್ಶಾ ದೇಡ್
ಮಹಿನೊ ಸಗ್ಳೊ ಆಸಾ ಜಾಲ್ಲ್ಯಾನ್ ಪರೀಕ್ಶಾ ಜಾತೆಚ್ಚ್ ಕಾಜಾರಾವಿಶಿಂ ಉಲವ್ಯಾಂ’
ಮ್ಹಣ್ ಬಾಯ್ ಖಂಡಿತ್ ಸಾಂಗ್ತೆಲೆಂ ಮ್ಹಣ್ ಹಾಂವೆಂ ಲೇಕ್ ಘಾಲ್ಲೆಂ.
ಬಾಯ್ ಆನಿಂ ನವ್ರೊ ವಿಂಗಡ್ ರಾವೊನ್ ಉಲಯ್ಲಿಂ. ಬಾಯ್ ಚಡ್ ಉಲಯ್ಲೆಂನಾ
ಪರೀಕ್ಶಾ ಕಾಬಾರ್ ಜಾತೆಚ್ಚ್ ಸಯ್ರಿಕೆವಿಶಿಂ ಉಲವ್ಯಾಂ ಮ್ಹಳ್ಳ್ಯಾಕ್
ನವ್ರ್ಯಾನ್ ಕಬ್ಲಾತ್ ದಿಲ್ಲಿ. ಉಪ್ರಾಂತ್ ನವ್ರೊ, ಸೈರಿಕೆಚೊ
ಮ್ಹಾಲೊ ದುಜಾಮಾಲಾಗಿಂ ಕಿತೆಂಗಿ ಉಲಯ್ಲೊ. ದುಜಾಮ್ ಘರ್ಚ್ಯಾಲಾಗಿಂ
ಮ್ಹಣಾಲೊ. ’ತುಂಮ್ಚ್ಯಾ ಚೆಡ್ವಾಕ್ ಆತಾಂ ಪರೀಕ್ಶಾ ಆಸ್ಲ್ಲ್ಯಾನ್ ಹೆ ರಜೆರ್ ಆಯಿಲ್ಲೊ
ನವ್ರೊ ವಿಶೆಂತ್ ಪರತ್ ಪಾಟಿಂ ವಚೊನ್ ದೋನ್ ಮಹಿನ್ಯಾಂನಿ
ಪಾಟಿಂ ಯೆತಾ. ತೆದಾಳಾ ಚೆಡ್ವಾಚಿ ಪರೀಕ್ಶಾ ಕಾಬಾರ್ ಜಾತಾ. ತ್ಯಾ ಉಪ್ರಾಂತ್ ಖರಾರ್ ಆನಿಂ ಕಾಜಾರ್ ದವರ್ಯಾಂ’
ಮ್ಹಣ್ತಾನಾ ಬಾಯೆಚೆಂ ತೋಂಡ್ ರುಂದಾಲೆಂ. ಮಾಂಯ್ಚೆಂ ತೊಂಡ್
ಮಾತ್ರ್ ಕರ್ಪಾಲೆಂ. ಬಾಬಾಕ್ ನವ್ರೊ ತಶೆಂ ತಾಚೆಂ ಉಲವ್ಣೆಂ
ಪಸಂದ್ ಜಾಲ್ಲೆಂ.
ಉಪ್ರಾಂತ್
ಬಾಯೆಚೆಂ ಸಗ್ಳೆಂ ಧ್ಯಾನ್ ಪರೀಕ್ಶೆಚೆರ್ ಖಂಚ್ಲ್ಲೆಂ. ಬಾಯೆನ್
ಪರೀಕ್ಶೆಂತ್ ಬರೆಂ ಕರ್ನ್ ಬರಯಿಲ್ಲೆಂ ಮ್ಹಳ್ಳೆಂ ತಾಚ್ಯಾ ಉತ್ರಾನಿಂಚ್ ಕಳ್ತಾಲೆಂ. ’ಹ್ಯಾ
ಪಾವ್ಟಿಂಚ್ಯಾ ಪರೀಕ್ಶೆಂತ್ ಆಪುಣ್ ಬರ್ಯಾ ಅಂಕಾನಿಂ ಪಾಸ್ ಜಾತೆಲಿಂ’
ಮ್ಹಣ್ತಾನಾ ಮ್ಹಾಕಾಯಿ ಸಂತೊಸ್ ಜಾಲೊ.
ಬಾಯೆಚಿ ಪರೀಕ್ಶಾ ಜಾಲ್ಲ್ಯಾ ಎಕಾ ಹಪ್ತ್ಯಾ ಉಪ್ರಾಂತ್ ದುಬಾಯ್ ಥಾವ್ನ್
ವಿಶೆಂತಿಚೆಂ ಕಾಗಾದ್ ಆಯ್ಲೆಂ. ’ಕಾಮಾಚಿ ರಾಟಾವಳ್ ಚಡ್ ಆಸ್ಲ್ಲ್ಯಾನ್
ಸದಾಂ ಯೆಂವ್ಚೆಂಪರಿಂ ದೋನ್ ಮಹಿನ್ಯಾನಿಂಚ್ ಹ್ಯಾ ಪಾವ್ಟಿಂ ಯೇಂವ್ಕ್ ಜಾಯ್ನಾ...... ಏಕ್
ಮಹಿನೊ ಚಡಿತ್ ರಾವೊನ್ ಯೆತಾಂ’ ಮ್ಹಣ್ ಬರಯಿಲ್ಲೆಂ.
ಬಾಯೆಕ್ಯಿ ಖುಶಿ ಜಾಲ್ಲಿ. ವಿಶೆಂತ್ ಗಾಂವಾಕ್ ಯೆತಾನಾ ರಿಜಲ್ಟ್ಯಿ ಯೇಂವ್ಕ್
ಪುರೊ, ಮ್ಹಳ್ಳೆಂ ಅಂದಾಜ್ ಲೇಕ್ ಬಾಯೆಚೆಂ...ಬಾಯ್
ಸದಾಂನೀತ್ ಸಕಾಳಿಂಚ್ಯಾ ಮಿಸಾಕ್ ವೆತಾಲೆಂ. ದೆವಾಲಾಗಿಂ ಮಾಗ್ತಾಲೆಂ...ಉರ್ಲ್ಲೊ
ಸಗ್ಳೊ ದೀಸ್ ಘರ್ ಕಾಮಾಂತ್ ಪಾಶಾರ್ ಕರ್ತಾಲೆಂ.
ಆನಿಂ ತೊ ದೀಸ್ ಉದೆಲೊ.
ದುಬಾಯ್ ಥಾವ್ನ್ ವಿಶೆಂತ್ ಗಾಂವಾಕ್ ಆಯಿಲ್ಲೊ ಆನಿಂ ಹೆಣೆಂ
ಬಾಯೆಚೆಂ ರಿಜಲ್ಟ್ಯಿ ಆಯಿಲ್ಲೆಂ.
ಬಾಯೆಕ್ ಸಗ್ಳ್ಯಾ ಕರ್ನಾಟಕಾ ರಾಜ್ಯಾಂತ್ ಪಿ.ಯು. ಸಿ. ಂತ್
ಪಯ್ಲೆಂ ರೇಂಕ್ ಮೆಳ್ಲ್ಲೆಂ. ಖಬಾರ್ ಮೆಳ್ಲ್ಲೊ ದಾಕ್ತೆರ್
ವಿಶೆಂತ್ ದುಜಾಮಾ ಸಾಂಗಾಂತಾ ಘರ್ಚೆಂ ಮೇಟ್ ಚಡ್ತಾನಾ
ಬಾಬಾನ್ ನವ್ರ್ಯಾಕ್ ಸಾಂಗ್ಲೆಂ.
’ಮ್ಹಜೆಂ ಧುವ್ ಕಾಜಾರ್ ಜಾಯ್ನಾ ಖಂಯ್.....ಮಾದ್ರ್ ಜಾವ್ನ್
ಸೆವಾ ದೀಂವ್ಕ್ ಕೊವೆಂತಾಕ್ ರಿಗ್ತಾ ಖಂಯ್....!’
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
