ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

’ಜೆದ್ನಾಂ ತುಂ ಹೆರಾಂಚಾ ಬರ್‍ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್

ಕೊಂಕ್ಣಿ ಕಾರ್ಭಾರಿ - 22. ಬಸ್ತಿ ವಾಮನ್ ಶೆಣಯ್

ನಾಂವ್ : ಬಸ್ತಿ ವಾಮನ್ ಶೆಣೈ

ಜಲ್ಮಾಲ್ಲಿ ತಾರಿಕ್ : 6 ನವೆಂಬರ್ 1934

ಆವಯ್ ಬಾಪಾಯ್ಚೆಂ ನಾಂವ್ : ದೆವಾಧೀನ್ ಗೌರಿ ಶೆಣೈ ಆನಿ ಬಸ್ತಿ ಮಹಾಬಲ ಶೆಣೈ

ಜಲ್ಮಾಲ್ಲೊ ಗಾಂವ್ : ಬಂಟ್ವಾಳ್

ಪತಿಣೆಚೆ ನಾಂವ್ : ಸವಿತಾ ಶೆಣೈ

ಭುರ್ಗಿಂ :

ವಿದ್ಯಾ ಕಿಣಿ (ಕಾಜಾರ್ ಜಾವ್ನ್ ಮುಂಬಯ್ ವಸ್ತಿ ಕರ್‍ನ್ ಆಸಾ).

ಬಸ್ತಿ ಮಹಾಬಲ ಶೆಣೈ

ದಿನೇಶ್ ಶೆಣೈ( ಡೆಲ್ಲಿಂತ್ ಚಿತ್ರರಂಗಾಂತ್ ಫೊಟೊ ಪತ್ರಿಕೊದ್ಯಮಿ ಜಾವ್ನ್ ವಾವ್ರ್ ಕರ್‍ನ್ ಆಸಾ)

ಸಾಹಿತ್ಯ್ : ಹಾತ್ ಬರ್ಪಾಚೆಂ ಮಯ್ನ್ಯಾಳೆಂ (ಕೈ ಬರಹದ ಮಾಸಪತ್ರಿಕೆ)

ಲೇಖನಾಂ : ರಾಜಕೀಯಚೆರ್ ಸಬಾರ್ ಲೇಖನಾಂ ಲಿಕ್ಲ್ಯಾಂತ್

ಮಟ್ವ್ಯೊ ಕಾಣ್ಯೊ : ಲಗ್ಬಗ್ 20

Placeholder: the original page gave this picture no description, and none has been written yet. It came from daaiz\daaiz\column\kk\kk22.asp.

[ಬಾಬ್ ಬಸ್ತಿ ವಾಮನ್ ಶೆಣಯ್ ಸವೆಂ ಸಂವಾದ್ ಕರ್ತಾ ಬಾಯ್ ವಾಯ್ಲೆಟ್ ಜೆ. ಪಿರೇರಾ]

ಕೊಂಕ್ಣೆಂತ್ ಭೋವ್ ಥೊಡೆ ವಾವ್ರಾಡಿ ಅಸಲೇಯ್ ಆಸಾತ್, ತೆ ಸಾಹಿತಿ ಜಾವ್ನಾಸೊನ್‌ಯೀ, ಕೊಂಕ್ಣಿ ವಾವ್ರಾಕ್ ನಾಂವಾಡ್ದಿಕ್ ಜಾಲ್ಲೆ, ಆನಿ ತಾಂತ್ಲೊ ಎಕ್ಲೊ ಜಾವ್ನಾಸಾ ಬಾಬ್ ಬಸ್ತಿ ವಾಮನ್ ಶೆಣಯ್, ಅಜೂನ್ ಮುಖಾಮುಖಿ ಮೆಳೊನ್, ಉಲವ್ನ್ ನೆಣಾಂ ತರ್‌ಯೀ, ಇಮೇಯ್ಲಾಂ ಮುಖಾಂತ್ರ್ ಸಂಪರ್ಕಾರ್ ಮ್ಹಾಕಾ ಮ್ಹಜ್ಯಾ ಕಾಂಯ್ ಇಲ್ಲ್ಯಾ ಚಿಲ್ಲರ್ ಕೊಂಕ್ಣಿ ವಾವ್ರಾಕ್ ದೋನ್ ಬರಿಂ, ಮಾಯ್ಪಾಸಿ ಉತ್ರಾಂ ಬರವ್ನ್ ಮ್ಹಾಕಾ ಉತ್ತೇಜನ್ ದಿತೆಲ್ಯಾಂ ಪಯ್ಕಿಂತ್ಲೊ ಹೋಯ್ ಎಕ್ಲೊ. ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ಜಾವ್ನ್ ವಾವ್ರ್ ಕೆಲ್ಲೊ ಹೊ ಏಕ್ ಸಾಹಿತಿ, ಕವಿ, ಲೇಖಕ್ ತಶೆಂಚ್ ವಾವ್ರಾಡಿ ಸಯ್ತ್.

- ಸಂ

ಸಂವಾದ್ ಚಲವ್ಪಿಣ್: ವಾಯ್ಲೆಟ್ ಜೆ. ಪಿರೇರಾ. 

1. ತುಮ್ಕಾಂ ಕೊಂಕ್ಣೆ ಥಂಯ್ ಪ್ರೇರಣ್ ಕಶೆಂ ಲಾಭ್ಲೆಂ? ತುಮ್ಚ್ಯಾ ಭುರ್ಗ್ಯಾಪಣಾಂವಿಶಿಂ ತಶೆಂಚ್ಚ್ ತುಮ್ಚ್ಯಾ ಆಸಕ್ತೆವಿಶಿಂ ಕಾಂಯ್ ಸಾಂಗೊಂಕ್ ಆಶೆತಾತ್‌ಗೀ?

ಜಾಪ್: ಹಾಂವ್ ಲ್ಹಾನ್ ಆಸ್ತಾನಾ ಮ್ಹಜೊ ಬಾಪು ಕೊಂಕ್ಣಿ ಬರಯ್ಣಾರ್ ಜಾವ್ನಾಸ್‌ಲ್ಲೊ, ತಾಚೆ ಥಾವ್ನ್ ಆಮಿ ಸಾರಸ್ವತ್ ವ್ಯಾಕರಣ್ (ಗ್ರಾಮರ್) ವಾಚ್ತೆಲ್ಯಾಂವ್ ಮ್ಹಾಕಾ ವಾಸ್ಚೆಂ ಪಿಶೆಂ ಚಡ್ ಆಸ್‌ಲ್ಲೆ, ಕಾದಂಬರಿ ವಾಚ್ತಾಲೊಂ, ಮ್ಹಜೊ ಬಾಪು ತಶೆಂಚ್ಚ್ ಹೆರ್ ಬರಯ್ಣಾರ್, ನಾಟಕಿಸ್ತ್ ಎಕಾಮೆಕಾ ಆಮ್ಗೆರ್ ಭೆಟ್ತಾಲೆ ಜಾಲ್ಲ್ಯಾನ್ ಆಮ್ಚ್ಯಾ ಘರಾಂತ್ ಕೊಂಕ್ಣೆಚೆಂ ವಾತಾವರಣ್ ಉಭ್ಜಾಲ್ಲೆಂ. ಲ್ಹಾನ್ ಥಾವ್ನ್ ಹಾಂವ್ ರಾಕ್ಣೊ ವಾಚ್ತಾಲೊಂ, ಮ್ಹಜೆ ಈಶ್ಟ್ ಸರ್ವ್ ಕ್ರಿಸ್ರಾಂವ್ಚೆ ಜಾವ್ನಾಸ್‌ಲ್ಲೆ, ಆಶೆಂ ಮ್ಹಾಕಾ ಕೊಂಕ್ಣೆ ಥಂಯ್ ಚಡಿತ್ ಉರ್ಭಾ ಆಯ್ಲಿ, ಅನಿ ತಿ ವ್ಹಾಡಾತ್ ಗೆಲಿ. ಹಾಂವ್ ಶಿಕಾಪ್ ಸಂಪವ್ನ್ ಬ್ಯಾಂಕಾಂತ್ ಕಾಮಾಕ್ ರಿಗ್‌ಲ್ಲ್ಯಾ ನಂತರ್ ಮ್ಹಜ್ಯಾ ಇಶ್ಟಾಂಕ್ ಹಾಂವ್ ಕೊಂಕ್ಣೆತ್‌ಚ್ಚ್ ಚೀಟ್ ಬರಯ್ತಾಲೊಂ.

2. ತುಮ್ಚಾ ಭುರ್ಗ್ಯಾಪಣಾಲ್ಯಾ ತಶೆಂಚ್ಚ್ ಆತಾಂಚ್ಯಾ ಕೊಂಕ್ಣಿ ಪರಿಗತೆವಿಶಿಂ ತುಮಿಂ ಕಿತೆಂ ಸಾಂಗೊಂಕ್ ಆಶೆತಾತ್. ಕೊಂಕ್ಣೆಚಾ ಫುಡಾರಾವಿಶಿಂ ತುಮ್ಚಿ ಕಸಲಿ ಅಭಿಪ್ರಾಯ್?

ಜಾಪ್: ಲ್ಹಾನ್ ಆಸ್ತಾನಾ ಆಮ್ಚಾ ಕೊಂಕ್ಣಿ ಭಾಶೆಕ್ ತಿತ್ಲೊ ಸ್ಥಾನ್ ಮಾನ್ ನಾತ್‌ಲ್ಲೊ. 1992 ಇಸ್ವೆಂತ್ ಅಮಿ "ಕೊಂಕ್ಣಿ ಜಾಥಾ" ಮ್ಹಣ್ ಏಕ್ ಚಳವಳ್ ಸಗ್ಳ್ಯಾ ಪ್ರಾಂತಾಚ್ಯಾ ಕೊಂಕ್ಣಿ ಲೊಕಾಕ್ ಎಕ್ಟಾಂವ್ನ್ ಸುರು ಕೆಲಿ. ಕರ್ನಾಟಕಾಂತ್ ಕೊಂಕ್ಣೆಚೆ ಸಾಹಿತ್ಯ್, ಸಂಸ್ಕೃತಿ, ಕಲಾ, ಜನಪದಚಾ ವಾಡಾವಳೆಕ್ ಜಾಥಾ ಮ್ಹಣ್ ಕರುನ್ ಬೆಂಗ್ಳುರ್ ವಚೊನ್ ಮುಖ್ಯಮಂತ್ರಿಕ್ ಮನವಿ ದಿಲಿ. ಪುಣ್ ಕಾಂಯ್ ಫಾಯ್ದೊ ಜಾಲೊ ನಾ. ವೀರಪ್ಪ ಮೊಯ್ಲಿ ಮುಖ್ಯಮಂತ್ರಿ ಜಾಲ್ಯಾ ನಂತರ್ ಆಮಿ ಪರ್ತ್ಯಾನ್ ಮನವಿ ಪತ್ರ್ ದಿಲೆಂ ಅನಿ ತಾಚೆ ಪಾಟ್ಲ್ಯಾನ್ ನಿರಂತರಿ ವಾವುರ್ಲ್ಯಾಂವ್. ತಶೆಂ ಕರ್ನಾಟಕ್ ಕೊಂಕಣ್ ಸಾಹಿತ್ಯ್ ಆಕಾಡೆಮಿ ಮ್ಹಳ್ಳೊ ಸಂಸ್ಥೊ ಉದೆವ್ನ್ ಆಯ್ಲೊ. ಸುರ್ವೆರ್ ಆಮ್ಕಾಂ ವರ್ಸಾಕ್ ರುಪಯ್ ಸಾತ್ ಲಾಖ್ ಅನುದಾನ್ ಸರ್ಕಾರಾ ಥಾವ್ನ್ ಮೆಳ್ತಾಲೆ. ಆತಾಂ ರುಪಯ್ ವೀಸ್ ಲಾಖ್ ಮೆಳ್ತೆ ಆಸಾತ್. ಆಶೆಂ ಆಮಿಂ ಕೊಂಕ್ಣಿ ಕಲಾ ಉತ್ಸವ್, ಬೆಂಗ್ಳುರ್, ಡೆಲ್ಲಿ, ಗೋವಾ, ಬೊಂಬೆಂತ್ ಆಸಾ ಕೆಲೆ. ಥೊಡೆ ಬೂಕ್ ಫಾಯ್ಸ್ ಕೆಲೆ. ಕೊಂಕಣಿ ಸಮಾಂತರ್ ಶಬ್ದಕೋಶ್ ಫಾಯ್ಸ್ ಕೆಲೊ. ಕೊಂಕ್ಣೆಚೊ ವಾವ್ರ್ ಕೆಲ್ಲ್ಯಾ ಮಾಲ್ಘಡ್ಯಾ ಲೇಖಕಾಂಚೊ ಬೂಕ್ "ಮಹಾ ಮಾನೆಸ್ತ್ ಲೇಖನ್ ಮಾಲಾ" ಫಾಯ್ಸ್ ಕೆಲೊ.

1995 ಂತ್ "ಪ್ರಥಮ್ ವಿಶ್ವ ಕೊಂಕಣಿ ಸಮ್ಮೇಳನ್" ಮಂಗ್ಳೂರಾಂತ್ ಆಸಾ ಕೆಲೊ. ಹ್ಯಾ ಸಮ್ಮೇಳಾನಾಕ್ ಡೆಲ್ಲಿ ಥಾವ್ನ್ ಕೊಚ್ಚಿ ಪರ್‍ಯಾಂತ್ "ಕೊಂಕ್ಣಿ ಜನ ಸಮೂಹ್" ಸಗ್ಳ್ಯಾಂಕ್ ಸಾಂಗಾತಾ ಘೆವ್ನ್ ಸುಮಾರ್ 5000 ಲೊಕಾಕ್ ಎಕ್ಟಾಯ್ಲೆ. ಆಶೆಂ ಹ್ಯಾ ಸಮ್ಮೇಳನಾಕ್ ವಿದೇಶಾ ತಾವ್ನ್ 40 ಜಣ್ ಹಾಜರ್ ಆಸ್‌ಲ್ಲೆ. ಆತಾಂ ಕೊಂಕ್ಣೆಕ್ ಬರೊ ಫುಡಾರ್ ಆಸಾ. ಕೊಂಕ್ಣೆಕ್ ಬರೊ ಕಾಳ್ ಆಯ್ಲಾ, ಕಿತ್ಯಾಕ್ ಕೊಂಕ್ಣೆಚೊ ವಾವ್ರ್ ಕರ್ತೆಲ್ಯಾಂಕ್ ಮಾನ್ ಮೆಳ್ತೇ ಆಸಾ. ಸಾಹಿತ್ಯ್ ಆಕಾಡೆಮಿ ನ್ಯಾಶನಲ್ ಬುಕ್ ಟ್ರಸ್ಟ್, ಕೊಂಕ್ಣೆಚೆ ವಿಂಚ್ಣಾರ್ ಬೂಕ್ ಸಗ್ಳ್ಯಾ ಭಾಸಾಂನಿ ಭಾಶಾಂತರ್ ಕರ್‍ನ್ ಪರ್ಗಟ್ ಕರ್‍ಚೆ ಕಾಮ್ ಕರ್‍ನ್ ಆಸಾತ್.

3. ತುಮ್ಕಾ ಕೊಂಕ್ಣಿ ಸಾಹಿತ್ಯಾ ಥಂಯ್ ವೋಡ್ ಕಶಿಂ ಆಯ್ಲಿ? ಸಾಹಿತ್ಯ್ ಆನಿ ಭಾಶೆ ಥಂಯ್ ತುಮ್ಕಾ ಆಸ್ಚೊ ಸಂಬಂಧ್ ತುಮಿ ಸಾಂಗ್ಶ್ಯಾತ್‌ಗೀ?

ಜಾಪ್: ಖಂಚಾಯ್ ಸಾಹಿತ್ಯಾಚೆಂ ಮೂಳ್ ಜಾವ್ನಾಸಾ ಭಾಸ್. ಸಾಹಿತ್ಯ್ ಬರಂವ್ಕ್ ಆಸಾ ತರ್ ಭಾಸ್ ಗರ್ಜೆಚಿ. ಭಾಶೆಚೆರ್ ಮೋಗ್ ಆನಿ ವಾಪಾರ್ ಘರ್ಚೆಚೆ. ತಶೆಂ ಏಕಾ ಮನ್ಶ್ಯಾನ್ ಸಗ್ಳಿ ಭಾಸ್ ವಾಪಾರಿಜೆ ಮ್ಹಣ್ ನಾ. ಕನ್ನಡ, ಹಿಂದಿ, ಇಂಗ್ಲಿಶ್ ಆಶೆಂ ಸಗ್ಳಿ ಭಾಸ್ ವಾಪಾರುನ್ ಬರಂವ್ಕ್ ಶಿಕಾಜೆ. ಹಾಂವ್ ಲ್ಹಾನ್ ಆಸ್ತಾನಾ ’ರಾಕ್ಣೊ ಹಾಫ್ತಾಳೆಂ’ ವಾಚ್ತಾಲೊ, ವಾಚ್ಚೆ ಮ್ಹಜೆ ಹವ್ಯಾಸ್ ಜಾವ್ನಾಸ್‌ಲ್ಲೆ. ಹಾಂವ್ ನಾಟಕ್ ದಿಗ್ದರ್ಶನ್ ಕರ್‍ತಾಲೊಂ. ಬಂಟ್ವಾಳಾಂತ್ ಹಾಂವೆ ಸಂಗೀತ್, ನಾಟಕ್, ಸಾಹಿತ್ಯ್ ಹಾಂತು ಹಾಂವೆ ಜಾಣ್ವಾಯ್ ಘೆತ್ಲಿ. 1957 ಇಸ್ವೆಂತ್ ಸಂಗೀತ್ ಇಸ್ಕೊಲ್ "ಸರಸ್ವತಿ ಸಂಗೀತ ಶಾಲೆ" ಆರಂಭ್ ಕೆಲೆಂ. ಆಶೆಂ ಹಾಂವೆಂ ಮ್ಹಜೆ ಥಂಯ್ ಸಾಹಿತ್ಯ್ ಆನಿ ಕೊಂಕ್ಣಿ ಭಾಶೆಚೊ ಸಂಬಂಧ್ ಚಡ್ ಆನಿ ಚಡ್ ಬಳಿಶ್ಟ್ ಕೆಲೊ. ಆನಿ ಮ್ಹಜೆ ಥಂಯ್ ಆಸ್‌ಲ್ಲಿ ಹಿ ಕೊಂಕ್ಣೆಚೆ ಪಿಸಾಯ್ ಆನಿಕೀ ವಾಡಾಶಿ ಕೆಲಿ.

4. ವಿವಿಧ್ ಲಿಪಿ ತಶೆಂಚ್ಚ್ ಕೊಂಕ್ಣಿ ಬೊಲಿ ವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ?

ಜಾಪ್: ಕೊಂಕ್ಣಿ ಜಾವ್ನಾಸಾ ಇಂಡೊ-ಆರ್‍ಯನ್ ಭಾಸ್. ತಾಚೆ ನಿಮ್ತಿ ಹಿಂದಿ, ಸಂಸ್ಕ್ರತ್, ಮರಾಠಿ, ನೆಪಾಲಿ, ಕೊಂಕ್ಣಿ, ರಾಜಸ್ಥಾನಿ ಹಿಂ ಭಾಸ್ ಆಮಿಂ ದೇವ್‌ನಾಗರಿ ಲಿಪಿಂತ್ ಬರಂವ್ಚೆಂ. ಕಾನಡಿ ಲಿಪಿ ಕ್ರಿಸ್ತಾಂವ್ ಲಿಪಿಕ್ ಆನಿ ಭಾಶೆಕ್ ಸಂಬಂಧ್ ಆಸಾ ಜಾಲ್ಲ್ಯಾನ್ ಆಮಿ ತೆಂಚ್ಚ್ ಜಾಯ್ ಹೆಂಚ್ಚ್ ಜಾಯ್ ಮ್ಹಣೊಂಕ್ ಜಾಯ್ನಾ. ಆಮಿ ಸತ್ ಗಜಾಲ್ ಸಮ್ಜೊಚಿ ಗರ್ಜ್ ಆಸಾ. ಆಮ್ಚಿ ಭಾಸ್ ಎಕಾ ವರ್ಗಾಚಿ ಜಾಯ್ಜೆ ತರ್ ಆಮ್ಚಿಚ್ಚ್ ಏಕ್ ಲಿಪಿ ಮ್ಹಳ್ಳಿ ಆಸೊಂಕ್ ಜಾಯ್. ಆತಾಂ ಉದಾಹರಣ್ ದಿಂವ್ಚೆ ತರ್ ಆಮ್ಚೆ ಜಾತಿಚೆ ಕೊಚ್ಚಿಂತ್ ಆಸಾತ್, ತಾಂಕಾ ಆಮ್ಚಿ ಭಾಸ್ ಸಮ್ಜಾನಾ, ಕಿತ್ಯಾಕ್ ಪ್ರತಿ ಚಾಳಿಸ್ ಕಿಲೊಮಿಟರಾಕ್ ಭಾಸ್ ಬದ್ಲಾತಾ. ಆಮ್ಚಿ ಭಾಸ್ ವರ್ಗಿಕೃತ್ ಜಾಯ್ಜೆ ತರ್ ಆಮಿ ಬರಯಿಲ್ಲೆಂ ಎಕಾಮೆಕಾ ವಾಚುನ್ ಸಮ್ಜೊನ್ ಘೆಂವ್ಕ್ ಜಾಯ್. ಆನಿ ಬರೆಂ ಸಾಹಿತ್ಯ್ ವಾಸ್ಚೆಂ ಭೋವ್ ಗರ್ಜೆಚೆಂ.

5. ’ವಿಶ್ವ ಕೊಂಕ್ಣಿ ಸಂಸ್ಥೊ’ ವಿಶಿಂ ತುಮ್ಚೆ ವಿಚಾರ್, ಉದ್ದೇಶ್ ಆನಿ ಆಭಿಪ್ರಾಯ್ ಕಸಲಿ?

ಜಾಪ್: ಆಮಿ ವಿಶ್ವ್ ಕೊಂಕಣಿ ಸಮ್ಮೇಳನ್ ಕೆಲ್ಲೆ ತೆದ್ನಾ ಏಕ್ ನಿರ್ಣಯ್ ಹಾತಿ ಘೆತ್ಲೊ. ಆಮ್ಕಾ ಕ್ರೀಸ್ತಾಂವಾಂಕ್ ಕಶೆಂ ರೋಮ್ ಆಸಾ, ಹಿಂದ್ವಾಕ್ ಕಾಶಿ ಆಸಾ ಆನಿ ಮುಸಲ್ಮಾನಾಂಕ್ ಮೆಕ್ಕಾ ಆಸಾ ತಶೆಂಚ್ಚ್ ಕೊಂಕ್ಣೆಕ್ ಏಕ್ ಕೇಂದ್ರ್ ಸಂಸ್ಥೊ ಆಸಾಜಯ್ ಮ್ಹಣ್ ನಿರ್ಣಯ್ ಘೆತ್ಲೊ. ಹ್ಯಾ ನಿರ್ಣಯಾ ಪ್ರಕಾರ್ "ಕೊಂಕ್ಣಿ ಭಾಸ್ ಆನಿ ಸಂಸ್ಕ್ರತಿ ಪ್ರತಿಶ್ಟಾನ್" ಮ್ಹಳ್ಳೊ ಸಂಸ್ಥೊ ಆಸಾ ಕೆಲೊ. ಆತಾಂ ಆಮಿ ಶಕ್ತಿನಗರಾಂತ್ ತೀನ್ ಎಕ್ರೆ ಸುವಾತೆರ್ ಪಾಂಚ್ ಕೊರೊಡಾಂಚೆ ಏಕ್ ಯೋಜನ್ ಹಾತಿಂ ಘೆತ್ಲಾಂ. ಆನಿ ಹ್ಯಾ ಯೋಜನಾಧ್ವಾರಿ ಆಮಿ ಧಾ ಬೂಕ್ ವೆಗಿಂಚ್ಚ್ ಫಾಯ್ಸ್ ಕರ್ತೆಲ್ಯಾಂವ್.

6. ಆಯ್ಚಾ ಕೊಂಕ್ಣಿ ಸಾಹಿತ್ಯಾಂತ್ 80% ಸಾಹಿತ್ಯ್ ಕಾನಾಡಿ ಲಿಪಿಂತ್ ಬರೈತಾತ್ ತಶೆಂಚ್ಚ್ ವಾಚ್ತಾತ್. ಹಾಕಾ ತುಮಿ ಮಾನ್ತಾತ್‌ಗೀ ವಾ ನಾ? ಕಿತ್ಯಾಕ್?

ಜಾಪ್: 80% ಮ್ಹಳ್ಳೆ ತೆಂ ಆಮಿ ಆಯ್ಕೊನ್ ಬರೈಲ್ಲೆ. ಆಮಿ ಮಂಗ್ಳುರಾಂತ್ ಆಸ್‌ಲ್ಲ್ಯಾನ್ ಆಮ್ಕಾಂ ತೆಂ ಕಳಿತ್. ಆತಾಂ ಮಂಗ್ಳುರಾಂತ್, ಗೊಯಾಂತ್, ಬೊಂಬಾಯಾಂತ್ ತಶೆಂಚ್ಚ್ ಕೇರಳಾಂತ್ ದೇವ್‌ನಾಗರಿ ಬೂಕ್ ಫಾಯ್ಸ್ ಜಾತಾತ್. ರವೀಂದ್ರ ಕೇಳೇಕರಾಚೊ ಬೂಕ್ ಕೊಂಕ್ಣೆತ್ ಆಸ್‌ಲ್ಲೊ ಆತಾಂ ಇಂಗ್ಲೀಶಾಂತ್ ಭಾಶಾಂತರ್ ಜಾಲಾ. ತೀಸ್ ಕಾನಡಿ ಲಿಪ್ಯೆಂತ್ ಆಸ್‌ಲ್ಲೆ ಬೂಕ್ ದೇವ್‌ನಾಗರಿಕ್ ಲಿಪ್ಯಾಂತರ್ ಕರ್‍ನ್ ಫಾಯ್ಸ್ ಕರ್‍ಚೊ ವಾವ್ರ್ ಚಲೊನ್ ಆಸಾ.

7. ದೇವ್‌ನಾಗರಿ ಲಿಪಿಚ್ಚ್ ಕೊಂಕ್ಣೆಂತ್ ಪ್ರಯೋಗ್ ಕೆಲ್ಯಾರ್ ಕೊಂಕ್ಣಿ ಸಾಹಿತ್ಯ್ ಫುಲಾತ್‌ಗೀ? ಹ್ಯಾ ವಿಶಿಂ ತುಮ್ಚಿ ಆಭಿಪ್ರಾಯ್ ಕಸಲಿ?

ಜಾಪ್: ಖಂಡಿತ್, ಕೊಂಕ್ಣೆಂತ್ ದೇವ್‌ನಾಗರಿಚೊ ಪ್ರಯೋಗ್ ಕೆಲ್ಯಾರ್ ಕೊಂಕ್ಣಿ ಸಾಹಿತ್ಯ್ ಹರ್‍ಯೇಕಾ ಪ್ರಾಂತಾಚ್ಯಾ ಲೊಕಾಕ್ ವಾಚುಂಕ್ ಸಲೀಸ್ ಜಾತೆಲೆಂ. ಆನಿ ಹ್ಯಾ ಮುಖಾಂತ್ರ್ ವಾಚ್ಪಿ ಚಡ್ತೆಲೆ ಆನಿ ಆಮ್ಚಿ ಕೊಂಕ್ಣಿ ಫುಲ್ತೆಲಿ ಆನಿ ವಾಡ್ತೆಲಿ. ಹಾಂತುಂ ದುಭಾವ್‌ಚ್ಚ್ ನಾ.

8. ತುಮಿ ಕರ್ನಾಟಕ ಸಾಹಿತ್ಯ್ ಆಕಾಡೆಮಿಚೊ ಅಧ್ಯಕ್ಷ್ ಜಾವ್ನ್ ತುಮ್ಚಿ ಸೆವಾ ದಿಲ್ಯಾ, ಆತಾಂಚ್ಯಾ ಅಧ್ಯಕ್ಷಾವಿಶಿಂ ಆನಿ ತಾಚ್ಯಾ ವಾವ್ರಾ ವಿಶಿಂ ತುಮ್ಚಿ ಅಭಿಪ್ರಾಯ್ ಕಿತೆಂ?

ಜಾಪ್: ಆಕಾಡೆಮಿ ಮುಖಾರ್ ವಚೊನ್ಂಚ್ಚ್ ಆಸಾ. ತಾಂಚೆ ವಾವ್ರ್ ತೆಂ ಕರ್‍ನ್ ಆಸಾತ್ ಆಮ್ಚೆ ವಾವ್ರ್ ಆಮಿ ಕರ್‍ನ್ ಆಸಾಂವ್.

9. ಆತಾಂಚ್ಯಾ ಕೊಂಕ್ಣಿ ಭಾಶೆ ವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ? ಅತಾಂಚೆ ಪಿಳ್ಗೆಕ್ ಕೊಂಕ್ಣಿ ಭಾಶೆ ಥಂಯ್ ವೋಡ್ ಆಸಾಗೀ?

ಜಾಪ್: ವ್ಹಯ್. ಹೆಂ ಏಕ್ ಬರೆಂ ಸವಾಲ್. ಗೊಯಾಂತ್ ಆಮಿ ಲೇಕ್ ಘಾಲ್ತಾನಾ 500 ಭುರ್ಗಿಂ ಕೊಂಕ್ಣಿ ಬರಂವ್ಚೆಂ ಉಜ್ವಾಡಾಕ್ ಆಯ್ಲೆ. ತಿಂ ವ್ಹಡಾ ಮಿನತೆನ್ ಕೊಂಕ್ಣಿ ಬರೈತಾತ್. ಖಂಡಿತ್ ಜಾವ್ನ್ ಆಮ್ಚಿ ಪಿಳ್ಗಿ ಕೊಂಕ್ಣಿ ಭಾಶೆಕ್ ಮಾನಾನ್ ಆನಿ ಗೌರವಾನ್ ಲೆಕ್ತೆಲಿ ಆನಿ ಕೊಂಕ್ಣಿ ಭಾಸ್ ಉರವ್ನ್ ಹಾಡ್ತೆಲಿಂ ಮ್ಹಳ್ಳೊ ಭರ್ವಸೊ ಮ್ಹಾಕಾ ಆಸಾ. ಆತಾಂ ಮಂಗ್ಳುರಾಂತ್‌ಯೀ ಸಭಾರ್ ಭುರ್ಗಿಂ ಕೊಂಕ್ಣಿ ಬರಯ್ತಾತ್.

10. ಆಯ್ಚಾ ಕೊಂಕ್ಣಿ ಪರಿಗತೆವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ? ಭಾಸ್, ಸಂಸ್ಕ್ರತಿ, ಸಾಹಿತ್ಯ್, ಸಂಗೀತ್, ಜನಪದ್, ಪತ್ರಿಕೋದ್ಯಮ್ ಹ್ಯಾ ವಿಶಿಂ ತುಮಿ ಕಿತೆಂ ಸಾಂಗೊಂಕ್ ಆಶೆತಾತ್?

ಜಾಪ್: ಭಾರೀ ಬರೆ ದೀಸ್ ಆಯ್ಲ್ಯಾತ್. ಮೊಸ್ತ್ ಸಂಸ್ಥೆ ವಾಡೊನ್ ಯೇವ್ನ್ ಪಯ್ಲೆ ಪಾವ್ಟಿಂ ರವೀಂದ್ರ ಕೇಳೇಕರಾಕ್ ಸಾಹಿತ್ಯ್ ಆಕಾಡೆಮಿ ಡೆಲ್ಲಿ ಥಾವ್ನ್ "ಫೆಲೋಶಿಪ್" ಮೆಳ್ಳೆಂ. ಜಾಯ್ತೆ ಹೆರ್ ಸಂಘ್ ಸಂಸ್ಥೆ ಸಯ್ತ್ ಆಜ್ ಕೊಂಕ್ಣಿ ಭಾಸ್, ಸಂಸ್ಕೃತಿ, ಸಾಹಿತ್ಯ್, ಸಂಗೀತ್, ಜಾನಪದ್ ಅಶೆಂ ವೆವೆಗ್ಳ್ಯಾ ಪ್ರಕಾರಾಚೆರ್ ವಾವ್ರ್ ಚಲವ್ನ್ ಆಸಾ. ಆನಿ ಸರ್ವ್ ರಿತಿಚೊ ವಾವ್ರ್ ಅಸೊಚ್ಚ್ ಮುಖಾರುನ್ ಗೆಲೊ ತರ್ ಮಾತ್ರ್ ಕೊಂಕ್ಣೆಚೆಂ ಬರೆಂಪಣ್ ಸಾಧ್ಯ್ ಮ್ಹಳ್ಳೆಂ ಸತ್.

11. ಕರ್ನಾಟಕಾಂತ್ ಶಾಳಾನಿಂ ಕೊಂಕ್ಣಿ ಶಿಕಂವ್ಚೆವಿಶಿಂ ತುಮ್ಚೆ ವಿಚಾರ್ ಕಸಲೆ?

ಜಾಪ್: ಹಿಂ ಏಕ್ ಕೊಂಕ್ಣಿ ಸಮಾಜೆಕ್ ಸಂತೊಸಾಚಿ ಗಜಾಲ್. ಶಾಳಾಂನಿ ಕೊಂಕ್ಣಿ ಶಿಕೈಲ್ಯಾರ್ ಕೊಂಕ್ಣಿ ಉರ್‍ತಾ, ಆನಿ ಬಾಳ್ವತಾ. ಕೊಂಕ್ಣಿ ಉರವ್ನ್ ಯೇಜೆ ಜಾಲ್ಯಾರ್ ಭುರ್ಗ್ಯಾಂನಿ ಶಾಳಾಂನಿ ಕೊಂಕ್ಣಿ ಶಿಕೊಂಕ್ ಜಾಯ್. ಅನಿ ಕೊಂಕ್ಣಿ ಭುರ್ಗ್ಯಾಂನಿ ಶಿಕಾಜೆ ತರ್ ವ್ಹಡಿಲ್ಹಾಂಚೊ ಸಹಕಾರ್ ಆನಿ ಮಾರ್ಗದರ್ಶನ್ ಗರ್ಜೆಚೆಂ.

12. ಇ-ಮಿಡಿಯಾ ಆನಿ ಅಂತ್ರಾರ್‌ಜಾಳಿ ವಿಶಿಂ ತುಮ್ಚೆ ವಿಚಾರ್ ಕಸಲೆ?

ಜಾಪ್: ಕೊಂಕ್ಣಿ ಸಂಸಾರಾಚ್ಯಾ ಹರ್‍ಯೇಕಾ ಕೊನ್ಶ್ಯಾಕ್ ಪಾವಾಜೆ ತರ್ ಇ-ಮಿಡಿಯಾ ಆನಿ ಅಂತರ್‌ಜಾಳಿ ಭೋವ್ ಗರ್ಜೆಚೆಂ. ಹ್ಯಾ ಮುಖಾಂತ್ರ್ ಲೋಕ್ ಕೊಂಕ್ಣಿ ಭಾಸ್ ತಶೆಂಚ್ಚ್ ಲೇಖನಾ ವಾಚುಂಕ್ ಸಕ್ತಾ. ಕೊಂಕ್ಣಿ ಅಂತ್ರಾರ್ಜಾಳಿ ಮುಖಾಂತ್ರ್ ಪರ್ಗಟ್ ಥರಾನ್ ಉಲೊಂವ್ಕ್ ತಶೆಂಚ್ಚ್ ಶಿಕಂವ್ಕ್ ವಾವ್ರ್ ಕರ್ನ್ ಆಸಾತ್.

13. ತುಮಿ ದಾಯ್ಜ್.ಕೊಮ್ ವಿಶಿಂ ಆಯ್ಕಾಂಲಾಂಗೀ? ಕೊಂಕ್ಣಿ ಅಂತರ್‌ಜಾಳಿ ಮುಖಾಂತ್ರ್ ಲೊಕಾಕ್ ಪಾವೊಂವ್ಚಾ ವಿಶಿಂ ತುಮ್ಚೆ ವಿಚಾರ್ ಕಸಲೆ?

ಜಾಪ್: ದಾಯ್ಜ್.ಕೊಮ್ ಜಾವ್ನಾಸಾ ಆಮ್ಚಿ ಆಸ್ಮಿತಾಯ್, ಆಮ್ಚೆಂ ದಾಯ್ಜ್. ದಾಯ್ಜ್.ಕೊಮ್ ಥಾವ್ನ್ ಕೊಂಕ್ಣೆಚೊ ಖರೊ ವಾವ್ರ್ ಜಾವ್ನಾಸಾ ಆನಿ ಸಭಾರ್ ಜಣಾಂ ಖಳಾನಾಸ್ತಾಂ ಆಪ್ಲೊ ವಾವ್ರ್ ದೀವ್ನ್ ಅಸಾತ್. ಹಿ ಸಾಯ್ಟ್ ಸಂಪೂರ್ಣ್ ಕೊಂಕ್ಣೆಕ್ ಸಮರ್ಪುನ್ ದಿಲ್ಯಾ ಆಸ್ತಾ ಸರ್ವ್ ಕೊಂಕ್ಣಿ ಲೊಕಾಂನಿ ಹ್ಯಾ ಸಾಯ್ಟಾಕ್ ಪ್ರೋತ್ಸಾಹ್ ದಿಂವ್ಚೆಂ ಗರ್ಜೆಚೆಂ ಜಾವ್ನಾಸಾ. ಆಪ್ಲೊ ಸ್ವ ಫಾಯ್ದೊ ಪಳೈನಾಸ್ತಾಂ ಕೊಂಕ್ಣಿ ಖಾತಿರ್ ವಾವ್ರ್ ಕರ್‍ಚಾ ದಾಯ್ಜ್ ಪಂಗ್ಡಾಕ್ ನಿಜಾಯ್ಕಿ ಶಾಭಾಸ್ಕಿ ಫಾವೊ.

14. ಆಶಾವಾದಿ ಪ್ರಕಾಶನಾ ವಿಶಿಂ ತುಮ್ಚಿ ಅಭಿಪ್ರಾಯ್ ಕಿತೆಂ?

ಜಾಪ್: ಆಶಾವಾದಿ ಪ್ರಕಾಶನ್ ಕೊಂಕ್ಣೆಚೆ ಏಕ್ ಭಂಡಾರ್ ಮ್ಹಣ್ಯೆತ್. ಕಿತ್ಯಾಕ್ ಹ್ಯಾ ಪ್ರಕಾಶನಧ್ವಾರಿಂ ಸಭಾರ್ ಲೇಖಕಾಂಚೆ ಬೂಕ್ ಪರ್ಗಟ್ ಜಾತಾತ್. ಸಗ್ಳ್ಯಾ ಲೇಖಕಾಂಕ್ ಭಾಂಗ್ರಾಳೊ ಆವ್ಕಾಸ್ ದೀವ್ನ್ ಆಶಾವಾದಿ ಪ್ರಕಾಶನ್ ತಾಂಚೆ ಬೂಕ್ ಪ್ರಗಟ್ ಕರ್ತಾ. ಹೆ ಆಶಾವಾದಿ ಪ್ರಕಾಶನಾಚೆ ವರ್ತೆ ಶೆಗುಣ್ ಜಾವ್ನಾಸಾತ್.

15. ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್?

ಜಾಪ್: ದಾಯ್ಜ್ ವಾಚಾಕಾಂನಿ ಕೊಂಕಣಿ ಭಾಸ್, ಸಂಸ್ಕ್ರತಿ, ಸಾಹಿತ್ಯ್ ಹಾಚೆ ಉದರ್ಗತೆ ಖಾತಿರ್ ವ್ಹಾವುರ್‍ಚಾ ಸರ್ವ್ ವಾವ್ರಾಡ್ಯಾಂಕ್ ಪಾಟಿಂಬೊ ದೀಂವ್ಕ್ ಜಾಯ್. ತ್ಯಾ ನಿಮಿತ್ತಾನ್ ಆಮ್ಚೆಂ ಮಾಲ್ಘಡ್ಯಾಂಚೆಂ ದಾಯ್ಜ್ ಆನಿ ಕೊಂಕ್ಣಿ ಮನ್ಶ್ಯಾಂಚಿ ಆಸ್ಮಿತಾಯ್ ಆನಿಂ ಮುಖ್ಲ್ಯಾ ಪಿಳ್ಗೆಕ್ ಆಸ್ತ್ ಜಾವ್ನ್ ದಿಂವ್ಚಾಕ್ ಸಾಧ್ಯ್ ಜಾತಾ. ಆನಿ ಖಂಡಿತ್ ಜಾವ್ನ್ ತುಮಿ ದಾಯ್ಜ್ ವಾಚಾಪ್ ದಿತೆಲ್ಯಾತ್ ಮ್ಹಣ್ ಆಶೆತಾಂ.

16. ದೇವ್ ಬರೆಂ ಕರುಂ ಬಸ್ತಿ ವಾಮನ್ ಬಾಬ್ ತುಮ್ಕಾಂ, ತುಮ್ಚೊ ಮೊಲಾದಿಕ್ ವೇಳ್ ಆಮ್ಚೆ ಸವೆಂ ಸಂದರ್ಶಾನಾಂತ್ ಖರ್ಚಿಲ್ಲ್ಯಾಕ್. ತುಮ್ಚಾ ಕೊಂಕ್ಣಿ ವಾವ್ರಾಂತ್ ಸರ್ವ್ ಬರೆಂ ಮಾಗ್ತಾಂ.

ಜಾಪ್: ದೇವ್ ಬರೆಂ ಕರುಂ ತುಕಾ ವಾಯ್ಲೆಟ್. ತುಜೆರ್ ಆನಿ ತುಜ್ಯಾ ಹ್ಯಾ ಕೊಂಕ್ಣಿ ವಾವ್ರಾವೆರ್ ದೆವಾಚಿಂ ಧಾರಾಳ್ ಆಶೀರ್ವಾದಾಂ ಮಾಗ್ತಾಂ. ತುಂ ತುಜ್ಯಾ ಕೊಂಕ್ಣಿ ವಾವ್ರಾಂತ್ ಆನಿಕೀ ಉಂಚಾಯೆಕ್ ಪಾವ್, ಕೊಂಕ್ಣೆ ಖಾತಿರ್ ವಾವುರ್‍ತೆಲ್ಯಾಂಕ್ ಚಡ್ ಆನಿ ಚಡ್ ಭೆಟೊನ್ ತಾಂಚೊ ವಾವ್ರ್ ಲೊಕಾ ಸಮೊರ್ ಹಾಡ್ಚ್ಯಾ ಹ್ಯಾ ತುಜ್ಯಾ ವಾವ್ರಾಕ್ ಹಾಂವ್ ಸರ್ವ್ ಬರೆಂ ಮಾಗ್ತಾಂ. ದೆವಾಚೆಂ ಬೆಸಾಂವ್ ತುಕಾ.

ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications