ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಚಡಾವತ್ ಮನಿಸ್ ಚಿಂತ್ಚಾಕೀ ಮೊರೊಂಕ್ ಪಸಂದ್ ಕರ್ತಿತ್’ - ಬರ್ಟ್ರಂಡ್ ರಸ್ಸಲ್
ಮಾಂಯ್ಗಾಂವಾಕ್ ಏಕ್ ಭಂವ್ಡಿ
ವರಸ್ : 2006
ಅಂಕೊ : 24
ಮಯ್ನೊ : ಜೂನ್
ಸಂಪಾದಕೀಯ್ - 24.
ವಲ್ಲಿ ಕ್ವಾಡ್ರಸ್
ಪರ್ಗಾಂವಾಂತ್ ಆಸ್ಚಾಂಕ್ ಆಪ್ಲ್ಯಾ
ಮಾಂಯ್ಗಾಂವಾಕ್ ವೆಚೆಂ ಸದಾಂಚ್ ಅತ್ರೆಗಾಚೆಂ, ತೇಂಯ್
ಮಾಯ್ ಮಯ್ನ್ಯಾಂತ್ ಗಾಂವಾಂತ್ ಭೋವ್ ವರ್ತೊ ವೇಳ್. ರುಕಾಂನಿ ಕಾಜು, ಆಂಬೆ,
ಪೊಣೊಸ್, ಪಾಲ್ಪೊಣೊಸ್ - ಹರ್ ಥರಾಚ್ಯೊ ಫಳ್
ವಸ್ತು ಖಾಂವ್ಕ್ ಮೆಳ್ತಾತ್, ಭುರ್ಗ್ಯಾಂಕ್ ಇಸ್ಕೊಲಾಕ್ ರಜಾ
ಮೆಳ್ಲ್ಲೆನಿಮ್ತಿಂ ಬೊಂಬೊಯಾಂತ್ ಆಸ್ಚಿಂ ಚಡ್ತಾವಾಂ ರಜೆರ್ ಗಾಂವಾಕ್
ಪಾವ್ತಾತ್. ಗರ್ಮೆಚಾ ಹ್ಯಾ ಮಯ್ನ್ಯಾಂತ್ ಉದ್ಕಾಚೆ, ಕರೆಂಟಾಚೆ
ವಾಂದೆ ಸೊಡ್ಲ್ಯಾರ್ ಮಾಂಯ್ಗಾಂವ್ ತೊ ಮಾಂಯ್ಗಾಂವ್ಂಚ್.
ರಜೆರ್ ಗೆಲ್ಲ್ಯಾವೆಳಾರ್ ಮ್ಹಾಕಾ ಕಿತ್ಲೆಂ ಸಾಧ್ಯ್ ಜಾತಾ ತಿತ್ಲಿಂ ಕೊಂಕ್ಣಿ ಕಾರ್ಯಿಂ ಪಳೆಂವ್ಚಿ ಆತುರಾಯ್, ಉರ್ಭಾ ಯಾ
ಪಿಸಾಯ್ ಘೆವ್ನ್ ಪಾವ್ಲ್ಲೊಂಚ್ ’ಝೆಲೊ ಭಾಂಗ್ರಾಳ್ಯಾ
ವರ್ಸಾಚಾ ಅಂಕ್ಯಾಚಾ ಉಗ್ತಾವಣ್ ಕಾರ್ಯಾಕ್’ - ಅಪುಟ್ ಕೊಂಕ್ಣಿ ಕಾರ್ಯೆಂ,
ಮಾನ್ ಸಾಹಿತಿಂನಿ ಭರ್ಲ್ಲೆಂ ಸಭಾಸಾಲ್, ಮಾನ್ ಸಾಹಿತಿಂ
ಪಯ್ಕಿಂತ್ಲ್ಯಾ ಎಕ್ಲ್ಯಾಕ್ ’ಎಡಿ ನೆಟ್ಟೊ’ ಕ್ ಮಾನ್ - ಹೆಂ
ಹ್ಯಾ ಕಾರ್ಯಾಚೊ ವಾಂಟೊ. ತಶೆಂಚ್ ರುಚಿಕ್ ಮಂಗ್ಳುರಿ ಜೆವಾಣ್ (ಸನ್ನಾಂ - ದುಕ್ರಾ
ಮಾಸಾಸವೆಂ).
ಸಾಹಿತಿಲಾಗಿಂ ಸಂವಾದ್ ಚಲಂವ್ಕ್ ಏಕ್ ಬರೊ ಆವ್ಕಾಸ್, ಗಲ್ಫಾಂತ್ ಕೊಂಕ್ಣಿ ಫುಲ್ಲ್ಲ್ಯಾವಿಶಿಂ ವಿಚಾರ್-ತರ್ಕ್ ಫುಡ್ಲ್ಯಾ
ದಿಸಾಂನಿಯೀ ಚಾಲುಚ್ ದವರ್ಚಾ ಮಧೆಂ ಮ್ಹಜೆಂ ಪ್ರಮುಕ್ ಕಾಮ್ಯ್
ಸುರು ಜಾಲೆಂ. ಆಶಾವಾದಿ ಪ್ರಕಾಶನಾಚೆ ಪಾಂಚ್ ಬೂಕ್ ಪರ್ಗಟ್ಣೆಕ್ ದಿಂವ್ಚೆಂ ಕಾಮ್. ತ್ಯಾ ಬರಾಬರ್ ದಾಯ್ಜ್
ಸಾಹಿತಿಕ್ ಸ್ಪರ್ಧ್ಯಾಂತ್ ಜಿಕ್ಲ್ಲ್ಯಾಂಕ್, ಬರ್ಪಾಂ ಧಾಡ್ಲೆಲ್ಯಾಂಕ್
ಸಂಪರ್ಕ್ ಕರ್ಚೆಂ, ದಾಯ್ಜ್-ಮಿತ್ರ್ ತರ್ಫೆನ್ ಪಯ್ಲೆಂ
ಸಾಹಿತಿಕ್ ತರ್ಭೆತೆ ಶಿಭಿರ್ ಮಾಂಡುನ್ ಹಾಡ್ಚೆಂ.
ತ್ಯಾ ಮಧೆಂ ರಾಕ್ಣೊನ್ ಮಾಂಡುನ್ ಹಾಡ್ಲ್ಲಿ ಕವಿಸಂಧಿಂತ್
ವಾಂಟೆಲಿ ಜಾಂವ್ಚೊ ಸುಯೋಗ್, ಜಿಣ್ಯೆಂತ್ ಎದೊಳ್ ಭೆಟೊಂಕ್
ನಾತ್ಲ್ಲ್ಯಾ ಮಾನ್ ಕೊಂಕ್ಣಿ ಸಾಹಿತಿ ಆಲ್ಬನ್
ಮೆಸ್ತ್ರಿ(ಕ್ಯಾಸ್ತೆಲಿನೊ)ಕ್ ತಶೆಂಚ್ ಮಸ್ಕತ್ ಥಾವ್ನ್ ಗಾಂವಾಕ್ ಆಯಿಲ್ಲೊ ಫಾಮಾದ್ ಕೊಂಕ್ಣಿ
ವಾವ್ರಾಡಿ ಜೆರಿ ಡಿಮೆಲ್ಲೊಕ್ ಭೆಟ್ಚೊ ಆವ್ಕಾಸ್ಯ್ ಲಾಭ್ಲೊ.
ವಿಲ್ಫಿ ರೆಬಿಂಬಸ್, ಪೌಲ್ ಮೋರಸ್, ಬಸ್ತಿ ವಾಮನ್ ಶೆಣಯ್, ರಾಕ್ಣೊಚೊ
ಪರ್ನೊ/ನವೊ ಸಂಪಾದಕ್ ಆನಿ ಹೆರಾಂ ಹಾಜರ್ ಆಸ್ಲ್ಲಿ ಹಿ ಕವಿ
ಸಂಧಿ ಭೋವ್ಶಾ ಖಾಸ್ಗೆನ್, ವಿಂಚ್ಲ್ಲ್ಯಾಂಕ್ ಮಾತ್ರ್ ಆಪವ್ಣೆಂ
ದಿಲ್ಲೆಂಗಾಯ್ ಮ್ಹಳ್ಳೊ ದುಭಾವ್ ಉಟ್ಲೊ - ಕವಿತಾಗೋಷ್ಟಿಂತ್ ಎಲ್ಯೆರಾಚೆಂ ಕವಿತಾ ಕಾರ್ಭಾರ್ಯಾಂಚಾ
ಮಾತ್ಯಾಂತ್ ಧುಂವರ್ ಉಟಂವ್ಕ್ ಲಾಗ್ತಾನಾ ಕವಿತಾರಸಿಕ್
ಸಗ್ಳೆ ಸಂತೊಸಾನ್ ಫುಲ್ಲೆ. ವಿಲ್ಫಿ ರೆಬಿಂಬಸಾಚೆಂ ಕವಿತಾ
ಸುರು ಜಾತಾನಾಂಚ್ ಕವಿತಾರಸಿಕ್ ಸಗ್ಳೆ ಆತುರಾಯೆನ್ ಭರ್ಲ್ಲಿ
ಸೊಭಾಯ್, ತಶೆಂಚ್ ಟೈಟಸ್ ತಾಕೊಡೆನ್ ’ಆಮಿ ಸತ್ಚ್ ಉಲಂವ್ಚೆಂ’
ಮ್ಹಣ್ ಸಾಂಗ್ತಾನಾ ಥೊಡ್ಯಾಂಕ್ ಇನ್ಸುರೆನ್ಸಾಚೊ ಉಡಾಸ್ ಜರೂರ್ ಆಯ್ಲೊ ಆಸ್ತಲೊ.
ಹ್ಯಾ ಮಧೆಂ ತೀನ್ ವರ್ಸಾಂಧಿಂ ಆಮ್ಕಾಂ ಸಾಂಡುನ್ ಗೆಲ್ಲ್ಯಾ ಜೊರ್ಜಿಯಾಬಾಚಾ ಘರಾ (ಮಾಯ್ 11 ತಾರಿಕೆರ್) ಏಕ್ ಭೆಟ್ ದೀಂವ್ಕ್ ಮ್ಹಜೆಂ ಕಾಳಿಜ್ ಸಾಂಗ್ತಾಲೆಂ ದೆಖುನ್ ಏಕ್ ಭೆಟ್ ದಿಲಿ, ಹ್ಯೇ ಪಾವ್ಟಿಂ ತಾಚಾ ನೊವೊದ್ ವರ್ಸಾಂ ಉತ್ರಾಲ್ಲ್ಯಾ ಅಸ್ಕತ್ ಆವಯ್ಕ್ ದೆಖ್ಚೆಂ ತಶೆಂಚ್ ತಾಚಾ ಭಯ್ಣಿಲಾಗಿಂ ಉಲಂವ್ಚೆಂ/ಆಯ್ಕೊಂವ್ಚೆಂ ಭಾಗ್ ಮೆಳ್ಳೆಂ. ದೀಂವ್ಕ್ ಕಿತೆಂಚ್ ನಾತ್ಲ್ಲೆಂ ತರ್ಯ್ ಯೆತಾನಾ ’ಹ್ಯಾ ಸಂಸಾರಾಂತ್ ಕಸ್ಟತೆಲ್ಯಾಂಕ್ ಜೀಣ್ಭರ್ ಕಸ್ಟ್ ಕಿತ್ಯಾಕ್ ದೆವಾ?’ ಮ್ಹಳ್ಳೆಂ ಸವಾಲ್ ಮತಿಕ್ ಕಾಂತಯ್ತಾಲೆಂ. ಪಾಟಿಂ ಯೆಂವ್ಚಾ ವಾಟೆರ್ ಕೊಂಕ್ಣೆಂತ್ ಆಯ್ಲೆವಾರ್ ಉದೆವ್ನ್ ಆಯಿಲ್ಲೊ ಭರ್ವಶ್ಯಾಚೊ ಸಾಹಿತಿ/ಕವಿ ವಿಲ್ಸನ್ ಕಟೀಲ್ ಹಾಚಾ ಘರಾ ಭೆಟ್ ದಿಲಿ, ಜಾತಿ ಪ್ರತಿಭಾ, ಖಾಲ್ತೆಂಪಣ್ ಆಸ್ಚಾ ಹ್ಯಾ ಕವಿಕ್ ಜರ್ ಕೊಂಕ್ಣಿ ಹೊಗ್ಡಾಯ್ತ್, ತರ್ ಕೊಂಕ್ಣೆಂತ್ ದುಖಾಕ್ ಮೋಲ್ ಆಸ್ಚೆಂಚ್ ನಾ ಮ್ಹಣ್ ಭೊಗ್ಲೆಂ.
ದಾಯ್ಜ್ - ಮಿತ್ರ್ ಆಯೋಜಿತ್ ಸಾಹಿತಿಕ್ ಶಿಭಿರ್ ಚಿಂತ್ಲ್ಲೆಪರಿಂಚ್ ಭೋವ್ ಅಪುರ್ಭಾಯೆನ್ ಚಲ್ಲೆಂ. ಅಪ್ರೂಪಾಚೊ
ಪಾವ್ಸ್, ಅಖ್ರೇಚಾ ಘಡ್ಯೆ ಶಿಭಿರ್ ಚಲಂವ್ಚೊ ಜಾಗೊ ಬದ್ಲಿಲೊ ತರ್ಯ್
ಪನ್ನಾಸಾಂ ವಯ್ರ್ ಶಿಭಿರಾರ್ಥಿಂನಿ ಭಾಗ್ ಘೆತ್ಲ್ಲೊ ನಿಜಾಯ್ಕೀ ಧಾದೊಸ್ಕಾಯೆಚೆಂ.
ಹ್ಯಾ ಖಾತಿರ್ ಫಿರ್ಗಜೆವಾರ್ ಭೆಟೊ ದೀಂವ್ಕ್ ವಿತೊರಿ ಆನಿ ಹಾಂವ್ ಗೆಲ್ಲ್ಯಾಂವ್ ತೊ ಅನ್ಯೇಕ್ ಅನ್ಭೋಗ್. ಕೊಂಕ್ಣಿ
ವರ್ತುಲಾಂತ್ ಭೋವ್ಶಾ ಪ್ರಸ್ತುತ್ ಪರಿಗತೆಂತ್ ಉರ್ಭೆನ್, ಜೆಮೆನಾಸ್ತಾಂ, ಕಾಳ್ಜಾ-ಮನಾನ್
ವಾವ್ರ್ ಕರ್ಚಾ ಭೋವ್ ಥೊಡ್ಯಾಂ ಪಯ್ಕಿ ವಿತೊರಿ ಎಕ್ಲೊ
ಮ್ಹಣ್ ಕೊಣ್ಯ್ ನೆಗಾರ್ ಕರ್ಚೆನಾಂತ್. ಹ್ಯಾ ಶಿಭಿರಾಂತ್ ಕೊಂಕ್ಣಿ ವಾವ್ರಾವಿಶಿಂ ಉಲವ್ಪ್
ದಿಶಾ ಚುಕೊನ್ ಶಿಭಿರಾರ್ಥಿಂಚಾ ಮಾತ್ಯಾವಯ್ರ್ ಉಭ್ಲೆಂ ತರ್ಯ್,
ಮಟ್ವ್ಯಾ ಕಾಣ್ಯಾಂವಿಶಿಂ ಎಡ್ವಿನ್ ಜೆ.ಎಫ್.ಡಿ’ಸೋಜಾನ್ ದಿಲ್ಲೆಂ ಉಲವ್ಪ್, ಆನಿ ಕೆವಿನ್ ಡಿ’ಮೆಲ್ಲೊನ್
ಮಾತ್ಯಾರ್ ತೊಪಿ ದವ್ರುನ್ ಮಟ್ವ್ಯಾ ಕಾಣ್ಯೆವಿಶಿಂ
ದಿಲ್ಲೆಂ ವ್ಯಾಖ್ಯಾನ್ ವಾಚ್ಪ್ಯಾಂಕ್ ಧಾದೊಸ್ ಕರುಂಕ್ ಪಾವ್ಲೆಂ
ಮ್ಹಣ್ಚಾಂತ್ ದೋನ್ ಉತ್ರಾಂ ನಾಂತ್. ಸಾಹಿತ್ಯಾಚೊ ಮೋಗ್ ದವ್ರುನ್
ಮಂಗ್ಳುರ್ ಥಾವ್ನ್ ಕಾರ್ಕಳ್ ಪರ್ಯಾಂತ್ ಪಯ್ಣ್ ಕರ್ನ್, ವೇಳ್ ಖರ್ಚಿಲ್ಲ್ಯಾ
ಸಾಹಿತಿಂಚಾ ಬರ್ಯಾ ಮನಾಕ್ ’ಮಹಾನ್ ಸಾಹಿತಿ’ ಮ್ಹಳ್ಳೆ
ಬಿಲ್ಲೆ ಖರೆಚ್ಚ್ ಸೊಭ್ತಾತ್. ಡೊಲ್ಫಿ ಕಾಸ್ಸಿಯಾ, ಎಡ್ವಿನ್ ಜೆ.ಎಫ್.ಡಿ’ಸೋಜ್, ರಾತ್ಭರ್
ಪಯ್ಣ್ ಕರ್ನ್ ಗೊಯಾಂ ಥಾವ್ನ್ ಸಕಾಳಿಂ ಕಾರ್ಕಳ್ ಯೇವ್ನ್
ಪಾವ್ಲ್ಲಿ ಗ್ಲೇಡಿಸ್ ರೇಗೊ, ಮಸ್ಕತ್ ಥಾವ್ನ್ ರಜೆರ್ ಆಯ್ಲ್ಯಾರೀ ಕೊಂಕ್ಣಿ ವಾವ್ರಾವಿಶಿಂ ಉಲಂವ್ಕ್ ಆಯಿಲ್ಲೊ ಜೆರಿ ಡಿ’ಮೆಲ್ಲೊ
ಹಾಂತ್ಲೆ ಪ್ರಮುಕ್..
ಹ್ಯಾ ಶಿಭಿರಾಚಿ ಅನ್ಯೇಕ್ ಸೊಭಾಯ್ ಮ್ಹಳ್ಯಾರ್ ರಜೆರ್ ಆಯಿಲ್ಲಿಂ ಥೊಡಿಂ ಗಲ್ಫಾಂತ್ಲಿಂ
ಸಕ್ರಿಯ್ ರಿತಿನ್ ಮೆತೆರ್ ಜಾಲ್ಲಿಂ - ವಾಯ್ಲೆಟ್ ಪಿರೇರ್, ಪಿಯುಸ್ ಜೇಮ್ಸ್ ಕರುಗಳ್ನಡೆ ಅಪ್ಲ್ಯಾ ಕುಟ್ಮಾಸಮೇತ್
ಹಾಜರ್ ಆಸ್ಲ್ಲಿಂ, ಸುನೀಲ್ ಫೆರ್ನಾಂಡಿಸ್, ಜೆರಿ ಡಿ’ಮೆಲ್ಲೊ, ರಜೆರ್ ಆಯಿಲ್ಲೊ
ನಕ್ರೆಚೊ ಏಕ್ ಬ್ರದರ್ ಸಯ್ತ್ ಹ್ಯಾ ಸಗ್ಳ್ಯಾ ದಿಸಾಚಾ ಕಾರ್ಯಾಂತ್
ಹಾಜರ್ ಆಸ್ಲ್ಲೆಂ ವಿಶೇಷ್. ತಾಂಚೆಸವೆಂ ಗಾಂವ್ಚೆ ಉದೆವ್ನ್ ಯೆಂವ್ಚೆ ಭರ್ವಶ್ಯಾಚೆ
ಸಾಹಿತಿ ಮೆಲ್ವಿನ್ ಪೆರ್ನಾಲ್, ಅವಿನಾ ಮಿಯಾರ್, ಮೆಲ್ಕ
ಮಿಯಾರ್, ಎಲ್ಯೆರ್ ತಾಕೊಡೆ, ರಿಚ್ಚಿ ಕವ್ತಾರ್ ಆನಿ ಹೆರ್..
ದನ್ಪಾರಾಂಚಾ ಕಾರ್ಯಾಂತ್ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಂತ್ ಜಿಕ್ಲ್ಲ್ಯಾಂಕ್ ಇನಾಮಾಂ
ವಾಂಟ್ಲಿಂ, ಹೆಚ್ಚ್ ಸಂದರ್ಭಾರ್ ಕಾರ್ಕಳ್ ವಾರಾಡ್ಯಾಂತ್ ಕೊಂಕ್ಣಿ
ಸಾಹಿತಿಕ್ ವಾವ್ರ್ ಕೆಲ್ಲ್ಯಾ/ಕರ್ಚ್ಯಾ ವಿಂಚ್ಣಾರ್ ಸಾಹಿತಿಂಕ್ ಮಾನ್ ಕೆಲ್ಲಿ ಗೋಷ್ಟಿ
ಸಭಾರಾಂಕ್ ಸಮಧಾನ್ ದೀಂವ್ಕ್ ಪಾವ್ಲಿ ಮ್ಹಣ್ತಾನಾ ಆಮಿ ಧಾದೊಸ್. ಉಪ್ರಾಂತ್ ಕಣ್ಶೆಂತ್ಲೆ
ಪಾಂಚ್ ಬೂಕ್ ಮೊಕ್ಳಿಕ್ ಜಾಲೆ, ಮ್ಹಜಿ ಪಯ್ಲಿ ಕಾದಂಬರಿ ’ಮೊಗಾ
ಮ್ಹಜಾ’ ಪರ್ಗಟ್ ಕೆಲ್ಲ್ಯಾ ಡೊಲ್ಫಿ ಕಾಸ್ಸಿಯಾನ್ ಮ್ಹಜಿ
ಸವಿ (ಪಯ್ಲಿ ’ಇ-ಕಾದಂಬರಿ’) ’ಪಾಟಿಂ ಗಾಂವಾಕ್’ ಮೊಕ್ಳೀಕ್ ಕೆಲಿ ತರ್,
ಮ್ಹಜಾ ತಿಸ್ರ್ಯಾ ಕವಿತಾಜಮ್ಯಾಕ್ ’ದರ್ಭಾರಾಂತ್ಲಿ ಪಿಂರ್ಗೊಣ್’
ಬೂಕ್ ಕೊಣಾಕ್ ಸಮರ್ಪಿತ್ ಕೆಲ್ಲೊಗೀ, ತಾಣೆಂಚ್ (ಎಡ್ವಿನ್ ಜೆ.ಎಫ್. ಡಿ’ಸೋಜ್) ಉಗ್ತಾವಣ್ ಕೆಲೊ. ಎಚ್ಚೆಮಾಚೊ ತಿಸ್ರೊ ಕವಿತಾಜಮೊ
’ಬಾಮುಣಾಚೆಂ ಚೆಡುಂ’
ಬುಕಾಕ್ ಬಾಬ್ ಎರಿಕ್ ಒಜೇರಾನ್ ಉಗ್ತಾವಣ್ ಕೆಲೊ ತರ್, ’ದರ್ಯಾಕ್ ಉದಾಕ್
(ಕವಿತಾಪಾಠ್ - ದುಸ್ರೊ ಭಾಗ್)’ ಹಾಚೆಂ ಉಗ್ತಾವಣ್ ಗ್ಲೇಡಿಸ್ ರೇಗೊನ್ ಕೆಲೆಂ.
ಶೆಂಭೊರ್ ಕವಿಂಚ್ಯಾ ಶೆಂಭೊರ್ ಕವಿತಾಂಚೊ ಕೊಂಕ್ಣೆಂತ್ಲೊ
ಪಯ್ಲೊ ಬೂಕ್ ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ ಬುಕಾಚೆಂ ಉಗ್ತಾವಣ್ ಕೊಂಕ್ಣಿ ಭಾಷಾ-ತಜ್ನ್
ಮಾ|ಬಾ|ವಲ್ಲಿ ಫೆರ್ನಾಂದ್, ಅಜೆಕಾರ್ ಹಾಣಿಂ ಉಗ್ತಾವಣ್ ಕೆಲೆಂ.
ಹೆಚ್ಚ್ ಸಂದರ್ಭಾರ್ ಕೊಂಕ್ಣೆಂತ್ಲ್ಯಾ ಪಯ್ಲ್ಯಾ ಇ-ಬುಕಾಚೆಂ ’ಸಾಗೊರಾಚ್ಯಾ
ವಾಟೆಚ್ಯೊ ಝರಿ’ ಉಗ್ತಾವಣ್ ಜೆರಿ ಡಿ’ಮೆಲ್ಲೊನ್ ಕೆಲೆಂ.
ಬಾಬ್ ಎರಿಕ್ ಒಜೇರ್ ಅಪ್ಲ್ಯಾ ಉತ್ರಾಂನಿ ’ಅಪುಣ್ ಖಂಡಿತ್ ಸಾಹಿತಿ ನ್ಹಂಯ್,
ಸಾಹಿತಿಂಚಾ ಮೆಳಿಂತ್ ಮ್ಹಜೆಂ ಖಂಡಿತ್ ನಾಂವ್ ಆಸ್ಚೆಂನಾ’ ಮ್ಹಳ್ಳೆಂ ಉತಾರ್
ಸಾಂಗ್ತಾನಾ ಖರೆಂಚ್ ತಾಚಾ ಕಾಳ್ಜಾಚೆಂ ವಿಶಾಲ್ಪಣ್ ಝಳ್ಕಾಲೆಂ. ಕುವೆಯ್ಟಾಂತ್ ದಾಯ್ಜ್
ಪಂಗ್ಡಾನ್ ಕರ್ಚಾ ವಾವ್ರಾವಿಶಿಂ ತಾಚಿ ಗಿದಾಚಿ ನದರ್ ಕೆದ್ನಾಂ ಪಡ್ಲಿ ಮ್ಹಳ್ಳೆಂ ಆಯ್ಕೊನ್
ಹಾಂವ್ಂಚ್ ಅಜ್ಯಾಪ್ಲೊಂ. ಆಸೊಂ - ಜಸೊ ತೊ ಝುಜಾರಿಗೀ, ತಶೆಂಚ್ ತಾಕಾ
ಹೆರಾಂಚೆಂ ಬರೆಂ ಪಳೆಂವ್ಚಿ ದೀಶ್ಟ್ ಆಸ್ಚಿ ಕೊಂಕ್ಣೆಚಾ ಮಟ್ಟಾಕ್ ಭೋವ್
ಸಂತೊಸಾಚೆಂ. ಕೊಂಕ್ಣೆಂತ್ ವ್ಹಡ್ಲೆಂ ವ್ಹಡ್ಲೆಂ ಉಲಂವ್ಚೆ, ಬರಂವ್ಚೆಂ ಜಾಯ್ತೆ ಆಸ್ತಿತ್
ಪುಣ್ ತೆಂ ಜ್ಯಾರಿಯೆರ್ ಆಸ್ಚೆ ಆಸ್ಚೆ ಭೋವ್ ಉಣೆಂ ವಾ ನಾಂಚ್.. ತಾಂತುಂ ಉಟೊನ್
ದಿಸ್ಚೊ ಕೊಂಕ್ಣಿ ಝುಜಾರಿ ಬಾಬ್ ಎರಿಕಾನ್ ಹ್ಯಾ ಆವ್ದೆಂತ್ ಕೊಂಕ್ಣೆಂತ್ ಕೆಲ್ಲಿಂ ಕಾಮಾಂ ಭೋವ್ಶಾ
ಹ್ಯಾ ಆಧ್ಲ್ಯಾಂನಿ ಅಪ್ಲ್ಯಾ ಸಂಪೂರ್ಣ್ ಆವ್ದೆಂತ್ಯ್ ಕರುಂಕ್
ನಾತ್ಲ್ಲಿಂ. ಫುಡೆಂ ಕಾರ್ಯಾಚೊ ನಿಯುಕ್ತ್ ಅಧ್ಯಕ್ಶ್ ಮಾ|ಬಾ|ರಿಚಾರ್ಡ್ ರೇಗೊ
(ರೆಗಾಮ್ ತಾಕೊಡೆ) ಅಪ್ಲ್ಯಾ ಅಪುರ್ಭಾಯೆಚಾ ಉತ್ರಾಂನಿ ಕೊಂಕ್ಣೆಂತ್ ಇ-ಬುಕಾಚಿ ಗರ್ಜ್ ಮ್ಹಳ್ಳ್ಯಾಚೆರ್ ಉಲಯ್ಲೊ.
ವೆದಿಚೆಂ ಕಾರ್ಯೆಂ ಸಂಪ್ತಚ್ ಕವಿತಾಸೊಭಾಣ್ ಚಲ್ಲೆಂ, ಲಗ್ಭಗ್
ಸತ್ತರಾಂ ವಯ್ರ್ ಲೋಕ್ ಹಾಜರ್ ಆಸೊನ್ ಕವಿಂಚಿಂ ಕವಿತಾ ಆಯ್ಕೊನ್ ತಾಳಿಯೊ, ಕುಕಾರ್ಯೊ
ಮಾರ್ತಾನಾ ಖರೆಂಚ್ ಸೊಭ್ತಾಲೆಂ...
ಪುಣ್ ಥೊಡ್ಯಾಚ್ಚ್ ದಿಸಾಂನಿ ಹೆಣೆಂ-ತೆಣೆಂ ಖಬಾರ್ ’ವಲ್ಲಿನ್
ಮಿತ್ರ್ ಘೆತ್ಲಾಂ’.. ಎಕ್ಲ್ಯಾನ್ ದನ್ಪಾರಾಂ ಹಾಂವ್, ಮಿತ್ರ್
ಸಂಪಾದಕ್ ಲೋಯ್ಡ್ ಆನಿ ರಿಚ್ಚಿ ಕವ್ತಾರ್ ಸಾಂಗಾತಾ ಜೆವ್ಣಾಕ್
ವೆತಾನಾ ರಸ್ತ್ಯಾರ್ ಹೆಂ ವಿಚಾರುನ್ ಸೊಡ್ಲೆಂಚ್, ತಾಕಾ
ಹಾವೆಂ ಅಪ್ರೂಪಾಚಾ ಸಮಧಾನೆನ್ ಜಾಪ್ ದೀವ್ನ್ ಮ್ಹಳೆಂ ’ಅಳೆ,
ಮ್ಹಾಕಾ ಜೆಮೆನಾಸ್ತಾಂ ಕೊಂಕ್ಣಿ ವಾವ್ರಾಕ್ ಸದಾಂಚ್ ತಯಾರ್ ರಾಂವ್ಚೆಂ ಉರ್ಭೆವಂತ್
ದಿಸ್ಚೆ ಹೆ ತೇಗ್ ಮಾತ್ರ್, ಹೆರಾಂಚಿ ಜೆಮ್ ಸೊಡಂವ್ಚಿ ತಾಂಕ್ಯ್
ಮ್ಹಾಕಾ ನಾ, ವೇಳ್-ಸಯ್ರಣ್ಯ್ ನಾ ದೆಖುನ್ ಹಾಂಚೆಸವೆಂ
ವಾವ್ರ್ ಕರುಂಕ್ ಮ್ಹಜೆಂಯ್ ಮನ್ ಎಕಾಚ್ ಪಾಂಯಾರ್ ಉಭೆಂ ಜಾತಾ ದೆಖುನ್
ಹಾವೆಂ ಮಿತ್ರ್ ಘೆತ್ಲಾಂ ವ ಮಿತ್ರಾನ್ ಮ್ಹಾಕಾ ಘೆತ್ಲಾಂ ಮ್ಹಣ್
ನ್ಹಂಯ್, ಹಾಂವ್ ಮಿತ್ರಾಚೊ ಏಕ್ ಮಿತ್ರ್ ಜೊ ಕೊಂಕ್ಣೆಂತ್ಲೊ
ಹರ್ಯೆಕ್ಲೊ ಆಸ್ಚೆಪರಿಂ’ - ಭೋವ್ಶಾ ತಾಚಾ ಸವಾಲಾಕ್ ಜಾಪ್ ಮೆಳ್ಳಿ
ಜಾವ್ಯೆತ್.
ವಲ್ಲಿಯಾಬ್ (ವಲ್ಲಿ ವಗ್ಗ) ಕೆದ್ನಾಂಯ್ "ಪುರ್ಸೋತ್ ಕರ್ನ್ ಮೈಸೂರ್ ಯೇ" ಮ್ಹಣ್ತಾಲೊ ದೆಖುನ್ ರಜೆಚೆ ಥೊಡೆ ದೀಸ್ ಮೈಸೂರ್-ಬೆಂಗ್ಳುರ್ ಭಂವ್ಡೆಕ್ ಗಳ್ಸಿಲೆ. ಪುಣ್ ಅವ್ಚಿತ್ ತೊ ವೆಲಂಕಣಿ ಪಾವ್ಲೊ ಆನಿ ಕವಿ ಡಾ|ಎಡ್ವರ್ಡ್ ನೊರೊನ್ಹಾಕ್ ಮೆಳ್ಚೆಂ ಭಾಗ್ ಚುಕ್ಲೆಂ, ತರ್ಯ್ ಫೊನಾರ್ ದೋನ್ ಸಬ್ಧ್ ಉಲಂವ್ಚೊ ಸುಯೋಗ್ ಲಾಭ್ಲೊ. ಭೋವ್ಶಾ ವಲ್ಲಿಯಾಬ್ ಆಸ್ತೊ ತರ್ ಸಿಲ್ವೆಸ್ಟರ್ ಸೊಜ್ ಮೈಸೂರ್ ಆನಿ ಹೆರಾಂಕ್ಯ್ ಮೆಳ್ಚೊ ಆವ್ಕಾಸ್ ಆಸ್ತೊ ಕೊಣ್ಣಾ.
ಫುಡ್ಲ್ಯಾ ದಿಸಾಂನಿ ಕೊಂಕ್ಣೆಚೆಂ ಅನ್ಯೇಕ್ ನವೆಂ ಪ್ರಕಾಶನ್
’ಎವರ್ಶೈನ್ ಪಬ್ಲಿಕೇಶನ್ಸ್’ ಆರಂಬ್ಲೆಂ, ಪಯ್ಲೊ ಬೂಕ್
’ಚಿಂಚಾರೆ’ ಮೊಕ್ಳಿಕ್ ಕೆಲೊ. ಪ್ರಕಾಶಕ್ ಕೆನ್ಯೂಟ್ ಕೆಲರಾಯ್ ಆನಿ ಬರವ್ಪಿ ಜೈಸನ್
ಸುವಾರಿಸ್ ಥಂಯ್ ಆಸ್ಚಿ ನವಿ ಉರ್ಭಾ ಸದಾಂಕಾಳ್ ಉರೊಂದಿ
ಮ್ಹಣ್ ಮನಾಂತ್ಚ್ ಮಾಗ್ಲೆಂ. ಜಿಣ್ಯೆಂತ್ ಪಯ್ಲೆ ಪಾವ್ಟಿಂ
ಮಾಲ್ಘಡೊ ಸಾಹಿತಿ-ಕವಿ ಲಿಯಾಬಾಕ್ ಮೆಳ್ಚೆಂ ಭಾಗ್ ಲಾಭ್ಲೆಂ.
ತಾಚೆಸವೆಂ ಸಭಾರ್ ಸಾಹಿತಿಂಕ್ ವಿಕ್ಟರ್ ರೋಡ್ರಿಗಸ್ ಆಂಜೆಲೊರ್,
ಶಾಲಿನಿ ವಾಲೆನ್ಸಿಯಾ, ಜೆರಿ ಕುಲ್ಶೇಕರ್, ಡಾ|ಎಡ್ವರ್ಡ್ ನಜ್ರೆತ್,
ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ, ಸ್ಟೀವನ್ ಪಿಂಟೊ ಕುಂಟಲ್ಪಾಡಿ, ಕೆವಿನ್ ಡಿ’ಮೆಲ್ಲೊ,
ಪಂಚು ಬಂಟ್ವಾಳ್, ಮೌರಿಸ್ ಶಾಂತಿಪುರ್, ಗ್ಲೇಡಿಸ್ ರೇಗೊ,
ಮಾಚ್ಚಾ ಮಿಲಾರ್, ಜೆಫ್ರಿ ಕುಮಾರ್, ಜೋಕರ್ ಕಾಸ್ಸಿಯಾ, ಫೆಚ್ಚಾ ಕುಲ್ಶೇಕರ್,
ಸೋನಿಯಾ ದೆ’ಕೋಸ್ತಾ, ರಿಚ್ಚಿ ಪಿರೇರ್ ಆನಿ ಹೆರಾಂಕ್ ಮೆಳ್ಚೊ
ಸುಯೋಗ್ ಮೆಳ್ಳೊಂ.
ಜೆರಿ
ಕುಲ್ಶೇಕರ್ ಪ್ರಾಯೆಂತ್ ಮಾತ್ರ್ ಮಾಲ್ಘಡೊ
ನ್ಹಂಯ್, ಚಿಂತ್ಪಾನ್ ಸಯ್ತ್ - ದೆಖುನ್ ಹ್ಯಾ ಪಾವ್ಟಿಂ
ತಾಂಗೆರ್ ರಾವ್ಲ್ಲೆಶಿವಾಯ್ ಉಪಾವ್ ನಾತ್ಲ್ಲೊ.
ಜಾಯ್ತೊ ವೇಳ್ ತಾಚೆಸವೆಂ ಖರ್ಚಿಲೊ, ತಾಚೆಥಾವ್ನ್
ಜಾಯ್ತೆಂ ಶಿಕೊಂಕ್ ಮೆಳ್ಳೆಂ. ಕೊಂಕ್ಣೆಂತ್ ಕಾದಂಬರಿಯಾಂಚೊ
ಬಾಪುಯ್ ಜಾವ್ನ್ ಕಸೊ ’ಜೊ.ಸಾ.ಅಲ್ವಾರಿಸ್’ ಫಾಮಾದ್ಗಿ
ತೆಚ್ಚ್ಪರಿಂ ಕಾದಂಬರಿಯಾಂಚೊ ರಾಯ್ ಜಾವ್ನ್ ಜೆರಿ
ಕುಲ್ಶೇಕರ್ ಫಾಮಾದ್. ಭೋವ್ಶಾ ಚಡ್ತಾವಾಂಕ್ ಹೆಂ
ಕಳಿತ್ ಆಸ್ಚೆಂನಾಕೀ ತಾಕಾ 1978
ಇಸ್ವೆಂತ್ ಹಿ ಬಿರುದ್ ಲಾಭ್ಲ್ಲಿ.
ಥೊಡ್ಯಾಚ್ ದಿಸಾಂನಿ ಕೊಂಕ್ಣೆಂತ್ ಅನ್ಯೇಕ್ ನವೆಂ ಪತ್ರ್ ’ದಿರ್ವೆಂ’ ಉಗ್ತಾವಣ್ ಜಾಲೆಂ..
ಇತ್ಲೆಂ ಸರ್ವ್ ಕೊಂಕ್ಣಿ ಕಾರ್ಯಾಂನಿ ಭಾಗ್ ಘೆಂವ್ಚೆಂ ಭೋವ್ಶಾ
ಮ್ಹಜಾ ನಶಿಬಾಕ್ ಪಸಂದ್ ಜಾಲೆಂನಾ ಜಾವ್ಯೆತ್ ದೆಖುನ್ ಫುಡ್ಲೆ
ಪಂದ್ರಾ ದೀಸ್ ತಾಪಾಂತ್, ಕೊಲಾಸೊ ಆಸ್ಪತ್ರೆಂತ್ ಖರ್ಚುನ್ ಯೆಂವ್ಚಾ ಎಕಾ
ದಿಸಾಧಿಂ ಎಡ್ವಿನ್ ಜೆ.ಎಫ್.ಡಿ’ಸೋಜಾಕ್, ರೆಗಾಮ್ ತಾಕೊಡೆಕ್,
ಪಯ್ಲೆ ಪಾವ್ಟಿಂ ಮೆಳ್ಚಿಂ ನಂದಿನಿ (ಸ್ಟೆಲ್ಲಾ ಬಾಯ್), ಸಿರಿವಂತ್
ಹಾಂಕಾಂ ಮೆಳ್ಳೊಂ. ಭರ್ಲ್ಲೊ ಕೊಳ್ಸೊ ಕೆದಿಂಚ್
ಆಲ್ಕಾಂದನಾ ಮ್ಹಣ್ಚಾಕ್ ರೆಗಾಮ್ ತಾಕೊಡೆ ಅನ್ಯೇಕ್ ನಿದರ್ಶನ್,
ಜಿತ್ಲೊ ಪ್ರತಿಭಾವಂತ್ ತೊಗೀ, ತಿತ್ಲೊಚ್ ಖಾಲ್ತೊ ಆನಿ
ಮೊವಾಳ್. ಥೊಡ್ಯೊ ಘಡ್ಯೊ ಮಾತ್ರ್ ತಾಚೆಲಾಗಿಂ ಖರ್ಚುಂವ್ಚೊ ಸುಯೋಗ್
ಮ್ಹಾಕಾ ಲಾಭ್ಲೊ ತರ್ಯ್ ಎಕೆಕಾ ಘಡ್ಯೆ ಮ್ಹಾಕಾ
ತಾಚೆಥಾವ್ನ್ ಶಿಕೊಂಕ್ ಆಸ್ಲ್ಲೆಂ. ತೆಚ್ಚ್ ಸಂದರ್ಭಾರ್ ಸಾಂಗಾತಿ ಮೀಡಿಯಾಚೆ
ರೆಗಾಮ್ ತಾಕೊಡೆಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ಕಾಡ್ಚಿ
ಯೆವ್ಜಣ್ ಕರ್ನ್ ಆಸ್ಚೆಂ ಆಯ್ಕೊನ್ ಫುಲ್ಲೊಂ..
ಎಚ್ಚೆಮಾಚಾ ಮಂಗ್ಳುರ್ಚಾ ಘರಾಂತ್ ಜೇವ್ನ್ ಕಶೀಯ್ ಮ್ಹಜಾ ಮಾಂಯ್ಗಾಂವ್ಚಾ ಭಂವ್ಡೆಕ್ ಸಾಂಕೇತಿಕ್ ರಿತಿನ್ ಸಂಪ್ಣಿ ದೀವ್ನ್ ಯೆತಾನಾ ವಾಟೆರ್ ಪಂಚು ಬಂಟ್ವಾಳ್ ರಾಕೊನ್ ಆಸ್ಲ್ಲೊ. ಅಮ್ಸೊರಾನ್ ತರ್ಯ್ ಥೊಡೊ ವೇಳ್ ಸುಕ್-ದೂಕ್ ಉಲಯ್ಲ್ಯಾಂವ್. ಕೊಂಕ್ಣೆಂತ್ ಮ್ಹಜಿ ಪಯ್ಲಿ ಮಟ್ವಿ ಕಾಣಿ ಪರ್ಗಟ್ ಕೆಲ್ಲೊ ಪಂಚು ಖರೆಂಚ್ ಜಾವ್ನ್ ಮೊಗಾಚೊ. ಅಶೆಂ ಹೆರಾಂಕ್ ಮೆಳ್ಚಿಂ ಅಧುರಿಂ ಸ್ವಪ್ಣಾಂ ಗಾಂವಾಂತ್ಚ್ ಪುರುನ್ ಕಸೋಯ್ ಕುವೇಯ್ಟ್ ಪಾವ್ಲೊಂ.
ಮ್ಹಜೆಂ ಸ್ವಾಗತ್ ಕರುಂಕ್ ಇಮೇಯ್ಲಾಂಚಿ ರಾಸ್ ಆಸ್ಲ್ಲಿ ತರ್ಯ್ ಕೆಲ್ಲೆಂ
ಪಯ್ಲೆಂ ಕಾಮ್ ಮ್ಹಳ್ಯಾರ್ ದಾಯ್ಜ್ ಪಾನ್ ಬದ್ಲಿಲೆಂ.... ತಿಂತೆರಾಂತ್ ಪಿಂತುರಾಂ ಅಂಕೊ
ಪರ್ಗಟ್ ಕೆಲೊ ಆನಿ ಹಳ್ತಾರ್ ಮಾಂಯ್ಗಾಂವಾಂತ್ ಖರ್ಚಿಲ್ಲ್ಯಾ ಬರ್ಯಾ
ದಿಸಾಂಚೊ ತಶೆಂಚ್ ಅಧುರಿಂಚ್ ಉರ್ಲೆಲ್ಯಾ ಜಾಯ್ತ್ಯಾ
ಕಾಮಾಂಚೊ ನಿಯಾಳ್ ಕರುಂಕ್ ಪಡ್ಲೊಂ..
ಹ್ಯಾ ದಿಸಾಂನಿ ದಾಯ್ಜ್ ವಾಚ್ಪ್ಯಾಂಕ್ ರಾಕೊಂಕ್ ಕೆಲ್ಲ್ಯಾಕ್,
ಸಮಧಾನ್ ದವ್ರುನ್, ಮಾಯಾ-ಮೊಗಾನ್ ಮ್ಹಜೆವಿಶಿಂ ತನ್ಕಿ ಕೆಲ್ಲ್ಯಾ
ಸರ್ವ್ ಮೊಗಾಚ್ಯಾಂಕ್ ಹಾಂವ್ ಋಣ್ಕಾರಿ ಜಾವ್ನ್ ಉರ್ತಲೊಂ.
ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
