ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಂಕರ್ - 2
ಮಟ್ವಿ ವಳೊಕ್:
ನಿರ್ಮಲಾ ಗೋವಿಯಸ್ ಆಯ್ಲೆವಾರ್ ಕೊಂಕ್ಣಿ ಸಾಹಿತ್ಯಾಂತ್ ವಳ್ಕಿಚೆಂ, ಅಪ್ರೂಪಾನ್ ಥೊಡಿಂ ಕವಿತಾ ಬರಂವ್ಚಾ ಬಾಯ್ ನಿರ್ಮಲಾಚಿ ಹಿ ಅಪ್ರೂಪ್ ಮಟ್ವಿ ಕಾಣಿ ಜಾವ್ನಾಸಾ. ಮಸ್ಕತಾಂತ್ಲ್ಯಾ ಪ್ರತಿಷ್ಟಿತ್ ’ಬರ್ಪಿ ಮಿತ್ರ್’ ಹಾಂತುಂ ಸಕ್ರೀಯ್ ರಿತಿನ್ ಸೆವಾ ದಿಂವ್ಚಿ ಬಾಯ್ ನಿರ್ಮಲಾಥಾವ್ನ್ ಅಸಲ್ಯೊಚ್ ಬರ್ಯೊ ಸಾಮಾಜಿಕ್ ಕಾಣ್ಯೊ ಉದೆವ್ನ್ ಯೇಂವ್ ಮ್ಹಣ್ ಆಶೆತಾಂ.
ನಿರ್ಮಲಾ ಗೋವಿಯಸ್
ಕಥಾಂಕರ್ - 2. ನಿರ್ಮೊಣೆ
ದೆವಾಚೆಂ ದೆಣೆಂ ಯಾ ವಿಚಿತ್ರ್ ನಿರ್ಮೊಣೆಂ ತೆಂ ಕಳಿತ್ ನಾ, ಅರ್ಮೂಸ್ ಅನಿಂ ಆಪೊಲಿ ಬಾಯೆಕ್ ಆಟ್ ಜಣಾಂ ಬುರ್ಗಿಂ. ತಾಂತುನ್ ದೊಗಾಂ ಜೊವ್ಳಿಂ. ಎಕ್ಲೆಂ ಮೊನೆಂ ಆನಿ ಎಕ್ಲೊ ಕೆಪ್ಪೊ. ಉರ್ಲ್ಲ್ಯಾ ಸ ಜಣಾಂ ಪಾಯ್ಕಿ ಘರಾಂತ್ ಭುರ್ಗ್ಯಾಂ ಪಾಯ್ಕಿ ಮಾಲ್ಘಡೆಂ ಮಾಗ್ದಲೆನ್. ಅರ್ಮೂಸಾಬಾನ್ ತಾಕಾ ಮೊಗಾನ್ ಮಾಗ್ಗಿ ಮ್ಹಣ್ ನಾವಯ್ಲಾಂ. ಮಾಗ್ಗಿ ಪಾಟ್ಲ್ಯಾನ್ ಚಾರ್ ಭಾವ್ ಆನಿ ತೆಗಾಂ ಬಯ್ಣ್ಯೊ. ’ಏಕ್ ಜಾಯ್ ದೋನ್ ಪುರೊ’ ಮ್ಹಣ್ಚ್ಯಾ ಮಾರ್ಗಾಯೆಚ್ಯಾ ಕಾಳಾರ್, ಆರ್ಮೂಸಾಬ್ ಆನಿ ಆಪೊಲಿಬಾಯೆಚಾ ಭಾಗಿಂತ್ ಆಟ್ ಫುಲಾಂ ಫುಲ್ಲ್ಲಿಂ. ತಾಂಕಾಂ ವ್ಹಡ್ ಕರ್ಚೆಂ, ಫಾವೊತೆಂ ಶಿಕಾಪ್ ದಿಂವ್ಚಿ ತಾಂಕ್ ತಾಂಚೆ ಥಂಯ್ ನಾತ್ಲ್ಲಿ. ತಕ್ಲೆಕ್ ವೊಡ್ಲ್ಯಾರ್ ಪಾಂಯಾಕ್ ನಾ. ಪಾಂಯಾಕ್ ಘಾಲ್ಲ್ಯಾರ್ ತಕ್ಲೆಕ್ ಪಾವಾನಾ ಮ್ಹಳ್ಳಿ ಗತ್ ಜಾಲ್ಲಿ ತ್ಯಾ ಘರ್ಚಾಂ ಮ್ಹನ್ಶಾಂಚಿ.
ಆಪೊಲಿಬಾಯ್ ಘರ್ ಕಾಮ್ ಕರ್ನ್ ಆನಿ ಅರ್ಮೂಸಾಬ್ ಸಾಯ್ಬಾಚಾ ತೊಟಾಂತ್ ದಿಸ್ಫಡ್ತೊ ವಾವ್ರ್ ಕರ್ನ್ ಭುರ್ಗ್ಯಾಂಕ್ ಪೊಸ್ತಾತ್. ಸಭಾರ್ ಪಾವ್ಟಿಂ ಕುಡ್ಲ್ಯಾಂತ್ಲೆಂ ಇಲ್ಲೆಂ ಜೆವಾಣ್ ಭುರ್ಗ್ಯಾಂಕ್ ವಾಂಟುನ್ ವಾಡುನ್ ತಿಂ ಖಾಲಿ ಪೊಟಾರ್ ಥಂಡ್ ಕುಡ್ಕೊ ಘಾಲ್ನ್ ಭುಕ್ ಥಾಂಬಂವ್ಚೆಂ ಸದಾಂಚೆಂ ಜಾಲಾಂ. ಮಾಗ್ಗಿ ಹೆಂ ಸರ್ವ್ ಪಳೆವ್ನ್ ದುಃಖ್ ಪಾವ್ತಾ ತರಿ ಅಸಹಾಯಕ್ ಉರ್ಲಾ.
ಅಪೊಲಿಬಾಯ್ ಕಾಮ್ ಕರ್ಚಾ ಧನ್ಯಾಚಾ ಕುಮ್ಕೆನ್ ಆನಿ ಇಗರ್ಜೆಂತ್ಲೊ ವಿಗಾರ್ ಸಿಕೇರಿಚಾ ವ್ಹಡಾ ಮನಾನ್ ಮಾಗ್ಗಿ ಇಸ್ಕೊಲಾಂತ್ ಭರ್ತಿ ಜಾತಾ. ತಾಚೆಂ ಇಸ್ಕೊಲ್ ಶಿಕಾಪ್ ಸಂಪ್ತಚ್ ಸಾಂಜೆರ್ ಘರಾ ಯೇವ್ನ್, ಗರ್ಜೆಚೆಂ ಕಾಮ್ ಕರ್ನ್, ಭಾವಾ ಭೈಣೆಂಚೆಂ ಗರ್ಜ್ಯೊ ಸುಧಾರ್ಸುನ್, ಶಿಕ್ಪಾಚ್ಯಾ ಅಭ್ಯಾಸಾಕ್ ಬೋವ್ ಥೊಡೊ ವೇಳ್ ತಾಕಾ ಮೆಳ್ತಾ ತರೀ, ಶಿಕ್ಪಾಂತ್ ಗೋಲ್ಡ್ ಮೆಡಲ್ ಹರ್ಯೇಕಾ ವರ್ಸಾ ಬಾಂದುನ್ ದವರ್ಲಿ ಭುತಿ ತಾಕಾ. ಆನಿ ಹ್ಯಾ ವರ್ವಿಂ ತಾಚ್ಯಾ ಚುರುಕಾಯೆಕ್ ಲಾಗೊನ್, ಆನಿ ಶಿಕ್ಪಾಂತ್ ದಾಕಯ್ಲ್ಯಾ ಯಶಸ್ವಿ ಥಾವ್ನ್ ಸಭಾರ್ ಸಂಘ್ ಸಂಸ್ಥ್ಯಾ ಥಾವ್ನ್ ಆರ್ಥಿಕ್ ರಿತಿನ್ ಸಹಾಯ್ ತಾಕಾ ಲಾಭ್ತಾ. ಯೆದೊಳ್ಚ್ಚ್ ಶಿಕ್ಪಾಂತ್ ತಶೆಂ ಖೆಳಾ ಪಂದ್ಯಾಟಾನಿಂ ನಾಂವ್ ತಾಣೆಂ ಜೊಡ್ಲಾಂ. ತಾಚ್ಯಾ ಕಷ್ಟಾಕ್ ಫಳ್ ಜಾವ್ನ್ ಧಾವ್ಯಾ ವರ್ಗಾಂತ್ ಪ್ರಥಮ್ ಸ್ಥಾನ್ ರಾಜ್ಯ್ ಮಟ್ಟಾರ್ ಫಾವೊ ಜಾವ್ನ್ ಮುಖ್ಲ್ಯಾ ಫುಡಾರಾಕ್ ಆನಿ ಶಿಕ್ಪಾಕ್ ಬರಿಂ ವಾಟ್ ಆತಾಂ ತಯಾರ್ ಜಾಲ್ಯಾ. ತೆಂ ಸಂತೊಸಾನ್ ಭರ್ಲಾಂ.
ಆಪ್ಲ್ಯಾ ಕುಟ್ಮಾಕ್ ಸಾಂಬಾಳ್ಚಿ ತಶೆಂಚ್ ಭಾವ್ ಭಯ್ಣಿಂಕ್ ಬರೆಂ ಕರ್ನ್ ತಾಂಕಾಯಿ ಬರೊ ಫುಡಾರ್ ದಾಕಂವ್ಚಿ ಸಪ್ಣಾಂ ತೆಂ ದೆಕುನ್ ಆಸ್ಚ್ಯಾ ಹ್ಯಾ ವಗ್ತಾ ಆಪೊಲಿಬಾಯ್ ಪಿಡೆಂತ್ ಪಡ್ಲ್ಯಾ. ಆಕಸ್ಮಾತ್ ಆವ್ಚಿತ್ ದೊಸ್ಚ್ಯಾ ಪಿಡೆ ವರ್ವಿಂ ನಿತ್ರಾಣಿಂ ಜಾವ್ನ್ ಕಾಮ್ ಕರುಂಕ್ ತಿಕಾ ಆಸಾಧ್ಯ್ ಜಾಲಾಂ. ಮಾಗ್ಗಿಚಾ ಶಿಕ್ಪಾಕ್ ಆನಿ ಬರ್ಯಾ ಭವಿಶ್ಯಾಚ್ಯಾ ಸಪ್ಣಾಂಕ್ ಆಡ್ ಪಾಂಯ್ ತಶೆಂ ಸಗ್ಳ್ಯಾ ಘರ್ಚೊ ಹಾರ್ಭಾರ್ ಬಾಬಾಸಂಗಿಂ ಮಾಗ್ಗಿನ್ ಸಾಂಬಾಳಿಜಯ್ ಪಡ್ಲಾಂ. ಮಾಗ್ಗಿ ವರ್ನಿಂ ಲ್ಹಾನ್ ಆಸ್ಲ್ಲಿಂ ಭಾಂವ್ಡಾಂ ಶಿಕಾಪ್ ಮುಂದರುನ್ ಆಸಾತ್. ತಾಂಚೆಂ ಉದರ್ಗತೆ ಖಾತಿರ್ ಆನಿಂ ವಡಿಲಾಂಚಾ ಉತ್ರಾಕ್ ಖಾಲ್ತಿಮಾನ್ ಘಾಲ್ನ್ ಮಾಗ್ಗಿನ್ ತಾಚಿ ಆಶಾ, ಆಕಾಂಕ್ಶಾ, ಸಪ್ಣಾಂ ಸರ್ವ್ ತ್ಯಾಗ್ ಕರಿಜೆ ಪಡ್ತಾ. ಏಕ್ ಮಹಿನೊಭರ್ ಘರ್ಚೆಂ ಹಾರ್ಭಾರ್, ಮಾಂಯ್ಚಿ ಚಾಕ್ರಿ ಕರ್ನ್ ಆಸ್ತಾನಾ ಮಾಗ್ಗಿಕ್ ಫಾದರ್ ಸಿಕೇರ್ ಆಪಯ್ತಾ ಆನಿ "ಮಾಗ್ಗಿ.....ಲೋಭಾಮಾಚ್ಯಾ ಪ್ರೆಸ್ಸಾಂತ್ ಕ್ಲಾರ್ಕಾಚೆಂ ಕಾಮ್ ಆಸಾ, ತುಂ ಕರುಂಕ್ ತಯಾರ್ ಆಸಾಯ್?" ಧಾವಿ ಕ್ಲಾಸ್ ಶಿಕೊನ್ ಕಾಮಾಚಿ ಸಾರ್ಕಿ ಮಾಹೆತ್ ನಾತ್ಲ್ಲ್ಯಾನ್ ಕಾಮ್ ತರೀ ಕಶೆಂ ಕರ್ಚೆಂ ಮ್ಹಣ್ ಸಾಂಗೊಂಕ್ ತೊಂಡಾ ಮ್ಹಣಾಸರ್ ಆಯ್ಲ್ಯಾರೀ ಘರ್ಚಿ ಪರಿಸ್ಥಿತಿ ಚಿಂತುನ್" ಜಾಯ್ತ್ ಫಾದರ್, ಹಾಂವ್ ತಯಾರ್ ಆಸಾಂ" ಮ್ಹಣ್ ಜಾಪ್ ದಿತಾ. ಫಾದ್ರ್ಯಾಬಾಚಾ ಆನಿ ಲೊಬಾಮಾಚ್ಯಾ ಸಹಕರಾನ್ ಪ್ರೆಸಾಂತ್ ಭರ್ತಿ ಜಾವ್ನ್ ತೀನ್ ಮಹಿನ್ಯಾ ಭಿತರ್ ಸ್ವತಂತ್ರ್ ಜಾವ್ನ್ ಬಹುಷ್ಯಾ ಚುರುಕಾಯೆನ್ ಕಾಮ್ ಕರುಂಕ್ ಮಾಗ್ಗಿ ಸಕ್ತಾ. ಹೆಂ ಪಳೆವ್ನ್ ಲೋಬಾಮ್ ಆಜಾಪ್ ಪಾವ್ತಾ ತರಿಂ ತಾಚೆಂ ಶೆಗುಣ್ ಆನಿಂ ಹುಶಾರ್ಕಾಯ್ ಪಳೆವ್ನ್ ಸಂತೊಸ್ತಾ.
ಮಾಗ್ಗಿಚೊ ಸಾಂಬಾಳ್ ಸ ಮಹಿನ್ಯಾ ಬಿತರ್ ತಾಣೆಂ ದೊಡ್ತೊ ಕೆಲೊ. ತಾಚಿ ಕಾಮಾಂತ್ ಆಸಕ್ತ್ ಆನಿ ಅಭಿವ್ರದ್ಧಿಚ್ಚ್ ಹಾಕಾ ಕಾರಣ್ ಜಾವ್ನಸಾ. ಕಾಮಾ ಸಾಂಗಾಂತಾ, ಸಾಂಜೆರ್ ಕೊಲೆಜಿಚೆಂ ಶಿಕಾಪ್ ಮುಂದರ್ಸುನ್ ಆನಿ ಘರಾ ಬಾಬಾಕ್ ಅರ್ಥಿಕ್ ಸಹಾಯ್ ಕರುಂಕ್ ಮಾಗ್ಗಿ ಸಕ್ತಾ. ಘರ್ಚೆಂ ಕಾಮ್, ದಿಸಾಚೆಂ ಅಪೊಲಿಬಾಯೆಚಿ ಚಾಕ್ರಿ, ಮಾಗ್ಗಿಚೆಂ ಪಾಟ್ಲೆ ಭಯ್ಣ್ ಜೆಸ್ಸಿ ಸಂಪೈತಾ. ಆಟ್ವೆ ಕ್ಲಾಸಿಂತ್ ತೆಂ ಆಸಾ ತರೀ, ಘರ್ಚಾ ಕಾಮಾಂತ್ ಸರ್ವಾಂಕ್ ತೆಂ ಪಾಟಿಂ ಸೊಡ್ನ್ ಆಪುಣ್ ಉಂಚ್ಲ್ಯಾ ಹಂತಾರ್ ಆಸಾ. ಆತಾಂ ಮಾಗ್ಗಿ ಮಾಂಯ್, ಬಾಬಾಕ್ ಆನಿಂ ಬಾಂವ್ಡಾಂಕ್ ಆರ್ಥಿಕ್ ರಿತಿನ್ ಘಟ್ ಖಾಂಬೊ ಜಾವ್ನ್ ಆಧಾರ್ ದೀವ್ನ್ ಆಸಾ.
ಹಿ ತಾಚಿ ಶಾತಿ ಪಳೆವ್ನ್ ಬಾಬಾಕ್ ಮಾಗ್ಗಿ ವಯ್ಲೊ ಗೌರವ್ ಚಡ್ತಾ. ಲೋಬಾಮಾಚಾ ಭೈಣೆಚೊ ಪೂತ್ ರೋಬರ್ಟ್ ಲೋಬಾಮಾಕ್ ಪ್ರೆಸ್ಸಾಕ್ ಮೆಳೊಂಕ್ ವೆತಾ. ಲೊಬಾಮಾಚ್ಯಾ ಮೊಗಾಚೊ ಬಾಚೊ ತೊ. ಲಾಂಬ್, ದಿಂಡೊ ಮಾನಾಯ್, ಗೊರ್ಶಾ ಕಾತಿಚೊ, ಹಾಸ್ತ್ಯಾ ಮುಖಾಮೊಳಾಚೊ ತರ್ನಾಟೊ. ಕಾಲೆಜಿಚ್ಯಾ (ಡಬಲ್ ಗ್ರಾಜುಯೇಶನ್) ಎಂ. ಕೊಮಾಚ್ಯಾ ಆಖ್ರೇಚ್ಯಾ ಹಂತಾರ್ ಶಿಕಾಪ್ ಕರ್ನ್ ಆಸಲ್ಲೊ. ಪಳೆಂವ್ಕ್ ಕಿತ್ಲೊ ಆಕರ್ಶಿತ್ಗೀ ತಿತ್ಲೊಚ್ ಗುಣೇಸ್ತ್. ಕಾಮಾಂತ್ ಮಾಗ್ಗಿ ಬರಿಚ್ಚ್ ಚುರುಕ್. ಲೋಬಾಮಾಚ್ಯಾ ಪ್ರಶಂಸೆಕ್ ಪಾತ್ರ್ ಜಾಲ್ಲೊ ಆಪುಟ್ ಆಂಕ್ವಾರ್ ಬಾಚೊ ಮಣ್ಯೆತ್ ರೊಬು. ಶಿಕ್ಪಾ ಮಧೆಂ ತಡವ್ ಮೆಳ್ತಾನಾ ಲೊಬಾಮಾಕ್ ಪ್ರೆಸಾಚಾ ಕಾಮಾಂತ್ ಕುಮ್ಕೆಚೊ ಹಾತ್ ಮೆಳಯ್ತಾಲೊ.
ಮಾಗ್ಗಿ ವಿಶ್ಯಾಂತ್ಲಿ ಬರಿ ಅಬಿಪ್ರಾಯ್ ಲೋಬಾಮ್ ಬೋವ್ಚ್ಚ್ ಉಂಚ್ಲ್ಯಾ ಉತ್ರಾಂನಿಂ ತಾಚಿ ಪರಿಚಯ್ ರೊಬುಕ್ ಕರ್ನ್ ದಿತಾ. ಲೋಬಾಮಾಚ್ಯಾ ಹೊಗ್ಳಾಪಾಚ್ಯಾ ಉತ್ರಾಂನಿಂ ಪ್ರಭಾವಿತ್ ಜಾವ್ನ್ ಎದೊಳ್ ಕೊಣಾಥಂಯ್ ಬೊಗನಾತ್ಲ್ಲೆಂ ಆಕರ್ಷಣ್ ರೊಬುಕ್ ಮಾಗ್ಗಿ ಥಂಯ್ ಬೊಗ್ತಾ. ತೊ ಸಂತೊಸಾನ್ ತಾಂಬ್ಡೊ ಜಾತಾ. ತಾಚೆಂ ಮುಖಾಮಳ್ ಫುಲ್ತಾ. ಗಾಲಾರ್ ಮಿರಿಯೊ ಹಾಡ್ಚೊ ತಾಚೊ ಹಾಸೊ ಬಾರಿಚ್ಚ್ ಅಪುರ್ಬಾಯೆಚೊ. ಮಾಗ್ಗಿಚ್ಯಾ ದೊಳ್ಯಾಂಕ್ ದೊಳೊ ಲಾಗೊನ್ ಪಳೆವ್ನಂಚ್ ರಾವಲ್ಲ್ಯಾ ರೊಬುಕ್ ಲೋಬಾಮ್ ಜಾಗಾಯ್ತಾ.
"ರೊಬು ಕಿತೆಂ ಚಿಂತುಂಕ್ ಪಡ್ಲಾಯ್ ತುಂ? ಭಲಾಯ್ಕಿ ಬರಿ ಆಸಾಮು? ಹಾ ದಾಕ್ತೆರಾಚಿ ಬಾಗ್ಲಾಂ ಉಗ್ತಿಂ ಕರಿಜಾಯ್?"
ನಾಂ ನಾಂ ಮಾಮಾ ಹಾಂವ್ ಸಾರ್ಕೊಂ ಆಸಾಂ. ಕಾಂಯ್ ತೊಂದ್ರೆ ನಾಂತ್". ಹೆಂ ಆಯ್ಕೊನ್ ಮಾಗ್ಗಿ ಮತಿಂತ್ ಆಮ್ರೊಕೆ ಹಾಸ್ತಾಂ. ಮಾಗ್ಗಿಲಾಗಿಂ ದೋನ್ ಉತ್ರಾಂ ಉಲಂವ್ಕ್ ಆತ್ರೆಗೊನ್ ತಿಂ ತಾಳ್ಯಾ ಥಾವ್ನ್ ಭಾಯ್ರ್ ಪಡ್ಚೆ ಆದಿಂ ಲೋಬಾಮ್ ರೋಬುಕ್ ತಾಚ್ಯಾ ಕ್ಯಾಬಿನಾಕ್ ಉಲೊ ಕರ್ತಾ. ಹಾತಾಕ್ ಮೆಳ್ಲ್ಲೆಂ ತೊಂಡಾಕ್ ವರ್ಚೆ ಆದಿಂ ಚುಕ್ಲೆಂ ಮ್ಹಣ್ ತೊ ನಿರಾಸ್ತಾ.
ತ್ಯಾ ದೀಸ್ ರೊಬುಚ್ಯಾ ದೊಳ್ಯಾಂಕ್ ಮಾಗ್ಗಿಚಿಂಚ್ ಸೊದ್ನಾಂ. ತಾಚಿ ಚಾಲ್, ಚಮ್ಕಣ್ ಆನಿಂ ಮಾಮಾನ್ ಕೆಲ್ಲಿ ತಿ ಪ್ರಶಂಸಾ, ಚುರುಕಾಯ್ ಹೆಂ ಸರ್ವ್ ನಿಯಾಳುನ್ ರಾತಿಂ ನೀದ್ ನಾಸ್ತಾಂ ತಾಚೆ ದೊಳೆ ಬಿಂಡಾ ಬರಿ ತಾಂಬ್ಡೆ ಜಾಲ್ಯಾತ್ ತರೀ ಹೆಂ ಸರ್ವ್ ತೊ ಪರ್ವಾ ಕರಿನಾ. ಸಕಾಳಿಂ ಉಠಲ್ಲೊಚ್ಚ್ ಕಾಲೇಜಿಕ್ ಚಕ್ಕರ್ ಮರ್ನ್ ಪ್ರೆಸಾಚಾ ವಾಟೆಕ್ ಬೈಕ್ ಗುಡ್ಡಾಯ್ತಾ. ಸಕಾಳಿಂ ಫುಡೆಂ ಪ್ರೆಸ್ಸಾಂತ್ ರೊಬುಕ್ ದೆಕಲ್ಲೊ ಮಾಮಾ ಅಜ್ಯಾಪಾನ್ ವಿಚಾರಿ
"ಸುರ್ಯೊ ಆಜ್ ಕೈಂ ಥಾವ್ನ್ ಉದೆಲೊ?"
ಹೆಂ ಆಯ್ಕೊನ್ ರೊಬು ಆಮ್ರುಕೆಂ ಹಾಸ್ತಾ ಆನಿ ಮಾಗ್ಗಿ ಖಂಯ್ ತರೀ ದಿಷ್ಟಿಕ್ ಪಡಾತ್ಗಿ ಮಣೊನ್ ಆತ್ರೆಗಾನ್ ದೀಷ್ಟ್ ಭಂವ್ಡಾಯ್ತಾ. ತಾಚೆಂ ಮೌನ್ಪಣ್ ಆನಿ ಹಾಸೊ ಲೋಬಾಮಾಕ್, ರೊಬು ಥಂಯ್ ಕಿತೆಂಗೀ ಬದ್ಲಾವಣ್ ಆಯ್ಲ್ಯಾ ಹೆಂ ಖಚಿತ್ ಕರ್ತಾತ್.
ಕುಶಿಲ್ಯಾ ಕುಡಾಂತ್ ಟೈಪಿಂಗಾಚ್ಯಾ ಕಾಮಾಂತ್ ಮಗ್ನ್ ಜಾಲೀ ಮಾಗ್ಗಿಕ್ ರೊಬು ಜಾಗಯ್ತಾ.
"ಗುಡ್ ಮೊರ್ನಿಂಗ್... ಕಶೆಂ ಆಸಾಯ್ ತುಂ"
ಮಾಗ್ಗಿ ಟೈಪಿಂಗ್ ಮಿಶಿನಾ ವಯ್ಲೆ ದೊಳೆ ಕಾಡ್ನ್, ವಯ್ರ್ ಉಭಾರುನ್ "ಹಾಂವ್ ಬರಿಂ ಆಸಾಂ", ತುಂ ಕಸೊ ಆಸಾಯ್?" ಆಶೆಂ ಸಂಬಾಷಣ್ ಪ್ರಾರಂಭ್ ಜಾಲ್ಲೆಂಚ್ ತಿ ದೊಗಾಂಯಿ ದಿಸಾಂನ್ ದೀಸ್ ಏಕಾಮೆಕಾ ಗೌರಾವಾನ್ ಲೆಕುನ್ ಆಪ್ತ್ ಜಾತಾತ್. ದೀಸ್, ಹಪ್ತೆ ಮಹಿನೆ ಪಾಶಾರ್ ಜಾತಚ್ಚ್ ತಿಂ ಬರಿಂ ಸಾಂಗಾತಿ ಜಾಂವ್ಕ್ ಪಾವ್ತಾತ್.
ರೋಬರ್ಟಾಚೆಂ ಶಿಕಾಪ್ ಸಂಪ್ಲೆಂ. ಆಪ್ಲೆಂ ಪ್ರೆಸ್ಸಾಚೊ ಹಾರ್ಭಾರ್ ಸಾಂಬಾಳುಂಕ್ ರೋಬರ್ಟಾಕ್ ಲೋಬಾಮ್ ವಿನಂತಿ ಕರ್ತಾ. ಎದಳೊಚ್ಚ್ ಹ್ಯಾ ಕಾಮಾಂತ್ ಪುರ್ತಿ ಮಹೆತ್ ತಾಣೆಂ ಜೊಡ್ಲ್ಯಾ. ಪ್ರೆಸ್ಸಾಚೆ ಬಿಸಿನೆಸ್ ಉದರ್ಗತೆಕ್ ಪಾಂವ್ಚಿ ಶಾತಿ ಆನಿ ತಾಲೆಂತಾಂ ತಾಚೆ ಥಂಯ್ ಲಿಪೊನ್ ಆಸಾತ್. ತೊ ಲೊಬಾಮಾಚ್ಯಾ ವಿನಂತೆಕ್ ಗ್ರೀನ್ ಸಿಗ್ನಲ್ ದಾಕವ್ನ್ ತಾಕಾ ಸಂತೊಸಾಯ್ತಾ. ಲೊಬಾಮಾಕ್ ಡಯಾಬಿಟಿಸ್ ಪಿಡಾ ಧೊಸ್ತಾ ಜಾಲ್ಲ್ಯಾನ್, ತಾಕಾ ಹರ್ಶೆಂಚಾ ಬರಿ ವಾವ್ರ್ ಕರುಂಕ್ ತಾಂಕ್ ನಾಂ ಆನಿಂ ತೊ ನಿವೃತ್ತ್ ಜಾಂವ್ಕ್ ಚಿಂತಾ.
ಆತಾಂ ಮಾಗ್ಗಿಚೊ ಧನಿ ರೊಬು, ತೊ ತಾಚೊ ಆಪ್ತ್ ಈಷ್ಟ್ ತರೀ ಕಾಮಾ ಮಧೆಂ ಇಷ್ಟಾಗತೆಚೆಂ ನಾಂವ್ ಹಾಡುಂಕ್ ಮಾಗ್ಗಿ ಕಾರಣ್ ದೀನಾ. ಕಿತೆಂಯೀ ವೈಯುಕ್ತಿಕ್ ವಿಷಯ್ ಆಸಾ ತರೀ, ಕಾಮ್ ಸಂಪ್ಲ್ಲ್ಯಾ ಉಪ್ರಾಂತ್ ತೆಂ ಅದಲ್ ಬದಲ್ ಕರ್ತಾತ್. ಹೊ ಮಾಗ್ಗಿಚೊ ಗೂಣ್ ರೊಬುಕ್ ಬಾರಿಚ್ಚ್ ರುಚ್ತಾ. ಕಾಮಾ ಥೈಂ ಮಾಗ್ಗಿಚ್ಯಾ ಆಸಕ್ತ್ ಆನಿಂ ಚಡ್ಲ್ಲ್ಯಾ ಅಭಿವೃದ್ಧೆವರ್ವಿಂ ತಾಚೊ ಸಾಂಬಾಳ್ ಹರ್ಯೇಕಾ ವರ್ಸಾ ದೊಡ್ತೊ ಜಾಲಾ. ಪ್ರೆಸ್ಸಾಚೆಂ ಬಿಸಿನೆಸ್ ಚಡ್ಲಾಂ. ಉತ್ಪತ್ತಿ ಹರ್ಯೇಕಾ ವರ್ಸಾ ಚಡ್ಲ್ಯಾ ಜಾಲ್ಲ್ಯಾನ್ ಮಾಗ್ಗಿಕ್ ವರ್ಸಾ ವರ್ಸಾ ಬೋನಸ್ ರಾಕೊನ್ ಆಸ್ಲ್ಲ್ಯಾನ್ ತಾಚೆಂ ಕೊಲೆಜಿಚೆಂ ಶಿಕಾಪ್ ತಾಣೆಂ ಸಂಪಯ್ಲೆಂ.
ಬುಧ್ವಾರಾಚೊ ದೀಸ್ ತೊ, ಕಾಮ್ ಜಾತಚ್ಚ್ ರೊಬು ಮಾಗ್ಗಿಕ್ ತಾಚ್ಯಾ ಕ್ಯಾಬಿನಾಕ್ ಆಪಯ್ತಾ "ಮಾಗ್ಗಿ ಮ್ಹಾಕಾ ತುಜ್ಯೆಲಾಗಿಂ ಉಲಂವ್ಕ್ ಆಸಾ". ಮಾಗ್ಗಿ ದಫ್ತರಾಂತ್ ರೊಬುಚ್ಯಾ ಹುದ್ದ್ಯಾಕ್ ಗೌರಾವಾನ್ ’ಸರ್’ ಮ್ಹಣ್ ಆಪ್ಯ್ಲ್ಯಾನ್ "ಸಾಂಗಾ ಸಾರ್...." ಕಿತೆಂ ಉಲಂವ್ಕ್ ಆಸಾ ಮ್ಹಜೆಲಾಗಿಂ?"
"ನಾಂ ಮಾಗ್ಗಿ ಹಾಂಗಾ ಉಲೊಂವ್ಕ್ ಜಾಯ್ನಾ ಹೆಂ ದಫ್ತರಾಕ್ ಸಂಬಂದ್ ಜಾಲ್ಲೆಂ ನ್ಹಯ್ ವೈಯುಕ್ತಿಕ್. ತುಂ ಮ್ಹಜೆಸಂಗಿ ಆಜ್ ಭಾಯ್ರ್ ಯೆಶಿಗಿ"?
ಮಾಗ್ಗಿ ಚಿಂತಾ ಮಗ್ನ್ ಜಾತಾ. ಆಜ್ ಮ್ಹಣಾಸರ್ ತೆಂ ಖಂಚಾಯಿ ಚಲ್ಯಾಸಂಗಿಂ ಭಾಯ್ರ್ ಭಂವೊಂಕ್ ಗೆಲ್ಲೆಂ ನಾಂ ಆನಿಂ
ಆತಾಂ.... ರೊಬುಸಂಗಿಂ ಗೆಲ್ಲ್ಯಾರ್ ಕಶೆಂ? ಚಿಂತಾ ಮಗ್ನ್ ಮಾಗ್ಗಿಕ್ ರೊಬು ಜಾಗಯ್ತಾ. "ಕಿತೆಂ ಮಾಗ್ಗಿ ಕಾಲೆಂ ಚಿಂತಾಯ್?" "ಮ್ಹಜೆ ಸಂಗಿಂ ಯೇಂವ್ಕ್ ತುಕಾ ಮನ್ ನಾ?" ಜಾಪ್ ಜಾವ್ನ್ ಮಾಗ್ಗಿ "ನಾ....ನಾ ತಶೆಂ ಕಾಂಯ್ ನಾ ಸರ್, ಹಾಂವ್ ಅಜೂನೀ ಕೊಣೆಂಯೀ ಚಲ್ಯಾ ಸಾಂಗಾಂತಾ ಭಾಯ್ರ್ ಭಂವೊಂಕ್ ಗೆಲ್ಲಿನಾ. ಆನಿಂ ಹಾಕಾ ಮ್ಹಜ್ಯಾ ಬಾಬಾಚಿ ಪರ್ವಣ್ಗಿ ಅತೀ ಗರ್ಜೆಚಿ". ಮಾಗ್ಗಿಕ್ ರೊಬು ಸಮ್ಜತಾ ತಾಚೊ ಖಾಲ್ತೊ ಸ್ಚಭಾವ್ ಲೆಕುನ್ ಸಂತೊಸ್ತಾ. ತಾಕಾ ಮಾಗ್ಗಿವಯ್ರ್ ಆಸ್ಚೊ ಗುಪಿತ್ ಮೋಗ್ ಚಡ್ತಾ.
ಕಾಮ್ ಸಂಪಲ್ಲೆಚ್ ಸ ವೊರಾರ್ ಮಾಗ್ಗಿಸಂಗಿಂ ತಾಚಾ ಘರಾ ರೊಬು ವೆತಾ. ರೊಬು ವಯ್ರ್ ಆಸಲ್ಲ್ಯಾ ಪಾತ್ಯೆಣೆನ್ ಮಾಗ್ಗಿಚೊ ಬಾಬ್ ತಾಂಕಾಂ ದೊಗಾಂಯ್ಕಿ ಬಾಯ್ರ್ ವಚೊಂಕ್ ಪರ್ವಣ್ಗಿ ದಿತಾ. ಹಾಚೆ ಪಯ್ಲೆಂ ಬಾಬಾ ಸಂಗಿಂ ರೊಬುಚ್ಯಾ ಘರ್ಚಿ ಬೆಟ್ ಮಾಗ್ಗಿನ್ ಕೆಲ್ಲಿ ಪೂಣ್ ಮಾಗ್ಗಿಚೊ ಮೋಗ್ ಕರ್ತಾ ಮ್ಹಳ್ಳಿ ಬರಿ ಖಬಾರ್ ಆಪ್ಲ್ಯಾ ಆವಯ್ ಥಾವ್ನ್ ತಾಣೆಂ ಲಿಪೊನ್ ದವರ್ಲ್ಲಿ. ಗುಪಿತ್ ಮೋಗ್ ಕಾಳ್ಜಾಂತ್ ಆಟಯಿಲ್ಲೊ ರೊಬು ಆತಾಂ ಉದೆಲ್ಲ್ಯಾ ಖುಶೆಚ್ಯಾ ಘಡಿಯೆಕ್ ಚಿಂತುನ್ ಬೋವಚ್ಚ್ ಸಂತೊಸ್ತಾ. ಮಾಗ್ಗಿ ಸಾಂಗಾಂತಾ ಭಾಯ್ರ್ ವೆಚೊ ವಾರ್ಯಾರ್ ಉಬ್ಲ್ಲ್ಯಾ ತಿತ್ಲೊ ಸಂತೊಸ್ ಜಾತಾ. ಮಾಗ್ಗಿಕ್ ಭಾಯ್ರ್ ಎಕಾಂತ್ ಜಾಗ್ಯಾಕ್ ಆಪವ್ನ್ ವರ್ನ್ ಆಪ್ಲೆ ಕಾಳ್ಜಾಚೆ ಆತ್ರೆಗ್ ತಾಚೆ ಮತಿಂತ್ ಖಂಚೊಂವ್ಕ್ ಉಲೊಣೆಂ ಕಶೆಂ ಪ್ರಾರಂಭ್ ಕರ್ಚೆಂ ತೆಂ ತಾಕಾ ಕಳಿತ್ ನಾಸ್ತಾಂ ಕಾವ್ಜೆತಾ ತರೀ, ಚಡ್ ತಡೊವ್ ಕರಿನಾಸ್ತಾಂ "ಮಾಗ್ಗಿ ತುಕಾ ಕಳಿತ್ ಆಸಾಗೀ ನಾ ಮಾಕಾ ಸಾರ್ಕೆಂ ಗೊತ್ತುನಾ ಮ್ಹಜ್ಯಾ ಕಾಳ್ಜಾಂತ್ ತುಜೊ ಮೋಗ್ ರೊಂಬೊನ್ ಗೆಲಾ".
ಹಾಂವೆ ತುಜೆಲಾಗಿ ಲಗ್ನ್ ಜಾಂವ್ಕ್ ಆನಿ ತುಕಾ ಮ್ಹಜಿ ಜಿಣ್ಯೆ ಸಾಂಗಾತಿಣ್ ಕರುಂಕ್ ನಿರ್ಧಾರ್ ಘೆತ್ಲಾ. ವ್ಹಡಿಲಾಂ ಸಮರ್ ಹೊ ವಿಷಯ್ ಪಾಂವ್ಚೆಂ ಪಯ್ಲೆಂ ತುಜಿ ಕಬ್ಲಾತ್ ವಿಚಾರುಂಕ್ ತುಕಾ ಹಾಂಗಾಸರ್ ಆಪವ್ನ್ ಹಾಡ್ನ್ ಆಯ್ಲಾಂ". ಹೆಂ ಆಯ್ಕೊನ್ ಮಾಗ್ಗಿ ತಠಾಕ್ ಜಾತಾ. ಸ್ವಪ್ಣಾಂತೀ ದೆಕಾನಾತ್ಲೆಂ, ಎದೊಳ್ ವರೆಗ್ ಚಿಂತಿನಾತ್ಲ್ಲೆಂ, ಹೆಂ ನವಾಲ್ ಆಯ್ಕೊನ್ ವಿಜ್ಮಿತ್ ಜಾತಾ. ಆಕಾಸಾ ವಯ್ಲಿಂ ತಾರಾಂ ಭುಮಿವಯ್ರ್ ಪಡ್ಲ್ಲೊ ಅನ್ಭೋಗ್ ತಾಕಾ. ಅರ್ಧೊ ಘಂಟೊ ಭರ್ ಜಾಪ್ ದೀಂವ್ಕ್, ಕಿತೆಂಚ್ ಉಲಂವ್ಕ್ ತೆಂ ಸಕಾನಾ. ತಾಚೆಂ ಚಿಂತಾ ಮಗ್ನ್, ವಿಜ್ಮಿತ್ ಮುಖಾಮಳ್ ಪಳೆವ್ನ್ ರೋಬರ್ಟ್ ಖಂತಿಷ್ಟ್ ಜಾತಾ. ಆನಿಂ "ಮ್ಹಜೆ ಹ್ಯಾ ಉಲೊವ್ಣ್ಯಾಕ್ ತುಕಾ ಬೆಜಾರ್ ಕೆಲಾಂ ತರ್ ಮ್ಹಾಕಾ ಮಾಫ್ ಕರ್. ತುಜ್ಯಾ ಮತಿಂತ್ಲಿ ಬೊಗ್ಣಾಂ ಮ್ಹಜೆಲಾಗಿಂ ಉಗ್ತ್ಯಾನ್ ಉಚಾರ್.
ತುಕಾ ಮ್ಹಜೆಲಾಗಿಂ ಲಗ್ನ್ ಜಾಂವ್ಕ್ ಮನ್ ಆಸಾ ತರ್ ’ವ್ಹಯ್’ ಮ್ಹಣ್ ನಾ ತರ್ ಸತ್ಚ್ಚ್ ಸಾಂಗ್ ಮ್ಹಾಕಾ ಬೆಜಾರ್ ನಾ. ತುಂ ಪಾಚ್ವೊ ಸಿಗ್ನೆಲ್ ದಿ ವಾ ತಾಂಬ್ಡೊ ಸಿಗ್ನೆಲ್ ದೀ, ದೊನೀ ಸಂಧರ್ಬಾಕ್ ಹಾಂವ್ ಹೊಂದುನ್ ವಚೊಂಕ್ ತಯಾರ್ ಆಸಾಂ. ತುಂ ಜರ್ ವ್ಹಯ್ ಮ್ಹಣ್ಶಿ ಸಂತೊಸ್ ನಾ ಮ್ಹಣ್ಶಿ ತುಜಿ ಖುಶಿ, ಮ್ಹಾಕಾ ತುಕಾ ವಿಸ್ರೊಂಕ್ ಬೋವ್ಚ್ಚ್ ಕಷ್ಟ್ ಮಾರ್ತಾಲೆ ತರೀ ವೊತ್ತಾಯ್ ಕರ್ನ್, ದಾಕ್ಶೆಣೆಕ್ ಲಾಗುನ್ ತುಜಿ ಜಿಣಿ ವಿಬಾಡುಂಕ್ ಹಾಂವ್ ತಯಾರ್ ನಾ. ತುಕಾ ಕಷ್ಟಾಂತ್ ಖಂಡಿತ್ ಗಾಲಿಸೊನಾ. ಜಿಣ್ಯೆ ಸಾಂಗಾತಿ ನಾಂ ತರ್ ಆಮ್ಚೊ ಆಜೂನ್ ವರೇಗ್ಚೊ ಇಷ್ಟಾಗತೆಚೊ ಸಂಬಂದ್ ಅಮರ್ ಉರ್ತಲೊ. ಸಮ್ಜೊಣಿ ಕೆದಿಂಚ್ ಮಾಜ್ವೊಂಚಿ ನಾ. ತುಜೆ ವಯ್ಲೊ ಬರೊ ಆಬಿಪ್ರಾಯ್ ಥಿರ್ ಆಸ್ತಲೊ ಸದಾಂಚ್ಚ್. ಸಾರ್ಕೆಂ ಚಿಂತುನ್ ಜಾಪ್ ದಿ.
ಮಾಗ್ಗಿಕ್ ಕಿತೆಂ ಸಾಂಗ್ಚೆಂ ಕಳನಾ ತರೀ, ರೊಬುಚೆಂ ಬರೆಂ ಮನ್, ಸಾರ್ಕಿ ಸಮ್ಜಣಿಂ, ಖರೆಂ ಮನ್ಶಾಪಣ್ ಪಳೆವ್ನ್ ಉತ್ರಾಂ ಮುಂದರ್ಸಿತಾ "ರೊಬು ಮ್ಹಜಾ ಘರ್ಚೊ ಸಗ್ಳೊ ಹಾರ್ಭಾರ್ ಮಜೆ ವರ್ಯ್ ಆಸಾ ತೆಂ ತುಂ ಜಾಣಾಂಯ್. ಹಾಂವೆಂ ಜರ್ ಮುಜೊ ಸ್ವಾರ್ಥ್ ಲೆಗುನ್ ಕಾಜಾರಾಚೆಂ ಮೇಟ್ ಕಾಡ್ಲೆಂ ತರ್, ಮಜಿ ಮಾಂಯ್ ಬಾಬ್ ಅಸಹಾಯಕ್ ಜಾತೆಲಿಂ. ಮ್ಹಜೆ ವಯ್ರ್ಚ್ಚ್ ಭರ್ವಸೊ ದವರ್ಲ್ಲ್ಯಾ ಮ್ಹಜ್ಯಾ ಬಾಂವ್ಡಾಚೊ ಫುಡಾರ್ ಕಿತೆಂ? ಹಾಂವ್ ಬಾಬಾಚೊ ಉಜ್ವೊ ಹಾತ್ ಮ್ಹಣೊನ್ ಘನಾನ್ ತೊ ಪಾಚಾರ್ತಾ. ಹಾಂವ್ಂಚ್ ಘರಾಂತ್ ನಾ ತರ್ ತಾಚ್ಯಾ ಉಜ್ವ್ಯಾ ಹಾತಾಚೆಂ ಭಳ್ ಮೊಡ್ತೆಲೆಂ ಆನಿಂ ಹಾಂವ್ ಹೆಂ ದೆಕುಂಕ್ ಸಕ್ಚಿನಾ".
ಹಾಕಾ ಜಾಪ್ ಜಾವ್ನ್ "ನಾ ಮಾಗ್ಗಿ, ಮ್ಹಜೆಲಾಗಿಂ ಕಾಜಾರ್ ಜಾಲ್ಯಾರೀ ತುಜಾ ಕುಟ್ಮಾಕ್ ತುಂ ಸಾಂಡಿನಾಕಾ. ಎದೊಳ್ ಪರ್ಯಾಂತ್ಲೊ ತುಜೊ ಸಹಕಾರ್ ಮುಂದರ್ಸಿ. ಹಾಂವೀ ತುಕಾ ತುಜ್ಯಾ ಕಾಮಾಂತ್ ಹಾತ್ ದಿತಲೊಂ ಆನಿ ತುಕಾ ಆನಿ ತುಜ್ಯಾ ಕುಟ್ಮಾಕ್ ಮೊಗಾನ್ ಸಾಂಬಾಳ್ತಾಲೊಂ. ತುಂ ಬಾಬಾಚೊ ಉಜ್ವೊ ಹಾತ್ ತರ್ ಹಾಂವ್ ತುಜೊ ಉಜ್ವೊ ಹಾತ್ ಜಾತಾಲೊಂ. ಖಂತ್ ಕರಿನಾಕಾ. ಹ್ಯಾ ವಿಷ್ಯಾಂತ್ ಮ್ಹಜ್ಯಾ ಆವಯ್ಕ್ ಆಭ್ಯಂತರ್ ಆಸ್ಚಿನಾ. ಮ್ಹಾಕಾ ಗ್ರೇಸ್ತ್ ಕುಟ್ಮಾಂತ್ಲೊ ಬರ್ಯೊ ಸೈರಿಕ್ಯೊ ಆಯ್ಲ್ಯೊ ತರೀ ಮ್ಹಜ್ಯಾ ಮಾಮ್ಮಿನ್ ಸರ್ವ್ ಇನ್ಕಾರ್ ಕೆಲ್ಯೊ. ತಿಕಾ ದುಬ್ಳ್ಯಾ ಕುಟ್ಮಾಂತ್ಲೆಂ, ಸಾಧೆಂ ಸುನ್ ಹಾಡಿಜಾಯ್ ಮ್ಹಳ್ಳಿ ಆಶಾ. ಪಯ್ಶಾ ಆನಿಂ ಗ್ರೇಸ್ತ್ಕಾಯೆ ವರ್ನಿಂ, ಮನ್ಶಾಚೆ ಶೆಗುಣ್ ತಿ ಚಡ್ ಮಾನ್ತಾ. ಮ್ಹಜಿ ಆನಿ ತಿಚಿ ಆಶಾ ಎಕಾಮೆಕಾ ಹೊಂದ್ವಾತಾ ಜಾಲ್ಲ್ಯಾನ್ ಹಾಂವೆಯ್ ತುಕಾ ಸೊಡ್ನ್ ಖಂಚಾಯಿ ಚಲಿಯೆಕ್ ಎದೊಳ್ ಪರ್ಯಾನ್ ಕಾಜಾರಾಚ್ಯಾ ದಿಷ್ಟಿನ್ ದೆಕಲ್ಲೆಂನಾ. ತುಂ ಮ್ಹಜೆ ಲಾಗಿಂ ಕಾಜಾರ್ ಜಾಶಿ ತರ್ ಕಸಲೆಚ್ಚ್ ದೂಕ್ ದಿನಾಸ್ತಾಂ ಮೊಗಾನ್ ಸಾಂಬಾಳ್ತಾಂ."
ಮಾಗ್ಗಿ ರೊಬುಚ್ಯಾ ಉಲವ್ಣ್ಯಾಕ್ ಜಾಪ್ ಜಾವ್ನ್ "ಮ್ಹಜಿ ಗರ್ಜ್ ಘರ್ಚಾ ಸರ್ವ್ ಸಾಂದ್ಯಾಂಕ್ ಆಸಾ. ಹಾಂವೆಂ ಘರಾ ರಾಂವ್ಚೆಂ ಆತೀ ಗರ್ಜೆಚೆಂ. ಆನಿಂ ಥೊಡಿಂ ವರ್ಸಾಂ ಮ್ಹಜ್ಯಾ ಬಾಂವ್ಡಾಂಕ್ ಏಕಾ ಹುಂಭ್ರಾರ್ (ಹಂತಾರ್) ಪಾವಂವ್ಚಾ ಪಯ್ಲೆಂ ಕಾಜಾರಾ ವಿಷ್ಯಾಂತ್ ಚಿಂತ್ಚೆಂ ಆನಿ ಘರ್ ಸೊಡ್ನ್ ವೆಚೆಂ ಮ್ಹಾಕಾ ಅಸಾಧ್ಯ್. ಮ್ಹಜ್ಯಾ ಭಾಂವ್ಡಾಕ್ ಬರೊ ಫುಡಾರ್ ಮೆಳ್ಚ್ಯಾ ವರ್ನಿಂ ದುಸ್ರೊ ಸಂತೊಸ್ ಮ್ಹಾಕಾ ನಾ. ಕಾಜಾರಾ ವರ್ನಿಂ ಚಡ್ ತ್ರಪ್ತಿ ಮ್ಹಾಕಾ ಮ್ಹಜೆ ಕುಟಾಮ್ ಸಾಂಬಾಳ್ಳ್ಯಾಂತ್ ಮೆಳ್ತಾ. ಮ್ಹಾಕಾ ಜೆಂ ಕುಟ್ಮಾಚೊ ಹಾರ್-ಭಾರ್ ನಾತ್ಲ್ಲೊ ತರ್ ತುಕಾ ಹಾಂವ್ ಖಂಡಿತ್ ಇನ್ಕಾರ್ ಕರ್ತಿಂನಾ. ತುಜೆಲಾಗಿಂ ಕಾಜಾರ್ ಜಾವ್ನ್ ಜಿಣಿಂ ಸಾರ್ಚೆಂ ಚೆಡುಂ ನಿಜಾಯ್ಕಿ ಭಾಗಿ. ತುಂ ಮ್ಹಾಕಾ, ಮ್ಹಜೆ ಖಾತಿರ್ ರಾಕೊನ್ ರಾಂವ್ಚೆಂ ಮ್ಹಾಕಾ ಸಾರ್ಕೆಂ ದಿಸಾನಾ. ತುಂ ದುಸ್ರೆಂ ಚೆಡುಂ ಪಳೆವ್ನ್ ಕಾಜಾರ್ ಜಾ. "
ಹೆಂ ಆಯ್ಕೊನ್ ರೊಬು ತಟ್ಟಕ್ಕ್ ಜಾಲೊ ತರೀ, ಬೆಜಾರ್ ಪಾವೊಂಕ್ ನಾ. ಮಾಗ್ಗಿಚಿ ಅಸಹಾಯಕತಾ ತಾಕಾ ಸಮ್ಜಲಿ. ರೊಬು ತಾಚ್ಯಾ ಅವಯ್- ಬಾಪಯ್ಕ್ ಏಕ್ಚ್ಚ್ ಪೂತ್ ಜಾಲ್ಲ್ಯಾನ್ ತಾಂಚೆಂ ಕುಟಾಮ್ ಮುಂದರ್ಸುಚೆಂ ಕಾಮ್ ತಾಚ್ಯಾ ಹಾತಾಂತ್ ಆಸ್ಲ್ಲ್ಯಾನ್ ತಶೆಂಚ್ಚ್ ಪ್ರಾಯ್ವಂತ್ ಮಮ್ಮಿಕ್ ಘರಾಂತ್ ಅಧಾರ್ ದೀಂವ್ಕ್ ಆನಿಂ ರೊಬು ಸಂಗಿಂ ಪತಿಣ್ ಜಾವ್ನ್ ಜಿಯೆಂವ್ಕ್ ಲೊಲಿಟಾ ಮ್ಹಳ್ಳೆಂ ಚಲಿಯೆಲಾಗಿಂ ರೊಬುಚೆಂ ಖರಾರ್ ಜಾತಾ ಆನಿಂ ವರ್ಸಾ ಬಿತರ್ ಕಾಜಾರೀ ಸಂಪೊನ್ ತಿಂ ಸಂಗಿಂ ಜೀವನ್ ಪ್ರಾರಂಭ್ ಕರ್ತಾತ್.
ಮಾಗ್ಗಿಚ್ಯಾ ಆನಿಂ ರೊಬುಚ್ಯಾ ಬರ್ಯಾ ಆನಿಂ ಖರ್ಯಾ ಸಂಬಂದಾನ್ ಆನಿಂ ಸಮ್ಜಣೆನ್ ಮಾಗ್ಗಿನ್ ರೊಬುಚ್ಯಾ ಅಫಿಸಾಂತ್ ಕಾಮ್ ಮುಂದರ್ಸಿಲೆಂ. ತಾಕಾ ಆತಾಂ ಲಾಬ್ತ್ಯಾ ತ್ಯಾ ಚಡಿತ್ ಸಾಂಬಾಳಾ ವರ್ವಿಂ ಕುಟ್ಮಾಕ್ ಧೈರಾನ್ ಸಾಂಬಾಳುಂಕ್ ಮಾಗ್ಗಿ ಸಕ್ತಾ. ದೊಗಾಂ ಭಯ್ಣಿಂಚೆಂ ಕಾಜಾರ್ ಬರ್ಯಾ ಘರಣ್ಯಾಥಂಯ್ ತಾಣೆಂ ಆತಾಂ ಸಂಪಯ್ಲೆಂ. ಆಶೆಂ ಆಸ್ತಾಂ ಅಸ್ವಸ್ತ್ ಅಪೊಲಿಬಾಯ್ ದೆವಾದೀನ್ ಜಾತಾ ಆಶೆಂ ಘರಾಂತ್ ದುಖಿಚೆಂ ವಾದಾಳ್ಚ್ಚ್ ಉಠ್ತಾ. ಸರ್ವ್ ಘರ್ಚೆ ಸಾಂದೆ ಖಂತಿಷ್ಟ್ ಆತಾಂ. ಸುರ್ಯಾವಿಣೆಂ ಸಾಳ್ಕಾಚಿ ಜಿಣಿ ಮ್ಹಳ್ಳಿ ಗತ್ ಜಾಲ್ಲ್ಯಾ ಮಾಗ್ಗಿಚಿ. ಆವಯ್ ಪಿಡೆಸ್ತ್ ಆನಿಂ ಅಸ್ಕತ್ ತರೀ ತಿಚೊ ಪಾತ್ರ್ ತಾಂಚ್ಯಾ ಕುಟ್ಮಾಂತ್ ಪ್ರಮುಖ್ ಗರ್ಜೆಚೊ. ಹೆಂ ಸರ್ವ್ ದೊಳ್ಯಾಂನಿ ದೆಕ್ತಾನಾ, ದುಕೆಸ್ತ್ ಮಾಗ್ಗಿಚೆಂ ಮಾಜ್ವಾಲ್ಲೆಂ ಮುಖಾಮಳ್ ದೆಕ್ಲ್ಲೊ ಅಮೂಸ್ಬಾಬ್ ಅಸ್ವಸ್ಥ್ ಜಾಲೊ. ತಾಚಿ ಜತನ್ ಚವ್ತೊ ಬಾವ್ ಪೆಡ್ಡಿ ಕರ್ತಲೊ. ಸಾಂಗಾತಾಚ್ಚ್ ಕೊಲೆಜಿಚೆಂ ಶಿಕಾಪ್ ಮುಂದರ್ಸಿತಲೊ. ತಾಚೆಂ ಶಿಕಾಪ್ ಸಂಪ್ತಚ್ಚ್ ತಾಕಾ ಆನಿಂ ಜೊಕಿಕ್ ಬರಿ ಸೈರಿಕ್ ಆಯ್ಲಿ ಆನಿ ಕಾಜಾರಾಚೆಂ ಕಾರ್ಯೆಂ ಮಾಗ್ಗಿಚ್ಯಾ ಮುಖೆಲ್ಪಣಾಖಾಲ್ ಬರ್ಯಾನ್ ಸಂಪ್ಲೆಂ.
ಉಪ್ರಾಂತ್ ಆತಾಂ ಉರ್ಲ್ಯಾಂತ್ ದೋಗ್ ಬಾವ್ ಆನಿ ಏಕ್ ಭೈಣ್. ತಾಂತುಂ ಎಕ್ಲೆಂ ಕೆಪ್ಪೆ ಆನಿ ಎಕ್ಲೊ ಮೊನೊ ಜಾಲ್ಲ್ಯಾನ್, ತಾಚಿ ಕಾಜಾರಾಚಿ ಆಶಾ ಸೊಡಿಜಾಯ್ ಮ್ಹಣ್ಯೆತ್. ಆನಿಂ ಉರ್ಲೊ ಏಕ್ ಭಾವ್ ಕಾಜಾರಾಚ್ಯಾ ಪ್ರಾಯೆಕ್ ಪಾವ್ತಾನಾ ಬಾಬ್ ಅಂತರ್ಲೊಚ್ಚ್ ಘರಾಂತ್ ಶಾಂತ್ ಜಾವ್ನ್ ಯೆತೆಲೆಂ ವಾದಾಳ್ ಪರತ್ ಉಟ್ಲೆಂ. ಮಾಗ್ಗಿ ಆತಾಂ ಅಸಹಾಯತ್ ಆನಿಂ ದುಖೇಸ್ತ್. ತಾಕಾ ಧೈರ್ ಭಳ್ ಜಾವ್ನಾಸ್ಲೊ ತಾಚೊ ಬಾಬ್ ಮಾಂಯ್ ಸರ್ಶಿಂ ಪಾವ್ಲ್ಲೊ. ಹೆಂ ತಾಕಾ ಸ್ವೀಕರ್ಸುಂಕ್ ಬೋವ್ ಅಡೂಕ್ ಮಾರ್ಲೆಂ ತರೀ, ತಾಚ್ಯಾ ದೋನ್ ಅಸಹಾಯಕ್ ಭಾಂವ್ಡಾಂಚೆಂ ತೊಂಡ್ ಪಳೆವ್ನ್ ತೆಂ ದೈರ್ ಘೆತಾ. ಆನಿ ಉರ್ಲ್ಲ್ಯಾ ಏಕಾ ಕಾಜಾರೀ ಸಂಪೈತಾ. ಆತಾಂ ಉರ್ಲಿಂ ಮಾಗ್ಗಿ, ಕೆಪ್ಪೆ ಬೈಣ್ ಆನಿ ಮೊನೊ ಬ್ಭಾವ್ ಘರಾಂತ್.
ಹ್ಯಾ ವಗ್ತಾ ಮಾಂಯ್ ಬಾಬಾಚಿ ಯಾದ್ ಚಡಿತ್ ತಾಕಾ ದೊಸ್ತಾ ಕಿತ್ಯಾಕ್ ಬರ್ಯಾ ಫುಡಾರಾಕ್ ಪಾವಲ್ಲಿಂ ತಾಚಿ ಬಾಂವ್ಡಾಂ ಆಜ್ ಘರ್ ಸೊಡ್ನ್ ತಾಂಚೊ ಸ್ವಾರ್ಥ್ ಲಿಗುನ್ ಪಯ್ಸ್ ಪಾವ್ಲ್ಯಾಂತ್. ಕೆಪ್ಪೆ ಭೈಣ್ ಮೇರಿ ಆನಿಂ ಮೊನೊ ಭಾವ್ ಜೆರಿ ಹಾಂಚೆಂ ಕಾತಿರ್ ಮಾಗ್ಗಿನ್ ಚಡ್ ಕಷ್ಟ್ ಕಾಡುಂಕ್ ನಾಂ ತರೀ ಮಾಗ್ಗಿಚೊ ಅಧಿಕ್ ಮೋಗ್ ತಿಂ ಕರ್ತಾತ್ ತಾಕಾ ಸದಾಂಚ್ಚ್ ಸಾಂಗಾಂತ್ ದಿತಾತ್. ಉರ್ಲ್ಲಿಂ ಭಾಂವ್ಡಾಂ ಆಜ್ ಗಿರೇಸ್ತ್ ಜಾವ್ನ್ ಅನುಪ್ಕಾರಿ ಜಾಲ್ಯಾಂತ್. ಮಾಗ್ಗಿಚೊ ಉಡಾಸ್ ಪರ್ಯಾಂತ್ ತಾಂಕಾಂ ಯೇನಾ. ಗ್ರೇಸ್ಕ್ಕಾಯೆನ್ ಕಾರಣ್ ಜಾಲ್ಲೆಂ ಮೂಳ್ ತಾಣಿಂ ಹುಮ್ಟೊನ್ ಉಡಯ್ಲಾಂ.
ಹಾಕಾ ಕೋಣ್ ಕಾರಣ್?
ಸಬಾರ್ ಪಾವ್ಟಿಂ ಹಿಂ ಚಿಂತ್ನಾಂ ಮಾಗ್ಗಿಚ್ಯಾ ಮತಿಂತ್ ಬೊಂವ್ಡ್ಯೊ ಮಾರ್ತಾನಾ ಹೆಂಚ್ಚ್ ಮ್ಹಜ್ಯಾ ನಿಸ್ವಾರ್ಥಿ ಜಿಣ್ಯೆಕ್ ಲಾಭ್ಲ್ಲೆಂ ಬಹುಮಾನ್? ಮ್ಹಳ್ಳೆಂ ಸವಾಲ್ ತಾಚೆ ಮತಿಂತ್ ಉದೆವ್ನ್ ಖಂತಿಷ್ಟ್ ಜಾತಾ ತರೀ, ಬಾಬಾಚೆ ಆನಿಂ ಮಾಂಯ್ಚ್ಯಾ ಮಾಗ್ಣ್ಯಾನ್ ಆನಿ ಅಸಹಾಯಕ್ ಜೆರಿ ಆನಿ ಮೆರಿಚ್ ತೊಂಡ್ ಪಳೆವ್ನ್ ಮಾಗ್ಗಿ ಧೈರ್ ಘೆತಾ. ಆತಾಂ ತಾಣೆಂ ಕಾಜಾರ್ ಜಾಂವ್ಕ್ ತರೀ ಚಿಂತುನ್ ಫಾಯ್ದೊನಾ ಕಿತ್ಯಾಕ್ ತಾಚಿ ಗ್ರೇಸ್ತ್ ಭಾಂವ್ಡಾಂ ತಾಚೆ ವಿಶ್ಯಾಂತ್ ಪುಣಿ ಯಾ ಜೆರಿ, ಮೇರಿ ವಿಶ್ಯಾಂತ್ ಪುಣೀ ಚಿಂತುಂಕ್ ಯಾ ಖಬಾರ್ ಘೆಂವ್ಕ್ ತಯಾರ್ ನಾಂತ್. ತಾಣೆಂ ದವರ್ಲ್ಲೊ ಭರ್ವಸೊ ಆಜ್ ನಿರಾಸ್ ಜಾಲಾಂ. ಆನಿಂ ಘಾಲ್ಲೆಂ ಲೇಕ್ ಚುಕ್ಲಾಂ. ಜಿಣ್ಯೆಂತ್ಲೆಂ ಆಶಾಕೀರ್ಣ್ ನಪಂಯ್ಚ್ ಜಾಲಾಂ.
ಮೆಣಾಚ್ಯಾ ವಾತಿ ಬರಿ ಕರ್ಗುನ್ ಮಾಗ್ಗಿನ್ ಭಾಂವ್ಡಾಂಕ್ ಉಜ್ವಾಡ್ ಫಾಂಕಯ್ಲಾಂ. ಆನಿಂ ಆಜ್ ಆನಿಂ ಮುಖ್ಲಿ ಜಿಣಿ ಕಷ್ಟಾಂಚಿ ತರೀ, ಜೆರಿ ಆನಿಂ ಮೆರಿ ಸಂಗಿಂ ಏಕ್ ನಿತಳ್ ಜಿಣಿ ಜಿಯೆಂವ್ಕ್, ನಿಸ್ವಾರ್ಥಿ ಆನಿ ಮೊಗಾಳ್ ಜಿಣಿಂ ಮುಂದಾರ್ಸುಂಕ್ ಮಾಗ್ಗಿ ನಿರ್ಧಾರ್ ಘೆತಾ. ನಿವ್ರತ್ತ್ ಜಾತಾ ಮ್ಹಣಾಸರ್ ರುಬುಚ್ಯಾ ಪ್ರೆಸ್ಸಾಂತ್ ಕಾಮ್ ಮುಂದರ್ಸುನ್, ರೊಬುಚ್ಯಾ ಬರ್ಯಾ ಮನಾನ್ ಉಪ್ರಾಂತ್ ಮೆಳ್ಲ್ಲ್ಯಾ ಪೆನ್ಶಾನಾಂತ್ ತಾಚಿ ಮುಖ್ಲಿ ಜಿಣಿಂ ಧೈರಾನ್ ತೆಂ ಸಾರ್ತಾ ಆನಿಂ ಆಪ್ಲೊ ಆಖೇರ್ ದೀಸ್ ಯೆಂವ್ಚಾ ಫುಡೆಂ ಆಪ್ಲ್ಯಾ ಸರ್ವ್ ಭಾಂವ್ಡಾಂಕ್ ಬೊಗ್ಸುನ್, ಸಂಗಿಂ ಮೆಳೊನ್ ಜಿಯೆಂವ್ಕ್ ಅತ್ರೆಗ್ಲಾಂ.
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
