ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 26. ಕೋಣ್ ಬರೊ?
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಏಕ್ ಪಾವ್ಟಿಂ ತ್ಯಾ ಗಾಂವಾಂಕ್ ಕಠೀಣ್ ವಾರೆಂ ಪಾವ್ಸ್ ಆನಿ ವಾದಾಳ್ ಆಯ್ಲೆಂ, ಆನಿಂ ತ್ಯಾ ವಾದಾಳಾಕ್ ಸಾಂಪ್ಡೊನ್ ಏಕ್ ಲ್ಹಾನ್ ಸುಕ್ಣೆಂ ಬಿಜೊನ್ ಹಿಂವಾನ್ ಆಂಕುಡ್ನ್ ಮೊರ್ಚೆ ಸ್ಥಿತೆರ್ ಪಡ್ಲೆಂ.
ಅಶೆಂ ವಾದಾಳ್ ಸಂಪ್ತಚ್, ಆಪ್ಲ್ಯಾ ಗೊರ್ವಾಂಕ್ ಆಂಬುಡ್ನ್ ವರ್ಚೊ ಎಕ್ಲೊ ಮನಿಸ್ ತ್ಯಾ ವಾಟೆನ್ ಪಾಶಾರ್ ಜಾತಾಸ್ತಾಂ ತಾಚಿ ನದರ್ ಹ್ಯಾ ಲ್ಹಾನ್ ಸುಕ್ಣ್ಯಾಚೆರ್ ಗೆಲಿ, ಹಿಂವಾನ್ ಆಂಕುಡ್ಚಾ ಆನಿ ಪಿಂರ್ಗೊಂವ್ಚಾ ಹ್ಯಾ ಸುಕ್ಣ್ಯಾಕ್ ಆಪ್ಲ್ಯಾ ಹಾತಿಂ ಘೆವ್ನ್, ಬರೆಂ ಕರ್ನ್ ಪುಸುನ್, ಹಿಂವಾನ್ ಕಾಂಪ್ಚ್ಯಾ ತ್ಯಾ ಸುಕ್ಣ್ಯಾಕ್, ಆಪ್ಲ್ಯಾ ಗಾಯೆನ್ ಘಾಲ್ಲ್ಯಾ ಹುನ್ ಶೆಣಾಂತ್ ದವರ್ನ್ ಗೆಲೊ.
ಅಶೆಂ ತ್ಯಾ ಹುನಾಂತ್ ಇಲ್ಲೊ ಜೀವ್ ಭರೊನ್ ಆಯಿಲ್ಲೆಂ ಸುಕ್ಣೆಂ ಆಪ್ಲೆಂ ಹಿಂವ್ ವೆತೆಚ್, ಖುಶೇನ್ ಭರ್ಲೆಂ ಆನಿಂ ಸಂತೊಸಾನ್ ಗಾಂವ್ಕ್ ಲಾಗ್ಲೆಂ. ತೆಚ್ಚ್ ವಾಟೆರ್ ವೆಚೊ ಏಕ್ ಕೊಲೊ ಸುಕ್ಣ್ಯಾಚೆಂ ಗಾಯನ್ ಆಯ್ಕೊನ್ ಲಾಗಿಂ ಆಯ್ಲೊ ಆನಿಂ ಶೆಣಾಂತ್ ಆಸ್ಚಾ ಹ್ಯಾ ಸುಕ್ಣ್ಯಾಕ್ ಧರ್ನ್ ಎಕಾಚ್ ಘಾಸಾನ್ ಗೀಳ್ನ್ ಸೊಡ್ಲೆಂ.
ಸಂದೇಶ್: ಆಮ್ಚಾಯ್ ಜಿಣ್ಯೆಂತ್ ಆಮಿಂ ಸಭಾರ್ ಪಾವ್ಟಿಂ ಸಂಸಾರಾಚಾ ಶೆಣಾಂತ್ ಪಡೊಂಕ್ ಪುರೊ. ಪುಣ್ ಆಮ್ಕಾಂ ತ್ಯಾ ಶೆಣಾಂತ್ ಘಾಲ್ಲೆ ಸಗ್ಳೆ ಆಮ್ಚೆ ದುಸ್ಮಾನ್ ಜಾಯ್ಜಯ್ ಮ್ಹಣೊನ್ ನಾ. ತಶೆಂಚ್ ತ್ಯಾ ಶೆಣಾ ಥಾವ್ನ್ ವಯ್ರ್ ಕಾಡ್ಚೆ ಸಗ್ಳೆ ಆಮ್ಚೆ ಈಶ್ಟ್ ಜಾಯ್ಜಯ್ ಮ್ಹಣೊನ್ಯ್ ನಾಂ. ದೆಕುನ್ ಆಮಿಂ ಭರ್ಯಾನ್ ಆಸಾಂವ್ ತರ್ಯ್ ಶೆಣಾಂತ್ ಆಸಾಂವ್ ತರ್ ಆಮ್ಚೆಂ ತೋಂಡ್ ದಾಂಪುನ್ ವೊಗೊಚ್ ಬೊಸ್ಚೆಂ ಬರೆಂ ನ್ಹಯ್ಗೀ?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
