ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 73. ಅಶಿ ಏಕ್ ಮೊಗಾಚಿ ಕಾಣಿ
ಕಿಶೂ ಬಾರ್ಕುರ್: ಕೊಂಕ್ಣೆಂತ್ ಅಪ್ರೂಪ್ ತರ್ಯೀ ಅಪುರ್ಭಾಯೆಚ್ಯೊ ಕಾಣ್ಯೊ, ಕವಿತಾ, ಲೇಖನಾಂ ಬರಂವ್ಚೊ ಕಿಶೂ ಗೊನ್ಸಾಲ್ವಿಸ್ ಬರಯ್ತಾ. ಅಪ್ರೂಪ್ ವಸ್ತುಭಂವ್ತಿಂ ಕಾಣಿ ವಿಣ್ಚಿ ಕಲಾ ಹೊ ಬರ್ಯಾನ್ ಜಾಣಾ ದೆಕುನ್ ಹಾಚ್ಯೊ ಚಡ್ತಾವ್ ಕಾಣ್ಯೊ ವಾಚ್ಪ್ಯಾಂಕ್ ಸರ್ವ್ ಕಾಳಾಕ್ ಉಡಾಸಾಂತ್ ಉರ್ಚೆ ತಸ್ಲ್ಯೊ. ಥೊಡ್ಯಾ ಕೊಂಕ್ಣಿ ಬುಕಾಂಚೆಂ ಪ್ರಸ್ತಾವನ್ ಹಾಣೆಂ ಬರಯ್ಲಾಂ.
ಕಿಶೂ ಬಾರ್ಕುರ್
ಕಿತೆಂ ಬರಂವ್, ಕಶೆಂ ಸುರು ಕರುಂ ಮ್ಹಾಕಾ ಕಳಾನಾ. ಜೆಂ ಹಾಂವ್ ಬರಯ್ತಾಂ, ತೆಂ ತುಜೆ ಇತ್ತುನ್ ಪಾವ್ತಲೆಂ ಮ್ಹಣೊನೀ ಹಾಂವ್ ನೆಣಾಂ. ತುಕಾ ಕಶೆಂ ಆಪಂವ್ಚೆಂ? ತುಂ ಮ್ಹಜೊ ಮೋಗ್ಚ್ ಜಾವ್ನಾಸ್ಲ್ಲೆಂಯ್, ತರೀ ಮೊಗಾ ಮ್ಹಣ್ ತುಕಾ ಕೆನ್ನಾಂಯ್ ಮ್ಹಳ್ಳೆಂನಾ..... ಕಾಳ್ಜಾಚೊ ಗೊಂಡೊ ತಶೆಂ ಆಸ್ಲ್ಲೆಂಯ್ ತರೀ ತುಕಾ ಕೆನ್ನಾಂಯ್ ಸಾಂಗ್ಲ್ಲೆನಾಂ. ಕಶೆಂ ತುಕಾ ಉಲೊ ಮಾರುಂ ಮ್ಹಾಕಾ ಬಿಲ್ಕುಲ್ ಸಮ್ಜಾನಾ. ಪುಣ್ ಮ್ಹಾಕಾ ಉಡಾಸ್ ಆಸಾ ಥಾವ್ನ್ ತುಂ ಮ್ಹಜೊ ಉಡಾಸ್ ಜಾಲ್ಲೆಂಯ್ ತೆಂ ಮಾತ್ ಹಾಂವ್ ಜಾಣಾಂ. ಏಕ್ ಖಿಣ್ ಲೆಗುನ್ ಸೊಡಿನಾಸ್ತಾಂ, ವೇಳ್ ಘಡಿ ಲೆಕಿನಾಸ್ತಾಂ, ಉಡಾಸ್ ಜಾವ್ನ್ ಮ್ಹಾಕಾ ಧೊಸ್ಲಾಂಯ್... ಕಾಂಯ್ ತುಕಾಯ್ ಹಾಂವ್ ತಶೆಂಚ್...?
ತುಂ ಕೆನ್ನಾ ಮ್ಹಜಾ ದಿಸಾಂನಿ ಖಿರ್ಲೆಂಯ್, ರಾತಿಚಿಂ ಸಪ್ಣಾಂ ಜಾಲೆಂಯ್ ಮ್ಹಾಕಾ ಕಳ್ಳೆಂಚ್ ನಾ. ಉಡಾಸಾ ಮಾರ್ಗಾರ್ ಪಾಟಿಂ ಪಾಟಿಂ ವೆತಾಂ, ತುಂ ಸಕಾಳಿಚೆಂ ಇಸ್ಕಾಲಾಕ್ ಚಲೊನ್ ಯೆಂವ್ಚೆಂ ಮ್ಹಾಕಾ ದಿಸ್ತಾ. ತುಂ ಆಟ್ವೆಂತ್ ಆಸ್ಲ್ಲೆಂಯ್ ಆನಿ ಹಾಂವ್ ನೊವ್ಯಾಂತ್. ಸೊಜಾಗೆಲ್ಯಾ ಸಾಂಕ್ಯಾ ಉಪ್ರಾಂತ್ ಆಮ್ಚಿ ವಾಟ್ ಏಕ್ ಜಾತೆಲಿ. ಹಾಂವ್ ಮ್ಹಜೊ ವೇಳ್ ಅಡ್ಜಸ್ಟ್ ಕರ್ನ್ ತುಕಾ ಥಂಯ್ ರಾಕ್ತಲೊಂ. ಉಪ್ರಾಂತ್ ಆಮ್ಚಿಂ ಉತ್ರಾಂ ಮೊಳ್ಬಾರ್ ಚಡೊನ್ ಉಭ್ತಾಲಿಂ, ಕಾಳ್ಜಾಕ್ ಪಾಕಾಂ ಫುಲ್ತಾಲಿಂ... ಆಮ್ಚ್ಯಾ ಸಾಮ್ಕಾರ್ ಇಸ್ಕಾಲಾಚಿ ಗೇಟ್ ಕೆನ್ನಾ ಉದೆತಾಲಿ.... ಬಿಲ್ಕುಲ್ ಕಳಾನಾತ್ಲ್ಲೆಂ.
ತುಕಾ ಉಡಾಸ್ ಆಸಾ? ತ್ಯಾ ವರ್ಸಾ ಇಸ್ಕಾಲಾಚಾ ಪಾರ್ಲಿಮೆಂಟಾಂತ್ ಹಾಂವ್ ಕಸ್ಲೊಗೀ ’ಮಂತ್ರಿ’ ಜಾಲ್ಲೊಂ ಆನಿ ತುಂ ’ಉಪಮಂತ್ರಿ’ ಜಾಲ್ಲೆಂಯ್. ನಶೀಬಾನ್ ಮ್ಹಣ್ ಚಿಂತ್ಲ್ಲೆಂಯ್? ತಾಚೆ ಪಾಟ್ಲ್ಯಾನ್ ಹಾಂವ್ ಕಿತ್ಲೊ ಖೆಳ್ ಖೆಳ್ಳಲೊಂ ತೆಂ ತುಕಾ ಯಾ ಸಿಸ್ಟರ್ ರೋಜ್ಮೇರಿಕ್ ಜಾಂವ್ ಕಳಾನಾತ್ಲ್ಲೆಬರಿಂ ಜಾಂವ್ಕ್ ಹಾಂವೆ ಕಿತ್ಲೆ ವೊದ್ದುವೊರಾಂಟ್ ಘೆತ್ಲ್ಲೆ ಜಾಣಾಂಯ್? ಕಾಂಯ್ ವರ್ಸ್ಭರ್ ತುಜೆಲಾಗಿಂ ವೆವೆಗ್ಳ್ಯಾ ನಿಬಾಂನಿ ಉಲವ್ಯೆತೆಂ ನ್ಹಯ್!
ಅಂಕಲಾನ್ ಹಾಡ್ಲ್ಲಿಂ ಗಲ್ಫಾಚಿಂ ಚೊಕ್ಲೆಟಾಂ ತುಕಾ ದೀಜೆ ಮ್ಹಣ್ ಪೊತ್ಯಾಂತ್ ದವರ್ಲ್ಲಿಂ, ದಿಂವ್ಚೆಂ ಧಯ್ರ್ ನಾಸ್ತಾಂ, ಹಾಂವೆಂಯ್ ಖಾಯ್ನಾಸ್ತಾಂ, ತಶಿಂಚ್ ಕಡೊನ್ ಗೆಲ್ಲಿಂ, ಜಾಣಾಂಯ್?
ಹಾಂವ್ ಧಾವೆಂತ್ ಪಾಸ್ ಜಾವ್ನ್ ಪಯ್ಶಿಲ್ಯಾ ಜೂನಿಯರ್ ಕೊಲೆಜಿಕ್ ವಚೊಂಕ್ ಆಸ್ತಾನಾ, ತುಂ ಥಂಯ್ ಆಸ್ಚೆಂನಾಂಯ್ ಮ್ಹಳ್ಳ್ಯಾ ಎಕಾಚ್ ಕಾರಣಾಕ್, ಕಿತ್ಲೆಶೆಂ ಪಾವ್ಟಿಂ ಹಾಂವ್ ನಾಪಾಸ್ ಜಾಲ್ಲೊಂ ತರ್ ಕಿತ್ಲೆಂ ಬರೆಂ ಆಸ್ತೆಂ ಮ್ಹಣ್ ಹಾಂವೆಂ ಚಿಂತ್ಲ್ಲೆಂ ನಾ? ಪಾಸ್ ಜಾಲ್ಲ್ಯಾಕ್ ಮ್ಹಾಕಾಚ್ ಹಾಂವೆಂ ಯೆಟ್ಲ್ಲೆಂನಾ?
ಆಮ್ಚಿ ಜ್ಯೂನಿಯರ್ ಕೊಲೆಜ್ ಆನಿ ತುಮ್ಚೆಂ ಹೈಸ್ಕೂಲ್ ಎಕಾಮೆಕಾ ಪಯ್ಸ್ ಆಸ್ಲ್ಲಿಂ. ತರೀ ಫಕತ್ ತುಜೆರ್ ಏಕ್ ದೀಷ್ಟ್ ಘಾಲ್ಚೆ ಪಾಸತ್, ಆನಿ ಮ್ಹಾಕಾ ಪಳೆತಾಂ, ತುಜ್ಯಾ ಗಾಲಾಂನಿ ಉದೆಂವ್ಚಾ ತಾಂಬ್ಸಾಣೆ ಪಾಸತ್, ಕಿತ್ಲೆಶ್ಯಾ ಪಾವ್ಟಿಂ ದನ್ಪಾರಾಂಚ್ಯಾ ಜೆವ್ಣಾ ವಿರಾಮಾವೆಳಾರ್, ಕೊಣಾಕೊಣಾಚಿ ಸೈಕಲಾಂ ಮಾಗೊನ್ ಹಾಂವ್ ಥಂಯ್ಸರ್ ಯೆತಲೊಂ. ಥಂಯ್ ಪರ್ಯಾಂತ್ ತೆಂ ಸೈಕಲ್ ಮಾಡೊವ್ನ್ ಯೇವ್ನ್ ವೆತಾನಾ, ದನ್ಪಾರಾಂ ಜೆಂವ್ಲ್ಲ್ಯಾ ಭುತಿಯೆಂತ್ಲಿ ಪೇಜ್ ಖಂಯ್ಸರ್ ಮಾಯಾಕ್ ಜಾವ್ನ್ ವೆತಾಲಿ ಕೋಣ್ ಜಾಣಾ? ಸಾಂಜೆರ್ ಕ್ಲಾಸಿ ಜಾತಾ ಪರ್ಯಾಂತ್, ಮ್ಹಜೆ ಬಾರಾ ಬ್ರೆಸ್ತಾರ್ ಆನಿ ತೆರಾ ಸುಕ್ರಾರ್ ಜಾತೆಲೆ. ಮುಕ್ಲ್ಯಾ ವರ್ಸಾ ತುಂ ಪಯ್ಲೆ ಪಿಯುಸಿಕ್ ಭರ್ತಿ ಜಾತಾ ಪರ್ಯಾಂತ್ ಕಿತ್ಲ್ಯಾ ಕರಂದಾಯೆನ್ ತೆಂ ವರಸ್ ಹಾಂವೆಂ ಖರ್ಚಿಲ್ಲೆಂ, ತೆಂ ಭೋವ್ಶ್ಯಾ ದೇವ್ ಆನಿ ಹಾಂವ್ ಮಾತ್ ಜಾಣಾಂವ್. ತುಕಾ ಕಾಂಯ್ ತಾಚಿ ಖಬಾರ್ ಆಸ್ಲ್ಲಿ?
ಜೂನಿಯರ್ ಕೊಲೆಜಿಂತ್ಲಿ ಗಜಾಲ್ ವೆಗ್ಳಿಚ್. ಸುತ್ತೂರಾಂತ್ಲ್ಯಾ ಚಾರ್ ಗಾಂವ್ಚ್ಯಾ ತ್ಯಾ ಏಕ್ ಮಾತ್ ಜೂನಿಯರ್ ಕೊಲೆಜಿಂತ್, ಶೆರಾಂತ್ಲ್ಯಾ ಕೊಲೆಜಿಬರಿಂ, ಚೆಡೆ ಚೆಡ್ವಾಂಚಿ ಭರ್ಸವ್ಣಿ ಬಿಲ್ಕುಲ್ ನಾತ್ಲ್ಲಿ. ಹೈಸ್ಕೂಲ್ ಪರ್ಯಾಂತ್, ಮಾದ್ರಿಂಖಾಲ್ ಆಸ್ಲ್ಲ್ಯಾ ಇಸ್ಕಾಲಾನಿಂ ಸುಡಾಳ್ ವಾಡ್ಲೆಲ್ಯಾ ಆಮ್ಕಾಂ ಹಾಂಗಾಚ್ಯಾ ಭಂವ್ತಣೆಂತ್ ಬಾಂಧುನ್ ಘಾಲ್ಲೆಬರಿಂ ಜಾತಾಲೆಂ. ಏಕ್ ಚಲೊ ಆನಿ ಚಲಿ ಮೆಳ್ಳಿಂ, ಉಲಯ್ಲಿಂ ಮ್ಹಳ್ಯಾರ್ ಕರ್ಡಾಕ್ ಉಜೊ ಪೆಟ್ಲ್ಲೆಬರಿ! ತರೀ ಹಾಂವ್, ತುಂವೆಂ ಇಷ್ಟಿಣ್ಯಾಸಂಗಿಂ ಯೆಂವ್ಚ್ಯಾ ವೆಳಾರ್ಚ್ ಮ್ಹಜ್ಯಾ ಇಷ್ಟಾಸಂಗಿಂ ಸುಟ್ತಾಲೊಂ. ಗಾದ್ಯಾಮೆರೆಂನಿ ಆಮ್ಚೆ ಪಂಗಡ್ ಇಲ್ಲೆ ಮುಕಾರ್ ಪಾಟಿಂ ಚಲೊನ್ ವೆತಾನಾ, ಹಾಂವ್ ಫಕತ್ ತುಕಾ ಆಯ್ಕೊಂಚೆ ಪಾಸತ್ ವ್ಹಡ್ಲ್ಯಾನ್ ಉಲಯ್ತಾಲೊಂ, ಹಾಸ್ತಾಲೊಂ. ತುಜೆಂ ಧ್ಯಾನ್ಯೀ ಹಾಂಗಾಚ್ ಆಸ್ತಲೆಂ ತೆಂ ಹಾಂವ್ ಬರ್ಯಾನ್ ಜಾಣಾಸ್ಲ್ಲೊಂ. ತುಂ ಮ್ಹಜೆ ನೋಟ್ಸ್ ಮಾಗ್ತಾಲೆಂಯ್, ಲ್ಯಾಬ್ ರೆಕೊರ್ಡ್ ವಿಚಾರ್ತಾಲೆಂಯ್. ಜರ್ ತುಂ ವಿಚಾರ್ಶಿ ಮ್ಹಣ್ ಮ್ಹಾಕಾ ಪಯ್ಲೆಂಚ್ ಕಳ್ಳೆಲೆಂ ತರ್ ಹಾಂವ್ ಪಯ್ಲ್ಯಾ ಪಿಯುಸೆಚೆ ನೋಟ್ಸ್ ಆನಿ ರೆಕೊರ್ಡ್ ಕಿತ್ಲೆ ಬರೆ ಕರ್ನ್ ಕರ್ತೊಂ ಕೊಣ್ಣಾ. ದುಸ್ರ್ಯಾ ವರ್ಸಾಚೆ ಮ್ಹಜೆ ರೆಕೊರ್ಡ್ ಅವ್ವಲ್ ನಂಬ್ರಾಚೆ ಆಸ್ಲ್ಲೆ. ಮುಕ್ಲ್ಯಾ ವರ್ಸಾ ತುಂ ವಿಚಾರ್ತಲೆಂಯ್ ತುಕಾ ತಾಂಚಿ ಗರ್ಜ್ ಪಡ್ತೆಲಿ ಮ್ಹಳ್ಳ್ಯಾ ಎಕಾಚ್ ಶೆವೊಟಾನ್ ಮ್ಹಜಿ ತಾಂಕಿವರ್ತಿ ಮಿನತ್ ತ್ಯಾ ನೋಟ್ಸ್ ಆನಿ ರೆಕೊರ್ಡಾಂಚೆರ್ ಘಾಲ್ಲಿ. ಆಮ್ಚ್ಯಾ ಲೆಕ್ಚರರಾಂಕ್ ಅಜ್ಯಾಪ್ಶೆಂ ಜಾಲ್ಲೆಂ. ಪಯ್ಲ್ಯಾ ವರ್ಸಾ ಮರ್ಯಾದೆನ್ ’ಎಸೈನ್ಮೆಂಟ್’ ದೀನಾತ್ಲ್ಲ್ಯಾ ಚೆರ್ಕ್ಯಾಕ್ ದುಸ್ರ್ಯಾ ವರ್ಸಾ ಖಂಯ್ಚೊ ಭೂತ್ ಲಾಗ್ಲಾ ತಾಂಕಾಂ ಕಳೊಂಕ್ನಾತ್ಲ್ಲೆಂ! ತುಂ ಮ್ಹಜ್ಯಾ ರೆಕೊರ್ಡಾಂಚಿ ಮಜತ್ ಘೆತಾಯ್ ಮ್ಹಣ್ ಜಾಣಾಸ್ಲ್ಲೊ ’ಬಯೋಲಜಿ ಭೊಟ್’ ತುಕಾ ತವಳ್ ತವಳ್ ಉತ್ರಾಂ ತೀರ್ ಮಾರ್ತಲೊ ಮ್ಹಣ್ ತುವೆಂ ಸಾಂಗ್ಲ್ಲೊ ಉಡಾಸ್ ಆಸಾ ಮ್ಹಾಕಾ.
ಸಾಂಜೆಚೆಂ ಕ್ಲಾಸಿ ಥಾವ್ನ್ ಘರಾ ಯೆತಾನಾ, ಗಾದ್ಯಾಮೆರೆನಿಂ ತುಕಾ ಉತ್ರೊಂಚೆ ಪಾಸತ್ ಸರಾರಾಂ ಚಲೊನ್ ತುಕಾ ಓವರ್ಟೇಕ್ ಕರ್ನ್ ಘರಾ ವೆಚೆಂ ಆಸ್ಲ್ಲೆಂ. ಘರಾಪಾವ್ಲ್ಲೆಂಚ್ ಬೂಕ್ ಉಡವ್ನ್, ಪರತ್ ಏಕ್ ಪಾವ್ಟಿಂ ತುಕಾ ಮೆರೆರ್ ಉತ್ರೊಂಚೆ ಪಾಸತ್ ಖಂಯ್ಚಾಯ್ ನಿಬಾನ್ ಭಾಯ್ರ್ ಸರ್ಚೆಂ ಆಸ್ಲ್ಲೆಂ. ತ್ಯಾ ಏಕ್ ಫುಟ್ ರುಂದಾಯೆಚ್ಯಾ ಮೆರೆರ್ ತುಕಾ ಉತರ್ತನಾ, ತುಂ ಮ್ಹಜ್ಯಾ ಬೋವ್ಲಾಗಿಂ ಯೆಂವ್ಚ್ಯಾ ತ್ಯಾ ಏಕ್ ಆಪುರ್ಬಾಯೆಚ್ಯಾ ಘಡ್ಯೆ ಪಾಸತ್, ತ್ಯಾ ಖಿಣಾ, ಮ್ಹಜ್ಯಾ ಆಂಗಾಂತ್ ಚರ್ಚ್ಯಾ ತ್ಯಾ ವೀಜೆ ಪಾಸತ್, ಕಿತ್ಲೆಶಿಂ ಮೈಲಾಂ ಫುಕಟಾಕ್ ಹಾಂವ್ ಚಲ್ಲ್ಲೊಂನಾ?
ತುಕಾ ಉಡಾಸ್ ಆಸಾ? ತ್ಯಾ ವರ್ಸಾ ನತಾಲಾಂ ರಾತಿಂ, ಮಧ್ಯಾನೆ ಮಿಸಾಕ್ ವೆತಾನಾ, ಹಾಂವ್ ಆಮ್ಚ್ಯಾ ಘರ್ಚ್ಯಾಂಸಂಗಿಂ, ತುಂ ತುಂಚ್ಯಾ ಘರ್ಚ್ಯಾಂಸಂಗಿಂ, ಆಮಿ ದೊಗಾಂಯ್ ತಾಂಚೆ ಪ್ರಾಸ್ ಚಾರ್ ಮೆಟಾಂ ಮುಕಾರ್.... ಪುನ್ವೆಚ್ಯಾ ಚಾನ್ನ್ಯಾಕ್ ಗಾದೆ ದುದಾಂತ್ ಬುಡವ್ನ್ ಕಾಡ್ಲ್ಲೆಬರಿಂ ದಿಸ್ತಾಲೆ. ಶೆತಾಂಚೆರ್ ಮಾಂಡ್ಲ್ಲೆ ದೊವಾ ಥೆಂಬೆ ತ್ಯಾ ಚಾನ್ನ್ಯಾಕ್ ಮೊತಿಯಾಂಬರಿಂ ಪರ್ಜಳ್ತಾಲೆ..... ಆನಿ ದಸೆಂಬ್ರಾಚ್ಯಾ ಹಿಂವಾಂತೀ ಹಾಂವ್ ಬಾರೀಕ್ ಘಾಮೆತಾಲೊಂ. ಗಾದೆ ಉತರ್ನ್ ಪೆಂಟೆಂತ್ ಪಾವೊನ್ ಆಮಿ ರಸ್ತ್ಯಾರ್ ಎಕಾಮೆಕಾ ಬರಾಬರ್ ಚಲ್ತಾನಾ, ಹಾಂವ್ ತುಜೆಸಂಗಿಂ ರೆಸ್ಪೆರಾಕ್ಚ್ ಭಾಯ್ರ್ ಸರ್ಲಾಂಶೆಂ ಮ್ಹಾಕಾ ಭೊಗ್ತಾಲೆಂ! ಪಯ್ಸ್ ಖಂಯ್ಸರ್ಗೀ ‘ಸ್ವಾದಿಕ್ ರಾತ್ ಭಾಗಿ ರಾತ್’ ಹಳ್ವಾಯೆನ್ ಆಯ್ಕಾತಾಲೆಂ. ಖರೆಂಚ್ ಸಾಂಗ್ತಾಂ ತಸಲೊ ದೈವಿಕ್ ಆನ್ಬೊಗ್ ಮ್ಹಾಕಾ ಜಿಣ್ಯೆಂತ್ ಪರತ್ ಜಾಲ್ಲೊನಾ! ತುಜೊ ಹಾತ್ ಧರ್ಚಿ ಪಿಸಾಯ್ ಮ್ಹಾಕಾ ಇತ್ಲಿ ಯೆತಾಲಿ... ಮ್ಹಜೆ ದೊನೀ ಹಾತ್ ಹಾಂವೆಂ ಘಟ್ ಬಾಂಧುನ್ ದವರ್ಲ್ಲೆ. ತೆನ್ನಾಂ ಸಾಂಗ್ ಮ್ಹಾಕಾ ತುಂ ಕಿತೆಂ ಚಿಂತಾಲೆಂಯ್?
ತೆ ದೀಸ್ ಕಿತ್ಲೆ ಬರೆ ಆಸ್ಲ್ಲೆ... ದಿಸಾಕ್ ಏಕ್ ಪಾವ್ಟಿಂ ತುಕಾ ಪಳೆಲೆಂ ಆನಿ ತುವೆಂ ಅಮ್ರುಕ್ಯೊ ಹಾಸೊ ದಿಲ್ಯೊಯ್ ತರ್ ಹಾಂವ್ ಖುಶೆಚ್ಯಾ ಆಮಾಲಾಂತ್ ಪಿಕ್ತಾಲೊಂ. ತುಂ ಹಾಸ್ತಾಂ ತುಜ್ಯಾ ಗಾಲಾಂನಿ ಪಡ್ಚ್ಯಾ ಪಂಡ್ಕುಲ್ಯಾಂನಿ ಬುಡೊನ್ ರಾವ್ಯಾಶೆಂ ಮ್ಹಾಕಾ ಭೊಗ್ತಾಲೆಂ. ತುಂ ಕಶೆಂ ಆನಿ ಕೆನ್ನಾ ಮ್ಹಜ್ಯಾ ಜಿಣ್ಯೆಂತ್ ತಿತ್ಲೆಂ ಮಿಸ್ಳಾಲೆಂಯ್, ಮ್ಹಾಕಾ ಬಿಲ್ಕುಲ್ ಖಬಾರ್ಚ್ ಜಾಲಿನಾ. ತ್ಯಾ ಮಿಸ್ಳಾವ್ಣೆಂತ್ ಮ್ಹಜೆ ಪ್ರಾಸ್ ತುಜೊಚ್ ವಾಂಟೊ ಚಡ್ ಆಸ್ಲ್ಲೊ... ಯಾ ತುಂಚ್ ಆಸ್ಲ್ಲೆಂಯ್? ಹಾಂವ್ ಫಕತ್ ನಾಂವಾಂಖಾತಿರ್ ಆಸ್ಲ್ಲೊಂ? ಮ್ಹಜ್ಯಾ ಜಿಣಿಯೆಚೊ ಶೆವೊಟ್ಚ್ ತುಂ ಮ್ಹಣ್ ಹಾಂವ್ ಚಿಂತಾಲೊಂ.
ತ್ಯಾ ವರ್ಸಾ ವ್ಹಡ್ಲ್ಯಾ ಫೆಸ್ತಾಚ್ಯಾ ಸಾಂತೆಂತ್ ಹಾಂವೆಂ ಚರಿತ್ರಾ ರಚ್ಲ್ಲಿ! ಗಾಂವಾಂತ್ ಆಮ್ಚ್ಯಾ, ಪಯ್ಲೆ ಪಾವ್ಟಿಂ ತರ್ನ್ಯಾ ಚಲ್ಯಾನ್, ಎಕಾ ತರ್ನ್ಯಾ ಚಲಿಯೆಕ್ ಫೆಸ್ತಾಸಾಂತೆಂತ್ ಐಸ್ಕ್ರೀಮ್ ಘೇವ್ನ್ ದಿಲ್ಲೆಂ! ತುವೆಂ ಕಿತ್ಲೆಂ ದೊಡುನ್ ತೆಂ ಕಾಣ್ಘೆಲ್ಲೆಂಯ್... ಪುಣ್ ಹಿ ಖಬರ್ ಫಕತ್ ಖಬರ್ ಜಾವ್ನ್ ಉರೊಂಕ್ ನಾತ್ಲ್ಲಿ. ತ್ಯಾ ವರ್ಸಾ, ಗಾಂವಾಂತ್ ಪ್ರಾಯೆಕ್ ಪಾವ್ಲ್ಲ್ಯಾ ಹರ್ಯೆಕ್ ಚಲ್ಯಾ ಚಲಿಯಾಂನಿ ಫೆಸ್ತಾ ಸುರ್ಯೊ ಬುಡ್ಚಾಪಯ್ಲೆಂ ಎಕಾಮೆಕಾ ಐಸ್ಕ್ರೀಮ್ ಖಾವಯಿಲ್ಲಿಂ! ಪಾಟ್ಲ್ಯಾ ಚಾರ್ ಪಾಂಚ್ ಮಹಿನ್ಯಾಂನಿ ಫೆಸ್ತಾಖಾತಿರ್ ಜಮೊ ಕೆಲ್ಲೆ ಪಯ್ಶೆ, ಎಕಾಚ್ ದಿಸಾನ್ ಐಸ್ಕ್ರೀಮಾಂ ಪಾಟ್ಲ್ಯಾನ್ ಉದಾಕ್ ಜಾಲ್ಲೆ.
ಮೈಕಲಾಚ್ಯಾ ರೊಸಾ ರಾತಿಂ, ಆಮಿ ತಾಂಗೆರ್ ಡೆಕೊರೇಶನ್ ಕರುಂಕ್ ಗೆಲ್ಲೆ ತೆನ್ನಾ ತುಂ ಥಂಯ್ ಆಸ್ಲ್ಲೆಂಯ್. ಹಾಂವ್ ವೊಣ್ತಿರ್ ಕಾಗ್ದಾಫಿಂತಾಂಚಿಂ ಕಾಳ್ಜಾಂ ಸೊಡಯ್ತಾಲೊಂ ಆನಿ ತುಂ ಮ್ಹಾಕಾ ಟೇಪ್ ಕಾತರ್ನ್ ದಿತಾಲೆಂಯ್. ವೊಣ್ತಿವಯ್ಲ್ಯಾ ತ್ಯಾ ಫಿಂತಾಂಚ್ಯಾ ಕಾಳ್ಜಾಂ ಭಿತರ್ ಮೈಕಲ್ ಆನಿ ತಾಚ್ಯಾ ವೊಕ್ಲೆಚ್ಯಾ ನಾಂವಾ ಬದ್ಲಾಕ್ ಮ್ಹಜೆಂ ಆನಿ ತುಜೆಂ ನಾಂವ್ ಬರಂವ್ಚಿ ಮ್ಹಜಿ ಗಿರಾಂತ್ ತ್ಯಾ ದೀಸ್ ಕಿತ್ಲ್ಯಾ ಕಷ್ಟಾಂನಿ ಹಾಂವೆಂ ದಾಂಬುನ್ ಧರ್ಲ್ಲಿ ತೆಂ ಹಾಂವ್ ಮಾತ್ ಜಾಣಾಂ... ತುಕಾಯ್ ತಿಚ್ ಆಶಾ ನಾತ್ಲ್ಲಿ?
ಖಂಯ್ಸರ್ ಗೆಲೆ ತೆ ದೀಸ್ ಕೊಣ್ಣಾ? ತವಳ್ ತುಕಾಯ್ ಮ್ಹಜೊ ಸಾಂಗಾತ್ ಬರೊ ಲಾಗ್ತಾಲೊ ತೆಂ ಹಾಂವ್ ಜಾಣಾಸ್ಲ್ಲೊಂ. ಮ್ಹಾಕಾ ಪಳೆಂವ್ಕ್ನಾಂಯ್ ತರ್ ಪಳೆವ್ನ್ ಹಾಸ್ಲೆನಾಂಯ್ ತರ್ ತುಕಾಯ್ ಸಮಾಧಾನ್ ಜಾಯ್ನಾತ್ಲ್ಲೆಂ ತೆಂ ಮ್ಹಾಕಾ ಕಳಿತ್ ಆಸ್ಲ್ಲೆಂ. ನಾ ತರ್ ತಾಪಾಂತ್ ಪಡೊನ್ ಹಾಂವ್ ಚಾರ್ ಪಾಂಚ್ ದೀಸ್ ಕ್ಲಾಸಿಕ್ ಯೇಂವ್ಕ್ ನಾತ್ಲ್ಲೆವೆಳಾರ್ ತುಂ ನೋಟ್ಸಾಚ್ಯಾ ನಿಬಾರ್, ಆಮ್ಗೆರ್ ಘರಾ ಮ್ಹಾಕಾ ಪಳೆಂವ್ಕ್ ಯೆತೆಂನಾಯ್. ಅಕ್ಟೋಬ್ರಾಚ್ಯಾ ರಜೆಂತ್, ಸ್ಪರ್ಧ್ಯಾಕ್ ಪದಾಂ ಶಿಕೊಂಕ್ ಮ್ಹಣ್ ಮ್ಹಾಕಾ ಘಡ್ಯೆ ಘಡ್ಯೆ ಮೆಳ್ತೆಂನಾಂಯ್. ತುಕಾ ಪದಾಂ ಶಿಕಯ್ತಾನಾ, ಮ್ಹಜೊ ಗಳೊ ಸುಕ್ತಾಲೊ ಆನಿ ತಾಳೊ ಸುಟಾನಾತ್ಲ್ಲೊ ಆನಿ ತುಂ ತುಜ್ಯಾ ಸಂಗೀತ್ ಮೆಸ್ತ್ರಿಚ್ಯಾ ಹಾಲತಿಚೆರ್ ಅಮ್ರುಕೆಂ ಹಾಸ್ತಾಲೆಂಯ್. ಮ್ಹಜ್ಯಾ ಕಾಳ್ಜಾ ಮನಾಂತ್ಲೆ ಹಾಲ್ ತುಂ ಬರ್ಯಾನ್ ಜಾಣಾಸ್ಲ್ಲೆಂಯ್... ತುಕಾಯ್ ತಶೆಂಚ್ ಜಾತಲೆಂ ನ್ಹಯ್?
ಧಾವೆಂತ್ ಆಸ್ತಾಂ, ಕ್ಲಾಸಿಕ್ ಅವ್ವಲ್ ನಂಬ್ರಾರ್ ಪಾಸ್ ಜಾಲ್ಲೊ ಹಾಂವ್, ಪಿಯುಸಿಂತ್ ನಾಪಾಸ್ ಜಾಲ್ಲ್ಯಾಕ್, ಫಕತ್ ತುಕಾ ಗುನ್ಯಾಂವ್ಕಾರ್ ಠರಾಯ್ತಾಂ. ತುಂ ಜರ್ ತ್ಯಾ ನಮುನೆರ್ ಮ್ಹಜ್ಯಾ ಕಾಳ್ಜಾಂತ್ ಪಾಟ್ ಬಾಂದುನ್ ಬಸೊಂಕ್ ನಾತ್ಲ್ಲೆಂಯ್, ಕೆಮಿಸ್ಟ್ರಿಚ್ಯಾ ’ಇಕ್ವೇಶನಾ’ನಿಂ, ಮ್ಯಾಥ್ಸಾಚ್ಯಾ ’ಥಿಯರಮಾಂನಿ’, ಫಿಝಿಕ್ಸಾಚ್ಯಾ ’ಪ್ರೂಫಾಂನಿ’ ಆನಿ ಬಯೋಲಜಿಚ್ಯಾ ’ಸೆಲ್ಲಾ ಸೆಲ್ಲಾ’ನಿಂ ಫಕತ್ ತುಂಚ್ ಮ್ಹಾಕಾ ಝಳ್ಕಾನಾತ್ಲ್ಲೆಂಯ್ ತರ್ ಹಾಂವ್ ಪಿಯುಸಿಂತ್ ಉಣ್ಯಾರ್ ಫಸ್ಟ್ ಕ್ಲಾಸ್ ತರ್ಯೀ ಯೆತೊಂ. ತ್ಯಾ ದಿಸಾಂನಿ ತುಂ ಮ್ಹಜ್ಯಾ ಜಿಣ್ಯೆಂತ್ ಇತ್ಲೆಂ ಘುಸೊನ್ ಗೆಲ್ಲೆಂಯ್, ಪರೀಕ್ಷೆಚ್ಯಾ ಪೇಪರಾಂನಿ ಹಾಂವೆಂ ತುಜಿಂಚ್ ನಾಂವಾಂ ಸೋಡ್ನ್ ದುಸ್ರೆಂ ಕಾಂಯ್ ಬರಯಿಲ್ಲೆಂ ವಾ ನಾ ತಿ ಮ್ಹಾಕಚ್ ಖಬಾರ್ ನಾ!
ವಚೊಂಕ್ ಕುಸ್ಕುಟಾಚೆಂ ಮನ್ ನಾತ್ಲ್ಲೆಂ ತರೀ ದುಸ್ರಿ ವಾಟ್ ನಾಸ್ತಾಂ ಹಾಂವೆಂ ಬೊಂಬಯ್ಚಿ ವಾಟ್ ಧರ್ಲ್ಲಿ. ಗಾಂವ್ಚ್ಯಾ ನಾಕ್ಯಾರ್, ಹೈವೆಲಾಗಿಂ ಬಸ್ಸಾಕ್ ರಾಕ್ಚ್ಯಾ ಮ್ಹಾಕಾ ಪಾಂವ್ಕ್ ಘರ್ಚಿಂ, ಆನಿ ಏಕ್ ದೋಗ್ ಈಷ್ಟ್ ಆಯಿಲ್ಲೆ. ಬಸ್ ಸುಟ್ಚ್ಯಾ ಇಲ್ಲೆಂ ಪಯ್ಲೆಂ, ತುಂ ’ಖಂಯ್ಸರ್ಗೀ’ ವೆಚೆಂ ಅಚಾನಕ್ ತ್ಯಾ ವಾಟೆನ್ ಪಾಶಾರ್ ಜಾಲ್ಲೆಂಯ್... ಮ್ಹಾಕಾ ಮೆಳ್ಲ್ಲೆಂಯ್, ಬಸ್ ಸುಟ್ತಾ ಪರ್ಯಾಂತ್ ರಾವ್ಲ್ಲೆಂಯ್... ಆನಿ ತುಂ ಥಂಯ್ಸರ್ ಖಂಡಿತ್ ಯೆತೆಲೆಂಯ್ ಮ್ಹಣ್ ಹಾಂವ್ ಕಿತ್ಯಾಕ್ ಪಯ್ಲೆಂಚ್ ಜಾಣಾಸ್ಲೊಂ? ಬಸ್ ಸುಟೊನ್ ಮುಕಾರ್ ವೆತಾನಾ ಭಿಜ್ಲ್ಲ್ಯಾ ಮ್ಹಜ್ಯಾ ದೊಳ್ಯಾಂಕ್, ತುಜ್ಯಾಯ್ ದೊಳ್ಯಾಂಖಾಂಚಿಂನಿ ದುಕಾಂ ದಿಸ್ಲ್ಲಿಂ...? ಯಾ ತಶೆಂ ಮ್ಹಾಕಾ ಭೊಗ್ಲ್ಲೆಂ ಮಾತ್?...
ಬೊಂಬಯ್ ಪಾವ್ಲ್ಲ್ಯಾ ಉಪ್ರಾಂತ್.....
**********
ಆವಾಜ್ ನಾಸ್ತಾಂ ಭಿತರ್ ರಿಗ್ಲ್ಲ್ಯಾ ರೊನಿನ್ ಜೆನ್ನಿಚ್ಯಾ ಹಾತಾಂತ್ಲಿಂ ಪೇಪರಾಂ ಎಕ್ದಂ ವೋಡ್ನ್ ಕಾಣ್ಘೆಲಿಂ...
"ಹೇಯ್ ಕಿತೆಂ ಕರ್ನ್ ಆಸಾಯ್? ಹಿಂ ಕಾಗ್ದಾಂ...! ಅರೆ ಹಿಂ ಖಂಯ್ ಮೆಳ್ಳಿಂ ತುಕಾ? ಕಿತೆಂ ಹೊ ಕಚ್ರೊ...?"
"ಪ್ಲೀಸ್ ರೊನಿ ತಿಂ ಕಾಗ್ದಾಂ ಮ್ಹಾಕಾ ದೀ.... ಹಾಂಗಾ ಕಬಾಟಾಂತ್ ಸಗ್ಳೆಂ ಸಮಾ ಕರ್ಯಾಂ ಮ್ಹಣ್ತಾನಾ... ಹಿಂ ಮೆಳ್ಳಿಂ... ತುಂ ಇತ್ಲೆಂ ಪೂರಾ ಬರಯ್ಶಿ ಮ್ಹಣ್ ಹಾಂವ್ ನೆಣಾಸ್ಲ್ಲಿಂ... ಪ್ಲೀಸ್ ದೀನೆಂ..." ಜೆನ್ನಿನ್ ಕಬಾಟಾಂತ್ಲೆಂ ಸರ್ವ್ ಉಸ್ತುನ್ ಘಾಲ್ಲೆಂ... ಪರ್ನ್ಯೊ ತಸ್ವೀರ್ಯೊ... ಫೈಲಾಂ... ಬೂಕ್...
"ಇನ್ಫ್ಯಾಕ್ಟ್ ಹಾಂವ್ಯೀ ಹಿಂಚ್ ಕಾಗ್ದಾಂ ಸೊಧುನ್ ಆಸ್ಲ್ಲೊಂ." ಆಪ್ಲಿ ಟೈ ಸಡೀಳ್ ಕರ್ತಾಂ ರೊನಿ ಮ್ಹಣಾಲೊ.
"ಕಿತ್ಲಿಂ ವರ್ಸಾಂ ಜಾಲಿಂ... ಹಾಂವ್ ಚಿಂತಾಲೊಂ ತಿಂ ಖಂಯ್ ತರೀ ಗುಲ್ಲ್ ಜಾಲ್ಯಾಂತ್ ಮ್ಹಣ್..." ಮೊಚೆ ನಿಕ್ಳಾವ್ನ್ ತೊ ಜೆನ್ನಿಸವೆಂ ತ್ಯಾ ಕಚ್ರ್ಯಾ ಮಧೆಂಚ್ ಬಸ್ಲೊ. "ಭುರ್ಗಿಂ ಖಂಯ್ ಗೆಲ್ಯಾಂತ್?" ಜೆನ್ನಿ ತಾಕಾ ವೊಣ್ಕಾಲೆಂ.
"ರೀನು ಡ್ಯಾನ್ಸ್ ಕ್ಲಾಸಿಕ್ ಗೆಲಾಂ. ಯೆತಾನಾ ಸಾಡೆಸಾತ್ ಜಾಂವ್ಕ್ ಪುರೊ. ಧಾಕ್ಟೊ ಸಕಯ್ಲ್ ಬಿಲ್ಡಿಂಗಾಂತ್ಲ್ಯಾ ಭುರ್ಗ್ಯಾಂಸಂಗಿಂ ಖೆಳ್ತಾ. ಭೋವ್ಶ್ಯಾ ತುಜೆಂ ಕಾರ್ ಗೇಟಿಭಿತರ್ ರಿಗ್ತಾನಾ ಪಳೆಂವ್ಕ್ ನಾ ಆಸ್ತೆಲೆಂ... ತೆಂ ಸೊಡ್ ಆನಿ ಸಾಂಗ್ ಮ್ಹಾಕಾ ಹೆಂ ಕಿತೆಂ ಬರಯ್ಲೆಂಯ್ ಸಾಂಗ್ ಮ್ಹಾಕಾ.... ಕೋಣ್ ತೆಂ ಚೆಡುಂ?"
"ಒಹೊ! ತೆಂ ಪೂರಾ ತವಳ್ಚೆಂ ಪಿಶೆಪಣ್... ಸೊಡ್ ತಿ ಗಜಾಲ್" ರೊನಿ ಥಂಯ್ಚೊ ಉಟೊಂಕ್ ಲಾಗ್ಲೊ.
"ಸಾಂಗ್ನೆ ರೊನಿ ಪ್ಲೀಸ್... ಮುಕಾರ್ ಕಿತೆಂ ಜಾಲೆಂ?" ಜೆನ್ನಿನ್ ತಾಕಾ ಸೊಡ್ಲೆಂ ನಾ.
"ಜಾಂವ್ಚೆಂ ಕಿತೆಂ? ಹಾಂವ್ ಬೊಂಬಯ್ ಪಾವೊನ್ ಪುರ್ತಿಂ ಚಾರ್ ವರ್ಸಾಂ ಜಾಯ್ಜೆ ತರ್ ತಾಚೆಂ ಕಾಜಾರ್ ಜಾಲೆಂ."
"ತುಕಾ ಖಬರ್ ನಾತ್ಲ್ಲಿ? ತುಂ ವೊಗೊಚ್ ರಾವ್ಲೊಯ್?"
"ಖಬರ್ ಜಾಂವ್ಚಿ? ತಾಣೆಂ ಮ್ಹಾಕಾ ಗಾಂವಾಂ ಥಾವ್ನ್ ಕಾಗತ್ ಬರಯಿಲ್ಲೆಂ ಲೆಗುನ್... ತಾಚೆಂ ಪಯ್ಲೆಂ ಆನಿ ನಿಮಾಣೆ ಮೊಗಾಪತ್ರ್!"
"ಆನಿ ತುಂ ಗಾಂವಾಕ್ ಯೇಂವ್ಕ್ನಾಂಯ್!!"
"ಯೇವ್ನ್ ಕಿತೆಂ ಕರ್ತೊಂ? ತವಳ್ ಮ್ಹಾಕಾ ಬಾವೀಸ್ ವರ್ಸಾಂ... ಬೊಂಬಯ್ ಗಾಂವ್ಚ್ಯಾ ಕುಡಾಂತ್ ರಾವ್ತಾಲೊಂ. ಸಮಾಶೆಂ ಕಾಮ್ ನಾತ್ಲ್ಲೆಂ... ತೆಂ ಪೂರಾ ಫಿಲ್ಮಾಂನಿ ಚಲ್ತಾ ಜೆನ್ನಿ... ಉಟಾಉಟಿಂ ಗಾಂವಾಕ್ ಯೇವ್ನ್ ತಾಚೆಂ ರೆಸ್ಪೆರ್ ಜಾತಾಸ್ತಾನಾ ಗ್ರ್ಯಾಂಡ್ ಎಂಟ್ರಿ ಮಾರ್ನ್ ’ರೋಕ್ ದೊ ಯೆ ಶಾದಿ’ ಮ್ಹಣ್ ಬೊಬಾಟ್ ಮಾರ್ಲ್ಯಾರ್ ತೆಂ ಆಲ್ತಾರ್ ಸೋಡ್ನ್ ಧಾಂವೊನ್ ಯೇವ್ನ್ ಮ್ಹಾಕಾ ವೇಂಗ್ ಮಾರ್ತಾ... ಸಮಾ ಸಾಂಗ್ಚೆಂ ತರ್ ತವಳ್ ಮ್ಹಜೆಲಾಗಿಂ ಗಾಂವಾಕ್ ಯೇಂವ್ಕ್ ಟಿಕೆಟಿಚೆ ಪಯ್ಶೆ ಲೆಗುನ್ ನಾತ್ಲ್ಲೆ!" ರೊನಿ ಹಾಸ್ಲೊ.
"ತುಕಾ ಕಿತೆಂಚ್ ಭೊಗ್ಲೆಂನಾ? ದೂಕ್ ಆಯ್ಲೆಂನಾ?" ಜೆನ್ನಿ ರೊನಿಚ್ಯಾ ಟೈ ಸಂಗಿಂ ಖೆಳ್ತಾಲೆಂ.
"ಭೊಗ್ಲೆಂ... ದುಕ್ಲೆಂ ಆನಿ ಜಿವಿತಾಂತ್ ಕಾಂಯ್ಚ್ ಉರ್ಲೆಂನಾ ಮ್ಹಣ್ ಚಿಂತ್ಲೆಂ ಸಯ್ತ್. ತ್ಯಾ ವಗ್ತಾಚಿಂ ಮ್ಹಜಿ ಭೊಗ್ಣಾಂಚ್ ತುವೆಂ ಆತ್ತಾಂ ವಾಚ್ಲಿಂಯ್... ಇನ್ಫ್ಯಾಕ್ಟ್ ಹಾಂವ್ ಜೀವ್ಘಾತ್ ಕರ್ಚೆವಿಶಿಂ ಚಿಂತಾಲೊಂ."
"ಉಫ್" ಜೆನ್ನಿ ನೀಟ್ ಜಾಲೆಂ. "ಮಾಗಿರ್!?"
"ಮಾಗಿರ್ ಕಿತೆಂ? ಜೀವ್ಘಾತ್ ಕರ್ಚೆಂ ತಿತ್ಲೆಂ ಧಯ್ರ್ ಆಯ್ಲೆಂನಾ. ಉಪ್ರಾಂತ್ಲೊ ಥೊಡೊ ತೇಂಪ್ ಅಂಧ್ಕಾರಾಂತ್ಶೆಂ ಆಸ್ಲ್ಲೊಂ... ವೆಳಾಸವೆಂ ಸರ್ವ್ ಸಾರ್ಕೆಂ ಜಾಲೆಂ... ವಾಚುಂಕ್ ಸುರು ಕೆಲೆಂ... ಕಾಮ್ ಕರ್ತಾಂ ಕರ್ತಾಂ ಶಿಕಪ್ ಮುಕರ್ಸಿಲೆಂ. ಡಿಗ್ರಿ ಜೊಡ್ಲಿ... ಕಾಮ್... ಪ್ರಮೋಶನ್... ಉಪ್ರಾಂತ್ ತುಂ ಮೆಳ್ಳೆಂಯ್"
"ಕಿತ್ಲ್ಯಾ ಸೊಂಪ್ಯಾನ್ ಸಾಂಗ್ತಾಯ್... ತೆಂ ಚೆಡುಂ? ತಾಚೆವಿಶಿಂ ಕಿತೆಂ?"
"ಚೆಡ್ವಾಕ್ ಕಿತೆಂ? ದೊಗಾಂ ಭುರ್ಗಿಂ ಆಸಾತ್. ಆಸ್ಟ್ರೇಲಿಯಾಂತ್ ಸೆಟಲ್ ಜಾಲಾಂ... ಆತಾಂಯ್ ತವಳ್ ತವಳ್ ಇಮೇಯ್ಲಾಂ ಧಾಡಿತ್ತ್ ಆಸ್ತಾ. ಇತ್ಲ್ಯಾ ಮೊಟೆಂ ಜಾಲಾಂ... ಸೈನ್ ಒಫ್ ಪ್ರೊಸ್ಪೆರಿಟಿ..." ರೊನಿಚ್ಯಾ ತೊಂಡಾರ್ ಪೊಕ್ರಿ ಹಾಸೊ ಖೆಳ್ತಾಲ್ಯೊ.
"ಮ್ಹಳ್ಯಾರ್.... ಲವೀನಾ!!?? ಯೂ..." ಜೆನ್ನಿನ್ ಉಶ್ಯಾಂತ್ ರೊನಿಕ್ ಮಾರ್ಲೆಂ... ಮ್ಹಾಕಾ ಗೊತ್ತುಚ್ ಆಸ್ಲ್ಲೆಂ... ತುಮ್ಚ್ಯಾ ದೊಗಾಂಮಧೆಂ ಕಾಂಯ್ ತರೀ ಚಕ್ಕರ್ ಆಸಾತ್ ಮ್ಹಣ್."
"ಹೇಯ್... ಹೇಯ್ ಆತಾಂ ಸುರು ಕರ್ನಾಕಾ. ಆಮ್ಚೆ ಮಧೆಂ ಕಾಂಯ್ ಚಕ್ಕರ್ ನಾಂತ್ ಜಾಯ್ತೆ... ವಿ ಆರ್ ಜಸ್ಟ್ ಗುಡ್ ಫ್ರೆಂಡ್ಸ್...!" ರೊನಿನ್ ಜೆನ್ನಿಕ್ ಆರಾಯ್ಲೆಂ.
"ಮ್ಹಜೆಲಾಗಿಂ ಉಲಯ್ನಾಕಾ ತುಂ..." ಜೆನ್ನಿ ಫಟ್ಕಿರ್ಯಾ ರಾಗಾನ್ ತಾಚ್ಯಾ ವೆಂಗೆಂತ್ಲೆಂ ಸುಟ್ಚೆಂ ಪ್ರೇತನ್ ಕರ್ತಾಲೆಂ.
"ಆಟ್ವ್ಯಾ ನೊವ್ಯಾ ಕ್ಲಾಸಿಂತ್ ಸುರು ಜಾಂವ್ಚೊ ಮೋಗ್... ಇಟ್ಸ್ ಜಸ್ಟ್ ಇನ್ಫೆಚುಯೇಶನ್...! ತಿತ್ಲೆಂಚ್... ಸಮಾಪ್ರಾಯೆಚಾಂಚೊ ಮೋಗ್ ಜಿಕ್ಚೊ ಭಾರಿಚ್ ಅಪ್ರೂಪ್... ಚೆಡ್ವಾಂಕ್ ಕೊಲೆಜ್ ಜಾಯ್ಜೆ ತರ್ ಬರೀ ಸೈರಿಕ್ ಆಯ್ಲಿ ತರ್ ಎಕ್ವೀಸ್ ಬಾವೀಸ್ ವರ್ಸಾಂಕ್ಚ್ ಕಾಜಾರ್ ಕರ್ನ್ ಸೊಡ್ತಾತ್... ತಶೆಂ ಮ್ಹಣ್ ಚೆಡ್ಯಾಂಕ್ ತ್ಯಾ ಪ್ರಾಯೆರ್ ಕಾಜಾರ್ ಜಾಂವ್ಕ್ ಜಾತಾ? ತೆ ಜಿಣ್ಯೆಂತ್ ಸೆಟ್ಲ್ ಜಾವ್ನ್ ಕಾಜಾರ್ ಜಾತಾ ಮ್ಹಣ್ತಾ ಪರ್ಯಾಂತ್ ಚಲಿಯಾಂಚ್ಯಾ ಘರ್ಚಿಂ ರಾಕ್ತಿತ್?"
"ಬಾರಿ ಫಿಲೊಸಫಿ ಉಲಂವ್ಕ್ ಸುರು ಕೆಲೆಂಯ್?" ಜೆನ್ನಿ ರೊನಿಚ್ಯಾ ವೆಂಗೆಂತ್ ಹುಳ್ವಳ್ಳೆಂ.
"ಜಿಣ್ಯೆಂತ್ ಮಾರ್ ಖೆಲ್ಲೆ ಉಪ್ರಾಂತ್ ಫಿಲೊಸಫಿ ಆಪಾಪಿಂಚ್ ಯೆತಾ ಜೆನ್ನಿ..."
"ತೆಂ ಸೊಡ್... ತುಂ ನೊವೆಂತ್ ಆಸ್ತಾಂ... ತುಕಾ ಹಾಂವ್ ಕಿತ್ಯಾಕ್ ದಿಸ್ಲಿಂನಾ?"
"ಪಯ್ಲ್ಯಾನ್ ತುಂ ಆಮ್ಚ್ಯಾ ಗಾಂವಾಂತ್ ನಾತ್ಲ್ಲೆಂಯ್... ಆನಿ ಏಕ್ ವೆಳಾ ಆಸ್ಲ್ಲೆಂಯ್ ತರೀ ಹಾಂವ್ ಬಿಲ್ಕುಲ್ ತುಕಾ ಲೈನ್ ಮಾರ್ತೊನಾ" ರೊನಿ ಹಾಸ್ಲೊ.
"ಹಾಂ!??" ಜೆನ್ನಿ ಪರತ್ ಖುಬಾಳ್ಳೆಂ.
"ಡಾರ್ಲಿಂಗ್" ರೊನಿನ್ ಆಪ್ಲಿ ವೇಂಗ್ ಬಳ್ ಕೆಲಿ. ತಾಚಿಂ ಬೊಟಾಂ ಜೆನ್ನಿಚ್ಯಾ ಕೆಸಾಂ ಮಧೆಂ ಖೆಳ್ತಾಲಿಂ.
"ಹಾಂವ್ ನೊವ್ಯಾಂತ್ ಆಸ್ತಾಂ ತುಂ ತಿಸ್ರೆಂತ್ ಆಸ್ಲ್ಲೆಂಯ್!... ರಿಮೆಂಬರ್??"
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
