ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 76. ಜುದಾಸಾಚೆಂ ರುದಾನ್
ಆಂಟನಿ ಬಾರ್ಕುರ್: ಬಾರ್ಕುರ್ ಫಿರ್ಗಜೆಚೊ ಆಂಟನಿ ಆಯ್ಲೆವಾರ್ ಕೊಂಕ್ಣಿ ಸಾಹಿತ್ಯಾಂತ್ ಅಪ್ಲ್ಯಾ ಕವಿತೆಂಕ್ ಫಾಮಾದ್ ತರ್ಯೀ, ಹಾಣೆಂ ಅಪ್ರೂಪ್ ಕಾಣ್ಯೊ ಬರಯ್ಲ್ಯಾತ್. ಕೊಂಕ್ಣೆಂತ್ ನವ್ಯಾ ಚಿಂತ್ಪಾಚ್ಯಾ ಸಾಹಿತ್ಯಾಕ್ ರಚನ್ ಕರ್ಚಿ ಗರ್ಜ್ ಆಸಾ ಮ್ಹಣ್ ಸಮ್ಜತೆಲ್ಯಾಂಚ್ಯಾ ವರ್ಗಾಂತ್ಲೊ ಹೊಯೀ ಎಕ್ಲೊ. ಅಪ್ಲಿ ಮಿನತ್ ಮುಖಾರುನ್ ವ್ಹರಿತ್ ತರ್, ಫುಡಿಲ್ಯಾ ದಿಸಾಂನಿ ಕೊಂಕ್ಣೆಂತ್ಲೊ ಏಕ್ ಬರೊ ಕಾಣ್ಯೆಗಾರ್ ಜಾಂವ್ಚಿಂ ಲಕ್ಶಣಾಂ ಹಾಚ್ಯಾ ಬರ್ಪಾಂನಿ ದಿಸೊನ್ ಯೆತಾತ್.
ಆಂಟನಿ ಬಾರ್ಕುರ್
ಹಾಂವ್ ಜುದಾಸ್, ಜೆಜುಚೊ ದಾಸ್, ಶಿಸ್. ಪುಣ್ ತುಮ್ಚಾ ವಾಂಟ್ಯಾಕ್ ಹಾಂವ್ ಜೆಜುಕ್ ವಿಕ್ರೀತ್ ಕೆಲ್ಲೊಂ, ಪಯ್ಶಾಂಕ್ ಲಬ್ದಾಲ್ಲೊಂ, ಘಾತ್ಕಿ.
ತ್ಯಾಚ್ ವಿಷಯಾಂತ್ ಇಲ್ಲೆಂ ತುಂಮ್ಚೆಲಾಗಿಂ ಉಲವ್ಯಾಂ ಮ್ಹಣ್ ಆಜ್ ಭೊಗ್ತಾ ಮ್ಹಾಕಾ. ಕಿತೆಂ ಜಾವ್ನ್ ಗೆಲಾ ಮ್ಹಜೆಂ ನಾಂವ್? ಜೆಜುಚ್ಯಾ ಕಾಳಾರ್ ಸಾಮಾನ್ಯ್ ಜಾವ್ನ್ ಆಸ್ಲ್ಲೆಂ ಜುದಾಸ್ ಮ್ಹಳ್ಳೆಂ ನಾಂವ್, ಆಜ್ ಫಕತ್ ಘಾತ್ಕ್ಯಾಂಕ್ ಆಪಂವ್ಚಿ ಏಕ್ ಗಾಳ್ ಮಾತ್ರ್. ತುಮ್ಚಾ ನಾಟಕಾಂನಿಂ ದುಷ್ಟ್ ಮನ್ಶ್ಯಾಂಕ್ ದಿಂವ್ಚೆಂ ಬಿರುದ್ ಯಾ ಭುತಾಂತ್ ವೊಲಾಂವ್ಚೆಂ ನಾಂವ್.
ಏಕ್ ಸಾಂಗಾ ಮ್ಹಾಕಾ - ಮ್ಹಜ್ಯಾ ವಿಶ್ಯಾಂತ್ ಕಿತೆಂ ಜಾಣಾಂತ್ ಮ್ಹಣ್ ತುಮಿ ಹೆಂ ಫೈಸಲ್ ದಿಲಾಂ ಮ್ಹಜೆರ್? ಮಾತೆವಾನ್ ಸಾಂಗ್ಲೆಂ ಮ್ಹಣ್, ಜುವಾಂವ್ನ್ ಸಾಂಗ್ಲೆಂ ಮ್ಹಣ್ ಯಾ ಪಾದ್ರಿನ್? ಹ್ಹಂ..... ತಾಂಕಾಂ ದಿಸ್ಲ್ಲ್ಯಾ ಬರಿಂ ತಾಣಿಂ ಸಾಂಗ್ಚೆಂ ಚೂಕ್ ಮ್ಹಣ್ ಹಾಂವ್ ಮ್ಹಣಾನಾ. ಪುಣ್ ತುಮಿ ಅಶೆಂಚ್ ಪಾತ್ಯೆಲ್ಯಾತ್? ತಾಣಿಂ ಬರಯಿಲ್ಲ್ಯಾ ಉತ್ರಾಂಚೊ ನೀಜ್ ಅರ್ಥ್ ಕಿತೆಂಗಾಯ್ ಮ್ಹಣ್ ಏಕ್ ಖಿಣ್ ತರೀ ಚಿಂತ್ಲೆಂ ತುಮಿಂ? ತಾಣಿ ಸಾಂಗ್ಲೆಂ ಆನಿ ತುಮಿ ಆಯ್ಕಾಲೆಂ.
ಜೆಜುಚಾ ಕಾಳಾ ಥಾವ್ನ್ ಆಜ್ ವರೆಕ್ ತರೀ ಕಿತೆಂಚ್ ಬದ್ಲೊಂಕ್ ನಾ. ತ್ಯಾ ಕಾಳಾರ್ ಫಾರಿಜೆವ್ ಲೊಕಾಂಚೆಂ ಚಿಂತಾಪ್ ರುತಾ ಕರ್ತಾಲೆ. ಆತಾಂ ಬೂಕ್, ವಾರ್ಯಾ ವಯ್ಲೊ ಖಬ್ರೊ, ಆಬಾನ್ ಸಾಂಗಲ್ಲೆಂ, ಬಾಪಾಯ್ನ್ ಶಿಕಯಿಲ್ಲೆಂ ಅಶೆಂ. ಎಕಾ ಘಡಿತಾಚಿ ವ್ಯಾಪ್ತ್ ಕಿತ್ಲಿ, ನೀಜ್ ಅರ್ಥ್ ಕಿತೆಂ ಮ್ಹಣ್ ಚಿಂತುಂಕ್ ಕಿತ್ಯಾಕ್ ವಚಾನಾಂತ್ ತುಮಿ?
ತ್ಯಾ ದೆಕುನ್ಂಚ್ ಹಾಂವ್ ಆಜ್ ಉಲಯ್ತಾಂ. ಆಯ್ಕೊಂಕ್ ಕಾನ್ ಆಸ್ಲ್ಯಾರ್ ಆಯ್ಕಾಯಾತ್.
ತಾಚಾಕೀ ಪಯ್ಲೆಂ ತುಮ್ಕಾಂ ಹಾಂವ್ ಕೋಣ್, ಮ್ಹಜಿ ಚರಿತ್ರಾ ಕಶಿ, ಮ್ಹಜ್ಯಾ ಕುಳಿಯೆ ವಿಷ್ಯಾಂತ್ ಇಲ್ಲೆಂ ಸಾಂಗಿಜಾಯ್ ಮ್ಹಣ್ ದಿಸ್ತಾ. ಎಕಾ ವ್ಯಕ್ತಿಕ್ ಜೊಕ್ತಾನಾ ತುಮಿಂಯ್ ತಾಚ್ಯಾ ಕುಟ್ಮಾಚಿ ಖಬಾರ್ ಕಾಡ್ತಾತ್ ನ್ಹಯ್? ತರ್ ಆಯ್ಕಾ.
ಹಾಂವ್ ಇಸ್ಕಾರಿಯೊತ್ ಜುದಾಸ್, "ಸಿಕಾರಿಯಸ್" ಮ್ಹಳ್ಳ್ಯಾ ಪಂಗ್ಡಾಚೊ. ಆಮಿ ರೊಮಾಗಾರಾಂಚ್ಯಾ ಬಂಧಡೆ ಥಾವ್ನ್ ಜುದೆವ್ಗಾರಾಂಕ್ ಸುಟಂವ್ಕ್ ಗುಪ್ತಿಂ ವಾವುರ್ನ್ ಆಸಲ್ಲೆ ಮನಿಸ್. ತುಮಿ ಚಿಂತಾಲ್ಲ್ಯಾ ಬರಿಂ ಥೊಡ್ಯಾ ಪಯ್ಶ್ಯಾಂಕ್ ಆಶೆಲ್ಲೆ ಯಾ ಲೊಕಾಂಕ್ ಲುಟುನ್ ಆಸ್ಲ್ಲೆ ಸುಂಕಾಗಾರ್ ನ್ಹಯ್. ಮ್ಹಜೊ ಬಾಪಯ್ "ಸಿಮಾಂವ್ ಇಸ್ಕಾರಿಯೊತ್" ಲೊಕಾಂಕ್ ಒಳಕ್ ಆಸಲ್ಲೊ ವ್ಯಕ್ತಿ.
ಜೆಜುಚೆ ಚಡಾವತ್ ಶೀಸ್ ಗಾಲಿಲೆಯಾಗಾರ್, ಹಾಂವ್ ಎಕ್ಲೊ ಮಾತ್ರ್ ಜುದೆಯಾಂತ್ಲೊ. ಹಳ್ಳೆಂತ್ಲೊ ನ್ಹಯ್ ಬಗಾರ್ ಎಕಾ ಲ್ಹಾನ್ ಶ್ಹೆರಾಂತ್ಲೊ.
ತಶೆಂಚ್ ಸಾಮರ್ಥೆಂತ್ಯ್ ಹಾಂವ್ ಕಾಂಯ್ ಉಣೆ ನ್ಹಯ್. ವ್ಹಯ್ ಜೆಜುನ್ ಶೀಸ್ ಜಾವ್ನ್ ವಿಂಚಲ್ಲೆ ಚಡ್ತಿಕ್ ಸುಂಕಾಗಾರಾಂಕ್, ಮಾಸ್ಳಿ-ಪಾಗ್ಪ್ಯಾಂಯ್ ಆನಿ ಸಾದ್ಯಾ ಲೊಕಾಂಕ್.
ತಶೆಂ ಜಾವ್ನ್ ತಾಂಚ್ಯಾ ಮಧೆಂ, ಇಲ್ಲೆಂ ವ್ಯಾವಹಾರಿಕ್ ಜ್ಞಾನ್ ಆಸಲ್ಲೆಂ ಮ್ಹಾಕಾ ಮಾತ್ರ್. ಸಹಜ್ ಜಾವ್ನ್ ಆಮ್ಚಿ ಪಯ್ಶಾಂಚಿ ಥೈಲಿ ಸಾಬಾಳ್ಚಿ ಜವಾಬ್ದಾರಿ ಜೆಜುನ್ ಮ್ಹಾಕಾ ದಿಲ್ಲಿ ಮ್ಹಣ್ತಾನಾ, ತುಮಿಂಚ್ ಸಮ್ಜಾಯಾ. ಯಾ ತುಮಿಂ ಹಾಂವ್ ಕಿತೆಂ ಆನಿಂ ಕೊಣ್ ಮ್ಹಣ್ ಜೆಜುಕ್ಚ್ ಕಳಿತ್ ನಾತಲ್ಲೆಂ ಮ್ಹಣ್ತಾತ್? ತಾಣೆ ಮ್ಹಾಕಾ ತಾಚೊ ಶೀಸ್ ಜಾವ್ನ್ ವಿಂಚಲ್ಲ್ಯಾಂತ್ ಕಿತೆಂಚ್ ಉದ್ದೇಶ್ ನಾಂ ಮ್ಹಣ್ತಾತ್?
ತ್ಯಾ ಎಕಾ ದಿಸಾ ವಿಶ್ಯಾಂತ್ ತುಮ್ಕಾಂ ಸಾಂಗಿಜಾಯ್. ಜೆಜುಚೊ ಜೆರುಜಲ್ಯಾಂತ್ ವೈಭವಿಕ್ ಪ್ರವೇಸ್ ಜಾಲ್ಲೊ. ಲೋಕ್ ಸಗ್ಳೊ ಜೆಜುಚ್ಯಾ ಪಾಟ್ಲ್ಯಾನ್ ಆಸಲ್ಲೊ. ಆಮಿ ಸರ್ವಾನಿಂ ಚಿಂತ್ಲ್ಲ್ಯಾ ಬರಿಂ ಜೆಜುನ್ ಆಪ್ಲೆಂ ರಾಜ್ ಸ್ಥಾಪಿತ್ ಕರ್ಚಿ ಘಡಿ ಲಾಗಿಂ ಪಾವ್ಲ್ಲಿ ತಿ ದಿಸ್ತಾಲಿ. ತಿತ್ಲೆಂ ಮಾತ್ರ್ ನ್ಹಯ್ ಆಸ್ತಾಂ ಬೆಥಾನಿಯಾಂತ್ ಜೆಜುಚಿ ತೆಲಾವ್ಣಿಂ ಸಮೇತ್ ಜಾಲ್ಲಿ, ಕಾಜಾರಾಕ್ ತಯಾರ್ ವ್ಹೊರೆತಾಕ್ ಸುಗಂಧ್ ಮಾಖಲ್ಲ್ಯಾ ಬರಿಂ.
ಚಡುಣೆಂ ತ್ಯಾಚ್ ವೆಳಾರ್ ಮ್ಹಜ್ಯಾ ಮತಿಂತ್ ಆಲೊಚನ್ಯೊ ಆರಂಭ್ ಜಾಲ್ಲ್ಯೊ.
ಜೆಜುನ್ಂಚ್ ಸಾಂಗ್ಲ್ಲೆ ನ್ಹಯ್ಗೀ ಆಪ್ಣಾಕ್ ಕಿತೆಂ ಸಕ್ಕಟ್ ಘಡುಂಕ್ ಆಸಾ ಮ್ಹಣ್. ತಶೆಂ ಜಾಲ್ಲ್ಯಾನ್ ಆಮಿ ಸರ್ವ್ ತ್ಯಾ ಘಡಿಯೆಕ್ ರಾಕೊನ್ ಆಸ್ಲ್ಲ್ಯಾಂವ್. ತ್ಯಾ ರಾಜಾಂತ್ ತಾಚೆ ಶೀಸ್ ಜಾವ್ನ್ ಆಸಲ್ಲ್ಯಾ ಆಮ್ಕಾಂ ವಿಶೇಸ್ ಸ್ಥಾನ್ ಫಾವೊ ಜಾತೆಲೆಂ ಮ್ಹಳ್ಳಿ ಖಾತ್ರಿ ಆಮ್ಕಾಂ ಆಸಲ್ಲಿ. ಆನಿ ತಿ ಘಡಿ ವೆಗ್ಗಿಂ ಯೆಂವ್ದಿ ಮ್ಹಳ್ಳಿ ಉರ್ಬಾ ಜಬ್ಬೊರ್ ಜಾಲ್ಲಿ. ಜಾಕೊಬಾ ಆನಿ ಜುವಾಂವ್ಚಾ ಆವಯ್ನ್ ಯೇವ್ನ್ ಜೆಜುಲಾಗಿಂ ತಾಚ್ಯಾ ಸಿಯಾಸಣಾಚಾ ಉಜ್ವ್ಯಾಕ್ ಆನಿಂ ದಾವ್ಯಾಕ್ ಜಾಗೊ ವಿಚಾರಲ್ಲೊ ಉಗ್ಡಾಸ್ ಆಸಾ ತುಮ್ಕಾಂ? ಕಳ್ಳೆಂ ನ್ಹಯ್ಗೀ ಆಮ್ಚಾ ಮಧೆಂ ಕಿತ್ಲೆ ಪಂತ್ ಚಲ್ತಾಲೆ ಮ್ಹಣ್?
ತಶೆಂ ಜೆಜುಚೆಂ ನಾಂವ್ ಲೊಕಾಚಾ ಜಿಬೆರ್ ಖೆಳೊನ್ ಆಸ್ತಾನಾಂಚ್ ಮ್ಹಾಕಾ ಹೆಂ ಚಿಂತಾಪ್ ಆಯಿಲ್ಲೆಂ. ಕಶೆಂಯ್ ಜೆಜು ಹ್ಯಾ ಫಾರಿಜೆವಾಂಕ್ ಆನಿಂ ಶಾಸ್ತ್ರ್ಯಾಂಕ್ ಮುಖಾರ್ ಮುಖಾರ್ಚ್ ತಾಂಚೊ ಚುಕಿ ದಾಕೊವ್ನ್ ದೀವ್ನ್ ಆಸಾ. ತೆಯ್ ತಾಚೆರ್ ರಾಗಾನ್ ಕಡೊನ್ ಆಸಾತ್. ಹ್ಯಾ ವೆಳಾರ್ ತಾಕಾ ಜರ್ ತಾಣಿಂ ಬಂಧಿತ್ ಕೆಲೆಂ, ತರ್ ಲೋಕ್ ಖುಬಾಳ್ತಲೊ. ಕ್ರಾಂತಿ ಜಾತಲಿ. ರೊಮಾಗಾರಾಂ ಥಾವ್ನ್ ಸುಟ್ಕಾ ಜಾತಲಿ.
ಜೆಜುನ್ ಆಮ್ಕಾಂ ಪರತ್ ಪರತ್ ಸಾಂಗೊನ್ ಆಸಲ್ಲೆಂ ದೆವಾಚೆಂ ರಾಜ್ ಜಾರಿ ಜಾಂವ್ಕ್ ಕಸಲೆಂ ತರಿ ವಿಶೇಸ್ ಘಡಿತ್ ಜಾಯ್ಜಾಯ್ ಆಸಲ್ಲೆಂ.
ತೆಂ ನಾಸ್ತಾನಾ ಹಾಚಾಕಿ ಪಯ್ಲೆಂ ಕಿತ್ಲೆಶಾ ಪಾವ್ಟಿಂ ಜೆಜು ತಾಕಾ ಧರುಂಕ್ ಆಯಿಲ್ಲ್ಯಾಂಚಾ ಹಾತಾ ಥಾವ್ನ್ ಚುಕೊನಾ? ತಾಕಾ ಚಡಿತ್ ದಗ್ದೊಂವ್ಚಿ ಶಾತಿ ಆನಿ ಧಯ್ರ್ ಹ್ಯಾ ಭಿಕ್ಣೆಶಿ ಶಾಸ್ತ್ರ್ಯಾಂಕ್ ನಾ ತೆಂ ಮ್ಹಾಕಾ ಕಳಿತ್ ಆಸಲ್ಲೆಂ. ನ್ಹಯ್ ಜಾಲ್ಲೆಂ ತರ್ ತೆ ಜೆಜುಕ್ ದೆವಾಳಾಂತ್ಚ್ ಧರ್ತಾ ಆಸಲ್ಲೆ. ಲೊಕಾಚೆಂ ಭೆಂ ತೆದಾಳಾ ಥಾವ್ನ್ ಆತಾ ಪರ್ಯಾಂತ್ ಕಾರ್ಭಾರ್ಯಾಂಕ್ ಆಸ್ತಾ. (ತೆಂ ಲೊಕಾಕ್ ಕಳಿತ್ ಆಸಾನಾ ತೆಂ ವೆಗ್ಳೆಂ.)
ಅಶೆಂ ಆಸಲ್ಲೆಂ ಮ್ಹಜೆಂ ರಾಜಾಂವ್. ಸಯ್ತಾನಾನ್ ಮ್ಹಜಾ ಮತಿಂತ್ ಹೆಂ ಚಿಂತಾಪ್ ಘಾಲ್ಲೆಂ ಮ್ಹಣ್ ತುಮಿ ಮ್ಹಣ್ತಾತ್ ತರ್ ಮ್ಹಜಿ ಕಾಂಯ್ ಆಡ್ಕಳ್ ನಾ. ಜೆಜುಕ್ ವಿಕ್ರೀತ್ ಕರ್ಚಿ ಕಾಂಯ್ ಬರಿ ಆಲೊಚನ್ ಮ್ಹಣ್ ಹಾಂವ್ ಸಾಂಗಿನಾ. ತೆಂಯ್ ಫಕತ್ ತೀಸ್ ರುಪ್ಯಾ ನಾಣ್ಯಾಂಕ್. ಮ್ಹಾಕಾ ಕಿತೆಂ ಕಳಿತ್ ಮುಕಾರ್ ಕಿತೆಂ ಜಾಂವ್ಕ್ ಆಸಲ್ಲೆಂ ಮ್ಹಣ್? ಫಾರಿಜೆವ್ ಆನಿ ಶಾಸ್ತ್ರಿ ಮಾತ್ರ್ ಹಾಂವೆಂ ತಾಂಚೆ ಕಡೆ ಸೊಲ್ಲೊ ಕರುಂಕ್ ಆಯಿಲ್ಲೆಂ ಪಳೆವ್ನ್ ಭಾರಿಚ್ ಸಂತೊಸ್ಲೆ.
ಹಾಂವೆಂ ಕರ್ಚಾ ಕಾಮಾಕ್ ಪಯ್ಶೆ ಘೆತ್ಲೆ. ಪಯ್ಶೆ ಹಾಂವೆಂ ಘೆತಲ್ಲೆ ಮ್ಹಜೆ ಇರಾದೆ ತಾಂಕಾಂ ಪುರ್ತೆ ಕಳಾನಾಯೆ ಮ್ಹಳ್ಳ್ಯಾ ಇರಾದ್ಯಾನ್ ಯಾ ಪಯ್ಶಾಂಚಾ ಆಶೆನ್ ಯಾ ಆನಿ ಕಿತೆಂ ಕಾರಾಣ್ - ತೆಂ ಹಾಂವೆಂ ಸಾಂಗ್ಲ್ಯಾರ್ ಬರೆಂ ನ್ಹಯ್. ತುಮಿಂ ಜಾಯ್ ತಶೆಂ ಚಿಂತಾ. ಹಾಂವೆಂ ಪಯ್ಶೆ ಘೆತಲ್ಲೆ ಮಾತ್ರ್ ವ್ಹಯ್.
ಹಾಂವೆಂ ಕೆಲ್ಲಿ ತಿಚ್ ವ್ಹಡ್ ಚೂಕ್ ಮ್ಹಣ್ ಭೊಗ್ತಾ ಮ್ಹಾಕಾ - ದೆವಾಚಾ ಪುತಾಕ್ ಫಕತ್ ಎಕಾ ಗುಲಾಮಾಕ್ ಯಾ ಎಕಾ ಬಯ್ಲಾಕ್ ವಿಕ್ಚಾ ಮೊಲಾಕ್ ವಿಕಲ್ಲೆಂ ಬರೆಂ ಕಾಮ್ ಖಂಡಿತ್ ನ್ಹಯ್. ಜರ್ ಹಾಂವೆಂ ಪಯ್ಶೆ ಘೆ ನಾಸ್ತಾನಾ ಜೆಜುಚ್ ತಾಂಚ್ಯಾ ಅಧೀನ್ ಕೆಲ್ಲೆಂ ತರ್ ತುಮ್ಕಾಂ ಮ್ಹಜೆರ್ ಇಲ್ಲಿ ತರೀ ಬರಿ ಅಭಿಪ್ರಾಯ್ ಆಸ್ತಿ. ಪುಣ್ ಕಿತೆಂ ಕರುಂ - ಸಯ್ತಾನಾಂಚಿಂ ಕಾಮಾ ಮ್ಹಣುಂ ಯಾ ಪ್ರವಾದ್ಯಾಂಚೆಂ ಉತರ್ ಪೂರ್ಣ್ ಜಾಂವ್ಕ್ ಆಸಲ್ಲ್ಯಾ ವರ್ವಿಂ ಮ್ಹಣುಂ, ಮ್ಹಾಕಾ ಅಸಲಿ ಬೂದ್ ಆಯಿಲ್ಲಿ.
ಹಾಂವ್ ಪುರ್ತೊ ಹಾಂವ್ ಜಾವ್ನ್ ನಾತ್ಲ್ಲೊಂ ತೆಂ ಮಾತ್ರ್ ಖಂಡಿತ್.
ತೆದಾಳಾ ಉದೆಲ್ಲೊ ಪರ್ಬೆಚೊ ದೀಸ್. ಜೆಜುನ್ ಆಮ್ಕಾಂಯ್ ಸಾಂಗ್ಲ್ಲೆಂ ಜೆವಾಣ್ ತಯಾರ್ ಕರುಂಕ್. ಜೆವ್ಣಾಂತ್ ಆಮಿ ಸಕ್ಕಟ್ ಸಾಂಗಾತಾ ಮೆಳ್ಳ್ಯಾಂವ್ - ಜೆಜುಚಾ ತೊಂಡಾರ್ ವಿಶೇಸ್ ಪ್ರಕಾಸ್. ಉಂಡೊ ಆನಿಂ ವಾಯ್ನ್ ವಾಂಟುನ್ ಜಾತಚ್ ತೊ ಆಪ್ಲ್ಯಾ ಮೊರ್ನಾ ವಿಶ್ಯಾಂತ್ ಪರತ್ ಉಲಂವ್ಕ್ ಲಾಗ್ಲೊ - ಥೊಡಿಂ ಉತ್ರಾಂ ತಿಂ ಮ್ಹಾಕಾಚ್ ಜೊಕಲ್ಲ್ಯಾ ಬರಿಂ.
"ಮ್ಹಾಕಾ ವಿಕ್ರಿತ್ ಕರ್ತಲ್ಯಾಚೊ ಹಾತ್ ಮ್ಹಜ್ಯಾ ವಾಟ್ಲೆಂತ್ ಆಸಾ. ಮನ್ಶಾ ಪೂತ್ ಪವಿತ್ರ್ ಪುಸ್ತಕಿಂ ಬರಯ್ಲಾ ತಶೆಂ ಮೊರೊಂಕ್ ವೆತಾ ತೆಂ ಖರೆಂ. ಪೂಣ್ ಧಿಕ್ಕಾರ್ ತ್ಯಾ ವ್ಯಕ್ತಿಕ್. ತಾಣೆಂ ಜಲ್ಮೊಂಕ್ಚ್ ನಾತ್ಲ್ಲೆಂ ತರ್ ತಾಕಾ ಬರೆಂ ಆಸ್ತೆಂ."
ಪಳೆಯಾ, ತಾಣೆಂ ಮ್ಹಜಿ ಚೂಕ್ ದಾಕವ್ನ್ ದಿಲಿ. ಹಾಂವೆಂ ಕರ್ಚೆಂ ಹೆಂ ಕಾಮ್ ಮ್ಹಾಕಾ ಕಿತ್ಲೆಂ ಮ್ಹಾರೊಗ್ ಪಡ್ತಲೆಂ ತೆಂಯ್ ಸಾಂಗುನ್ ದಿಲೆಂ. ಹಾಂವೆಂ ಕಿತೆಂ ಸಕ್ಕಟ್ ಭೊಗುಂಕ್ ಆಸ್ತಲೆಂ ತೆಂ ತಾಕಾ ಕಳಿತ್ ಆಸಲ್ಲೆಂ. ಪುಣ್ ತಾಣೆ ಮ್ಹಾಕಾ ಆಡಾಂವ್ಕ್ ನಾ. ದೆವಾಚಿ ಖುಶಿ ಆಸಾ ತಶಿ ಜಾರಿ ಕರುಂಕ್ ತೊ ಆಯಿಲ್ಲೊ. ತಶೆಂಚ್ ಕೆಲೆಂ ತಾಣೆಂ.
ಮ್ಹಾಕಾ ತಡ್ವೊನ್ ಘೆಂವ್ಕ್ ಜಾಲೆಂ ನಾ. ಹಾಂವೆಂ ವಿಚಾರ್ಲೆಂ " ತೊ ಹಾಂವ್ ಪುಣೀ ನ್ಹಯ್ಮೂ ಸೊಮ್ಯಾ?".
ತಾಣೆ ದಿಲ್ಲಿ ಜಾಪ್ ತರೀ ಕಸಲಿ - ಕಾಳ್ಜಾಲ್ ತೊಪುನ್ ತೀರ್ ಕರ್ಚಾ ತಸಲಿ -
"ತೆಂ ತುಂಚ್ ಸಾಂಗ್ತಾಯ್".
ಪುಣ್ ತ್ಯಾ ಘಡಿಯೆ ತಿಂ ಉತ್ರಾಂ, ಆಸಲ್ಲಿ ಚೂಕ್ ಆಸಾ ತಶಿ ದಾಕವ್ನ್ ದಿಂವ್ಚಿಂ ಆನಿಂ ಮನ್ ಬದ್ಲುಂಕ್ ಆವ್ಕಾಸ್ ದಿಂವ್ಚಿಂ - ಮ್ಹಜ್ಯಾ ಕಾನಾರ್ ಪಡಲ್ಲಿಂ ತಿಂ ಮ್ಹಜ್ಯಾ ಕಾಳ್ಜಾಕ್ ಕಿತ್ಯಾಕ್ ನಾಟ್ವೊನಾಂತ್ ತೆಂ ತೊಚ್ ಜಾಣಾ.
ತಾಣೆಂಚ್ ಸಾಂಗ್ಲ್ಲ್ಯಾ ಬರಿಂ "ತುಮಿಂ ಆಯ್ಕಾತಾತ್, ತರೀ ತುಮ್ಕಾಂ ಸಮ್ಜೊಚೆಂನಾ". ಪುಣ್ ಪಳೆಯಾ, ತಾಣೆಂ ಮ್ಹಜಿ ಚೂಕ್ ಮ್ಹಾಕಾ ಮಾತ್ರ್ ಕಳ್ಚ್ಯಾ ಬರಿಂ ದಾಕವ್ನ್ ದಿಲಿ, ಸಕ್ಟಾಂ ಮುಕಾರ್ ಸಾಂಗೊನ್ ಮ್ಹಜಿ ಮರ್ಯಾದ್ ಕಾಡುಂಕ್ನಾ.
ಪೂಣ್ ಮ್ಹಾಕಾ ಹೆಂ ತಾಣೆ ತಾಕಾಚ್ ವಿಕ್ರಿತ್ ಕರುಂಕ್ ದಿಲ್ಲಿ ಕಬ್ಲಾತ್ಶಿ ಭೊಗ್ಲ್ಲಿ.
ಜೆವಾಣ್ ಜಾಲೆಂ, ಕೀರ್ತನ್ ಗಾವ್ನ್ ಆಮಿ ಸರ್ವ್ ಒಲಿವೆತ್ ದೊಂಗ್ರಾ ಕುಶಿನ್ ಭಾಯ್ರ್ ಸರ್ಲ್ಯಾಂವ್.
ಜೆಜು ಪರತ್ ಆಮ್ಕಾಂ ಸರ್ವಾಂಕ್ ಜಾಗ್ರುತ್ ಸಾಂಗಾಲಾಗ್ಲೊ. ಪೆದ್ರು ಸಮೇತ್ ಆಮಿ ಸಕ್ಕಟ್ ಬಡಾಯ್ ಉಲಯ್ಲ್ಯಾಂವ್. ತೊ ಕಾಂಯ್ ಮತಿಂತ್ಚ್ ಹಾಸ್ಲೊ ಆಸ್ತಲೊ.
ಪುಣ್ ತಾಚೆಂ ಧಯ್ರ್ ಪಳಯಾ. ಆಪ್ಣಾಕ್ ಕಿತೆಂ ಜಾಂವ್ಕ್ ಆಸಾ ಮ್ಹಣ್ ಕಳಿತ್ ತರೀ ಆಮ್ಕಾಂ ಘೆವ್ನ್ ಗೆತ್ಸೆಮನಿ ಮೊಳ್ಯಾ ಕಡೆಂ ಗೆಲೊ. ಆಮ್ಕಾಂ ಥಂಯ್ಚ್ ಮಾಗೊಂಕ್ ಸಾಂಗುನ್ ತೊ ಆನಿ ಇಲ್ಲೆಂ ಮುಕಾರ್ ಗೆಲೊ.
ಹೊಚ್ ಮ್ಹಾಕಾ ಮೆಳ್ಲ್ಲೊ ಸಂದ್ರಪ್. ಜೆಜು ಎಕ್ಸುರೊ, ತಾಚೆ ಭೊಂವಾರಿ ಲೋಕ್ ನಾ, ರಾತಿಚೊ ವೇಳ್, ಸರ್ವ್ ಮ್ಹಜೆ ಸಾಂಗಾತಿ ಶೀಸ್ ನಿದೆಂತ್ ಪಿಕ್ಲಾತ್, ಪರ್ಬೆಚೊ ದೀಸ್ - ಸರ್ವ್ ತಾಂತಾಂಚ್ಯಾ ಸಂಸಾರಾಂತ್ಚ್ ಮಗ್ನ್.
ಕೆದ್ರೊನ್ ವ್ಹಾಳಾ ಪಲ್ತಡಿಚೊ ಹ್ಯಾ ಜಾಗ್ಯಾಚಿ ಮ್ಹಾಕಾ ಬರಿಚ್ ವೊಳೊಕ್ ಆಸಲ್ಲಿ. ಹಾಂವ್ ಹಳೂ ನಿಸ್ರೊನ್, ಪ್ರಧಾನ್ ಯಾಜಕಾಂ ಲಾಗಿಂ ಗೆಲ್ಲೊಂ. ತಾಣಿಂ ಏಕ್ ವ್ಹಡ್ ಜಮೊ ಎಕ್ಟಾಯ್ ಕರಯ್ಲೊ. ದಿವೆ, ದಾಂಡೆ ಆನಿ ಕೊಯ್ತ್ಯೊ ಘೇವ್ನ್ ಆಮಿ ಜೆಜು ಕಡೆ ಗೆಲ್ಲ್ಯಾಂವ್.
ಮ್ಹಾಕಾ ಮ್ಹಜೆಂ ಕಾಮ್ ಸಂಪಂವ್ಚಿ ಆತುರಾಯ್?.
"ನಮಾನ್ ರಾಬ್ಬಿ" ಮ್ಹಣ್ ಹಾಂವೆಂ ತಾಕಾ ಉಮೊ ದಿಲೊ.
ವ್ಹಯ್ ಉಮೊ, ಜ್ಯಾ ಉಮ್ಯಾ ವರ್ವಿಂ ಜೆಜುಚ್ಯಾ ಕಷ್ಟಾಂಚೊ ಆರಂಭ್ ಜಾಲೊ ತೊ ಉಮೊ, ಜೊ ಉಮೊ ಆಜ್ ಸಯ್ತ್ ಘಾತಾಚಿ ರುಜ್ವಾತ್ಶಿ ಉರೊನ್ ಗೆಲೊ ತೊ ಉಮೊ, ಜೆಜುಕ್ ಮೆಳ್ಲ್ಲೊ ಅಖೇರಿಚೊ ಉಮೊ, ಜುದಾಸಾಚೊ ಉಮೊ.
ತ್ಯಾ ವೆಳಾರ್ ಸಯ್ತ್ ತಾಣೆಂ ಸಾಂಗ್ಲ್ಲಿಂ ಉತ್ರಾಂ -
"ಇಷ್ಟಾ, ಜೆಂ ಕರುಂಕ್ ಆಯ್ಲಾಯ್ ತೆಂ ಕರ್ನ್ ಸೋಡ್".
ಇಷ್ಟಾ ಮ್ಹಣ್ ಆಪಂವ್ಚಾ ತಿತ್ಲಿ ಮೊವಾಳಾಯ್ - ಕೊಣಾಕ್ ಸಾಧ್ಯ್ ಹೆಂ - ಅಸಲ್ಯಾ ಘಡಿಯೆ ಅಸಲಿ ಉತ್ರಾಂ ಉಲಂವ್ಕ್. ತಾಣೆಂ ಮ್ಹಾಕಾ ಭೆಷ್ಟಾಯಿಲ್ಲೆಂ ತರೀ ವ್ಹಡ್ ನಾತ್ಲ್ಲೆಂ.
ಪುಣ್ ಹಾಂವೆಂ ಮುಕಾರ್ ಭೊಗುಂಕ್ ಆಸ್ಚೆಂ ಜಾಣಾ ಆಸೊನ್ಗೀ ಕಿತೆಂಗೀ, ಮ್ಹಜೆಲಾಗಿಂ, ತಾಕಾ ವಿಕಲ್ಲ್ಯಾಲಾಗಿಂ ದಯಾಳಾಯೆನ್ ಉಲಂವ್ಚೆಂ; ತಾಣೆಂ ಸಾಂಗಲ್ಲ್ಯಾಬರಿಂ ತೊ ಚಲ್ಲೊ. ಹಾಂವೆಂ ಕೆಲ್ಲ್ಯಾ ಖೊಟೆಪಣಾಕ್ ತಾಣೆಂ ಮ್ಹಾಕಾ ದಾಕಯಿಲ್ಲೆಂ ಬರೆಪಣ್. ಮ್ಹಜ್ಯಾ ಕಾಳ್ಜಾ ಭಿತರ್ ಕಾಂತಂವ್ಕ್ ಸುರು ಜಾಲ್ಲೆಂ.
ಉಪ್ರಾಂತ್ ಜಾಲ್ಲೆಂ ಮಾತ್ರ್ ಸರ್ವ್ ಮ್ಹಜ್ಯಾ ಅಪೇಕ್ಶೆ ವಿರೋಧ್ಚ್.
ಲೋಕ್, ಜೆ ಥೊಡ್ಯಾಚ್ ದಿಸಾಂ ಪಯ್ಲೆಂ ತಾಕಾ ಗಾಡ್ವಾರ್ ಬಸೊವ್ನ್, ಆಪ್ಲಿಂ ವಸ್ತುರಾಂ ಹಾಂತುಳ್ನ್, ಚುಟ್ಟ್ಯೊ ಹಾತಿಂ ಘೆವುನ್, ನಾಂವಾಡುನ್ ಗಾಯ್ತಲೆ, ತೆಚ್ ಆಜ್ ಖುರ್ಸಾಯ್ ತಾಕಾ ಮ್ಹಣ್ ಬೊಬಾಟ್ತಾಲೆ. ಕಿತೆಂ ಶಿಂತ್ರ್ಯೊ ಖೆಳ್ಳ್ಯೊಗೀ ತ್ಯಾ ಯಾಜಕಾಂನಿಂ ಹಾಂವ್ ನೆಣಾಂ.
ತಾಚ್ಯಾ ಸಾಂಗಾತಾ ಜೆಜು ಸಯ್ತ್ ಚಡಾವತ್ ಮೌನ್ ರಾವ್ಲ್ಲೊ. ತಾಕಾ ಮಾರ್ಲ್ಲೆ ಮಾರ್ ತರೀ ಕಿತ್ಲೆ? ರಾತ್ ಭರ್ - ಆನ್ನಾಸಾ ಥಾವ್ನ್ ಪ್ರಧಾನ್ ಯಾಜಕ್ ಕಾಯ್ಫಾಸ್, ಕಾಯ್ಫಾಸಾ ಥಾವ್ನ್ ಪಿಲಾತ್, ಪಿಲಾತಾ ಥಾವ್ನ್ ಹೆರೊದ್, ಹೆರೊದಿ ಥಾವ್ನ್ ಪರತ್ ಪಿಲಾತ್ - ಬೊಕ್ರ್ಯಾ ಬರಿಂ ಚಲಯ್ಲೆಂ ತಾಕಾ.
ಸಕಾಳ್ ಜಾಂವ್ಚಾ ಭಿತರ್ ಯಾಜಕಾಂನಿಂ ಮೆಳೊನ್ ಜೆಜುನ್ ಜಿವೆಶಿಂ ಮಾರುಂಕ್ ಜಾಯ್ ಮ್ಹಣ್ ನಿರ್ಧಾರ್ ಕೆಲ್ಲೊ. ಮ್ಹಾಕಾ ಕಿತೆಂ ಜಾತೆ ಆಸಾ ಮ್ಹಣ್ ಕಳೊಂಕ್ ಆರಂಭ್ ಜಾಲ್ಲೆಂ.
ಹಾಂವೆಂ ಕೆಲ್ಲ್ಯಾ ಕರ್ತುಬಾಚೊ ಪರಿಣಾಮ್ ಮ್ಹಾಕಾ ದಿಸೊಂಕ್ ಸುರು ಜಾಲ್ಲೊ. ಶಾಸ್ತ್ರಿ ಆನಿ ಯಾಜಕಾಂಚಿ ಘುಟ್ಮಳ್ ಸ್ಪಷ್ಟ್ ಜಾಲ್ಲಿ. ಆತಾಂ ಮ್ಹಜೆರ್ ಆಸಲ್ಲೊ ಸಯ್ತಾನ್ ದೆಂವೊನ್ ಗೆಲ್ಲೊ. ಮ್ಹಜೆಂ ಗಿನ್ಯಾನ್ ಪಾಟಿಂ ಆಯಿಲ್ಲೆಂ.
ಪುಣ್ ವೇಳ್ ಉತ್ರಾಲ್ಲೊ.
ತರೀ ಅಖೇರಿಚೆಂ ಪ್ರಯತನ್ ಮ್ಹಣ್ಚಾಬರಿಂ ಹಾಂವ್ ತಾಂಚೆ ಲಾಗಿಂ ಪಾಟಿಂ ಗೆಲೊಂ. ಮ್ಹಜೆ ಪಯ್ಶೆ ಪಾಟಿಂ ದಿಲೆ ತಾಂಕಾಂ.
"ನಿರಾಪ್ರಾಧಿ ರಗತ್ ಹಾಂವೆಂ ವಿಕ್ರಿತ್ ಕೆಲೆಂ" ಮ್ಹಳ್ಳೆಂ ಹಾಂವೆಂ "ಹಾಂವೆಂ ಪಾಪ್ ಕೆಲೆಂ".
ಪುಣ್ ಮ್ಹಜೆಂ ರುದಾನ್ ತಾಂಚೆಂ ಧಾರುಣ್ ಕಾಳಿಜ್ ಮೊವಾಳುಂಕ್ ಸಕ್ಲೆನಾಂ. ಪುಣ್ ತಾಣಿ ತೆ ಪಯ್ಶೆ ಘೇಂವ್ಕ್ ನೆಗಾರ್ ಕೆಲೆ.
"ತುಜಿ ಜವಾಬ್ದಾರಿ ತಿ. ಆಮ್ಕಾಂ ತೆಂ ಪಡೋನ್ ವಚೊಂಕ್ ನಾ".
ವ್ಹಯ್ ಮ್ಹಜಿಚ್ ಚೂಕ್. ತ್ಯಾ ಚುಕಿಚಿ ಜವಾಬ್ದಾರಿ ಮ್ಹಜಿ. ಪುಣ್ ಕಿತೆಂಚ್ ಕರ್ಚಾ ಸ್ಠಿತೆರ್ ಹಾಂವ್ ನಾಂತ್ಲ್ಲೊಂ. ಜೆಜು ಪಿಲಾತಾಚಾ ರಾಜಾಗ್ಣಾಂತ್ ಆಸಲ್ಲೊ ಆನಿಂ ತಾಚೆಂ ಮೋಲ್ಶೆಂ ಆಸಲ್ಲೆ ಪಯ್ಶೆ, ತೀಸ್ ರುಪ್ಯಾಚಿಂ ನಾಣಿಂ, ಮ್ಹಜ್ಯಾ ಹಾತಿಂತ್ ಆಸಲ್ಲಿಂ. ಮ್ಹಾಕಾ ಹೆಡಾಯ್ತಾಲಿಂ. ಸಗ್ಳೊಚ್ ದೆಧೆಸ್ಪಾರ್ ಜಾಲ್ಲೊ ಹಾಂವ್.
ಹಾಂವೆಂ ತೆ ಪಯ್ಶೆ ಕಾಡ್ನ್ ದೆವಾಳಾಂತ್ ಉಡಯ್ಲೆ.
ಫಕತ್ ಪಯ್ಶಾಂ ಖಾತಿರ್ ಜೆಜುಕ್ ಹಾಂವೆಂ ವಿಕ್ಲೆಂ ಕೆಲೆಂ ಮ್ಹಣ್ ಚಿಂತೆಲ್ಯಾನೊಂ, ಪಳೆಯಾ. ಪಯ್ಶಾಂಚಾ ಆಶೆಲ್ಲೊ ಮನಿಸ್ ಪಯ್ಶೆ ಉಡಯ್ನಾ.
ಥಂಯ್ ಥಾವ್ನ್ ಚಲ್ಲೊಂ ಹಾಂವ್. ಮ್ಹಜಿಂ ಯೋಜನಾಂ ಫುಟಲ್ಲಿಂ. ಗುಲಾಮಾಂಚಾ ಮೊಲಾಕ್ ಹಾಂವೆಂ ಸೊಮ್ಯಾಕ್ ವಿಕ್ಲ್ಲೆಂ. ಮ್ಹಜೆಂ ಅಂತಸ್ಕರ್ನ್ ಮ್ಹಾಕಾ ಥುಕ್ತಾಲೆಂ.
ಹ್ಯಾ ವೆಳಾರ್ ಮ್ಹಾಕಾ ಧಯ್ರ್ ದೀಂವ್ಕ್ ಸಗ್ಳ್ಯಾ ಸಂಸಾರಾಂತ್ ಕಿತೆಂಚ್ ನಾತ್ಲ್ಲೆಂ. ಮ್ಹಜೆ ಸಾಂಗಾತಿ ಸರ್ವ್ ಧುಸ್ಪಾಟುನ್ ಗೆಲ್ಲೆ. ಆಸಲ್ಲೆ ತರೀ ಮ್ಹಾಕಾ ಕೋಣ್ ಲಾಗಿಂ ಘೆತೊ? ಪೆದ್ರು ಎಕ್ಲೊ ದೆವಾಳಾ ಭಾಯ್ರ್ ರಾವೊನ್ ದುಃಖಾಂ ಗಳಯ್ತಾಲೊ. ಸರ್ವ್ ಜೆಜುನ್ ಸಾಂಗ್ಲ್ಲ್ಯಾ ಬರಿಂಚ್ ಘಡೊನ್ ಯೆತೆ ಆಸ್ಲ್ಲೆಂ.
ಮ್ಹಾಕಾ ಖಂಯ್ ಥಾವ್ನ್ಯೀ ಸಸಾಯ್ ಯಾ ಆಧಾರ್ ಮೆಳ್ಚಿ ನಿಶಾನಿ ನಾತ್ಲ್ಲಿ. ಪಶ್ಚಾತ್ತಾಪಾಚಿ ಸುರಿ ಮ್ಹಜೆಂ ಕಾಳಿಜ್ ಭೆಸಾಂ ಕರಿತ್ ಆಸಲ್ಲಿ. ಕೆಲ್ಲ್ಯಾ ಕರ್ತುಬಾಚೆಂ ಪ್ರಾಚಿತ್ ಕರ್ಚೆಂ ಗರ್ಜ್ ಆಸಲ್ಲೆಂ. ತರೀ ಮ್ಹಾಕಾ ವಾಟ್ ದಾಕಯ್ತ್ ಜಾಲ್ಲೊ ಸೊಮಿ, ಮರ್ಣಾಕ್ ಖಾಲ್ ಜಾವ್ನ್ ದೆವಾಚಿ ಖುಶಿ ಕರುಂಕ್ ರಾಕೊನ್ ಆಸ್ಲ್ಲೊ.
ಮ್ಹಾಕಾ ನಿಜಾಯ್ಕೀ ಭೊಗ್ಲೆಂ "ಧಿಕ್ಕಾರ್ ಮ್ಹಾಕಾ. ಹಾಂವೆಂ ಜಲ್ಮೊಂಕ್ಚ್ ನಾತ್ಲ್ಲೆಂ ತರ್ ಕಿತ್ಲೆ ಬರೆಂ ಆಸ್ತೆಂ".
ವ್ಹಯ್ ಜಲ್ಮೊಂಕ್ಚ್ ನಾತ್ಲ್ಲೆಂ ತರ್...?
ತರ್.....?
ತರ್....?
ಮೆಲ್ಯಾರ್ ಕಶೆಂ?
ಹಾಂವೆಂ ಫಾಶಿ ಘೆತ್ಲಿ.
ದೆವಾಳಾಂತ್ ಉಡಯಿಲ್ಲ್ಯಾ ಮ್ಹಜ್ಯಾ ಪಯ್ಶಾನಿಂ ತಾಣಿಂ ಏಕ್ ಗಾದೊ ಘೆತ್ಲೊ. ತಾಕಾ ತಾಣಿಂ "ರಗ್ತಾಚೊ ಗಾದೊ" ಮ್ಹಣ್ ನಾಂವ್ ದಿಲ್ಲೆಂ. ತಾಂತು ಪರ್ಗಾವ್ಯಾಂಕ್ ಪುರುಂಕ್ ವ್ಯವಸ್ಥಾ ಕೆಲಿ. ಪಯ್ಶೆ ಅಶೆ ಎಕಾ ಬರ್ಯಾ ಕಾಮಾಕ್ ಉಪ್ಕಾರಾಕ್ ಪಡ್ಲೆ ಮ್ಹಣ್ಚೆಂ ಎಕ್ಚ್ ಸಮಾಧಾನ್ ಮ್ಹಾಕಾ. ಪುಣ್ ಕೊಣ್ ಹೆಂ ಚಿಂತಿತ್?
ಕೋಣ್, ಹಾಂವ್ ಕಿತ್ಲೊ ಪಶ್ಚಾತ್ತಾಪ್ ಪಾವ್ಲೊಂ, ಕಿತ್ಲೊಂ ಹಾಂವ್ ದೆಧೆಸ್ಪ್ಪರ್ ಜಾಲೊ, ಕಿತ್ಲೊ ಕಷ್ಟಾಂಲೊಂ ಮ್ಹಣ್ ಚಿಂತಿತ್. ಕೋಣ್?
ಹಾಂವೆಂ ಕೆಲ್ಲ್ಯಾ ಕರ್ತುಬಾನಿಂ ಮ್ಹಾಕಾ ಮರಣ್ ಮೆಳ್ಳೆಂ. ವ್ಹಯ್. ಪುಣ್ ತುಮ್ಕಾಂ ಸಾಸ್ಣಾಚೆಂ ಜಿವಿತ್ ಮೆಳ್ಳೆಂಮೂ? ಹ್ಯಾ ಪಾಸತ್ ಪುಣೀ ಮ್ಹಜೆರ್ ಇಲ್ಲಿ ದಯಾ ತುಮ್ಕಾ ಯೇನಾ?
ಕ್ಷಣಿಕ್ ಭುಲವ್ಣ್ಯಾಂಕ್ ಕಿತ್ಲೆ ಪಾವ್ಟಿಂ ತುಮಿ ಪಡೊನಾಂತ್? ಉಪ್ರಾಂತ್ ಉಟ್ತಾತ್, ಸೊಮ್ಯಾ ಕಡೆ ಭೊಗ್ಸಾಣೆ ಮಾಗ್ತಾತ್ ಆನಿ ಸಾಲ್ವಾರ್ ಜಾತಾತ್. ತರ್ ಮ್ಹಜ್ಯಾ ಪ್ರಾಚಿತಾಕ್ ಕಿತೆಂತ್ ಮೋಲ್ ನಾ?
ಮ್ಹಾಕಾ ಭೊಗ್ಸಾಣೆಂ ನಾ?
ಮ್ಹಾಕಾ ಸೊಮ್ಯಾಚೆಂ ಪಾಶಾಂವ್ ಆರಂಭ್ ಜಾಂವ್ಕ್ ಏಕ್ ಹಾತೆರ್-ಶೆಂ ಮೆತೆರ್ ಜಾಲ್ಲ್ಯಾ ಮ್ಹಾಕಾ ಸೊಮ್ಯಾಚ್ಯಾ ಸನ್ನಿಧಾನಾಂತ್ ಕುರ್ಪಾ ಲಾಭಾನಾ?
ದೇವ್ ತುಮ್ಕಾಂ ಏಕ್ ನ್ಯಾಯ್, ಮ್ಹಾಕಾ ಏಕ್ ನ್ಯಾಯ್ ಕರೀತ್?
ಫಕತ್ ತುಮಿ ತಾಚೆ ಮ್ಹಳ್ಳ್ಯಾ ಖಾತಿರ್ ಆನಿಂ ಹಾಂವೆಂ ತುಮ್ಚಾ ಸೊಮ್ಯಾಕ್ ವಿಕ್ಲೆಂ ಮ್ಹಳ್ಳ್ಯಾ ಎಕ್ಚ್ ಕಾರಣಾಕ್ ಮ್ಹಾಕಾ ತುಮಿ ದ್ವೇಶಿತಾತ್? ತಾಣೆಂಚ್ ಮ್ಹಾಕಾ ದ್ವೆಷುಂಕ್ ನಾ ಬಗಾರ್ ತಾಣೆಂ ಮ್ಹಾಕಾಯ್ ಉಂಡೊ ಆನಿಂ ವಾಯ್ನ್ ದಿಲೊ, ಸಾಂಗಾತಾ ಜೆವ್ಲೊ, ಇಷ್ಟಾ ಮ್ಹಣಾಲೊ. ತರ್ ತುಮಿ ಮಾತ್ರ್ ಕಿತ್ಯಾಕ್ ಮ್ಹಾಕಾ ಅಶೆಂ ಪಳಯ್ತಾತ್?
ಹಾಂವ್ ತುಮ್ಚೆ ಲಾಗಿ ಉಲಂವ್ಕ್ ಬಸಲ್ಲೊಂ, ತುಮಿ ಮ್ಹಾಕಾ ಹೊಗ್ಳಿಕ್ ದೀಜಾಯ್ ಮ್ಹಣ್ ನ್ಹಯ್. ಬಗಾರ್ ಮ್ಹಾಕಾ "ಘಾತ್ಕಿ" ಮ್ಹಣ್ ವೊಲಾವ್ನ್, ಶೆಕಿಂ ವಿಸ್ರೊನ್ ಸೊಡ್ಚಾ ಬದ್ಲಾಕ್ ಮ್ಹಜ್ಯಾ ಜಿಣ್ಯೆ ಥಾವ್ನ್ ಇಲ್ಲೆಂ ತರೀ ಲಿಸಾಂವ್ ಶಿಕಾ ಮ್ಹಣ್ ಸಾಂಗುಂಕ್.
ಮ್ಹಜೊಚ್ ಜೀವ್ ಹೊಗ್ಡಾವ್ನ್ ಹಾಂವೆಂ ಆಪೊಸ್ತಲಾಚೆಂ ಸ್ಥಾನ್ ಹೊಗ್ಡಾಯ್ಲೆಂ, ಲಾಂಬ್ ಪ್ರಾಚಿತ್ ಕರ್ನ್ ಮ್ಹಜ್ಯಾ ಚುಕಿಕ್ ದೆವೆಂ ಫಾರಿಕ್ ಕರ್ಚೊ ಆವ್ಕಾಸ್ ಹೊಗ್ಡಾಯ್ಲೊ.
ಪೆದ್ರುನ್ಂಚ್ ಏಕ್ ಪಾವ್ಟಿಂ ಸಾಂಗ್ಲ್ಲ್ಯಾಬರಿಂ ಮ್ಹಾಕಾ ಜೆಜುಚ್ಯಾ ಮಣಿಯಾರ್ಪಣಾಂತ್ ವಿಶೇಸ್ ವಾಂಟೊ ಮೆಳಲ್ಲೊ - ಸಂಸಾಂರಾಂತ್ ಮಾಥ್ಥಿಯಾಸ್ ಸಮೇತ್ ಫಕತ್ ತೆರಾ ಜಣಾಂಕ್ ಲಾಭ್ಲ್ಲೆಂ ಭಾಗ್. ಇತ್ಲಿ ಶಿಕೊವ್ಣ್ ಸರ್ವ್ ಎಕಾ ಖಿಣಾಚಾ ಖೊಟ್ಯಾ ಚಿಂತ್ಪಾ ವರ್ವಿಂ ಕಿತೆಂಚ್ ಉಪ್ಕಾರಾಕ್ ಪಡಾನಾಸ್ತಾನಾ ಗೆಲಿ.
ಹೆಂ ಜಾಯ್ಜಾಯ್ ತುಮ್ಕಾಂ ಏಕ್ ಜಾಗ್ರುತ್ ಕರ್ಚೆಂ ಘಡಿತ್.
ದೆಕುನ್ ಮ್ಹಾಕಾ ದ್ವೇಷಿನಾಕಾತ್ ಬಗಾರ್ ಸಯ್ತಾನಾಚ್ಯಾ ಶಿಂತ್ರೆಕ್ ಶಿರ್ಕಾಲ್ಲ್ಯಾ ಮ್ಹಜ್ಯಾ ಅಸ್ಕತ್ ಸಂಯ್ಬಾಚೆರ್ ಬಿರ್ಮತ್ ಪಾವಾ. ಸೊಮ್ಯಾಚಿ ಕುರ್ಪಾ, ತ್ಯಾ ಖುರ್ಸಾವಯ್ಲ್ಯಾ ಚೊರಾಕ್ ಲಾಭ್ಲ್ಲ್ಯಾಬರಿಂ ಮ್ಹಾಕಾಯ್ ಲಾಭೊಂದಿ ಮ್ಹಾಣ್ ಹರ್ಸಿಯಾ.
ತುಮಿ ಮಾಗ್ತಾನಾ ಮ್ಹಜೊ ಉಗ್ಡಾಸ್ ದವರಾ.
********
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
