ಬಾಪಾಚೆಂ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

’ಕಾಣಿಂ ಎಕಾ ವಾಚ್ಪ್ಯಾಕ್ ಸ್ವಪ್ಣಾಂಚಾ ಸಾಗೊರಾಲಾಗಿಂ ಪಾವಂವ್ಕ್ ಸಕ್ತಾ ತರ್ ಕವಿತಾ ತಾಂತುಂ ಉಪ್ಯೆಂವ್ಚೊ ಅನ್ಭೋಗ್ ದಿತಾ’

ಕವಿತಾಪಾಠ್ - 11

ಲಿಸಾಂವ್ -11. ಬಾಪಾಚೆಂ ಘರ್!

ಕವಿತಾ - ಬಾಪಾಚೆಂ ಘರ್

ಕವಿ: ರೋಬರ್ಟ್ ಫೆರ್ನಾಂಡಿಸ್

ಬೂಕ್: ಮೊತಿಯಾಂ ಆನಿ ತಾರಾಂ

ಪ್ರಕಾಶಕ್: ಆಶಾವಾದಿ ಪ್ರಕಾಶನ್

ಪಾಠ್ ಚಲವ್ಪಿ: ಜೊಮೆಲ್ ಬೊಂದೆಲ್

ತಾರಿಕ್: 13 ಜನೆರ್ 2006

ಜಾಗೊ: ಸಾಲ್ಮಿಯಾ, ಕುವೇಯ್ಟ್

ನತಾಲಾಂ ವೆಳಾರ್ ಜಮ್ಲೆಲ್ಯಾ
ಮೊಗಾಳ್ ಪರ್ಜೆಕ್ ಪಳೆಂವ್ಕ್ ಆಪ್ಲ್ಯಾ
ಸಂತೊಸಾನ್ ಸೊಮಿ ಜೆಜು
ದೆವಾಳಾ ಅಂಗ್ಣಾಂಕ್ ರಿಗ್ಲೊ
ಗೇಟಿ ಭಿತರ್ ಪಾಂಯ್ ತೆಂಕ್ತಚ್ಚ್
ಖೆಟ್ ಶಿಂದುನ್ ಮುಖಾರ್ ಸರ್ತಚ್ಚ್
ದೊಳ್ಯಾಂ ಮುಕ್ಲೆಂ ದೃಶ್ಯ್ ದೆಕೊನ್
ವಿಜ್ಮಿತ್ ಜಾಲೊ ಸಗ್ಳೊ
    ಏಕಾ ಕುಶಿನ್ ದಾಳ್ನ್ ದವರ್ಲ್ಯಾಂತ್
    ನೆಕೆತ್ರಾಂ ಕ್ಯಾಲೆಂಡ್ರಾಂ
    ಅನ್ಯೇಕಾ ಕುಶಿನ್ ಭರಾನ್ ವಿಕ್ತಾತ್
    ಕ್ರಿಸ್ಮಸ್ ನ್ಯೂಇಯರ್ ಕಾರ್ಡಾಂ
    ಬಗ್ಲೆಕ್ ಎಕ್ಲೊ ಘೆವುನ್ ಬಸ್ಲಾ
    ಲಕ್ಕಿಡಿಪ್ಪ್ ಲೊಟ್ರ್ಯೊ ಥಂಯ್ಚ್

    ದೆಗೆನ್ ಮೊಲಾಕ್ ಮೆಳ್ತಾತ್
    ಟೀ ಶರ್ಟಾಂ, ರಜಿಸ್ತ್ರ್ಯೊ
ಸಾಕ್ರಿಸ್ತಿಂತ್ ಲಾಯ್ನ್ ಲಾಗ್ಲ್ಯಾ
ಬರವ್ನ್ ಆಸಾತ್ ಮಿಸಾಂ
ಕ್ಯಾಂಟಿನಾಂತ್ ಖೆಟ್ ಘೆಂವ್ಚಾಕ್
ಪಿಜ್ಜಾ ಆನಿಂ ಪ್ಯಾಟ್ಟಿಸಾಂ
ಗ್ರೊಟ್ಟ್ಯಾಲಾಗಿಂ ಬಾವ್ಡೊ ಮಿರೊಣ್
ಬಸ್ಲಾ ವಿಕುಂಕ್ ವಾತಿ
ಎಕ್ಲೊ ಮ್ಹಣ್ತಾ ಘೆಯಾತ್ ಕೊಂಕ್ಣಿ
ಪದಾಂ ಹಾಸ್ತಿಂ ಉಡ್ತಿಂ
    ಚಾರಿಟಿ ಬಜಾರಾಂತ್ ರುಚಿಕ್
    ಸರ್ಪಾತೆಲ್ ಸನ್ನಾಂ
    ರೂಚ್ ಹಾಚಿ ಜಾಣಾಸ್ಲ್ಯಾಂಕ್
    ಹೆಂ ದೆವಾನ್ ದಿಲ್ಲೆಂ ಮಾನ್ನಾ
    ಕಾರಿಜ್ಮಾತಿಕ್ ಭಾವ್ ವಿಕ್ತಾತ್
    ಕೊಂತಾಂ ಖುರಿಸ್ ಸಬಾರ್
    ಕುಸ್ವಾರ್ ತರೀ ಘೆವ್ನ್ ಬಸ್ತಿಂ
    ಘಡ್ಯೆನ್ ಜಾತ್ತೊ ಕಾಬಾರ್
ಬಾಪಾಚೆಂ ಘರ್ ಯಾ ಬಾಜಾರ್?
ಪಳೆವ್ನ್ ಜೆಜು ಚುರ್ಚುರ್ಲೊ
ಸಾರ್ಣಿ ಕುಂಟೊ ಹಾತಿಂ ಘೆವ್ನ್
ಎಕೆಕ್ಲ್ಯಾಕ್ ಧಾಂವ್ಡಾಂವ್ಕ್ ಧರಿಲಾಗ್ಲೊ
ದೆಖ್ತಾಂ ದೆಖ್ತಾಂ ಪಡ್ಲೆಚ್
ಥೊಡ್ಯಾಂ ಪಾಟಿರ್ ಮಾರ್
ಕವಿತಾ ಬೂಕ್ ವಿಕುಂಕ್ ಬಸ್‌ಲ್ಲ್ಯಾ
ಮ್ಹಜೆರ್‌ಯ್ ಪಡ್ಲೆ ಚಾರ್
    ಧನ್ಯ್ ಜಾಲಾಂ ಆಜ್ ಹಾಂವ್
    ಮಾರ್ ಖಾವ್ನ್ ಜೆಜು ಹಾತಿಂ
    ಮನ್ಶಾ ಕೂಡ್‌ಯೀ ಪವಿತ್ರ್ ತೇಂಪ್ಲ್
    ತೆಂ ಸತ್ ಆಠಾಯ್ತಾಂ ಮತಿಂ
    ಉಣ್ಯಾಪಣಾಂಕ್ ವಳ್ಕಾತಾಂ
    ಕರ್ನ್ಯಾಂಕ್ ಮ್ಹಜ್ಯಾ ಲಜ್ತಾಂ
    ವ್ಯಾರ್‌ಯ್ ಪುರೊ ಮಾರ್‌ಯ್ ಪುರೊ
    ಮೆಟಾಂ ಮ್ಹಜಿಂ ಮೆಜ್ತಾಂ

ಕವಿಚಿ ವ್ಹಳೊಕ್:

ರೋಬರ್ಟ್ ಫೆರ್ನಾಂಡಿಸ್ ಉದ್ಯಾವರ್ ಕೊಂಕ್ಣೆಂತ್ ಆಯ್ಲೆವಾರ್ ಉದೆವ್ನ್ ಆಯಿಲ್ಲೊ ಏಕ್ ಭರ್‍ವಶ್ಯಾಚೊ ಕವಿ. ಚಿಂತ್ಪಾಂತ್ ಗುಂಡಾಯ್, ತಶೆಂಚ್ ವಿಸ್ತಾರಾಯ್ ಆಸ್ಚಾ ಹಾಣೆಂ ಬರಯಿಲ್ಲಿಂ ಕವಿತಾ ಥೊಡಿಂಚ್ ತರ್‌ಯ್ ಬರಿಂ ಕವಿತಾ ಬರಂವ್ಚಿ ಶ್ಯಾಥಿ ಹಾಕಾ ಆಸಾ ಮ್ಹಣ್ ಎದೊಳ್‌ಚ್ ರುಜು ಕೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ಪಯ್ಲೆಂ ಇನಾಮ್ ಜೊಡ್‌ಲ್ಲ್ಯಾ ಹಾಚಿಂ ಪಾಂಚ್ ಕವಿತಾ ’ಮೊತಿಯಾಂ ಆನಿ ತಾರಾಂ’ ಬುಕಾಂತ್ ಪರ್ಗಟ್ಲ್ಯಾಂತ್.

(ದಾವ್ಯಾ ಥಾವ್ನ್ ಉಜ್ವ್ಯಾಕ್) ವಲ್ಲಿ ಕ್ವಾಡ್ರಸ್, ಸಿರಿಲ್ ಪೆರಿಸ್, ಮದಿಯಲಿಗನ್, ಸಹಾಯ್‌ಕುಮಾರ್, ಜೊಮೆಲ್ ಬೊಂದೆಲ್

[ಕುವೆಯ್ಟಾಂತ್ ಆಯಿಲ್ಲ್ಯಾ ಅಪ್ರೂಪ್ ಪಾವ್ಸಾನಿಮ್ತಿಂ ಹೆರ್ ಥೊಡ್ಯಾಂಕ್ ಕಾಮಾಸಾಳಾಕ್ ಯೇಂವ್ಕ್ ಸಾಧ್ಯ್ ಜಾಂವ್ಕ್ ನಾ.]

ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್

ಕವಿತಾಪಾಠ್ - 10. ದೇವ್ ಎಕ್ಸುರೊ (ವಲ್ಲಿ ವಗ್ಗ)

ಕವಿತಾಪಾಠ್ - 09. ಭಿತರ್ಲೆಂ ತುಫಾನ್ (ಜೆ.ಬಿ.ಮೊರಾಯಸ್)

ಕವಿತಾಪಾಠ್ - 08 . ದರ್‍ಯಾಕ್ ಉಜೊ ಪೆಟ್ಲಾ (ಚಾ.ಫ್ರಾ.ದೆ’ಕೋಸ್ತಾ)

ಕವಿತಾಪಾಠ್ - 07. ಮನಿಸ್ ಮಣ್ಜೆ ಕಿತೆಂ (ಲುವಿಸ್ ಮಸ್ಕಾರೇಞ್)

ಕವಿತಾಪಾಠ್ - 06 . ಮ್ಹಜೊ ದಿವೊ (ಮಾವ್ರಿಸ್ ಶಾಂತಿಪುರ್)

ಕವಿತಾಪಾಠ್ - 05 . ಬಾಂಯ್  (ಆಂಡ್ರು ಎಲ್. ಡಿ’ಕುನ್ಹಾ)

ಕವಿತಾಪಾಠ್ - 04 . ಆಜ್ (ವಲ್ಲಿ ಕ್ವಾಡ್ರಸ್)

ಕವಿತಾಪಾಠ್ - 03 . ಸಲ್ವಣಿ (ಫ್ರೆಡ್ ಕುಮಾರ್)

ಕವಿತಾಪಾಠ್ - 02 . ಕಯ್ದ್ಯಾಚಿ ಕವಿತಾ (ಎಚ್ಚೆಮ್)

ಕವಿತಾಪಾಠ್ - 01 . ವಾಟ್ (ಮೆಲ್ವಿನ್ ರೊಡ್ರಿಗಸ್)

ಸಂಸಾರಿ ’ಬಾಜಾರಿ’ ವೆವಸ್ತೆಚೆರ್ ಅರ್ಸೊ ಧರ್ಚಿ ಕವಿತಾ [ - ವಲ್ಲಿ ಕ್ವಾಡ್ರಸ್]

ಆಯ್ಲೆವಾರ್ ಕೊಂಕ್ಣೆಂತ್ ಉದೆಲ್ಲ್ಯಾ ಥೊಡ್ಯಾಂ ಭರ್‍ವಶ್ಯಾಚಾ ಕವಿಂಚಾ ಮೆಳಿಂತ್ ಮುಖಾರ್ ಆಸ್ಚೊ ರೊಬರ್ಟ್ ಫೆರ್ನಾಂಡಿಸಾಕ್ ಹಾಂವೆಂ ವಳ್ಕಾಲ್ಲೆಪರಿಂ, ತಾಚೆಂ ಚಿಂತಾಪ್ ವಿಸ್ತಾರ್ ಜಾವ್ನಾಸಾ, ತಾಚೊ ಖಾಲ್ತೊ ಜಿನೊಸ್, ಸಾದೆಂ ಉಲವ್ಣೆಂ ತರ್‌ಯ್ ಅಪುರ್ಭಾಯೆಚೆಂ ಚಿಂತಾಪ್ ವ್ಹಾಳಂವ್ಚಿ ಶ್ಯಾಥಿ ತಾಕಾ ಆಸಾ. ಆಯ್ಲೆವಾರ್ ಪರ್ಗಟ್ ಜಾಲ್ಲ್ಯಾ ’ಮೊತಿಯಾಂ ಆನಿ ತಾರಾಂ’ ಬುಕಾಂಕ್ ತಾಚಾ ಸ ಕವಿತಾಂ ಪಯ್ಕಿ ಏಕ್ ಕವಿತಾ ವಿಂಚುಂಕ್ ಮ್ಹಾಕಾಚ್ ತ್ರಾಸ್ ಭೊಗ್ಲೆ. ತ್ಯಾ ಸ ಕವಿತಾಂ ಪಯ್ಕಿ ಹೆಂ ಕವಿತಾ ಶ್ರೇಷ್ಟ್ ಮ್ಹಣೊನ್ ಹೆಂ ವಿಂಚ್ಲಾಂ ಬಿಲ್ಕುಲ್ ನ್ಹಯ್. ಹೆಂ ಕವಿತಾ ಪ್ರಸ್ತುತ್ ಮಾತ್ರ್ ನ್ಹಯ್ ಹಾಂತುಂ ಆಸ್ಚೆಂ ಸತ್ ಪ್ರಸ್ತುತ್ ಕಾಳಾಂತ್ ಪಳೆಲೆಂ ತರ್ ಭೋವ್ಶಾ ಆಮ್ಚಾ ಮತಿಕ್‌ಯ್ ತೆಂ ಸತ್ ಮ್ಹಣ್ ದಿಸೊಂಕ್ ಪುರೊ. 

’ಬಾಪಾಚೆಂ ಘರ್’ ಕವಿತಾ ವಾಂಜೆಲಾಂತ್ ಜೆಜುನ್ ದೆವಾಳ್ ಶುದ್ದ್ ಕೆಲ್ಲಿ ಕಾಣಿ ಸಾಂಗ್ಚೆಪರಿಂ ಭೊಗ್ತಾ ತರ್‌ಯ್ ಹೆಂ ಕವಿತಾ ತಿತ್ಲೆಂಚ್ ನ್ಹಯ್, ದುಸ್ರೆಂಯ್ ಸಾಂಗ್ತಾ. ಆತಾಂ ಹ್ಯಾ ಕವಿತಾಚೆಂ ಅಧ್ಯಯನ್ ಕರ್ಚಾಧಿಂ ಹೆಂ ಎಕಾಚ್ ತಾಳ್ಯಾಂತ್ ವಾಚುನ್ ಸಾಂಗ್ಚೆಂ ತರ್;

           ನತ್ಲಾಂ ವೆಳಾರ್ ಜಮ್ಲೆಲ್ಯಾ
           ಮೊಗಾಳ್ ಪರ್ಜೆಕ್ ಪಳೆಂವ್ಕ್ ಆಪ್ಲ್ಯಾ
           ಸಂತೊಸಾನ್ ಸೊಮಿ ಜೆಜು
           ದೆವಾಳಾ ಅಂಗ್ಣಾಂಕ್ ರಿಗ್ಲೊ
           ಗೇಟಿ ಭಿತರ್ ಪಾಂಯ್ ತೆಂಕ್ತಚ್
           ಖೆಟ್ ಶಿಂದುನ್ ಮುಖಾರ್ ಸರ್ತಚ್
           ದೊಳ್ಯಾಂ ಮುಕ್ಲೆಂ ದೃಶ್ಯ್ ದೆಕೊನ್
           ವಿಜ್ಮಿತ್ ಜಾಲೊ ಸಗ್ಳೊ
                      ಏಕಾ ಕುಶಿನ್ ದಾಳ್ನ್ ದವರ್ಲ್ಯಾಂತ್
                      ನೆಕೆತ್ರಾಂ ಕ್ಯಾಲೆಂಡ್ರಾಂ
                      ಅನ್ಯೇಕಾ ಕುಶಿನ್ ಭರಾನ್ ವಿಕ್ತಾತ್
                      ಕ್ರಿಸ್ಮಸ್ ನ್ಯೂಇಯರ್ ಕಾರ್ಡಾಂ
                      ಬಗ್ಲೆಕ್ ಎಕ್ಲೊ ಘೆವುನ್ ಬಸ್ಲಾ
                      ಲಕ್ಕಿಡಿಪ್ಪ್ ಲೊಟ್ರ್ಯೊ
                      ಥಂಯ್ಚ್ ದೆಗೆನ್ ಮೊಲಾಕ್ ಮೆಳ್ತಾತ್
                      ಟೀ ಶರ್ಟಾಂ, ರಜಿಸ್ತ್ರ್ಯೊ
           ಸಾಕ್ರಿಸ್ತಿಂತ್ ಲಾಯ್ನ್ ಲಾಗ್ಲ್ಯಾ
           ಬರವ್ನ್ ಆಸಾತ್ ಮಿಸಾಂ
           ಕ್ಯಾಂಟಿನಾಂತ್ ಖೆಟ್ ಘೆಂವ್ಚಾಕ್
           ಪಿಜ್ಜಾ ಆನಿಂ ಪ್ಯಾಟ್ಟಿಸಾಂ
           ಗ್ರೊಟ್ಟ್ಯಾಲಾಗಿಂ ಬಾವ್ಡೊ ಮಿರೊಣ್
           ಬಸ್ಲಾ ವಿಕುಂಕ್ ವಾತಿ
           ಎಕ್ಲೊ ಮ್ಹಣ್ತಾ ಘೆಯಾತ್ ಕೊಂಕ್ಣಿ
           ಪದಾಂ ಹಾಸ್ತಿಂ ಉಡ್ತಿಂ
                      ಚಾರಿಟಿ ಬಜಾರಾಂತ್ ರುಚಿಕ್
                      ಸರ್ಪಾತೆಲ್ ಸನ್ನಾಂ
                      ರೂಚ್ ಹಾಚಿ ಜಾಣಾಸ್ಲ್ಯಾಂಕ್
                      ಹೆಂ ದೆವಾನ್ ದಿಲ್ಲೆಂ ಮಾನ್ನಾ
                      ಕಾರಿಜ್ಮಾತಿಕ್ ಭಾವ್ ವಿಕ್ತಾತ್
                      ಕೊಂತಾಂ ಖುರಿಸ್ ಸಬಾರ್
                      ಕುಸ್ವಾರ್ ತರೀ ಘೆವ್ನ್ ಬಸ್ತಿಂ
                      ಘಡ್ಯೆನ್ ಜಾತೊ ಕಾಬಾರ್
           ಬಾಪಾಚೆಂ ಘರ್ ಯಾ ಬಾಜಾರ್?
           ಪಳೆವ್ನ್ ಜೆಜು ಚುರ್ಚುರ್ಲೊ
           ಸಾರ್ಣಿ ಕುಂಟೊ ಹಾತಿಂ ಘೆವ್ನ್
           ಏಎಕ್ಲ್ಯಾಕ್ ಧಾಂವ್ಡಾಂವ್ಕ್ ಧರಿಲಾಗ್ಲೊ
           ದೆಖ್ತಾಂ ದೆಖ್ತಾಂ ಪಡ್ಲೆಚ್
           ಥೊಡ್ಯಾಂ ಪಾಟಿರ್ ಮಾರ್
           ಕವಿತಾ ಬೂಕ್ ವಿಕುಂಕ್ ಬಸ್‌ಲ್ಲ್ಯಾ
           ಮ್ಹಜೆರ್‌ಯ್ ಪಡ್ಲೆ ಚಾರ್
                      ಧನ್ಯ್ ಜಾಲಾಂ ಆಜ್ ಹಾಂವ್
                      ಮಾರ್ ಖಾವ್ನ್ ಜೆಜು ಹಾತಿಂ
                      ಮನ್ಶಾ ಕೂಡ್‌ಯೀ ಪವಿತ್ರ್ ತೇಂಪ್ಲ್
                      ತೆಂ ಸತ್ ಆಠಾಯ್ತಾಂ ಮತಿಂ
                      ಉಣ್ಯಾಪಣಾಂಕ್ ವ್ಹಳ್ಕಾತಾಂ
                      ಕರ್ನ್ಯಾಂಕ್ ಮ್ಹಜ್ಯಾ ಲಜ್ತಾಂ
                      ವ್ಯಾರ್‌ಯ್ ಪುರೊ ಮಾರ್‌ಯ್ ಪುರೊ
                      ಮೆಟಾಂ ಮ್ಹಜಿಂ ಮೆಜ್ತಾಂ

ಸಾದೆಂ ದಿಸ್ಚೆಂ ಹೆಂ ಕವಿತಾ ಭೋವ್ ಸಂಪ್ಯಾ ರಿತಿನ್ ಕವಿನ್ ಪಿಂತ್ರಾಯ್ಲಾಂ ತರ್‌ಯ್ ಹಾಂತುಂ ಆಸ್ಚೊ ಇಮಾಜ್ಯೊ, ತೀರ್ಳ್ ಆನಿ ಸಾರ್ ಹಾಂತ್ಲ್ಯಾ ಚಿಂತ್ಪಾಸವೆಂ ಸಮ್ಜೊಂವ್ಚಾ ಇರಾದ್ಯಾನ್ ಆತಾಂ ಹ್ಯಾ ಕವಿತೆಚಾ ಎಕೆಕಾ ಪಂಗ್ತೆಕ್ ಮೆಕ್ಳೆ ಕರುನ್ ಸಮ್ಜೊಂಕ್ ಪ್ರೇತರ್ ಕರ್‍ಚೆಂ ತರ್;

           ನತ್ಲಾಂ ವೆಳಾರ್ ಜಮ್ಲೆಲ್ಯಾ
           ಮೊಗಾಳ್ ಪರ್ಜೆಕ್ ಪಳೆಂವ್ಕ್ ಆಪ್ಲ್ಯಾ
           ಸಂತೊಸಾನ್ ಸೊಮಿ ಜೆಜು
           ದೆವಾಳಾ ಅಂಗ್ಣಾಂಕ್ ರಿಗ್ಲೊ
           ಗೇಟಿ ಭಿತರ್ ಪಾಂಯ್ ತೆಂಕ್ತಚ್
           ಖೆಟ್ ಶಿಂದುನ್ ಮುಖಾರ್ ಸರ್ತಚ್
           ದೊಳ್ಯಾಂ ಮುಕ್ಲೆಂ ದೃಶ್ಯ್ ದೆಕೊನ್
           ವಿಜ್ಮಿತ್ ಜಾಲೊ ಸಗ್ಳೊ

ಜೆಜು ಅಪ್ಲ್ಯಾ ಜಲ್ಮಾಲ್ಲ್ಯಾ ದಿಸಾ ಅಪ್ಲೆಂಚ್ ಮ್ಹಣ್ ಆಸ್ಚಾ ಘರಾಕ್ (ದೆವಾಳಾಕ್) ಆಯ್ಲೊ ’ಬರ್ತ್‌ಡೇ ಬೋಯ್’ ಜಾವ್ನ್. ಭೋವ್ಶಾ ಕೇಕ್ ಮಾಂಡುನ್ ದವರ್‍ಲ್ಯಾಸ್ತೆಲಿ ಹ್ಯಾ ಖೆಟಿಚಾ ಲೊಕಾಂನಿ ಮ್ಹಣ್ ಚಿಂತುನ್ ಆಯ್ಲಾಸ್ತಲೊ. ಏಕ್ ಘಡಿ ಆಮಿ ಜೆಜು ದೇವ್ ಆನಿ ಸರ್ವ್ ಜಾಣಾರಿ ಮ್ಹಳ್ಳೆಂ ವಿಸ್ರೊನ್ ಸೊಡ್ಲೆಂ ತರ್ ಉತ್ರಾಂ ಶೀದಾ ಆನಿ ಸಾದಿಂ ಆಸಾತ್ ದೆಕುನ್ ಆಮ್ಕಾಂ ತಿಂ ಬರಿಂ ಸಮ್ಜಾತಾತ್. ಜೆಜುಕ್ ಹಾಂಗಾ ಕವಿನ್ ಏಕ್ ಸಾದೊ ಮನಿಸ್‌ಚ್ ಜಾವ್ನ್ ಘೆತ್ಲಾ, ಬಿಲ್ಕುಲ್ ಮ್ಹಜೆ ಆನಿ ತುಜೆಪರಿಂ. ಜೊ ಹೆರ್ ಕಿತೆಂಚ್ ನೆಣಾಂ. ಹೊ ಸಂಸಾರ್, ಹೆಂ ದರ್ಭಾರ್, ಹಿ ರಾಜ್ವಟ್ಕಿ, ಹೆ ಕಾಯ್ದೆ ಕಾನೂನ್, ಹಿ ವೆವಸ್ಥಾ ಬಿಲ್ಕುಲ್ ನೆಣಾಂ ದೆಕುನ್ ಜೆಜುನ್ ವಿಜ್ಮಿತ್ ಪಾವ್ತಾ, ಅಪ್ಲ್ಯಾ ಜಲ್ಮಾದಿಸಾಕ್ ಎಕ್ಟಾಂಯ್ ಜಾಲ್ಲ್ಯಾ ಖೆಟಿಚಾ ಮಧೆಂ ಅಪ್ಣಾಚಿ ವಳೊಕ್ ನಾತ್‌ಲ್ಲ್ಯಾಂ ಮಧೆಂ ವಾಟ್ ಕರುನ್ ತೊ ದೆವಾಳಾಭಿತರ್ ಸರ್ತಾ.

           ಏಕಾ ಕುಶಿನ್ ದಾಳ್ನ್ ದವರ್ಲ್ಯಾಂತ್
           ನೆಕೆತ್ರಾಂ ಕ್ಯಾಲೆಂಡ್ರಾಂ
           ಅನ್ಯೇಕಾ ಕುಶಿನ್ ಭರಾನ್ ವಿಕ್ತಾತ್
           ಕ್ರಿಸ್ಮಸ್ ನ್ಯೂಇಯರ್ ಕಾರ್ಡಾಂ
           ಬಗ್ಲೆಕ್ ಎಕ್ಲೊ ಘೆವುನ್ ಬಸ್ಲಾ
           ಲಕ್ಕಿಡಿಪ್ಪ್ ಲೊಟ್ರ್ಯೊ
           ಥಂಯ್ಚ್ ದೆಗೆನ್ ಮೊಲಾಕ್ ಮೆಳ್ತಾತ್
           ಟೀ ಶರ್ಟಾಂ, ರಜಿಸ್ತ್ರ್ಯೊ

ಜೆಜು ಅಪ್ಲ್ಯಾ ಜಲ್ಮಾದಿಸಾಚೆಂ ಆಚರಣ್ ಕರುಂಕ್ ಆಯಿಲ್ಲ್ಯಾ ಅಪ್ಲ್ಯಾ ಮೊಗಾಚಾ ಪರ್ಜಾಂಚಿ ಕೃತ್ಯಾಂ ಪಾರ್ಕುನ್ ಪಳೆತಾ. ವಯ್ಲ್ಯಾ ಪಂಗ್ತೆರ್ ತೊ ಪಾರ್ಕುಂವ್ಚಾಧಿಂಚ್ ವಿಜ್ಮಿತ್ ಪಾವ್ತಾ ಆನಿ ದುಸ್ರ್ಯಾ ಪಂಗ್ತೆಂತ್ ತೊ ಪಾರ್ಕುನ್ ಪಳೆತಾ. ಕ್ಯಾಲೆಂಡರ್ ಆನಿ ನ್ಯೂಇಯರ್ ಕಾರ್ಡಾಂ ಮಧೆಂಚ್ ಎಕ್ಲೊ ವಿಖುನ್ ಬಸ್ಲಾ ಲಕ್ಕಿಡಿಪ್-ಲೊಟ್ರ್ಯೊ. ಹಾಂಗಾ ನ್ಯೂಇಯರ್ ಕಾರ್ಡಾಂ ಪ್ರಸ್ತುತ್. ಮ್ಹಣ್ಜೆ ವಾಜ್ಬಿ, ಆನಿ ಬಗ್ಲೆನ್ ಲಕ್ಕಿಡಿಪ್-ಲೊಟ್ರ್ಯೊ ಮ್ಹಣ್ಜೆ ಅಪ್ರಸ್ತುತ್. ಕ್ರಿಸ್ಮಸಾಕ್ ಆನಿ ಲೊಟ್ರ್ಯಾಂಕ್ ಸಂಬಂಧ್ ಆಸಾ? ಕವಿಚಾ ಚಿಂತ್ಪಾಪ್ರಕಾರ್ ಹೊ ಹ್ಯಾ ಪ್ರಸ್ತುತ್ ಘಡಿತಾಂಚಾ ಪ್ರಸ್ತುತ್ ಘಟಾನಾಂಚಾ ಮಧೆಂ ಪ್ರಸ್ತುತ್ ಜಾಲ್ಲ್ಯಾ ಸಂಗ್ತ್ಯಾಂನಿ ಕಶೆಂ ಅವ್ಕಾಸ್‌ಸೊದ್ಪಿ (Opportunist) ಅಪ್ಲ್ಯಾ ನಾಂವಾಚೊ ಬೊಂಗೊಸ್ತೊಳ್ ಕರ್ತಾತ್ ಮ್ಹಣ್ ಉಚಾರ್ತಾ.

ಆವ್ಕಾಸ್‌ಸೊಧಾಪ್ ಸಂಸಾರಾಚಾ ಸುರ್‍ವಾತೆ ಥಾವ್ನ್ ಮನ್ಶಾಕುಳಾಚೆರ್ ಥಾಪೊನ್ ಆಯಿಲ್ಲೆಂ ಜಾವ್ನಾಸಾ, ಜೆದ್ನಾಂ ಭುಂಯ್‌ವೈಕುಟಾಂತ್ ಜಿಯೆವ್ನ್ ಆಸ್‌ಲ್ಲ್ಯಾ ಆದಾಂವ್-ಯೆವೆಕ್ ಸೊರೊಪ್ ನಾಡ್ತಾ, ಮ್ಹಳ್ಯಾರ್ ದೆವಾವಿರೋಧ್ ಭಡ್ಕಾಂವ್ಕ್ ಆವ್ಕಾಸ್ ಸೊಧುನ್ ಏಕ್ ’ಆವ್ಕಾಸ್‌ಸೊಧ್ಪಿ’ ಜಾವ್ನ್ ಯೆವುನ್ ಯೆವೆಕ್ ನಾಡ್ತಾ ಆನಿ ಪಾತ್ಕಾಕ್ ಕಾರಾಣ್ ಜಾತಾ. ಆತಾಂಚಾ ಕಾಳಾರ್‌ಯ್ ’ಧರ್ಮ್’ ಭೋವ್ಶಾ ಏಕ್ ಸಾಂಕೇತ್ ಆನಿ ಹ್ಯಾ ಸಾಂಕೆತಾಕ್ ಆವ್ಕಾಸ್ ಜಾವ್ನ್ ಕರುನ್ ’ಆವ್ಕಾಸ್‌ಸೊಧ್ಪಿ’ ಜಾವ್ನ್ ಕಿತ್ಲೆಶೆ ಅಪ್ಲೆಂ ಬೊಳ್ಕೆ ಭರಿನಾಂತ್?

ಥಂಯ್‌ಚ್ ದೆಗೆನ್ ಮೊಲಾಕ್ ಮೆಳ್ತಾತ್ ಟೀಶರ್ಟಾಂ-ರಜಿಸ್ತ್ರಾಂ. ಮ್ಹಾಕಾ ಹ್ಯಾ ಪಂಗ್ತೆಂತ್ ಉಟೊನ್ ದಿಸ್ಚೊ ಇಮಾಜ್ಯೊ ತಜ್ವೀಜ್ ಕರುನ್ ಪಳೆತಾನಾ ಅನ್ಯೇಕ್ ಸಂದೇಶ್ ಮೆಳ್ತಾ. ಹಾಂಗಾಸರ್ ನೆಕೆತ್ರಾಂ, ಕಾರ್ಡಾಂ, ರಜಿಸ್ತ್ರಾಂ, ಲೊಟ್ರ್ಯೊ,ಲಕ್ಕಿಡಿಪ್ಪಾಂ, ಟೀಶರ್ಟಾಂ ಸಾಂಕೇತಿಕ್ ರಿತಿನ್ ಘೆತ್ಲಿಂ ತರ್ ಅಶಿಂ ಆಸಾತ್;

ನೆಕೆತ್ರಾಂ ಮ್ಹಳ್ಯಾರ್ ಖಂಚಾಕ್ ಮನ್ಶಾನ್ ವಯ್ರ್ ದವರ್‍ಯೆತ್ ಜಾಲ್ಲ್ಯೊ ಸಂಗ್ತ್ಯೊ. ನೆಕೆತ್ರಾಂಕ್ ಕೊಣ್‌ಯ್ ಕುಜ್ನಾಂತ್ ವಾ ಖಾಕ್ಸಾಂತ್ ದವ್ರಿನಾ, ಬಗಾರ್ ಘರಾ ಮುಖ್ಲ್ಯಾನ್ ವಯ್ರ್ ಉಭಾರ್ನ್ ದವರ್ತಾ.
ಕಾರ್ಡಾಂ ಮ್ಹಳ್ಯಾರ್ ಭಾಂಧ್. ಆಮಿಂ ಆಮ್ಕಾಂ ಏಕ್ ನ್ಹಯ್ ಎಕಾ ರಿತಿನ್ ಲೆಖ್ತೆಲ್ಯಾಂಕ್ ಮಾತ್ರ್ ಕಾರ್ಡಾಂ ಧಾಡ್ತಾಂವ್.
ರಜಿಸ್ತ್ರಾಂ ಮ್ಹಳ್ಯಾರ್ ಕೊಣಾಚಾಗೀ ಉಡಾಸಾಚೊ ಘುರ್ತ್. 
ಲೊಟ್ರ್ಯೊ ಮ್ಹಳ್ಯಾರ್ ಸ್ವಪ್ಣಾಂ - ಕೊಣಾಕ್ ಭರ್ನ್ ದಿಂವ್ಚಿಂ, ಕೊಣಾಕ್ ರಿತೆಂ ಕರ್ಚಿಂ.
ಟೀಶರ್ಟಾಂ ಮ್ಹಳ್ಯಾರ್ ಕೊಣಾಚೊಗೀ ಮಾನ್ ಧಾಂಪ್ಚಿ ವಸ್ತ್.

ಮ್ಹಳ್ಯಾರ್ ಕವಿಚಾ ನದ್ರೆನ್ ಹ್ಯೊ ವೆವೆಗ್ಳ್ಯೊ ವಸ್ತು ಹ್ಯಾ ನತಾಲಾಂ ಫೆಸ್ತಾಚಾ ವೆಳಾರ್ ಎಕಾಚ್ ಜಾಗ್ಯಾರ್ ವಿಖುಂಕ್ ಪಡ್ಲ್ಯಾತ್ ಆನಿ ಹಾಂಚೆರ್ ದಂದೊ ಚಲ್ತಾ ಮ್ಹಣ್ತಾ. ಜೆಜು ಹೆಂ ಸರ್ವ್ ಪಳೆತೆಚ್ಚ್ ಮುಖಾರ್ ಮುಖಾರ್ ವೆತಾ. ಆನಿ ಮುಖಾರ್ ಗೆಲ್ಲೊ ತೊ ಥಂಯ್ಸರ್ ಕಿತೆಂ ಪಳೆತಾ ಪಳೆವ್ಯಾಂ;

           ಸಾಕ್ರಿಸ್ತಿಂತ್ ಲಾಯ್ನ್ ಲಾಗ್ಲ್ಯಾ
           ಬರವ್ನ್ ಆಸಾತ್ ಮಿಸಾಂ
           ಕ್ಯಾಂಟಿನಾಂತ್ ಖೆಟ್ ಘೆಂವ್ಚಾಕ್
           ಪಿಜ್ಜಾ ಆನಿಂ ಪ್ಯಾಟ್ಟಿಸಾಂ
           ಗ್ರೊಟ್ಟ್ಯಾಲಾಗಿಂ ಬಾವ್ಡೊ ಮಿರೊಣ್
           ಬಸ್ಲಾ ವಿಕುಂಕ್ ವಾತಿ
           ಎಕ್ಲೊ ಮ್ಹಣ್ತಾ ಘೆಯಾತ್ ಕೊಂಕ್ಣಿ
           ಪದಾಂ ಹಾಸ್ತಿಂ ಉಡ್ತಿಂ

ಹಾಂಗಾಸರ್ ಕವಿಚಾ ಇಮಾಜ್ಯಾಂಕ್ ಜೀವ್ ಯೆತಾ ಆನಿ ಮಾತ್ಸಿ ಶಿಣಾಚಿ ಬೋಬ್ ಆಯ್ಕಾತಾ;

ಸಾಕ್ರಿಸ್ತಿಂತ್ ಲಯ್ನ್ ಲಾಗ್ಲ್ಯಾ ಮಿಸಾಂ ಬರಂವ್ಕ್ - ಮ್ಹಳ್ಯಾರ್ ಧರ್ಮಾಚೊ ಬಾಜಾರ್.
ಪಿಜ್ಜಾ ಆನಿ ಪ್ಯಾಟಿಸಾಂ - ಮ್ಹಣ್ಜೆ ಫಿಂರ್ಗಿ ಅಚಾರ್, ಫಿಂರ್ಗಿ ವಿಚಾರ್, ಪರ್ದೆಸಿ ಆಸ್ತ್-ವಸ್ತ್.
ಕವಿ ಸತ್ ಉಚಾರ್ತಾ, ನಾಗ್ಡೆಂ ಸತ್ - ಭೋವ್ ಕೊಡು. ದೆಕುನ್ ತ್ಯಾ ಗ್ರೊಟ್ಟ್ಯಾಲಾಗಿಂ ಮಿರೊಣ್ ವಾತಿ ವಿಖುನ್ ಬೊಸ್ಲಾ. 
ಮ್ಹಣ್ಜೆ, ಹ್ಯಾ ಪಂಗ್ತೆಂತ್ ಕವಿನ್ ಹೊ ಬಾಜಾರ್ ಖಂಯ್ಸರ್ ಜಾತಾ ಮ್ಹಣ್ ಸಾಂಗೊಂಕ್ ಪ್ರೇತನ್ ಕೆಲಾಂ, ಸಾಕ್ರಿಸ್ತಿಂತ್ ಆನಿ ಕ್ಯಾಂಟಿನಾಂತ್ ಮ್ಹಳ್ಯಾರ್ ಭಿತರ್ ಮ್ಹಣೊನ್ ಅರ್ಥ್, ತಶೆಂಚ್ ಗ್ರೊಟ್ಟ್ಯಾಂತ್ ಮ್ಹಳ್ಯಾರ್ ಭಾಯ್ರ್ ಮ್ಹಳ್ಳೊ ಅರ್ಥ್. ಜೆಜು ಹಾಂಗಾ ಪಳೆತಾ, ಪಾರ್ಕಿತಾ ಆನಿ ವೊಗೊಚ್ಚ್ ರಾವೊನ್ ಪಾರ್ಕಿತಾ.

           ಚಾರಿಟಿ ಬಜಾರಾಂತ್ ರುಚಿಕ್
           ಸರ್ಪಾತೆಲ್ ಸನ್ನಾಂ
           ರೂಚ್ ಹಾಚಿ ಜಾಣಾಸ್ಲ್ಯಾಂಕ್
           ಹೆಂ ದೆವಾನ್ ದಿಲ್ಲೆಂ ಮಾನ್ನಾ
           ಕಾರಿಜ್ಮಾತಿಕ್ ಭಾವ್ ವಿಕ್ತಾತ್
           ಕೊಂತಾಂ ಖುರಿಸ್ ಸಬಾರ್
           ಕುಸ್ವಾರ್ ತರೀ ಘೆವ್ನ್ ಬಸ್ತಿಂ
           ಘಡ್ಯೆನ್ ಜಾತೊ ಕಾಬಾರ್

ಹ್ಯಾ ಪಂಗ್ತೆಂತ್ ವಸ್ತು ಇಮಾಜ್ಯೊ ಉಭ್ಯೊ ಆಸಾತ್, ಸರ್ಪಾತೆಲ್, ಸನ್ನಾಂ, ಕುಸ್ವಾರ್ ಆನಿ ಕೊಂತಾಂ, ಖುರಿಸ್. ಮ್ಹಣ್ಜೆ ’ಭುಕ್’ ಆನಿ ’ಧರ್ಮ್’ ಹ್ಯಾ ದೊನಾಂಕ್ ಲಗ್ತಿ ಜಾಲ್ಲ್ಯೊ ವಸ್ತು ಜೆಜುಕ್ ಹಾಂಗಾ ದಿಸ್ತಾತ್. ಹ್ಯಾ ದೋನ್ ಪಂಗ್ತೆಂನಿ ಕವಿ ಸಾಂಗ್ತಾ ಭಿತರ್ ಭಾಯ್ರ್, ವಯ್ರ್ ಸಕಯ್ಲ್ ಸಗ್ಳ್ಯಾಂನಿ, ವೆವೆಗ್ಳ್ಯಾ ರುಪಾನ್, ವೆವೆಗ್ಳ್ಯಾ ಮಾಪಾನ್, ವೆವೆಗ್ಳ್ಯಾ ಅರ್ಥಾನ್ ಚಲೊನ್ ಆಸಾ ಬಾಜಾರ್ ಮ್ಹಣ್. ಹ್ಯಾ ಪಂಗ್ತೆರ್ ಆಸ್ಚೊ ಹೊ ಏಕ್ ಸಬ್ಧ್ ಉಡಾಸಾಕ್ ದವರಾ ’ಬಸ್ತಿಂ’. (ಮ್ಹಳ್ಯಾರ್ ಕವಿತೆಚೊ ಕವಿ ಬಾಯ್ಲ್?) ಆಸೊಂ! ಆತಾಂ ಫುಡ್ಲಿ ಪಂಗತ್ ಪಳೆವ್ಯಾಂ;

           ಬಾಪಾಚೆಂ ಘರ್ ಯಾ ಬಾಜಾರ್?
           ಪಳೆವ್ನ್ ಜೆಜು ಚುರ್ಚುರ್ಲೊ
           ಸಾರ್ಣಿ ಕುಂಟೊ ಹಾತಿಂ ಘೆವ್ನ್
           ಏಎಕ್ಲ್ಯಾಕ್ ಧಾಂವ್ಡಾಂವ್ಕ್ ಧರಿಲಾಗ್ಲೊ
           ದೆಖ್ತಾಂ ದೆಖ್ತಾಂ ಪಡ್ಲೆಚ್
           ಥೊಡ್ಯಾಂ ಪಾಟಿರ್ ಮಾರ್
           ಕವಿತಾ ಬೂಕ್ ವಿಕುಂಕ್ ಬಸ್‌ಲ್ಲ್ಯಾ
           ಮ್ಹಜೆರ್‌ಯ್ ಪಡ್ಲೆ ಚಾರ್

ಹೊ ಸಾರ್ಣಿ ಖುಂಟೊ ಖೈಂ ಥಾವ್ನ್ ಆಯ್ಲೊ ಹಾಂಗಾ? ನತಾಲಾಂ ಫೆಸ್ತಾಚಾ ಸಂಭ್ರಮಾಂತ್ ದೆವಾಳಾಂತ್ ಮಧೆಂಚ್ ಸಾರ್ಣಿಖುಂಟೊ ಕಸೊ ಉದೆಲೊ? ಕೊಣ್‌ಯ್ ವಿಖುನ್ ಬೊಸ್‌ಲ್ಲೊ ಜಾವ್ಯೆತ್. ಆಸೊಂ - ಜೆಜು ಆತಾಂ ಖುಂಟೊ ಘೆತಾ ಆನಿ ಎಕೆಕ್ಲ್ಯಾಕ್ ಧಾಂವ್ಡಾಂವ್ಕ್ ಲಾಗ್ಲೊ - ಕಿತ್ಲೊ ಸಾದೊ/ಬೊಳೊ ಲೋಕ್ ಪಳೆಯಾ, ಎಕಾ ಸಾರ್ಣಿ ಖುಂಟ್ಯಾಕ್ ಪಳೆವ್ನ್ ಧಾಂವ್ಲೊ. ಆತಾಂಚಾ ಕಾಳಾರ್ ಸಾರ್ಣಿಖುಂಟೊ ನ್ಹಯ್ ಎಕೆ-47 ಕಾಡ್ಲ್ಯಾರ್ ಯಾ ಬೋಂಬ್ ಕಾಡ್ಲ್ಯಾರ್ ಮಾತ್ರ್ ಕೊಣ್‌ಯ್ ಧಾಂವೊಂಕ್ ಸೊಧಿತ್ ಆಸೊಂ!. ಆತಾಂ ಜೆಜು ಸಾರ್ಣಿ ಖುಂಟೊ ಘೆವ್ನ್ ಆಯ್ಲೊ ಆನಿ ಕವಿತಾಬೂಕ್ ವಿಖ್ಚಾ ಬಾಯ್ಲೆಚೆರ್‌ಯ್ ಚಾರ್ ಮಾರ್ ಘಾಲೆ. (ಸ್ತ್ರೀ ಹಕ್ಕಾಂಕ್ ಝುಜ್ಚಾ ಬಾಯ್ಲಾಂನಿ ಇಲ್ಲೆಂ ಸುಧಾರ್ಸುಂಚೆಂ). ಮುಖಾರ್ ಕಿತೆಂ ಜಾತಾ ಪಳೆವ್ಯಾಂ;

           ಧನ್ಯ್ ಜಾಲಾಂ ಆಜ್ ಹಾಂವ್
           ಮಾರ್ ಖಾವ್ನ್ ಜೆಜು ಹಾತಿಂ
           ಮನ್ಶಾ ಕೂಡ್‌ಯೀ ಪವಿತ್ರ್ ತೇಂಪ್ಲ್
           ತೆಂ ಸತ್ ಆಠಾಯ್ತಾಂ ಮತಿಂ
           ಉಣ್ಯಾಪಣಾಂಕ್ ವ್ಹಳ್ಕಾತಾಂ
           ಕರ್ನ್ಯಾಂಕ್ ಮ್ಹಜ್ಯಾ ಲಜ್ತಾಂ
           ವ್ಯಾರ್‌ಯ್ ಪುರೊ ಮಾರ್‌ಯ್ ಪುರೊ
           ಮೆಟಾಂ ಮ್ಹಜಿಂ ಮೆಜ್ತಾಂ

ಹಾಂಗಾಸರ್ ಕವಿ ಲಿಪವ್ನ್ ದವರ್‌ಲ್ಲ್ಯಾ ಕವಿತಾಚಾ ತಿರ್ಳಾಕ್ ಉಸ್ತಿತಾಶೆಂ ಭೊಗ್ತಾ. ಮ್ಹಳ್ಯಾರ್ ಕವಿಚೊ ಹಾಂಗಾಚೊ ಪ್ರಮುಕ್ ಇರಾದೊ ಬಾಜಾರ್ ಕರ್ಚೊ ನ್ಹಯ್, ಬಗಾರ್ ಬಾಜಾರಾಕ್ ಉಗ್ಡಾಪೆಂ ಕರ್ಚೊ. ತೊ ಯಾ ತಿ ಯೆತಾನಾ ಕಸಲೆಚ್ ಇರಾದೆ ಘೆವ್ನ್ ಆಯಿಲ್ಲೊ/ಲ್ಲಿ ನ್ಹಯ್ ದೆಖುನ್ ವೆತಾನಾ ಸಯ್ತ್ ಜೆಜುಚಾ ಹಾತಾಚೆ (ಸಾರ್ಣಿಚೆ) ಮಾರ್ ಖಾವ್ನ್ ಧನ್ಯ್ ಜಾವ್ನ್ ವೆತಾನಾ ತಿಚೆ ಬರಾಬರ್ ಹ್ಯಾ ಬಾಜಾರಾಂತ್ ವಾಂಟೆಲಿ ಜಾಲ್ಲ್ಯಾಂಚೆಂ ಉಲ್ಲೇಕ್ ಕರುನ್ ವೆತಾ.

ಕವಿತಾ ಸಾದೆಂ ದಿಸೊಂಕ್ ಪುರೊ, ಸುಲಭ್ ಉತ್ರಾಂನಿ ಉತ್ರಾಯ್ಲಾಂ ತರ್‌ಯ್ ಹಾಂತ್ಲೊ ಸಂದೇಶ್ ಸುಡಾಳ್ ಆಸಾ, ಹೊ ಸಂಸಾರ್ ಏಕ್ ಬಾಜಾರ್, ಹಾಂತು ಜಿಯೆಂವ್ಚಿ ಎಕೆಕ್ ಜೀವಿ ಹ್ಯಾಚ್ ಬಾಜಾರಿ ವೆವಸ್ತೆಚಿ ’ಕಟ್‌ಪುತ್ಳಿ’. ದೆಕುನ್ ಹೆ ’ಧರ್ಮ್’, ಹೆ ’ಸಂಬಂಧ್’ ಮ್ಹಳ್ಳೆ ಫಕತ್ತ್ ಸಬ್ಧ್ ಮ್ಹಳ್ಳ್ಯಾ ಸತಾಕ್ ಉಚಾರ್ತಾ ಮ್ಹಳ್ಳಿಂ ಮ್ಹಜಿಂ ಭಗ್ಣಾಂ.

ಫೆಸ್ತ್ ಪರಬ್ ’ಕಮರ್ಶಿಯಲ್’ ಜಾತಾನಾ.... [- ಜೊಮೆಲ್, ಬೊಂದೆಲ್]

ಹಿ ಕವಿತಾ, ಕವಿ ರೊಬರ್ಟ್ ಪೆರ್ನಾಂಡಿಸ್, ಉದ್ಯಾವರ್ ಹಾಣೆ ಸಂಪ್ಯಾ ಉತ್ರಾಂನಿ ಸೊಭಯ್ಲ್ಯಾ ತರ್‌ಯೀ, ಸಮಾಜೆಚಿ ಏಕ್ ಕೂಸ್ ಆಮ್ಕಾಂ ದಾಕೊಂವ್ಚಾಂತ್ ಜಿಕ್ಲಾ. ಆಮಿಂಚ್ ಘಡ್‌ಲ್ಲ್ಯೊ ಥೊಡ್ಯೊ ರಿತಿ ರಿವಾಜ್ಯೊ, ಫೆಸ್ತಾಂ ಪರಬ್, ಕಾಯ್ದೆ ಆನಿ ಕಾನೂನ್ ಮೀತ್ ಮಿಕ್ವೊನ್ ವೆತಾನಾ, ಥಂಯ್ಸರ್ ಏಕಾ ಥರಾಚೊ ಬಾಜಾರ್, ಯಾ ಆಮಿ ಕಿತೆಂಯ್ ಕೆಲ್ಯಾರೀ ಸಾರ್ಕೆಂ ಜಾತಾ ಮ್ಹಳ್ಳೆಂ ಚಿಂತಾಪ್ ಉಟಂವ್ಚೆ ’ವ್ಯಾಪಾರಿಸ್ತ್’ ಹ್ಯಾ ಕವಿತಾಂತ್ ಸ್ಪಷ್ಟ್ ದಿಸೊನ್ ಯೆತಾ. 

ನತಲಾಂ ಫೆಸ್ತಾ ದಿಸಾಚ್, ಜೆಜುನ್ ಆಪ್ಲ್ಯಾ ಪರ್ಜೆಕ್ ಪಳೆಂವ್ಕ್ ಯೆಂವ್ಚೆ ಸನ್ನಿವೇಶ್ ಭೊವ್ ಸೊಬಿತ್ ರಿತಿನ್ ಪಿಂತ್ರಾಯ್ಲಾಂ. ತ್ಯಾ ಲೊಕಾಂಚ್ಯಾ ಖೆಟಿಂತ್ ಸರ್ವ್ ಆಸಾ ಆನಿಂ ಸರ್ವ್ ದಿಸ್ತಾ ಪುಣ್ ಜೆಜು ಚಲೊನ್ ಯೆಂವ್ಚೆ ಕೊಣಾಚ್ಯಾಯ್ ಗುಮಾನಾಕ್ ಯೇನಾ. 

ಫೆಸ್ತಾಂ ಪರ್ಬೆಚೊ ಯಾ ರಿತಿ ರಿವಾಜ್ಯಾಂಚೊ ಖರೊ ಮಹತ್ವ್/ಅರ್ಥ್ ಸಮ್ಜಾನಾಸ್ತಾಂ ತ್ಯಾಚ್ ಸಂಗ್ತೆಕ್ ಆಧುನೀಕರಣಾಚೊ ಲೇಪ್ ದಿತಾನಾ, ತಿಂ ಫೆಸ್ತಾಂ ಪರ್ಬಿ ’ಕಮರ್ಶಿಯಲ್’ ಜಾಂವ್ಕ್ ಪಾವ್ತಾತ್. ನತಾಲಾಚಾಂ ಫೆಸ್ತಾ ಸಂಧರ್ಬಾರ್ ಜೆಜುಚೆಂ ಜನನಾಚೊ ಖರೊ ಅರ್ಥ್ ಸಮ್ಜೊಂಕ್ ಪ್ರಯತ್ನ್ ಕರಿನಾತ್‌ಲ್ಲ್ಯಾ ವೆಳಾರ್ ತೆಂಚ್ ಫೆಸ್ತ್ ಏಕ್ ವ್ಯಾಪಾರಾಚೆ ಆಕರ್‍ಶಣ್ ಜಾಂವ್ಕ್ ಪಾವ್ತಾ. ಜಾಯ್ತಿಂ ಕ್ರೀಸ್ತಾಂವ್ ಬಾಂವ್ಡಾ ನತಾಲಾಂಚ್ಯಾ ಮದ್ಯಾನಾ ರಾತಿಚೆ ಮೀಸ್ ಸೊಡ್ಯಾಂ ವರ್‍ಸಾಂತ್ ಏಕ್ ಮೀಸ್ ಬರ್‍ಯಾ ಥರಾನ್ ಅಯ್ಕೊಂಕ್/ಭೆಟೊವ್ಕ್, ಪಾವ್ಟ್ ನಾತ್‌ಲ್ಲಿಂ ’ಕ್ರಿಸ್ಮಸ್’ ಫೆಸ್ತಾಚೊ ಧಂದೊ, ಪಾರ್‍ಟಿ ಆನಿಂ ಆತ್ಮೀಕ್ ಗರ್‍ಜೆಕ್ ಪಡನಾತ್‌ಲ್ಲ್ಯಾ ಸಂಗ್ತೆಂತ್ ಮೆತೆರ್ ಜಾವ್ನ್ ಆಸ್ತಾತ್. ಅಸಲೆಂಚ್ ಉದಹರಣ್ ಹ್ಯಾ ಕವಿತೆಂತ್ ದಿಸೊನ್ ಯೆತಾ.

ಕವಿಚಾ ಲಿಖ್ಣೆಥಾವ್ನ್ [-ರೊಬರ್ಟ್ ಫೆನಾಂಡಿಸ್, ಉದ್ಯಾವರ್.] (ಕವಿತಾಪಾಠ್ ಸುರು ಜಾಂವ್ಚಾ ಆಧಿಂ)

ಕುವೈಟಾಂತ್ಲ್ಯಾ ಕವಿಸಹೃದಯಿಂಕ್ ರೊಬಾರ್ಟಾಚೆ ಪ್ರಣಾಮ್ ಆನಿ ನವ್ಯಾ ವರ್ಸಾಚೆ ಉಲ್ಲಾಸ್. ಹ್ಯಾ ನವ್ಯಾ ವರ್ಸಾ ತುಮ್ಚ್ಯಾ ಲಿಖ್ಣೆ ಥಾವ್ನ್ ವಿಂಚ್ಣಾರ್ ಸಾಹಿತ್ಯ್ ಭರ್ಪೂರ್ ವಾಳೊಂ ಮ್ಹಣ್ ಮಾಗ್ತಾಂ.

’ಆಶಾವಾದಿ ಪ್ರಕಾಶನ್’ ಧ್ವಾರಿಂ ಪ್ರಕಾಶಿತ್ ಜಾಲ್ಲ್ಯಾ ’ಮೊತಿಯಾಂ ಆನಿ ತಾರಾಂ’ ಕವಿತಾ ಪುಂಜಾಂತ್ಲ್ಯಾ ಏಕೇಕಾ ಕವಿಚಿಂ ಕವಿತಾಂ ವ್ಯವಸ್ಥಿತ್ ಥರಾನ್ ವಿಂಚುನ್, ತಾಂಚೆರ್ ಅಧ್ಯಯನ್ ಕರುನ್ ಆಸ್ಚ್ಯಾ ತುಮ್ಕಾಂ ಶಾಭಾಸ್ಕಿ ಫಾವೊ. ಹ್ಯಾ ಮಹಿನ್ಯಾಂತ್ ತುಮಿ ಮ್ಹಜಿ ಕವಿತಾ ’ಬಾಪಾಚೆಂ ಘರ್’ ಅಧ್ಯಯನಾಂಕ್ ವಿಂಚ್ಲಾಂ ತ್ಯಾ ಪಾಸತ್ ತುಮ್ಕಾಂ ದೇವ್ ಬರೆಂ ಕರುಂ ಮ್ಹಣ್ತಾಂ.

ಹ್ಯಾ ಕವಿತೆವಿಶಿಂ ಮ್ಹಜಿಂ ಭಗ್ಣಾಂ ಮಟ್ವ್ಯಾನ್ ಸಾಂಗ್ಚಿಂ ತರ್:

1) ಸಮಾಜೆಂತ್ ಆಮಿಂಚ್ ಆಸಾ ಕೆಲ್ಲ್ಯೊ ಥೊಡ್ಯೊ ರಿತಿ-ರಿವಾಜ್ಯೊ, ಆಮಿ ಬಾಂಧುನ್ ಹಾಡ್‌ಲ್ಲಿ ವ್ಯವಸ್ಥಾ ಥೊಡೆಪಾವ್ಟಿಂ ಆಮ್ಚ್ಯಾಚ್ ದೊಳ್ಯಾಂಚ್ಯೊ ಅಸ್ಡ್ಯೊ ಉಭಾರುಂಕ್ ಕರ್‍ತಾತ್ ಆನಿ ಅಮ್ಕಾಂಚ್ ಆಮಿ ಸವಾಲ್ ಕರಿಶೆಂ ಕರ್‍ತಾತ್. ಅಸಲಿಂಚ್ ವಾಜ್ಬಿ ಸವಲಾಂ ಉಬ್ಜಾಲ್ಲ್ಯಾಚೊ ಪ್ರತಿಫಳ್ ಜಾವ್ನ್ ’ಬಾಪಾಚೆಂ ಘರ್’ ಕವಿತಾ ಉಭಿ ಜಾಲ್ಯಾ. ಕವಿನ್ ಸಮಾಜೆಚ್ಯಾ ವ್ಯವಸ್ಥೆ ಥಂಯ್ ಬೋಟ್ ಜೋಕ್‌ಲ್ಲ್ಯಾಫರಾ ಬದ್ಲಾವಣ್ ಕಾಂಯ್ ಯೇತ್ ಮ್ಹಣ್ ಅಪೇಕ್ಷುಂಕ್ ಜಾಯ್ನಾ ತರೀ ವಾಚ್ಪ್ಯಾಕ್ ಜರ್ ಏಕ್ ಕವಿತಾ ಚಿಂತುಂಕ್ ಕರಿತ್ ತರ್ ತಿ ಕವಿತಾ ಜಯ್ತೆವಂತ್ ಜಾಂವ್ಕ್ ಸಕ್ತಾ ಕೊಣ್ಣಾ (?).

2) ಹಿ ಕವಿತಾ ಹಾಂವೆ ಚಡ್ ಪ್ರೇತನ್ ಘಾಲಿನಾಸ್ತಾಂ ಬರಯಿಲ್ಲಿ ಸಾದಿ ಕವಿತಾ. ಕವಿತಾ ವಾಚ್‌ಲ್ಲಿಚ್ ಕವಿಮಿತ್ರಾನ್ ಎಕ್ಲ್ಯಾನ್ ಅಶೆಂ ಸಾಂಗ್‌ಲ್ಲೊ ಉಡಾಸ್ "ತ್ರಾಸ್ ನಾಸ್ತಾನಾ ಪ್ರಾಸ್ ಘಾಲ್ತಾಯ್" ಮ್ಹಣ್. ಕವಿತಾ ಪ್ರಾಸಾಸವೆಂ ವಿಣ್ಲೆಲಿಚ್ ಜಾವ್ನ್ ಆಸಾಜಾಯ್ ಮ್ಹಣ್ ಹಾಂವ್ ಖಂಡಿತ್ ಮಾಂದಿನಾ. ಹ್ಯಾ ಕವಿತೆಂತ್ ಜರ್ ತಶೆಂ ಜಾಲಾಂ ತರ್ ತೆಂ ’ಬೈ-ಚಾನ್ಸ್’.

ದಾಯ್ಜ್ ಪಂಗ್ಡಾಂತ್ ಬರ್‍ಯಾಂತ್ ಬರೆ ಕವಿ, ಲೇಖಕ್ ಆನಿ ಅನುಭವಿ ವಿಮರ್ಶಕ್ ಆಸಾತ್. ವಿಮರ್ಶ್ಯಾ ದೃಷ್ಟೆನ್ ಜ್ಯೆಂ ಕಿತೆಂ ತುಮಿ ಹ್ಯಾ ಕವಿತೆಂತ್ ದೆಖ್ಲಾಂ ತೆಂ ವಾಚುಂಕ್ ಹಾಂವ್ ವ್ಹಡಾ ಆತುರಾಯೆನ್ ರಾಕೊನ್ ಆಸಾಂ.

(ಕವಿತಾಪಾಠ್ ಉಪ್ರಾಂತ್)

ಮೊಗಾಳ್ ಕವಿಬಾಬ್ ವಲ್ಲಿಕ್ ತಶೆಂಚ್ ದಾಯ್ಜ್ ಪಂಗ್ಡಾಚಾ ಸರ್ವಾಂಕ್,

ದುಭಾಯ್ ಥಾವ್ನ್ ರೊಬರ್ಟಾಚೆ ಪ್ರಣಾಮ್.

ದಾಯ್ಜ್ ಕವಿತಾಪಾಠಾಂತ್ ಮ್ಹಜ್ಯಾ ಕವಿತೆವಿಶಿಂ ಸವಿಸ್ತಾರ್ ರಿತಿನ್ ವಿಶ್ಲೇಶಣ್ ಕೆಲ್ಲ್ಯಾ ತುಮ್ಕಾಂ ದೇವ್ ಬರೆಂ ಕರುಂ. ವಾಚ್ತಾಂ ವಾಚ್ತಾಂ ಹಾಂವೆ ಗಮನಾಂಕ್ ವ್ಹರುಂಕ್ ನಾತ್‌ಲ್ಲ್ಯೊ ಪುಣ್ ತುಮಿಂ ಸೊಧುನ್ ಕಾಡ್‌ಲ್ಲ್ಯೊ ಸುಮಾರ್ ಸಂಗ್ತಿ ಝಳ್ಕಾಲ್ಯೊ. ಕವಿತೆಕ್ ಏಕ್ ಅಥ್ವಾಚ್ ರಿತಿನ್ ತುಕುನ್ ಅಪ್ಲಿ ಅಭಿಪ್ರಾಯ್ ಸುಡಾಳ್ ಉಚಾರ್‌ಲ್ಲ್ಯಾ ಖಾತಿರ್ ಮಸ್ತ್ ದೇವ್ ಬರೆಂ ಕರುಂ. ಮ್ಹಜ್ಯಾ ತಸಲ್ಯಾ ನವ್ಯಾಂಕ್ ತುಮಿ ದಿಂವ್ಚೆಂ ಉತ್ತೇಜನ್ ಆಮ್ಕಾಂ ಬರೆಂ ಸಾಹಿತ್ಯ್ ರಚುಂಕ್ ಅವ್ಕಾಸ್ ಕರುನ್ ದಿಂವ್ಚಾಂತ್ ದುಭಾವ್ ನಾ.

ಫಕತ್ತ್ ದೋನ್ ಸಂಗ್ತಿ ವಿಶ್ಯಾಂತ್ ಮ್ಹಜೆಂ ವಿವರಣ್:

ಪಯ್ಲೆಂ:

                 ’ಕಾರಿಜ್ಮಾತಿಕ್ ಭಾವ್ ವಿಕ್ತಾತ್
                 ಕೊಂತಾಂ ಖುರಿಸ್ ಸಭಾರ್
                 ಕುಸ್ವಾರ್ ತರೀ ಘೆವ್ನ್ ಬಸ್ತಿಂ
                 ಘಡ್ಯೆನ್ ಜಾತ್ತೊ ಕಾಭಾರ್’

ಹ್ಯೊ ಚಾರ್‌ಯ್ ಲಾಯ್ನಿ ಖಂಡಿತ್ ಏಕಾಮೆಕಾಕ್ ಲಗ್ತಿ ಜಾಲ್ಲ್ಯೊ.

ಮ್ಹಜಿ ಚೂಕ್ (ವ್ಯಾಕರಣಾಂತ್) ಭೋವ್ಶಾ ಮ್ಹಜ್ಯಾ ಗಮನಾಂಕ್ ವೆಳಾರ್ ಯೇನಾಸ್ತಾಂ ರಾವ್ಲಿ. ಆನಿ ವಲ್ಲಿಯಾಬಾಕ್ ದೋನ್ ವೆಗ್ಳ್ಯೊ ಸಂಗ್ತಿ ತಶೆಂ ದಿಸ್ಲ್ಯೊ ಜಾವ್ಯೆತ್.

ಜರ್ ಸರ್ವಾಂಕ್ ಸಮ್ಜಂವ್ಚೆಪರಿಂ ಹಾಂವ್ ತಿದ್ವುಂಕ್ ಸಕ್ತೊಂ ತರ್:

                 "ಕಾರಿಜ್ಮಾತಿಕ್ ಭಾವ್-ಭಯ್ಣಿ ವಿಕ್ತಾತ್
                 ಕೊಂತಾಂ ಖುರಿಸ್ ಸಭಾರ್
                 ಕುಸ್ವಾರ್ ತರೀ ತಿಂ ಘೆವ್ನ್ ಬಸ್ತಿಂ
                 ಘಡ್ಯೆನ್ ಜಾತೊ ಕಾಭಾರ್"

ದುಸ್ರೆಂ: 

                 ’ಸಾರ್ಣಿ ಕುಂಟೊ ಹಾತಿಂ ಘೆವ್ನ್........’

ಕಿತ್ಯಾಕ್‌ಗೀ ಮ್ಹಳ್ಳ್ಯಾರ್ ಕೋಯ್ರ್ ಸಾರ್ಣಿ ಕುಂಟ್ಯಾಂತ್‌ಚ್ ಕಾಡ್ತಾತ್. ಮ್ಹಾಕಾ ದುಸ್ರೆಂ ಕಾಂಯ್ (ನಾಡೊ ಯಾ ದೋರಿ) ಸಾಂಗೊಂಕ್ ನಾಕಾಸ್‌ಲ್ಲೆಂ. ತೊ ಸಾರ್ಣಿ ಕುಂಟೊ ಖಂಯ್ ಥಾವ್ನ್ ಮೆಳ್ಳೊ ಮ್ಹಣ್ ಸೊಧುನ್ ಕಾಡುಂಕ್ ಹಾಂವೆ ಎದೊಳ್ ಮಾತೆಂ ಕೊರ್ಪಿಲ್ಲೆಂ ನಾ. ಆತಾಂ ತುಮ್ಚ್ಯಾ ಸಾಯ್ಟಿಚೆರ್ ವಾಚ್‌ಲ್ಲ್ಯಾ ಉಪ್ರಾಂತ್ ಕೊರ್ಪುನ್ ಆಸಾಂ......

ದೇವ್ ಬರೆಂ ಕರುಂ.

ಮೊಗಾಸವೆಂ,
ರೊಬರ್ಟ್ ಫೆರ್ನಾಂಡಿಸ್, ಉದ್ಯಾವರ್.

ಪಾಟಿಂ ಕವಿತಾಪಾಠ್ ಪಾನಾಕ್

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications