ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬನಾವಟಿ ಕಾಜಾರಾಂ....! - ಆಸ್ಟಿನ್ ಡಿ’ಸೋಜ್ ಪ್ರಭು
ಲಗ್ನ್ - ಸಭಾರಾಂಕ್ ಜಲ್ಮಾಂತ್ ಏಕ್ ಪಾವ್ಟಿಂಚೆಂ ಘಡಿತ್.
ಚಡ್ತಾವ್ ಹರ್ ವ್ಯಕ್ತಿ ಹ್ಯಾ ವಿಶಿಂ ಚಿಂತಾಪ್ ಚಿಂತ್ತಾ, ಸ್ವಪ್ಣಾಂ ದೆಖ್ತಾ ಆನಿ ನಿಮಾಣೆ ಎಕಾ ಘಡ್ಯೆ ಲಗ್ನ್ ಜಾವ್ನ್ಂಚ್ ಸೊಡ್ತಾ.
ಸಭಾರಾಂಕ್ ಲಗ್ನ್ ಜಾಂವ್ಕ್ ಪಾವ್ತಾ ಸಂತೊಸಾಚಿ ಬುನ್ಯಾದ್; ಸಭಾರಾಂಕ್ ಲಗ್ನ್ ಜಾಂವ್ಕ್ ಪಾವ್ತಾ ಕರಂದಾಯೆಚಿ ಸುರ್ವಾತ್; ಸಭಾರಾಂಕ್ ಲಗ್ನ್ ಜಾಂವ್ಕ್ ಪಾವ್ತಾ ತೆಂತೆಸಾಂವಾಚಿ ಭಾಯ್ರಿ; ತಸೆಂ ಸಭಾರಾಂಕ್ ಲಗ್ನ್ ಜಾಂವ್ಕ್ ಪಾವ್ತಾ ಜೀವ್ಘಾತ್ ಕರ್ಚ್ಯಾಕ್ ಪ್ರಥಮ್ ಮೇಟ್.
ಇತ್ಲೆಂ ಸರ್ವ್ ಘಡೊನ್ಂಯೀ ತರ್ನಾಟಿಂ ಕಿತ್ಯಾಕ್ ಲಗ್ನಾ ಭೆಸಾಂತ್ ಏಕ್ ಜಾತಾತ್? ಕಿತ್ಯಾಕ್ ತಿಂ ತಾಂಚಿ ಅಸ್ಥಿತ್ವತಾ ಹೊಗ್ಡಾವ್ನ್ ಘೆತಾತ್? ಕಿತ್ಯಾಕ್ ತಿಂ ಆಪ್ಲೆಂ ಸ್ವಾತಂತ್ರ್ ಆಡೊವ್ ಘಾಲ್ತಾತ್? ಕಿತ್ಯಾಕ್ ತಿಂ ಆಪ್ಲೆಂ ಮನ್ಶಾಪಣ್ ಶರಣಾಗತ್ ಕರ್ತಾತ್? ಹ್ಯಾ ಸವಾಲಾಂಕ್ ಖಂಚ್ಯಾ ವಾಕ್ಸರಿಂನಿಯ್ ಫಾವೊತಿ ಜವಾಬ್ ನಾ.
ಕಿತೆಂಗಿ ದೇವ್ ದುರ್ಬಳ್ಯಾಂಕ್ ಸೊಭಿತ್ ಸೊಭಿತ್ ಭುರ್ಗಿಂ ದಿತಾ, ತಾಂಕಾಂ ತೊ ಖಾಂವ್ಕ್ ಜೇಂವ್ಕ್ ಸಮಾ ನಾ ತರೀ ಸುಂದರಾಯೆನ್ ಭರ್ತಾ ಆನಿ ಉಪ್ರಾಂತ್ ತೊ ತಾಂಕಾಂ ತಾಂಚೆಯಿತ್ಲ್ಯಾಕ್ಚ್ ಸೊಡ್ತಾ. ತಿಂ ಕಷ್ಟಾಂನಿ ಶಿಕ್ತಾತ್, ಘಾಮಾನ್ ಘೊಳ್ತಾತ್ ಆನಿ ಸದಾಂ ಸಕಾಳಿಂ ಉಟೊನ್ ತೊ ಸದಾಂಚೊ ಸುರ್ಯೊ ಪಳೆಂವ್ಚ್ಯಾ ಪಯ್ಲೆಂ ಸಭಾರ್ ಸ್ವಪ್ಣಾಂ ಪಳೆತಾತ್. ತಿಂ ಆಪ್ಲೆಂ ಜೀವನ್ ನಂದನ್ ಕರುಂಕ್ ಲಾಲೆತಾತ್; ಸದಾಂಚ್ ಕೋಣ್ ತರೀ ಆಪ್ಣಾಕ್ ಖಾಯ್ಸ್ ಕರಿತ್ಗಾಯ್ ಮ್ಹಣ್ ತ್ರಾಣೆತಾತ್. ಆನಿಂ ಅಶೆಂ ತಿಂ ಚಿಂತುನ್ಂಚ್ ಆಸ್ತಾಂ, ತಾಂಚ್ಯಾ ಘರಾಂನಿ ತ್ಯಾ ಕಾಸಾಪ್ಪಿ ಸೈರಿಕೆಚ್ಯಾ ಮ್ಹಾಲ್ಯಾಂಚೆಂ ಯೆಣೆಂ ಜಾತಾ!
ಭಾರಿಚ್ ಭಾಂಗಾರಾಚೊ ಭುರ್ಗೊ ತೊ, ಲ್ಹಾನ್ ಆಸ್ತಾನಾ ಆಲ್ತಾರ್ ಭುರ್ಗೊ ಜಾಲೊ, ಉಪ್ರಾಂತ್ ತೊ ಸೆಮಿನರಿಕ್ ವೆತಾಂ ಮ್ಹಣಾಲೊ ತರೀ ಆವಯ್ ಬಾಪಾಯ್ನ್ ಆಡಾವ್ನ್ ತಾಕಾ ಗಲ್ಫಾಕ್ ಧಾಡ್ಲೊ, ಆತಾಂ ತೊ ಥಂಯ್ಸರ್ ಏಕಾ ವಿದೇಶಿ ಕಂಪ್ಣೆಂತ್ ಊಂಚ್ಲ್ಯಾ ಕಾಮಾರ್ ಆಸಾ (ಪೆದೊ ಜಾವ್ನ್?), ಕಂಪೆನಿನ್ ತಾಕಾ ಕಾರ್ ದಿಲಾಂ (ಧುಂವ್ನ್ ಪುಸುಂಕ್?), ರಾವೊಂಕ್ ಮ್ಹಳ್ಳೆಂ ಘರ್ ಆಸಾ (ಕೊಣಾಚ್ಯಾ ಬಾಪಾಯ್ಚೆಂ ಘರ್?), ತಿ ಲಧಿನ್ ವಾಚ್ಲ್ಲಿ ಆಯ್ಕಾತಾನಾ ಚೆಡ್ವಾಂಚ್ಯಾ ಆವಯ್-ಬಾಪಾಂಯ್ಕ್ ಕಾನಾಂತ್ ಪಾಂಯ್ಜಣಾಂಚೊ ಆವಾಜ್ ಆಯ್ಕಾತಾ, ತಿಂ ದಿಸಾ ಉಜ್ವಾಡಾಕ್ಚ್ ಸ್ವಪ್ಣೆಂವ್ಕ್ ಲಾಗ್ತಾತ್, ಪಕ್ಷಿಕೆರೆಚ್ಯಾ ಸಾಂತ್ ಜುದಾನ್ ತಾಂಕಾಂ ಮಾಗ್ಲ್ಲ್ಯಾಕ್ ಫಾವೊತೊ ಜಾಂವಂಯ್ ಸೊಧುನ್ ದಿಲೊ ಮ್ಹಣ್ ಆನಿ ಏಕ್ ಡಜನ್ ವಾತಿ ಭಾಸಾಯ್ತಾತ್, ಚೆಡ್ವಾಲಾಗಿಂ ವಿಚಾರಿನಾಸ್ತಾಂಚ್ ತಾಂಚಿ ಕಬ್ಲಾತ್ ದಿತಾತ್ ಆನಿ ಪಾಪ್ ಬಾವ್ಡೆಂ ಕಾಮಾಂ ಥಾವ್ನ್ ಘರಾ ಯೆತಾನಾ ತಾಣಿಂ ಏಕ್ ಬರೀಶಿ ಸೈರಿಕ್ ಪಳೆಲ್ಯಾ, ಭುರ್ಗೊ ಭಾರಿಚ್ ಬರೊ, ಸುಶೆಗಾತ್ ಜೊಡ್ತಾ ಆನಿ ತಿಂ ವ್ಹಡ್ಲ್ಯಾ ಬೊಂಗ್ಲ್ಯಾಂತ್ ರಾವ್ತಾತ್ ಮ್ಹಣ್ ಖಚಿತ್ ಕರ್ತಾತ್.
ನಿರಾಧಾರಿ ಚೆಡ್ವಾಂ ಭುರ್ಗಿಂ ಆವಯ್-ಬಾಪಾಯ್ ಥಾವ್ನ್ ಹಿ ಕಾಣಿಂ ಆಯ್ಕೊನ್ ಆಪ್ಲ್ಯಾ ಮತಿಪಡ್ದ್ಯಾರ್ ಮೊಳಾಬ್ ಕಾಂತಂವ್ಚಿಂ ಭಾಂದ್ಪಾಂ ಬಾಂಧ್ತಾತ್, ಭಾಂಗ್ರಾಚೆಂ ಪಾಳ್ಣೆಂ ದೆಖ್ತಾತ್, ಆನಿಂ ತಿಂ ಹಿಂದಿ ಪಿಂತುರಾಂತ್ ನಾಯಕ್-ನಾಯಕಿನ್ ಪದಾಂ ಗಾವುನ್ ಫುಲಾಂ-ತೋಟಾಂನಿ ಧಾಂವ್ಚೆಂ, ಉಡ್ಚೆಂ, ಪೊಟ್ಲುನ್ ಧರ್ಚೆಂ, ಚುಂಬನ್ ದಿಂವ್ಚೆಂ ದೃಶ್ಯ್ ಆಟಯ್ತಾತ್! ಪಂದ್ರಾಚ್ ದೀಸಾಂನಿ ಬೆಂಡ್ಕಾರ್ ತಾಂಚ್ಯಾ ಝಾಲಾಂತ್ ಬೇಂಡ್ ಫುಂಕ್ತಾತ್, ಘರ್ ಆಡವ್ ಘಾಲ್ನ್ ಕೆಲ್ಲಿ ತಿ ಸರ್ಬಾರಾಯ್ ಸೆಜಾರ್ಯಾಂಕ್ ಚಿಂತುಂಕ್ ಅವ್ಕಾಸ್ ದಿತಾ; ತರೀ ನೊವ್ರೊ ವಿದೇಶಾಂತ್ಲೊ ತೆಂ ಆಯ್ಕೊನ್ ತಾಂಕಾಂಯ್ ಮಾತ್ಸೆಂ ಸಮಾಧಾನ್ ಭೊಗ್ತಾ.
ಲಗ್ನ್ ಜಾಲೆಂ ದಬಾಜಾನ್ ಕಾಡುನ್ ರೀಣ್ ಬೇಂಕಾ ಥಾವ್ನ್. ಹೊಕಾಲ್ ನೊವ್ರೊ ಹನಿಮೂನಾಕ್ ಊಟಿ ಗೆಲ್ಯಾಂತ್; ವಾಟೆರ್ ಬೆಂಗ್ಳುರ್-ಮೈಸೂರ್ಯ್ ವಚೊನ್ ಯೆಂವ್ಚ್ಯಾರ್ ಆಸಾತ್. ಬಸ್ಸಾ ಥಾವ್ನ್ ದೆಂವ್ಲ್ಲೊಚ್ ನೊವ್ರೊ ಏಕಾ ಶೊಪಾಕ್ ವೆತಾ, ಏಕ್ ಬ್ರಾಂದಿಚಿ ಬೋತ್ಲ್ ಬೇಗಾಂತ್ ಚೆಪ್ತಾ; ಹೊಕ್ಲೆನ್ ವಿಚಾರ್ಲ್ಲ್ಯಾಕ್ - ಇಲ್ಲೆಶೆಂ ಘೆತ್ಲ್ಯಾರ್ ಮಝಾ ಭಾರಿಚ್ ಮಧುರ್ ಜಾತಾ ಮ್ಹಣ್ ಹೊಕ್ಲೆಕ್ ಥಂಡ್ ಕರ್ತಾ; ತರೀ ಹೊಕ್ಲೆಚ್ಯಾ ಮತಿಂತ್ ಚಿಂತಾಪ್ ಕಾಂತಯ್ತಾ - ಪಿಯೆನಾ ಮ್ಹಳ್ಳೊ ಆತಾಂ ಪಿಯೆಂಚ್ಕ್ ಸುರು ಕರ್ತಾ? ಪುಣ್ ನೊವ್ರ್ಯಾನ್ ದಿಲ್ಲೆಂ ಸೂಚನ್ ತಿಕಾ ರುಚ್ತಾ - ತಿಂ ಹನಿಮೂನಾಚೆರ್ ಆಸಾತ್; ತಾಕಾಯ್ ಬರೋ ಮೋಗ್ ಕರುಂಕ್ ಜಾಯ್, ಪೊಟ್ಲುನ್ ಧರುಂಕ್ ಜಾಯ್, ಚುಂಬನ್ ದೀಂವ್ಕ್ ಜಾಯ್, ಇತ್ಯಾದಿ, ಇತ್ಯಾದಿ.
ಏಕ್ ಹಫ್ತ್ಯಾಚೆಂ ತಾಂಚೆಂ ಹನಿಮೂನ್ ಭಾರಿಚ್ ಮಧುರಾಯೆಚೆಂ ಜಾತಾ, ತಿಂ ಸಂಸಾರಾಂತ್ಚ್ ಸ್ವರ್ಗ್ ಪಳೆತಾತ್ ಆನಿ ಏಕ್ ಕೂಡ್, ಏಕ್ ಕಾಳಿಜ್ ಆನಿ ಏಕ್ ಮನ್ ಜಾವ್ನ್ ಪಾಟಿಂ ಘರಾ ಪರ್ತಾತಾತ್. ಯೆಂವ್ಚ್ಯಾ ಹಫ್ತ್ಯಾಂತ್ ನೊವ್ರ್ಯಾಕ್ ಪಾಟಿಂ ಗಲ್ಫಾಕ್ ವಚೊಂಕ್ ಆಸಾ; ತುರ್ತಾಚಿ ತಯಾರಾಯ್ ಜಾತಾ; ಕುಟ್ಮಾದಾರಾಂಗೆರ್ ಜೆವ್ಣಾಂ ಜಾತಾತ್; ಭಾರಿಚ್ ಗಮ್ಮತಾಯೆನ್ ನೊವ್ರೊ ಆನಿ ಹೊಕಾಲ್ ವೆಗಿಂಚ್ ಗಲ್ಫಾಕ್ ವಚೊನ್, ಸಾಂಗಾತಾ ರಾವೊನ್, ಕಾಮ್ ಪಳೆವ್ನ್, ಕುಟಾಮ್ ಬಾಂದ್ಚಿ ವಿಲೆವಾರಿ ಮತಿಂತ್ಚ್ ಕರ್ತಾತ್.
ನೊವ್ರ್ಯಾಕ್ ಪಾಟಿಂ ವೆಚೊ ದೀಸ್ ಉದೆಲಾ, ಹೊಕಾಲ್ ಹುಸ್ಕಾರ್ನ್ ಸುಸ್ಕಾರ್ನ್ ರಡ್ತಾ, ನೊವ್ರ್ಯಾಕ್ ಹೆಣೆಂ ತೆಣೆಂ ಪೊಟ್ಲುನ್ ಧರುನ್ ಉಮೆ ದಿತಾ ಆನಿ ನಿಮಾಣೆಂ ಬಜ್ಪ್ಯಾಂ ವಿಮಾನ್ ಥಳಾಕ್ ವಚೊನ್ ತಾಕಾ ತಿ ಆದೇವ್ಸ್ ಮಾಗ್ತಾ. ದೀಸ್ ಪಾಶಾರ್ ಜಾತಾತ್, ಕಾಗ್ದಾಂ-ವೀಜ್ ಕಾಗ್ದಾಂ ಯೆತಾತ್; ತಾಂಚೆ ಉಮೆ ಆತಾಂ ಪತ್ರಾಂ ಮುಖಾಂತ್ರ್ ಆಶಾರ್ ಪಾಶಾರ್ ಜಾತಾತ್. ಸವ್ಕಾಸ್ ಹೊಕಾಲ್ ನೊವ್ಚ್ಯಾಲಾಗಿಂ ಪತ್ರಾಂ ಮುಖಾಂತ್ರ್ ವಿಚಾರ್ತಾ - ತಾಕಾ ಗಲ್ಫಾಕ್ ವೆಚ್ಯಾ ವಿಜಾ ವಿಶ್ಯಾಂತ್ ಕಿತೆಂ ಖಬಾರ್ ಮ್ಹಣ್.
ನಾ, ನೊವ್ರ್ಯಾಚಿ ಜವಾಬ್ಯೀ ನಾ ಆನಿ ಪತ್ರ್ಯೀ ನಾ! ಕುಳಾರಾ ನೊವ್ರ್ಯಾಚಿ ಆವಯ್ ಸುನೆಚೆರ್ ಒತ್ತಡ್ ಘಾಲ್ತಾ, ಕಾಮ್ ಜಾವ್ನ್ ಆಯಿಲ್ಲೆಂಚ್ ಘರ್ಚೆಂ ಕಾಮ್ ಕರುಂಕ್ ಸಾಂಗ್ತಾ, ವಸ್ತುರ್ ಉಂಬ್ಳುಂಕ್, ಆಯ್ದಾನಾಂ ಘಾಸುಂಕ್, ಕಾಮಾಚೊ ಭೊರೊ ಚಡೊನ್ಂಚ್ ಯೆತಾ! ಹೊಕ್ಲೆನ್ ವಾರ್ಯಾರ್ ಬಾಂದ್ಲ್ಲಿಂ ತಿಂ ಕಟ್ಟೋಣಾಂ ಏಕೇಕ್ಚ್ ಕೊಸ್ಳೊನ್ ಪಡ್ತಾತ್. ತೆಣೆಂ ಹೊಕ್ಲೆಚ್ಯಾ ಕುಟ್ಮಾಂತ್ಲಿಂ, ಮಿತ್ರಿಣ್ಯೊಂ ಸದಾಂ ಮ್ಹಳ್ಳ್ಯಾಪರಿಂ ವಿಚಾರುನ್ಂಚ್ ಆಸಾತ್ - ತುಂ ಕೆನ್ನಾಂ ನೊವ್ರ್ಯಾಲಾಗಿಂ ವೆತಾಯ್?
ಕಿತೆಂ ಜವಾಬ್ ದಿಂವ್ಚಿ ತಾಣೆಂ? ಸಾಸುಮಾಂಯ್ಚಿ ಕರಂದಾಯ್ ಸೊಸುಂಕ್ ತಾಂಕಾನಾಸ್ತಾಂ ತೆಂ ಆತಾಂ ಆಪ್ಲ್ಯಾಚ್ ಆದ್ಲ್ಯಾ ಘರಾ ಆವಯ್-ಬಾಪಾಯ್ಲಾಗಿಂ ರಾವೊಂಕ್ ಆಯ್ಲಾಂ; ಬಾಪಯ್ ಆತಾಂ ಘರ್ಚೆಂ ರೀಣ್ ಫಾರಿಕ್ ಕರುಂ ಆಸ್ಚಿ ತಿ ಬೃಹತ್ ಜವಾಬ್ದಾರಿ ಚಿಂತುನ್ ಕಂಗಾಲ್ ಜಾಲಾ; ಹರ್ಶೆಂ ಸಾಟ್ ಪಿಯೆಂವ್ಚೊ ತೊ ಆತಾಂ 180 ಪಿಯೆಲ್ಯಾರ್ಯ್ ಪಾವಾನಾ ಕಸೊ ಜಾಲಾ. ಘರ್ಚ್ಯಾಂ ಮಧೆಂ ಆತಾಂ ತೆಂ ಪಯ್ಲೆಂಚೆಂ ಮೊಗಾ ಮಯ್ಪಾಸಾಚೆಂ ಉಲವ್ಣೆಂ ಬಂಧ್ ಜಾಲಾಂ.
ಕಾರಣ್?
ಕಾರಣ್ ಏಕ್ಚ್ - ಬನಾವಟಿ ಕಾಜಾರ್! ನೊವ್ರೊ ಗಲ್ಫಾಂತ್ ಎಕಾ ಕುಡಾಂತ್ ಹೆರಾಂ ಪಾಂಚ್ ದಾದ್ಲ್ಯಾಂಸಂಗಿಂ ಭಾಡೆಂ ದೀವ್ನ್ ವಸ್ತಿ ಕರುನ್ ಆಸಾ; ತಾಚ್ಯಾ ಕಾಮಾ ಥಾವ್ನ್ ಮೆಳ್ಲ್ಲೊ ಸಾಂಬಾಳ್ ತಾಕಾ ತಾಚೆಂಚ್ ಮ್ಹಳ್ಳೆಂ ಘರ್ ಭಾಡ್ಯಾಂಕ್ ಘೆಂವ್ಕ್, ಲಗ್ನ್ ಜಾಲ್ಲ್ಯಾ ಹೊಕ್ಲೆಕ್ ಹಾಡ್ನ್ ಗಲ್ಫಾಂತ್ ದವ್ರುಂಕ್ ಪಾವಾನಾ ಜಾಲ್ಲ್ಯಾನ್ ಫಟಿ ಮಾರುನ್ ಕಾಜಾರ್ ಜಾಲ್ಲೊ ತೊ ಆತಾಂ ಭಿರಾಂಕುಳ್ ಜಾಳಾಂತ್ ಶಿರ್ಕಾಲಾ!
ಅಸೆಂ ಘಡ್ಚೆಂ ಆತಾಂ’ತಾಂ ಸದಾಂಚೆ ಕಸೆಂ ಜಾಲಾಂ. ಭಾನಾವ್ನ್ ಲಗ್ನಾಂ ಜಾತಾತ್ ಆನಿ ಏಕಾಮೆಕಾಚೊ ಭರ್ವಸೊ ಹೊಗ್ಡಾಯ್ತಾತ್. ಫಕತ್ತ್ ಫಟಿಂಚಿ ಶಿಂಖಳ್ ಲಗ್ನಾಚೆ ಮ್ಹಾಲಿ ಗುಂತುನ್ ತೆ ತಾಂಚೊ ಮುನಾಫೊ ಘೆವ್ನ್ ಪೊಳ್ತಾತ್.
ಚತ್ರಾಯ್ ವ್ಹಡಿಲಾಂನೊ, ಚತ್ರಾಯ್ ಘೆಯಾ ತುಮಿಂ ಕೊಣಾಯ್ ವಿದೇಶಾಂತ್ಲಿ ಸೈರಿಕ್ ಘಟ್ ಕರ್ತಾನಾ. ಪರಿಪೂರ್ಣ್ ವಿಚಾರ್ - ಉಚಾರ್ ನಾಸ್ತಾಂ ಸಕಾಳಿಂ ಪಳೆಲ್ಲ್ಯಾ ಬಾಂಯ್ತ್ ರಾತಿಕ್ ವಚೊನ್ ಪಡಾನಾಕಾತ್. ತುಮ್ಚ್ಯಾ ಧುವೆಚೆಂ ಜೀವನ್ ಕಂಗಾಲ್ ಕರಿನಾಕಾತ್. ಉಪ್ರಾಂತ್ ಚುರ್ಚುರ್ಚ್ಯಾ ಬದ್ಲಾಕ್ ಪಯ್ಲೆಂಚ್ ಚಿಂತುನ್ ಫಾವೊತೆಂ ಮೇಟ್ ಕಾಡಾತ್. ಜಾಂವ್ ತೆ ಗಲ್ಫಾಂತ್ಲೆ, ವ ಖಂಚ್ಯಾಯ್ ಪರ್ದೇಶಾಂತ್ಲೆ, ಪಯ್ಲೆಂ ವ್ಹೊರಯಾತ್ ಉಪ್ರಾಂತ್ ಝರಯಾತ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
