ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 66. ರೊದಾಂ ನಾತ್ಲ್ಲೆಂ ರಥ್
ಪ್ರಕಾಶ್ ಬಂಟ್ವಾಳ್: ಕೊಂಕ್ಣೆಂತ್ ಹಾಣೆಂ ಬರಯಿಲ್ಲ್ಯೊ ಮಟ್ವ್ಯೊ ಕಾಣ್ಯೊ ಥೊಡ್ಯೊಚ್ಚ್ ತರ್ಯೀ, ಅಪ್ಲಿ ಮಿನತ್ ಜ್ಯಾರಿ ದವರುಂಕ್ ಸಕಾತ್ ತರ್, ಕೊಂಕ್ಣೆಂತ್ ಏಕ್ ಭರ್ವಶ್ಯಾಚೊ ಕಾಣ್ಯೆಗಾರ್ ಜಾಂವ್ಕ್ ಹೊ ಸಕ್ತಲೊ ಮ್ಹಣ್ಚಾಂತ್ ಕಸಲೊಚ್ಚ್ ದುಭಾವ್ ನಾ.
ಪ್ರಕಾಶ್ ಬಂಟ್ವಾಳ್
ಕುಜ್ನಾಂತ್ ಆಸ್ಚಾ ಮೆಜಾಚೆರ್ ಚಾಚೊ ಗ್ಲಾಸ್ ದವರ್ನ್ ಕದೆಲಾರ್ ಬಸ್ಲ್ಲ್ಯಾ ಸಾಲುಚ್ಯಾ ಕಾಳ್ಜಾಕ್ ಅವೆಕ್ತ್ ದುಕಿನ್ ರೆವೊಡ್ ಘಾಲ್ಲೊ. ಲಾಗಿಂಚ್ ಆಸ್ಲ್ಲ್ಯಾ ಜಯ್ತ್ ಫ್ರಿಜ್ಜಾಕ್ ವೊಣ್ಕೊನ್ ಸೊಫಿ ರಾವ್ಲ್ಲೆಂ.
"’ಅಶೆಂ ಜಾಲೆಂ ನೆ’ ಮ್ಹಳ್ಳಿ ಏಕ್ ಬೆಜಾರಾಯ್ ಸೋಡ್ಲ್ಯಾರ್ ತುಂ ಕೊಣಾಯ್ಚ್ಯಾ ಪಾಟ್ಲ್ಯಾನ್ ಧಾಂವ್ಲ್ಯಾರ್ಯಿ ಮ್ಹಾಕಾ ಕಾಂಯ್ ಫ಼ರಕ್ ಪಡಾನಾ." ಎಕೆ ಕುಶಿನ್ ಆಯಿಲ್ಲೊ ರಾಗ್ ಸಾಲುನ್ ಮುಕಾರ್ ದಾಕಯ್ಲೊ ನಾ.
ಸೊಫಿನ್ ಜಾತಿಭಾಯ್ಲ್ಯಾ ಚೆಡ್ಯಾಲಾಗಿಂ ಕಾಜಾರ್ ಜಾಂವ್ಚೆಂ ತಾಕಾ ಬಿಲ್ಕುಲ್ ಖುಶಿ ನಾತ್ಲ್ಲೆಂ.
"ಮ್ಹಾಕಾ ತುಜಿ ಸಲಹಾ ಜಾಯ್" ಪಯ್ಲೆಂಚ್ ಆಪ್ಲಿಂ ಉತ್ರಾಂ ಸೊಫಿನ್ ಚಿಂತುನ್ ದವರ್ಲ್ಲಿಂ.
"ಮ್ಹಜಿ ಸಲಹಾ ತುಕಾ ಕಾಂಯ್ ಉಪ್ಕಾರಾಕ್ ಪಡ್ಚಿನಾ. ತಶೆಂ ಗರ್ಜೆ ಭಾಯ್ರ್ ಕೊಣಾಯ್ಕಿ ಸಲಹಾ ದಿಂವ್ಚಿ ಸವಯ್ ಮ್ಹಾಕಾ ನಾ" ಕೊಡ್ಸಾಣೆನ್ ಉಲಯ್ಲೊ ಸಾಲು.
"ಹ್ಯಾವಿಶಿಂ ತುಜಿಚ್ ಮ್ಹಳ್ಳಿ ಏಕ್ ಅಭಿಪ್ರಾಯ್ ಖಂಡಿತ್ ಆಸ್ತೆಲಿಚ್ ಪಳೆ" ಸೊಫಿನ್ ಕಶ್ಟಾಂನಿ ಹಾಸ್ಚೆಂ ಪ್ರೇತನ್ ಕೆಲೆಂ.
"ಮ್ಹಜೆ ಅಭಿಪ್ರಾಯೆಕ್ ತುವೆಂ ಕಾಂಯ್ ಮೋಲ್ ದಿಂವ್ಚೆಪರಿಂ ದಿಸನಾ" ಸೊಫಿಚೆಂ ಮನ್ ಪರಿವರ್ತನ್ ಕರ್ಚಿ ಏಕ್ ಉಮೆದ್ಯಿ ಸಾಲುಕ್ ಆಸ್ಲ್ಲಿ.
"ಪುಣ್ ಮ್ಹಾಕಾ ಆಯ್ಕೊಂಕ್ ಮನ್ ಆಸಾ" ಸೊಫಿನ್ ಒತ್ತಾಯ್ ಕೆಲಿ.
"ಪಿಶೆಪಣ್ ಆದಾರ್ತಾಯ್ ತುಂ. ರಾತಿಕ್ ಪಳೆಯಿಲ್ಲೆ ಬಾಂಯ್ತ್ ದಿಸಾಕ್ ಪಡ್ಚೆಂ ಮ್ಹಣ್ಚ್ಯಾಕ್ ತುಜೆಪ್ರಾಸ್ ವರ್ತಿ ರುಜ್ವಾತ್ ದಿಸ್ರಿ ಆಸ್ಚಿ ನಾ" ದಾಕ್ಶೆಣ್ ನಾಸ್ತಾಂ ಮ್ಹಣಾಲೊ.
ಥೋಡೊ ವೇಳ್ ಥಂಯ್ ಕಾಂಯ್ ಉಲವ್ಣೆಂ ಚಲ್ಲೆಂ ನಾ.
ಕುವೇಯ್ಟ್ ಎಕಾಚ್ ಬಂಗ್ಲ್ಯಾಂತ್ ವೀಸ್ ವರ್ಸಾಂ ಥಾವ್ನ್ ಬೊಟ್ಲೆರಾಚೆಂ ಕಾಮ್ ಕರ್ನ್ ಆಸ್ಚೊ ಸಾಲು ಗಾಂವಾನ್ ಬೆಳ್ಮಣ್ಚೊ ಜಾಲ್ಯಾರ್ ತ್ಯಾಚ್ ಬಂಗ್ಲ್ಯಾಂತ್ ಪಾಟ್ಲ್ಯಾ ಪಾಂಚ್ ವರ್ಸಾಂಥಾವ್ನ್ ಆಯಾಚೆಂ ಕಾಮ್ ಕರ್ನ್ ಆಸ್ಚೆಂ ಸೊಫಿ ಬಂಟ್ವಾಳ್ಚೆಂ. ಗಾಂವಾಂತ್ ಸೊಫಿಚ್ಯೆ ಪ್ರಾಯೆಚೆಂ ಚೆಡುಂ ಆಸ್ಚ್ಯಾ ಸಾಲುಕ್ ಉಲವ್ಣ್ಯಾಂತ್ ಸುಡಾಳ್, ಚಾಲಿಂತ್ ಸುಡ್ಸುಡಿತ್ ಆನಿ ಅಪೂರ್ವ್ ಸೊಭಾಯೆಚೆಂ ಸೊಫಿ ಏಕ್ ಆದರ್ಶ್ ಚೆಡುಂ. ಕೊಣಾಯ್ಕಿ ವಾಯ್ಟ್ ಚಿಂತಿನಾ ಜಾಂವ್ಚ್ಯಾ ಸಾಲುಚೆರ್ ಸೊಫಿಕ್ಯ್ ಅಭಿಮಾನ್. ಪಾಂಚ್ ವರ್ಸಾಂಥಾವ್ನ್ ಎಕಾಮೆಕಾ ಮಾಯಾಮೊಗಾನ್ ಸುದಾರ್ಸುನ್ ಸಾಂಗಾತಾ ಕಾಮ್ ಕೆಲ್ಲ್ಯಾ ತಾಂಚ್ಯಾಮಧೆಂ ಏಕ್ ಬರೊ ಸಂಬಂದ್ ರುತಾಂ ಜಾಲ್ಲೊ.
ಚಡಾವತ್ ಹರೆಕೆ ಸಂಗ್ತಿಂತ್ ಸೊಫಿಸಂಗಿಂ ಸಹಮತಾನ್ ಆಸ್ಚೊ ಸಾಲು, ತೆಂ ಆತಾಂ ಬಂಗ್ಲ್ಯಾಂತ್ಲೊ ಡ್ರಾಯ್ವರ್ ಹಮೀದಾಲಾಗಿಂ ಕಾಜಾರ್ ಜಾತಾ ಮ್ಹಣ್ತಾನಾ ಉಪ್ರಾಟ್ಲೊ.
ಮುಕಾರ್ಚ್ ಉಭೆಂ ಆಸ್ಚ್ಯಾ ಸೊಫಿಚೆರ್ ತಾಣೆಂ ದೀಶ್ಟ್ ವ್ಹೆಲಿ.
"ಹೊ ವಿಶಯ್ ಮ್ಹಜೆಲಾಗಿಂ ಸಾಂಗ್ಚಿ ತುಕಾ ಕಿತೆಂ ಗರ್ಜ್ ಆಸ್ಲ್ಲಿ?" ಆಪ್ಲ್ಯಾ ದೊಳ್ಯಾಂಮುಕಾರ್ ಆಪ್ಲೆ ಖುಶೆವಿರೋದ್ ಅಶೆಂ ಘಡ್ತಾನಾ ಭೊಗ್ಚಿ ಅಸಹಾಯಕತಾ ಸಾಲುಚ್ಯಾ ತಾಳ್ಯಾಂತ್ ಝಳ್ಕತಾಲಿ.
ಮ್ಹಜಿಂ ಮ್ಹಳ್ಯಾರ್ ತುಮಿ ದೊಗಾಂಚ್ ಹಾಂಗಾ ಆಸ್ಚಿಂ" ಜಾಪ್ ದಿತಾನಾ ಸೊಫಿ ಇಲ್ಲೆಂ ಕಾವ್ಜೆಲೆಂ.
"ಎಕಾ ತೆಂಪಾರ್ ದೋಗ್ ಆಸ್ಲ್ಲೆ. ಆತಾಂ ಎಕ್ಲೊಚ್ ಮ್ಹಣ್ ಸಾಂಗ್" ಉಕಲ್ಲ್ಲೊ ಚಾಚೊ ಗ್ಲಾಸ್ ಸಾಲುನ್ ಪಾಟಿಂ ದವರ್ಲೊ. "ತುಕಾ ಹಾವೆಂ ವ್ಹಡಾ ಮೊಗಾನ್ ಪಳೆಯಿಲ್ಲಿ ಮ್ಹಜಿ ಚೂಕ್ ಜಾಲಿ. ಆಮ್ಕಾಂ ಸಂಬಂದ್ ನಾ ತರ್ಯಿ ತುಜಿ ಮ್ಹಾಕಾ ವರ್ತಿ ಖಂತ್ ಭೊಗ್ತಾ. ತುಜೆಂ ಬರೆಪಣ್ ಹಾಂವ್ ಆಶೆತಾಂ" ಅಪ್ಲೆ ಧುವೆಬರಿಚ್ ಸೊಫಿಚೊ ಮೋಗ್ ಕೆಲ್ಲ್ಯಾನ್ ಸಾಲುಚೊ ತಾಳೊ ಭರೊನ್ ಆಯ್ಲೊ.
ಕಿತೆಂ ಉಲಂವ್ಚೆಂ ಕಳನಾಸ್ತಾಂ ಸೊಫಿ ವೊಗೆಂ ರಾವ್ಲೆಂ.
"ಆತಾಂ ಮುಕಾರ್ ಕಿತೆಂ ಸಾಂಗ್ತಾ ತೊ?" ತಡ್ವುಂಕ್ ತಾಂಕಾನಾಸ್ತಾಂ ಥೊಡ್ಯಾ ವೆಳಾನ್ ಸಾಲುನ್ಂಚ್ ವಿಚಾರ್ಲೆಂ.
"ಕಾಮ್ ಸೊಡ್ನ್ ಗಾಂವಾಕ್ ವಚೊಂಕ್ ಸಾಂಗ್ತಾ" ಸೊಫಿಚಿಂ ಉತ್ರಾಂ ಸರಾಗ್ ವ್ಹಾಳ್ಳಿನಾಂತ್.
"ಉಪ್ರಾಂತ್?"
"ಮಯ್ನ್ಯಾ ಭಿತರ್ ನವಿ ವೀಜಾ ಧಾಡ್ತಾ ಖಂಯ್" ಸೊಫಿನ್ ತಕ್ಶಣ್ ಜಾಪ್ ದಿಲಿ.
"ನವಿ ವೀಜಾ?" ಸಾಲುನ್ ದೊಳೆ ಅಶೀರ್ ಕೆಲೆ. "ಮೆಳ್ಳಿನಾ ತರ್?"
"ಖಂಡಿತ್ ಧಾಡ್ತಲೊ. ತಿತ್ಲಿ ಪಾತ್ಯೆಣಿ ದವರಿನಾ ತರ್ ತಾಚ್ಯಾ ಸಂಗಿಂ ವಚೊಂಕ್ ಹಾಂವೆಂ ತಯಾರ್ ಜಾಂವ್ಚ್ಯಾಂತ್ ಅರ್ತ್ ನಾ."
ಸೊಫಿಚೊ ವಾದ್ ಏಕ್ದಮ್ ಪೊಕ್ಳೊ ದಿಸ್ಲೊ ಸಾಲುಕ್.
"ತುಜಿ ತಕ್ಲಿ ಅಸ್ಕತ್ ಜಾಲ್ಯಾ" ತೊ ವಿರಾರಾಯೆನ್ ಉಲಯ್ಲೊ.
"ಮ್ಹಾಕಾ ತಾಚೆರ್ ಭರ್ವಸೊ ಆಸಾ" ಸವ್ಕಾಸ್ ಮುಕಾರ್ ಆಯಿಲ್ಲ್ಯಾ ಸೊಫಿನ್ ಬಸೊಂಕ್ ಏಕ್ ಕದೆಲ್ ವೊಡ್ಲೆಂ.
"ಫ಼ಟ್ಕಿರ್ಯೊ ಭಾಸವ್ಣ್ಯೊ ಆನಿ ವಿಶ್ವಾಸ್ಘಾತ್ ಕೆಲ್ಲೆ ಸಬಾರ್ ದಾಕ್ಲೆ ಆಮ್ಚೆ ಮದೆಂ ಆಸಾತ್" ಸಾಲುನ್ ಸಮ್ಜಂವ್ಚೆಂ ಪ್ರೇತನ್ ಕೆಲೆಂ.
"ಹಮೀದ್ ತಸಲೊ ನ್ಹಂಯ್. ಪಾಂಚ್ ವರ್ಸಾಂ ಥಾವ್ನ್ ಹಾಂವೆಂ ತಾಕಾ ಪಳೆಯ್ಲಾಂ"
ಸೊಫಿ ಬಸ್ಲೆಂ.
"ಪಾಂಚ್ ವರ್ಸಾಂಥಾವ್ನ್ ಹಾಂವ್ಯ್ ತುಕಾ ಪಳೆವ್ನ್ ಆಸಾಂ" ಬಸ್ಲ್ಲೆಕಡೆನ್ಚ್ ಹುಳ್ವುಳ್ಳೊ ಸಾಲು. "ಮೊಗಾಚೆ ಸುರ್ವೆರ್ ಸಕ್ಕಡ್ ಗೊಡ್ಚ್ ಆಸ್ತಾ ಖಂಯ್."
"ಜಾಂವ್ಕ್ ಪುರೊ. ಹೆರಾಂಮಧೆಂ ಘಡ್ಚೆಂಚ್ ಆಮ್ಚೆಥಂಯ್ಯಿ ಘಡಜೆ ಮ್ಹಣ್ ನಾ.
ಆಮಿ ಕಿತ್ಯಾಕ್ ಏಕ್ ದೆಕಿಭರಿತ್ ಜಿಣಿ ಜಿಯೆಂವ್ಕ್ ಸಾದ್ಯ್ ನಾ?" ಸೊಫಿಚೆಂ ಸವಾಲ್ ಸಾಲುಕ್ ಆಡೂಕ್ ಲಾಗ್ಲೆಂ.
"ತೆಂ ಆಸೊಂದಿ. ತುವೆಂ ಘರಾ ಕಳಯ್ಲಾಂಗೀ?" ಥೊಡೆ ಘಳಾಯೆನ್ ವಿಚಾರ್ಲೆಂ ಸಾಲುನ್.
"ಸವ್ಕಾಸ್ ಸಾಂಗ್ತಾಂ." ಹೆಂ ಏಕ್ ಕಶ್ಟಾಚೆಂ ಕಾಮ್ ಸೊಫಿನ್ ಬಾಕಿ ದವರ್ಲ್ಲೆಂ.
"ತಿಂ ವಿರೋದ್ ಕರ್ತೆಲಿಂಚ್. ಪುಣ್ ಮ್ಹಜೆಂ ಜಿವಿತ್ ಮ್ಹಜೆ ಖುಶೆಪ್ರಕಾರ್ ಜಿಯೆಂವ್ಚೆಂ ಹಕ್ಕ್ ಮ್ಹಾಕಾ ಆಸಾ" ಸೊಫಿಚೊ ತರ್ಕ್ ಅಸಂಬದ್ದ್ ಮ್ಹಣ್ ಭೊಗ್ತಾನಾ ಸಾಲು ಅರ್ದೊ ಖಾಲಿ ಜಾಲ್ಲೊ ಚಾಚೊ ಗ್ಲಾಸ್ ಘೆವ್ನ್ ಉಟ್ಲೊ.
"ಮ್ಹಾಕಾ ಹೆಂ ಸಾಂಗ್ ಸೊಫಿ" ಗ್ಲಾಸ್ ಬೆಶಿನಾಂತ್ ದವರ್ನ್ ತಾಣೆ ಗೊಮ್ಟಿ ಘುಂವ್ಡಾಯ್ಲಿ.
"ಜರ್ ದೆಕಿಭರಿತ್ ಜೊಡೆಂ ಜಾಂವ್ಚೆಂ ತುಜೆ ಪ್ರೇತನ್ ನಿರ್ಫಳ್ ಜಾಲೆಂ ತರ್ ತುಜ್ಯಾಸಂಗಿಂ ತುಜ್ಯಾ ಕುಟ್ಮಾಂತ್ ಉರ್ಲ್ಲ್ಯಾಂಚಿಯಿ ಜಿಣಿ ಕರಂದಾಯೆಚಿ ಜಾತೆಲಿ. ಆನಿ ಜರ್ ತುಜೆಂ ಜಿವಿತ್ ಯಶಸ್ವಿ ಜಾಲೆಂ ತರ್ಯಿ ತುಜ್ಯಾ ಕುಟ್ಮಾಚೆರ್ ಹಾಚೊ ಪರಿಣಾಮ್ ವಾಯ್ಟ್ಚ್ ಜಾತಲೊ ಮ್ಹಳ್ಳೆಂ ತುವೆಂ ಚಿಂತ್ಲಾಂಯ್?" ತೊಪ್ಚೆ ತಸಲಿಂ ಉತ್ರಾಂ ಸಾಂಗೊನ್ ಸಾಲುನ್ ಉದ್ಕಾಚೊ ನಳ್ ಘುಂವ್ಡಾಯ್ಲೊ.
"ಹಾಂವ್ ಜಾಣಾಂ" ತಕ್ಲಿ ಹಾಲಯ್ಲಿ ಸೊಫಿನ್.
"ವ್ಹಡ್ಲೆಂ ಭಯ್ಣ್ ಜಾತಿಭಾಯ್ಲ್ಯಾ ಚೆಡ್ಯಾಲಾಗಿಂ ಕಾಜಾರ್ ಜಾಲಾಂ ಮ್ಹಳ್ಳೊ ವಿಶಯ್ ತುಜ್ಯಾ ಭಯ್ಣಿಂಚೊ ಭುತಾಬರಿ ಪಾಟ್ಲಾವ್ ಕರ್ತಾನಾ ತಾಣಿಂ ಭೊಗ್ಚ್ಯಾ ಕಳ್ವಳ್ಯಾಂಕ್ ತುಂಚ್ ಕಾರಾಣ್ ಜಾತೆಲೆಂಯ್ ಮ್ಹಣ್ ಚಿಂತಾನಾ ತುಕಾ ಖುಶಿ ಜಾತಾ?" ಸಾಲುನ್ ಗ್ಲಾಸ್ ಧುಲೊ.
"ಕುಟ್ಮಾ ಖಾತಿರ್ ಹಾಂವೆಂ ಜಾಯ್ತೆ ಸಾಕ್ರಿಫಿಸ್ ಕೆಲ್ಯಾತ್. ಆತಾಂ ತರ್ಯೀ ಹಾವೆಂ ಮ್ಹಜೆವಿಶಿಂ ಚಿಂತ್ಚ್ಯಾಂತ್ ಕಾಂಯ್ ಚೂಕ್ ಆಸ್ಚಿನಾ" ಜಾಫ್ ದಿಲಿ ಸೊಫಿನ್.
"ತುಜೆವರ್ವಿಂ ತುಜಿ ಆವಯ್ ಪಿಡೆಸ್ತ್ ಜಾಲಿ. ಬಾಪಾಯ್ನ್ ಆಮಾಲ್ ಪಿಯೊಣೆಂ ಸುರು ಕೆಲೆಂ ಮ್ಹಳ್ಳೆಂ ತುಕಾ ದೀಸ್ ರಾತ್ ಧೊಸ್ತೆಲೆಂ" ಸಾಲುನ್ ಸೊಡ್ನ್ ದಿಲೆಂನಾ.
"ತಶೆಂ ಜಾಂವ್ಚೆಂನಾ ಮ್ಹಳ್ಳೊ ಭರ್ವಸೊ ಆಸಾ ಮ್ಹಾಕಾ" ಸೊಫಿನ್ ಕೇಸ್ ಸಾರ್ಕೆ ಕೆಲೆ.
"ನ್ಹಂಯ್ ನ್ಹಂಯ್, ಎಕಾದಾವೆಳಾ ತಶೆಂ ಜಾಲೆಂ ತರ್ ಮ್ಹಳೆಂ" ಸಾಳುನ್ ತೆಂಚ್ ಸವಾಲ್ ಪರತ್ ಘಾಲೆಂ.
"ತಾಚೆವರ್ತಿ ದೂಕ್ ಮ್ಹಾಕಾ ದುಸ್ರಿ ಆಸ್ಚಿ ನಾ"
"ತುಜ್ಯಾ ಕುಟ್ಮಾಚಿಂ, ಸೆಜಾರಿಂ, ತಶೆಂ ಸಯ್ರಿಂ ತುಕಾ ಮಾಂದ್ತಾತ್ ಮ್ಹಣ್ ತುಂ ಕೆದಾಳಾಯ್ ಮ್ಹಜೆಲಾಗಿಂ ಸಾಂಗ್ತಾಲೆಂಯ್" ಸಾಲುನ್ ಅನಿಕ್ಯೀ ಝರಯ್ಲೆಂ.
"ತಿಂ ಸರ್ವಾಂ ತುಕಾ ಕಾಂಟಾಳ್ತೆಲಿಂ. ಪಾವಾನಾತ್ಲ್ಲ್ಯಾಕ್ ತಾಂಚೆಮದೆಂ ಭರ್ಸೊಂಕ್ ತುಕಾ ತ್ರಾಸ್ ಜಾತೆಲೆ."
"ಹ್ಯಾ ಖಂಚ್ಯಾಚ್ ಕಾರಣಾಂಕ್ ಲಾಗೊನ್ ಹಾಂವ್ ಹಮೀದಾಕ್ ಸೊಡುಂಕ್ ತಯಾರ್ ನಾ" ಎಕಾಚ್ ಉತ್ರಾನ್ ತಿರ್ಸಿಲೆಂ ಸೊಫಿನ್. ತಾಚಿಂ ಕಠೀಣ್ ಉತ್ರಾಂ ಆಯ್ಕಲ್ಲ್ಯಾ ಸಾಲುನ್ ಘಡಿಭರ್ ತಾಕಾಚ್ ಚೊಯ್ಲೆಂ. ಉಪ್ರಾಂತ್ ದೀಶ್ಟ್ ಬದ್ಲಿಲಿ.
"ಸೊಫಿ" ಹಾತಾಚಿ ಶೆಳ್ ಪುಸುಂಕ್ ತುವಾಲೊ ವಿಂಚ್ಲೊ ಸಾಲುನ್, "ತುಜೆಲಾಗಿಂ ಆತಾಂ ತರ್ಕ್ ಮಾಂಡುನ್ ಫಾಯ್ದೊ ನಾ. ತುಕಾ ಇತ್ಲೆಂಚ್ ಸಾಂಗ್ತಾಂಕಿ ತುಂ ರೊದಾಂ ನಾತ್ಲ್ಲೆಂ ರಥ್ ವೊಡುಂಕ್ ಪ್ರೇತನ್ ಕರ್ನ್ ಆಸಾಯ್. ಉಜ್ವಲ್ ಫುಡಾರ್ ಮುಕಾರ್ ಝಳ್ಕಾತಾನಾ ವಿರೋದ್ ದಿಶೆನ್ ತುಂ ಚಮ್ಕತಾಯ್. ಹಾಂವೆಂ ಕಿತ್ಲೆಂ ಸಮ್ಜಾಯ್ಲ್ಯಾರ್ಯಿ ತುಕಾ ಆತಾಂ ನಾಟ್ವೊಂಚೆಂನಾ. ತುಜೆ ಖುಶೆಪ್ರಕಾರ್ ಕರ್" ಸಾಲುಕ್ ಥಂಯ್ ರಾವೊಂಕ್ ನಾಕಾ ಜಾಲೆಂ.
"ತಶೆಂ ತರ್ ತುಜ್ಯಾ ಲೆಕಾರ್ ಜಾತಿಭಾಯ್ಲೆಂ ಕಾಜಾರ್ ಏಕ್ ಅಪ್ರಾದ್ ಮ್ಹಣ್ ಜಾಲೆಂ"
ಸೊಫಿಚ್ಯಾ ಉತ್ರಾಂಕ್ ಸಾಲುಚಿ ಚಾಲ್ ಥಾಂಬ್ಲಿ.
"ತುಂ ಅಪ್ರಾದ್ ಆದಾರ್ತಾಯ್ ಮ್ಹಣ್ ಹಾಂವೆಂ ಸಾಂಗೊಂಕ್ ನಾ. ಅಸಲ್ಯಾ ಕಾಜರಾಂನಿ ಮ್ಹಾಕಾ ಭರ್ವಸೊ ನಾ. ಕಾಣ್ಯಾಂನಿ ವಾ ಪಿಂತುರಾಂನಿ ಮಾತ್ ಹಾಕಾ ಸೊಬಾಯ್" ಭಾಯ್ರ್ ವಚೊಂಕ್ ಮುಕಾರ್ ಮೇಟ್ ಕಾಡ್ಲ್ಲೊ ತೊ ರಾವ್ಲೊ. "ಸುರ್ವೆರ್ ಹ್ಯಾ ವಿಶಿಂ ತುವೆಂ ಮ್ಹಜಿ ಅಭಿಪ್ರಾಯ್ ವಿಚಾರ್ಲ್ಲಿಯ್. ಆನಿ ಹಿ ಮ್ಹಜಿ ಖಾಸ್ಗಿ ಅಬಿಪ್ರಾಯ್ ಮ್ಹಳ್ಳೆಂ ಉಡಾಸ್ ಆಸೊಂ." ಸೊಫಿಕ್ ಥಂಚ್ ಸೊಡ್ನ್ ಸಾಲು ಕುಜ್ನಾಂತ್ಲೊ ಭಾಯ್ರ್ ಆಯ್ಲೊ.
ಸಾಲುನ್ ಹಾಚೆ ಉಪ್ರಾಂತ್ ಸೊಫಿಲಾಗಿಂ ಉಲಂವ್ಚೆಂ ಉಣೆಂ ಕೆಲ್ಲೆಂ. ಗರ್ಜೆಶಿವಾಯ್ ತಾಂಚೆಮದೆಂ ಏಕ್ ಸಬ್ದ್ಯಿ ಪಾಶಾರ್ ಜಾಲೊನಾ. ವರ್ಸ್ ಅಶೆಂಚ್ ಉತರ್ಲೆಂ. ಪುಣ್ ಸೊಫಿಥಂಯ್ ಸಾಲುನ್ ಏಕ್ ವಿಶಯ್ ಪಾರ್ಕಿಲೊ. ತೆಂ ಹ್ಯಾ ದಿಸಾಂನಿ ಏಕ್ದಮ್ ಉದಾಸ್ ಆಸ್ತಾಲೆಂ.
ಏಕ್ ದೀಸ್ ಬಂಗ್ಲ್ಯಾಂತ್ ಕೊಣ್ಯಿ ನಾತ್ಲ್ಲ್ಯಾ ವೆಳಾರ್ ಸೊಫಿ ಎಕಾಚ್ಫರಾ ಸಾಲುಚ್ಯಾ ಕುಡಾಕ್ ರಿಗ್ಲೆಂ. ಖಟ್ಲ್ಯಾರ್ ಆಶ್ ಪಡೊನ್ ಟಿವಿ ಪಳೆವ್ನ್ ಆಸ್ಲ್ಲೊ ಸಾಲು ತಾಕಾ ಪಳೆಲ್ಲೆಂಚ್ ಕಾಲುಬುಲೊ ಜಾವ್ನ್ ಉಟೊನ್ ಬಸ್ಲೊ. ಬಂಗ್ಲ್ಯಾಂತ್ ಕೊಣ್ಯಿ ನಾತ್ಲ್ಲ್ಯಾ ವಳಾ ಅಶೆಂ ಕೆದಾಳಾಯ್ ತೆಂ ತಾಚ್ಯಾ ಕುಡಾಕ್ ಆಯಿಲ್ಲೆಂ ನಾ.
ಉಟೊನ್ ಬಸ್ಲ್ಲ್ಯಾ ಸಾಲುನ್ "ಕಿತೆಂ?" ಮ್ಹಣ್ಚ್ಯಾ ಜಿನ್ಸಾರ್ ಸೊಫಿಕ್ ಪಳೆಯ್ಲೆಂ. ಬಾಂದ್ಪಾಸಾಂತ್ ಶಿರ್ಕೊನ್ ಸೊಫಿ ಉತ್ರಾಂ ಉಚಾರುಂಕ್ ಉದ್ದಾಡ್ಲೆಂ.
"ಮ್ಹಾಕಾ ತುಜಿ ಕುಮೊಕ್ ಜಾಯ್" ಬೋವ್ ಕಶ್ಟಾಂನಿ ಸುರ್ವಾತ್ ಕೆಲಿ ತಾನೆ.
"ಹಾಂ!" ಕಿತ್ಲೆಶ್ಯಾ ಮಯ್ನ್ಯಾಂ ಉಪ್ರಾಂತ್ ಸಾಲುನ್ ಸೊಫಿಚ್ಯಾ ದೊಳ್ಯಾಂಕ್ ದೊಳೆ ಮೆಳಯ್ಲೆ.
"ಕಿತೆಂ ಜಾಲಾಂ?"
"ಹಮೀದ್ ಮ್ಹಜೆರ್ ನಾಕಾ ಜಾಲ್ಲೊ ಅಪ್ರಾದ್ ಮಾಂಡ್ತಾ." ಅಶೆಂ ಜಾತೆಲೆಂ ಮ್ಹಣ್ ಸಾಲು ಪಯ್ಲೆಂಚ್ ಜಾಣಾಸ್ಲ್ಲೊ.
"ಕಸಲೊ ಆರೋಪ್?" ನಿರಾಸಕ್ತೆನ್ ವಿಚಾರ್ ಕೆಲೊ ಸಾಲುನ್.
"ಹಾಂವ್ ಪಯ್ಲೆಂಚ್ ದುಸ್ರ್ಯಾಂ ಸಾಂಗಾತಾ ಭಂವ್ಲ್ಯಾಂ ಖಂಯ್. ಮ್ಹಜೆಂ ನ್ಹೆಸಣ್ ಮಾಣ್ಸುಗೆಚೆಂ ನ್ಹಂಯ್ ಮ್ಹಣ್ತಾ. ಹಾಚೆಂ ಉತಾರ್ ಮಿರ್ವೊನ್ ಗೆಲ್ಯಾರ್ ತಾಚ್ಯಾ ಕುಟ್ಮಾಂತ್ ಜಾಗೊ ನಾ ಮ್ಹಣ್ ಭೆಶ್ಟಾಯ್ತಾ. ಹರ್ಯೆಕಾ ಉತ್ರಾಂಕ್ ಖುಬಾಳ್ತಾ. ಪಯ್ಲೆಂ ತೊ ಅಸೊ ನಾತ್ಲ್ಲೊ" ಕುಡ್ಕ್ಯಾ ಉತ್ರಾಂನಿ ಸೊಫಿನ್ ವಿವರಿಲೆಂ.
"ತುಮ್ಚೆ ಮದೆಂ ರಾಜಿ ಪಂಚೆತ್ಕಿ ಕರುಂಕ್ ದಯಕರ್ನ್ ಮ್ಹಾಕಾ ಸಾಂಗಾನಾ. ಅಸಲ್ಯಾ ಕಾಮಾಂನಿ ಮ್ಹಾಕಾ ಅನ್ಭೋಗ್ ನಾ" ಸಾಲುಕ್ ಆತಾಂ ಸೊಫಿಚಿ ವಿಶೇಸ್ ಭಿರ್ಮತ್ ದಿಸ್ಲಿ ನಾ.
"ತಾಚೆಲಾಗಿಂ ರಾಜಿ ಜಾಂವ್ಕ್ ಸೊಡ್, ತಾಚೆಂ ತೋಂಡ್ ಪಳೆಂವ್ಕ್ಯಿ ಮ್ಹಾಕಾ ನಾಕಾ." ಸೊಫಿಚ್ಯಾ ದೊಳ್ಯಾಂನಿ ದುಕಾಂ ಭರ್ಲಿಂ.
"ಬರೆಂ ಜಾಲೆಂ" ಹಾಂಚೆಂ ಸಂಬಂದ್ ತುಟ್ಲ್ಲೊ ಸಾಲುಕ್ ಸಾರ್ಕೆಂ ದಿಸ್ಲೆಂ. "ತುಕಾ ಅನಿಕ್ಯಿ ವಿಂಚವ್ಣ್ಯೊ ಆಸಾತ್. ತಾಚೆವರ್ವಿಂ ಕಾಂಯ್ ತುಜೆ ದೀಸ್ ವಚನಾಂತ್ ಪಳೆ" ಸಾಲುನ್ ಧಯ್ರ್ ದಿಲೆಂ.
"ಪುಣ್ ಆತಾಂ ಪರಿಗತ್ ಹಾತ್ ಮಿರ್ವೊನ್ ಗೆಲ್ಯಾ. ತೊ ಮ್ಹಾಕಾ ಹಾಂಗಾ ಕುಮೊಕ್ ಕರುಂಕ್ ತಯಾರ್ ನಾ. ಗಾಂವಾಕ್ ವಚೊಂಕ್ ಸಾಂಗ್ತಾ. ಅಶೆಂ ಗಾಂವಾಕ್ ವಚೊಂಕ್ ಮ್ಹಜೆವರ್ವಿಂ ಸಾಧ್ಯ್ ನಾ." ಸೊಫಿನ್ ಮಾನ್ ಬಾಗಾಯ್ಲೊ.
"ಗಾಂವಾಕ್?" ಸಾಲುಕ್ ಸಮ್ಜಾಲೆಂನಾ.
"ಮ್ಹಾಕಾ ಆತಾಂ ದೋನ್ ಮಯ್ನೆ!"
ಸೊಫಿಚಿಂ ಉತ್ರಾಂ ಘಡ್ಗಡ್ಯಾಭಾಶೆನ್ ಸಾಲುಚ್ಯಾ ಕಾನಾಂಕ್ ಆಪ್ಟಾತಾನಾ ವಿಶಯ್ ಜಿರವ್ನ್ ಘೆಂವ್ಕ್ ತಾಣೆ ವೇಳ್ ಘೆತ್ಲೊ. ಅವಾಕ್ಕ್ ಜಾವ್ನ್ ಬಸ್ಲ್ಲ್ಯಾ ತಾಚೆ ತಕ್ಲೆಕ್ ಸವ್ಕಾಸ್ ರಗತ್ ಚಡ್ಲೆಂ.
"ಕಿತೆಂ?" ತಾಣೆ ಖಿಳಂಚ್ ಮಾರ್ಲಿ. "ತುಂ ಇತ್ಲೆಂಯ್ ನೀಚ್ ಮ್ಹಳ್ಳೆಂ ಹಾಂವೆಂ ಎದೊಳ್ ಚಿಂತುಂಕ್ ನಾತ್ಲ್ಲೆಂ. ಲಜ್ ದಿಸಾನಾ ತುಕಾ?" ತೊ ಬೊಬಾಟ್ಲೊ.
"ಅಂಕಲ್" ಸೊಫಿನ್ ಮಾಗ್ಲೆಂ. "ಹೆರ್ ಕೊಣಯ್ಕಿ ಕಳನಾತ್ಲ್ಲೆಬರಿ ಹಾಂತ್ಲಿ ಮ್ಹಾಕಾ ಸುಟ್ಕಾ ಜಾಯ್" ಖಂಚ್ಯಾಯ್ ಥರಾನ್ ಸೊಫಿಕ್ ಕುಮೊಕ್ ಕರ್ನ್ ಶಿರ್ಕೊನ್ ಪಡ್ಲ್ಯಾರ್ ಆರೋಪ್ ಕಡ್ಕಡ್ಚ್ಯಾ ಸಾಲುನ್ ಹಾತ್ ಜೊಡ್ಲೆ. "ತುಮ್ಚೆ ಮದೆಂ ಮ್ಹಾಕಾ ಭರ್ಶಿನಾಕಾ."
"ಅಂಕಲ್ ಪ್ಲೀಜ್" ಸೊಫಿ ಪಾಂಯಾಂಕ್ ಪಡೊಂಕ್ ತಯಾರ್ ಜಾಲೆಂ.
"ತುಂ ಮ್ಹಾಕಾ ಹಾಂತ್ಲೆಂ ಸಾಲ್ವಾರ್ ಕರುಂಕ್ ಸಕ್ತಾಯ್" ಸೊಫಿನ್ ದೀನ್ಪಣಿಂ ಆವೇಶ್ ಭರ್ಲೊ.
"ವಯ್ರ್ ಬಂಗ್ಲ್ಯಾಚ್ಯಾ ಟೆರೆಸಾರ್ ಚಡ್ ಆನಿ ಉಡಿ ಮಾರ್, ತಶೆಂ ಪುಣ್ಯಿ ತುಜಿ ಜಿಣಿ ಹೆರಾಂಕ್ ದೆಕಿಭರಿತ್ ಜಾಂವ್ದಿ" ಭಿರಾಂಕುಳ್ ಜಾಪ್ ದೀವ್ನ್ ಸಾಲು ಕುಡಾಂತ್ಲೊ ಭಾಯ್ರ್ ಆಯ್ಲೊ.
ಸೊಫಿ ಅಶೆಂ ಕರಿತ್ ಮ್ಹಣ್ ಸಾಲುನ್ ಸಪ್ಣಾಂತ್ ಸಯ್ತ್ ಚಿಂತುಂಕ್ ನಾತ್ಲ್ಲೆಂ. ಪುಣ್ ದೆದೆಸ್ಪೊರ್ ಜಾಲ್ಲೆ ಸೊಫಿನ್ ಸಾಲುನ್ ಸಾಂಗ್ಲ್ಲೆಬರಿಚ್ ಕೆಲ್ಲೆಂ.
ತ್ಯಾಚ್ ದಿಸಾ ಸಾಂಜೆರ್ ತಾಣೆಂ ಜೀವ್ಘಾತ್ ಕೆಲ್ಲೊ. ರಗ್ತಾಚ್ಯಾ ಕೊಂಡಾಂತ್ ಪಡೊನ್ ಆಸ್ಚೆ ಸೊಫಿಕ್ ಪಳಯಿಲ್ಲೊ ಸಾಲು ಸಗ್ಳೊಚ್ ಥರ್ಥರ್ಲೊ. ಮುಕ್ಲ್ಯಾ ಸಬಾರ್ ದಿಸಾಂನಿ ತಾಕಾ ಸಾರ್ಕಿ ನೀದ್ಚ್ ಪಡ್ಲಿನಾ. ಸೊಫಿ ಸಾಂಗಾತಾ ಪಾಶಾರ್ ಜಾಲ್ಲ್ಯಾ ಬರ್ಯಾ ದಿಸಾಂಚೊ ಉಡಾಸ್, ಪೊಲಿಸ್, ಆಂಬುಲೆನ್ಸ್, ಆಸ್ಪತ್ರ್ ಆನಿ ತಕ್ಲಿ ಭೆಸಾಂ ಜಾವ್ನ್ ವಿದ್ರೂಪ್ ದಿಸ್ಚೆಂ ಸೊಫಿ ಹಿಂಚ್ ಚಿತ್ರಾಂ ತಾಚ್ಯಾ ದೊಳ್ಯಾಂ ಮುಕಾರ್ ಪರತ್ ಆನಿ ಪರತ್ ಯೇವ್ನ್ ತಾಕಾ ಧಗ್ದಿತಾಲಿಂ. ಸೊಫಿಕ್ ಆಸ್ಪತ್ರೆಕ್ ವ್ಹೆಲ್ಲ್ಯಾ ಉಪ್ರಾಂತ್ ಸತ್ ಗಜಾಲ್ ಧನ್ಯಾಕ್ ಕಳಯ್ನಾಸ್ತಾಂ ರಾವೊಂಕ್ ಸಾಲುಚ್ಯಾನ್ ಜಲೆಂನಾ. ಪಯ್ಲೆಂಚ್ ಕಳಯ್ನಾತ್ಲ್ಲ್ಯಾಕ್ ಸಾಲುಸವೆಂ ತಾಚೆ ಸಗ್ಳೆ ಸಂತತೆಕ್ ಶಿರಾಫುನ್, ಉಪ್ರಾಂತ್ಲಿಂ ಕಾಮಾಂ ಧನ್ಯಾನ್ ತುರ್ತಾನ್ ಆನಿ ವೆವಸ್ತಿತ್ ರಿತಿನ್ ಕರಯ್ಲಿಂ. ಹಮೀದಾಕ್ ಪೊಲಿಸಾಂನಿ ವ್ಹೆಲ್ಲೊ.
ಲಗ್ಬಗ್ ವೀಸ್ ದಿಸಾಂನಿ ಸೊಫಿಚೆಂ ಮೋರ್ನ್ ಗಾಂವಾಕ್ ಧಾಡ್ಚಿ ವಿಲೇವಾರಿ ಜಾತಾನಾ, ಸಾಲುಕ್ಯಿ ಸಾಂಗಾತಾ ವೆಚೆಖಾತಿರ್ ಟಿಕೆಟ್ ಆಯ್ಲಿ. ವಸ್ತುರ್ ಸುಕತ್ ಘಾಲ್ತಾನಾ ಟೆರೆಸಾವಯ್ಲಿ ಆಕಸ್ಮಿಕ್ ನಿಸರ್ನ್ ಸೊಫಿ ಸಕಯ್ಲ್ ಪಡ್ಲಾಂ ಮ್ಹಳ್ಳಿ ಖಬರ್ ಸಾಲುನ್ ಗಾಂವಾಕ್ ದೀವ್ನ್ ಜಾಲ್ಲಿ. ಅಕೇರಿಚ್ಯಾ ದಿಸಾ ಗಾಂವಾಕ್ ವ್ಹರ್ಚ್ಯಾಕ್ ಸೊಫಿಚ್ಯೊ ಸರ್ವ್ ವಸ್ತು ಭರ್ತಾನಾ ಏಕ್ ಲ್ಹಾನ್ ಆಲ್ಬಮ್ ಪಳೆವ್ನ್ ಸಾಲುಚೆ ಹಾತ್ ಏಕ್ ಪಾವ್ಟಿಂ ಸ್ತಭ್ದ್ ಜಾಲೆ. ಸಗ್ಳೊ ಆಲ್ಬಮ್ ಹಮೀದಾಸವೆಂ ಕಾಡ್ಲ್ಲ್ಯಾ ತಸ್ವೀರ್ಯಾಂನಿ ಭರ್ಲ್ಲೊ. ಪುಣ್ ಚಡಾವತ್ ತಸ್ವಿರ್ಯಾಂನಿ ಸೊಫಿನ್ ಹಮಿದಾಚೆ ದೊಳೆ ಕೊಂಕುನ್ ಕಾಡ್ಲ್ಲೆ! ಮೊರ್ಚೆ ಆದಿಂ ಅಕೆರಿಚಿಂ ತೊಡಿಂ ವೊರಾಂ ಸೊಫಿನ್ ಕಸಲ್ಯಾ ಮಾನಸಿಕ್ ಸ್ಥಿತೆರ್, ಕಸಲ್ಯಾ ಆಟೆವಿಟೆಂನಿ ಪಾಶಾರ್ ಕೆಲ್ಯಾತ್ ಜಾಂವ್ಕ್ ಪುರೊ ಮ್ಹಳ್ಳಿಂ ಚಿಂತ್ನಾಂ ಮತಿಕ್ ಯೆತಾನಾ ಸಾಲುಚ್ಯಾ ಕಾಳ್ಜಾಕ್ ತೊಪ್ಲ್ಲೆಪರಿಂ ಜಾಲೆಂ. ತಾಂತ್ಲ್ಯೊ ಥೊಡ್ಯೊ ಬರ್ಯೊ ತಸ್ವಿರ್ಯೊ ತಾಣೆ ಸಾಂಗಾತಾ ಘೆತ್ಲ್ಯೊ.
ಲೊಕಾಂಮದೆಂ ಎಕ್ಲ್ಯಾಕ್ ಮೆಳ್ಚೆ ತಸಲೆ ವಿಶಿಶ್ಟ್ ಜವಾಬ್ಧಾರೆಸಂಗಿಂ ಸೊಫಿಚಿ ನಿರ್ಜೀವ್ ಕೂಡ್ ಘೆವ್ನ್ ಸಾಲು ವರ್ಸಾಭಿತರ್ ದುಸ್ರೆಪಾವ್ಟಿಂ ಗಾಂವಾಕ್ ಭಾಯ್ರ್ ಸರ್ಲೊ. ಕುವೆಯ್ಟ್ ಥಾವ್ನ್ ಮುಂಬಯ್, ಮುಂಬಯ್ ತಪಾಸ್ಣೆಂತ್ ಜಾಲ್ಲ್ಯಾ ಗರ್ಜೆಭಾಯ್ಲ್ಯಾ ಘಳಾಯೆವರ್ವಿಂ, ಬಜ್ಪ್ಯಾಂ ಏರ್ಪೋರ್ಟಾಕ್ ಯೇವ್ನ್ ಪಾವ್ತಾನಾ ಸಾಲುಚೊ ಜೀವ್ ಅರ್ಧೊ ಜಾಲ್ಲೊ. ಬಜ್ಪ್ಯಾಂ ಸೊಫಿಕ್ ಘೆಂವ್ಕ್ ಮುಕಾರ್ ಆಯಿಲ್ಲ್ಯಾ ಲೊಕಾಚೊ ಜಮೊ ಪಳೆತಾನಾ ಸೊಫಿಕ್ ಆನಿ ತಾಚ್ಯಾ ಘರ್ಚ್ಯಾಂಕ್ ಲೋಕ್ ಕಿತ್ಲೊ ಮಾಂಧ್ತಾ ಮ್ಹಳ್ಳ್ಯಾಚೊಅಂದಾಜ್ ಸಾಲುಕ್ ಜಾಲೊ. ಘರಾ ಪಾವ್ಲ್ಲೆಂಚ್ ಆವಯ್ಚೆಂ ಆನಿ ಭಯ್ಣಿಚೆಂ ರುದಾನ್ ಆಯ್ಕೊಂಕ್ ಜಾಯ್ನಾಸ್ತಾಂ ತಾಣೆ ಕಾನಾಕ್ ಹಾತ್ ಧರ್ಲೆ.
ಸೊಫಿ ಆವ್ಘಡಾಂತ್ ನ್ಹಂಯ್ ಬಗಾರ್ ಜೀವ್ಘಾತ್ ಕರ್ನ್ ಅಂತರ್ಲೆಂ ಮ್ಹಣ್ ಕಳವ್ನ್ಚ್ ಪಾಟಿಂ ಕುವೇಯ್ಟ್ ವಚೊಂಕ್ ಸಾಲುನ್ ನಿಚೆವ್ ಕೆಲೊ.
ಹಫ್ತ್ಯಾಚ್ಯಾ ಮಿಸಾಉಪ್ರಾಂತ್ ಏಕ್ ದೀಸ್, ಸೊಫಿಚಿ ಖರಿ ಗಜಾಲ್ ಆಸಾ ತಶಿ ಕಳಂವ್ಚ್ಯಾಕ್ ತಾಚ್ಯಾ ಘರ್ಚಿಂ ಮೆಟಾಂ ಚಡ್ಲೊ ಸಾಲು. ಗರಾ ಸೊಪಿಚೊ ಬಾಪುಯ್ ಬೊನಾ ಮಾತ್ ಆಸ್ಲ್ಲೊ. ಸಾಲುಕ್ ಪಳೆಲ್ಲೆಂಚ್ ಬೊನಾನ್ ದಾರ್ ಉಘಡ್ನ್ ಯೆವ್ಕಾರ್ ಮಾಗ್ಲೊ. ನಿರಾಶಿ, ಅಸ್ಕತ್ ಹಾಸೊ ತಾಚ್ಯಾ ತೊಂಡಾರ್ ಉದೆವ್ನ್ ನಪಂಯ್ಚ್ ಜಾಲ್ಯೊ. ಪಾಶಾರ್ ಜಾಲ್ಲ್ಯಾ ಎಕಾ ಮಯ್ನ್ಯಾನ್ ತಾಚೆರ್ ಬರೊ ಪರಿಣಾಮ್ ಕೆಲ್ಲೊ.
"ದೇವ್ ಆಮ್ಚಿಪರಿಕ್ಶಾ ಕರ್ತಾಶೆಂ ದಿಸ್ತಾ" ಬೊನಾನ್ ಮುಕ್ಲೆಂ ದಾರ್ ಆಡ್ ಕೆಲೆಂ.
ಸವ್ಕಾಸ್ ಹಾತಾಂತ್ಲಿ ಥಯ್ಲಿ ಸಕಯ್ಲ್ ದವರ್ಲಿ.
"ಪುಣ್ ಹೆಂ ಆಮ್ಚೆ ಸೊಸ್ಣಿಕಾಯೆಚೆ ಗಡಿಭಾಯ್ರ್ ಗೆಲಾಂ. ಮ್ಹಜಿ ಯೆಜ್ಮಾನ್ ಸಗ್ಳಿಚ್ ಗಳೊನ್ ಗೆಲ್ಯಾ. ಆಜ್ಯಿ ತಿಕಾ ಧುವ್ ಒಕ್ತಾಕ್ ವ್ಹರ್ನ್ ಗೆಲ್ಯಾ. ಮ್ಹಾಕಾ ಘರಾಭಿತರ್ ರಾವೊಂಕ್ ಮನ್ ಯೇನಾ. ಕಿತೆಂಚ್ ನಾಕಾ ಮ್ಹಣ್ ಭಗ್ತಾ" ಭಾವುಕ್ ಜಾಲ್ಲೊ ತೊಯಿ ಸಾಲುಚ್ಯಾ ಮುಕ್ಲ್ಯಾ ಸೊಫಾಚೆರ್ ಬಸ್ಲೊ.
"ಮೊರ್ನಾಕ್ ತಶೆಂ ಹಫ್ತ್ಯಾಚ್ಯಾ ಮಿಸಾಕ್ ಆಯಿಲ್ಲ್ಯಾ ವೆಳಾರ್ ಸೊಫಿವಿಣೆ ತುಮಿ ಕಿತ್ಲೆಂ ಕರ್ಗತಾತ್ ಮ್ಹಳ್ಳೆಂ ಹಾಂವೆಂ ಪಳೆಲಾಂ" ಸಾಲುಚ್ಯಾ ಕಾಳ್ಜಾಚ್ಯೊ ಉಡ್ಯೊ ಚಡ್ಲ್ಯೊ.
"ಹಿ ಖಬರ್ ಫಟ್ ಜಾಂವ್ದಿ ಮ್ಹಣ್ ಹಾಂವ್ ಆಶೆಲ್ಲ್ಯಾ ತಿತ್ಲೆಂ ಜೀಣ್ಯೆಂತ್ ದುಸ್ರೆಂ ಕಿತೆಂಚ್ ಆಶೆಲ್ಲೊಂ ನಾ. ಹಾಂಗಾಚ್ ಆಸ್ಲ್ಲೆಂ ತರ್ ಆಮ್ಚೆಂ ಚೆಡುಂ ದೊಳ್ಯಾಂ ಮುಕಾರ್ ಆಸ್ತೆಂ. ಪರ್ಗಾಂವಾಕ್ ಧಾಡ್ನ್ ಅಶೆಂ ಜಾಲೆಂ. ಎಕಾ ಲೆಕಾರ್ ಅಮಿಚ್ ಚುಕಿದಾರ್" ತಾಳೊ ಭರೊನ್ ಯೆತಾನಾ ತೊ ಉಲಂವ್ಕ್ ಕಶ್ಟಾಲೊ.
"ಸೊಫಿ ಸರ್ವಾಂಕ್ ಮೊಗಾಚೆಂ ಜಾವ್ನ್ ಆಸ್ಲ್ಲೆಂ ದಿಸ್ತಾ" ಸಾಂಗೊಂಕ್ ಚಿಂತ್ಲ್ಲೊ ವಿಶಯ್ ಉಸ್ತುಂಕ್ ಸಾಲುಕ್ ಅಮ್ಸೊರ್ ಜಾಲೊ.
"ಸೊಫಿ ಸರ್ವಾಂಕ್ ಜಿವಾಚೆಂ. ದೆವಾನ್ ಇತ್ಲಿ ಕಠಿಣ್ ಶಿಕ್ಶಾ ಆಮ್ಕಾಂ ಕಿತ್ಯಾಕ್ ಫಾವೊ ಕೆಲಿ ಮ್ಹಳ್ಳೆಂ ಸಮ್ಜಾನಾ" ಬೊನಾನ್ ದೀಶ್ಟ್ ಧರ್ಣಿರ್ ಖಂಚಯ್ಲಿ.
"ಮ್ಹಜಿ ರಜಾ ಆನಿಕ್ ದೋನ್ ದೀಸ್ ಆಸಾ" ಥೊಡ್ಯಾ ಘಡ್ಯಾಂನಿ ಸಾಲುನ್ ವಿಶಯ್ ಬದ್ಲಿಲೊ. "ಪಂದ್ರಾ ದಿಸಾಂ ಖಾತಿರ್ ಮಾತ್ ಮ್ಹಾಕಾ ಧಾಡ್ಲ್ಲೊ. ಥೊಡೆ ಗರ್ಜೆಚೆ ವಿಶಯ್ ತುಮ್ಕಾಂ ಕಳಯಾಂ ಮ್ಹಣ್ ಹಾಂವ್ ಆಯ್ಲೊಂ" ಸಾರ್ಕೊ ಬಸೊನ್ ಮುಕಾರಿಲೆಂ ಸಾಲುನ್. "ಸೊಫಿಕ್ ಸರ್ವಾಂಚ್ಯಾ ಕಾಳ್ಜಾಂತ್ ಎಕೆ ಸಾಂತಿಣಿಚೊ ಜಾಗೊ ಆಸಾ ಮ್ಹಳ್ಳೆಂ ಸಮ್ಜತಾ. ಪುಣ್ ತೆಂ ಸೊಫಿ, ಪಾಂಚ್ ವರ್ಸಾಂ ಆದಿಂ ಕುವೆಯ್ಟ್ ಪಾಂಯ್ ದವರ್ಚೆ ಆದಿಂ ಆಸ್ಲ್ಲೆ ತಿತ್ಲೆಂ ಸಾದೆಂ, ಭೊಳೆಂ ಜಾವ್ನ್ ಅಕೆರ್ ಪರ್ಯಾಂತ್ ಉರೊಂಕ್ ನಾತ್ಲ್ಲೆಂ."
"ಮ್ಹಳ್ಯಾರ್?" ಚಿಂತುಂಕ್ ಪಡ್ಲ್ಲೊ ಬೊನಾ ಅರ್ಧ್ಯಾ ಮಿನುಟಾ ಉಪ್ರಾಂತ್ ಉಲಯ್ಲೊ.
"ಹಾಂವ್ ಖಂಚ್ಯಾಯ್ ಪಾಡ್ ಇರಾದ್ಯಾನ್ ಹಾಂಗಾ ಯೇಂವ್ಕ್ ನಾ. ಬೋವ್ಶಾ ಪರತ್ ಆಮಿ ಮೆಳ್ಚಿ ಸಾಧ್ಯತಾಯ್ ಭೋವ್ ಉಣಿ. ದೆಕುನ್ ಮ್ಹಜೆ ಮತಿಚ್ಯಾ ಸಮಧಾನಾಕ್ ಆನಿ ತುಮ್ಚ್ಯಾ ಕಾಳ್ಜಾಂತ್ಲಿ ದೂಕ್ ಉಣಿ ಕರುಂಕ್ ತುಮ್ಕಾಂ ಖರಿ ಗಜಾಲ್ ಕಳಂವ್ಕ್ ಆಶೆತಾಂ" ಸಾಲುನ್ ವೊಂಟಾರ್ ಜೀಬ್ ಚರಯ್ಲಿ.
ಬೊನಾ ತಾಕಾಚ್ ಪಳೆಂವ್ಕ್ ಪಡ್ಲೊ.
"ಕಸಲೊ ವಿಶಯ್?" ತೊ ಥೊಡೊ ಆತುರಿತ್ ಜಾಲೊ.
"ಲಾಂಬಾಯೆಚಿಂ ಪಾಂಚ್ ವರ್ಸಾಂ ತುಮ್ಚೆಥಾವ್ನ್ ಪಯ್ಸ್ ಆಸ್ಲ್ಲೆಂ ಸೊಫಿ ಅಕೆರಿಕ್ ಬದ್ಲಾಲ್ಲೆಂ. ತೆಂ ತುಮ್ಕಾಂ ಸರ್ವಾಂಕ್ ಸಾಂಡುನ್ ಪಯ್ಸ್ ವಚೊಂಕ್ ತಯಾರ್ ಜಾಲ್ಲೆಂ" ಸಾಲುನ್ ಸುರ್ವಾತ್ ಕೆಲಿ.
"ಖಂಯ್?" ಬೊನಾ ಅಜ್ಯಾಪ್ಲೊ.
"ಕಾಣಿ ಲಾಂಬ್ ಆಸಾ. ತೆಂ ಎಕಾ ಅಕ್ರಿಸ್ತಾಂವ್ ಚಲ್ಯಾಚ್ಯಾ ಮೊಗಾರ್ ಪಡ್ಲ್ಲೆಂ. ತುಮ್ಕಾಂ ಸರ್ವಾಂಕ್ ಸಾಂಡುನ್, ತಾಚೆಸಂಗಿಂ ವಚೊಂಕ್ ಆಯ್ತೆಂ ಜಾಲ್ಲೆಂ ತೆಂ" ಸಾಲು ಬೊನಾಚ್ಯಾ ತೊಂಡಾರ್ ಜಾಂವ್ಚಿ ಬದ್ಲಾಪ್ ಪಾರ್ಕಿತಾಲೊ.
"ಹಾಂವ್ ಪಾತ್ಯೆನಾ" ಬೊನಾ ಗಾಗೆಲೊ.
"ಪುಣ್ ಹೆಂ ಸತ್. ತ್ಯಾ ಚಲ್ಯಾನ್ ಧಗೊ ದಿಲ್ಲ್ಯಾನ್ಚ್ ಜೀವ್ಘಾತ್ ಕೆಲೊ"
ಸಂಪೂರ್ಣ್ ಗಜಾಲ್ ಕಳಂವ್ಕ್ ಕಿತ್ಯಾಕ್ಗಿ ಸಾಲುಕ್ ಜೀಬ್ ಪರ್ತಾಲಿನಾ. "ತುಮ್ಕಾಂ ಕಳಯಿಲ್ಲ್ಯಾಬರಿ ತೆಂ ಟೆರೆಸಾ ಥಾವ್ನ್ ಸಕಯ್ಲ್ ಪಡ್ಲ್ಲೆಂ ನ್ಹಂಯ್.."
ಆಂಗಾಂತ್ಲೆಂ ರಗತ್ ಸಂಪೂರ್ಣ್ ಚಿಂವೊನ್ ಕಡ್ಲ್ಲೆಬರಿ ಸ್ತಬ್ದ್ ಜಾವ್ನ್ ಬಸ್ಲ್ಲೊ.
"ಅಮಿಂ ಸೊಫಿಕ್ ವಿಸರಿಜೆ ಮ್ಹಳ್ಳ್ಯಾ ಖಾತಿರ್ ತುಂ ಫಟಿ ಮಾರ್ತಾಯ್ ತಶೆಂ ಭೊಗ್ತಾ" ಅಸ್ಪಶ್ಟ್ ಉತ್ರಾಂ ತಾಚ್ಯಾ ತೊಂಡಾಂತ್ಲಿಂ ಭಾಯ್ರ್ ಪಡ್ಲಿಂ.
"ಹಾಂವೆಂ ಹಿ ಗಜಾಲ್ ತುಮ್ಕಾಂ ಕಳಂವ್ಚಿ ಸಾರ್ಕಿಗೀ ವಾ ಚೂಕ್ ಮ್ಹಳ್ಳೆಂ ಮ್ಹಾಕಾ ಕಳಿತ್ ನಾ" ಸಾಲುನ್ ಸಕಯ್ಲ್ ದವರ್ಲ್ಲಿ ಥಯ್ಲಿ ವಿಂಚ್ಲಿ. "ಹಾಂತುಂ ಥೊಡ್ಯೊ ತಸ್ವೀರ್ಯೊ ಆಸಾತ್. ತ್ಯೊ ತುಮ್ಚೊ ದುಭಾವ್ ಥೊಡೊ ಪುಣ್ಯಿ ಪಯ್ಸ್ ಕರುಂಕ್ ಸಕ್ತಲ್ಯೊ" ಸಾಲುನ್ ಥಂಯ್ಲೆಂತ್ಲೆಂ ಏಕ್ ಬಂದ್ ಕವರ್ ಕಾಡ್ಲೆಂ.
ಪಯ್ಲೆಂಚ್ ಬಾವ್ಲ್ಲ್ಯಾ ಬೊನಾಚ್ಯಾ ತೊಂಡಾಚೊ ಛಾರೊ ಪುರ್ತೊ ಬದಲ್ಲೊ.
"ಹೆಂ ಆಯ್ಕೊಂಚ್ಯಾ ಅದಿಂಚ್ ಹಾಂವ್ ಮೆಲ್ಲೊಂ ತರ್ ಕಿತ್ಲೆಂ ಬರೆಂ ಆಸ್ತೆಂ" ನಿಸ್ತೇಜ್ ತಾಳ್ಯಾನ್ ಉಲಯ್ಲೊ ಬೊನಾ.
"ಜರ್ತರ್ ಹಿ ಗಜಾಲ್ ತುಮ್ಕಾಂ ಕಳಂವ್ಕ್ ಹಾಂವೆಂ ಚೂಕ್ ಆದಾರ್ಲ್ಯಾ ಮ್ಹಣ್ ತುಮ್ಕಾಂ ಭಗ್ತಾ ತರ್ ಮ್ಹಾಕಾ ಮಾಫ್ ಕರ್" ಸಾಲು ಬಸ್ಲ್ಲ್ಯಾ ಕಡ್ಚೊ ಉಟೊನ್ ಕವರ್ ಘೆವ್ನ್ ಮುಕಾರ್ ಯೆತಾನಾ ಬೊನಾನ್ ಹಾತ್ ವೊಡ್ಡಾಯ್ಲೊ.
"ತುಕಾ ದುಕಯಿಲ್ಲ್ಯಾಕ್ ಹಾಂವ್ ಬೆಜಾರ್ ಪಾವ್ತಾಂ" ಸಾಲುಚ್ ಪರತ್ ಉಲಯ್ಲೊ.
"ಆನಿ ಹಾಂವೆಂ ವಚ್ಯೆತ್ ಮ್ಹಣ್ ಚಿಂತಾಂ."
"ಸೊಫಿಚೆಂ ಹೆಂ ರೂಪ್ ಕೊಣ್ಚ್ ಪಾತ್ಯೆಂವ್ಚಿನಾಂತ್" ದುಕಾಂ ಥೆಂಬೆ ಜಾವ್ನ್ ತಾಚ್ಯಾ ದೊಳ್ಯಾಂತ್ಲಿಂ ಗಳ್ಳಿಂ. ಥಂಯ್ ರಾವೊಂಕ್ ತಾಂಕಾನಾಸ್ತಾಂ ಸಾಲುನ್ ದಾರಾ ಕುಶಿನ್ ಮೆಟಾಂ ಕಾಡ್ಲಿಂ.
ಘರ್ಚಿಂ ಮೆಟಾಂ ದೆಂವೊನ್ ಆಂಗ್ಣಾಂತ್ಲ್ಯಾನ್ ಪಾಶಾರ್ ಜಾತಾನಾ, ಸತ್ ಗಜಾಲ್ ಸಂಬಂದ್ ಜಾಲ್ಲ್ಯಾಂಕ್ ಕಳಯಿಲ್ಲ್ಯಾಕ್ ಸಾಲುಕ್ ಎಕಾ ಥರಾಚೆಂ ಸಮದಾನ್ ಭಗ್ಲೆಂ.
ಮುಕ್ಲಿ ಗೇಟ್ ಉತರ್ನ್, ಭಯ್ರ್ ರಾವಯಿಲ್ಲೆ ಟೆಕ್ಸೆಚೆರ್ ತೊ ಬಸ್ಲ್ಲೊಚ್ ಡ್ರಾಯ್ವರಾನ್ ಕಾರ್ ಚಾಲು ಕೆಲೆಂ. ಆನಿ ಕಿತೆಂ ವೆತಾಂ ಮ್ಹಣ್ತಾನಾಚ್ ಬೊನಾ ಕಾರಾಚ್ಯಾ ದಾರಾಲಾಗಿಂ ಉಭೊ ಜಾಲೊ.
"ತುವೆಂ ಆಮ್ಕಾಂ ಮಸ್ತ್ ಉಪ್ಕಾರ್ ಕೆಲಾಯ್. ಸಾರ್ಕೆಂ ಸಾಂಗ್ಚೆಂ ತರ್ ಆಮ್ಚೆ ಪಾಸತ್ ತುವೆಂ ಜಾಯ್ತೆ ಕಶ್ಟ್ ಕಾಡ್ಲ್ಯಾರ್. ಆಮ್ಚ್ಯಾ ಕಾಳ್ಜಾಂತ್ ತುಂ ಕೆದಾಳಾಯ್ ಉರ್ತಲೊಯ್" ಬೊನಾಚ್ಯಾ ದೊಳ್ಯಾಂನಿ ಅಜೂನ್ ದುಕಾಂ ಭರ್ಲ್ಲಿಂ.
ದುಸ್ರೆಂ ಕಿತೆಂಗೀ ಮ್ಹಳ್ಯಾರ್ ಸೊಫಿವಿಶಿಂ ತಾಚ್ಯಾ ಆವಯ್ಚ್ಯಾ ಆನಿ ಭಯ್ಣಿಚ್ಯಾ ಕಾಳ್ಜಾಂತ್ ಮದುರ್ ಸಂಬಂದಾಚಿ ಸೊಬಿತ್ ಸಪ್ಣಾಂಚ್ ಭರೊನ್ ಆಸಾತ್. ತಿಂ ಕೊಸ್ಳಾಂವ್ಕ್ ಹಾಂವ್ ಆಶೆನಾ. ಸತ್ ಉಗ್ಡಾಪೆಂ ಕೆಲ್ಯಾರ್ ತಾಂಚಿ ದೂಕ್ ವೆಗಿಂಚ್ ಪಯ್ಸ್ ಸರತ್ ತರ್ಯಿ, ಹೊ ಘುಟ್ಚ್ ಉರೊನ್ ವೇಳ್ ಉತರ್ತಾನಾ ತಿಂ ಸಾರ್ಕಿಂ ಜಾತೆಲಿಂ ತೆಂ ಖಂಡಿತ್. ತ್ಯಾ ಖಾತಿರ್ ಹ್ಯೊ ತಸ್ವೀರ್ಯೊ ತುವೆಂಚ್ ಪಾಟಿಂ ವ್ಹರಜೆ ಮ್ಹಳ್ಳಿ ಮ್ಹಜಿ ವಿನತಿ. ಚಡ್ ಜಾವ್ನ್ ಹ್ಯೊ ಪಳೆಂವ್ಚೆಂ ಧಯ್ರ್ ಮ್ಹಾಕಾಯಿ ನಾ." ತಸ್ವೀರ್ಯೊ ಸಾಲುಚೆ ಹಾತಿಂ ದೀವ್ನ್ ಜಾಪಿಕ್ ರಾಕನಾಸ್ತಾಂ ಬೊನಾ ಪಾಟಿಂ ಘುಂವ್ಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
