ಆಯ್ಚೆ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಸವಾಲಾಂಕ್ ಜಾಪಿ

ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ

Placeholder: the original page gave this picture no description, and none has been written yet. It came from daaiz\daaiz\column\sz\sz9.asp.

ದಿವೊ ಹಾಫ್ತ್ಯಾಳೆಂ

ಮಿತ್ರ್ ಹಾಫ್ತಾಳೆಂ

ಸೆವಕ್ ಮಯ್ನ್ಯಾಳೆಂ

ಅಂಕಣ್‌ಕಾರಾ ವಿಶ್ಯಾಂತ್

’ಮಿತ್ರ್’, ’ಝೆಲೊ’ ತಶೆಂಚ್ ’ಕಾಣಿಕ್’ ಪತ್ರಾಂಚೆಂ ಸಂಪಾದಕ್ಪಣ್ ಚಲಂವ್ಚೆ ಮಾರಿಫಾತ್, ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಭರ್ಪೂರ್ ಅನ್ಭೋಗ್ ಆಸ್ಚೊ ದೊ|ಆಸ್ಟಿನ್ ಡಿ’ಸೋಜ್ ಪ್ರಭು ಪ್ರಸ್ತುತ್, ಅಮೆರಿಕಾಂತ್ ಅಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರುನ್ ಆಸಾ. ಕೊಂಕ್ಣಿ ಭಾಸ್/ಸಾಹಿತ್ಯಾಚಾ ವ್ಹಾಡಾವಳೆಕ್ ಖಾಂದ್ ದಿಲ್ಲೊ ಹೊ ಏಕ್ ಸಂಘಟಕ್/ಮುಖೆಲಿ ತಶೆಂಚ್ ಕೊಂಕ್ಣಿ ಕಾರ್ಭಾರಿ ಜಾವ್ನಾಸಾ.

ಹಾಚಾ ವೆಕ್ತಿತ್ವಾ/ವಿಚಾರಾಂವಿಶಿಂ ಚಡ್ ಜಾಣಾಂ ಜಾಂವ್ಕ್ ಕೊಂಕ್ಣಿ ಕಾರ್ಭಾರಿ ಅಂಕಣಾಕ್ ಭೆಟ್ ದೀ.

[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]

ಆಯ್ಚೆ ಥೊಡೆ ಯುವಜಣ್ ವಿಂಚವ್ನ್ (ಚೋಯ್ಸ್) -ಕ್ ಸ್ಪರ್ಧೊ (ಕಾಂಪಿಟಿಶನ್) ಮ್ಹಣ್ ಲೆಖ್ತಾತ್ ಖಂಯ್, ಹಾಕಾ ತುಂ ಕಿತೆಂ ಮ್ಹಣ್ತಾಯ್? [ಪ್ರಸನ್ನ, ನಿಡ್ಡೋಡಿ]

ಪೆರಾಂ ಆನಿ ತೊರಾಂ ಮಧ್ಲೊ ಫರಕ್ ನೆಣಾಸ್‌ಲ್ಲ್ಯೊ ಜೀವಿ ಹ್ಯೊ! ಪರಿಪಿಕಾಯೆಕ್ ಪಾವಾನಾಸ್‌ಲ್ಲಿಂ ನೆಣಾರಿಂ ಹಿಂ. ಪಯ್ಣ್ ಹಾಂಚೆಂ ಸುರು ಜಾಲಾಂ ಮಾತ್ರ್, ಸಭಾರ್ ಮೈಲಾಂ ಆಸಾತ್ ಮುಖಾರ್ ವಚೊಂಕ್.

ಮೆಲ್ಯಾ ಉಪ್ರಾ೦ತ್ 72 ಅ೦ಕ್ವಾರಿ೦ಚೆಂ ಸುಖ್ ಭೊಗು೦ಕ್ ಮೆಳ್ತಾ ಮ್ಹಳ್ಳ್ಯಾ ಇರಾದ್ಯಾನ್ ಚಡಾವತ್ ಮುಸ್ಲಿಮಾ೦ಚ್ಯಾ ಗಾ೦ವಾ೦ತ್ ಸಬಾರ್ ಜಣ್ ದಾದ್ಲೆ ಅಪ್ಲ್ಯಾ ಕುಡಿಕ್ ಅಣ್ವಸ್ತ್ರಾ೦ ಭಾ೦ದುನ್ ಜೀವ್ಘಾತ್ ಕರ್ತಾತ್ ಆಶೆ೦ ಕಿತ್ಯಾಕ್ ಆಸ್ಟಿನ್ ದಾಟ್ಟ್ಯಾ? [ವಾಯ್ಲೆಟ್ ಪಿರೇರಾ, ದುಬಾಯ್]

ಮೆಂದ್ವಾಂತ್ ಕಿಡೆ ಭರ್‌ಲ್ಲೆ ಮನಿಸ್ ಹೆ! ಸ್ವ ಚಿಂತ್ಪಾ ಸಕತ್ ನಾಸ್ತಾಂ ಹೆರಾಂನಿ ಸಾಂಗ್‌ಲ್ಲೆಂ ಆಯ್ಕೊನ್ ಆಪ್ಲೊ ಜೀವ್ ಹೊಗ್ಡಾಂವ್ಚ್ಯೊ ಮಂಜಾತಿ ಹ್ಯೊ.

ಜೀವ್ ಆಸ್ತಾನಾ ಪಾಟ್ಲ್ಯಾನ್ ತೇಂಯ್ ಜಿಬಾಳ್ಯಾ ಬಾಯ್ಲಾಂಕಡೆ ಖಬ್ರೊ ಕರ್ಚೆ ಥೊಡೆ ಮೊರ್ತಚ್ ಸಿಸ್ರಿಚಿಂ ದುಃಖಾಂ ಗಳಯ್ತಾತ್‌ಮೂ? ಕಹಲಿಗಾ ಹಿ ಫಜಿಂತ್? [ವೀರಾ ರೇಗೊ, ಕುವೇಯ್ಟ್] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ಸೊರ್ಪಾ ಪಿಲಾಂ ತಿಂ! ತಂಗಾಣೆಂ-ಮಂಗಾಣೆಂ ಕರುನ್ ಬರೇಂ ನಾಚ್ತಾತ್ ಆನಿ ಏಕ್‌ಚ್ಚ್ ಪಾವ್ಟಿಂ ವಿಕಾಳ್ ಬೋಂಚ್ ಮಾರ್ತಾತ್.

ಅಫ್ಘಾನಿಸ್ತಾನ್ ಜಾಲೆಂ, ಇರಾಕ್ ಜಾಲೆಂ, ಆನಿ ಖಂಚಾ ದೇಶಾಚೆರ್ ಬುಶ್ ದೊಳೊ ದವರ್ನ್ ಆಸಾ ಆಸ್ಟಿನಾಮಾ? [ಅಸ್ಕತ್ ಪಿಲೊ, ಮಸ್ಕತ್]

ಸರ್ವಾಂಚೆರ್ ದೊಳೆ ದವ್ರುನ್, ದವ್ರುನ್ ತಾಚೆ ದೊಳೆ ಆತಾಂ ಪಿಡ್ಡ್ಯಾರ್ ಜಾಲ್ಯಾತ್. ಆನಿ ಏಕ್ ವರಸ್ ಬಾಕಿ ಉರ್ಲಾಂ, ಮಾತ್ಸೆಂ ಸೈರಾಣ್ ಘೆ.

ಹಾಂಗಾ ಥೊಡೆ ಜೀವ್ ಆಸ್ತಾನಾಂಚ್ ಅಭಿಮಾನಿ ಸಂಘ್ ಬಾಂಧುನ್ ’ಅಮರ್’ ಜಾಂವ್ಚಿಂ ಸಪ್ಣಾಂ ಸಪ್ಣೆಂವ್ಕ್ ಲಾಗ್ಲ್ಯಾತ್ ಮಾಮಾ ಕಿತೆಂ ಮ್ಹಣ್ತಾಯ್ ತುಂ? [ಬೋರಿ ಬಸವ ಅಬ್ಬಾಸಿಯಾ, ಕುವೇಯ್ಟ್]

ತೆ ಜಾಣಾಂತ್ ಕೀ ತೆ ಮೆಲ್ಯಾ ಉಪ್ರಾಂತ್ ತಾಂಕಾಂ ಸುಣೆಂಯೀ ಹುಂಗ್ಚೆಂ ನಾ ಮ್ಹಣ್! ದೆಖುನ್ ತಾಂಚಿ ಸಮಾಧಿ ತೆಚ್ಚ್ ಬಾಂದ್ತಾತ್.

ಚಾರ್ ದಿಸಾಂಚಿ ತರ್ಭೆತಿ ಘೆವ್ನ್ ಕೊಣೆಂಯ್ ಶಿಕವ್ಣ್‌ದಾರ್ ಜಾವ್ಯೆತ್‌ವೆ? [ಗಂಗು ಗಂಗೊಳ್ಳಿ,ಆತಾಂ ವಾರಣಾಸಿ]

ಜೆ ಕಿತೆಂ ಕರ್ತಾತ್ ಮ್ಹಳ್ಳೆಂ ತೆಚ್ಚ್ ನೆಣಾಂತ್ ಗಂಗು, ಚಡೀತ್ ಶಿಕಾಪ್ ಘೆಂವ್ಕ್ ತಾಂಚ್ಯಾ ತಕ್ಲೆಂತ್ ಭೆಜೊ ಆಸ್ಲ್ಯಾರ್ ನ್ಹಂಯ್ಗಿ ತಾಣಿಂ ಶಿಕ್ಚೆಂ! ಹಾಣಿಂ ಚಿಂತ್ಚೆಂ ಹೆರ್ ಸರ್ವ್ ಮಾಂಕೊಡ್ ಮ್ಹಣ್.

ಮಿಸಾವೆಳಾರ್ ಹೆರಾಂಚೆರ್ ಖೊಟೆಂ ಮಾಗ್ಲ್ಯಾರ್ ದೇವ್ ಆಯ್ಕಾತಾವೆ ಆಸ್ಟಿನಾ? [ಕುಮಾದ್ರ್, ಮಂಗ್ಳುರ್]

ಜೆಂ ಕಿತೆಂ ಏಕ್ಲ್ಯಾಕ್ ಜೀವನಾಂತ್ ಭೊಗುಂಕ್ ಆಸಾ, ತೆಂ ದೇವ್ ಆಯ್ಕೊಂವ್ ವ ದೆಂವ್ಚಾರ್ ಆಯ್ಕೊಂವ್, ಜಾಂವ್ಚೆಂ ತೆಂ ಜಾವ್ನ್ಂಚ್ ಶುದ್ಧ್.

ಕೊಂಕ್ಣೆಚಾ ಮುಕ್ಕಾಲ್ ವಾಂಟೊ ಲೊಕಾಂಕ್ ಕೊಂಕ್ಣಿ ನಾಕಾ, ಬಾಕಿಚ್ಯಾ ಪಂಚ್ವೀಸ್ ಠಕ್ಕೆ ಕೊಂಕ್ಣ್ಯಾಂಕ್ ಪನ್ನಾಸಾಂ ವಯ್ರ್ ರಾಜಕೀಯ್, ತಾಚೆಮಧೆಂ ಲಿಪಿಚೊ ವಾದ್, ಆನಿ ತಾಚೆಮಧೆಂ ಕಾಂಯ್ ಥೊಡೆ ಬರಿಂ ಕಾಮಾಂ ಕರ್ಚೆಂ ಹೆರಾಂಕ್ ಸೊಸಾನಾ - ಕೊಂಕ್ಣೆಚಿ ಫುಡ್ಲಿ ಗತ್ ಕಶಿ ರಾವತ್ ಆಸ್ಟಿನ್ ಅಂಕಲ್? [ರೊಜಿಟಾ ನಜ್ರೆತ್, ಮಿರಾ ರೋಡ್] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ಅಸಲ್ಯಾಚ್ಚ್ ವಾದಾಕ್ ಲಾಗೊನ್ ಕಾಯ್ನಾನ್ ಆಬೆಲಾಕ್ ಲಾಗಾಡ್ ಕಾಡ್ಲೆಂ - ಮೊಸೊರ್, ಜಿದ್ದ್, ಹಗೆಂ, ಫಾರಿಕ್ಪಣ್ - ಫಕತ್ತ್ ಆಪಾಪ್ಲ್ಯಾ ಸ್ವಾರ್ಥಾಕ್ ಲಾಗೊನ್. ಕೊಂಕ್ಣಿ ಎದೊಳ್ ವಾಂಚ್ಲ್ಯಾ, ಆನಿ ಮುಖಾರೀಂ ವಾಂಚೊನ್ ಉರ್ತೆಲಿ. ತುಂ ಕಾಂಯ್ ಭಿಂಯೆನಾಕಾ ಬಾಯೆ ರೊಜಿಟಾ.

ಮ್ಹಜಾ ಕುಮಾದ್ರೆಕ್ ವೋಂಕ್ ಸುರು ಜಾಲ್ಯಾ, ತಿಚಾ ಭುರ್ಗ್ಯಾಚೆಂ ಪಿಲ್ಯಾದ್ ಜೊಡುಂಕ್ ತಯಾರ್ ಆಸಾಯ್ವೆ ಆಸ್ಟಿನಾಬಾ? [ವಿನ್ಸಿ ಬೆಂಗ್ಳುರ್]

ತುಂ ಕೆನ್ನಾಂ ತಿಚ್ಯಾ ಮಾಂದ್ರೆರ್ ನಿದೊಂಕ್ ಗೆಲ್ಲೊ? ಲಜ್ ದಿಸಾನಾ ತುಕಾ, ಮ್ಹಾಕಾ ಪಿಲ್ಯಾದ್ ಜೋಡ್ ಮ್ಹಣ್ ಸಾಂಗೊಂಕ್?

ದಾನ್ ಜಾವ್ನ್ ವ್ಹಡ್ಲೊ ದುಡು ಘೆವ್ನ್ ಯೆತಾನಾ ಪಾದ್ರಿ ವಾತಿಚ್ಯಾ ಮೆಣಾಪರಿಂ ಕಡ್ತಾತ್‌ಮೂ ಹಿ ಕಸಲಿ ಸಕತ್ ಆಸ್ಟಿನಾಮಾ? [ಡೆಲಿನಾ, ಬೆಂಗ್ಳುರ್]

ತಾಕಾ ಮ್ಹಣ್ತಾತ್ ’ಪಿಸ್ತುಲ್ ಪಿಡಾ’ ಮ್ಹಣ್! ತಿ ವಾತ್ ಜಾಯ್ ಜಾಲ್ಲ್ಯಾ ತೆದಾಳಾ ಕಡ್ತಾ ಆನಿ ಜಾಯ್ ಜಾಲ್ಲ್ಯಾ ತೆದಾಳಾ ಘಟ್ ಜಾತಾ; ವಿಶೇಷ್ ಆಕರ್ಷಣ್ ಹೆಂ.

ಘರ್ಚಾ ಕಾಮಾಚ್ಯಾಂಕ್ ಕಷ್ಟುಂವ್ಚಿ ಎಕ್ಲಿ ಬಾಯ್ಲ್ ಅಪ್ಲ್ಯಾ ಪೆಟ್ಯಾಚಿ ಬರಿ ಚಾಕ್ರಿ ಕರ್ತಾ - ಹಿ ಕಸಲಿ ಪಿಡಾ ಆಸ್ಟಿನಾಮಾ? [ಸೆವ್ರಿನ್, ಶಿರ್ವಾಂ] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ಸುಕ್ಯಾ ಗೂವಾಕ್ ಉದಾಕ್ ಪಡ್ಲ್ಯಾರ್ ಜಾಂವ್ಚೆಂ ಅಸೆಂಚ್! ತಾಂಕಾಂ ದಾಟ್ ಕಡಿಯೆ ಮಧ್ಲೊ ಆನಿ ಪಾತಳ್ ಗೂವಾ ಮಧ್ಲೊ ವ್ಯತ್ಯಾಸ್ ಭಿಲ್ಕುಲ್ ಕಳಾನಾ; ತಿಂ ಕಿತೇಂಯ್ ಖಾತಿತ್.

ಮಾಗಾ ತುಮ್ಕಾಂ ಮೆಳ್ತೆಲೆಂ ಮ್ಹಣೊನ್ ಕೊಂಬಿ ಆಸ್ಚಿ ಕೊಂಬೊ ಜಾಂವ್ಕ್ ಮಾಗ್‌ಲ್ಲ್ಯಾಕ್ ಪಾದ್ರಿನ್ ಮಾರ್ಲೆಂ, ತಶೆಂಚ್ ಬಡಯಾ ಉಗ್ತೆಂ ಜಾತೆಲೆಂ ಮ್ಹಣೊನ್ ರಾತಿಂ ಸೆಜಾರ್ಚಾ ಕುಮಾದ್ರೆಚಾ ಕುಡಾಕ್ ಬಡಯಿಲ್ಲ್ಯಾಕ್ ಕುಂಪಾರಿನ್ ಮಾರ್ಲೆಂಮೂ? ಸತ್ ಖಂಚೆಂ ಆಸ್ಟಿನಾಮಾ? [ಸಿರಿಲ್, ಬಾರ್ಕುರ್]

ಆಳೆ ಸಿರ್ಲಾ, ತುಂ ತುಜಿ ಕಾಷ್ಟಿ ಅರ್ಣುನ್ನ್ ನಿದೊಂಕ್ ವೆಚ್ಯಾ ಬದ್ಲಾಕ್ ಕುಮಾದ್ರಿಚ್ಯಾ ಕುಡಾಕ್ ಕಿತ್ಯಾ ಕುಂಪಾರ್ ಘರಾ ಆಸ್ತಾನಾ ಬಡಂವ್ಕ್ ಗೆಲ್ಲೊಯ್? ತುಜೊ ಮೆಂದು ಖಂಯ್ ಆಸಾ? ತಕ್ಲೆಂತ್ ವ ಕಾಷ್ಟೆಂತ್??

ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ

’ಮಿತ್ ಹಾಪ್ತ್ಯಾಳೆಂ’

ಸೆವ್ರಿನ್, ಶಿರ್ವಾಂ

’ದಿವೊ ಹಾಪ್ತ್ಯಾಳೆಂ’

ರೊಜಿಟಾ ನಜ್ರೆತ್, ಮಿರಾ ರೋಡ್

’ಸೆವಕ್ ಮಯ್ನ್ಯಾಳೆಂ’

ವೀರಾ ರೇಗೊ, ಕುವೇಯ್ಟ್

(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.

ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: austinporob@gmail.com ವಾ editor@daaiz.com

ಹ್ಯಾ ಅಧ್ಲಿಂ ಸವಾಲಾಂ-ಜಾಪಿ: 1 , 2, 3 , 4 , 5, 6, 7, 8