ಆಟಾಪ್ಲೆಲಿಂ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ವಿಮರ್ಶ್ಯಾ ಲೇಖನ್ - 1

Placeholder: the original page gave this picture no description, and none has been written yet. It came from daaiz\daaiz\articles\vim\vmp1.asp.

ಬೂಕ್: ಮೊತಿಯಾಂ ಆನಿ ತಾರಾಂ [ಕವಿತಾಜಮೊ]

ಸಂಪಾದಕ್: ವಲ್ಲಿ ಕ್ವಾಡ್ರಸ್

ಆಟಾಪ್ಲೆಲಿಂ ಬರ್ಪಾಂ/ಕವಿತಾಂ:

ಆರ್ಥರ್ ಪಿರೇರಾ, ದಿನೇಶ್ ಕೊರೆಯಾ, ಜೊಮೆಲ್ ಬೊಂದೆಲ್, ಮೆಲ್ವಿನ್ ಜೆ. ವಾಸ್, ರೋಬರ್ಟ್ ಫೆರ್ನಾಂಡಿಸ್, ವಿನ್ಸೆಂಟ್ ಪಿಂಟೊ, ಆಸ್ಟಿನ್ ಪ್ರಭು, ಸಿಜ್ಯೆಸ್ ತಾಕೊಡೆ, ಎಮ್.ಪಿ.ರೊಡ್ರಿಗ್ಸ್, ವಲ್ಲಿ ವಗ್ಗ, ವಿಲ್ಫಿ ರೆಬಿಂಬಸ್.

ಮೊತಿಯಾಂ ಆನಿ ತಾರಾಂ

ಬೂಕ್ - ಸಮೀಕ್ಶಾ ಲೇಖನ್

ಮೆಲ್ವಿನ್ ಪಿಂಟೊ, ನೀರುಡೆ

ವಿವಿದ್ ತರ್ನ್ಯಾ ಆನಿ ಪರ್ನ್ಯಾ ಕವಿಂಚಿಂ ವಿಂಚ್‌ಲ್ಲಿಂ ಕವನಾಂ ಸಾಂಗಾತಾ ಹಾಡ್ನ್ ಕವಿತಾ ಸಂಗ್ರಹ್ ಪರ್ಗಟ್ ಕರ್ಚೆಂ ಏಕ್ ನವೆಂ ಸಾಹಸ್‌ಚ್ ಸಯ್. ಕೊಂಕ್ಣೆಂತ್ ಅಸಲೆ ಸಂಗ್ರಹ್ ಭೋವ್‌ಚ್ ಉಣೆ. ಅಸಲೆ ಸಂಗ್ರಹ್ ಚಡಿತ್ ಯೇಂವ್ಕ್‌ಚ್ ಜಾಯ್. ವಿವಿದ್ ಕವಿಂಚಿ ಕವಿತಾಝರ್ ಎಕಾಚ್ ಘೊಟಾನ್ ಚಾಕೊನ್ ತಾಂಚಿ ತಾಡ್-ವೋಡ್ ಅರ್ಥ್ ಕರ್ನ್ ಘೆಂವ್ಚೊ ಆವ್ಕಾಸ್ ಸಹೃದಯಿಂಕ್ ಮೆಳ್‌ಲ್ಲೆಬರಿ ಜಾತಾ.

’ಮೊತಿಯಾಂ ಆನಿ ತಾರಾಂ’ ಸಂಗ್ರಹಾಂತ್ ಸ ತರ್ನ್ಯಾ ಆನಿ ಪಾಂಚ್ ಪರ್ನ್ಯಾ ಕವಿಂಚಿಂ ಕವನಾಂ ಆಸಾತ್. ಅಸಾದಾರಣ್ ಮ್ಹಣ್ಚೆ ತಸಲಿಂ ಕವನಾಂ ದಿಸಾನಾಂತ್ ತರೀ ಥೊಡಿಂ ಕವನಾಂ ಜರೂರ್ ಆವಡ್ತಾತ್. ತರ್ನ್ಯಾ ಸ ಕವಿಂ ಪಯ್ಕಿ ರೊಬರ್ಟ್ ಫೆರ್ನಾಂಡಿಸ್ ಉದ್ಯಾವರ್ ಚಡಿತ್ ಭರ್‍ವಶ್ಯಾಚೊ, ಫುಲೊನ್ ಯೆಂವ್ಚೊ ಕವಿ ಕಸೊ ದಿಸ್ತಾ. ತಾಚ್ಯಾ ಕವನಾಂನಿ ಗುಂಡಾಯ್ ಆನಿ ತೀಕ್ಶ್ಣ್ ಚಿಂತಾಪ್ ಆಸಾ;

                 ’ಸಕಾಳಿ ನೆಂಟಿಂ ಸಾಂಜೆರ್ ಜಾಂಟಿಂ
                 ಆವ್ಕ್ ಮ್ಹಜೆಂ ಮಟ್ವೆಂ ಖರೆಂ
                 ಆಸಾಂ ಭುಮಿಕ್ ಭಾರ್ ತರೀ
                 ಮೆಲ್ಯಾ ಉಪ್ರಾಂತ್ ಜಾಯ್ನ್ ಸಾರೆಂ’ [ಆಳ್ಮೆಂ!]

’ಕಾಳ್ಜಾ-ಶೆವೊಟ್’ ಕವನಾಂತ್ ತೊ ಕಾಳ್ಜಾಕ್ ಅರ್ಥ್ ಕರ್‍ಚೆಂ ಪ್ರೇತನ್ ಕರ್‍ತಾ. ’ಬಾಂಯ್ತ್‌ಲೊ ಮಾಣ್ಕೊ’ ಕವನಾಂತ್ ಮಾಣ್ಕ್ಯಾಚಿ ಅಮಾಯಕತಾ, ಮುಗ್ದ್‌ಪಣ್ ಖರೆಂಚ್ ಉತ್ರಾಯ್ತಾ. ’ಬಾಪಾಚೆಂ ಘರ್’ ಕವನ್‌ಯೀ ಬರೆಂಚ್ ವ್ಹಾಳ್ತಾ ತರೀ ಅಂತ್ಯ್ ಕರ್‍ತಾನಾ ಮಾತ್ರ್ ಕವಿ ಥೊಡೊ ಘುಸ್ಪಡ್ಲಾ ಮ್ಹಣ್ ಭೊಗ್ತಾ. ದೆವಾಳಾಂತ್ ಕವಿತಾ ಬುಕಾಂಕ್ ಖಾಯ್ಸ್ ನಾ ತೆಂ ಚಿಂತಾಪ್ ವಿಡಂಬನಾತ್ಮಕ್.

ಮೆಲ್ವಿನ್ ಜೆ. ವಾಸ್ ಕೆಲರಾಯ್ ಹಾಚಿಂ ’ಕಾಜುಲೊ’ ಆನಿ ’ಗುಂಡಾಯೆ ಥಾವ್ನ್’ ಕವನಾಂನಿ ಸತ್ವ್ ಆಸಾ. ’ಗುಂಡಾಯೆ ಥಾವ್ನ್’ ಕವನಾಂತ್ ಸಮಾಜೆಚ್ಯಾ ವಾಯ್ಟಾಂಕ್ ಖಂಡನ್ ಕರ್‍ಚೆಂ ಪ್ರೇತನ್ ಕವಿನ್ ಕೆಲಾಂ, ತರೀ ಕವಿತಾ ಮಾದ್ಯಮಾಚೊ ಜೊಕ್ತೊ ವಾಪಾರ್ ಮಾತ್ರ್ ಜಾಂವ್ಕ್ ನಾ ಮ್ಹಣ್ ಭೊಗ್ತಾ.

ಜೋನ್ ಕೊರೆಯಾ ಹಾಚೆಂ ’ಹ್ಯಾ ಮ್ಹಜ್ಯಾ ಗಾಂವಾಂತ್’ ಏಕ್ ಬರೆಂ ಕವನ್. ಪುಣ್ ತಾಚಿಂ ಉರ್‌ಲ್ಲಿಂ ಕವನಾಂ ಸಲ್ವಾತಾತ್. ’ಹ್ಯಾ ಮ್ಹಜ್ಯಾ ಗಾಂವಾಂತ್’ ಕವನಾಚ್ಯೊ ಥೊಡ್ಯೊ ಪಂಕ್ತಿ ಕವನಾಕ್ ಗಿರೇಸ್ತ್ ಕರ್‍ತಾತ್.

                 ’ಉಸ್ಣ್ಯಾಚೊ ನೋಟ್ ಮಾಗೊನ್
                 ಆಲ್ತಾರೆಕ್ ದಿವೆ ಚಡ್ತಾತ್..
                 ....
                 ಫೆಸ್ತಾಂ ಪರ್ಬೆಕ್ ಮುಡ್ದೊಮ್ ರಾವ್ಲ್ಯಾರೀ
                 ಸೆಜಾರಾಚಿ ಮೊಡ್ಕಿ ಖಾಲಿಚ್ ಉರ್ತಾ’

ದಿನೇಶ್ ಕೊರೆಯಾಚ್ಯಾ ’ಗಾಯ್ ಆಯ್ಲ್ಯಾ ಧಾಂವ್ಡಾಯಾತ್’ ಕವನಾಂತ್ ’ಗಾಯ್’ ಏಕ್ ಸಾಂಕೇತ್-ಜೊ ಆಮ್ಚ್ಯಾ ’ಭಕ್ತಿಪಣಾ’ಚೊ ವಿಮರ್ಸೊ ಕರ್‍ತಾ. ತಾಚ್ಯಾ ’ಹೈಕೂಂ’ನಿ ಅಜ್ಯಾಪ್ ಕರ್‍ಚೆ ತಸಲಿಂ ಗೂಂಡ್ ಚಿಂತ್ನಾಂ ಆಸಾತ್;

                 ’ಕೊಗ್ಳೆಕ್ ಆಳ್ಶಿ ಗೀತ್ ಗಾಯ್ಲೆಂ
                 ಕವಿನ್ ತಾಳೊ ಬಸಯ್ಲೊ!’

ಆರ್ಥರ್ ರೋಶನ್ ಪಿರೇರಾಚೆಂ ’ವ್ಹಳೂ ವ್ಹಳೂ ಕಾಳ್ಜಾಕ್ ಲಾಗ್’ ಕವನಾಂತ್ ಬರೆಂ ಪ್ರೇತನ್ ದಿಸ್ತಾ.

ಪರ್ನ್ಯಾ ಕವಿಂ ಪಯ್ಕಿ ವಲ್ಲಿ ವಗ್ಗಚಿಂ ಕವನಾಂ ಮಟ್ವಿಂ ಜಾವ್ನ್ ಥೊಡಿಂ ಚಡಿತ್ ಚಿಂತಾಂಕ್ ಆವ್ಕಾಸ್ ಕರ್‍ನ್ ದಿತಾತ್. ಸಂಗ್ರಹಾಂತ್ಲೆಂ ಉಂಚ್ಲೆಂ ಕವನ್ ’ಸ್ವತಂತ್ರ್ ಜೀವಿ’;

                 ’ತಾಂಬ್ಡೆ ಬೊಂಚಿಚ್ಯಾ
                 ಪಾಚ್ವ್ಯಾ ಕಿರಾ
                 ಪಿಂಜ್ರೊ ಸಾಂಡುನ್
                 ಧಾಂವ್‌ರೆ ಘರಾ!’

ಹ್ಯಾ ಚ್ಯಾರ್ ಪಂಕ್ತೆಂನಿ ತೊ ಹಜಾರ್ ಉತ್ರಾಂ ಸಾಂಗಾನಾಸ್ತಾಂಚ್ ಸಾಂಗ್ತಾ. ಕಿರಾನ್ ಸ್ವತಂತ್ರ್ ಜಾಯ್ಜೆ ಮ್ಹಳ್ಳಿ ಆಶಾ ಕವಿಚಿ. ಪುಣ್ ಕೊಣೆಂ ತರೀ ಪಿಂಜ್ರೊ ಉಗ್ತೊ ಕೆಲ್ಲ್ಯಾ ಶಿವಾಯ್ ಕೀರ್ ಅಸಹಾಯಕ್ ತಿ ವಾಸ್ತವಿಕತಾ ಮಾತ್ರ್ ದುಕಾಚಿ, ಬೆಜಾರಾಯೆಚಿ!

ವಿಲ್ಫಿ ರೆಬಿಂಬಸ್ ಏಕ್ ಕವಿ ಮ್ಹಣ್ಚಾಕ್‌ಯೀ ತೊ ಏಕ್ ಸಮರ್ಥ್, ವಿಂಚ್ಣಾರ್ ಸದಾಂ ಸಾಹಿತಿ ಮ್ಹಳ್ಯಾರ್ ಭೋವ್‌ಶ್ಯಾ ತಾಕಾ ಆಮಿ ಚಡ್ ಮಾನ್ ಕರ್‍ತಾಂವ್. ತರೀ ತಾಚ್ಯಾ ಚಡ್ತಾವ್ ಪದಾಂನಿ ಕವಿತೆಚೆ ಗೂಣ್‌ಯೀ ಆಸಾತ್ ತೆಂ ನೆಗಾರ್‍ಚೆಂ ಅಸಾಧ್ಯ್.

’ಹಾಂವ್ ಯೆತಾಂಗೊ ಘಾಟಿ ದೆಂವೊನ್’ ಹ್ಯೆ ಕವಿತೆಂತ್ ಪರ್ಗಾಂವಾಥಾವ್ನ್ ಗಾಂವಾಕ್ ದೆಂವ್ಚ್ಯಾ ನೊವ್ರ್ಯಾಚ್ಯಾ ಕಾಳ್ಜಾಚೆ ಉಮಾಳೆ, ಆಟೆವಿಟೆ ಖರೆಚ್ ವೆಕ್ತ್ ಜಾಲ್ಯಾತ್. ತಾಕಾ ರೂಕ್-ಝಡಾಂಯೀ ಅಪ್ಲ್ಯಾ ಹೊಕ್ಲೆವಿಶಿಂಚ್ ಉಲಯ್ತಾತ್ ಕಶೆಂ ಭೊಗ್ತಾ. ಪರ್ಗಾಂವಾಂತ್ ಆಪ್ಲ್ಯಾ ಸಾಕ್ರಾಮೆಂತಾಚ್ಯಾ ಉದಾಸಾಂತ್ ಚಡ್ಪಡ್ಚ್ಯಾ, ಕರ್‍ಗೊಂಚ್ಯಾ ತರ್ನಾಟ್ಯಾಂಚೆ ವಳ್ವಳೆ ವಿಲ್ಫಿನ್ ಖರೆಚ್ ಅರ್ಥ್ ಕರ್ನ್ ಘೆತ್ಲ್ಯಾತ್.

ಆವಯ್‌ವಿಶಿಂ ವಿಲ್ಫಿನ್ ಸಭಾರ್ ಪದಾಂ ಘಡ್ಲ್ಯಾಂತ್. ಎಕೇಕ್ ಪದ್‌ಯೀ ಆಯ್ಕೊಪ್ಯಾಂಕ್ ಸಿಂತಿಮೆಂತಾಂನಿ ಭಗ್ಣಾಂನಿ ಗುಂತುನ್ ಆವಯ್ ಥಂಯ್ ಚಡಿತ್ ಮೋಗ್ ಉಭ್ಜಾಯ್ತಾತ್. ’ದುದಾಂತ್ ಧುತೊಂ ತುಜೆ ಪಾಂಯ್’ ಹಾಂಗಾಸರ್ ಜೀವಂತ್ ಆಸ್ತಾನಾ ಮಾಂಯ್ಕ್ ಅಪ್ಲೆಂ ಬರೆಂ ಕರ್ನ್ ಪಳೆಂವ್ಕ್ ನಾ ಮ್ಹಳ್ಳೆಂ ದೂಕ್ ಆಸಾ ತರೀ ತಿಂ ಚಡಿತ್ ಅವಡ್ನಾಂತ್.

ಸಗ್ಳ್ಯಾ ಸಂಗ್ರಹಾಂತ್ ಏಕ್‌ಯೀ ಕವಯತ್ರಿ ನಾ ತಿ ಗಜಾಲ್ ಬೆಜಾರಾಯೆಚಿ. ಹಾಂಗಾಚ್ಯಾ ಕವಿಂಕ್ ವಿಂಚುಂಕ್ ಸಂಪಾದಕಾನ್ ಕಸಲೊ ಮಾನ್-ದಂಡ್ ವಾಪಾರ್ಲಾ ಕಳಿತ್ ನಾ. ಪುಣ್ ಏಕ್ ದೋನ್ ಕವಯತ್ರಿ ಆಸ್‌ಲ್ಲ್ಯೊ ತರ್ ಸ್ತ್ರೀ ಸಂವೇದನ್ ಥೊಡೆಂ ಸಾಂಗಾತಾ ಮೆಳ್ತೆಂ.

ಸಂಗ್ರಹಾಂತ್ ಥೊಡಿಂ ಕವನಾಂ ಧಾಡಾವ್ನ್ ಪಿಕಯ್ಲ್ಯಾಂತ್ ಮ್ಹಳ್ಳೆಬರಿ ಭೊಗ್ತಾ, ಥಂಯ್ಸರ್ ಸಾರ್ ದಿಸಾನಾ. ದಾಕ್ಲ್ಯಾಕ್ ’ಗುಲೊಬ್’, ’ದೆವಾನ್ ವಿಂಚ್ಲೆಲಿಂ ಫುಲಾಂ’, ’ಎಕ್ಸುರೆಂ ರಡ್ಣೆಂ’ ಇತ್ಯಾದಿ.

[ಹೆಂ ವಿಮರ್ಶ್ಯಾ ಲೇಖನ್ ’ಮಿತ್ರ್’ ಹಾಫ್ತ್ಯಾಳ್ಯಾಚೆರ್ ಪರ್ಗಟ್ಲಾಂ]

ಲೇಖನಾಂಚಾ ಪಾನಾಕ್

ಪಾಟಿಂ ದಾಯ್ಜ್ ಪಾನಾಕ್

ಕಾಣ್ಯೆಗಾರ್:

ಚರ್ಬೆಲ್ಲಿ

ಕೃತಿ