ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಸಂಸಾರಾಂತ್ ವ್ಹಡ್ಲೆಂ ಆತಂಕ್ವಾದ್ ಬಂದೂಕ್ ವಾ ಗುಳೆ ನ್ಹಯ್ - ಮೊಗಾಚಿ ಸುಕಿಧಾಡ್ ಆನಿ ಆಪ್ಲಿಂಚ್ ಪರ್ಕಿಂ ಮ್ಹಣ್ ಲೆಖ್ಚೆಂ’
ಆತಂಕ್ವಾದಾಚೆ ಗುನ್ಯಾಂವ್ಕಾರ್ ಕೋಣ್?
ವರಸ್ : 2008
ಅಂಕೊ : 47
ಮಯ್ನೊ : ದಸೆಂಬರ್
ಸಂಪಾದಕೀಯ್ - 47.
ವಲ್ಲಿ ಕ್ವಾಡ್ರಸ್
ಆತಂಕ್ವಾದ್ ಆನಿ ಆತಂಕ್ವಾದಿ ಮನೋಗತ್ ಸಂಸಾರಾಕ್ ನವೆಂ ನ್ಹಯ್, ಪುಣ್ ಬದ್ಲೊನ್ ಯೆಂವ್ಚಿ ಮನೋಗತ್ ಮಾತ್ರ್ ಹರ್ಯೆಕಾ ದೇಶಾಚ್ಯಾ, ಹರ್ಯೆಕಾ ಜಾತಿಚ್ಯಾ, ಹರ್ಯೆಕಾ ವರ್ಗಾಚ್ಯಾ ಲೊಕಾಂಚ್ಯಾ ದೀಸ್ಪೊಡ್ತ್ಯಾ ಜಿಣ್ಯೆಚೆಂ ಸಮಧಾನ್ ಪಿಡ್ಡ್ಯಾರ್ ಕರುಂಕ್ ಸಕ್ಲ್ಯಾ ಮ್ಹಳ್ಳೆಂ ಅಪುಟ್ ಸತ್. ಎದೊಳ್ ಪರ್ಯಾಂತ್ ಪಯ್ಸಿಲೆ ಪಯ್ಸ್ ಅಸಲಿಂ ಆತಂಕ್ವಾದಿ ಕಾಮಾಂ ಚಲ್ಚಿಂ ಆಮಿ ದಿಸ್ಪೊಡ್ತ್ಯಾ ಖಬ್ರ್ಯಾ ಮಾಧ್ಯಮಾಂನಿ ವಾಚುನ್, ಆಯ್ಕೊನ್ ಆಸ್ಲ್ಲ್ಯಾಂವ್ ತರ್ಯೀ ಆತಾಂ ಹೆಂ ಆತಂಕ್ವಾದ್ ಆಮ್ಚೆಲಾಗಿಂ, ಆಮ್ಚ್ಯಾಚ್ ಆಂಗ್ಣಾಕ್ ಪಾವ್ಲಾಂ ಮ್ಹಣ್ತಚ್ ಅಚಾನಕ್ ಆಮ್ಚಿ ನೀದ್ ಸುಟ್ಲಿ ಆನಿ ಎಕಾಮೆಕಾ ವಾದ್-ಪ್ರತಿವಾದ್, ಆರೋಪ್-ಪ್ರತ್ಯಾರೋಪ್ ಸುರು ಕೆಲೆ. ಕೊಣ್ ಮ್ಹಣ್ತಾ ಹ್ಯಾ ಕರ್ನ್ಯಾಂಕ್ ಪಾಕಿಸ್ತಾನ್ ಕಾರಾಣ್, ಅನಿ ಕೊಣ್ ಮ್ಹಣ್ತಾ ಪಾಶ್ಚಾತ್ಯ್ ರಾಶ್ಟ್ರಾಂಚ್ಯಾ ಪ್ರಚೋದನಾಂಕ್ ಬೂದ್ ಶಿಕಂವ್ಚ್ಯಾಕ್ ಥೊಡ್ಯಾ ದೇಶಾಂಚಿ ಜೊಕ್ತಿ ಜವಾಬ್, ಆನಿ ಕೊಣ್ ಮ್ಹಣ್ತಾ ಅನಿ ಕಿತೆಂ. ಪುಣ್ ಹ್ಯಾ ಸರ್ವ್ ಆರೋಪ್ - ಪ್ರತ್ಯಾರೋಪಾಂತ್ ಏಕ್ ಸತ್ ಮಾತ್ರ್ ಸುಟಾವೆಂ ಜಾವ್ನ್ ಆಮ್ಕಾಂಚ್ ನಾಗ್ಡೆಂ ಕರುನ್ ಗೆಲ್ಲೆಂ ಜಾವ್ನಾಸಾ;
ಸಂಸಾರಾಂತ್ಲ್ಯಾ ಪಾಂಚ್ ಪ್ರಗತಿಪರ್ ದಿಶೆನ್ ಚಮ್ಕೊನ್ ವೆಚ್ಯಾ ದೇಶಾಂ ಪಯ್ಕಿಂತ್ ಏಕ್ ಜಾವ್ನಾಸ್ಚ್ಯಾ ಆಮ್ಚ್ಯಾ ಭಾರತ್ ದೇಶಾಚಿ ಪರಿಗತ್ ಕಿತ್ಲಿ ಲಾಚಾರ್ ಆನಿ ಅಸ್ಕತ್ ಮ್ಹಳ್ಳೆಂ ಆಮ್ಕಾಂ ದಿಸ್ಲೆಂ. ಆಜ್ ಆಮ್ಚ್ಯಾ ದೇಶಾಚೆರ್ ಕಸ್ಲ್ಯಾಯ್ ರಿತಿರ್ ಸಲೀಸಾಯೆನ್ ಆಕ್ರಮಣ್ ಕರ್ಯೆತಾ; ಜಾಂವ್ ವಾರ್ಯಾರ್, ಜಾಂವ್ ಉದ್ಕಾಂತ್ ವಾ ಜಾಂವ್ ಭುಂಯ್ತ್.
ಜಮ್ಮು ಕಾಶ್ಮೀರಾಂತ್ ಕಾಂಯ್ ಅಸಲೆ ಬೋಂಬ್ ಫುಟ್ಚೆ, ಘರಾಂ ಲಾಸ್ಚಿಂ, ಮೊಡಿಂ ರಾಸ್ ಪಡ್ಚಿಂ ಸದಾಂಚೆಂ ಜಾಲಾಂ. ಹ್ಯಾ ಖಬ್ರಾಂಚೆರ್ ಸತ್ ಸಾಂಗ್ಚೆಂ ತರ್ ಚಡ್ತಾವ್ ಲೋಕ್ ಎಕಾ ಘಡ್ಯೆ ವಾಚ್ತಾ ಆನಿ ದುಸ್ರೆ ಘಡ್ಯೆ ವಿಸರ್ತಾ. ಥೊಡ್ಯಾ ವರ್ಸಾಧಿಂ ಇರಾಕಾಂತ್ ಜಾಂವ್, ಥೊಡ್ಯಾ ವರ್ಸಾಂಧಿಂ ಅಮೆರಿಕಾಚ್ಯಾ ಸ್ಟೋಕ್ ಎಕ್ಸ್ಚೇಂಜಿಚೆರ್ ಜಾಲ್ಲ್ಯಾ ಹಲ್ಲ್ಯಾಕ್, ಸಭಾರ್ ವರ್ಸಾಂ ಥಾವ್ನ್ ಇಸ್ರೇಲ್ ಆನಿ ಪ್ಯಾಲೆಸ್ತಿನಾಂತ್ ಜಾವ್ನಾಸ್ಚಿಂ, ಆಯ್ಲೆವಾರ್ ಲೆಬ್ನಾನಾಂತ್ ಜಾವ್ನಾಸ್ಚಿಂ ಆತಂಕ್ವಾದಿ ಕೃತ್ಯಾಂನಿ ಕಿತ್ಲೆಶ್ಯಾ ಆಮ್ಕಾಂ ಜಾಗಯ್ಲಾಂ?. ತಿಂ ಪಯ್ಸಿಲಿಂ ತರ್ ಆಮ್ಚ್ಯಾ ದೇಶಾಚ್ಯಾ ಭಂವಾರಿಂ ನದರ್ ಘಾಲ್ಯಾಂ; ಶ್ರೀಲಂಕಾಂತ್ ಕಿತ್ಲೆಶ್ಯಾ ವರ್ಸಾಂ ಥಾವ್ನ್ ಜಾವ್ನ್ ಆಸ್ಚೆಂ ಆತಂಕ್ವಾದ್, ಅಫ್ಘಾನಿಸ್ತಾನಾಂತ್, ಪಾಕಿಸ್ತಾನಾಂತ್ ಜಾವ್ನಾಸ್ಚೆ ಜೀವ್ಘಾತಿ ಹಲ್ಲ್ಯಾ ಮಧೆಂ ಸಯ್ತ್ ಆಮಿ ಆಮ್ಕಾಂ ಸುರಕ್ಶಿತ್ ದೇಸ್ ಮ್ಹಳ್ಳ್ಯಾ ಭ್ರಮಿದೆಂತ್ ಸುಖಾ ಸಂತೊಸಾನ್ ಜಿಯೆವ್ನ್ ಆಸ್ಲ್ಯಾಂವ್. ಆಮ್ಚಿ ಜೆಮ್ ಸುಟಾಜಯ್ಚ್ ತರ್ ಭಾಯ್ಲ್ಯಾ ರಾಷ್ಟ್ರಾಂಕ್ ಕಿತ್ಯಾಕ್? ಆಮ್ಚ್ಯಾ ದೇಶಾಭಿತರ್ ಜಾವ್ನಾಸ್ಚೆಂ ಆತಂಕ್ವಾದ್ ಕಾಂಯ್ ಉಣೆಂ? ತರಿಕೀ ಆಮಿ ದಿಲ್ಲೆಂ/ದೀವ್ನಾಸ್ಚೆಂ ಗಮನ್ ಜಾವ್ನಾಸಾ ಸಚಿನಾಚ್ಯೊ ಸೆಂಚುರಿ, ಸಾನಿಯಾಚೊ ತೀನ್ ಇಂಚಾಚೊ ಗಾಗ್ರೊ, ಮಹೇಂದ್ರ ಸಿಂಘ್ ಧೊನಿಚೆ ಲಾಂಬ್ ಕೇಸ್, ರಾಖಿ ಸಾವಂತಾಕ್ ಮಿಖಾನ್ ದಿಲ್ಲೊ ಕೀಸ್, ರಾಹುಲ್ ಮಹಾಜನಾಚೊ ವೇಸ್, ಆಮ್ಚ್ಯಾ ಚಡ್ತಾವ್ ನ್ಯಾಶನಲ್ ಟಿವಿ ಮಾಧ್ಯಮಾಂನಿ ಚಡ್ತಿಕ್ ಆಕರ್ಶಿತ್ ವಿಶಯ್ ಸೊಡ್ಲ್ಯಾರ್ ಆಮ್ಚ್ಯಾ ದೇಶಾಂತ್ ವೆವಸ್ಥಿತ್ ರಿತಿರ್ ಜಾವ್ನಾಸ್ಚ್ಯಾ ಜಾಯ್ತ್ಯಾ ಗತಿವಿಧಿಯಾಂಚೆರ್ ಆಮ್ಚ್ಯಾ ಲೊಕಾಕ್ ಗಮನ್/ಗುಮಾನ್ಂಚ್ ನಾ.
ಆಮ್ಚ್ಯಾ ಟಿವಿಂಕ್ ಟಿಆರ್ಪಿ ಲಾಭೊಂಕ್ ಬಿಗ್ಬೋಸ್, ಸಾಸ್-ಬಹೂ, ಆಜ್ ಕಾ ಮುಕದ್ದಮ್ ಕಾರ್ಯಿಂ ಮಾತ್ರ್ ಸಕ್ತಾತ್ ಶಿವಾಯ್; ಪ್ರವೀಣ್ ತೊಗಾಡಿಯಾನ್ ತ್ರಿಶುಲಾಂ ವಾಂಟ್ಚೆಂ ಜಾಂವ್, ರಾಜ್ ಠಾಕ್ರೆನ್ ಬಿಹಾರಿಂಕ್ ಉಗ್ತ್ಯಾನ್ ಮಾರ್ಚೆಂ, ಭೆಶ್ಟಾಂವ್ಚೆಂ ಜಾಂವ್, ಸಿಮಿ ಮ್ಹಳ್ಳ್ಯಾ ಸಂಸ್ಥ್ಯಾಕ್ ವಿದೇಶಾಂ ಥಾವ್ನ್ ಯೆಂವ್ಚ್ಯಾ ದುಡ್ವಾವಿಶಿಂ ಜಾಂವ್, ಮತಾಂತರ್ ಮ್ಹಳ್ಳೆಂ ನೀಬ್ ದಿವ್ನ್ ಅಮಾಯಕಾಂಕ್ ಲುಟ್ಚೆಂ ಭಿರಾಂಕುಳ್ ಕರ್ನ್ಯೊ ನ್ಹಯ್. ಆಮ್ಚ್ಯಾ ದೇಶಾಂತ್ ಇತ್ಲೆಂ ಸರ್ವ್ ಜಾಲಾಂ, ಜಾವ್ನಾಸಾ ತರ್ಯೀ ಅಜೂನ್ ಆಮ್ಚಿ ಜೆಮ್ ಸುಟ್ಲ್ಲಿಚ್ ನಾ. ಆಮಿ ಅಜೂನ್ ಬಿಂದ್ರಾಚ್ಯಾ ಭಾಂಗ್ರಾ ಪದಕಾಚೆ ಖುಶೆನ್, ಟಿ ಟ್ವೆಂಟಿ ವರ್ಲ್ಡ್ ಕಪ್ಪಾಚ್ಯಾ ಖುಶೆನ್, ಯುವ್ರಾಜ್ ಸಿಂಘಾನ್ ಎಕಾ ಒವರಾಂತ್ ಮಾರ್ಲ್ಲ್ಯಾ ಸ ಸಿಕ್ಸರಾಚ್ಯಾ ಖುಶೆಥಾವ್ನ್ ಅಜೂನ್ ಭಾಯ್ರ್ ಯೇಂವ್ಕ್ ನಾಂವ್. ಆನಿ ಆಮ್ಕಾಂ ಕಾಂಯ್ ಜೆಮ್ ಸುಟಾತ್ ಕೊಣ್ಣಾ ಮ್ಹಳ್ಳ್ಯಾ ಭಿಂಯಾಂತ್ ಪರತ್ ಗಾಡ್ ನಿದೆಂತ್ ಉರಂವ್ಕ್ ಪೆಚಾಡ್ಚಿಂ ಖಬ್ರೆ ಮಾಧ್ಯಮಾಂ ಸಯ್ತ್.
ದೆಕುನ್ ಅಜೂನ್ ಆಮಿ ರಿಯಾಕ್ಟಿವ್/ಪ್ರತಿಕ್ರಿಯಾ (Reactive) ಪಸಂದ್ ಕರ್ತಾಂವ್ ಶಿವಾಯ್ ಪ್ರೊಆಕ್ಟಿವ್/ಪೂರ್ವ್ತಯಾರಾಯ್ (Proactive) ನ್ಹಯ್. ಆಮ್ಚೆಂ ಕಾನೂನ್ ವೆವಸ್ತಾ ಪಳೆಯಾ; ಭ್ರಶ್ಟಾಚಾರಾಚೊ ಬಾಪುಯ್ ಮ್ಹಣ್ ಅಖ್ಖೊ ದೇಸ್ ವಳ್ಕೊಂಚ್ಯಾ ಮುಲಾಯಮ್ ಸಿಂಘಾಕ್ ಸಯ್ತ್ ಸಿಬಿಐ ತಸ್ಲ್ಯಾಂನಿ ಕ್ಲೀನ್ ಚಿಟ್ ದಿತಾನಾ, ನಟ್ವರ್ ಸಿಂಘ್, ಚಂದ್ರಸ್ವಾಮಿ ತಸಲಿಂ ಅಜೂನ್ ಹರ್ಧೆಂ ಫುಲವ್ನ್ ಜಿಯೆತಾನಾ, ಪಪ್ಪು ಯಾದವ್, ರಾಜ ಭಯ್ಯಾ, ಅರುಣ್ ಗಾವ್ಲಿ ತಸ್ಲೆ ಎಲಿಸಾಂವ್ ಜಿಕ್ತಾನಾ ಬೇಂಕಾಚೆಂ ಲೋನ್ ಕಾಡ್ಲ್ಲೊ ಬಾವ್ಡೊ, ಕಾಂಯ್ ಏಕ್ ಮಯ್ನ್ಯಾಚೆಂ ಕಂತ್ ಭಾಂದುಂಕ್ ವಿಸರ್ಲೊ ತರ್ ತಾಚೆರ್ ಕಾನೂನಿ ಕ್ರಮ್ ಘೆತಾತ್. ಕರೆಂಟ್ ಬಿಲ್ಲ್ ಭಾಂದುಂಕ್ ತಾಂಕ್ ನಾಂ ತರ್ ಫ್ಯೂಜ್ ಕಾಡ್ತಾತ್. ಟೆಲಿಫೊನಾಚೆಂ ಬಿಲ್ ಬಾಕಿ ಆಸಾ ತರ್ ಟೆಲಿಫೋನ್ ಕನೆಕ್ಶನ್ ಕಾತರ್ತಾತ್. ಆಮ್ಚೆ ಪೊಲಿಸ್ ಪಳೆಯಾ; ರಸ್ತ್ಯಾಚ್ಯಾ ಸಿಗ್ನಲಾಚೆರ್ ರಾಂವ್ಚ್ಯಾಕೀ, ಇಲ್ಲೆಂ ಪಯ್ಸ್ ವಚೊನ್ ರುಕಾ ಇಡ್ಯಾಕ್ ವಾ ಆಡೊಸಾಕ್ ಲಿಪೊನ್ ಬೊಸ್ತಾತ್, ಕಾಂಯ್ ಸನಿ ಲಾಗ್ಲ್ಲೆ ಎಕ್ಲೆ-ದೋಗ್ ಸಿಗ್ನಲ್ ಮೋಡ್ನ್ ಯೆತಿತ್ಗಾಯ್ ಮ್ಹಣೊನ್. ಆನಿ ಆಯಿಲ್ಲೆ ತೆ ಕೊಣ್ಯೀ ಪಡ್ಚಾ, ಹಜಾರಾಂಚೊ ಪಡ್ಕೊ. ಕಾಯ್ದೆ ಕಾನುನ್ ಹ್ಯಾ ಪೊಲಿಸಾಂಚಿ ಆಸ್ತ್-ವಸ್ತ್.
ದೆಕುನ್ ಆಮಿ ಆತಂಕ್ವಾದಿ ಯೆವ್ನ್ ಆಮ್ಚೆರ್ ಗುಳ್ಯಾಂಚೊ ಪಾವ್ಸ್ ವೊತ್ತಾನಾ ಆಮ್ಚಿ ಜೆಮ್ ಸುಟ್ಲಿ. ಆಮ್ಚೆ ಪೊಲಿಸ್, ಆಮ್ಚೆ ರಾಕೊಣ್ ಕಿತ್ಲೆ ಅಸ್ಕತ್ ಆನಿ ಲಾಚಾರ್ ಮ್ಹಳ್ಳೆಂ ತ್ಯಾ ಆತಂಕ್ವಾದಿಂನಿ ಆಮ್ಕಾಂ ಧಾಖಯ್ಲೆಂ. ಆಮ್ಚೆ ರಾಜಕೀಯ್ ಮುಖೆಲಿ ಸಯ್ತ್ ’ಝಡ್ ಪ್ಲಸ್’ ಸೆಕ್ಯುರಿಟಿಂತ್ ಆಸ್ಚೆ, ತೊಂಡಾಕ್ ಆಯಿಲ್ಲೆಪರಿಂ ಪಾಕಿಸ್ತಾನಾಚೆರ್ ಬೊಬಾಟ್ಲೆ. ಥೊಡ್ಯಾಂನಿ ಆಪ್ಲೆ ಹುದ್ದೆ ಸಾಂಡ್ಲೆ ತರ್ ಆನಿ ಥೊಡ್ಯಾಂಕ್ ಹುದ್ದ್ಯಾನ್ ಕಾಡ್ಲೊ. ಲೊಕಾಂಕ್ ಬೇಕೂಫ್ ಕರ್ಚಿ ವಿಧ್ಯಾ. ಲೊಕಾಂನಿ ಬೊಟಾಂ ಜೊಕ್ಲಿಂ ದೆಕುನ್ ಆತಾಂ ಆಮ್ಚೆ ರಾಜಕೀಯ್ ಮುಖೆಲಿ ಜಾಗೆ ಜಾಲೆ?
ಪುಣ್ ಏಕ್ ಘಡಿ ರಾಜಕೀಯ್ ಮುಖೆಲಿಂಚೆರ್ ಬೊಟಾಂ ಜೊಕ್ಚ್ಯಾಧಿಂ ಗರ್ಜೆಚೊ ನಿಯಾಳ್ ಕರ್ಯಾಂಗಿ? ಆಮ್ಚ್ಯಾ ದೇಶಾಂತ್ ಹರ್ಯೆಕಾ ಪ್ರಾಂತ್ಯಾಂತ್ ವೆವೆಗ್ಳ್ಯಾರ್ ರಿತಿಚೆಂ ವಿಕೃತ್ ಕಾಮ್ ಕರ್ಚೊ ಲೋಕ್ ಅಜೂನ್ ನಾಂಗೀ? ಫಕತ್ತ್ ಪಾಂಯ್ಶಿ ರುಪ್ಯಾಂನಿ ರೇಶನ್ ಕಾರ್ಡಾಂ ಕರ್ನ್ ದಿಲ್ಲೆ ಕಿತ್ಲೆ ಧಾಖ್ಲೆ ಆಮಿಂ ಪಳೆಂವ್ಕ್ ನಾಂತ್? ಎಕಾ ಹಜಾರಾಂನಿ ಕೊಲೆಜಿಚ್ಯೊ ಡಿಗ್ರ್ಯೊ ಮೆಳ್ಚ್ಯೊ ಆಮಿಂ ಕಿತ್ಲೆಂ ಆಯ್ಕೊಂಕ್ ನಾಂವ್? ನಕ್ಲಿ ನೋಟ್ ಅರ್ಧ್ಯಾ ಮೊಲಾಕ್ ಘೆವ್ನ್ ಆಮಿ ಚಲಯ್ತೆಲೆ ಕಿತ್ಲೆಶ್ಯಾಂಕ್ ವಳ್ಕನಾಂವ್? ನಕ್ಲಿ ಪಾಸ್ಪೋರ್ಟ್ ಕರ್ನ್ ದಿತೆಲೆ ಕಿತ್ಲೆ ಯೇಜಂಟ್ ಆಮಿಂ ವಳ್ಕನಾಂವ್? ಆನಿ ಅಸಲ್ಯಾಂಚೊ ಫಾಯ್ದೊ ಉಟಂವ್ನ್ ಭಾರತೀಯ್ ನಾಗರಿಕ್ ಮ್ಹಳ್ಳೆಪರಿಂ ಜಿಯೆಂವ್ಚೊ ಬಾಂಗ್ಲಾಚೊ, ಪಾಕಿಸ್ತಾನಿ ತಶೆಂಚ್ ಹೆರ್ ರಾಶ್ಟ್ರಾಂಚೊ ಕಿತ್ಲೊ ಲೋಕ್ ಜಿಯೆವ್ನ್ ನಾ?. ತರ್ ಅಸಲ್ಯಾ ಕರ್ನ್ಯಾಂನಿ ಆಮ್ಚ್ಯಾ ದೇಶಾಕ್ ಸಂಚಿಕಾರ್ ಮ್ಹಳ್ಳಿ ಪ್ರಜ್ನಾ ಕಿತ್ಲೆಶ್ಯಾಂಕ್ ಆಮ್ಕಾಂ ಆಯಿಲ್ಲಿ ಆಸಾ? ತ್ಯಾ ಆತಂಕ್ವಾದಿಂನಿ ವ್ಹಾಪಾರ್ಲ್ಲಿಂ ಸಿಮ್ ಕಾರ್ಡಾಂ ಆಮ್ಚೆ ಪಯ್ಕಿಂತ್ಲ್ಯಾಂನಿಚ್ ನ್ಹಯ್ಗಿ ತಾಂಕಾಂ ದಿಲ್ಲಿಂ? ತರ್ ಆತಾಂ ಆಮಿ ಅಸುರಕ್ಶಿತ್ ಮ್ಹಣೊನ್ ಆರಾಬ್ಬಾಯೊ ದಿಂವ್ಚಿಂ ಆಮಿಂಚ್ ಎಕಾ ರಿತಿನ್ ಹ್ಯಾ ಸರ್ವಾಂಕ್ ಕಾರಣ್ ನ್ಹಯ್?
ದಿಸಾನ್ದೀಸ್ ಬದ್ಲೊನ್ ವೆಚ್ಯಾ ಸಂಸಾರಾಂತ್, ಜಿತ್ಲೆಂ ಬರೆಂ ಬದಲ್ತಾಗೀ, ತಿತ್ಲೆಂಚ್ ವಾ ತಾಚ್ಯಾಕೀ ಚಡಿತ್ ಮಾಪಾನ್ ವಾಯ್ಟ್ಯೀ ಬದಲ್ತಾ. ಆಮಿಂ ಪಯ್ಲೆಂ ಶಿಕ್ಶಿತ್ ಜಾಂವ್ಚಿ ಭೋವ್ ಗರ್ಜ್ ಆಸಾ. ಶಿಕ್ಶಿತ್ ಮ್ಹಳ್ಯಾರ್ ಇಸ್ಕೊಲಾಂ-ಕೊಲೆಜಿಕ್ ವಚೊನ್ ಡಿಗ್ರ್ಯೊ ಘೆಂವ್ಚೆಂಚ್ ನ್ಹಯ್. ದೆಕುನ್ ಆಮ್ಚೆ ಜಾಯ್ತೆ ಶಿಕ್ಪಿ ವರ್ಗಾಚ್ಯಾ ಲೊಕಾನಿ ಕರ್ಚ್ಯೊ ನಾಲಿಸಾಯೆಚ್ಯೊ ಕರ್ನ್ಯೊ, ಅಶಿಕ್ಪಿಂ ಚಿಂತುಂಕ್ ಸಯ್ತ್ ಸಕ್ಚಿಂನಾಂತ್. ದೆಕುನ್ ಆಜ್ಕಾಲ್ ಅಮೆರಿಕಾ ತಸ್ಲ್ಯಾ ರಾಶ್ಟ್ರಾಂತ್ ಆಮ್ಚೆ ಶಿಕ್ಪಿ ಲೋಕ್ ದುಡು ಎಕ್ಟಾಂಯ್ ಕರುನ್ ಆಮ್ಚ್ಯಾ ದೇಶಾಂತ್ಲ್ಯಾ ವಿ.ಎಚ್.ಪಿ, ಸಿಮಿ ತಸಲ್ಯಾ ಸಂಸ್ಥ್ಯಾಂಕ್ ಧಾಡ್ತಾ ಆನಿ ಹ್ಯಾ ದುಡ್ವಾಂತ್ ಆಮ್ಚ್ಯಾ ದೇಶಾ ಭಿತರ್ಲಿ ಸುರಕ್ಶಾ ದಿಸಾನ್ ದೀಸ್ ಬಿಗ್ಡೊನ್ ವೆತಾ. ಕಾಂಯ್ ಆಮಿ ಸಂಸಾರಾಚ್ಯಾ ದೊಳ್ಯಾಂಚೆರ್ ಮಾತಿ ಘಾಲುಂಕ್ ಆಮಿ ಎಕ್ವಟಿತ್ ಮ್ಹಣ್ ಧಾಖಂವ್ಕ್ ಪ್ರೇತನ್ ಕೆಲ್ಯಾರೀ, ಆಮ್ಚೆ ಭಿತರ್ ಅಮಿಂಚ್ ಫಾಸಾಳ್ಚೊ ದೀಸ್, ಎಕಾಮೆಕಾ ಚ್ಯುರಾನ್ ಚ್ಯುರೊ ಜಾಂವ್ಚೊ ವೇಳ್ ಕಾಂಯ್ ಪಯ್ಸ್ ನಾ. ಆಜ್ ಆಮ್ಕಾಂ ಬೊಟಾಂ ಜೊಕುಂಕ್ ಭಾಯ್ಲೊ ರಾಶ್ಟ್ರ್ ಆಸಾ, ವಾ ಆಮ್ಚೆ ರಾಜಕೀಯ್ ಮುಖೆಲಿ ಆಸಾತ್. ಪುಣ್ ತ್ಯಾ ದಿಸಾಂನಿ ಬೊಟಾಂ ಜೊಕುಂಕ್ ತಿಂ ಬೊಟಾಂ ಉರ್ಚಿಂನಾಂತ್ ಮ್ಹಳ್ಳೆಂ ಸತ್ ಆಮಿ ಸಮ್ಜೊಂಚೆಂ ಪ್ರೇತನ್ ಕೆಲ್ಯಾರ್ ಆಮ್ಕಾಂಚ್ ಬರೆಂ.
ಆತಾಂ ತುಮಿಂಚ್ ಸಾಂಗಾಂ - ಆತಂಕ್ವಾದಾಚೆ ಗುನ್ಯಾಂವ್ಕಾರಿ ಕೊಣ್?
ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
