ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 6. ಮೊಗಾಚೊ ಆಸ್ರೊ
ಐರಿನ್ ಪಿಂಟೊ, ಕೊಂಕ್ಣೆಂತ್ ಉಂಚ್ಲ್ಯಾ ಬರವ್ಪಿಣ್ಯಾಂ ಪಯ್ಕಿ ಎಕ್ಲಿ ಮ್ಹಳ್ಳ್ಯಾಕ್ ಹಿಚಾ ಲಿಖ್ಣೆಥಾವ್ನ್ ಉದೆಲ್ಲ್ಯೊ ಕೃತಿಯೊಚ್ ಗೊವಾಯ್ ದಿತಾತ್. ಹಿಚಾ ಲಿಖ್ಣೆಥಾವ್ನ್ ಉದೆಲ್ಲ್ "ಮ್ಹಜೆಂ ಅಂತಸ್ಕರ್ನ್ ವಿಸರ್ಚೆಂ ನಾ" ಹಾಂತ್ಲಿ ಏಕ್ ಮ್ಹಣ್ ವೊಪ್ಚಾ ಸಭಾರಾಂತ್ಲೊಂ ಹಾಂವ್ಯ್ ಎಕ್ಲೊಂ. ಮ್ಹಜಾ ಭುರ್ಗ್ಯಾಪಣಾಚೆರ್ ಹಿಚೊ ಕಾಣ್ಯೊ ವಾಚ್ಲ್ಲೊಂ ಹಾಂವ್ಯ್, ಹಿಚಾ ಸಾಹಿತ್ಯಾಚಾ ಸಭಾರ್ ಅಭಿಮಾನಿಂ ಪಯ್ಕಿಂತ್ ಎಕ್ಲೊಂ ಮ್ಹಣ್ ಸಾಂಗ್ಚಾಕ್ ಮ್ಹಕಾ ಭೋವ್ ಸಂತೊಸ್ ಆನಿ ಅಭಿಮಾನ್ ಭೊಗ್ತಾ. ಹಿಚಾ ಲಿಖ್ಣೆಥಾವ್ನ್ ಅಸಲ್ಯೊಚ್ ಕಾಣ್ಯೊ ಪರತ್ ಪರತ್ ಉದೆಂವ್ದಿ ಮ್ಹಣ್ ಆಶೆತಾಂ.
ಐರಿನ್ ಪಿಂಟೊ
"ಮಾಂಯ್ ಕೊಲ್ ಬೆಲ್ಲ್ ಜಾಲಿ ಬಾಗಿಲ್ ತಿಕ್ಕೆ ಉಗ್ತೆಂ ಕರುಂಕ್ ಜಾಯ್ನಾಂಯೆ?" ಬಿತರ್ ಥಾವ್ನ್ ಸುನೆನ್ ಉಲೊ ದಿಲ್ಲೊ ಆಯ್ಕೊನ್ ಬಸ್ಲ್ಲ್ಯಾ ಕಡ್ಚೆಂ ಉಟೊಂಕ್ ಪ್ರಯತನ್ ಕೆಲೆಂ ಆಲಿಸಾನ್. ಧೊಂಪ್ರಾ ದುಖಿ ವರ್ವಿಂ ಸುಲಭಾಯೆನ್ ಉಟೊಂಕ್ ಆನಿ ಬೊಸೊಂಕ್ ಜಾಯ್ನಾತ್ಲೆಂ ತಿಕಾ. ಬಸಲ್ಲ್ಯಾ ಕದೆಲಾಚೆರ್ ಹಾತಾಚೆಂ ಬಳ್ ಘಾಲ್ನ್ ಉಟೊನ್ ಸವ್ಕಾಸ್ ಬಾಗ್ಲಾ ಕುಶಿನ್ ಆಯ್ಲಿ ತಿ ಆನಿ ಬಾಗ್ಲಾಚಿ ಖಿಳ್ ಕಾಡ್ಲಿ.
"ಎಕ್ ಬಾಗಿಲ್ ಉಗ್ತೆಂ ಕರುಂಕ್ ಕಿತ್ಲೊ ವೇಳ್ ಮಾಂಯ್ ತುಕಾ? ತುಮಿ ದೊಗಾಂಯ್ ಘರಾ ಬೊಸೊನ್ ಕಿತೆಂ ಕರ್ತಾತ್?"
ಪುರ್ಪುರೊನ್ಂಚ್ಚ್ ಬಾಗ್ಲಾ ಭಿತರ್ ರಿಗ್ಲ್ಲ್ಯಾ ಜೊಸ್ಸಿಚ್ಯಾ ತೊಂಡಾರ್ ಪುರಾಸಣ್ ಆನಿ ನಾ ಸಮಾಧಾನ್ ಝಳ್ಕಾತಾಲೆಂ. ಆಲಿಸ್ ಜಾಣಾಸ್ಲ್ಲಿ ಆಪ್ಲ್ಯಾ ದೊಗಾಂ ಪುತಾ ಮಧೆಂ ಆಸ್ತಿಚೆ-ವಾಂಟೆ ಕರ್ನ್ ದಿಲ್ಲ್ಯಾ ನಂತರ್, ತಿಣೆಂ ಕೆಲ್ಲೆಂ ಏಕ್ಚ್ಚ್ ಏಕ್ ಕಾಮ್ ಪುತಾಕ್ ತೃಪ್ತಿ ದೀಂವ್ಕ್ ಸಕಾನಾ ಮ್ಹಣ್.
"ಮಾಂಯ್ ಹಾಂಗಾ ಯೆ ಬಸ್" ಸೊಫಾರ್ ಬಸ್ತಾಚ್ಚ್ ಆಪಯ್ಲೆಂ ಜೊಸ್ಸಿನ್. ತಾಚೊ ತಾಳೊ ಗರಮ್ ಆಸ್ಲ್ಲೊ.
ತಿಕಾ ಸೊಫಾಚೆರ್ ಬಸೊಂಕ್ ಕಶ್ಟ್ ಜಾತಾಲೆ ಜಾಲ್ಲ್ಯಾನ್ ತಾಚ್ಯಾ ಮುಕಾರ್ ಆಸ್ಲ್ಲ್ಯಾ ಕದೆಲಾರ್ ಕಷ್ಟಾಂನಿ ಬಸ್ಲಿ ತಿ.
"ಲೆತ್ತಿ ಮಾವ್ಶಿ ಮೆಳ್ಳಿ. ತುಂವೆಂ ಲಿನೆಟಾಚ್ಯಾ ಕಾಜಾರಾಕ್ 3 ಪಾಂವ್ಡಾ ಭಾಂಗಾರ್ ದಿತಾಂ ಮ್ಹಳಾಂ ಖಂಯ್. ಕಾಜಾರಾಚೆ ದೀಸ್ ಲಾಗ್ಗಿಂ ಯೆತಾತ್. ವೆಗ್ಗಿಂ ದಿಲ್ಯಾರ್ ಬರೆಂ ಆಸ್ಲ್ಲೆಂ ಮ್ಹಣಾಲಿ.
ಪುತಾಚಿಂ ಉತ್ರಾಂ ಆಯ್ಕೊನ್ ಕಾವ್ಜೆಲಿ ಆಲಿಸ್. ಆಪ್ಲಿ ಭೈಣ್ ಲೆತ್ತಿ ವಿಧೊವ್. ಕಷ್ಟಾಂತ್ ಆಸಾ. ತೆಗಾಂಯ್ ಧುವೊಚ್ಚ್ ತಿಕಾ. ವೊಡ್ಲ್ಯಾ ದೊಗಾಂಕ್ ಕಷ್ಟಾಂನಿ ತಿಣೆಂ ಕಾಜಾರ್ ಕೆಲ್ಲೆಂ. ತೆದಾಳಾಯ್ ತಾಂಕಾ ಆಪ್ಣೆಂ ಕುಮಕ್ ಕೆಲ್ಲಿ. ನಿಮಾಣೆಂ ಲಿನೆಟ್. ಲೆತ್ತಿಚ್ಯಾ ಹಾತಾಂತ್ ಕಾಂಯ್ ಪಯ್ಶೆ ನಾತ್ಲ್ಲೆ. ಆಪ್ಣೆಂ ತಿಕಾ ಇಲ್ಲಿ ಪುಣಿ ಕುಮಕ್ ಕರಿಜಾಯ್ ಮ್ಹಣ್ ಆಲಿಸಾಕ್ ಆಶಾ ಆಸ್ಲ್ಲಿ. ಪುತಾಲಾಗ್ಗಿಂ ವಿಚಾರ್ಲ್ಯಾರ್ ತೊ ಆಡ್ಕಳ್ ಕರ್ತಾಲೊ ಮ್ಹಳ್ಳೆಂ ತಿ ಜಾಣಾಸ್ಲ್ಲಿ. ದೆಕುನ್ ತಾಚೆಲಾಗಿಂ ವಿಚಾರಿನಾಸ್ತಾನಾಂಚ್ಚ್ ತಿಣೆ ಆಪ್ಲ್ಯಾ ಭಾಂಗಾರಾಂತ್ಲಿ
ತೀನ್ ಪಾಂವ್ಡಾಂ ತಾಂಕಾ ಭಾಸಾಯಿಲ್ಲಿಂ.
"ತಿಂ ಕಷ್ಟಾಂನಿ ಆಸಾತ್ ನಹಿಂವೆಂ ಪುತಾ. ದೆಕುನ್ ದಿತಾಂ ಮ್ಹಳ್ಳೆಂ. ತುಜೆಲಾಗಿಂ ಪಯ್ಶೆ ವಿಚಾರುಂಕ್ ಬೆಜಾರ್ ಜಾಲೆಂ".
"ಆಮಿ ಖಂಚಾ ಸುಖಾರ್ ಆಸಾಂವ್ ಮಾಂಯ್? ಆಸ್ಲ್ಲೆಂ ಇಲ್ಲೆಂ ತುಂವೆಂ ದಾನ್ ದಿಲಾಂಯ್ ಆನಿ ಆನಿಕೀ ದೀವ್ನ್ಂಚ್ ಆಸಾಯ್. ತುಕಾ ಜಾಲಾಂ ತರೀ ಕಿತೆಂ?"
"ಖಂಯ್ ಪುತಾ ಹಾಂವೆಂ ದಾನ್ ಕೆಲಾಂ? ತುಕಾ ತುಜೊ ವಾಂಟೊ ದೀಂವ್ಕ್ ನಾಂಗಿ?"
"ದಿಲಾಂ ಮಾಂಯ್ ಹೆಂ ಪರ್ನೆಂ ಘರ್ ಆನಿ ಭೊಂವ್ತಣಿಚೊ ಜಾಗೊ. ಪ್ರೆಡ್ಡಿಕ್ ಜೋಡ್ ಆಸ್ಲಾರೀ, ತುಜಿ ಚಾಕ್ರಿ ಹಾಂವ್ ಕರ್ತಾಂ ಜಾಲ್ಯಾರೀ, ತಾಕಾ ತುಂವೆಂ ಬರೊ ಜಾಗೊ ದಿಲಾಯ್. ತಾಚಾ ಜಾಗ್ಯಾಕ್ ಭಾಂಗಾರಾಚೆಂ ಮೋಲ್ ಯೆತಾ".
"ಹೆಂ ಮಾಲ್ಗಡೆಂ ಘರ್ ಪುತಾ. ತುಂ ಆಮ್ಚೊ ಮಾಲ್ಗಡೊ ಪುತ್. ತಶೆಂ ಜಾಲ್ಲ್ಯಾನ್ ಹೆಂ ಘರ್ ತುಕಾ ದಿಲಾಂ. ತಾಚ್ಯಾ ವಾಂಟ್ಯಾಂತ್ ಘರ್ ನಾ. ತೊ ಖಾಲಿ ಜಾಗೊ. ಹೆಂ ಘರ್ ಆಮ್ಚ್ಯಾ ಮೊಗಾಚೊ ಆಸ್ರೊ. ಹ್ಯಾ ಘರಾ ಸಾಂಗಾತಾ ಆಮ್ಚೊ ಮೋಗ್ ಆನಿ ಬೊಗ್ಣಾಂಯ್ ತುಜ್ಯಾ ವಾಂಟ್ಯಾಕ್ ಆಸಾತ್ ಪುತಾ".
"ನಾಂ ಮಾಂಯ್. ತೆಂ ತುಂವೆಂ ತೊಂಡಾನ್ ಮಾತ್ರ್ ಮ್ಹಣ್ಚೆಂ. ಹಾಂವ್ ಜಾಣಾಂ ತುಜೆಂ ಆನಿ ಆನಾಚೆಂ ಮನ್ ಕಿತೆಂ ಮ್ಹಣ್. ಮಾಕಾ ಜೋಡ್ ಉಣಿ, ಚಡ್ ಶಿಕಾಪ್ ನಾ. ದೈಹಿಕ್ ಊಣ್ ಆಸಾ ದೆಕುನ್ ತುಮ್ಕಾಂ ಮ್ಹಜೆರ್ ತಾತ್ಸಾರ್. ಫ್ರೆಡ್ಡಿ ಗಲ್ಫಾಂತ್ ಬರ್ಯಾ ಜೋಡಿರ್ ಆಸಾ. ಚಡ್ ಶಿಕ್ಲಾ. ಪಳೆಂವ್ಕ್ ಬರೊ ಆಸಾ. ದೆಕುನ್ ಸುರು ಥಾವ್ನ್ ತುಮ್ಕಾಂ ತಾಚೆರ್ ಮೋಗ್ ಚಡ್. ಆನ್ ಮೊರ್ತಾನಾಂಯ್ ನೀತ್ ಕರ್ನ್ ಮೊರೊಂಕ್ ನಾ".
"ತೊಂಡ್ ಧಾಂಪ್ರೆ" ಚಾಳ್ವಾಲಿ ಆಲಿಸ್. "ತುಜ್ಯಾ ಬಾಪಾಯ್ ವಿಶ್ಯಾಂತ್ ಏಕ್ ಸಬ್ದ್ ಕಾಡ್ಶಿ ಜಾಲ್ಯಾರ್ ಪಳೆ ತುಕಾ. ತೊ ಕಿತ್ಲೊ ನಿತಿಚೊ ಮನಿಸ್ ಮ್ಹಣ್ ಸರ್ವ್ ಜಾಣಾಂತ್. ತುಕಾ ಸಗ್ಳೊ ಘರ್ ಆನಿ ಜಾಗೊ ಭಿತರ್ ಘಾಲಿಜಾಯ್ ಆಸ್ಲೊ. ಏಕ್ ವಾಂಟೊ ಫ್ರೆಡ್ಡಿಕ್ ದಿಲಾ ಮ್ಹಣ್ ತುಕಾ ಆತಾಂ ಪೊಟಾಕ್ ಜಾಳ್. ತಾಚ್ಯಾ ನಶೀಬಾಕ್ ಆತಾಂ ತಾಚ್ಯಾ ವಾಂಟ್ಯಾ ಸರ್ಶಿನ್ ಮಾರೊಗ್ ಯೆತಾ ಆನಿ ತಾಕಾ ಮೋಲ್ ಚಡ್ ಯೆತಾ" ತಿಚೊ ವ್ಹಡ್ಲೊ ತಾಳೊ ಆಯ್ಕೊನ್ ಭಿತರ್ ಕಾಮಾರ್ ಆಸ್ಲ್ಲಿ ತಿಚಿ ಸುನ್ ಜೆನೆಟ್ ಧಾಂವೊನ್ ಆಯ್ಲಿ.
"ತುಕಾ ಹಾಂವೆಂ ಸಾಂಗ್ಲ್ಲೆಂ ನಂಯ್" ಆಪ್ಲ್ಯಾ ಪತಿಕ್ ಉದ್ದೇಶುನ್ ಮ್ಹಣಾಲಿ ತಿ.
"ಸದಾಂಚ್ಚ್ ಘರಾಂತ್ ಝಗ್ಡೆಂ ಕರ್ಚಾ ಬದ್ಲಾಕ್ ಮಾಂಯ್ ಆಮ್ಚೆ ಲಾಗಿಂ ಸಮಾ ಪಡಾನಾ ತರ್ ಪ್ರಾಯ್ವಂತಾಚ್ಯಾ ಆಶ್ರ್ಯಾಂತ್ ದವರ್ಯಾಂ ಮ್ಹಣ್. ಮೊಗಾಚೊ ಪುತ್ ಫ್ರೆಡ್ಡಿ ಪಯ್ಸೆ ಧಾಡ್ತೊಲೊ.
ಆಯ್ಕೊನ್ ಆಲಿಸ್ ಸ್ತಬ್ದ್ ಜಾಲಿ. ಉಲಂವ್ಕ್ ಉಗ್ತೆಂ ಕೆಲ್ಲ್ಯಾ ತಿಚ್ಯಾ ವೊಂಟಾಂತ್ಲ್ಯಾನ್ ಉತ್ರಾಂ ಭಾಯ್ರ್ ಸರ್ಲಿನಾಂತ್. ಹ್ಯಾ ದೀಸಾಂನಿ ಘರಾಂತ್ ಕಿತ್ಯಾ ಪುಸು ಪುಸು ಜಾತಾ ಮ್ಹಳ್ಳೆಂ ತಿಕಾ ಝಳ್ಕಾಲೆಂ. ಇತ್ಲಿಂ ವರ್ಸಾಂ ಆಪುಣ್ ಜಿಯೆಲ್ಲೆಂ ಘರ್. ಆಪ್ಲ್ಯಾ ಸುಖಾದುಖಾಂತ್ ವಾಂಟೆಲಿ ಜಾಲ್ಲೆಂ ತೆಂ ಘರ್ ಮೊರೊಂಕ್ ಲಾಗ್ಗಿಂ ಪಾವ್ತಾನಾ ಸೊಡ್ನ್ ವೆಚೆಂ ಕಶೆಂ?
"ಕಿತೆಂ ಆಯ್ಕಾತಾಂ ಹಾಂವ್" ರಡ್ಲಿ ತಿ ತಕ್ಲೆಕ್ ಹಾತ್ ಮಾರ್ನ್.
"ಮ್ಹಜೊ ಜೀವ್ ಆಸ್ತಾನಾಂಚ್ಚ್ ಆಸ್ತ್ ವಾಂಟುನ್ ದಿಲ್ಲೊ ಫಳ್ ಹೊ. ಹೆರಾಂನಿ ಕಿತ್ಲೆಂ ಸಾಂಗ್ಲೆಂ ಮಾಕಾ ನಾಕಾ ಮ್ಹಣೊನ್ ಜಾಲ್ಯಾರೀ ತುಮ್ಚೆರ್ ಭರ್ವಸೊ ದವರ್ನ್ ಹಾಂವೆ ವಾಂಟೆ ಕೆಲೆ. ಆತಾಂ ಹಾಂವ್ಚ್ಚ್ ನಾಕಾ ತುಮ್ಕಾಂ. ತುಜ್ಯಾ ಆನಾನ್ ಆನಿ ಹಾಂವೆ ಕಷ್ಟಾಂನಿ ಬಾಂದ್ಲ್ಲೆಂ ಘರ್ ಹೆಂ. ಮಜೊ ಜೀವ್ ಹಾಂತುಚ್ಚ್ ವಚಾಜಾಯ್".
"ನಾ ಮಾಂಯ್, ಹಾಂವೆ ಆನಿ ಜೆನೆಟಾನ್ ನಿರ್ಧಾರ್ ಕರ್ನ್ ಜಾಲಾ. ತುಂವೆಂ ವಿಳಾಪ್ ಕರ್ನ್ ಪ್ರಯೋಜನ್ ನಾಂ. ತೆಗಾಂ ಭುರ್ಗ್ಯಾಂಚಿ ಜತನ್ ತಾಚೆ ವಯ್ರ್ ತುಜಿ ಚಾಕ್ರಿ ಕರುಂಕ್ ಆಮ್ಕಾಂ ಸಕತ್ ನಾಂ. ತುಂ ಜಾಣಾಂಯ್ ಮ್ಹಾಕಾ ಉಸ್ಮೊಡ್ ಆಸಾ ಮ್ಹಣ್".
ಕಿತೆಂ ಉಲೈತೆಲಿ ಆಲಿಸ್? ತಿ ಜಾಣಾಸ್ಲ್ಲಿ ಮೋಗ್ ಆಸ್ಲ್ಯಾರ್ ಕಿತ್ಲಿಯ್ ಜಡಾಯ್ ಉಕಲ್ತಾ ಮತ್. ಪುಣ್ ಮೋಗ್ಚ್ಚ್ ನಾ ತರ್. ಆಪ್ಲೆಂ ತೋಂಡ್ ಪಾಲ್ವಾಂತ್ ಲಿಪವ್ನ್ ರಡಾತ್ತ್ ಆಪ್ಲ್ಯಾ ಕುಡಾಕ್ ಗೆಲಿ ಆನಿ ಆಪ್ಲ್ಯಾ ಖಟ್ಲ್ಯಾರ್ ಬಸ್ಲಿ. ಮುಕಾರ್ ಆಸ್ಲ್ಲಿ ಪತಿಚಿ ತಸ್ಪೀರ್ ಆಪ್ಣಾಕ್ಚ್ಚ್ ಭಿರ್ಮತೆನ್ ಪಳೈತಾ ಮ್ಹಳ್ಳೆ ಬರಿಂ ಭಗ್ಲೆಂ ತಿಕಾ.
"ತುಂಚ್ಚ್ ಭಾಗಿ. ಹೆಂ ಪುರಾ ಪಳೆಂವ್ಚ್ಯಾ ಪಯ್ಲೆಂಚ್ ಗೆಲೊಯ್" ದೊಳ್ಯಾಂತ್ಲ್ಯಾನ್ ದೆಂವ್ಚಿಂ ದುಖಾಂ ಪುಸ್ಚೆಂ ಪ್ರಯತನ್ ಕರಿನಾಸ್ತಾನಾ ಖಟ್ಲ್ಯಾರ್ ಆಡ್ ಪಡ್ಲಿ.
ತಿಚಿಂ ಚಿಂತ್ನಾಂ ಜೊಸ್ಸಿಚ್ಯಾ ಬಾಳ್ಪಣಾಚ್ಯಾ ವೆಳಾಕ್ ಪಾಟಿಂ ಧಾಂವ್ಲಿಂ. ಕಿತ್ಲ್ಯಾ ಮೊಗಾನ್ ವಾಗಯ್ಲೊ ತಾಕಾ. ತಾಚೊ ದಾವೊ ಪಾಯ್ ಉಜ್ವ್ಯಾ ಪಾಯಾ ಪ್ರಾಸಾ ತಿಕ್ಕೆ ಮಟ್ವೊ ಆಸ್ಲ್ಲೊ ಆನಿ ಚಲ್ತಾನಾ ತೊ ಪಾಂಯ್ ತೊ ವೊಡ್ನ್ ಚಲ್ತಾಲೊ. ತಾಕಾ ಚಲೊಂಕ್ ಕಷ್ಟ್ ಜಾತಾತ್ ಮ್ಹಣೊನ್ ಫ್ರೆಡ್ಡಿಕ್ ಆಪುಣ್
ಗರ್ಭೇಸ್ತ್ ಜಾತಾ ಮ್ಹಣಾಸರ್ ತಾಕಾ ಹಾಂಡಿ ಮಾರ್ನ್ ತಿ ಭೊಂವ್ತಾಲಿ. ದುಸ್ರ್ಯಾಂ ಭುರ್ಗ್ಯಾ ಥಾವ್ನ್ ತಾಕಾ ರಾಕೊಂಕ್ ಕಿತ್ಲೆಂ ಝಗ್ಡೆಂ ತಿಣೆಂ ಕೆಲ್ಲೆಂ.
ತಿ ಆನಿ ತಿಚೊ ಪತಿ ಲೊರೆಸಾನ್ ಜೊಸ್ಸಿ ದೋನ್ ವರ್ಸಾಂಚೊ ಭುರ್ಗೊ ಆಸ್ತಾನ್ ಒಮ್ಜೊರ್ ಆಪ್ಲ್ಯಾ ಗಾಂವಾಂತ್ ಆಸ್ಲ್ಲೆಂ ತೋಟ್ ಆನಿ ಗಾದೆ ವಿಕುನ್ ಕೊಡ್ಯಾಳ್ ಯೇವ್ನ್ ವಸ್ತಿ ಕೆಲ್ಲಿ. ಆಪ್ಲೆಂ ಆಸ್ತ್ಬದಿಕ್ ವಿಕ್ಲ್ಲ್ಯಾ ಪಯ್ಶಾಂನಿ ತೆದಾಳಾ ಕೊಡ್ಯಾಳಾಂತ್ ಲಾಗ್ಗಿಂ ಲಾಗ್ಗಿಂ ಏಕ್ ಎಕ್ರೊ ಜಾಗೊ ತಾಣಿಂ ಘೆತ್ಲ್ಲೊ. ತೆದಾಳಾ ಜಾಗ್ಯಾಕ್ ಚಡ್ ಮೋಲ್ ನಾತ್ಲ್ಲ್ಯಾ ವರ್ವಿಂ ಹೆಂ ಸಾಧ್ಯ್ ಜಾಲ್ಲೆಂ. ಉರ್ಲ್ಲ್ಯಾ ಪಯ್ಶಾಂನಿ ತೆಂ ಘರ್ ತಾಣಿಂ ಬಾಂದ್ಲ್ಲೆಂ. ದೀಸ್ ಪಾಶಾರ್ ಜಾತಾನಾ ತ್ಯಾ ಜಾಗ್ಯಾ ಭೊಂವ್ತಿ ದುಸ್ರಿಂ ಘರಾಂ ವಯ್ರ್ ಆಯಿಲ್ಲಿಂ ಆನಿ ಜಾಗ್ಯಾಚೆಂ ಮೋಲ್ ಚಡ್ಲ್ಲೆಂ.
ಫ್ರೆಡ್ಡಿ ಜಲ್ಮಾತಾನಾ ಜೊಸ್ಸಿಕ್ 7 ವರ್ಸಾಂ. ಫ್ರೆಡ್ಡಿ ವಾಡೊನ್ ಯೆತಾನಾ ಜೊಸ್ಸಿ ಆನಿ ಫ್ರೆಡ್ಡಿ ಮಧ್ಲೊ ತಫಾವತ್ ದಿಸೊನ್ ಆಯ್ಲೊ. ಫ್ರೆಡ್ಡಿ ಚುರುಕ್, ಶಿಕ್ಪಾಂತ್ ಹುಶಾರ್, ಪಳೆಂವ್ಕ್ ಸೊಭಿತ್. ಜೊಸ್ಸಿ ಸಾವ್ಳೊ, ಪಾಯಾ ವರ್ವಿಂ ಕಾಮಾಂತ್ ಆನಿ ಖೆಳಾಂತ್ ಸವ್ಕಾಸ್ ಆನಿ ಶಿಕೊಂಕ್ ಪಾಟಿಂ. ಭಾವಾ ಮುಕಾರ್ ಜೊಸ್ಸಿಕ್ ಕೆದಾಳಾಯ್ ಉಣೆಪಣ್ ಭೊಗ್ತಾಲೆಂ.
ವ್ರತ್ತೆನ್ ಲೊರೆಸ್ ಶಿಕ್ಷಕ್. ಆಸ್ಲ್ಲೆ ಪಯ್ಶೆ ಆಸ್ತಿಕ್ ಆನಿ ಘರಾಕ್ ಖರ್ಚಿಲ್ಲ್ಯಾ ವರ್ವಿಂ ತಾಕಾ ಇಗರ್ಜೆಚ್ಯಾ ಇಸ್ಕೊಲಾಂತ್ ಮೆಸ್ತ್ರಿಚೆಂ ಕಾಮ್ ಕರಿಜಾಯ್ ಪಡ್ಲೆಂ. ಆನಿ ಗಾಂವಾರ್ ತೊ ಲೊರ್ಸು ಮೆಸ್ತ್ರಿ ಮ್ಹಣೊನ್ ವಳ್ಕಿಚೊ ಜಾಲೊ. ಆಲಿಸ್ ಜಾಗ್ರುತ್ಕಾಯೆನ್ ಘರ್ ಆನಿ ಆಪ್ಲ್ಯಾ ದೊಗಾಂ ಭುರ್ಗ್ಯಾಂಕ್ ಸಾಂಬಾಳ್ತಾಲಿ.
ಜೊಸ್ಸಿನ್ ಮೆಟ್ರಿಕ್ ಜಾತಾಚ್ಚ್ ಬಾಪಯ್ ಬರಿಂ ಶಿಕ್ಷಕಾಚಿ ವ್ರತ್ತಿ ವಿಂಚ್ತಾನಾ ಫ್ರೆಡ್ಡಿ ಕೊಲೆಜಿಚೆಂ ಶಿಕಾಪ್ ತಿರ್ಸುನ್ ಗಲ್ಪಾಕ್ ಪಾವ್ಲೊ. ಜೊಸ್ಸಿಚೆಂ ಕಾಜಾರ್ ತಾಕಾ
30 ವರ್ಸಾಂ ಜಾತಾನಾ ತಾಚಾಚ್ಚ್ ಇಸ್ಕೊಲಾಂತ್ ಶಿಕಂವ್ಚ್ಯಾ ಜೆನೆಟ್ ಟೀಚರಿ ಲಾಗಿಂ ಜಾಲೆಂ. ತಾಂಕಾ ಪಾಟಾಪಾಟ್ ತೆಗಾಂ ಚೆಡ್ವಾಂ ಭುರ್ಗಿಂ ಜಲ್ಮಾಲಿಂ. ಫ್ರೆಡ್ಡಿ ಕಾಜಾರ್ ಜಾವ್ನ್ ಆಪ್ಲ್ಯಾ ಪತಿಣೆ ಆನಿ ಏಕಾಚ್ಚ್ ಪುತಾ ಸಂಗಿಂ ಗಲ್ಪಾಂತ್ ಆಸ್ಲ್ಲೊ.
ಫ್ರೆಡ್ಡಿ ಆವಯ್ಕ್ ತಿಚ್ಯಾ ಜಲ್ಮಾದೀಸಾ ಆನಿ ಕ್ರಿಸ್ಮಸಾಕ್ ಪಯ್ಸೆ ಧಾಡ್ತಾಲೊ. ಹರ್ಯೆಕಾ ಮಹಿನ್ಯಾಂತ್ ಪಯ್ಶೆ ಧಾಡ್ಚಿ ಸವಯ್ ತಾಕಾ ನಾತ್ಲ್ಲಿ. ಹ್ಯಾ ಪ್ರಾಯೆರ್ ಆಪ್ಲ್ಯಾ ಆವಯ್ಕ್ ಪಯ್ಶಾಂಚಿ ಕಸಲಿ ಗರ್ಜ್ ಮ್ಹಳ್ಳಿ ಚಿಂತ್ನಾಂ ತಾಚಿಂ. "ತುಕಾ ಗರ್ಜ್ ಪಡ್ಲ್ಯಾರ್ ವಿಚಾರ್ ಮಾಂಯ್, ಹಾಂವ್ ಧಾಡ್ತಾಂ" ಮ್ಹಣ್ತಾಲೊ. ಸ್ವಾಭಿಮಾನಿ ಆಲಿಸಾಚ್ಯೊ ಗರ್ಜೊ ಬೋವ್ ಉಣ್ಯೊ.
ಭಲಾಯ್ಕೆಂತ್ ಬರೊ ಆಸ್ಲ್ಲೊ ಲೊರೆಸ್ ಆಪ್ಲ್ಯಾ 75 ಪ್ರಾಯೆರ್ ಆವ್ಚಿತ್ತ್ ಕಾಳ್ಜಾಘಾತಾನ್ ಅಂತರ್ಲೊ. ಘಾಂಟಿ ದೂಕಿನ್ ಕೊನ್ಶ್ಯಾರ್ ಪಡ್ಲ್ಲಿ ಆಲಿಸ್ ನಿರಾಧಾರಿ ಜಾಲ್ಲಿ. ಘರ್ಚೆಂ ಕಾಮ್ ಕರುಂಕ್ ತಿಕಾ ಜಾಯ್ನಾತ್ಲ್ಲೆಂ. ಜೆನೆಟಾನ್ ಕಾಮಾಕ್ ರಾಜಿನಾಮೆ ದೀವ್ನ್ ಘರ್ ಸಾಂಬಾಳಿಜಾಯ್ ಪಡ್ಲೆಂ. ಪಾವಾನಾತ್ಲ್ಲ್ಯಾಕ್ ಆಯ್ಲೆವಾರ್ ಆಲಿಸಾಕ್ ಗೊಡ್ ಮುತಾಚಿ (diabeties) ಪಿಡಾ ಆನಿ ರಗ್ತಾದಾಬ್ (B.P.) ದೊನಿ ಆಸ್ಲ್ಲಿ. ಆಪ್ಲೆಂ ಅಂತ್ಯ್ ಆವ್ಚಿತ್ತ್ ಜಾಯ್ತ್ ಮ್ಹಳ್ಳ್ಯಾ ಭಿಯಾಂನ್ ಆಲಿಸಾನ್ ಪತಿನ್ ಆಪ್ಲ್ಯಾ ನಾಂವಾರ್ ಕೆಲ್ಲೊ ಜಾಗೊ ದೊಗಾಂಯ್ ಪುತಾಂಕ್ ವಾಂಟುನ್ ದಿಲೊ. ಆಸ್ಚೆಂ ಘರ್ ಆನಿ ಭೊಂವ್ತಣಿಚೊ
50 ಸೆಂಟ್ಸ್ ಮಾಲ್ಗಡ್ಯಾ ಜೊಸ್ಸಿಕ್ ಉರ್ಲ್ಲೊ ಖಾಲಿ ಜಾಗೊ ಫ್ರೆಡ್ಡಿಕ್. ಆಪ್ಣಾಕ್ ಜೋಡ್ ಉಣಿ ಆಸ್ಲ್ಲ್ಯಾನ್ ಆನಿ ತೆಗಾಂಯ್ ಭುರ್ಗಿಂ ಚಲಿಯೊ ಜಾಲ್ಲ್ಯಾನ್ ಜೊಸ್ಸಿಕ್ ಆವಯ್ನ್ ಸಗ್ಳೊ ಜಾಗೊ ಆಪ್ಣಾಕ್ ದೀಜಾಯ್ ಮ್ಹಣೊನ್ ಆಶಾ ಆಸ್ಲ್ಲಿ. ಆವಯ್ಕ್ ಆಪುಣ್ ಪಳಯ್ತಾಂ, ಜಾಗೊಯ್ ಆಪುಣ್ ಸಾಂಬಾಳ್ತಾಂ, ಫ್ರೆಡ್ಡಿಕ್ ಬೊರಿ ಜೋಡ್ ಆಸಾ, ತಾಕಾ ಕಿತ್ಯಾಕ್ ವಾಂಟೊ ಮ್ಹಣ್ ತಾಚೊ ವಾದ್.
ಜಾಗ್ಯಾಚೆ ವಾಂಟ್ ಜಾತಾಚ್ಚ್ ಫ್ರೆಡ್ಡಿಚಾ ನಶೀಬಾಕ್ ತಾಚ್ಯಾ ವಾಂಟ್ಯಾ ಸರ್ಶಿನ್ ನೊವೊ ಮಾರೊಗ್ ಜಾಲೊ ಆನಿ ತಾಚ್ಯಾ ಜಾಗ್ಯಾಚೆಂ ಮೋಲ್ ಚಡ್ಲೆಂ. ಘರಾಂತ್ ನಾ ಸಮಾಧಾನ್ ಚಡೊನ್ಂಚ್ಚ್ ಆಯ್ಲೆಂ. ಹೆಂ ಪುರಾ ನೆಣಾಸ್ಲ್ಲೊ ಫ್ರೆಡ್ಡಿ ಆಪ್ಲ್ಯಾಚ್ಚ್ ಪಯ್ಸೆ ಜೊಡ್ಚ್ಯಾ ಸಂಸಾರಾಂತ್ ಮಗ್ನ್ ಜಾವ್ನಾಸ್ಲ್ಲೊ.
ಸಾಂಜೆರ್ ಆಮೊರೆಚೊ ವೇಳ್ ಜಾಲ್ಲ್ಯಾನ್ ಆಪ್ಲ್ಯಾ ಚಿಂತ್ನಾಂತ್ಲ್ಯಾ ಸಂಸಾರಾಂತ್ ಥಾವ್ನ್ ವಾಸ್ತವಿಕತೆಕ್ ಪಾಟಿಂ ಆಯ್ಲಿ ಆಲಿಸ್. ಆಪ್ಲ್ಯಾ ಪತಿಚೊ ಪಾಟ್ಲಾವ್ ಕರುಂಕ್ ಆನಿ ಚಡ್ ದೀಸ್ ನಾಂತ್ ಮ್ಹಣ್ ಭೊಗ್ಲೆಂ ತಿಕಾ. "ಆನಿ ವಾಂಚುನ್ ಕಿತೆಂ ಫಾಯ್ದೊ? ಹಾಂವಿ ವೆಗ್ಗೆಂ ತುಜೆ ಸರ್ಶಿಂ ಯೆತಾಂ". ಮೊಗಾನ್ ಲೊರೆಸಾಚ್ಯಾ ಪೊಟೊಕ್ ಪಳೆವ್ನ್ ಉದ್ಗಾರ್ ಕಾಡ್ಲೊ ತಿಣೆಂ. ತಾಚಾ ಮೊರ್ನಾ ಸಾಂಗಾತಾ ಉಣೆ ಜಾಲ್ಲಿ ಜಿಯೆಂವ್ಚಿ ಆಶಾ ತ್ಯಾ ದೀಸ್ ಸಂಪೂರ್ಣ್ ತಿಚೆ ಥಾವ್ನ್ ನಪೈಂಚ್ ಜಾಲಿ.
ಮಹಿನೊ ಆಖೇರ್ ಜಾವ್ನ್ ಯೆತಾಲೊ. ಘರಾಂತ್ ಆತಾಂ ಮಾಂಯ್, ಪುತಾ ಆನಿ ಸುನೆ ಮಧೆಂ ಉಲವ್ಣೆಂ ನಾತ್ಲ್ಲೆಂ. ಆಲಿಸ್ ಗರ್ಜೆ ಪುರ್ತೆಂ ನಾತ್ರಾಂ ಲಾಗಿಂ ಮಾತ್ರ್ ಉಲೈತಾಲಿ. ತಿಚ್ಯಾ ದೊಳ್ಯಾಂನಿ ಭರ್ಲ್ಲಿ ದುಖಾಂ ಆಡ್ಕಳ್ ನಾಸ್ತಾನಾ ಪೊಲ್ಯಾಂಚೆರ್ ವಾಳ್ತಾಲಿಂ. ತಿಂ ಪುಸುಂಕ್ ತಿ ಪ್ರಯತನ್ ಕರಿನಾತ್ಲ್ಲಿ. ಪುಸ್ಚೊ ದುಸ್ರೊ ಹಾತ್ ತ್ಯಾ ಘರಾಂತ್ ನಾತ್ಲ್ಲೊ.
"ಮಾಂಯ್ಕ್ ಆಮ್ಚೆ ಸಾಂಗಾತಾ ರಾವೊಂಕ್ ನಾಕಾ ಖಂಯ್. ತಿ ಆಶ್ರ್ಯಾಂತ್ ರಾವ್ತಾಂ ಮ್ಹಣ್ತಾ" ಮ್ಹಣೊನ್ ಜೊಸ್ಸಿನ್ ಭಾವಾಕ್ ಪೋನ್ ಕರ್ನ್ ಸಾಂಗ್ಲ್ಲೆಂ. ತಿಚ್ಯಾ ಮಹಿನ್ಯಾಚೊ ಖರ್ಚ್ ತಾಣೆಂ ಧಾಡ್ತಾಂ ಮ್ಹಳ್ಳೊ. ಪೋನಾರ್ ಆಪ್ಣಾಲಾಗಿಂ ತೊ ಉಲೈತಾನಾ ಜಾಪ್ ಜಾವ್ನ್ ತಿ ರಡ್ಲ್ಲಿ ಮಾತ್ರ್.
"ರಡಾನಾಕಾ ಮಾಂಯ್. ಆನಿ ಚಾರ್ ಮಹಿನ್ಯಾಂನಿ ಹಾಂವ್ ಗಾಂವಾಕ್ ಯೆತಾಂ. ತುಂವೆ ವೆಚೊ ಆಸ್ರೊ ಬರೊ ಮ್ಹಣ್ ಆಯ್ಕಾಲಾಂ ಹಾಂವೆಂ. ಥಂಯ್ ಮಾದ್ರಿ ತುಜಿ ಜತನ್ ಘೆತಲ್ಯೊ ಆನಿ ತುಕಾ ಹೆರಾಂ ಪ್ರಾಯೆಸ್ತಾಂಚೊ ಸಾಂಗಾತ್ ಮೆಳ್ತೊಲೊ"
ಕಿತೆಂ ಮ್ಹಣ್ತೆಲಿ ತಿ?
ಸಪ್ಟೆಂಬರ್ ಮಹಿನೊ. ಆಖ್ರೇಚ್ಯಾ ದೀಸಾ ತಿಚಿ ಥೊಡಿ ಮುಸ್ತಾಯ್ಕಿ ಸೂಟ್ಕೇಸಿಂತ್ ಘಾಲ್ನ್ ಜೊಸ್ಸಿನ್ ತಿಕಾ ಭಾಯ್ರ್ ಸರ್ ಮ್ಹಳೆಂ. ಆಪ್ಲ್ಯಾ ಘರ್ಚಿ ಆಲ್ತಾರ್, ಆಪುಣ್ ನಿದ್ಚೆಂ ಖಟ್ಲೆಂ, ಬಸ್ಚೆಂ ಕದೆಲ್ ಹರ್ಯೆಕ್ ಆಪ್ಲಿ ವಸ್ತ್ ಮೊಗಾನ್ ಪೊಶೆವ್ನ್ ರಡೊನ್ ಆಲಿಸಾನ್ ಆದೇವ್ಸ್ ಮ್ಹಳೊ. ತ್ಯಾ ಘರಾಚ್ಯಾ ಕೊನ್ಶ್ಯಾಂ ಕೊನ್ಶ್ಯಾಂನಿ ತಿಚೊ ಉಡಾಸ್ ಆನಿ ಭೊಗ್ಣಾಂ ಲಿಪೊನ್ ಆಸ್ಲ್ಲಿಂ. ಲೊರೆಸಾನ್ ಭಾಯ್ರ್ ವೆತಾನಾ ಘಾಲ್ಚ್ಯೊ ವಾಣೊ ಪರ್ಯಾಂತೀ ತಿಣೆ ಬೊರ್ಯೊ ಕರ್ನ್ ಪುಸುನ್ ಕಾಗ್ದಾಂತ್ ಬಾಂದುನ್ ಆಲ್ಮಾರಿಂತ್ ಕೊನ್ಶ್ಯಾಕ್ ದವರ್ಲ್ಲ್ಯೊ. ತಾಚೆಂ ಉಶೆಂ ಆಪ್ಣಾ ಸರ್ಶಿನ್ ಖಟ್ಲ್ಯಾರ್ ದವರ್ನ್ ನಿದ್ತಾಲಿ ತಿ. ತಾಚಿ ಮುಸ್ತಾಯ್ಕಿ ಗಡಿ ಕರ್ನ್ ಆಪ್ಲ್ಯಾ ಕಾಪ್ಡಾಂ ಸಂಗಿಂ ತಿಣೆ ದವರ್ಲ್ಲಿ. ನೆಸೊಂಕ್ ಕಾಪಾಡ್ ಕಾಡ್ತಾನಾ ಮೊಗಾನ್ ತಾಚ್ಯಾ ಶರ್ಟಾ ವಯ್ರ್ ತಿಚೊ ಹಾತ್ ಚರ್ತಾಲೊ. ಹ್ಯಾ ಸಂಸಾರಾಂತ್ ತೊ ನಾತ್ಲ್ಲೊ ತರೀ ತಿಚ್ಯಾ ಉಗ್ಡಾಸಾಂತ್ ತೊ ಜಿವೊ ಆಸ್ಲ್ಲೊ. ಕಶಿ ತಿ ತೆಂ ಘರ್ ಸೊಡ್ನ್ ವೆತೆಲಿ? ತಿಚೆಂ ಕಾಳಿಜ್ ಭೆಸಾಂ ಜಾಲ್ಲಿಂ. ರಡೊನ್ ಆನಿ ನೀದ್ ನಾಸ್ತಾನಾ ದೊಳ್ಯಾಂ ಭೊಂವ್ತೊಣಿ ಕಾಳ್ಬಾಣ್ ಮಾಂಡ್ಲ್ಲಿ. ಪುಣ್ ಜೊಸ್ಸಿ ಆನಿ ಜೆನೆಟ್ ಮಾತ್ರ್ ಫಾತೊರ್ ಜಾಲ್ಲಿಂ.
ನಾತ್ರಾಂಕ್ ಪೊಟ್ಲುನ್ ಧರ್ನ್ ರಡೊನ್ ಗೆಲಿ ತಿ.
ಆಶ್ರ್ಯಾಂತ್ ದೋನ್ ಮಹಿನೆ ಆಪ್ಲೊ ಸಂಸಾರ್ ವಿಸ್ರೊನ್ ಜಿಯೆಂವ್ಚೆಂ ಪ್ರಯತನ್ ಕೆಲೆಂ ತಿಣೆಂ. ಪುಣ್ ತಿಚಿ ಭಲಾಯ್ಕಿ ಭಿಗ್ಡೊನ್ ಆಯ್ಲಿ. ತಿಚಿ
B.P. ಆನಿ ಡಯಾಬಿಟಿಸ್ ಚಡೊನ್ಂಚ್ಚ್ ಗೆಲೆ. ಜಿಯೆಂವ್ಚಿ ಕಸಲಿಚ್ಚ್ ಆಶಾ ತಿಚೆ ಥಂಯ್ ಉರೊಂಕ್ ನಾತ್ಲ್ಲಿ. ಮಾದ್ರಿಂನಿ ಕಿತ್ಲೆಂ ಬೊರೆಂ ಕರ್ನ್ ಪಳೈಲ್ಯಾರೀ ಪ್ರಯೋಜನ್ ಜಾಲೆಂನಾ. ತ್ಯಾ ದೀಸ್ ರಾತಿಂ ನಿದ್ಲ್ಲಿ ತಿ ಸಕಾಳಿಂ ಉಟ್ಲಿಚ್ಚ್ ನಾ.
ಮೊರ್ನಾಚಿ ವಿಲೆವಾರಿ ಕರುಂಕ್ ಆಸ್ಲ್ಲಿ.
ಮಾದ್ರಿಂನಿ ಜೊಸ್ಸಿಕ್ ಆಪಂವ್ಕ್ ಧಾಡ್ಲೊ. ತಾಣೆಂ ಫ್ರೆಡ್ಡಿಕ್ ಪೋನ್ ಕೆಲೆಂ. ಆಪ್ಲ್ಯಾ ಆವಯ್ನ್ ಇತ್ಲೆ ವೆಗ್ಗಿಂ ಕಿತ್ಯಾ ಸಂಸಾರಾಂಕ್ ಆದೇವ್ಸ್ ಮಾಗ್ಲೊ ಮ್ಹಣ್ ಫ್ರೆಡ್ಡಿಕ್ ಸಮ್ಜಾಲೆಂನಾ. ಆಪುಣ್ ತಿಕಾ ಆಶ್ರ್ಯಾಂತ್ ದವರ್ಚೆ ಪಯ್ಲೆಂಚ್ಚ್ ರಜೆರ್ ಯೆತೊಂ ಮ್ಹಣ್ ಚುರ್ಚುರ್ಲೊ ತೊ ಆನಿ ಗಾಂವಾಕ್ ಯೆಂವ್ಚಿ ತಯಾರಾಯ್ ಕೆಲಿ.
ಭಾವಾಕ್ ಖಬಾರ್ ದೀವ್ನ್ ಜೊಸ್ಸಿ ಆಶ್ರ್ಯಾಕ್ ಧಾಂವೊನ್ ಆಯ್ಲೊ. ಆವಯ್ ಇತ್ಲೆ ವೆಗ್ಗಿಂ ಮೊರಾತ್ ಮ್ಹಣ್ ತಾಣೆಂ ಚಿಂತುಂಕ್ ನಾತ್ಲೆಂ. ತೊ ಪಾವ್ಲ್ಲೊಚ್ಚ್ ನಿದೆಂತ್ ಆಸ್ಲ್ಲ್ಯಾಬರಿ ದಿಸ್ಚ್ಯಾ ಆವಯ್ಚೆರ್ ದೀಶ್ಟ್ ಘಾಲಿ ತಾಣೆ. ತಿಚ್ಯಾ ತೊಂಡಾರ್ ಆತಾಂ ಶಾಶ್ವಿತ್ ಶಾಂತಿ ಆಸ್ಲ್ಲಿ. ಫ್ರೆಡ್ಡಿ ಗಾಂವಾಕ್ ಪಾವ್ತಾ ವರೇಗ್ ಮೊರ್ನ್ ಆಸ್ಪತ್ರೆಂತ್ ಮೊರ್ಗಾಂತ್ ದವರುಂಕ್ ಆಸ್ಲ್ಲೆಂ. ತೊ ಯೆತಾ ಜಾಲ್ಲ್ಯಾನ್ ಮೊರ್ನಾಚೊ ಖರ್ಚ್ ತೊ ಪಳೈತಾ ಮ್ಹಣ್ ಜೊಸ್ಸಿ ಜಾಣಾಸ್ಲ್ಲೊ.
ಕುಡಾ ಭಿತರ್ ಆಯಿಲ್ಲ್ಯಾ ವೊಡಿಲ್ನಿನ್ ತಾಚೆಂ ಗಮನ್ ಆಪ್ಣಾಂ ಥಂಯ್ ವೊಡುಂಕ್ ಹಳ್ತಾಚಿ ಖೊಂಕ್ಲಿ ಕಾಡ್ಲಿ.
"ತುಜ್ಯಾ ಆವಯ್ಚಾ ಮೊರ್ನಾ ಖಾತಿರ್ ಆಮಿ ಸಕ್ಕಡ್ ಕಾಳ್ಜಾಂ ಥಾವ್ನ್ ದೂಖ್ ಪಾವ್ತಾಂವ್" ಮ್ಹಣಾಲಿ ತಿ ತಾಚೆ ಕುಶಿನ್ ಏಕ್ ಕವರ್ ಆನಿ ಲ್ಹಾನ್ ಪೊಟ್ಲಿ ವೊಡ್ಡಾವ್ನ್ "ಆಪುಣ್ ಆವ್ಚಿತ್ತ್ ಮೊರಾನ್ ತರ್ ಹೆಂ ತುಕಾ ದಿ ಮ್ಹಳಾಂ".
ತಿಣೆಂ ದಿಲ್ಲಿ ಪೊಟ್ಲಿ ಆನಿ ಕಾಗಾತ್ ಕಾಣ್ಗೆಲೆಂ ಜೊಸ್ಸಿನ್. ತ್ಯಾ ಪೊಟ್ಲೆಂತ್ ತಿಚೆಂ ಭಾಂಗಾರ್ ಆಸ್ಲ್ಲೆಂ. ತೆಂ ತಾಣೆ ಆಪ್ಲ್ಯಾ ಬೊಲ್ಸಾಂತ್ ಘಾಲೆಂ ಆನಿ ಕವರ್ ಉಗ್ತೆಂ ಕೆಲೆಂ. ಆತುರಾಯೆನ್ ತಾಚೆ ದೊಳೆ ತ್ಯಾ ಕಾಗ್ದಾ ವಯ್ರ್ ಧಾಂವ್ಲೆ.
ಮೊಗಾಚ್ಯಾ ಜೊಸ್ಸಿಕ್,
ಹಾಂವ್ ಆಶ್ರ್ಯಾಕ್ ಯೆತಾನಾಂಚ್ಚ್ ಮ್ಹಾಕಾ ಭೊಗ್ಲ್ಲೆಂ ಹಾಂವ್ ಆನಿ ಚಡ್ ತೇಂಪ್ ವಾಂಚಾನಾ ಮ್ಹಣ್. ಮ್ಹಜ್ಯಾ ಜಿವಾಕ್ ಸವ್ಕಾಸಾಯ್ ನಾತ್ಲ್ಲಿ. ದೆಕುನ್ ಹಾಂಗಾ ಆಯಿಲ್ಲಿಂಚ್ಚ್ ಹೆಂ ಕಾಗಾತ್ ಬರವ್ನ್ ವಡಿಲ್ನಿಚ್ಯಾ ಹಾತಾಂತ್ ದಿಲಾಂ. ಮ್ಹಜ್ಯಾ ಮೊರ್ನಾ ನಂತರ್ ತುಕಾ ಮಾತ್ರ್ ದೀಂವ್ಕ್ ಸಾಂಗ್ಲಾಂ. ಹ್ಯಾ ಕಾಗ್ದಾ ಸಾಂಗಾತಾ ಮ್ಹಜೆಂ ಸಕ್ಕಡ್ ಭಾಂಗಾರ್ ಹಾಂವೆ ಏಕಾ ಪೊತ್ಯೆಂತ್ ಘಾಲ್ನ್ ದವರ್ಲಾಂ. ತೆಂ ತುಜ್ಯಾ ಧುವಾಂಕ್.
ಹ್ಯಾ ಕಾಗ್ದಾಂತ್ಲಿ ಸಂಗತ್ ಮ್ಹಜೆ ಸಾಂಗಾತಾಚ್ಚ್ ಮಾತ್ಯೆಂತ್ ನಪಂಯ್ಚ್ ಜಾವ್ನ್ ಯೇತಿ ಪುತಾ. ಹಾಂವ್ ತುಕಾ ಖಂಡಿತ್ ಸಾಂಗ್ತಿನಾ. ಪುಣ್ ಮ್ಹಾಕಾ ಆಶ್ರ್ಯಾಂತ್ ಹಾಡ್ನ್ ದವರ್ಚಾ ದೀಸಾ ತುಜ್ಯಾ ದೊಳ್ಯಾಂನಿ ಮ್ಹಜೆ ಥಂಯ್ ತುಕಾ ಚಡೊನ್ ಯೆಂವ್ಚೊ ರಾಗ್ ಆನಿ ದುಸ್ಮಾನ್ಕಾಯ್ ಹಾಂವೆ ದೆಕ್ಲಿ. ತ್ಯಾ ರಾಗಾನ್ ಮ್ಹಜಿ ನಿಮಾಣಿ ಆಶಾ ತುಂ ಬಾಗೊಂವ್ಚೊನಾಂಯ್ ಮ್ಹಳ್ಳೆಂ ಏಕ್ ಭ್ಯೆಂ ಮ್ಹಜ್ಯಾ ಮೊನಾಂತ್ ಉಬ್ಜೊನ್ ವಾಡೊಂಕ್ ಲಾಗ್ಲೆಂ. ದೆಕುನ್ ಹೆಂ ಕಾಗಾತ್ ಬರೈತಾಂ.
ಹೆಂ ಆಶ್ರಮ್ ಆಮ್ಚ್ಯಾ ಗಾಂವಾಂ ಥಾವ್ನ್ ಮಸ್ತ್ ಪಯ್ಸ್ ಆಸಾ. ಹಾಂವ್ ಹಾಂಗಾ ಮೊರಾನ್ ಥರ್ ಮ್ಹಜೆಂ ಮೊರ್ನ್ ಮ್ಹಜ್ಯಾ ಘರಾ ವರ್ನ್ ಆಮ್ಚ್ಯಾಂಚ್ ಫಿಗರ್ಜೆಂತ್ ಆನಾಚ್ಯಾ ಪೊಂಡಾಂತ್ ನಿಕೆಪಿಜಾಯ್. ಮೊರ್ನಾ ನಂತರ್ ಖಂಯ್ ಜಾಲ್ಯಾರೀ ಕಿತೆಂ ಮ್ಹಳ್ಳೆಂ ಚಿಂತಾಪ್ ತುಜೆ ಥಂಯ್ ಆಸೊಂಕ್ ನಜೊ. ಮ್ಹಜೆಂ ಮೊರ್ನ್ ತುಜ್ಯಾ ಆನಾಚೆಂ ಜಾಲ್ಲೆಂ ಪರಿಂ ಮ್ಹಜ್ಯಾಚ್ಚ್ ಘರಾ ಥಾವ್ನ್ ಜಾಯ್ಚಾಯ್. ಆತಾಂ ಆಶ್ರ್ಯಾಂತ್ ಆಸ್ಲ್ಲ್ಯಾ ಥೊಡ್ಯಾಂಚಿಂ ಮೊರ್ನಾಂ ಶೀದಾ ಇಗರ್ಜೆಕ್ ವರ್ನ್ ಕರ್ತಾತ್. ತಶೆಂ ಜಾಂವ್ಕ್ ನಜೊ ಪುತಾ. ಹಾಂವೆ ಆನಿ ತುಜ್ಯಾ ಆನಾನ್ ಆಮ್ಚಿಂ ಸರ್ವ್ ಕಾಮಾಂ ನೀತಿನ್ ಆನಿ ಭರ್ಮಾನ್ ಕೆಲ್ಯಾಂತ್. ದೆಕುನ್ ಸಾದೆಂ ತರೀ ವ್ಹಡ್ ನಹಿಂ ಗೌರವನ್ಂಚ್ಚ್ ಕರಿಜಾಯ್.
ಪುತಾ ಜೊಸ್ಸಿ ತುಜೆಂ ನಾಂವ್ ಕಾಡ್ತಾನಾ ಆಜೂನೀಯ್ ಮ್ಹಜ್ಯಾ ದೊಳ್ಯಾಂತ್ ದುಖಾಂ ಭರ್ತಾತ್. ಕಾಳಿಜ್ ತುಜೆ ಖಾತಿರ್ ರಡ್ತಾ. ಲ್ಹಾನ್ ಆಸ್ತಾನಾ ತುಕಾ ದುಕ್ಲ್ಲ್ಯಾ ವೆಳಾರ್ ಧಾಂವೊನ್ ಯೇವ್ನ್ ಮಾಕಾ ಪೊಟ್ಲುನ್ ಧರ್ಚೆಂ ದೃಶ್ಯ್ ಆನಿಕೀ ಮ್ಹಜ್ಯಾ ದೊಳ್ಯಾಂ ಮುಕಾರ್ ಆಸಾ. ಕಿತ್ಯಾ ಪುತಾ ಬಾಯ್ಲ್, ಭುರ್ಗಿಂ, ಆಸ್ತ್ ಆನಿ ಸಂಸಾರ್ ತುಜೊ ಜಾತಾನಾ ತುಜ್ಯಾ ಕಾಳ್ಜಾಂತ್ ಮ್ಹಜೆ ಖಾತಿರ್ ಇಲ್ಲೊಸೊ ಜಾಗೊ ತುಂವೆ ಉರಂವ್ಕ್ ನಾಂಯ್? ಪಯ್ಲೆಂ ಕಾಳ್ಜಾಂತ್ ಥಾವ್ನ್ ಮಾಗಿರ್ ಘರಾಂತ್ ಥಾವ್ನ್ ಭಾಯ್ರ್ ಘಾಲೆಂಯ್ಗಿ ಪುತಾ? ಆಸ್ತ್ ಸಮಾ ವಾಂಟೆ ಕರ್ನ್ ದಿಲ್ಲ್ಯಾಂತ್ ಆಮ್ಚಿ ಕಿತೆಂ ಚೂಕ್ ಆಸಾ? ತೊಯ್ ಆಮ್ಚೊ ಪುತ್ ಜಾಲ್ಲ್ಯಾನ್ ತಾಕಾಯ್ ವಾಂಟೊ ದೀಂವ್ಚೊ ಆಮ್ಚೊ ಕಾಯ್ದೊ ನಹಿಂಗೀ?
ತುಜೆಂ ಬಾಳ್ಪಣ್ ಮ್ಹಾಕಾ ಜಡ್ ಜಾಂವ್ಕ್ ನಾ ತರೀ ಮ್ಹಜೆಂ ಮಾತಾರೆಪಣ್ ತುಕಾ ಜಡ್ ಜಾಲೆಂ ನಹಿಂಗೀ? ತುಜೊ ಪಾಂಯ್ ಮಟ್ವೊ. ತುಕಾ ಚಲೊಂಕ್ ಕಶ್ಟ್ ಜಾತಾತ್
ಮ್ಹಣ್ ಸ
ವರ್ಸಾಂ ಪರ್ಯಾಂತ್ ಹಾಂಡಿ ಘೆವ್ನ್ ಭೊಂವ್ತಾಲಿಂ ಹಾಂವ್. ಮಾಕಾ ತೆದಾಳಾ ತುಂ ಜಡ್ ಜಾಂವ್ಕ್ ನಾಂಯ್. ಪುಣ್ ಮ್ಹಜಿ ಕೂಡ್ ಅಸ್ಕತ್ ಜಾವ್ನ್ ಯೆತಾನಾ ಮಾಕಾ ಆಧಾರ್ ದೀಂವ್ಕ್ ತುಂವೆ ಕಿತ್ಯಾಕ್ ಇನ್ಕಾರ್ ಕೆಲೆಂಯ್?
ತುಕಾ ಉಡಾಸ್ ಆಸೊಂಕ್ ಪುರೊ. ಲಾನ್ ಆಸ್ತಾನಾ ಫ್ರೆಡ್ಡಿನ್ ಮಸ್ತ್ ಪಾವ್ಟಿಂ ಮ್ಹಾಕಾ ವಿಸಾರ್ಚೆಂ ಆಸ್ಲ್ಲೆಂ "ಮಾಂಯ್ ಮ್ಹಜಿ ಚೂಕ್ ನಹಿಂ ತರೀ ಕಿತ್ಯಾಕ್ ತುಂ ಮಾಕಾಚ್ಚ್ ಉಲೈತಾಯ್ ಆನಿ ಮಾರ್ತಾಯ್ ಆನಿ ಜೊಸ್ಸಿಚಿ ಪಾಡ್ತ್ ಕಾಣ್ಗೆತಾಯ್". ತು ನೆಣಾಂಯ್ಗಿ ಪುತಾ, ಭುರ್ಗ್ಯಾಕ್ ಊಣ್ ಆಸ್ಲ್ಯಾರ್ ಆವಯ್ ಬಾಪಾಯ್ಕ್ ತಾಚೊ ಖಂತ್ ಹುಸ್ಕೊ ಚಡ್ ಮೋಗ್ ಚಡ್. ತುಕಾ ತಾತ್ಸಾರ್ ಕೆಲೆಂ ಮ್ಹಳ್ಳಿಂ ಚಿಂತ್ನಾಂ ಕಶಿಂ ತುಜ್ಯಾ ಮತಿಂತ್ ಆಯ್ಲಿಂ. ತುಜೊ ಆಮಿ ತಾತ್ಸಾರ್ ಕರುಂಕ್ ನಾ ಪುತಾ ಬದ್ಲಾಕ್ ಚಡ್ ಮೋಗ್ ಕೆಲಾ. ತುಜೆ ಖಾತಿರ್ಚ್ಚ್ ಆಮಿ ಆಮ್ಚಾ ಮಾಲ್ಗಡ್ಯಾಂ ಥಾವ್ನ್ ಆಯಿಲ್ಲಿ ಆಸ್ತ್ಬದಿಕ್ ವಿಕುನ್ ಕೊಡ್ಯಾಳ್ ಯೇವ್ನ್ ರಾವ್ಲ್ಯಾಂವ್ ಪುತಾ.
ಮ್ಹಜ್ಯಾ ಕಾಳ್ಜಾಂತ್ ಏಕ್ ದೂಕ್ ಮಾತ್ರ್ ಕೆದಾಳಾಯ್ ಆಸ್ಲ್ಲಿ. ಎಕಾಚ್ಚ್ ಸಂಗ್ತಿಂತ್ ಹಾಂವೆಂ ತುಜ್ಯೆ ಆನಿ ಫ್ರೆಡ್ಡಿ ಮಧೆಂ ಭೇದ್ಭಾವ್ ಕೆಲ್ಲೊ. ತಿಂ ಚಿಂತ್ನಾಂ ಮಾಕಾ ಧೊಸ್ತಾಲಿಂ. ತೆಂ ಉಣೆಪಣ್ ಭರ್ತಿ ಕರುಂಕ್ ಹಾಂವ್ ತುಜೊ ಚಡ್ ಮೋಗ್ ಕರ್ತಾಲಿಂ. ಫ್ರೆಡ್ಡಿಕ್ ಆಮಿ ಆಮ್ಚೆಂಚ್ ರಗಾತ್ ವಾಂಟುನ್ ದಿಲಾಂ ಪುತಾ. ತುಕಾ ದೀಂವ್ಕ್ ಆಮಿ ಸಕೊಂಕ್ ನಾಂವ್. ತುಂ ದೋನ್ ವರ್ಸಾಂಚೊ ಬಾಳ್ ಆಸ್ತಾನಾ ತುಕಾ ಆಮಿ ಆಶ್ರ್ಯಾಂತ್ಲೊ ಹಾಡ್ಲ್ಲೊ. ಕಾಜಾರ್ ಜಾವ್ನ್ ಪಾಂಚ್ ವರ್ಸಾಂ ಪರ್ಯಾಂತ್ ಆಮ್ಕಾಂ ಭುರ್ಗಿಂ ನಾತ್ಲ್ಲಿಂ. ಸಕ್ಡಾಂ ಪ್ರಾಸ್ ಪಯ್ಸ್ ರಾವೊನ್ ದೊಳ್ಯಾಂತ್ಲ್ಯಾನ್ ದುಖಾಂ ಆನಿ ನಾಕಾಂತ್ಲ್ಯಾನ್ ಕಿರ್ಮೆಂ ಗಳ್ಚ್ಯಾ, ಪಾಯಾಂಚೊ ಊಣ್ ಆನಿ ಉಸ್ಮಡ್ ಆಸ್ಚ್ಯಾ ತುಕಾ ಪಳೆವ್ನ್ ಮ್ಹಜೆ ಕಾಳಿಜ್ ರಡ್ಲ್ಲೆಂ. ದೋನ್ ವರ್ಸಾಂಚ್ಯಾ ತುಕಾ ಹಾಂವೆ ಉಕಲ್ನ್ ನವೆಂ ಜೀವಿತ್ ದಿಂವ್ಚೊ ನಿರ್ಧಾರ್ ಕೆಲ್ಲೊ. ತುಕಾ ಹಾಂವೆ ವಿಂಚ್ಲ್ಲೊ ಪುತಾ. ಫ್ರೆಡ್ಡಿಕ್ ಹಾಂವೆಂ ವಿಂಚುಂಕ್ ನಾಂ. ಮಾಕಾ ದೆವಾನ್ ದಿಲ್ಲೊ.
ಹಿ ಮ್ಹಜಿ ಆಶಾ. ತ್ಯಾ ದಿಸಾ ಮ್ಹಜ್ಯಾ ಖಾಂದ್ಯಾರ್ ನಿದೊನ್ ಉಸ್ಕಾರ್ಚ್ಯಾ ತುಜಿ ಜಡಾಯ್ ಮ್ಹಾಕಾ ಮೊಗಾಚಿ ಜಾಲ್ಲಿ. ಆಜ್ ತುಜ್ಯಾ ಖಾಂದ್ಯಾರ್ ಮ್ಹಾಕಾ ವರ್ತಾನಾ ಮ್ಹಜಿ ಜಡಾಯ್ ತುಕಾ ಮೊಗಾಚಿ ಜಾಂವ್ಚಿ ಪುತಾ.
ಸದಾಂಚ್ಚ್ ತುಜ್ಯಾ ಮೊಗಾಚಿ ಆವಯ್
ಆಲಿಸ್.
"ಮಾಂಯ್" ಕಾಗಾತ್ ಹರ್ದ್ಯಾಕ್ ದಾಂಬುನ್ ಧರ್ನ್ ಗಳ್ಗಳ್ಯಾಂ ರಡ್ಲೊ ಜೊಸ್ಸಿ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
