ಆಶ್ರಮಾಂ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಆಮ್ಚಿಂ ಆಶ್ರಮಾಂ - ಆಸ್ಟಿನ್ ಡಿ’ಸೋಜ್ ಪ್ರಭು

ಗ್ರೇಸ್ತಾಂಕ್ ಆಮಿಂ ಹೆಣೆಂ ತೆಣೆಂ ಕೊಲೆಜಿ ಭಾಂದ್ಲ್ಯೊ ಆನಿ ದುರ್ಭಳ್ಯಾಂಕ್-ಗತ್ ಆಧಾರ್ ನಾತ್‌ಲ್ಲ್ಯಾಂಕ್ ಆಮಿಂ ಆಶ್ರಮಾಂ ಭಾಂದ್ಲಿಂ!

ಹಾಂತುಂ ಕಿತೆಂ ವಾಯ್ಟ್ ಜಾಲಾಂ ಮ್ಹಣ್ ತುಮಿ ಸವಾಲ್ ಕರುಂಕ್ ಆಸಾತ್ ವ ಮ್ಹಜ್ಯಾ ತಕ್ಲೆಚೆ ಇಸ್ಕುರ್ ಸಡಿಲ್ ಜಾಲ್ಯಾತ್ ಮ್ಹಣೊನ್ ಇಸ್ಕುರ್ ಚಾಲಕಾಕ್ (ಸ್ಕ್ರೂ ಡ್ರೈವರ್) ಸೊಧುಂಕ್ ಆಸಾತ್. ಆತಾಂ ಹ್ಯಾ ವಿಶ್ಯಾಂತ್ ಥೊಡೆಂ ಉಲವ್ಯಾಂ.

ಆಶ್ರಮಾಂತ್ಲ್ಯಾ ಲೋಕಾಚೆಂ ಮುಳಾವೆಂ ಕಾರಣ್ ಕೊಣೆಂ ಸೊಧುನ್ ಕಾಡ್ಲಾಂ? ನಾ, ಬದ್ಲಾಕ್ ಆಮಿ ತಾಂಕಾಂ ಆಪವ್ಣೆಂ ದಿಲೆಂ ಆಮ್ಚ್ಯಾ ಆಶ್ರಮಾಂನಿ, ತಾಂಕಾಂ ಮಾಂದ್ರಿ ದಿಲಿ, ವೋಲ್ ದಿಲಿ, ಥೊಡೆಂ ಖಾಂವ್ಕ್ ದಿಲೆಂ ಆನಿ ಗ್ರೇಸ್ತಾಂ ಲಾಗ್ಚೆ ಪಯ್ಶೆ ದಾನಾ ರೂಪಾರ್ ಬೊಲ್ಸಾಂತ್ ಚೆಪುನ್ ಹ್ಯಾ ದುರ್ಬಳ್ಯಾ ಗತ್-ಆಧಾರ್ ನಾತ್‌ಲ್ಲ್ಯಾ ಲೋಕಾ ಥಾವ್ನ್ ಹಾತ್ ವಯ್ರ್ ಕರುನ್ ಮಾಗ್ಣಿಂ ಕರಯ್ಲಿಂ - ಗ್ರೇಸ್ತಾಂಚೆ ಮಾಗ್‌ಲ್ಲೆ ಉಪ್ಕಾರ್ ಮೆಳ್ಚ್ಯಾ ಖಾತಿರ್! ಕಿತೆಂ ಅನ್ನ್ಯಾಯ್, ಕಿತೆಂ ದಗಲ್ಬಾಜ್, ಕಿತೆಂ ತಾರಿಪೊ ಹಾಂಗಾಸರ್! ದಾನ್ ಆರಾವ್ನ್ ಆಮಿಂ ಹ್ಯಾ ದುರ್ಬಳ್ಯಾಂಕ್ ಆಶ್ರಮ್ ಮ್ಹಳ್ಳ್ಯಾ ಜೈಲಾಂನಿ ಪಿಛಾರ್ ಕರುನ್ ದವರ್ಲೆಂ ಆನಿ ತಾಂಕಾಂ ಜಾಯ್ ತಸೆ ಆಮ್ಚ್ಯಾ ಫಾಯ್ದ್ಯಾಕ್ ವ್ಹಾಪಾರುಂಕ್ ಪಳೆಲೆಂ.

ಹ್ಯಾ ನಿರ್ಗತಿಕಾಂಕ್ ಆಶ್ರಮ್ಂಚ್ ಏಕ್ ಸರ್ಗ್ ವ ಹ್ಯಾ ಸಮಸ್ಯಾಕ್ ಕಾಂಯ್ ಜೊಕ್ತೊ ಪರಿಹಾರ್ ತರೀ ಆಸಾ?

ಜೆಜುನ್ ತ್ಯಾ ದುಬ್ಳ್ಯಾಂಕ್ ಆಪ್ಲೆ ಶೆರ್ಮಾಂವ್ ಆಯ್ಕೊನ್ ಪುರೊ ಜಾವ್ನ್ ಭುಕೆಂವ್ಕ್ ಲಾಗ್ತಾನಾ ಥಂಯ್ಸರ್ ಆಸ್‌ಲ್ಲ್ಯೊ ತೀನ್ ಮಾಸ್ಳ್ಯೊ ಆನಿ ಪಾಂಚ್ ಉಂಡೆ ಘೆವ್ನ್ ಹಜಾರೊಂ ಲೋಕಾಕ್ ಸುಶೆಗಾತ್ ಜೆವಾಣ್ ದಿಲೆಂ ಆನಿ ಉರ್‌ಲ್ಲ್ಯಾ ಜೆವ್ಣಾನ್ ತ್ಯಾ ಲೋಕಾನ್ ದುಸ್ರ್ಯಾ ದಿಸಾಯ್ ತಾಂಚೆಂ ಪೋಟ್ ಭರ್ಲೆಂ! ಆಸೆಂಚ್ ಆಮಿಂಯ್ ಆಜ್ ಕರ್ತಾಂವ್. ಹಾಂವ್ ಜಾಲ್ಲೊಂ ಜಾಲ್ಯಾರ್ ಹ್ಯಾ ಮಾಸ್ಳಿ ಪಾಗ್ಪಿ ಪೆದ್ರುಕ್ ಏಕ್ ಖರೊ ಮುಖೆಲಿ ಜಾವ್ನ್ ಸರ್ವಾಂಕ್ ನಂಯ್ ತಡಿರ್ ಆಪವ್ನ್ ವ್ಹರ್ನ್ ಮಾಸ್ಳಿ ಪಾಗುಂಕ್ ಶಿಖಯ್ ಮ್ಹಣ್ ಸಾಂಗ್ತೊಂ. ಜೆಜುನ್ ತಸೆಂಚ್ ಕೆಲ್ಲೆಂ ಜಾಂವ್ಕ್‌ಯ್ ಪುರೊ ಪುಣ್ ಜೆಜುಚಿಂ ಅಜಾಪಾಂಚ್ ವಾಖಣ್ಚ್ಯಾ ಚೊವ್ಗಾಂಯ್ ವಾಂಜೆಲ್ ಬರವ್ಪ್ಯಾಂನಿ ಅಜಾಪಾ ವಿಶ್ಯಾಂತ್ ಮಾತ್ರ್ ಬರಯ್ಲೆಂ.

ಹಾಂವೆ ಹಾಚೊ ಉಲ್ಲೇಖ್ ಕೆಲೊ ಕಿತ್ಯಾಕ್‌ಗಿ ಮ್ಹಳ್ಯಾರ್, ಆಮಿಂಯ್ ಹಾಂಗಾಸರ್ ತೆಂಚ್ ಕೆಲಾಂ. ದುರ್ಬಳ್ಯಾಂಕ್ ಭುಕ್ ಲಾಗ್ಲ್ಯಾ ಮ್ಹಣ್ತಾನಾ ಮಾಸ್ಳಿ ಪಾಗುಂಕ್ ಶಿಕಂವ್ಚ್ಯಾ ಬದ್ಲಾಕ್ ಇಲ್ಲಿ ಮಾಸ್ಳಿಚ್ ತಾಂಚ್ಯಾ ಹಾತಾಂನಿ ಘಾಲ್ಯಾ ಆನಿ ತಾಂಕಾಂ ಥಂಯ್ಸರ್‌ಚ್ ಸೊಡ್ಲಾಂ. ಹ್ಯಾ ನಿರ್ಗತಿಕಾಂಚೊ ಮುಳಾವೊ ಶೆವಟ್‌ಚ್ ಆಮಿಂ ಧರ್ಣಿ ಸಮಾನ್ ಕೆಲಾ ಆನಿಂ ತಾಂಕಾಂ ಆಶ್ರಮಾಂನಿ ಬಂಧಿತ್ ಕೆಲಾಂ. ಪಯ್ಲ್ಯೆ ಸುವಾತೆರ್ ಆಮಿ ಹ್ಯಾ ನಿರ್ಗತಿಕಾಂಕ್ ಹ್ಯಾ ಸ್ಥಿತೆರ್ ಯೇಂವ್ಕ್ ಕಿತೆಂ ಕಾರಣ್ ಮ್ಹಳ್ಳ್ಯಾಚೆರ್ ಚಡೀತ್ ಗಮನ್ ದೀಂವ್ಕ್ ಜಾಯ್. ಆದ್ಲ್ಯಾ ಕಾಳಾರ್ ಫಕತ್ ಬೆಬ್ದೆಂಪಣ್ ಕುಟ್ಮಾಂನಿ ರಾಜ್ ಕರ್ತಾಲೆಂ ಆನಿ ಸರ್ವ್ ಪಯ್ಶೆ ಧಿಕ್ಕಾಪಾಲ್ ಜಾವ್ನ್ ವೆತಾಲೆ. ನಿಮಾಣೆ ಹಾಚೊ ಪರಿಣಾಮ್ ಜಾವ್ನ್ ಕುಟ್ಮಾಚಿಂ ಆಶ್ರಮಾಚೆಂ ದಾರ್ ಠೊಕ್ತಾಲಿಂ ಆನಿ ಥಂಯ್ಸರ್ ಜಿಯೆತಾಲಿಂ. ಆತಾಂ ಕಾಳ್ ಬದಲ್ಲಾ ಆನಿ ದುರ್ಬಳ್‌ಕಾಯೆಕ್ ಹಜಾರ್ ಕಾರಣಾಂ ಆಸಾತ್.

ವಿಗ್ಯಾನ್ ಸಗ್ಳ್ಯಾನ್ ವಿಸ್ತಾರ್ಲಾಂ ಆನಿ ಹಾಚೊ ಲೋಕಾನ್ ಬರೊಚ್ ಪ್ರಯೋಗ್ ಕರುಂಕ್ ಸುರ್ವಾತಿಲಾಂ. ಆಮ್ಕಾಂ ಜಾಯ್ ಆಜ್ ನ್ಹಯ್ ಆಶ್ರಮಾಂ ಬಗಾರ್ ಸಮಾಜಿಕ್ ಕಾಮೆಲಿ (ಸೋಶಿಯಲ್ ವರ್ಕರ್ಸ್) ಅಸಲ್ಯಾ ಸಂಕಷ್ಟಾಂಕ್ ಸಾಂಪಡ್ಲೆಲ್ಯಾಂಕ್ ತ್ಯಾ ಜಾಳಾ ಥಾವ್ನ್ ಮುಕ್ತ್ ಕರುಂಕ್ ಆನಿ ತಾಂಚೆಂ ಜೀವನ್ ತಾಣಿಂ ತಾಂಚ್ಯಾಚ್ ಪಾಂಯಾಂಚೆರ್ ರಾವೊನ್ ಮುಖಾರುನ್ ವ್ಹರುಂಕ್. ಮುಳಾವೆಂ ಕಾರಣ್ ಸೊಧುನ್ ಕಾಡುನ್ ತಾಕಾ ಜೊಕ್ತೊ ಪರಿಹಾರ್ ಸೊಧುನ್ ಕಾಡುಂಕ್ ಆನಿ ಮುಖ್ಲ್ಯಾ ಜೀವನಾಕ್ ಮಾರ್ಗ್‌ದರ್ಶನ್ ದೀಂವ್ಕ್.

ದುರ್ಭಳಿಂ ಮ್ಹಣೊನ್ ತಾಂಕಾಂ ಫಕತ್ ಆಸ್ರೊ ದೀವ್ನ್ ರಾವಯ್ಲ್ಯಾರ್ ಆಮಿ ಖಂಯ್ಸರ್ ಮಾನವೀಯ್ ಭರ್ಮಾಕ್ ಮಾನ್ ದಿತಾಂವ್? ಬಗಾರ್ ತೊ ಮಾನವೀಯ್ ಮಾನ್ ಆಮಿ ಹಲ್ಕ್ ಕರ್ತಾಂವ್ ಆನಿ ತಾಂಕಾಂ ಧುಳಿ ಸಮಾನ್ ದವರ್ಚೆಂ ಪ್ರಯತ್ನ್ ಕರ್ತಾಂವ್.

ಮುಖೆಲ್ಯಾಂನೊ ಆಮಿ ಜಾಗೆ ಜಾವ್ಯಾಂ ಆನಿ ಆಮ್ಚೊ ಶೆವಟ್ ಜ್ಯಾರಿಯೆಕ್ ಹಾಡುಂಕ್ ಪಳೆತಾನಾ ತ್ಯಾ ಮಹತ್ವಾಚಾ ಸಮಸ್ಯಾಕ್ ಪರಿಹಾರ್ ಸೊಧುನ್ ಮಾನವೀಯ್ ಮರ್ಯಾದ್ ರಾಕೊನ್ ವ್ಹರ್ಯಾಂ. ಆಮ್ಚ್ಯಾ ಸಮಾಜೆಂತ್ಲಿಂ ಪ್ರಾಯೆಸ್ತಾಂ ಕಿತ್ಯಾಕ್ ಹ್ಯಾ ಆಶ್ರಮಾಚಿ ವಾಟ್ ಧರ್ತಾತ್? ತಾಂಕಾಂ ತಾಂಚಿಂ ಭುರ್ಗಿಂ ಕಿತ್ಯಾಕ್ ವಾಟೆರ್ ಸೊಡ್ತಾತ್? ಥೊಡ್ಯಾ ಕುಟ್ಮಾಂಕ್ ಕಿತ್ಯಾಕ್ ತಾಂಚಿಂ ಭುರ್ಗಿಂ ಜಡ್ ಜಾತಾತ್ ಆನಿಂ ತಿಂ ಆಶ್ರಮಾಂಕ್ ಧಾಡ್ತಾತ್? ಹ್ಯಾ ಸಮಸ್ಯಾಂಚಿಂ ಮುಳಾವಿಂ ಕಾರಣಾಂ ತರೀ ಕಸಲಿಂ? ಹಾಚೆರ್ ಕೊಣೇಂಯ್ ಥೊಡೊ ತರೀ ಪ್ರಕಾಶ್ ಫಾಂಕ್ಲಾ ವ ಫಕತ್ ಆಶ್ರಮಾಂಚ್ಯಾ ಫಾತ್ರಾಂಕ್ ಚಡೀತ್ ಸಿಮೆಂಟ್ ಘಾಲ್ಯಾ?

ಥಂಯ್ಸರ್ ಏಕ್ ಸಾಂ| ಜುಜೆಚೆಂ ವೃತ್ತಿಪರ್ ಶಿಕ್ಪಾ ಕಾಮಾಶಾಲ್ ತ್ಯಾ ಜೆಜ್ವಿತಾಂನಿ ಬಾಂದ್ಲೆಂ ಆನಿ ತಾಂಚೊ ಶೆವೊಟ್ ಜಾವ್ನಾಸ್‌ಲ್ಲೊಕೀ ತಾಣಿಂ ಥಂಯ್ಸರ್ ಮತಾಂತರ್ ಕೆಲ್ಲ್ಯಾ ನವ್ಯಾ ಕ್ರೀಸ್ತಾಂವಾಂಕ್ ಏಕ್ ವೃತ್ತಿ ಶಿಕವ್ನ್ ತಾಂಚೆಂ ಜೀವನ್ ನಂದನ್ ಕರ್ಚಿ. ಪುಣ್ ಹ್ಯಾ ಕಾಮಾಶಾಲಾಚಿ ಗತ್ ಪಳೆಲ್ಯಾರ್ ಆಮ್ಕಾಂ ನಾಲೀಸಾಯೆಚಿ ಜಾಲಿ. ಸರ್ವ್ ಶಾಲಾಂ, ಕೊಲೆಜಿ, ಆಸ್ಪತ್ರ್ಯೊ, ಆಶ್ರಮಾಂ ವಾಡೊನ್ಂಚ್ ಯೆತಾನಾ ಹ್ಯಾ ಕಾಮಾಶಾಲಾಕ್ ಮಾತಿ ಖಾಂವ್ಕ್ ಸುರು ಜಾಲಿ. ಭಾರಿಚ್ ಕಷ್ಟಾಂನಿ ಹೆಂ ಶಾಲ್ ಮುಖಾರುನ್ ಗೆಲೆಂ ಆನಿ ಥೊಡ್ಯಾಚ್ ತರುಣಾಂಕ್ ಕುಮ್ಕೆಚೆಂ ಜಾಲೆಂ. ಸಭಾರಾಂಕ್ ಹಾಂಗಾಸರ್ ಕಾಮ್ ಕರುಂಕ್‌ಯ್ ಕಾಂಠಾಳೊ ಆಯ್ಲೊ. ತರ್ ಆಮ್ಚೊ ಶೆವಟ್ ಕಿತ್ಯಾ ಅಸೊ ಬುರೂಸ್ ಜಾಲೊ? ಆಮ್ಕಾಂ ಆಶ್ರಮ್ ಗರ್ಜೆಚೆಂ ಮ್ಹಣ್ ದಿಸ್ಲೆಂ ವ ಅಸಲಿಂ ತರುಣಾಂಕ್ ತರ್ಭೆತಿ ದಿಂವ್ಚಿಂ ಕಾಮಾಶಾಲಾಂ? ಆಮಿ ಖಂಯ್ಸರ್ ನಿಸ್ರೊನ್ ಪಡ್ಲ್ಯಾಂವ್?

ಆಜ್ ಫಿರ್ಗಜಾಂನಿ ವ್ಹಡಿಲಾಂಕ್ ಕುಟ್ಮಾಂಚಿ ಭೆಟ್ ಕರುನ್ ತಾಂಚೆಂ ಬರೆಂ-ಫಾಲೆಂ ಪಳೆಂವ್ಕ್ ವೇಳ್‌ಚ್ ನಾ ಜಾಲಾ. ವರ್ಸಾಕ್ ಏಕ್ ಪಾವ್ಟಿ ಘರ್ ಬೆಜ್ಮೆಂತಾವೆಳಿಂ ಮಾತ್ರ್ ವ್ಹಡಿಲ್ ಘರಾಂಕ್ ಭೆಟ್ ದಿತಾತ್ ದಿಲ್ಲಿಂ ಕೆಳಿಂ ಖಾತಾತ್, ಇಗರ್ಜೆಕ್ ದಿಂವ್ಚ್ಯಾ ಪಯ್ಶ್ಯಾ ವಿಶ್ಯಾಂತ್ ಉಲ್ಲೇಖ್ ಕರ್ತಾತ್ ಆನಿ ಪಾಂಚ್ ಮಿನುಟಾಂನಿ ಥಂಯ್ ಥಾವ್ನ್ ಧಾಂವ್ತಾತ್; ಕಿತ್ಯಾ ತಾಂಕಾಂ ಹೆರ್ ಚಡೀತ್ ಜವಾಬ್ದಾರೆಚಿಂ(!) ಕಾಮಾಂ ಕರುಂಕ್ ಆಸಾತ್. ಜೆಜು ದುರ್ಬಳ್ಯಾಂಕ್ ಲಾಗಿಂ ಆಸ್ಲೊ, ತೊ ತಾಂಚೆ ಬರಾಬರ್ ರಾವ್ಲೊ, ತಾಂಚ್ಯಾ ಕಷ್ಟಾಂ-ದುಖಾಂತ್ ಮೆತೆರ್ ಜಾಲೊ, ತಾಂಕಾಂ ಗೂಣ್ ಕರಿತ್ತ್ ಗೆಲೊ ಆನಿ ಆಪ್ಲೊ ವೇಳ್ ತಾಂಚೆ ಖಾತಿರ್‌ಚ್ ಖರ್ಚಿಲಾಗ್ಲೊ.

ಆತಾಂ ಕಾಳ್ ಬದಲ್ಲಾ, ಆಮ್ಚೆಲಾಗಿಂ ಮೋಟಾರ್ ವಾಹನಾಂ ಆಸಾತ್ ಆನಿ ಪಯ್ಣ್ ಭಾರಿಚ್ ಸಲೀಸ್ ಜಾಲಾಂ. ಆಮ್ಕಾಂ ಫೋನಾಂ ಆಸಾತ್ ಆನಿ ಕಷ್ಟ್ ದುಖ್ ಉಲಂವ್ಕ್ ಸಭಾರ್ ಆಧುನಿಕ್ ಸಾಧನಾಂ ಆಸಾತ್. ಆತಾಂ ರಸ್ತ್ಯಾರ್ ಭಿಕ್ ಮಾಗ್ತೆಲ್ಯಾಲಾಗಿಂಯ್ ಮೊಬಾಯ್ಲ್ ಫೋನಾಂ ಆಸಾತ್. ಆಮ್ಚೊ ಲೋಕ್ ಸುಧಾರುನ್ಂಚ್ ವೆತಾ ಪುಣ್ ಆಮ್ಚಿಂ ಆಶ್ರಮಾಂ ತಸಿಂಚ್ ಆಸಾತ್; ಆಮ್ಚ್ಯಾ ಚಿಂತ್ಪಾಕ್ ಮಾತಿ ಖೆಲ್ಯಾ ಆನಿ ಹಾಕಾ ಕೊಣೆ ತರೀ ಸಾಣಸ್ ಮಾರ್‍ಲ್ಯಾ ಬಗಾರ್ ಆಮಿ ಆಮ್ಚೆಂ ಸುಧಾರಣ್ ಪಳೆಂವ್ಕ್ ಸಾಧ್ಯ್ ನಾ ದಿಸ್ತಾ.

ಸಾಹಿತಿಲಾಗಿಂ ಸಂವಾದ್

ಪರ್ಗಟ್ ಉಚಾರ್

ದಾಯ್ಜ್ ಪಾನಾಕ್

[ಮಿಕ್‌ಮ್ಯಾಕ್ಸ್]

[8. ವಲ್ಲಿ]

[7. ಮಾನೆಸ್ತ್]