ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸಿಯೋನ್ ಆಶ್ರಮ್
ಮನ್ಶಾಚ್ಯಾ ಸೆವೆಧ್ವಾರಿಂ ದೆವಾಚೊ ಮೋಗ್
- ಆಗ್ನೆಲ್ ಪಿರೇರಾ, ಬಾಹ್ರೇಯ್ನ್
ಆಗ್ನೆಲ್ ಪಿರೇರಾ
ಹ್ಯಾ ಸಂಸಾರಾಂತ್ ಮ್ಹನಿಸ್ ಜಲ್ಮೊನ್ ಯೆತಾನಾ ಆಪ್ಣಾಚೆಂತ್ ಮ್ಹಳ್ಳೆಂ ಏಕ್ ಮಿಸಾಂವ್ ಘೆವ್ನ್ ಯೆತಾ. ಮಿಸಾಂವ್ ಜಾಂವ್ಕ್ ಪುರೊ ಬರೆಂ ಅನಿ ಹೆರಾಂಕ್ ಮೆಚ್ವೊಂಚೆ ತಸಲೆಂ, ಯಾ ಹೆರಾಂಚ್ಯಾ ಬರ್ಯಾಕ್ ಪಡ್ಚೆ ತಸಲೆಂ. ಆಮಿ ವಾಂಜೆಲಾಂತ್ ಅಯ್ಕಾತಾಂವ್ ಜೆಜುಚಿಂಚ್ ಉತ್ರಾಂ: ’ಮ್ಹಜ್ಯಾ ಅಧಿಕ್ ಲ್ಹಾನಾಂ ಭಾವಾಂಕ್ ತುಮಿ ಕಿತೆಂ ಕೆಲೆಂಗೀ, ಮ್ಹಾಕಾಚ್ ತುಮಿ ತೆಂ ಕೆಲೆಂ’. ಅಶೆಂ ಅಮಿ ಅಮ್ಕಾಂ ಜನ್ಮಾ ದಿಸಾ ಥಾವ್ನ್ ಮ್ಹೆಳ್ಲ್ಲೆಂ ಮಿಸಾಂವ್ ಕಾರ್ಯಾ ರೂಪಾಕ್ ಹಾಡುಂಕ್ ಜಿಣಿ ಭರ್ ಪೆಚಾಡ್ತಾಂವ್.
ಹ್ಯಾ ಸಂಸಾರಾಂತ್ಲೆಂ ಮಿಸಾಂವ್ ಕರುಂಕ್ ಅಮಿ ಸೆಮಿನೆರಿಕ್ಚ್ ರಿಗಾಜಯ್ ಮ್ಹಣ್ ನಾಂ. ಪಾದ್ರಿ ಮಾದ್ರಿ ಜಾಯ್ಜಯ್ ಮ್ಹಣ್ಯೀ ನಾಂ. ವಾಂಜೆಲ್ ಅಮ್ಕಾಂ ಪರತ್ ಉಡಾಸಾಕ್ ಹಾಡ್ತಾ ಬರಿ ಕರ್ನಿ ಎಕಾ ಬರ್ಯಾ ಸಾಮಾರಿಯಾಗಾರಾಚಿ, ಜೊ ಯಾಜಾಕ್ ಅನಿ ಶಾಸ್ತ್ರಿ ಕರುಂಕ್ ನಾತ್ಲೆಂ ಕಾಮ್ ತೊ ಕರುನ್ ದಾಕಯ್ತಾ. ತಶೆಂ ಮ್ಹಳ್ಯಾರ್ ಯಾಜಕ್ ಭಾವ್ ಅನಿ ಧರ್ಮ್ ಭೈಣಿ ಲೊಕಾಚಿ ಸೆವಾ ಕರಿನಾಂತ್ ಮ್ಹಣ್ ಅರ್ಥ್ ನೈಂ. ಸಭಾರ್ ಬರೆಂಪಣ್ ಹಜಾರೊಂ ಧರ್ಮಿಶ್ಟಾನಿಂ ಅಮ್ಚ್ಯಾ ಹ್ಯಾ ಭಾರತಾಂತ್ ತಶೆಂಚ್ಚ್ ಭಾಯ್ಲ್ಯಾ ಗಾಂವಾಂನಿಂ ಕೆಲಾಂ ಅನಿ ತಿಂ ಕರ್ತೆಚ್ಚ್ ಅಸಾತ್.
ತಸ್ಲ್ಯಾ ಅಪುರ್ಬಾಯೆಚ್ಯಾ ಧರ್ಮಿಶ್ಟಾಂಕ್ ದೇವ್ ತಾಚಿಂ ಧಾರಾಳ್ ಅಶಿರ್ವಾದಾಂ ಘಾಲುಂದಿ ಮ್ಹಣ್ ಅಮ್ಚೆಂ ಮಾಗ್ಣೆಂ ಜಾಂವ್ದಿ. ಜರ್ ಏಕ್ ಮ್ಹನಿಸ್ ಧರ್ಮಿಶ್ಟ್ ಜಾಯ್ನಾಸ್ತಾನಾ ಅಸಲೆಂ ಲೊಕಾ ಸೆವೆಚೆಂ ಕಾಮ್ ಕರಿತ್ ತರ್ ಅಮಿಂ ಕಿತೆಂ ಮ್ಹಣ್ಯೆತ್? ಸಭಾರ್ ದಾಕ್ಲೆ ಅಸಾತ್ ಅಮ್ಚ್ಯಾ ಮುಕಾರ್ ಅಸಲ್ಯಾ ಲಾಯಿಕಾಂಚೆ. ಅಶೆಂ ಮ್ಹಣ್ತಾನಾ ಮ್ಹಾಕಾ ಉಗ್ದಾಸ್ ಯೆತಾ ಎಕಾ ಭಾರಿ ಸಾಧಾರ್ಣ್ ಮ್ಹನ್ಶ್ಯಾಚೊ, ಯೂ. ಸಿ. ಪೌಲೊಸ್ ತಾಚೆಂ ನಾಂವ್.
ಆಜ್ಯಾಪಿ ರಿತಿನ್ ತಾಕಾ ದೇವ್ ವಿಂಚುನ್ ಕಾಡ್ತಾ ಲೊಕಾಚಿ ಸೆವಾ ಕರುಂಕ್ ಅನಿ ತೊ ಅಪ್ಲೊ ಖುರಿಸ್ ಸಂತೊಸಾನ್ ಖಾಂದ್ಯಾರ್ ಘೆತಾ ಅನಿ ಅಪ್ಲಿ ಪತಿಣ್ ಅನಿ ಕುಟ್ಮಾಕ್ ಸಾಂಗಾತಾ ಘೆವ್ನ್ ಕುಡಿಂತ್ ಅನಿ ಮತಿಂತ್ ಸಂಕಶ್ಟ್ ಭಗ್ಚಾ ಲೊಕಾಚಿ ಸೆವಾ ಕರುಂಕ್ ಮುಕಾರ್ ಸರ್ತಾ. ಏಕ್ ಬರೊ ಸಾಮಾರಿಯಾಗಾರ್ ತೊ ಜಾಂವ್ಕ್ ಪಾವ್ತಾ. ಪಳೆವ್ಯಾಂ ಅಮಿ ಹ್ಯಾ ದೆವಾಚಾ ರುಪಾಂತ್ಲ್ಯಾ ಮ್ಹನ್ಶಾಂಚಿ ಜಿಣಿ ಅನಿಂ ತಾಂಚ್ಯಾ ಸೆವೆಚಿ ಕಾಣಿ. ಕಶೆಂ ಜಾತಾ ಸುರ್ವಾತ್ ಹ್ಯಾ ಮಹಾನ್ ಕಾಮಾಚಿ?
ಪೌಲುಸ್ ಏಕ್ ಪಾವ್ಟಿಂ ಪೊಟ್ಟಾಂತ್ಲಿ ರೆತಿರ್ ಜಾವ್ನ್ ಪಾಟಿಂ ಯೆತಾಸ್ತಾನಾ, ಪಾಲ್ಘಾಟ್ ರೈಲ್ ಸ್ಟೆಶನಾಚ್ಯಾ ಲಾಗಿಂ ಥೊಡೆ ತಕ್ಲೆಂತ್ ಅಸ್ಕತ್ ಅಸ್ಲೆಲೆ ಮ್ಹನಿಸ್ ಕಸ್ತಾಳಾಂತ್ಲ್ಯಾ ಮ್ಹೆಳ್ಯಾಂತ್ಲೆಂ ಖಾಣ್ ವಿಂಚುನ್ ಖಾಂವ್ಚೆಂ ತೊ ಪಳೆಯ್ತಾ. ತ್ಯಾ ಘಡ್ಯೆ ತಾಚ್ಯಾ ಮತಿಕ್ ಭಾರಿ ಬೆಜಾರಾಯ್ ಭೊಗ್ತಾ.
ತ್ಯಾಚ್ಚ್ ಘಡ್ಯೆ ತೊ ಏಕ್ ನಿಚೆವ್ ಕರ್ತಾ, ಹ್ಯಾ ತಕ್ಲೆಂತ್ ಅಸ್ಕತ್ಕಾಯ್ ಅಸ್ಲ್ಯಾಂಚಿ ಅನಿ ಕುಡಿಂತ್ ಭಲಾಯ್ಕಿ ನಾತ್ಲ್ಲ್ಯಾಂಚಿ ಸೆವಾ ಕರುಂಕ್ ತೊ ಭಾಯ್ರ್ ಸರ್ತಾ. ಕಿತ್ಲ್ಯಾ ಪಾವ್ಟಿಂ ಅಮ್ಕಾಂ ಅಸಲೆ ಸಂಧರ್ಭ್ ಮೆಳ್ತಾತ್, ಪೂಣ್ ಅಮ್ಕಾಂ ಹೆರಾಂಚಿ ಸೆವಾ ಕರುಂಕ್ ಬೆಜಾರಾಯ್ ಯಾ ಲಜ್ ಭೊಗ್ತಾ.
ಸಾಂ ಪಾವ್ಲ್ ಕೊರಿಂಥ್ಗಾರಾಂಕ್ ಸಾಂಗ್ತಾ: "ಕೊಣೆಂಯ್ ಅಪ್ಣಾಚೆಂ ಬರೆಂಪಣ್ ಅಶೆಂವ್ಚ್ಯಾಕೀ, ಹೆರಾಂಚೆಂ ಬರೆಂಪಣ್ ಅಶೆಂವ್ಕ್ ಜಾಯ್". ಹೆಂ ಚಿಂತಾಪ್ ಮತಿಂತ್ ಘೆವ್ನ್ ಜಾಯ್ಜೆ, ಪೌಲುಸ್ ಕಶ್ಟಾತೆಲ್ಯಾಂಚ್ಯಾ ಸೆವೆಕ್ ಕಮರ್ ಭಾಂದ್ತಾ.
1999 ಚ್ಯಾ ವರ್ಸಾ ಪೌಲುಸ್ ಅಪ್ಲ್ಯಾ ಕುಟ್ಮಾಕ್ ತಾಚೊ ಇರಾದೊ ವ್ಯಕ್ತ್ ಕರ್ತಾ ಅನಿ ತಾಚಿ ಬಾಯ್ಲ್ ಮೇರಿ ಅನಿ ಸರ್ವ್ ಕುಟ್ಮಾಚಿಂ ತಾಕಾ ಹ್ಯಾ ಕಾಮಾಕ್ ಪಾಟಿಂಬೊ ದಿತಾತ್, ಅಪೊಸ್ತಲಾನಿ ಜೆಜುಕ್ ಸಾಂಗಾತ್ ದಿಲ್ಲ್ಯೆ ಬರಿ. ತಾಂಚೆಂ ಕಾಮ್ ಪಯ್ಲೆಂ ತಾಂಚ್ಯಾಚ್ ಘರಾಂತ್ ಸುರು ಜಾತಾ ಅನಿ ಏಕಾಚ್ ವರ್ಸಾ, ತಿಂ ಸಾಧಾರ್ಣ್ 65 ಜಣಾಂ ಪಿಡೆಸ್ತಾಂಚಿ ಚಾಕ್ರಿ ಕರುಂಕ್ ಪಾವ್ತಾತ್.
ತೊ ಸೊಧುನ್ ವೆತಾ ಮಾರ್ಗಾರ್ ಪಡ್ಲ್ಲ್ಯಾ ಅನಿಂ ಸಂಕಶ್ಟಾಂತ್ ಅಸ್ಲೆಲ್ಯಾ ವ್ಯಕ್ತಿಂಕ್, ಅನಿಂ ಅಪವ್ನ್ ಹಾಡ್ತಾ ತಾಂಕಾ ಅಪ್ಣಾಚ್ಯಾ ಘರಾ. ಸೆಜ್ಸಾಂಬಾರಾಚಿಂ ಅಪ್ಲಿ ವಿರಾರಾಯ್ ದಾಕೈತಾತ್ ಹ್ಯಾ ಕಾಮಾಕ್, ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ತಕ್ಲೆಂತ್ ಅಸ್ಕತ್ ಅಶ್ಚ್ಯಾ ಮ್ಹನ್ಶ್ಯಾಂ ಸಾಂಗಾತಾ ಜಿಯೆಂವ್ನ್ ಅಪ್ಣಾಚ್ಯಾ ಜೀವನಾಚಿ ಮಜಾ ಕಶಿ ತಾಣಿ ಹೊಗ್ಡಾವ್ನ್ ಘೆಂವ್ಚಿ?
ಪೌಲುಸಾಚ್ಯಾ ಭುರ್ಗ್ಯಾಂಕ್ ಅಣ್ಕಾಣೆ ಆಯ್ಕೊಂಕ್ ಮೆಳ್ತಾತ್ ಇಸ್ಕೊಲಾಂತ್, ಪಿಶ್ಯಾಂ ಸಾಂಗಾತಾ ತಿಂ ಜಿಯೆತಾತ್ ಮ್ಹಣ್. ಜಾಲ್ಯಾರಿ, ಪೌಲುಸ್ ಅನಿಂ ತಾಚೆಂ ದೆವ್-ಭಕ್ತಿಚೆಂ ಕುಟಾಮ್ ಅಪ್ಲೆಂ ಮಿಸಾಂವ್ ಮುಕಾರ್ಸುನ್ ವರ್ತಾ. ದೀಸ್ ಪಾಶಾರ್ ಜಾತಾನಾ, ಹ್ಯಾ ಕುಟ್ಮಾಚೆ ಕಶ್ಟ್ ಚಡೊನ್ ಯೆತಾತ್. ಹಾತಾಂತ್ ಪೊಯ್ಶೆ ನಾಸ್ತಾಂ ಕಶಿ ಕರ್ಚಿ ಪಿಡೆಸ್ತಾಂಚಿ ಚಾಕ್ರಿ? ಇಲ್ಲೊ-ಇಲ್ಲೊ ಸಹಾಯ್ ಲಾಗ್ಶಿಲ್ಯಾ ಘರಾಂ ಥಾವ್ನ್ ಮೆಳ್ತಾ ತರೀ ಜೀವನ್ ಕಾಡ್ಚೆಂ ಕಶ್ಟಾಂಚೆಂ ಜಾತಾ. ಪುಣ್ ದೆವಾಚೆಂ ಕಾಮ್ ಕರುಂಕ್ ಭಾಯ್ರ್ ಸರ್ಲ್ಲ್ಯಾ ಪೌಲುಸಾಕ್ ದೇವ್ ಸೊಡ್ನ್ ಘಾಲಿತ್ಗೀ?
ದೇವ್ಚ್ಚ್ ತಾಂಚ್ಯಾ ಅಧಾರಾಕ್ ಯೆತಾ. ಹಾಂಚ್ಯಾ ಬರ್ಯಾ ಕಾಮಾಚಿ ಖಭಾರ್ ಸಗ್ಳ್ಯಾನಿತ್ಲ್ಯಾನ್ ಫಾಯ್ಸ್ ಜಾತಾ. ದುಡು, ಖಾಣ್, ಸಾಮಾನ್ ಅನಿಂ ವೊರ್ವಿ ಯೇಂವ್ಕ್ ಸುರು ಜಾತಾ. ಪೌಲುಸಾನ್ ಸಾಂಗ್ಚ್ಯೆ ಪರ್ಮಾಣೆ, ಧರ್ಮಸ್ಥಳಾಚೊ ಧರ್ಮಾಧಿಕಾರಿ ವೀರೆಂದ್ರ ಹೆಗ್ಡೆ ಸಭಾರ್ ಥರಾಚಿ ಸಹಾಯ್ ಒದಗ್ಸುನ್ ದಿತಾ. ಅನಿ ಸವ್ಕಾಸ್ ಪಿಡೆಸ್ತಾಂಚೊ ಸಂಖೊ ಶೆಂಭೊರಾಂಕ್ ಮಿಕ್ವಾತಾ. ಹ್ಯೆಂ ಚಿಂತಾನಾ ಅಮ್ಚ್ಯಾ ಆಂಗಾಂತ್ಲಿ ಲೋಂವ್ ಉಭಿ ರಾಂವ್ಚೆಂ ಸಹಜ್, ಘರಾಂತ್ ಏಕ್ ಪಿಡೆಸ್ತ್ ಅಸ್ಲ್ಯಾರ್ ಕಿತ್ಲೆಂ ಕಶ್ಟಾತಾಂವ್ ಅಮಿ, ಹಾಂಗಾ ಹೊ ಎಕ್ಲೊ ಆಪ್ಲ್ಯಾ ಪತಿಣೆ ಸಾಂಗಾತಾ ಶೆಂಭೊರಾಂ ವಯ್ರ್ ಪಿಡೆಸ್ತಾಂಚಿ, ತೆಂಯ್ ತಕ್ಲೆಚ್ಯಾ ಪಿಡೆಂತ್ ವಳ್ವಳ್ಚ್ಯಾಂಚಿ ಚಾಕ್ರಿ ಕರ್ತಾ! ಹ್ಯೆಂ ಪಳೆತಾನಾ ಆಮ್ಕಾಂ ಖಂಡಿತ್ ಮದರ್ ತೆರೆಜಾಚೊ ಉಡಾಸ್ ಯೆಂವ್ಚೊ ಸಹಜ್.
1999 ಂತ್ ಸುರು ಜಾಲ್ಲೆಂ ಹೆಂ ಮಿಸಾಂವ್, ಉಪ್ರಾಂತ್ ಎಕಾ ಟ್ರಸ್ಟಾ ದ್ವಾರಿಂ ಮುಕಾರ್ಸುನ್ ಯೆತಾ. ಸಿಯೊನ್ ಅಶ್ರಮ್ ಟ್ರಸ್ಟ್ ಎಕ್ ಸರ್ವ್ ಧರ್ಮಾಚ್ಯಾ ಲೊಕಾಕ್ ಎಕ್ ಧೈರಾಚೆಂ ಅನಿ ಭಲಾಯ್ಕೆಚೆಂ ಕೇಂದ್ರ್ ಜಾಂವ್ಕ್ ಪಾವ್ತಾ.
1999 ಥಾವ್ನ್ ಆಜ್ ಪರ್ಯಾಂತ್ ಸಾಧಾರ್ನ್ 800 ಂಕ್ ಮಿಕ್ವೊನ್ ಲೋಕ್ ಅಪ್ಲ್ಯಾ ಪಿಡೆಕ್ ಪರಿಹಾರ್ ಜೊಡುಂಕ್ ಪಾವ್ತಾ. ಧರ್ಮಿಶ್ಟಾಂಚ್ಯಾ ಅನಿ ದಾನಿಂಚ್ಯಾ ಸಹಾಯೆ ಮಾರಿಫಾತ್ ಅಸ್ಪತ್ರೆಚೆಂ ಲ್ಹಾನ್ ಭಾಂದಾಪ್ ನೀಟ್ ಜಾತಾ.
2003 ಇಸ್ವೆಂತ್ ಕರ್ನಾಟಕ ಸರ್ಕಾರಾಚ್ಯಾ ಮಾನ್ಯತಾಯೆ ಸವೆಂ, ಸಿಯೊನ್ ಅಶ್ರಮ್ ಟ್ರಸ್ಟಾಕ್ ರಾಜ್ಯ್ ಪ್ರಶಸ್ತಿಯಿ ಫಾವೊ ಜಾತಾ. ತರಿಕೀ, ಸರ್ಕಾರಾಚಿ ಧನ್ ಸಹಾಯ್ ಮ್ಹೆಳ್ಚೆಂ ಕಿತೆಂ ಸಲಿಸ್ಗೀ?
ಪೌಲುಸ್ ಲಾಗ್ಶಿಲ್ಯಾ ಅನಿ ಪಯ್ಶಿಲ್ಯಾ ಗಾಂವಾಂನಿ, ಇಗರ್ಜಾನಿಂ ಕುಮಕ್ ಮಾಗೊಂಕ್ ವೆತಾ ಅನಿ ಸಭಾರ್ ಜಣ್ ಸಹಾಯ್ ಕರ್ತಾತ್. ದುಬಾಯ್ ಅನಿಂ ಕುವೆಯ್ಟಾಂತ್ ವರ್ತೊ ಧನ್ ಸಹಾಯ್ ತಾಕಾ ಮೆಳ್ತಾ ತಾಚ್ಯಾ ಜೀವನಾಚೊ ಧ್ಯೇಯ್ ಮುಕಾರ್ಸುನ್ ವರುಂಕ್. ಅತಾಂ ಲಗ್ಭಗ್ 250 ಲೋಕ್ ಸಿಯೊನಾಂತ್ ವಸ್ತಿ ಕರ್ನ್ ಅಸಾ, ಅನಿಂ ಹಾಂತ್ಲೆ 75% ಚ್ಯಾಕಿ ಚಡ್ ಲೋಕ್ ತಕ್ಲೆಚ್ಯಾ ಪಿಡೆಚೊ ಜಾವ್ನಾಸಾ.
ಅಮಿಂ ಕಿತೆಂ ಕರ್ಯಾಂ, ಯಾ ಅಮಿಂ ಕಿತೆಂ ಕರ್ಯೆತ್?
ಅಮಿಂ ಅಮ್ಕಾಂ, ದೇವ್ ಸಮೆಸ್ತಾಂಕ್ ಮ್ಹಣ್ ವಗೆಂ ಬಸ್ಚೆ ಸಭಾರ್ ಜಣ್ ಅಸಾತ್ ಅಮ್ಚ್ಯೆ ಮಧೆಂ. ಅಮಿಂಯ್ ತಶೆಂ ಜಾಂವ್ಚೆಂಗೀ? ಆಮ್ಕಾಂಯೀ ದೆವಾನ್ ಏಕ್ ಮಿಸಾಂವ್ ದಿಲಾಂ ತೆಂ ಅಮಿಂ ವಿಸ್ರೊಂಚೆಂಗೀ?
ದುಬ್ಳ್ಯಾ-ಧಾಕ್ಟ್ಯಾಂಚಿ ಸೆವಾ ಕರ್ಚೊ ಅನಿಂ ಅಮ್ಚ್ಯಾ ಮತಿಕ್ ಧಾಧೊಸ್ಕಾಯ್ ಹಾಡ್ಚ್ಯಾ ತಸ್ಲೊ ಹೊ ಏಕ್ ಸಂದರ್ಭ್ ಅಮಿಂ ಹೊಗ್ಡಾಂವ್ಚೊಗೀ?
ಪರತ್ ಅಮಿಂ ಉಡಾಸಾಕ್ ಹಾಡ್ಯಾಂ ಅಮ್ಚ್ಯಾ ಸೊಮ್ಯಾಚಿಂತ್ ಉತ್ರಾಂ: "ಮ್ಹಜ್ಯಾ ಅಧಿಕ್ ಲ್ಹಾನಾಂ ಭಾಂವಾಂಕ್...... ಹಾಂವ್ ಪಿಡೆಸ್ತ್ ಅಸ್ಲ್ಲೊಂ, ತುಮಿ ಮ್ಹಜಿ ಚಾಕ್ರಿ ಕೆಲಿ".
ಪಿಡೆಸ್ತಾಂಚಿ ಚಾಕ್ರಿ ಕರುಂಕ್ ಆಮಿ ವಚಾಜೆ ಮ್ಹಣ್ ನಾಂ, ತ್ಯೆಂ ಕಾಮ್ ಪೌಲುಸ್ ಅನಿಂ ತಾಚೆಂ ಟ್ರಸ್ಟ್ ಕರ್ನ್ ಅಸಾ. ಅಮ್ಚ್ಯಾಚ್ ಹಾತಾಂತ್ ನೈಂ ತರೀ, ಅಮ್ಚ್ಯಾ ತಾಂಕಿ ಭಿತರ್ಲಿ ದುಡ್ವಾ ಸಹಾಯ್ ದೀವ್ನ್ ಹ್ಯಾ ಎಕಾ ದೆವಾಚ್ಯಾ ಮ್ಹನ್ಶ್ಯಾಕ್ ಅನಿ ತಾಚ್ಯಾ ಹ್ಯಾ ಮಹಾನ್ ಕಾಮಾಕ್ ಅಮಿ ಅಮ್ಚೊ ಪಾಟಿಂಬೊ ದಿಂವ್ಯಾ, ದೆವಾಚೆಂ ಕಾಮ್ ಮುಕಾರ್ಸುನ್ ವರುಂಕ್ ತಾಕಾ ಕುಮಕ್ ಕರ್ಯಾಂ ಅನಿ ಅಮ್ಚ್ಯಾ ಕುಡಿಕ್ ಅನಿ ಮತಿಕ್ ಸಂತೊಸಾಂವ್ಚೆ ಕಾಮ್ ಅಮಿ ಕರ್ಯಾಂ. ಅಮಿಂ ಅಮ್ಚ್ಯಾ ಫೆಸ್ತಾಂಕ್, ಭುರ್ಗ್ಯಾಂಚ್ಯಾ ಜಲ್ಮಾ ದಿಸಾಂಕ್, ಕಾಜಾರಾಂಕ್ ಪೊಯ್ಶೆ ಖರ್ಚಿತಾಂವ್, ಸೈರ್ಯಾ-ಧೈರ್ಯಾಂಕ್ ಅಪಯ್ತಾಂವ್.
ಸಾಂ ಲೂಕ್ ಮ್ಹಣ್ತಾ: "ತುಮಿಂ ಜೆವಾಣ್ ಕರ್ತಾಸ್ತಾನಾ, ಕುಟ್ಮಾಕ್, ಸೈರ್ಯಾಂಕ್, ಇಶ್ಟಾಂಕ್ ಅನಿ ಗ್ರೇಸ್ತ್ ಸೆಜಾರ್ಯಾಕ್ ಅಪೈಲ್ಯಾರ್, ತಿಂ ತುಮ್ಕಾಂ ಪಾಟಿಂ ಅಪೈತೆಲಿಂ ಅನಿ ತುಮ್ಚೆಂ ರೂಣ್ ಹ್ಯಾಚ್ ಸಂಸಾರಾಂತ್ ಫಾರಿಕ್ ಜಾತೆಲೆಂ; ತುಮ್ಚ್ಯಾ ಫೆಸ್ತಾಂಕ್ ಆಪಯಾ ತುಮಿ ದುಬ್ಳ್ಯಾಂಕ್, ಥೊಂಟ್ಯಾಂಕ್, ಕುರ್ಡ್ಯಾಂಕ್ ಅನಿ ಅಸ್ಕತ್ ಅನಿ ಗತ್ ಆಧಾರ್ ನಾತ್ಲ್ಯಾಂಕ್... ತುಮ್ಚೆಂ ರೂಣ್ ಫಾರಿಕ್ ಕರುಂಕ್ ತೆ ಸಕ್ಚೆನಾಂತ್, ಪೂಣ್ ದೇವ್ ತುಮ್ಕಾಂ ಹಜಾರ್ ವಾಂಟ್ಯಾನಿ ಪಾಟಿಂ ದಿತೊಲೊ"
ಸಿಯೊನ್ ಅಶ್ರಮ್ ಟ್ರಸ್ಟಾಕ್ ವರ್ಸಾಕ್ ಲಗ್ಭಗ್ 40 ಲಾಖ್ ರುಪ್ಯಾಂಚಿ ಗರ್ಜ್ ಆಸಾ. ಹೊ ಕಾಲಿ ಪಿಡೆಸ್ತಾಂಚ್ಯಾ ಖಾಣಾಕ್, ವಕ್ತಾಂಕ್, ನ್ಹೆಸ್ಣಾಕ್ ಅನಿ ಟ್ರಸ್ಟಾಚ್ಯಾ ಉರ್ಲ್ಲ್ಯಾ ಖರ್ಚಾಂಕ್. ಪೌಲುಸಾಚೆಂ ಸ್ವಪಾಣ್ ಅಸಾ ಹ್ಯಾ ಇತ್ಲ್ಯಾ ಜಣಾ ಪಿಡೆಸ್ತಾಂಚ್ಯಾ ಭಲಾಯ್ಕೆ ಖಾತಿರ್ ಏಕ್ ಬರಿ ತಕ್ಲೆಚಿ (ಮೆಂಟಲ್) ಆಸ್ಪತ್ರ್ ಆಸಾ ಕರಿಜೆ ಮ್ಹಣ್. ಹ್ಯೆಂ ಸ್ವಪಾಣ್ ಜ್ಯಾರ್ ಕರುಂಕ್ ಚಡ್ ಕಶ್ಟ್ ನಾಂತ್, ಜರ್ ಅಮಿ ಮ್ಹನ್ ಕರ್ತಾಂವ್ ತರ್.
ಅಮೆರಿಕಾಚೊ ಏಕ್ ಪ್ರಸಿದ್ಧ್ ಯಾಜಾಕ್, ಡಾ. ರಾಬರ್ಟ್ ಶುಲ್ಲರ್ ಮ್ಹಣ್ತಾ: "ಹ್ಯಾ ಸಂಸಾರಾಂತ್ ಮ್ಹಣ್ಶ್ಯಾಕ್ ಕರುಂಕ್ ಜಾಯ್ನಾತ್ಲ್ಲೆಂ ಕಾಮ್ ಖೈಂಚೆಂಚ್ ನಾಂ. ಅನಿ ದೆವಾಚೆಂ ಕಾಮ್ ಕರುಂಕ್ ಅಮಿ ಮುಕಾರ್ ಸರ್ತಾನಾ, ಕಸ್ಲಿಚ್ಚ್ ಖಾವ್ಜೆಣಿ ಅಮ್ಕಾಂ ಯೆಂವ್ಕ್ ನಜೊ"
ತರ್ ಯಾ ಅಮಿ, ಕಮರ್ ಭಾಂದ್ಯಾ ಹೆಂ ದೆವಾಚೆಂ ಕಾಮ್ ಮುಕಾರ್ಸುನ್ ವರುಂಕ್, ಅನಿ ಹೆಂ ಪೌಲುಸಾಚೆಂ ಮಿಸಾಂವ್ ಅಮ್ಚೆಂಚ್ ಮ್ಹಣ್ ಮತಿಂತ್ ದವ್ರುನ್ ಅಮ್ಚಿ ದುಡ್ವಾ ಸಹಾಯ್ ಪೌಲುಸಾಕ್ ತುರ್ತಾನ್ ಧಾಡ್ನ್ ದೀಂವ್ಯಾ. ಉಡಾಸ್ ದವರ್ಯಾಂ, ಜೆಜು ತಾಚೆ ಹಾತ್ ಮುಕಾರ್ ದೊವೊರ್ನ್ ಅಮ್ಕಾಂ ಅಪಯ್ತಾ, ಅಮ್ಚ್ಯಾ ಬರ್ಯಾ ಮ್ಹನಾಚಿ ಕುಮಕ್ ಅಮ್ಚ್ಯಾ ಅಧಿಕ್ ಲ್ಹಾನಾ ಭಾಂವಾಂಕ್ ಧಾಡುನ್ ದೀಂವ್ಕ್. ತುಮ್ಚ್ಯಾ ದಾವ್ಯಾ ಹಾತಾನ್ ದಿಲ್ಲಿ ಕುಮಕ್ ತುಮ್ಚೊ ಉಜ್ವೊ ಹಾತ್ ನ್ಹೆಣಾ ಜಾಂವ್ದಿ. ತುಮ್ಕಾಂ ಸಕ್ಡಾಂಕ್ ಅನಿ ತುಮ್ಚ್ಯಾ ಕುಟ್ಮಾಂಕ್ ದೆವಾಚಿಂ ಧಾರಾಳ್ ಅಶಿರ್ವಾದಾಂ ಪಡೊಂ.
ತುಮ್ಚಿ ಕುಮೊಕ್ ಧಾಡುಂಕ್ ವಿಳಾಸ್:
(ಪರ್ಗಾಂವಾಂ ಥಾವ್ನ್ ಕೊಣಾಯ್ಕ್ಯ್ ಕುಮೊಕ್ ಧಾಡುಂಕ್ ಆಸಾ ತರ್ ತಿ ದಯಕರುನ್ SEON A.T. Syndicate bank with Kakkinje ಹ್ಯಾ ನಾಂವಾಚೆರ್ ಕರುನ್ U.C.Paulose ಹಾಕಾ ಪೋಸ್ಟ್ ಕರಾ.)
ಮ್ಯಾನೆಜಿಂಗ್ ಟ್ರಸ್ಟಿ, ಸಿಯೊನ್ ಅಶ್ರಮ್ ಟ್ರಸ್ಟ್, ಗಂಡಿಬಾಗಿಲು ಪೊಸ್ಟ್, ಬೆಳ್ತಂಗಡಿ, ದಕ್ಶಿಣ ಕನ್ನಡ, ಕರ್ನಾಟಕ, 574 228
ಫೋನ್ ನಂ: 0091 825 305228, 0091 94480 11928
ಸಿಯೋನ್ ಆಶ್ರಮಾಕ್ ಕುಮೊಕ್ ಕರ್ಚಾ ಇರಾದ್ಯಾಚೊ ದಿವೊ-ದಾಯ್ಜ್ ವಿಶೇಷ್ ಅಂಕೊ 2005
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications