ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಇತ್ಲೆ ದೇವ್, ಧರ್ಮ್, ಭಾಸೊ ಆಸೊನೀ, ಆಮಿ ಏಕ್ ಜಾವ್ನ್ ಉರೊಂಕ್ ಸಕೊಂಕ್ ನಾಂವ್ ನ್ಹಯ್? ಕಿತ್ಲೆಂ ವ್ಹಡ್ಲೆಂ ವಿಪರ್ಯಾಸ್ ನ್ಹಯ್?’
ಅಶೀರ್ ವಾಟ್ ವಿಂಚ್ಯಾಂಗೀ?
ವರಸ್ : 2009
ಅಂಕೊ : 50
ಮಯ್ನೊ : ಮಾರ್ಚ್
ಸಂಪಾದಕೀಯ್ - 50.
ವಲ್ಲಿ ಕ್ವಾಡ್ರಸ್
ಮ್ಹಜೆ ತಸಲ್ಯಾ ಎಕಾ ಸಾದ್ಯಾ ಮನ್ಶ್ಯಾಕ್, (ತುಮ್ಕಾಂ ಪಾತ್ಯೆಂವ್ಕ್ ಕಶ್ಟ್ ಜಾತಿರ್ ತರ್ ತುಜೆ ತಸಲ್ಯಾ ಎಕಾ ಸಾದ್ಯಾ ಮನ್ಶ್ಯಾಕ್) ಜರ್ತರ್ ಎಕ್ಲೊ ಮುಖಾರ್ ಉಭೊ ರಾವೊನ್ ಬಂದೂಕ್ ಜೊಕುನ್ "ತುಕಾ ವಾಂಚೊಂಕ್ ಖಂಚೆಂ ಭೋವ್ ಗರ್ಜ್ ಆಸಾ ಮ್ಹಳ್ಳೆಂ ವೆಗ್ಗಿಂ ಸಾಂಗ್, ಉದಾಕ್? ಭುಂಯ್, ವಾರೆಂ ವಾ ಹಾಂವ್?"
ಖಂಡಿತ್ ಜಾವ್ನ್ ಹಾಂವ್ ಜಾಂವ್ ತುಂ ಜಾಂವ್ ಜಾಪ್ ದಿತೆಲ್ಯಾಂವ್ "ತುಂ" ಮ್ಹಣೊನ್.
ಹಾಂಗಾಸರ್ ಕಾಂಯ್ ಧಯ್ರ್ ಎಕ್ಟಾವ್ನ್ "ತುಜೆಶಿವಾಯ್ ಬಾಕಿಚೆಂ ಸರ್ವ್ ಗರ್ಜೆಚೆಂ" ಮ್ಹಳ್ಳೆಂ ತರ್ ತೊ ಕಾಂಯ್ ಆಪ್ಲ್ಯಾ ಬಂದುಕೆಚೆ ಗುಳೆ ವೊತ್ತೊ ಮಾತ್ರ್ ನ್ಹಯ್, ಹೆರ್ ಲೋಕ್, ತಶೆಂಚ್ ವಾಟೆರ್ ವೆಚೆಂ ಸುಣೆಂ ಮಾಜರ್ಯೀ ’ತುಕಾ ವ ಮ್ಹಾಕಾ’ ಪಿಶ್ಯಾರ್ ಕಾಡ್ನ್ ಹಾಸ್ತೆ.
ಹಾಕಾಚ್ಚ್ ಮ್ಹಣ್ಚೆಂ ಗರ್ಜ್ ಪಡ್ತಾನಾ ಗಾಡಾಂವ್ ಸಯ್ತ್ ಬಾಪುಯ್ ಕರ್ಚೆಂ ಮ್ಹಣ್.
ಹಿ ಜಾಲ್ಯಾ ಆಯ್ಚ್ಯಾ ಕಾಳಾಚಿ ಪರಿಗತ್, ವಯ್ರ್ ಥಾವ್ನ್ ಸಕಯ್ಲ್, ಪಡ್ಲಾ ಥಾವ್ನ್ ಮುಡ್ಲಾಂತ್, ಗಾಂವಾಂತ್ ತಶೆಂಚ್ ಪರ್ಗಾಂವಾಂತ್, ಹಿಚ್ಚ್ ಗಜಾಲ್, ಕಂಯ್ ಗೆಲ್ಯಾರೀ ಪಳೆಂವ್ಕ್ ಮೆಳ್ಚಿ ಖಬಾರ್ ಹಿಚ್, ಪತ್ರಾಂನಿ ಜಾಂವ್ ಹೆರ್ ಮಾಧ್ಯಮಾಂನಿ ಜಾಂವ್ ವಾಚುಂಕ್ ಮೆಳ್ಚಿ ಖಬಾರ್ ಹಿಚ್ಚ್; ಖಂಯ್ ದಿಸಾಚೆಂ ಖುನಿ, ಅಮಾಯಕಾಂಚೆರ್ ಜುಲುಮ್, ನೆಣ್ತ್ಯಾ ಭುರ್ಗ್ಯಾಂಕ್ ಸಯ್ತ್ ಆಪ್ಲ್ಯಾ ಕುಡಿಚ್ಯಾ ವೊಡ್ಣೆಕ್ ಗಳ್ಸಿತಾತ್ ಆನಿ ಉಪ್ರಾಂತ್ ಲಗಾಡ್ ಕಾಡ್ತಾತ್. ಆಪ್ಲ್ಯಾ ಮೊಡ್ಕೆಂತ್ ಶಿಜಯಿಲ್ಲಿ ಪೇಜ್ ಮರ್ಯಾದೆನ್ ಜೇಂವ್ಕ್ ಲಾಭಾಜಯ್ ತರೀ ಪರಿಶ್ರಮ್ ಕರಿಜಾಯ್. ಸಾಮಾಜಿಕ್ ಕಾಯ್ದೆ ಕಾನುನ್ ಮ್ಹಳ್ಳೊ ಏಕ್ ಜೋಕ್ ಜಾಲಾ, ಕಾನೂನ್ ಲಾಭೊಂಕೀ ಸಾದ್ಯಾ ಮನ್ಶಾನ್ ವಿಶೇಸ್ ರಿತಿಚೆಚಿ ಮಿನತ್ ಕರುಂಕ್ ಪಡ್ತಾ. ಅಶೆಂಯ್ ಭಗ್ತಾ; ಕೀರ್ತನಾಂಚ್ಯಾ ಬುಕಾಂತ್ ವಾಚುಂಕ್ ಮೆಳ್ಚಿಂ ಸತಾಂ ಎಕೆಕ್ಚ್ ಉಗ್ಡಾಪಿಂ ಜಾತೇ ಆಸಾತ್.
ಹ್ಯಾ ದಿಸಾಂನಿ ಲೊಕಾಂಚೆಂ ಗಮನ್ ಚಡಿತ್ ವೆಚೆಂ ಜಾವ್ನಾಸಾ; ಆಯ್ಲೆವಾರ್ ಓಸ್ಕರ್ ಇನಾಮಾಂ ಜಿಕ್ಲೆಲ್ಯಾ ಸ್ಲಮ್ ಡೋಗ್ ಮಿಲಿಯನರ್ ಫಿಲ್ಮಾಚೆರ್. ಲೊಕಾಚೆ ವಾದ್ ವಿವಾದ್ ವಿಚಿತ್ರ್ ನ್ಹಯ್? ಓಸ್ಕರ್ ಮೆಳಾನಾತ್ಲ್ಯಾರೀ ಲೋಕ್ ದುರ್ಸತೊ ಆಮ್ಚ್ಯಾ ಭಾರತಾಚೆರ್ ಕಾಡ್ಲೆಲ್ಯಾ ಫಿಲ್ಮಾಂಕ್ ಇತ್ಲೆ ಸಲೀಸಾಯೆನ್ ಪುರಸ್ಕಾರ್ ಲಾಭಾನಾಂತ್ ಮ್ಹಣ್, ಆತಾಂ ಮೆಳ್ಳೆ, ತೆಯೀ ಏಕ್ ದೋನ್ ನ್ಹಯ್, ಆಟ್ ಆಸ್ಕರ್!. ತರ್ಯೀ ಲೋಕ್ ಪುರ್ಪುರ್ತಾ ’ಆಮ್ಚ್ಯಾ ಭಾರತಾಚಿ ಮರ್ಯಾದ್ ಕಾಡ್ಚ್ಯಾ ಫಿಲ್ಮಾಕ್ ಓಸ್ಕರ್ ದಿಲೆ ಆನಿ ಆಮ್ಚ್ಯಾ ದೇಶಾಚಿ ಮರ್ಯಾದ್ ಕಾಡ್ಲಿ’.
ಬೊಂಬೊಯ್ಚಿ ಜೋಪಡ್ಪಟ್ಟಿ ಸಂಸಾರಾಂತ್ಲಿ ದುಸ್ರಿ ವ್ಹಡ್ಲಿ ಜೋಪಡ್ಪಟ್ಟಿ ಮ್ಹಳ್ಳೆಂ ಸತ್ ಭೋವ್ಶಾ ಬೊಬಾಟ್ಚೊ ಹೊ ಲೋಕ್ ವಿಸ್ರೊಂಕ್ ನಾ ಜಾವ್ಯೆತ್. ದೆಕುನ್ ಜಾಣಾರಿ ಸಾಂಗ್ತಾತ್ ’ಜನರನ್ನು ಸಮಧಾನಪಡಿಸಲು ಜನಾರ್ಧನನಿಂದಲೂ ಅಸಾಧ್ಯ’.
ಸ್ಲಮ್ಡೋಗ್ ಮಿಲಿಯನರ್ ಸೊಡ್ಲ್ಯಾರ್ ಅನ್ಯೇಕ್ ವಿಶಯ್ ಲೊಕಾಂಚ್ಯಾ ಗಮನಾಕ್ ವೊಡ್ಚೊ ಜಾವ್ನಾಸಾ ’ಆತಂಕ್ವಾದ್’. ಗೋಧ್ರ, ಬಾಬ್ರಿ ಮಸ್ಜೀದ್, ಮುಂಬಯ್ ದಂಗೆ, ಒರಿಸ್ಸಾ, ತಂದೂರಿ, ನಿಠಾರಿ, ತೆಹಲ್ಕಾ, ಹರ್ಶದ್ ಮೆಹ್ತಾ, ಚಾರಾ, ಬೋಫೋರ್ಸ್, ಕಾರ್ಗಿಲ್ ಆನಿ ಹೆರ್ ವಾದ್-ವಿವಾದ್ ಭೋವ್ಶಾ ಆಮಿ ಹಳ್ತಾರ್ ವಿಸರ್ಲ್ಯಾಂವ್. ಸದ್ದ್ಯಾಚ್ಯಾ ಮಟ್ಟಾಕ್ ವಿಸ್ರೊಂಕ್ ಅಸಾಧ್ಯ್ ಜಾಂವ್ಚೊ ವಿಶಯ್ ಜಾವ್ನಾಸಾ ’ಆತಂಕ್ವಾದ್’.
ಅಶೆಂ ಮ್ಹಣೋನ್ ಆತಂಕ್ವಾದ್ ಮ್ಹಣ್ತಚ್ ಕಾಂಯ್ ಆಮ್ಚ್ಯಾ ಚಡ್ತಾವ್ ಲೊಕಾಚೆಂ ಗಮಾನ್ ಇಸ್ರೇಲ್-ಪ್ಯಾಲೆಸ್ತಿನಾಂತ್ ಜಾಂವ್ಚ್ಯಾ ಝುಜಾಚೆರ್ ವ್ಹಚಾನಾ, ವರ್ಸಾಂಧಿಂ ಜಾಲ್ಲ್ಯಾ ಇಸ್ರೇಲ್ ಆನಿ ಹಸನ್ ನಸ್ರಲ್ಲಾಚ್ಯಾ ಪಂಗ್ಡಾಕ್ ಜಾಲ್ಲ್ಯಾ ಝುಜಾಚೆರ್ ವಚಾನಾ, ವಾ ತಾಚ್ಯಾಕೀ ಪಯ್ಲೆಂ ಜಾಲ್ಲ್ಯಾ ಇರಾಕ್ - ಎಮೆರಿಕಾ ಝುಜಾಚೆರ್ ವಚಾನಾ, ವಾ ತಾಚ್ಯಾಕೀ ಆಧಿಂ ಜಾಲ್ಲ್ಯಾ ತಾಲಿಬಾನ್-ಅಮೆರಿಕಾಚ್ಯಾ ಝುಜಾಚೆರ್ಯೀ ವಚಾನಾ. ತಾಚ್ಯಾಕೀ ಪಯ್ಲೆಂ ಆತಂಕ್ವಾದ್ ಆತಾಂ ಬೆಳ್ಶೆಲಾಂ.
ಮ್ಹಜೆ ತಸಲ್ಯಾ (ಸೊಡ್ಯಾಂ ತುಜೆ ತಸಲ್ಯಾ) ಎಕಾ ಸಾದ್ಯಾ ಮನ್ಶಾಕ್ ಜರ್ ಕೊಣೆಂಯ್ ಸವಾಲ್ ಕೆಲೆಂ ’ಖಂಯ್ಚೆಂ ಆತಂಕ್ವಾದ್?’, ತೆದ್ನಾಂ ಮ್ಹಜಿ/ತುಜಿ ಜವಾಬ್ ಕಸ್ಲಿ ಆಸ್ಯೆತ್? ಭಿಂಯೆನಾಕಾ, ಹಾಂಗಾಸರ್ ಬಂಧೂಕ್ ನಾಸ್ತಾಂ ಸವಾಲ್ ವಿಚಾರ್ಲಾಂ, ಕೊಣ್ ಮ್ಹಣಾತ್ ಪೋರ್ ಶ್ರೀಲಂಕಾಚ್ಯಾ ಕ್ರಿಕೆಟರಾಂಚೆರ್ ಪಾಕಿಸ್ತಾನಾಂತ್ ಬಂದೂಕೆಚೆ ಗುಳೆ ಮಾರ್ಲೆಲೆ - ತೆ ’ಆತಂಕ್ವಾದಿ’ ಮ್ಹಣ್. ಕೊಣ್ ಮ್ಹಣಾತ್ ಪೋರ್ ಬೊಂಬೊಯಾಂತ್ ತಾಜ್ಮಹಲಾಂತ್ ಯೇವ್ನ್ ಲೊಕಾಂಚೆರ್ ಗುಳೆ ಸೊಡ್ಲೆ ಪಳೆ, ತೆಚ್ಚ್ ಆತಂಕ್ವಾದಿ ಮ್ಹಣ್. ಆನಿ ಕೊಣ್ ಮ್ಹಣ್ತಿತ್ ಕಾಶ್ಮಿರಾಂತ್ ’ಜಿಹಾದಿ’ ಮ್ಹಣ್ ವೆವೆಗ್ಳ್ಯಾ ರಾನಾಂನಿ , ಟೆಂಟಾನಿ ಆಸೊನ್ ಟ್ರೇಯ್ನಿಂಗ್ ಘೆತಾತ್ ತೆ ಆತಂಕ್ವಾದಿ ಮ್ಹಣೊನ್, ಕೊಣ್ ಮ್ಹಣ್ತಿತ್ ’ನಕ್ಸಲೈಟ್’ ಮ್ಹಣ್, ಆನಿ ಕೊಣ್ ಮ್ಹಣ್ತಿತ್ ’ಎಲ್ಟಿಟಿಇ’, ’ಉಲ್ಫಾ’......
ಏಕ್ ಘಡಿ ನಿಯಾಳ್ ಕರ್ಯಾಂ - ನಿಜಾಯ್ಕೀ ಹೆಚ್ಚ್ಗೀ ಆತಂಕ್ವಾದಿ? ಹೆಚ್ಚ್ ಆತಂಕ್ವಾದಿ ತರ್ ಹೆ ಕೊಣ್ ಮ್ಹಳ್ಳೆಂ ಆಮ್ಕಾಂಚ್ ಅಮಿ ಸವಾಲ್ ಕರ್ಯಾಂ;
’ಝಡ್ ಪ್ಲಸ್ ಸೆಕ್ಯೂರಿಟಿ’ ಆಸಾ ಮ್ಹಳ್ಳ್ಯಾ ಧಯ್ರಾನ್ ವೆದಿಚೆರ್ ಚಡೊನ್ ಕೊಣಾ ಕೊಣಾಕ್ ಗಾಳಿ ಸೊವುನ್ ಬೊಬಾಟ್ಚೆ ಆಮ್ಚೆ ಮುಖೆಲಿ, ವೆದಿ ಸಕ್ಲಾ ಪರ್ದ್ಯಾ ಪಾಟ್ಲ್ಯಾನ್ ರಾವೊನ್ ಕೊಣಾಕ್ ಧರ್ಮಾಚ್ಯಾ ನಾಂವಿಂ, ಕೊಣಾಕ್ ರಂಗಾಚ್ಯಾ ನಾಂವಿ, ಕೊಣಾಕ್ ಜಾತಿಚ್ಯಾ ನಾಂವಿಂ, ಕೊಣಾಕ್ ಭಾಸೆಚ್ಯಾ ನಾಂವಿ ಮಾಸಾಂ ಖಾಂವ್ಕ್ ಲಾಂವ್ಚೆ ಕೊಣ್?
ಚಡ್ತಾವ್ ಲೊಕಾಕ್ ಕಶೀಯ್ ತಕ್ಲಿ ನಾ, ತಕ್ಲಿ ಆಸ್ಲ್ಯಾರೀ ತಾಂತುಂ ಶೆಣ್ ಭರ್ಲಾಂ, ಕೊಣಾಕ್ ಪರಿಗತೆಚಿ ದಾಬ್, ಕೊಣಾಕ್ ಹೆರ್ ಗರ್ಜ್ ಆನಿ ಅಸಲ್ಯಾಂಚ್ಯಾ ಕೊಂಪ್ರಾಕ್ ಮ್ಹೊಂವ್ ಸಾರವ್ನ್ ಲೆಂವಂವ್ಚೆ ಹೆ ಮುಖೆಲಿ, ಕೆದ್ನಾಂ ಧರ್ಮಾಚ್ಯಾ ನಾಂವಾನ್, ಕೆದ್ನಾಂ ಆನಿ ಕಸಲ್ಯಾ ನಿಬಾಂನಿ ಎಕಾಮೆಕಾ ವಿಂಗಡ್ ಕರುನ್, ಚ್ಯುರಾನ್ ಚ್ಯುರೊ ಕರುನ್ ಎಕಾಮೆಕಾಚೆಂ ರಗಾತ್ ಪಿಯೆಂವ್ಚೆ ಕೊಣ್?
ಆಮ್ಚೊ ದೇಸ್ ಶಾಂತಿಚೊ ದೇಸ್, ಆಮ್ಚ್ಯಾ ದೇಸಾಚೊ ಬಾಪುಯ್ ಮಹಾತ್ಮಾ ಗಾಂಧಿ, ಜೊ ಶಾಂತೆ ಖಾತಿರ್ ಅಖ್ಖೊ ಸಂಸಾರ್ ಮಾಂಧ್ತಾ, ತಾಚೆರ್ ಘಡ್ಲ್ಲ್ಯಾ ಫಿಲ್ಮಾಕ್ ಸಯ್ತ್ ಆಟ್ ಆಸ್ಕರ್ ಇನಾಮಾಂ ಲಾಭ್ಲ್ಯಾಂತ್, ತಾಕಾ ಶಾಂತೆಚೊ ನೋಬೆಲ್ ಪುರಸ್ಕಾರ್ ಲಾಭೊಂಕ್ ನಾತ್ಲ್ಲಿ ವ್ಹಡ್ಲೆಂ ಸತ್. ಪುಣ್ ಆಜ್ ಹೆಚ್ಚ್ ಗಾಂಧಿಕ್ ತುರುಪಾಚೊ ಎಕ್ಕೊ ಕರುನ್ ಸರ್ವ್ ಪಾರ್ಟ್ಯೊ ಲೊಕಾಂಕ್ ಎಕಾಮೆಕಾಚ್ಯಾ ಫಾಯ್ದ್ಯಾ ಖಾತಿರ್ ಗಳ್ಸಿನಾ? ಆನಿ ಆಮಿ ಸರ್ವ್ ’ಕುರಿಗಳು ಸಾರ್ ಕುರಿಗಳು’ - ನಿಜಾಯ್ಕೀ ಬೊಕ್ರೆ ಜಾವ್ನ್ ಜಿಯೆತಾಂವ್ ಶಿವಾಯ್ ಆಮ್ಚೊ ಅಕ್ಕಲ್ ಕಾಂಯ್ ಚುರುಕ್ ಜಾಲ್ಲೊಚ್ ನಾ. ಜಾಂವ್ಚೆಪರಿಂಯ್ ಆಸಾ ಮ್ಹಣ್ಚೆಂ ಧಯ್ರ್ ಮ್ಹಾಕಾಯ್ ನಾ.
ಕಿತ್ಯಾ? ಆಮ್ಚೆಂ ಸಂಯ್ಬ್ ಪೊಳ್ಕುರೆಂ, ಆಮ್ಚೆಂ ಸಂಯ್ಬ್ ದುಭಾವಿ, ಆಮ್ಚೆಂ ಸಂಯ್ಬ್ ಹೆರಾಂಕ್ ಸಕ್ಲಾ ಘಾಲ್ನ್ ಮಸ್ತುಂಚೆಂ. ಸದಾಂಚೆಂ ಮಾಗ್ಣೆಂ ರಜಾರ್ ಕರ್ನ್, ಹಫ್ತ್ಯಾಚೆಂ ಮೀಸ್ ಚುಕಯ್ನಾಸ್ತಾಂ ಭಾಗೆವಂತ್ ಜಿಣಿ ಜಿಯೆಂವ್ಚೆ ಆಮಿ ಆಮ್ಚ್ಯಾಚ್ ಸಮಾಜೆಂತ್ ಎಕಾಮೆಕಾ ಪಳೆಂವ್ಚಿ, ವ್ಹಳ್ಕೊಂಚಿ ರೀತ್ ಆಮ್ಕಾಂಚ್ ಮಾರಗ್ ಪಡೊಂಕ್ ನಾ? ನಾ ತರ್ ಆಯ್ಲೆವಾರ್ ಜಾಲ್ಲೆಪರಿಂ ಆಮ್ಕಾಂ ಆಮ್ಚ್ಯಾಚ್ ಆಂಗ್ಣಾಂತ್ ದೆಂವೊನ್ ಆಮ್ಚೆರ್ ಹಲ್ಲೊ ಜಾತೊನಾ. ತರ್ ಹೊ ದೇಸ್ ಕೊಣಾಚೊ ಮ್ಹಣ್ ಚಾರ್ ಜಣ್ ಎಕಾಮೆಕಾ ಮೆಳೊನ್ ಭಾಸಾಭಾಸ್ ಚಲಯ್ತಾತ್ ತರ್ ತೆ ಕೊಣ್?
ಆಮ್ಚ್ಯಾ ದೇಸಾಂತ್ ಆಸ್ಚೆ ತಿತ್ಲೆ ದೇವ್ ಸಂಸಾರಾಂತ್ ಹೆರ್ ಖಂಚ್ಯಾರ್ ದೇಸಾಂತ್ ನಾಂತ್, ಆಮ್ಚ್ಯಾ ದೇಸಾಂತ್ ಆಸ್ಚೆ ತಿತ್ಲೆ ಧರ್ಮ್ ಸಂಸಾರಾಚ್ಯಾ ಹೆರ್ ಖಂಚ್ಯಾಯ್ ದೇಸಾಂತ್ ನಾಂತ್, ಆಮ್ಚ್ಯಾ ದೇಸಾಂತ್ ಆಸ್ಚೆ ತಿತ್ಲ್ಯೊ ಭಾಸೊ ಸಂಸಾರಾಚ್ಯಾ ಹೆರ್ ಖಂಚ್ಯಾಯ್ ದೇಸಾಂತ್ ನಾಂತ್, ತರ್ಯೀ ಸತ್ ಹೆಂ: ಆಮ್ಚ್ಯಾ ದೇಸಾಂತ್ ಆಸ್ಚೆ ತಿತ್ಲೆಂ ದಲ್ಡಿರ್ಪಣ್ ಸಂಸಾರಾಚ್ಯಾ ಹೆರ್ ಖಂಚ್ಯಾಯ್ ದೇಸಾಂತ್ ದಿಸೊನ್ ಯೇನಾ. ಅಜೂನ್ ಆಮ್ಚೆಪಯ್ಕಿ ಆಮಿ ಜಿತ್ಲೆಂ ಮುಖಾರ್ ಪಾವ್ಲಾಂ ಕಾಡ್ತಾಂವ್ಗೀ ತಿತ್ಲಿಂಚ್ ಪಾಟಿಂ ಪಾವ್ತಾಂವ್. ಆಮ್ಚ್ಯಾ ಚಿಂತ್ಪಾಚಿ ಸುಕಿಧಾಡ್? ಆಮ್ಚ್ಯಾ ಸಮ್ಜೊಣೆಚಿ ಸುಕಿದಾಡ್? ಇತ್ಲೆ ದೇವ್ ಆಸೊನೀ, ಇತ್ಲೆ ಧರ್ಮ್ ಆಸೊನೀ, ಇತ್ಲ್ಯೊ ಭಾಸೊ ಆಸೊನೀ, ಆಮಿ ಏಕ್ ಜಾವ್ನ್ ಉರೊಂಕ್ ಸಕೊಂಕ್ ನಾಂವ್ ನ್ಹಯ್? ಕಿತ್ಲೆಂ ವ್ಹಡ್ಲೆಂ ವಿಪರ್ಯಾಸ್ ನ್ಹಯ್? ದೆಕುನ್ ಜಾತಿಂ ಜಾತಿಂ ಮಧೆಂ, ಭಾಸೆ ಭಾಸೆ ಮಧೆಂ, ಪ್ರಾಂತ್ಯಾಂ ಪ್ರಾಂತ್ಯಾಂ ಮಧೆಂ ಆನಿ ದೆವಾಂ ದೆವಾಂ ಮಧೆಂ ದೊರೆ ಆನಿ ರಾಜ್ವಟ್ಕಿ. ಆನಿ ಆಮಿ ಹೆಚ್ಚ್ ಗುಲಾಮ್ಪಣಾಂತ್ ಜಿಣಿ ಮ್ಹಳ್ಳೆಂ ಸುಖ್ ಭಗ್ತೆಲೆ ಬೊಕ್ರೆ.
ದಿಸಾನ್ ದೀಸ್ ಆಯ್ಚೊ ಸಂಸಾರ್ ಎಕಾ ಅಸಲ್ಯಾ ದಿಶೆನ್ ಚಮ್ಕೊನ್ ಆಸಾ, ಸಂಸಾರ್ ಆರ್ಥಿಕ್ ದಿವಾಳೆಂತ್ ಕಂಗಾಲ್ ಜಾಲಾ, ಗಾಂವಾಂತ್ ಕಾಮಾಂ ಮೆಳಾನಾಂತ್, ಕಾಮ್ ನಾಸ್ತಾಂ ಗಾಂವಾಂತ್ ಆಸ್ಚಿಂ ಗಲ್ಫಾಕ್ ವೆತಾಲಿಂ, ಆತಾಂ ಗಲ್ಫಾಚಿ ಪರಿಗತ್ ಗಾಂವ್ಚ್ಯಾಕೀ ಪಾಸ್ಟ್ ಜಾಂವ್ಚಿಂ ಖುಣಾಂ ದಿಸೊಂಕ್ ಲಾಗ್ಲ್ಯಾಂತ್. ಜಾಯ್ತ್ಯಾಂನಿ ಕಾಮಾಂ ಹೊಗ್ಡಾಯ್ಲ್ಯಾಂತ್, ಆನಿ ಕಾಮಾಂ ಆಸ್ಚಿಂ ಸಯ್ತ್ ದೀಸ್ ಮೆಜುನ್ ಆಸಾತ್. ಥೊಡ್ಯಾಂಚೊ ಪಾಗ್ ಉಣೊ ಕೆಲಾ, ಪುಣ್ ಭಾಡಿಂ ಚಡೊನ್ ಆಸಾತ್, ವಸ್ತುಂಚಿಂ ಮೊಲಾಂ ಚಡೊನ್ ಆಸಾತ್, ಬೆಂಕಾಂನಿ ವಾಡ್ ನಾ ಮ್ಹಣೊನ್ ಕೊಣೆ ಘರಾಂ-ಫ್ಲೇಟಾಂ ಘೆತ್ಲ್ಯಾಂತ್, ಪುಣ್ ಫ್ಲೇಟಾಂ ಅನಿಕಿ ತಯಾರ್ ಜಾವ್ನಾಂತ್, ಬೆಂಕಾಚೆಂ ಲೋನ್ ಬಾಂಧುಂಕ್ ತ್ರಾಸ್ ಥೊಡ್ಯಾಂಕ್, ಥೊಡ್ಯಾಂನಿ ಶೇರ್ ಮಾರ್ಕೆಟಿಂತ್ ದುಡು ಘಾಲ್ಲೊ, ಮಾರ್ಕೆಟ್ ಪರ್ತಾಲ್ಯಾ, ಎಕಾ ವಾಟೆನ್ ಟ್ಯಾಕ್ಸ್, ಅನ್ಯೇಕಾ ವಾಟೆನ್ ಪಿಡಾ ಶಿಡಾ...
ಆರ್ಥಿಕ್ ದಿವಾಳಿ, ಕಾಮಾಂ ಉಣಿ ವಾ ನಾಂತ್, ಚಡ್ಲ್ಲೆಂ ನಾಸಮಧಾನ್, ಎಕಾಮೆಕಾಚೆ ಮನಸ್ಥಾಪ್, ಝಗ್ಡಿಂ, ಮೋರಲ್ ಪೊಲಿಸ್, ಆತಂಕ್ವಾದ್ - ಸಮಸ್ಸೆ ನ್ಹಯ್, ಸಮಸ್ಸ್ಯಾಂಚೆ ವೊರ್ ಆಮ್ಚೆ ಮುಖಾರ್ ಆಸಾತ್.
ತರ್ಯೀ, ಹ್ಯಾ ಸರ್ವ್ ಸಮಸ್ಸ್ಯಾಂ ಮಧೆಂ ಸಮಧಾನೆಚಿ ವಾಟ್ ಸೊಧುನ್ ತಿ ಮುಖಾರುನ್ ವರ್ಚೆಂಚ್ ಏಕ್ ಭೋವ್ ವ್ಹಡ್ಲೆಂ ಶರ್ತ್ ಆಮ್ಚೆ ಮುಖಾರ್ ಆಸಾ.
ಬರಿ ವಾಟ್ ಕೆದ್ನಾಂಯ್ ಅಶೀರ್ ಆಸ್ತಾ ಕಂಯ್, ಆಮಿ ಖಂಯ್ಚಿ ವಾಟ್ ವಿಂಚ್ಯಾಂ?
ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
