ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 70. ಬಿಡಾರ್
ಅರುಣಾ ತಲಪಾಡಿ: ಕೊಂಕ್ಣೆಂತ್ ಸಾಂಕೇತಿಕ್ ಕಾಣ್ಯೊ ಬರಯ್ತೆಲೆ ನಾಂತ್ ಮ್ಹಳ್ಳೆಂ ದುರ್ಸೊಣೆ ಉಚಾರ್ತೆಲ್ಯಾಂನಿ ಹಿ ಕಾಣಿ ಜರೂರ್ ಪರತ್ ಪರತ್ ವಾಚಿಜಾಯ್. ಆಪ್ಲ್ಯಾ ಆವಯ್ ಸಾರ್ಕ್ಯಾ ಭುಂಯ್ಚೆ ಚುರಾನ್ ಚುರೆ ಜಾತಾನಾ ಸಯ್ತ್ ತಿಚೊ ಎಕ್ಲೊ ಪೂತ್ ಆಪ್ಲ್ಯಾ ಕುಟ್ಮಾಚ್ಯಾ ಮಾತ್ಯಾವಯ್ಲೆಂ ಪಾಕೆಂ ನಾಸ್ತಾಂ ಆಸ್ಚ್ಯಾ ಪರಿಗತೆಕ್ ಸಯ್ತ್ ಸ್ವೀಕಾರ್ ಕರ್ತಾ ಆನಿ ಅಖ್ರೇಕ್ ಅಪ್ಲೊ ಆಸ್ರೊ ಸೊಧ್ತಾ. ಹಾಂಗಾಸರ್ ಜಾಗೊ ’ಕೊಂಕ್ಣಿ ಭಾಸ್’ ಮ್ಹಣ್ ಲೆಖ್ಲಿ ತರ್ ಹ್ಯಾ ಕಾಣ್ಯೆಚಿ ಸೊಭಾಯ್ ಆನಿ ತಾಂಕ್ ಮೆಜುಂಕ್ ತುಮ್ಕಾಂಚ್ ಸೊಡ್ತಾಂ. ’ರೋನಿ ಅರುಣ್’ ಅಪ್ರೂಪಾಚೊ ಕಾಣ್ಯೆಗಾರ್/ಕವಿ ತರ್ಯೀ, ಚಿಂತ್ಪಾಚಿ ಗುಂಡಾಯ್ ಆಸ್ಚಾಂತ್ಲೊ ಎಕ್ಲೊ.
ಅರುಣಾ ತಲಪಾಡಿ
"ಆಮಿ ಫಾಲ್ಯಾಂ ಸಾಂಜೆ ಭಿತರ್ ಘರ್ ಸೊಡುನ್ ದೀಜೆ ಕಂಯ್" ಕಾಮಾ ಥಾವ್ನ್ ಯೆತೆಚ್ಚ್ ಪೆಂಟಾಳೆರ್ ಬಸ್ಲ್ಲ್ಯಾ ಮ್ಹಾಕಾ ಕಾಫಿ ದೀವ್ನ್ ಮ್ಹಜಿ ಪತಿಣ್ ಮ್ಹಣಾಲಿ. ತಕ್ಲಿ ಉಕಲ್ನ್ ತಿಕಾ ಪಳೆಲೆಂ, ’ಮುಕಾರ್ ಕಿತೆಂ?’ ಮ್ಹಳ್ಳೆಂ ಸವಾಲ್ ತಿಚ್ಯಾ ದೊಳ್ಯಾಂನಿ ಆಸ್ಲ್ಲೆಂ, ಹಾಂವ್ ಪುರಾಸಣೆನ್ ಆಯ್ಲಾಂ, ಇಲ್ಲೆಂ ಸುಧಾರ್ಸುನ್ ಘೆತ್ಲ್ಯಾ ಉಪ್ರಾಂತ್ ಜಾಲ್ಯಾರ್ ಬರೆಂ ಆಸ್ತೆಂ ಕೊಣ್ಣಾ, ಪುಣ್ ತಿಚೆ ಕಾವ್ಜೆಣೆನ್ ಆಸ್ಪದ್ ದೀಂವ್ಕ್ ನಾ ಜಾಯ್ಜೆ ಚಿಂತ್ಲೆಂ ಹಾಂವೆಂ.
"ಕಿತೆಂ ಕರ್ಯಾಂ ಕರ್ಯಾಂ?" ತಿಕಾಚ್ ಸವಾಲ್ ಕರಿತ್ ಕಾಪ್ಯೆಚೊ ಏಕ್ ಘೊಟ್ ಮಾರ್ಲಿ. ಖಂಚಿಯಿ ಪರಿಗತ್ ಆಯಿಲ್ಲೆ ಪರಿಂಚ್ ಫುಡ್ ಕರ್ಚಿ ಮ್ಹಜಿ ಕಾಲೆತಿ ದೆಕುನ್ ತಿ ಕೆದ್ನಾಂಯ್ ಮ್ಹಣ್ತಾ "ತುಕಾ ಫುಡಾರಾಚಿ ಖಂತ್ ನಾ!"
ಮ್ಹಾಕಾ ಫುಡಾರಾಚಿ ಖಂತ್ ನಾ? ಖಂಡಿತ್ ಆಸಾ, ಪುಣ್ ತ್ಯಾಚ್ ವೆಳಾರ್ ಮ್ಹಜ್ಯಾಚ್ ಭಾಂವ್ಡಾಂಚೆರ್ಯೀ ಮ್ಹಾಕಾ ಎಕಾ ಥರಾಚಿ ಪಾತ್ಯೆಣಿ ಆಸಾ. ತೆ ಮ್ಹಜೊ ಹಾತ್ ಸೊಡ್ಚೆನಾಂತ್, ಘರಾ ಥಾವ್ನ್ ಭಾಯ್ರ್ ಘಾಲ್ಚೆನಾಂತ್. ಹಾಂವ್ ಕಾಳ್ಜಾ ಥಾವ್ನ್ ಚಿಂತಾಲೊಂ! ಪುಣ್ ಮ್ಹಜಿ ಪತಿಣ್ ತಕ್ಲೆ ಥಾವ್ನ್ ಚಿಂತಾಲಿ. ಆಮ್ಚೆಂ ಘರ್ ಆಸ್ಚ್ಯಾ ಜಾಗ್ಯಾರ್ ಏಕ್ ಸೆಂಟ್ ಭುಂಯ್ಕ್ ಸತ್ತರ್ ಹಜಾರ್! 48 ಸೆಂಟ್ಸ್ ಭುಂಯ್ಕ್ ಮೋಲ್ ಕಿತ್ಲೆಂ ಜಾಲೆಂ? ದುಡು ಕೊಣಾಕ್ ಕೊಡ್ಹು ಜಾತಾ? ತಿ ಸದಾಂಯ್ ಸಾಂಗ್ತಾಲಿ. "ಭಾವ್ ಭಯ್ಣಿ ಪುರಾ ಜಲ್ಮತಾನಾ ಮಾತ್, ವಾಡ್ತಾನಾ ಫಕತ್ತ್ ಸ್ವಾರ್ಥ್ ಭರ್ಲ್ಲೊ ಮನಿಸ್! ತಿಂಯ್ ಎಕ್ಚ್, ಪರ್ಕಿಯಿ ಏಕ್ಚ್ಚ್!"
ತಶೆಂಚ್ ಜಾಲೆಂ, ರಗ್ತಾಕ್ ರಗಾತ್ ವಿಸರ್ಲೆಂ, ಮೊರ್ತಾನಾ ಸಾಂಡುನ್ ವೆಚ್ಯಾ ಭುಂಯ್ತ್ ಲ್ಹಾನ್ಪಣಾಕ್ ಸಾಕ್ಸ್ ಜಾಲ್ಲ್ಯಾ ಹ್ಯಾ ಘರಾಂತ್ ವಾಂಟೊ ಜಾಯ್ ಮ್ಹಣ್ ಭಾವ್ ಮ್ಹಜೆರ್ ಉಪ್ರಾಟ್ಲ್ಯಾತ್. ಆತಾಂ ಮ್ಹಜ್ಯಾ ಕಾಳ್ಜಾನ್ ಚಿಂತ್ಚೆಂ ರಾವಯ್ಲಾಂ! ಫುಡಾರಾಚೆ ಖಂತಿನ್ ತಿಕಾ ರೆವೊಡ್ಲಾಂ.
"ಕಿತೆಂ ಕರ್ಯಾಂ? ಆಜ್ ಕಿತೆಂ ಕರ್ಯಾಂ?" ಹಾಂವ್ ಲ್ಹಾನ್ ಆಸ್ತಾನಾ ಮ್ಹಜೊ ಆನ್ ಹೆಂ ಘರ್ ಭಾಂದ್ತಾನಾ ಹೆಂಚ್ ಸವಾಲ್ ವಿಚಾರ್ತಾಲೊ. "ಆಜ್ ಕಿತೆಂ ಕರ್ಯಾಂ ಮಾತಿ ಕಾಲವ್ಯಾಂ? ರುಕಾಡ್ ಹಾಡ್ಯಾಂ?" ಅಶೆಂ ಉಲವ್ನ್ ಹಾಸೊನ್ಚ್ ಹೆಂ ಘರ್ ಬಾಂದ್ಲ್ಲೆಂ. ಹ್ಯಾ ಘರ್ಚಿ ವೊಣೊದ್ ಇಂಚಾನ್ ಇಂಚ್ ವಯ್ರ್ ಯೆತಾನಾ ಹಾಂವೆಂ ಪಳೆಲಾಂ. ಆನ್ ಕಾಮಾಥಾವ್ನ್ ಸಾಂಜೆರ್ ಯೆತಾಲೊ. ಆನ್, ಮಾಂಯ್ ಆನಿ ಹಾಂವ್ ಮೆಳೊನ್ ಹೆಂ ಘರ್ ಬಾಂದ್ತೆಲ್ಯಾಂವ್. ಹಾಂವ್ ತವಳ್ ಸ ವರ್ಸಾಂಚೊ ಪಿಲೊ. ಕಿತೆಂ ಜಾಲೆಂ? ಹಾಂವ್ಯಿ ಹಾತಾಕ್ ಹಾತ್ ದಿತಾಲೊಂ. ವೊಣೊದಿಕ್ ವೊಣೊದ್, ಕುಡಾಕ್ ಕೂಡ್ ಸೆರ್ವೊನ್ ಹೆಂ ಘರ್ ರುತಾ ಜಾಲ್ಲೆಂ.
ಮ್ಹಜ್ಯಾ ಪಾಟ್ಲ್ಯಾನ್ ಸ ವರ್ಸಾಂ ಉಪ್ರಾಂತ್ ಪಾಟಾಪಾಟ್ ತೆಗಾಂ ಜಣಾಂ ಭಾವ್ಭಯ್ಣಿಂ ಜಲ್ಮಾಲಿಂ. ಹಿಂ ವಾಡೊನ್ ಯೆತಾನಾ ಅವ್ಚಿತ್ ಆನ್ ಏಕ್ ದೀಸ್ ಅವ್ಘಡಾಕ್ ಬಲಿ ಜಾವ್ನ್ ಆಮ್ಕಾಂ ಸಾಂಡುನ್ ಗೆಲೊ. ತವಳ್ ಮ್ಹಾಕಾ ಚೊವ್ದಾ ವರ್ಸಾಂ. ಶಿಕ್ಪಾಕ್ ಗುಟ್ಲಿ ಮಾರ್ನ್ ಕಾಮಾಕ್ ವಚೊಂಕ್ ಲಾಗ್ಲೊಂ. ಭಾವಾಂಚೊ, ಭಯ್ಣಿಂಚೊ ಫುಡಾರ್ ಮ್ಹಜ್ಯಾ ಖಾಂದ್ಯಾರ್ ಘೆವ್ನ್ ತಾಂಕಾಂ ಶಿಕಪ್ ದೀವ್ನ್ ತಾಂಚೊ ಫುಡಾರ್ ಬಾಂದ್ಲೊ. ಪಾಕಟೆ ಫುಟ್ಲೆ, ಸುಕ್ಣಿಂ ಉಭೊನ್ ಗೆಲಿಂ, ತಾಂಚ್ಯಾ ಘೊಂಟೆರಾಕ್. ಪುಣ್ ಹಾಂವ್ ಮಾತ್ ಎಕ್ಲೊಂ ಹಾಂಗಾಚ್ ಉರ್ಲೊಂ. ಪ್ರಾಯ್ವಂತ್ ಆವಯ್ ಆನಿ ಆವಯ್ ಸಾರ್ಕೆಂ ಹೆಂ ಘರ್ ಮ್ಹಾಕಾ ಉರ್ಲೆಂ. ಹಾಂವೆಂ ಕೆಲ್ಲೆಂ ಕರ್ತವ್ಯ್ ಮಾತ್ ಖರೆಂ. ತಶೆಂಚ್ ಮ್ಹಜಿಂ ಭಾಂವ್ಡಾಂಯಿ ತಾಂಚೆಂ ಕರ್ತವ್ಯ್ ಕರ್ತೆಲಿಂ. ’ದಾಟ್ಟ್ಯಾಬಾ, ತುಕಾಚ್ ಹೆಂ ಘರ್ ಆಸೊಂದಿ’ ಹ್ಯಾ ದುಬ್ಳ್ಯಾ ಭಾವಾಕ್ ಇತ್ಲೆಂ ಪುಣ್ಯಿ ಕರ್ತಾತ್ ಮ್ಹಣ್ ಪಾತ್ಯೆಂವ್ನ್ ಹಾಂವ್ ಫಸ್ವಾಲೊಂ!
ಆತಾಂ ಹೊ ಜಾಗೊ ವಾಂಟೆ ಜಾಲೊ ತರ್ ಹೆಂ ಘರ್ ಉರತ್? ಭಿರಾಂತ್ ಮ್ಹಾಕಾ ಧೊಸ್ತಾ. ದೊಳ್ಯಾಂ ಮುಕಾರ್ ಇಂಚಾನ್ ಇಂಚ್ ಉಬಿ ಜಾಲ್ಲಿ ವೊಣದ್ ಖಿಣಾಭಿತರ್ ಭೆಸಾಂ ಜಾತಾನಾ ಹಾಂವ್ ಸೊಸುಂ ಕಶೆಂ? ಬಾಳ್ಪಣಾ ಥಾವ್ನ್ ಆಜ್ ಪರ್ಯಾಂತ್ ಕುಡಿಕ್ ಊಬ್ ದಿಲ್ಲಿ, ಪಾವ್ನ್, ಹಿಂವ್ ಆನಿ ವೊತಾ ಥಾವ್ನ್ ರಾಕೊನ್ ಆಸ್ರೊ ದಿಲ್ಲಿ ಆವಯ್ ಸಾರ್ಕಿ ಆವಯ್ ಪರ್ಕ್ಯಾಂಚ್ಯಾ ಹಾತಾಂತ್ ಪಡ್ಲಿ ತರ್ ಉರತ್ ಕಶಿ? ತಿತ್ಲೆಂಚ್ ನ್ಹಯ್ ಆಸ್ತಾಂ ಜಾಗೊ ವಿಕ್ಲೊ ತರ್ ಹಾಂವ್ ಖಂಯ್ ವಚೊಂ? ಸವಾಲಾಂಚ್ಯಾ ಸಾಗೊರಾಂತ್ ಬುಡೊನ್ ಮೊರ್ತಾಶೆಂ ಭಗ್ಲೆಂ ಮ್ಹಾಕಾ.
"ಊಟ್ ನೆ ಕಿತೆಂ ಚಿಂತಾಯ್?"
"ಆನಿ ಕಿತೆಂ ಕರುಂ ತಕ್ಲಿ ಧಾಡಾಂವ್?"
"ಆಮಿಂಯಿ ಕೊಡ್ತಿಂಕ್ ಕೇಜ್ ಘಾಲ್ಯಾಂ, ನಾತ್ಲ್ಯಾರ್ ಹಾಂಗಾ ಥಾವ್ನ್ ಉಟ್ಚೆಂಚ್ ನಾಕಾ ಕಿತೆಂ ಕರ್ತಾತ್ ಪಳೆಯಾಂ!" ಪತಿಣೆನ್ ಮ್ಹಾಕಾ ವಾಸ್ತವಾಕ್ ಹಾಡ್ಲೊ.
"ಕಿತೆಂ ಉಲಯ್ತಾತ್ ತುಂ? ಕೋಡ್ತ್ ವಕೀಲ್ ಮ್ಹಣ್ ಭಂವೊನ್ ಕುಟ್ಮಾಚಿ ಮರ್ಯಾರ್ ರಸ್ತ್ಯಾರ್ ಘಾಲಿಜೆ ಮ್ಹಣ್ಚೆಂಗೀ ಆನಿ ತಾಕಾ ಖರ್ಚುಂಕ್ ಆಮ್ಚೆಲಾಗಿಂ ಪಯ್ಶೆ ತರ್ಯಿ ಖಂಯ್ ಆಸಾತ್? ಉಟ್ಚೆಂ ನಾಕಾ ಮ್ಹಣ್ತಾಯ್ ಹಾಂತುಂ ನ್ಯಾಯ್ ತರ್ಯಿ ಆಸಾಗೀ? ಹ್ಯಾ ಜಾಗ್ಯಾರ್ ಮ್ಹಾಕಾ ಕಿತ್ಲೆಂ ಹಕ್ಕ್ ಆಸಾಗಿ ತಾಂಕಾಂಯಿ ತಿತ್ಲೆಂಚ್ ಆಸಾನೆ? ದೆಕುನ್ ನಿತಿನ್ ವಾಂಟೆ ಕರುಂಕ್ ಸಾಂಗ್ಯಾಂ ಆನಿ ಆಮ್ಚ್ಯಾ ವಾಂಟ್ಯಾಂತ್ ಏಕ್ ಲ್ಹಾನ್ಶೆಂ ಬಿಡಾರ್ ಭಾಂದ್ಲ್ಯಾರ್ ಸಯ್." ಪರ್ತುನ್ ಮ್ಹಜೆಂ ಕಾಳಿಜ್ ಉಲಂವ್ಕ್ ಲಾಗ್ಲೆಂ.
"ಲ್ಹಾನ್ಶೆಂ ಬಿಡಾರ್ ಬಾಂದುಂಕ್ ಗಾಂಟ್ ಬಾಂದುನ್ ದವರ್ಲ್ಯಾಗಿ?" ಪತಿಣೆಚೆ ತಕ್ಲೆಚೆಂ ಚಿಂತಪ್ ಮ್ಹಜ್ಯಾ ಕಾಳ್ಜಾನ್ ಮಾಂದುನ್ ಘೆತ್ಲೆಂ. ಹಾಂವ್ ವೊಗೊ ರಾವ್ಲೊಂ.
"ತುಂ ಅಶೆಂಚ್ ಫಯ್ಸಲ್ ದಿತಾಯ್ ಮ್ಹಣ್ ಹಾಂವೆಂ ಚಿಂತ್ಲ್ಲೆಂ, ದೆಕುನ್ ಮ್ಹಜೆ ಇನ್ಶಿಣೆಲಾಗಿಂ ಗಜಾಲ್ ಸಾಂಗ್ತಾನಾ ಥೊಡ್ಯಾ ದಿಸಾ ಮಟ್ಟಾಕ್ ತಾಂಚ್ಯಾ ಘರಾಂತ್ ಖಾಲಿ ಆಸ್ಚ್ಯಾ ದೋನ್ ಕುಡಾಂನಿ ರಾವೊಂಕ್ ಸಾಂಗ್ಲಾಂ." ಖಾಲಿ ಜಾಲ್ಲೊ ಕಾಪ್ಯೆಚೊ ಗೊಬ್ಳೊ ಹಾತಾಂತ್ ಘೆವ್ನ್ ಮ್ಹಣಾಲಿ. ಗೊಬ್ಳ್ಯಾ ಬರಿಂಚ್ ಮ್ಹಜೊ ಮೆಂದುಯಿ ಖಾಲಿ ಜಾಲ್ಲಿ. ಹಾಂವೆಂ ಜಾಯ್ತ್ ಮ್ಹಣ್ಚೆ ಭಾಶೆನ್ ತಕ್ಲಿ ಹಾಲಯ್ಲಿ.
**********************
ವಾಂಟೆ ಕರುಂಕ್ ಸುಲಬ್ ಜಾಯ್ಶೆಂ ಆಮಿ ಘರ್ ಖಾಲಿ ಕೆಲೆಂ. ತಾಂಕಾಂ ವಿಕುಂಕ್ ಸುಲಭ್ ಜಾಯ್ಶೆಂ ಎಕಾ ಕೊನ್ಶ್ಯಾಚೊ ಜಾಗೊ ಮ್ಹಜೊ ವಾಂಟೊ ಮ್ಹಣ್ ಹಾಂವೆಂ ಘೆತ್ಲೊ. ಮೆಜೂನ್ ಸಾಟ್ ದಿಸಾಂನಿ ಭಾವ್ ಭಯ್ಣಿನ್ ಮೆಳೊನ್ ತಾಂಕಾಂ ಮೆಳ್ಲ್ಲೊ ವಾಂಟೊ ಎಕಾ ಮಾಪ್ಳ್ಯಾಕ್ ವಿಕ್ಲೊ. ಮ್ಹಜಿ ಭುಂಯ್ ವೊತಾಕ್ ಸುಕೊನ್, ಪಾವ್ಸಾಕ್ ಭಿಜೊನ್ ಘಡ್ಚ್ಯಾ ಘಡಿತಾಂಕ್ ಸಾಕ್ಸ್ ಜಾವ್ನ್ ಉರ್ಲಿ. ಆನಾಚಿಂ ಹಾಡಾಂ ಫೊಂಡಾಂತ್ ಚಡ್ಪಡ್ತಾಲಿಂ!
ಹಾಂವ್ ಸಕ್ಕಡ್ ವಿಸ್ರೊನ್ ಪರತ್ ಮ್ಹಜ್ಯಾ ಕಾಮಾಕ್ ಲಾಗ್ಲೊಂ. ಕಾಮ್ ಮ್ಹಳ್ಯಾರ್ ಕುಲಿಚೆಂ, ಆಸ್ಲ್ಯಾರ್ ಜಾಲೆಂ ನಾತ್ಲ್ಯಾರ್ ನಾ! ಏಕ್ ದೀಸ್ ಕಾಮ್ ನಾತ್ಲ್ಲ್ಯಾ ವೆಳಾರ್ ಬಸೊನ್ ಆಸ್ತಾನಾ ಏಕ್ ಕಾರ್ ಯೇವ್ನ್ ಆಂಗ್ಣಾಂತ್ ರಾವ್ಲೆಂ ಆನಿ ತಾಂತ್ಲೊ ಏಕ್ ಮನಿಸ್ ಮ್ಹಾಕಾ ವಿಚಾರುನ್ ಘರ್ಚ್ಯಾ ಹುಂಬ್ರಾರ್ ಚಡ್ಲೊ. ತೊ ಆಮ್ಚೊ ಜಾಗೊ ಘೆತ್ಲ್ಲೊ ಮಾಪ್ಳಿ ಕಂಯ್. "ಹಾಂವೆಂ ತುಮ್ಚೊ ಜಾಗೊ ಘೆತ್ಲಾ" ತೊ ಹಾತ್ ಜೋಡ್ನ್ ಮ್ಹಣಾಲೊ. "ಹಾಂವ್ ಜಾಣಾಂ" ಹಾಂವೆಂಯಿ ಹಾತ್ ಜೊಡ್ಲೆ.
"ಶೆಜಾರ್ಚ್ಯಾಂನಿ ತುಜೆವಿಶ್ಯಾಂತ್ ಮ್ಹಾಕಾ ಸಗ್ಳೆಂ ಸಾಂಗ್ಲೆಂ. ಮ್ಹಾಕಾ ಮಸ್ತ್ ಬೆಜಾರ್ ಜಾಲೆಂ. ದೆಕುನ್ ತುಕಾ ಕುಮೊಕ್ ಕರ್ಯಾಂ ಮ್ಹಣ್ ಚಿಂತುನ್ ಹಾಂವ್ ಆಯ್ಲಾಂ."
"ಕುಮೊಕ್ ಕರುಂಕ್ ಆಯ್ಲಾಯ್?" ಹಾಂವೆಂ ಉಲಯ್ಜೆಚ್ಚ್ ಪಡ್ಲೆಂ. ತಾಣೆಂ ಕುಮೊಕ್ ಕರಿಜೆ ತರ್ ಮ್ಹಜೆ ಥಾವ್ನ್ ಮಾಪ್ಳಿ ಕಿತೆಂಗೀ ಆಶೆತಾ ಮ್ಹಣ್ ಸಮ್ಜಾಲೆಂ ಮ್ಹಾಕಾ. "ಸಾಂಗ್ ಹಾಂವೆಂ ಕಿತೆಂ ಕರಿಜೆ?"
"ವಿಶೇಸ್ ಕಾಂಯ್ ನಾ", ಏಕ್ ಘಡಿ ರಾವ್ಲೊ ತೊ, ಉಪ್ರಾಂತ್ "ತುಜೊ ವಾಂಟೊಯಿ ಹಾಂವೆಂಚ್ ಘೆಂವ್ಚೊ ಮ್ಹಣ್ ಚಿಂತ್ಲಾಂ. ತುಮ್ಚ್ಯಾ ತ್ಯಾ ಜಾಗ್ಯಾರ್ ಫ್ಲೇಟಾಂ ಬಾಂದುಂಕ್ ಆಸಾತ್. ಬೇಸ್ಮೆಂಟಾಂತ್ ತುಕಾ ಏಕ್ ಘರ್ಯಿ ಆಸ್ತೆಲೆಂ ಆನಿ ವರ್ಸ್ಭರ್ ತುಕಾ ಕಾಮ್ಯಿ ಆಸ್ತೆಲೆಂ."
ತೊ ಸಾಂಗೊನ್ಚ್ ಗೆಲೊ, ಹಾಂವ್ ತಾಕಾಚ್ ಪಳೆವ್ನ್ ಕಿತೆಂ ಸಾಂಗ್ಚೆಂ ಮ್ಹಣ್ ಚಿಂತಾಲೊಂ.
"ಜಾಯ್ತ್ ತುಜಿ ಯೆವ್ಜಣ್ ಆಮ್ಕಾಂ ಮಂಜೂರ್ ಆಸಾ" ಸಟ್ಟ್ ಕರ್ನ್ ಮ್ಹಜೆ ಪತಿಣೆನ್ ಜಾಪ್ ದೀವ್ನ್ ಜಾಲ್ಲಿ. ಮಾಪ್ಳಿ ಮ್ಹಾಕಾಚ್ಚ್ ಪಳೆತಾಲೊ, ಮ್ಹಜೆ ಕಬ್ಲಾತೆಕ್ ರಾಕ್ತಾಲೊ ಜಾಯ್ಜಯ್. ಹಾಂವೆಂ ಜಾಯ್ತ್ ಮ್ಹಣ್ಚೆ ಭಾಶೆನ್ ತಕ್ಲಿ ಹಾಲಯ್ಲಿ. ದೊಳ್ಯಾಂತ್ಲಿಂ ದುಕಾಂ ಲಿಪಂವ್ಚ್ಯಾಕ್ ಹಾಂವ್ ಭಿತರ್ ಘುಂವ್ಲೊಂ. ಮಾಪ್ಳಿ ಎಡ್ವಾನ್ಸ್ ದೀವ್ನ್ ಜಾಗೊ ತಾಕಾಚ್ ವಿಖ್ಚೆಂ ನಕ್ಕಿ ಕರ್ನ್ ಗೆಲೊ.
****************************
ಆತಾಂ ಮ್ಹಾಕಾ ರಾವೊಂಕ್ ಏಕ್ ಘರ್ ಆನಿ ವರ್ಸ್ಭರ್ ಕಾಮ್, ದೊನ್ಯೀ ಆಸಾ. ಹಾಂವ್ ಆತಾಂ ವೋಚ್ಮೆನ್ ಮ್ಹಜ್ಯಾಚ್ ಜಾಗ್ಯಾಚೊ!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
