ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪಾಂಚ್ ಲಿಪಿಯಾಂನಿ ಕೊಂಕ್ಣಿ ಬರಯ್ತಾತ್; ರೋಮಿ (ಗೊಯಾಂ), ದೇವ್ನಾಗರಿ (ರತ್ನಗಿರಿ), ಕಾನಡಿ (ಮಂಗ್ಳುರ್), ಉರ್ದು (ಭಟ್ಕಳ್) ಆನಿ ಮಲಯಾಳಂ (ಕೊಚ್ಚಿನ್)
ಕೊಂಕ್ಣಿ ಭಾಸ್ ಆನಿ ಲಿಪಿ
- ವಿಲ್ಮಾ ಫೆರ್ನಾಂಡಿಸ್, ಬೆಳ್ಮಣ್
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005 ಹಾಂತುಂ ವೊರಾಯ್ಣಾರಾಂಚಿ ಶಿಫಾರಸ್ ಜೊಡ್ಲ್ಲೆಂ ಲೇಖನ್]
ಭಾಸ್ ಮ್ಹಳ್ಯಾರ್ ಮನ್ಶಾಚೆಂ ಉಲವ್ಪ್, ಭಗ್ಣಾಂ ಭಾಯ್ರ್ ವ್ಯಕ್ತ್ ಕರ್ಚೆಂ ಏಕ್ ಮಾಧ್ಯಮ್. ಆಮ್ಚಿ ಮಾಂಯ್ಭಾಸ್ ಜಾವ್ನಾಸಾ ಕೊಂಕ್ಣಿ. ಆಮ್ಚಾ ಖಾಸ್ ಭಾಸೆಕ್ ಆಮಿ ಮಾಂಯ್ಭಾಸ್ ಮ್ಹಣ್ತಾಂವ್. ಆಮಿಂ ಜಲ್ಮಾ ಥಾವ್ನ್ ಶಿಕೊನ್ ಉಲಂವ್ಚಿ ಭಾಸ್ ತಿ ಜಾವ್ನಾಸಾ. ಕೊಂಕಣ್ ಕರಾವಳಿಚಾ ಲೊಕಾನ್ ಉಲಂವ್ಚಿ ಭಾಸ್ ಜಾವ್ನಾಸಾ ಕೊಂಕ್ಣಿ. ಭಾರತೀಯ್ ಸಾಹಿತ್ಯ್ ಅಕಾಡೆಮಿನ್ ಕೊಂಕ್ಣಿ ಏಕ್ ಸ್ವತಂತ್ರ್ ಭಾಸ್ ಮ್ಹಣೊನ್ ಮಾಂದುನ್ ಘೆತ್ಲೆಂ, ತಶೆಂ ಜಾಲ್ಲ್ಯಾನ್ ಕೊಂಕ್ಣಿ ಏಕ್ ಸ್ವತಂತ್ರ್ ಭಾಸ್ ಜಾವ್ನಾಸಾ. ಕೊಂಕ್ಣಿ ಭಾಸೆಚ್ಯೊ ಸೆಜಾರಿ ಭಾಸೊ ಜಾವ್ನಾಸಾತ್ ಕನ್ನಡ ಆನಿ ಮರಾಠಿ. ಗೊಂಯಾಂಕ್ ಕೊಂಕ್ಣೆಚೆಂ ಕುಳಾರ್ ಮ್ಹಣ್ತಾತ್. ಕೊಂಕ್ಣಿ ಭಾಸೆಚಾ ಕಶ್ಟಾಂ ವೆಳಾರ್ ತಿಕಾ ಮೊಗಾನ್ ವಾಡಯಿಲ್ಲೆಂ ಕಾಥೊಲಿ ಮಿಶಿನರಿಂನಿ ಜಾವ್ನಾಸಾ.
ಕರ್ನಾಟಕಾಚ್ಯಾ ಸಾಂಸ್ಕೃತಿಕ್ ಜಿಣ್ಯೆಂತ್ ಕೊಂಕ್ಣಿ ಲೋಕ್ ಪಯ್ಲ್ಯಾ ಪಂಗ್ತೆರ್ ಆಸಾ. ಸಕ್ಕಡ್ ಭಾರತೀಯ್ ಪಂಗ್ಡಾಂ ಪ್ರಾಸ್ ಪಯಿಲ್ಲೆಂ ಇಂಗ್ಲಿಶ್ ಶಿಕ್ಶಣ್ ಜೊಡ್ಲ್ಲೊ ಲೋಕ್ ಜಾವ್ನಾಸಾ ಕೊಂಕ್ಣಿ ಲೋಕ್. ಕೊಂಕ್ಣಿ ಮಾಂಯ್ಭಾಸ್ ಆನಿ ತಿಚೆಂ ಸಾಹಿತ್ಯ್ ವಾಡಂವ್ಚೆಂ ಹಕ್ಕ್ ಕೊಂಕ್ಣಿ ನಾಗರಿಕಾಂಚೆಂ ಜಾವ್ನಾಸಾ. ದೆ|ಚಾ.ಫ್ರಾ.ದೆ’ಕೋಸ್ತಾ ಕೊಂಕ್ಣೆಚೊ ಮಹಾನ್ ಕವಿ ಜಾವ್ನಾಸ್ಲ್ಲೊ. ಜರ್ತರ್ ತೊ
ಕನ್ನಡ ಭಾಶೆಚೊ ಕವಿ ಜಾಲ್ಲೊ ತರ್ ತಾಕಾ ಕುವೆಂಪುಚೆಂ ಸ್ಥಾನ್ ಫಾವೊ ಜಾತೆಂ ಆಸ್ಲ್ಲೆಂ.
ಜಾತಿಫರ್ಮಾಣೆಂ ಕುಳಿಯಾಂ ಫರ್ಮಾಣೆಂ ಕೊಂಕ್ಣಿ ಭಾಶೆಂತ್ ಭೇಧ್ ಉಭ್ಜೊಂಕ್ ಕಾರಾಣ್ ಕಿತೆಂಗೀ ಮ್ಹಳ್ಯಾರ್ ಕೊಂಕ್ಣಿ ಭಾಸ್ ಉಲಂವ್ಕ್ ಮಾತ್ರ್ ಉಪ್ಯೋಗ್ಸಿತಾತ್ ಜಾಲ್ಲ್ಯಾನ್.
ಪ್ರಸ್ತುತ್ ಕೊಂಕ್ಣಿ ಜಿವಾಳ್ ಆನಿ ಕಾರ್ಯಾಳ್ ಆಸ್ಚಿ ತರ್ ತಿ ಕರ್ನಾಟಕಾಂತ್. ಕನ್ನಡ ಲಿಪಿಂತ್ ಕೊಂಕ್ಣಿ ಭಾಸೆಖಾತಿರ್ ಕಿತೆಂಯ್ ಕರುಂಕ್ ತಯಾರ್ ಆಸಾತ್ ತರ್ ತೆ ಕೆನಾರಾಚೆ ಕೊಂಕ್ಣಿ ಲೋಕ್ ಮಾತ್ರ್. ಹಾಂಚೆ ಪಯ್ಕಿ ಕ್ರಿಸ್ತಾಂವ್ ಜಣ್ ಚಡ್ ಆಸಾತ್.
ಕೆನಾರಾಚ್ಯಾ ಕಾಥೊಲಿಕಾಂ ಮಧೆಂ ಜರ್ ಕೊಂಕ್ಣಿ ಉರೊಂಕ್ ಪ್ರಮುಕ್ ಕಾರಾಣ್ ತಿ ತಾಂಚಿ ಧಾರ್ಮಿಕ್ ಕಾರ್ಯಾವಳಿಂಚಿ ಭಾಸ್ ಜಾಲ್ಲ್ಯಾನ್. ಆಮ್ಚ್ಯೊ ಇಗರ್ಜ್ಯೊ ಆಮ್ಚ್ಯಾ ಲೊಕಾಂಚಿ ಕೊಂಕ್ಣಿ ಭಾಸ್ ಆನಿ ಸಂಸ್ಕೃತಿಚೆ ರಾಕ್ವಣೆಕ್ ಕಾರಾಣ್ ಜಾಲ್ಯಾತ್.
ಹೆರ್ ಭಾರತೀಯ್ ಭಾಸಾಂನಿ ಯಾ ಸಂಸ್ಕೃತೆಂನಿ ಆಸ್ಚಾ ವರ್ನಿ ಚಡ್ ಅಧ್ಯನ್ ಯೋಗ್ಯ್ ವಿಶಯ್ ಕೊಂಕ್ಣಿ ಭಾಸೆಂತ್ ಆಸಾ. ಮಂಗ್ಳುರಾಂತ್ ಇಕ್ರಾವೆಂ ಅಖಿಲ್ ಭಾರತೀಯ್ ಕೊಂಕ್ಣಿ ಸಾಹಿತ್ಯ್ ಪರಿಶದೆಚೆಂ ಅಧಿವೇಶನ್ ಚಲ್ತಾಸ್ತಾನಾ ಕೊಂಕ್ಣೆಕ್ ಮಾನ್ಯತಾಯ್ ಮೆಳ್ಲ್ಲಿ. ಸಭಾರ್ ತೆಂಪಾಚಾ ವಾವ್ರಾ ಉಪ್ರಾಂತ್ ಶಾಳಾಂನಿ ಕೊಂಕ್ಣಿ ಶಿಕಂವ್ಕ್ ಪರ್ವಣ್ಗಿ ಮೆಳ್ಳ್ಯಾ.
ಕೊಂಕ್ಣಿ ಭಾಸೆಕ್ ಲಗ್ಭಗ್ ಸ ಹಜಾರ್ ವರ್ಸಾಂಚೆಂ ಇತಿಹಾಸ್ ಆಸಾ. ಸಾರಸ್ವತಾಂಚಿ ಮಾಂಯ್ಭಾಸ್ ಕೊಂಕಣಿ ಜಾವ್ನಾಸಾ. ಕೊಂಕ್ಣಿ ಭಾಸ್ ವಾಡ್ಚಿ ಘರಾಂನಿ ಜಾವ್ನಾಸಾ ದೆಖುನ್ ಘರಾಂನಿ ಕೊಂಕ್ಣಿ ಭಾಸೆಚೊ ಉಪಯೋಗ್ ಕರ್ಚೊ ಭೋವ್ ಗರ್ಜೆಚೊ. ಕೊಂಕ್ಣಿ ಭಾಸ್ ಸುರ್ವೆರ್ ಥಾವ್ನ್ ನೀಟ್ ಆನಿ ಸರಳ್ ರಿತಿಚಿ ಭಾಸ್ ಜಾವ್ನಾಸಾ.
ಆಮ್ಚಾ ಕರಾವಳಿ ಪ್ರದೇಶಾಂತ್ ಸಾರಸ್ವತ್ ಕೊಂಕ್ಣ್ಯಾಂಚೊ ವೆಪಾರ್ ಚಲ್ತಾಲೊ ಜಾಲ್ಲ್ಯಾನ್ ಕನ್ನಡ ಲಿಪಿಂತ್ ಕೊಂಕಣಿ ವಿಸ್ತಾರ್ಲಿ. ಕೊಂಕಣಿ ಭಾಸ್ ಎಕ್ಚ್ ಜಾಲ್ಯಾರ್ಯೀ ವಿವಿಧ್ ಧರ್ಮಾಂಚಾ ಲೊಕಾಂನಿ ವಿವಿಂಗಡ್ ಪ್ರಾಂತ್ಯಾಂನಿ ಉಲಂವ್ಚಾ ರಿತಿಂನಿ (ಬೊಲಿಂನಿ) ತಫಾವತ್ ಆಸಾ. ತ್ಯಾ ತ್ಯಾ ಪ್ರಾಂತ್ಯಾಂನಿ ಉಲಂವ್ಚಾ ಹೆರ್ ಭಾಸಾಂಚೊ ಪ್ರಭಾವ್ ಪಡ್ಲ್ಲ್ಯಾನ್ ಕೊಂಕಣಿ ಭಾಸ್ ಉಲಂವ್ಚಾ ರಿತಿಂನಿ ಹೊ ತಫಾವತ್ ಯೇಂವ್ಕ್ ಕಾರಾಣ್.
ಕೊಂಕ್ಣಿ ಭಾಸೆಚೆಂ ಸಾಹಿತ್ಯ್ ಚಡ್ ಜಾವ್ನ್ ಉತ್ಪನ್ನ್ ಜಾಂವ್ಚೆಂ ವ ಪರ್ಗಟ್ ಜಾಂವ್ಚೆಂ ಮಂಗ್ಳುರಾಂತ್ ಜಾವ್ನಾಸಾ. ಕೊಂಕ್ಣಿ ಭಾಸ್ ಖಂಚಾಯ್ ಎಕಾ ಧರ್ಮಾಚಿ ವ ಎಕಾ ಜಾತಿಚಾ ಲೊಕಾಂಚಿ ಭಾಸ್ ನ್ಹಂಯ್. ಚಡಾವತ್ ಹರ್ಯೆಕಾ ಧರ್ಮಾಚಾ ಲೊಕಾಂಚಿ, ಹಿಂದು, ಮುಸ್ಲಿಮ್, ಕ್ರಿಸ್ತಾಂವ್ ಲೊಕಾಂಚಿ ಭಾಸ್ ತಿ ಜಾವ್ನಾಸಾ. ಗೊಂಯಾಂತ್ ಆನಿ ಕಾರ್ವಾರಾಂತ್ ಕೊಂಕ್ಣಿ ಭಾಸ್ ವಾಪಾರ್ತಾತ್. ಹಜಾರ್ ವರ್ಸಾಂ ಥಾವ್ನ್ ಕೊಂಕ್ಣಿ ಉಲಂವ್ಚೊ ಲೋಕ್ ಭಾರತಾಂತ್ ಆಸ್ಲ್ಲೊ ಮ್ಹಣ್ ರುಜ್ವಾತಿ ಮೆಳ್ತಾತ್.
ಭಾರತಾಂತ್ ಛಾಪ್ಲ್ಲಿಂ ಆನಿ ಉಜ್ವಾಡಾಯಿಲ್ಲಿಂ ದೇಶಿ ಭಾಸೆಚಿಂ ಪ್ರಥಮ್ ಪುಸ್ತಕಾಂ ಕೊಂಕ್ಣಿ ಭಾಸೆಂತ್ ಆಸ್ಲ್ಲಿಂ. ಕೊಂಕ್ಣಿ ಭಾಸ್ ದುಸ್ರ್ಯಾ ವರ್ಗಾಚಿ ಭಾಸ್ ಜಾವ್ನ್ ಉರೊಂಕ್ ಕಾರಾಣ್ ಕಿತೆಂಗೀ ಮ್ಹಳ್ಯಾರ್ ಕೊಂಕ್ಣಿ ಲೋಕ್ ಸ್ವಾಭಾವಿಕ್ ಥರಾನ್ ಆಕ್ರಮಣ್ ಪ್ರವ್ರತ್ತಿ ಆಸ್ಲ್ಲೊ ನ್ಹಂಯ್. ದುಸ್ರೆಂ ಕಿತೆಂಗೀ ಮ್ಹಳ್ಯಾರ್ ಖಂಚಾಯ್ ರಾಯಾಂಚೊ ಆಸ್ರೊ ಹಾಚೆ ಆಧಿಂ ಕೊಂಕ್ಣಿ ಭಾಸೆಕ್ ಮೆಳ್ಲ್ಲೊ ನಾ. ಸಹಜ್ ಥರಾನ್ ಹೆರ್ ಲೊಕಾ ಜಮ್ಯಾಸಂಗಿಂ ಕೊಂಕ್ಣಿ ಲೋಕ್ ಸಲೀಸಾಯೆನ್ ಭರ್ಸತಾತ್, ಅಶೆಂ ಹೆರಾಂ ಸಾಂಗಾತಾ ಭರ್ಸುನ್ ಜಿಯೆತಾನಾ, ತೆ ತಾಂಚಿ ಭಾಸ್ ಸಂಸ್ಕೃತಿ ಆನಿ ತಾಂಕಾಂಚ್ ತೆ ವಿಸ್ರತಾತ್.
ಲಿಪಿ ಜಾವ್ನಾಸಾ ಸಾಹಿತ್ಯ್ ದಾಖಲ್ ಕರ್ಚೆಂ ಸಾಧನ್. ಭಾಸ್ ದೊಳ್ಯಾಂತ್ ದಿಸಾನಾ ದೆಖುನ್ ತಿಕಾ ದೊಳ್ಯಾಂಕ್ ದಿಸ್ಚ್ಯಾ ರುಪಾರ್ ಧರ್ನ್ ದವರುಂಕ್ ಕೆಲ್ಲಿ ವೆವಸ್ತಾಚ್ಚ್ ಲಿಪಿ ವ ಬರಾಪ್. ಕೊಂಕ್ಣಿ ಭಾಸೆಕ್ ಬರಂವ್ಕ್ ಕರ್ನಾಟಕಾಂತ್ ಕನ್ನಡ ಲಿಪಿ ವಾಪಾರ್ತಾತ್ ತರ್ ಗೊಂಯಾಂತ್ ರೊಮಿ ಲಿಪಿ ವಾಪಾರ್ತಾತ್ ಕೇರಳಾಂತ್ ಕೊಂಕ್ಣಿ ಬರಂವ್ಕ್ ಮಲ್ಯಾಳಿ ಲಿಪಿ ವಾಪಾರ್ತಾತ್ ಆನಿ ರತ್ನಗಿರಿಂತ್ ದೇವ್ನಾಗರಿ ಲಿಪಿ ತರ್ ಭಟ್ಕಳಾಂತ್ ನವಾಯತಿ/ಉರ್ದು ಲಿಪಿ ವಾಪಾರ್ತಾತ್ ಪುಣ್ ಕೊಂಕ್ಣೆಕ್ ನಾಗರಿ ಲಿಪಿಯೆಂತ್ ಚಡ್ ಪ್ರೋತ್ಸಾಹ್ ಮೆಳ್ತಾ ಮ್ಹಣ್ ನಾಗರಿ ಲಿಪಿ ವಾಪಾರ್ಚಿ ಸಾರ್ಕಿ ನ್ಹಂಯ್.
ಕೊಂಕ್ಣಿ ಸಾಹಿತ್ಯ್ ಕನ್ನಡ ಲಿಪಿಂತ್ ಚಡ್ ಫಳಾಧಿಕ್ ಆಸಾ. ಕೊಂಕ್ಣಿ ಭಾಸ್ ಬರಂವ್ಕ್ ಉಚಾರ್ ಕರ್ಚ್ಯೊ ಪಾಂಚ್ ಲಿಪಿ ಜಾವ್ನಾಸಾತ್ ಕನ್ನಡ, ರೊಮಿ, ಮಲಯಾಳಿ, ಉರ್ದು ಆನಿ ನಾಗರಿ. ಪುಣ್ ಹ್ಯಾ ಸರ್ವ್ ಲಿಪಿಂ ಪಯ್ಕಿ ಅಧಿಕ್ ಚಡಿತ್ ಮಾಪಾನ್ ಪರ್ಗಟ್ ಜಾಂವ್ಚೆಂ ಸಾಹಿತ್ಯ್ ಕನ್ನಡ ಲಿಪಿಯೆಂತ್ ಜಾವ್ನಾಸಾ.
ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿನ್ ನಾಗರಿ ಲಿಪಿಚ್ಚ್ ಕೊಂಕ್ಣೆಚಿ ಅಧಿಕೃತ್ ಲಿಪಿ ಮ್ಹಣ್ ಪರ್ಗಟ್ಚೆ ತಿತ್ಲೆಂ ಸಾರ್ಕೆಂ ನ್ಹಂಯ್. ಸಾಃಇತ್ಯ್ ಅಕಾಡೆಮಿನ್ ಪ್ರಶಸ್ಥಿ ದಿತಾಸ್ತಾನಾ, ಫಕತ್ತ್ ನಾಗರಿ ಲಿಪಿಂತ್ಚ್ ಆಸ್ಲ್ಯಾ ಬರ್ಪಾಂಕ್ಯೀ ವೊರಾವ್ನ್ ಪಳೆಂವ್ಚೆಂ ಗರ್ಜೆಚೆಂ, ಪ್ರಶಸ್ಥಿ ದಿತಾಸ್ತಾನಾ , ಫಕತ್ತ್ ಸಾಹಿತ್ಯ್ ಕಸಲೆಂಗೀ ಮ್ಹಳ್ಳೆಂ ವೊರಾವ್ನ್ ಪಳೆಂವ್ಚೆಂ ಲಿಪಿ ಕಸಲೀಯ್ ಜಾಂವ್.
ಫಿರ್ಗಜೆಂತ್ ಲೋಕ್ ಶಿಕಾಪ್ ಚಡ್ ಆಸ್ಲ್ಲೊ ವ ಉಣೆಂ ಆಸ್ಲ್ಲೊ ಮ್ಹಳ್ಳೊ ಭೇಧ್ ನಾಸ್ತಾಂ ಕಾನಡಿ ಲಿಪಿಂತ್ ಆಸ್ಲ್ಲಿಂ ವಾಚ್ಪಾಂ ವಾಚ್ತಾತ್. ಸಗ್ಳೊ ಬಾಯ್ಬಲ್ ಕಾನಡಿ ಲಿಪಿಯೆಂತ್ಲ್ಯಾ ಕೊಂಕ್ಣೆಂತ್ ಮಾತ್ರ್ ಆಸಾ. ವಿವಿಂಗಡ್ ಲಿಪಿಂಕ್ ಲಾಗೊನ್ ಕೊಂಕ್ಣಿ ಸಮಾಜೆಂತ್ ಆಪ್ಲ್ಯಾ ಮಧೆಂ ವೊಣದಿ ಉಭ್ಯೊ ಜಾಂವ್ಕ್ ಕಾರಾಣ್ ಜಾಲ್ಯಾತ್.
ಕೊಂಕ್ಣಿ ಭಾಸ್ ಮಾತ್ರ್ ಪಾಂಚ್ ಲಿಪಿಯಾಂನಿ ಬರಯ್ತಾತ್ ಮ್ಹಳ್ಳೆಂ ಸಾರ್ಕೆಂ ನ್ಹಂಯ್. ಹೆರ್ ಜಾಯ್ತ್ಯೊ ಭಾಸೊ ವಿವಿಧ್ ಲಿಪಿಂನಿ ಬರಯ್ತಾತ್, ದಾಖ್ಲ್ಯಾಕ್ ಸಿಂಧಿ ಭಾಸ್, ಪರ್ಶಿಯನ್, ಅರೇಬಿಕ್, ದೇವ್ನಾಗರಿ ಲಿಪಿಂನಿ ಬರಯ್ತಾತ್. ಕಾಶ್ಮಿರಿ ಭಾಸೆಕ್ಯ್ ಪಾಂಚ್ ಲಿಪಿ ಆಸಾತ್.
ಹಾಂಗಾಚ್ಯಾ ಹೆರ್ ಲೊಕಾಂಪರಿಂ ಸಾಹಿತ್ಯಾಂತ್ ಸಕ್ರೀಯ್ ಆಸ್ಲ್ಲ್ಯಾ ಕಾಥೊಲಿಕ್ ಲೊಕಾಕ್ಯೀ ಜೆರಾಲ್ ಥರಾನ್ ದೇವ್ನಾಗರಿ ಲಿಪಿ ವಳ್ಕಿಚಿ ನ್ಹಂಯ್. ಜೆರಾಲ್ ಥರಾನ್ ವಾಚ್ಪ್ಯಾಂಕ್ ದೇವ್ನಾಗರಿ ಲಿಪಿಂತ್ ಆಸ್ಲ್ಲಿ ಕೊಂಕ್ಣಿ ವಾಚುಂಕ್ ಕಳಿತ್ ನಾ. ಥೊಡೆ ಬರಯ್ಣಾರ್ ಸೊಡ್ಲ್ಯಾರ್ ಹೆರ್ ಜಾಯಿತ್ತ್ಯಾ ಕಾಥೊಲಿಕ್ ಬರಯ್ಣಾರ್ ಸಯ್ತ್ ದೇವ್ನಾಗರಿಂತ್ ಬರಂವ್ಕ್/ವಾಚುಂಕ್ ಕಳಿತ್ ನಾ. ಹಾಂಗಾ ಹಾಫ್ತ್ಯಾಳಿಂ ನೆಮಾಳಿಂ ಧರ್ನ್ ಕನ್ನಡ ಲಿಪಿಂತ್ ಆಸಾತ್. ಜಾಯಿತ್ತ್ಯಾ ಫಿರ್ಗಜ್ಯಾಂನಿ ಫಿರ್ಗಜ್ ಪತ್ರಾಂ ಕಾನಡಿ ಲಿಪಿಂತ್ ಪರ್ಗಟ್ ಜಾಂವ್ಚೆ ಕೊಂಕ್ಣಿ ಬೂಕ್ಯೀ ಕೆನರಾಂತ್ ಬರ್ಯಾನ್ ವಿಕೊನ್ ವೆತಾತ್.
ಅಶೆಂ ಆಮ್ಚ್ಯಾ ಎಕ್ವಟಾಖಾತಿರ್ ಏಕ್ ಭಾಸ್ ಏಕ್ ಲಿಪಿ ಗರ್ಜೆಚಿ ಮ್ಹಳ್ಳೆಂ ಸಾರ್ಕೆಂ ನ್ಹಂಯ್. ಆಮ್ಚ್ಯಾ ಸಂವಿಧಾನಾಂತ್ ಅಲ್ಪ್ಸಂಖ್ಯಾತಾಂತ್ ಜಶಿ ತಾಂಚಿ ಭಾಸ್ ಸಾಂಭಾಳುಂಕ್ ಹಕ್ಕ್ ದಿತಾಗೀ ತಶೆಂಚ್ ತಾಂಚಿ ಲಿಪಿ ಸಾಂಭಾಳುಂಕ್ಯೀ ಹಕ್ಕ್ ದಿತಾ..
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications