ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
1992 ಇಸ್ವೆಂತ್ ಕೊಂಕ್ಣೆಕ್ ಭಾರತಾಚಾ 8 ವ್ಯಾ ವ್ಹೊಳೆರಿಂತ್ ಸ್ಥಾನ್ ದಿಲೆಂ
ಆಯ್ಚೊ ಕೊಂಕ್ಣಿ ಲೋಕ್ ಆನಿ ಆಯ್ಚಿ ಕೊಂಕ್ಣಿ ಪರಿಗತ್
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2004 ಹಾಂತುಂ ಪಯ್ಲೆಂ ಇನಾಮ್ ಜೊಡ್ಲ್ಲೆಂ ಲೇಖನ್]
- ಜೆ. ಬಿ. ಮೊರಾಯಸ್, ಮುಂಬಯ್
ಕೊಂಕ್ಣಿ ಲೋಕ್ ಆನಿ ತಾಂಚ್ಯಾ ಮಾಯ್ಭಾಶೆ ವಿಷಾಂತ್ ವಿಚಾರ್ ಕರ್ತಾನಾ ಭಾರತಾಂತ್ಲ್ಯಾಚ್ ನ್ಹಂಯ್ ಬಗಾರ್ ಸಂಸರಾಂತ್ಲ್ಯಾ ಹೆರಾ ಭಾಶೆಂ ಥಂಯ್ ಬದ್ಲೊನ್ ಯೆಂವ್ಚಿ ಪರಿಗತ್ಯೀ ಆಮಿ ಮತಿಂತ್ ದವ್ರಿಜಾಯ್ ಪಡ್ಟಾ.
ಜೆರಾಲ್ ಥರಾನ್ ಸಾಂಗ್ಚೆಂ ಜಾಲ್ಯಾರ್, ಆಜ್ ಆಮ್ಚ್ಯೊ ಚಡಾವತ್ ಭಾಸೊ ಆನಿ ತಾಂಚೆ ಭಾಶೆಕ್ ಇಂಗ್ಲಿಶಾಚ್ಯಾ ಪ್ರಭಾವಾಂತ್ ಆಯ್ಲ್ಯಾತ್, ಅಶೆಂ ಆಸ್ತಾಂ, ಕೊಂಕ್ಣಿ ಲೊಕಾಚ್ಯಾ ಆನಿ ಭಾಶೆಚ್ಯಾ ಸಮಸ್ಯಾಂಚೆರ್ ಉಜ್ವಾಡ್ ಘಾಲ್ತಾನಾ ಹಿ ಅದ್ಭುತ್ ಜಾಗೃತಿಕ್ ಪರಿಗತ್ ಕುಶಿಕ್ ದವರ್ ಫಕತ್ ಕೊಂಕ್ಣಿ ಲೋಕ್ ಆನಿ ತಾಂಚೆ ಭಾಶೆವಯ್ರ್ ಆಮಿ ಆಮ್ಸೊರಾಚೆಂ ತೀರ್ಪ್ ವೊಡುಂಕ್ ಜಾಯ್ನಾ.
ತರಿಪುಣ್ ಶೆಂಬರ್ ವರ್ಸಾಂ ಆಧಿಂ ಕೊಂಕ್ಣಿಚಿ ಪರಿಗತ್ ಕಶಿ ಅಸ್ಲ್ಲಿ?
ಆಜ್ ತಾಚೆವಯ್ರ್ ಕಿತೆಂ ಬದ್ಲಾವಣ್ ಜಾಲ್ಯಾ? ತ್ಯಾ ಬದ್ಲಾವಣೆವರ್ವಿ ಬರೆಪಣ್ ಜಾಲಾಂ ವ ನಾ?
ಜಾಲಾಂ ಜಾಲ್ಯಾರ್ ಕಿತ್ಲೆಂ?
ಮುಖಾರ್ ಕಿತೆಂ ಕರ್ಯೆತ್?
ಬರೆಪಣ್ ಜಾಂವ್ಕ್ ನಾ ಜಾಲ್ಯಾರ್ ಕಿತ್ಯಾಕ್?
ಹ್ಯಾ ಥೊಡ್ಯಾ ಸವಲಾಂವಯ್ರ್ ಭಾವನಾತ್ಮಕ್ ಜಾಯ್ನಾಸ್ತಾಂ ಥೊಡೊ ವಿಚಾರ್ ಕರ್ಚೆ ಗರ್ಜ್ ದಿಸ್ತಾ. ದೊಳೆ ಉಗ್ತೆ ಕರ್ಚಿ ವರ್ದಿ ಹ್ಯಾಚ್ ಡಿಸೆಂಬರ್ 10 ತಾರಿಕೆಚ್ಯಾ ’ಟ್ಯಾಮ್ಸ್ ಆಫ್ ಇಂಡಿಯಾ’ ಪತ್ರಾಂತ್ ಅಯಿಲ್ಲಿ ಖಬಾರ್ ಇಂಗ್ಲಿಶ್ ಭಾಶೆಚೆರ್ ಏಕ್ ವೆಗ್ಳೊಚ್ ಉಜ್ವಾಡ್ ಘಾಲ್ತಾ.
ಜಾಗತಿಕ್ ಇಂಗ್ಲಿಶಾವಯ್ರ್ ಬರಂವ್ಚೊ ನಾಂವಾಡ್ದಿಕ್ ಬ್ರಿಟಿಶ್ ಲೇಖಕ್ ಡೇವಿಡ್ ಗ್ರ್ಯಾಡ್ಡೊಲ್ ಹಾಣೆ ಮುಖ್ಲ್ಯಾ 50 ವರ್ಸಾಂನಿ ಇಂಗ್ಲಿಶಾಚೆಂ ಭವಿಶ್ಯ್ ಕಶೆಂ ರಾವ್ತಲೆಂ ಹ್ಯಾ ವಿಷಯಾ ವಯ್ರ್ ಏಕ್ ವಿಶೇಸ್ ವರ್ದಿ ತಯಾರ್ ಕೆಲ್ಯಾ. ತ್ಯಾ ವರ್ದೆಚೆಂ ಶಿರೊನಾಂವ್ ಜಾವ್ನಾಸಾ ’The Future of English. ತಾಂತು ತೊ ಮ್ಹಣ್ಟಾ,
"ಆನಿ ಧಾ ವರ್ಸಾಂ ಭಿತರ್ ಸಂಸರಾಂತ್ಲ್ಯಾ 600 ಕೊರೊಡ್ ಲೊಕಾಂತ್ಲೊ ತಿನಾಂತ್ ಏಕ್ ವಾಂಟೊ ಮ್ಹಣ್ಜೆ 200 ಕೊರೊಡ್ ಲೋಕ್ ಇಂಗ್ಲಿಶ್ ಶಿಕ್ತಾಲೊ. ಖರೆಂಚ್ ಜಾವ್ನ್ ಇಂಗ್ಲಿಶ್ ಭಾಸ್ ಮುಖ್ಲ್ಯಾ ಧಾ ವರ್ಸಾಂನಿ ’ಜಾಗತಿಕ್ ಭಾಸ್’ ಮ್ಹಣ್ ವಳ್ಕತೆಲಿ. ಭಾರತಾಚ್ಯಾ ಮಟ್ಟಾಕ್ ಸಾಂಗ್ಚೆ ಜಾಲ್ಯಾರ್, ಯೆಂವ್ಚ್ಯಾ ವರ್ಸಾ 15 ಕೊರೊಡ್ ಭುರ್ಗಿಂ ಪ್ರಾಥಮಿಕ್ ಇಸ್ಕೊಲಾಂನಿ ಇಂಗ್ಲಿಶ್ ಶಿಕ್ತೆಲಿಂ. ಹಾಚೆ ಸಾಂಗಾತಾಚ್ ಗ್ರ್ಯಾಡ್ಡೊಲ್ ಏಕ್ ಚತ್ರಾಯ್ ಸಯ್ತ್ ದಿತಾ. ತೊ ಮ್ಹಣ್ಟಾ, "ಇಂಗ್ಲೆಂಡಾನ್ ಆಪ್ಲೆಂ ಇಂಗ್ಲಿಶ್ ಭಾಶೆಚೆಂ ಸಾಮ್ರಜ್ಯ್ ಸಂಸಾರ್ಭರ್ ವಿಸ್ತಾರಾಯ್ಲೆಂ ಮ್ಹಣ್ ದವ್ಲತ್ ಭೊಗ್ಚಿ ಗರ್ಜ್ನಾ. ಕಿತ್ಯಾಕ್, ಆನಿ 50 ವರ್ಸಾಂನಿ, ಮ್ಹಣ್ಜೆ ಸಾಧಾರಣ್ 2050 ಇಸ್ವೆಭಿತರ್, ತಿ ಶಿಖರಾಕ್ ಪಾವ್ತೆಲಿ. ಆನಿ ತೆದಾಳಾ ತಿಚಿ ದೆಂವ್ಣಿ ಸುರು ಜಾತೆಲಿ. ತಿ ಕಶಿ ಮ್ಹಳ್ಯಾರ್, ತ್ಯಾ ವೆಳಾರ್ ಇಂಗ್ಲಿಶ್ ಶಿಕೊವ್ಚ್ಯಾ ಉದ್ಯಮಾಕ್ ಉತ್ತೇಜನ್ ಆಸ್ಚೆಂನಾ. ಪರಿಣಾಮ್ ಜಾವ್ನ್ ಇಂಗ್ಲಿಶ್ ಶಿಕ್ತೆಲ್ಯಾಂಚೊ ಸಂಖೊ 200 ಕೊರೊಡ್ ಥಾವ್ನ್ 50 ಕೊರೊಡಾಂಕ್ ದೆಂವ್ತಲೊ."
ಹಿ ವರ್ದಿ ಡಿಸೆಂಬರ್ 9 ತಾರಿಕೆರ್ ಇಂಗ್ಲೆಂಡಾಂತ್ಲ್ಯಾ ಎಡಿನ್ಬರೊ ಶ್ಹರಾಂತ್ ಚಲ್ಲ್ಲ್ಯಾ ಎಕಾ ಸಮ್ಮೇಳನಾಂತ್ ಮಾಂಡ್ಲಿ. ಸಮ್ಮೇಳನಾಂತ್ ಇಂಗ್ಲೆಂಡಾಚ್ಯಾ ಶಿಕ್ಷಣ್ ಮಂತ್ರಿನ್ ಇಂಗ್ಲೆಂಡಾಚ್ಯಾ ಲೊಕಾಕ್ ಚತ್ರಾಯ್ ಸಾಂಗ್ಲಿ ಕಿ ಇಂಗ್ಲಿಶ್ ಭಾಶೆವಯ್ರ್ ಮಾತ್ರ್ ಹೊಂದ್ವೊನ್ ರಾಂವ್ಚೆಂ ಆನಿ ಹೆರ್ ಭಾಶೆಂಕ್ ಅಲಕ್ಷಾ ಕರ್ಚೆಂ ಅಪಾಯ್ಕಾರಿ ಮ್ಹಣ್. ಗ್ರ್ಯಾಡ್ಹೊಲಾಚ್ಯೆ ಅಭಿಪ್ರಾಯೆ ಪ್ರಮಾಣೆ, ಮುಖ್ಲ್ಯಾ ವರ್ಸಾಂನಿ ಸಭಾರ್ ಸ್ವಾಭಿಮಾನಿ ಭಾಸೊ ಪ್ರಾಮುಖ್ಯತ ಜೊಡ್ಟೆಲ್ಯೊ. ಹ್ಯೊ ಥೊಡ್ಯೊ ಜಾವ್ನಾಸಾತ್ ಚೈನಿಸ್, ಆರೇಬಿಕ್, ಸ್ಪ್ಯಾನಿಶ್ ಆನಿ ಜರ್ಮ್ನ್.
ಪುಣ್ ಅಜ್ಯಾಪ್ ಮ್ಹಳ್ಳೆಬರಿ, ಹಿಂದಿ ಭಾಸ್ ಸೈತ್ ಮುಖ್ಲ್ಯಾ ವರ್ಸಾಂನಿ ಏಶ್ಯಾಂತ್ಲಿ ಏಕ್ ಪ್ರಮುಖ್ ಭಾಸ್ ಮ್ಹ್ಣ್ ವಯ್ರ್ ಯೆತೆಲಿ ಮ್ಹಣ್ ತೊ ಮ್ಹಣ್ಟಾ. ಆಮ್ಕಾಂ ಕೊಂಕ್ಣಿ ಲೊಕಾಕ್ ಹಾಂತುಂ ಕಿತೆಂ ಲಿಸಾಂವ್ ಆಸಾ? ಸಂಸಾರಾಂತ್ ಖಂಚೀಯ್ ಭಾಸ್ ಹೆರಾಂ ಭಾಶೆಂಕ್ ಚಿಡ್ಡುನ್ ಚಡ್ ಪ್ರಾಮುಖ್ಯತಾ ಜೊಡುಂಕ್ ಪಾವ್ಲಿ ಜಾಲ್ಯಾರ್ ತಾಂತುಂ ಬರ್ಯಾ ತಿತ್ಲೆಂಚ್ ವಾಯ್ಟ್ಯೀ ಜಾಂವ್ಕ್ ಸಾಧ್ಯ್ ಆಸಾ. ಸಂಸಾರಾಂತ್ ಹಜಾರೊಂ ಜನಾಂಗಾಂನಿ ಉಲಂವ್ಚ್ಯೊ ಹಜಾರೊಂ ಭಾಸೊ ಆಸಾತ್. ಹರ್ಯೆಕ್ ಭಾಸ್ - ಜಾಂವ್ದಿ ತಿ ಕೊರೊಡ್ ಲೊಕಾನ್ ಉಲಂವ್ಚಿ ಯಾ ಶೆಂಬರ್ ಲೊಕಾನ್ - ತಿ, ತ್ಯಾ ತ್ಯಾ ಲೊಕಾಚ್ಯಾ ಖಾಸ್ ಸಂಸ್ಕ್ರತಿಚೆಂ ಏಕ್ ಪ್ರತೀಕ್.
ಸಂಸ್ಕ್ರತಿ ಮ್ಹಳ್ಯಾರ್ ಕಿತೆಂ?
ಸಂಸ್ಕ್ರತಿ ಜಾವ್ನಾಸಾ ಮನ್ಶಾನ್ ಎಕಾ ಸಮುದಾಯಾಂತ್ ಹಜಾರೊಂ ವರ್ಸಾಂ ಜಿಯೆವ್ನ್ ಆಸ್ತಾನ ವಿಕಸಿತ್ ಜಾವ್ನ್ ಯೆಂವ್ಚಿ ಜಿಣ್ಯೆರೀತ್. ಜಶೆಂ, ಕನ್ಶಾಚಿಂ ನಾಂವಾಂ ವೆವೆಗ್ಳಿಂ ಆಸ್ತಾತ್ ಆನಿ ತಾಚಿ ವಳಕ್ ಆಮ್ಕಾಂ ತಾಚ್ಯಾ ನಾಂವಾನ್ ಕಳ್ಟಾ ತಶೆಂಚ್ ಎಕಾ ಸಮುದಾಯಾಚಿ ವ ಜನಾಂಗಾಚಿ ವಳಕ್ ತಾಚ್ಯಾ ಭಾಶೆವರ್ವಿಂ, ಸಂಸ್ಕ್ರತಿ ವರ್ವಿಂ ಕಳ್ಟಾ. ಚಿಂತ್ಯಾಂ, ಜರ್ತರ್ ಫಾಲ್ಯಾಂ, ಜಾದುಗಾರಾಚ್ಯಾ ಬೆತಾನ್ ಸಗ್ಳ್ಯೊ ಭಾಸೊ ಆನಿ ಸಂಸ್ಕ್ರತಿ ನಪಂಯ್ಚ್ ಜಾಲ್ಯೊ ಆನಿ ಎಕ್ಚ್ಚ್ ಭಾಸ್ ಉರ್ಲಿ, ತರ್ ಜಿಣ್ಯೆಂತ್ ಕಿತೆ ಉರ್ಲೆಂ? ’Variety is the Spice of Life’ ಮ್ಹಣ್ ಇಂಗ್ಲಿಶಾಂತ್ ಏಕ್ ಸಾಂಗ್ಣಿ ಆಸಾ.
ದೆವಾನ್ ಸಂಸಾರ್ ರಚ್ತಾನಾ ವಿವಿಧತಾಯೀ ರಚ್ಲ್ಯಾ. ಆಮ್ಚ್ಯಾ ಭಂವ್ತಣಿಚ್ಯಾ ಪ್ರಕೃತೆವಯ್ರ್ ಆಮಿ ದೀಷ್ಟ್ ಘಾಲುಂ ಜಾಲ್ಯಾರ್ ಹೆಂ ರುಜು ಜಾತಾ. ವಿವಿಧತೆಂತ್ ಆಸಾ ಜಿಣ್ಯೆಚೊ ರಂಗ್, ಮನ್ಶ್ಯಾಚ್ಯಾ ಜಿಣ್ಯೆಂತ್ಲಿ ವಿವಿಧತಾ ಗೆಲಿ ಜಾಲ್ಯಾರ್ ಮನಿಸ್ ಫಕತ್ತ್ ಏಕ್ ಯಂತ್ರ್ ಜಾತಲೊ ಮ್ಹಣ್ಟಾತ್ ಯಾಂತ್ರಿಕ್ ಮನಿಸ್ (Robot) ಮಾಯ್ಭಾಸ್ ಆನಿ ವ್ಯಾವರಿಕ್ ಭಾಸ್ ಹೊ ವಿವರ್ ಕಿತ್ಯಾಕ್ ದೀಜಾಯ್ ಪಡ್ಲೊ ಮ್ಹಳ್ಯಾರ್, ನ್ಹಂಯ್ಚ್ ಸಭಾರ್ ಕೊಂಕ್ಣಿ ಲೋಕ್ ಬಗಾರ್ ಹೆರ್ ಭಾಶಿಕ್ ಸೈತ್ ಸಂಸಾರಾಂತ್ ಇಂಗ್ಲಿಶ್ ಎಕ್ಚ್ಚ್ ಭಾಸ್ ಆಸ್ಲ್ಯಾರ್ ಪುರೊ ಮ್ಹಣ್ಟಾತ್.
ಸಂಸ್ಕ್ರತಿ ತಾಂಕಾಂ ಪಡೊನ್ ವ್ಹಚೊಂಕ್ ನಾ. ಜೀಣ್ ಮ್ಹಳ್ಯಾರ್ ಸುಖಾ-ಸಂಪತ್ತಿ ಆನಿ ಖುಶಾಲಾಯ್ ಮ್ಹಳೆಂ ಎಕ್ಚ್ ತಾಂಚ್ಯಾ ಮತಿಂತ್ ಆಸ್ತಾ. ಕಿತ್ಲೆಂ ಅಪಾಯ್ಕಾರಿ ಚಿಂತಾಪ್ ಹೆಂ! ಅಸಲೆಂ ಚಿಂತಾಪ್ ಬಳ್ ಜಾಂವ್ಕ್ ಕಾರಣ್ ಕಿತೆಂ ಮ್ಹಳ್ಯಾರ್, ಆಮಿ ಮಾಯ್ಭಾಶೆಚೊ (ಕೊಂಕ್ಣಿ) ಪಾತ್ರ್ ಆನಿ ವ್ಯಾವಹಾರಿಕ್ ಭಾಷೆಚೊ (ಇಂಗ್ಲಿಶ್) ಪಾತ್ರ್ ಸಂಪೂರ್ಣ್ ವೆವೆಗ್ಳೆ ಮ್ಹಳ್ಳೆಂ ವಿಸರ್ಲ್ಯಾಂವ್. ಹಿ ಗುಸ್ಪೊಡ್ ಮತಿಂತ್ ಉಬ್ಜಾಲ್ಲ್ಯಾನ್ ಇಂಗ್ಲಿಶ್ ಭಾಸ್ ಏಕ್ ಶಿಕ್ಲ್ಯಾರ್ ಜಿಣ್ಯೆಂತ್ ಹೆರ್ ಖಂಚ್ಯಾಯೀ ಭಾಶೆಚಿ ಗರ್ಜ್ ನಾ ಮ್ಹಣ್ ಆಮಿ ಚಿಂತುಂಕ್ ಲಾಗ್ಲ್ಯಾಂವ್.
ಆಮ್ಚಿ ಮಾಯ್ಭಾಸ್ ಕೊಂಕ್ಣಿ ಜಾವ್ನಾಸಾ ಜಿ ಆಮಿ ಆವಯ್ಚ್ಯಾ ಉಸ್ಕ್ಯಾರ್ ಶಿಕ್ತಾಂವ್; ಜಶೆಂ ಹಾಂವೆಂ ವಯ್ರ್ ಸಾಂಗ್ಲಾಂ ಆಮ್ಚಿ ಮಾಯ್ಭಾಸ್ ಜಾವ್ನಾಸಾ ಆಮ್ಚ್ಯಾ ಸಂಸ್ಕೃತಿಚೆಂ ಪ್ರತೀಕ್. ಮಾಯ್ಭಾಸ್ ಘರಾಂತ್, ಆಸ್ಪಾಸ್ ಆನಿ ತಿ ಭಾಸ್ ಉಲಂವ್ಚ್ಯಾ ಹೆರಾ ಲೊಕಾಲಾಗಿಂ ಸಂಪರ್ಕ್ ದವರ್ಚೆಂ ಮಾಧ್ಯಮ್. ತ್ಯಾ ಭಾಶೆಂತ್ ಆಮಿ ವಾಚುಂಕ್ ಆನಿ ಬರಂವ್ಕ್ ಶಿಕ್ಚೆಂಯೀ ಗರ್ಜೆಚೆಂ. ಕಿತ್ಯಾಕ್, ತ್ಯಾ ಭಾಶೆಂತ್ಲೆಂ ಸಾಹಿತ್ಯ್, ಜಾಣ್ವಾಯ್, ಮಾಹೆತ್ ಆನಿ ದೆಣೆಂ ಆಸ್ಲ್ಲ್ಯಾಂನಿ ತ್ಯಾ ಭಾಶೆಂತ್ ಸಾಹಿತ್ಯ್ ಆನಿ ಹೆರ್ ವಿಷಯ್ ಬರಂವ್ಕ್. ವ್ಯಾವರಿಕ್ ಭಾಸ್ ಉಂಚ್ಲ್ಯಾ ಶಿಕ್ಪಾಕ್, ಹೆರಾಂ ಭಾಶಿಕಾಂಕಡೆ ಸಂಪರ್ಕ್ ಕರ್ಚ್ಯಾಕ್ ಆನಿ ವ್ಯವಹಾರಾ ಖಾತಿರ್ ವಾಪ್ರುಂಕ್. ಆಶೆಂ ಮಾಯ್ಭಾಶೆಚೊ ಆನಿ ವ್ಯಾವಹಾರಿಕ್ ಭಾಶೆಚೊ ಪಾತ್ರ್ ನಿರ್ದಿಷ್ಟ್ ಥರಾನ್ ವೆಗ್ಳೆ ಆಸಾತ್.
ಕೊಂಕ್ಣಿ ಲೋಕ್ ಅಧಿಕಾಂಶ್ ಜಾವ್ನ್ ಮಾಹಾರಾಷ್ರ, ಕರ್ನಾಟಕ ಆನಿ ಕೇರಳ ರಾಜ್ಯಾಂಚ್ಯಾ ಕರಾವಳಿ ಪ್ರದೇಶಾಂನಿ ಆನಿ ಗೊಂಯಾಂತ್ (ಸಗ್ಳ್ಯಾ ರಾಜ್ಯಾಂತ್) ಕೇಂದ್ರೀಕ್ರತ್ ಜಾಲ್ಯಾತ್. ತಶೆಂಚ್, ದೆಶಾಚ್ಯಾ ವಿವಿಧ್ ಭಾಗಾಂನಿಂ ಲ್ಹಾನ್ ಲ್ಹಾನ್ ಸಂಖ್ಯಾಂನಿ ತೆ ಶಿಂಪ್ಡೊನ್ ಆಸಾತ್. ದೆಶಾಭಾಯ್ರ್ ಗಲ್ಫ್ ರಾಷ್ರಾಂನಿಂ, ಆಮೆರಿಕಾಂತ್, ಇಂಗ್ಲೆಂಡಾಂತ್, ಕೆನಡಾಂತ್, ಆಸ್ಟ್ರೇಲಿಯಾಂತ್, ಆಫ್ರಿಕಾಂತ್ ಆನಿ ಹೆರ್ ಗಾಂವಾಂನಿ ತಾಂಚಿ ವಸ್ತಿ ಆಸಾ. ಹಿ ಭಾಯ್ಲ್ಯಾ ಗಾಂವ್ಚಿ ವಸ್ತಿ ಮುಖ್ಯ ಜಾವೆ ಆಪ್ಲೊ ಫುಡಾರ್ ಉಜ್ವಲ್ ಕರ್ಚ್ಯಾ ಉದ್ದೇಶಾನ್ ಕೆಲ್ಲಿ ಆನಿ ಕರ್ನ್ ಆಸ್ಚಿ ಮ್ಹಣ್ಯೆತ್. ಹ್ಯಾ ಕೊಂಕ್ಣಿ ಲೊಕಾ ಮಧೆಂ ಗೊಂಯ್ಚೆ ಆನಿ ಕರ್ನಾಟಕಾಚೆ ಕೊಂಕ್ಣಿ ಲೋಕ್, ತಾಂತುಂಯೀ ಕ್ರಿಸ್ತಾಂವ್ ಲೋಕ್ ಚಡ್ ಸಂಖ್ಯಾನ್ ಆಸಾತ್ ಮ್ಹಳ್ಯಾರ್ ಚೂಕ್ ಜಾಯ್ಶಿನಾ. ಹೆರಾ ಧರ್ಮಾಂಚೆ, ಜಾತಿಚೆ, ಜನಾಂಗಾಂಚೆ ಲೋಕ್ಯೀ ಆಸಾತ್ ಪುಣ್ ಉಣ್ಯಾ ಸಂಖ್ಯಾನ್.
ಕೊಂಕ್ಣಿ ಲೊಕಾಚಿ ವಿಶೇಷಾತಾ ಜೆರಾಲ್ ಥರಾನ್ ಸಾಂಗ್ಚಿ ಜಾಲ್ಯಾರ್, ತಾಂಚೆ ಥಂಯ್, ಆಪ್ಣಾಯಿಲ್ಲ್ಯಾ ಕಾಮಾಚಿ ಕುಶಲತಾ, ಕಷ್ಟಿ ಮನೋಭಾವ್, ಜಾಣ್ವಾಯ್, ಶಿಕಾಪ್ ಆಸಾ. ಆಪ್ಣೆ ಆರ್ಥಿಕ್ ಮಟ್ಟಾರ್ ವಯ್ರ್ ಯೇಜಾಯ್, ಸಮಾಜೆಂತ್ ನಾಂವ್ ಜೊಡಿಜಾಯ್ ಮ್ಹಳ್ಳಿ ಆಕಾಂಕ್ಷಾ ತಾಂಕಾಂ ಆಸಾ. ಫಕತ್ತ್ ಪಶ್ಚಾತ್ತಾಪಾಚಿ ಗಜಾಲ್ ಮ್ಹಳ್ಯಾರ್, ತೆ ಆಪ್ಲ್ಯಾ ಮಾಯ್ಭಾಶೆಥಂಯ್ ಚಡ್ ಅಭಿಮಾನ್ ದಾಕಯ್ನಾಂತ್. ಆಯ್ಲೆವಾರ್ಚ್ಯಾ ವರ್ಸಾಂನಿ ಕಂಪ್ಯೂಟರ್ ಆನಿ ಅಂತರ್ಜಳಾಚೊ ಪ್ರವೇಶ್ ಜಾಲ್ಯಾ ಉಪ್ರಾಂತ್ ಮಾತ್ರ್ ಕೊಂಕ್ಣಿ ವಿಷಾಂತ್ ಹುಸ್ಕೊ ಆಸ್ಲ್ಲ್ಯಾ ಸಬಾರ್ ಶಿಕ್ಪಿ ಯುವಜಣಾಂನಿ ಕೊಂಕ್ಣಿ ಭಾಸ್, ಸಾಹಿತ್ಯ್ ಆನಿ ಸಂಸ್ಕ್ರತಿ ವಯ್ರ್ ಅಂತರ್ಜಾಳ್ ಟಿಕಾಣೆ (Websites) ಸುರು ಕರ್ನ್ ಸಂಸಾರ್ಭರ್ ವಿಸ್ತಾರ್ಲ್ಲ್ಯಾ ಮ್ಹಣ್ಯೆತ್. ಹಾಂತುಂ ಇಂಗ್ಲಿಶ್ ಭಾಶೆಚೊ ಪಾತ್ರ್ ವ್ಹಡ್ಲೊ ಆಸಾ ತರಿ, ಹೊ ಪಾತ್ರ್ ಕೊಂಕ್ಣಿ ಭಾಶೆಥಂಯ್ ಆಸಕ್ತ್ ಉಬ್ಜಂವ್ಚೊ ಜಾಲ್ಲ್ಯಾನ್ ಗರ್ಜೆಚೊ ಜಾವ್ನಾಸಾ. ಲಿಪಿಚಿ ಸಮಸ್ಯಾ ಆಮ್ಚಿ ವ್ಹಡ್ಲಿ ಸಮಸ್ಯಾ ಜಾವ್ನಾಸಾ ಲಿಪಿಚಿ. ಖಂಚ್ಯಾಯ್ ಭಾಶೆಚೆಂ ಸಾಹಿತ್ಯ್ ತ್ಯಾ ಭಶೆಚ್ಯಾ ಸರ್ವ್ ಲೊಕಾಪರ್ಯಾಂತ್ ಪಾವಾಜಾಯ್ ತರ್ ತ್ಯಾ ಭಾಶೆಕ್ ಏಕ್ ಲಿಪಿ ಆಸೊಂಕ್ ಜಾಯ್.
’ಎಕಾ ಭಾಶೆಕ್ ಏಕ್ ಲಿಪಿ’ ಮ್ಹಳ್ಳೊ ಸಿದ್ಧಾಂತ್ ಆಮಿ ಮಾಂದ್ತಾಂವ್ ಜಾಲ್ಯಾರ್ ಹ್ಯಾ ದಿಶೆನ್ ಆಮಿ ವಾವುರ್ಚೆಂ ಆಮ್ಚೆಂ ಕರ್ತವ್ಯ್ ಜಾವ್ನಾಸಾ. ತೆದ್ನಾ ತ್ಯಾ ಭಾಶೆಚೆಂ ಸಾಹಿತ್ಯ್ ಚಡ್ ವೆಗಾನ್ ವಿಕಸಿತ್ ಜಾತಾ. ಚಾರಿತ್ರಿಕ್ ಕಾರಣಾಂಕ್ ಲಾಗೊನ್ ಆಮಿ ಕರ್ನಾಟಕ ಆನಿ ಕೇರಳಾಂತ್ ಕನ್ನಡ ಆನಿ ಮಲ್ಯಾಳಮ್ ಲಿಪಿ ವಾಪ್ರಿಜಾಯ್ ಪಡ್ಲಿ. ಕೊಂಕ್ಣಿಚೆಂ ಮೂಳ್ಪೀಠ್ ಮ್ಹಣ್ಚ್ಯಾ ಗೊಂಯಾಂತ್ ಸೈತ್ ದೋನ್ ಲಿಪಿ (ನಾಗರಿ ಆನಿ ರೋಮಿ) ಪ್ರಚಲಿತ್ ಆಸಾತ್. ಭಟ್ಕಳ್ಚೆ ಪಂಚ್ವೀಸ್ ಹಜಾರ್ ನವಾಯತ್ (ಮುಸ್ಲಿಮ್) ಕೊಂಕ್ಣಿ ಬರಂವ್ಕ್ ಫಾರ್ಸಿ/ಉರ್ದು ಲಿಪಿ ವಾಪರ್ತಾತ್. ಆಶೆಂ ಆಮ್ಚೆಂ ಸಾಹಿತ್ಯ್ ವೆವೆಗ್ಳ್ಯಾ ಲಿಪಿಂಚ್ಯಾ ವೊಣ್ತಿಂಭಿತರ್ ಬಂದೆಂತ್ ಆಸಾ ಮ್ಹಣ್ಯೆತ್.
ಆಮ್ಚಿ ಸಾಮಾನ್ಯ್ ಲಿಪಿ ರೋಮಿ ಜಾಯ್ಜಾಯ್ ಮ್ಹಳ್ಳೊ ವಾದ್ ಆಯ್ಲೆವಾರ್ ಥೊಡೆಕಡೆಥಾವ್ನ್ ಆಯ್ಕೊಂಕ್ ಸುರು ಜಾಲಾ. ಸಂಸಾರ್ಭರ್ ಲೋಕ್ ಇಂಗ್ಲಿಶ್ ಭಾಶೆಕ್ ರೋಮಿ ಲಿಪಿ ವಾಪರ್ತಾತ್ ಆನಿ ಭುರ್ಗಿಂ ಲ್ಹಾನ್ ಪ್ರಾಯೆರ್ಚ್ ತಿ ಲಿಪಿ ಇಸ್ಕೊಲಾಂತ್ ಶಿಕ್ತಾತ್ ಜಾಲ್ಲ್ಯಾನ್ ತಿಚ್ಚ್ ಲಿಪಿ ಕೊಂಕ್ಣಿಕ್ ವಾಪರ್ಲ್ಯಾರ್ ಕೊಂಕ್ಣಿ ಭಾಶೆಕ್ ಆನಿ ಸಾಹಿತ್ಯಾಕ್ ಚಡ್ ಫಾಯ್ದೊ ಆಸಾ ಮ್ಹಣ್ ರೋಮಿ ಲಿಪಿಚೆ ಸಮರ್ಥಕ್ ಸಾಂಗ್ತಾತ್.
ಇಂಗ್ಲಿಶ್ ಭಾಶೆಚ್ಯಾ ಅಕ್ಷರ್ ಮೆಳಾವಣೆಂತ್ (Spelling) ಆನಿ ಕೊಂಕ್ಣಿ ಭಾಸ್ ರೋಮಿ ಲಿಪಿಂತ್ ಬರಯ್ತಾನಾ ವಾಪಾರ್ಚ್ಯಾ ಅಕ್ಷರ್ ಮಿಳಾವಣೆಂತ್ ರಾತ್-ದೀಸ್ ಫರಕ್ ಆಸಾ. ನಾಗರಿ ವ ಕನ್ನಡ್ ಲಿಪಿಂತ್ ಬರಯ್ತಾನಾ ಆಯ್ಕಾಲ್ಲ್ಯಾ ಬರಿ ಬರಂವ್ಚಿ ರೀತ್ (Phonetic) ಆಮಿ ಆಪ್ಣಾಯ್ತಾಂವ್ ಪುಣ್ ಕೊಂಕ್ಣಿ ಭಾಸ್ ರೋಮಿ ಲಿಪಿಂತ್ ಬರಯ್ತಾನಾ ವೆಗ್ಳಿಂಚ್ ನಿಯಮಾಂ ಪಾಳಿಜಾಯ್ ಪಡ್ಟಾತ್. ಹಾಕಾ ’ಬೊಲಿ’ ಮ್ಹಣ್ತಾತ್. ಹೆಂ ಇಸ್ಕೊಲಾಂತ್ ಶಿಕ್ಚ್ಯಾ ಭುರ್ಗ್ಯಾಂಕ್ ಸುಲಭ್ ನ್ಹ್ಂಯ್.
ಕರ್ನಾಟಕಾಂತ್ ಕೊಂಕ್ಣಿ ಭಾಶೆಕ್ ಲಗ್ಭಗ್ ಶೆಂಬರ್ ಪ್ರತಿಶತ್ ಕನ್ನಡ್ ಲಿಪಿ ವಾಪರ್ತಾತ್ ಮ್ಹಳ್ಯಾರ್ ಚೂಕ್ ಜಾಯ್ಶಿನಾ. ಕರ್ನಾಟಕಾಂತ್ಲೊ ಕೊಂಕ್ಣಿ ಲೋಕ್ ಚಾರಿತ್ರಿಕ್ ಕಾರಣಾಂತ್ ಲಾಗೊನ್ ಕನ್ನಡ ಲಿಪಿ ವಾಪರ್ತಾತ್. ವೆವೆಗ್ಳ್ಯಾ ಕಾರಣಾಂಕ್ ಲಾಗೊನ್ ಗೊಂಯಾಂಥಾವ್ನ್ ದಕ್ಷಿಣಾಕ್ ಕೊಂಕ್ಣಿ ಲೋಕ್ ನಿವಾಸಾಂತರ್ (Migration) ಜಾತಾನಾ ಕರ್ನಾಟಕಾಕ್ ಆಯಿಲ್ಲ್ಯಾ ಕೊಂಕ್ಣಿ ಲೊಕಾಕ್ ಇಸ್ಕೊಲಾಂತ್ ಕನ್ನಡ ಮಾಧ್ಯಮಾಂತ್ ಶಿಕಾಜಾಯ್ ಪಡ್ಲೆಂ ಆನಿ ಕೊಂಕ್ಣಿ ಇಸ್ಕೊಲಾಂ ವ ಕೊಂಕ್ಣಿ ಶಿಕ್ಚಿ ವೆಗ್ಳಿ ಮಾಂಡಾವಳ್ ನಾತ್ಲ್ಲ್ಯಾನ್ ಕನ್ನಡ್ ಲಿಪಿಚ್ ತಾಣಿಂ ಕೊಂಕ್ಣಿ ವಾಪರ್ಲಿ. ಹ್ಯಾಚ್ ಕಾರಣಾಕ್ ಲಾಗೊನ್ ಕೇರಳಾಂತ್ ಕೊಂಕ್ಣಿ ಭಾಶೆಕ್ ಮಲಯಾಳಂ ಲಿಪಿಚೊ ವಾಪರ್ ಜಾಲೊ. (ಪುಣ್ ಆತಾಂ ತೆ ವ್ಹಡ್ ಪ್ರಮಾಣಾರ್ ನಾಗರಿ ಕುಶಿನ್ ಪರ್ತಾಲ್ಯಾತ್).
ಆತಾಂ, ನಾಗರಿ ಕೊಂಕ್ಣಿಚಿ ಅಧಿಕ್ರತ್ ಲಿಪಿ ಮ್ಹಣ್ ಕಶಿ ಉಬಿ ಜಾಲಿ ಮ್ಹಳ್ಳೆಂ ಸವಾಲ್ ಉಬ್ಜಾತಾ. 1975 ಥಾವ್ನ್ 1992 ಪರ್ಯಾಂತ್ಲ್ಯಾ 17 ವರ್ಸಾಂನಿ ಕೊಂಕ್ಣಿಕ್ ತೀನ್ ಮಹತ್ವಾಚ್ಯೊ ಮಾನ್ಯತಾಯೊ ಮೆಳ್ಳ್ಯೊ. 1975 ವರ್ಸಾ ಕೊಂಕ್ಣಿ ಏಕ್ ಸ್ವತಂತ್ರ್ ಆನಿ ಸಾಹಿತಿಕ್ ಮ್ಹಣ್ ಕೇಂದ್ರ್ ಸಾಹಿತ್ಯ್ ಎಕಾಡೆಮಿಚಿ ಮಾನ್ಯಾತಾ, 1987 ವರ್ಸಾ ತಿ ಗೊಂಯ್ಚಿ ರಾಜ್ಭಾಸ್ ಮ್ಹಣ್ ಮಾನ್ಯತಾ ಆನಿ ನಿಮಾಣಿ ಮಾನ್ಯತಾ 1992 ವರ್ಸಾ ಕೇಂದ್ರ್ ಸರ್ಕಾರಾನ್ ಕೊಂಕ್ಣೆಕ್ ಸಂವಿಧಾನಾಚ್ಯಾ ಆಟ್ವ್ಯೆ ವೊಳಿಂತ್ ಮೆಳವ್ನ್ ದಿಲಿ. ಹ್ಯೊ ಮಾನ್ಯತಾಯೊ ಜೊಡ್ಚ್ಯಾ ಚಳ್ವಳೆಂತ್ ಆಖಿಲ್ ಭಾರತೀಯ್ ಕೊಂಕ್ಣಿ ಪರಿಶದ್ ವಿಶೇಸ್ ಪಾತ್ರ್ ಖೆಳ್ಳ್ಯಾ.
ಪುಣ್ ಹ್ಯಾ ಚಳ್ವಳಿಚಿ ಫುಡ್ಕಾಯ್ ನಾಗರಿ ಲಿಪಿಕ್ ಪಾಟಿಂಬೊ ದಿಂವ್ಚ್ಯಾ ಗೊಂಯ್ಕಾರ್ ಕೊಂಕ್ಣ್ಯಾಂನಿ ಆಪ್ಲ್ಯಾ ಮುಟಿಂತ್ ಧರ್ಲ್ಲಿ. ಹೆಂ ಸತ್ ನೆಗಾರ್ ಕರುಂಕ್ ಜಾಯ್ನಾ ಕಿ ತ್ಯಾ ತೆಂಪಾರ್ ರೋಮಿ ಲಿಪಿಕ್ ಜಾಂವ್, ಕನ್ನಡ ಲಿಪಿಕ್ ಜಾಂವ್ ಕೊಂಕ್ಣಿಚಿ ಅಧಿಕೃತ್ ಲಿಪಿ ಕರಿಜಾಯ್ ಮ್ಹಳ್ಳೊ ಆವಾಜ್ ಕೊಣೆಂಯ್ ಉಟಂವ್ಕ್ ನಾ ಆನಿ ಉಟಯ್ಲಾ ಜಾಲ್ಯಾರ್ ತೊ ಭೋವ್ ಕ್ಷೀಣ್ ಆಸ್ಲ್ಲೊ ಮ್ಹಣ್ಯೆತ್.
ಆಮ್ಚೊ ಶ್ರೇಷ್ಟ್ ಕವಿ ಆನಿ 92 ವರ್ಸಾಂ ಆದಿಂ ಸುರು ಜಾಲ್ಲ್ಯಾ ’ಕೊಂಕ್ಣಿ ದಿರ್ವೆಂ; ನೆಮಾಳ್ಯಾಚೊ ಪ್ರಥಮ್ ಸಂಪಾದಕ್ ಲುವಿಸ್ ಮಸ್ಕರೆಂಜಾನ್ 1938 ವರ್ಸಾ ಫಾಯ್ಸ್ ಜಾಲ್ಲ್ಯಾ ’ಕೊಂಕ್ಣಿ ದಿರ್ವ್ಯಾ’ಚ್ಯಾ ರುಪ್ಯೋತ್ಸವ್ ಅಂಕ್ಯಾಂತ್ ನಾಗರಿ ಆನಿ ರೋಮಿ ಲಿಪಿ ವಿಷಾಂತ್ ಬರಯಿಲ್ಲಿಂ ಉತ್ರಾಂ ಭೋವ್ ಮಹತ್ವಾಚಿಂ ಆನಿ ಗುಮಾನ್ ದಿಂವ್ಚೆ ತಸಲಿಂ ಜಾವ್ನಾಸಾತ್. ’ಕೊಂಕ್ಣಿ ಲಿಖಿತಾಂಚಿ ವಾಡಾವಳ್’ ಹ್ಯಾ ಲೇಖನಾಂತ್ (ಪಾನ್ 22) ತೊ ಮ್ಹಣ್ಟಾ:
ಕೊಂಕ್ಣಿ ಭಾಶೆಕ್ ತಿಚಿಂಚ್ ಸಂಯ್ಬಾಚಿ ದೇವನಾಗರಿ ಅಕ್ಷರಾಂ ಪೊರ್ತುನ್ ಆಧಾರಿಜಾಯ್ ಮ್ಹಳ್ಳಿ ಸಭಾರ್ ಜಣಾಂಚಿ ಆಪೇಕ್ಷಾ........ ದ್ರಾವಿಡ್ ಕುಳಿಯೆಚಾ ತುಳು, ಕಳಿಯಾಳಿ, ಜಾಂದ್ಡಿ, ತಮ್ಳು, ತೆಲುಗು ಭಾಸಾಂಕ್ ಆನಿ ಆರ್ಯ ಕುಳಿಯೆಚಾ ಸಂಸ್ಕ್ರತ್, ಬಂಗಾಳಿ, ಹಿಂದಿ, ಗುಜರಾತಿ, ಮರಾಠಿ, ಕೊಂಕ್ಣಿ ಭಾಸಾಂಕ್ ಸಂಯ್ಬಾನ್ ಸಂಬಂಧ್ ನಾತ್ಲ್ಲ್ಲ್ಯಾ ವೆಳಾರ್, ಆಮಿ ಕಾಂದ್ಡಿ ಅಕ್ಷರಾಂ ಕೊಂಕ್ಣಿ ಭಷೆಕ್ ಉಪಯೋಗ್ಸಿಲ್ಯಾರ್, ಆರ್ಯ ರಂಗಾಚ್ಯಾ ಗೊರ್ಯಾ ಚಲಿಯೆಕ್ ದ್ರಾವಿಡ್ ರಂಗಾಚೊ ಕಾಳೊ ನವ್ರೊ ಸೈರಿಕ್ ಕೆಲ್ಲ್ಯಾ ಬರಿ ದಿಸ್ತಾ.....
ಕನ್ನಡಾಚ್ಯಾ ಕೊಂಕ್ಣಿ ಉಲಂವ್ಚಾ ಸರ್ವ್ ಭುರ್ಗ್ಯಾಂಕ್ ಕಾಂದ್ಡ್ಯಾ ಬದ್ಲಾಕ್ ಎಕ್ಚ್ಚ್ ಹಿಂದಿ ಯಾ ಮರಾಠಿ ಭಾಸ್ ಶಿಕೊಂಕ್ ಕರಿಜಾಯ್. ಕಾಂದ್ಡ್ಯಾ ಪ್ರಾಸ್ ಹ್ಯೊ ಭಾಸೊ ಆಮ್ಚಾ ಭುರ್ಗ್ಯಾಂಕ್ ಶಿಕೊಂಕ್ ಸಲಿಸ್ ಜಾತೆಲ್ಯೊ. ತರಿಕಿ, ಹಿ ಸಂಗತ್ ಸದ್ದ್ಯಾಕ್ ಸಾಧ್ಯ್ ಜಾಂವ್ಚಿ ಮಾಕಾ ದಿಸಾನಾ. ದೆಕುನ್ ಮುಖಾರ್ಸುನ್ ಮಸ್ಕರೆಂಜ್ ಮ್ಹಣ್ಟಾ... ಆಮ್ಚೆ ಭಾಷೆಕ್ ಗೊಂಯ್ಕಾರಾಂಬರಿ ರೋಮನ್ ಅಕ್ಷರಾಂಚ್ ಉಪಯೋಗ್ಸುಂಚಿಂ ಬರಿಂ. 60-70 ವರ್ಸಾಂ ಆದಿಂ ಜಾಲ್ಯಾರಿ ಮಂಗ್ಳುರಾಂತ್ ಅಸಲೆಂ ವಿಶಾಲ್ ಮನಾಚೆಂ ಚಿಂತಾಪ್ ಆಸ್ಲ್ಲೆಂ ಮ್ಹಳ್ಳ್ಯಾಕ್ ಲುವಿಸ್ ಮಸ್ಕರೆಂಜಾಚೆಂ ಹೆಂ ಲೇಖನ್ ಜಾವ್ನಾಸಾ.
ಹರ್ಯೆಕಾ ಥರಾಚಿ ಜಾಣ್ವಾಯ್ ಆನಿ ಮಾಹೆತ್ ದಿಂವ್ಚೆಂ ಕಂಪ್ಯೂಟರ್, ಅಂತರ್ಜಾಳ್, ಟಿ.ವಿ., ರೇಡಿಯೊ ಇತ್ಯಾದಿ ಘರಾಂತ್ಚ್ ಉಪಲಬ್ಧ್ ಆಸ್ತಾನಾ ವಾಚುನ್ ಜೊಡ್ಚ್ಯಾ ಮನೋರಂಜನ್ ಆನಿ ಜಾಣ್ವಾಯೆಥಂಯ್ ಆಸಕ್ತ್ ಉಣಿ ಜಾಲ್ಲ್ಯಾಂತ್ ನವಾಲ್ ನಾ. ತೀಸ್-ಚಾಳಿಸ್ ವರ್ಸಾಂ ಆಧಿಂ ಮುಂಬಯ್ಚ್ಯಾ ಗಲ್ಲ್ಯಾಂ ಗಲ್ಲ್ಯಾಂನಿ ’ಸರ್ಕ್ಯುಲೇಟಿಂಕ್ ಲೈಬ್ರೆರಿ’ ಆಸ್ಲ್ಲ್ಯೊ ಆನಿ ಜಾಯ್ತಿಂ ಯುವಜಣಾಂ ಬಸ್ಸಾಂನಿ, ಟ್ರೆಯ್ನಿಂನಿ, ಟೆಕ್ಸೆಂನಿಂ ಆನಿ ರಿಕ್ಷಾಂಚೆರ್ ಪಯ್ಣ್ ಕರ್ತಾನಾ ಲೈಬ್ರೆರಿ ಬೂಕ್ ವಾಚ್ಚ್ಯಾಂತ್ ಮಗ್ನ್ ಜಾತಾಲಿಂ. ಸಾರ್ವಾಜನಿಕ್ ಲೈಬ್ರೆರಿಂನಿ ಆನಿ ರೀಡಿಂಗ್ ರುಮಾಂನಿ ಬಸೊಂಕ್ ಜಾಗೊ ಮೆಳಾನಾತ್ಲ್ಲೊ. ಆಜ್ ಪರಿಸ್ಥಿತಿ ಸಂಪೂರ್ಣ್ ಬದಲ್ಲ್ಯಾ. ಹಿ ಪರಿಸ್ಥಿತಿ ಕೊಂಕ್ಣಿ ಮಾತ್ರ್ ನ್ಹಂಯ್ ಸರ್ವ್ ಭಾಸಾಂಕ್ ಲಾಗು ಜಾತಾ. ತರಿಪುಣ್ ಹಿಂದಿ, ಮರಾಠಿ, ಕನ್ನಡ ತಸಲ್ಯಾ ಮಜತ್ ಮೆಳ್ಚ್ಯಾ ಆನಿ ಗಾಂವಾಂ ಗಾಂವಾಂನಿ ಸಾರ್ವಾಜನಿಕ್ ಗ್ರಂಥಾಲಯ್ ಆಸ್ಚ್ಯಾ ಬಳಾಧಿಕ್ ಭಾಶೆಂಕ್ ಹಿ ಬದ್ಲಾವಣ್ ಕೊಂಕ್ಣಿ ಭಾಶೆಕ್ ಜಾಲ್ಲ್ಯಾಬರಿ ಮಾರೆಕಾರ್ ಜಾಂವ್ಚಿನಾ.
ಬರ್ಯಾ ವಿಮರ್ಶಾಚೊ ಅಭಾವ್ ಕೊಂಕ್ಣಿ ಸಾಹಿತ್ಯಾಚೆಂ ಗುಣಮಟ್ಟ್ ಜೆರಾಲ್ ಥರಾನ್ ಉಂಚ್ಲ್ಯಾ ಪಾಂವ್ಡ್ಯಾಕ್ ಪಾವೊಂಕ್ ನಾ ಮ್ಹಳ್ಳೆಂ ಏಕ್ ಕೊಡು ಸತ್. ವಿಶಾಲ್ ಮರುಭೂಮಿಂತ್ ಭೋವ್ ಆಪ್ರೂಪ್ ದಿಸ್ಚ್ಯಾ ಜಲಾಶ್ರಯಾಬರಿ (Oasis) ಆಮ್ಚ್ಯಾ ಥೊಡ್ಯಾಚ್ ಶ್ರೇಷ್ಟ್ ವರ್ಗಾಚ್ಯಾ ಸಾಹಿತಿಂವರ್ವಿಂ ಕೊಂಕ್ಣಿ ಸಾಹಿತ್ಯಾಕ್ ಮಾನ್ ಆಸಾ. ಶೆಂಬೊರಾಂನಿ ಬರಯ್ಣಾರ್ ಆಸಾತ್ ಪುಣ್ ಬೊಟಾಂನಿಂ ಮೆಜ್ಚೆ ಇತ್ಲೆ ಲೇಖಕ್ ಮಾತ್ರ್ ಉಡಾಸ್ ಉರ್ಚೆಂ, ಜೊಗಾಸಾಣೆನ್ ಸಾಂಬಾಳ್ಚೆ ತಸಲೆಂ ಸಾಹಿತ್ಯ್ ರಚ್ತಾತ್ ಮ್ಹಳ್ಳೆಂಯೀ ಸತ್.
ಸಾಹಿತ್ಯಾಚೆಂ ಗುಣಮಟ್ಟ್ ಸಾದ್ಯಾ ವಾಚ್ಪ್ಯಾಥಂಯ್ ಪ್ರಾಮಾಣಿಕ್ಪಣಾನ್ ಪಾವಂವ್ಚೆ ವಿಮರ್ಶಕ್ ನಾಂತ್ ವ ತಾಂಕಾಂ ಉತ್ತೇಜನ್ ಮೆಳಾನಾ. ಹಾಚೆಂ ಏಕ್ ಕಾರಣ್ ಜಾವ್ನಾಸಾ ಆಮ್ಚ್ಯಾ ಲೇಖಕಾಂಚ್ಯಾ ವರ್ತುಲಾಂತ್ಲೆಚ್ ವಿಮರ್ಶಕ್ ಜಾತಾತ್ ಶಿವಾಯ್ ಸ್ವತಂತ್ರ್ ವಿಮರ್ಶಕ್ ನಾಂತ್. ಕೊಂಕ್ಣಿ ಸಾಹಿತ್ಯಾಂತ್ ಪೂರ್ವಾಗ್ರಹ್ (Prejudice) ಆಸ್ತಾಂ, ಗುಂಡಾಯೆನ್ ವಿಮರ್ಶಾ ಬದ್ಲಾಕ್ ಸಾಹಿತಿಚೊ ವೈಯಕ್ತಿಕ್ ವಿಮರ್ಸೊ ಜಾತಾ. ಅಶೆಂ, ಉಂಚ್ಲೆಂ ಸಾಹಿತ್ಯ್ ದುರುದ್ದೇಶಾನ್ ವ ನೆಣಾರ್ಪಣಾನ್ ಸಕ್ಲಾ ಘಾಲ್ಯೆತ್;
ಗೂಂಡ್ ಅಧ್ಯಯನ್ ವ ಚಿಂತಾಪ್ ನಾಸ್ತಾಂ ಬರಯಿಲ್ಲೆಂ ಸಾಹಿತ್ಯ್ ತಿತ್ಲ್ಯಾಚ್ ಮಟ್ಟಾಚ್ಯಾ ವಿಮರ್ಶಕಾನ್ ಉಂಚಾಯೆರ್ ದವರ್ಯೆತ್. ಆಮ್ಚ್ಯಾ ದುರದ್ರಷ್ಟಾನ್ ಆಸಲಿ ಪ್ರವೃತ್ತಿ ಆಮ್ಚ್ಯ ಸಾಹಿತ್ಯಾಂತ್ ಚಡ್ ಝಳ್ಕಾತಾ. ಆರ್ಸೊ ಧರ್ಲ್ಯಾ ಶಿವಾಯ್ ಅಮ್ಚ್ಯಾ ತೊಂಡಾವಯ್ಲಿಂ ಶಿಬಾಂ ಆಮ್ಕಾಂ ದಿಸಾನಾಂತ್. ಖರೊ ವಿಮರ್ಸೊ ಜಾವ್ನಾಸಾ ಹೊ ಆರ್ಸೊ. ಪುಣ್ ಆರ್ಶಾಂತ್ ಶಿಬಾಂ ದಿಸ್ಲ್ಯಾರ್ ತಿ ಆರ್ಶಾಚಿ ಚೂಕ್ ಮ್ಹಣ್ ತೊ ಫೊಡ್ಚೊ ನ್ಹಂಯ್. ಬರ್ಯಾ ಮನಾನ್ ಕೆಲ್ಲ್ಯಾ ವಿಮರ್ಶಾಂಕ್ ಥೊಡೆ ಪಾವ್ಟಿ ಆಸಲೆಂ ಇನಾಮ್ ಮೆಳ್ಟಾ.
ದೆಕುನ್ ಸಗ್ಳೆಂ ಆರಾವ್ನ್ ಸಾಂಗ್ಚೆಂ ಜಾಲ್ಯಾರ್, ಆಮ್ಚ್ಯಾ ಸಾಹಿತ್ಯಾಚೆಂ ಮೊಲ್-ಮಾಪ್ ಉಂಚಾರ್ ಪಾವ್ಲ್ಯಾ ಶಿವಾಯ್ ಆಮ್ಚೆಂ ಸಾಹಿತ್ಯ್ ಉಂಚಾರ್ ಪಾಂವ್ಚೆಂನಾ. ಹಾಂತುಂ ಸಂಪಾದಕಾಂನಿ ಮಹತ್ವಾಚೊ ಪಾತ್ರ್ ಖೆಳ್ಯೆತ್. ಖಂಡಿತ್ ಜಾವ್ನ್ ಕೊಂಕ್ಣಿ ಭಾಶೆಚಿ ಪರಿಗತ್ ಗೆಲೆತ್ಯಾ ಲಗ್ಭಗ್ ಪನ್ನಾಸ್ ವರ್ಸಾಂನಿ ಸುಧಾರ್ಲ್ಯಾ. ವೆವೆಗ್ಳ್ಯಾ ಜಾತಿ-ಕಾತಿಚೊ ಕೊಂಕ್ಣಿ ಲೋಕ್ ಪ್ರವಾಸಾವರ್ವಿಂ ವ ಸಾಹಿತಿಕ್ ಸಮ್ಮೇಳನಾಂ ಮುಖಾಂತ್ರ್ ವ ಹೆರ್ ಕಾರಾಣಾಂನಿ ಎಕಾಮೆಕಾ ಮೆಳ್ಟಾತ್ ಆನಿ ಮಾಯ್ಭಾಶೆನ್ ಉಲಯ್ತಾತ್. ಆಪ್ಲ್ಯಾ ಬರ್ಯಾ ಫುಡಾರಾಖಾತಿರ್ ಆಪ್ಲೊ ಮಾಯ್ಗಾಂವ್ ಸಾಂಡುನ್ ಪಯ್ಶಿಲ್ಯಾ ಗಾಂವಾಂಕ್ ಪಾವ್ಲ್ಲೆ ಕೊಂಕ್ಣಿ ಲೋಕ್ ಆಪ್ಲ್ಯಾ ಮಾಯ್ಭಾಶೆಥಂಯ್ ಚಡ್ ಉರ್ಬಾ ದಾಕಯ್ತಾತ್. ಆಸಲೆ ಸಂಪರ್ಕ್ ಭಾಶೆಚ್ಯಾ ಪ್ರಮಾಣಿಕರಣಾಚೆಂ (Standardization) ಪಯ್ಲೆಂ ಮೆಟ್ ಮ್ಹಣ್ಯೆತ್. ಅಸಲೆಂ ಸಂಪರ್ಕ್ ವ್ಹಾಡಯ್ಜಯ್.
ಜಾಯ್ತೆ ಪಾವ್ಟಿ ಆಮಿ ಆಮ್ಚಿ ಉಲವ್ಣ್ಯಾ ರೀತ್ (ಬೊಲಿ) ಮಾತ್ರ್ ಸಾರ್ಕಿ ಆನಿ ಹೆರಾಂಚಿ ಚುಕಿಚಿ ಮ್ಹಳ್ಳೊ ಮನೋಭಾವ್ ದವರ್ನ್ ಹೆರಾಂಚ್ಯಾ ಉಲವ್ಣ್ಯಾ ರಿತಿಥಂಯ್ ತಾತ್ಸಾರ್ ದಾಕಯ್ತಾಂವ್. ಹೆಂ ಸಾರ್ಕೆಂ ನ್ಹಂಯ್. ಭಾಶೆಥಂಯ್ ಆಮ್ಚೆಂ ಮನ್ ವಿಶಾಲ್ ಕರುಂಕ್, ಅಮ್ಚೆಂ ಸಂಭಾಷಣ್ ಎಕಾಮೆಕಾಕ್ ಅಭಿರುಚಿಚೆಂ ಕರುಂಕ್, ಆಮ್ಚೆಂ ಸಬ್ಧಾ-ಭಂಡಾರ್ ವ್ಹಾಡಂವ್ಕ್ ಹೆರ್ ಕೊಂಕ್ಣಿ ಸಮುದಾಯಾಂಕಡೆ ವಿಚಾರ್ ಅದಲ್ಬದಲ್ (Interaction) ಕರ್ಚೆಂ ಗರ್ಜ್ ಆಸಾ. ಥೊಡ್ಯಾಚ್ ದಿಸಾಂ ಆದಿಂ ಮುಂಬಯ್ಚ್ಯಾ ತೀನ್ ಹಜಾರ್ ಲೋಕ್ ಬಸ್ಚ್ಯಾ ಅತಿ ವ್ಹಡ್ ಸಭಾ ಘರಾಂತ್ ಎಕಾ ಕೊಂಕ್ಣಿ ಸಾಂಸ್ಕ್ರತಿಕ್ ಕಾರ್ಯಾವಳಿಕ್ ಹಿಂದು ಆನಿ ಕ್ರಿಸ್ತಾಂವ್ ಕೊಂಕ್ಣಿ ಲೋಕ್ ಅಪಾರ್ ಸಂಖ್ಯಾನ್ ಹಾಜರ್ ಜಾಲೆ. ಶೆಂಬೊರಾಂನಿ ಲೋಕ್ ಬಸೊಂಕ್ ಜಾಗೊನಾಸ್ತಾಂ ನಿರಾಶಿ ಜಾವ್ನ್ ಪಾಟಿಂ ಗೆಲೆ. ಹಿಂ ಜಾವ್ನಾಸಾತ್ ಕೊಂಕ್ಣಿಚ್ಯಾ ಪುನರ್ಜೀವಂತ್ಪಣಾಚಿಂ ಖುಣಾಂ.
ಕೊಂಕ್ಣಿ ಭಾಶೆ ದಿಷ್ಟಿನ್ ಏಕ್ ಮಹತ್ವಾಚೊ ಸಮಾರಂಭ್ ಹ್ಯಾ ವರ್ಸಾಚ್ಯಾ ಆಖ್ರೆಕ್ ಮಂಗ್ಳುರಾಂತ್ ಜಾಂವ್ಚೊ ಆಸಾ. ಹೊ ಜಾವ್ನಾಸಾ ಕೆನರಾ ಕೊಂಕ್ಣಿ ಕ್ರಿಸ್ತಾಂವಾಂಚೊ ಪ್ರಥಮ್ ಜಾಗತಿಕ್ ಸಮ್ಮೇಳ್. ಹೊ ಸಮಾರಂಭ್ ಕೊಂಕ್ಣಿಚ್ಯಾ ಸಭಾರ್ ಸಮುದಾಯಾಂ ಪಯ್ಕಿ ಎಕಾಚೊ ತರಿ ಭಾಸ್, ಸಾಹಿತ್ಯ್ ಆನಿ ಸಾಂಸ್ಕೃತಿಕ್ ಶೆತಾಂತ್ ಹ್ಯಾ ಸಮುದಾಯಾಚೊ ಪಾತ್ರ್ ಭೋವ್ ಪ್ರಭಾವಿ ಜಾವ್ನಾಸಾ. ದೆಕುನ್ ಹ್ಯಾ ಸಮ್ಮೇಳಾಂತ್ ಭಾಶೆವಯ್ರ್ ಚಲ್ಚಿ ಚರ್ಚಾ ಆನಿ ಘೆಂವ್ಚೆ ನಿರ್ಣಯ್ ಪರಿಣಾಮ್ಕಾರಿ ಜಾವ್ನಾಸ್ತಲೆ ಮ್ಹಣ್ ಭರ್ವಸೊ ದವರ್ಯೆತ್. ತಶೆಂಚ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಎಕಾಡೆಮಿ ಯೆಂವ್ಚ್ಯಾ ವರ್ಸಾಥಾವ್ನ್ ಕರ್ನಾಟಕಚ್ಯಾ ಇಸ್ಕೊಲಾಂನಿ ಕೊಂಕ್ಣಿ ತಿಸ್ರಿ ಭಾಸ್ ಮ್ಹಣ್ ಶಿಕಂವ್ಚ್ಯಾ ಖಾತಿರ್ ಪ್ರಯತನ್ ಕರ್ನ್ ಆಸಾ. ಹೆ ಪ್ರಯತನ್ ಸುಫಳ್ ಜಾಲೆಂ ಜಾಲ್ಯಾರ್ ಕೊಂಕ್ಣಿಂತ್ ಏಕ್ ಚರಿತ್ರಾಚ್ ಘಡ್ಲಿ ಮ್ಹಣ್ಯೆತ್.
ದೋನ್ ವಿರೊಧ್ ವ್ಹಾಳೆ ಕೊಂಕ್ಣಿಚಿ ಆಯ್ಚಿ ಪರಿಗತ್ ಸೂಕ್ಷ್ಮ್ ಥರಾನ್ ವೊರಯ್ಲ್ಯಾರ್ ದೋನ್ ಎಕಾಮೆಕಾ ವಿರೋಧ್ ವ್ಹಾಳೆ ಆಮಿ ಪಳವ್ಯೆತ್.
ಪಯ್ಲ್ಯಾ ವ್ಹಾಳ್ಯಾಂತ್ ಅಸಾತ್ ಕೊಂಕ್ಣಿ ಉಲಂವ್ಚೆ, ಫುಡಾರಾಖಾತಿರ್ ಮುಂಬಯ್ ತಸಲ್ಯಾ ಮಹಾನಗರಾಂನಿ ಯೇವ್ನ್ ವಸ್ತೆಕುಡಾಂ ಕರ್ನ್ ಬಾಂಧವ್ಪಣ್ ವ್ಹಾಡವ್ನ್ ಮಾಯ್ಭಾಸ್ ಜಿವಿ ದವರ್ಚೆ, ಸಾಹಿತ್ಯ್ ಎಕಾಡೆಮಿ ಕೊಂಕ್ಣಿ ವಿಭಾಗ್, ಕೊಂಕ್ಣಿ ಎಕಾಡೆಮಿ, ಕೊಂಕ್ಣಿ ಭಾಷಾ ಮಂಡಳ್ ತಸಲೆ ಪ್ರಾತಿನಿಧಿಕ್ ಸಂಸ್ಥೆ ಘಡುನ್ ಕೊಂಕ್ಣಿಚ್ಯಾ ಸ್ಥಾನ್ ಆನಿ ಹಕ್ಕಾಂ ಖಾತಿರ್ ಝಜ್ಚೆ, ಕೊಂಕ್ಣಿ ನೆಮಾಳಿಂ ಸುರು ಕರ್ನ್ ಭಾಸ್ ಆನಿ ಸಾಹಿತ್ಯಾಥಂಯ್ ಅಭಿರುಚ್ ಜಿವಿ ದವರ್ಚೆ ಆನಿ ನಿಮಾಣೆ ತರಿ ಚಡ್ ಪ್ರಮುಖ್ ಜಾವ್ನಾಸ್ಚೆ ಪಾವ್ಸಾಂತ್ಲ್ಯಾ ಆಳ್ಮ್ಯಾಂಬರಿ ಫುಲೊನ್ ಯೆಂವ್ಚೆ ಅಂತರ್ಜಾಳ್ ಟಿಕಾಣೆ (Websites) - ಹೆ ಸರ್ವ್ ಕೊಂಕ್ಣಿ ಭಾಶೆಕ್ ಕೊಂಕ್ಣಿ ಲೊಕಾಚ್ಯಾ ಜಿಬೆರ್ ಆನಿ ಕಾಳ್ಜಾಂತ್ ಹಾಡುಂಕ್ ಪೆಚಾಡ್ಚೆ ಉರ್ಬೆಸ್ತ್ ವ್ಯಕ್ತಿ ಆನಿ ಸಂಸ್ಥೆ. ಹಾಂಚ್ಯಾ ಪ್ರಯತ್ನಾನ್ ಕೊಂಕ್ಣಿ ಪುನರ್ಜೀವಂತ್ ಜಾಲ್ಯಾ. ಹೊ ವ್ಹಾಳೊ ದಿಸಾನ್ದೀಸ್ ಬಳಾಧಿಕ್ ಜಾವ್ನ್ ಯೆತಾ.
ಹ್ಯಾ ವ್ಹಾಳ್ಯಾ ವಿರೋಧ್ ವ್ಹಾಳ್ಚೊ ದುಸ್ರೊ ವ್ಹಾಳೊಯೀ ಕೊಂಕ್ಣಿ ಕಾಂಯ್ ಅಸ್ಕತ್ ನಾ. ಹಾಂತುಂ ಆಸಾತ್ ಕೊಂಕ್ಣಿ ಏಕ್ ಕೀಳ್ ಭಾಸ್ ಮ್ಹಣ್ ಲೆಕ್ಚೆ, ತಿಕಾ ಲಿಪಿ ನಾ ಮ್ಹಣ್ಚೆ, ಇಂಗ್ಲಿಶ್ ಶಿಕ್ಲ್ಯಾರ್ ಮಾತ್ರ್ ಸಮಾಜೆಂತ್ ಮಾನ್ ಆನಿ ಫುಡಾರ್ ಆಸಾ ಮ್ಹಣ್ ಚಿಂತ್ಚೆ ಆನಿ ತೀಚ್ ಭಾಸ್ ಘರಾಂತ್ ಉಲಂವ್ಚೆ, ಮಾಯ್ಭಾಶೆಚೊ ಪಾತ್ರ್ ಕಿತೆಂ ಮ್ಹಳ್ಳೆಂ ನೆಣಾ ಆಸ್ಚೆ, ಆಯ್ಲೆವಾರ್ಚ್ಯಾ ವರ್ಸಾಂನಿ ಕೊಂಕ್ಣಿಕ್ ಮೆಳ್ಲ್ಲ್ಯೊ ಮಾನ್ಯತಾಯೊ ಆನಿ ಸ್ಥಾನ್ ಜಾಣಾ ಆಸೊನೀ ಅಲಕ್ಷಾ ಕರ್ಚೆ.
ಹ್ಯಾ ದೋನ್ ವ್ಹಾಳ್ಯಾಂನಿ ಕೊಂಕ್ಣಿ ಲೋಕ್ ಶಿರ್ಕಾಲ್ಯಾತ್. ಖಂಚೊ ವ್ಹಾಳೊ ಬಳ್ ಜಾತಲೊ ಆನಿ ದುಸ್ರ್ಯಾಕ್ ಗೀಳ್ನ್ ಸೊಡ್ಟಲೊ ಹೆಂ ವೇಳ್ಚ್ ಸಾಂಗ್ತಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications