ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸವಾಲಾಂಕ್ ಜಾಪಿ
ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ
ದಿವೊ ಹಾಫ್ತ್ಯಾಳೆಂ
ಮಿತ್ರ್ ಹಾಫ್ತಾಳೆಂ
ಸೆವಕ್ ಮಯ್ನ್ಯಾಳೆಂ
ಅಂಕಣ್ಕಾರಾ ವಿಶ್ಯಾಂತ್
’ಮಿತ್ರ್’, ’ಝೆಲೊ’ ತಶೆಂಚ್ ’ಕಾಣಿಕ್’ ಪತ್ರಾಂಚೆಂ ಸಂಪಾದಕ್ಪಣ್ ಚಲಂವ್ಚೆ ಮಾರಿಫಾತ್, ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಭರ್ಪೂರ್ ಅನ್ಭೋಗ್ ಆಸ್ಚೊ ದೊ|ಆಸ್ಟಿನ್ ಡಿ’ಸೋಜ್ ಪ್ರಭು ಪ್ರಸ್ತುತ್, ಅಮೆರಿಕಾಂತ್ ಅಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರುನ್ ಆಸಾ. ಕೊಂಕ್ಣಿ ಭಾಸ್/ಸಾಹಿತ್ಯಾಚಾ ವ್ಹಾಡಾವಳೆಕ್ ಖಾಂದ್ ದಿಲ್ಲೊ ಹೊ ಏಕ್ ಸಂಘಟಕ್/ಮುಖೆಲಿ ತಶೆಂಚ್ ಕೊಂಕ್ಣಿ ಕಾರ್ಭಾರಿ ಜಾವ್ನಾಸಾ.
ಹಾಚಾ ವೆಕ್ತಿತ್ವಾ/ವಿಚಾರಾಂವಿಶಿಂ ಚಡ್ ಜಾಣಾಂ ಜಾಂವ್ಕ್ ಕೊಂಕ್ಣಿ ಕಾರ್ಭಾರಿ ಅಂಕಣಾಕ್ ಭೆಟ್ ದೀ.
[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]
ಅಪ್ಲೆಂ ಸರ್ವಸ್ವ್ ಕೊಂಕ್ಣೆಕ್ ದಿಲೆಂ ಮ್ಹಣೊನ್ ಗಾಂವಾಂತ್ ಥೊಡೆ ರಡೊನ್ ರಡೊನ್ ಸಂಸಾರಿ ಆಸ್ತ್-ಬದಿಕ್ ಪುಂಜಾವ್ನ್, ಆತಾಂಯ್ ರಡೊನ್ಂಚ್ ಆಸಾತ್ಮೂ - ಕೊಣಾಕ್ಗಾ ಹಾಣಿಂ ಫಟಂವ್ಚೆಂ? [ದುಕೊರ್ ಬೊಸ್ತ್ಯಾಂವ್, ದುಭಾಯ್]
ಭಿಕಾರ್ಯಾಂಕ್ ತಿಚ್ಚ್ ಸವಯ್ - ರಡ್ಚೆಂ, ರಡ್ಚೆಂ ಆನಿ ಭಿಕ್ ಮಾಗ್ಚೆಂ! ತಸಲ್ಯಾಂಕ್ ಭಿಕ್ ದಿಂವ್ಚಿಚ್ಚ್ ಬಂಧ್ ಕರುಂಕ್ ಜಾಯ್.
ಮಂಗ್ಳುರಾಂತ್ ’ಕೊಂಕ್ಣೆ’ ಪರ್ಕಿ ಆನಿ ಬೆಂಗ್ಳುರಾಂತ್ ’ಕಾನಡಿಗ’ ಪರ್ಕಿ ಜಾಲ್ಯಾತ್ಮೂ ಗಜಾಲ್ ಕಸಲಿ ಆಸ್ಟಿನಾಮಾ? [ವಿನ್ಸಿ ಬೆಂಗ್ಳುರ್] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಕರ್ಚೆಂ ಕಿತೆಂ ಮ್ಹಣ್ತಾಯ್? ಆಮ್ಚ್ಯಾ ಘರಾ ಆಮಿಂಚ್ ಪರ್ಕಿ ಜಾಲ್ಯಾಂವ್! ದೆಖುನ್ಂಚ್ ಹೆರ್ ಯೇವ್ನ್ ಆಮ್ಚ್ಯಾ ಘರಾಂನಿ ಆಮ್ಚ್ಯಾ ಥೊಡ್ಯಾ ಬಾಯ್ಲಾಲಾಗಿಂ ವ್ಯಾಪಾರ್ ಚಲಯ್ತಾತ್. ಸರ್ವ್ ಸಂಪದಲೆಂ ವಿನ್ಸಿ!
ಆಜ್ಕಾಲ್ ಫ್ಯಾಶನಾಚಾ ನಾಂವಾರ್ ಪೊಜ್ಡೆಂ ನ್ಹೆಸಾಪ್ ನ್ಹೆಸೊನ್ ಮಿಸಾಕ್ ಯೆಂವ್ಚಾ ಚಲಿಯಾಂಕ್ ಬೂದ್ ಸಾಂಗ್ಚಾ ಬದ್ಲಾಕ್ ತಾಂಚೆಸವೆಂ ಚಂಗಾಣೆ ಕರ್ಚಾ ಥೊಡ್ಯಾ ಪಾದ್ರಿಂಕ್ ಕಿತೆಂ ಕರಿಜಾಯ್ ಮ್ಹಣ್ತಾಯ್ ಆಸ್ಟಿನಾ? [ಅಸ್ಕತ್ ಪಿಲೊ, ಮಸ್ಕತ್]
ತುಂ ತಕ್ಲೆಂತ್ ಅಸ್ಕತ್ ಮ್ಹಣ್ಚ್ಯಾಕ್ ತುಜೆಂ ಸವಾಲ್ಚ್ಚ್ ಸಾಕ್ಸ್! ದೆವಾನ್ಂಚ್ ನಹಿಂಗಿ ಮಾನವಾಕ್ ಭುಮಿ ವೈಂಕುಂಠಾಂತ್ ವಿಣ್ಗೆಂ ರಚ್ಲೆಂ? ಹಾಂತುಂ ಪೊಜ್ಡೆಂಪಣ್ ಕಸ್ಲೆಂ? ತಸಲಿಂ ಇಗರ್ಜೆಕ್ ಯೇನಾ ಜಾಲ್ಯಾರ್ ಮಾಗಿರ್ ತುಂ ಖಂಯ್ ಪಳ್ಳೆಕ್ ವೆತಾಯ್?
ಗಲ್ಫಾಂತ್ ಆಜ್ಕಾಲ್ ಹರ್ಯೆಕ್ಕಡೆ ಫೆಸ್ತಾಂ-ಕಾರ್ಯಾಂನಿ ಕಾನ್ ಫುಟ್ಟಾಸರ್ ಅರ್ಥ್ ನಾತ್ಲ್ಲ್ಯಾ ಪದಾಂಚೆಂ ಮ್ಯೂಜಿಕ್ ಆಸೊನ್ ಸಯ್ರ್ಯಾಂಲಾಗಿಂ ಕಾನಾಂಕ್ ಲಾಗಿಂ ಯೇವ್ನ್ ಆರಾಬ್ಬಾಯೊ ದಿಂವ್ಚಾಂಕ್ ಕಿತೆಂ ಮ್ಹಣ್ಚೆಂ? [ಕುಮಾದ್ರ್, ಕುಂದಾಪುರ್]
ಸಂಸಾರ್ ಭಾರಿಚ್ಚ್ ಸುಧಾರ್ಲಾ! ತೆಂ ಸಂಗೀತ್ ಆಸ್ಚೆಂ ತುಜ್ಯೆತಸಲ್ಯಾಂಕ್ ಉಲಂವ್ಕ್ ನಹಿಂ; ಸಾಂಗಾತಿಣಿಕ್ ಘೆವ್ನ್ ಕುಲೆ ಹಾಲಂವ್ಕ್ ವ ಪೊಟ್ಲುನ್ ಧರುನ್ ತಿಕಾ ಧರ್ಣಿರ್ ಧಲಂವ್ಕ್. ತೆಂ ಮಾಸಾಕ್ ಮಾಸ್ ಲಾಗ್ತಾನಾ ಆನಿಂ ತೆಂ ಸಂಗೀತ್ ವ್ಹಾಜ್ತಾನಾ ಕೋಣಾಕ್ ಜಾಯ್ ಉಲಂವ್ಕ್?
ಪ್ರಶಸ್ಥಿ ಆನಿ ದುಡು ಲಾಭ್ತಾ ತರ್ ನಾಯ್ತ್ಯಾಂ ಥಾವ್ನ್ಂಯ್ ’ಕೊಂಕ್ಣಿ ಪುರಸ್ಕಾರ್’ ಘೆಂವ್ಕ್ ಎಕಾಚ್ ಪಾಂಯಾರ್ ಉಭೆ ರಾವ್ಲ್ಲ್ಯಾ ಥೊಡ್ಯಾ ಮಹಾನ್ ಕೊಂಕ್ಣಿ ಲೇಖಕಾಂವಿಶಿಂ ತುಜಿ ಕಿತೆಂ ಜಾಪ್ ಆಸ್ಟಿನಾ? [ರೊಜಿಟಾ ನಜ್ರೆತ್, ಮಿರಾ ರೋಡ್]
ಸುಣ್ಯಾಕ್ ಸುಸು ಕರುಂಕ್ ವೊಡಾಚೊ ರೂಕ್ಚ್ಚ್ ಜಾಯ್ಜೆ ಮ್ಹಣ್ ನಾ; ಪೇರಾಂಚೊ ರೂಕ್ಯೀ ಜಾತಾ. ತುಜೆಂ ಕಿತೆಂ ಝಡ್ತಾ ರೊಜಿಟಾ?
"ಆಜ್ಕಾಲ್ ಸುಣಿಂ ಮಾಜ್ರಾಂ ಸಯ್ತ್ ಕವಿತಾ ಬರಯ್ತಾತ್" ಮ್ಹಣ್ತಾ ಹಾಂಗಾ ಎಕ್ಲಿ ಲಾಂಬ್ ಜಿಬೆಚಿ ಏಕ್ ಕವಯತ್ರಿ. ತಿಕಾ ಇಲ್ಲಿ ಸಲ್ಹಾ ದಿಶಿಯ್ವೆ ಆಸ್ಟಿನಾ? [ವೀರಾ ರೇಗೊ, ಸಾಲ್ಮಿಯಾ - ಕುವೇಯ್ಟ್]
ಭಾರಿಚ್ ಸಂತೊಸ್ ಮ್ಹಾಕಾ. ಬರಂವ್ಚಿಂ ಬರವ್ನ್ಂಚ್ ರಾವೊಂದಿತ್; ತಿಚೆ ಕಾಂಯ್ ಪಾಂಯ್ ಧರ್ನ್ ವಾಚ್ ಮ್ಹಣ್ತಾತ್ವೆ ತಿಂ? ತಾಂಕಾಂ ಕಿತ್ಯಾ ವಿರ್ಯಾರ್ ಜಾತಾ ವೀರಾ? ಸೊಡ್ನ್ ಸೊಡ್ ತಸಲ್ಯಾಂಕ್.
ಇ-ಪತ್ರ್, ಇ-ಜಾಗೊ, ಇ-ಬೂಕ್ ಆಸ್ಚೆಪರಿಂ ಫುಡೆಂ ಇ-ಬಾಪುಯ್, ಇ-ಆವಯ್ ಯೇತ್ಗೀ? [ಗಂಗು ಗಂಗೊಳ್ಳಿ, ಆತಾಂ ವಾರಣಾಸಿ]
ಜೆನ್ನಾಂ ಪರ್ಯಾಂತ್ ’ಇ’ ಮುಖಾಂತ್ರ್ ಸಂಭೋಗ್ ಕರುಂಕ್ ವ ’ಪಾನೊ ಪಿಯೆಂವ್ಕ್’ ಜಾಂವ್ಚೆಂನಾಂಗೀ ತೆನ್ನಾಂ ಪರ್ಯಾಂತ್ ಇ-ಬಾಪ್ ಆನಿಂ ಇ-ಮಾಂಯ್ ಯೆಂವ್ಚಿಂ ನಾಂತ್.
ಆಜ್ಕಾಲ್ ಲೋಕ್ ಕೊಂಕ್ಣಿ ಪತ್ರಾಂ/ಬೂಕ್ ಮೊಲಾಕ್ ಘೆವ್ನ್ ವಾಚಿನಾಂತ್ ಮ್ಹಣೊನ್ ಆಮ್ಚೆ ಥೊಡೆ ಮಹಾನ್ ಸಾಹಿತಿ ಧುರ್ಸತಾತ್ - ಪುಣ್ ಹಿಂ ತೆಚ್ಚ್ ಬೂಕ್ ಫುಂಕ್ಯಾಕ್ ದಿಲ್ಯಾರೀ ವಾಚಿನಾಂತ್ಮೂ? [ಸಹನಾ, ಕುವೇಯ್ಟ್] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಭಾರಿಚ್ ಬೆಜಾರಾಯೆಚಿ ಗಜಾಲ್ ಹಿ. ಲೋಕಾಕ್ ಆಪ್ಲಿ ಕಾಷ್ಟಿ ಧುಂವ್ಕ್ಚ್ಚ್ ವೇಳ್ ನಾಸ್ಲ್ಲ್ಯಾ ಹ್ಯಾ ವೆಳಾ ತಿಂ ಬೂಕ್ ಕಶಿಂ ವಾಚ್ತೆಲಿಂ? ಟೆಲೆವಿಜನ್, ಈ-ಮಾಧ್ಯಮಾಂ ಸರ್ವ್ ಬೂಕ್ ಸಾಲಾ ಥಾವ್ನ್ ಝಾಲಾಕ್ ಉಡಯ್ತಾತ್.
ಥೊಡಿಂ ಆಡ್ ನಾಂವಾರ್ ಕಿತ್ಯಾಕ್ ಬರಯ್ತಾತ್ ಸಾಯ್ಭಾ - ಹಾಂಕಾಂ ಕಸಲಿ ಪಿಡಾ? [ಡೆಲಿನಾ, ಬೆಂಗ್ಳುರ್]
ಪೆಂಕ್ಟಾಂತ್ ಬಳ್ ನಾಸ್ಲ್ಲ್ಯೊ ವಾಲಿ ವ ಮುಫ್ತ್ಖೋರಾಂ ಹಿಂ. ಹೆರಾಂಕ್ ಮುಖಾಮುಖ್ ದೀಂವ್ಕ್ ಸಕತ್ ನಾಸ್ತಾಂ ತಿಂ ಹಿಜ್ಡೆಂಪಣ್ ಆಧಾರ್ತಾತ್.
’ಜನವಾಹಿನಿ’ ಆಮ್ಚೆಂ ಪತ್ರ್ ಮ್ಹಣೊನ್ ಆಮ್ಚಾ ಲೊಕಾಂಕ್ ಲಾಖಾಂನಿ ಚುನೊ ಲಾಯ್ಲೊ ಆನಿ ಆತಾಂ ಆಮ್ಚೊ ಲೋಕ್ ಕೊಂಕ್ಣಿ ಪತ್ರಾಂ ವಾಚಿನಾ ಮ್ಹಣ್ ದುರ್ಸತೆಲ್ಯಾಂಕ್ ಕಿತೆಂ ಕರಿಜಾಯ್ ಮ್ಹಣ್ತಾಯ್ ತುಂ? [ಸೆವ್ರಿನ್, ಶಿರ್ವಾಂ] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
’ಜನವಾಹಿನಿ’ ಕಾನಡಿ ಪತ್ರ್ ಜಾವ್ನಾಸ್ಲ್ಲೆಂ ನಂಯ್ಗಿ ಸೆವ್ರಿನಾ? ಐಡಿಯಲ್ ಐಸ್ಕ್ರೀಮಾಪರಿಂ ಘಡ್ಬಡ್ ಚಾಕಂವ್ಚಿಂ ಪತ್ರಾಂ ಜರ್ ಸುರು ಕೆಲಿಂ, ಕೊಂಕ್ಣಿ ಲೋಕ್ ಖಂಡಿತ್ ಜಾವ್ನ್ ತಾಚಿ ರೂಚ್ ಚಾಕ್ತಲೊ ಆನಿಂ ದೆಂಖ್ ಕಾಡ್ತಲೊ.
ಹಾಂವ್ ’ಮೋಗ್ ಕರಾ ಎಕಾಮೆಕಾಚೊ’ ಮ್ಹಣ್ ಶಿಕಯಿಲ್ಲ್ಯಾ ಟಿಚೆರಿಚಾ ಮೊಗಾರ್ ಪಡ್ಲಾಂ ಆಸ್ಟಿನ್ ಅಂಕಲ್ - ಪುಣ್ ತಿಕಾ ಸಾಂಗೊಂಕ್ ಭ್ಯೆಂ ದಿಸ್ತಾಮೂ? ಮಜತ್ ದಿಶಿಗಿ? [ಬೋರಿ ಬಸವ ಅಬ್ಬಾಸಿಯಾ, ಕುವೇಯ್ಟ್]
ತಿ ಟೀಚರ್ ತುಕಾ ಸಗ್ಳಿಚ್ಚ್ ಗಿಳುಂಕ್ ಆಸಾ ಪಾಂಯಾಂ ಸಮೇತ್ ಬಸ್ವಾ! ಜಾಗ್ರುತ್ !! ಮೋಗ್ ಮ್ಹಳ್ಯಾರ್ ಭಿಂರ್ಡಾಂ ಉಗ್ತಿಂ ಕರುನ್ ಬಿಯೊ ಖಾವ್ನ್ ಸೊಲಾಂ ಉಡಯಿಲ್ಲ್ಯಾ ತಿತ್ಲೆಂ ಸಲೀಸ್ ನಹಿಂ.
’ಅಸ್ಟಿನ್ಸ್ ಆನ್ಸರ್ಸ್ ಆರ್ ಸೆಕ್ಸಿ’ ಮ್ಹಣ್ತಾ ಮ್ಹಜಿ ಕುಮಾದ್ರ್ - ಗಜಾಲ್ ಕಿತೆಂ ಇರ್ಮಾಂವ್? [ಪ್ರವೀಣ್ ಸಿಕೇರ್]
’ಹಂಡ್ರೆಡ್ ಪರ್ಸೆಂಟ್ ಟ್ರೂ!’ ತುಜಿ ಕುಮಾದ್ರ್ ಖಂಡಿತ್ ಜಾವ್ನ್ ಪರಿಪಿಕಾಯೆಕ್ ಪಾವ್ಲ್ಯಾ; ತಿಕಾ ಮ್ಹಜ್ಯೆಲಾಗಿಂ ಧಾಡ್ಶಿಗಿ? ಆಮ್ಚಿ ಜಾತೆಲಿ ಮೊಗಾರ್ನಾಡ್ಚಿ ಜೊಡಿ ಘಾಲುಂಕ್ ಘಡಾಮೊಡಿ.
ಕಾಜುಚಿ ಬೀ ಕಿತ್ಯಾ ಭಾಯ್ರ್ ಆಸ್ಟಿನಾ? ತುಕಾ ಕಾಂಯ್ ಕಳೀತ್ ಆಸಾ? [ಸುಕೊ ಮಿರೊಣ್, ಗೊರೆಗಾಂವ್]
ತೆಂಚ್ ತುಂ ಚಿಂತುನ್ ಚಿಂತುನ್ ಸುಕೊನ್ ಗೆಲಾಯ್. ದೇವ್ ಆನ್ಯೇಕ್ ಆದಾಂವ್ ಮ್ಹಣ್ ರಚುಂಕ್ ಗೆಲೊ. ಕಾಮ್ ಸುರು ಕೆಲ್ಲೆಂ ಮಾತ್ರ್, ತೊ ತಿತ್ಲ್ಯಾರ್ ಕುಡಿಚಿ ಗರ್ಜ್ ತಿರ್ಸುಂಕ್ ಗುಡ್ಯಾಕ್ ಗೆಲೊ ಆನಿಂ ಸಂಪೂರ್ಣ್ ವಿಸ್ರಾಲೊ. ದೆಖುನ್ ಕಾಜ್ ಮಾತ್ಸಿ ದಾದ್ಲ್ಯಾಂಪರಿಂ ದಿಸ್ತಾ - ಬೀ ಭಾಯ್ರ್ ಆಸೊನ್.
ತುಜಿಂ ಸವಾಲಾಂ ವಾಚ್ತಾನಾ ಮ್ಹಾಕಾ ಪೆಂಕ್ಟಾ ಸಕಯ್ಲ್ ತಾಪ್ ಯೆತಾಮೂ? ಹಾಂವ್ ಕಿತೆಂ ಕರುಂ? [ಲವ್ರೆಂತ್, ಕಂಕನಾಡಿ]
"ಆಪ್ಣಾ ಹಾತ್, ಜಗನ್ನಾಥ್" ಮ್ಹಣಾನಾಕಾ; ಏಕ್ ಸೊಭಿತ್ ಚಲಿಯೆಕ್ ಪಳೆವ್ನ್ ಕಾಜಾರ್ ಜಾ, ತಿ ತುಕಾ ಲಾಗ್ಲ್ಲೊ ತಾಪ್ ಸುಟಯ್ತಾಗಿ ನಾ ತೆಂ ಮಾಗಿರ್ ಪಳೆ.
ಉಮೆ ದಿತಾನಾ ದೊಳೆ ಧಾಂಪ್ಚೆ ಕಿತ್ಯಾ ಆಸ್ಟಿನ್ ಮಾಮಾ? [ವೀರಾ ಡಿ’ಸೋಜಾ, ದುಬಾಯ್]
ದೊಳೆ ಧಾಂಪ್ತಾನಾ ತೋಂಡ್ ಆಪ್ಶೆಂಚ್ ಉಗ್ತೆಂ ಜಾತಾ ವೀರಾ; ಬುತಾಂವ್ ಧಾಂಬ್ತಾನಾ ಲಿಫ್ಟಾಚೆಂ ದಾರ್ ಉಗ್ತೆಂ ಜಾಲ್ಲ್ಯಾಪರಿಂ.
ಆಸ್ಟಿನಾಮಾ ’ಮೊಗಾಂತ್ಲೊ ತ್ಯಾಗ್’ ಹೊ ಖರೊ ಮೋಗ್ಗೀ ಯಾ ಮೋಗಾ ಥಾವ್ನ್ ಚುಕಾರಿ? [ವಿಲ್ಫಿ, ಕಿನ್ನಿಗೋಳಿ]
’ಮೋಗಾಂತ್ಲೊ ತ್ಯಾಗ್’ ಮ್ಹಳ್ಯಾರ್ ’ರಾನಾಂತ್ಲೊ ವಾಗ್’ ಕಸೊ. ಜಾವ್ಯೆತ್ ತಿ ಪೋಟ್ ಭರ್ಲ್ಯಾ ಉಪ್ರಾಂತ್ಲಿ ಸಾಧಿ ಸುಧಿ ಮನ್ಜಾತ್ ವ ಸದಾಂ ಭುಕೆನ್ ಆಸ್ಚಿ ರಾನ್ವಟಿ ಜಾತ್. ಮೋಗಾಂತ್ ತ್ಯಾಗ್ ಆಸೊಂಕ್ ಫಾವೊ ನಾ, ತೊ ಸದಾಂಚ್ ಆಪುಟ್ಟ್ ಆನಿ ಅಪೇಕ್ಷಿತ್.
ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ
’ಮಿತ್ ಹಾಪ್ತ್ಯಾಳೆಂ’
ಸಹನಾ, ಕುವೇಯ್ಟ್
’ದಿವೊ ಹಾಪ್ತ್ಯಾಳೆಂ’
ಸೆವ್ರಿನ್, ಶಿರ್ವಾಂ
’ಸೆವಕ್ ಮಯ್ನ್ಯಾಳೆಂ’
ವಿನ್ಸಿ, ಬೆಂಗ್ಳುರ್
(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.
ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: austinporob@gmail.com ವಾ editor@daaiz.com
ಹ್ಯಾ ಅಧ್ಲಿಂ ಸವಾಲಾಂ-ಜಾಪಿ: 1, 2, 3, 4, 5, 6
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
