ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಅನಾವರಣ್
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್), ಖಣ್ (ಸ್ವ), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ, ಸಂಬಂಧ್, ಶನಿ, ಖುರ್ಸಾವಾಟ್, ಕಂಟ್ರಿ ಆವಯ್, ಭಾಂದ್, ಸುಟ್ಕಾ, ಅಜ್ಜಿಕುಂಜ, ಜಿಣ್ಯೆ ಸೂತ್ರ್, ಮಾರ್, ತೆಂ ಆನಿ ಹಾಂವ್.
’ಅನಾವರಣ್’ - ಆಜ್ ಉಗ್ತಾವಣ್ ಜಾಲ್ಲೊ ಹೊ ಬೂಕ್ ತಾಚೊ ಚೊವ್ತೊ ಕಾಣ್ಯಾಂಚೊ ಬೂಕ್.
ಶ್ಹೆರಾಂತ್ಲ್ಯಾ ನಾಂವಾಡ್ದಿಕ್ ಹೊಟೆಲಾಂತ್ ಫಕತ್ತ್ ಆಪವ್ಣೆಂ ಆಸ್ಲ್ಲ್ಯಾಂಕ್ ಮಾತ್ರ್ ಆಸಾ ಕೆಲ್ಲ್ಯಾ ಹ್ಯಾ ಕಾರ್ಯಾಂತ್ ವೆವೆಗ್ಳ್ಯಾ ಶ್ಹೆರಾಂನಿ ವಸ್ತಿ ಕರ್ಚೆ ವಿಂಚ್ಣಾರ್ ಸಾಹಿತಿ ಹಾಜರ್ ಆಸ್ಲೆ, ಶ್ಹೆರಾಂತ್ಲೆ ಥೊಡೆ ಉಧ್ಯಮಿ ಸಯ್ತ್ ಹಾಜರ್ ಆಸ್ಲೆ. ಸಾಂಜೆರ್ ಸಾಡೆ ಸ ವೊರಾಂಕ್ ಸುರು ಜಾಲ್ಲೆಂ ಕಾರ್ಯೆಂ ದೇಡ್ ವೊರಾ ಭಿತರ್ ಅಖೇರ್ ಜಾಲ್ಲೆಂ. ಫಾಮಾದ್ ಉಲವ್ಪ್ಯಾನ್ ಹಿಸ್ಪಾಭಾಯ್ರ್ ಫುಕಾರುನ್ಗೀ, ಬುಕಾಚಿ ವಳೊಕ್ ದಿಲ್ಲ್ಯಾನ್ ಮೀತ್ ಮಿರ್ವೊನ್ ಫೊಣ್ಣ್ ಘಲುನ್ಗೀ ಯಾ ಕಾರ್ಯಾ ಉಪ್ರಾಂತ್ಲ್ಯಾ ಮ್ಯೂಜಿಕಾಚ್ಯಾ ಆವಾಜಾಂತ್, ವಿಸ್ಕಿ-ಬಿಯೆರಿಚ್ಯಾ ಗ್ಲಾಸಾಂನಿ ಆಧಳ್ಚ್ಯಾ ಉನ್ಮಾದಾಂತ್ಗೀ ಕಿತೆಂಗೀ, ತೊ ಆಪ್ಲ್ಯಾ ಜಿಣ್ಯೆಚೆಂ ಅರ್ದೆಂ ಆವ್ಕ್ ಸಂಪಂವ್ಚ್ಯಾಕ್ ಲಾಗಿಂ ಜಾಲ್ಲೊ ಫುಲೊನ್ ತಾಂಬ್ಶೆಲ್ಲೊ.
ಲಾಂಬಾಯೆಚೆಂ ಧವೆಂ ಶೆರ್ವಾನಿ ನೆಸ್ಣಾರ್ ತೊ ಬರೊಚ್ಚ್ ಸೊಭ್ತಾಲೊ. ಎದೊಳ್ಚ್ಚ್ ಗಳ್ಯಾರ್ ನೆಟಯಿಲ್ಲೆ ಫುಲಾಂಚೆ ತುರೆ ಕಾಡುನ್ ಮೆಜಾರ್ ದವರುನ್ ತೊ ಹಾತಿಂ ಏಕ್ ವಿಸ್ಕೆಚೊ ಗ್ಲಾಸ್ ಘೆವ್ನ್ ಹಾಜರ್ ಆಸ್ಲ್ಲ್ಯಾ ಮಾನ್ ಮನ್ಶ್ಯಾಂಕ್ ಅಪ್ಲ್ಯಾ ಜಿವಾ ವರ್ತ್ಯಾ ತಾಂಕಿಚ್ಯೊ ಹಾಸೊ ಪಾಟಂವ್ಕ್ ಪ್ರೇತನ್ ಕರ್ತಾಲೊ.
ಲಗ್ಭಗ್ ತೀಸ್ ವರ್ಸಾಚೊ ಸಾಹಿತಿಕ್ ವಾವ್ರ್ ತಾಚೊ ಆಜ್ ಸರ್ವ್ ಸ್ವಪ್ಣಾಂ ಜ್ಯಾರಿ ಕರುಂಕ್ ಸಕ್ಲ್ಲೊ.
ಪತ್ರಾಂಚೆ, ಸಾಯ್ಟಿಂಚೆ, ಟಿವಿಚೆ, ಹೆರ್ ಮಾಧ್ಯಮಾಂಚೆ ಪತ್ರ್ಕರ್ತ್ ಎದೊಳ್ಚ್ಚ್ ವೆವೆಗ್ಳ್ಯೊ ತಸ್ವೀರೊ ಕಾಡ್ನ್, ಕಶೆಂ ತರೀ ಸವಾಲಾಂ ವಿಚಾರುಂಕ್ ರಾಕೊನ್ ಅಸ್ಲ್ಲೆ.
ಮಾಸ್ ಖಾತೆಲ್ಯಾಂಕ್ ವಿಂಗಡ್, ಮಾಸ್ಳಿ ಖಾತೆಲ್ಯಾಂಕ್ ವಿಂಗಡ್, ತರ್ಕಾರಿ ಖಾತೆಲ್ಯಾಂಕ್ ವಿಂಗಡ್ ಜೆವ್ಪಾಚಿ ವಿಲೇವಾರಿ ಕೆಲ್ಲಿ. ತೆಚ್ಚ್ಪರಿಂ ಪಿಯೆನಾತ್ಲ್ಲೆ ಕೊಣ್ಯೀ ನಾತ್ಲ್ಲೆ ತರ್ಯೀ ವಿಸ್ಕಿ, ಬ್ರಾಂಡಿ ಎಕಾ ಕೊನ್ಶಾರ್ ತರ್ ಬಿಯೆರ್ ಆನಿ ಲಿಮ್ಕಾಚಿಂ ಅನ್ಯೇಕಾ ಕುಶಿನ್ ಕೌಂಟರಾಂ ಆಸ್ಲ್ಲಿಂ. ಸುಮಾರ್ ದೆಡ್ಶೆಂ ಲೋಕ್ ಹ್ಯಾ ಅಪುರ್ಭಾಯೆಚ್ಯಾ ಕಾರ್ಯಾಚಿ ಮಜಾ ಚಾಕ್ತಾಲೊ.
’ಅನಾವರಣ್’ ಮ್ಹಳ್ಯಾರ್ ’ಆವರಣ್’ ಸಭ್ದಾಚೊ ಉಲ್ಟೊ ಸಬ್ಧ್, ಆವರಣ್ ಮ್ಹಳ್ಯಾರ್ ಎಕಾ ರಿತಿರ್ ಗುಟ್ಲಾಂವ್ಚೆಂ ಮ್ಹಣ್ ತರ್, ಅನಾವರಣ್ ಮ್ಹಳ್ಯಾರ್ ಗುಟ್ಲಾಯಿಲ್ಲ್ಯಾಂತ್ಲೆಂ ಭಾಯ್ರ್ ಕಾಡ್ಚೆಂ. ತೊ ತಾಕಾ ಸವಾಲ್ ವಿಚಾರ್ತೆಲ್ಯಾಂಕ್ ಸಮ್ಜಾಯ್ತಾಲೊ.
ದಾಟ್ ಅಕ್ಶರಾಂನಿ ’ಅನಾವರಣ್’ ಬರಯಿಲ್ಲ್ಯಾ ಮುಖ್ಪಾನಾಚೆರ್ ಆಸ್ಚೆಂ ತೀನ್ ರಂಗಾಚೆಂ ಪಿಂತುರ್, ಏಕ್ ಹಾಸ್ಕುರ್ಯಾ ತೊಂಡಾಚಿ ಅಸ್ಕತ್ ಚಿವಳ್ಳೆಲಿ ಸಾವ್ಳಿ. ತೊ ಬುಕಾಚೆಂ ಮುಖ್ಪಾನ್ ಉಘಡ್ನ್ ಧಾಖಯ್ತಲೊ;
ಅರ್ಪಣ್ - ಮ್ಹಜ್ಯಾ ಕಾಳ್ಜಾಚೆಂ ಕಿಸ್ಪೊರ್ ಕೆಲ್ಲ್ಯಾ ಚಲಿಯೆಕ್!
"ಮ್ಹಜ್ಯಾ ಹ್ಯಾ ಆಧ್ಲ್ಯಾ ತೀನ್ ಬುಕಾಂಚ್ಯೊ ಹಜಾರಾಂನಿ ಪ್ರತಿಯೊ ವಿಖುನ್ ಗೆಲ್ಯಾತ್ ಆಸ್ತಾಂ ಹ್ಯಾ ಬುಕಾಚ್ಯೊ ಪ್ರತಿಯೊ ಸಯ್ತ್ ವಿಖುನ್ ವೆಚ್ಯಾಂಕ್ ಮ್ಹಾಕಾ ತರ್ಯೀ ಕಸ್ಲೊಚ್ ದುಭಾವ್ ನಾ. ಪುಣ್ ಮ್ಹಜ್ಯಾ ಬುಕಾಂಚಿ ವಿಶೇಷತಾ ಖಂಚಿಗೀ ಮ್ಹಳ್ಯಾರ್ ಮ್ಹಜ್ಯಾ ಹರ್ಯೆಕಾ ಬುಕಾಂನಿ ಆಧ್ಲೆ ಸರ್ವ್ ಧಾಖ್ಲೆ ಮೊಡ್ಲ್ಯಾತ್. ಲೊಕಾಕ್ ಮ್ಹಜೆಂ ಸಾಹಿತ್ಯ್ ಖಾಯ್ಸ್ ಜಾಂವ್ಚ್ಯಾಕ್ ಹಾಚ್ಯಾಕೀ ವರ್ತಿ ರುಜ್ವಾತ್ ಕಸ್ಲಿ ಜಾಯ್?" - ತೊ ಆಪ್ಲ್ಯಾ ಶೆರ್ವಾನಿಚೆರ್ ಆಸ್ಚೆ ಫುಲಾಂಚೆ ಚುರೆ ಆಪ್ಲ್ಯಾ ಉಜ್ವ್ಯಾ ಹಾತಾಚ್ಯಾ ಬೊಟಾಂನಿ ಪಾಪ್ಡಿತ್ತ್ ಉಲಯ್ತಾಲೊ.
"ಪುಣ್ ವಿಮರ್ಶಕಾಂನಿ ಕಿತ್ಯಾಕ್ ತುಜ್ಯಾ ಆಧ್ಲ್ಯಾ ಬುಕಾಂಕ್ ತಿಕ್ಶಿ ಪ್ರತಿಕ್ರಿಯಾ ದಿಲ್ಯಾ?" ಎಕಾ ಪತ್ರ್ಕರ್ತಾನ್ ಸವಾಲ್ ಉಡಯ್ಲೆಂಚ್;
"ಆಮಿ ಪ್ರಜಾಪ್ರಭುತ್ವ್ ಸಂಸಾರಾಂತ್ ಜಿಯೆವ್ನ್ ಆಸಾಂವ್, ಸತ್ ಸಾಂಗ್ಚೆಂ ತರ್ ಮ್ಹಾಕಾ ಕೊಣೆಂಯ್ ಚಡ್ ಹೊಗಳ್ಸಿಲ್ಯಾರ್ ಚಡ್ ಸಂತೊಸ್ಯೀ ಜಾಯ್ನಾ, ಕೊಣೆಂಯ್ ಚಡ್ ಠೀಕಾ ಕೆಲ್ಯಾರ್ ಚಡ್ ಬೆಜಾರಾಯ್ಯೀ ಜಾಯ್ನಾ. ಹಾಂವ್ ತಿಂ ಸರ್ವ್ ಹಂತಾಂ ಪಾಶಾರ್ ಜಾವ್ನ್ ಆಯ್ಲಾಂ.... ಲಾವೋ ತ್ಸೂ ಸಾಂಗ್ತಾ ’ನೀಜ್ ಉತ್ರಾಂ ರಂಗಾಳ್ ನ್ಹಯ್, ಆನಿ ರಂಗಾಳ್ ಉತ್ರಾಂ ನೀಜ್ ನ್ಹಯ್’. ಠೀಕಾ ಕೊಣಾಚಿ ಜಾಯ್ನಾ? ಜೆಜುಚಿ ಠೀಕಾ ಜಾಯ್ನಾಗೀ? ಮದರ್ ತೆರೆಜಾಚಿ ಠೀಕಾ ಜಾಯ್ನಾಂಗಿ? ಆಮ್ಕಾಂ ಕಿತೆಂಯ್ ಉಲಂವ್ಕ್ ಸ್ವಾತಂತ್ರ್ ಆಸಾ ಮ್ಹಣ್ತಾನಾ ಕೊಣೆಂಯ್ ಕಿತೆಂಯ್ ಉಲಯ್ಲ್ಯಾರ್ ಹಾವೆಂ ಕಿತ್ಯಾಕ್ ಮತಿಕ್ ಘೆಜಾಯ್? ಹೊ ಎಕಾ ರಿತಿಚೊ ಮೊಸೊರ್ ತಾಂಚೊ..." ತೊ ಉಲವ್ನ್ ವಿಸ್ಕೆಚೊ ಏಕ್ ಸಿಪ್ ಪಿಯೆಲೊ.
"ತುಜ್ಯಾ ಆಧ್ಲ್ಯಾ ಬುಕಾಂಚಿಂ ನಾಂವಾ ಖಂಚಿಂ ಸರ್?"
"ಪಯ್ಲೊ ಬೂಕ್ ’ಅಂತಸ್ಥ್’ ಅಜೀಕ್ ಸತ್ರಾ ವರ್ಸಾಧಿಂ ಬರಯಿಲ್ಲೊ ಬೂಕ್. ಹ್ಯಾ ಸಮಾಜೆಂತ್ ಜಿಯೆಂವ್ಚೊ ಲೋಕ್ ಕಸೊ ಆಪ್ಲ್ಯಾ ಅಂತಸ್ಥೆ ಖಾತಿರ್ ಜಿಯೆತಾ, ಕಶೆಂ ಹ್ಯಾ ಅಂತಸ್ಥಾಖಾತಿರ್ ಕೊಣಾ ಕೊಣಾಚೆಂ ವೆಕ್ತಿತ್ವ್ ಗಿಳ್ತಾ ಮ್ಹಳ್ಳೆಂ ಹ್ಯಾ ಬುಕಾಂತ್ ಪಿಂತ್ರಾಯ್ಲಾಂ; ಎಕಾ ಮಯ್ನ್ಯಾ ಭಿತರ್ ಅಡೇಜ್ ಹಜಾರ್ ಪ್ರತಿಯೊ ವಿಖೊನ್ ಗೆಲ್ಲ್ಯೊ. ದುಸ್ರೊ ಬೂಕ್ ’ಭುಕ್’, ಕಶೆಂ ಹ್ಯಾ ಸಂಸಾರಾಂತ್ ಭುಕೆಂತ್ ಲೋಕ್ ವಳ್ವಳ್ತಾ, ದಿಸಾಕ್ ಎಕಾ ಜೆವ್ಣಾಚಿ ಸಯ್ತ್ ಗತ್ ನಾಸ್ತಾಂ ಲೋಕ್ ಕಿತ್ಲೊ ಲಾಚಾರ್ ಜಾಲಾ ಮ್ಹಣ್ ಹಾವೆಂ ಬರಯ್ಲಾಂ; ವೀಸ್ ದಿಸಾಂನಿ ತೀನ್ ಹಜಾರ್ ಪ್ರತಿಯೊ ವಿಖೊನ್ ಗೆಲ್ಲ್ಯೊ. ತಿಸ್ರೊ ಬೂಕ್ ’ಮನ್ಶಾಪಣ್’ ವಿಶ್ಯಾಂತ್; ಕಶೆಂ ಮನಿಸ್ ಮನ್ಶ್ಯಾಸವೆಂ ಮನಿಸ್ ಜಾವ್ನ್ ಜಿಯೆನಾ ಬಗಾರ್ ಮನ್ಜಾತ್ ಜಾವ್ನ್ ಜಿಯೆತಾ ಆನಿ ಕಶೆಂ ಎಕಾಮೆಕಾಚೆಂ ಮನ್ಶಾಪಣ್ ಲುಟ್ತಾ ಮ್ಹಳ್ಳೆಂ ಹಾವೆಂ ಪಿಂತ್ರಾಯ್ಲಾಂ; ಆನಿ ಪಂದ್ರಾ ದಿಸಾಂನಿಂಚ್ ಸಾಡೆ ತೀನ್ ಹಜಾರ್ ಪ್ರತಿಯೊ ವಿಖುನ್ ಗೆಲ್ಯೊ. ಆನಿ ’ಅನಾವರಣ್’ ಚ್ಯೊ ಪ್ರತಿಯೊ ಧಾ ದಿಸಾಂನಿ ವಿಖೊನ್ ವೆತೆಲ್ಯೊ ಮ್ಹಳ್ಳೊ ಭರ್ವಸೊ ಮ್ಹಜೊ"
ಸವಾಲಾಂ ಜಾತೆಚ್ಚ್ ಪತ್ರ್ಕರ್ತಾಂನಿ ಬರಯ್ಣಾರಾಚೆ ವೆವೆಗ್ಳ್ಯಾ ಫೋಸಾರ್ ತಸ್ವೀರೊ ಕಾಡ್ಲ್ಯೊ, ಉಭೊ ರಾವವ್ನ್, ತೊಂಡಾಚ್ಯಾ ದೆಗೆಚಿ ಫೋಸ್ ಕಾಡುನ್, ಖಾಡ್ಕೆಚೆರ್ ಹಾತ್ ದವ್ರುನ್ ಗಂಭೀರ್ ಚಿಂತ್ಚೆಪರಿಂ, ಹಾತಿಂ ಗ್ಲಾಸ್ ಧರುನ್ ಚಿಯರ್ಸ್ ಮ್ಹಣ್ಚೊ, ಬತ್ತೀಸ್ ದಾಂತ್ ಧಾಖವ್ನ್ ಕಾಂಯ್ ನೋಬೆಲ್ ಪುರಸ್ಕಾರ್ ಘೆಂವ್ಚೆಪರಿಂ ವಾ ಕಾಂಯ್ ಒಲಿಂಪಿಕ್ಸ್ ಗೋಲ್ಡ್ ಮೆಡಲ್ ಜಿಕ್ತಾನಾ ಜಾಂವ್ಚ್ಯಾ ಸಂತೊಸಾಪರಿಂ ಹಾಸೊನ್ ವೆವೆಗ್ಳೆ ಫೊಟೊ ಕಾಡ್ಲೆ. ಉಪ್ರಾಂತ್ ಹ್ಯಾ ಸರ್ವ್ ತಸ್ವೀರೆಂಚಿ ಎಕೆಕ್ ಪ್ರತಿ ದೀಂವ್ಕ್ ಸಾಂಗೊಂಕ್ ಮಾತ್ರ್ ವಿಸರ್ಲೊನಾ.
’ಅನಾವರಣ್’ ಬುಕಾಚೆಂ ಅನಾವರಣ್ ಭೋವ್ ಗಡ್ದಾಯೆನ್ ಜಾಲೆಂ
******************
ದುಸ್ರೆ ದಿಸಾ ಸರ್ವ್ ಖಬ್ರಾಳ್ಯಾ ಪತ್ರಾಂನಿ ದಾಟ್ ಅಕ್ಷರಾಂನಿ, ರಂಗಾಳ್ ತಸ್ವೀರೆಂನಿ ಸೊಭ್ಚ್ಯೊ ತಸ್ವೀರೊ ಆನಿ ವರ್ದಿ ಸಗ್ಳ್ಯಾನಿತ್ಲ್ಯಾನ್. ಟಿವಿಚೆರ್ ಸಯ್ತ್ ಹಿ ಖಬಾರ್.
ತೊ ಹರ್ಶೆಂಚ್ಯಾಕೀ ದೇಡ್ ವೋರ್ ತಡವ್ ಕರ್ನ್ ಉಟ್ಲೊ ತರ್ಯೀ, ಉಟೊನ್ ನ್ಹಾವ್ನ್ ಯೆಂವ್ಚ್ಯಾಧಿಂ ಪತ್ರಾಂಚೆರ್ ಎಕೊಡಿ ನದರ್ ಘಾಲುಂಕ್ ವಿಸರ್ಲೊನಾ.
ಸಕ್ಕಡ್ ತಾಣೆ ಮಾಂಡುನ್ ಹಾಡ್ಲ್ಲೆಪರಿಂಚ್ ಆಸ್ಲೆಂ.
ಶ್ಹೆರಾಂತ್ಲ್ಯಾ ಮಧ್ಗಾತ್ ತಾಚೊ ಬಂಗ್ಲೊ ತಾಚ್ಯಾ ಗಿರೇಸ್ತ್ಕಾಯೆಚಿ ರುಜ್ವಾತ್ ದಿತಾಲೊ. ಗ್ರೇಸ್ತ್ ಮಂತನಾಂತ್ಲೆಂ ಚೆಡುಂ ತಾಚಿ ಬಾಯ್ಲ್, ಆನಿ ದೊಗಾಂ ಭುರ್ಗಿಂ ಹಾಸ್ತಾಲಿಂ, ರಡ್ತಾಲಿಂ, ಹಾಗ್ತಾಲಿಂ ಮುತ್ತಾಲಿಂ ಸರ್ವ್ ಇಂಗ್ಲಿಶಾಂತ್.
ಎಕಾ ತೆಂಪಾರ್ ಲೊಣ್ಚೆಂ ವಿಖುನ್ ದೀಸ್ ಕಾಡುಂಕ್ಯೀ ಕಶ್ಟಾಲ್ಲೊ ತೊ ಆಜ್ ಖಂಯ್ ಥಾವ್ನ್ ಖಂಯ್ ಪಾವ್ಲ್ಲೊ? ಆಜ್ ತೊ ಏಕ್ ಹೈಫೈ ಸಾಹಿತಿ. ತಾಚಿ ಸಳಾವಳ್ ಸಾಹಿತ್ಯ್ ಅಕಾಡೆಮಿ ಪ್ರಸಸ್ಥಿ ಜಿಕ್ಪ್ಯಾಂ ಸವೆಂ ವಾ ಅಂತರ್ರಾಶ್ಟ್ರೀಯ್ ಸಾಹಿತಿಸವೆಂ ಮಾತ್ರ್.
ಆತಾಂ ತಾಕಾ ಮಾನ್ ಕಿತೆಂ ಮರ್ಯಾದ್ ಕೆದಿ? ಸಾಹಿತಿಕ್ ಸಮ್ಮೇಳನಾಂನಿ ತೊ ಮಾನಾಚೊ ಸಯ್ರೊ. ಸಾಹಿತಿಕ್ ಸ್ಪರ್ಧ್ಯಾಂನಿ ತೊಚ್ಚ್ ಅಂತಿಮ್ ವೊರಾಯ್ಣಾರ್. ತಾಚ್ಯಾ ಸಾಹಿತ್ಯಾಚೆರ್ ಅಧ್ಯಯನ್ ಚಲ್ತಾ. ಇಸ್ಕೊಲಾಂನಿ ತಾಚ್ಯಾ ಸಾಹಿತ್ಯಾಕ್ ಶಿಕ್ತಾತ್ ಭುರ್ಗಿಂ. ತಾಚ್ಯಾ ನಾಂವಾರ್ ಪ್ರಶಸ್ಥ್ಯೊ ವಾಂಟ್ತಾತ್. ತಾಚೊ ಅಭಿಮಾನಿ ಪಂಗಡ್ ಆಸಾ ಆನಿ ತಾಚ್ಯಾ ಸಾಹಿತ್ಯಾಚೊ ವಿರೋದ್ ಕೆಲ್ಲ್ಯಾಂಕ್ ನಾಸ್ ಕರ್ಚಿ ತಾಚಿ ಶ್ಯಾಥಿ. ತಾಚೆಂ ಪ್ರಸ್ತಾವನ್ ಆಸ್ಚ್ಯಾ ಖಂಚ್ಯಾಯ್ ಬುಕಾಂಕ್ ಪ್ರಶಸ್ಥಿ ಲಾಭ್ಲಿ ಮ್ಹಳ್ಳೊ ಅರ್ಥ್. ತಿತ್ಲೆಂಚ್ ಕಿತ್ಯಾಕ್? ಖಂಯ್ಚಿ ಖಬಾರ್ ಸಾಹಿತಿಕ್ ಖಬಾರ್ ಆನಿ ಖಂಚಿ ನ್ಹಯ್ ತೆಂ ಹಾಣೆಂಚ್ ನಿರ್ಣಯ್ ಕೆಲ್ಯಾರ್ ಜಾತಾ. ದೆಕುನ್ ಕೊಣಾಚ್ಯೊ ಖಬ್ರೊ ಕರ್ಚ್ಯೊ ಆನಿ ಕೊಣಾಚ್ಯೊ ನ್ಹಯ್ ಮ್ಹಳ್ಳೆಂ ಹಾಚೆಂಚ್ ಫಯ್ಸಲ್.
ಸಕ್ಕಡ್ ಆಪ್ಲ್ಯಾ ಮಿನತೆನ್ ಆನಿ ಪರಿಶ್ರಮಾನ್ ಮ್ಹಳ್ಳೆಂ ತಾಚೆಂ ಚಿಂತಾಪ್.
**********************
ಅಕಾಡೆಮಿನ್ ವರ್ಸಾನ್ ವರಸ್ ಮಾಂಡುನ್ ಹಾಡ್ಚೊ ಸಾಹಿತಿಕ್ ಸ್ಪರ್ಧೊ ತ್ಯಾ ವರ್ಸಾಯ್ ಆಯೋಜಿತ್ ಕೆಲ್ಲೊ. ಮಟ್ವ್ಯಾ ಕಾಣ್ಯಾಂಚೊ ವೊರಾಯ್ಣಾರ್ ಜಾವ್ನ್ ಹ್ಯಾ ವರ್ಸಾಯ್ ತೊ ಆಸ್ಲ್ಲೊ.
ಚಡುಣೆಂ ಸಾಠ್ ಸತ್ತರ್ ಮಟ್ವ್ಯೊ ಕಾಣ್ಯೊ ಸ್ಪರ್ಧ್ಯಾಕ್ ಆಯಿಲ್ಲ್ಯೊ ಆನಿ ತಾಂತುಂ ವಿಂಚ್ಣಾರ್ ಧಾ ಕಾಣ್ಯಾಂಕ್ ಹೆರ್ ವೊರಾಯ್ಣಾರಾಂನಿ ವಿಂಚುನ್ ಕಾಡ್ಲ್ಲ್ಯೊ. ಸತ್ ಸಾಂಗ್ಚೆಂ ತರ್ ಹಾಕಾ ಕಾಣ್ಯಾಂಚೊ ಪಯ್ಲೊ ಪ್ಯಾರಾ ವಾಚ್ತಾನಾಂಚ್ ಕಳ್ತಾ ಹ್ಯಾ ಕಾಣ್ಯೆಚೊ ಬರವ್ಪಿ ಕೊಣ್ ಮ್ಹಳ್ಳೆಂ. ತಿತ್ಲಿ ಚುರುಕ್ ತಕ್ಲಿ ಹಾಚಿ.
ಧಾ ಕಾಣ್ಯಾಂಕ್ ಘೆವ್ನ್ ಹೊ ಆತಾಂ ವೊರಾಂವ್ಕ್ ಬಸ್ಲಾ.
ಎಕೆಕ್ಚ್ ಕಾಣಿ ತೊ ಚೀತ್ ದೀವ್ನ್ ವಾಚ್ತಾ,
ತಾಂತುಂ ಬರಯ್ಣಾರಾಂಚಿಂ ನಾಂವಾಂ ನಾಂತ್, ಕೊಣಾಚೆಂ ಹಾತ್ ಬರಾಪ್ ಮ್ಹಣ್ ಧರುಂಕ್ ಜಾಯ್ನಾಂತ್, ಕಿತ್ಯಾಕ್ ಮ್ಹಳ್ಯಾರ್ ಕಾಣ್ಯೊ ಟೈಪ್ ಕೆಲ್ಯಾತ್. ಸರ್ವ್ ಎಕ್ಚ್ಚ್ ಲೇಕ್ ದಿಸ್ತಾತ್.
ತರ್ಯೀ ತಾಚೆಂ ಗಮನ್ ಎಕಾ ಕಾಣ್ಯೆಚೆರ್ ಗೆಲೆಂಚ್, ತ್ಯಾ ಕಾಣ್ಯೆಚೆಂ ನಾಂವ್ ’ಅನಾವರಣ್’.
ಹ!... ಅಪ್ಲ್ಯಾ ಬುಕಾಚೆಂ ನಾಂವ್ ಚೊರಿ ಕರ್ನ್ ಸ್ಪರ್ಧ್ಯಾಕ್ ಕಾಣಿ ಧಾಡ್ಲ್ಯಾ!
ತೊ ಮತಿಂತ್ ಚಿಂತುನ್ ವೊರಾಂವ್ಕ್ ಬೊಸ್ಲೊ.
ಎಕಾ ಗರೀಬ್ ಚೆಡ್ವಾಚಿ ಕಾಣಿ ತಿ.
ಆಪ್ಲ್ಯಾ ಶೆಜಾರ್ಚ್ಯಾ ಎಕ್ಲ್ಯಾ ತರ್ನಾಟ್ಯಾಕ್ ತಾಚ್ಯಾ ಜಿಣ್ಯೆಂತ್ ಏಕ್ ಬರೊ ಫುಡಾರ್ ಭಾಂದುನ್ ದಿಂವ್ಚ್ಯಾಕ್ ಕರ್ಚ್ಯಾ ಎಕೆಕಾ ಮಿನತೆಚಿ ಕಾಣಿ.
ತಿ ಸಯ್ತ್ ತಿಚ್ಯಾ ಕುಟ್ಮಾಂತ್ ಮಾಲ್ಘಡಿ, ತಿಚೆ ಪಾಟ್ಲ್ಯಾನ್ ತೆಗಾಂ ಭಯ್ಣಿಂ, ತಿಚಿ ಆವಯ್ ಖೆವಾದ್ ಪಿಡೆಸ್ತಿಣ್ ದೆಕುನ್ ಕುಟಾಮ್ ಚಲಂವ್ಚೊ ಸಗ್ಳೊ ಹಾರ್ಭಾರ್ ತಿಚೆರ್, ಕಿತ್ಯಾಕ್ ತಿಚೊ ಬಾಪುಯ್ ಸರ್ಲ್ಲೊ. ತಿಕಾ ಹ್ಯಾ ಶೆಜಾರ್ಚ್ಯಾ ತರ್ನಾಟ್ಯಾಚೆರ್ ಭಿರ್ಮೊತ್ ಯೇಂವ್ಕ್ಯೀ ಹೆಂಚ್ ಕಾರಣ್; ತಾಚೊಯ್ ಬಾಪುಯ್ ಲ್ಹಾನ್ ಪ್ರಾಯೆರ್ ಸರ್ಲ್ಲೊ.
ಗುಣಾನ್ ಇತ್ಲೆಂ ಮೊಗಾಳ್ಗೀ, ರುಪಾನ್ಯೀ ತಿತ್ಲೆಂಚ್ ಮಾಣಿಕ್ ಜಾವ್ನಾಸ್ಚೆಂ ಚೆಡುಂ ಅಪ್ಣಾಕ್ ಶಿಕೊಂಕ್ ಮನ್ ಆಸ್ಲ್ಯಾರ್ಯೀ, ಆಪ್ಲ್ಯಾ ಭಯ್ಣ್ಯಾಂಚ್ಯಾ ಫುಡಾರಾ ಪಾಸತ್ ಸಾಕ್ರಿಫಿಸ್ ಕರುನ್ ಎಕಾ ದಫ್ತರಾಂತ್ ಕಾಮ್ ಕರ್ತಾ ಆನಿ ತಿಕಾ ಮೆಳ್ಚ್ಯಾ ಪಾಗಾಂತ್ ತಿಚೆಂ ಘರ್ ಚಲ್ತಾಲೆಂ. ಆನಿ ಕಾಂಯ್ ಉರವ್ಯೆತ್ ಜಾಲ್ಲ್ಯಾ ಪೊಯ್ಶ್ಯಾಂನಿ ತಿಣೆ ಹ್ಯಾ ತರ್ನಾಟ್ಯಾಕ್ ಶಿಕ್ಪಾಕ್ ದೀಂವ್ಕ್ ಚಿಂತ್ಲೆಂ.
ಅಶೆಂ ಪಳೆಲ್ಯಾರ್ ತಿಂ ಕಾಂಯ್ ರಗ್ತಾ ಸಂಬಂಧಿ ನ್ಹಯ್, ಮನ್ಶಾಪಣಾ ಶಿವಾಯ್ ಕಸ್ಲೊಚ್ ಸಂಬಂಧ್ ತಾಂಕಾಂ ನಾ, ತರ್ಯೀ ತಿಣೆಂ ಫಾಲೆಂ ಚಿಂತಿನಾಸ್ತಾಂ ತ್ಯಾ ತರ್ನಾಟ್ಯಾಕ್ ಶಿಕಾಪ್ ದಿಲೆಂ.
ವರ್ಸಾಂ ಪಾಶಾರ್ ಜಾಲಿಂ, ತಿಚ್ಯೊ ತೆಗಿ ಭಯ್ಣ್ಯೊ ಇಸ್ಕೊಲ್ ಸಂಪವ್ನ್ ಕೊಲೆಜಿಕ್ ಸೆರ್ವಲ್ಯೊ, ತೊ ತರ್ನಾಟೊ ಕೊಲೆಜ್ ಸಂಪವ್ನ್ ಕಾಮಾಕ್ ಲಾಗ್ಲೊ, ಪುಣ್ ಸಾಂಬಾಳ್ ಭೋವ್ ಉಣೊ.
ಹ್ಯಾ ಮಧೆಂ ತ್ಯಾ ಚಲಿಯೆಚೆಂ ಕಾಳಿಜ್ ತಿಕಾ ಕಳಾನಾಸ್ತಾಂಚ್ ತ್ಯಾ ತರ್ನಾಟ್ಯಾಚೆರ್ ಭುಲ್ಲೆಂ ಆನಿ ತಿ ಕಿತೆಂಚ್ ಪರಿಣಾಮ್ ನೆಣಾಸ್ತಾಂ ತಾಚ್ಯಾ ಮೊಗಾರ್ ಪಡ್ಲಿ.
ತರ್ನಾಟೊ ಕಸೊ ನಾ ಮ್ಹಣ್ತಲೊ? ತಾಚಿ ಕೊಲೆಜ್ ಸಂಪವ್ನ್ ಪೋಸ್ಟ್ ಗ್ರಾಜುಯೇಶನ್ ಶಿಕೊಂಕ್ ಲಾಗ್ಲೊ, ತೆಂಯೀ ತ್ಯಾ ಚಲಿಯೆಚ್ಯಾ ಆಧಾರಾನ್.
ತಿಚ್ಯಾ ಮೊಗಾಂತ್ ಕಸ್ಲೊಚ್ ಸ್ವಾರ್ಥ್ ನಾತ್ಲ್ಲೊ, ಲೈಂಗಿಕ್ ಭುಕ್ ನಾತ್ಲ್ಲಿ - ಫಕತ್ತ್ ನಿತಳ್ ಮೋಗ್.
ಅಶೆಂ ಪಳೆಂವ್ಕ್ ಗೆಲ್ಯಾರ್ ತಿಕಾ, ತಿಚ್ಯಾ ಲ್ಹಾನ್ ಪ್ರಾಯೆರ್ ಬಾಪುಯ್ ಸರ್ತಾನಾ, ತಿಕಾ ಭಾವ್ಯೀ ನಾತ್ಲ್ಲ್ಯಾನ್ ಚೆಡ್ಯಾಂಚೊ ಮೋಗ್ ಮ್ಹಳ್ಯಾರ್ ಕಿತೆಂ ಮ್ಹಣ್ ಸಮ್ಜೊಂಕ್ ಜಾಲ್ಲೆಂಯೀ ನಾ. ತಿಣೆಂ ಮೋಗ್ ಕರ್ಯೆತ್ ಜಾಲ್ಲೊ ಭೋವ್ಶಾ ಎಕ್ಲೊಚ್ಚ್ ಜಾವ್ನಾಸ್ಲೊ ತೊ ತರ್ನಾಟೊ.
ಪರತ್ ವರಸ್ ಪಾಶಾರ್ ಜಾಲೆಂ. ತರ್ನಾಟೊ ಶಿಕ್ಲೊ, ಪೋಸ್ಟ್ ಗ್ರಾಜುಯೇಶನ್ ಕೆಲೆಂ. ಬರೆ ಮಾರ್ಕ್ಸ್ ಕಾಡ್ನ್ ಪಾಸ್ ಜಾಲೊ. ಗಾಂವಾಂತ್ ಕಾಮ್ ಮೆಳ್ತಾ ಜಾಲ್ಯಾರ್ಯೀ, ಬರೊ ಸಾಂಬಾಳ್ ನಾ ದೆಕುನ್ ಪರ್ಗಾಂವಾಕ್ ವಚೊಂಕ್ ಚಿಂತಿಲಾಗ್ಲೊ.
ಎಕಾ ದಿಸಾ ತಿಣೆ ಧಯ್ರ್ ಕರ್ನ್ ಅಪ್ಲ್ಯಾ ಕಾಳ್ಜಾಂತ್ ಲಿಪವ್ನ್ ದವರ್ಲ್ಲಿಂ ಭಗ್ಣಾಂ ತಾಚೆ ಸಮೊರ್ ದವ್ರುಂಕ್ ಚಿಂತ್ಲೆಂ. ತಿ ಗರ್ಜ್ ನಾತ್ಲ್ಲಿ ಮ್ಹಣ್ ಜಾಣಾಸೊನ್ಯೀ.
ತಿಣೆ ಎದೊಳ್ಚ್ಯಾ ತಿಚ್ಯಾ ಜಿಣ್ಯೆಂತ್ ಫಕತ್ತ್ ದಿಲ್ಲೆಂ ಶಿವಾಯ್ ಘೆವ್ನಾ. ತ್ಯಾ ಶಿವಾಯ್ ತಿಕಾ ಹೊ ಮೋಗ್ ತಿಣೆ ಕೆಲ್ಲ್ಯಾ ಕಸ್ಲ್ಯಾಯ್ ಸಾಕ್ರಿಫಿಸಾಚೊ ಪ್ರತಿಫಳ್ ಮ್ಹಣ್ ಕರುಂಕ್ ನಾಕಾಸ್ಲ್ಲೆಂ.
ತಿ ನೊವಿ ಕ್ಲಾಸ್ ಶಿಕ್ಲ್ಲಿ ಚಲಿ ಆನಿ ಹೊ ಪೋಸ್ಟ್ ಗ್ರಾಜುಯೆಟ್ ಚಲೊ.
ದೊಗಾಂನಿ ತಾಂಚ್ಯಾ ಎಕಾ ಸಾಮಾನ್ಯ್ ಮಿತ್ರಾ ಮುಖಾಂತ್ರ್ ಸಂಪರ್ಕ್ ಕರ್ಚೊ ನಿರ್ಣಯ್ ಕೆಲೊ.
ಅಜ್ಯಾಪ್! ಅಜೂನ್ ಸಯ್ತ್ ಮೊಗಾಚಿ ಉಚಾರ್ಣಿ ಅಪ್ಲ್ಯಾ ತೊಂಡಾಂತ್ ಕರುಂಕ್ ಕಾಳ್ಜಾಚೆ ಧಡ್ಧಡೆ! ವಾ ಅವ್ಯಕ್ತ್ ಭಾಂದ್ಪಾಸ್!?
ಬರೆಂ!
ತಿಣೆಂ ಅಪ್ಲೆ ಕಾಳ್ಜಾಂತ್ಲೆ ಉಮಾಳೆ ಉತ್ರಾಂನಿ ಪಿಂತ್ರಾಯ್ಲೆ;
"ಮೊಗಾ,
ಹಾಂವ್ ಕಶೆಂ ಉಚಾರುಂ ಸಮ್ಜಾನಾ,
ಜೆದ್ನಾಂ ಮ್ಹಾಕಾ ’ಆಶಾ’ ಮ್ಹಳ್ಯಾರ್ ಕಿತೆಂ ಮ್ಹಣ್ ಸಮ್ಜೊಂಖ್ ಲಾಗ್ಲೆಂ, ತೆದ್ನಾಂ ಹಾವೆಂ ಕೆಲ್ಲಿ ಆಶಾ ಎಕ್ಚ್ಚ್,
ಜೆದ್ನಾಂ ಮ್ಹಾಕಾ ’ಮೋಗ್’ ಕಿತೆಂ ಮ್ಹಣ್ ಸಮ್ಜೊಂಕ್ ಲಾಗ್ಲೊ, ತೆಧಾಂ ಹಾವೆಂ ಮೋಗ್ ಕೆಲ್ಲೊ ಎಕ್ಲ್ಯಾಚೊಚ್ಚ್,
ಮ್ಹಜ್ಯಾ ಜಿಣ್ಯೆಂತ್ ’ದಾದ್ಲೊ’ ಕೊಣ್ಯೀ ಆಸಾ ತರ್, ತೊ ಮ್ಹಜ್ಯಾ ಕಾಳ್ಜಾ ಗೊಪಾಂತ್ ಆಸಾ, ಮ್ಹಜ್ಯಾ ಶಿರಾಂ ಶಿರಾಂನಿ ತಾಚೊ ಮೋಗ್ ಭರೊನ್ ವೊಮ್ತೊನ್ ಆಸಾ, ಆನಿ ತೊ ತುಂಚ್.
ಪುಣ್ ಮ್ಹಜ್ಯಾ ಮೊಗಾಕ್ ಹಾಂವ್ ತುಕಾ ಭಾಂದ್ಪಾಸ್ ಕರುಂಕ್ ಆಶೆನಾ, ಬಗಾರ್ ತುಜ್ಯಾ ಕಾಳ್ಜಾಂತ್ಲ್ಯಾ ಪ್ರಾಮಾಣಿಕ್ ಉಮಾಳ್ಯಾಂಕ್ ಆಯ್ಕೊಂಕ್ ಆಶೆತಾಂ, ಜಾಣಾಸೊನ್ಯೀ, ತುಂ ಮ್ಹಜ್ಯಾ ಮೊಗಾಂತ್ ಲಾಸೊನ್ ಆಸಾಯ್ ಮ್ಹಳ್ಳೆಂ. ಜಾಣಾಸೊನ್ಯೀ ತುಂ ಫಕತ್ತ್ ಮ್ಹಜೊ ಮ್ಹಳ್ಳೆಂ.
ತುಜೆಂ, ಫಕತ್ತ್ ತುಜೆಂ"
ಹೆಂ ಕಾಗಾದ್ ಬರಂವ್ಕ್ ತಿಕಾ ಕಶಿಂ ಉತ್ರಾಂ ಮೆಳ್ಳಿಂ ತೆಂ ಖುದ್ದ್ ತೆಂಚ್ ನೆಣಾಂ.
ಕಾಗಾದ್ ತಿಚ್ಯಾ ಇಶ್ಟಿಣೆ ಮುಖಾಂತ್ರ್ ತಾಕಾ ಪಾವ್ಲೆಂ. ಎಕಾಚ್ ದಿಸಾ ತಾಚಿ ಜಾಪ್ಯೀ ಆಯ್ಲಿ;
"ಹಾಂವ್ ತುಜ್ಯಾ ಉಪ್ಕಾರಾಚೆಂ ವೊಜೆಂ ವ್ಹಾವವ್ನ್ ಆಸಾಂ ಖರೆಂ, ಪುಣ್ ಮ್ಹಜಿ ಪರಿಗತ್ ಸಮ್ಜೊಂಚಿ ಶ್ಯಾಥಿ ತುಕಾ ಆಸಾ ವಾ ನಾ ತೆಂ ನಾಂವ್ ನೆಣಾಂ, ಮ್ಹಾಕಾ ಸಮಾಜೆಚೆಂ ಅಂತಸ್ಥ್ ಪಳೆಂವ್ಕ್ ಆಸಾ, ಮ್ಹಜ್ಯಾ ಅಂತಸ್ತೆಚೆಂ ಚೆಡುಂ ಸೊಧುಂಕ್ ಆಸಾ, ಮ್ಹಜ್ಯಾ ಉಂಚ್ಲ್ಯಾ ಫುಡಾರಾಚಿಂ ಸ್ವಪ್ಣಾಂ ಖರಿಂ ಕರುಂಕ್ ಆಸಾತ್, ದೆಕುನ್ ತುಂ ಮ್ಹಜ್ಯಾ ಅಂತಸ್ಥಾಕ್ ಫಾವೊ ಜಾಲ್ಲೆಂ ಚೆಡುಂ ನ್ಹಯ್ ಮ್ಹಳ್ಳೆಂ ಸತ್ ತುವೆಂ ಆತಾಂ ತರ್ಯೀ ಸಮ್ಜೊನ್ ಘೆತ್ಲ್ಯಾರ್ ಭೋವ್ ಬರೆಂ. ದೆಕುನ್ ದಯಕರುನ್ ಮ್ಹಜಿ ಪಾಟ್ ಸೊಡ್"
ತಿಚ್ಯಾ ಜಿಣ್ಯೆಂತ್ ಪಯ್ಲೆ ಪಾವ್ಟಿಂ ಇತ್ಲ್ಯಾ ನಿಷ್ಟುರ್ ಘಡ್ಯೆಕ್ ಭೆಟ್ಚೆಂ.
ತಿಣೆಂ ತಿಚೆಂ ಕಾಳಿಜ್ ತಿಚೆ ಸಮೊರ್ ಕೊಸ್ಳೊನ್ ಪಡ್ತಾನಾ ಸಯ್ತ್ ಏಕ್ ಥೆಂಬೊ ದೂಕ್ ಆಪ್ಲ್ಯಾ ದೊಳ್ಯಾಂನಿ ಗಳಯ್ಲೆಂ ನಾ.
ತಿ ಜಿಯೆತಾಲಿ, ಜಿಯೆವ್ನ್ ಆಸ್ಲ್ಲಿ, ಜಿಣ್ಯೆಚೆ ಎಕೆ ಮಿಸ್ತೆರ್ ಸಮ್ಜೊನ್ ಜಿಯೆತಾಲಿ.
ಕಾಣ್ಯೆಚೆ ಅಖೇರಿಕ್ ದಿಲ್ಲೊ ಶ್ಹರೊ ಅಸೊ ಆಸ್ಲೊ;
’ಭುಕೆನ್ ವ್ಹಳ್ವಳ್ತೆಲ್ಯಾ ಕೊಣಾಯ್ಕೀ ಸಮಾಜೆಚೆಂ ಸ್ಥಾನ್-ಮಾನ್, ವಾ ಅಂತಸ್ಥ್ ನ್ಹಯ್, ಬಗಾರ್ ಏಕ್ ಘಾಸ್ ಶಿತ್ ಮಾತ್ರ್ ಭುಕ್ ಥಾಂಭವ್ಕ್ ಸಕ್ತಾ. ಸಾಹಿತಿಚ್ಯಾ ಜಿಣ್ಯೆಕ್ ’ಸಾಹಿತ್ಯಾನ್’ ಆನಾವರಣ್ ಕರಿಜಾಯ್, ವಾ ತ್ಯಾ ದಿಶೆಂತ್ ಏಕ್ ವಾಟ್ ಆಸಾ ಕರುನ್ ದೀಜಾಯ್. ’ಸಾಹಿತಿಕ್ ಜಯ್ತ್’ ಮ್ಹಳ್ಯಾರ್ ತಾಣೆಂ ಕೊಣಾಕ್ ಕಿತ್ಲೆ ಪಾವ್ಟಿಂ ಕಶೆಂ ಆನಿ ಕಿತ್ಲೆಂ ಮಟ್ಟಾಕ್ ಫಟಯ್ಲಾಂ ಮ್ಹಳ್ಲ್ಯಾಚೆರ್ ನ್ಹಯ್, ಬಗಾರ್ ಅಪ್ಣಾಕ್ಚ್ ಅಪುಣ್ ಕಿತ್ಲೆ ಪಾವ್ಟಿಂ ಪ್ರಾಮಾಣಿಕ್ ಜೀಣ್ ಜಿಯೆವ್ನ್ ಧಾಖಯ್ಲಾಂ ಮ್ಹಳ್ಳ್ಯಾಚೆರ್ ಆಸಾಜಯ್. ತವಳ್ ಮಾತ್ರ್ ಎಕಾ ಸಾಹಿತಿನ್ ಆಪ್ಲ್ಯಾ ಸಾಹಿತ್ಯಾಕ್ ಸಮಾಜೆಸಮೊರ್ ’ಅನಾವರಣ್’ ಕರುಂಕ್ ಸಾಧ್ಯ್.
************
ಕಾಣಿಂ ವಾಚುನ್ ತಾಕಾ ಹ್ಯಾ ಕಾಣ್ಯೆಚಿ ಲೇಖಕಿ ಕೊಣ್ ಮ್ಹಳ್ಳೆಂ ಮಾತ್ರ್ ಸ್ಪಷ್ಟ್ ದಿಸೊನ್ ಯೆತಾನಾ ತೊ ಅರ್ಥ್ ನಾತ್ಲ್ಲ್ಯಾ ಉದ್ವೇಗಾಂತ್ ಭರೊನ್ ಯೆತಾಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
