ಕವಿತಾकविताPoem
ಆನಂದ್
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾದಾಯ್ಜ್ - 8
ಆನಂದ್ ಬಕ್ಶಿ
ನೀಜ್ ನಾಂವ್ : ಆನಂದ್ ಬಕ್ಷಿ.
ಜನನ್ : 21 ಜುಲಾಯ್ 1930.
ಮರಣ್ : 30 ಮಾರ್ಚ್ 2002.
ಜಲ್ಮಾಲ್ಲೊ ಗಾಂವ್ : ರಾವಲ್ಪಿಂಡಿ (ಪಾಕಿಸ್ತಾನ್).
ಶಿಕಾಪ್ : ಆಟ್ವಿ ಕ್ಲಾಸ್ ಪರ್ಯಾಂತ್.
ವಳೊಕ್:
ಅಪ್ಣಾಯಿಲ್ಲ್ಯೊ ಪ್ರಶಸ್ತ್ಯೊ :
1978 ಇಸ್ವೆಂತ್ ’ಅಪ್ನಾಪನ್’ ಫಿಲ್ಮಾಕ್ ತಾಣೆ ಲಿಖ್ಲ್ಲ್ಯಾ ಪದಾಂಕ್ ಫಿಲ್ಮ್ಫೇರ್ ಪ್ರಶಸ್ತಿ.
1981 ಇಸ್ವೆಂತ್ ’ಏಕ್ ದೂಜೆ ಕೆ ಲಿಯೆ’ ಫಿಲ್ಮಾಕ್ ತಾಣೆ ಲಿಖ್ಲ್ಲ್ಯಾ ’ತೆರೆ ಮೆರೆ ಬೀಚ್ಮೆ’ ಪದಾಕ್ ಫಿಲ್ಮ್ಫೇರ್ ಪ್ರಶಸ್ತಿ.
1995 ಇಸ್ವೆಂತ್ ’ದಿಲ್ವಾಲೆ ದುಲನಿಯಾಂ ಲೇಜಾಯೆಂಗೆ’ ಫಿಲ್ಮಾಕ್ ತಾಣೆ ಲಿಖ್ಲ್ಲ್ಯಾ ’ಘರ್ ಆಯಾ’ ಪದಾಕ್ ಫಿಲ್ಮ್ಫೇರ್ ಪ್ರಶಸ್ತಿ.
1999 ಇಸ್ವೆಂತ್ ’ತಾಲ್’ ಫಿಲ್ಮಾಕ್ ತಾಣೆ ಲಿಖ್ಲ್ಲ್ಯಾ ’ಇಶ್ಕ್ ಬಿನಾ’ ಪದಾಕ್ ಫಿಲ್ಮ್ಫೇರ್ ಪ್ರಶಸ್ತಿ.
2000 ಇಸ್ವೆಂತ್ ’ಮೊಹಬ್ಬತೇಂ’ ಫಿಲ್ಮಾಚಾ ಪದಾಂಕ್ ಸ್ಕ್ರೀನ್ ಪ್ರಶಸ್ತಿ.
ಹಾಣೆಂ ಪದಾಂ ಬರಯಿಲ್ಲಿಂ ಫಿಲ್ಮಾಂ : 500 ವಯ್ರ್.
ಪದಾಂ/ಕವಿತಾ/ಗಝಲಾಂ : 4000 ವಯ್ರ್.
ಸುರ್ವಿಲ್ಲೆ ದೀಸ್ ಆನಿಂ ತಾಚಿ ಸಾಹಿತಿಕ್ ಸುರ್ವಾತ್ :
ಸ್ವಾತಂತ್ರ್ ಪೂರ್ವ್ ಕಾಳಾರ್ ಆತಾಂಚಾ ಪಾಕಿಸ್ತಾನಾಂತ್ ಆಸ್ಲ್ಲ್ಯಾ ಆನಂದ್ ಬಕ್ಷಿಚಾ ಕುಟ್ಮಾಚೆ ಚಡಾವತ್ ಸಾಂದೆ ಮಿಲಿಟರಿ ಯಾ ಬೆಂಕಾಂನಿ ಕಾಮ್ ಕರ್ನ್ ಆಸ್ಲ್ಲೆ ದೆಕುನ್ ಆನಂದ್ ಬಕ್ಷಿಕ್ ಮಿಲಿಟರಿಂತ್ ಏಕ್ ಸಾದೆಂ ಕಾಮ್ ಕರಿಲಾಗ್ಲೊ. ಪುಣ್ ರೆಡಿಯೊಚೆರ್ ಪದಾಂ ಆಯ್ಕೊಂವ್ಚೆಂ, ಗಾಂವ್ಚೆಂ ಪಿಶೆಂ ಆಸ್ಲ್ಲ್ಯಾ ಹಾಣೆಂ ಪದಾಂ ಲಿಖ್ಚಾಂತ್ ಆಸಕ್ತ್ ಧಾಕಂವ್ಕ್ ಸುರು ಕೆಲೆಂ.
ತಾಚಾ ತರ್ನಾಟ್ಪಣಾಚೊ ಚಡ್ ವಿವರ್ ಸಾರ್ಕೆ ರಿತಿರ್ ಮೆಳಾನಾ ತರ್ಯ್ ಕಶೆಂ ಪುಣೀಂ ಬೊಂಬೊಯ್ ಯೇವ್ನ್ ಫಿಲ್ಮಾಂನಿ ಕಾಮ್ ಕರಿಜಾಯ್ ಮ್ಹಳ್ಳ್ಯಾ ಹಠಾನ್, ಕರಾಚಿಂತ್ ನೇವಿಂತ್ ಕಾಮ್ ಕೆಲೆಂ. ಉಪ್ರಾಂತ್ ಮ್ಹಣ್ಜೆ 1947 ಇಸ್ವೆಂತ್ ಆನಂದ್ ಬಕ್ಷಿ, ಪಾಕಿಸ್ತಾನ್ ಸೊಡ್ನ್ ಆಪ್ಲ್ಯಾ ಗಾಂವಾಕ್ ಲಖ್ನೊ ಆಯ್ಲೊ ಆನಿಂ ಟೆಲೆಫೊನ್ ಒಪರೇಟರ್ ಜಾವ್ನ್ ಕಾಮ್ ಕರಿಲಾಗ್ಲೊ. ಉಪ್ರಾಂತ್ ತೊ ಬೆಂಕಾಂತ್ ಕಾಮ್ ಕರಿಲಾಗ್ಲೊ 1956 ಇಸ್ವೆ ಪರ್ಯಾಂತ್.
ಉಪ್ರಾಂತ್ ತೊ ಬೊಂಬೊಯ್ ಆಯ್ಲೊ ಎಕ್ಚ್ ಪದಾಂ ಲಿಖ್ಚಾ ಯಾ ಪದಾಂ ಗಾಂವ್ಚಾ ಇರಾದ್ಯಾನ್. ತಾಣೆಂ ಅಪ್ಲ್ಯಾ ಕಾಮಾಚಿ ಸುರ್ವಾತ್ ಮಿಲಿಟರಿಂತ್ ಕಾಮ್ ಕರುನ್ ಕೆಲಿ. ಚಡುಣೆಂ ತೀನ್ ವರ್ಸಾಂ ತಾಣೆಂ ಕಾಮ್ ಕೆಲೆಂ ಆನಿಂ ಉಪ್ರಾಂತ್ ಬೊಂಬೊಯ್ ಪಾವ್ಲೊ ಆನಿಂ ಏಕ್ ಬರವ್ಪಿ ಜಾವ್ನ್ ಅಪ್ಲಿ ಅಸ್ಮಿತ್ಕಾಯ್ ರುತಾಂ ಕರುಂಕ್ ಜಾಯ್ತೊ ವದ್ದಾಡ್ಲೊ ತರ್ಯೀ ಸಲ್ವೊನ್ ಪರತ್ ಪಾಟಿಂ ಮಿಲಿಟರಿಂತ್ ಕಾಮ್ ಕರುಂಕ್ ಗೆಲೊ ಕಠೀಣ್ ಮಾನಸಿಕ್ ವಳ್ವಳೆ ಭೊಗೊನ್.
ಪುಣ್ ಥೊಡೊಚ್ ಕಾಳ್ - ಕಾಜಾರ್ಯೀ ಜಾಲೊ, ಬಾಯ್ಲೆಕ್ ಆನಿಂ ಆನಿಂ ಧುವೆಕ್ ಘೆವುನ್ ಪರ್ತುನ್ ಬೊಂಬೊಯ್ ಆಯ್ಲೊ, ಆನಿಂ ಸುರ್ವಿಲ್ಲ್ಯಾ ದಿಸಾಂನಿ ತಾಣೆಂ ಕಠೀಣ್ ಪರಿಶ್ರಮ್ ಕರಿಜಾಯ್ ಪಡ್ಲೆಂ. ಎಕಾ ಸ್ಟುಡಿಯೊ ಥಾವ್ನ್ ಅನ್ಯೇಕಾ ಸ್ಟುಡಿಯೊಕ್ ಧಾಂವ್ಲೊ. ತೆಚ್ಚ್ ವೆಳಾರ್ ಖ್ಯಾತ್ ಮರಾಠಿ ನಟ್ ಜಾವ್ನಾಸ್ಲ್ಲ್ಯಾ ಭಗ್ವಾನಾನ್ 1958 ಇಸ್ವೆಂತ್ ’ಭಡಾ ಆದ್ಮಿ’ ಮ್ಹಳ್ಳ್ಯಾ ಫಿಲ್ಮಾಂತ್ ಚಾರ್ ಪದಾಂ ಲಿಖ್ಚಾಕ್ ಪಯ್ಲೊ ಆವ್ಕಾಸ್ ದಿಲೊ ಆನಿಂ ದೆಡ್ಶೆಂ ರುಪಯ್ ಸಂಭಾವನ್ ದಿಲೆಂ.
ಪುಣ್ ಫಿಲ್ಮ್ ತಿತ್ಲೆಂ ಚಲ್ಲೆಂ ನಾ ದೆಕುನ್ ಆನಂದ್ ಬಕ್ಶಿಚೆಂ ನಾಂವ್ ಸರ್ವಾಂಕ್ ವಳ್ಕಿಚೆಂ ಜಾಲೆಂನಾ. ಹಾಂತುಂ ಕಠೀಣ್ ನಿರಾಶಿ ಆನಿಂ ದುಖೇಸ್ತ್ ಜಾಲ್ಲೊ ಆನಂದ್ ಬಕ್ಷಿ ಡೆಲ್ಹಿಕ್ ಪಾವ್ಲೊ ಆನಿಂ ಮೋಟಾರ್ ಮೆಕ್ಯಾನಿಕ್ ಜಾವ್ನ್ ಕಾಮ್ ಕರಿಲಾಗ್ಲೊ ತರ್ಯ್ ಅಪುಣ್ ಪರತ್ ಬೊಂಬೊಯ್ ಪಾವ್ತಲೊಂ ಆನಿಂ ಜರೂರ್ ಫಿಲ್ಮಾಂತ್ ಕಾಮ್ ಕರ್ತಲೊಂ ಮ್ಹಳ್ಳೆಂ ಹಠ್ ತಾಚೆಲಾಗಿಂ ಆಸ್ಲ್ಲೆಂ.
ಪುಣ್ ತ್ಯಾ ಕಾಳಾರ್ ಕವಿತಾಂ/ಪದಾಂ ಲಿಖ್ಚಾ ಹೆರ್ ಮಹಾನ್ ಕವಿಂ ಜಾವ್ನಾಸ್ಲ್ಲ್ಯಾ ಸಾಹಿರ್ ಲುಧ್ಯಾನ್ವಿ, ಹಸ್ರತ್ ಜೈಪುರಿ, ಕೈಫಿ ಆಜ್ಮಿ, ಶೈಲೇಂದ್ರ, ಶಕೀಲ್ ಬದಾಯುನಿ ಹಾಂಚೆಮುಕಾರ್ ಅಪ್ಲೆಂ ಅಸ್ತಿತ್ವ್ ಸೊಧುಂಕ್ ಕಠೀಣ್ ಪರಿಶ್ರಮ್ ಕರುಂಕ್ ಪಡ್ಲೆಂ ಆನಿಂ ಅಪ್ಲ್ಯಾಚ್ ರಿತಿನ್ ಆನಂದ್ ಬಕ್ಷಿನ್ ಅಪ್ಲಿಂ ಪಾವ್ಲಾಂ ಕಾಡುಂಕ್ ಧರ್ಲಿಂ.
ಅಶೆಂ ಚಾರ್ ವರ್ಸಾಂ ಉಪ್ರಾಂತ್ 1962 ಇಸ್ವೆಂತ್ ’ಮೆಹೆಂದಿ ಲಗೆ ಮೆರೆ ಹಾತ್’ ಹ್ಯಾ ಫಿಲ್ಮಾಂತ್ ತಶೆಂಚ್ 1964 ಇಸ್ವೆಂತ್ ’ದೇವರ್’ ಮ್ಹಳ್ಳ್ಯಾ ಫಿಲ್ಮಾಂಕ್ ಪದಾಂ ಲಿಖ್ಲಿಂ. ಉಪ್ರಾಂತ್ ಹಿಮಾಲಯ್ ಕಿ ಗೋಧ್ ಮೆ ಆನಿಂ ಜಬ್ ಜಬ್ ಫೂಲ್ ಖಿಲೆ ಫಿಲ್ಮಾಂತ್ಲಿಂ ತಾಚಿಂ ಪದಾಂ ತಾಕಾ ಸಂಸಾರ್ಭರ್ ಖ್ಯಾತ್ ಕರುಂಕ್ ಪಾವ್ಲಿಂ. ಉಪ್ರಾಂತ್ ಆನಂದ್ ಬಕ್ಷಿನ್ ಕೆದಿಂಕ್ಚ್ ಪಾಟಿಂ ಪಳೆಲೆಂನಾ.
ಫಿಲ್ಮಾಂಕ್ ಪದಾಂಚಿ ಸುರ್ವಾತ್ :
1958 ಇಸ್ವೆಂತ್ ’ಭಡಾ ಆದ್ಮಿ’ ಮ್ಹಳ್ಳ್ಯಾ ಫಿಲ್ಮಾಂತ್ ಚಾರ್ ಪದಾಂ ಲಿಖ್ಲಿಂ ತರ್ಯೀ ತಾಚಿ ಫಿಲ್ಮಾಚಿ ನೀಜ್ ಜಿಣಿ ಸುರು ಜಾಲ್ಲಿ 1962 ಇಸ್ವೆಂತ್ ’ಮೆಹೆಂದಿ ಲಗೆ ಮೆರೆ ಹಾತ್’ ಹ್ಯಾ ಫಿಲ್ಮಾಂತ್ ತಶೆಂಚ್ 1964 ಇಸ್ವೆಂತ್ ’ದೇವರ್’ ಮ್ಹಳ್ಳ್ಯಾ ಫಿಲ್ಮಾಂಕ್ ಪದಾಂ ಲಿಖ್ಲಿಂ. ಉಪ್ರಾಂತ್ ಎಕೆಕ್ಚ್ ಫಿಲ್ಮಾಂ ಮೆಳ್ಳಿಂ; ಹಿಮಾಲಯ್ ಕಿ ಗೋಧ್ ಮೆ ಆನಿಂ ಜಬ್ ಜಬ್ ಫೂಲ್ ಖಿಲೆ ಫಿಲ್ಮಾಂತ್ಲಿಂ ತಾಚಿಂ ಪದಾಂ ತಾಕಾ ಸಂಸಾರ್ಭರ್ ಖ್ಯಾತ್ ಕರುಂಕ್ ಪಾವ್ಲಿಂ. ಉಪ್ರಾಂತ್ ಆನಂದ್ ಬಕ್ಷಿನ್ ಕೆದಿಂಕ್ಚ್ ಪಾಟಿಂ ಪಳೆಲೆಂನಾ, ಆನಿಂ ಆನಂದ್ ಬಕ್ಷಿ ಏಕ್ ಪ್ರತಿಶ್ಟಿತ್ ಕವಿ ಜಾವ್ನ್ ಬದಲ್ಲೊ.
ಗಾವ್ಪಿ ಜಾವ್ನ್ :
ಆನಂದ್ ಬಕ್ಷಿ ಏಕ್ ಪದಾಂ ಲಿಖ್ಪಿ ಮಾತ್ರ್ ನ್ಹಯ್ ಗಾವ್ಪಿಯ್ ಜಾವ್ನಾಸ್ಲ್ಲೊ. ಥೊಡ್ಯಾ ಫಿಲ್ಮಾಂನಿ ತಾಣೆಂ ಗಾಯ್ಲಾಂ ಸಯ್ತ್. ’ಭಾಗೊಂ ಮೆ ಬಹಾರ್ ಆಯೆ’ ಮ್ಹಳ್ಳೆಂ ಪದ್ ’ಮೋಮ್ ಕಿ ಗುಡಿಯಾ’ ಫಿಲ್ಮಾಂತ್ ತಾಣೆಂ ಲತಾ ಮಂಗೇಶ್ಕರಾಸವೆಂ ಗಾಯ್ಲಾಂ. ಇತ್ಲೆಂಚ್ ನ್ಹಯ್ ’ಶೋಲೆ’ ಫಿಲ್ಮಾಂತ್ ಏಕ್ ಖವಾಲಿ ಗಾಯ್ಲಿ ಪುಣ್ ತಿ ಫಿಲ್ಮಾಂತ್ ಧಾಖಯ್ಲಿಚ್ ನಾ.
ಫಿಲ್ಮಾಂ ಆನಿಂ ಪದಾಂ :
ಹಿಂದಿ ಫಿಲ್ಮಾಂತ್ ಬರ್ಯಾಂತ್ಲಿಂ ಬರಿಂ ಫಿಲ್ಮಾಂ ಚಿಂಚುನ್ ತಿಂ ಕಿತ್ಯಾಕ್ ಬರಿಂ ಫಿಲ್ಮಾಂ ಜಾಲಿಂ ಮ್ಹಳ್ಳೆಂ ಅವಲೋಕನ್ ಕರ್ಚೆಂ ತರ್, ತಾಂತುಂ ಹ್ಯೊ ಸಂಗ್ತ್ಯೊ ಆಮ್ಕಾಂ ಪಳೆಂವ್ಕ್ ಮೆಳ್ತಾತ್. ಏಕ್ ಬರಿ ಕಾಣಿ (ಕಾಣ್ಯೆಗಾರ್), ಏಕ್ ಬರೆಂ ನಿರ್ದೇಶನ್ (ನಿರ್ದೇಶಕ್), ಏಕ್ ಬರೆಂ ಸಂಗೀತ್ (ಸಂಗೀತ್ಕಾರ್) ಆನಿಂ ಬರಿಂ ಪದಾಂ/ಉತ್ರಾಂ (ಕವಿ/ಪದಾಂ ಲಿಖ್ಪಿ). ಆನಿಂ ಉಪ್ರಾಂತ್ ಹ್ಯಾ ಫಿಲ್ಮಾಂತ್ ಅಭಿನಯ್ ಕೆಲ್ಲಿಂ. ಪುಣ್ ಫಿಲ್ಮಾಂನಿ ಕವಿತಾ/ಪದಾಂ ಲಿಖ್ಪ್ಯಾಂಕ್ ಅಸ್ಚೊ ಮಾನ್ಯೀ ಜಿತ್ಲೊಚ್ ಹ್ಯಾ ಹೆರಾಂಕ್ ಮೆಳ್ಚೆ ತಿತ್ಲೊ. ಕಿತ್ಯಾಕ್ ಮ್ಹಳ್ಯಾರ್ ಹಿಂಚ್ ಪದಾಂ ಆಮ್ಚಾ ದೆಸಾಚಾ ಹರ್ಯೆಕಾ ಗಲ್ಲೆ ಗಲ್ಲೆಂನಿ ಲೊಕಾಂನಿ ಜಿಕುನ್ ಧರ್ಚಿಂ ಮಾತ್ರ್ ನ್ಹಯ್, ಗುಣ್ಗುಣ್ಚಿಂ ಜಾವ್ನಾಸಾತ್. ದೆಕುನ್ಂಚ್ ಮ್ಹಣ್ತಾತ್ ಕವಿಕ್ ಹ್ಯಾ ಸಂಸಾರಾಂತ್ ಮರಣ್ ನಾ ಮ್ಹಣ್.
ಕವಿತಾ/ಪದಾಂ :
ಅಪ್ಲ್ಯಾ ಚಾಳಿಸ್ ವರ್ಸಾಂಚಾ ಅನ್ಭೋಗಾಂತ್ ತಾಣೆಂ ಹಿಂದಿ ಕವಿತಾಶೆತಾಂತ್ ಥೊಡಿಂ ಅಸಲಿಂ ಕವಿತಾ/ಪದಾಂ ರಚ್ಲ್ಯಾಂತ್ ಮ್ಹಳ್ಯಾರ್ ತಿಂ ಆಜ್ ಪರ್ಯಾಂತ್ ಹಿಂದೆಂತ್ಲ್ಯಾ ಶ್ರೇಷ್ಟ್ ಪದಾಂ ಪಯ್ಕಿ ಥೊಡಿಂ ಮ್ಹಣ್ ಲೋಕ್ ಮಾಂದ್ತಾ. ಪುಣ್ ಸಾಟಾವ್ಯಾ ಧಾಕ್ಡ್ಯಾ ಥಾವ್ನ್ ಚಡುಣೆಂ ಪಂದ್ರಾ ವರ್ಸಾಂನಿ ತಾಚಾ ಜಿಣ್ಯೆಂತ್ಲಿಂ ಶ್ರೇಷ್ಟ್ ಪದಾಂ ತಾಣೆಂ ಬರಯ್ಲಿಂ ಮಾತ್ರ್ ನ್ಹಯ್, ಹಿಂದಿಂತ್ ಹ್ಯಾ ಪದಾಂಚಾ ಸಂಸಾರಾಂತ್ ನವೊ ಅಧ್ಯಾಯ್ ಉಘಡ್ಲೊ ಸಯ್ತ್. ಸಂಗೀತ್ಕಾರ್ ರಾಹುಲ್ ದೇವ್ (ಆರ್.ಡಿ.) ಬರ್ಮನ್, ಲತಾ ಮಂಗೇಶ್ಕರ್, ಆಶಾ ಭೋನ್ಸ್ಲೆ, ಕಿಶೋರ್ ಕುಮಾರ್ ಎಕಾ ಜಾಗ್ಯಾರ್ ತರ್, ರಾಜೇಶ್ ಖನ್ನಾ, ಶರ್ಮಿಳಾ ಠಾಗೋರ್, ಮುಮ್ತಾಜ್ ಅನ್ಯೇಕಾ ಜಾಗ್ಯಾರ್, ತಾಂಚೆ ಸವೆಂ ಆನಂದ್ ಬಕ್ಷಿಚಿಂ ಪದಾಂ ಅಜೂನ್ ಪರ್ಯಾಂತ್ ಲೋಕ್ ಗುಣ್ಗುಣ್ತಾ.
ಹಾಂತ್ಲಿಂ ಥೊಡಿಂ ಫಿಲ್ಮಾಂ ’ಕಟಿ ಪತಂಗ್ (1970), ಹರೆ ರಾಮ ಹರೆ ಕೃಷ್ಣ (1971), ಅಮರ್ ಪ್ರೇಮ್ (1971), ಅಮರ್ ಅಕ್ಬರ್ ಆಂತೊನಿ (1997). ರಾಜ್ಕಪೂರಾಚಿಂ ಫಿಲ್ಮಾಂ; ಬಾಬ್ಬಿ (1973), ಸತ್ಯಮ್ ಶಿವಮ್ ಸುಂದರಮ್ (1978), ಸುಭಾಶ್ ಘಾಯ್ಚಿಂ ಕರ್ಜ್ (1980), ಹೀರೊ (1983), ಕರ್ಮ (1986), ರಾಮ್ ಲಕನ್ (1989), ಸೌದಾಗರ್ (1991), ಖಳ್ನಾಯಕ್ (1993), ತಾಲ್ (1999), ಯಾದೇಂ (2001), ಯಶ್ ಛೋಪ್ರಾಚಿಂ ಚಾಂದ್ನಿ (1989), ಲಮ್ಹೆ (1991), ಡರ್ (1993), ದಿಲ್ ತೊ ಪಾಗಲ್ ಹೆ (1997).
ಪುಣ್ ಆನಂದ್ ಬಕ್ಷಿಚಾ ಕವಿತಾ/ಪದಾಂಚಿ ಸೊಭಾಯ್ ಜಿತ್ಲಿ ಪರ್ನ್ಯಾಂಕ್ ರುಚ್ತಾಲಿಗೀ ತಿತ್ಲಿಚ್ ತರ್ನ್ಯಾಂಕ್ಯ್ ರುಚ್ತಾಲಿಂ ಮ್ಹಳ್ಳ್ಯಾಕ್ ಹಿಂ ಫಿಲ್ಮಾಂ ಗವಾಯ್; ಹಮ್ ದಿಲ್ ದೇ ಚುಕೆ ಸನಮ್, ಮೊಹಬ್ಬತೇಂ, ನಾಯಕ್, ದಿಲ್ವಾಲೆ ದುಲ್ಹನಿಯಾಂ ಲೇ ಜಾಯೆಂಗೆ (1995), ಮೊಹಬ್ಬತೇಂ (2000). ಅಪ್ಲ್ಯಾ ಇತ್ಲ್ಯಾ ಲಾಂಬ್ ಅನ್ಭೋಗಾಂತ್ ತಾಣೆಂ ಬರ್ಯಾಂತ್ಲ್ಯಾ ಬರ್ಯಾ ಸಂಗೀತ್ಕಾರಾಂ ಸವೆಂ, ಕಾಮ್ ಕೆಲಾಂ ಆನಿಂ ಪ್ರಸ್ತುತ್ ಕಾಳಾಚಾ ಕವಿತಾ/ಪದ್ಂ ಲಿಕ್ಪಿಂಚಾ ಚಿಂತ್ಪಾಚೆರ್ ತೊ ಜಾಯ್ತೆ ಪಾವ್ಟಿಂ ಉಗ್ತ್ಯಾನ್ ಖುಭಾಳ್ಳಾ.
ಕವಿತಾದಾಯ್ಜ್ - 8 . ಆನಂದ್ ಬಕ್ಶಿ
ಆನಂದ್ ಬಕ್ಷಿಚೆಂ ಶ್ರೇಷ್ಟ್ ಕವಿತಾ/ಪದ್ ಜಾವ್ನಾಸಾ ’ಸಾವನ್ ಜೊ ಅಗನ್ ಲಗಾಯೆ (ಪಾವ್ಸ್ ಜರ್ ಉಜೊ ಪೆಟಯ್ತ್ - ತಾಕಾ ಕೋಣ್ ಪಾಲ್ವಂವ್ಕ್ ಸಕತ್?’) ಮ್ಹಳ್ಳೆಂ ’ಅಮರ್ ಪ್ರೇಮ್’ ಫಿಲ್ಮಾಂತ್ಲೆಂ ಕವಿತಾ/ಪದ್ ತರ್ಯೀ ಮ್ಹಾಕಾ ಪಸಂದ್ ಜಾಲ್ಲೆಂ ತಾಚೆಂ 1974 ಇಸ್ವೆಂತ್ ’ಆಪ್ ಕಿ ಕಸಮ್’ ಫಿಲ್ಮಾಂತ್ ತಾಣೆಂ ಬರಯಿಲ್ಲೆಂ ’ಜಿಂಗಗಿ ಸಫರ್ ಮೆ ಗುಜರ್ ಜಾತೆ ಹೆ’ (ಜಿಣ್ಯೆಚಾ ಪಯ್ಣಾರ್ ಪಾಶಾರ್ ಜಾಲ್ಲೆ) ಪದ್ ಅಶೆಂ ಆಸಾ;
"ಜಿಣ್ಯೆಚಾ ಪಯ್ಣಾರ್ ಪಾಶಾರ್ ಜಾಲ್ಲ್ಯೊ ತ್ಯೊ ಘಡಿಯೊ
ತ್ಯೊ ಪರತ್ ಯೆಂವ್ಚ್ಯೊ ನಾಂತ್, ತ್ಯೊ ಪರತ್ ಯೆಂವ್ಚ್ಯೊ ನಾಂತ್
ಫುಲಾಂ ಫುಲ್ತಾತ್, ಲೋಕ್ ಮೆಳ್ತಾತ್ ಪುಣ್,
ಫಾತ್ರಾಂ ಪಂದಾ ತಿಂ ಫುಲಾಂ ಮೊರ್ತಾತ್ ತಿಂ
ಸುವಾಧಿಕ್ ವಾರೆಂ ಯೆತೆಚ್ ಪರತ್ ಫುಲಾನಾಂತ್
ಥೊಡೊ ಲೋಕ್ ಹ್ಯಾ ಸದಾಂಯ್ ವೆಗ್ಳಾಚಾರ್ ಜಾಂವ್ಚೊ ತೊ
ಹಜಾರಾಂನಿ ಆಯ್ಲ್ಯಾರ್ಯೀ ಮೆಳಾನಾಂತ್
ಜಿಣಿಭರ್ ಆಶೆಲ್ಲೊ ಕೊಣ್ಯೀ ಆಪಯ್ತಿತ್ ತಾಚೆಂ ನಾಂವ್
ತಿಂ ಪರತ್ ಯೆಂವ್ಚಿಂ ನಾಂತ್, ತಿಂ ಪರತ್ ಯೆಂವ್ಚಿಂ ನಾಂತ್
ದೊಳೆಚ್ ಏಕ್ ಕಪಟಿ, ಕಸಲೊ ತಾಚೊ ಭರ್ವಸೊ ಆಯ್ಕ್,
ಇಸ್ಟಾಗಾತೆಚೊ ದುಭಾವ್ಚ್ ಇಸ್ಟಾಗಾತೆಚೊ ದುಸ್ಮಾನ್
ಅಪ್ಲ್ಯಾ ಕಾಳ್ಜಾಂತ್ ಹಾಕಾ ಬಿಡಾರ್ ಕರುಂಕ್ ದೀನಾಕಾ
ಫಾಲ್ಯಾಂ ವಳ್ವಳೊಂಕ್ ಪಡಾತ್ ಉಡಾಸಾನ್ ಜಾಂಕಾಂ ರಾವಯ್
ಧರುನ್ ತಾಂಕಾಂ ವಚೊಂಕ್ ದೀನಾಕಾ
ಉಪ್ರಾಂತ್ ಧಾಡ್ ಮೊಗಾಚೆ ಹಜಾರ್ ಸಲಾಮ್ ತರ್ಯೀ ತಿಂ
ಪರತ್ ಯೆಂವ್ಚಿಂ ನಾಂತ್, ತಿಂ ಪರತ್ ಯೆಂವ್ಚಿಂ ನಾಂತ್
ಸಕಾಳ್ ಯೆತಲೊ, ರಾತ್ ಪಾಶಾರ್ ಜಾತೆಲಿ. ಅಶಿಚ್,
ವೇಳ್ ಚಲೊನ್ಂಚ್ ವೆತಲೊ ರಾವಾಸೊನಾ
ಎಕಾ ಘಡ್ಯೆಂತ್ ಹೊ ಮುಖಾರ್ ಪಾವ್ತಲೊ ಮನ್ಶಾ ಸಾರ್ಕೆಂ ಪಳೆ,
ಕಳಿತ್ ನಾ ಕೆನ್ನಾ ಆನಿ ಪರ್ದ್ಯಾಚೆರ್ ರುಪ್ಣೆಂ ಬದಲ್ತಾ
ಏಕ್ ಪಾವ್ಟಿಂ ಪಾಶಾರ್ ಜಾಲ್ಲೆ ತೆ ದೀಸ್-ರಾತ್ ಸಕಾಳ್ ಆನಿಂ ಸಾಂಜ್
ತಿಂ ಪರತ್ ಯೆಂವ್ಚಿಂ ನಾಂತ್, ತಿಂ ಪರತ್ ಯೆಂವ್ಚಿಂ ನಾಂತ್"
ಕವಿತಾದಾಯ್ಜ್: 1, 2, 3, 4, 5, 6, 7
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.