ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಚ್ಚೆಮ್ ಮ್ಹಳ್ಳ್ಯಾ ಲಿಖ್ಣೆನಾಂವಾರ್ ಕವಿತಾ ಬರಂವ್ಚೊ ಹೆನ್ರಿ ಮೆಂದೊಸ್ ಕೊಂಕ್ಣಿ ಕವಿತಾ ಶೆತಾಂತ್ ಪ್ರಸ್ತುತ್ ಕಾಳಾಚೊ ಉಂಚ್ಲೊ ಕವಿ, ವಿಮರ್ಶಕ್ ಆನಿ ಚಿಂತ್ಪಿ. ಎದೊಳ್ಚ್ ರಾಕ್ಣೊ ಸಾಹಿತಿಕ್ ಸ್ಪರ್ದೊ, ಕಾಣಿಕ್ ಕವಿ ಸ್ಪರ್ಧೊ, ದಾಯ್ಜ್ ಸಾಹಿತಿಕ್ ಸ್ಪರ್ಧೊ ಅಶೆಂ ಸಭಾರ್ ಸ್ಪರ್ಧ್ಯಾಂನಿ ಪಯ್ಲಿಂ ಇನಾಮಾಂ ಜೊಡ್ಲ್ಲ್ಯಾ ಹಾಚೆ ತೀನ್ ಕವಿತಾಜಮೆ ’ಚಲ್ಯಾಂಕ್ ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’ ಆನಿ ’ಬಾಮುಣಾಚೆಂ ಚೆಡುಂ’ ಪರ್ಗಟ್ ಜಾಲ್ಯಾತ್. ಕೊಂಕ್ಣಿ ಕವಿತಾಂಚೆರ್ ಜಾಯ್ತಿಂ ಲೇಖನಾಂ ಬರಯ್ಲ್ಯಾಂತ್. ಹೊ ಏಕ್ ಕಾಣ್ಯೆಗಾರ್, ಅಂಕಣ್ಕಾರ್ ಸಯ್ತ್. ಆಮ್ಕಾಂ ಸಭಾರ್ ವಾಚ್ಪ್ಯಾಂನಿ ಆಮ್ಕಾಂ ಎಚ್ಚೆಮಾಚಾ ಬರ್ಪಾಂ ಪರ್ಗಟ್ ಕರುಂಕ್ ವತ್ತಾಯ್ ಕೆಲ್ಲ್ಯಾನ್ ಹೊ ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಜಾಲ್ಲ್ಯಾ ಸಂಗ್ತೆಚೆರ್ ಹೊ ತವಳ್ತವಳ್ ದಾಯ್ಜ್.ಕೊಮ್ಚೆರ್ ಅಪ್ಲಿಂ ಬರ್ಪಾಂ ಬರಯ್ತಲೊ.
ಆಧ್ಲೆ ಆಂಕ್ಡೆ
2. ಕವಿತಾ ಕಾಳ್ಜಾಚಿ ಭಾಸ್!?
ಕೊಂಕ್ಣಿ ಸಾಹಿತ್ಯಾಂತ್ ತಪಸ್ಸ್ಯಾಕ್ ಬಸ್ಲ್ಲ್ಯಾ ಮೆಲ್ವಿನ್ ರೊಡ್ರಿಗಸಾನ್ ಆನ್ಯೆಕ್ ಕವಿತಾಪುಂಜೊ ಸಂಪಾದುನ್ ಪರ್ಗಟ್ಲಾ. ’ಕಾಳೊಕಾಂತ್ಲಿ ಕಾಂತಾರಾಂ’ ಕೊಂಕ್ಣಿ ಸಂಸಾರಾಂತ್ ಕಾಳೊಕಾಂತ್ ಗುಣ್ಗುಣ್ಚೆ ಏಕೇಕ್ ಕವಿತೆಚೆ ಕಾಜುಲೆ ಸೊಧುನ್ ತಾಣೆಂಚ್ ಸಾಂಗ್ಚೆಪರಿಂ, ತಾಂಚ್ಯೆ ಥೈಂ ಹುಮೆದಿಚೆ ಭರ್ವಶಾಚೆ ಆತ್ಮೆ ಭರ್ನ್ ತಾಂಚಿ ಕಾಂತಾರಾಂ ಪುಸ್ತಕಾ ರುಪಿಂ ಉಜ್ವಾಡಾಂವ್ಕ್ - ತಾಂಣೆ ತರೀ ಬರಿ ಮಿನತ್ ಘೆತ್ಲ್ಯಾ. ಅಶೆಂ ಬೂಕ್ ಪರ್ಗಟ್ಚೊ, ಪ್ರತ್ಯೇಕ್ ಜಾವ್ನ್ ಕವಿತಾಚೊಂ, ಹೊ ಪ್ರಯೋಗ್ ಕೊಂಕ್ಣೆಂತ್ ಮಾತ್ಸೊ ನವೊ ಮ್ಹಣ್ ಭೊಗ್ಲ್ಯಾರೀ ಹೆರ್ ಭಾಸಾಂನಿ ಪರ್ನೊ.
ಕಾನಡೀ ಪತ್ರಾಂನಿ ಕವಿತಾ ಛಾಪ್ತಾನಾಂ ಕವಿಚೊ ಪಾತ್ತೊ ಕವಿತೆಚ್ಯಾ ಮುಳಾಂತ್ ಛಾಪ್ಚಿ ಏಕ್ ರಿವಾಜ್ ಆಸಾ. ಆದಿಂಯೀ ಆಸ್ಲಿ ಆನಿ ಚಂ.ಪಾ.ನ್ ಸಂಪಾದುನ್ ಪರ್ಗಟ್ಲ್ಲ್ಯಾ ’ಕನ್ನಡ ಲೇಖಕರ ವಿಳಾಸಗಳು’ ಬುಕಾಂತ್ ಛಾಪ್ಲ್ಲ್ಯಾ ಮ್ಹಜ್ಯಾ ಪೆರ್ನಾಳ್ಚ್ಯಾ ಘರ್ಚ್ಯಾ ಪತ್ತ್ಯಾರ್ ಹಾಂವ್ ಕಾಂಯ್ ಶಿರ್ವಾಂ ಕಾಲೇಜಿಂತ್ ಶಿಕ್ತಾನಾಂ ಮೈಸೂರ್ ಬೆಂಗ್ಳುರ್ ಥಾವ್ನ್ ಪ್ರಕಾಶಕ್ ಕಾಗ್ದಾಂ ಘಾಲ್ತಾಲೆ. ಅಶೆಂ ಛಾಪೊನ್ ಯೆಂವ್ಚ್ಯಾ ಬುಕಾಂಚೆ ಸುರುಪ್ ಕೊಲೇಜಿಚ್ಯಾ ಲಾಯ್ಬ್ರೆರಿಂತ್ ಪಳೆವ್ನ್ ಹಾಂವೆ ತರೀ ಕೊಣ್ ಸಂಪಾದಕಾಕ್/ ಪ್ರಕಾಶಕಾಕ್ ಏಕ್ ಕವಿತಾ ಧಾಡ್ಲ್ಲಿ ನಾಂ. ಧಾಡ್ಲ್ಯಾರೀ ತಿ ತ್ಯಾ ಬೂಕಾಂತ್ ಛಾಪೊನ್ ಯೇಜಾಯ್ ತರ್ ಇತ್ಲ್ಯಾಚ್ ಮೊಲಾಚೆ ಬೂಕ್ ಹಾಂವೆಯೀ ಕವಿತಾ ಧಾಡ್ಲ್ಲ್ಯಾ ಕರ್ಮಾಕ್ ಮೊಲಾಕ್ ಘೆಜೆ ಪಡ್ತೆ. ತಿ ತಾಂಕ್ ಮ್ಹಾಕಾ ತೆನ್ನಾಂಯೀ ನಾತ್ಲಿ. ದೆಕುನ್ ಹಾಂವ್ಯೀ ಕಾನಡಿ ಕಾವ್ಯಾ ಸಂಸಾರಾಂತ್ ಕಾಜುಲೊ ಜಾವ್ನ್ ಉರ್ಲೊಂ ಮ್ಹಣೊಂ..? ಅಸೊಂ.
’ಕವಿತಾ ಮ್ಹಾಕಾ ಕಿತೆಂ ಲೆಕ್ತಾ?’, ಹರ್ ಸಮಕಾಳೀನ್ ಸ್ರಜನ್ ಶೀಲ್ ಬರವ್ಪ್ಯಾನ್, ಕವಿನ್ ಆಜ್ ಅಪ್ಣಾಕ್ ವಿಚಾರ್ನ್ ಘೆಜಾಯ್ ಜಾಲ್ಲೆಂ ಸವಾಲ್ ಮುಳಾವೆಂ. ತಸೆಂ ಹಾಂವ್ ಕಿತ್ಯಾಕ್ ಬರಯ್ತಾಂ..? ತೇಂ.. ಖಾಸ್ಗೆನ್ ಮ್ಹಾಕಾ ಹ್ಯಾ ದೊನೀ ಸವಾಲಾಂಕ್ ಜಾಪ್ ಏಕ್ಚ್. ಪೂಣ್ ಕಾಂತಾರಾಂ ಕಾಳೊಕಾಂತ್ ಬರ್ಯಿಲ್ಲ್ಯಾ ಜಾಯ್ತ್ಯಾ ಕವಿಂನಿ ಮ್ಹಳಾಂ, ’ಕವಿತಾ ಮ್ಹಳ್ಯಾರ್ ಕಾಳ್ಜಾಚಿ ಭಾಸ್’. ಜಿಣಿಯೆ ಆನ್ಭೋಗಾಚಿ ಅಭಿವ್ಯಕ್ತಿ.
ಕವಿ ವಾ ಬರವ್ಪಿ ಸಮಾಜೆಚೊ ಏಕ್ ವಾಂಟೊ. ಬರೆಂ ವಾ ವಾಯ್ಟ್, ಜೀಕ್ ವ ಸಲ್ವಣಿ ಹರ್ ಸಮಾಜೆಂತ್ಲೆ ಕಶೆಂ ತಶೆಂ ತೊಯೀ ವೈಯಕ್ತಿಕ್ ಭೊಗ್ತಾ. ಜಾಂವ್ಕ್ ಪುರೊ ತಾಂಣೆ ಭೊಗ್ಚಿ, ಪಳೆಂವ್ಚಿ ದೀಷ್ಟ್ ಥೊಡಿ ನಿರಾಳ್ ವೆಗ್ಳಿ. ಕಾಳಿಜ್ ಕಡ್ಟಾ, ಮೊವಾಳ್ಟಾ, ಮೊಗಾಕ್ ಲಾಲೆತಾ ಪೂಣ್ ಚಿಂತಿನಾಂ. ಮತ್ ಮಾತ್ರ್ ಚಿಂತುಂಕ್ ಸಕ್ತಾ. ಬರೆಂ- ವಾಯ್ಟ್, ಭೊಗ್ಚ್ಯಾಂತ್ ಆನಿ ಚಿಂತ್ಚ್ಯಾಂತ್ ಫರಕ್ ಆಸಾ ವಾ ಚಿಂತುನ್ ಭೊಗ್ಚ್ಯಾಂತ್. ಕಾಳಿಜ್ ಭೊಗುಂಕ್ ಮಾತ್ರ್ ಸಕ್ತಾ ದೆಕುನ್ ಕವಿತಾ ಥರಾವಳ್ ಭೊಗ್ಣಾಂಚಿಂ ಅಭಿವ್ಯಕ್ತಿ ಮಾತ್ರ್ ಮ್ಹಣೊಂ..?
ಮ್ಹಜ್ಯಾಯೀ ಮೊಗಾಚೊಚ್ ಕವಿ ಕೆ. ಎಸ್. ನರಸಿಂಹಸ್ವಾಮಿಕ್ ನವ್ಯಾಚೊ ಪ್ರಮುಕ್ ಕವಿ ಗೋಪಾಲಕ್ರಶ್ಣ ಆಡಿಗನ್ ಮ್ಹಳ್ಳೆಂ ಆಸಾ, ’ತಾಚೆ ಆನ್ಭೋಗ್ ಪಾತಳ್’. ಕೆ. ಎಸ್. ನ. ಮ್ಹಣ್ತಾ, ’ಮ್ಹಜೊ ಆನ್ಭೋಗ್ ಪಾತಳ್ ಮ್ಹಳ್ಳ್ಯಾ ಟೀಕೆಕ್ ಹಾಸ್ಲೊಂ, ಆಟ್ ಜಣಾಂ ಭುರ್ಗಿಂ ಮ್ಹಾಕಾ, ಹಾಂವ್ಯೀ ಜಲ್ಮಾಲ್ಲೊಂ ಕರ್ಕಟ್ಯಾ ವೊತಾಂತ್ಚ್. ವಾಡ್ಲ್ಲೊಂ ಉಜ್ಯಾಚೆ ಕೇಂಡಾಚೆರ್. ಮದ್ಘಾತ್ ರಸ್ತ್ಯಾರ್ ’ಹೆಂ’ ಮ್ಹಾಕಾ ಮೆಳ್ಳೆಂ ಆನಿ ಮ್ಹಾಕಾಯೀ ತುಜೆಪರಿಂ ಜಾಲೊ. ಹಾಣೆ ಉಭಿ ಕೆಲ್ಲ್ಯಾ ವಾಸ್ಯಾನಿಸ್ಣಿಚೆರ್ ಹಾಂವ್ ನೆಕೆತ್ರಾಂ ಖುಂಟುಂಕ್ ಗೆಲೊಂ. ಆತಾಂಯೀ ವಿಚಾರ್ತಾಂ ’ಆನಿಕೀ ಆಶಾಗೀ ತುಮ್ಕಾಂ? ಸತ್ತರಾಚ್ಯಾ ಪಿರಾಯೆರ್!’, ಉಮೊ ದೀವ್ನ್ ನಾಚ್ಲೊಂ.
ಆನ್ಭೋಗ್ ’ಸುಖಾಚೊ’ ಮಾತ್ರ್ ಮ್ಹಣ್ ಕೆ.ಏಸ್.ನ. ಪರಿಂ ಹಾಂವೆಂಯ್ ಚಿಂತ್ಲ್ಯಾರ್, ಎಚ್.ಎಸ್ ಶಿವಪ್ರಕಾಶ್ ಕಿತೆಂ ಮ್ಹಣ್ತಾ, ’ಮ್ಹಜ್ಯಾ ಆನ್ಭೋಗಾಂತ್ ಕವಿತಾ ಬರಂವ್ಚೆ ಪಯ್ಲೆಂ, ಮತಿಂತ್ ಏಕ್ ದಾಬ್ ನಿರ್ಮಾಣ್ ಜಾತಾ. ಹೊ ದಾಬ್ ಇತ್ಲೊ ಜಬ್ಬೊರ್ ಆಸ್ತಾಗೀ ಮ್ಹಳ್ಯಾರ್ ತೊ ಭಿಲ್ಕುಲ್ ದಾಂಬುನ್ ದವ್ರುಂಕ್ ಕಷ್ಟ್. ತೊ ಪರ್ಗಟ್ ಜಾತಾನಾಂ ಆಪ್ಲೆ ಸಗ್ಳೆ ಅಕ್ಲಾಸ್, ಜಬ್ಬೊರ್ಪಣ್, ತಳ್ಮಳೆ ಘೆವ್ನ್ಂಚ್ ತಾಚೆಚ್ ಮ್ಹಳ್ಳ್ಯಾ ಏಕಾ ’ಸೊಭಾಯೆ’-ಂತ್ ಭಾಯ್ರ್ ಯೆತಾತ್. ಹಾಂಗಾ ’ಸೊಭಾಯ್’ ಮ್ಹಳ್ಯಾರ್ ಸೊಭಿತ್ (ವ ಸುಖಾಳ್) ಮ್ಹಣ್ ನೈಂ, ಸೊಭಿತ್ ಮ್ಹಳ್ಯಾರ್ ಕ್ರೋಧ್, ಭಿರಾಂತ್ ಸಗ್ಳೆ ಮೆಳೊನ್ ಜಾಂವ್ಚೆಂ ಏಕ್ ಸುಸಂಗತ್ ರುಪ್ಣೆಂ (ಶಬ್ದಗುಣ ಪ್ರ. 1, ಅಂ 1, ಪಾನ್: 6).
ಕೆ. ಎಸ್. ನ. ವಿಚಾರ್ತಾ (1993 ಇಸ್ವೆಂತ್):
ಸಾಂಕೊವ್ ಉತ್ರೊನ್ ರಾಜ್ ರಸ್ತ್ಯಾರ್ ಚಲೊನ್
ದುಕಿ ಸಗ್ಳೆ ವಿಸರ್ಲೊಂ ಜಿಣ್ಯೆಂತ್
ಸೊಸ್ಲ್ಲಿಂ ದುಕಾಂ ಮಾತ್ರ್ ಗಾಂವ್ಚಿಗೀ..?
ನಾಕಾತ್ಗೀ ಕೊಣಾಕೀ ಮೊಗ್ರ್ಯಾ ಕಳೆ..? (ಮಲ್ಲಿಗೆಯ ಮಾಲೆ ಪಾನ್ 464)
ಕವಿ ಗೋಪಾಲಕ್ರಶ್ಣ ಆಡಿಗಾಚೆಂ ದುಬಾವ್ ಮ್ಹಜೊಯೀ ಆಸ್ಲೊ ದೆಕುನ್ ಕೊಂಕ್ಣಿ ಕಾವ್ಯಾ ಸಂಸಾರಾತೀ ಪಾತಳ್ ಆನ್ಭೋಗಾಚೆಂ ದ್ರವ್ಯ್ ಪರಿಕಲ್ಪನ್ ಮ್ಹಕಾಯೀ ಸೊಡಿನಾಸ್ತಾನಾಂ ಧೊಸ್ತಾಲೆಂ. ಆನಿ ಹೆಂ ಝುಜ್ ಮತಿಂತ್ ಘಮಸಾಣೆನ್ ಚಾಲೂ ಆಸ್ತಾನಾಂ ಹಾಂವೆ ಬರವ್ನ್ ದವರ್ಲ್ಲಿ ಕವಿತಾ ’ಕವಿಚೆ ಕಳ್ವಳೆ’ ಆಯ್ಲೆವಾರ್ ಛಾಪೊನ್ ಆಯಿಲ್ಲ್ಯಾ ’ಬಾಮುಣಾಂಚೆ ಚೆಡುಂ’ (ಆಶಾವಾದಿ ಪ್ರಕಾಶನ್ -2006) ಬುಕಾಂತ್ ಆಸಾ. ವಿಸ್ತ್ರತ್ ಅರ್ಥಾರ್ ಮ್ಹಾಕಾ ತರೀ ಮ್ಹನ್ಶಾಜಿವಾಚೆ ಸಮಾಜಿಕ್ ಕಳ್ವಳೆ, ಧಣ್ಸಣ್, ಬೋಬ್ ಆನಿ ದೂಕ್ ಮಾತ್ರ್ ಕವಿತೆಚೆಂ ಆನ್ಭೊಗಾದ್ರವ್ಯೆಂ ಜಾಯ್ಜೆ ಮ್ಹಣ್ ಭೊಗ್ತಾ ಕಿತ್ಯಾಕ್?
ಮೊಗ್ರ್ಯಾಂ ಕಳೆ ಆನಿ ತಾಂಚಿ ಮಹಿಮಾ ಗಾಂವ್ಕ್ ಆಮ್ಚೆ ಮಧೆಂ ಲೋಯ್ಡ್, ಪಂಚು ಆನಿ ಹ್ಯಾಚ್ ಕಾಳೊಕಾಂತ್ಲಿ ಕಾಂತಾರಾಚೊ ಸಂಪಾದಕ್ ಮೆಲ್ವಿನ್ ರೊಡ್ರಿಗಸ್ ಆಸ್ತಾನಾಂ ಮ್ಹಜೆ ತಸಲ್ಯಾಂಚಿ ಗರ್ಜ್ ಕಿತೆಂ? ಅಸಲೆಂ ವಿನೋದಿಕ್ ಉತಳ್ ಚಿಂತಾಪ್ ಮತಿಂತ್ ಉದೆಲ್ಲೆಂಯ್ ಆಸಾ. (ಆತಾಂ ಸಿ.ಡಿ. ಕೆಸೆಟ್ ಆಲ್ಬಮ್ ಕಾತರ್ತಾತ್ ತರೀ ಹೆ ಕೊಂಕ್ಣಿ ಆಧುನಿಕ್ ಕಾವ್ಯಾಂತ್ಲೆ ಪ್ರಮುಖ್ ಕವಿ ವಿಸರ್ಚೆಂ ಮ್ಹಾಕಾ ಮುಖ್ಲ್ಯಾ ಸಾತ್ ಜಲ್ಮಾಂತೀ ಸಾಧ್ ನಾಂ), ಅಸೊಂ.
ಆತಾಂ ಕಾಳ್ಜಾಂತ್ ದೂಕ್, ಕ್ರೋಧ್, ಆಕ್ರೋಶ್, ಭಿರಾಂತ್ ಅಶೆಂ ಥರಾವಳ್ ಭೊಗ್ಣಾಂ ಆಸ್ತಾನಾಂ ಕವಿತೇಕ್ ತರ್ಯೀ ಹಾಂವ್ ಕಾಳ್ಜಾಚಿ ಭಾಸ್ ನ್ಹಂಯ್ ಕಶೆಂ ಮ್ಹಣೊಂ? ಹಾಂವೆ ಖಾಯ್ಸ್ ಕರ್ಚೊ ಕಾನಡಿ ಕವಿ ಡೊ. ಕೆ. ವಿ. ತಿರುಮಲೇಶ್ ಅಮೆರಿಕನ್ ಕವಿ ಆರ್ಚಿಬಾಲ್ಡ್ ಮೆಕ್ ಲೀಶ್ ಹಾಕಾ ವಾಚುನ್ ಮ್ಹಣ್ತಾ: ’ಎ ಪೊಯಮ್ ಶುಡ್ ನಾಟ್ ಮೀನ್ ಬಟ್ ಬಿ’ ಮ್ಹಳ್ಯಾರ್ ಕವಿತಾ ಅರ್ಥ್ ಜಾಂವ್ಕ್ ನಜೊ ಬಗಾರ್ ಆಸಾಜೇ. (ತೊಚ್ ಕವಿತೆ ಸಂಬಂಧಿ ಬೂಕ್ ಶಬ್ದಗುಣ ಪ್ರ: 1, ಅಂ: 1, ಪಾನ್: 130, ಸಂಪಾದಕ್: ವಸಂತ ಬನ್ನಾಡಿ) ಆತಾಂ ಕವಿತಾ ಆಸಾಜೇ ಮ್ಹಳ್ಯಾರ್ ಭೆಷ್ಟೆಂಚ್ ಆಸಾಜೆ? ಮ್ಹಳ್ಯಾರ್ ಕಿತೆಂಯ್ ಸಾಂಗಾನಾಸ್ತಾನಾಂ..?
ಪೂಣ್ ಭಾಸ್ (ವಯ್ರ್ ಹಾಂವೆ ಸಾಂಗ್ಲ್ಲಿ ಕಾಳ್ಜಾಚಿ?) ವಾಪರ್ಚಿ ಖೈಂಚಿಯ್ ಕವಿತಾ ಕಿತೆಂಯೀ ಸಾಂಗಾನಾಸ್ತಾನಾಂ ರಾವೊಂಕ್ ಸಾಧ್ ಗೀ..? ಕವಿತಾ ವ ವಿಶಾಲ್ ಅರ್ಥಾರ್ ಸಾಹಿತ್ ಮ್ಹಳ್ಯಾರ್ ಸಂಗೀತ್. ವರ್ಣಾ ಪಿಂತುರ್, ನಾಚಾಪರಿಂ ನೈಂ. ಹ್ಯಾ ಕಲಾಕ್ರತಿಯಾಂನಿ ಆಮೂರ್ತ್ ಜಾಂವ್ಕ್ ಸಾಧ್ ಆಸಾ. ಆಮೂರ್ತ್ ಮ್ಹಳ್ಯಾರ್ ಅರ್ತಾಹೀನ್ ಜಾಂವ್ಚೆಂ ಅಶೆಂ ನೈಂ. ಪೂಣ್ ಭಾಸ್ ವಾಪರ್ಚೆಂ ಸಾಹಿತ್ ಅಮೂರ್ತ್ ಜಾಂವ್ಚ್ಯಾಕ್ ಸಾಧ್ ನಾಂ. ಭಾಸ್ ವಾಪರ್ತಾನಾಂ ಭಾಶೆ ಸಾಂಗಾತಾ ಅರ್ತ್ಯೀ ವಾಳೊನ್ ಯೆತಾ. ಹರ್ ಬರವ್ಪಿ ಭಾಶೆ ಥಾವ್ನ್ ’ಸುಟ್ಕಾ’ ಜೊಡುಂಕ್ ಆಶೆತಾ ಖರೆಂ ಪೂಣ್ ತೆಂ ಕೆನ್ನಾಂಯ್ ಆಸಾಧ್ಚ್. ತೆ ವರ್ವಿಂ ಭಾಶೆ ಥಾವ್ನ್ ಸುಟ್ಕಾ ಮ್ಹಳ್ಯಾರ್ ತಿಕಾ ಸರ್ಜನ್ಪಣಿಂ ವಾಪರ್ಚೆಂ ಮ್ಹಣ್ಂಚ್ ಅರ್ತ್. ಅಶೆಂ "ಸಾಹಿತಾಚಾ ಮಟ್ಟಾಕ್ ಭಾಸ್ ಮ್ಹಳ್ಯಾರ್ ಜಿಣಿ, ಚರಿತ್ರಾ, ಪ್ರಾದೇಶಿಕತಾ, ಸಾರ್ವತ್ರಿಕತಾ ಸಗ್ಳೆಂ".
ಹೇ ಪಾಟ್ ಥಳಾರ್ ಕಾಳೊಕಾಂತ್ಲಿ ಕಾಂತಾರಾಂ ಬುಕಾಂತ್ಲ್ಯಾ ಕೊಂಕ್ಣಿ ಪ್ರಾತಿನಿಧಿಕ್ ಕಾವ್ಯಾ ಸಂದರ್ಭಾರ್ ಕವಿಂನಿ ’ಕಾಳ್ಜಾಚಿ’ ಮ್ಹಳ್ಳೆಂ ’ಭಾಶೆ’ಂತ್ ಇತ್ಲೆಂ ಸರ್ವ್ ಧರ್ನ್ ದವರ್ಲಾಂ ಮ್ಹಣ್ ಆಶೆಂವ್..?
[ಕಾಳೊಕಾಂತ್ಲಿಂ ಕಾಂತಾರಾಂ ಬುಕಾಚೆರ್ ಕವಿತಾಪಾಠ್ಚೆರ್ ಪ್ರಸ್ತುತ್ ಕೆಲ್ಲೆಂ ಸಮೀಕ್ಶಾ ಲೇಖನ್]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
