ಅಂಕಣ್ಕಾರಾವಿಶಿಂ ದೋನ್ ಉತ್ರಾಂ
’ಘೊಡ್ಯಾಕ್ ಗಾಡಾಂವ್ ಮ್ಹಣ್ತಚ್ ಕಾಂಯ್ ಘೊಡೊ ಗಾಡಾಂವ್ ಜಾಯ್ನಾ, ತೆಚ್ಚ್ಪರಿಂ ಗಾಡ್ವಾಕ್ ಘೊಡೊ ಮ್ಹಣ್ತಚ್ ಕಾಂಯ್ ಗಾಡಾಂವ್ ಘೊಡೊ ಜಾಯ್ನಾ’
ಶ್ಹರೊ: ಹಾಂಗಾಸರ್ ಹಾಂವೆಂ ಉತ್ರಾಂವ್ಚೆಂ ವೆಕ್ತಿತ್ವ್ ಕಾಂಯ್ ಥೊಡ್ಯಾಂಕ್ ಅತಿಶಯೋಕ್ತ್ ಮ್ಹಣ್ ದಿಸತ್ ವಾ ಗರ್ಜೆಭಾಯ್ಲೆಂ ಮ್ಹಣ್ ದಿಸತ್ - ಪುಣ್ ಹಾಂವೆಂ ಮ್ಹಜೆಸವೆಂ ಪ್ರಾಮಾಣಿಕ್ಪಣ್ ಸಾಂಭಾಳ್ಚಿ ಗರ್ಜ್ ಆಸಾ ಆನಿ ಹೆ ಮ್ಹಜೆ ಖಾಸ್ಗಿ ವಿಚಾರ್ ಶಿವಾಯ್ ವಾಂಜೆಲ್ ಜಾಯ್ಜಯ್ ಮ್ಹಣ್ ನಾ.
ಬೆಂದುರ್ ಫಿರ್ಗಜೆಂತ್ಲ್ಯಾ ಮಾನೆಸ್ತ್ ಜೆರಿ ಡಿ’ಮೆಲ್ಲೊಕ್ ಕೊಣ್ ಸಂಗೀತ್ಕಾರ್ ಮ್ಹಣ್ ವ್ಹಳ್ಕಾತ್, ಆನಿ ಕೊಣ್ ಕಲಾಕಾರ್ ಮ್ಹಣ್ ವ್ಹಳ್ಕಾತ್, ಕೊಣಾಕ್ ಹೊ ಪರ್ಧ್ಯಾಪಾಟ್ಲ್ಯಾನ್ ಲಿಪೊನ್ ವಾವ್ರ್ ಕರ್ಚೊ ದಿಸೊಂಕ್ ಪುರೊ ತರ್ ಆನಿ ಕೊಣಾಕ್ ಖಾಲ್ತೊ, ಮಾಯ್ಪಾಸಿ ಅಮಿಗ್ ಜಾವ್ನ್ ದಿಸೊಂಕ್ ಪುರೊ. ಪುಣ್ ಮ್ಹಾಕಾ ತೊ ಏಕ್ ಶಿಸ್ತೆಚೊ ಕೊಂಕ್ಣಿ ಶಿಪಾಯ್ ಜಸೊ ದಿಸ್ತಾ. ಸಂಪ್ಯಾ ಉತ್ರಾಂನಿ ಸಾಂಗ್ಚೆಂ ತರ್ ’ದೆವಾಚ್ಯಾ ಮಾತ್ಯಾಚೆರ್ ಫುಲ್ ತರ್ಯೀ ಚುಕಾತ್, ಪುಣ್ ಜೆರಿ ಡಿ’ಮೆಲ್ಲೊಚೆಂ ಮಯ್ನ್ಯಾಳೆಂ ಅಂಕಣ್ ಚುಕಾಶೆಂನಾ’. ಕಾಂಯ್ ಕೊಣ್ ಉಣ್ಯಾ ಸಮ್ಜಣೆಚೆ ಮಾಂಧ್ತಿತ್ ’ಹಾಂಕಾಂ ದುಸ್ರೆಂ ಕಿತೆಂಚ್ ಕಾಮ್ ನಾ, ದೆಕುನ್ ತ್ಯಾ ತ್ಯಾ ವೆಳಾರ್ ಚುಕಾನಾಸ್ತಾಂ ಅಂಕಣಾಂ ಬರಯ್ತಾತ್’ - ಪುಣ್ ಕೊಣ್ ಸಾಂಗ್ತಾ ಅಂಕಣ್ ಬರಂವ್ಕ್ ಫಕತ್ತ್ ವೇಳ್ ಮಾತ್ರ್ ಪುರೊ ಮ್ಹಣ್?. ಕಾಳ್ಜಾಂತ್ ಜರ್ ಖತ್ಕತ್ಚೊ ಮೋಗ್, ಆನಿ ಫಾವೊತೆಂ ಸಪರ್ಪಿತ್ ಭಗಾಪ್ ಆಸ್ಲ್ಯಾರ್ ವೇಳ್ ಅಪ್ಸೊಚ್ಚ್ ಮೆಳ್ತಾ ಆನಿ ಹಾತಿಂ ಧರ್ಲ್ಲೆಂ ಖಂಚೇಂಯ್ ಕಾಮ್, ಕಿತ್ಲೇಂಯ್ ಕಠೀಣಾಯೆಚೆಂ ತೆಂ ಜಾಂವ್, ಕರುಂಕ್ ಸಾಧ್ಯ್ ಜಾತಾ.
ಮಾನೆಸ್ತ್ ಜೆರಿ ಡಿ’ಮೆಲ್ಲೊಚ್ಯಾ ’ದೊ.ರೆ.ಮಿ.ಪಾ’ ಅಂಕಣಾಚ್ಯಾ ಸಭಾರ್ ವಾಚ್ಪಿ ಅಭಿಮಾನಿಂತ್ಲೊ ಹಾಂವ್ಯೀ ಎಕ್ಲೊಂ. ಹ್ಯಾ ಅಂಕಣಾಚ್ಯಾ ಪಾಟ್ಲ್ಯಾನ್ ತಾಣೆಂ ಘೆತ್ಲ್ಲಿ ಮಿನತ್, ಕಾಡ್ಲ್ಲಿ ವಾಂವ್ಟ್ ಮ್ಹಾಕಾ ಇಲ್ಲೊ ತರ್ಯೀ ಸುಸ್ತಾತಾನಾ ಖರೆಂಚ್ ಭಗ್ತಾ - ಹೆಂ ಕಾಂಯ್ ಕೊಣೆಂಯ್ ಕರ್ಚೆತಸ್ಲೆಂ ಮಿಸಾಂವ್ ಭಿಲ್ಕುಲ್ ನ್ಹಯ್. ಎಕಾಧಾವೆಳಾ ವ್ಹಯ್ ಆಸ್ತೆಂ ತರ್ - ಬಡಂವ್ಚೆ ಸರ್ವ್ ವ್ಹಾಜಯ್ತೆ, ವ್ಹಾಜಂವ್ಚೆ ಸರ್ವ್ ಫುಂಕ್ತೆ, ಫುಂಕ್ಚೆ ಸರ್ವ್ ಗಾಯ್ತೆ ಆನಿ ಗಾಂವ್ಚೆ ಸರ್ವ್ ನಾಚ್ತೆ.
ಮಾನೆಸ್ತ್ ಜೆರಿ ಡಿ’ಮೆಲ್ಲೊ ಸಭಾರ್ ತಾಲೆಂತಾಂಕ್ ಜೋಡ್ನ್ ಘೆತ್ಲ್ಲೊ; ಪದಾಂ ಮಾತ್ರ್ ನ್ಹಯ್, ಕವಿತಾಂಯ್ ತೊ ಬರಯ್ತಾ, ಲೇಖನಾಂ ಸಯ್ತ್ ಬರಯ್ತಾ, ಸಂದರ್ಶನಾಂ, ವೆಕ್ತಿ ಪರಿಚಯ್ ಕಾಂಯ್ ಚಿಲ್ಲರ್ ಸಾಹಿತ್ಯ್ ನ್ಹಯ್, ತಿತ್ಲೆಂ ಸಲೀಸ್ಯೀ ನ್ಹಯ್. ಪುಣ್ ಮನ್ ಆಸ್ಲ್ಯಾರ್ ಸರ್ವ್ ಸಲೀಸ್ - ಹಿ ಹಾಚಿ ಮನೋಗತ್. ಇತ್ಲೆಂಚ್ ನ್ಹಯ್, ಹಾಚೆಲಾಗಿಂ ಆಸ್ಚಿ ಅನ್ಯೇಕ್ ಭೋವ್ ಭಳ್ವಂತ್ ಸಕತ್ ಜಾವ್ನಾಸಾ - ಹೆರಾಂಕ್ ಹುಮೆದಿನ್ ಭರ್ಚಿ ಸಕತ್. ಜಿಣ್ಯೆಚ್ಯಾ ಅಖ್ರೇಚ್ಯಾ ಪಾಂವ್ಡಾರ್, ಜಿಣ್ಯೆಂತ್ ಝುಜೊನ್, ಸಲ್ವೊನ್, ಮೊರ್ಣಾಕ್ ರಾಕ್ಚ್ಯಾಕ್ ಸಯ್ತ್ ಹಾಚಿ ಹುಮೆದ್ - ಕಾಂಯ್ ನವೆಂ ಜಿವಿತ್ ಜೊಡ್ಯಾಂ ಮ್ಹಳ್ಳೆಂ ಚಿಂತಾಪ್ ಹಾಡಯ್ತ್ ತರ್ ಹಾಂವ್ ಅಜ್ಯಾಪ್ ಪಾಂವ್ಚೊ ನಾ.
ಮಸ್ಕತಾಂತ್ಲ್ಯಾ ಕೊಂಕ್ಣಿ ಪರ್ಜೆನ್ ಲಾಗ್ಸಿಲ್ಯಾನ್ ವ್ಹಳ್ಕಾಲ್ಲ್ಯಾ ಮಾನೆಸ್ತ್ ಜೆರಿ ಡಿ’ಮೆಲ್ಲೊಕ್ ಮುಖಾಮುಖಿ ಜಾಂವ್ಚೆಂ ಭಾಗ್ ಮ್ಹಾಕಾ ಸರ್ವೆಸ್ಪರ್ ದೆವಾನ್ ಫಾವೊ ಕೆಲ್ಲೆಂ 2006 ಇಸ್ವೆಂತ್, ರಾಕ್ಣೊ ಹಫ್ತ್ಯಾಳ್ಯಾನ್ ಆಸಾ ಕೆಲ್ಲ್ಯಾ ಎಕಾ ಕವಿ-ಸಂಧಿಂತ್. ಹಾಂವ್ ಪಯ್ಸಿಲೆಂ ಪಯ್ಣ್ ಕರ್ನ್ ವೆಗಿಂಚ್ ಆಯಿಲ್ಲೊಂ ತರ್ ತೊ ವೆಳಾರ್ ಯೆತಾನಾ ಥೊಡೆ ಜಮ್ಲ್ಲೆ. ಹಾಂವ್ ವಿಲ್ಫಿಯಾಬಾಸವೆಂ ಉಲವ್ನ್ ಆಸ್ಚೆವೆಳಾರ್, ಅಪ್ಲೆಂ ಹಾಸ್ಕುರೆಂ ತೋಂಡ್ ಘೆವ್ನ್ ಸಾಲಾಕ್ ಭಿತರ್ ರಿಗ್ಲ್ಲ್ಯಾ ಹಾಣೆಂ ವಿಲ್ಫಿಯಾಬಾಕ್ ಹಾತ್ ಮೆಳಯ್ತಚ್, ದೆಗೆನ್ ಉಭೊ ಆಸ್ಲ್ಲ್ಯಾ ಹಾಂವೆಂ ಮ್ಹಜೆಂ ನಾಂವ್ ಮಾತ್ರ್ ಸಾಂಗೊನ್ ತೋಂಡ್ ಧಾಂಪಿಜಯ್ ತರ್ ತಾಣೆಂ ಆಪ್ಲೆ ದೊನೀ ಬಾವ್ಳೆ ಉಸವ್ನ್ ಮ್ಹಾಕಾ ಮಾಯ್ಪಾಸಿ ವೇಂಗ್ ದಿತಾನಾ ಅಶೆಂ ಭಗ್ಲೆಂ ’ಕಿಡ್ಯಾಕ್ ಸಯ್ತ್ ಎಕಾ ಖಿಣಾಕ್ ಅಪುಣ್ ರೆಡೊ ಮ್ಹಳ್ಳೆಂ ಭಗಾಪ್ ಹೆರಾಂ ಥಂಯ್ ಹಾಡಂವ್ಚಿ ಶ್ಯಾಥಿ ಸರ್ವಾಂಲಾಗಿಂ ಆಸಾನಾ’. ಥೊಡ್ಯೊಚ್ ಘಡಿಯೊ ಆಮಿ ಉಲಯ್ಲ್ಯಾಂವ್, ಪುಣ್ ತ್ಯಾ ಥೊಡ್ಯಾ ಘಡಿಯಾಂನಿ ಪಾವಣ್ಶಿಂ ಠಕ್ಕೆಂ ಉಲವ್ಪ್ ಕೊಂಕ್ಣೆವಿಶಿಂ ಆಸ್ಲೆಂ ಶಿವಾಯ್ ಆಮ್ಚೆವಿಶಿಂ ನ್ಹಯ್.
ಫುಡಿಲ್ಯಾ ಹಾಫ್ತ್ಯಾಂತ್ ಆಮಿ ಕಾರ್ಕಳ್ ವಾರಾಡ್ಯಾಂತ್ ಆಸಾ ಕೆಲ್ಲ್ಯಾ ದಾಯ್ಜ್-ಮಿತ್ರ್ ಸಾಹಿತಿಕ್ ಶಿಭಿರಾಕ್ ಯೆಂವ್ಚಿ ಭಾಸಾವ್ಣಿ ತಾಣೆಂ ಕೆಲಿ ಮಾತ್ರ್ ನ್ಹಯ್, ತ್ಯೇ ದಿಸಾ ಪಯ್ಣ್ ಕರುನ್ ತೊ ಪಾವ್ಲೊ ಸಯ್ತ್, ಆನಿ ’ಕೊಂಕ್ಣಿ ವಾವ್ರ್’ ವಿಶ್ಯಾಂತ್ ಅಪುರ್ಭಾಯೆಚಿಂ ದೋನ್ ಉತ್ರಾಂಯ್ ಉಲಯ್ಲೊ. ಇತ್ಲೆಂಚ್ ನ್ಹಯ್, ಆಪ್ಲ್ಯಾ ಉತ್ರಾಕ್ ಸರಿ ಜಾವ್ನ್ ಕೊಂಕ್ಣೆಂತ್ಲೊ ಪಯ್ಲೊ ಸಂಪೂರ್ಣ್ ಇ-ಬೂಕ್ ಜಾವ್ನಾಸ್ಚ್ಯಾ ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ ಬುಕಾಚಿ ಮೊಕ್ಳೀಕ್ ಸಯ್ತ್ ಕೆಲೊ. ಹೆಚ್ಚ್ ಸಂಧರ್ಭಾಚೆರ್ ತಾಕಾ ದಾಯ್ಜ್.ಕೊಮ್ ತರ್ಫೆನ್ ಮಾನ್ ಕೆಲೊ. ಹೆಚ್ಚ್ ಸಂಧರ್ಭಿಂ ಬಾಬ್ ಎರಿಕ್ ಒಝೆರಾನ್ ಸಾಂಗ್ಲ್ಲೆಂ ಏಕ್ ಉತಾರ್ ಉಡಾಸ್ ಕಾಡುಂ ತರ್ "ಕೊಣ್ ಕೆನರಾಚೊ ಉಡಾಸ್ ವಿಸ್ರೊನ್ ಕೆನಡಾಕ್ ವೆತಾತ್ ಆನಿ ಆಪ್ಲೆಂ ಕುಟಾಮ್ ಚಲಯ್ತಾತ್, ಪುಣ್ ಹೊ ಕೆನಡಾಕ್ ವೆತಾಸ್ತಾಂ, ಸಂಗಿಂ ಆಪ್ಲ್ಯಾ ಕಾಳ್ಜಾಂತ್ ಭರೊನ್ ವೊಮ್ತೊಂಚಿಂ ಕೊಂಕ್ಣಿ ಸ್ವಪ್ಣಾಂ, ಕೊಂಕ್ಣಿ ಬೊಂದೆರ್ ಘೆವುನ್ ವೆತಾ"
ತ್ಯೇ ಉಪ್ರಾಂತ್ ಆಮಿ ಕೆದಿಂಚ್ ಮೆಳೊಂಕ್ ನಾಂವ್ ತರ್ಯೀ, ಕೆದಿಂಚ್ ತೊ ಪಯ್ಸ್ ಆಸಾ ಮ್ಹಳ್ಳೆಂ ಭಗಾಪ್ಯೀ ಮ್ಹಾಕಾ ಆಯಿಲ್ಲೆಂ ನಾ. ಆಜ್ ತೊ ಪಯ್ಸಿಲ್ಯಾ ಕೆನಡಾಕ್ ಉಭ್ಲಾ. ಖರೆಂಚ್ ಜಾವ್ನ್ ಬಾಬ್ ಎರಿಕ್ ಒಝೆರಾಚಿಂ ಉತ್ರಾಂ ಹಕೀಗತೆನ್ ಬದ್ಲೊಂಚಿಂ ಭಳ್ವಂತ್ ಖುಣಾಂ ದಿಸೊನ್ ಯೆತಾತ್. ಸತ್ ಸಾಂಗೊಂ ತರ್ ತಾಚೆಂ ಸಾಹಿತ್ಯ್ ವಾಚುಂಕ್ ಅತ್ರೆಗಾನ್ ರಾಕ್ತೆಲ್ಯಾಂ ಪಯ್ಕಿಂತ್ಲೊ ಹಾಂವ್ಯೀ ಎಕ್ಲೊಂ. ಆತಾಂ ತಾಚೆಂ ನವೆಂ ಅಂಕಣ್ ಕೊಂಕ್ಣಿ ವಾಚ್ಪ್ಯಾಂಕ್ ವಾಚುಂಕ್ ಮೆಳ್ಚೆಂ ಭೋವ್ ಸಂತೊಸಾಚೆಂಚ್.
’ಕೆನರಾ ಥಾವ್ನ್ ಕೆನಡಾ’ - ಏಕ್ ವಿಶೇಸ್ ಮಿಸಾಂವ್, ಆಪ್ಲೊ ಮಾಯ್ಗಾಂವ್ ಸಾಂಡುನ್ ಕೆನಡಾಕ್ ಪಾವೊನ್ ಆಪ್ಲಿಂ ಸ್ವಪ್ಣಾಂ ಹಕೀಗತ್ ಕರುಂಕ್ ಆಶೆತೆಲ್ಯಾ ಹಜಾರೊಂ ಲೊಕಾಂಕ್, ಕೆನಡಾಚೆಂ ವಾಸ್ತವ್ ಧಾಖಂವ್ಚ್ಯಾ ಇರಾದ್ಯಾನ್, ಹೊ ಆಪ್ಲೆ ಅನ್ಭೋಗ್, ಆಶಾ-ಅತ್ರೆಗ್, ವಾಂಟುನ್ ಘೆಂವ್ಕ್ ಮುಖಾರ್ ಆಯ್ಲಾ. ಖರೆಂಚ್ ಜಾವ್ನ್ ಹೆಂ ಅಂಕಣ್, ಕೆನಡಾಕ್ ಗೆಲ್ಲ್ಯಾಂನಿ, ವಾ ವಚೊಂಕ್ ಆಶೆತೆಲ್ಯಾಂನಿ ಜರೂರ್ ವಾಚಿಜಯ್ ಜಾಲ್ಲೆಂ ಜಾವ್ನಾಸಾ.
- ವಲ್ಲಿ ಕ್ವಾಡ್ರಸ್.
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
