ಅಮಿಂ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಅಮಿಂ ಸ್ವತಂತ್ರ್

ವರಸ್ : 2004

ಅಂಕೊ : 2

ಮಯ್ನೊ : ಅಗೋಸ್ತ್

ಸಂಪಾದಕೀಯ್ - 2 .

ವಲ್ಲಿ ಕ್ವಾಡ್ರಸ್

ಅಗೋಸ್ತಾಚೊ ಮಯ್ನೊ ಸಭಾರ್ ಕಾರಾಣಾಂಕ್ ಲಾಗೊನ್ ಮಹತ್ವಾಚೊ, ಹ್ಯಾ ಸಭಾರ್ ಕಾರಾಣಾಂ ಪಯ್ಕಿ ಪ್ರಮುಖ್ ಕಾರಾಣ್ ಜಾವ್ನಾಸಾ ಆಮ್ಕಾಂ ಲಾಭ್‌ಲ್ಲೆಂ ಸ್ವಾತಂತ್ರ್. ಅಜಿಕ್ ಸತ್ತಾವನ್ ವರ್ಸಾಧಿಂ ಮ್ಹಣ್ಜೆ ಏಕ್ ಹಜಾರ್ ನೊಯ್ಶಿಂ ಸತ್ತಾಚಾಳಿಸ್ ಇಸ್ವೆಥಾವ್ನ್, ಅಜೂನ್ ಪರ್‍ಯಾಂತ್ ಆಮಿಂ ಸ್ವತಂತ್ರ್?.

ಚಡುಣೆಂ ಸಾಡೆಪಾಂಚ್ ದಾಕ್ಡ್ಯಾಂನಿ ಅಮಿಂ ಕಿತೆಂ ಶಿಕ್ಲ್ಯಾಂವ್? ಆಮ್ಚೊ ದೇಸ್ ಖಂಯ್ಚಾ ದಿಶೆನ್ ಚಮ್ಕೊನ್ ಆಸಾ? ಆಯ್ಲೆವಾರ್ ’ಇಂಡಿಯಾ ಈಸ್ ಶಾಯ್ನಿಂಗ್’ ಮ್ಹಳ್ಳೆ ನಾರೆ ಥಂಯ್ ಹಾಂಗಾ ಆಯ್ಕೊಂಕ್ ಮೆಳ್ಳೆ. ತೆ ನಾರೆ ತಾಳೆ ಆಸ್ಚಾಂನಿ ಘಾಲ್ಲೆ ಆನಿಂ ಕಾನ್ ಆಸ್ಚಾಂನಿ ಆಯ್ಕಾಲೆ.

ಪುಣ್ ಹ್ಯಾ ಸರ್‍ವ್ ವರ್ಸಾಂನಿ ಥೊಡ್ಯೊ ಸಂಗ್ತ್ಯೊ ಮಾತ್ರ್ ಆಧಿಂ ಥಾವುನ್ ಅಜೂನ್ ಪರ್‍ಯಾಂತ್ ಸಾಮಾನ್ಯ್ ಜಾವ್ನ್ಂಚ್ ಉರ್‍ಲ್ಯೊ. ಏಕ್ ’ಲಜ್’ ಅನ್ಯೇಕ್ ’ಭುಕ್’. ಮನಿಸ್ ಜಸೊ ಸಂಸಾರ್ ಬದಲ್ಲಾ ತಶೆಂ ಬದಲ್ಲಾ, ಅಪ್ಲ್ಯಾ ಮಟ್ಟಾಕ್ ಸರಿ ಜಾಲ್ಲೆಪರಿಂ ನೆಸ್ತಾ, ಪಾಂಗುರ್ತಾ, ಖಾತಾ, ಪಿಯೆತಾ.

ಇರಾದೊ ಮಾನ್ ದಾಂಪ್ಚೊ ತರ್‌ಯಿ ಕೋಣ್ ಎಕ್ಲೊ ಸೂಟ್ ತರ್ ಕೋಣ್ ಎಕ್ಲೊ ಖಲ್ಸಾಂವ್, ಇರಾದೊ ಚಲ್ಚೊ ತರ್‌ಯಿ ಕೋಣ್ ಎಕ್ಲೊ ಬೂಟ್ ತರ್ ಕೋಣ್ ಎಕ್ಲೊ ರಿತ್ಯಾ ಪಾಂಯಾಂಚೆರ್. ಇರಾದೊ ಪೋಟ್ ಭರ್ಚೊ ತರ್‌ಯಿ ಕೋಣ್ ಚಿಕನ್ ಮಂಚೂರಿಯನ್ ತರ್ ಕೋಣ್ ಮೀಟ್ ಮಿರ್ಸಾಂಗ್ ಚಿಡ್ಡಿಲ್ಲಿ ಪೇಜ್.

ತರ್‌ಯಿ ಅಜೂನ್ ಸಂಸಾರಾಂತ್ ವಾಟಾಂ ವಾಟಾಂನಿ, ಮೆಟಾಂ ಮೆಟಾಂನಿ ಕಸೊ ಪೆಟೊನಾಸಾ ತೊಚ್ ಉಜೊ, ಫ಼ಾರಿಕ್ಪಣಾಚೊ, ಧ್ವೇಶಾಚೊ, ಹಗ್ಯಾಚೊ, ಮೊಸ್ರಾಚೊ. ಮನಿಸ್ ಎಕಾಮೆಕಾ ತಿರ್ಕುಟ್ ಕರುಂಕ್ ಲಾಗ್ಲಾ, ಜಾತಿಚಾ, ಕಾತಿಚಾ, ಧರ್‍ಮಾಚಾ ನಾಂವಾನ್. ಶಿಕಾಪ್ ಏಕ್ ದಂದೊ ಜಾಲಾ, ನೀತ್ ಮ್ಹಳ್ಳೊ ಏಕ್ ಬಾಜಾರ್‌ಸೊ ಜಾಲಾ. ಮಯ್ಪಾಸ್, ಮನ್ಶಾಪಣ್ ಮ್ಹಳ್ಳೆ ಫ಼ಕತ್ ಸಬ್ದ್ ಜಾವ್ನ್ ಸಬ್ದ್‌ಕೋಶಾಚಾ ಬುಕಾಂನಿ ಪಿಗಳ್ಳ್ಯಾತ್.

ಹ್ಯಾ ದಿಸಾಂ ಮಧೆಂ ಪರತ್ ಪರತ್ ಹೆಡಾಂವ್ಚಾಕ್ ಯೆವುನ್ ವೆತಾ ಸ್ವತಂತ್ರಾಚೊ ದೀಸ್. ಹ್ಯಾಚ್ಚ್ ದಿಸಾ ಖೈಂ ಭಾಶಣಾಂ ಜಾತಾತ್, ಖೈಂ ರಾಶ್ಟ್ರಾಚೊ ಬಾವ್ಟೊ ಉಭಾರ್ ಜಾತಾ, ಖೈಂ ಫ಼ುಲಾಂ ಸಕ್ಲಾ ಪಡ್ತಾತ್, ಕೋಣ್ ಮಸ್ತಿತಾತ್, ಕೋಣ್ ಚಿಡ್ಡಿತಾತ್, ಕೋಣ್ ಗುಡ್ಡಾಯ್ತಾತ್ ಆನಿಂ ಲೊಕಾಂಚಾ ತಾಳಿಯಾಂಚಾ ಆವಾಜಾ ಬರಾಬರ್ ಕೋಣ್ ವಾಂಟ್ತಾತ್ ಮಿಟಾಯ್.

ಹ್ಯಾ ಪರಿಗತೆಚಾ ಶಿಂಕ್ಳೆಂತ್ ಶಿರ್ಕೊನ್ ಸಾದೊ ಲೋಕ್ ಅಜೂನ್ ಮೊರೊನ್ ತರ್‌ಯಿ ಜಿಯೆತಾ. ರಿತ್ಯಾ ಕುಡಿಂತ್, ರಿತ್ಯಾ ಬೊಲ್ಸಾಂನಿ ಮಾತ್ರ್ ನ್ಹಯ್ ರಿತ್ಯಾ ಪೊಟಾನ್ ಸಯ್ತ್. ಆಪ್ಲೆಂ ಫಾಲೆಂ ನೆಣಾಸ್ತಾಂ, ಅಪ್ಲ್ಯಾ ಬಾಳಾಂಚೆಂ ಫಾಲೆಂ ನೆಣಾಸ್ತಾಂ.

ಹ್ಯಾ ಕಂಗಾಲ್ ದಿಸಾಂನಿ ಜರೀತರೀ ಹ್ಯಾ ಭಾಶಣಾಂಚಾ ಬದ್ಲಾಕ್, ಮಿಟಾಯಾಂ ಬದ್ಲಾಕ್ ಹ್ಯಾ ಎಕಾ ದಿಸಾ ಪುಣೀಂ ಹ್ಯಾ ನಿರ್ಗತಿಂಕಾಂ ಖಾತಿರ್ ಜಿಯೆಂವ್ಕ್ ಸಕ್ತಿತ್ ತರ್? ಹಾಂಚಿ ಭುಕ್ ಆಯ್ಕತಿತ್ ತರ್? ಹಾಂಚಿ ತಾನ್ ಚೊಂವ್ಕ್ ಸಕ್ತಿತ್ ತರ್? ಜಾಂವ್ಚೆಂನಾಗೀ ಹ್ಯಾ ಸ್ವತಂತ್ರ್ ದಿಸಾಚೊ ನವೊ ಅರ್ಥ್?

ಆಯ್ಚಾ ಪ್ರಗತಿಪರ್ ಸಂಸಾರಾಂತ್ ಆಮಿಂ ಎಕಾ ಉಡ್ಕೆನ್ ಚಂದ್ರಾಕ್ ಪಾವ್ತಾಂವ್, ಎಕಾ ಖಿಣಾನ್ ಏಕ್ ಗಾಂವ್ ಹುಲ್ಪಾಶೆಂ ಕರುಂಕ್ ಸಕ್ತಾಂವ್, ಎಕಾ ಘಡ್ಯೆನ್ ದರ್‍ಯಾಚಾ ಗರ್ಭಾಕ್ ಉಸ್ತುಂಕ್ ಸಕ್ತಾಂವ್. ಕಿತ್ಯಾಕ್ ಮ್ಹಳ್ಯಾರ್ ಆಮ್ಚಿ ನದರ್ ಆಮ್ಚೆ ಮುಖಾರ್ ಆಸಾ, ಜಶೆಂ ದಾಂವ್ಚಾ ಘೊಡ್ಯಾಚಾ ದೊಳ್ಯಾಂಭಂವಾರಿಂ ಪಾಟೊ ಬಾಂದ್‌ಲ್ಲೆಪರಿಂ ಆಮ್ಚಾ ಆಳ್ಸಾಯೆಚೊ ಪಾಟೊ ಆಮಿಂ ಆಮ್ಚಾ ಜಿಣ್ಯೆಂತ್‌ಯಿ ಬಾಂದ್ಲಾ.

ಆಮ್ಚಾ ಭಂವಾರಿಂ ಆಮ್ಕಾಂ ಪಳೆಂವ್ಕ್ ನಾಕಾ. ಕಿತ್ಲೆಂ ಬರೆಂ ಆಸ್ಚೆಂ ಜರ್ ಆಮ್ಚಾ ಭಂವಾರಿಂ ಆಮಿಂ ದೆಖೊಂಕ್ ಸಕ್‌ಲ್ಲ್ಯಾಂವ್ ತರ್? ಆಮಿಂ ಎಕ್ಲಿಂ ಜಾವ್ನ್, ಆಮ್ಚಾ ಇಸ್ಟಾಂ ಮಂತ್ರಾಂಕ್ ಘೆವ್ನ್, ಆಮ್ಚಾ ಸಮಾಜೆಚಾ ಮನ್ಶಾಂಕ್ ಘೆವ್ನ್, ಆಮ್ಚಾ ಗಾಂವ್ಚಾಂಕ್ ಘೆವ್ನ್ ಏಕ್ ದೀಸ್, ಯಾ ಏಕ್ ಘಡಿ ಆಮಿಂ ಹೆರಾಂ ಖಾತಿರ್ ಜಿಯೆಲ್ಲ್ಯಾಂವ್ ತರ್? ಆಮ್ಚಾ ಸಂಚಾಲನಾಧ್ವಾರಿಂ, ಆಮ್ಚಾ ಗರ್ಜೆವಂತಾಂಕ್ ಎಕಾ ದಿಸಾಚೆಂ ಪುಣೀಂ ಪಾವೊಂಕ್ ಸಕ್‌ಲ್ಲ್ಯಾಂವ್ ತರ್?

ಬೌತಿಕ್ ಯಾ ಲೌಕಿಕ್ ಸಂಸಾರಾಚೆ ನದ್ರೆನ್ ಪಳೆಲೆಂ ತರ್ ಹಾಂತುಂ, ಮ್ಹಣ್ಜೆ ಗರ್ಜೆಂತ್ ಆಸ್ಚಾಂಕ್ ಪಾವೊಂಕ್ ಗೆಲ್ಯಾರ್, ಪ್ರತಿಫಳ್ ಕಸ್ಲೊಚ್ ಮೆಳ್ಚೊನಾ, ಖಂಯ್ಸರ್‌ಯ್ ನಾಂವ್ ಗಾಜ್ಚೆನಾಂ, ತಸ್ವೀರ್ ಜಾಂವ್ ವರ್ದಿ ಜಾಂವ್ ಛಾಪ್ಚಿನಾ, ಮಾನ್ ಮೆಳ್ಚೊನಾ, ಧನ್ ದಿರ್‍ವೆಂ ಮೆಳ್ಚಾಕೀ ಹೊಗ್ಡಾಯ್ಜಯ್ ಪಡ್ತೆಲೆಂ.

ತರ್‌ಯೀ ಮನ್ಶಾಪಣಾಚಿಂ ಖರಿಂ ಮೊಲಾಂ ಹ್ಯಾಚ್ ಕರ್‍ನೆಂನಿ ಆಟಾಪೊನ್ ಆಸಾತ್ ನ್ಹಯ್‌ಗೀ? ತಶೆಂ ಆಸ್ತಾಂ ಹ್ಯಾ ವರ್ಸಾ, ಹಾಂವ್, ಆಮಿಂ, ಆಮ್ಚೆಂ ಸಂಚಾಲನ್, ಫ಼ಕತ್ ಏಕ್ ಉದ್ದೇಶ್ ಅಪ್ಲ್ಯಾ ಘಟನಾವಳೆಕ್ ಮೆಳಯ್ತಾ ಆನಿಂ ತೊ ಜಾವ್ನಾಸಾ ’ಅಮ್ಚಾಚ್ಚ್ ಗರ್ಜೆವಂತಾಂಕ್ ಏಕ್ ದಿಸಾ ಪುಣೀಂ ಪಾಂವ್ಚೊ’

ಪುಣ್ ಲಾಖ್ ರುಪ್ಯಾಚೆಂ ಸವಾಲ್ ಮಾತ್ರ್ ಅಧುರೆಂಚ್ ಜಾವ್ನ್ ಉರ್ತಾ ’ಮಾಜ್ರಾಕ್ ಘಾಂಟ್ ಬಾಂಧ್ತಾ ಕೋಣ್?’

- ವಲ್ಲಿ ಕ್ವಾಡ್ರಸ್, ಅಜೆಕಾರ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

ಮುಕ್ತ್ ಉಲವ್ಪ್ ವಾ ಸವಾಯೆಚೆಂ (ಚೀಪ್) ಉಲವ್ಪ್?

ಬಿಜಿ ಆಸಾಯ್‌ಗೀ?

ಕಸ್ಟ್