ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತುವೆಂ
ಸಾಂಗ್ಲೆಲೆಬರಿ ಆಮಿಂ ಮಾಗ್ತಾಂವ್. ದೆವಾಲಾಗಿಂ ಸಾಂವಾದ್ ಕರ್ತಾನಾ
ಸಂಬಂಧ್ ಕರ್ತಾನಾ ಆಮ್ಚ್ಯೊ ಆಶ್ಯೊ - ವಿನತಿ ತುಕಾ ಧಾಡ್ತಾಂವ್ ಎಕ್ಚ್ ತುಜ್ಯೆಲಾಗಿಂ. ತುಂ ಏಕ್ದಮ್ ಬಿಜಿ ಆಸ್ಲ್ಲ್ಯಾನ್, ಆಮಿ ತುಜ್ಯಾ ಭಕ್ತಾಂಲಾಗಿಂ -
ಸಾಂತಾಂಲಾಗಿಂ ಮಾಗ್ತಾಂವ್.
ಆಮಿಂ ಮಾಗ್ತಾಂವ್ - ಆಮ್ಚೆಖಾತಿರ್, ಆಮ್ಚಾ ಕುಟ್ಮಾ ಖಾತಿರ್, ಆಮ್ಚ್ಯಾ ಬರೆಂಪಣಾ ಖಾತಿರ್, ದುಸ್ಮಾನಾಂಚ್ಯಾ
ನಾಸಾಖಾತಿರ್, ಆಮ್ಚ್ಯಾ ವಿರೋಧಿಂಚ್ಯಾ ಸತ್ತ್ಯಾನಾಸಾ ಖಾತಿರ್.
ಸತಾಂತ್ಲಿಂ ವಿಚಿತ್ರಾಂ - 10. ಆಂಗವ್ಣ್ಯೊ ಆನಿ ಮಿಸಾಂ
ಜೆಮ್ಮಾ ಪಡೀಲ್
ದೆವಾ ತುವೆಂ ಆಮ್ಕಾಂ ಮಾಗೊಂಕ್ ಸಾಂಗ್ಲೆಂಯ್, ಮಾಗ್ಣ್ಯಾ ಥಾವ್ನ್ ಮಾಗ್ಣ್ಯಾ ವರ್ವಿಂ ಜಾಂವ್ಚೊ ದೆವಾಲಾಗಿಂ ಸಂವಾದ್, ಸಂಬಂಧ್ ತುವೆಂ ಸಾಂಗೊನ್, ವಿವರ್ಸುನ್ ಆಮ್ಕಾಂ ’ದೆವಾಚೆಂ ಮಾಗ್ಣೆಂ’ ಶಿಕಯ್ಲೆಂಯ್. ಎಕಾ ಉತ್ರಾನ್ - ಹ್ಯಾ ಮಾಗ್ಣ್ಯಾಂತ್ ಜೀವನಾಂತ್ಲಿಂ ಸರ್ವ್ ಮುಖಾಂ, ಆರ್ಸೊ ತುವೆಂ ಧಾಖಯ್ತಾತ್ ಮ್ಹಣ್ ಕಳಿತ್ ಕೆಲೆಂಯ್.
ತುವೆಂ ಸಾಂಗ್ಲೆಲೆಬರಿ ಆಮಿಂ ಮಾಗ್ತಾಂವ್. ದೆವಾಲಾಗಿಂ ಸಾಂವಾದ್ ಕರ್ತಾನಾ ಸಂಬಂಧ್ ಕರ್ತಾನಾ ಆಮ್ಚ್ಯೊ ಆಶ್ಯೊ - ವಿನತಿ ತುಕಾ ಧಾಡ್ತಾಂವ್ ಎಕ್ಚ್ ತುಜ್ಯೆಲಾಗಿಂ. ತುಂ ಏಕ್ದಮ್ ಬಿಜಿ ಆಸ್ಲ್ಲ್ಯಾನ್, ಆಮಿ ತುಜ್ಯಾ ಭಕ್ತಾಂಲಾಗಿಂ - ಸಾಂತಾಂಲಾಗಿಂ ಮಾಗ್ತಾಂವ್.
ಆಮಿಂ ಮಾಗ್ತಾಂವ್ - ಆಮ್ಚೆಖಾತಿರ್, ಆಮ್ಚಾ ಕುಟ್ಮಾ ಖಾತಿರ್, ಆಮ್ಚ್ಯಾ ಬರೆಂಪಣಾ ಖಾತಿರ್, ದುಸ್ಮಾನಾಂಚ್ಯಾ ನಾಸಾಖಾತಿರ್, ಆಮ್ಚ್ಯಾ ವಿರೋಧಿಂಚ್ಯಾ ಸತ್ತ್ಯಾನಾಸಾ ಖಾತಿರ್. ತುವೆಂ ಸಾಂಗೊಂಕ್ ನಾಂಯ್ ವಾಯ್ಟ್ ಹೆರಾಂಕ್ ಮಾಗಾನಾಕಾ ಮ್ಹಣ್. ತುವೆಂ ಆಮ್ಕಾಂ ದುಖಯಿಲ್ಲ್ಯಾಂಕ್ ಭಗ್ಸುಂಕ್ ಸಾಂಗ್ಲಾಂಯ್. ಪುಣ್ ಆಮಿಂ ದೇವ್ ನ್ಹಂಯ್ ಮನಿಸ್. ಕುಡ್ ಆಸ್ಲ್ಲೊ - ಸಂಸಾರಾಚೊ ವೊಸೊ ಆಸ್ಲ್ಲೊ ಮನಿಸ್. ತುವೆಂ ತಸಲ್ಯಾಂ ಥಾವ್ನ್ ’ಹೆರ್’ ಕಿತೆಂ ಅಪೇಕ್ಶಿಯೆತ್?
ದೆವಾ ತುವೆಂ ಮಾಗೊಂಕ್ ಸಾಂಗ್ಲ್ಲ್ಯಾನ್, ಆಜ್ಕಾಲ್ ಮಾಗ್ಣೆಂ "ಏಕ್ಧಮ್" ಚಡ್ಲಾಂ. ಲೋಕ್ ಅಪ್ಲಿ ಜವಾಬ್ಧಾರಿ ಸೊಡ್ನ್ ಮಾಗ್ಣೆಂ ಕರಿತ್ತ್ ಆಸಾ. ಕಾಮಾಗಡೆ ’ಬೋರ್’ ಜಾವ್ನ್ ಮಾಗ್ತಾನಾ ಮಾತ್ರ್ ವಯ್ರ್ ಥಾವ್ನ್ ದೆಂವ್ಲೆಲ್ಯಾ ಆಂಜಾಬರಿ - ಕಿತೆಂ ಮಾಗ್ಚಿ ಸೊಭಾಯ್? ತಾಂಕಾಂ ಪಳೆತಾನಾ ಕಳ್ತಾ - ತಾಂಚೆಂ ’ನಟನ್’ ತುಕಾ ಫಟಂವ್ಕ್ ಸಕ್ತಾ?
ಆಜ್ಕಾಲ್ ಕಿತೆಂಗೀ ಲೊಕಾಕ್ ’ಕಿತೆಂಶೆಂ’ ಜಾಲಾಂ ತುವೆಂ ಮಾಗೊಂಕ್ ಸಾಂಗ್ಲೆಲಿ ರೀತ್ ಕಾಂಯ್ ವಿಸ್ರಾಲಾಗಿ ಮ್ಹಣ್ ಕೊಣ್ಣಾ - ಕಿತೆಂ ಬೊಬಾಟ್? ಕಿತೆಂ ಗಲಾಟೊ? ತಾಂಚಿ ಬೊಬಾಟ್ ಆಯ್ಕೊನ್ ಭುರ್ಗಿಂ ಬಾಳ್ಶಿಂ ರಡ್ತಾತ್, ತಾಂಚ್ಯೊ ಕಿಂಕ್ರಾಟ್ಯೊ ತಾಂಚಿ ಹಾಲ್ ಹವಾಲ್ ಪಳೆತಾನಾ ತಿಂ ಮಾಗ್ತಾತ್ಗಿ ಯಾ ನಾಚ್ತಾತ್ಗಿ ಮ್ಹಳ್ಳೊ ದುಭಾವ್. ಹಾತ್ ಪಾಂಯ್ ಹಾಲಯ್ತಾತ್. ಹಾಂವ್ ಚಿಂತಾಂ ತುಕಾ ಜೆಮ್ ಆಯಿಲ್ಲಿ ಕಾಡುಂಕ್ ತೆ ’ತ್ಯಾ’ ಥರಾನ್ ಮಾಗ್ತಾತ್. ತುವೆಂ ಆಮ್ಕಾಂ ಆಯ್ಕೊಂಚೆಂ ಕಾನ್
ದಿಲ್ಲ್ಯಾ ತುಕಾ ತ್ಯೊ ಬೊಬೊ ಕಿತೆಂ ಕರುಂಕ್ ಸಕ್ತಾತ್.? ದಯಕರ್ನ್ ಸಾಂಗ್ ಸೊಮಿಯಾಂ ತುಜೆಲಾಗಿಂ ವಿಚಾರ್ಲ್ಯಾರ್ ತುಜಿ ಜವಾಬ್ ಮ್ಹಾಕಾ ಸಾರ್ಕೆ ಮತಿಕ್ ಉಜ್ವಾಡ್ ದೀಂವ್ಕ್ ಸಕ್ತಾ ದಯಕರ್ನ್ ಹೆಂ ತುಂ ಕಳಯ್ ಸೊಮಿಯಾಂ.
ತುವೆಂ ಹ್ಯಾ ಸಂಸಾರಾಂತ್ ಆಯಿಲ್ಲ್ಯಾ ವೆಳಾರ್ ಪಿಡೆಸ್ತಾಂಕ್ ಗೂಣ್ ಕೆಲೆಂಯ್. ಕುಡ್ಡ್ಯಾಂಕ್ ದೀಶ್ಟ್ ದಿಲಿಯ್, ಕೊಡ್ಕಾರಾಂಕ್ ಬರೆಂ ಕೆಲೆಂಯ್. ತುವೆಂ ಪಾಟಿಂ "ಕಿತೇಂಯ್" ಘೆಂವ್ಕ್
ನ್ಹಂಯ್ - ಕಾಣಿಕ್ಯೊ ಯಾ ಹೆರ್. ಪುಣ್ ಹಾಂಗಾ ಕಿತೆಂ ಚಲ್ತಾ ಸೊಮಿಯಾಂ? ತುಜೆ ಥಾವ್ನ್ ಮೆಳ್ಲ್ಲ್ಯಾ ಉಪ್ಕಾರಾಕ್ ತುಜ್ಯಾ ಭಕ್ತಾಂಕ್ ಭೆಟಯ್ತಾತ್ ಕಾಣಿಕ್ಯೊ. ಉಪ್ಕಾರ್ ಮೆಳ್ಚ್ಯಾ ಪಯ್ಲೆಂ ವ್ಹಡ್ಲ್ಯೊ ವ್ಹಡ್ಲ್ಯೊ ಆಂಗವ್ಣ್ಯೊ. ಹ್ಯೊ ಆಂಗವ್ಣ್ಯೊ ತಾಚ್ಯಾ ಜೀವನಾಂತ್ ಕರುಂಕ್ ಸಕ್ತಾತ್ಗಿ ಮ್ಹಳ್ಳೆಂ ಏಕ್ ಸವಾಲ್ ಆಸಾ. "ದಯಕರ್ನ್ ಮ್ಹಜೊ ಉಪ್ಕಾರ್ ಮೆಳಾಸೊ ಕರ್. ತುಕಾ..."
ಕಿತೆಂ ಚಲ್ತಾ ಸೊಮಿಯಾಂ? ’ಹೊ’ ಖಂಯ್ಚೊ ಬುಲಾವ್? ಹಿ ಕಸಲಿ ಪುಸ್ಲಾವ್ಣಿ? ತುಜ್ಯೆ ಥಾವ್ನ್ ಉಪ್ಕಾರ್ ಮೆಳ್ಳ್ಯಾರ್ ಹಾಂವ್ ತೆಂ ಕರ್ತಾಂ - ಹೆಂ ಕರ್ತಾಂ, ತುಕಾ ಹೆಂ ದಿತಾಂ..
ದೆವಾಲಾಗಿಂ ಭೃಷ್ಟಾಚಾರ್?!
ತುವೆಂ ಹ್ಯಾ ಸಂಸಾರಾಂತ್ ಕಿತೆಂಯ್ ಘೆಂವ್ಕ್ ನಾಂಯ್. ಪುಣ್ ’ಹ್ಯಾ’ ಸಂಸಾರಾಂತ್ ಸರ್ವ್ ತುಜ್ಯಾ ನಾಂವಾರ್.. ಹಿ ಏಕ್ ವೃತ್ತಿ, ಹೊ ಏಕ್ ವೆವ್ಹಾರ್, ಸರ್ವಾಂಕ್ ಕಾಮ್ - ಸೊನಾರಾಕ್, ವಾಹನ್ಗಾರಾಂಕ್.. ಸರ್ವಾಂಕ್..
ಹೆಂ ಕೊಣ್ ಘೆತಾತ್? ಖಂಯ್ ವೆತಾತ್? ತುಜ್ಯಾ ನಾಂವಾನ್ ಏಕ್ ವೆವ್ಹಾರ್ ಚಾಲು ಆಸ್ತಾ.
ಪರ್ನ್ಯಾ ಸೊಲ್ಲ್ಯಾಂತ್ ತುಂ ಉಲಯ್ತೊಲೊಯ್. ಹ್ಯಾ ಕಾಲಾಂತ್ ತುಜೆಂ ಉಲವ್ಣೆಂ ನಾಂ. ತುಜ್ಯಾ ನಾಂವಾನ್ ಉಲಂವ್ಚೆ ಮುಕಾರ್ ಏಕ್, ಪಾಟ್ಲ್ಯಾನ್ ಏಕ್ ಕರ್ತಾತ್.. ಖಂಯ್ ಚಡ್ ಲೋಕ್ ಯೆತಾ ಉಪ್ಕಾರ್ ಮಾಗೊಂಕ್ ಥಂಯ್ ’ರಾಜಕೀಯ್’ ಚಲ್ತಾ ಸೊಮಿಯಾಂ. ತುವೆಂ ದಿಲ್ಲ್ಯಾ ಪಯ್ಶ್ಯಾಂ ಪಾಟ್ಲ್ಯಾನ್ ಹಾಂಗಾ ಕಾಂಬೊಳ್ ಚಲ್ತಾನಾ ತುಂ ಮೌನ್ ಆಸಾಯ್. ಕಿತೆಂ ತುಂ ವಗೊಚ್ಚ್ ಆಸಾಯ್?
ಆಂಗವ್ಣ್ಯಾಂಚಾ ನಾಂವಾನ್ ಯಾ ಸರ್ಲ್ಲ್ಯಾಂಚಾ ಅತ್ಮ್ಯಾಂಕ್ ಆಮಿ ಮಿಸಾಂ ದಿತಾಂವ್ ಸೊಮಿಯಾಂ. ಮೀಸ್ ಮಾತಿಯೆಕ್ ಪಾಯ್ತಾನಾ ಏಕ್ ರಾಸ್ ಸೆರಾಫಿಕ್ ಮಿಸಾಂಚಿ ಕಡ್ತಿಲ್ಯೊ ಪೆಟೆಂತ್! ಹೆಂ ಕಿತೆಂ ಸೊಮಿಯಾಂ! ಸೆರಾಫಿಕ್ ಮೀಸ್ ದಿಲ್ಯಾರ್ ತಸಲ್ಯಾಂಕ್ ’ಸರ್ಗ್’ ಖಂಡಿತ್! ತಸಲೆಂ ಒಕ್ಕಾಣೆ ತಾಂತುಂ!! ತುವೆಂ ಸರ್ಗ್ ಹ್ಯಾ ಥರಾನ್ ಉಗ್ತೊ ದವರ್ಲಾಯ್? ತಶೆಂ ಜಾಲ್ಯಾರ್ ಮೊರ್ನಾಚೆಂ ಮೀಸ್ ಕಸಲ್ಯಾಕ್? ಸೆರಾಫಿಕ್ ಮಿಸಾಚಿಂ ಕಡ್ತಿಲ್ಯೊ ಪೆಟೆಂತ್ ಭರ್ನ್ ದವರ್ಲ್ಯಾರ್ ಜಾಲೆಂ. ಮರಣ್ ಪಾವ್ಲ್ಲ್ಯಾ ಘರ್ಚ್ಯಾಂಕ್ ಕಸಲೀಯ್ ಖಂತ್ ನಾ. "ತಾಕಾ ಆಮಿ ಸರ್ಗಾಂತ್ ಜಾಗೊ ಮೊಲಾಕ್ ಘೆತ್ಲಾ" ಹೆಂ ಸಾಂಗ್ಲ್ಲ್ಯಾಂತ್ ಕಾಂಯ್ ಚೂಕ್ ಆಸಾ ಸೊಮಿಯಾಂ?
ಹಾಂವ್ ಪಾತ್ಕಿ ಮ್ಹಜಿ ತಕ್ಲಿ ಕುಂಬು; ಅರ್ಧಿಕುರಿ. ತ್ಯಾ ದೆಕುನ್, ಹಾವೆಂ ತುಜ್ಯೆಲಾಗಿಂ ಸವಾಲಾಂ ಕರ್ಚಿಂ ಉಪ್ರಾಂತ್ ತರೀ ಸಾಂಗ್ಯೆತ್ "ಮ್ಹಾಕಾ ದೆವಾಥಾವ್ನ್ ಮೆಸೇಜ್ ಆಯ್ಲ್ಯಾ" ಹೆಂ ಪುರಾ ಸಮಾ
ನ್ಹಂಯ್?.
"ದೆವಾಕ್ ಬರೆಂ ಲಾಗಾನಾ. ಬಂಧ್ ಕರಾ ಹೆಂ ಸರ್ವ್!" ಹಾಂವ್ ಖಂಡಿತ್ ಸಾಂಗ್ತಾಂ ಅಶೆಂ ಹಾಂವ್ ಸಾಂಗ್ಲ್ಯಾರ್ "ತುಜೆ" ಮನಿಸ್ ಕಿತೆಂ ಪ್ರತಿಕ್ರಿಯಾ ದಿತೆಲೆ ತೆಂ. ಹಾವೆಂ ಬರಂವ್ಚಿ ಗರ್ಜ್ ಆಸಾ? ತುಂ ಸರ್ವ್ ಜಾಣಾಂಯ್. ತುಕಾ ಮ್ಹಜೆಂ ’ಹೆಂ’ ವಾಚುಂಕ್ ವೇಳ್ ನಾ. ತುಜೊ ವೇಳ್ ಪಾಡ್ ಕರ್ಚೊ ಸಾರ್ಕೊ ನ್ಹಂಯ್!.
ಲೋಕ್ ಮ್ಹಾಕಾ ಪಿಸೊ ಮ್ಹಣ್ತೆಲೆ. ಥೊಡೆ ಹಾಂವ್ ಕಮ್ಯೂನಿಸ್ಟ್ ಮ್ಹಣ್ತೆಲೆ. ಆಜ್ಕಾಳ್ ಕಮ್ಯೂನಿಸ್ಟ್ ಬದ್ಲೊನ್ ಬಂಡ್ವಾಳಿ ಜಾಲ್ಯಾತ್, ಪುಣ್ ಸತ್ ಸಾಂಗ್ತಾನಾ ಉತಾರ್ ಯೆಂವ್ಚೆಂ ಎಕ್ ಉತಾರ್ "ತುಂ ಕಮ್ಯೂನಿಸ್ಟ್". ದೆವಾ ತುಕಾ ಕಳಿತ್ ಆಸಾ. ಜೆಂ ಕಿತೆಂ ತುವೆಂ ಸಾಂಗ್ಲಾಂಯ್ ಹಾಂವ್ ತೆಂ ಹೆರಾಂಕ್ ಸಾಂಗ್ತಲೊಂ. ಲೋಕ್ ಕಿತೆಂಯ್ ಉಲಂವ್ದಿತ್. ದಯಕರ್ನ್ ತುಂ ತುಜಿ ಜವಾಬ್ ಮ್ಹಾಕಾ ಕಳಿತ್ ಕರ್. ಮ್ಹಾಕಾ ಹಾಂಗಾ ಖರಸ್ ಯೆತಾ.
ತುಂ ಆಮ್ಚೊ ಸೊಡ್ವಣ್ದಾರ್; ಆಮ್ಚಿ ಸೊಡ್ವಣ್ ಕರ್ - ದುಸ್ರ್ಯಾಚ್ ಥರಾನ್!
ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6, 7, 8, 9
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
