ಅಮೇರಿಕಾಂತ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಸವಾಲಾಂಕ್ ಜಾಪಿ

ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ

Placeholder: the original page gave this picture no description, and none has been written yet. It came from daaiz\daaiz\column\sz\sz1.asp.

ದಿವೊ ಹಾಫ್ತ್ಯಾಳೆಂ

ಮಿತ್ರ್ ಹಾಫ್ತಾಳೆಂ

ಸೆವಕ್ ಮಯ್ನ್ಯಾಳೆಂ

ಅಂಕಣ್‌ಕಾರಾ ವಿಶ್ಯಾಂತ್

’ಮಿತ್ರ್’, ’ಝೆಲೊ’ ತಶೆಂಚ್ ’ಕಾಣಿಕ್’ ಪತ್ರಾಂಚೆಂ ಸಂಪಾದಕ್ಪಣ್ ಚಲಂವ್ಚೆ ಮಾರಿಫಾತ್, ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಭರ್ಪೂರ್ ಅನ್ಭೋಗ್ ಆಸ್ಚೊ ದೊ|ಆಸ್ಟಿನ್ ಡಿ’ಸೋಜ್ ಪ್ರಭು ಪ್ರಸ್ತುತ್, ಅಮೆರಿಕಾಂತ್ ಅಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರುನ್ ಆಸಾ. ಕೊಂಕ್ಣಿ ಭಾಸ್/ಸಾಹಿತ್ಯಾಚಾ ವ್ಹಾಡಾವಳೆಕ್ ಖಾಂದ್ ದಿಲ್ಲೊ ಹೊ ಏಕ್ ಸಂಘಟಕ್/ಮುಖೆಲಿ ತಶೆಂಚ್ ಕೊಂಕ್ಣಿ ಕಾರ್ಭಾರಿ ಜಾವ್ನಾಸಾ.

ಹಾಚಾ ವೆಕ್ತಿತ್ವಾ/ವಿಚಾರಾಂವಿಶಿಂ ಚಡ್ ಜಾಣಾಂ ಜಾಂವ್ಕ್ ಕೊಂಕ್ಣಿ ಕಾರ್ಭಾರಿ ಅಂಕಣಾಕ್ ಭೆಟ್ ದೀ.

[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]

ಮೋಗ್ ಮ್ಹಳ್ಯಾರ್ ಕಿತೆಂ? [- ಕು|ಶಾಲಿನಿ ಡಿ’ಸೋಜಾ, ಕುವೇಯ್ಟ್]

ಮೋಗ್ ಮ್ಹಳ್ಯಾರ್ ಚಿಮ್ಟಿಭರ್ ಲಜ್ ನಾಸ್ತಾಂ ಗೊಮ್ಟಿಭರ್ ಆಶಾ ಭಾಗಂವ್ಚಿ.

ಅಮೇರಿಕಾಂತ್ ದುರ್ಬಳ್ಕಾಯ್ ಆಸಾ ಮ್ಹಣ್ ಆಯ್ಕಾಲಾಂ. ವಯ್‌ಗಿ? [ನವೀನ್, ಮಂಗ್ಳುರ್]

ಆಮೆರಿಕಾ ಸಂಸಾರಾಂತ್ಲೊ ಗ್ರೇಸ್ತ್ ರಾಷ್ಟ್ರ್ ತರ್‌ಯೀ, ಹಾಂಗಾಸರ್‌ಯೀ ದುರ್ಬಳ್ಯಾಂಕ್ ಮದರ್ ತೆರೆಜಾಚೆಂ ಸೂಪ್-ಕೂಜ್ನ್ ಆಸಾ.

ಸಂಸಾರಾಂತ್ ’ಖರೊ ಮೋಗ್’ ಮ್ಹಳ್ಳೊ ಆಸಾಗೀ? [ವೀಣಾ ಲಸ್ರಾದೊ, ಫೆರಾರ್]

ವ್ಹಯ್, ಆಸಾ - ಸರ್ವ್ ಲಾಯ್ಟ್ ಪಾಲ್ವಾಲ್ಲ್ಯಾ ಉಪ್ರಾಂತ್ - ಅಂಧ್ಕಾರಾಂತ್

ಭಾರತ್ ಸರ್ಕಾರಾನ್ ದೊಡ್ತೆಂ ಪೌರುಷತ್ವ್ ದೀಂವ್ಕ್ ಸುರ್ವಾತ್ ಕೆಲ್ಯಾ. ಹಾಂತುಂ ಕೊಣಾಕ್ ಫಾಯ್ದೊ? [ಪೀಟರ್ ಫ್ರೆಂಕ್, ಕುವೇಯ್ಟ್]

ದೊಗಾಂಯ್ಕಿ - ಭಾರತ್ ಸರ್ಕಾರಾಕ್ ಆನಿಂ ದೊಡ್ತೆಂ ಪೌರುಷತ್ವ್ ಘೆತ್‌ಲ್ಲ್ಯಾಂಕ್ ಜಾಂವ್ಕ್ ಪುರೊ.

ಕೊಂಕ್ಣೆಕ್ ಆಟ್ವ್ಯಾ ವೊಳೆರಿಂತ್ ಸ್ಥಾನ್ ಮೆಳ್ತಾಸ್ತಾನಾ ನಾತ್‌ಲ್ಲೊ ’ಲಿಪಿ ವಿವಾದ್’ ಆತಾಂ ಕಸೊ ಉದೆಲೊ? [ಡೇವಿಡ್ ರೊಡ್ರಿಗಸ್, ಪೆರ್ಮುದೆ] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ಭೋವ್ಶಾ ಕೊಂಕ್ಣಿ ಶಿಂತ್ರಾಳ್ಯಾಂಚೊ ಹೊರ್ಭೊಸ್ ಪರಿಪಿಕಾಯೆಕ್ ಪಾವ್ಲೊ!

ಗಲ್ಫಾಂತ್ ಆಯಾಚೆಂ ಕಾಮ್ ಕರ್ನ್ ಆಸ್ಚಿ ಆಮ್ಚ್ಯಾ ಗಾಂವ್ಚಿ ಎಕ್ಲಿ ಬಾಯ್ಲ್, ಗಾಂವಾಕ್ ಆಯಿಲ್ಲಿಚ್ ಇಂಗ್ಲಿಷ್ ಸೊಡ್ಟಾ, ಪುಣ್ ಅಮೇರಿಕಾಂತ್ ಆಸ್ಚಿಂ ಸಭಾರಾಂ ಆಜೂನ್ ಕೊಂಕ್ಣಿ ಉಲಯ್ತಾತ್; ಅಶೆಂ ಕಿತ್ಯಾಕ್? [ವಿನ್ಸಿ ಡಿ’ಸೋಜಾ, ಬೆಂಗ್ಳುರ್]

ಶೆಳ್ಯಾ ಗುವಾಚೆರ್ ಉದಾಕ್ ಪಡ್ಲ್ಯಾರ್ ಜಾಂವ್ಚಿ ಅವಸ್ಥ್ಯಾ ಅಶಿಚ್ಚ್!

ಆಕಯ್ಚ್ಯಾ ಘೊವಾಕ್‌ಯ್ ’ಮಾಮ್’ ಮ್ಹಣ್ತಾಂವ್, ಆವಯ್ಚ್ಯಾ ಭಾವಾಕ್‌ಯ್ ’ಮಾಮ್’ ಮ್ಹಣ್ತಾಂವ್ ಕಿತ್ಯಾಕ್? [ಸನ್ನೇಸಿ ಬೊಳಿಯೆ, ತಾರ್ದೇವ್]

ಆಮ್ಚೆ ಮ್ಹಾಲ್ಘಡೆ ಸುರ್ ಪಿಯೆವ್ನ್ ’ಮಾಮ್’ ಜಾಲ್ಲ್ಯಾ ವೆಳಾರ್ ಸಕ್ಡಾಂಕ್‌ಯ್ ’ಮಾಮ್’ಂಚ್ ಮ್ಹಣ್ತಾಲೆ ಖೈಂ - ತೆಂಚ್ ಮುಖಾರುನ್ ಗೆಲಾಂ.

ಸುಕ್ಣಿಂ ಸುಸು ಕರ್ತಾತ್‌ಗಿ? [ಡೇವಿಡ್ ಫೆರ್ನಾಂಡಿಸ್, ಮುಖಾಮಾರ್]

ಸುಕ್ಣಿಂ ಸುಸು ಕರಿನಾಂತ್; ತಾಂಕಾಂ ’ಪಿಸ್ತುಲ್ ’ ನಾ.

ಜಾಳಾ ಸುವಾತ್ (ವೆಬ್ ಸಾಯ್ಟ್) ಆಸ್ಚಿ ಲೋಕಾ ಖಾತಿರ್‌ಗಿ ವ ’ವ್ಯಕ್ತಿಂ’ ಖಾತಿರ್? [ರೊಜಿಟಾ ನಜ್ರೆತ್, ಮಿರಾ ರೋಡ್]

ಥೊಡ್ಯೊ ಲೋಕಾಖಾತಿರ್ ತರ್, ಹೆರ್ ಲೋಕಾಂಕ್ ’ಘಡಾಯ್’ ದಾಖವ್ನ್ ಆಪ್ಲಿಚ್ ’ಬಡಾಯ್’ ಬಡಂವ್ಕ್.

ಕೊಂಕ್ಣಿ ಸಮಾಜೆಂತ್ ಆಪುರ್ಭಾಯೇನ್ ’ರಾಜಕೀಯ್’ ಕರ್ಚೆ ಥೊಡೆ, ಭಾರತೀಯ್ ರಾಜಕೀಯಾಂತ್ ರಿಗ್ತಿತ್ ತರ್ ಕಿತೆಂ ಜಾಯ್ತ್? [ಸಹನಾ, ಕುವೇಯ್ಟ್]

ತಾಂಕಾಂಯೀ ಸವ್ಕಾಸ್ ಶಿಂಗಾಂ ಫುಟೊನ್ ಶಿಮ್ಟಿ ಯೆತಾನಾ ತೆವೀ ಏಕಾ ರುಕಾ ಥಾವ್ನ್ ಆನ್ಯೇಕಾ ರುಕಾಕ್ ಪಳ್ಟಿ ಮಾರುನ್ ಆಪ್ಲೆಂಚ್ ಧೊಲ್ಕೆಂ ಭರುಂಕ್ ಪ್ರಯತ್ನ್ ಕರ್ತಿತ್.

’ಕೊಂಕ್ಣಿ ಸೆವಾ’ ಆನಿಂ ’ಕೊಂಕ್ಣಿ ವಾವ್ರ್’ ಮಧೆಂ ತಫಾವತ್ ಆಸಾಗಿ? [ಆವಿತ್ ಸಿಕ್ವೇರಾ, ಕೆಂಗೇರಿ] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

’ಕೊಂಕ್ಣಿ ಸೆವಾ’ ಮ್ಹಳ್ಯಾರ್ ಕೊಂಕ್ಣಿ ಖಾತಿರ್ ಇಲ್ಲೊ ವಾವ್ರ್ ಕರುನ್ ಹಾತಿಂ ಗರ್ಣಾಳ್ ಮಾರುನ್ ಮಾಧ್ಯಮಾಂನಿ ಆಪ್ಲಿ ಬಡಾಯ್ ಮಾರ್ಚಿ ಆನಿಂ ’ಕೊಂಕ್ಣಿ ವಾವ್ರ್’ ಮ್ಹಳ್ಯಾರ್ ಹಾತಿಂ ಮುರ್ಣಾಳ್ ಧರುನ್ ಕೊಂಕ್ಣೆಚಿ ಗುಪಿತ್ತ್ ಸೇವಾ ಕರ್ಚಿ.

ಮ್ಹಜಿ ಬಾಯ್ಲ್ ಕುಂಭಕರ್ಣಪರಿಂ ಘೊರೆತಾಮೂ, ಹಾಂವ್ ಕಿತೆಂ ಕರುಂ? [ಲಾಯ್ನಲ್ ಸಲ್ಡಾನ್ಹಾ, ಶಿರ್ತಾಡಿ]

ಕಾನಾಂಕ್ ದೋನ್ ಗುಡ್ದ್ಯೊ ಘಾಲ್ನ್ ಕಾಂಬ್ಳಿ ಪಂದಾ ವೊಗೊಚ್ ನಿದೆ. ನಾಂ ತರ್, ದುಸ್ರಿ ಬಾಯ್ಲ್ ಪಳೆ - ದೀಸಾ ಉಜ್ವಾಡಾಕ್ ಘೊರೆಂವ್ಚಿ.

ದೆವಾನ್ ಕಿತ್ಯಾ ದೆಂವ್ಚಾರಾಂಕ್ ರಚ್ಲೆಂ? [ಸಿಲ್ವಿಯಾ ಪಿಂಟೊ, ಕಂಕ್ನಾಡಿ]

ದೆವಾನ್ ದೆಂವ್ಚಾರಾಂಕ್ ರಚುಂಕ್ ನಾ, ತೆ ತಾಂಚ್ಯೆ ಇತ್ಲ್ಯಾಕ್‌ಚ್ ಉದೆಲೆ - ಮ್ಹೆಳ್ಯಾಂತ್ ಆಳ್ಮಿಂ ಕಿರ್ಲಾಲ್ಲ್ಯಾಪರಿಂ.

ಅಮೇರಿಕಾಚೆಂ ಪಿಶೆಂಪಣ್ ಕೆದಾಳಾ ಬಂಧ್ ಜಾಯ್ತ್? [ಪ್ರವೀಣ್ ತೆಲ್ಲಿಸ್, ಕುಂದಾಪುರ್]

ಜೋರ್ಜ್ ಬುಶ್ ತಸಲೆ ಹಂಕಾರಿ ಅಧ್ಯಕ್ಷ್ ವಿಂಚೊನ್ ಯೆಂವ್ಚೆ ಬಂಧ್ ಜಾಲ್ಯಾ ಉಪ್ರಾಂತ್.

ಆತಾಂ ಜೆಜು ದೆಂವೊನ್ ಸಂಸಾರಾಕ್ ಆಯ್ಲೊ ತರ್ ತೊ ಪಯ್ಲೊ ಖಂಯ್ ದೆಂವಾತ್? [ನಾಂವ್ ನಾಕಾ, ಕುವೇಯ್ಟ್] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ಹಾಂವ್ ಚಿಂತಿನಾ ತೊ ಪರತ್ ಸಂಸಾರಾಕ್ ದೆಂವೊನ್ ಯೇತ್ ಮ್ಹಣ್; ಕಿತ್ಯಾ ಆಜ್ ತಾಚ್ಯಾ ಗರ್ಧನಾಚ್ಯಾ ಗೊಟ್ಯಾಂತ್ ಆಮ್ಚ್ಯಾ ದೆವೊತ್ ಮನ್ಶಾಂನಿ ಮ್ಹೆಳೆಂ ದಾಸ್ತಾನ್ ಕೆಲಾಂ.

ಬಿಸ್ಪ್ ಕಿತ್ಯಾ ಆಪ್ಲ್ಯಾ ಮಾತ್ಯಾರ್ ತೊಪಿ ದವರ್ತಾತ್? [ಸೆಲಿನ್ ಕ್ರಾಸ್ತಾ, ಬೈಂದೂರ್]

ತಶೆಂ ಕೆಲ್ಲ್ಯಾನ್ ತಾಂಕಾಂ ಹೆರಾಂಕ್ ತೊಪಿ ದೀಂವ್ಕ್ ಭಾರಿಚ್ ಸಲೀಸ್ ಜಾತಾ ದೆಕುನ್.

ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ

’ಮಿತ್ ಹಾಪ್ತ್ಯಾಳೆಂ’

ಡೇವಿಡ್ ರೊಡ್ರಿಗಸ್, ಪೆರ್ಮುದೆ

’ದಿವೊ ಹಾಪ್ತ್ಯಾಳೆಂ’

ಅವಿತ್ ಸಿಕ್ವೇರಾ, ಕೆಂಗೇರಿ

’ಸೆವಕ್ ಮಯ್ನ್ಯಾಳೆಂ’

ನಾಂವ್ ನಾಕಾ, ಕುವೇಯ್ಟ್

(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.

ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: austinporob@gmail.com ವಾ editor@daaiz.com