ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲವ್ಪಿಣ್: ವಾಯ್ಲೆಟ್ ಜೆ. ಪಿರೇರಾ
ಕನ್ಸೆಪ್ಟಾ ಆಳ್ವಾ
ಕೊನ್ಸೆಪ್ಟಾವಿಶಿಂ ದೋನ್ ಉತ್ರಾಂ:
ಕೊಂಕ್ಣೆಂತ್ ಪರ್ಧ್ಯಾ ಪಾಟ್ಲ್ಯಾನ್ ರಾವೊನ್ ವಾವ್ರ್ ಕರ್ಚ್ಯಾ ಸಭಾರ್ ಕಲಾಕಾರಾಂ ಪಯ್ಕಿ ಹಿ ಎಕ್ಲಿ. ಆಕಾಶ್ವಾಣಿ ಮಂಗ್ಳುರಾಂತ್ ಕಾಮ್ ಕರ್ನ್ ಆಸೊನ್ಯೀ, ಕೊಂಕ್ಣಿ ಭಾಸೆಚಾ ಪ್ರಚಾರಾಕ್ ಹಿಣೆ ಕರ್ಚೊ ಖಳ್ಮಿತ್ ನಾತ್ಲ್ಲೊ ವಾವ್ರ್ ಅಪಾರ್. ಕೊಂಕ್ಣಿ ವಾವ್ರಾಂಕ್ ಚಡ್ ತೃಪ್ತಿ ಆನಿ ಸಮಧಾನ್ ಜೊಡ್ಚ್ಯಾ ಹಿಕಾ ಆಧ್ಲ್ಯಾ ವರ್ಸಾ ಹಿಕಾ ದಿವೊ ಪುರಸ್ಕಾರ್ ಲಾಭ್ಲೊ. ಹಿಚೆಸವೆಂ ಬಾಯ್ ವಾಯ್ಲೆಟ್ ಪಿರೇರಾನ್ ಚಲಯಿಲ್ಲೆಂ ಸಂವಾದ್.
ಸಂವಾದ್:
ಸ: ಕಶಿ ಕೊಂಕ್ಣಿ ಸಂಸ್ಕ್ರತಿ/ ಕೊಂಕ್ಣಿ ಸಾಹಿತ್ಯಾಚಿ ವೋಡ್ ತುಮ್ಕಾಂ ಕಶಿ ಆಯ್ಲಿ? ಕಸಲೆಂ ಪ್ರೇರಣ್ ಲಾಭ್ಲೆಂ?
ಜಾ: ಮುದರಂಗಡಿ(ಕೆಂಞ) ಸಾಂತ್ ಫ್ರಾನ್ಸಿಸ್ ಸಾವೆರ್ ಫಿರ್ಗಜೆಚಾ ರೈಮಂಡ್(ಆತಾಂ ದೆವಾಧೀನ್) ಆನಿ ಕ್ರಿಸ್ತಿನ್ ಫೆರ್ನಾಂಡಿಸ್ ಮ್ಹಜಿ ಆವಯ್ ಬಾಪಯ್. ತೆರಾ ಭುರ್ಗ್ಯಾಂಚೆಂ ವ್ಹಡ್ ಕುಟಮ್. ಕೃಷಿ ಸಾಗ್ವಳೆಚೆಂ ಘರಾಣೆಂ ಆಮ್ಚೆಂ. ಆಬ್ ಆಂತೊನ್ ಫೆರ್ನಾಂದ್ ತ್ಯಾ ಕಾಳಾಚೊ ಶಿಕ್ಪಿ, ಮೆಸ್ತ್ರಿ. ತಾಕಾ ವಾಚ್ಚಿ ಸವಯ್ ಆಸ್ಲ್ಲಿ. ರಾಕ್ಣೊ, ಪಯ್ಣಾರಿ ಆನಿ ಥೊಡಿಂ ಕನ್ನಡ ಪತ್ರಾಂ ಆಮ್ಚ್ಯಾ ಘರಾ ಯೆತಾಲಿಂ. ಮ್ಹಜ್ಯಾ ಮಾಂಯ್ಕ್ ವಾಚ್ಚಿ ಸವಯ್ ಆಸಾ. ಆತಾಂಯ್ ಜಾಯಿತ್ತೆಂ ವಾಚ್ತಾ. ಆಮ್ಕಾಂ ಸಕ್ಕಡ್ ಭುರ್ಗ್ಯಾಂಕ್ ವಾಚ್ಚಿ ಸವಯ್ ಲ್ಹಾನ್ ಥಾವ್ನ್ಂಚ್ ಜಾಲ್ಲಿ. ಮ್ಹಾಕಾ "ವಾಚ್ಚೆಂ ಪಿಶೆಂ" ಇಲ್ಲೆಂ ಚಡ್ಚ್ಚ್ ಆಸ್ಲ್ಲೆಂ. ಹೈಸ್ಕೂಲ್, ಕೊಲೆಜಿಂತ್ ಶಿಕ್ತಾನಾ ವಾಚ್ಲ್ಲ್ಯಾ ಕೊಂಕ್ಣಿ, ಕನ್ನಡ, ಇಂಗ್ಲಿಷ್ ಪುಸ್ತಕಾಂಚೆಂ ಮ್ಹಾಕಾ ಲೇಕ್ ನಾ.
ಸ: ಎದೊಳ್ ಪರ್ಯಾಂತ್ ಕೊಂಕ್ಣೆಂತ್ ಖಂಚಾಯ್ ಸ್ರೀಯಾಂನಿ ಜೊಡಿನಾತ್ಲ್ಲೆಂ ತುಮಿಂ ಕೊಂಕ್ಣೆಂತ್ ಜೊಡ್ಲಾಂ? ಹ್ಯಾ ವಿಶಿಂ ತುಮ್ಕಾಂ ಕಿತೆಂ ಭಗ್ತಾ?
ಜಾ: ಪಿ.ಯು.ಸಿ (ಅದಮಾರು ಪೂರ್ಣಪ್ರಜ್ನ ಪಿ.ಯು. ಕೊಲೆಜ್) ಶಿಕ್ತಾನಾಂಚ್ ಮಂಗ್ಳುರ್ ಆಕಾಶವಾಣಿಚ್ಯಾ ಯುವವಾಣಿ ವಿಭಾಗಾಂತ್ ಭಾಷಣ್, ಸಂವಾದ್, ತರ್ಕ್, ಆನಿ ಕವಿತಾ ವಾಚನ್ ಕಾರ್ಯಾವಳಿಂನಿ ಭಾಗ್ ಘೆಂವ್ಚೊ ಆವ್ಕಾಸ್ ಲಾಬ್ಲ್ಲೊ. ಹೈಸ್ಕೂಲ್, ಕೊಲೆಜಿಂತ್ ತಾಲೂಕ್, ಜಿಲ್ಲಾ ಆನಿ ಯುನಿವರ್ಸಿಟಿ ಮಟ್ಟಾರ್ ಪ್ರಬಂಧ್ ಆನಿ ಭಾಷಣ್ ಸ್ಪರ್ಧ್ಯಾಂನಿ ಇನಾಮಾಂ ಮೆಳ್ಲ್ಲಿಂ.
ಮಂಗ್ಳುರ್ ಯುನಿವರ್ಸಿಟಿಂತ್ ಅರ್ಥ್ಶಾಸ್ತ್ರಾಂತ್ ಎಮ್. ಎ. ಶಿಕಪ್ ಸಂಪಂವ್ಚಾ ವೆಳಾರ್ಚ್ಚ್(ಮಾಯ್
1998) "ಸ್ಟಾಫ್ ಸೆಲೆಕ್ಷನ್ ಕಮಿಷನ್" ಹಾಣಿಂ ಆಕಾಶ್ವಾಣಿಚ್ಯಾ "ಟ್ರಾನ್ಸ್ಮಿಷನ್ ಎಕ್ಸಿಕ್ಯೂಟಿವ್" ಹುದ್ದ್ಯಾಕ್ ಸ್ಪರ್ಧಾತ್ಮಕ್ ಪರೀಕ್ಷಾ ಜಾಹೀರ್ ಕೆಲಿ. ಅಗೊಸ್ತಾಂತ್ ಬೆಂಗ್ಳುರಾಂತ್ ಪರೀಕ್ಷಾ ಚಲ್ಲಿ. ಹಜಾರಾಂಗಟ್ಲ್ಯಾನ್ ಆಭ್ಯರ್ಥಿ ಆಸ್ಲ್ಲೆ. ತಾಂತ್ಲ್ಯಾ
800
ಜಣಾಂಕ್ ದಸೆಂಬ್ರಾಂತ್ ಇಂಟರ್ವ್ಯೂವ್ ಚಲ್ಲೊ. 16
ಹುದ್ದೆ ಕರ್ನಾಟಕಾಂತ್ ಆಸ್ಲ್ಲೆ. ತಾಂತ್ಲೆ 7
ಜನರಲ್ ಮೆರಿಟ್. ಹೆರ್ ರಿಸರ್ವೇಶನ್. ಜನರಲ್ ಮೆರಿಟಾಂತ್ ವಿಂಚೊನ್ ಆಯಿಲ್ಲ್ಯಾ ಪಯ್ಕಿ ಹಾಂವ್ಯೀ ಎಕ್ಲಿ. ಕೊಂಕ್ಣಿ, ತುಳು, ಕನ್ನಡ, ಇಂಗ್ಲಿಷ್ ಸುಡಾಳ್ ಉಲಂವ್ಕ್, ವಾಚುಂಕ್, ಬರಂವ್ಕ್ ಯೆತಾ ದೆಕುನ್ ಮಂಗ್ಳುರ್ ಆಕಾಶಾವಾಣಿಂತ್ ಮ್ಹಜೆಂ ನೇಮಕ್ಪಣ್ ಜಾಲೆಂ.
23/11/1989 ವೆರ್ ಹಾಂವ್ ಆಕಾಶ್ವಾಣಿಚಾ ಕಾಮಾಕ್ ಲಾಗ್ಲಿಂ. ಪಾಟ್ಲ್ಯಾ
12
ವರ್ಸಾಂ ಥಾವ್ನ್ ಸರ್ಕಾರಿ ಸಂಸ್ಥ್ಯಾಕ್ ನವಿಂ ನೇಮಕ್ಪಣಾಂ ಜಾಂವ್ಕ್ ನಾಂತ್, ವಾವ್ರಾಡ್ಯಾಂಕ್ ಪ್ರಮೋಷನಾಂ ಪಾಟಿಂ ಪಡ್ಲಿಂ. ತಶೆಂ ಜಾಲ್ಲ್ಯಾನ್
2005, ಫೆಬ್ರವರಿಂತ್ ಮ್ಹಜೆಂ ಪ್ರಮೋಷನ್ ಜಾಲೆಂ. ಆತಾಂ ಪ್ರೋಗ್ರಾಮ್ ಎಕ್ಸಿಕ್ಯೂಟಿವ್ - ಗಜೆಟೆಡ್ ಹುದ್ದೊ. ಹಿ ಭಡ್ತಿ
ಪಾಂಚ್ ವರ್ಸಾಂ ಆದಿಂಚ್ ಮೆಳಾಜಾಯ್ ಆಸ್ಲ್ಲಿ. ಮ್ಹಜೆಂ ಪ್ರಮೋಷನ್ ಜಾತಾನಾ ಮಂಗ್ಳುರ್ ಆಕಾಶಾವಾಣಿಂತ್ ದೋನ್ ಹುದ್ದೆ ಖಾಲಿ ಆಸ್ಲ್ಲ್ಯಾನ್ ಅನಿಕೀ ಥೊಡಿಂ ವರ್ಸಾಂ ಮಂಗ್ಳುರಾಂತ್ಚ್ಚ್ ಕಾಮ್ ಕರುಂಕ್ ಆವ್ಕಾಸ್ ಲಾಭ್ಲಾ. ಆಮ್ಚ್ಯಾ ಸಮಾಜೆಚ್ಯಾ ಸಭಾರ್ ಸ್ತ್ರೀಯಾಂನಿ ಉಂಚ್ಲೆ ಹುದ್ದೆ ಆಪ್ಣಾಯ್ಲ್ಯಾತ್, ಆನಿ ಯಶಸ್ವೆನ್ ಸಾಂಬಾಳ್ಳ್ಯಾತ್. ಹಾಂವೆಂ ಸಾಧನ್ ಕರುಂಕ್ ಆನಿಕ್ಯೀ ಜಾಯಿತ್ತೆಂ ಆಸಾ.
ಸ: ತುಮ್ಚಾ ತರ್ನಾಟ್ಪಾಣಾರ್ ತುಮಿ ಜಾಯ್ತಾ ಕೊಂಕ್ಣಿ ಸಾಂಸ್ಕ್ರತಿಕ್ ತಶೆಂಚ್ಚ್ ಕೊಂಕ್ಣಿ ಸಾಹಿತ್ಯ್ ಚಟುವಟಿಕೆಂನಿ ಪಾತ್ರ್ ಘೆತ್ಲ್ಯಾತ್. ತುಮ್ಕಾಂ ತುಮ್ಚ್ಯಾ ಕುಟ್ಮಾ ಥಾವ್ನ್ ಕಿತ್ಲೊ ಪಾಟಿಂಬೊ ಮೆಳ್ಳಾ?
ಜಾ: ಮ್ಹಾಕಾ ತೇಗ್ ಭಾವ್, ನೋವ್ ಭಯ್ಣಿಂ. ಆಮ್ಚ್ಯಾ ಆವಯ್ ಬಾಪಾಯ್ನ್ ಹರ್ಯೆಕಾ ಭುರ್ಗ್ಯಾಕ್ ಬರೆಂ ಶಿಕಪ್ ದಿಲಾಂ. ಚೆಡ್ವಾಂ ಭುರ್ಗಾಂಕ್ ಶಿಕಪ್ ದಿಂವ್ಚೆ ಖಾತಿರ್ ತಾಣಿ ಕಾಡ್ಲ್ಲೆ ತಸಲಿ ಮ್ಹಿನತ್ ಭೋವ್ಶಾ ಆಮ್ಚ್ಯಾ ಗಾಂವಾಂತ್ ಕೊಣೆಂಯ್ ಕಾಡುಂಕ್ ನಾ. ಆಮ್ಕಾಂ ಇಸ್ಕೊಲ್, ಕೊಲೆಜಿ ಥಾವ್ನ್ ಪ್ರಬಂಧ್, ಭಾಷಣ್, ನಾಟಕ್ ಸ್ಪರ್ಧ್ಯಾಂ ಖಾತಿರ್ ಪಯ್ಸ್ ಪಯ್ಸ್ ವಚೊಂಕ್ ಪಡ್ತಾಲೆಂ. ಪಾಟಿಂ ಯೆತಾನಾ ಕಾಳೊಕ್ ಜಾಲ್ಯಾರ್ ಆಮ್ಚೊ ಬಾಬ್ ಬಸ್ಸ್ಟೆಂಡಾಲಾಗಿಂ ರಾಕೊನ್ ರಾವ್ತಾಲೊ. ವ್ಹಡ್ ಭಾವ್ ಭಯ್ಣಿಂನಿ ಆಮ್ಕಾಂ ಜಾಯ್ತೆಂ ಉತ್ತೇಜನ್, ಮಾರ್ಗದರ್ಶನ್ ದಿಲಾಂ. ಹಾಂವೆಂ ಕಾಂಯ್ ತರಿ ಸಾಧನ್ ಕೆಲಾಂ ಜಾಲ್ಯಾರ್ ತಾಂತುಂ ಮ್ಹಜಾ ಕುಟ್ಮಾ ಥಾವ್ನ್ ಲಾಬ್ಲ್ಲ್ಯಾ ಉತ್ತೇಜನಾಚೊ, ಸಹಕಾರಾಚೊ ಮೊಟೊ ವಾಂಟೊ ಆಸಾ.
ಸ: ತುಮ್ಚೆಂ ಭುರ್ಗ್ಯಾಪಣಾಲೆ ಸ್ವಪಣ್ ಕಸಲೆಂ? ತೆಂ ಪೊಂತಾಕ್ ಪಾವ್ಲಾಂಗೀ? ಪೊಂತಾಕ್ ಪಾವೊಂಕ್ ಕಿತ್ಲೊ ತೇಂಪ್ ಲಾಗ್ಲೊ?
ಜಾ: ಸಾಹಿತ್ಯಾಂತ್ ಮ್ಹಾಕಾ ಚಡ್ ಆಸಕ್ತ್ ಆಸ್ಲ್ಲಿ. ಶಿಕ್ಷಕಿ ಜಾಂವ್ಕ್ ಮ್ಹಾಕಾ ಲ್ಹಾನ್ ಥಾವ್ನ್ಂಚ್ ಆಶಾ ಆಸ್ಲ್ಲಿ. ಸಾಹಿತ್ಯಾಂತ್ಲಿ ಮ್ಹಜಿ ಆಸಕ್ತ್ ಪಳೆವ್ನ್ ಮ್ಹಜಿ ಭಯ್ಣ್ ಸಿಸ್ಟರ್ ಐವಿನ್ (ಅರ್ಸುಲಾಯ್ನ್
ಫ್ರಾನ್ಸಿಸ್ಕನ್) ಮ್ಹಾಕಾ ಮಂಗ್ಳುರ್ ರೋಶನಿ ನಿಲಯಾಂತ್ ಬಿ.ಎ.ಕ್ ಎಡ್ಮಿಷನ್ ಕರಯ್ಲೆಂ. ಹಾಂವೆಂ ಕನ್ನಡ ಸಾಹಿತ್ಯ್ ಒಪ್ಶನಲ್ ಸಬ್ಜೆಕ್ಟ್ ಆನಿ ಹಿಂದಿ ಭಾಸ್ ಅಭ್ಯಾಸ್ ಕೆಲಿ. ತ್ಯಾ
ಉಪ್ರಾಂತ್ ಎಕೊನೊಮಿಕ್ಸ್ಂತ್ ಎಮ್. ಎ. ಸಂಪಯ್ಲೆಂ. ರೋಶನಿ ನಿಲಯಾಂತ್ ಪಾರ್ಟ್ ಟೈಮ್ ಲೆಕ್ಚರರ್ ಜಾವ್ನ್ ಏಕ್ ವರ್ಸ್ ಕಾಮ್ ಕೆಲೆಂ. ತವಳ್ಚ್ಚ್ ಆಕಾಶವಾಣಿಚ್ಯಾ ಕಾಮಾಕ್ ಆಪವ್ಣೆಂ ಆಯ್ಲೆಂ. ಸಗ್ಳೊ ವೇಳ್ ಲೆಕ್ಚರರ್ ಜಾವ್ನ್ ಮ್ಹಾಕಾ ಕಾಮ್ ಮೆಳ್ಲ್ಲೆ ತರ್ ಹಾಂವ್ ಆತಾಂ ಶಿಕ್ಷಕಿ ಜಾವ್ನ್ಂಚ್ ಉರ್ತಿಂ ಕೊಣ್ಣಾ. ಪುಣ್ ಆಕಾಶವಾಣಿಂತ್ ಲೊಕಾಕ್ ಶಿಕ್ಷಿತ್ ಕರ್ಚೊಚ್ಚ್ ವಾವ್ರ್ ಆಮಿಂ ಕರ್ತಾಂವ್ ದೆಕುನ್ ಹ್ಯಾ ಶೆತಾಕ್ ಪಾವ್ಲ್ಲೊ ಸಂತೊಸ್ ಆಸಾ.
ರೋಶನಿ ನಿಲಯಾಂತ್ ವ್ಹಾವುರ್ತಾನಾ, ಕುಶಿಚ್ಯಾ ಫಾತಿಮಾ ರೆತಿರ್ ಮಂದಿರಾಂತ್, ಸಾಂತ್ ಲುವಿಸ್ ಕೊಲೆಜಿಚ್ಯಾ ಕೊಂಕ್ಣಿ ಸಂಸ್ಥ್ಯಾಚೊ "ಕೊಂಕ್ಣಿ ವಕ್ಸರ್ ಯೆವ್ಜಣ್" (ಕೊಂಕಣಿ ಲೆಕ್ಸಿಕನ್ ಪ್ರೊಜೆಕ್ಟ್) ಚಾಲು ಆಸ್ಲ್ಲೊ. ರೋಶ್ನಿಂತ್ ಮ್ಹಜಿ ಇಂಗ್ಲಿಷ್ ಶಿಕ್ಷಕಿ, ಉಪ್ರಾಂತ್ ಸಾಂಗಾತಿ ಶಿಕ್ಷಕಿ ಪ್ರೊ. ಫ್ರೆನ್ನಿ ಕುಲಾಸೊನ್ ಹ್ಯಾ ವಿಶ್ಯಾಂತ್ ಮಾಹೆತ್ ದೀವ್ನ್ ನಿರ್ದೇಶಕ್ ಫಾ. ವಿಲ್ಲಿ ದಿಸಿಲ್ವಚಿ ವಳಕ್ ಕರ್ನ್ ದಿಲಿ. ಆತಾಂಚೊ ನಾಂವಾಡ್ದಿಕ್ ಕವಿ ಮೆಲ್ವಿನ್ ರೊಡ್ರಿಗಸಾಚ್ಯಾ ಮುಖೆಲ್ಪಣಾಖಾಲ್ ಥೊಡೊ ತೇಂಪ್ ವಾವ್ರ್ ಕೆಲೊ. ಕ್ರಮೇಣ್ ತಿ ಯೆವ್ಜಣ್ ಬಂದ್ ಪಡ್ಲ್ಲೆಂ ಕೊಂಕ್ಣೆಚೆಂ ದುರಾದೃಷ್ಟ್.
ಸ: ತುಮಿಂ ಆಕಾಶ್ವಾಣಿ ಮಂಗ್ಳುರ್ ಮುಖಾಂತ್ರ್ ಸಭಾರ್ ಯುವಕ್/ಯುವತಿಂಕ್ ಮೊಟೊ ಪ್ರೋತ್ಸಾಹ್ ದಿಲಾ. ಹ್ಯಾ ವಿಶಿ ತುಂಮ್ಚೆ ವಿಚಾರ್ ಕಸಲೆ?
ಜಾ: ಕೊಂಕ್ಣಿ ವಾಕ್ಸರಿಂತ್ ಕಾಮ್ ಕರ್ತಾನಾ "ಮಾಂಡ್ ಸೊಬಾಣ್", "ಜಾಗೆ ಕವಿ", ಆನಿ ಹೆರ್ ಸಬಾರ್ ಸಾಹಿತಿಂಚೆಂ ದರ್ಶನ್, ವಳಕ್ ಜಾಲಿ. ಕೊಂಕ್ಣೆಂತ್ಲ್ಯಾ ಚಡವತ್ ಬರವ್ಪ್ಯಾಂಚಿ ಬರ್ಪಾಂ ವಾಚುನ್ ಜಾಣಾ ಆಸ್ಲ್ಲ್ಯಾನ್ ಸಾಹಿತಿಂಕ್ ಪಳೆಂವ್ಚಿ ಆಶಾ ಆಸ್ಲ್ಲಿ ತಿ ಥಂಯ್ ಸುಫಳ್ ಜಾಲಿ. ಆಕಾಶವಾಣಿಂತ್ ಪ್ರಸಾರ್ ನಿರ್ವಹಣಾ ಸಾಂಗಾತಾ ಕೊಂಕ್ಣಿ ಕಾರ್ಯಾವಳ್ ಸಾದರ್ ಕರ್ಚಿ ಜವಾಬ್ದಾರಿ ಮ್ಹಜಾ ವಾಂಟ್ಯಾಕ್ ಆಯಿಲ್ಲ್ಯಾನ್ ನಾಂವಾಡ್ದಿಕ್ ತಶೆಂ ಉದೆತ್ಯಾ ಬರವ್ಪ್ಯಾಂಕ್ ತಶೆಂಚ್ ಜಾಯ್ತ್ಯಾ ಯುವಜಣಾಂಕ್ ಆಕಾಶ್ವಾಣಿಂತ್ ಆವ್ಕಾಸ್ ದೀಂವ್ಕ್ ಸಾಧ್ಯ್ ಜಾಲಾಂ. ಸಾಹಿತ್ಯಾಕ್ ಸಂಬಂಧ್ ಜಾಲ್ಲ್ಯಾ ಕಾರ್ಯಾವಳಿಂಚೊ ಸಂಕೊ ಚಡ್ಲಾ ಮ್ಹಣ್ ಆಯ್ಕೊವ್ಪಿ ಸಾಂಗ್ತಾತ್.
ಸ: ತುಮ್ಚ್ಯಾ ತರ್ನಾಟ್ಪಾಣಾರ್ ಹೆಚ್. ಆರ್. ಆಳ್ವ ಏಕ್ ಪ್ರಮುಖ್ ಯುವ ಪ್ರೇರಣ್ ಜಾವ್ನಾಸ್ಲ್ಲೊ. ತಾಚ್ಯಾ ಮುಖೆಲ್ಪಣಾಚೊ ಪ್ರಭಾವ್ ತುಮ್ಚೆರ್ ಆನಿ ತುಮ್ಚ್ಯಾ ಮುಖೆಲ್ಪಣಾರ್ ಕಿತ್ಲೊ ಪಡ್ಲಾ?
ಜಾ: ಮ್ಹಜೊ ಪತಿ ಎಚ್. ಆರ್ ಆಳ್ವ ಪಾಂಗ್ಳಾ ಫಿರ್ಗಜ್, ಶಿರ್ವಾಂ ವಾರಾಡೊ ಆನಿ ಮಂಗ್ಳುರ್ ದಿಯೆಸೆಜ್ ಮಟ್ಟಾರ್ ಭೋವ್ ಲ್ಹಾನ್ ಪ್ರಾಯೆರ್ಚ್ಚ್ ತಾಣೆ ಉಂಚ್ಲೆ ಹುದ್ದೆ ಸಾಂಬಾಳ್ಳ್ಯಾತ್. ಕಥೊಲಿಕ್ ಯುವಸಂಚಾಲನಾಚ್ಯಾ ಕೇಂದ್ರಿಕ್ ಸಮಿತಿಕ್ ಅಧ್ಯಕ್ಷ್ ಜಾವ್ನ್ ವಿಂಚುನ್ ಆಯಿಲ್ಲೊ. ಮಂಗ್ಳುರ್ ಶೆಹೆರಾ ಭಾಯ್ಲೊ ಪಯ್ಲೊ ವೆಕ್ತಿ ತೊ ಅನಿಯಮಿತ್ ಥರಾನ್ ಫಾಯ್ಸ್ ಜಾವ್ನ್ ಆಸ್ಲ್ಲೆಂ "ಆಮ್ಚೊ ಯುವಕ್" ಪತ್ರ್ ನೋಂದಾವಣ್ ಕರ್ನ್ ಸಂಪಾದಕ್ ಜಾವ್ನ್ ಚ್ಯಾರ್ ವರ್ಸಾಂ ಮಹಿನ್ಯಾಳೆಂ ಜಾವ್ನ್ ಚಲವ್ನ್ ವೆಲಾಂ. ತಶೆಂಚ್ ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಷದೆಚೊ ಪಯ್ಲೊ ಲಾಯಿಕ್ ಕಾರ್ಯದರ್ಶಿ ಆಸ್ಲ್ಲೊ. ತೀನ್ ವರ್ಸಾಂಚಾ ದೋನ್ ಆವ್ದೆಕ್ (ಒಟ್ಟುಕ್ ಸ ವರ್ಸಾಂ) ತೊ ಕಾರ್ಯದರ್ಶಿ ಆಸ್ಲ್ಲೊ. ಹೆಂಚ್ ನ್ಹಂಯ್ ಆಸ್ತಾಂ ಶಂಕರಪುರ ರೋಟರಿ, ನಾಗರಿಕ ಸಮಿತಿ, ಆದ್ಲ್ಯಾ ವಿದ್ಯಾರ್ಥಿ ಸಂಘಾಚೊ ಅಧ್ಯಕ್ಷ್, ಫಿರ್ಗಜ್ ಗೊವ್ಳಿಕ್ ಸಭೆಚೊ ಕಾರ್ಯದರ್ಶಿ, ಉಪಾಧ್ಯಕ್ಷ್, ಕಥೊಲಿಕ್ ಸಭಾ, ಶಾಂ ವಿಶೆಂತ್ ಪಾವ್ಲ್ ಸಭಾ, ಸಾಂ. ಕ್ರಿಸ್ಟೋಫರ್ ಅಸೋಶಿಯೇಶನ್ ಚೊ ಸಾಂದೊ ಜಾವ್ನ್ ಜಾಯ್ತೊ ಸಾಮಾಜಿಕ್ ವಾವ್ರ್ ಕೆಲಾ. ಯುವಮುಕೆಲಿ ಜಾವ್ನ್ ಫ್ರಾನ್ಸ್ (ತೈಝೆ), ಇಟಲಿ ದೇಶಾಂಕ್ ಭಾರತಾಚೊ ಪ್ರತಿನಿಧಿ ಜಾವ್ನ್ ಭೆಟ್ ದಿಲ್ಯಾ. ಆಪ್ಲ್ಯಾ ಬರ್ಪಾಂ ಆನಿ ಭಾಷಣಾಂದ್ವಾರಿಂ ದಿಯೆಸೆಜಿ ಭಾಯ್ರ್ ವಳ್ಕಿಚೊ ಜಾಲಾ. ಹೊ ಸಕ್ಕಡ್ ವಾವ್ರ್ ಆಮ್ಚ್ಯಾ ಲಗ್ನಾಚಾಕೀ ಪಯ್ಲೆಂಚ್ ತಾಣೆ ಕೆಲಾ. ತಾಚಾ ವಾವ್ರಾ ಥಾವ್ನ್ ಪ್ರೇರಣ್ ಆನಿ ಮಾರ್ಗದರ್ಶನ್ ಜೊಡ್ಲ್ಲೆ ಥೊಡೆ ವ್ಯಕ್ತಿ ಆತಾಂಯ್ ಆಮ್ಚೆಸವೆಂ ಸಂಪರ್ಕಾರ್ ಆಸಾತ್.
ಹಾಂವ್ಯೀ
ಹೈಸ್ಕೂಲಾ ಥಾವ್ನ್ಂಚ್ ನಾಟಕ್, ಪ್ರಬಂಧ್, ಭಾಷಣ್ ಹಾಂತು
ಮುಕಾರ್ ಆಸ್ಲ್ಲಿ. ಸಭಾಕಂಪ್ಣಿ ನಾತ್ಲ್ಲಿಚ್ಚ್. ವಿದ್ಯಾರ್ಥಿ ಜಿಣ್ಯೆಂತ್ ಜಾಯಿತ್ತಿಂ ವೆದಿಕಾರ್ಯಿಂ ಚಲಯ್ಲ್ಯಾಂತ್.
ಹಾಂವ್ ರೋಶ್ನಿ ನಿಲಯಾಂತ್ ಶಿಕ್ತಾನಾ ಆಮಿಂ "ಕನ್ನಡ
ಸಂಘ" ಘಡ್ನ್ ಹಪ್ತ್ಯಾಳೆಂ "ವೊಣದೆ ಪತ್ರ್" (ವಾಲ್ ಮ್ಯಾಗಝಿನ್) ದೋನ್
ವರ್ಸಾಂ ಯಶಸ್ವೆನ್ ಚಲಯ್ಲಾಂ. ಹೆರ್ ವಿದ್ಯಾರ್ಥಿಂಕ್ ಬರಂವ್ಕ್ ಉತ್ತೇಜನ್
ದೀವ್ನ್, ತಾಣಿಂ ಬರಯಿಲ್ಲೆಂ ತಿದ್ವುನ್ ಮಾರ್ಗದರ್ಶನ್
ದಿಲಾಂ. "ಕನ್ನಡ ಸಂಘ" ಧ್ವಾರಿ ಆಕಾಶವಾಣಿಂತ್ ಕಾರ್ಯಕ್ರಮಾಂ
ಪ್ರಸಾರ್ ಜಾಲ್ಯಾಂತ್. ಆಜೂನ್ಯೀ "ಕನ್ನಡ ಸಂಘ" ಬರ್ಯಾನ್ ಚಲ್ತಾ
ಮ್ಹಣ್ ಆಯ್ಕಾಲಾ.
ಹಾಂವ್ ಆನಿ ಹೆರಿ, ಆಮ್ಚ್ಯಾ ಲಗ್ನಾ ಫುಡೆಂಚ್, ಆಮ್ಚ್ಯಾಮ್ಚ್ಯಾ
ಶೆತಾಂತ್ ಆಮ್ಚಿ ವಾಟ್ ಥಿರ್ ಕರ್ನ್ ಘೆತ್ಲ್ಲ್ಯಾನ್ ಭೋವ್ಶಾ ಆಮ್ಚೆರ್ ಎಕಾಮೆಕಾಚೊ
ವಿಶೇಸ್ ಪ್ರಭಾವ್ ಪಡೊಂಕ್ ನಾ. ಆಮ್ಚ್ಯಾ ಲಗ್ನಾ ಪುಡೆಂಚ್
(1990 ಇಸ್ವೆಂತ್)
ಹಾಂವೆ ಆಕಾಶವಾಣಿಂತ್ ಸಾದರ್ ಕೆಲ್ಲ್ಯಾ "ಗುಮ್ಟಾಂ" ರೂಪಕಾಕ್ ರಾಷ್ಟ್ರ
ಪ್ರಶಸ್ತಿ ಲಾಬ್ಲ್ಲಿ. 1991
ಇಸ್ವೆಂತ್ ಹಾಂವೆ ಧಾರ್ವಾಡ್ಚ್ಯಾ ಕರ್ನಾಟಕ್ ಯುನಿವರ್ಸಿಟಿಂತ್ ಇಂಗ್ಲಿಷ್
ಸಾಹಿತ್ಯಾಂತ್ ಎಮ್.ಎ. ಶಿಕಪ್ ಆರಂಬ್ ಕೆಲ್ಲೆ.(ಕರೆಸ್ಪೊಂಡೆನ್ಸ್ ಕೋರ್ಸ್) ಎಕಾ
ವರ್ಸಾ ಉಪ್ರಾಂತ್ ಹೆರಿನ್ ಪೊಲಿಟಿಕಲ್ ಸಾಯನ್ಸ್ ಹಾಂತುಂ ಎಮ್. ಎ ಶಿಕಪ್ ಆರಂಬ್ ಕೆಲೆಂ. ತಿತ್ಲ್ಯಾ
ಮಟ್ಟಾಕ್ ತಾಚೆರ್ ಮ್ಹಜೊ ಪ್ರಭಾವ್ ಪಡ್ಲಾ ಮ್ಹಣ್ಯೆತ್. ಎಕಾಮೆಕಾಚೊ
ಪ್ರಭಾವ್ ಆಮ್ಚೆರ್ ವಿಶೇಸ್ ರಿತಿರ್ ಪಡೊಂಕ್ ನಾ ತರೀ ಆಮಿ ಎಕಾಮೆಕಾಚೊ
ವಿಮರ್ಸೊ/ ಠಿಕಾ ಜರೂರ್ ಕರ್ತಾಂವ್.
ಸ: ಕೊಂಕ್ಣೆಚ್ಯಾ ಚಟುವಟಿಕೆಂನಿ / ಕೊಂಕ್ಣಿ ವಾವ್ರಾಕ್ ತುಮ್ಕಾಂ ಕುಟ್ಮಾಚಿ ಜವಾಬ್ದಾರಿ ಅಡ್ಕಳ್ ಜಾಲ್ಯಾ?
ಜಾ: 1994
ಜನವರಿಂತ್ ಆಮ್ಚೊ ಪೂತ್ "ಹರ್ಷ್" ಜಲ್ಮಾಲೊ. ತ್ಯಾಚ್ಚ್ ಮೇಯಾಂತ್ ಹೆರಿನ್ ಮೆಂಗ್ಳೂರ್ ಕೆಮಿಕಲ್ಸ್ ಆಂಡ್ ಫರ್ಟಿಲೈಸರ್ಸ್(ಎಮ್. ಸಿ. ಎಫ಼್) ಹಾಂತ್ಲೊ ವಾವ್ರ್ ಸಾಂಡುನ್ ಶಂಕರಪುರಂತ್ ಮರಿಯಾ ಎಡ್ವರ್ಟೈಸರ್ಸ್ ಉದ್ಯಮ್ ಆರಂಭ್ ಕೆಲೆಂ. ಆಗೋಸ್ತಾಂತ್ ಮಂಗ್ಳುರಾಂತ್ ಪ್ರಧಾನ್ ದಫ್ತರ್ ಕೆಲೆಂ.
1996
ಮೇಯಾಂತ್ ಆಮ್ಚಿ ಧುವ್ "ಹೀರಾ" ಜಲ್ಮಾಲಿ. 1991
ವ್ಯಾ ವರ್ಸಾ(ಲಗ್ನಾ ಫುಡೆಂ) "ಮಾಂಡೊ ಫೆಸ್ತ್", 1992
ವರ್ಸಾ 9
ದಿಸಾಂಚಿ "ಪೊರೊಬ್", 1993
ಂತ್ "ಸಾಂತ್", ತಶೆಂಚ್ ಮಾಂಡ್ ಸೊಬಾಣಾಚಿ ಹೆರ್ ಜಾಯ್ತಿ ವ್ಹಡ್ ಮಟ್ಟಾಚಿ ಕಾರ್ಯಿಂ - "ಪುನವ್(1996),
1995
ವಿಶ್ವಕೊಂಕಣಿ ಸಮ್ಮೇಳನ್, "ಸಂಗೀತ್ ಧಬ್ ಧಬೊ", ಸಾಸ್ರಾಚೊ ಕೊಂಕ್ಣಿ ಮಹಾ ಮಾನೇಸ್ತ್ ಆಶೆಂ ಸುಮಾರ್ ಧಾ ವರ್ಸಾಂ
(1991 -2000) ಮಾಂಡ್ ಸೊಭಾಣ್ ಪಂಗ್ಡಾಚಿ ಕಾರ್ಯಕರ್ತ್ ಜಾವ್ನ್ ತಾಂಕಿ ಪುರ್ತೊ ವಾವ್ರ್ ಕೆಲಾ. ಚಡಾವತ್ ವೆದಿಕಾರ್ಯಿಂ ಚಲಂವ್ಕ್ ತಾಣಿಂ ಮ್ಹಕಾ ಆವ್ಕಾಸ್ ದಿಲ್ಯಾತ್. ತಶೆಂಚ್ ಸಂದೇಶ್, ಮಂಗ್ಳುರ್ ದಿಯೆಸೆಜ್, ಮಂಗ್ಳುರ್ ವಿ.ವಿ. ಕ್ರೀಸ್ತಾಂವ್ ವಿದ್ಯಾಪೀಠ್, ಜೆಪ್ಪು ಸೆಮಿನರಿ, ಆಮ್ಚಿ ಮಾಂಯ್ ಪತ್ರ್, ಕರ್ನಾಟಕ ಕೊಂಕ್ಣಿ ಸಾಹಿತ್ಯ ಆಕಾಡೆಮಿ, ರಾಕ್ಣೊ ಪತ್ರ್, ಹಾಣಿಂ ಸರ್ವಾಂನಿ ತಾಂಚೆ ವ್ಹಡ್ ವ್ಹಡ್ ಸಂಭ್ರಮ್ ಚಲಯ್ತಾನಾ ವೆದಿಕಾರ್ಯೆಂ ನಿರ್ವಹಣ್ ಕರುಂಕ್ ಮ್ಹಾಕಾ ಆವ್ಕಾಸ್ ದಿಲ್ಯಾತ್. ಆಪವ್ಣಿಂ ಆತಾಂಯ್ ಯೇವ್ನ್ಂಚ್ ಆಸಾತ್. ಥೊಡೆ ಪಾವ್ಟಿಂ ಒತ್ತಾಯೆಕ್ ಲಾಗೊನ್ ಸ್ವೀಕಾರ್ ಕರುಂಕ್ ಪಡ್ತಾತ್. ಮಾಂಯ್ಭಾಸ್ ಡೊಟ್ ಕೊಮ್ ವೆಬ್ ಸಾಯ್ಟಿಚಾ
"ರುಮ್ಡಿ ಫುಲಾಂ" ವಿಭಾಗಾಂತ್ ಮ್ಹಜಿ ವಳಕ್ ಫಾಯ್ಸ್ ಜಾಲ್ಯಾ. ದಾಯ್ಜಿವರ್ಲ್ಡ್ ಡೊಟ್ ಕೊಮ್ ಹಾಚೊ ಪಾಂಚ್ವೊ ಜಲ್ಮಾ ಉತ್ಸವ್ ಆಯ್ಲೆವಾರ್ ಮಂಗ್ಳುರಾಂತ್ ಚಲ್ಲ್ಲ್ಯಾ ವೆಳಾರ್ ವೆದಿ ಕಾರ್ಯೆಂ ಚಲಯ್ಲಾಂ.
ದಫ್ತರಾಂತ್ ಆನಿ ಘರಾಂತ್ ಜವಾಬ್ದಾರಿ ಆತಾಂ ಚಡ್ಲ್ಯಾ. ಭುರ್ಗ್ಯಾಂಚಾ ಶಿಕ್ಪಾಕುಶಿನ್ ಥೊಡೆಂ ಗಮನ್ ದೀಜಯ್ ಪಡ್ತಾ. ಘರ್ ಕಾಮಾಕ್ ಪಾತ್ಯೆಣೆಚಿಂ ಮನ್ಶ್ಯಾ ಮೆಳಾನಾಂತ್. ಪಾಟ್ಲ್ಯಾ
12 ವರ್ಸಾಂನಿ ಹೆರಿಚೆಂ ಉದ್ಯಮ್ ವಾಡ್ಲಾಂ. ದಿಸಾಕ್ ಥೊಡಿಂ ಮಿನುಟಾಂ ಪುಣೀ ತಾಚಾ ಉದ್ಯಮಾ ಖಾತಿರ್ ಖರ್ಚಿಜೆ ಪಡ್ತಾ. ಕುಟ್ಮಾಚಿ ಜವಾಬ್ದಾರಿ ಆಮ್ಚ್ಯಾ ಸಾಧನಾಂತ್ ಆಡ್ಕಳ್ ಮ್ಹಣ್ ಹಾಂವ್ ಖಂಡಿತ್ ಚಿಂತಿನಾ. ಆಮ್ಚೆಂ ಕುಟ್ಮಾಜಿವಿತ್ ಕಿತ್ಲೆಂ ಬರೆಂ ಆಸ್ತಾ, ತಿತ್ಲೆಂ ಚಡ್ ಸಾಧನ್ ಕರುಂಕ್ ಆಮಿ ಸಕ್ತಾಂವ್. ದೊಗಾಂಯ್ ಭುರ್ಗಿಂ ಇಸ್ಕೊಲಾಕ್ ವಚೊಂಕ್ ಪ್ರಾರಂಭ್ ಕೆಲ್ಯಾ ನಂತರ್ ಹಾಂವೆಂ ಸಾಂತ್ ಲುವಿಸ್ ಕೊಲೆಜಿಚ್ಯಾ ಕೊಂಕ್ಣಿ ಸಂಸ್ಥ್ಯಾಚೊ ಸ್ನಾತಕೋತ್ತರ್ ಡಿಪ್ಲೊಮಾ ಡಿಸ್ಟಿಂಕ್ಶನಾ ಸವೆಂ ಸಂಪಯ್ಲಾ. ಕುಟ್ಮಾಚ್ಯಾ ಜವಾಬ್ದಾರೆ ನಿಮ್ತಿ ಆಮ್ಚೆಂ ಆದ್ಯತಾ
(Priorities) ಬದಲ್ತಾತ್. ವೆಳಾಕಾಳಾಕ್ ಸಹಜ್ ಜಾವ್ನ್ ತೆಂ ಬದ್ಲೊಂಕ್ಚ್ಚ್ ಜಾಯ್. ಪುಣ್ ಆಮ್ಚೆ ಮುಳಾವೆ ಗೂಣ್ ಬದ್ಲೊಂಕ್ ನಾಂತ್. ಹೆರಿನ್ ಸುಮಾರ್
20 ವರ್ಸಾಂ ಸಾಮಾಜಿಕ್ ವಾವ್ರ್ ಕೆಲಾ. ಆತಾಂ ಆಪ್ಲ್ಯಾ ಉದ್ಯಮಾ ಕುಶಿನ್ ಚಡಿತ್ ಗಮನ್ ದಿತಾ. ಹಾಂವೆಯೀ ಮ್ಹಜ್ಯಾ ತಾಂಕಿ ಭಿತರ್ಲೊ ವಾವ್ರ್ ಕೊಂಕ್ಣೆ ಖಾತಿರ್ ಕೆಲಾ. ಹೆರಾಂಕ್ಯ್ ಆವ್ಕಾಸ್ ಮೆಳೊಂದಿ ಮ್ಹಣ್ ಆಮಿ ಆಶೆತಾಂವ್.
ಮ್ಹಜ್ಯಾ ಉದ್ಯೋಗಾಂತ್ ಕೊಂಕ್ಣಿ ವಾವ್ರ್ ಮಿಸ್ಳೊನ್ ಆಸಾ. ಬರ್ಯಾ ಹುಮೆದಿನ್ ಹಾಂವ್ ಮುಕಾರ್ ವ್ಹರುಂಕ್ ಆಶೆತಾ. ಆಮ್ಚ್ಯೊ ದೊಗಾಂಯ್ಚ್ಯೊ ರಾಟಾವಳಿ ಕಿತ್ಲ್ಯೊಯ್ ವಾಡ್ಲ್ಯಾರೀ ಮಂಗ್ಳುರಾಂತ್ ಆತಾಂ ಚಲೊನ್ ಆಸ್ಚ್ಯಾ ಕೊಂಕ್ಣಿ ಕಾರ್ಯಕ್ರಮಾಂಕ್ ಆಮಿ ಹಾಜರ್ ಜಾಂವ್ಚೆಂ ಪ್ರಯತ್ನ್ ಕರ್ನ್ಂಚ್ ಆಸಾಂವ್. ಆಮ್ಕಾಂ ದೊಗಾಂಯ್ಕ್ಯೀ ವಾಚ್ಚಿ ಸವಯ್ ಆಸಾ. ಕೊಂಕ್ಣೆಂತ್ಲಿ ಚಡಾವತ್ ಸಕ್ಕಡ್ ಪತ್ರಾಂ ಹಾಡಯ್ತಾಂವ್. ನವಿಂ ಪುಸ್ತಕಾಂ ಮೊಲಾಕ್ ಘೆವ್ನ್ ವಾಚ್ತಾಂವ್. ಆಮಿ ವಾಚ್ಲ್ಲ್ಯಾ ಸಂಗ್ತಿಂಚೆರ್ ಕಿತ್ಲೆಶೆ ಪಾವ್ಟಿಂ ತರ್ಕ್ ಚಲಯ್ತಾಂವ್.
ಸ: ಆತಾಂಚ್ಯಾ ಕೊಂಕ್ಣಿ ಪರಿಗತ್, ಕೊಂಕ್ಣಿ ಸಂಸ್ಕ್ರತಿ, ಕೊಂಕ್ಣಿ ಸಾಹಿತ್ಯ್, ಕೊಂಕ್ಣಿ ಸಂಗೀತ್, ಕೊಂಕ್ಣಿ ಭಾಸ್ ಆನಿ ಕೊಂಕ್ಣಿ ಲೊಕಾ ವಿಶ್ಯಾಂತ್ ತುಂಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ಆಜ್ಕಾಲ್ ಕೊಂಕ್ಣೆಕ್ ಬರೆ ದೀಸ್ ಆಯ್ಲ್ಯಾತ್. ಬರವ್ಪ್ಯಾಂಕ್, ಸಾಹಿತಿಂಕ್, ಕಲಾಕಾರಾಂಕ್ ಆದಿಂ ಮೆಳೊಂಕ್ ನಾತ್ಲ್ಲೆ ತಿತ್ಲೊ ಆಧಾರ್, ಗೌರವ್ ಆಯ್ಲೆವಾರ್ಚ್ಯಾ ವರ್ಸಾಂನಿ ದಿಸೊನ್ ಯೆತಾ. ಕೊಂಕ್ಣೆಂತ್ ಪತ್ರಾಂಯ್ ಚಡ್ಲ್ಯಾಂತ್. ಸಾತ್ ದರ್ಯಾಂ ಬಾಯ್ರ್ಯೀ ಕೊಂಕ್ಣಿ ಗಾಜ್ತಾ ಮ್ಹಣ್ತಾನಾ ಕೊಂಕ್ಣೆಕ್ ಬರೊ ಫುಡಾರ್ ಆಸಾ. ಲಿಪ್ಯೆಚೊ ವಾದ್ ವೆಗಿಂಚ್ ನಿವ್ಲ್ಯಾರ್ ಬರೆಂ. ಜಾಗತೀಕರಣಾಚ್ಯಾ ಹ್ಯಾ ಕಾಳಾರ್ ಸಂಸ್ಕ್ರತೆಂಚೆ ಮಿಸ್ಳಾಪ್ ಆಡಾಂವ್ಕ್ ಸಾಧ್ಯ್ ನಾ.
ಸ: ಕೊಂಕ್ಣೆಂತ್ ತುಮ್ಚ್ಯಾ ಜಿಣ್ಯೆಚಿ ಮಹಾತ್ವಾಕಾಂಕ್ಷ ಕಸಲಿ?
ಜಾ: ಕೊಂಕ್ಣೆಚ್ಯಾ ಖಂಚಾಯೀ ಎಕಾ ಶೆತಾಂತ್ ಉಂಚ್ಲೆಂ ಶಿಕಾಪ್ ವಾ ಸಂಸೊದ್ ಕರ್ಚಿ ಆಶಾ ಆಸಾ. ಕೆನ್ನಾ ಜ್ಯಾರಿ ಜಾಯ್ತ್ ರಾಕೊನ್ ಆಸಾ.
ಸ: ತುಮ್ಚಾ ಭುರ್ಗಾಂಚ್ಯಾ ಕೊಂಕ್ಣಿ ಆಸಕ್ತಿ ವಿಶ್ಯಾಂತ್ ಸಾಂಗ್ಶ್ಯಾತ್ಗೀ. ಇತ್ಲ್ಯಾ ದೆಣ್ಯಾಂನಿ ನೆಟ್ಲ್ಲ್ಯಾ ವ್ಹಡಿಲಾಂ ಥಂಯ್ ತಾಂಕಾ ಕಿತ್ಲೊ ಗೌರವ್ ಆನಿ ಆಬಿಮಾನ್ ಆಸಾ?
ಜಾ: ಆಮ್ಚ್ಯಾ ಘರಾಂತ್ ಕೊಂಕ್ಣೆಚೆಂಚ್ ವಾತಾವರಣ್. ಉಲವ್ಣೆಂ, ಮಾಗ್ಣೆಂ ಸಗ್ಳೆಂ ಕೊಂಕ್ಣೆಂತ್ಚ್ಚ್. ಥೊಡಿಂ ಕೊಂಕ್ಣಿ ಪತ್ರಾಂ ಭುರ್ಗ್ಯಾಂಚಾ ನಾಂವಾರ್ ತಪ್ಪಲಾರ್ ಹಾಡಯ್ತಾಂವ್. ಕೊಂಕ್ಣಿ ಪತ್ರಾಂತ್ಲೆಂ ಕಾಂಯ್ ಥೊಡೆಂ ವಾಚ್ತಾತ್. ಘರಾಭಿತರ್ ಆನಿ ಭಾಯ್ರ್ ಆಮ್ಚಿ ಸಾದಿ ಜಿಣಿ. ಪಾಟ್ಲ್ಯಾ ವರ್ಸಾಂನಿ ಆಮಿ ಕೆಲ್ಲ್ಯಾ ಸಾಮಾಜಿಕ್ ವಾವ್ರಾ ವಿಶ್ಯಾಂತ್ ಭುರ್ಗ್ಯಾಂಕ್ ಚಡ್ ಕಳಿತ್ ನಾ. ಪುತಾಕ್ 13 ವರ್ಸಾಂ ಆನಿ ಧುವೆಕ್ 10 ವರ್ಸಾಂಚಿ ಪ್ರಾಯ್. ಪುತಾಕ್ ವಾಚ್ಚಿ ಸವಯ್ ಚಡ್ಚ್ ಆಸಾ ತಶೆಂ ದಿಸ್ತಾ. ಧುವೆಕ್ ಸಬಾರ್ ಆಸಕ್ತ್ಯೊ ಆಸಾತ್. ಉಲಂವ್ಚ್ಯಾಂತ್ ಚುರುಕ್ ಆಸಾ.
ಸ: ಕೊಂಕ್ಣೆಚ್ಯಾ ಚಡುಣೆ ಸರ್ವ್ ಸಾಹಿತಿಲಾಗಿಂ ತುಮ್ಕಾಂ ಸಂಪರ್ಕ್ ಆಸಾ. ತಾಂಕಾ ಭೆಟ್ತಾನಾ ತುಮ್ಕಾಂ ಜಾಲ್ಲೊ ಅನ್ಭೋಗ್ ಸಾಂಗ್ಶ್ಯಾತ್ಗೀ? ತುಮ್ಕಾಂ ಚಡ್ ಪಸಂದೆಚೊ ಸಾಹಿತಿ ಕೋಣ್?
ಜಾ: ಕೊಂಕ್ಣೆಂತ್ಲ್ಯಾ ನಾಂವಾಡ್ದಿಕ್ ಸಾಹಿತಿಂಕ್ ಲಾಗ್ಶಿಲ್ಯಾನ್ ಪಳೆಂವ್ಚೆಂ, ಉಲಂವ್ಚೆ, ತಾಂಚಿಂ ಕಾರ್ಯಕ್ರಮಾ ರೆಕೊರ್ಡ್ ಕರ್ನ್ ಪ್ರಸಾರ್ ಕರ್ಚೆ ಆವ್ಕಾಸ್ ಮ್ಹಾಕಾ ಲಾಬ್ಲ್ಯಾತ್. ಹಾಂವೆ ಆಕಾಶ್ವಾಣಿಕ್ ಸೆರ್ವೊನ್ ಥೊಡ್ಯಾಚ್ ಹಪ್ತ್ಯಾಂ ಬಿತರ್ ವಿ.ಜೆ.ಪಿ. ಸಲ್ದಾಞಾಚಿ ಕಾಣಿ ರೆಕೊರ್ಡ್ ಕೆಲ್ಲಿ. ಕೊಂಕ್ಣಿ ವಾಕ್ಸರಿಂತ್ ದಫ್ತರಾಕ್ ಎ.ಟಿ.ಲೋಬೋ, ಚಾ.ಫ್ರಾ, ಸಿಜ್ಯೆಸ್ ಆನಿ ಹೆರ್ ಥೊಡೆ
ಸಾಹಿತಿ, ಫಾ. ವಿಲ್ಲಿಕ್, ಮೆಲ್ವಿನ್ ರೊಡ್ರಿಗಸಾಕ್ ಮೆಳೊಂಕ್
ಯೆತಾಲೆ. ಆಮ್ಚ್ಯಾ ಲಗ್ನಾಚಾ ಸುರ್ವಿಲ್ಯಾ ದಿಸಾಂನಿಂಚ್ ಹೆರಿನ್ ಸಬಾರ್ ಬರವ್ಪ್ಯಾಂಚಿ ವಳಕ್ ಕರ್ನ್ ದಿಲ್ಲಿ. ಜೊ.ಸಾ. ಆಲ್ವಾರಿಸಾಚ್ಯಾ ಘರಾ ಆಪವ್ನ್ ವೆಲ್ಲೆಂ. ತಾಂಚೆ ಸಾಹಿತ್ಯ್ ವಾಚ್ಲ್ಲ್ಯಾನ್ ಹರ್ಯೆಕ್ ಬರವ್ಪ್ಯಾಕ್ ಪಳೆಯ್ತಾನಾ, ಮೆಳ್ತಾನಾ ಮ್ಹಾಕಾ ವಿಶಿಷ್ಟ್ ಆನ್ಬೋಗ್ ಜಾತಾಲೊ.
ಕೊಂಕ್ಣಿ ವಾಕ್ಸರಿಂತ್ ಕಾಮ್ ಕರ್ತಾನಾ ಖಂಚಾಯ್ ಎಕಾ ಸಾಹಿತಿಚ್ಯಾ ಸಮಗ್ರ್ ಬರ್ಪಾಂತ್ಲೆ ವಿಶೇಸ್ ಆನಿ ವಿಂಚ್ಣಾರ್ ಸಬ್ಧ್ ವಿಂಚುನ್ ಕಾಡ್ಚೆ ಕಾಮ್ ಆಟಾಪುನ್ ಆಸ್ಲ್ಲೆಂ. ಹಾಂವೆ ವಿಂಚ್ಲ್ಲೊ ಸಾಹಿತಿ ಎಡ್ವಿನ್ ಜೆ. ಎಫ್. ಡಿಸೋಜ್. ಕೊಂಕ್ಣಿ ಪತ್ರಾಂನಿ ಸಾಂಕಳ್ ರುಪಾರ್ ಫಾಯ್ಸ್ ಜಾಲ್ಲೆ ತಾಚೆ ತ್ಯಾ ಪರ್ಯಾಂತ್
(1990) ಪರ್ಗಟ್ ಜಾಲ್ಲ್ಯೊ ಕಾದಂಬರಿ ಎಕಾ ಪಾಟ್ಲ್ಯಾನ್ ಏಕ್ ವಾಚುನ್ ತಾಂತ್ಲೆ ಸಬ್ಧ್ ವಿಂಚುನ್ ಕಾಡ್ತಾನಾ, ಎಡ್ವಿನಾಚ್ಯಾ ವಿಷಯ್ ವಿಸ್ತಾರಾಯ್ ಆನಿ ಗುಂಡಾಯೆಚೆರ್ ಹಾಂವ್ ಖರಿಂಚ್ಚ್ ವಿಜ್ಮಿತ್ ಪಾವ್ಲ್ಲಿಂ. "ಧಾರೂವಾಲಾ ಎಸ್ಟೇಟ್", "ಮ್ಹಜ್ಯಾ ವೊಡ್ತಾಂತ್ಲೆ ಗುಲೊಬ್", ಹಾಂವ್ ಜಿಯೆತಾಂ ಆನಿ ಹೆರ್ ಕಾದಂಬರಿ ವಾಚ್ತಾನಾ, ಕೊಂಕ್ಣೆಂತ್ ಹ್ಯಾ ಪ್ರಕಾರಾಚೆಂ ಉಂಚ್ಲೆಂ ಸಾಹಿತ್ಯ್ ಬರಂವ್ಕ್ ಹಾಕಾ ಕಿತ್ಲಿ ಶ್ಯಾಥಿ ಆಸಾಜಯ್, ಹ್ಯಾ ವ್ಯಕ್ತಿಕ್ ಹಾಂವ್ ಕೆದಾಳಾ ಆನಿ ಖಂಯ್ ಪಳೆಯ್ನ್ ಮ್ಹಳ್ಳಿಂ ಚಿಂತ್ನಾಂ ಆಟವ್ನ್ ಆಸ್ತಾನಾಂಚ್ ಎಕಾ ದೊನ್ಪಾರಾ ಉಪ್ರಾಂತ್ ಸಾದಾರ್ನ್
35
ವರ್ಸಾಂ ಪ್ರಾಯೆಚೊ ಬಾರೀಕ್ ಜಿವಾಚೊ, ನಿತಳ್ ಖಡಕ್ಕ್ ಇಸ್ತ್ರಿ ಮಾರ್ಲ್ಲ್ಯಾ ನೆಸ್ಣಾಚೊ ಮನಿಸ್ ಆಮ್ಚ್ಯಾ ದಫ್ತರಾ ಭಿತರ್ ಆಯ್ಲೊ, ಶೀದಾ ಮೆಲ್ವಿ ಬೊಸೊನ್ ಆಸ್ಲ್ಲ್ಯಾ ಕುಡಾಕ್ ಗೆಲೊ. ಆಮ್ಕಾಂ ಉಪ್ರಾಂತ್ ಕಳ್ಳೆಂ ತೊ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಮ್ಹಣ್. ಮೆಲ್ವಿನ್ ಆಮ್ಕಾಂ ತಾಚಿ ವಳಕ್ ಕರ್ನ್ ದಿಲಿ. ತಾಕಾ ಪಯಿಲ್ಲೆ ಪಾವ್ಟಿಂ ಮೆಳ್ತಾನಾ ಮ್ಹಾಕಾ ಭಗ್ಲ್ಲಿ ವಿಜ್ಮಿತ್ಕಾಯ್, ಉದ್ವೇಗ್ ಆನಿ ಸಂತೊಸ್ ಹಾಂವ್ ಉತ್ರಾಂನಿ ವಿವರುಂಕ್ ಸಕಾನಾ.
ಸ: ಕೊಂಕ್ಣಿ ವೆಬ್ಸಾಯ್ಟಾ ಮುಖಾಂತ್ರ್ ಜಾಂವ್ಚಾ ಕೊಂಕ್ಣಿ ವಾವ್ರಾ ವಿಶ್ಯಾಂತ್ ತುಮ್ಚಿ ಅಭಿಪ್ರಾಯ್ ಕಸಲಿ? ಕೊಂಕ್ಣಿ ವೆಬ್ಸಾಯ್ಟಾ ಕೊಂಕ್ಣೆಚಾ ವಾಡಾವಳೆಕ್ ಉಪ್ಕಾರ್ತಿತ್?
ಜಾ: ಇಲೆಕ್ಟ್ರೋನಿಕ್ ಮಾಧ್ಯಮಾಂಧ್ವಾರಿಂ ಕೊಂಕ್ಣೆಕ್ ಆದ್ಲ್ಯಾ ಪ್ರಾಸ್ ಚಡ್ ಪ್ರಚಾರ್ ಆನಿ ಪ್ರಸಾರ್ ಲಾಭ್ಲಾ. ಸಂಸಾರಾಚಾ ಖಂಚ್ಯಾಯ್ ಕೊನ್ಶ್ಯಾ ಥಾವ್ನ್ ಕೊಂಕ್ಣಿ ಲೊಕಾನ್ ಎಕಾಮೆಕಾ ಥಂಯ್ ಸಂಪರ್ಕ್, ಸಂಬಂಧ್ ವಾಡಂವ್ಕ್ ಸಾಧ್ಯ್ ಜಾಲಾಂ. ಕೊಂಕ್ಣಿ ಅಭಿಮಾನಿ ಆನಿ ವಾವ್ರಾಡ್ಯಾಂಚೊ ಸಂಖೊ ಚಡ್ಲಾ.
ಸ: ದಾಯ್ಜ್ ಡೊಟ್ ಕೊಮ್ ವಿಶ್ಯಾಂತ್ ತುಮ್ಚೆ ವಿಚಾರ್ ಕಸಲೆ?
ಜಾ: ದಾಯ್ಜ್ ಡೊಟ್ ಕೊಮ್ ವೆಬ್ಸಾಯ್ಟ್ ಕೊಂಕ್ಣೆಚೊ ಬರೊಚ್ಚ್ ವಾವ್ರ್ ಕರ್ನ್ ಆಸಾ. ಕೊಂಕ್ಣೆ ಖಾತಿರ್ ವಾವುರ್ತೆಲ್ಯಾಂಚಿ ಉರ್ಭಾ ಚಡಯಿತ್ತ್ ಆಸಾ. ದಾಯ್ಜ್ ಕಾರ್ಬಾರ್ಯಾಂಕ್ ಹಾಂವ್ ಅಭಿನಂದನ್ ದಿತಾಂ. ಚಡಿತ್ ಹುಮೆದಿನ್ ತುಮ್ಚೊ ವಾವ್ರ್ ಮುಕಾರ್ಸಿಯಾ ಆನಿ ಹೆರಾಂಕೀ ವಾವ್ರುಂಕ್ ಪ್ರೇರಣ್ ದಿಯಾ.
ಸ: ದಾಯ್ಜ್ ವಾಚ್ಪಾಂಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: ದಾಯ್ಜ್ ವಾಚ್ಪ್ಯಾಂಕ್ ಹಾಂವೆಂ ಸಾಂಗ್ಚೆ ಕಿತೆಂಗೀ ಮ್ಹಳ್ಯಾರ್ ಕೊಂಕ್ಣೆಚೆಂ ಕಾಮ್ ಆಮ್ಚೆ ಥಾವ್ನ್, ಆಮ್ಚ್ಯಾ ಘರಾ ಥಾವ್ನ್ ಆರಂಭ್ ಜಾಂವ್ದಿ. ಆಮ್ಚ್ಯಾ ಭುರ್ಗ್ಯಾಂ ಬರಾಬರ್ ವಾಡೊಂದಿ ಆನಿ ಫುಲೊಂದಿ. ತುಮ್ಚ್ಯಾ ಭುರ್ಗ್ಯಾಂಕ್ ಕೊಂಕ್ಣೆಚೊ ಮೋಗ್ ಶಿಕಯಾ.
ಸ: ದೇವ್ ಬರೆಂ ಕರುಂ ಕೊನ್ಸೆಪ್ಟಾ ಬಾಯ್ ತುಕಾ, ತುಜೊ ಆಮೊಲಿಕ್ ವೇಳ್ ಆಮ್ಕಾಂ ದಿಲ್ಲ್ಯಾಕ್.
ಜಾ: ದೇವ್ ಬರೆಂ ಕರುಂ ತುಕಾಯ್ ವಾಯ್ಲೆಟ್, ತುಂ ಹಾಂಗಾಸರ್ ಯೇವ್ನ್ ಮ್ಹಜೆ ಸವೆಂ ತುಜೊ ವೇಳ್ ಖರ್ಚಿಲ್ಲ್ಯಾಕ್. ತಶೆಂಚ್ಚ್ ವಲ್ಲಿಕ್ ಆನಿ ದಾಯ್ಜಾಚ್ಯಾ ಸರ್ವ್ ವಾವ್ರಾಡ್ಯಾಂಕ್ ದೇವ್ ಬರೆಂ ಕರುಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
