ಅಗೇರಾಲಾಗಿಂ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.

ಸಾಹಿತಿಲಾಗಿಂ ಸಂವಾದ್

Placeholder: the original page gave this picture no description, and none has been written yet. It came from daaiz\daaiz\column\ss\stan.asp.

ಸ್ಟೇನ್ ಅಗೇರಾಲಾಗಿಂ ಸಂವಾದ್ ಚಲಯ್ತಾ: ವಲ್ಲಿ ಕ್ವಾಡ್ರಸ್

ಸ್ಟೇನ್ ಅಗೇರಾ, ಮುಲ್ಕಿ

ಸಾಹಿತಿವಿಶಿಂ ದೋನ್ ಉತ್ರಾಂ:

ನಾಂವ್: ಸ್ಟೇನ್ ಅಗೇರಾ

ಆವಯ್ ಬಾಪಾಯ್ಚೆಂ ನಾಂವ್: ಶ್ರೀಮತಿ ಸೆಲಿನ್ ಆನಿ ದೆವಾಧೀನ್ ಲಿಗೋರಿ ಅಗೇರಾ

ಜಲ್ಮಾಲ್ಲೊ ದೀಸ್: ಮೇಯಾಚಿ ತೀನ್ ತಾರೀಕ್ 1961.

ಇಸ್ಕೊಲ್: ಸಾತ್ವೆ ಪರ್‍ಯಾಂತ್ ಮುಲ್ಕಿ ಬೆಥನಿ ಕೊನ್ವೆಂಟ್, ಆಟ್ವಿ ಥಾವ್ನ್ ಧಾವೆ ಪರ್‍ಯಾಂತ್ ಮುಲ್ಕಿ ಸರ್‍ಕಾರಿ ಇಸ್ಕಾಲ್, ಮುಲ್ಕಿ ವಿಜಯಾ ಕೊಲೇಜಿಂತ್ ಪಿಯುಸಿ ಥಾವ್ನ್ ಬಿಕೊಮ್ ಪರ್‍ಯಾಂತ್. ಉಪ್ರಾಂತ್ IBAM-New delhi ಥಾವ್ನ್ MBA ಸನದ್.

ಪಯ್ಲಿ ಮಟ್ವಿ ಕಥಾ: ’ಆಮ್ಚಿ ಕಥಾ’ ಮಣ್ಚಾ ತಕ್ಲೆ ನಾಂವಾಕಾಲ್ 1975 ಇಸ್ವೆಂತ್ ರಾಕ್ಣೊ ಪತ್ರಾರ್, ಮಾ|ಮಾರ್ಕ್ ವಾಲ್ಡರ್ ಸಂಪಾದಕ್ ಜಾವ್ನಾಸ್ತಾನಾ.

ಮಟ್ವ್ಯೊ ಕಥಾ: ಲಗ್‌ಭಗ್ 250 (ಲೇಕ್ ದವರ್‍ಚೆಂ ಬಂಧ್ ಕೆಲಾಂ)

ಕಾದಂಬರಿ: ನಿತಿದಾರ್, ಹೆಂ ಸತ್ ಜಾವ್ನಾಸಾ, ಪಿಸೊ ಸಂಸಾರ್, ಫರ್‍ಮಾಣ್, ಪಿಮೆಂಟೊ, ಶಿಕಾರಿ, ಸೊಧ್ನಾಂ, ಬದ್ಲಾನಾತ್‌ಲ್ಲೊ ಗಾಂವ್, ಸ್ಪರ್‍ಧಿ-ಪ್ರತಿಸ್ಪರ್‍ಧಿ, ಘರ್‍ಶಣ್, ಸ್ವಾವಲಂಬಿ, ಪರ್‍ಸಿ, ಖುರಿಸ್ ಅಪ್ಣಾ-ಅಪ್ಣಾಚೊ, ಆಸಾಧ್ಯ್, ನಾಲಿಸಾಯಿ ಆನಿ ಶಿಂಪಡ್ಲೆಲಿಂ ಪಾನಾಂ. (ವೆಗಿಂಚ್ ಯೆತಾ: ಕಾಳ್ಜಾ-ಉಡಿ)

ಕವಿತಾಂ: ಚಡ್ ಮಳ್ಯಾರ್ ಧಾ.

ಅಂಕಣ್: ಬಿಂದಾಸ್ (ದಾಯ್ಜಿವರ್ಲ್ಡ್ ಡೊಟ್ ಕೊಮಾಂತ್)

ಪರ್‍ಗಟ್ ಜಾಲ್ಲಿಂ ಪುಸ್ತಕಾಂ:

ನಿತಿದಾರ್ (ಪುನವ್ ಪ್ರಕಶಾನ್ 1981)

ಪಿಸೊ ಸಂಸಾರ್ (ಪುನವ್ ಪ್ರಕಶಾನ್ 1982)

ಹೆಂ ಸತ್ ಜಾವ್ನಾಸಾ (ಕಾಣಿಕ್ ಪ್ರಕಶಾನ್ 1984)

ಫರ್‍ಮಾಣ್ (ಪುನವ್ ಪ್ರಕಶಾನ್ 1984)

ಪಿಮೆಂಟೊ (ಪುನವ್ ಪ್ರಕಶಾನ್ 1985)

ಶಿಕಾರಿ (ಪುನವ್ ಪ್ರಕಶಾನ್ 1986)

ಸೊಧ್ನಾಂ (ಪುನವ್ ಪ್ರಕಶಾನ್ 1987)

ಬದ್ಲಾನಾತ್‌ಲ್ಲೊ ಗಾಂವ್ (ರಾಕ್ಣೊ ಪ್ರಕಶಾನ್ 1988)

ಸ್ಪರ್‍ಧಿ-ಪ್ರತಿಸ್ಪರ್‍ಧಿ (ಪುನವ್ ಪ್ರಕಶಾನ್ 1988)

ಸ್ಟೇನ್ ಅಗೇರಾಚೊ ಮಟ್ವೊ ಕಥಾ (ಅಮರ್ ಪ್ರಕಶಾನ್ 1988)

ಘರ್‍ಶಣ್ (ಪುನವ್ ಪ್ರಕಶಾನ್ 1990)

ಸ್ವಾವಲಂಬಿ (ರಾಕ್ಣೊ ಪ್ರಕಶಾನ್ 1992)

ಪರ್‍ಸಿ (ಪುನವ್ ಪ್ರಕಶಾನ್ 1993)

ಖುರಿಸ್ ಅಪ್ಣಾ-ಅಪ್ಣಾಚೊ (ಪುನವ್ ಪ್ರಕಶಾನ್ 1994)

ಆಸಾಧ್ಯ್ (ಪುನವ್ ಪ್ರಕಶಾನ್ 1995)

ನಾಲಿಸಾಯ್ (ರಾಕ್ಣೊ ಪ್ರಕಶಾನ್ 1995)

ಬಿಂದಾಸ್ (ದಾಯ್ಜಿ ಪ್ರಕಶಾನ್ 2006)

ತಾಂಬ್ಡಿ ಮಿರ್‍ಸಾಂಗ್ (ಉಜ್ವಲ್ ಪ್ರಕಶಾನ್ 2006)

ಪುರಾಸ್ಕಾರ್:

ಬದ್ಲಾನಾತ್‌ಲ್ಲೊ ಗಾಂವಾಕ್ ಗೊಂಯ್ಚಾ ಭಾಶಾ ಮಂಡಳೆಚೊ ಪುರಾಸ್ಕಾರ್

ನಾಲಿಸಾಯಿ ಕಾದಂದರಿಕ್ ಕರ್‍ನಾಟಕ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ.

ಸಂವಾದ್:

1. ತುಮಿಂ ಕೊಂಕ್ಣೆಂತ್ ಮಾಲ್ಘಡೆ ಸಾಹಿತಿ ತರ್‌ಯೀ, ತರ್ನ್ಯಾ ಬರವ್ಪ್ಯಾಂಸವೆಂ ಸಯ್ತ್ ಬರ್‍ಯಾ ಸಳ್ಗೆನ್, ಮಾಯಾಮೊಗಾನ್ ಆನಿ ಇಸ್ಟಾಗತೆರ್ ಆಸಾತ್, ಹ್ಯೇವಿಶಿಂ ತುಮ್ಚೆ ವಿಚಾರ್?

ಜಾ: ವಳಕ್ ಆನಿ ಇಷ್ಟಾಗತೆಕ್ ಸಾಹಿತ್ಯ್, ಪ್ರಾಯ್, ಪರ್‍ನೊ ಆನಿ ನವೊ ಮ್ಹಣ್ಚೊ ದೊರೊ ನಾ. ಕೋಣ್‌ಯಿಂ ನವೊ ಬರವ್ಪಿ ಭೆಟ್ತಾನಾ ಯಾ ಪತ್ರ್/ಇಮೇಯ್ಲಾಧ್ವಾರಿಂ ಸಂಪರ್‍ಕ್ ಕರ್‍ತಾನಾ ಹಾಂವ್ ಪರ್‍ನೊ ಯಾ ಆನ್ಭೋಗಿ ಮ್ಹಣ್ಚೆಂ ವಜನ್ ಹಾಂವೆಂ ಕೆದಾಳಾಯಿ ಹೆರಾಂಚ್ಯಾ ತಕ್ಲೆರ್ ಥಾಪುಂಕ್ ಪ್ರಯತನ್ ಕೆಲ್ಲೆಂ ನಾ. ಸಾಹಿತ್ಯಾಂತ್ ಹಾಂವ್ ಆಜೂನ್ ಮ್ಹಾಕಾಚ್ ನವೊ ಆನಿ ಆನ್ಭೋಗ್ ನಾತ್‌ಲ್ಲೊಂ ಮ್ಹಣ್ ಸಮ್ಜತಾಂ.

2. ತುಮ್ಕಾಂ ಕಾಣ್ಯೊ ವಾ ಕಾದಂಬರಿ ಬರಂವ್ಕ್ ಕಸಲೆಂ ಪ್ರೇರಣ್ ಮೆಳ್ಳಾಂ?

ಜಾ: ಹಾಂವ್ ಲ್ಹಾನ್ ಆಸ್ತಾನಾ ಜಾಯ್ತ್ಯೊ ಕಾಣಿಯೊಂ ವಾಚ್ತಾಲೊಂ. ತವಳ್ ಕಾಣ್ಯೆಂಚೆಂ ಅಂತ್ಯ್ ವಾಚ್ಪ್ಯಾನ್ ಅಪೇಕ್ಷುಂಚಾ ಫರ್‍ಮಾಣೆ ಸರ್‍ವ್ ಬರ್‍ಯಾನ್ ಅಕೇರ್ ಜಾತಾಲೆಂ. ಸರ್‍ವ್ ಕಿತ್ಯಾಕ್ ಬರ್‍ಯಾನ್ ಅಕೇರ್ ಜಾತಾ ಮಣ್ಚಾ ಸವಾಲಾಕ್ ಜಾಪ್ ಸೊಧುನ್ ಅಂತ್ಯ್ ಬದ್ಲಿಜಾಯಿ ಆನಿ ವೆಗ್ಳ್ಯಾ ರೀತಿನ್ ಅಕೇರ್ ಜಾಯ್ಜಾಯಿ ಮಣ್ಚಾ ಹುಮೆದಿಕ್ ಸಾಂಪ್ಡೊನ್ ಹಾಂವೆ ಬರಂವ್ಚಿ ಸುರ್‍ವಾತ್ ಕೆಲ್ಲಿ.

3. ತುಮಿ ಕೊಂಕ್ಣೆಂತ್ ತಶೆಂಚ್ ಇಂಗ್ಲಿಶಾಂತ್ ಲಗ್ಬಗ್ ಅಡೇಯ್ಶಾಂ ವಯ್ರ್ ಕಾಣ್ಯೊ ಬರಯ್ಲ್ಯಾತ್. ತುಮ್ಚಿ ಭೋವ್ ಬರಿ ಮಟ್ವಿ ಕಾಣಿ ಖಂಚಿ?

ಜಾ: ಆಜೂನ್ ತೃಪ್ತಿಕರ್ ಕಾಣಿ ಹಾಂವೆಂ ಯೆದೊಳ್ ಲಿಖುಂಕ್ ನಾಂ. ಪಾಟ್ಲ್ಯಾ ದೋನ್-ತೀನ್ ವರ್‍ಸಾಂ ಥಾವ್ನ್ ಬರಯಿಲ್ಲ್ಯಾ ಕಾಣಿಯಾಂನಿ ಇಲ್ಲೆಶೆಂ ಸಮಧಾನ್ ದಿಲಾಂ. ಪುಣ್ ಸುಧಾರಾಣ್ ಜಾಯ್ತೆಂ ಬಾಕಿ ಆಸಾ.

4. ಪ್ರಸ್ತುತ್ ಕಾಣ್ಯೆಗಾರಾಂವಿಶಿಂ ತುಮ್ಚೆ ವಿಚಾರ್ ಕಸ್ಲೆ? ತುಮ್ಕಾಂ ಚಡ್ ಪಸಂದೆಚಿ ಕಾದಂಬರಿ ಖಂಯ್ಚಿ?

ಜಾ: ಮಂಗ್ಳುರ್‍ಚಾ ಕಾನಡಿ ಲಿಪಿಚಾ ಕೊಂಕ್ಣಿ ಸಾಹಿತ್ಯಾಂತ್ ಜಾಯ್ತೆಂ ನವೆ ಬರವ್ಪಿ ದಿಸೊನ್ ಯೆತಾತ್ ಆನಿ ಹಾಂಕಾಂ ಉತ್ತೀಮ್ ಭವಿಶ್ಯ್ ಆಸಾ ಮ್ಹಣ್ ಹಾಂವ್ ಸಮ್ಜಾತಾಂ. ಕಥಾ ವಸ್ತ್ ಆನಿ ಬರಂವ್ಚಾ ಶೈಲಿಂತ್, ತಾಂತ್ರಿಕ್ ಸೂತ್ರಾಂಚೆರ್ ಜಾಯ್ತೆಂ ನವೆಂಸಾಂವ್ ದಿಸೊನ್ ಯೆತಾ.

5. ತುಮಿ ಏಕ್ ನಟ್ - ಪುಣ್ ನಟನ್ ಕರ್ಚೆಂ ಕಿತ್ಯಾಕ್ ತುಮಿಂ ಸಾಂಡ್ಲೆಂ?

ಜಾ: ನಟನ್ ಮ್ಹಜ್ಯಾ ವಾಂಟ್ಯಾಕ್ ಹವ್ಯಾಸ್ ಜಾವ್ನಾಸ್‌ಲ್ಲೆಂ. ಖಾಸ್ಗಿ ಜಿಣಿ ಆನಿ ಕಾಮಾಚಾ ರಾಟಾವಾಳೆಂತ್ ಹವ್ಯಾಸ್ ಮುಕಾರ್‍ಸುಂಚೆಂ ಆಸಾಧ್ಯ್ ಜಾಲೆಂ.

6. ತುಮ್ಚಾ ಸಾಹಿತಿಕ್ ಸುರ್ವಾತೆಚ್ಯಾ ಕಾಳಾಕ್ ಆನಿ ಆಯ್ಚಾ ಕಾಳಾಕ್ ಕಸಲೊ ತಫಾವತ್ ತುಮ್ಕಾಂ ದಿಸೊನ್ ಯೆತಾ?

ಜಾ: ಆದಿಂ ಚಡಾವತ್ ಮಟ್ವ್ಯೊ ಕಥಾ ಮೊಗಾಚ್ಯಾ ಕಥಾವಸ್ತುಚೆರ್ (ರೊಮ್ಯಾಂಟಿಕ್) ಹೊಂದೊನ್ ರಾವ್ತಾಲ್ಯೊ. ಆತಾಂ ವೆವೆಗ್ಳ್ಯಾ ವಿಷಯಾಂಚೆರ್ ಪ್ರಯೋಗ್ ಚಲ್ತಾ. ಪುಣ್ ಕೊಂಕ್ಣಿ ಕಾದಂಬರಿಂಕ್ ಆತಾಂ ಆದ್ಲೆಪರಿಂ ಖಾಯ್ಸ್ ನಾ.

7. ಕೊಂಕ್ಣೆಂತ್ಲ್ಯಾ ಜಾಯ್ತ್ಯಾ ಮಾಲ್ಘಡ್ಯಾ ಸಾಹಿತಿಂಸವೆಂ ತುಮ್ಚೊ ಬರೊ ಸಂಪರ್ಕ್ ಆಸಾ, ತುಮ್ಚಾ ಪಸಂದೆಚೆ ಸಾಹಿತಿ ಕೊಣ್?

ಜಾ: ಸರ್‍ವ್ ಮ್ಹಜ್ಯಾ ವಳ್ಕಿಚೆ ಮಾಲ್ಗಡೆ ಬರವ್ಪಿ ಮ್ಹಾಕಾ ಮೊಗಾಚೆ, ಜಾಂವ್ ಖಡಾಪ್, ಎಡ್ವಿನ್, ಡೊಲ್ಫಿ, ಜೆಮ್ಮಾ, ಸ್ಟೇನಿ ಪಿಂಟೊ, ಆಸ್ಟಿನ್, ಸಿಜ್ಯೆಸ್, ಹೇಮಾಚಾರ್‍ಯಾ, ವಿಲ್ಫಿ ರೆಬಿಂಬಸ್ ಆನಿ ಹೆರಾಂನಿ ಮ್ಹಾಕಾ ಮೊಗಾನ್ ಸಾಂಬಾಳ್ಳಾಂ ಆನಿ ಉತ್ತೇಜನ್ ದಿಲಾಂ. ತಾಂಕಾಂ ಹಾಂವ್ ಋಣಿಂ ಜಾವ್ನಾಸಾಂ. ಪ್ರತ್ಯೇಕ್ ಜಾವ್ನ್ ಸರ್‍ವ್ ಸಂಪಾದಕಾಂಚೊ (ನವೆ ಆನಿ ಪರ್‍ನೆಂ) ಹಾಂವ್ ಸದಾಂ ಉಪ್ಕಾರ್ ಬಾವುಡ್ತಾಂ. ಸಂಪಾದಕಾಂನಿ ದಿಲ್ಲ್ಯಾ ಸಹಕಾರಾಂತ್ ಹಾಂವ್ ಇಲ್ಲೊಸ್ ಭಳ್ ಜಾಲಾಂ ಮ್ಹಣ್ ಸಮ್ಜಾತಾಂ.

8. ಕೊಂಕ್ಣೆಂತ್ಲೆ ಥೊಡೆ ಸಂಪಾದಕ್ ’ಸ್ಟೇನ್ ಅಗೇರಾ ಅಪ್ಲ್ಯಾ ಕಾಣ್ಯಾಂಕ್ ಉಟಾಉಟಿಂ ಪರ್ಗಟ್ ಕರುಂಕ್ ಪಾಟ್ ಲಾಗ್ತಾ’ ಮ್ಹಣ್ ದುರ್ಸತಾತ್ - ಹ್ಯೇ ವಿಶಿಂ ತುಮ್ಚಿ ಪ್ರತಿಕ್ರಿಯಾ ಕಸಲಿ?

ಜಾ: ನಿಜಾಯ್ಕಿ? ಕೋಣ್ ಸಂಪಾದಕ್ ಆಶೆಂ ಉಲಯ್ತಾತ್? ಸತ್ ಸಾಂಗ್ಚೆಂ ತರ್ ತಾಣಿಂ ಮ್ಹಜ್ಯೊ ಕಾಣಿಯೊಂ ಪರ್‍ಗಟ್ ಕರುಂಕ್ ಘಳಾಯಿ ಕೆಲ್ಲಿ ತರ್ ಉಪ್ಕಾರ್ ಜಾತೊ. ಮ್ಹಾಕಾ ಸರಾಗ್ ಬರಯ್ಜಾಯ್ ಮಣ್ಚಿ ಸ್ಥಿತಿ ಯೆತಾ ನಾತ್‌ಲ್ಲಿ. ಹಾಂವೆ ’ವೆಗಿಂ ಪ್ರಗಟ್ ಕರ್’ ಮ್ಹಣ್ ಸಾಂಗ್ಲಾಂ ಮ್ಹಣ್ ಖಂಚೊಯಿ ಸಂಪಾದಕ್ ಸಾಂಗ್ತಾ ತರ್ ತ್ಯಾ ಉತ್ರಾಂನಿ ಸತ್ ನಾ.

9. ಮಟ್ವ್ಯಾ ಕಾಣ್ಯಾಂ ಶಿವಾಯ್ ತುಮಿ ಕಾದಂಬರಿ, ಲೇಖನಾಂ, ಕವಿತಾ ಬರಯ್ತಾತ್ - ತುಮ್ಚೊ ಪಸಂದೆಚೊ ಪ್ರಕಾರ್ ಖಂಚೊ ಆನಿ ಕಿತ್ಯಾಕ್?

ಜಾ: ಹಾಂವ್ ಲೇಕಕ್ ತರ್ ಫರಾಮಶೆನ್. ಪುಣ್ ಕವಿ ಬಿಲ್ಕುಲ್ ನ್ಹಂಯ್. ಮ್ಹಜಾ ಕವಿತಾಂನಿ ’ಧಮ್ಮ್’ ನಾ!

10. ಹೆರ್ ಪ್ರಾಂತೀಯ್ ಭಾಸೆಂತ್ಲ್ಯಾ ಮಟ್ವ್ಯಾ ಕಾಣ್ಯಾಂ ಮುಖಾರ್ ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಮಟ್ಟ್ ಖಂಚ್ಯಾ ಪಾಂವ್ಡಾರ್ ಆಸಾ ಮ್ಹಣ್ತಾತ್ ತುಮಿ?

ಜಾ: ಆಮಿ ಆಮ್ಕಾಂಚ್ ಲ್ಹಾನ್ ಮ್ಹಣ್ ಸಮ್ಜೊಂಚಿ ಗರ್‍ಜ್ ನಾ. ಆಮ್ಚೊ ಕಾಣಿಯೊಂ ಕನ್ನಡ ಆನಿ ಇಂಗ್ಲೀಷ್ ಪತ್ರಾಂ ಧಾಡ್‌ಲ್ಲೆ ಸಂದರ್‍ಭಿಂ ತೆ ಪ್ರಗಟ್ ಜಾಲ್ಯಾತ್ ಮ್ಹಣ್ತಾನಾ ಆಮಿ ಖಂಚಾಂತ್ ಉಣೆಂ ಮಣ್ತಾಯಿ ತುಂ? ಸುಧಾರಾಣ್ ವಾಡಾವಾಳೆಚೊ ಏಕ್ ವಾಂಟೊ, ತೊ ಹರ್‍ಯೆಕಾ ಭಾಶೆಕ್ ಲಾಗು ಜಾತಾ.

11. ಕೊಂಕ್ಣಿ ಮಟ್ವ್ಯೊ ಕಾಣ್ಯಾಂಚೆಂ ಗುಣ್‌ಮಟ್ಟ್ ಚಡೋಂಕ್ ಕಸಲಿಂ ಮೆಟಾಂ ಗರ್ಜೆಚಿಂ ಮ್ಹಣ್ ತುಮ್ಕಾಂ ಭಗ್ತಾ?

ಜಾ: ಕಾಣಿಯೊಂ ಸುಧ್ರಾಜಾಯಿ ತರ್ ಶಿಕಾಪ್, ಆನ್ಬೋಗ್ ಆನಿ ಜಾಯ್ತೆಂ ವಾಚಾಪ್ ಮಹತ್ವಾಚೆಂ. ನವೆಂಸಾಂವ್ ಹಾಡಿಜಾಯಿ ತರ್ ಖಳಾನಾತ್‌ಲ್ಲಿ ವಾಂವ್ಟ್, ಅಧ್ಯಯನ್ ಆನಿ ಪ್ರಯೋಗ್ ಅತೀ ಗರ್‍ಜೆಚೆಂ. ತಿಕ್ಶೊ ವಿಮರ್‍ಸೊ ವಾಚುನ್ ಬೆಜಾರ್ ಪಾವಾನಾಸ್ತಾನಾ ಸುಧಾರಣ್ ಹಾಡುಂಕ್ ಪೆಚಾಡ್ಚಾ ಲೇಕಕಾಂಚಿ ಆಮ್ಕಾಂ ಗರ್‍ಜ್ ಆಸಾ.

12. ತುಮ್ಚೊ ಪಸಂದೆಚೊ ಬರಯ್ಣಾರ್ ಕೊಣ್? ಕೊಣಾಚೆಂ ಸಾಹಿತ್ಯ್ ತುಮ್ಕಾಂ ಚಡ್ ರುಚ್ತಾ?

ಜಾ: ಮಟ್ವ್ಯಾ ಕಾಣ್ಯೆಂನಿ ಮ್ಹಾಕಾ ’ಒ ಹೆನ್ರಿಚೊ’ ಕಾಣಿಯೊಂ ಭೋವ್ ಮೊಗಾಚೊ ಆನಿ ಕಾದಂಬರೆಂನಿ ಜೋನ್ ಗ್ರಶೆಮಾಚೆ ಬೂಕ್ ಅತೀ ಪಸಂದೆಚೆ.

13. ಅಂತರ್‌ಜಾಳಿಂಚೆರ್ ವೆವೆಗ್ಳ್ಯಾ ಪ್ರಕಾರಾಚೊ ಕೊಂಕ್ಣಿ ವಾವ್ರ್ ಚಲೊನ್ ಆಸ್ಚೆವಿಶಿಂ ತುಮ್ಚೆ ವಿಚಾರ್ ಕಸ್ಲೆ? ಅಂತರ್‌ಜಾಳಿಂನಿ ಕೊಂಕ್ಣಿ ವ್ಹಾಡಂವ್ಚೆಂ ಪ್ರೇತನ್ ಸಾರ್ಕೆಂ ಮ್ಹಣ್ ಭಗ್ತಾಗಿ ತುಮ್ಕಾಂ?

ಜಾ: ಅಂತರ್‌ಜಾಳಾಂಧ್ವಾರಿಂ ಮಂಗ್ಳುರ್‌ಗಾರಾಂಚೆಂ ಕೊಂಕ್ಣಿ ಸಾಹಿತ್ಯ್ ಚಡ್ ಲೊಕಾಕ್ ಸಂಸಾರಾಚಾ ಕೊನ್ಶಾಂ ಕೊನ್ಶಾಂಕ್ ಪಾವೊನ್ ಆಸಾ. ಹೊ ಸಂತೊಸಾಚೊ ವಿಶಯ್. ಹ್ಯಾ ಧ್ವಾರಿಂ ಸಾಹಿತ್ಯ್ ಮಜ್ಭೂತ್ ಜಾತೆಲೆಂ ಶಿವಾಯಿ ಅಸ್ಕತ್ ಜಾಂವ್ಚೆಂ ನಾ.

14. ತುಮ್ಚೆ ಪ್ರಕಾರ್ ಕೊಂಕ್ಣೆಚೊ ಫುಡಾರ್ ಕಸ್ಲೊ?

ಜಾ: ಕೊಂಕ್ಣಿ ಪತ್ರಾಂಚಿ ಸ್ಥಿತಿ ಉತ್ತೇಜಿತ್ ನಾ. ಆಮ್ಚೆಂ ಸಾಹಿತ್ಯ್ ಬಾಳ್ವಾಜಯ್ ತರ್ ಆಮ್ಚಿಂ ಪತ್ರಾಂ ಭಳ್ ಜಾಯ್ಜಾಯ್ ಆನಿ ತಾಂಚೊ ಪ್ರಸಾರ್ ವಾಡಾಜಾಯ್. ಪ್ರಕಾಶಾನಾಂ ಥಾವ್ನ್ ಭಾಯ್ರ್ ಪಡ್ಚೆ ಬೂಕ್ ವಿಕಿಜಾಯಿ ತರ್ ಕಿತ್ಲ್ಯಾ ಕಷ್ಟಾಂಚೆಂ ಮ್ಹಣೊನ್ ಪ್ರಕಶಾಕಾಂಕ್ ಮಾತ್ರ್ ಕಳಿತ್. ಅಸಲ್ಯಾ ಪರಿಸ್ಥಿತೆಂತ್ ’ಸರ್‍ವ್ ಬರೆಂ’ ಮಣ್ ಕಶೆಂ ಸಾಂಗ್ಚೆಂ? ಆಜ್ ಆಶೆಂ ತರ್ ಫಾಲ್ಯಾಂಚೊ ಕಿತೆಂ ಭರ್‍ವಸೊ?

15. ಲಿಪಿಚೆರ್ ತುಮ್ಚೆ ವಿಚಾರ್ ಕಸಲೆ? ಲಿಪಿ ವಾದ್ ಕೊಂಕ್ಣೆಕ್ ನಿರ್ಮಾಮ್ ಕರಿತ್ ಮ್ಹಣ್ ತುಮ್ಕಾಂ ಭಗ್ತಾ?

ಜಾ: ಲಿಪಿ ಸಾಹಿತ್ಯಾಚೊ ಖಾಂಬೊ ನ್ಹಂಯ್. ಸಾಹಿತ್ಯಾಚೊ ಖಾಂಬೊ ವಾಚ್ಪಿ ಜಾವ್ನಾಸಾತ್. ವಾಚ್ಪಿ ಖಂಚಿ ಲಿಪಿ ಪಸಂದ್ ಕರ್‍ತಾತ್, ತಿ ಲಿಪಿ ಆಮಿ ಮಧ್ಯಮ್ ಜಾವ್ನ್ ವಾಪರುಂಕ್ ಜಾಯ್.

16. ಕೊಂಕ್ಣೆಂತ್ ತುಮ್ಚಿ ಮಹತ್ವಾಕಾಂಕ್ಶಾ ಕಸಲಿ?

ಜಾ: ಮ್ಹಾಕಾ ಕೊಂಕ್ಣೆಂತ್ ಖಾಸ್ಗಿ ಆಕಾಂಕ್ಷಾ ನಾಂತ್. ಮ್ಹಜಿ ಆಕಾಂಕ್ಷಾ ತರ್ ಹಾಂವ್ ಕಾನಡಿ ಕೊಂಕ್ಣಿ ಲಿಪಿಂತ್ ಲಾಖಾಂನಿ ವಾಚ್ಪಿ ಜಲ್ಮೊಂಕ್ ಆಶೆತಾಂ.

17. ದಾಯ್ಜ್ ಡಾಟ್ ಕೊಮ್ ಚೆರ್ ತಶೆಂಚ್ ದಾಯ್ಜಾಚ್ಯಾ ವೆವೆಗ್ಳ್ಯಾ ಮಿಸಾಂವಾಚೆರ್ ತುಮ್ಚಿಂ ಭಗ್ಣಾಂ ಕಸಲಿಂ?

ಜಾ: ದಾಯ್ಜ್ ಡೊಟ್ ಕೊಮಾನ್ ಏಕ್ ಉತ್ತೀಮ್ ಮಿಸಾಂವ್ ಹಾತಿಂ ಧರ್‍ಲಾಂ ಆನಿ ಕೊಂಕ್ಣೆಚಿಂ ಪಾಳಾಂ ಭಳ್ ಕರ್‍ಚೆಂ ಪ್ರಯತನ್ ಕೆಲಾಂ. ತುಮ್ಕಾಂ ಹಾಂವ್ ಬರೆಂ ಮಾಗ್ತಾಂ ಆನಿ ಮ್ಹಜೊ ಸಹಕಾರ್ ಸದಾಂಚ್ ದಿತಾಂ.

18. ದಾಯ್ಜ್ ಸಾಹಿತ್ಯಾಚೆರ್ ವಾ ಅಂಕಣಾಂಚೆರ್ ತುಮ್ಕಾಂ ಕಿತೆಂಯ್ ವಿಶೇಸ್ ರಿತಿನ್ ಉಲ್ಲೇಕ್ ಕರುಂಕ್ ಆಸಾ?

ಜಾ: ತುಮ್ಚಿಂ ಸರ್‍ವ್ ಅಂಕಣಾಂ ಮಾಕಾ ಪಸಂದೆಚಿಂ. ತುಜೆಂ ಕಾಮ್ ಪಳೆವ್ನ್ ಹಾಂವ್ ತುಜೊ ಅಭಿಮಾನಿ ಜಾಲಾಂ.

19. ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸಲೆ?

ಜಾ: ತುಮಿ ದಿಂವ್ಚೊ ಸಹಕಾರ್ ಸದಾಂಚ್ ಚಾಲು ದವರಾ ಆನಿ ಕೊಂಕ್ಣಿ ಸಾಹಿತ್ಯ್ ಭಳ್ ಕರುಂಕ್ ಕುಮಕ್ ಕರಾ.

ಲ್ಯಾನ್ಸಿ ಪಿಂಟೊ ನಾಯಕ್

ಡಾ|ಎಡ್ವರ್ಡ್ ನಜ್ರೆತ್

ವಿಕ್ಟರ್ ರೊಡ್ರಿಗಸ್

ಕನ್ಸೆಪ್ಟಾ ಆಳ್ವ

ವಿಲ್ಫಿ ರೆಬಿಂಬಸ್

ಗ್ಲೇಡಿಸ್ ರೇಗೊ

ಮಾ|ಬಾ|ಪ್ರಾನ್ಸಿಸ್ ಅಲಂಗಾರ್

ಸಿರಿವಂತ್