ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪುಣ್ ಆಜ್ಕಾಲ್ ಥೊಡೆ ಮಾಗ್ಣೆಂ ಕೆಲ್ಲ್ಯಾ ನಂತರ್ ತಾಂಕಾಂ ಮೆಸೇಜ್ ಯೆತಾತ್ ಖಂಯ್. ತೆಂ ಕಶೆಂ ಸೊಮಿಯಾಂ? ತುಕಾ ಬೊಬೊ ಘಾಲ್ನ್ ತುಕಾ ಹರ್ಸಿಲ್ಯಾರ್ ತಾಂಕಾಂ ಮೆಸೇಜ್ ಯಾ ಖಬರ್ ಧಾಡ್ತಾಯ್ಗಿ? ಥೊಡೆ ಮ್ಹಣ್ತಾತ್ ತಾಂಕಾಂ ತುಂ ದಿಷ್ಟಿಕ್ ಪಡ್ತಾತ್ ಖಂಯ್. ತುಂ ಸಗ್ಳ್ಯಾ ಸಂಸಾರಾಂತ್ ಆಸ್ಚೊ ದೇವ್, ಬೊಬೊ ಘಾಲ್ಚಾ, ಹಾತಾ ವಯ್ರ್ ಕರ್ಚ್ಯಾ ಕಿಂಕ್ರಾಟ್ಯೊ ಮಾರ್ಚ್ಯಾ ಲೊಕಾಂಕ್ ಮಾತ್ರ್ ಪ್ರಸನ್ನ್ ಜಾವ್ನ್ ದಿಷ್ಟಿಕ್ ಪಡ್ತಾಯ್?
ಸತಾಂತ್ಲಿಂ ವಿಚಿತ್ರಾಂ - 12. ಆಚರ್ಯೆಂ
ಜೆಮ್ಮಾ ಪಡೀಲ್
ತುವೆಂ ದೆವಾ ಖಾನಾ
ಶ್ಹೆರಾಂತ್ ಉದಾಕ್ ಆಸ್ಲೆಲೆಂ ಅಪುಟ್ಟ್ ವಾಯ್ನ್ ಕರ್ನ್ ತುಜ್ಯಾ ಜಿವಿತಾಂತ್
ಪಯ್ಲೆಂ ಅಚರ್ಯೆಂ ಕೆಲೆಂ ಮ್ಹಣ್ ಆಮಿಂ ಸಮ್ಜತಾಂವ್. ಉಪ್ರಾಂತ್
ಮೆಲ್ಲ್ಯಾ ಲಾಜರಸಾಕ್ ಜಿವಂತ್ ಕೆಲೊಯ್. ಪಿಡೆಸ್ತಾಂಕ್ ಗೂಣ್ ಕೆಲೆಂಯ್. ಕುಡ್ಡ್ಯಾಕ್
ದಿಷ್ಟ್ ದಿಲಿಯ್. ಕೊಡ್ಕಾರಾಂಕ್ ಪರಿಪೂರ್ಣ್ ನಿತಳ್ ಕೆಲೆಂಯ್.
ಆಚರ್ಯೆಂ ಕಿತೆಂ ತೆಂ ಕಳಿತ್ ಕರುಂಕ್ ನಾಂಯ್ ತರ್ಯೀ,
ಹ್ಯಾ ಸಂಸಾರಾಂತ್ ಎಕಾ ಮನ್ಶ್ಯಾಕ್ ದೈವಿಕ್ ಸಕ್ತೆನ್
ಮಾತ್ರ್ ಕರುಂಕ್ ಸಕ್ಚಾ ಅಸಾಧಾರಣ್ ಕಾರ್ಯಾಂಕ್ ಹಾಂವೆಂ
’ಅಚರ್ಯೆಂ’ ಮ್ಹಳ್ಳೆಂ ನಾಂವ್ ದಿಂವ್?
ಆಜ್ಕಾಲ್ ಹಾಂಗಾ ಸರ್ವ್ ಆಜ್ಯಾಪಾಂ ವಿಶ್ಯಾಂತ್ ಉಲಯ್ತಾತ್!
ಹಾತಾಂತ್ ಉದ್ಕಾಕ್ ಉಜೊ ಕರ್ನ್, ವಾರ್ಯಾರ್ ಹಾತ್ ಘುಂವ್ಡಾವ್ನ್ ಗೊಬೊರ್ ಧಾಖವ್ನ್ ಅಪುಣ್ ಅಚರ್ಯೆಂ ಕೆಲೆಂ ಮ್ಹಳ್ಳೆಂ ಆವಾಜ್ ಕರ್ಚೆಂ ಪಳೆವ್ನ್
ಹಾಂವೆಂ ಹೆಂ ಸವಾಲ್ ತುಕಾ ಕರ್ಚೆಂ.
ಪಯ್ಸೆ ಹೊಗ್ಡಾಯಿಲ್ಲೆ ಮೆಳ್ಳ್ಯಾರ್ ಪಿಡೇಸ್ತ್ ಗೂಣ್ ಜಾಲ್ಯಾರ್, ಥಂಡ್ ಆಸ್ಲ್ಲೊ
ಮನಿಸ್ ಹಾಸೊನ್ ಖೆಳೊಂಕ್ ಸುರು ಕೆಲ್ಯಾರ್ ಉಟ್ಲ್ಲ್ಯಾ
ಬಸ್ಲ್ಲ್ಯಾಕ್ "ಅಚರ್ಯೆಂ ಘಡ್ಲೆಂ" ಮ್ಹಳ್ಳೆಂ ನಾಂವಾಂ ದಿತಾತ್.
ಆಚರ್ಯೆಂ ಮ್ಹಳ್ಯಾರ್ ತಿತ್ಲೆಂಯ್ ಚಿಲ್ಲರ್ಗಿ ಸೊಮಿಯಾ?
ನಾಂವ್ ಆಚರ್ಯೆಂ ತಿತ್ಲೆಂ ಸವಾಯೆಚೆಂ ಜಾಲ್ಯಾಂತ್ಗಿ? ಲೋಕ್
ಪಿಸೊ ಜಾಲಾ. ನಾಂವೇ ತಾಂಕಾಂ ಪಿಸೊ ಕೆಲಾ. ಹಾವೆಂ ಆಚರ್ಯೆಂ ಮ್ಹಳ್ಳೆಂ ಉತಾರ್ ಅಯ್ಕೊಂಚೆಂ ಫಕತ್ತ್ ಕ್ರಿಸ್ತಾಂವಾಂ
ಮಧೆಂ ಮಾತ್ರ್. ಉರ್ಲ್ಲ್ಯಾ ಜಾತಿಮಧೆಂ ಆಚರ್ಯೆಂ ನಾಂವ್ ಕಾಡ್ಲ್ಯಾರ್ ದೊಳೆ ಅಂಬಾಡೆಬರಿ ಕರ್ನ್ ಅಜ್ಯಾಪ್ ಜಾವ್ನ್ ಆಮ್ಕಾಂ ಪಳೆತಾತ್.
ಹೊ ಏಕ್ ಸಂಸಾರ್ ಏಕ್ ದೇವ್ ಹಜಾರ್ ಹೆಂ ಕಸಲೆಂ ನವಾಲ್
ಸೊಮಿಯಾಂ? ತುವೆಂ ಆಚರ್ಯೆಂ ಕರ್ಚೆಂ ಹಕ್ಕ್ ಫಕತ್ತ್ ಕ್ರಿಸ್ತಾಂವಾಂಕ್
ಮಾತ್ರ್ ದಿಲಾಂಯ್ಗಿ?
ಆಜ್ಕಾಲ್ ಆಮ್ಚಾ ಲೊಕಾಮಧೆಂ ರೆತಿರೊ ಚಡ್ಲ್ಯಾತ್. ಎಕಾ ತೆಂಪಾರ್ ರೆತಿರ್ ಮ್ಹಳ್ಯಾರ್ ದೆವಾಕಡೆ
ಸಂವಾದ್ ಕರ್ನ್, ಏಕ್ ನವೊ ಅವಸ್ವರ್ ಸುರು ಕರ್ಚೊ. ಆಜ್ಕಾಲ್ ರೆತಿರೊ ಮ್ಹಳ್ಯಾರ್ ಭಾರಿ
ಸವಯೆಚೆಂ ಉತಾರ್ ಜಾಲಾಂ. ರೆತಿರೆಚೆರ್ ಕಾಂಯ್ "ಹೀಲಿಂಗ್" ಮ್ಹಳ್ಳೆಂ ಉತಾರ್ ಆಯ್ಕಲ್ಯಾರ್ ಯಾ ಕಳಯ್ಲ್ಯಾರ್ ಥಂಯ್
ಲೊಕಾಚಿ ಖೆಟ್. ತ್ಯಾ ಲೊಕಾಕ್ ತುಜ್ಯೆಕಡೆ ಸಂವಾದ್ ಕರ್ನ್
ನವೊ ಅವಸ್ವರ್ ಉಗ್ತೆಂ ಕರ್ಚೊ ಉದ್ದೇಶ್ ಭಾರಿ ಉಣೊ. ಫಕತ್ತ್
ಜಾಯ್ ತಾಂಕಾಂ ಬರೆಂಪಣ್ - ’ಹೀಲಿಂಗ್
ಮುಖಾಂತ್ರ್’.
ಹೀಲಿಂಗ್ ಕೆಲ್ಯಾರ್ ಥಂಯ್ ಆಚರ್ಯೆಂ ಘಡ್ತಾತ್ ಖಂಯ್ ಧಾ ಜಣಾಂಕ್ ಭಲಾಯ್ಕೆಂತ್ ಬರೆಂಪಣ್,
ಪಾಂಚ್ ಜಣಾಂಕ್ ಕಾನ್ ಆಯ್ಕತಾತ್, ದೊಗಾಂಕ್ ಕೆನ್ಸಾರಾ ಥಾವ್ನ್
ಮುಕ್ತಿ..
ತುಕಾ ಅಜ್ಯಾಪ್ ಕರುಂಕ್ ತುಜ್ಯಾ ಆವಯ್ನ್ ತುಜೆಲಾಗಿಂ
ವಿನತಿ ಕೆಲ್ಲಿ ಮ್ಹಣ್ ರೆತಿರ್ ಚಲಂವ್ಚ್ಯಾಂಕ್ ತುವೆಂ ಜೆರಾಲ್ ಥರಾನ್ ಉಲಂವ್ಚೆಂ ತರ್
’Blank Authority’
ದಿಲ್ಯಾಯ್ ಸೊಮಿಯಾಂ? ನಾಂತರ್ ರೆತಿರೆಕ್ ಗೆಲ್ಲೆ ಮನಿಸ್ ಆಚರ್ಯೆಂ ಜಾಲೆಂ
ಮ್ಹಣ್ತಾತ್ ಶಿವಾಯ್ "ಫಲಾಣ್ಯಾ" ಮನ್ಶ್ಯಾಕ್, ಫಲಾಣ್ಯಾ ಗಾಂವ್ಚ್ಯಾ ನಿವಾಸಿಕ್ ಬರೆಂಪಣ್ ಜಾಲೆಂ ಯಾ
ಸಂಪೂರ್ಣ್ ಗೂಣ್ ಜಾಲ್ಲಿ ಗಜಾಲ್ ಉಗ್ತ್ಯಾನ್ ಕಿತ್ಯಾಕ್ ಸಾಂಗಾನಾಂತ್? ತುಂವೆಂ ತಾಂಕಾಂ ತಸಲೆಂ ಕಾನೂನ್
ದಿಲಾಂಯ್? ನಾಂವ್ ಗುಪಿತ್ ದವರಾ! ಆಮಿಂ ಹ್ಯಾ ಆಧುನಿಕ್
ಸಂಸಾರಾಂತ್ ಎಸ್ಸೆಮೆಸ್, ಟೆಲೆಕ್ಸ್, ಫ್ಯಾಕ್ಸ್ ಆನಿ ಟೆಲಿಗ್ರಾಮ್ ತಸಲ್ಯಾ
ಸಾಧನಾಂ ವಾ ಎಲೊಕ್ಟ್ರೋನಿಕ್ ಮಾಧ್ಯಮಾಂ ವರ್ವಿಂ ಖಬಾರ್
ಪಾವಿತ್ ಕರ್ತಾಂವ್. ಪುಣ್ ಆಜ್ಕಾಲ್ ಥೊಡೆ
ಮಾಗ್ಣೆಂ ಕೆಲ್ಲ್ಯಾ ನಂತರ್ ತಾಂಕಾಂ ಮೆಸೇಜ್ ಯೆತಾತ್ ಖಂಯ್. ತೆಂ ಕಶೆಂ
ಸೊಮಿಯಾಂ? ತುಕಾ ಬೊಬೊ ಘಾಲ್ನ್ ತುಕಾ ಹರ್ಸಿಲ್ಯಾರ್ ತಾಂಕಾಂ
ಮೆಸೇಜ್ ಯಾ ಖಬರ್ ಧಾಡ್ತಾಯ್ಗಿ? ಥೊಡೆ ಮ್ಹಣ್ತಾತ್ ತಾಂಕಾಂ ತುಂ
ದಿಷ್ಟಿಕ್ ಪಡ್ತಾತ್ ಖಂಯ್. ತುಂ ಸಗ್ಳ್ಯಾ ಸಂಸಾರಾಂತ್ ಆಸ್ಚೊ ದೇವ್,
ಬೊಬೊ ಘಾಲ್ಚಾ, ಹಾತಾ ವಯ್ರ್ ಕರ್ಚ್ಯಾ ಕಿಂಕ್ರಾಟ್ಯೊ ಮಾರ್ಚ್ಯಾ
ಲೊಕಾಂಕ್ ಮಾತ್ರ್ ಪ್ರಸನ್ನ್ ಜಾವ್ನ್ ದಿಷ್ಟಿಕ್ ಪಡ್ತಾಯ್?
ಹೆಂ ಖಂಡಿತ್ ಜಾವ್ನ್ ಆಚರ್ಯೆಂ ನ್ಹಂಯ್? ದೆವಾಕ್ ಪಳಂವ್ಚೆಂ ಭಾಗ್ ಕಿತ್ಲ್ಯಾ
ಸಾಂತಾಂಕ್ ಫಾವೊ ಜಾಲಾಂ? ತುಜಿ ಇಮಾಜಿ ಪಳೆವ್ನ್ ತುಜಿಂ ಚಿತ್ರಾಂ ಪಳೆವ್ನ್ ತುಜೆಂ ಮುಕಾಮಳ್ ಚಿತ್ರಿತ್ ಕರ್ಚ್ಯಾ ಆಮ್ಕಾಂ ತುಂ
ದಿಷ್ಟಿಕ್ ಪಡ್ಶಿ ತರ್ ಭಾರಿ ಬರೆಂ. ಏಕ್ ಸವಾಲ್ - ಹಾಂವ್ ಮಿಸಾಕ್
ವೆತಾಂ. ಕುಮ್ಸಾರ್ ಕುಮ್ಗಾರ್ ಘೆತಾಂ. ತುವೆಂ ದಿಲ್ಲೆಂ
ಸರ್ವ್ ಉಪಾದೆಸ್ ಪಾಳ್ತಾಂ ಜಾಲ್ಯಾರೀ ತುಜಿ ಝಳಕ್ ಹಾಂವೆಂ ಪಳೆಂವ್ಕ್
ನಾ. ತುಜ್ಯೆ ಥಾವ್ನ್ ಹಾಂವೆಂ ಯೆದೊಳ್ ಪರ್ಯಾಂತ್ ಮೆಸೇಜ್ ಯಾ ಖಬರ್ ಯೇಂವ್ಕ್
ನಾ ತೆಂ ಪಳೆವ್ನ್ ತುಕಾ ಸವಾಲ್ ಕರ್ಚೆಂ. ಹೆಂ ತುಂವೆಂ ಕರ್ಚೆಂ
ಸಮಾಗಿ? ತುಂ ನಿತಿಚೊ ರಾಯ್. ಸರ್ವಾಂಕ್ ಎಕಾ ನದ್ರೆನ್ ಪಳೆಂವ್ಚಾ ತುಂವೆಂ
"ಥೊಡ್ಯಾಂಕ್" ಮಾತ್ರ್ ಹೆಂ ತುಜೆಂ ’ದೆಣೆಂ’ ದಿಂವ್ಚೆಂ ಪಳೆತಾನಾ ತುಂ ತಫಾವತ್ ತರ್ತಾಯ್
ಮ್ಹಣ್ ಜಾಲೆಂ!.
ಹಾಂವೆಂ ಬರಯ್ಲೆಲೆಂ ಸಮಾ ನ್ಹಂಯ್ ತರ್, ದಯಾಕರ್ನ್ ತುಂ
ದಿಷ್ಟಿಕ್ ಪಡ್ ಯಾ ಏಕ್ ಖಬಾರ್ ಧಾಡ್ - ಹರ್ಯೆಕ್ಲ್ಯಾಕ್ "ತಾಣಿಂ" ಉಲಂವ್ಚೆಂ ಸತ್ ನ್ಹಂಯ್ ಬಗಾರ್ ಎಕಾ ಸ್ಥಿತೆ
ವರ್ವಿಂ ಮ್ಹಳ್ಳೆಂ ಕಳಿತ್ ಜಾಲ್ಯಾರ್ ಬರೆಂ. ಹಾಂವ್ ಘುಸ್ಪಡ್ಲಾಂ
ಸೊಮಿಯಾಂ. ಹಾತ್ ಪಾಂಯ್ ಹಾಲವ್ನ್, ಬೊಬೊ ಘಾಲ್ನ್,
ಹರ್ಧೆಂ ಬಡವ್ನ್ ತುಕಾ ನಿದೆಂತ್ಲೆಂ ಉಟಂವ್ಕ್ ಹಾಂವ್ ತಯಾರ್
ನಾಂ. ಹಿಂ ಅಚರ್ಯಿಂ, ದಿಷ್ಟಿ ಯಾ ಖಬಾರ್ ಫಕತ್ತ್ "ವಿಂಚ್ಣಾರ್"
ಲೊಕಾಕ್ ದಿಂವ್ಚೆಂ ಬಂದ್ ಕರುಂಕ್ ತುಂವೆಂ ಕಿತೆಂ ಕರುಂಕ್ ಜಾಯ್ ತೆಂ ಕಳಿತ್ ಕರುಂಕ್
ಹಾಂವ್ ಫಾವೊ ನ್ಹಂಯ್!.
ಮ್ಹಾಕಾ ಬರವ್ನ್ ಪುರೊ ಜಾಲೆಂ. ತುಕಾ ಆಯ್ಕೊನ್ ಪುರೊ ಜಾಲೆಂಗಿ? ಕಿತೆಂಯ್ ಜಾಂವ್ ತುಂ ಏಕ್
ವಾಟ್ ಸೊಧ್ ಆನಿ ಕಳಿತ್ ಕರ್. ನಾಂತರ್ ಹಾಂಗಾ ತುವೆಂ ರಚ್ಲೆಲ್ಯಾ
ಸಂಸಾರಾಂತ್ ಆಚರ್ಯೆಂ ಸದಾಂಚೆಂ ಜಾವ್ನಾಸ್ತೆಲೆಂ. ಸಕ್ಕಡ್ಯೀ
ಸಾಂತ್ ಆನಿ ಪ್ರವಾದಿ. ಮುಕಾರ್ ಗೊಂದೊಳ್ ಜಾಂವ್ಚೊ ನಾಕಾ
ತುಂ ತುಕಾ
ಮಾಗಿರ್ ಬರೆಂ ದಿಸ್ಲೆಲೆಂ ಕರ್.
ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6, 7, 8, 9, 10, 11
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
