Catherine Rodrigues-acheo Kotha-zomo Ugtaunn, Konkonni Kovigoxtti ani...

Catherine Rodrigues-acheo Kotha-zomo Ugtaunn, Konkonni Kovigoxtti ani Sadhokank Man

Katapady (6 Soptembor 2026) Ashawadi Prakashan-achea ’K.B.S’ (lipibhaili Konkonni) yeuzonnekhal choutem pustok ’Catherine Rodrigues-acheo Kotha’ ugtaunn karyem, aitara (Soptembor 6) sokallim sadde tha vorancher, Katapady-chea John's Ark ghorangnnant chol'lem. Namnecho tullu sahiti Mud'du Muddubell'llen, Ashawadi Prakashan-an Catherine Rodrigues-achea 50 mottvea kanniank Nagori lipint lipyontoronn kel'lem pustok lokarponn korun ’Catherine Rodrigues-’ tullu sahiteant ek vhodd namv, Kon'nodd, Tullu sahity, Nattok xetant soit zaitem yog‍dan dilam dekun tichem pustok lokarponn korunk mhaka khoroch obhiman bhogta mhonnalo.

Kareachea survater Loretta Veena Monteiro-n sorvank yeukar magon Mud'du Muddubell'lle, Andrew L. Dcunha, Valley Quadros, Catherine Rodrigues- ani Agnel Rodrigues hankam vedik yeukar ditoch Cynthia, Frida ani pongddacheanim prarthon git gailem. Bai Sweeny Rodrigues-an yeukar uloup kortoch K.B.S. Solha somitichea sandean Andrew L Dcunha-n K.B.S. (Konkani Beyond Script) vixeant uloun "Bhas zaunasa, obhivyoktechem madhyom'. Mai‌bhas omchea purvozam thaun mell‍l'li osmitai. Moukik (tondda utranim) ayil'li. Konknnent kitlexea sahitimni seva divn teag orpila. Oz kal omche boroupi ani konkonni seuk bhaxecheaki lipink chodd mohotv dil'lebori dista. Vevegllea lipimni boromvchea boroupeank ek sankovo roschem kam' kaim tempathaun Ashawadi Prakashan- korun osa. Hem karyem toxench hea kareant ugtaunn zaunko aschem pustok K.B.S. Yeuzonnechem choutem pustok" mhonnalo.

Ashawadi Prakashan-acho Valley Quadros prastovik uloupant xikxokachea disa somest xikxokank ul'las pattoun mhonnalo "Hamv konkonni sahity vachunk xik‌l'lom Panglla-nt, sahity matr nhoi, herank man divn svota man zoddchi sobhit rivaz soit Panglla firgoz‌garam thaun xikon ailam; mhojea yuvo prayer H.R. Alva, Steeven Alva tosoleam mukeleam thaun xikonk preton kelam matr nhoi, tanchea probhavant havo thoddo temp Shankerpura CYM-cho sando zaun aslom. Ashawadi Prakashan-akhal hamvem xembhoracheaki chodd pustokam prokott keleari tantu novod tthokke kon'noddo lipiechim. Dha tthokke nagori ani romi lipiechim. Punn hea novod tthokke pustokamvixim don borim utram ulounko futtvonaschinch dha tthokke Nagori ani Romi lipint pustokam porgott kel'leak utranim fatraitat mholl'llem haseaspod songot. Catherine Bai ani Kevin Dmello tosolea boroupeancha kanniamni graminn prodexachim chitronnam melltat."

6sep26-fotos Pustok ugtaupi Mud'du Muddubell'lle "Apli mai‍bhas Tullu tor‌yi Konkonnint‌ch uloilo. Ani apunn Akaxovannint vaur kortastana tachea sangoddeancho ul'lek korn keathorin bayechea sahity vaurak obhar mandlo.

Uprant namnecho vimorxok Nanu Morol Tott'ttam' hannem sonman karyem choloun velem; Catherine Rodrigues-achea sahityik denngek Ashawadi Prakashan-a torfen Mud'du Muddubell'llen yadistika ani kannik divun man kelo. Mud'du Mudd‌bell'llek Agnel Rodrigosan kannik dili. Joseph Quadros (Jo-Qua) chea konkonni vaurak Ashawadi Prakashan-achea torfen Steevan J Alva Panglla hannem yadistika ani kannik divun man kelo. Steevan J Alva-k Agnel rodrigosan kannik dili. Uprant Wilfred R. Panglla-chea konkonni vaurak Ashawadi Prakashan-a torfen Andrew L. Dcunha-n yadistika ani kannik divun man dilo. Andrew Dcunha-k Agnel Rodrigues-an kannik dili.

Tye uprant Raizal Furtado-n Konkonni kovigoxtti ani konkonni Kovita Quiz choloun vhorunk Bai Salomi Mogornad hika vedik apoun tichi vollok korun ditoch Salomichea odhyokx‌ponnar opurbhayechi kovigoxtti ani konkonni kovita quiz choloun veli. Do.Vijay Kumar Pai Kochin, Do. Flavia Castelino, Eliza Fernandes, Meena Monteiro, Violet Flavy Dsouza, Catherine Rodrigues-, Mud'du Muddubell'lle, Wilfred R. Panglla, Melvin J vas Kelarai, Valley Quadros ani Andrew L Dcunha hannim vinchnnar kovita sador kelim. Konkonni quiz-ant somjelea lokamni vantteli zaun inamam zoddlim.

Katapady firgojiche vigar Ba. Rajesh Prasann, Holy Cross Counsellng Director Ba. Preetham Jay Menezes, goullik porixod upadhyokx Manest Hecor Fernandes, karyodorxi Treza Lobo ani her sande hazor as‌l'le.

Catherine bayen dhinvas pattoun kumok ani pattimbo dileleank fulam zhoddam diun obhar mandlo. Dedd vorank ruchik jeunnasovem karyem somplem. Katapady toxench lagxilea porisorantlea deddxem lokamni hea kareant bhag ghetlo.

Kovita Sadoroponnam
Melvin J Vas