ಕವಿತಾकविताPoem

ಉಜ್ವಾಡಾಚ್ಯೆ ವೆಂಗೆಂತ್... [ಆಂಡ್ರು ಎಲ್. ಡಿ’ಕುನ್ಹಾ]

[ಕವಿತಾ] ಉಜ್ವಾಡಾಚ್ಯೆ ವೆಂಗೆಂತ್... [ಆಂಡ್ರು ಎಲ್. ಡಿ’ಕುನ್ಹಾ]

ಚೊರಾಕ್ ಚಂದ್ರ್ ಸೊಸಾನಾ, ಜಶೆಂ ಕಾಳೊಕಾಚ್ಯಾ ರಾಜಾಂತ್ ಉಜ್ವಾಡ್ ಕಯ್ದಿ ಮ್ಹಳ್ಳೆಪರಿಂ. ಸಂಸ್ರಾಂತ್ ಕಾಳೊಕಾಂತ್ ಮಿರಂವ್ಚಿ ಸವಯ್ ಕರುನ್ ಜಿವಿತಾಚಿ ಮಜಾ ಮಾರ್ನ್ ಸವಯೆರ್ ಪಡ್ಲೆಲ್ಯಾಂಕ್ ಉಜ್ವಾಡ್ ಸಯ್ರೊ ಕಸೊ ದಿಸೊಂಕ್ ಪುರೊ. ದೆಕುನ್ ಜಾವ್ಯೆತ್ ಶಿಕ್ಪಿ ವರ್ಗಾಂತ್ ಆಸ್ಚೊ ಮನಿಸ್ ಲೆಗೂನ್ ಆಜ್ ಹ್ಯಾಚ್ ಕಾಳೊಕಾಚೆ ದಲಾಳ್ ಜಾಲ್ಯಾತ್ ಆನಿ ಎಕಾಮೆಕಾ ಕಾಳೊಕ್ ವಾಂಟ್ತಾತ್, ಉಜ್ವಾಡಾಚೆ ಚ್ಯುರೆ ಕರ್ತಾತ್ ಆನಿ ಕಾಳೊಕಾಚೆಚ್ ದೊರೆ ಭಾಂದ್ತಾತ್.

ಹೊ ಕಾಳೊಕ್ ಆಮ್ಚ್ಯಾ ವಿಚಾರಾಂಚೊ ಆಸ್ಯೆತ್, ಆಮಿಂ ಬರೆಂ/ವಾಯ್ಟ್ ಮ್ಹಣ್ ಕರ್ಚ್ಯಾ ಸಂಗ್ತೆಂಚೊ ಆಸ್ಯೆತ್, ಜಾತ್-ಪ್ರಾಂತ್ಯ್-ಭಾಸ್-ಲಿಪಿ ಆಸ್ಯೆತ್ ವಾ ಹೆರ್ ಕಿತೆಂಯ್..

ಪೂಣ್ ಗಿನ್ಯಾನ್, ಸಮ್ಜಣಿ, ಬರೆಂ, ಸತ್ ಅಶೆಂ ’ಉಜ್ವಾಡ್’ ಸಬ್ಧಾಚೆರ್ ಕಾಂಯ್ ಥೊಡೆ ಅರ್ಥ್ ಆಸಾತ್. ಹ್ಯಾ ಕಾಂಯ್ ಥೊಡ್ಯಾಂತ್ ’ಗೂಣ್’ಯೀ ಏಕ್ ಅರ್ಥ್ ಆಸ್ಚೊ ಹ್ಯಾ ಕವಿತೆಂತ್ ಬಾರ್ಕಾಯೆನ್ ಪಳೆತಾನಾ ಸುಸ್ತಾತಾ. ಕೊಂಕಣಿ ಖವಿತಾ ಶೆತಾಂತ್ ’ಅಮೂರ್ಥ್ ಕವಿತಾ’ (Abstract poetry) ವಾಚುಂಕ್ ಮೆಳ್ಚ್ಯೊ ಭೋವ್ ಅಪ್ರೂಪ್.

ಉಜ್ವಾಡಾಚೊ ಖರೊ ಮತ್ಲಬ್ ’ಹ್ಯಾ ಸಂಸಾರಾಂತ್ ಫುಟ್ ನಾಸ್ಚೆಂ ಕಿತೆಂಚ್ ನಾ’ ಮ್ಹಣ್ ದಾಕಂವ್ಚೊ. ಆನಿ ತಸಲ್ಯಾ ಬಾರೀಕ್ ಬಾರೀಕ್ ಫುಟಿಂನಿ ಅಪ್ಲಿಂ ಕಿರ್ಣಾಂ ರಿಗಂವ್ಚಿ ಶ್ಯಾಥಿ ಆಸ್ಚಿ ಫಕತ್ ಉಜ್ವಾಡಾಕ್ ಮಾತ್ರ್. ಹಾಂಗಾಸರ್ ಅಸಲ್ಯಾಚ್ ಉಜ್ವಾಡಾಚ್ಯಾ ವೆಂಗೆಂತ್ ದೋನ್ ಭಂವಾರ್ ಕವಿನ್ ಉಭೆ ಕೆಲ್ಯಾತ್; ಆಲ್ತಡಿ ಆನಿ ಪಲ್ತಡಿ. ನಾರ್ಲ್, ಸುಕ್ಣಿಂ ಆನಿ ಲ್ಹಾರಾಂ ಕಾಂಯ್ ಖೆಳ್ಗಾಡಿ ಆಸ್ತಿತ್ ಪುಣ್ ಹ್ಯಾ ದೆಗೆನ್ ಝಡೊನ್ ಪಡ್ಲಲೊ ಏಕ್ ನಾರ್ಲ್, ತೊ ವಿಂಚುಂಕ್ ಅಪ್ಲ್ಯೊ ಅಸ್ಕಕ್ ಬೊಂಚಿಂನಿ ಪ್ರಯತ್ನ್ ಕರ್ಚಿಂ ಸುಕ್ಣಿಂ, ತಶೆಂಚ್ ತೊ ವಿಂಚುಂಕ್‌ಚ್ ಜಾಯ್ ಮ್ಹಳ್ಳೆಂ ಜಿದ್ದಾನ್ ವಚುನ್ ದರ್ಯಾಚ್ಯಾ ಲ್ಹಾರಾಕ್ ಸಾಂಗುನ್ ಯೆಂವ್ಚೆಂ ಆನಿ ತೆಂ ಲ್ಹಾರ್ ಸಯ್ತ್ ಹ್ಯಾ ಸುಕ್ಣ್ಯಾಂಚಿ ವಿನತಿ ಸಮ್ಜುನ್ ತ್ಯಾ ನಾರ್ಲಾಕ್ ತಡಿರ್ ಪಾವಂವ್ಚೆಂ ಆನಿ ಹೊ ಸಂತೊಸ್ ವರ್ಣುಂಕ್ ಮೊಳ್ಬಾರ್ ಸುಕ್ಣ್ಯಾಂಚೊ ಪುರ್ಶಾಂವ್... ವ್ಹಾ! ಕಿತೆಂ ದೆವಾಸಾಂವಾಚೆಂ ನಿತಳ್ ಚಿಂತಪ್. ಭೋವ್ಶಾ ಕವಿ ಆಂಡ್ರ್ಯೂ ಥಾವ್ನ್ ಮಾತ್ರ್ ಅಸಲೆಂ ಏಕ್ ಚಿಂತಪ್ ಕವಿತೆಂನಿ ಹಡುಂಕ್ ಸಾಧ್ಯ್ ಕೊಣ್ಣಾ.

ಕವಿತೆಚ್ಯ್ ಸೊಭಾಯೆಚಿ ಉಂಚ್ಲಿ ಘಡಿ ಯೆತಾ ಅಖೇರಿಚ್ಯಾ ಕಡ್ವ್ಯಾಂತ್. ಅಪುಟ್ ಆಶಾವಾದ್, ಜಶೆಂ ಆಲ್ತಡಿ ಏಕ್ ನಾರ್ಲ್ ಝಡ್ಲೊಕಿ ತಶೆಂಚ್ ಅನ್ಯೇಕಾ ತಡಿರ್ ಸಯ್ತ್ ಏಕ್ ನಾರ್ಕ್ ಝಡೊನ್ ಪಡ್ತಾಲೊ ಮ್ಹಣ್ಚೊ ಆಶಾವಾದ್...

ಪುಣ್ ಹೆಂ ಫಕತ್ ಉಜ್ವಾಡಾಚ್ಯ್ ವೆಂಗೆಂತ್ ಮಾತ್ರ್ ಸಾಧ್ಯ್.

[ಕವಿತಾ] ಉಜ್ವಾಡಾಚ್ಯೆ ವೆಂಗೆಂತ್... [ಆಂಡ್ರು ಎಲ್. ಡಿ’ಕುನ್ಹಾ]

ಉಜ್ವಾಡಾಚ್ಯೆ ವೆಂಗೆಂತ್...

ಉಜ್ವಾಡಾಚ್ಯೆ ವೆಂಗೆಂತ್

ದರ್ಯಾಕ್ ಮಾಲ್ವಲ್ಲ್ಯಾ ಮಾಡಾಂತ್ಲೊ

ಏಕ್ ನಾರ್ಲ್

ಝಡೊನ್ ಪಡ್ಲೊ

ಸುಕ್ಣಿಂ ಥೊಡಿಂ ಭೊಂವ್ತಿಂ ಜಮ್ಲಿಂ

ಬೊಂಚಿಯೆನ್ ತಾಂಚ್ಯಾ ವಿಂಚುಂಕ್ ಜಾಲೆಂನಾ

ಥೊಡಿಂ ದರ್ಯಾಕ್ ಉಭ್ಲಿಂ, ಆನಿ

ಲ್ಹಾರಾಂಕ್ ಸಾಂಗೊನ್ ಆಯ್ಲಿಂ

ಏಕ್ ವ್ಹಡ್ ಲ್ಹಾರ್ ಆಯ್ಲೆಂ

ನಾರ್ಲಾಕ್ ಉಕಲ್ನ್ ವರ್ನ್ ಗೆಲೆಂ

ಮೊಳ್ಬಾರ್ ಸುಕ್ಣ್ಯಾಂಚೊ ಪುರ್ಶಾಂವ್

ಅನ್ಯೇಕಾ ತಡಿಕ್...

ಆನಿ ಥೊಡ್ಯಾ ವರ್ಸಾಂನಿ

ತ್ಯಾ ಅನ್ಯೇಕಾ ತಡಿರ್

ದರ್ಯಾಕ್ ಮಾಲ್ವಾಲ್ಲ್ಯಾ ಮಾಡಾಚೊ

ನಾರ್ಲ್ ಝಡೊನ್ ಪಡ್ತಲೊ

ಉಜ್ವಾಡಾಚ್ಯೆ ವೆಂಗೆಂತ್

- ಆಂಡ್ರು ಎಲ್. ಡಿ’ಕುನ್ಹಾ [ಫೆಬ್ರೆರ್, 2025]

ಬರವ್ಪಿ

ಆಂಡ್ರ್ಯೂ ಎಲ್. ಡಿಕುನ್ಹಾ

1984 (ಪಾಟ್ಲ್ಯಾ 42 ವರ್ಸಾಂ) ಥಾವ್ನ್ ಕೊಂಕ್ಣೆಂತ್ ಸಾಹಿತ್ಯ್ ರಚುನ್ ಆಸ್ಚೊ ಆಂಡ್ರ್ಯೂ ಎಲ್. ಡಿಕುನ್ಹಾ ಏಕ್ ಲೊಕಾಮೊಗಾಳ್ ಕವಿ. ಗಾಂವಾನ್ ಗುರ್ಪುರ್ ಕಿನ್ನಿಕಂಬ್ಳಾಚೊ ತೊ ಅತಾಂ ಇಜಯ್ ವಸ್ತಿ ಕರ್ನ್ ಆಸಾ. ದೆವಾಧೀನ್ ಡೆನಿಸ್ ಆನಿ ಮೇರಿ ಡಿಕುನ್ಹಾ ಹಾಂಚ್ಯಾ ಸಾತ್ ಭುರ್ಗ್ಯಾಂ ಪಯ್ಕಿ ತೊ ನಿಮಾಣೊ. ತಾಣೆಂ 1000 ವಯ್ರ್ ಕವಿತಾಂ, 150 ಕ್ ಮಿಕ್ವೊನ್ ಲೇಖನಾಂ ಆನಿ 30 ಮಟ್ವ್ಯೊ ಕಾಣಿಯೊ ಬರಯ್ಲ್ಯಾತ್. ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ (2004 - ಆಶಾವಾದಿ ಪ್ರಕಾಶನ್), ’ಅಂಜುರಾಚೆಂ ಪಾನ್’ (2013 - ಕವಿತಾ ಟ್ರಸ್ಟ್) ಆನಿ ’ಆಯೆರಾಚೊ ಬೂಕ್’ (2014 - ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ) ತಾಚೆ ಪ್ರಕಟಿತ್ ಕವಿತಾ ಪುಂಜೆ. ತಾಚ್ಯಾ "ಅಂಜುರಾಚೆಂ ಪಾನ್" ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, AIKWO (ಅಖಿಲ್ ಭಾರತ್ ಕೊಂಕಣಿ ಬರೊವ್ಪ್ಯಾಂಚೊ ಎಕ್ತಾರ್ ಪುರಸ್ಕಾರ್), ವಿಮಲಾ ವಿ. ಪೈ ವಿಶ್ವ್ ಕೊಂಕಣಿ ಕವಿತಾ ಪುರಸ್ಕಾರ್ ಆನಿ ಡಾ. ಟಿ. ಎಮ್. ಎ. ಪೈ ಪುಸ್ತಕ್ ಪುರಸ್ಕಾರ್ ತಾಕಾ ಲಾಬ್ಲ್ಯಾತ್. ಆಯ್ಲೆವಾರ್ ತಾಚ್ಯಾ "ಉಜ್ವಾಡಾಚ್ಯೆ ವೆಂಗೆಂತ್" ಕವಿತಾ ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ ಪ್ರಶಸ್ತಿ ಲಾಬ್ಲ್ಯಾ. 2023 ವರ್ಸಾಚಿ ರಾಜ್ಯ್ ಮಟ್ಟಾಚಿ “ಸಂದೇಶ ಕೊಂಕ್ಣಿ ಸಾಹಿತ್ಯ್ ಪ್ರಶಸ್ತಿ” ತಾಕಾ ಲಾಬ್ಲ್ಯಾ.

ಮಂಗ್ಳುರ್ ಆಕಾಶ್‍ವಾಣಿ ಥಾವ್ನ್ ಸುಮಾರ್ 40 ಕೊಂಕ್ಣಿ ಕಾರ್‍ಯಕ್ರಮಾಂ ತಾಣೆಂ ಸಾದರ್ ಕೆಲ್ಯಾಂತ್. ಸುಮಾರ್ 38 ವರ್ಸಾಂ ಆದಿಂ ರಾಕ್ಣೊ ಪತ್ರಾರ್ ‘ಆಂದ್ರು ಮಾಮ್’ ಲಿಖ್ಣೆ ನಾಂವಾನ್ ಭುರ್ಗ್ಯಾಂಚೊ ಸಂಸಾರ್ ವಿಭಾಗ್ ತಾಣೆಂ ಚಲವ್ನ್ ವ್ಹೆಲಾ. ಆಮ್ಚೊ ಯುವಕ್ ಪತ್ರಾರ್ ನಿರ್ವಾಹಕ್ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. "ಇಜಯ್ಚೊ ಕಳೊ" ಪತ್ರಾಚೊ ಸಂಪಾದಕ್ ಜಾವ್ನ್ ವಾವುರ್‍ಲಾ. ದಾಯ್ಜಿ ದುಬಾಯ್ ಬರವ್ಪ್ಯಾಂಚ್ಯಾ ಎಕ್ತಾರಾಚೊ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. ಮಾಯ್‍ಭಾಸ್.ಕೊಮ್ ಜಾಳಿ ಜಾಗ್ಯಾರ್, ರಾಕ್ಣೊ, ದಿರ್ವೆಂ, ಉಜ್ವಾಡ್ ಪತ್ರಾಂನಿ ಕವಿತಾ ಅಂಕಣ್ ತಾಣೆಂ ಚಲಯ್ಲಾಂ. ರಾಕ್ಣ್ಯಾರ್ ತಾಚೊ "ಕಾಸ್ ಸಂಸಾರ್" ಅಂಕಣ್, ನಮಾನ್ ಜೆಜು ಬಾಳೊಕ್ ಪತ್ರಾರ್ "ಖಾಸ್ ಸಂಸಾರ್" ಅಂಕಣ್ ಅನಿ ಆಮ್ಚೊ ಸಂದೇಶ್ ಪತ್ರಾರ್ ಸಕಾಳಿಕ್ ಲೇಖನಾಂ ಸರಾಗ್ ಪ್ರಕಟ್ ಜಾವ್ನ್ ಆಸಾತ್. ತಾಣೆಂ ಆಟ್ ಪುಸ್ತಕಾಂಕ್ ಪ್ರಸ್ತಾವನ್ ಬರಯ್ಲಾಂ. ವೆವೆಗ್ಳ್ಯಾ ಕೊಂಕ್ಣಿ ಕವಿತಾ ಸ್ಪರ್ದ್ಯಾಂಚೊ, ಕೊಂಕ್ಣಿ ಕವಿತಾ ಸಾದರ್ ಸರ್ತೆಂಚೊ ತಶೆಂಚ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚ್ಯಾ ಪುಸ್ತಕ್ ಪ್ರಶಸ್ತೆಚೊ ವರಯ್ಣಾರ್ ಜಾವ್ನ್ ವಾವ್ರ್ ದಿಲಾ. ಗಾಂವಾಂತ್ ಆನಿ ಪರ್ಗಾಂವಾಂತ್ ಸಬಾರ್ ಕವಿತಾಗೋಶ್ಟಿ ತಾಣೆಂ ಚಲವ್ನ್ ವೆಲ್ಯಾತ್. ಕವಿತಾಂ ವಿಶಿಂ ಸಬಾರ್ ಪ್ರಬಂಧ್ ಮಂಡನ್ ಕೆಲ್ಯಾತ್ ಆನಿ ಉಪನ್ಯಾಸ್ ದಿಲ್ಯಾತ್. “ಕವಿತಾ ಟ್ರಸ್ಟ್” ಚೊ ತೊ ಟ್ರಸ್ಟಿ ಜಾವ್ನ್ ಆಸಾ. ಕವಿತಾ.ಕೊಮ್ ಜಾಳಿ ಜಾಗ್ಯಾರ್ ಸಂಪಾದಕೀಯಾಂ ತೊ ಬರಯ್ತಾ.

All 14 pages by this writer