"सर्गाची वाट हेरांक कुमोक कर्ची शिवाय हेरांक अडकळ हाडची न्हय"
नव्या वर्साचें नवें चिंताप
वरस : २००६
मयनो : जनेर
चिंताप मनशाक नवीं सतां धाखवन दिता, चिंताप मनशाक नव्यो वाटो सोधून दिता, पूण चिंतचांत आमीं कितलीं हुशार? भोवशा एक समीक्षा केली तर शेंभोरांत नोवोद ठक्के लोक फकत ’अपूण, आपलीं बायल भुर्गीं, आपली आसत-बदीक, अपले ईश्ट मंत्र’ ह्याविशीं मात्र चिंतुंक सक्ता शिवाय चडतीक कितेंच न्हय.
बाकी ऊरल्ल्या थोड्यांनी चिंतुंक प्रेतन केलें तरय तांचान हेरांचीं कर्तुवां व हेरांचे गुन्यांव मात्र चिंतुंक साध्य म्हळ्ळें म्हजें चिंताप. कित्याक म्हळ्यार जायत्यांक चिंताप एक पिडा म्हळ्ळें मतिंत आसा. चिंताप एक पिडा म्हण चिंतचींय धाराळ मापान आसात.
आमचें चिंतापय कितलें अपुर्भायेचें? आमकां देव, धर्म, मीस, तेर्स, पात्कां, कुम्सार, फेसतां शिवाय हेर चिंताप येंवचेंच भोव उणें. देकून आमचा मतीन जेदनां चिंतुंक मन केलें तेदनां येंवचें चिंतापय आमचा तळातातितलेंच गूंड. देकुन्ंच आमची मत जेजुचे भारा आपोसतोल आसल्ले, तांतूं पेद्रू वर्तो, आनी जुदास घात्की म्हण आमचें चिंताप. चूक दोगांयनी केल्ली, पेद्रूक जेजून पयलेंच शीदा सांगल्लें "अळे पेद्रू, तूं म्हाका फांत्याचो कोंबो साद घाल्चापयलें तीन पावटीं नेगार कर्तलोय", तरय पेद्रून तशेंच केलें. उपरांत पेद्रू गळगळ्यान रडलो... उपरांतली सभार रितिची काणी सभार जणांथावन आमीं आयकाल्या, आनी पेद्रू इगर्ज मातेचो व्हडील जालोच.
पूण गुन्यांव करुंक भायर सरल्ल्या जुदासाक जेजून केदिंकच शीदा सांगलेनांकी "तूं म्हाका विखरीत कर्ताय" म्हण. सांगल्लें तर कोण जाणां तो कितें कर्तो म्हळ्ळें? आसों! जुदासान तीस नाण्यांक जेजूक विखरीत केलोच. उपरांत अपली चूक वळकोन तो गळपास घेवन मेलो...
दोन चुकी, दोन गुन्यांव, दोन थरांचे, जेजूक विखरीत कर्चे.. पूण दोगांक ताणीं केल्ल्या गुन्यांवांक भोगुंक मेळल्लें वेवेगळेंच - कित्याक? आसों! चडतीक सवालां केल्यार नवीच हेरेजी जायत!.
थोड्याच वर्साधीं क्रिकेटांत म्याच फिक्सिंग अपरादांत शिर्कोन पडल्ल्यांचो धाखलो घेव्यां, आसट्रेलियाचो मार्क वा आनी शेन वार्न, दक्षीण आफ्रिकाचो ह्यान्सी क्रोनिये आनी हेर थोडे. हांतूं पयलो कोणेंच अपलो गुन्यांव वळकोन घेतलोना, पयलें कित्याक अजून सयत ह्यान्सी क्रोनियेशिवाय हेर कोणेंच हो गुन्यांव कबूल केलोना. कितें जालें? ह्यान्सी क्रोनियेक क्रिकेट संसारांतलो मेकळो केलो, थोड्याच वर्सांनी तो ह्या संसारांतलोच मेकळो जालो. पूण हेर अजून आसात.
आयलेवार एका संवादांत ’चोरी अनी चोर’ म्हळ्ळेविशीं तर्क चलोन आसताना, चोराक कसली शिक्षा दीजाय म्हणोन उलवन आसताना एकलो म्हणालो, ’चोराक फाशेची शिक्षा दीजाय, पूण ताणें चोरी कर्तानांच शिर्कोन पडलो तर मात्र’. अन्येकल्यान तवळ सवाल केलें ’कित्याक चोरी कर्तानांच शिर्कोन पडल्ल्याक?’ पयलो जाप दीवन म्हणालो, हांगा शिक्षा फकत्त ’चोरी केल्ल्याक न्हय, बगार शिर्कोन पडल्ल्याक’
नव्या वर्सार नवें चिंताप चिंतुंक आमकां साध्य? वा तेंच पर्नें चिंताप? तेंच गुमाट? तिच्च मांड कुर्पोण आनी तिच्च धोल?
- वल्ली क्वाड्रस
Comments
No comments yet. Be the first to say what you thought of it.
Leave a comment