Digital Konknni - Prostut ani Fuddar

Hea somsarant kitem-i thir (Xasvit) aschem zaunasa ’Boldaunn’. Progotipor chintpacheamni hea bodlaunnek sori zaun ami soit fuddem mettam kaddchi gorz onivary.

Oxem mhonntastam amim rodanchem (chokranchem) ovixkar kel'lea kallak vechi gorz na. Punn tea rodank vhaparn amchea purvozamni kel'lea ovixkarant ek zaunasli ’Boilachi gaddi’ (Bullock Cart). Boilanchi gaddi ami pollelea, muklean don boil, ani boilanchea khandar zhum, ani tea zhumvacher gaddiechi mukli kus tor, onyeka kusicher yatri bostale, apaplem vojem dourtale. Punn boil sodanch gaddiechea somor astale ani ti gaddi voddun vhortale xivai gaddie pattlean nhoi. Titli somzonni ani ginean amchea purvozank asli. Tacho protifoll zaun az konkonni aptton doptton tor‌yi jivich urlea. Hea gaddiek fuddem vhorchi zovabhdari atam ’xikpi’ zaunaschea amcher asa. Aminch te boil, ani tantrikota ek zhum. Dekun hea tantrikotek sarkye ritin vhaparn konkonni gaddi ami mukar vhorunk asa.

’Digital’ sobdh orthan vistar orthacho. Eka nirdixtt pranteacho va somudayacho nhoi; zagotik. Oxem mhonntoch ’Konkonni’ mhollear lhan/annvem chintop amkam naka. "Konkonni ek girest bhas, panch lipiamni, chear promuk rajeamni ghollchi, somsar‌bhor vistarit zal'li, bharot dexachi ek raxttr bhas" oxem vorsak ek pauttim (ogost 20 tariker) vedicher choddon maikacher tallo pinzun bobattun, vedithaun demvtoch ekameka lipi-boli-pranteachim nibam mukar haddn ekamekachim masam khamvchem kaim okosmik nhoi. Kiteak amkam dodon tonddam? ek vedicher, onyek vedisokla? amkam fokot ek tondd astem tor konkonni, zamv ti khonchyai vottharant va khonchyai lipi/bolint punn ti konkonnich nhoi? amchea pamyank kantto toplear amkam duk yemvchi sohoz nhoi? atam to kantto omerikant astana topum va zopanant astana topum va bharotant astana topum. Duk ti duk nhoi? atam duk ti duk tor, konkonni ti konkonni kiteak nhoi? amchelagim tantrikota asa, punn amchea motintlem oxir (narrow) chintop pois korunk tantrikota ozun yeunko na. Dekun fokot tantrikota aslear matr pavana, ti mukar vorunk zokti monogot aschim zai. Hea dixen ami sodam axavadi zaun urchi gorz asa.

Ashawadi prokaxonan Digital konkonnint kaim il'lo chil'lor vaur kela, korun asa. Tantlem promuk misamv konkonnintlem vinchnnar sahity Digitalikoronn korchem, zogaun dourchem. Fuddarak upkarak poddtelem mholl'llea chintpan, mai‌bhasecho mog konkonni lokanthoim sodankall jivall urtolo mholl'llea bhorvoxean. ’zolm' dil'lea auyk praivontachea axromant ghalun vhodda morjen jietelea lokam thaun auy‌bhasecher mog udetolo kai?’ - hem chintop konnaiki ’pixemponn’ mhonn bhogunk puro. Asum konn‌yi, koxem-i, kitem-i chintundi, apaplea motichea probhud'dhotecher tem lobdon asa. Punn amkam tori fuddaravixim axavadi zaunko asa. Dekun osolim Digital porisomvadam ayojit korchi gorz asa. Hea porisomvadant vichar ekameka paxar korchi gorz asa. Okttobor 25 tarikr cholonk aschea hea porisomvadacher ami printt pustok, e-pustok, toxench a-pustok oxem tin prokarachim pustokam lokarponn korchi yeuzonn ghalea. Digital Konkonni veg-vegllea xetant kam' korun aschea thoddeank ami hea porisomvadant meter kelam. Hea porisomvadant vantteli zaunko sorvank aukas asa.

251026