ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾದಾಯ್ಜ್ - 19
ಮ್ಹೊಂವಾಂತ್ ಹುಲ್ಪಾಲ್ಲಿಂ ಸ್ವಪ್ಣಾಂ
ಕ್ಲೆರೆನ್ಸ್ ಕೈಕಂಬ
ನಾಂವ್: ಕ್ಲೆರೆನ್ಸ್ ಡೊನಾಲ್ಡ್ ಪಿಂಟೊ
ಲಿಖ್ಣೆ ನಾಂವಾಂ: ಕ್ಲೆರೆನ್ಸ್, ಕೈಕಂಬ
ಜನನ್: 01 ಸಪ್ತೆಂಬರ್ 1958.
ಜಲ್ಮಾಲ್ಲೊ ಗಾಂವ್: ಕೈಕಂಬ.
ಆವಯ್-ಬಾಪುಯ್: ಅಲಿಸ್ ಪಿಂಟೊ ಆನಿ ದೆ|ಡೆನಿಸ್ ಫ್ರಾನ್ಸಿಸ್ ಪಿಂಟೊ.
ಹೆರ್ ಕಾಣ್ಯೊ: ದೆವಾನ್ ವಿಸ್ರಾಲ್ಲಿಂ ಭುರ್ಗಿಂ, ಯಜ್ನ್, ಧುಳ್ ತಿ ಧುಳ್ಚ್, ಏಕ್ ಕುಡ್ಕೊ ಪಿಜ್ಜಾ, ಖೊವ್ಳಾಂ, ಮರುಭುಂಯ್ಂತ್ಲೆಂ ವಾದಾಳ್
ವಳೊಕ್:
ಶಿಕಾಪ್: ’ಸಾಂ|ಲುವಿಸ್ ಕೊಲೆಜಿಂತ್’ ಬಿ.ಎಸ್ಸಿ ಶಿಕಾಪ್.
ಪಯ್ಲಿ ಮಟ್ವಿ ಕಥಾ: (ಸೆವಕ್, 1975)
ಪರ್ಗಟ್
ಜಾಲ್ಲೆ ಬೂಕ್:
ಯೆಮ್ಕೊಂಡಾಚಿಂ
ಮೆಟಾಂ (ಕಾದಂಬರಿ, ಪುನವ್ ಪ್ರಕಾಶನ್, 2001)
ಕಾಳೆಂ ರಗಾತ್ (ಕಾದಂಬರಿ, ಪುನವ್ ಪ್ರಕಾಶನ್, 1988)
ಭಾಂಗಾರಾಚೊ ಪಡ್ದೊ (ಕಾದಂಬರಿ, ಪುನವ್ ಪ್ರಕಾಶನ್, 2002)
ಸುಟ್ಕಾ (ಮಟ್ವ್ಯೊ ಕಾಣ್ಯೊ, ಜೇನ್ ಪ್ರಕಾಶನ್ 2006)
ಹೆರಾಂನಿ
ಪರ್ಗಟ್ ಕೆಲ್ಲೆ ಬೂಕ್:
ಸಾಗೊರಾಚ್ಯಾ
ವಾಟೆಚ್ಯೊ ಝರಿ (ಕವಿತಾ, ಆಶಾವಾದಿ ಪ್ರಕಾಶನ್
2006)
ಶಿಂಪಡ್ಲೆಲಿಂ ಮೊತಿಯಾಂ (5 ಕವಿತಾ, ಆಶಾವಾದಿ ಪ್ರಕಾಶನ್ 2007)
ಮಟ್ವ್ಯೊ ಕಾಣ್ಯೊ: 250 ವಯ್ರ್ [ಲೇಕ್ ಧರುಂಕ್ ನಾಂತ್]
ಕವಿತಾ: 30 ವಯ್ರ್.
ಕಾದಂಬರಿ: 5
ಯೇ ತುಂ ಮ್ಹಜ್ಯಾ ಕಾಳ್ಜಾಂತ್ (1982, ಪಯ್ಣಾರಿ)
ಫಾಸ್ಳಾಲ್ಲೆಂ ಸ್ವಪಾಣ್ (1984, ಪಯ್ಣಾರಿ)
ಯೆಮ್ಕೊಂಡಾಚಿಂ ಮೆಟಾಂ (1986, ಮಿತ್ರ್)
ಕಾಳೆಂ ರಗಾತ್ (1988, ಮಿತ್ರ್)
ಭಾಂಗಾರಾಚೊ ಪಡ್ದೊ (2002, ಪುನವ್ ಪ್ರಕಾಶನ್)
ಲೇಖನಾಂ: 50 ವಯ್ರ್
ವಿಶೇಸ್ ವಾವ್ರ್:
ಮಸ್ಕತ್ಗಾರಾಂಚೊ ’ಝೆಲೊ’ ವಿಶೇಸ್ ಅಂಖೊ. (1999)
ಮಸ್ಕತ್ಗಾರಾಂಚೊ ’ಝೆಲೊ’ ವಿಶೇಸ್ ಅಂಖೊ. (2000)
ಮಸ್ಕತ್ಗಾರಾಂಚೊ ’ಝೆಲೊ’ ವಿಶೇಸ್ ಅಂಖೊ. (2001)
ಮಸ್ಕತ್ಗಾರಾಂಚೊ ’ಕಾಣಿಕ್’ ವಿಶೇಸ್ ಅಂಖೊ. (2003)
ಅಂಕಣಾಂ:
ಕಥಾಮೃತ್ (ದಾಯ್ಜಿವರ್ಲ್ಡ್.ಕೊಮ್) [ಹೆಂ ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಪಯ್ಲೆಂ ಅಂಕಣ್ - ಆತಾಂ ತಾಚ್ಯಾ ತಶೆಂಚ್ ದಾಯ್ಜಿ ವಾಲ್ಟರ್ ನಂದಳಿಕೆಚ್ಯಾ ಪರ್ವಣ್ಗೆನ್ ದಾಯ್ಜ್.ಕೊಮ್ಚೆರ್ ವೆಗ್ಳ್ಯಾಚ್ ರಿತಿನ್ ಚಲೊನ್ ಆಸಾ]
ತಿಂತೆರ್ (ಮಾಯ್ಭಾಸ್.ಕೊಮ್)
ಪುರಸ್ಕಾರ್:
ಗೊಂಯ್ಚಿ ಕೊಂಕ್ಣಿ ಭಾಶಾ ಮಂಡಳ್ ಪ್ರಶಸ್ಥಿ (ಯೆಮ್ಕೊಂಡಾಚಿಂ ಮೆಟಾಂ, 1986)
ಚಿಂತಾಪ್: ಕೊಂಕ್ಣಿ ಸಾಹಿತ್ಯಾಂತ್ ಮಟ್ವ್ಯೊ ಕಾಣ್ಯೊ ಬರಯ್ತೆಲೆ ಶೆಂಭೊರಾಂನಿ ಆಸಾತ್ ತರ್ಯೀ, ಮಾನೆಸ್ತ್ ಕ್ಲೆರೆನ್ಸ್ ಕೈಕಂಬಚ್ಯೊ ಕಾಣ್ಯೊ ಅಥ್ವ್ಯೊಚ್ ಆನಿ ವೆಗ್ಳ್ಯೊಚ್. ಹಾಚಿ ಬರ್ಪಾ ಶಯ್ಲಿ, ನಿರೂಪಣ್/ವ್ಹಾಳವ್ಣಿ, ಕಥಾವಸ್ತ್, ಚಿಂತಾಪ್, ಸಂದೇಶ್ ಅಪುರ್ಭಾಯೆಚೆ. ಎಕಾಪ್ರಾಸ್ ಏಕ್ ಕಾಣಿ ವಾಚ್ಪ್ಯಾಂಚ್ಯಾ ಕಾಳ್ಜಾಂತ್ ರಿಗೊನ್ ಥಂಯ್ಚರ್ ರಾಜ್ ಕರ್ತಾ. ಕಿತ್ಲೆಶ್ಯಾಗೀ ವಾಚ್ಪ್ಯಾಂನಿ ತಾಚ್ಯೊ ಕಾಣ್ಯೊ ವಾಚುನ್ ದುಖಾಂ ಗಳಯ್ಲ್ಯಾಂತ್ ಸವೆಂ ಜಿಣ್ಯೆ ಲಿಸಾಂವ್ ಸಯ್ತ್ ಜೊಡ್ಲಾಂ. ತಿತ್ಲೊಚ್ ಖಾಲ್ತೊ, ಮೊವಾಳ್ ವೆಕ್ತಿತ್ವಾಚೊ ಮಾನೆಸ್ತ್ ಕ್ಲೆರೆನ್ಸ್ ಆನಿ ಹಾಂವ್ ಆಜ್ ಮ್ಹಣಾಸರ್ ಮುಖಾಮುಖಿ ಜಾಂವ್ಕ್ ನಾಂವ್ (ದೆವಾನ್ ಮ್ಹಾಕಾ ಅಜೂನ್ ಪರ್ಯಾಂತ್ ತಾಕಾ ಮೆಳ್ಚೆಂ ಭಾಗ್ ಫಾವೊ ಕರುಂಕ್ ನಾ). ಪುಣ್ ಮ್ಹಜ್ಯಾ ಕಾಳ್ಜಾಕ್ ಲಾಗ್ಸಿಲ್ಯಾ ಭೋವ್ ಥೊಡ್ಯಾಂ ಕಾಣ್ಯೆಗಾರಾಂ ಪಯ್ಕಿಂತ್ ಖಂಡಿತ್ ಜಾವ್ನ್ ಎಕ್ಲೊ ಹೊ.
- ವಲ್ಲಿ ಕ್ವಾಡ್ರಸ್
ಕಥಾದಾಯ್ಜ್ - 19. ಮ್ಹೊಂವಾಂತ್ ಹುಲ್ಪಾಲ್ಲಿಂ ಸ್ವಪ್ಣಾಂ
ಧರ್ಣಿಚೆರ್ ದವರ್ಲ್ಲ್ಯಾ ಉಶ್ಯಾರ್ ಬಸೊನ್ ಹಾತಿಂ ಆಸ್ಲ್ಲೆ ಚಣೆಂ ಖಾವ್ನ್ ಆಸ್ಲ್ಲೆಂ ರುಕ್ಸಾನಾ ಹಾಸೊಂಕ್ ಆಶೆಲೆಂ ತರ್ಯೀ ತಾಕಾ ಬಿಲ್ಕುಲ್ ಸಾಧ್ಯ್ ಜಾಲೆಂನಾ. ಲ್ಹಾನ್ ಸಾಲಾಂತ್ ಬಸ್ಲ್ಲಿಂ ಸರ್ವ್ ಚೆಡ್ವಾಂ, ಯಾ ಬಾಯ್ಲಾಂ ಘಡಿಯೆಕ್ ಪಾವ್ಟಿಂ ಗಮ್ಮತಾಯೆನ್ ಹಾಸ್ತಾಲಿಂ. ಹರ್ಯೆಕ್ಲ್ಯಾಚ್ಯಾ ಮುಟಿನಿಂ ಚಣೆಂ ಆಸ್ಲ್ಲೆ. ಆಜ್ ಚಣ್ಯಾಚೆಂ ಫೆಸ್ತ್ ಮ್ಹಳ್ಳ್ಯಾಬರಿ ಸರ್ವಾಂ ಚಣೆಂ ಖಾತಾಲಿಂ. ತಾಂಚೆಂ ಸಾಂಗಾತಿ ಶಾಲಿನಿ ರೂವಿ ಥಾವ್ನ್ ಯೆತಾನಾ, ಇರಾನಿಚ್ಯಾ ಆಂಗ್ಡಿ ಥಾವ್ನ್ ಚಣೆಂ ಹಾಡುನ್ ಆಯಿಲ್ಲೆಂ. ಟಿ. ವಿ. ಚೆರ್ ಚಲೊನ್ ಆಸ್ಲ್ಲೆಂ ಪಿಂತುರ್ ತಾಂಕಾ ಗಮ್ಮತಾಯೆನ್ ಹಾಸಯ್ತಾಲೆಂ. ರುಕ್ಸಾನಾಕ್ಯ್ ಹಾಸಾಜಯ್ ಮ್ಹಣ್ ಭಗ್ತಾಲೆಂ.... ಪುಣ್, ಮತಿಂತ್ ಭರ್ಲ್ಲೆಂ ಚಿಂತ್ಪಾ ವಾದಾಳ್ ತಾಕಾ ತಸೆಂ ಕರುಂಕ್ ಜಾಯ್ನಾತ್ಲ್ಲೆಂ. ಎಕೇಕ್ಚ್ಚ್ ಚಣೊ ತೊಂಡಾಕ್ ಉಡಯ್ತಾನಾ ಮತಿಂತ್ ಭರ್ಲ್ಲೆಂ ವಾದಾಳ್ ಉಣೆಂ ಜಾಯ್ತ್ ಮ್ಹಣ್ ತೆಂ ಚಿಂತ್ತಾಲೆಂ ತರ್ಯೀ ತಸೆಂ ಜಾಯ್ನಾತ್ಲ್ಲೆಂ. ಹ್ಯಾ ಘಡಿಯೆ ಹಾಸ್ಚ್ಯಾ ಬದ್ಲಾಕ್ ರಡೊಂಕ್ ಕೋಣೆಂಯೀ ಭುಜ್ ದಿಲ್ಲೆಂ ತರ್ ಕಿತ್ಲೆಂ ಸಮಧಾನ್ ಹ್ಯಾ ಕಾಳ್ಜಾಕ್ ಜಾತೆಂ ತೆಂ ಸಾಂಗೊಂಕ್ ತಾಕಾ ಸಾಧ್ಯ್ ಜಾಲೆಂ ನಾ.
ವಾದಿ ಕಭೀರ್ ತಾಂಚೆ ಬಿಡಾರ್. ಭಾಂದ್ಪಾಚ್ಯಾ ತಕ್ಲೆವಯ್ಲೆಂ (ಪೆಂಟ್ ಹೌಸ್) ಘರ್ ತೆಂ. ಘರಾಂತ್ ದೊನ್೦ಚ್ ರಾಂವ್ಚಿಂ ಕುಡಾಂ. ಮುಕ್ಲ್ಯಾನ್ ಏಕ್ ಲ್ಹಾನ್ ಸಾಲ್. ಸಾಲಾಚ್ಯಾ ಕುಶಿನ್ ನ್ಹಾಣಿ ಆನಿಂ ಆನ್ಯೇಕಾ ಕುಶಿನ್ ಲ್ಹಾನ್ ರಾಂದ್ಪಾ ಕೂಡ್. ಹಾಂತು ರಾಂವ್ಚಿಂ ಆಟ್ ಜಣಾಂ. ಸರ್ವಾಂ ರೂವಿ, ವಾದಿ ಕಬೀರ್ ವಾಟರಾಂತ್, ಹೆಣೆ ತೆಣೆಂ ಘರಾನಿಂ ಸದಾಂಚೆಂ ಕಾಮ್ ಕರ್ಚಿಂ ತಿಂ. ಭಾರತಾಚ್ಯಾ ವೆವೆಗ್ಳ್ಯಾ ಪ್ರಾಂತಾಥಾವ್ನ್ ಆಯಿಲ್ಲಿಂ ವೆವೆಗ್ಳ್ಯಾ ಜಾತಿಚಿಂ, ಪುಣ್, ಸರ್ವಾಂ ಥಂಯ್ ಏಕ್ಚ್ಚ್ ಉದ್ದೇಶ್... ಹಾತಾಂತ್ ಇಲ್ಲೆ ಪಯ್ಶೆ ಜಾಯ್ಜಯ್ ಆನಿಂ ಪಾಟಿಂ ಗಾವಾಂತ್ ಆಸ್ಲ್ಲ್ಯಾಂಕ್ ಖುಶ್ ಕರಿಜಾಯ್.....
ತಾಂಚೊ ದೀಸ್ ಸುರು ಜಾಂವ್ಚೊ ಸಕಾಳಿಂಚ್ಚ್. ಥೊಡ್ಯಾಂಚೊ ಪಾಂತ್ಯಾರ್ಚ್ಚ್.... ಚಡಾವತ್ ಜಣಾಂ ಸಕಾಳಿಂಚೊ ನಾಸ್ಟೊ ಘರಾಂತ್ ಕರಿನಾಂತ್. ಜೆಂ ಖಂಯ್ಸರ್ ಕಾಮಾಕ್ ವೆತಾತ್ ಥಂಯ್ಸರ್ಚ್ಚ್ ತಾಣಿಂ ತೆಂ ತಿರ್ಸುಚೆಂ ಆನಿಂ ದೊನ್ಪಾರಾಂಚೆಂ ಜೆವಾಣ್೦ಯ್. ಸರ್ವಾಂ ಸಕಾಳಿಂ ಘರ್ ಸೊಡ್ನ್ ಗೆಲಿಂ ತರ್ ಸಾಂಜ್ ಜೂನ್ ಜಾಲ್ಯಾ ಶಿವಾಯ್ ಪಾಟಿಂ ಯೆನಾತ್ಲ್ಲಿಂ. ಥೊಡ್ಯಾಂಕ್ ಏಕಾಚ್ಚ್ ಘರಾಂತ್ ಸಾಂಜ್ ಮ್ಹಣಾಸರ್ ಕಾಮ್ ತರ್ ಆನಿಂ ಥೊಡ್ಯಾಂಕ್ ದೋನ್ ತೀನ್ ಘರಾಂನಿಂ ಕಾಮ್ ಕರಿಜಯ್ ಪಡ್ತಾಲೆಂ. ಹಿಂ ಸರ್ವಾಂ ಸ್ವತಂತ್ರ್ (ಫ್ರಿ) ವಿಸಾಚೆರ್ ಕಾಮ್ ಕರ್ಚಿಂ ಕಾಮೆಲಿ ಜಾವ್ನಾಸ್ಲ್ಲಿಂ.
ಟಿ. ವಿ. ಚೆರ್ ಸ್ವಪ್ಣಾಂಚೆಂಚ್ ಪಿಂತುರ್ ದಾಕಯ್ತಾಲೆ. ಬರಿಂ ಸ್ವಪ್ಣಾಂ... ಸುಖಾಳ್ ಸ್ವಪ್ಣಾಂ..... ಬರ್ಯಾ ಜಿವಿತಾಂಚಿಂ ಸ್ವಪ್ಣಾಂ.... ಚೆಡ್ಯಾ ಚೆಡ್ವಾಚ್ಯಾ ಸುಖಾಳ್ ಜಿವಿತಾಚಿಂ ಸ್ವಪ್ಣಾಂ. ಅಸಲಿಂಚ್ಚ್ ಸ್ವಪ್ಣಾಂ ಮತಿಂತ್ ಘೆವ್ನ್ ರುಕ್ಸಾನಾ ಇಬ್ಬುಲಾಗಿಂ ಕಾಜಾರ್ ಜಾಲ್ಲೆಂ... ತಿಂ ಸ್ವಪ್ಣಾಂ ಉದ್ಕಾ ವಯ್ಲ್ಯಾ ಬುಳ್ಬುಳ್ಯಾಂ ಬರಿ ಪುಟ್ತಾನಾ, ಪರತ್ ತ್ಯಾ ಸ್ವಪ್ಣಾಂಕ್ ಆರಾವ್ನ್ ಮಸ್ಕತಾಕ್ ಆಯಿಲ್ಲೆಂ... ಮಸ್ಕತಾಂತ್ ಬರಿ ಜಿಣಿ ಜಿಯೆಂವ್ಕ್... ಆನಿಂ ಸಾಂಗಾತಾಚ್ಚ್ ಆಪ್ಲ್ಯಾ ದೊಗಾಂ ಚೆಡ್ವಾಂಕ್ ಹ್ಯಾಚ್ಚ್ ಸ್ವಪ್ಣಾಂನಿ ಜಿಯೆಂವ್ಕ್ ಆವ್ಕಾಸ್ ದೀಂವ್ಕ್..... ಹೆಂ ಜಿವಿತ್ಚ್ಚ್ ಸ್ವಪ್ಣಾಂಚಿ ಶಿಂಕಳ್ ತಸಿ ತಾಕಾ ಭಗ್ಲ್ಲಿ.
ಹೈದರಾಬಾದ್ ಥಾವ್ನ್ ಸುಮಾರ್ ದೊನ್ಶಿಂ ಮಯ್ಲಾಂ ಪಯ್ಸಿಲ್ಯಾ ಚಾಂದ್ವಾಡಿ ನಾಂವಾಚ್ಯಾ ಗಾವಾಂತ್ ತಾಚ್ಯಾ ಅಬ್ಬುಕ್ಯ್ ಸ್ವಪ್ಣಾಂ ಆಸ್ಲ್ಲಿಂ. ಪಯ್ಲಿ ಬಾಯ್ಲ್ ಸರೊನ್ ತೀನ್೦ಚ್ಚ್ ಮಹಿನ್ಯಾಂನಿಂ ದುಸ್ರ್ಯಾಪಣಾಕ್ ಕಾಜಾರ್ ಜಾಲ್ಲ್ಯಾ ತಾಕಾ ಸಾಂಗಾತಾಚ್ಚ್ ಪಾಟಾಪಾಟ್ ಜಾಲ್ಲ್ಯಾ ಬಾರಾ ಭುರ್ಗ್ಯಾಂ ಪಯ್ಕಿ ಆಟ್ ಜಣಾಂ ಚೆಡ್ವಾಂ ಜಾಲ್ಲಿಂ ತರ್ಯ್ ತಾಕಾ ಖುಶಿ ಚಡ್ ಜಾಲ್ಲಿ. ಹೊ ಕಾಳ್ ಪಯ್ಲೆಂಚ್ಯಾ ಬರಿ ನ್ಹಂಯ್...... ಚೆಡ್ವಾಂ ಜಾಲ್ಯಾರ್ ರಡ್ಚೊ ಼ ಮ್ಹಣ್ ತೊ ಜಾಣಾಸ್ಲ್ಲೊ. ಪಯ್ಲೆಂ ಚೆಡುಂ ಜಾಲ್ಲೆಂಚ್ಚ್ ದೋತಿಚಿ ಖಂತ್ ಆಸ್ಲ್ಲಿ. ಚೆಡುಂ ಕೊಣಾಯ್ಚ್ಯಾ ಮೊಗಾರ್ ಪಡೊನ್೦ಗೀ ಯಾ ಪಾಟ್ಲ್ಯಾನ್ ದಾವೊನ್೦ಗೀ ನಿಖಹ ಜಾಲೆಂ ತರ್ ಎಕ್ಲ್ಯಾಚೆಂ ವ್ಹೊಜೆಂ ಉಣೆಂ ಜಾಲ್ಲ್ಯಾಬರಿ ತರ್ ಆತಾಂ ತಸೆಂ ನ್ಹಂಯ್. ಖಂಯ್ ಥಾವ್ನ್ ನ್ಹಂಯ್ ತರ್ಯ್ ಕಸೆಂ ಪುಣಿ ಬಾಯ್ಲ್ಯಾ ಗಾವಾ ಆಯಿಲ್ಲ್ಯಾ ಆರ್ಭ್ಯಾಂಕ್ ಚೆಡ್ವಾಕ್ ದಿಲೆಂ ತರ್ ಚೆಡ್ವಾಚೆಂ ಜೀವನ್೦ಯ್ ನಂದನ್ ಜಾತಾ ಆನಿಂ ಆಪ್ಲ್ಯಾ ಬೊಲ್ಸಾಂತ್ಯ್ ಕಾಸ್ ಪಡ್ತಾತ್ ಆನಿಂ ಘರ್ದಾರ್ ಬರೆಂ ಜಾತಾ ಮ್ಹಣ್ ತೊ ಚಿಂತ್ತಾಲೊ. ತಾಚ್ಯಾ ಸಾಂಗಾತ್ಯಾನಿಂ ಸರ್ವಾಂನಿ ಕೆಲ್ಲೆಂ ತರ್ಯ್ ತಸೆಂಚ್ಚ್..... ಅಪ್ಲ್ಯಾ ಸ್ವಪ್ಣಾಂಕ್ ರುತಾ ಕರುಂಕ್ ಚೆಡ್ವಾಂಚ್ಯಾ ಭಗ್ಣಾಂಕ್ ಉಗ್ತ್ಯಾ ಬಾಜಾರಾರ್ ವಿಕ್ಚೆ ಕಸಾಯ್ಗಾರ್ ತೆ ಮ್ಹಣ್ ಜಾಯ್ತ್ಯಾಂಕ್ ಜಾಣಾಸ್ಲ್ಲೆಂ... ಪುಣ್, ಹಿ ಸಂಸ್ಕ್ರತ್ಚ್ಚ್ ತಸಲಿ... ಹಾಂಗಾಸರ್ ಮೊವಾಳ್ ಭಗ್ಣಾಂಕ್ ಆವ್ಕಾಸ್ ನಾ......
ಮಾಲ್ಘಡ್ಯಾ ದೊಗಾಂ ಪಾಟ್ಲೆಂ ರುಕ್ಸಾನಾ. ಬೋವ್ ಲ್ಹಾನ್ ಆಸ್ತಾನಾಂಚ್ಚ್ ಸೊಭಾಯೆಚೆಂ ಕುಂಡ್ಲೆಂ ತಸೆಂ ಆಸ್ಲ್ಲೆಂ. ಚಡ್ ಗೊರೆಂ ನ್ಹಂಯ್ ತರ್ಯ್ ಚಡ್ ಕಾಳ್ಶೆಂಯ್ ನ್ಹಂಯ್ ಆಸ್ಲ್ಲೊ ತಾಚೊ ರಂಗ್.... ತಾಚ್ಯಾ ಕಾಜುಲ್ಯಾ ದೊಳ್ಯಾಂಕ್ ಲೋಕ್ ಪಿಸ್ವಾತಾಲೊ ತೆಂ ಖರೆಂ. ಬಾರಾ ಜಾತಾನಾಂಚ್ಚ್ ಚಲಿಯೆಚಿಂ ಖುಣಾಂ ಉದೆವ್ನ್ ಗಲ್ಲೆಂತ್ಲ್ಯಾ ಚಲ್ಯಾಂಚ್ಯಾ ದೀಶ್ಟಿಕ್ ಪಡ್ತಾಲೆಂಚ್ಚ್......."ಹೆಣೆಂ ತೆಣೆಂ ಕೊಣಾಯ್ಕಿ ಪಳಯ್ನಾಕಾ ರುಕ್ಸಾ.. ಹೆ ಚೆಡೆ ಪೂರಾ ಪಾಡಾರಿ... ತರ್ನ್ಯಾ ಚಲಿಯಾಂಕ್ ಧರ್ನ್ ಖಾಂವ್ಚೆಚ್ಚ್...ತುಜೆಂ ಜೀವನ್ ನಂದನ್ ಜಾಯ್ಜಯ್ ತರ್ ಬಾಯ್ಲ್ಯಾ ಖಂಚಾಯ್ ಆರ್ಭ್ಯಾಕ್ ಪಳವ್ಯಾಂ.... ಥಂಯ್ಸರ್ ರಾಣಿ ಜಾವ್ನ್ ಜಿಯೆತೆಲೆಂಯ್ ತುಂ.... "
ಆಪ್ಲೆಂ ಚೆಡುಂ ಗಾಂವ್ಚ್ಯಾ ಪೊಕ್ರಿ ಚೆಡ್ಯಾಂ ಲಾಗಿಂ ಮೊಗಾರ್ ಪಡಾತ್ ತರ್ ಉಪ್ರಾಂತ್ ಆಪ್ಣಾಕ್ ಮೆಳ್ಚೆ ಆರ್ಭ್ಯಾಚೆಂ ಆನಿಂ ಧಲಾಲ್ಯಾಚೆಂ ಚಾರ್ ಕಾಸ್ ಮೆಳಾನಾಂತ್ ಮ್ಹಣ್ ರುಕ್ಸಾನಾಚ್ಯಾ ಬಾಪಾಯ್ಕ್ ಆಬ್ಲೆಸಾಚೆಂ ಆನಿಂ ಸ್ವಾರ್ಥಾಚೆಂ ಭ್ಯೆಂ ಆಸ್ಲ್ಲೆಂ ತರ್ ರುಕ್ಸಾನಾಚ್ಯಾ ತಕ್ಲೆರ್ ಕಿತೆಂ ಬರಯಿಲ್ಲೆಂ ತೆಂ ತೆಂಚ್ಚ್ ನೆಣಾಸ್ಲ್ಲೆಂ.
ರುಕ್ಸಾನಾಕ್ ಕಾಂಯ್ ಸೊಳಾ ಜಾತಾನಾ, ಮಾರ್ಕೆಟಿಂತ್ ಬೊಕ್ರ್ಯಾ ಮಾಸ್ ವಿಕ್ಚ್ಯಾ ಇಬ್ಬುಚಿ ವಳಕ್ ಜಾಲಿ. ಇಬ್ಬು ಕಾಂಯ್ ತರ್ನಾಟೊ ನ್ಹಂಯ್. ಪಳಂವ್ಕ್ ಕಾಂಯ್ ಸೊಭಾಯ್ ಯಾ ಗಿರೆಸ್ತ್ ನ್ಹಂಯ್. ದೋಗಿ ಬಾಯ್ಲೊ ಆನಿಂ ಸಾತ್ ಭುರ್ಗಿಂ ಯೆದೊಳ್ಚ್ಚ್ ಆಸ್ಲ್ಲಿಂ ತರ್ ಹೆಣೆಂ ತೆಣೆಂ ವೆತಾನಾ ಕೋಣೆಂಗೀ ದಿಲ್ಲೆಂ ಜೀನ್ಸ್ ಪ್ಯಾಂಟ್ ಶಿರ್ಕಾವ್ನ್, ಪೊರಿನ್ಚೊ ಪರ್ಮಳ್ ಘಾಮಾಚ್ಯಾ ಖಾಕಿಯೆಂತ್ ವೊತುನ್ ವಚಾತ್ ತರ್ ಗಲ್ಲೆಂತ್ಲಿ ಚೆಡ್ವಾಂ ತಾಚೆರ್ ಭುಲೊಂಕ್ ಕಾಂಯ್ ಉಣೆಂಪಣ್ ನಾತ್ಲ್ಲೆಂ. ತಾಕಾ ಮೊಗಾಚೊ ಆರ್ಭೊಸ್ ಮ್ಹಣ್ಚ್ಯಾಕ್ ಖಾತಿ ಪಂದ್ಲ್ಯಾ ಮಾಸಾಚಿ ಆಶಾ ಚಡ್ ಆಸ್ಲ್ಲಿಚ್ಚ್ ಮ್ಹಣೊಂಕ್ ಜಾಯ್ನಾ.... ರುಕ್ಸಾನಾಚ್ಯಾ ಬಾಪಾಯ್ನ್ ’ನಾಕಾ’ ಮ್ಹಣ್ ಪಾಯ್ ಧರ್ಚೆ ಮಾತ್ ಬಾಕಿ. ಮೊಗಾಚ್ಯಾ ಉಮಾಳ್ಯಾಂಚಿ ಆವಸ್ತಾಚ್ಚ್ ಹಿ. ತರ್ನ್ಯಾ ಕಾಳ್ಜಾಂಕ್ ಯಾ ಮಾತ್ಯಾರ್ಯಾ ಮನಾಂಕ್ ಖರೆಂ ಉತರ್ ಸಾಂಗ್ಲೆಂ ತರ್ ನಾಟ್ವಾನಾ. ಆನಿಂ ರುಕ್ಸಾನಾಕ್ ತರ್ಯ್ ತಸೆಂಚ್ಚ್ ಜಾಲ್ಲೆಂ. ಇಬ್ಬುಚ್ಯಾ ದುಕಾನಾಂತ್ಚ್ಚ್ ತಾಂಚಿ ಪಯ್ಲಿ ವಳಕ್ ಜಾಲ್ಲಿ ಆನಿಂ ಥಂಯ್ಸರ್ಚ್ಚ್ ತಾಚ್ಯಾ ಸ್ವಪ್ಣಾಂಕ್ ಉಜೊ ಪೆಟ್ತಾನಾ ತಾಂಚಿ ಮೊಗಾಚಿ ಭೆಟ್ ಜಾವ್ನ್ ಗೆಲ್ಲಿ.
ರುಕ್ಸಾನಾಕ್ ತಿಸ್ರಿ ಬಾಯ್ಲ್ ಜಾವ್ನ್ ಇಬ್ಬು ಘರಾಂತ್ ಗೆಲ್ಲೊ ತರ್ ತಾಕಾ ಚಡ್ ವೊರ್ಸಾಂ ಥಂಯ್ಸರ್ ರಾವೊಂಕ್ ಜಾಲ್ಲೆಂ ನಾ. ದೊಗಾಂ ಭುರ್ಗಿಂ ಜಾಲ್ಲಿಂಚ್ಚ್ ಇಬ್ಬುಚೊ ಕಾಂಟಾಳೊ ತಾಕಾ ಅಯಿಲ್ಲೊ. ಇಬ್ಬು ಆತಾಂ ಮಾತಾರೊಚ್ಚ್ ದಿಸ್ತಾಲೊ. ಹ್ಯಾ ವೆಳಾರ್ ತಾಕಾ ಘರ್ ಸೊಡುನ್ ಖಂಯ್ಸರ್ಯ್ ವಚೊಂಕ್ ಜಾಲೆಂ ನಾ...... ಬಾಪೊಯ್ ತಾಕಾ ಲಾಗಿಂ ಕರಿನಾ ಜಾಲೊ. ದೊಗಾಂ ಭುರ್ಗ್ಯಾಂಕ್, ತೆಂಯ್ ಚೆಡ್ವಾಂಕ್ಚ್ಚ್ ಸಾಂಗಾತಾ ಘೆವ್ನ್ ಖಂಯ್ ವೆಚೆಂ ತೆಂ ತಾಕಾ ಕಳ್ಲ್ಲೆಂ ನಾ.....
ಆನಿಂ ತ್ಯಾಚ್ಚ್ ವೆಳಾರ್ ರುಕ್ಸಾನಾಚೆಂ ದಾಕ್ಟೆಂ ಭಯ್ಣ್, ಜೀನತ್ ಮಸ್ಕತಾಂತ್ಲ್ಯಾ ಏಕಾ ಆರ್ಭ್ಯಾಲಾಗಿಂ ನಿಖಹ ಕೆಲ್ಲ್ಯಾ ವೊರ್ವಿಂ ತಾಕಾಯ್ ಮಸ್ಕತಾಂತ್ ಯೆಂವೆಂ ನಶಿಭ್ ಮೆಳ್ಲ್ಲೆಂ.... ಮೆಲ್ಲ್ಯಾ ಸ್ವಪ್ಣಾಂಕ್ ಜೀವ್ ದಿಂವ್ಕ್... ಆಸ್ಲ್ಲ್ಯಾ ದೊಗಾಂ ಭುರ್ಗ್ಯಾಂಕ್ ಬರೆಂ ಶಿಕವ್ನ್, ಏಕಾ ಬರ್ಯಾ ಪಾಂವ್ಡ್ಯಾರ್ ಪಾವಂವ್ಚ್ಯಾ ಸ್ವಪ್ಣಾಂಕ್ ಈಟ್ ದೀವ್ನ್ ತೆಂ ಬಾಯ್ರ್ ಸರ್ಲ್ಲೆಂ..... ಭುರ್ಗ್ಯಾಂಕ್ ಆನ್ಯೇಕ್ ಭಯ್ಣ್, ಜಮೀಲಾಲಾಗಿಂ ದವರುನ್, ತೆಂ ಮಸ್ಕತಾಕ್ ಆಯಿಲ್ಲೆಂ. ಜೀನತಾಕ್ ಪಯ್ಶ್ಯಾಂಚಿ ಆಶಾ ಮ್ಹಣ್ಯೆತ್. ರುಕ್ಸಾನಾಚ್ಯಾ ಭುರ್ಗ್ಯಾಂಕ್ ಪಳಯ್ಲ್ಯಾರ್ ಗಲ್ಫಾಕ್ ವೆಚೆಂ ಭಯ್ಣ್ ಪಯ್ಶೆ ಬರೆಚ್ಚ್ ದಿತೆಲೆಂ ಮ್ಹಣ್ ತಾಕಾ ಕಳಿತ್ ಆಸ್ಲ್ಲೆಂಚ್ಚ್.
ರುಕ್ಸಾನಾ ಪಯ್ಲೆಂ ಚಾರ್ ವೊರ್ಸಾಂ ಜೀನತಾಚ್ಯಾ ಘರಾಚ್ಚ್ ಕಾಮಾಕ್ ರಾವ್ಲೆಂ ತರ್ ಜೀನತಾಚ್ಯಾ ದಮ್ಕಿ ದಗ್ದೊವ್ಣ್ಯಾನ್ ರಾವೊಂಕ್ ಜಾಯ್ನಾಸ್ತಾನಾ, ಕಸೆಂ ಪುಣಿ ತಾಚ್ಯಾ ಲಾಗ್ಚಿ ಸ್ವತಂತ್ರ್ ವೀಸಾ (ಫ್ರಿ) ಘೆವ್ನ್ ಬಾಯ್ಲ್ಯಾ ಜಾಗ್ಯಾರ್ ಕಾಮಾಕ್ ತೆಂ ಲಾಗ್ಲ್ಲೆಂ.
ಟಿ. ವಿ. ವಯ್ಲೆಂ ಪಿಂತುರ್ ಕೋಣೆಂಗಿ ರಾವವ್ನ್ ಸರ್ಭತ್ ಕರುಂಕ್ ಉಟ್ತಾನಾ, ರುಕ್ಸಾನಾಚಿಂ ಚಿಂತ್ನಾಂ ತುಟ್ಲಿಂ. ಹಾತಾಂತ್ ಬಾಕಿ ಉರುಲ್ಲೆ ಚಣೆಂ ತೊಂಡಾಕ್ ಉಡವ್ನ್ ತಾಣೆಂ ಪಾಂಯ್ ದೊಡ್ಲೆ. ಮುಖ್ಲ್ಯಾ ತೊಟ್ಯಾಂತ್ ಆಸ್ಲ್ಲೆ ಚಣೆಂ ಮುಟಿಂತ್ ಆರಾಯ್ಲೆ....
ಮಹಿನ್ಯಾಚ್ಯಾ ಪಯ್ಲೆಂಚೊ ಬ್ರೆಸ್ತಾರ್ ಜಾಲ್ಲ್ಯಾ ನಿಮ್ತಿಂ ಆಜ್ ಘರಾಂತ್ ಗಮ್ಮತ್ ಆಸ್ಲ್ಲೆಂ. ಬೊಕ್ರ್ಯಾ ಮಾಸ್ ಆನಿಂ ಚಪಾತ್ಯೊ ಕೆಲ್ಲ್ಯೊ. ಘರಾಂತ್ ಆಸ್ಚ್ಯಾ ಜುಲಿಯೆಟಾಕ್ ಆಯ್ಚ್ಯಾ ರಾತಿಚಿ ತಯರಾಯ್ ಕರುಂಕ್. ಜುಲಿಯೆಟ್, ಮಲ್ಭಾರಿ ತರ್ಯ್ ತಾಕಾ ಯೆಂವ್ಚ್ಯೊ ಭಾಸೊ ಸರ್ವ್ ಗಾಂವ್ಚ್ಯೊ. ಹಾಂಗಾಸರ್ ಜಿಯೆಂವ್ಚ್ಯಾ ಪಯ್ಕಿ ಚಿಕ್ಕೆ ಬರೆಂ ಇಂಗ್ಲಿಷ್ ಉಲಂವ್ಚೆಂ ಮ್ಹಳ್ಯಾರ್ ತೆಂಚ್ಚ್. ಕಿತ್ಯಾಕ್ ತೆಂ ಗೊರ್ಯಾ ಕರ್ ಕಾಮ್ ಕರ್ತಾಲೆಂ ಜಾಲ್ಲ್ಯಾನ್ ತಾಕಾ ಇಂಗ್ಲಿಷ್ ಉದ್ಕಾಬರಿ ಯೆತಾಲಿ. ಬ್ರೆಸ್ತಾರಾ ಯೆತಾನಾ, ಗೊರ್ಯಾಚೆ ದೊಳೆ ಚುಕವ್ನ್ ದೋನ್ ತೀನ್ ಬಿಯರ್ಯೊ ಆನಿಂ ನಿಳ್ಶೆಂ ಪಿಂತುರ್ ಹಾಡುನ್ ಯೆತಾಲೆಂ. ಜಿಣಿಯೆಂತ್ ಮ್ಹಾತಾರಿಂ ಜಾಲ್ಲಿಂ ತರ್ಯ್ ಹಾಂಕಾ ತಾಚೊ ಹೊರ್ಭೊಸ್ ಉಣೊ ಜಾಂವ್ಕ್ ನಾತ್ಲ್ಲೊ.... ಕುಡಿಚ್ಯಾ ಆಶೆಚೊ ಹೊರ್ಭೊಸ್ ಯಾ ಭಗ್ಣಾಂಚೊ ಹುಲೊಪ್ ತೆಂ ಕೋಣ್ಂಚ್ಚ್ ನೆಣಾಂ.... ಹರ್ಏಕ್ಲ್ಯಾಕ್ ಏಕೆಕ್ಲೊ ದೋಸ್ತ್ ಆಸ್ಲ್ಲೊಚ್ಚ್ ತರ್ಯ್ ಮಹಿನ್ಯಾಕ್ ಏಕ್ ಪಾವ್ಟಿಂ ಅಸಲೆಂ ಪಿಂತುರ್ ತಾಂಕಾ ಜಾಯ್ ಆಸ್ಲ್ಲೆಂಚ್ಚ್...
ರುಕ್ಸಾನಾಚಿಂ ಚಿಂತ್ನಾಂ ಮುಕಾರ್ಸುನ್ ಗೆಲಿಂ......ಹಿಂ ಭಗ್ಣಾಂಚ್ಚ್ ವೆಗ್ಳಿಂ..... ಮಾಸಾಚ್ಯಾ ದುಕಾನಾಂತ್ ಬೊಕ್ರೊ ಕಾತರ್ಚ್ಯಾ ಜಾಗ್ಯಾರ್ ಇಬ್ಬುನ್ ಪಯ್ಲೆಂ ಆರಾಯ್ತಾನಾ ತಾಕಾ ತಿ ಆಶಾ ಜಾಗಿ ಜಾಲ್ಲಿ. ಉಮಾಳೊನ್ ಆಯಿಲ್ಲ್ಯಾ ಉಜ್ಯಾಕ್ ಇಬ್ಬುನ್ ವೇಳ್ ಕಾಡಿನಾಸ್ತಾನಾ ಥಂಡಾಯ್ ದಿಲ್ಲಿ. ಪುಣ್, ಉಪ್ರಾಂತ್ ಭುರ್ಗಿಂ ಜಾವ್ನ್, ಆಸ್ಲ್ಲೆಂ ಮಾಸ್ ಜಿರೊನ್ ವೆತಾನಾ, ತಿ ಆಶಾಯ್ ಮೆಲ್ಲಿ ಮ್ಹಣ್ಯೆತ್. ಪುಣ್, ಮಸ್ಕತಾಕ್ ಯೇವ್ನ್ ಜೀವ್ ಫುಲೊನ್ ಯೆತಾನಾ, ಕುಡಿ ಬಿತರ್ಲಿ ಆಶಾ ಜಿವಿ ಜಾಲ್ಲಿಚ್ಚ್... ಪಾಕ್ಳೆವ್ನ್ ಯೆಂವ್ಚ್ಯಾ ಕುಡಿಂತ್ ಸಂಯ್ಭಿಕ್ ಆಶಾ ವೆಗಿಂಚ್ಚ್ ಭರೊನ್ ಯೆತಾ ಮ್ಹಣ್ ತೆಂ ಜಾಣಾಸ್ಲ್ಲೆಂ...
ಜೀನತಾಲಾಗಿಂ ಕಾಮ್ ಸೊಡ್ನ್, "ಪ್ರಿ ವೀಸಾ"ಚೆರ್ ಕಾಮ್ ಸುರು ಕರ್ತಾನಾ, ಪಯ್ಲೆಂ ವಳಕ್ ಜಾಲ್ಲಿ ಜುಲಿಯೆಟಾಚಿ. ತಾಣೆಂಚ್ಚ್ ಹ್ಯಾ ಘರಾಂತ್ ಹಾಡ್ಲ್ಲೆಂ. ಧಾರ್ಸಯ್ತ್ ಏಕಾ ಕ್ರಿಸ್ತಾಂವ್ಚ್ಯಾ ಘರಾಂತ್ ಕಾಮಾಕ್ ಲಾಗಯಿಲ್ಲೆಂ.
"ತುಂ ಆನಿಕ್ಯ್ ತರ್ನಾಟೆಂ... ದೊಗಾಂ ಭುರ್ಗಿಂ ಅಸಾತ್ ಆನಿಂ ತಿಂಯ್ ಚೆಡ್ವಾಂ ಮ್ಹಣ್ತಾಯ್.... ತಾಂಚ್ಯಾ ಬರ್ಯಾಪಣಾಕ್ ತುಂ ಜೊಡ್ತಾಯ್.... ಹೆಣೆ ತೆಣೆ ಕಸೆಂ ಪಯ್ಶೆ ಜಾತಾತ್ ತೆ ಪಳೆ..... "
ರುಕ್ಸಾನಾಕ್ ಜುಲಿಯೆಟಾಚಿಂ ಉತ್ರಾಂ ಸಮ್ಜಲ್ಲಿಂನಾಂತ್.....
"ರುಕ್ಸಾನಾ... ತುಂ ಆನಿಕ್ಯ್ ಸಾಧೆಂ.... ಅಯ್ಕ್.... ತುಂ ಸಾಂಜ್ ವರೇಗ್ ದಾರ್ಸೈತಾಂತ್ ಕಾಮ್ ಕರ್ತಾಯ್ ತರ್ ಉಪ್ರಾಂತ್ ಹೆಣೆಂ ತೆಣೆಂ ಏಕ್ ದೋನ್ ವೊರಾಂಚೆಂ ಕಾಮ್ ಪಳೆ..... ಹಾಂಗಾಸರ್ ದಾದ್ಲೆಯ್ ದರಬಸ್ತ್ ಆಸಾತ್.... ಹ್ಯಾ ದಾದ್ಲ್ಯಾಂಚ್ಯಾ ಕುಳಿಯೆಕ್ ಭಗ್ಣಾಂಚೊ ಉಜೊ ಚಡ್..... ಭಗ್ಣಾಂ ಮೊಲಾಕ್ ಘೆವ್ನ್, ಉಮಾಳ್ಯಾಂಚೊ ಉಜೊ ಇಲ್ಲೊಸೊ ವಿಕ್ಲೊ ತರ್ ತಾಂಚ್ಯಾ ಬಾಯ್ಲೆ ಭುರ್ಗ್ಯಾಂಕ್ ವಿಕುನ್ ಸಯ್ತ್ ಆಮ್ಚೆಂ ಹರ್ಧೆಂ ಭರ್ತಾತ್.... ತಾಂತು ಕಾಂಯ್ ಚೂಕ್ ನಾ.... ತಾಂಕಾ ಚಲಿಯಾಂಚೊ ಹಾಸೊ ಪಾವ್ತಾ, ಆಸ್ಲ್ಲೆಂ ತುಜ್ಯಾ ಪಾಂಯಾಂಥಳಾ ವೊಂಪುಂಕ್..."
ರುಕ್ಸಾನಾನ್ ತಿಂ ಉತ್ರಾಂ ಆಯ್ಕೊನ್ ಏಕ್ ಪಾವ್ಟಿಂ ಆಂಗ್ ಹಿಂವಾಳಾಯಿಲ್ಲೆಂ ಪುಣ್ ತ್ಯಾ ಘರಾಂತ್ ಆಯ್ಲ್ಯಾ ಉಪ್ರಾಂತ್ ತ್ಯಾ ಉತ್ರಾಂಚೊ ಅರ್ತ್ ಕಳ್ಲ್ಲೊ.... ಸತ್ ಕಳ್ಲ್ಲೆಂ... ಹೆಣೆಂ ತೆಣೆಂ ಭಂವ್ಚೆಂ ದಾದ್ಲೆ.... ಬಾಯ್ಲಾಂಕ್ ಗಾವಾಂತ್ ಸೊಡುನ್ ಆಸ್ಲ್ಲೆ, ಥೊಡೆ ಆಂಕ್ವಾರ್ ಸಯ್ತ್ ಮೆಳೊಂಕ್ ಕಷ್ಟ್ ನಾತ್ಲ್ಲೆ.... ತಾಂಚ್ಯಾ ಸಾಂಗಾತಾಂತ್ ಥೊಡೊ ವೇಳ್ ಖರ್ಚಿಲೊ ತರ್ ಮೆಳ್ಚೊ ಲಾಭ್ ಚಡ್... ಹ್ಯಾ ದಾದ್ಲ್ಯಾಂಕ್ ಚಲಿಯಾಂ ಥಂಯ್ ಭರ್ವಸೊ ಚಡ್.... ಆಪ್ಲ್ಯಾ ಭಗ್ಣಾಂಚ್ಯಾ ಉಮಾಳ್ಯಾಂಕ್ ಥೊಡೊ ಉತ್ರಾಂಚೊ ಥೊಡೊ ಸಾಂಗಾತ್ ಮೆಳ್ಳೊ ತರ್ಯ್ ತೆ ಖರ್ಗೊನ್ಂಚ್ ವೆತಾತ್.. ..
ರುಕ್ಸಾನಾಕ್ ಹ್ಯಾ ಸಂಪ್ರದಾಯಾಂತ್ ಯೆಂವ್ಚ್ಯಾಕ್ ಪ್ರಮುಖ್ ಉದ್ದೇಶ್ - ಪಯ್ಶೆಚ್ಚ್ ಆನಿಂ ಮ್ಹೊಂವಾಂತ್ ವೊಂಪುಂಕ್ ಆಶೆಂವ್ಚಿಂ ಸ್ವಪ್ಣಾಂ.....
ಗಾವಾಂತ್ ಆಸ್ಚಿಂ ದೊಗಾಂ ಬಾಳಾಂ ವ್ಹಡ್ ಜಾವ್ನ್ ಯೆತಾಲಿಂ... ಘರ್ ಖಾತ್ಯಾಚೆಂ ಕಾಮ್ ಕರುನ್, ಮೆಳ್ಚೆ ಆಯ್ಶಿಂ ರಿಯಾಲ್. ಸಾಂಜೆರ್ ಆನಿಂ ದೋನ್ ವೊರಾಂ ಆನಿ ಎಕಾ ಘರಾ ಕಾಮ್ ಕೆಲೆಂ ತರ್ ಆನಿ ತೀಸ್ ರಿಯಾಲ್.... ಘರಾಚೆಂ ಭಾಡೆಂ, ಜೆವಾಣ್, ವೀಜ್-ಉದಕ್, ಹೆಣೆಂ ತೆಣೆಂ ವಚೊಂಕ್ ಮ್ಹಣ್ತಾನಾ ಉರ್ಚೆ ಕಾಂಯ್ ಚಾಳೀಸ್ - ಪನ್ನಾಸ್ ರಿಯಾಲ್. ತೆ ಗಾವಾಕ್ ದಾಡ್ಲೆ ತರ್ ಜಮೀಲಾ ಖುಶ್ ತರ್ಯ್ ಭುರ್ಗ್ಯಾಂಕ್ ಜಾಯ್ ಜಾಲ್ಲೆಂ ಕಿತೆಂಚ್ಚ್ ದೀಂವ್ಕ್ ತಾಚ್ಯಾ ಥಾವ್ನ್ ಜಾಲ್ಲೆಂನಾ....
"ಉಮ್ಮ, ಆಮ್ಕಾಂ ತುಜ್ಯಾ ಬರಿ ಜಾಂವ್ಕ್ ನಾಕಾ..... ಆಮ್ಕಾಂ ಮೊಸ್ತು ಶಿಕಜಯ್...... ಆಮ್ಚ್ಯಾ ಹೆರಾಂ ಬರಿ ನ್ಹಂಯ್...." ಭುರ್ಗ್ಯಾಂನಿ ಆದ್ಲೆ ಪಾವ್ಟಿಂ ಗಾವಾಕ್ ಗೆಲ್ಲ್ಯಾ ವೆಳಿಂ ತಾಕಾ ಕಳಯಿಲ್ಲೆಂ.
ರುಕ್ಸಾನಾಕ್ ತಸೆಂಚ್ಚ್ ಭಗ್ಲ್ಲೆಂ... ಚಾಂದ್ವಾಡಿಚಿಂ ಕಿತ್ಲಿಂಶಿ ಚೆಡ್ವಾಂ ಆರ್ಬ್ಯಾಲಾಗಿಂ ಕಾಜಾರ್ ಜಾಂವ್ಚಿ ತಾಣೆಂ ದೆಖ್ಲ್ಲಿಂ .... ತರ್ನಿಂಚ್ಚ್ ಚೆಡ್ವಾಂ.... ಪಯ್ಶಾಂಚ್ಯಾ ಆಶೆನ್ ವಿಕ್ತೆಲ್ಯಾಂಕ್ ದಿಂವ್ಚ್ಯಾ ಬಾಪಾಯ್ಚಿಂ ಆಶೆಚೆ ಆಬ್ಲೆಸ್.... ತಸಲ್ಯಾ ಚೆಡ್ವಾಂ ಪಯ್ಕಿ ಎಕ್ಲೆಂ ಆಪ್ಲೆಂ ಭುರ್ಗೆಂ ಜಾಂವ್ಚೆಂ ನಾ ಮ್ಹಣ್ ರುಕ್ಸಾನಾನ್ ಚಿಂತ್ಲ್ಲೆಂ...
ವಾದಿ ಕಬೀರ್ ರಾವೊನ್, ಜುಲಿಯೆಟಾಚಿ ಶಿಕವ್ಣ್ ಆರಾಯ್ಲ್ಯಾ ಉಪ್ರಾಂತ್, ಪಯ್ಲೆಂ ತಾಕಾ ಭೆಟ್ಲ್ಲೊ, ಗೆರೆಜಿಚೊ ಶಿವು. ಮದ್ರಾಸಿ ಆನಿಂ ಚಿಕ್ಕೆ ಪ್ರಾಯೆಸ್ತ್..... ರುಕ್ಸಾನಾ ಥಂಯ್ ಸೊಭಾಯ್ ಆಸ್ಲ್ಲಿ ತರ್ ಶಿವುಲಾಗಿಂ ಪಯ್ಶೆ... ರುಕ್ಸಾನಾಚ್ಯಾ ಏಕಾಚ್ಚ್ ಹಾಸ್ಯಾಕ್ ಶಿವು ಖರ್ಗಾಲ್ಲೊ.... ಶಿವುಕ್ಯ್ ಭಗ್ಣಾಂಚ್ಯಾ ಉಜ್ಯಾಕ್ ಫಟ್ಕಿರೆಂ ತೇಲ್ ವೊತ್ಚಿ ರೀತ್ ಜುಲಿಯೆಟ್ ಶಾಲಿನಿನ್ ತಾಕಾ ಕಳಯಿಲ್ಲಿ.... "ಉಲಯ್ತಾನಾ... ತಾಚ್ಯಾ ಕಾಳ್ಜಾಂತ್ ಮೊಗಾಚೊ ಉಜೊ ಪೆಟಯ್ ರುಕ್ಸಾ.... ತೊ ಬೊಲ್ಸಾಂ ಖಾಲಿಚ್ಚ್ ಕರ್ತಲೊ.... ಪುಣ್, ತುಜೆಂ ಕಾಳಿಜ್ ಫಾತೊರ್ ಕರ್.... ಆಂಗ್ ಆಪ್ಡುಂಕ್ ದಿ ಆನಿಂ ಹೆರ್ ದಿನಾಕಾ.... ಹ್ಯಾ ದಾದ್ಲ್ಯಾ ಜಾತಿಚೆ ಪಯ್ಶೆ ಪಿಳಿಜಯ್ ತರ್.. ತಾಂಚ್ಯಾ ಖಾತಿ ಪಂದ್ಲ್ಯಾ ಮಾಸಾಕ್ ಥಂಡ್ ಜಾಂವ್ಕ್ ದಿಂವ್ಕ್ ನ್ಹಜೊ.... ಹರಾಮಿ ಜಾತ್ ಹಿ..."
ರುಕ್ಸಾನಾಕ್ ಸತ್ ಮ್ಹಣ್ ಭಗ್ಲ್ಲೆಂ.... ಇಬ್ಬುನ್, ಆಪ್ಣಾ ಥಾವ್ನ್ ದೊಡ್ಯಾ ಪ್ರಾಯೆರ್ ಆಸ್ಲ್ಲೊ ತರ್ಯ್ ಆಪ್ಣಾಕ್ ಘಾತ್ ಕೆಲ್ಲೊ ನ್ಹಂಯ್....??? ಮಾಸಾಚ್ಯಾ ದುಕಾನಾಂತ್ ಆಪ್ಲಾ ಜೀವಾಂತ್ ಸಂಯ್ಭಿಕ್ ಉಜ್ಯಾಚೊ ಉಜೊ ಪೆಟಯ್ನಾತ್ಲ್ಲೊ ತರ್ ಅಪುಣ್ ಆಶಿಂ ಜಾತಿಂ?
ಗೆರೆಜಿಚ್ಯಾ ಶಿವುನ್ ರುಕ್ಸಾನಾಕ್ ಸರ್ವಸ್ವ್ ದಿಲ್ಲೆಂ. ರುಕ್ಸಾನಾ ಆಪ್ಣಾಚೊ ಖರೊ ಮೋಗ್ ಕರ್ತಾ ಮ್ಹಣ್ ಚಿಂತುನ್ ಪಿಸ್ಯಾಂಬರಿ ತಾಚ್ಯಾ ಪಾಟ್ಲ್ಯಾನ್ ಘುಂವೊಂಕ್ ಲಾಗ್ಲೊ.... ಗೆರೆಜಿಚೊ ವಾವ್ರ್ ಉಣೊ ಜಾತಾನಾ, ಜಾಲ್ಲೊ ಮುನಾಫೊ ಕಾಮಾಂಗರ್ ಲುಟುಂಕ್ಲಾಗ್ಲೆ..... ಶಿವು ಖಾಲಿ ಜಾತಾನಾ, ರುಕ್ಸಾನಾ ಮೆಳ್ಲ್ಲೊ, ಕುಂದಾಪೊರ್ಚೊ ಜೋರ್ಜಿ... ಮಲ್ಭರಿ ವರ್ಗೀಸ್..... ಎಕಾ ಪಾಟ್ಲ್ಯಾನ್ ಏಕ್.....ಹರ್ಏಕ್ಲ್ಯಾ ಥಂಯ್ ಆಸ್ಲ್ಲಿ ಏಕ್ಚ್ಚ್ ಆಶಾ ಏಕ್ ರೀತಿಚಿಂ ಭಗ್ಣಾಂ ಆನಿಂ ಉಮಾಳೆ.... ಏಕೇಕ್ ಪಾವ್ಟಿಂ ದೊಗಾಂ ತೇಗಾಂಚೊ ಸಾಂಗಾತ್ ತಾಣೆಂ ಕೆಲ್ಲೊಯ್ ಆಸಾ.... ಸರ್ವ್ ಪಯ್ಶಾಂಚ್ಯಾ ಆಶೆಂತ್ ನಾಚೊನ್ ವಾಂಚ್ಚೊ ಖೊಟೊ ಖೆಳ್..... ಜಾಯ್ ಜಾಲ್ಲೆಂ ಭಾಂಗಾರ್, ಪಯ್ಶೆ, ವಸ್ತುರ್ ಆನಿಂ ಜಾಯ್ ಕಿತೆಂ ಹ್ಯಾ ದಾದ್ಲ್ಯಾ ಥಾವ್ನ್೦ಚ್ ಮೆಳ್ತಾಲೆಂ....
ದೊಗಾಂ ಚೆಡ್ವಾಂ, ಸನ್ಹಾ ಆನಿಂ ಅಬೀರ್ ಗಾವಾಂತ್ ಶಿಕ್ಚೆಂ ಆಕೇರ್ ಕರುನ್, ಹೈದರಾಬಾದ್ ರಾವೊಂಕ್ ಸುರು ಕರ್ತಾನಾ, ಜಾಯ್ ತಿತ್ಲೆ ಪಯ್ಶೆ ದಾಡುಂಕ್ ರುಕ್ಸಾನಾಕ್ ಆತಾಂ ವಾಟೊ ಆಸ್ಲ್ಲ್ಯೊ. ಕುಡಿಚ್ಯಾ ಸೊಭಾಯೆಚ್ಯಾ ಪರ್ಮಳಾಕ್ ಪಿಶೆ ಜಾಂವ್ಚೆಂ ದಾದ್ಲೆ ಚಡ್ ಮೆಳ್ತಾನಾ ಪಯ್ಶಾಂಚಿ ರಾಸ್ ಚಡೊನ್ ಆಯ್ಲಿ.
ಪುಣ್, ಹ್ಯಾಚ್ಚ್ ವೇಳಾಂತ್ ಅವ್ಚಿತ್ ಆಯಿಲ್ಲಿ ಬರಿ ನಾತ್ಲ್ಲಿ... ಹೈದರಾಬಾದ್ ಶಿಕ್ಚೆಂ ಮಾಲ್ಘಡೆಂ ಚೆಡುಂ, ಸನ್ಹಾ ಕೊಲೆಜ್ ಸಾಂಡುನ್ ಖಂಚಾಗೀ ಮೊವಾಲಿ ಜುಲ್ಫಿಕರಾ ಲಾಗಿಂ ಜಿಯೆಂವ್ಕ್ ಸುರು ಕೆಲಾಂ ಮ್ಹಣ್ ಖಬರ್ ಮೆಳ್ತಾನಾ ರುಕ್ಸಾನಾಚೊ ಜೀವ್ ಉಡ್ಲ್ಲೊ. ಹೆಣೆಂ ತೆಣೆಂ ಮೆಳ್ಲ್ಲೆ ಪಯ್ಶೆ ಏಕ್ ಕರುನ್ ತೆಂ ಹೈದರಾಬಾದ್ ಪಾವ್ಲ್ಲೆಂ. ಪುಣ್, ಸನ್ಹಾಕ್ ಪಾಟಿಂ ಹಾಡುಂಕ್ ತಾಕಾ ಜಾಲೆಂ ನಾ. ನಿಖಹ ಜಾವ್ನ್ ಜಿಯೆಂವ್ಚ್ಯಾಂಕ್ ಕಿತೆಂ ಕರುವ್ಯೆತಾ?
ಏಕ್ ಬಳಾಧಿಕ್ ಸೊಫಾಣ್ ಪುಟ್ಲ್ಲೆಂ. ರುಕ್ಸಾನಾ ರಡ್ಲ್ಲೆಂ. ಆಪ್ಲ್ಯಾ ಸ್ವಪ್ಣಾಂಕ್ ಮ್ಹೊಂವಾಂ ಮೇಲ್ ಮಾಕುಂಕ್ ಕಿತ್ಲ್ಯಾ ಜಣಾಂಚಿ ಸ್ವಪ್ಣಾಂ ಆಪ್ಣೆಂ ಪುಟಂವ್ಕ್ ನಾಂತ್? ಅಸೆಂ ಕರ್ಚೆಂ ಸಮಾ ನ್ಹಂಯ್ ಮ್ಹಣ್ ತಾಕಾ ಭಗ್ತಾಲೆಂ ತರ್ ಹೆರ್ ವಾಟ್ ಖಂಚಿ?
ಜೀಣ್ ಕಾಂಟಾಳ್ಯಾಚಿ ಜಾಲ್ಲಿ ತರ್ ಆನಿಂ ಏಕ್ ಸೊಪಾಣ್ ಬಾಕಿ ಉರುಲ್ಲೆಂ.... ತ್ಯಾ ಖಾತಿರ್ ತಾಕಾ ಜಿಯೆಂವ್ಕ್ ಆಸ್ಲ್ಲೆಂ...
ದುಸ್ರಿ ಧು - ಅಬೀರ್. ಅಕ್ರೇಚೆಂ ಸೊಪಾಣ್. ನಾಚ್ಪಾಂತ್ ಆನಿಂ ಶಿಕ್ಪಾಂತ್ ಹುಶಾರ್.... ಪಳಂವ್ಕ್ ಸೊಭಿತ್... ಹಾಕಾ ಕೋಣ್೦ಯ್ ಮೆಳಾನಾ ಜಾಲ್ಯಾರ್ ಪುರೊ ಅಲ್ಲಾ ಮ್ಹಣ್ ತಾಣೆಂ ದೀಸಾಕ್ ಪಾಂಚ್ ನಮಾಜ್ಯೊ ಕೆಲ್ಲ್ಯೊ. ಜಾಯ್ ಜಾಲ್ಲೆಂ ಕಿತೆಂ ಪುರಾ ದಿತಾನಾ, ಜಾತಾ ತಿತ್ಲಿ ಜಾಗ್ರುತ್ಕಾಯ್ ತೆಂ ಸಾಂಗ್ತಾಲೆಂ..
ಮಸ್ಕತಾಕ್ ಪಾಟಿಂ ಆಯ್ಲ್ಯಾ ಉಪ್ರಾಂತ್ ಪರತ್ ತಾಕಾ ಮೆಳ್ಲ್ಲೆ - ಮಾಥ್ಯು, ಕಾಲೀದ್, ನಾಸರ್... ಆನಿಂ ಹೆರ್..... ಹರ್ಎಕ್ಲ್ಯಾಂಕ್ ಆಪ್ಲ್ಯಾ ಹಾಸ್ಯಾನ್೦ಚ್ಚ್ ಉಜೊ ದೀವ್ನ್ ಪಯ್ಶೆ ಜಮಯಿಲ್ಲೆ.... ಉಮಾಳ್ಯಾಂಕ್ ಆರಾವ್ನ್, ಸ್ವಪ್ಣಾಂ ವಿಕುನ್, ಆಪ್ಲೆಂ ಬೊಳ್ಕೆಂ ಭರ್ತಾನಾ ತೆಯ್ ಬಾರ್ಬಾದ್ ಜಾಲ್ಲೆ ತೆಂ ಖರೆಂ.
ರುಕ್ಸಾನಾನ್ ಪರತ್ ವ್ಹಡ್ ಉಸ್ವಾಸ್ ಸೊಡ್ಲೊ.... ಹಿಂ ಚಿಂತ್ನಾ ಮತಿಂತ್ ಯೆಂವ್ಚಿಂಚ್ಚ್ ನಾಕಾತ್ ಮ್ಹಣ್ ತೆಂ ಚಿಂತ್ತಾಲೆಂ... ಪುಣ್, ತಿಂ ಚಿಂತ್ನಾಂ ಯೆತಾಲಿಂಚ್ಚ್....ಮ್ಹೊಂವಾಂತ್ ಪಡೊನ್ ಖರ್ಪಾಲ್ಲ್ಯಾ ಸ್ವಪ್ಣಾಂಕ್ ತೆಂ ಪಳಯ್ತಾಲೆಂ...
ಆಜ್ ಅಬೀರಾಚೆಂ ಪೋನ್ ಆಯಿಲ್ಲೆಂ. ತಾಣೆಂಯ್ ಕೊಲೆಜ್ ಸಾಂಡ್ಲ್ಲಿ.... ಖಂಚಾಗೀ ಎಕಾ ಬಾರಾಂತ್ ನಾಚ್ಪಿಣ್ ಜಾವ್ನ್ ಕಾಮ್ ಕರ್ತಾಂ ಮ್ಹಣ್ ತಾಣೆಂ ತಿಳ್ಸಿಲ್ಲೆಂ. "ಪಾಟಿಂ ಯೆ ಪುತಾ... ಮ್ಹಜ್ಯಾ " ರುಕ್ಸಾನಾ ಪೋನಾಚೆರ್ ರಡ್ಲ್ಲೆಂ..." ತುಂಚ್ಚ್ ಮ್ಹಜೆಂ ಸೊಪಾಣ್... ಎಕ್ಚ್ಚ್ ಸೊಪಾಣ್... ತುಜೆ ಖಾತಿರ್ ಹಾಂವ್ ಜಿಯೆತಾಂ ಬಾಳಾ... ಪಾಟಿಂ ಯೆ .... ಹಾಂವ್ ಪಾಟಿಂ ಯೆತಾಂ ಆನಿಂ ಆಮಿಂ ಸಾಂಗಾತಾ ಜಿಯೆವ್ಯಾಂ...."
ಅಬೀರಾನ್ ತಾಕಾ ಜವಾಬ್ ದಿಲ್ಲಿ.... " ಉಮ್ಮ ... ತುಂವೆಂ ಯೆಂವ್ಚೆಂ ನಾಕಾ.... ಮ್ಹಾಕಾ ತುಜಿ ಗರ್ಜ್ ನಾ.... ಹಾಂವ್, ಹಾಂವ್ ಜಾವ್ನ್ ಜಿಯೆಂವ್ಕ್ ಆಶೆತಾಂ.... ಮ್ಜಜ್ಯಾ ಖುಶೆ ಪ್ರಮಾಣೆಂ.... ಕಿತ್ಯಾಕ್ ಹಾಂವ್ ವ್ಹಡ್ ಜಾಲ್ಯಾಂ ನ್ಹಂಯ್??"
ಪರತ್ ಮುಟಿಂತ್ ಆರಾಯಿಲ್ಲೆ ಚಣೆಂ ಮುಗ್ದಾಲ್ಲೆ.....
ರುಕ್ಸಾನಾಚ್ಯಾ ದೊಳ್ಯಾಂನಿ ದುಖಾಂ ಆಸ್ಲ್ಲಿಂ....
"ತುಕಾ ನಾಸರ್ ಸಕಯ್ಲ್ ರಾಕೊನ್ ರಾವ್ಲಾ...." ಶಾಲಿನಿನ್ ಮ್ಹಳ್ಳಿಂ ಉತ್ರಾಂ ತಾಕಾ ಆಯ್ಕಾಲಿಂ....
"ಹಾಂವ್ ವಚಾನಾ ಶಾಲು....." ತೆಂ ರಡ್ಲೆಂ....."ಕೋಣಾ ಖಾತಿರ್ ಹಾಂವೆಂ ಹೆಂ ಕರ್ಚೆಂ.... ಮ್ಹಜಿಂ ಸ್ವಪ್ಣಾಂ ಫುಟ್ಲ್ಯಾಂತ್...."
ಶಾಲಿನಿನ್ ಕಿತೆಂಚ್ಚ್ ಮ್ಹಳೆಂ ನಾ.....
ಹ್ಯಾ ವೆಳಿಂ ಕೊಣೆಂಯ್ ಆಪ್ಲೆಂ ತೋಂಡ್ ದವರುನ್ ರಡೊಂಕ್ ಭುಜ್ ದಿಲ್ಲೆಂ ತರ್ ಕಿತ್ಲೆಂ ಬರೆಂ ಅಸ್ಲ್ಲೆಂ ಮ್ಹಣ್ ತಾಣೆಂ ಚಿಂತ್ಲೆಂ ತರ್ ಕೋಣ್೦ಚ್ಚ್ ತ್ಯಾ ವೆಳಿಂ ತಾಚ್ಯಾ ಲಾಗಿಂ ನಾತ್ಲ್ಲಿಂ...
ಸಕಯ್ಲ್ ಆಸ್ಲ್ಲೊ ನಾಸರ್ ಮಾತ್ ಆನಿಕ್ಯೀ ಕಾರಾಚೆಂ ಹೊರ್ನ್ ಮಾರುನ್ ಆಸ್ಲ್ಲೊ.....
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
