ಕವಿತಾकविताPoem
ವೋಂಯ್
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾ ಮ್ಹಳ್ಯಾರ್ ಭಗ್ಣಾಂಚಿ ಅಭಿವ್ಯಕ್ತಿ.
ಕವಿತಾಪಾಠ್ - 5
ಲಿಸಾಂವ್ - 5. ಬಾಂಯ್
ಕವಿತಾ - ಬಾಂಯ್
ಕವಿ: ಆಂಡ್ರು ಎಲ್. ಡಿ’ಕುನ್ಹಾ
ಬೂಕ್: ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ
ಪ್ರಕಾಶಕ್: ಆಶಾವಾದಿ ಪ್ರಕಾಶನ್
ಪಾಠ್ ಚಲವ್ಪಿ: ಮೆಲ್ವಿನ್ ಜೆ. ವಾಸ್
ತಾರಿಕ್: 10 ಜೂನ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ತ್ಯಾ ಅಟ್ರಾ ಮುಂಡಾಂಚಾ
ಝರಿಚಾ ಬಾಂಯ್ಚೆರ್ ಸರ್ವಾಂಚೆ ದೊಳೆ
ಸಗ್ಳ್ಯಾ ಗಾಂವಾಚೆ ಭಿಜ್ಲೆ ಗಳೆ
ಖೊಂಡ್ಲ್ಲೆಂ ತಾಣಿಂ ಗುಡ್ಯಾರ್
ಕೊಸ್ಳೊಂಕ್ ಸೊಡಿನಾಸ್ತಾಂ ಕಶ್ಟಾಂನಿ
ಬಾಬಾನ್ ಬಾರಾ ಮೂಂಡ್
ಪುತಾನ್ ಸ ಮೂಂಡ್
ಇಂಗ್ಲಿಶ್ ಮೀಡಿಯಮ್ ನಾತು ತೇಗ್
ಘಡ್ಯೆ ಘಡ್ಯೆ ತಿಳ್ತಾಲೆ
ಗುಂಡಾಯ್ ಮೆಜ್ತಾಲೆ ಮಾತ್ಯೆಂತ್ ಖೆಳ್ತಾಲೆ
ಅಬೇಸ್ ಆರ್ಯಾಕ್ ಹಾಸ್ತಾಲೆ..
ಖೊಂಡ್ಲ್ಲೆ ತೆ ಮಾಲ್ಘಡೆ ಘಾಮ್ ವ್ಹಾಳವ್ನ್
ಶೆತ್ ಪಿಕವ್ನ್ ಸರೊನ್ ಗೆಲೆ
ಝರಿಚೆ ವಾಂಟೆ ಕರಿನಾಸ್ತಾಂ
ವಾಂಟೆ ಕರ್ಚಾಕ್ ಶೆತಾಚೆ ಆತಾಂ
ನಾತ್ವಾಂನಿ ತೆಗಾಂ ಯಂತ್ರಾ ತಂತ್ರಾಂ
ಶಿಂತ್ರ್ಯಾಂನಿ ಖೊಂಡ್ಲಿಂ
ತೀನ್ ಬೋರ್ವೆಲಾಂ
ಬಾಂಯ್ಚ್ಯೊ ಝರಿ ಶಿರೊ ಕಾತ್ರುನ್
ಸರ್ವಾಂನಿ ಸಾಂಡುನ್ ಘಾಲ್ಲಿ
ಸುಕೊನ್ ವೆಚಿ ಬಾಂಯ್ ಆತಾಂ
ಕೊಣಾಕ್ ಜಾಯ್? ಪುರ್ಚಿ ಕೊಣೆಂ?
ಉಬ್ಜಾಲೊ ನ್ಯಾಯ್
ಎಕ್ಚ್ ವ್ಹಾಟ್ ಉರ್ಲಿ
ತೆಗಾಂ ನಾತ್ವಾಂನಿ ಸಾಂಗಾತಾ ಮೆಳೊನ್
ಪುರ್ಲಿ ಝರ್ ಪುರ್ತಿ ಜಿರ್ಲಿ.
ಏಕ್ ನಾತು ಹಾಂವ್ ಆತಾಂ
ಶ್ಹೆರಾಂತ್ ರಾವೊನ್
ಮುನ್ಸಿಪಾಲಿಟಿಚೆಂ ಉದಕ್ ಪಿಯೆತಾಂ
ಆನಿ ಆಬಾಚಾ ಉಸ್ಕ್ಯಾರ್ ಬಸೊನ್
ಪಿಯೆಲ್ಲ್ಯಾ ತ್ಯಾ ಸರ್ಲ್ಲ್ಯಾ ಬಾಂಯ್ಚಾ
ಅಪುಟ್ ರುಚಿಕ್ ಉದ್ಕಾಚೊ
ಏಕ್ ಉಡಾಸ್ ಕಾಡ್ನ್
ಕವಿತಾಚಿ ವಾತ್ ಝಳಯ್ತಾಂ.
ಕವಿಚಿ ವಳೊಕ್:
ಆಂಡ್ರು ಎಲ್. ಡಿ’ಕುನ್ಹಾ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕವಿಂಪಯ್ಕಿ ಎಕ್ಲೊ. ಪರ್ಗಟ್ ಜಾಂವ್ಚೊ ತಾಚೊ ಹೊ ಪಯ್ಲೊ ಕವಿತಾಜಮೊ ತರ್ಯೀ ಕವಿತಾಶೆತಾಂತ್ ತೊ ನವೊ ನ್ಹಯ್. ’ಕವಿತಾವ್ಹಾಳೊ’ ಮ್ಹಳ್ಳಿ ತಾಚಿ ಕವಿತಾಂಚಿ ವ್ಹೋಳ್, ಪಾಟ್ಲ್ಯಾ ತೀನ್ ವರ್ಸಾಂ ಥಾವ್ನ್ ಮಾಯ್ಭಾಸ್ ಸಾಯ್ಟಾಚೆರ್ ಪರ್ಗಟ್ ಜಾವ್ನ್ ಆಸಾ. ಹೊ ಫಕತ್ತ್ ಕವಿತಾ ಮಾತ್ರ್ ನ್ಹಯ್, ಕಾಣ್ಯೊಂಯ್ ಬರಯ್ತಾ ಆನಿಂ ತಾಚಾ ಸಭಾರ್ ಕಾಣ್ಯಾಂ-ಕವಿತಾಂಕ್ ಸ್ಪರ್ಧ್ಯಾಂನಿ ಇನಾಮಾಂಯ್ ಲಾಭ್ಲ್ಯಾಂತ್. ದುಭಾಯಾಂತ್ಲ್ಯಾ ಕೊಂಕ್ಣಿ ಬರವ್ಪ್ಯಾಂಚಾ ಎಕ್ತಾರಾಚೊ ಪ್ರಸ್ತುತ್ ಸಂಪಾದಕ್ಯೀ ತೊ ಜಾವ್ನಾಸಾ.
(ತಸ್ವಿರೆಂತ್ ಆಸ್ಚಿಂ - ದಾವ್ಯಾ ಥಾವ್ನ್ ಉಜ್ವ್ಯಾಕ್)
ಬಸ್ಲ್ಲಿಂ: ಐಡಾ ಡಿ’ಸಿಲ್ವಾ, ಗಿಬ್ಬಾ ಕುಲ್ಶೇಕರ್, ಆಂಟನಿ ಮಿನೇಜಸ್, ಮೆಲ್ವಿನ್ ಜೆ. ವಾಸ್.
ಉಭಿಂ ಆಸ್ಚಿಂ: ಕ್ಯಾರಲ್ ಮಾರ್ಟಿಸ್, ವೀಣಾ ಮಿನೇಜಸ್, ಪ್ರಿಯಾ ಸಿಕ್ವೇರಾ, ಕ್ಲಾರಾ ಫೆರ್ನಾಂಡಿಸ್, ಜೊಮೆಲ್ ಬೊಂದೆಲ್, ಸಿರಿಲ್ ಪೆರಿಸ್, ಅನಿಲ್ ಮಿನೇಜಸ್ ಆನಿ ವಲ್ಲಿ ಕ್ವಾಡ್ರಸ್ (ತಸ್ವೀರೆಂತ್ ನಾ).
ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್
ಕವಿತಾಪಾಠ್ - 4. ಆಜ್ (ವಲ್ಲಿ ಕ್ವಾಡ್ರಸ್)
ಕವಿತಾಪಾಠ್ - 3. ಸಲ್ವಣಿ (ಫ್ರೆಡ್ ಕುಮಾರ್)
ಕವಿತಾಪಾಠ್ - 2. ಕಯ್ದ್ಯಾಚಿ ಕವಿತಾ (ಎಚ್ಚೆಮ್)
ಕವಿತಾಪಾಠ್ - 1. ವಾಟ್ (ಮೆಲ್ವಿನ್ ರೊಡ್ರಿಗಸ್)
ವೋಂಯ್ ಉಟೊನ್ ಶೆತ್ ಚರ್ತಾನಾ! [- ಮೆಲ್ವಿನ್ ಜೆ. ವಾಸ್ ಕೆಲಯಾರ್]
’ಬಾಂಯ್’ ಕೊಂಕ್ಣಿ ಸಂಸ್ಕ್ರತಿಚಿ ಬದ್ಲಾಲ್ಲಿ ಪರಿಗತ್ ಹುಸ್ಕೆವ್ನ್ ವ್ಹಾಳಯ್ಲೆಲ್ಯಾ ಥೊಡ್ಯಾಚ್ ಕವಿತಾಂ ಪಯ್ಕಿ ಬಾಬ್ ಆಂಡ್ರ್ಯುಚೆಂ ಹೆಂ ಕವಿತಾ ಆಪ್ಲ್ಯಾ ವಿಭಿನ್ನ್ ಶೈಲೆಧ್ವಾರಿಂ ಆನಿ ಸಾದ್ಯಾ ಉತ್ರಾಂದ್ವಾರಿಂ ಆಪ್ಲೆಂ ಉಂಚ್ಲೆಪಣ್ ಉಚಾರ್ತಾ. ಕವಿಚೊ ವಿಚಾರ್ ಹಾಂಗಾಸರ್ ಪರ್ನೊ ತರೀಯ್ ತೊ ವಿಚಾರ್ ವ್ಹಾಳಯಿಲ್ಲಿ ರೀತ್ ನವಿ. ಕವಿತೆಕ್ ಆತಾಂ ಸವಿಸ್ತಾರ್ ವ್ಹಾಳಂವ್ಚೆ ತರ್.....
"ತ್ಯಾ ಆಟ್ರಾ ಮುಂಡಾಂಚ್ಯಾ ಝರಿಚ್ಯಾ ಬಾಂಯ್ಚೆರ್ ಸರ್ವಾಂಚೆಂ ದೊಳೆ ಸಗ್ಳ್ಯಾ ಗಾಂವಾಚೆ ಭಿಜ್ಲೆ ಗಳೆ"
ಕವಿತೆಚೆ ಸುರ್ವಾತ್ಚ್ ಬಾಂಯ್ಚಿ ಕೀರ್ತ್ ಗಾಜ್ತಾ. ಬಾಂಯ್ ಮ್ಹಳ್ಯಾರ್ ಗುಂಡಾಯ್. ಗುಂಡಾಯ್ ಮ್ಹಳ್ಯಾರ್ ನಿತಳಾಯ್ ಆನಿಂ ತಾಚೆಂ ಆಪುಟ್ಪಣ್. ಹ್ಯಾ ನಿತಳಾಯೆ ವಯ್ರ್ ಸರ್ವಾಂಚೆ ದೊಳೆ. ಸಗ್ಳ್ಯಾ ಗಾಂವಾಚೆ ತಿಣೆಂ ಗಳೆ ಭಿಜಯ್ಲ್ಯಾತ್. ಏಕ್ ಬಾಂಯ್ ಆನಿ ಸಗ್ಳೊ ಗಾಂವ್. ಹಾಂಗಾಸರ್ ವಿಚಾರ್ ಉಗ್ಡಾಸ್ ದವರ್ಚೊ ಗರ್ಜೆಚೊ ಆಮ್ಚ್ಯಾ ಲಿಸಾಂವಾಚಾ ದುಸ್ರ್ಯಾ ಭಾಗಾಕ್.
"ಖೊಂಡ್ಲ್ಲೆಂ ತಾಣಿಂ ಗುಡ್ಯಾರ್ ಕೊಸ್ಳೊಂಕ್ ಸೊಡಿನಾಸ್ತಾಂ
ಕಶ್ಟಾಂನಿ ಬಾಬಾನ್ ಭಾರಾ ಮುಂಡ್ ಪುತಾನ್ ಸ ಮುಂಡ್
ಇಂಗ್ಲಿಶ್ ಮೀಡಿಯಂ ನಾತು ತೇಗ್ ಘಡ್ಯೆ ಘಡ್ಯೆ ತಿಳ್ತಾಲೆ
ಗುಂಡಾಯ್ ಮೆಜ್ತಾಲೆ ಮಾತ್ಯೆಂತ್ ಖೆಳ್ತಾಲೆ ಆಭೇಸ್ ಆರ್ಯಾಕ್ ಹಾಸ್ತಾಲೆ"
ಹಾಂಗಾಸರ್ ಉತ್ರಾಂ ಪಾಟ್ಲ್ಯೊ ಇಮಾಜ್ಯೊ ಪಳಂವ್ಚೊ ತರ್, ಗುಡೊ.. ಮ್ಹಣ್ಜೆ ಉಭಾರಾಯ್. ಉಭಾರಾಯ್ ಕೆದ್ನಾಂಯ್ ಪವಿತ್ರ್ಪಣ್. ಕವಿ ಹ್ಯಾ ಬಾಂಯ್ಕ್ ಪವಿತ್ರ್ಪಣಾಕ್ ಸರಿ ಕರ್ತಾ. ತಶೆಂ ತಿ ಖೊಂಡುನ್ ಆಯಿಲ್ಲಿ ರೀತ್, ಬಾಬಾನ್ ಭಾರಾ ಮುಂಡ್.. ಪುತಾನ್ ಸ ಮುಂಡ್.... ಹಾಂಗಾಸರ್ ಕುಳಿಯೆ ಥಾವ್ನ್ ಕುಳಿಯೆಕ್ ಜಾಂವ್ಚಿ ಬದ್ಲಾವಣ್ ಆನಿ ಇಂಗ್ಲಿಶ್ ಮೀಡಿಯಮ್ ನಾತು ಸಂಪೂರ್ಣ್ ಬದ್ಲಾಲ್ಲೆ.
"ಖೊಂಡ್ಲ್ಲೆ ತೆ ಮಾಲ್ಘಡೆ ಘಾಮ್ ವ್ಹಾಳವ್ನ್ ಶೆತ್ ಪಿಕವ್ನ್ ಸರೊನ್ ಗೆಲೆ ಝರಿಚೆ ವಾಂಟೆ ಕರಿನಾಸ್ತಾಂ"
ಬಾಂಯ್ಚೆರ್ ಕಾಡ್ಲ್ಲ್ಯಾ ಘಾಮಾಚೊ, ಪ್ರತಿಫಳ್ ಪಿಕಯಿಲ್ಲೆಂ ಶೆತ್...! ತೆಂ ಶೆತ್ ಪಿಕಯಿಲ್ಲೆ ಸರ್ಲ್ಯಾತ್ ಮ್ಹಳ್ಳ್ಯಾರ್ ಶೆತಾಂತ್ ಭಾಂಗಾರ್ ಪಿಕ್ತಾಲೆಂ. ತೆದ್ನಾಂ ಎಕ್ವಟ್ ಆಸ್ಲ್ಲೊ ಆತಾಂ ನಾಂ.
"ವಾಂಟೆ ಕರ್ಚ್ಯಾಕ್ ಶೆತಾಚೆ ಆತಾಂ ನಾತ್ವಾಂನಿ ತೆಗಾಂ ಯಂತ್ರಾಂ ತಂತ್ರಾ ಶಿಂತ್ರ್ಯಾನಿಂ
ಖೊಂಡ್ಲಿಂ ತೀನ್ ಬೋರ್ವೆಲಾಂ ಬಾಂಯ್ಚೊ ಝರಿ ಶಿರೊ ಕಾತ್ರುನ್"
ಹಾಂಗಾಸರ್, ಶೆತ್ ವಾಂಟ್ಯಾಕ್ ವಳ್ಕಾತಾ. ಶೆತಾಚೆ ವಾಂಟೆ ಜಾತಾನಾಂ, ನವೆಂಸಾಂವಾಕ್ ವೆಂಗ್ಲ್ಲ್ಯಾ ತೆಗಾಂ ನಾತ್ವಾಂನಿ, ಯಂತ್ರಾಂ, ತಂತ್ರಾಂ ಶಿಂತ್ರ್ಯಾನಿ ತೀನ್ ವಾಂಟ್ಯಾನಿಂ ತೀನ್ ಬೋರ್ವೆಲಾಂ ಖೊಂಡ್ತಾನಾ, ಬಾಂಯ್ಚೊ ಶಿರೊ ಕಾತ್ರುನ್ ವೆತಾತ್.
"ಸರ್ವಾಂನಿ ಸಾಂಡುನ್ ಘಾಲ್ಲಿ ಸುಕೊನ್ ವೆಚಿ ಬಾಂಯ್ ಆತಾಂ ಕೊಣಾಕ್ ಜಾಯ್? ಪುರ್ಚಿ ಕೊಣೆಂ? ಉಭ್ಜಾಲೊ ನ್ಯಾಯ್" ಬಾಂಯ್ ಆತಾಂ ಎಕ್ಸುರ್ಪಣಾಂತ್. ವ್ಹಾಳ್ಚಿ ಝರ್ ನಾಂ. ಸುಕ್ಲೆಲ್ಯಾ ಬಾಂಯ್ಕ್ ಪುರುಂಕ್ ಆತಾಂ ವಿಚಾರ್ ತರ್ಕ್.
"ಎಕ್ಚ್ ವಾಟ್ ಉರ್ಲಿ ತೆಗಾಂ ನಾತ್ವಾಂನಿ ಸಾಂಗಾತಾ ಮೆಳೊನ್ ಪುರ್ಲಿ ಝರ್ ಆತಾಂ ಪುರ್ತಿ ಜಿರ್ಲಿ"
ಏಕ್ ಜೆರಾಲ್ ಎಕ್ತಾರ್ ಆನಿ ಏಕ್ ಜೆರಾಲ್ ವಿಚಾರ್. ಸರ್ವಾಂನಿ ಸಾಂಗಾತಾ ಮೆಳೊನ್ ಬಾಂಯ್ ಪುರ್ಲಿ.
"ಏಕ್ ನಾತು ಹಾಂವ್ ಆತಾಂ ಶ್ಹೆರಾಂತ್ ರಾವೊನ್ ಮುನ್ಸಿಪಾಲಿಟಿಚೆಂ ಉದಾಕ್ ಪಿಯೆತಾಂ
ಆನಿ ಆಬಾಚಾ ಉಸ್ಕ್ಯಾರ್ ಬೊಸೊನ್ ಪಿಯೆಲ್ಲ್ಯಾ ತೆ ಸರ್ಲ್ಲೆ ಬಾಂಯ್ಚಾ
ಅಪುಟ್ ರುಚಿಕ್ ಉದ್ಕಾಚೊ ಏಕ್ ಉಗ್ಡಾಸ್ ಕಾಡುನ್ ಕವಿತೆಚಿ ವಾತ್ ಝಳಯ್ತಾಂ"
ಏಕ್ ನಾತು, ಆಜ್ ಶ್ಹೆರಾಕ್ ಪಾವ್ಲ್ಲೊ ಗಾಂವ್ಚಾ ಬಾಂಯ್ಚೊ ಉಗ್ಡಾಸ್ ಕಾಡ್ತಾ. ಮುನ್ಸಿಪಾಲಿಟಿಚೆಂ ಉದಾಕ್ ಪಿಯೆತಾನಾ ತ್ಯಾ ಸರ್ಲ್ಲ್ಯಾ ಬಾಂಯ್ಚಾ ಅಪುಟ್ ಝರಿಚೊ ಉಗ್ಡಾಸ್. ಹ್ಯಾ ಉಗ್ಡಾಸಾನ್ ಅರ್ಪಣ್ ಕರುನ್ ಹಿ ಕವಿತೆಚಿ ವಾತ್....! ಹೊ ಹ್ಯಾ ಬಾಂಯ್ ಕವಿತೆಚೊ ಸಾರ್. ಆತಾಂ ಹಿಚ್ ಕವಿತಾ ಸವಿಸ್ತಾರ್ ರಿತಿರ್ ಅಧ್ಯಾಯನ್ ಕರ್ಚೆಂ ತರ್ ಕವಿ ಖಂಡಿತ್ ತಾಚ್ಯಾ ಗಾಂವ್ಚಾ ಬಾಂಯ್ಚಾ ವಿಶಿಂ ಉಲಯ್ನಾಂ. ಕಿತ್ಯಾಕ್ ಮ್ಹಳ್ಯಾರ್, ಆಬಾಚ್ಯಾ ಉಸ್ಕ್ಯಾರ್ ಪಿಯೆಲ್ಲ್ಯಾ ಉದ್ಕಾಚಿ ರೂಚ್ ಜರ್ ಮ್ಹನ್ಶ್ಯಾಚಾ ಜಿಬೆಕ್ ದಾಂಭುನ್ ಧರ್ತಾ ತರ್, ಬಹುಶ: ಆಜ್ ಆಮ್ಚಾ ಗಾಂವಾನಿಂ ಪ್ರಾಯೆಸ್ತಾಂಚಿಂ ಘರಾಂ ಖಂಡಿತ್ ಉದೆತಿಂ ನಾಂತ್. ದುಸ್ರೆಂ, ತೊ ನಿಯಾಳ್ ಕರ್ತಾ ಪಿಕಯಿಲ್ಲ್ಯಾ ಶೆತಾಚೊ. ಶೆತ್ ನಾಸ್ತಾನಾ ಹಾಂಗಾಸರ್ ಬಾಂಯ್ ನಾಂ. ಶೆತಾಚೆ ವಾಂಟೆ ಜಾತಾನಾ ಬಾಂಯ್ಚೊ ಝರಿ ಕಾತ್ರುನ್ ವೆತಾತ್. ಕಾರಾಣ್ ಯಂತ್ರಾಂ ತಂತ್ರಾಂ ಆನಿ ಶಿಂತ್ರ್ಯೊ. ಹ್ಯೊ ಇಮಾಜಿ ಭಾರಿಚ್ ಗರ್ಜೆಂಚ್ಯೊ.
"ಏಕ್ ನಾತು ಹಾಂವ್ ಆತಾಂ ಶ್ಹೆರಾಂತ್ ರಾವೊನ್ ಮುನಿಸಿಪಾಲಿಟಿಚೆಂ ಉದಾಕ್ ಪಿಯೆತಾಂ"
ಶ್ಹೆರಾಂತ್ಲೆಂ ಮುನಿಸಿಪಾಲಿಟಿಚೆಂ ಉದಾಕ್. ಶ್ಹೆರ್ ಮ್ಹಳ್ಯಾರ್ ಗಡ್ದಿ. ಹಾಂಗಾಸರ್ ಝರಿಂಚಿ ಗಡ್ದಿ. ಹ್ಯಾ ಸಬಾರ್ ಝರಿಂಚೆಂ ಉದಾಕ್ ಮುನಿಸಿಪಾಲಿಟಿಚಾ ಎಕಾ ನಳಾಂತ್ ಮ್ಹಳ್ಯಾರ್ ಆಜ್ ತೊಚ್ಚ್ ವಿಸ್ರಾಲಾ ಆಪುಣ್ ಕಸಲ್ಯಾ ಝರಿಚೆಂ ಉದಾಕ್ ಪಿಯೆತಾಂ? ಆನಿ ಆಪ್ಲ್ಯಾ ಶಿಂತಿದಾಕ್ ಉಸವ್ನ್ ತೊ ಏಕ್ ಉಗ್ಡಾಸ್ ಕಾಡ್ತಾ ಆಪ್ಲ್ಯಾ ಆಪ್ಣಾಪಣಾಚೊ.
ಹ್ಯಾ ಹಂತಾರ್ ಹೆಂ ಎಕಾ ಸಂಸ್ಕ್ರತೆಚೆರ್ ಬರಯ್ಲೆಲೆಂ ಮ್ಹಣೊನ್ ಚಿಂತ್ಯೆತಾ. ಪೂಣ್ ಹಾಂಗಾಸರ್ ಕವಿ ಖುದ್ಧ್ ಕೊಂಕ್ಣೊ ಜಾಲ್ಲ್ಯಾನ್ ಜೆರಾಲ್ ರಿತಿನ್ ಹೆಂ ಕವಿತಾ ಕೊಂಕ್ಣಿ ಸಮಾಜೆಚಾ ಸಂಸ್ಕ್ರತಿ ವಯ್ರ್ ಬರಯ್ಲಾಂ ಮ್ಹಣ್ ವಾದ್ ಮಾಂಡ್ಯೆತಾ. ಹ್ಯಾ ವಾದಾಕ್ ಮುಖಾರ್ಸುಂಚೆಂ ತರ್....
"ತ್ಯಾ ಅಟ್ರಾ ಮುಂಡಾಂಚ್ಯಾ ಝರಿಚ್ಯಾ ಬಾಂಯ್ಚೆರ್ ಸರ್ವಾಂಚೆ ದೊಳೆ ಸಗ್ಳ್ಯಾ ಗಾಂವ್ಚೆ ಭಿಜ್ಲೆ ಗಳೆ.....
ತ್ಯಾ ಸರ್ಲ್ಲ್ಯಾ ಬಾಂಯ್ಚಾ ಅಪುಟ್ ರುಚಿಕ್ ಉದ್ಕಾಚೊ ಏಕ್ ಉಗ್ಡಾಸ್ ಕಾಡುನ್ ಕವಿತೆಚಿ ವಾತ್ ಝಳಯ್ತಾಂ"
ಹೆಂ ಕವಿತಾ ವೈಭವಾಚ್ಯಾ ಕಿರ್ತೆ ಥಾವ್ನ್ ಆರಂಭ್ ಜಾವ್ನ್ ಉಗ್ಡಾಸಾಚಾ ಸಕ್ತೆಂತ್ ಆಖೇರ್ ಜಾತಾ. ಸಗ್ಳ್ಯಾ ಗಾಂವ್ಚಿ ಏಕ್ ಬಾಂಯ್ ಸಗ್ಳ್ಯಾ ಗಾಂವಾಚೆ ಗಳೆ ಭಿಜಯ್ತಾಲಿ ತರ್ ಆಜ್ ತಿ ಪುರ್ಲ್ಯಾ. ತಿ ಪುರ್ಲ್ಯಾ ವಾ ಸಾಂಡ್ಲ್ಯಾ...? ಯಂತ್ರಾಂ, ತಂತ್ರಾಂ, ಶಿಂತ್ರ್ಯಾನಿ ಬೋರ್ವೆಲಾಂ ಖೊಂಡ್ಲ್ಲ್ಯಾ ನಾತ್ವಾಂಚಿ ಆತಾಂ ಶ್ಹೆರಾಂತ್ ಪೊಳಾಫಳ್. ಕಾರಾಣ್ ಸಲ್ವಣ್....!
ಹಾಂಗಾಸರ್ ನಾತು ಸಲ್ವಾಲಾ. ಶ್ಹೆರಾಕ್ ತೊ ವೆಂಗ್ಲಾ ಮ್ಹಳ್ಯಾರ್, ಗಾಂವಾಕ್ ಸಾಂಡುನ್ ಶ್ಹೆರಾಚಿ ವೇಂಗ್. ಸ್ವಷ್ಟ್ ಸಲ್ವಣ್. ಸಲ್ವಣೆಂತ್ ನಿರಾಶಾ ಆನಿ ನಿರಾಶೆಂತ್ ಉಗ್ಡಾಸ್ ಮಾತ್ರ್. ಪಾಟಿಂ ಪರ್ತವ್ಣಿ ನಾಂ ಯಾ ಆಶಾವಾದ್ ನಾಂ. ಕ್ರಾಂತಿ ನಾಂ ಸಂಪೂರ್ಣ್ ನಿರಾಶೆಚಾ ಥಳಾಂತ್ ಕವಿತಾ ಆಖೇರ್ ಜಾತಾ. ಜಾಂವ್ ಹೆಂ ಕವಿತಾ ತ್ಯಾ ಬಾಂಯ್ಚಾ ವೈಭವಾಕ್ ಉಗ್ಡಾಸ್ ಕಾಡ್ತಾ ಯಾ ತ್ಯಾ ಆಮ್ಚಾ ಕೊಂಕ್ಣಿ ಸಂಸ್ಕ್ರತಿಕ್, ತಿಚ್ಯಾ ಸುಕೊನ್ ಯೆಂವ್ಚಾ ಝರಿಚೊ ಉಗ್ಡಾಸ್ ಕಾಡ್ತಾ ತರ್ ಸಲ್ವಣ್ ಕಿತ್ಯಾಕ್?
"ಏಕ್ ಉಗ್ಡಾಸ್ ಕಾಡುನ್ ಕವಿತೆಚಿ ವಾತ್ ಝಳಯ್ತಾಂ"
ಹಾಂಗಾಸರ್ ಉಗ್ಡಾಸ್ ಏಕ್ ಮಾತ್ರ್ ಅಸ್ಪಷ್ಟ್ ಪಲಾಯನ್ ಯಾ ಪೊಳಾಪಳ್. ಸ್ವಷ್ಟ್ ಸಲ್ವಣೆಂತ್ ಅಸ್ಪಷ್ಟ್ ಪಲಾಯನ್.
"ಏಕ್ ನಾತು ಹಾಂವ್ ಆತಾಂ ಶ್ಹೆರಾಂತ್ ರಾವೊನ್"
ಕವಿತೆಚಾ ವಿಚಾರಾಂಕ್ ಹೆಂ ಪಲಾಯನ್ ಖಂಡಿತ್ ನೈಂ. ಕಾರಾಣ್.....
"ಯಂತ್ರಾಂ ತಂತ್ರಾ ಶಿಂತ್ರ್ಯಾನಿ ಖೊಂಡ್ಲಿ ತೀನ್ ಬೊರ್ವೆಲಾಂ ಬಾಂಯ್ಚೊ ಝರಿ ಶಿರೊ ಕಾತ್ರುನ್"
ಸಲ್ವಣ್ ಹಾಂಗಾಸರ್ ಉದೆಲ್ಯಾ. ಬಾಂಯ್ಚಾ ಝರಿಕ್ ಶ್ಹೆರ್ ಕಾಂಯ್ ಬಾಧಕ್ ನಾಂ. ಶ್ಹೆರಾಂತ್ ಜಿಯೆತಾನಾಂಯ್ ಬಾಂಯ್ಚಿ ಝರ್ ಫುಲ್ತಾ. ಪುಣ್ ಶೆತ್ ಪಿಕಾನಾಂ. ಹ್ಯಾ ಶೆತಾಕ್ ಆಮ್ಚೆಂ ಕೊಂಕ್ಣಿ ಕುಟಾಮ್, ಆಮ್ಚಿ ಕೊಂಕ್ಣಿ ಸಮಾಜ್ ಜಾವ್ನ್ ವಿಂಚ್ಯೆತ್. ಹ್ಯಾ ಸಮಾಜೆಂತ್ ಆಮ್ಚಾ ಸಂಸ್ಕ್ರತೆಚೆಂ ಆಬೇಸ್-ಆರ್ಯಾ ಆಸ್ಲ್ಲೆಂ. ಬಾಂಯ್ಚೊ ಶಿರೊ ಹಾಂಗಾಸರ್ ಕಾತ್ರಲ್ಯಾತ್. ಸಂಸ್ಕ್ರತೆನ್ ಹಾಂಗಾಸರ್ ವೈಭವ್ ಹೊಗ್ಡಾಯ್ಲಾ. ಆಬೇಸ್ ಆರ್ಯಾ....! ಚಡ್ಣಿ ಆನಿಂ ದೆಂವ್ಣಿ. ಹಿ ಚಡ್ಣಿ ಆನಿ ದೆಂವ್ಣಿ ಎಕಾಮೆಕಾ ಜೀವನ್ ಮರಣಾಚೊ ಸಾಂಗಾತ್ ದಿತಾತ್. ಚಡ್ಣಿ ನಾಸ್ತಾನಾ ದೆಂವ್ಣಿ ನಾಂ ಯಾ ದೆಂವ್ಣಿ ನಾಸ್ತಾಂ ಚಡ್ಣಿ ನಾಂ ಆನಿ ತೊ ಸಂತೊಸ್ ನಾಂ. ಹಾಂಗಾಸರ್ ನಿರಾಸ್ ನಾಂ ಸಲ್ವಣ್ ನಾಂ, ಬಗಾರ್ ಕ್ರಾಂತಿ...
"ಖೊಂಡ್ಲ್ಲೆಂ ತಾಣಿಂ ಗುಡ್ಯಾರ್ ಕೊಸ್ಳೊಂಕ್ ಸೊಡಿನಾಸ್ತಾನಾ ಕಶ್ಟಾಂನಿ..... ಘಾಮ್ ವಾಳವ್ನ್ ಶೆತ್ ಪಿಕವ್ನ್..."
ಗುಡೊ, ಘಾಮ್, ಶೆತ್, ಕಷ್ಟ್... ಇಮಾಜೆ ಪಾಟ್ಲೊ ಅರ್ಥ್ ಪಳಯ್ಲೊ ತರ್, ಆಪ್ಲಿ ಸಂಸ್ಕ್ರತಿ ತಿ ಪವಿತ್ರ್ಪಣಾಚಿ ಸಂಸ್ಕ್ರತಿ, ಪವಿತ್ರ್ ರಿತಿರ್ ಸಾಂಬಾಳುನ್ ವೆಲ್ಲಿ. ತಾಕಾ ಬರೊ ಮಾನ್ ಮೆಳ್ಲ್ಲೊ. ತೆದ್ನಾಂ ಘಾಮಾಚಿ ಪರ್ವಾ ನಾತ್ಲ್ಲಿ. ಕಶ್ಟ್, ನಶ್ಟಾಚಿ ಪರ್ವಾ ನಾತಲ್ಲಿ. ಶೆತ್ ಧಾರಾಳ್ ಪಿಕ್ಲ್ಲೆಂ.... ಹಾಚೊ ಪರಿಣಾಮ್ ವೈಭವ್ ಯಾ ಜೀಕ್. ನಿರಾಸ್ ನಾಂ. ಪಲಾಯನ್ ನಾಂ. ಎಕ್ವಟ್ ಆನಿ ನಿಸ್ವಾರ್ಥ್ ಎಕಾ ವೋಂಯ್ಪರಿಂ ಹ್ಯಾ ಶೆತಾಕ್ ಸಾಂಭಾಳ್ತಾಲಿ.
"ಯಂತ್ರಾ ತಂತ್ರಾಂ ಶಿಂತ್ರ್ಯಾನಿ ಖೊಂಡ್ಲಿ ತೀನ್ ಬೋರ್ವೆಲಾಂ"
’ಇಂಗ್ಲಿಶ್ ಮಿಡಿಯಮ್ ನಾತು ತೇಗ್’ ಇಂಗ್ಲಿಶ್ ಮಿಡಿಯಮ್.... ಹಾಂಗಾಸರ್ ಸಂಸ್ಕ್ರತಿ ಬದಲ್ತಾ. ತಾಂಚೆ ವಿಚಾರ್ ಬದಲ್ತಾತ್. ರಿತಿ ರಿವಾಜ್ಯೊ ಬದ್ಲಾತಾತ್. ಎಕ್ವಟಾಂತ್ ಬದ್ಲಾವಣ್ ಉದೆತಾ. ಹ್ಯಾ ಬದ್ಲಾವಣೆಕ್ ಯಂತ್ರಾಂ, ತಂತ್ರಾಂ ಆನಿ ಶಿಂತ್ರ್ಯೊಂ ಸಾಂಗಾತ್ ದಿತಾನಾ ಮ್ಹಳ್ಯಾರ್ ಆಧುನಿಕತಾ ಯಾ ನವೆಸಾಂವ್ ತ್ಯಾ ಸಂಸ್ಕ್ರತೆಕ್ ವೆಡೊ ಮಾರ್ತಾನಾ, ತ್ಯಾ ಆಪುಟ್ ಸಂಸ್ಕ್ರತೆಚೊ ಝರಿ ಕಾತ್ರುನ್ ವೆತಾತ್. ರಾಕ್ವಣೆಚಿ ವೋಂಯ್ಚ್ ಶೆತ್ ಚರ್ತಾ...!
"ಸುಕೊನ್ ವೆಚಿ ಬಾಂಯ್ ಕೊಣಾಕ್ ಜಾಯ್....."
"ತೆಗಾಂ ನಾತ್ವಾಂನಿ ಸಾಂಗಾತಾ ಮೆಳೊನ್ ಪುರ್ಲಿ..."
ಹಾಂಗಾಸರ್ ಸಂಸ್ಕ್ರತಿ ಎಕ್ಸುರ್ಪಣಾಂತ್ ಶಿರ್ಕೊನ್ ಉಡ್ಡಾತಾನಾ ತ್ಯಾ ಶೆತಾಚೊ ಉಲ್ಲೇಕ್ ನಾಂ. ತ್ಯಾ ಶೆತಾಚಾ ಪಿಕಾಚೊ ಉಲ್ಲೇಖ್ ನಾಂ ಮ್ಹಳ್ಯಾರ್ ಯೆದೊಳ್ಚ್ ಶೆತಾನ್ ಪಿಕಂವ್ಚೆಂ ರಾವಯ್ಲಾಂ. ವೈಭವ್ ಭಶ್ಟ್ ಜಾಲಾ. ಬಾಂಯ್ ಸಾಂಗಾತಾ ಶೆತ್ ಪುರಿನಾಂತ್. ಕಾರಾಣ್ ಶೆತಾಂತ್ ನವೆಸಾಂವ್ ನವಿ ಸಂಸ್ಕ್ರತಿ ಖೆಳೊಂಕ್ ಲಾಗ್ಲ್ಯಾ.
ಅಶೆಂ ಪರ್ನ್ಯಾ ಖರ್ಯಾ ಸಂಸ್ಕ್ರತಿಚಿ ಝರ್ ಹ್ಯಾ ಮಧೆಂ ಆಡ್ಚೊನ್ ಸುಕೊನ್ ಗೆಲ್ಯಾ. ಬಾಂಯ್ ಮಾತ್ರ್ ಪುರ್ಲಿ. ಶೆತ್ ನಹಿಂ.....! ಸಂಸ್ಕ್ರತಿ ಪುರ್ಲಿ, ಸಮಾಜ್ ನಹಿಂ...! ದುಖಾಭರಿತ್ ಸಲ್ವಣ್....! ಸಂಸ್ಕ್ರತಿಚಿ ನಿರಾಸ್ಭರಿತ್ ಸಲ್ವಣ್....!! ತರ್ ಸಮಾಜ್.....!!!
ಏಕ್ ನಾತು ಹಾಂವ್ ಆತಾಂ ಶ್ಹೆರಾಂತ್ ರಾವೊನ್......." "ಏಕ್ ಉಗ್ಡಾಸ್ ಕಾಡ್ನ್......" ಹಾಂಗಾಸರ್ ತ್ಯಾ ನಾತ್ವಾಚಿಯ್ ಸಲ್ವಣ್. ಮಾಂದುನ್ ಘೆತ್ಲೆಲಿ ಸಲ್ವಣ್ ಆನಿ ಉಗ್ಡಾಸಾಮಧೆಂ ಲಿಪಲ್ಲೆಂ ಪಲಾಯನ್, ಅಸ್ವಷ್ಟ್ ಪಲಾಯನ್.....! ಸಮಾಜೆಚ್ಯಾ ನವೆಂಸಾಂವಾಕ್ ಪಲಾಯನ್....!
ಕವಿಚಾ ಉತ್ರಾಂನಿ ಶೆತ್ ಮ್ಹಳ್ಯಾರ್ ಕೊಂಕ್ಣಿ ಸಮಾಜ್. ಬಾಂಯ್ ಮ್ಹಳ್ಯಾರ್ ಕೊಂಕ್ಣಿ ಸಂಸ್ಕ್ರತಿ. ಆಮ್ಚೆ ಸಭಾರ್ ಕವಿ ನಿರಾಶಾಕ್ ಕಿತ್ಯಾಕ್ ವೆಂಗ್ತಾತ್. ನಿರಾಶಾ ಯಾ ಸಲ್ವಣ್, ಪೊಳಾಪಳ್ ಯಾ ಪಲಾಯನ್ವಾದ್, ಆಮ್ಚಾ ಸಂಸ್ಕ್ರತೆಕ್ ಧರ್ಲೆಲಿ ವಾಳಯ್? ಕವಿನ್ ಹಾಂಗಾಸರ್ ಆಪ್ಣೆಂ ಪಿಯೆಲ್ಲ್ಯಾ ಝರಿ ಉದ್ಕಾಚಾ ಬಾಂಯ್ಕ್ ನವ್ಯಾನ್ ಏಕ್ ರೂಪ್ ದಿಲ್ಲೆಂ ತರ್? ಏಕ್ ರೂಪ್ ತಾಣೆಂ ದಿಲಾಂ ಕವಿತೆಚಿ ವಾತ್ ಝಳವ್ನ್.
ಪುಣ್, ತ್ಯಾ ಶೆತಾವಿಣೆಂ ಕವಿತಾಯ್ ಕೊಣಾ ಜಿಬೆರ್ ಖೆಳ್ತೆಲಿ? ಬಹುಶ: ಕವಿನ್ ಹಾಂಗಾಸರ್ ಆಪ್ಲ್ಯಾ ಕವಿತೆಕ್ ಆನಿ ಚಿಂತ್ಪಾಕ್ ಪಯ್ಲೆಂ, ತ್ಯಾ ಸಲ್ವಲ್ಲ್ಯಾ ಯಾ ನವೆಸಾಂವಾಂತ್ ಆಡ್ಚೊಂಚಾ ಆಮ್ಚಾ ವೈಭವಾಂತ್ಲ್ಯಾ ಸಂಸ್ಕ್ರತಿಕ್ ಉಪ್ರಾಂತ್ ವ್ಹಾಳಯ್ಲಾಂ ಆಸ್ತೆಲೆಂ. ಶೆತಾವಿಶಿಂ ಚಿಂತುಂಕ್ ನಾಂ ಆಸ್ತೆಲೆಂ.
ಶೆತಾಕ್ ನವ್ಯಾನ್ ರುತಾಂ ಕರ್ಚೆಂ ಚಡ್ ಗರ್ಜೆಚೆಂ. ಉಗ್ಡಾಸ್ ಕಾಡ್ಚೆಂ ನಹಿಂ. ಹ್ಯಾ ಸಂಸ್ಕ್ರತೆಕ್ ಸಾಂಗಾತ್ ಹಾಡುಂಕ್ ತ್ಯಾ ಯಂತ್ರಾಕ್, ತಂತ್ರಾಕ್, ಶಿಂತ್ರ್ಯಾಕ್ ಹುಮ್ಟೊನ್ ಉಡವ್ನ್ ಆಮ್ಚಾ ಸಂಸ್ಕ್ರತೆಂತ್ ರಿಗ್ಲ್ಲ್ಯಾ ತ್ಯಾ ಗೂಂಡ್ ಬೋರ್ವೆಲಾಂಕ್ ಘಟ್ಟ್ ದಾಂಪ್ಣೆಂ ಮಾರ್ಚೆಂ ಪಡ್ತೆಲೆಂ. ಬಹುಶ: ಹ್ಯಾಚ್ ಕಾರಾಣಾ ಖಾತಿರ್ ಕವಿನ್ ಆಪ್ಲಿ ಸಲ್ವಣಿ ದಾಖಯ್ಲ್ಯಾ ಆಸ್ತೆಲಿ. ಪುಣ್ ಕವಿತೆಚಿ ವಾತ್ ಝಳವ್ನ್, ಕುಡ್ಡ್ಯಾ ಶಿಂತ್ರಾಳ್ಯಾ ದೊಳ್ಯಾಂಕ್ ಉಜ್ವಾಡ್ ಫಾಂಕಂವ್ಚೆಂ ಪ್ರಯತ್ನ್ ತಾಚೆಂ. ಹೊ ಖಂಡಿತ್ ತಾಚೊ ಅಸ್ಪಷ್ಟ್ ಆಶಾವಾದ್....! ನಿದೆಂತ್ ಘೊರೆಂವ್ಚ್ಯಾಕ್ ಜಾಗಂವ್ಚೊ...! ತೆಗಾಂ ನಾತ್ವಾನಿಂ ಎಕ್ತಾರ್ ಘಡ್ಲ್ಲೊ, ಬಾಂಯ್ ಪುರ್ಚಾ ಖಾತಿರ್.
ಆತಾಂ ಆಮ್ಚಾ ಸಮಾಜೆಂತ್ ಆಮಿಂ ಘಡ್ಚೆ ಎಕ್ತಾರ್ ಕಿತ್ಲೆ ಹ್ಯಾಚ್ ಬಾಂಯ್ಕ್ ಜಿವಾಳ್ ಕರುಂಕ್ ಪೆಚಾಡ್ತಾತ್? ಯಂತ್ರಾಂ ತಂತ್ರಾಂ ಶಿಂತ್ರ್ಯೊ ಕಿತ್ಲ್ಯೊ ಉಣೆ ಜಾಲ್ಯಾತ್? ಎಕ್ವಟ್ ಕಿತ್ಲೊ ವಾಡ್ಲಾ? ಘಾಮ್ ವಾಳಯ್ತೆಲೆ ಕಿತ್ಲೆ ಆಸಾತ್? ಆಮಿಂ ಆಮ್ಚಾ ಸಂಸ್ಕ್ರತೆಚಿ ಝರ್ ಪುರುಂಕ್ ಪಳೆತಾಂವ್ ಯಾ ತಿ ಗೂಂಡಾಯೆಕ್ ರೊಂಬಂವ್ಕ್ ತ್ಯಾ ಅಭೇಸ್ ಆರ್ಯಾಕ್ ತಯಾರ್ ಆಸಾಂವ್...?
ಆತಾಂ ಆಯ್ಲೆವಾರ್ ಪಗ೯ಟ್ ಜಾಲ್ಲ್ಯಾ ಬಾಬ್ ವಲ್ಲಿ ಕ್ವಾಡ್ರಸಾಚಿ ’ಏಕ್ ಪರ್ಗಟ್ ರುದಾನ್’ ಯಾ ’ಕೊಂಕ್ಣಿ ಬರವ್ಪಿ’ ಕವಿತಾ ದಾಖ್ಲ್ಯಾಕ್ ಘೆಂವ್ಚೆ ತರ್, ಹ್ಯಾ ಬಾಂಯ್ ಕವಿತಾ ಪರಿಂ ನಿರಾಸ್ವಾದ್ ಸ್ಪಷ್ಟ್ ಝಳ್ಕಾತಾ. ಅಸ್ಪಷ್ಟ್ ಆಶಾವಾದ್ ಅಸ್ಪಷ್ಟ್ ಪಿಂತುರಾಂ ಪರಿಂ ಗೊಂದೊಳಾಚಾ ಜಾಳಿಂತ್ ಗೊಂದೊಳಾಯ್ತಾ ತೆಂ ಉಗ್ಡಾಸ್ ದವರುಂಕ್ ಜಾಯ್ ಜಾಲ್ಲೊ ವಿಶಯ್.
"ಆಜ್ ಸ್ತುತಿ ಅರ್ಗಾಂ ತುಕಾ ಮಾನ್ ಹಿಚೊ ರಾಕೊನ್ ವರ್
ಆಜ್ ವೊಜೆಂ ಹಳೂ ನಾಕಾ ತ್ರಾಣ್ ಹಿಕಾ ಫಾವೊ ಕರ್
ತುಜ್ಯಾ ಪದ್ವೆನ್ ಜಾತಾ ತರ್ ಮೋಮ್ ಬದ್ಲುನ್ ಮಾಂಯ್ ಕರ್
ಆಜ್ ತುಕಾ ಜೀವ್ ದಿತಾಂ ಭಾಸ್ ಮ್ಹಜಿ ಜಿವಾಳ್ ದವರ್" (ಏಕ್ ಪರ್ಗಟ್ ರುದಾನ್)
ಹಾಂಗಾಸರ್ಯ್ ಕವಿ ಆಪ್ಲ್ಯಾ ಆನಿಂ ಆಪ್ಣೆಂ ಉಲಯ್ತೆಲ್ಯಾಕ್ ಸೊಡ್ನ್ ತಿಸ್ರ್ಯಾಚಾ ಭರ್ವಸ್ಯಾಚೆರ್ ಆಸಾ ಮ್ಹಳ್ಯಾರ್ ತಾಣೆಂ ಸಲ್ವಣ್ ಮಾಂದ್ಲ್ಯಾ. ಹ್ಯಾ ಸಲ್ವಣೆ ಖಾತಿರ್ ತೊ ಆಪ್ಲೊ ಜೀವ್ ದಿಂವ್ಕ್ ತಯಾರ್ ಜಾಲಾ. ನಿರಾಸಾವಾದ್...! ನಿರಾಶೆಂತ್ ಪಲಾಯನ್......! ಹಾಂಗಾ ಝಜ್ ನಾಂ. ತೊ ಬಲಿ ಜಾಂವ್ಕ್ ತಯಾರ್ ಜಾಲಾ. ಹೆಂ ಸ್ಪಷ್ಟ್ ತರೀ ಅಸ್ಪಷ್ಟ್ ಪಲಾಯನ್. ಕೊಂಕ್ಣೆಕ್ ಬಲಿದಾನ್ ಜಾಂವ್ಚೆಂ ನಿಜಾಯ್ಕಿ ಭಾಗ್. ಪುಣ್ ನಿದ್ಲೆಲ್ಯಾಂಕ್ ಮಾರುನ್ ಉಟಂವ್ಚೆಂ ಚಡ್ ಗಜೆ೯ಚೆಂ. ಘೆತ್ಲಿ ಆತಾಂ ಬಾಬ್ ಮೆಲ್ವಿನ್ ರೊಡ್ರಿಗಸಾಚಿ ’ಮ್ಹಜೆಂ ಘರ್’ ಕವಿತಾ ದಾಖ್ಲ್ಯಾಕ್ ತರ್.....
"ದಾರಾರ್ ತುಮ್ಚಾ ಕಿತ್ಯಾಕ್ ನಾಚುಂ? ಝಡಾರ್ ಮ್ಹಜ್ಯಾ ಉರ್ತಾಂ
ಮ್ಹಜ್ಯಾ ಘರಾಂತ್ ಪೇಜ್ ನಾಂ ತರ್ ಉಪಾಶಿಂಚ್ ಮೊರ್ತಾಂ! (ಮ್ಹಜೆಂ ಘರ್)
ಹಾಂಗಾಸರ್ಯ್ ಕವಿ ವಾಸ್ತವಾಕ್ ಯಾ ಸಮಾಜೆಕ್ ಬಂಡಾಯ್ ಉಭಿ ಕರಿನಾಂ. ಬಗಾರ್ ಆಪ್ಲಿ ಸಲ್ವಣ್ ಮಾಂದುನ್ ಘೆವ್ನ್ ಆಪ್ಲ್ಯಾಚ್ ಚ್ಯಾರ್ ವೊಣೊದಿಂ ಭಿತರ್ ಉಪಾಶಿಂ ಮೊರೊಂಕ್ ತಯಾರ್ ಜಾಲಾ. ಹಾಂಗಾಸರ್ಯ್ ನಿರಾಸ್ವಾದ್. ಆಶಾವಾದ್ ಯಾ ಬಂಡಾಯ್ ಖಂಡಿತ್ ನಾಂ. ಸ್ಪಶ್ಟ್ ನಿರಾಸ್ವಾದಾಂತ್ ಅಸ್ಪಶ್ಟ್ ಪಲಾಯನ್. ಆತಾಂ ಬಾಂಯ್ ಕವಿತಾ ಘೆತ್ಲಿ ಜಾಲ್ಯಾರ್
"ಖೊಂಡ್ಲ್ಲೆಂ ತಾಣಿಂ ಗುಡ್ಯಾರ್ ಕೊಸ್ಳೊಂಕ್ ಸೊಡಿನಾಸ್ತಾಂ ಕಶ್ಟಾಂನಿ ಬಾಬಾನ್ ಭಾರಾ ಮುಂಡ್....!"
ಕೊಸ್ಳೊಂಕ್ ಸೊಡಿನಾಸ್ತಾನಾ ಬಾಂದ್ಲ್ಲಿ ಮ್ಹಳ್ಯಾರ್, ಕೊಸಾಳ್ಚಾ ಸ್ಥಿತೆರ್ ಆಸ್ಲೆಲಿ ಜಾಂವ್ಕ್ಯ್ ಪುರೊ. ಕಶ್ಟಾಂ ನಶ್ಟಾಂ ಮಧೆಂ ಖೊಂಡ್ಲ್ಲಿ ಮ್ಹಳ್ಯಾರ್, ಹಾಂಗಾಸರ್ ಪೊಳಾಪಳ್ ನಾಂ. ನಿರಾಸ್ ನಾಂ, ಎಕ್ವಟ್, ಧಯ್ರ್ ಆನಿ ಕಸಲೆಂಯ್ ತಾಂಡುನ್ ಘೆಂವ್ಚಿ ಶ್ಯಾಥಿ. ಹಿ ಅಸ್ಪಶ್ಟ್ ರುಪಾಚಿ ಕ್ರಾಂತಿ.
"ಏಕ್ ನಾತು ಹಾಂವ್ ಆತಾಂ ಶ್ಹೆರಾಂತ್ ರಾವೊನ್ ಮುನ್ಸಿಪಾಲಿಟಿಚೆಂ ಉದಾಕ್ ಪಿಯೆತಾಂ ಆನಿ ಆಬಾಚಾ ಉಸ್ಕ್ಯಾರ್ ಬೊಸೊನ್ ಪಿಯೆಲ್ಲ್ಯಾ ತೆ ಸರ್ಲ್ಲೆ ಬಾಂಯ್ಚಾ ಅಪುಟ್ ರುಚಿಕ್ ಉದ್ಕಾಚೊ ಏಕ್ ಉಗ್ಡಾಸ್ ಕಾಡುನ್ ಕವಿತೆಚಿ ವಾತ್ ಝಳಯ್ತಾಂ"
ಹಾಂಗಾಸರ್ ನಾತು ಸಂಪೂರ್ಣ್ ಮುನಿಸಿಪಾಲಿಟಿಚ್ಯಾ ಉದ್ಕಾಕ್ ಸಲ್ವೊನ್ ರಾವ್ಲಾ. ತಾಕಾ ಸರ್ಲ್ಲ್ಯಾ ಬಾಂಯ್ಚೊ, ತಾಚ್ಯಾ ತ್ಯಾ ಝರಿಚೊ ಉಗ್ಡಾಸ್ ಆಸಾ ಪೂಣ್, ತ್ಯಾ ಬಾಂಯ್ಕ್ ಪರ್ತ್ಯಾನ್ ಜಿವಾಳ್ ಕರ್ಚೆಂ ಧಯ್ರ್ ಯಾ ಸಂಘರ್ಷ್ ನಾಂ. ತೊ ಉಗ್ಡಾಸ್ ಮಾತ್ರ್ ಕಾಡುಂಕ್ ಸಕ್ತಾ ಹೆಂ ಸ್ಪಷ್ಟ್ ನಿರಾಸ್ವಾದ್ ಯಾ ಪಲಾಯನಾಕ್ ಉಲೊ ದಿತಾ. ಕಾರಾಣ್ ತಾಣೆ ಆಪ್ಣಾಕ್ಚ್ ಗಡ್ಡೆಚ್ಯಾ ಶ್ಹೆರಾಕ್ ವೊಳ್ಸಾಯ್ಲಾಂ. ತ್ಯಾ ತಾಚಾ ಗಾಂವಾಕ್ ಪಾಟಿಂ ಸೊಡ್ಲಾಂ. ಗಡ್ಡೆಚಾ ಶ್ಹೆರಾಂತ್ ತೊ ಮುನಿಸಿಪಾಲಿಟಿಚ್ಯಾ ಉದ್ಕಾಂತ್ ಮ್ಹಳ್ಯಾರ್ ವಿವಿಂಗಡ್ ಸಂಸ್ಕ್ರತಿಕ್ ಆನಿ ನವೆಸಾಂವಾಕ್ ವೆಂಗುನ್ ದೀಸ್ ಕಾಡ್ತಾ ಮ್ಹಳ್ಯಾರ್ ತೊ ಸಲ್ವಾಲಾ.
ಹಿ ಸಲ್ವಣಿ ಕಿತ್ಯಾಕ್? ಆಪ್ಣಾಯಿಲ್ಲ್ಯಾ ಸಲ್ವಣೆಂತ್ ಜೀಕ್ ಖಂಡಿತ್ ನಾ. ಹ್ಯಾ ಸಲ್ವಣೆಂತ್ ಆಶಾವಾದ್ಯ್ ಗೊಬ್ರಾ ಪಂದ್ಲ್ಯಾ ಖೆಂಡಾ ಪರಿಂ ಮುರ್ಮುರೊನ್ ಮಾತ್ರ್ ಆಪ್ಲೆಂ ಅಸ್ಪಶ್ಟ್ ಅಸ್ಥಿತ್ವ್ ದಾಖಯ್ತಾ ಶಿವಾಯ್, ತ್ಯಾ ಆಶೆಲ್ಲ್ಯಾ ಜಿಕಾಕ್ ಯಾ ತಾಚ್ಯಾ ಪಾಟ್ಲ್ಯಾ ಜಯ್ತಾಚಾ ಕ್ರಾಂತೆಕ್ ವರುನ್ ಪಾವಯ್ನಾಂ. ಆಜ್ ಆಮ್ಚಿ ಸಂಸ್ಕ್ರತಿ ಉಗ್ಡಾಸಾನ್ ಖಂಡಿತ್ ಜಿವಾಳ್ ಜಾಯ್ನಾಂ. ಹ್ಯಾ ಖಾತಿರ್ ಕ್ರಾಂತಿ ಖಂಡಿತ್ ಗರ್ಜೆಚಿ. ಆಯ್ಚಾ ಸಮಾಜೆಂತ್ ಆಜ್ ಜಲ್ಮಾಲ್ಲ್ಯಾ ಬಾಳಾಕ್ ಆವಯ್ಚೆಂ ದೂದ್ ಪಿಯೆಂವ್ಕ್ಯ್ ಕ್ರಾಂತೆಕ್ ದೆವಾಜಯ್ ಪಡ್ತಾ ನಾಂ ತರ್ ತೆಂ ತಾಚಾ ಹಕ್ಕಾಚೆಂ ದೂದ್ಯ್ ತಾಕಾ ಫಾವೊ ಜಾಯ್ನಾಂ.
ಕ್ರಾಂತಿ ಯಾ ಬಂಡಾಯ್ ಮ್ಹಳ್ಯಾರ್ ’See Red’ ಭಿಲ್ಕುಲ್ ನ್ಹಯ್ ಹೆಂ ಆದ್ಲೆಂ ಚಿಂತಾಪ್. ತಶೆಂಚ್ ಕವಿತೆಂಚ್ಯಾ ಚಿಂತ್ಪಾಂತ್ಯ್ ಬದ್ಲಾವಣ್ ಚಡ್ ಗರ್ಜೆಚಿ.
ಕುಟ್ಮಾಚಿ ತಾನ್ ಭಾಂಗಂವ್ಚಿ ಬಾಂಯ್ [-ಕ್ಲಾರಾ ಫೆರ್ನಾಂಡಿಸ್, ಕುಲ್ಶೇಕರ್]
ಆಧ್ಲ್ಯಾ ಕಾಳಾರ್ ಬಾಂಯ್ ಖೊಂಡ್ಚೆಂ ಸಲಿಸಾಯೆಚೆಂ ಕಾಮ್ ನೈಂ ಆಸ್ಲ್ಲೆಂ. ಚಾರ್ ಮುಂಡಾಂ ಖೊಂಡ್ಲ್ಲೆಂಚ್, ಉದ್ಕಾಚೆ ಝರಿಕ್ ಆತ್ರೆಗಾನ್ ರಾಕೊನ್ ರಾವ್ತಾಲಿಂ. ಹಾಂತುಂ ಆಸ್ಲ್ಲಿ ಮಿನತ್ ಕಠಿಣ್.
ಗುಡ್ಯಾರ್ ಬಾಂಯ್ ಖೊಂಡ್ಚಿ ಮ್ಹಳ್ಯಾರ್ ಮಾಗಿರ್ ಸಾಂಗ್ಚೆಂಚ್ ನಾಕಾ. ಪಾಜ್ ಮೆಳ್ಳಿ ತರ್ ನಿರಾಶಾಚ್ಚ್ ನಿರಾಶಾ. ಬಾಪಾಯ್ನ್ ಆನಿ ಪುತಾನ್ 18 ಮುಂಡಾಂಚಿ ಬಾಂಯ್ ಖೊಂಡ್ಲಿ. ತ್ಯಾ ಬಾಂಯೆ ನಿಮ್ತಿಂ ಜಾಯ್ತ್ಯಾ ಜಣಾಂಕ್ ಉಪಯೋಗ್ ಜಾಲಾ. ಪಯ್ಲೆಂ ಏಕ್ ಬಾಂಯ್ ಸಗ್ಳ್ಯಾ ವಾಡ್ಯಾಕ್ ಉಪ್ಕಾರ್ತಾಲಿ. ಹಾಂಗಾಸರ್ ಹಿ ’ಬಾಂಯ್’ ಎಕಾ ಕುಟ್ಮಾಚೊ ಉಗ್ಡಾಸ್ ದಿತಾ.
"ಖೊಂಡ್ಲ್ಲೆ ತಾಣಿಂ ಗುಡ್ಯಾರ್ ಕಷ್ಟೊಂಕ್ ಸೊಡಿನಾಸ್ತಾಂ ಕಶ್ಟಾಂನಿ".
ಬಾಬಾನ್ ಆನಿ ಪುತಾನ್ ಹೆಂ ಕುಟಾಮ್ ಚಡ್ ಮೊಗಾನ್ ಆನಿ ಮಯ್ಪಾಸಾನ್ ಬಾಂಧುನ್ ಹಾಡ್ಲ್ಲೆಂ. ಕಿತ್ಲೆಂಯ್ ರಾಗ್ ಶಿಣ್ ಉಬ್ಜಾಲ್ಯಾರ್ಯೀ ತಾಣಿಂ ಕುಟ್ಮಾಂಮಧೆಂ ಎರ್ ಯಾ ಫುಟ್ ಯೆಂವ್ಕ್ ದೀಂವ್ಕ್ ನಾಂ. ತಾಂಚಾ ಮೊಗಾಚಿ, ಜಾಣ್ವಾಯೆಚಿ ಆನಿ ಸಮ್ಜೊಣೆಚಿ ಗುಂಡಾಯ್ ’ಭಾರಾ ಮುಂಡ್’ ಬಾಂಯೆ ಭಾಶೆನ್ ಆಸ್ಲ್ಲಿ.
"ಖೊಂಡ್ಲ್ಲೆ ತೆ ಮಾಲ್ಘಡೆ ಘಾಮ್ ವ್ಹಾಳಂವ್ಕ್ ಶಿತ್ ಪಿಕವ್ನ್ ಸರೊನ್ ಗೆಲೆ"
ಮಾಲ್ಘಡೆ ತೆಂ ಭುರ್ಗ್ಯಾಂಕ್ ವ್ಹಡ್ ಕರುನ್ ತಾಂಕಾಂ ಫಾವೊತೆಂ ಶಿಕಾಪ್ ದೀವ್ನ್ ಮಾತ್ಯೆಕ್ ಸಾರೆಂ ಜಾಲೆ. ಮಾಲ್ಘಡ್ಯಾಂನಿ ಜಾಯ್ತಿ ಮಿನತ್ ಕರುನ್ ದಾಯ್ಜ್ ಪುಂಜಾಯ್ಲೆಂ. ತಾಣಿಂ ಕೆದಾಳಾಯ್ ಚಿಂತುಂಕ್ ನಾತ್ಲ್ಲೆಂ ಘರ್ಚೆ ವಾಂಟೆ ಜಾಯ್ಜಯ್ ಮ್ಹಣ್. ಪುಣ್ ತ್ಯಾ ತೆಗಾಂ ಶಿಕ್ಪಿ ನಾತ್ವಾಂನಿ ಹ್ಯಾ ಘರಾಚೆ ವಾಂಟೆ ಆನಿ ಫಾಂಟೆ ಕೆಲೆ. ಬಾಬಾನ್ ಆನಿ ಆಬಾನ್ ಆಸಾ ಕೆಲ್ಲಿ ಮೊಗಾಚಿ ಝರ್ ಜಿವಿಚ್ಚ್ ಉರ್ಲಿ. ಹಾಂತುನ್ ಏಕ್ ನಾತು ಶ್ಹೆರಾಂತ್ ವಸ್ತಿ ಕರ್ತಾಲೊ ತರ್ಯೀ, ಆಪ್ಲ್ಯಾ ಆಬಾನ್ ದಿಲ್ಲ್ಯಾ ಜಾಣ್ವಾಯೆಚೊ, ಮೊಗಾಚೊ ಉಗ್ಡಾಸ್ ಕಾಡುನ್ ಕವಿತಾಚಿ ವಾತ್ ಝಳಯ್ತಾ.
ಬಾಂಯ್ ಎಕಾ ಘರಾಣ್ಯಾಕ್ ಪೊಸ್ತಾ [- ವೀಣಾ ಮಿನೇಜಸ್, ಬೊಂದೆಲ್]
ಹ್ಯಾ ಬಾಂಯ್ ಕವಿತೆಂತ್ ಆಧ್ಲ್ಯಾ ಕಾಳಾರ್ ಘರಾಣ್ಯಾಂ ಮಧೆಂ ಆಸ್ಲ್ಲೊ ತೊ ಮೋಗ್, ಸೆಜಾರ್ಯಾಂ ಮಧೆಂ ಆನಿ ಗಾಂವ್ ಭಾಂವ್ಡಾಂ ಮಧೆಂ ಆಸ್ಲ್ಲೊ ತೊ ಎಕ್ವಟ್ ದಿಸೊನ್ ಯೆತಾ. ಹ್ಯಾ ಕವನಾಂತ್ಲೆ ಪುರ್ವಜ್ ಮಸ್ತ್ ಕಷ್ಟಿ ಮನಿಸ್. ಘಾಮ್ ಪಿಳೊನ್, ಕಶ್ಟ್ ಕಾಡ್ನ್ ಆಪ್ಲ್ಯಾ ಕುಟ್ಮಾಕ್ ಮೊಗಾನ್ ಪೊಸ್ತಾಲೆ ಆನಿ ಸಾಂಬಾಳ್ತಾಲೆ.
ಘರಾಂತ್ ದುಬ್ಳಿಕಾಯ್ ಆಸ್ಲ್ಲಿ ತರೀ ಮಯಾಮೊಗಾಕ್ ದುಬ್ಳಿಕಾಯ್ ನಾತ್ಲ್ಲಿ. ಕಿತೆಂಚ್ ನ್ಯಾಯ್-ಝಗ್ಡೆಂ ನಾಸ್ತಾನಾ ದುಬ್ಳಿಂ ಜಾಲ್ಯಾರ್ಯ್ ಶೆಗುಣಾಂಚೆಂ ತಾಂಚೆಂ ಜೀವನ್ ಜಾವ್ನಾಸ್ಲ್ಲೆಂ. ಬಾಪಾಯ್ನ್ ಖೊಂಡ್ಲ್ಲೆಂ ಭಾರಾ ಮುಂಡ್ ಬಾಪಾಯ್ಚಿ ಶ್ಯಾಥಿ ಆನಿ ಕಶ್ಟ್ ದೊಳ್ಯಾಂಕ್ ದಿಸ್ತಾತ್.
ಪುತಾನ್ ಖೊಂಡ್ಲ್ಲೆಂ ಸ ಮುಂಡ್ ಮ್ಹಣ್ತಾನಾ ದಿಸೊನ್ ಯೆತಾಕೀ ಪುತ್ ಬಾಪಯ್ ತಿತ್ಲೊ ಕಶ್ಟಿ ಆನಿ ಮಯ್ಪಾಸಿ ನೈಂ ಜಾಲ್ಯಾರೀ ಕಸಾಪ್ಪಿ ನೈಂ. ಹೆ ದೊಗಿ ಬಾಪಯ್-ಪುತ್ ಆಪ್ಲ್ಯಾ ಕುಟ್ಮಾ ಖಾತಿರ್ ಅನಿ ಗಾಂವಾಕ್ ಬರೆಂ ಕರುನ್ ಸರ್ಲೆ. ಪುಣ್ ಫಿಂರ್ಗಿ ಭಾಸೆಚಾ ಪಾಟಿಂ ಧಾಂವ್ಲ್ಲ್ಯಾ ನಾತ್ವಾಂಕ್ ಗಾಂವಾತ್ ರಾಂವ್ಚೆಂ ಆನಿ ಶೆತಾಂನಿ ವಾವ್ರ್ ಕರ್ಚೆಂ ಬರೆಂ ಲಾಗೊಂಕ್ನಾ. ದೆಕೊನ್ ತೆ ಮೋಡರ್ನ್ ಟೆಕ್ನೊಲೊಜಿಚ್ಯಾ ನಾಂವಾರ್ ಬೋರ್ವೆಲಾಂ ಖೊಂಡುನ್ ಆನಿ ಆಸ್ತಿಚೆ ವಾಂಟೆ ಕರುನ್ ಆಖ್ರೇಕ್ ಗಾಂವ್ ಸೊಡ್ನ್ ಪಯ್ಸ್ ಗೆಲೆ. ಆತಾಂಚಾ ಆಧುನಿಕ್ ಜನಾಂಗಾಂ ಮದೆಂ ಮಯಾಮೊಗ್ ಪಯ್ಸ್ ಸರ್ಲಾ. ರಾಗ್, ಮೊಸೊರ್, ಹಗೆಂ ಚಡ್ಲಾಂ. ಕುಟ್ಮಾಂ ಥಂಯ್ ಆದ್ಲೊ ವಿಶ್ವಾಸ್ ಆನಿ ಎಕ್ವೊಟ್ ನಾಂ ಜಾಲಾ.
ಕವಿನ್ ಬಾಂಯ್ ಕವಿತೆಂತ್ ಎಕಾ ಘರಾಣ್ಯಾಕ್ ಲಗ್ತಿ ಜಾವ್ಯೆತ್ ಜಾಲ್ಲ್ಯಾ ಸಭಾರ್ ವಿಚಾರಾಂಚೆರ್ ಆರ್ಸೊ ಧರ್ಲಾ.
ಬಾಂಯ್ ಎಕಾ ಕುಟ್ಮಾಚೆರ್ ಆರ್ಸೊ ಧರ್ತಾ [-ಆಂಟನಿ ಮಿನೇಜಸ್]
ಹ್ಯಾ ಕವಿತಾಚೆಂ ನಾಂವ್ ’ಬಾಂಯ್ ಮ್ಹಣ್ತಾನಾ ದಿಸ್ಚಿ ಇಮಾಜ್ ಮೋಗ್ ಆನಿ ಕವಿತಾ ಸುರು ಕೆಲ್ಲ್ಯಾ ಮಾಗೀರ್ "ಬಾಂಯ್" ಮ್ಹಣ್ತಾನಾ ಮ್ಹಜಾ ದೊಳ್ಯಾಂಕ್ ದಿಸ್ಚಿ ಇಮಾಜ್ ಜಾವ್ನಾಸಾ ಕುಟಾಮ್. ಝರ್ ಕೆದ್ನಾಂಯ್ ಎಕಾ ಜಾಗ್ಯಾರ್ ರಾವಾನಾಂ. ಕೆದಾಳಾಯ್ ವ್ಹಾಳೊನ್ಂಚ್ ಆಸ್ತಾ ಆನಿ ಸರ್ವಾಂಕ್ ಉಪ್ಕಾರಾಕ್ ಪಡ್ತಾ.
ಹಾಂಗಾ ಝರಿಕ್ ಗಾಂವಾತ್ಲ್ಯಾ ಎಕಾ ಕುಟ್ಮಾಕ್ ಸರಿ ಕೆಲಾ. ಆನಿ ಹ್ಯಾ ಗಾಂವ್ಚಾ ಸರ್ವ್ ಲೊಕಾಚೆ ದೊಳೆ ಹ್ಯಾ ಕುಟ್ಮಾಚೆರ್ ಖಂಚ್ಲ್ಯಾತ್. ಆನಿ ಹ್ಯಾ ಕುಟ್ಮಾಚಾಂಕ್ ಗಾಂವ್ಚ್ಯಾ ಲೊಕಾಂಕಡೆನ್ ಆಸ್ಚೊ ಮೋಗ್ ಕಿತ್ಲೊಗೀ ಮ್ಹಳ್ಳ್ಯಾರ್ ಎಕ್ ತಾನೆಲ್ಲೊ ಮನಿಸ್ ಉದಾಕ್ ಪಿಯೆವ್ನ್ ಧಾದೊಸ್ ಜಾಂವ್ಚೆ ತಿತ್ಲೊ. ಖೊಂಡ್ಲ್ಲೆಂ ತಾಣಿ ಗುಡ್ಯಾರ್ ಮ್ಹಣ್ತಾನಾ ಹಾಂಗಾಸರ್ ಆಮ್ಚಾ ದಿಷ್ಟಿಕ್ ಪಡ್ಚಿ ಇಮಾಜ್ ಜಾವ್ನಾಸಾ ಕಷ್ಟ್. ತೆಂ ಇತ್ಲೆಂ ಕಷ್ಟಿ ಜಾವ್ನ್ ಆಸ್ಲ್ಯಾರೀ ಭಾರಿ ಮೊವಾಳಾಯೆಚೆಂ ತಾಂಚೆಂ ಜೀವನ್ ಜಾವ್ನಾಸ್ಲ್ಲೆಂ ಮ್ಹಣ್ ಕವಿ ಆಮ್ಕಾಂ ದಾಖವ್ನ್ ದಿತಾ.
ಬಾಬಾನ್ ಖೊಂಡ್ಲ್ಲೆಂ ಭಾರಾ ಮುಂಡ್ ಆನಿ ಪುತಾನ್ ಸ ಮುಂಡ್ ಖೊಂಡ್ಲ್ಲೆಂ ಮ್ಹಣ್ ಸಾಂಗೊನ್ ಹ್ಯಾ ಕುಟ್ಮಾಂತ್ ಆಸ್ಚೊ ಮೊಗಾಚೊ ಫರಕ್ ಯಾ ತಪಾವಾತ್ ಕವಿ ಆಮ್ಕಾಂ ದಾಕವ್ನ್ ದಿತಾ. ಬಾಪಾಯ್ ಥಾವ್ನ್ ಪುತಾಕ್ ಅರ್ಧ್ಯಾಕ್ ಅರ್ಧ್ಯಾ ತಿತ್ಲೊ ಮೊಗ್ ಉಣೊ ಜಾಲ್ಲ್ಯಾ ಕುಟ್ಮಾಂತ್ ಆಸ್ಚೆ ತೇಗ್ ಶಿಕ್ಪಿ ನಾತು ಬಾಪಯ್ ಪುತಾಚೆಂ ಉಣೆಂಪಣ್ ಪಳೆತಾಲೊ ಆನಿ ಸರ್ವ್ ದಿಶಾಂನಿ ತಾಂಕಾ ಮೆಜ್ತಾಲೊ. ಆನಿ ಹೆಂ ನಾತು ಅಬೇಸ್ ಆರ್ಯಾಕ್ ಹಾಸ್ತಾಲೆ ಮ್ಹಣ್ ಸಾಂಗೊನ್ ಲಡಾಯ್ ಯಾ ಝಗ್ಡೆಂ ಮ್ಹಳ್ಳಿ ಇಮಾಜ್ ಉಬಿ ಕೆಲ್ಯಾ. ಅಬೇಸ್ ಆರ್ಯಾಕ್ ಮ್ಹಳ್ಯಾರ್ ಮಾತಿಯೆಕ್, ಬಾಟಿಯೆಕ್, ಲಾಟ್ಯಾಕ್, ದೊರ್ಯೆಕ್ ಆನಿ ಆಕ್ರೇಖ್ ಮ್ಹನ್ಶ್ಯಾ ಮಧೆಂ ಜಾಂವ್ಚಿ ಎಕಾ ಥರಾಚೆಂ ಚಲನ್. ಬಾಪಯ್ ಆನಿ ಪುತಾ ಥಂಯ್ ಮನಸ್ತಾಪ್ ಆಸ್ಲ್ಯಾರೀ ತೆ ಮಾಲ್ಘಡೆ ಘಾಮ್ ಕಾಡ್ನ್ ಫಳಾದಿಕ್ ಶೆತ್ ಕರ್ನ್ ಕುಟ್ಮಾಚಾ ಎಕ್ವಟಾಖಾತಿರ್ ವಾಂಟೆ ಕರಿನಾಸ್ತಾಂ ಮಾಯಾಮೊಗಾನ್ಚ್ ದೆವಾಧಿನ್ ಜಾಲೆ.
ಆದ್ಲೆ ಮನಿಸ್ ಕಶೆಂ ಜಿಯೆತಾಲೆ ಆನಿ ಕಿತ್ಲ್ಯಾ ಮೊಗಾಚೆಂ ಜಿವಿತ್ ಜಿಯೆತಾಲೆ ಮ್ಹಣ್ ಕವಿನ್ ಬರೆಂ ಕರ್ನ್ ಸಾಂಗ್ಲಾಂ. ಕುಟ್ಮಾಚೊ ಎಕ್ವಟ್ ಆಶೆವ್ನ್ ಮಾಲ್ಘಡೆ ಸರ್ತಾನಾ, ಜಿವಂತ್ ಆಸ್ಲ್ಲೆ ತೇಗ್ ಶಿಕ್ಪಿ ನಾತು ಕಸಲಿಚ್ ಮುಲಾಜ್ ನಾಸ್ತಾನಾ ಘರ್ಜಾಗೊ ವಾಂಟೊ ಕರ್ನ್ ಖೊಂಡ್ಲಿಂ ತಾಣೆಂ ತೀನ್ ಬೊರ್ವೆಲಾಂ.
ಮಾಲ್ಘಡ್ಯಾಂನಿ ಖೊಂಡ್ಲ್ಲ್ಯಾ ಅಟ್ರಾ ಮುಂಡಾಚಾ ಬಾಂಯ್ತ್ ಥಾವ್ನ್ ಮಯಾಮೊಗಾಚಿ ಝರ್ ವಾಳ್ತಾಲಿ ಜಾಲ್ಯಾರ್ ಆಜ್ ನಾತ್ವಾಂನಿ ಖೊಂಡ್ಲ್ಲ್ಯಾ ತಿನ್ಶಿಂ ಪುಟಿಂಚಾ ಬೊರ್ವೆಲಾ ಥಾವ್ನ್ ವಾಳ್ತಾಲಿ ರಾಗಾಚಿ, ಕೊಡ್ತಿಚಿ, ರಗ್ತಾಚಿ ಆನಿ ಹಗ್ಯಾಚಿ ಝರ್. ದೊಳ್ಯಾಂತ್ ರಗಾತ್ ನಾತ್ಲೆಲ್ಯಾ ಪರಿಂ ಆಸ್ತಿ ಖಾತಿರ್ ದುಡ್ವಾ ಖಾತಿರ್ ಬಾಂಯ್ಚೊ ಝರಿಶಿರೊ ಕಾತ್ರುನ್ ಮ್ಹಣ್ಜೆ ಕುಟಾಮ್, ಮಾಯಾಮೊಗ್, ದಯಾ, ಎಕ್ವೊಟಾಚೆಂ ಜೀವನ್ ಮ್ಹಳ್ಳ್ಯಾ ಪರಿಧಿ ಥಾವ್ನ್ ಭಾಯ್ರ್ ಯೆವ್ನ್ ದುಸ್ಮಾನ್ಕಾಯೆಚೆಂ ಜೀವನ್ ಜಿಯೆಂವ್ಕ್ ಕಾಂಯ್ ಪಾಟಿಂ ಸರೊಂಕ್ ನಾಂತ್. ಆನಿ ಅಶೆಂ ತಾಣಿಂ ಜಿಯೆಂವ್ಕ್ ಸುರು ಕೆಲ್ಲ್ಯಾ ವಗ್ತಾ ಮಾಲ್ಘಡ್ಯಾಂನಿ ಖೊಂಡ್ಲ್ಲಿ ಬಾಂಯ್ ಸುಕೊನ್ ವಚೊಂಕ್ ಸುರು ಜಾಲ್ಲಿ ಮ್ಹಳ್ಯಾರ್ ನಾತ್ವಾಂಮಧೆಂ ಮೋಗ್ ಉಣೊ ಜಾಲ್ಲೊ ಆನಿ ದುಡ್ವಾ ಆಸ್ತಿ ಮುಕಾರ್ ತಾಂಕಾ ಮೊಗಾಚಿ ತಿತ್ಲಿ ಗರ್ಜ್ ಮ್ಹಣ್ ದಿಸೊಂಕ್ ನಾಂ.
ಮಾತ್ರ್ ನೈಂ ಆಸ್ಲ್ಯಾ ಮಾಲ್ಘಡ್ಯಾಂನಿ ಆಸಾ ಕೆಲ್ಲ್ಯಾ ಎಕ್ವೊಟಾ ಥಾವ್ನ್ ಸಂಪೂರ್ಣ್ ಥರಾನ್ ಪಯ್ಸ್ ವಚೊಂಕ್ ಆಯ್ತೆ ಜಾವ್ನ್ ವೆಗ್ಳಾಚಾರಾಚಿ ವಾಟ್ ಧರ್ನ್ ಸಾಂಗಾತಾ ಮೆಳವ್ನ್ ಮಾಲ್ಘಡ್ಯಾಂನಿ ಆಶೆಲ್ಲಿ ಮೊಗಾಝರ್ ಸಾಂಗಾತ್ ಮೆಳವ್ನ್ ಮಲ್ಘಡ್ಯಾಂನಿ ಆಶೆಲ್ಲಿ ಮೊಗಾಝರ್ ಪುರ್ತ್ಯಾ ಥರಾನ್ ಸುಕೊನ್ ಸೊಡ್ಲಿ ಮ್ಹಳ್ಯಾರ್ ಕುಟ್ಮಾಂತ್ ಆಸ್ಚೊ ಮಾಯಾಮೊಗ್ ನಪಂಯ್ಚ್ ಕರ್ನ್ ಸೊಡ್ಲೊ.
ಆತಾಂ ಹಾಂತ್ಲೊ ಏಕ್ ನಾತು ಜಾವ್ನ್ ಕವಿ ಮಯಾಮೊಗಾಚೊ ಗಾಂವ್ ಸೊಡ್ನ್ ಶಹರಾಂತ್ ವಚೊನ್ ರಾವ್ತಾಂ ಆನಿ ಮುನ್ಸಿಪಾಲಿಟಿಚೆಂ ಉದಾಕ್ ಪಿಯೆತಾಂ. ಕವಿ ಶಹರಾಂತ್ಲೊ ಮೋಗ್ ಮುನ್ಸಿಪಾಲಿಟಿಚ್ಯಾ ಉದ್ಕಾಕ್ ಸರಿ ಕರ್ತಾ, ಮುನ್ಸಿಪಾಲಿಟಿಚ್ಯಾ ಉದ್ಕಾ ವಿಶ್ಯಾಂತ್ ಆಮ್ಕಾಂ ಕೊಣಾಯ್ಕಿ ಪುರ್ತೆಂ ಸೊಡವ್ನ್ ಸಾಂಗ್ಚಿ ಗರ್ಜ್ ನಾ ಮ್ಹಣ್ ದಿಸ್ತಾ. ಮುನ್ಸಿಪಾಲಿಟಿಚ್ಯಾ ಉದ್ಕಾಕ್ ವೊರಾಂಭರ್ ರಾಕೊನ್ ರಾವಾಜಯ್ ಪಡ್ತಾ. ದೀಸ್ಭರ್ ರಾಕ್ಲ್ಲ್ಯಾ ಮಾಗಿರ್ ಸ್ಸುನಾಮಿ ಭಾಶೆನ್ 15-20 ಮಿನುಟಾಂ ಯೆಂವ್ಚೆಂ ಉದಾಕ್ ನಿತಳ್ ಆಸ್ಚೆವರ್ನಿಂ ಚಡ್ ಮ್ಹೆಳೆಂಚ್ ಆಸ್ತಾ.
ಖಂಚ್ಯಾ ಥರಾಚೊ ಮೋಗ್ ಆನಿ ಸಹಕಾರ್ ಶೆರಾಂನಿ ಮೆಳ್ತಾ ಮ್ಹಣ್ ಕವಿ ಸಾಂಗ್ತಾ. ಮುನ್ಸಿಪಾಲಿಟಿಚೆಂ ಉದಾಕ್ ಪಿಯೆವ್ನ್ ಘಡ್ಯೆಚಾ ಸುಖಾಕ್ ಆಶೆವ್ನ್ ಸರ್ವ್ ತಾತ್ಕಾಲಿಕ್ ಮ್ಹಣ್ ಸಮ್ಜಲ್ಲ್ಯಾ ಕವಿಕ್ ಆಬಾಚ್ಯಾ ಉಸ್ಕ್ಯಾರ್ ಬೊಸೊನ್ ಪಿಯೆಲ್ಲ್ಯಾ ತ್ಯಾ ಬಾಂಯ್ಚ್ಯಾ ಉದ್ಕಾಚೊ ಉಡಾಸ್ ಯೆತಾ. ಮ್ಹಳ್ಳ್ಯಾರ್ ಕವಿನ್ ಹಾಂಗಾಸರ್ ಸಾಂಗ್ತಾಕೀ ಬಾಂಯ್ಚೆಂ ಅಪುಟ್ ಝರಿಚೆಂ ಉದಾಕ್ ಪಿಯೆವ್ನ್ ವಾಡ್ಲ್ಲೊ ಮನಿಸ್ ಸಮಾಜೆಂತ್ ಆಪುಣ್ ಊಂಚ್ ಮ್ಹಣ್ ದಾಕಂವ್ಚೆ ಖಾತಿರ್ ಮುನ್ಸಿಪಾಲಿಟಿಚೆಂ ಉದಾಕ್ ಪಿಯೆವ್ನ್ ಸಮಾಧಾನೆನ್ ಜಿಯೆಂವ್ಕ್ ಸಕಾನಾ ಮ್ಹಣ್ ಕವಿ ಹ್ಯಾ ಕವಿತಾಧ್ವಾರಿಂ ಆಮ್ಕಾಂ ಸಾಂಗ್ತಾ.
ಸಂಸ್ಕೃತೆಚೆರ್ ಆರ್ಸೊ ಧರ್ಚಿ ಕವಿತಾ [ - ಜೊಮೆಲ್, ಬೊಂದೆಲ್]
’ಬಾಂಯ್’ ಕವಿತಾಧ್ವಾರಿಂ, ಕವಿ ಆಂಡ್ರು ಎಲ್. ಡಿಕುನ್ಹಾ ತಾಚಾ ಕವಿತಾ ಸಾಗೊರಾಚ್ಯಾ ಬೋವ್ ಥಳಾಕ್ ವೊಚುನ್ ಪಾವ್ಲಾ ತಶೆಂ ದಿಸ್ತಾ, ಹಿ ಅಪುರ್ಬಾಯ್ ಕವಿತಾ ಸುರು ಥಾವ್ನ್ ಆಖೇರ್ ಮ್ಹಣಾಸರ್ ’ನಿಜ್ ಉದ್ಕಾಚಿ ಬಾಂಯ್’ ವಿಶ್ಯಾಂತ್ ಉಲೈತಾ ತರ್ಯೀ, ತಿ ಖಂಡಿತ್ ಜಾವ್ನ್ಯೀ ಬಾಂಯ್ ವಿಶ್ಯಾಂತ್ ಲಿಖ್ಲ್ಲಿ ನ್ಹಯ್ ಜಾವ್ನಾಸಾ. ಆಮ್ಚಾ ಮಾಲ್ಘಡ್ಯಾಂನಿ ಪೋಸ್ ಕರುನ್ ಹಾಡ್ಲ್ಲಿ ಆಮ್ಚಿ ಸಂಸ್ಕ್ರತಿ, ಬಾಸ್ ಕಶಿ ಅಳ್ವೊನ್ ವೆತಾ, ಕಶಿ ತಿ ಎಕಾ ಚರಿತ್ರೆಚಾ ಪಾನಾಂತ್ ವಿಲೀನ್ ಜಾತಾ ಮ್ಹಣ್ ಕವಿ ತಾಚ್ಯಾ ಸೊಭಿತ್ತ್ ಉತ್ರಾಂನಿ ವರ್ಣಿತಾ.
ಆಟ್ರಾ ಮುಂಡ್ ಬಾಂಯ್ ಮ್ಹಳ್ಯಾರ್ ಖಂಡಿತ್ ಜಾವ್ನ್ ತಿ ಏಕ್ ಗೂಂಡ್ ಬಾಂಯ್, ಆನಿ ತಿಯ್ ಏಕ್ ಝರಿಚಿ ಬಾಂಯ್. ಹ್ಯಾ ಝರಿಚ್ಯಾ ಬಾಂಯ್ಚೆ ಉದಾಕ್ ಪಿಯವ್ನ್, ಮ್ಹಣ್ಜೆ ಆಮ್ಚಿ ಸಂಸ್ಕ್ರತಿ ಉಲವ್ನ್, ನೆಸೊನ್, ಪಾಂಗ್ರೊನ್ ಸರ್ವಾಂಚಿ ತಾನ್ ಭಾಗಯ್ಲ್ಯಾ, ಗಳೆ ಬಿಜಯ್ಲ್ಯಾತ್. ’ಬಾಬಾನ್ ಭಾರಾ ಮುಂಡ್ ಪುತಾನ್ ಸ ಮುಂಡ್’ ಮ್ಹಣ್ಜೆ ಮಲ್ಘಡ್ಯಾಂನಿ ಪೊಸುನ್ ಸಾಂಭಾಳುನ್ ಹಾಡ್ಲ್ಲಿ ಆಮ್ಚಿ ಸಂಸ್ಕೃತಿ ಬದಲ್ಚ್ಯಾ ’ಮೊಡರ್ನ್ ಕಾಳಾಕ್ (ಪಿಂರ್ಗಿ ಕಾಳಾರ್) ಆಮಿ ಹ್ಯಾ ಸಂಸ್ಕ್ರತೆಚೊ ಫಕತ್ತ್ ಉಡಾಸ್ ಕಾಡುನ್ ಸಂಸ್ಕ್ರತಿ ಉರಂವ್ಕ್ ಪಳೆತಾಂವ್ ಶಿವಾಯ್, ತಿ ಸಂಸ್ಕ್ರತಿ ಅಭಿವೃದ್ದಿ ಕರಿನಾಂವ್. ಆಶೆಂ ನಾತ್ವಾಂನಿ, ಮ್ಹಣ್ಜೆ ಆತಾಂಚ್ಯಾ ಪಿಳ್ಗೆನ್, ಝರಿಚ್ಯಾ ಬಾಂಯ್ಕ್ ಝರಿ ಸಮೇತ್ ಪುರುನ್ ಸೊಡ್ಲ್ಯಾ.
ಹ್ಯಾ ಸಂಸ್ಕ್ರತೆಚೊ ಹುಸ್ಕೊ ಆಸ್ಚಾ ಕವಿಕ್ ಹೆ ಆಟೆವಿಟೆ ಸೊಸಾನಾಂತ್. ಭೋವ್ ಬೆಜಾರಾಯೆನ್ ಆಸಾ. ಪೊಟಾಚಾ ಗ್ರಾಸಾಖಾತಿರ್ ಶಹರಾಂತ್ ವಾವುರ್ತಾನಾ ತಾಕಾ ಆಬಾಚ್ಯಾ ಉಸ್ಕ್ಯಾರ್ ಬೊಸೊನ್ ಪಿಯೆಲ್ಲ್ಯಾ ಆಪುಟ್ಟ್ ರುಚಿಕ್ ಉದ್ಕಾಚೊ ಉಡಾಸ್ ಯೆತಾ. ಶಹರಾಂತ್ ಚಡವತ್ ನಾ. ಚಡಾವತ್ ಜಾವ್ನ್ ಸರ್ಶಿಭರ್ಶಿ ಜಾವ್ನ್ ಆಸ್ತಾ. ಪಿಯೆಂವ್ಚೆಂ ಉದಾಕ್ಯೀ ಮುನ್ಸಿಪಾಲಿಟಿಚೆಂ ಖಂಚ್ಯಾ ತಳ್ಯಾಚೆಂಗೀ ಯಾ ಬಾಂಯ್ಚೆಂಗೀ ಕೊಣ್ಂಚ್ ನೆಣಾಂತ್, ಮ್ಹಣ್ಜೆ "ಅಪುಟ್"ಪಣ್ ನಾ. ಹೆಂ ಚಿಂತುನ್, ನಿಯಾಳುನ್ ಹ್ಯಾ ಕವಿತಾಚಿ ವಾತ್ ಝಳಯ್ತಾ.
ಕೊಂಕ್ಣಿ ಸಂಸೃತಿ ಉರಂವ್ಚೊ ಸಂಧೇಶ್ ದಿಂವ್ಚಿ ಕವಿತಾ [ - ಪ್ರಿಯಾ ಸಿಕ್ವೇರಾ, ಫೆರಾರ್]
ಬಾಂಯ್ ಆಮಿಂ ಸರ್ವಾಂನಿ ಪಳೆಲ್ಯಾ. ಕಿತ್ಲಿ ಗೂಂಡ್ ಬಾಂಯ್ ಆಸ್ತಾಗೀ ತಿತ್ಲೆಂಚ್ ಬರೆಂ ಉದಾಕ್ ಮೆಳ್ತಾ. ಹಾಂಗಾಸಾರ್ ಕವಿಕ್ ಕೊಂಕ್ಣಿ ಸಂಸ್ಕ್ರತಿ, ಭಾಸೆ ವಿಷ್ಯಾಂತ್ ಆಸ್ಚೆಂ ಆಪ್ಲೆ ಉಮಾಳೆ, ಭೊಗ್ಣಾಂ ಎಕಾ ಬಾಂಯ್ಕ್ ಸರಿ ಕರುನ್ ಭಾರೀ ಅರ್ಥಾಭರಿತ್ ಥರಾನ್ ಹ್ಯಾ ಬಾಂಯ್ ಮ್ಹಳ್ಳ್ಯಾ ಕವಿತಾದ್ವಾರಿಂ ವಿವರ್ಸಿಲಾಂ. ಹರೇಕಾ ಸಬ್ದಾಂನಿ ಕೊಂಕ್ಣಿ ಸಂಸ್ಕ್ರತಿಚಿ ಪರಿಸ್ಥಿತಿ ಧರ್ ಧರ್ ಮ್ಹಣ್ ಹ್ಯಾ ಕವಿತೆಂತ್ ದಿಸೊನ್ ಯೆತಾ. ಬಾಂಯ್ಚಿ ಇಮಾಜ್ ಮುಖಾರ್ ದವರುನ್ ಸಂಸ್ಕ್ರತೆ ವಿಷ್ಯಾಂತ್ ವಿವರ್ಸಿಲ್ಲಿ ರೀತ್ ಹ್ಯಾ ಕವಿತೆಕ್ ಸೊಬಾಯ್ ದೀಂವ್ಕ್ ಪಾವ್ಲ್ಯಾ.
ತ್ಯಾ ಆಟ್ರಾ ಮುಂಡಾಚ್ಯಾ ಝರಿಚಾ ಬಾಂಯ್ಚೆರ್ ಸರ್ವಾಂಚೆ ದೊಳೆ ಸಗ್ಳ್ಯಾ ಗಾಂವಾಚೆ ಬಿಜ್ಲೆ ಗಳೆ ಆಟ್ರಾ ಮುಂಡಾಂಚಿ ಬಾಂಯ್ ಮ್ಹಣ್ತಾನಾ ಬಾರಿಚ್ ಗೂಂಡ್ ನ್ಹಯ್ಗಿ? ಆಮ್ಚ್ಯಾ ಕೊಂಕ್ಣಿ ಸಂಸ್ಕ್ರತೆಚಿ ಪಾಳಾಂ, ಲಾಂಬ್ ಗೂಂಡಾಯೆಚಿ ಜಾವ್ನಾಸಾತ್ ಮ್ಹಣ್ ಹ್ಯಾ ಉತ್ರಾಧ್ವಾರಿಂ ಸಮ್ಜವ್ಯೆತ್. ಎಕಾ ಕಾಳಾರ್ ಅಮ್ಚಾ ಲೊಕಾಕ್ ಅಪ್ಲ್ಯಾ ಸಂಸ್ಕ್ರತೆ ವಿಷ್ಯಾಂತ್ ಅಭಿಮಾನ್, ಮೋಗ್, ಗೌರವ್ ಆಸಲ್ಲೊ. ಆನಿಂ ದುಸ್ರ್ಯಾ ಸಂಸ್ಕ್ರತೆಚಾ ಲೊಕಾಕ್ ಅಜಾಪಾಂಚೆ ಅನಿ ದೆಖಿಭರಿತ್ ಜಾವ್ನಾಸ್ಲೆ ಮ್ಹಣ್
"ಸಗ್ಳ್ಯಾ ಗಾಂವಾಚೆ ಬಿಜ್ಲೆ ಗಳೆ"
ಹಾಂಗಾಸರ್ ಕವಿ ಸಾಂಗ್ತಾ. ಖೊಂಡ್ಲ್ಲೆಂ ತಾಣಿಂ ಗುಡ್ಯಾರ್ ಕೊಸ್ಳೊಂಕ್ ಸೊಡಿನಾಸ್ತಾಂ ಕಷ್ಟಾಂನಿ ಗುಡ್ಯಾರ್ ಬಾಂಯ್ ಖೊಂಡಿಜಾಯ್ ತರ್ ತೆಂ ಸಲಭಾಯೆಚೆಂ ಕಾಮ್ ನ್ಹಂಯ್, ಕೊಸ್ಳೊಂಕ್ ಸೊಡಿನಾಸ್ತಾಂ ಕಷ್ಟಾಂನಿ ತಿ ಬಾಂಯ್ ಬಾಂಧುನ್ ಹಾಡ್ಲಿ.
ಹ್ಯೊ ಇಮಾಜ್ಯೊ ಉಬಾರುನ್ ಕವಿ ಅಶೆಂ ಸಾಂಗ್ತಾ; ವಿವಿಧ್ ಧರ್ಮಾ ಮಧೆಂ, ಭಾಶೆ ಮಧೆಂ, ಖಂಚಾಯೀ ಏಕಾ ಸಂಸ್ಕ್ರತೆನ್ ಬಳಿಷ್ಟ್ ಸ್ಥಾನ್ ಘೆಜಾಯ್ ತರ್ ಕಷ್ಟ್ ಆಸಾತ್. ಹಾಕಾ ಮಿನತ್, ಸಂಸ್ಕ್ರತೆಚೊ ಮೋಗ್, ಅಭಿಮಾನ್ ಗರ್ಜ್ ಮ್ಹಣ್ ಆಮಿಂ ಅತಾಂಚಿ ಪರಿಸ್ಥಿತಿ ಪಳೆವ್ನ್ ಸಮ್ಜೊವ್ನ್ ಘೆವ್ಯೆತ್. ಜರ್ತರ್ ಆಮ್ಚಿಂ ಕೊಂಕ್ಣಿ ಭಾಸ್, ಸಂಸ್ಕ್ರತಿ ಆತಾಂ ವಾಂಚೊನ್ ಉರೊನ್ ಉಸ್ವಾಸ್ ಸೊಡುನ್ ಆಸಾ ತರ್ ಹಾಕಾ ಕಾರಣ್ ಆಮ್ಚಾಂ ಮಾಲ್ಘಡ್ಯಾಂಚೆ ಪ್ರಯತ್ನ್. ಇಂಗ್ಲಿಶ್ ಮೀಡಿಯಮ್ ನಾತು ತೇಗ್ ಘಡ್ಯೆ ಘಡ್ಯೆ ತಿಳ್ತಾಲೆ ಗುಂಡಾಯ್ ಮೆಜ್ತಾಲೆ ಮಾತ್ಯೆಂತ್ ಖೆಳ್ತಾಲೆ ಆಭೇಸ್ ಆರ್ಯಾಕ್ ಹಾಸ್ತಾಲೆ.. ಹಾಂಗಾಸಾರ್ ಕವಿ ಅತಾಂಚೆ ಪಿಳ್ಗೆ ವಿಷ್ಯಾಂತ್ ಉಲ್ಲೇಖ್ ಕರ್ತಾ. ಆತಾಂಚಿಂ ಭುರ್ಗಿಂ ಕೊಂಕ್ಣಿ ಭಾಸ್ ಉಲಂವ್ಕ್ ನೆಣಾಂತ್. ಕೊಂಕ್ಣಿ ಸಂಸ್ಕ್ರತಿ ತಾಂಕಾ ಕಿತೆಂ ಮ್ಹಳ್ಳೆಂ ಕಳಿತ್ ನಾ.
ಸಂಸ್ಕ್ರತೆಚೊ ಅರ್ಥ್ ಯಾ ತಾಚಿ ಗುಂಡಾಯ್, ಮೋಲ್ ಕಳಿತ್ ನಾ ಬಾಂಯ್ಚ್ಯೊ ಝರಿ ಕಾತ್ರುನ್ ಆಧುನಿಕ್ ಕಾಳಾರ್ ಕಶೆಂ ಆಮ್ಚಿ ಸಂಸ್ಕ್ರತಿ ಮಾಜ್ವೊನ್ ಆಸಾ ಮ್ಹಣ್ ಕವಿ ಉಲ್ಲೇಖ್ ಕರ್ತಾ. ಫಿಂರ್ಗಿ ಭಾಶೆಚಾ ಮೊಗಾನ್, ತಿesಣeಡಿಟಿ ಸಂಸ್ಕ್ರತೆಚಾ ಪಿಶ್ಯಾರ್ ಪಡೊನ್ ಆಮ್ಚಿ ಸಂಸ್ಕ್ರತಿ ಪಿಡ್ಡ್ಯಾರ್ ಜಾವ್ನ್ ಆಸಾ. ತ್ಯಾ ಕಾಳಾರ್ ಕಾಜಾರಾಂನಿ ಆಮ್ಚಿಚ್ ಮ್ಹಳ್ಳಿ ಸಂಸ್ಕ್ರತಿ ಆಸ್ಲ್ಲಿ. ಸರ್ವ್ ಸೆಜಾರಾಂಚಿ ಸಾಂಗಾತಾ ಮೆಳೊನ್, ವೊವ್ಯೊ ವೇರ್ಸ್ ಗಾವೊನ್ ಎಕಾಚ್ಚ್ ಕುಟ್ಮಾ ಬರಿ ಸಂತೊಸ್ ಭೊಗುನ್ ವಾವ್ರ್ ಕರ್ಚೆ..
ವಾ ಕಿತ್ಲಿ ಮಜಾ ..ಪುಣ್ ಹೆಂ ಸರ್ವ್ ನಪಂಯ್ಚ್. ಪಿಂರ್ಗಿ ಸಂಸ್ಕ್ರತೆಕ್ ಆಪ್ಣಾವ್ನ್ ಆಮ್ಚಾಂ ಸಂಸ್ಕ್ರತೆಚೆ ತೀನ್ ತಿರ್ಕುಟೆ ಜಾಲ್ಯಾತ್ ಮ್ಹಣ್ ಹ್ಯಾ ವಯ್ಲ್ಯಾ ಉತ್ರಾಂಧ್ವಾರಿಂ ಸಾಂಗ್ತಾ. ಸಭಾರ್ ಲೋಕ್ ದೀಸ್ಪಡ್ತ್ಯಾ ಗ್ರಾಸಾಖಾತಿರ್ ಮಾಂಯ್ಗಾಂವ್ ಸೊಡ್ನ್ ಭಾಯ್ಲ್ಯಾ ಗಾಂವಾಂನಿ ವಾವ್ರ್ ಕರ್ತಾತ್. ಆಶೆಂ ಆಸ್ತಾಂ ಥೊಡ್ಯಾಂಕ್ ಆಪ್ಲ್ಯಾ ಸಂಸ್ಕ್ರತೆಚಿ ವಿಸರ್ ಪಡ್ಲ್ಯಾ ಜಾಂವ್ಕ್ ಪುರೊ. ಯಾ ಸಂಸ್ಕ್ರತಿ ಜಿವಿ ಉರೊಂವ್ಕ್ ಆವ್ಕಾಸ್ ಮೆಳಾನಾ ಯಾ ಕೊಂಕ್ಣಿ ಉಲಂವ್ಕ್ ಉಣೆಪಣ್.
ಕೊಂಕ್ಣಿ ಮಾಯೆಚ್ಯಾ ಉಸ್ಕಾರ್ ಖೆಳ್ಲ್ಲೆ ತೆ ದೀಸ್, ಅತಾಂ ಕೇವಲ್ ಏಕ್ ಉಡಾಸ್. ಆನಿಂ ಕವಿ ಹಾಂಗಾಸಾರ್ ತೆ ದೀಸ್ ಉಗ್ಡಾಸಾಕ್ ಹಾಡ್ನ್ ಕವಿತಾಚಿ ವಾತ್ ಝಳವ್ನ್ ಆಪ್ಣಾವರ್ವಿಂ ಕೊಂಕ್ಣಿ ಸಂಸ್ಕ್ರತೆಕ್ ಕಾಂಯ್ ಪುಣಿ ಕರಿಜಾಯ್ ಮ್ಹಳ್ಳೊ ಸಂದೇಶ್ ದಿತಾ.
ಪಾಟ್ ಸೊಡಿನಾತ್ಲ್ಲಿ ’ಬದ್ಲಾವಣ್’ [- ಐಡಾ ಡಿ’ಸಿಲ್ವಾ, ಪಾಲಡ್ಕಾ]
ಪಯ್ಲ್ಯಾ ಸುವತೆರ್ ಕವಿ ಆಂಡ್ರು ಸಾಂಗೊಂಕ್ ಅಶೆತಾ ಎಕ್ ಲ್ಹಾನ್ ಗಾಂವಾಂ ವಿಶ್ಯಾಂತ್ ಕಶೆಂ ಜಾತ್-ಕಾತ್ ಭೇದ್ ನಾಸ್ತಾಂ ಎಕಾಮೆಕಾ ಮೊಗಾನ್ ಜಿಯೆತಾತ್. ತೆಂ ಸ್ಪಸ್ಟ್ ಜಾತಾ ಕವಿಚಾ ಉತ್ರಾಂತ್ ’ಸಗ್ಳ್ಯಾ ಗಾಂವಾಂಚೆ ಬಿಜ್ಲೆ ಗಳೆ’ ಮುಕಾರುನ್ ವೆತಾನಾ ಕವಿ ಅಶೆಂ ಸಾಗ್ತಾ ’ ಪುತಾನ್ ಸ ಮುಂಡ್ ಖ್ಹೊಂಡ್ಲಿ’.. ವೊಯ್ ಪುತಾನ್ ಬಪಾಯ್ಚೆಂ ಕಾಮ್ ಮುಂದರ್ಸಿಲೆಂ ಅನಿಕಿ ತಿ ಬಾಂಯ್ ಗೂಂಡ್ ಕೆಲಿ ಅನಿ ಅಶೆಂ ಕರುನ್ ಬಾಪಾಯ್ನ್ ದಾಕಯಿಲ್ಲ್ಯಾ ವಾಟೆನ್ ಚಲ್ಚೆಂ ಪ್ರಯತ್ನ್ ಕರಿಲಾಗ್ಲೊ.
ಆಶೆಂ ತಾಣೆಂ ಸ ಮುಂಡ್ ಗೂಂಡ್ ಕೆಲ್ಯಾರಿ ತಾಕಾ ತಾಚೆ ಕಸ್ಟ್ ಕಳ್ಳೆ ಅನಿ ಅಪ್ಲ್ಯಾ ಬುರ್ಗ್ಯಾಂನಿ ತಸಲೆ ಕಸ್ಟ್ ಭೊಗ್ಚೆ ನಾಕಾತ್ ತಶೆಂ ತಾಂಕಾ ಇಂಗ್ಲಿಶ್ ಇಸ್ಕೊಲಾಕ್ ಘಾಲೆಂ. ಹಾಂಗಾಸರ್ ಅನ್ಯೆಕ್ ಸಂಗತ್ ಸ್ಪಸ್ಟ್ ಜಾತಾ ಕಿತೆಂ ಮ್ಹಳ್ಯಾರ್, ದೊನ್ ತಕ್ಲ್ಯಾಂ ಮಧೆಂ ಆಸ್ಚೊ ಚಿಂತ್ಪಾಚೊ ಫರಕ್.
ಸಂಸಾರ್ ಮುಕಾರುನ್ ಯೆತಾನಾ, ಮನಿಸ್ಯೀ ಬದ್ಲಾವಣ್ ಅಶೆತಾ. ಇಂಗ್ಲಿಶ್ ಶಿಕ್ಚಾ ನಾತ್ವಾಂಕ್ ಅಭೇಸ್ ಅರ್ಯಾಚೊ ಅರ್ಥ್ ಜಾವ್ನಾ ಜಾಲ್ಯಾರಿ ತಾಣಿಂ ತೆಂ ಅಪ್ಲ್ಯಾ ದೊಳ್ಯಾನ್ ಪಳೆಲೆಂ ಅನಿ ಸಮ್ಜನಾಸ್ತಾನಾ ಹಾಸೊಂಕ್ ಲಾಗ್ಲೆ. ಪುಣ್ ತ್ಯಾ ಹಾಸ್ಯಾಂತ್ ತಾಂಕಾ ಸಮ್ಜನಾಸ್ತಾಂಚ್ ಅಜಾಚಿ ಮಿನತ್ ಅನಿ ಬಾಪಾಯ್ಚೊ ಮೊಗ್ ತಾಂಚಾ ಕಾಳ್ಜಾಂತ್ ರಗ್ತಾಗತ್ ಜಾತಾ.
ಆಮ್ಚ್ಯಾ ಮಾಲ್ಗಡ್ಯಾನಿಂ, ಕುಟ್ಮಾಕ್, ಕುಟ್ಮಾಚಾಂ ಮೊಲಾಂಕ್ ಚಡಿತ್ ಮಹತ್ವ್ ದಿಲಾ. ತಶೆಂ ಬಾಂಯ್ಚಿ ಝರ್ ವಾಂಟೆ ಜಾಯ್ನಸ್ತಾಂ ಏಕ್ ಜಾವ್ನ್ ಉರ್ತಾ. ನಾತು ವಾಡ್ತಾನಾ ಸಂಸಾರಾಂತ್ ಅನಿಕ್ಯ್ ಬದ್ಲಾವಾಣ್ ಅಯ್ಲಿ, ತ್ಯಾ ಲ್ಹಾನ್ ಗಾಂವ್ಚೊ/ಕುಟ್ಮಾಚೊ ಲೊಕ್ ವಾಡಾತ್ತ್ ಗೆಲೊ ಅನಿ ಅಶೆಂ, ಬಾಬಾಚಿ ಅನಿ ಪುತಾಚಿ ಬಾಂಯ್ ಪಾವನಾ ಜಾತಾ ಅನಿ ಲೊಕಾಚೊ ಎಕ್ವಟ್ ಉಣೊ ಜಾಂವ್ಕ್ ಪ್ರಾರಂಭ್ ಜಾತಾ. ಹಾಕಾ ಅಮಿ ಕಿತೆಂ ಮ್ಹಣ್ಯಾಂ? ನಾತು ಹ್ಯಾ ಬದ್ಲಾವಣೆಕ್ ಕಾರಣ್ ಯಾ ಬದ್ಲಾಲ್ಲೊ ಸಂಸಾರ್ ಅನಿ ವಾಡ್ಲ್ಲ್ಯೊ ಗರ್ಜೊ???
ಮುಕಾರುನ್ ವೆತಾನಾ ಹಾಂಗಾಸರ್ ಅಮ್ಕಾ ಇಲ್ಲೆಂ ಚಿಂತುಕ್ ಅವ್ಕಾಸ್ ಜಾತಾ... ಸುಕೊನ್ ವೆಚಿ ಬಾಂಯ್ ಸುಕೊನ್ ವೆಚ್ಯಾ ಅಮ್ಚಾ ಅಸ್ತಿತ್ವಾಕ್ ಸರಿ ಕರ್ಯೆತ್? ಖಂಯ್ ಅಸ್ಲ್ಯಾರೀ ಅಮಿ ತೆಂ ಪುರುಂಕ್ ಸಕ್ತಾಂವ್!!! ಸುಕೊನ್ ವೆಚಿ ಬಾಂಯ್ ಚುಕೊನ್ ಗೆಲ್ಲ್ಯಾಂ ಅಮ್ಕಾಂ ಅನ್ಯೇಕ್ ಅವ್ಕಾಸ್ ದಿತಾ ಸಾಂಗಾತಾ ಹಾಡುಂಕ್.. ಪುಣ್ ಹಾಂಗಾಸರ್ ಹೊ ಅವ್ಕಾಸ್ ಆಮಿ ಸೊಡ್ನ್ ಘಾಲ್ತಾಂವ್. ತೆಗೀ ನಾತು ಬಾಂಯ್ ಪುರ್ತಾತ್ ಝರ್ ಸುಕ್ತಾ... ಅಸ್ತಿತ್ವಾಕ್ ಫುಮಾರ್ ಕೆಲೆಂ.
ಅಭೇಸ್ ಅರ್ಯಾಚೊ ಹಾಸೊ ಅಕ್ರೆಕ್ ತರೀ ನಾತ್ವಾಚಾ ಅಂತಸ್ಕನಾಂ ಥಾವ್ನ್ ಭಾಯ್ರ್ ಯೆತಾ ಅನಿ ಮುನ್ಸಿಪಾಲಿಟಿಚ್ಯಾ ಉದ್ಕಾಂತ್ ಝರಿಚಿ ರುಚ್ ಚಾಕ್ಚೆಂ ಪ್ರಯತ್ನ್ ಕರ್ತಾ... ಹ್ಯಾ ನಾತ್ವಾನ್ ಅಪ್ಲ್ಯಾ ಬಾಪಾಯ್ನ್ ಪುತಾ ಖ್ಹಾತಿರ್ ಪಳಯಿಲ್ಲಿಂ ಸ್ವಪ್ಣಾಂ ಜ್ಯಾರಿ ಕೆಲ್ಯಾಂತ್ ಅಸ್ತೆಲಿ, ತಶೆಂ ಅಪ್ಲ್ಯಾ ಬುರ್ಗ್ಯಾಂಕೀ ತಸಲಿಚ್ ವಾಟ್ ದಾಖಯ್ಲ್ಯಾ ಅಸ್ತೆಲಿ..
(ಹಾಂಗಾಸರ್ ಕವಿನ್ ನಾತು ಕಸಲ್ಯಾ ಸನ್ನಿವೆಶಾರ್ ಅಸಾ ತೆಂ ಸ್ಪಸ್ಟ್ ಕರುಂಕ್ನಾ. ಹೊ ನಾತು ಅತಾಂ ಮ್ಹಾತಾರೊ ಜಾಲಾ ಅಸ್ತಲೊ ಅನಿ ಅಪ್ಲಿಂ ಆಧ್ಲಿ ಜಿಣಿ ಅನಿ ತಾಂತು ಉರ್ಲಲೊ ಇಲ್ಲೊ ಉಗ್ದಾಸ್ ಪುನರ್ ಜಿವಿತ್ ಕರುಂಕ್ ಅಶೆತಾ ಅಸ್ತಲೊ.) ಆಜ್ಯಾನ್ ಅಪ್ಲೆಂ ಕರ್ತುವ್ ಜ್ಯಾರಿ ಕೆಲೆಂ, ಪುತಾನ್ ಅಪ್ಲೆಂ, ಅನಿ ನಾತ್ವಾನ್ ಅಪ್ಲೆಂ... ಹ್ಯಾ ಮಧೆಂ ಅಮ್ಚಾ ಎಕ್ವಟಾಚೆರ್ ಕಳಾನಾಸ್ತಾಂಚ್ ಫುಟ್ ಆಯ್ಲಿ ಅನಿ ಝರ್ ಪಾಚಾರೊನ್ ಗೆಲಿ...
ಹ್ಯಾ ಕವಿತೆಕ್ ಆನಿಂ ಪ್ರಸ್ತುತ್ ಪರಿಗತೆಕ್ ತುಕುನ್ ಪಳೆಂವ್ಚೆಂ ತರ್ ವೆಳಾಕಾಳಾ ಫರ್ಮಾಣೆ ಹ್ಯಾ ಸಂಸಾರಾಂತ್ ಬದ್ಲಾವಣ್ ಜಾಲ್ಯಾ ಆನಿಂ ಹಿ ಬದ್ಲಾವಣ್ ತ್ಯಾ ತ್ಯಾ ಸಂಧರ್ಭ ಪ್ರಕಾರ್ ಜಾಲ್ಯಾ. ಪ್ರಗತೆಂತ್ ಜಾಂವ್, ಮನ್ಶಾಚಾ ಚಾಲಿಂತ್ ಜಾಂವ್, ವಾ ಮನ್ಶಾಚಾ ವಿಚಾರಾಂತ್ ಜಾಂವ್ ಬದ್ಲಾವಣ್ ಜಾಲ್ಯಾ ಆನಿಂ ಪ್ರತ್ಯಕ್ಶ್ ಜಾವ್ನ್ ನ್ಹಯ್ ತರ್ಯೀ ಪರೋಕ್ಶ್ ರಿತಿನ್ ತರ್ಯ್ ಭಾಸೆಚೆರ್, ಸಂಸ್ಕೃತೆಚೆರ್ ಹಾಚೊ ಬರೊಚ್ ಪ್ರಭಾವ್ ಪಡ್ಲಾ.
ಸಂಸಾರಾಚ್ಯಾ ಬದ್ಲಾವಣೆಕ್ ಅಮಿ ಸಗ್ಳೆ ಸಾಂಪಾಡ್ಲ್ಯಾಂವ್ ತರ್ಯೀ, ಅಮ್ಚೆಂ ಸಾಂಡ್ಲೆಲೆಂ ಅಸ್ತಿತ್ವ್ ಕೆದ್ನಾಂಯ್ ಅಮ್ಚಿ ಪಾಟ್ ಸೊಡ್ಚೊನಾ ಮ್ಹಳ್ಳೊ ಏಕ್ ವಿಷಯ್ ಸ್ಪಸ್ಟ್ ಜಾತಾ.. ಹ್ಯಾ ಕವಿತೆಂತ್.
ಖೊಂಡ್ಲ್ಲೆ ತಿತ್ಲಿ ಪುರ್ವೊನ್ ವೆಚಿ ಬಾಂಯ್ [ - ವಲ್ಲಿ ಕ್ವಾಡ್ರಸ್, ಅಜೆಕಾರ್]
ಸಾಂಕೇತಿಕತಾ ಪಾಚಾರ್ಚಿ ಹಿ ಕವಿತಾ ’ಬಾಂಯ್’ ಫಕತ್ತ್ ಏಕ್ ಕವಿತಾ ಮಾತ್ರ್ ನ್ಹಯ್, ಬಗಾರ್ ಕೊಂಕ್ಣಿ ಭಾಸ್ ತಶೆಂಚ್ ಸಂಸ್ಕೃತೆಚೆರ್ ಆರ್ಸೊ ಧರ್ಚಿ ಜಾವ್ನಾಸಾ. ಕವಿ ಆಂಡ್ರು ಕೊಂಕ್ಣಿ ಭಾಸೆಕ್, ಕೊಂಕ್ಣಿ ಸಂಸ್ಕೃತೆಕ್ ಭೋವ್ ಲಾಗ್ಸಿಲ್ಯಾನ್ ವಳ್ಕೊಂಕ್ ಜಾಯ್ತ್ಯಾ ಸಂದರ್ಭಾಚೊ ಅನ್ಭೋಗ್ ಜೊಡುನ್ ಘೆತ್ಲಾ ದೆಕುನ್ ಹ್ಯಾ ಕವಿತೆಂತ್ ಎಕೆಕಾ ಉತ್ರಾಂನಿ ತಾಣೆಂ ಸತ್ಚ್ ವ್ಹಾಳಯ್ಲಾಂ;
ಬಾಂಯ್ ತಿ ಪುರ್ವಜಾಂಚಿ, ಜ್ಯಾ ಕಾಳಾರ್ ಹ್ಯಾ ಬಾಂಯ್ಚಿ ಪುಜಾ ಜಾತಾಲಿ. ಅಶೆಂ ಮೊಯಾಮೊಗಾಚೊ ಬಾಂಧ್ ಜಾಲ್ಲ್ಯಾ ಹ್ಯಾ ಬಾಂಯ್ಕ್ ಪುರ್ವಜಾಂನಿ ಗುಡ್ಯಾರ್ ತ್ಯಾ ವೊತಾಕ್ ಸೊಸುನ್ ಖೊಂಡ್ಲಿ. ಜಿತ್ಲಿ ಗೂಂಡ್ ಕೆಲಿಗೀ ತಿತ್ಲಿಚ್ ಆಳ್ಸಾಯ್ ಉಪ್ರಾಂತ್ಲ್ಯಾಂನಿ ಕೆಲಿ, ಖೊಂಡುಂಕ್ ಆಳ್ಸಾಯ್, ಆಸ್ಚೆಂ ಉದಾಕ್ ಧಾರಾಳ್ ಪುರೊ ಮ್ಹಳ್ಳೆಂ ಪಿಶೆಂ ಧಯ್ರ್.
ಆಬಾಚಾ ಕಾಳಾಥಾವ್ನ್ ದೆಂವೊನ್ ಆಯಿಲ್ಲಿ ಹಿಚ್ ಆಳ್ಸಾಯ್, ಕುಂಕುಡ್ಸೊ ಲಾಗ್ಲ್ಲ್ಯಾ ಕೊಂಬಿಯೆಚಾ ಮನೋಭಾವಾಪರಿಂ ನಿಂವೊನ್ ಆಯ್ಲೊ, ದೆಂವೊನ್ ಆಯ್ಲೊ, ಲಾಚಾರ್ ಜಾವ್ನ್ ಆಯ್ಲೊ, ಆನಿಂ ಅಸಲೊಯ್ ಏಕ್ ದೀಸ್ ಉದೆಲೊ ಅಪ್ಲ್ಯಾ ಜಲ್ಮ್ ದಿಲ್ಲ್ಯಾ ಆವಯ್ಕ್ಚ್ ವಿಣ್ಗೊ ಕರ್ಚೊ, ತಿಚೊ ಕಾತಿ ಸೊಲ್ಚೊ, ತಿಚಿಂ ಮಾಸಾಂ ಖಾಂವ್ಚೊ, ತಿಚೆಂ ರಗಾತ್ ಚಿಂವ್ಚೊ, ತಿಚಿಂ ಹಾಡಾಂ ಮೊಡ್ಚೊ.. ಆನಿಂ ಶೆರಾಂನಿ ವ್ಹಡ್ ಜಾಲ್ಲೆ ಸುಪುತ್ರ್, ನಾತು ಎಕ್ಟಾಂಯ್ ಜಾವ್ನ್ ಕಸಲಿಚ್ ದಯಾ ದಾಕ್ಶೆಣ್ ಮ್ಹಳ್ಳಿ ನಾಸ್ತಾನಾ ಬಾಂಯ್ಕ್ ಆಧುನೀಕೃತ್ (Modernisation) ಕರುಂಕ್ ಲಾಗ್ಲೆ - ಬಾಂಯ್ಚೊ ಖರೊ ಮತ್ಲಬ್ ಕಳಿತ್ ನಾಸ್ತಾನಾ - ಬಿಲ್ಕುಲ್ ಆಜ್ಕಾಲ್ಚಾಂಪರಿಂ.
ಇಂಗ್ಲಿಶ್ ಮಾಧ್ಯಮಾಚೆ ನಾತು ತಾಳ್ ಮೂಳ್ ನೆಣಾಸ್ತಾಂ ’ಅಭೇಸ್- ಆರ್ಯಾ’ ಮ್ಹಣ್ಚೆಂ ಆಯ್ಕೊನ್ ಹಾಸ್ತಾಲೆ, ಪುಣ್ ಹಾಂಕಾ ತಿ ವಿಧ್ಯಾ ದೀನಾತ್ಲ್ಲ್ಯಾ ಹಾಂಚಾ ವ್ಹಡಿಲಾಂಚೊಚ್ ಗುನ್ಯಾಂವ್ . ಆತಾಂ ಬೋರ್ವೆಲ್ ಕಾಡ್ಲ್ಯೊ ಬಾಂಯ್ಚೆ ಭಂವ್ತೊಣಿಂ, ಕೊಣಾಕ್ ಜಾಯ್ ಲಾಟ್ಯಾರ್ ಆಸ್ಚಾ ದೊರಿಯೆಂತ್ ಕೊಳ್ಚೊ ದೆಂವವ್ನ್ ಪೆಂಕಾಡ್ ಬಾಗ್ವೊನ್ ಉದಾಕ್ ವೊಡ್ಚೆ ತ್ರಾಸ್? ಬೋರ್ವೆಲ್ ಕಾಡ್ಲ್ಯೊ ಮಾತ್ರ್ ನ್ಹಯ್; ಅಖೇರಿಕ್ ಬಾಂಯ್ ಪುರ್ವಂವ್ಚೆಂ ಫರ್ಮಾಣ್ಯ್ ಆಯ್ಲೆಂ ಆನಿಂ ಅಖ್ರೇಕ್ ಬಾಂಯ್ಕ್ ಪುರ್ಲೆಂ, ಬಾಂಯ್ಕ್ ಮಾಡ್ತಿರ್ ಮಾರ್ಲೆಂ, ಬಾಂಯ್ಕ್ ಜಿವೆಂ ಜಿವೆಂ ಲಗಾಡ್ ಕಾಡ್ಲೆಂ, ನಾಸ್ ಕೆಲೆಂ.
ಬಾಂಯ್ ಮ್ಹಳ್ಯಾರ್ ಕೊಂಕ್ಣಿ ಭಾಸ್/ಸಂಸ್ಕೃತಿ, ಪುರ್ವಜ್ ಮ್ಹಳ್ಯಾರ್ ಪುರ್ವಜ್ಚ್, ಶೆರ್ ಮ್ಹಳ್ಯಾರ್ ಪ್ರಗತಿ ಯಾ ಆಧುನೀಕರಣ್. ಬೋರ್ವೆಲಾಂ ಮ್ಹಳ್ಯಾರ್ ಹೆರ್ ಭಾಸೊ/ಸಂಸೃತಿ, ನಾತು ಮ್ಹಳ್ಯಾರ್ ಆತಾಂಚಿ ಪಿಳ್ಗಿ - ಮ್ಹಳ್ಯಾರ್ ಆಮಿಂ. ಝರ್ ಮ್ಹಳ್ಯಾರ್ ಖರೆಂಪಣ್ (Reality/ಅಸ್ಲೀಯತ್).
ಭೋವ್ಶಾ ಎಕಾ ದಿಸಾ ಕೊಂಕ್ಣೆಕ್ ಜಾವ್ಯೆತ್ ಜಾಲ್ಲ್ಯಾ ಗತಿವಿಶ್ಯಾಂತ್ ಭೋವ್ ಅಪುರ್ಭಾಯೆನ್ ಪಿಂತ್ರಾಂವ್ಚೊ ಆರ್ಸೊಚ್ ಹಿ ’ಬಾಂಯ್’ ಪುಣ್ ಅಖ್ರೇಚೆಂ ಸತ್ ಮಾತ್ರ್ ಕವಿತೆಂತ್ಲ್ಯಾ ಕವಿಚೆಂ ರುದಾನ್ ಮ್ಹಾಕಾ ಸೊಸುಂಕ್ ಜಾಯ್ನಾಂ - ತ್ಯಾ ನಾತ್ವಾಂ ಪಯ್ಕಿಂತ್ಲೊ ಎಕ್ಲೊ ನಾತು ಕವಿತೆಂತ್ಲೊ ಕವಿ ಜಾವ್ನ್ ಕಿತೆಂಚ್ ಕರಿನಾ, ಬಗಾರ್ ರುದಾನ್ ಕರುನ್ ಕವಿತೆಚಿ ವಾತ್ ಝಳಯ್ತಾ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.